\id HAG Pohnpeian Bible
\ide UTF-8
\h AKKAI
\toc1 AKKAI
\toc2 AKKAI
\toc3 Ak.
\mt1 AKKAI
\is1 Oaralap en Pwuhk wet
\ip \bk Pwuken Akkai \bk* iei mahsen mwotomwot kei me pwilsang rehn Kaun-o ong soukohp Akkai ni pahr 520 mwohn Krais. Mehn Israel ko pwurodohsangehr sahpw me re kalipilipala ie, re ahpw kousoanlahr sounpar kei nan Serusalem, ahpw Tehnpas Sarawio saikinte onohnda sapahl. Mahsen en soukohpo koangoangehki aramas akan en onehda sapahl Tehnpas Sarawio, oh Kaun-o ketin inoukihda me e pahn ketikidohng paiamwahu oh popohl ni ahnsou kohkohdo ong aramas akan me wiliakapwalahr oh mwakelekellahr.
\iot Audepe ni Oaralap
\io1 Kosonned en onehda sapahl Tehnpas Sarawio 1.1-15
\io1 Mahsen en koaloalamwahu oh koapworopwor 2.1-23
\c 1
\s1 Kosonned en KAUN-O ong ni Onohnsapahl en Tehnpas Sarawio
\p
\v 1 Ni keriaun sounpar me Darius wiewiahki nanmwarkien Persia, ni keieun rahnen keweneun sounpwong, KAUN-O ahpw mahsen sang rehn soukohp Akkai. Mahseno ong kepinahn Suda, Serupapel nein Sealtiel, oh ong Samworo Lapalap Sesua, nein Sehosadak.\x - \xo 1:1 \xo*\xt Esra 4.24—5.2; 6.14.\xt*\x*
\p
\v 2 KAUN-O, Wasa Lapalap, mahsanihong Akkai, “Aramas pwukat ndinda me e saikinte lel ahnsou mwahu en onehda sapahl Tehnpas Sarawio.” 
\v 3 KAUN-O eri mahsanihong soukohp Akkai en patohwanohng aramas akan: 
\v 4 “Nei aramas akan, dahme kumwail pahn mihmihki nan ihmw kaselel kan, a ei Tehnpas Sarawio ahpw pahn wiewia mohn tehnpas ehu? 
\v 5 Kumwail sohte kilang dahme wiewiawi ong kumwail? 
\v 6 Kumwail padokedi wahnsahpw tohto, ahpw dolung me malaulau. Mie kanamwail mwenge, ahpw kumwail sohte kak medkihla. Mie nimamwail wain, ahpw sohte itar kumwail en sakaukihla! Mie amwail likou, ahpw sohte itar kumwail en karakarkihda. Oh tohndoadoahk men sohte kak ale pweine me itar en mourki. 
\v 7 Kumwail sohte kak ese dahme mepwukat wiewiawihkihong kumwail? 
\v 8 Eri met, kumwail kohdahla pohn dohl kan, ale tuhke, oh onehda sapahl Tehnpas Sarawio; eri, I ahpw pahn kupwurperenda oh ale kaudok duwen me konehng.
\p
\v 9 “Kumwail kin kasik en dolung wahnsahpw laud, ahpw me malaulau me kumwail kin dolung. Oh ni amwail kin wadohng wahnsahpw akan ni imwamwail, I kin kasohrehla. Eri, dahme I wiewiahki met? Pwehki ei Tehnpas Sarawio eh wonohn ohlahr nindokon kumwail koaros kedikedirepwki koadoakoadoahkih pein imwamwail kan. 
\v 10 Ihme kahrehda eh sohte kin keteu oh wahnsahpw akan sohte kak keirda. 
\v 11 Ngehi me kupwuredahr en sohla keteu nan sahpwo—pohn dohl kan, nan mwaht akan, nan mwetin wain kan, oh nan mwetin olip kan—oh pohn mehkoaros me pwehl kin kapwarehda ong aramas oh mahn akan, pohn mehkoaros me kumwail kin song en kairada.”
\s1 Aramas akan Kapwaiada Kosonned en KAUN-O
\p
\v 12 Serupapel oh Sesua oh aramas koaros me pwurodohsangehr ar kalipilipala nan Papilonia, ahpw wiahda dahme KAUN-O ar Koht mahsanihong irail. Re lemmwikihda KAUN-O oh peikiong soukohp Akkai, sapwellimen KAUN-O meninkeder. 
\v 13 Akkai eri patohwanohng aramas akan sapwellimen KAUN-O mahsen: “I pahn ieiang kumwail—met iei ei inou.” 
\v 14 KAUN-O eri ketikihong loalen aramas koaros ineng en koadoahkih Tehnpas Sarawio: Serupapel, kepinahn Suda; Sesua, Samworo Lapalap, oh aramas koaros me pwurodohsangehr ar kalipilipala. Re ahpw tepida koadoahkih Tehnpas Sarawien KAUN-O, Wasa Lapalap, ar Koht, 
\v 15 ni rahn kerieisek pahieun keweneu en sounpwong en sounpar keriau me Darius wiewiahki nanmwarki lapalap.
\c 2
\s1 Lingan en Tehnpas Sarawio
\p
\v 1 Ni kerieisek ehu en keisuhn sounpwong en nan sounparohte, KAUN-O ahpw pwurehng mahsen sang rehn soukohp Akkai. 
