\id 1PE Pohnpeian Bible
\ide UTF-8
\h 1 PITER
\toc1 Keieun Kisinlikou Sang Piter
\toc2 1 PITER
\toc3 1 Pit.
\mt1 Keieun Kisinlikou Sang Piter
\is1 Oaralap en Kisinlikou wet
\ip \bk Keieun kisinlikou sang Piter\bk* ntingdier ong souleng kan, me adaneki “sapwellimen Koht aramas pilipil kan”; eri, souleng pwukat koukousoanseli nan paliepeng en Eisia Tikitik. Ire keieu kesempwal en kisinlikou kiset iei koangngoangpen souleng ko, me milahr nan apwal en kamakam oh lokolok pwehki ar pwoson. Sounntingo wia met ni eh katamankihong souleng ko duwen Rongamwahu en Sises Krais, me eh pwoula, iasada, oh inoupen eh pahn ketin sapahldo kahrehiongirailehr koapworopwor laud. Pwehki irair wet, re uhdahn pahn ale oh kanengamahiong ar lokolok kan, oh wiahki kamehlelpen mehlel en ar pwoson, oh re pahn ale ketingpen pwoson wet “ni Rahn me Sises Krais pahn ketin pwarodo.”
\ip Ni eh song en kakehlaka irail ni ahnsou apwal, sounntingo pil koangngoangehkin irail re en momourki mour me uhdahn konehng sapwellimen Krais kan.
\iot Audepe ni Oaralap
\io1 Tepin kisinlikou 1.1-2
\io1 Katamanpen komour me sang rehn Koht 1.3-12
\io1 Peneu kehlail ong mour sarawi 1.13—2.10
\io1 En souleng eh pwukoa kan ni ahnsoun lokolok 2.11—4.19
\io1 En souleng eh mpahi oh papah 5.1-11
\io1 Kaimwiseklahn kisinlikou 5.12-14
\c 1
\p
\v 1 Sang Piter, wahnpoaron en Sises Krais—
\p Ong sapwellimen Koht aramas pilipil kan, me koukousoanseli duwehte mehn keiru kei, nan wehin Pondus, Kalesia, Kapadosia, Eisia oh Pidinia. 
\v 2 Kumwail pilipildahr pahn kupwur en Koht Sahm, pwe en wiahla wehi sarawi ehu sang ni kasarawihpen Ngene, oh pwe kumwail en kin peikiong Sises Krais oh mwakelekelkihla ntah.
\p Kalahngan oh popohl en unsekla mehlel rehmwail.
\s1 Mouren Koapworopwor
\p
\v 3 Kitail kapingkalahngan ong Koht, Semen atail Kaun Sises Krais, pwehki sapwellime kalahngan lapalap en mour kapw me e ketikihong kitail ni eh ketin kaiasada Sises Krais sang me melahr akan. Met kadirehkinkitaillahr koapworopwor laud ehu, 
\v 4 iei me kitail kasikasingkiher me kitail pahn iang paieki kapai laud me Koht ketin nekinekidohng sapwellime kan. Ei, e ketin nekinekidohng kumwail kapai pwukat nanleng, wasa me re sohte kak ohla, de mwerpeseng, de sohrala ie. 
\v 5 Kapai pwukat uhdahn amwail, kumwail kan me aleier silasil mwahu pahn manaman en Koht pwehki amwail pwoson, nindokon amwail awiawih komourpamwail me nektehn sansalda ni imwilahn ahnsou.
\p
\v 6 Eri, kumwail perenda, mehnda ma ahnsou wet kumwail kin diar nsensuwed ekis ahnsou sang ni soangen apwal akan me kin lelohng kumwail. 
\v 7 Pwe katepen apwal pwukat mehn kasalehda mehlel en amwail pwoson. Duwen kohl me kin kak ohla, e kin mwakelekelkihla kisiniei; eri, iei pil duwen amwail pwoson, me uhdahn kesempwalasang kohl, e uhdahn pahn pil ale sosohngpe, pwe en kakairada. Kumwail ahpw pahn alehki kaping oh lingan oh wahu ni rahn me Sises Krais pahn ketin pwarodo. 
