\id JON JONPOHNPEIAN Bible
\ide UTF-8
\h SONA
\toc1 SONA
\toc2 SONA
\toc3 Sona
\mt1 Pwuhken SONA
\is1 Oaralap en Pwuhk wet
\ip \bk Pwuhken Sona \bk* sohte duwehte pwuken soukohp teikan en Pwuhk Sarawi, pwe pwuhk ehu met me mihmi ni iren pwuken koasoi; eri, koasoiepen soukohp men eh mwekid kan me song en sapeikiong mahsen en Koht. Koht ketin mahsanihong en patohla Ninipe, poahsoan kaunen wehi lapalap en Asiria, me kin imwintihtiong kowahlap Israel. Ahpw Sona kahng patohla wasao wa mahsen en Koht, pwehki eh lemeleme me Koht sohte pahn ketin kapwaiada sapwellime kupwur en kauwehla kahnimwo. Mwurin wiewia kei, Sona ahpw mehnseirenla oh patopatohla; oh ni imwilah e ahpw kohnsup seren pahtoukihla mahsen en kokohp en kalokolok eh sohte pweida.
\ip Pwuhk wet kasalehda sapwellimen Koht manaman lapalap en kaunda wasa ong mehkoaros nanleng oh sampah. Ahpw mwohn mehkoaros e kasalehda duwen sapwellimen Koht limpoak oh kalahngan, pwe e kin kupwurperenki mahkohng aramas akan oh komourirailla. E sohte kin kupwurperenki kaloke de kamwomwala imwintihtien sapwellime aramas akan.
\iot Audepe ni Oaralap
\io1 Malipilip ong Sona oh eh sapeik 1.1-17
\io1 En Sona eh koluhla oh wiliakapwala 2.1-10
\io1 En Sona kalohk me uhwong Ninipe 3.1-10
\io1 Sapwellimen Koht kupwurkalahngan ong Ninipe 4.1-11
\c 1
\s1 Sona Tangasang KAUN-O
\p
\v 1 Rahn ehu KAUN-O ahpw mahsanihong Sona, nein Amidai.\x - \xo 1:1 \xo*\xt 2 Nan. 14.25.\xt*\x* 
\v 2 E mahsanih, “Kohwei Ninipe, kahnimw kalaimwuno, oh panawih irail, pwe I rongehr duwen suwed laud en aramas akan wasao.” 
\v 3 Sona ahpw tangalahng ekis wasa tohrohr pwe en tangasang KAUN-O. Ih eri kohla Sopa oh diarada sohp pwoat me pahn kolahng Spein. E ahpw pwainda eh pasis oh iangala sohpo kolahng wasao pwe en tangasang KAUN-O.
\p
\v 4 KAUN-O ahpw kamwakidkihda sehdo melimel kalaimwun ehu; melimel wet me kehlail mehlel, kahrehiong tohn sohpo ar lemeleme me sohpo pahn ohla. 
\v 5 Tohn sohpo koaros ahpw masepwehkada oh emenemen likweriongete eh koht pwe en sewese irail. Re pil kesehsang dipwisoun sohpo pwe en kamarahda. Nindokon mepwukat eh wiewiawi, Sona mihmi nan kepin sohpo wie memeir.
\p
\v 6 Kepdin en sohpo eri diarada Sona wasao, e ahpw ndaiong, “Ia duwen omw kak memeir? Pirida oh peki rehn omw Koht pwe en sewesei kitail; pwe mweinele e pahn kupwurei kitail oh kitail sohte pahn mehla.”
\p
\v 7 Tohn sohpo ahpw koasoakoasoiapene nanpwungarail, ndinda, “Kitail koadoaropwe pwe en kadiarakada ihs me kahrehiong kitail apwal wet.” Irail eri diarada me Sona. 
\v 8 Irail ahpw ndaiong, “Padahkihong kiht ihs me se pahn kapwukoahki apwal wet! Dahme ke wiewia wasaht? Mehnia wehi me ke kohsang ie? Kowe mehn ia; ia omw wehi?”
\p
\v 9 Sona ahpw sapeng irail, patohwan, “Ngehi mehn Ipru men. I kin kaudokiong KAUN-O, Koht en nanleng, me ketin kapikada sehd oh sahpw.” 
\v 10 E pil kasalehiong irail me e tangatangasang KAUN-O.
\p Tohn sohpo ahpw masepwehkada, oh padahkihong, “Meid suwed omw wiewiahn!” 
\v 11 Melimelo ahpw lalaudlahte ahnsou koaros. Tohn sohpo eri idek rehn Sona, “Dahme se pahn wiahiong uhk pwe melimelet en kak tokedi?”
