\id OBA Pohnpeian Bible
\ide UTF-8
\h OPADAIA
\toc1 OPADAIA
\toc2 OPADAIA
\toc3 Op.
\mt1 OPADAIA
\is1 Oaralap en Pwuhk wet
\ip Pwuhk mwotomwot wet wiawihda ahnsou ehu me sohte dehde, ahpw mwurin ohlahn Serusalem ni pahr 586 mwohn Krais, ni ahnsou me mehn Edom kan imwintihtihiong Suda ni palieir; re perenkihda ohlahn Serusalem. Re ahpw isanekihla en Suda eh apwalahr oh iang kauwehla oh pirap nan kahnimwo oh sewesehda mehn liki ko me kodohn mahweniong irail. Opadaia kohpada me Edom pahn ale lokolok oh lohdi, iangahki wehi teikan me kin imwintihtihong Israel.
\iot Audepe ni Oaralap
\io1 Kalokolok ong Edom 1-14
\io1 Rahnen Kaun-o 15-21
\c 1
\p
\v 1 Met iei en Opadaia eh kokohp—dahme KAUN-O, Wasa Lapalahpie, mahsanih duwen wehin Edom.\x - \xo 1:1 \xo*\xt Ais. 34.5-17; 63.1-6; Ser.49.7-22; Esek. 25.12-14; 35.1-15; Eimw. 1. 11-12; Mal. 1.2-5.\xt*\x*
\s1 KAUN-O Pahn ketin Kaloke Edom
\q1 KAUN-O ketin kadarodo sapwellime meninkeder ong wehi kan,
\q2 oh kitail rongehr sapwellime mahsano:
\q2 “Kumwail onopada! Kitail kohla mahweniong Edom!”
\q1
\v 2 KAUN-O ketin mahsanihong Edom,
\q2 “I pahn kaluweteiukala;
\q2 aramas koaros pahn kailongkinuhkala.
\q1
\v 3 Omw aklapalap pitihiukdier.
\q1 Omw poahsoan kaun iei kelen paipalap ehu;
\q2 uhdakomw iei pohn nahna ile kan,
\q1 ke ahpw mengimengloalki,
\q2 ‘Ihs me kak keseiediong nanpwel?’
\q1
\v 4 Mehnda ma ke wiahda omw wasahn kousoan
\q2 wasa ile duwehte wasa me pesen ikel kan mie,
\q2 pwe en mwomwen mi nanpwungen usu kan,
\q1 ahpw I pahn apihiukedi.
\b
\q1
\v 5 “Ma sounpirap akan pahn kohdo nipwong,
\q2 re pahn kihsangete dahme re anahne.
\q1 Ni aramas ar kin rikpene wahn wain,
\q2 me re kin kalap luhwehkihdi me malaulau.
\q1 Ahpw omw imwintihti kan kasohreiukalahr douluhl.
\q1
\v 6 Kumwail kadaudok en Esau kan, amwail dipwisou kesempwal kan kulsangehr.
\q1
\v 7 Iengamwail kan pitihkumwaildier;
\q2 re kasareikumwailsangehr nan sapwamwail.
\q1 Aramas akan me kumwail kin ehupene ni meleilei kaloweiukdier met.
\q2 Kompoakepahmw kan me kin iang uhk mwohdehng nin tepel, wiadahr mehn lidipihiuk;
\q2 re kin nda, ‘Ia eh loalokong?’
\b
\q1
\v 8 “Ni rahn me I pahn kaloke Edom,
\q2 I pahn kamwomwala neirail aramas loalokong kan
\q2 oh kasohrehla ar kupwurokong koaros.
\q1
\v 9 Ohl dingngan kan en Teman pahn masepwehkada,
\q2 oh sounpei koaros nan Edom pahn kamakamala.
