\id 2TH - Old Pohnpeian2 
\h Men Tesalonik II 
\toc1 EN PAULUS A KISIN LIKAU KARIAU ONG MEN TESALONIK. 
\toc2 Men Tesalonik II 
\toc3 2 Tes 
\mt2 EN PAULUS A KISIN LIKAU KARIAU ONG  
\mt1 MEN TESALONIK.  
\c 1  
\p
\v 1 PAULUS o Silwanus, o Timoteus ong momodisou en Tesalonik me ren Kot Sam atail, o atail Kaun Iesus Kristus.  
\v 2 Mak o popol sang ren Kot Sam atail o atail Kaun Iesus Kristus en mi re omail!  
\v 3 Mak eta sen poden danke Kot pweki komail, ri ai kan, pwe omail poson kin laudela kaualap, o omail limpok pena pwaida kaualap.  
\v 4 I me kit suai kin komail ong momodisou en Kot akan pweki omail kanongama o poson ni omail kalokolok o kamekam, me lel ong komail.  
\v 5 Iei me kasansal pan kadeik pung en Kot, komail ap pan kon ong wein Kot, me komail kamekamki.  
\v 6 Pwe me pung ta ong Kot en depukki ong irail me moromorouo ong komail.  
\v 7 A komail, me kalokolok, pan iang kit meleileila, ni kasale pan Kaun Iesus sang nanlang iang sapwilim a tounlang manaman akan,  
\v 8 Sansaldo ni kisiniai umpumpul, kapukapung ong irail me poponsasa Kot, o ong irail, me so peiki ong rongamau en atail Kaun Iesus Kristus.  
\v 9 O me pan lokidokilang kamekam soutuk sang mon silang en Kaun o sang mon a manaman lingan.  
\v 10 Ni a pan kotido o lingan kila sapwilim a saraui kan, ni ran o, o usun kin ir karos, me posonlar i, pwe komail kamelele atail kadede.  
\v 11 I me se kin pil poden kapakapa kin komail, pwe Kot en kotin kakonekon komail ong paeker o a kotin kaerela omail kapunglol o kapwaiada wiawia en poson ki manaman.  
\v 12 Pwe mar en atail Kaun Iesus Kristus en kalinganada re omail, o komail en konekonla re a duen mak en atail Kot o atail Kaun Iesus Kristus.   
\c 2  
\p
\v 1 SE men poeki re omail ri at akan iran atail Kaun Iesus Kristus a pan kotin pwarado, o atail pan peukedalang i,  
\v 2 Komail der wukiwuk sili o der wapon kida ngen eu, de kasoi pot, de kisin likau, me dene kit kadar wong komail, me dene ran en Kaun o mier.  
\v 3 Sota amen en kotau komail la ni meakot. Pwe ran o sota pan pwarado, lao wiawia en mas more wei sang, o aramas en dip sansal la, nain me sued.  
\v 4 Me pan palian meakaros o kasapwilada pein i, en ileila sang karos, me udan Kot de men kaudok kan, A pan mondi nan tanpas en Kot o mome ong pein i Kot.  
\v 5 Komail sota tamanda ni ai mimi re omail, i katiti ong komail mepukat?  
\v 6 Ari met komail asaer, me meakot mia, me kin kapwandela a pan pwarado.  
\v 7 A rir en sapung kan ap mur pwaida met. Ari so, a mimieta me kin kapwandela, lao a pan poioki wei sang;  
\v 8 I ansau me likin kapung o pan sansaleda, me Kaun Iesus pan kotin kame kila ang en silang i, o kawe kila lingan en a pan pwarado.  
\v 9 I me pan pwara kido mana en Satan, iangaki manaman o kilel akai o kapuriam ni likam kai.  
\v 10 O iangaki widing en sapung karos ong irail, me pan lokidokila, pwe re kang limpok ong melel, pwe ren dorela.  
\v 11 I me Kot kotin mueid ong irail ni manaman sued eu men kaping ir ada, pwe ren kamelele likam.  
\v 12 Pwe karos pan pakadeikada me so kamelele masan melel, a me mauki me sapung.  
\v 13 A mak eta, sen danke Kot ansau karos pweki komail, ri ai kompok kan, o pwe sang nin tapi o Kot me kotin pila kidar komail ong maur potopot ni saraui la pan Ngen o ni poson melel o.  
\v 14 Pwe ong mepukat a kotin molipei komail er pan at rongamau, pwe komail en pwais aneki lingan en atail Kaun Iesus Kristus.  
\v 15 Ari ri at akan, tengedi ong o apwali padak, me komail padakkier, ma sang ni kasoi de at kisin likau.  
\v 16 A pein atail Kaun Iesus Kristus o Kot o Sam atail, me pok ong kitail o kupura dong kitail kamait soutuk o kapor mau pan mak,  
\v 17 I en kamaitala mongiong omail, o katingi komail ong ni wiawia mau karos o padak.   
\c 3  
\p
\v 1 ARI ri at akan, komail kapakapa kin kit, pwe masan en Kaun o en pwaida o linganla duen a wiauier re omail.  
\v 2 O pwe kit en sapedokala sang aramas solelapok kan; pwe poson kaidin pwais en aramas karos.  
\v 3 A Kaun o me melel, me pan katenge komail o nikid sang ni me sued.  
\v 4 Se kaporoporeki Kaun o re omail, me komail kin dadaurata o pan wiada, me se kakaliki ong komail er.  
\v 5 A Kaun o en kotin wiawia mongiong omail, pwe komail en direki limpok en Kot o kanongama en Kristus.  
\v 6 Ri ai kan, se kakaliki ong komail ni mar en atail Kaun Iesus Kristus, me komail en muei sang saulang karos, me kin dadaurata padak, me komail ronger sang kit.  
\v 7 Pwe komail asa duen idedauen kit, pwe kit sota wiadar sapung nan pung omail.  
\v 8 O se sota ale sang amen kan at manga, ap sota pwaipwai, pwe se dodok apwal ni pong o ni ran, pwe sen der katoutouki amen komail.  
\v 9 A kaidin pwe a sota muei ong kit, a pwe sen wia kin kit kilel en me komail en alale sang.  
\v 10 Pwe ni at mimi re omail, iet me se kakaliki ong komail, meamen me kang wia dodok, a pil sota pan manga.  
\v 11 Pwe se ronger, me akai mi re omail, me kin weweid ni mesued ni ar solar kin dodok, a re apwali kisin tiak mal.  
\v 12 Ari, irail me due met, se indai ong o panaui irail, pan Kaun Iesus Kristus, me irail en dodok, o nenenla o tungole pein kan ar manga.  
\v 13 A komail, ri ai kan, der pangki omail wiawia mau.  
\v 14 A ma amen kang oke at padak nan kisin likau et, i me komail en kileledi, o komail der apwali i, pwe i en namenokela.  
\v 15 A komail der wiaki i imwintiti amen, a sauasa i dueta ri omail amen.  
\v 16 A Kaun en popol en pein kotiti ong komail popol ansau karos o ni song karos! Kaun o en kotikot re omail karos!  
\v 17 Ngai Paulus ranamau ni mangin pa i, me kisin likau karos kilelekidi, iduen ai inting.  
\v 18 Mak en atail Kaun Iesus Kristus en mi re omail karos!