\p
\v 12 Sona ahpw sapeng, patohwan, “Kumwail ale ie oh keseielahng nansedo; eri, e ahpw pahn kak mwelehdi. Pwe I ese me ngehi me kahrehiong kumwail melimel wet.”
\p
\v 13 Tohn sohpo ahpw nannantihong arail seiseilahng ni oaroahr, ahpw re sohte kak, pwehki melimelo kekehlaillahte. 
\v 14 Irail eri likweriong KAUN-O, “Maing KAUN, se peki rehmwi, komw dehr ketin kalokehkin kiht mehla ni at pahn kemehla ohl menet. Pwe komwi, Maing KAUN, me ketikihong kiht nan apwal wet, komwi me ketin wiahda soahng wet.” 
\v 15 Irail ahpw ale Sona oh keselahng nansedo. Eri, ni ahnsowohte sehdo ahpw mwadangete mwelehdi. 
\v 16 Met kahrehda tohn sohpo ar lemmwikihda KAUN-O; re ahpw wiahda meirong ehu oh wiahda ar inou me re pahn papah ih.
\p
\v 17 KAUN-O ahpw ketin kadarodo lapalahn mwahmw men pwe en kadallehla Sona. Sona ahpw mihmihki nan kapehd en mwahmwo erein rahn siluh oh pwohng silipwong.\x - \xo 1:17 \xo*\xt Mad. 12.40.\xt*\x*
\c 2
\s1 En Sona eh Kapakap
\p
\v 1 Sona ahpw kapakapohng KAUN-O, eh Koht, sang nan kapehd en mwahmwo:
\q1
\v 2 “Maing KAUN, sang nan ei apwal I likweriong komwi,
\q2 oh komwi ketin sapeng ie.
\q1 I likwersang nan wasahn me melahr akan,
\q2 oh peki sawas, oh komwi ketin karonge ie.
\q1
\v 3 Komwi ketin keseiehdilahng wasa loal,
\q2 nan kepin madau,
\q2 wasa sehd kin kapiliepene,
\q2 wasa sapwellimomwi ilok laud kan koaduhpwalihiehdi.
\q1
\v 4 I ahpw medemedewe me I pekeussangehr pahn kupwuromwi
\q2 oh I solahr pahn kak pwurehng kilang Tehnpesomwi Sarawio.
\q1
\v 5 Madau ahpw koaduhpwalihiehdi, oh komwopwiehla;
\q2 sehdo koadupwalihiehdi mehlel;
\q2 oh dipwen nansed kan kin pidpene moangeiet.
\q1
\v 6 I pil kohdilahr oh milahr pahn tepin nahna kan,
\q2 nan sahpw me eh ewen kehl kan kin rit kohkohlahte.\f a \fr 2:6 \fr*\fk SAHPW ME EH EWEN KEHL KAN KIN RIT KOHKOHLAHTE: \fk*\ft Lepin mahsen pwukat duwehte lepin mahsen me wehwehki nan wasahn me melahr akan (tehk 2.2).\ft*\f*
\q1 Ahpw komwi, Maing KAUN, ei Koht,
\q2 komwi ketin kapwureiehdahdo sang wasa loal.
\q1
\v 7 Ni ei pepehm me ei mour sosohralahr,
\q2 ahpw, Maing KAUN, I kapakapohng komwi,
\q2 oh komwi ketin karonge ie nan Tehnpasomwi Sarawi.
\q1
\v 8 Irail kan me kin pwongih dikedik en eni kan
\q2 solahr loalopwoatohng komwi.
\q1
\v 9 Ahpw I pahn koulkihong komwi koulen kaping;
\q2 I pahn wiahiong komwi meirong
\q2 oh kapwaiada dahme I inoukihong komwi.
\q1 Komour kin pwilisang rehn KAUN-O!”
\p
\v 10 KAUN-O eri mahseniong mwahmwo, oh mwahmwo ahpw mwusikillahng Sona ni oaroahr.
\c 3
\s1 Sona Peikiong KAUN-O
\p
\v 1 KAUN-O eri pil pwurehng mahsanihong Sona, 
\v 2 “Kohwei Ninipe, kahnimw kalaimwuno, oh padahkihong irail mahseno me I ketikihonguhkehr.”\fig |alt="HK-17D Ninipe" src="" size="col" ref="SONA 3.2"\fig* 
\v 3 Sona eri kapwaiada kupwur en KAUN-O, oh kohla Ninipe, kahnimw ehu me inenen kalaimwun, me aramas pahn sapasapalki erein rahn siluh ahpw lel palio kahnimwo. 