\s1 Kahrepen Edom eh pahn Kalokolok
\q1
\v 10 “Pwehki amwail pirap oh kemehla
\q2 riamwail kan,\f a \fr 1:10 \fr*\fk RIAMWAIL KAN: \fk*\ft Mehn Israel kan iei kadaudok en Seikop, me iei rien Esau, mehn Edom kan iei kadaudok en Esau.\ft*\f* me iei kadaudok en Seikop,
\q2 kumwail pahn mwomwla oh sohla wahupamwail kohkohlahte.
\q1
\v 11 Ke mihmi wasao sohte mwekid ni rahn
\q2 me imwintihti ko kauwehla ar ewen kehl kan.
\q1 Ke pil inenen suwed duwehte mehn liki pwuko
\q2 me wahsangehr dipwisou kesempwal kan en Serusalem
\q2 oh nehkpeseng nanpwungarail.
\q1
\v 12 Ke sohte pahn perenkihda
\q2 paisuwed me lelohng riomw kan nan Suda.
\q1 Ke sohte pahn perenda
\q2 ni rahn me re ohlahro.
\q1 Ke sohte pahn kouruhrkin irail
\q2 nan ar pahtoula.
\q1
\v 13 Ke sohte pahn pedolong nan en nei aramas akan ar kahnimwo
\q2 pwe ke en perenkihda ar lokolok
\q2 oh kulihasang ar kepwe kan
\q2 ni rahn me kahpwalo lelohng irail.
\q1
\v 14 Ke sohte pahn kesihnenda ni alosop kan
\q2 pwe ke en saikedi irail kan me songosong en pitla.
\q1 Ke sohte pahn pangiraillahng rehn ar imwintihti kan
\q2 ni rahn me re pahtoula.
\s1 Koht Pahn ketin wia Kopwung ong Wehi kan
\q1
\v 15 “Rahno kerendohr, me ngehi, KAUN-O,
\q2 pahn wia kopwung ong wehi koaros.
\q1 Edom, dahme ke wiadahr
\q2 pahn pil wiawihong uhk.
\q2 Ke pahn pwurehng ale dahme ke kilahr.
\q1
\v 16 Nei aramas akan nimalahr dahl katik ehu en lokolok
\q2 pohn ei dohl sarawio.\f b \fr 1:16 \fr*\ft Nahna Saion (tehk nan kawehwehpen lepin mahsen kan).\ft*\f*
\q1 Ahpw wehi koaros me kapilpene pil pahn iang nim
\q2 dahl katik en lokolok me katiksang met;
\q2 irail koaros pahn nim oh sohrala.
\s1 En Israel eh Powehdi
\p
\v 17 “Ahpw ekei pahn pitla pohn Nahna Saion,
\q2 oh wasao pahn wia wasa sarawi ehu.
\q1 Aramas en Seikop kan pahn sapwenikihla
\q2 sahpw me uhdahn arail pwung mi powe.
\q1
\v 18 Aramas en Seikop oh Sosep kan pahn duwehte kisiniei;
\q2 re pahn kamwomwala aramas en Esau kan
\q2 duwehte kisiniei eh kin kamwasikahla dihpw meng.
\q2 Sohte emen kadaudok en Esau pahn pitla.
\q1 Ngehi, KAUN-O, me mahmahsen.
\b
\q1
\v 19 “Aramas akan sang palieir en Suda pahn kousoanla Edom;
\q2 irail kan sang nin dohl kan en palikapi pahn kalowehdi Pilisdia.
\q1 Mehn Israel kan pahn sapwenikihla sapwen Epraim oh Sameria;
\q2 aramas en Pensamin kan pahn sapwenikihla Kilead.
\q1
\v 20 Karis en aramas me kalipilipasang paliepeng en Israel
\q2 pahn pwurodo oh kalowehdi Penisia oh lellahng paliepeng en Sarepad.
\q1 Me kalipilipasang Serusalem kan me mihmi nan Sardis
\q2 pahn kalowehdi kisin kahnimw kan ni palieir en Suda.
\q1
\v 21 Mehn Serusalem kan me ahneki manaman en powehdi
\q2 pahn mahweniong Edom oh kaunda.
\q1 Oh pein KAUN-O pahn wiahla nanmwarki.”