\v 2 E mahsanihong Akkai en patohwanohng Serupapel, kepinahn Suda, ong Sesua, Samworo Lapalapo, oh ong aramas akan, 
\v 3 “Mie emen rehmwail me kak tamataman uwen lingan en Tehnpas Sarawi wet mahs? Ia mwomwe rahnwet ong kumwail? Likamwete solahr mwomwe.\x - \xo 2:3 \xo*\xt Esra 3.12.\xt*\x* 
\v 4 Ahpw kumwail koaruhsie dehr nan kapehd tikitikla. Kumwail doadoahk pwe I pahn ieiang kumwail. 
\v 5 Ni amwail kohdo sang Isip, I inoukihda me I pahn ieiang kumwail kohkohlahte. I ieiangkumwailte, eri kumwail dehr perki mehkot.\x - \xo 2:5 \xo*\xt Eks. 29.45-46.\xt*\x*
\p
\v 6 “Mwurin ahnsou mwotomwot I pahn itikada nanleng oh sampah, sahpw oh sehd.\x - \xo 2:6 \xo*\xt Ipru 12.26.\xt*\x* 
\v 7 I pahn kauwehla wehi koaros, oh ar dipwisou kesempwal akan pahn wisikdohng wasaht, oh Tehnpas Sarawi wet pahn direkihla dipwisou kesempwal. 
\v 8 Ngehi me sapwellimaniki silper oh kohl koaros en sampah. 
\v 9 Tehnpas Sarawi kapwo pahn lingan sang mehn mahso, oh I pahn ketikihong nei aramas akan pai oh popohl.” KAUN-O, Wasa Lapalap, me mahmahsen.
\s1 Soukohpo Rapahki Kaweid rehn Samworo ko
\p
\v 10 Ni rahn kerieisek pahieu en keduwahun sounpwong en keriaun sounpar me Darius wiewiahki nanmwarki lapalap, KAUN-O, Wasa Lapalap, pil pwurehng mahseniong soukohp Akkai. 
\v 11 E mahsanih, “Kalelapak rehn samworo kan duwen koasoandi en ire wet: 
\v 12 Ma emen pahn ale kisin uduk kis sang ni meirong ehu oh wa nan pwungipen eh likou. Ma eh likowo pahn sairada pilawa, mwenge leu, wain, lehn olip, de soangen mwenge tohrohr ehu, mwenge pwuko pahn iang sarawihla?”
\p Ni peidek wet eh wiawi, samworo ko sapengki, “Soh.”
\p
\v 13 Akkai eri kalelapak, “Ma aramas emen saminla pwehki eh sairada paliweren me mehla men. Eri, ma e sairada ehu soangen mwenge pwukat, mwenge pwukat pahn iang saminla?”\x - \xo 2:13 \xo*\xt Nemp 19.11-22.\xt*\x*
\p Samworo ko ahpw sapengki, “Ei.”
\p
\v 14 Akkai eri patohwan, “KAUN-O mahsanih me ihte soangen koasoandi wet pahn wiawihong tohn wehiet oh mehkoaros me re pahn kairada; eri, mehkoaros me re pahn kin meirongkihla pohn pei sarawi wet me samin.”
\s1 KAUN-O ketin Inoukihda Sapwellime Kupwuramwahu
\p
\v 15 KAUN-O ketin mahsanih, “Kumwail sohte kak kilang dahme wiawihong kumwail? Mwohn amwail tapihada koadoahkpen onohnsapahl en Tehnpas Sarawio, 
\v 16 kumwail kin kohla ni koasoakoasoak en wahnsahpw ehu kasikasik me kumwail pahn diar ehd rieisek, ahpw mehte eisek me kumwail kin diar. Kumwail kin kolahng ale kalon limeisek sang ni wasahn wie wain, kumwail ahpw kin diar kalonte rieisek. 
\v 17 I kadarowei kisinieng karakar oh keteu aihs takai pwehn kauwehla mehkoaros me kumwail song en kairada, ahpw kumwail sohte koluhla. 
\v 18 Rahnwet iei rahn kerieisek pahieu en keduwahun sounpwong, rahn me poahsoanen Tehnpas Sarawio kanekinekla. Eri, kumwail tehk dahme pahn wiawi sang rahnwet kohla. 
\v 19 Mehnda ma sohte wahnsahpw ehu luhwehdi, oh tuhkehn wain kan, tuhke pik kan, pohmakraneid kan, oh tuhkehn olip kan saikinte wa, ahpw sang met kohla I pahn kupwuramwahwih kumwail.”
\s1 Sapwellimen KAUN-O Inou ong Serupapel
\p
\v 20 Ni rahnohte, ni rahn kerieisek pahieun sounpwongo, KAUN-O ketikihong Akkai keriaun mahsen 
\v 21 ong Serupapel, kepinahn Suda: “I nektehn itikada nanleng oh sampah 
\v 22 oh kauwehla wehi kan oh katokihedi ar manaman. I pahn kesepwekehdi werennansapw en mahwen kan oh sountangahki kan; oahs akan pahn mehla, oh soundakeparail kan emente pahn kemehla emen. 
\v 23 Ni rahno I pahn aleiuk, Serupapel, nei ladu, oh I pahn idihiukada pwe ke en kaunda ni mwarei. Kowe me I piladahr.” KAUN-O, Wasa Lapalap, me mahmahsen.