\v 4 Sona ahpw tapihada sapasapal nan kahnimwo. Eri, mwurin eh sapasapalki rahn ehu pwon, e ahpw tapihada pakairki, “Mwurin rahn pahisek kahnimw Ninipe pahn mwomwla!”\x - \xo 3:4 \xo*\xt Mad. 12.41; Luk 11.32.\xt*\x*
\p
\v 5 Tohn kahnimw Ninipe eri pwosonla mahsen en Koht. Re ahpw pwungkihda aramas koaros en kaisihsol. Eri, sang me lapalap akan lel me tikitik kan, irail koaros ahpw likawihada likoun nsensuwed, pwe en kasalehda arail koluhla.
\p
\v 6 Eri, ni nanmwarkien Ninipe eh karongehda met, e ahpw ketida sang nan mwoale, oh kesehsang sapwellime likou puhp, oh pwuhriong nan likoun nsensuwed oh ketidiong nan pehs. 
\v 7 E ahpw ketin pakairkihong tohn kahnimw Ninipe kan, “Iet kosonned ehu sang rehn nanmwarki oh sapwellime lapalap akan: sohte me pahn kang mehkot. Aramas koaros, iangahki kou kan oh sihpw kan, sohte pahn mwenge oh nimpil. 
\v 8 Aramas koaros oh mahn koaros en pwuhriong nan likoun nsensuwed. Koaros en kapakap ngidingid ong Koht, oh emenemen en mweisang tiahk suwed oh sapwung kan me e kin wiewia. 
\v 9 Mweinele Koht pahn ketin wekidala kupwure oh sohla pahn engieng; eri, kitail sohte pahn mehla.”
\p
\v 10 Eri, Koht ketin mwahngihada dahme re wiahier. E pil ketin mwahngihada ar weksang arail sapwung kan. Koht eri ketin wekidala kupwure, oh sohte ketikihong irail apwal laud me e ketin kaunopadahng irail.
\c 4
\s1 En Sona eh Lingeringer oh Kupwurkalahngan en Koht
\p
\v 1 Sona inenen nsensuwedkihla irair wet, e ahpw lingeringerda. 
\v 2 Ih eri patohwan peki rehn KAUN-O, “Maing KAUN, kaidehn iei met me I patohwanohng komwi mwohn ei mweselsang nan ei wasa, me wiawiheret? Ihme kahrehda ei nantihong I en tangalahng Spein. I ese me komwi iei Koht kalahngan oh limpoak; ahnsou koaros komwi kin ketin kanengamah oh kalahngan, oh ahnsou koaros komwi kin ketin kak wekidala kupwuromwi oh sohla kaloke aramas.\x - \xo 4:2 \xo*\xt Eks. 34.6.\xt*\x* 
\v 3 Eri, Maing KAUN, komwi ketikihweisang ei mour, pwe ei mehla mwahusang ei momour.”\x - \xo 4:3 \xo*\xt 1 Nan. 19.4.\xt*\x*
\p
\v 4 KAUN-O ahpw ketin sapeng, mahsanih, “Ia duwe, omw lingeringeren me pwung?”
\p
\v 5 Sona ahpw mweselsang nan kahnimwo oh kohla palimesehn kahnimwo oh mwohndi. E ahpw wiahda eh wasahn ruksang ketipin oh mwohndiong pahn mweteh, oh awiawih dahme pahn wiahwihong Ninipe. 
\v 6 KAUN-O, Koht, ahpw ketin kawosehda tuhke pwoat pwe Sona en mi pahn mweteh, pwe en nsenamwahu. Sona eri inenen perenkihda tuhke pwoatet. 
\v 7 Eri, mandahn rahno, ni ketipin eh pahn dakada, Koht ahpw ketin kadaralahng tuhkeo mwahs emen pwe en kamangada; tuhkeo ahpw mehla. 
\v 8 Eri, ni en ketipino eh dakehr, Koht ahpw ketin kadarodo kisinieng karakar en palimese, oh Sona kereniong lupwongmaskihla engin ketipino pohn moange. E ahpw nda, “Ei mehla mwahusang ei momour.”
\p
\v 9 Koht ahpw mahsanihong Sona, “Ia duwe, omw lingeringerki tuhkeo me pwung?”
\p Sona ahpw sapeng, patohwan, “Ei, maing. Ei lingeringeret me pwung, oh ei lingeringeret kakete kemeiehla!”
\p
\v 10 KAUN-O ahpw ketin sapeng, mahsanih, “Tuhke pwoatet keirkihda pwohngtepwong, oh pil mehla ni mandahn rahno. Ke sohte wiahiong tuhke pwoatet mehkot, ke sohte pil kakairada; ahpw ke poakehla! 
\v 11 Eri, ia uwen ei sohte pahn poakehla tohn kahnimw wet Ninipe, kahnimw kalaimwun wet me seri soh dipe kei me tohtohsang 120,000 mi loale, oh pil mahn tohtohie?”