\v 8 Mehlel me kumwail poakohng ih, mehnda ma kumwail sohte kin kilang; mehlel me kumwail kin pwoson, mehnda ma kumwail sohte kin kilang ahnsou wet. Eri, kahrehda kumwail ngisingiski amwail peren ni soangen peren ehu me aramas sohte kak kihong nin lokaia, 
\v 9 pwehki amwail aleier wahn amwail pwosonen, iei komourpen ngenomwail kan.
\p
\v 10 Ong nin duwen komour wet me soukohp ako wiahier rompe oh kalelapakpe, oh kohpadahr duwen kapai wet me Koht pahn ketikihong kumwail. 
\v 11 Re song en rapahkihda ahnsawi oh duwen eh pahn leledo; pwe Ngenen Krais me ketiket rehrail ketin idihadahr ahnsou wet ni eh ketin kohpada lokolok kan me Krais pahn ketin lokolongki oh lingan me pahn kohdo. 
\v 12 Koht ketin kasalehiong soukohp pwukat duwen arail doadoahk eh kaidehk ong ni kamwahuparail, ahpw ong ni kamwahupamwail, ni ar koasoiahda padahk mehlel kan me kumwail rongorong met. Meninkeder en Rongamwahu, iei irail me lohkiong kumwail padahk pwukat ni manaman me Ngehn Sarawi ketin kadarodo sang nanleng. Iei padahk mehlel me pil tohnleng kan kin men iang dehdehkihla.
\s1 Malipilip ong Mour Sarawi
\p
\v 13 Eri, kumwail kaunopada oh koasoanehdi mwahu amwail lamalam akan. Kumwail mwasamwasahn oh koapworopworkihte kapai kan me kumwail pahn ale ahnsou me Sises Krais pahn ketin pwarodo. 
\v 14 Kumwail peikiong Koht; soangen ineng kei mie rehmwail ahnsou me kumwail saikinte marainkihla Koht, eri, kumwail dehr mweidohng soangen ineng ko en kaunda amwail mour ahnsou wet. 
\v 15 Ahpw kumwail en sarawihla ni mehkoaros me kumwail kin wia, duwen Koht me ketin malipeikumwaildo, eh ketin sarawi. 
\v 16 Pwe Pwuhk Sarawi mahsanih, “Kumwail uhdahn pahn sarawihla, pwe ngehi, I me sarawi.” \x - \xo 1:16 \xo*\xt Lip 11.44-45; 19.2.\xt*\x*
\p
\v 17 Ni amwail kin kapakap ong Koht, kumwail kin likweriheki Samat, iei ih me kin ketin kadeingkihda aramas koaros mehn sohng teieu, nin duwen me konehng en emenemen eh wiewia kan. Eri, kumwail uhdahn pahn kin lemmwiki nindokon amwail keikeiru nin sampah wet. 
\v 18 Pwe kumwail ese soahng da me kumwail kamaiaukihda sang nan soangen mour soh-katepe me kumwail sohsohki sang rehn samamwail ko; kaidehn kepwe sohr, duwehte silper de kohl; 
\v 19 pwe meirong pweilapalap ehu, iei nta kesempwal en Krais, me iei sihmpwul mwakelekel oh sohte samin, 
\v 20 me ketin pilipildahr rehn Koht mwohn tepin kawa oh ketin kasansaldahr ni imwilahn rahn pwukat pwehki kumwail. 
\v 21 Pwehki Krais kumwail kin pwoson Koht, me ketin kaiasadahr ih sang rehn me melahr akan oh ketin kalinganalahr. Eri, amwail pwoson oh koapworopwor kin uhlahngete rehn Koht.
\p
\v 22 Eri, ni amwail kamwakeledahr pein kumwail ni amwail kin peikiong me mehlelo, oh ni amwail kin limpoak mehlel ong riamwail souleng kan, kumwail limpoakpene sang nan kapehdamwail unsek. 
\v 23 Pwe sang ni mahsen en Koht ieias oh soutuk me kumwail ipwikihdi sapahl duwehte amwail samaniki sahm emente me sohte kak mehla, kaidehk sahm men me kak mehla. 
\v 24 Duwen Pwuhk Sarawi eh mahsanih,
\q1 “Aramas koaros rasehng reh,
\q2 oh ar lingan koaros rasehng wahnrohs en nansapw akan.
\q1 Reh kan kin mengila, oh wah kan kin mweredihsang, \x - \xo 1:24 \xo*\xt Ais. 40.6-8 (LXX).\xt*\x*
\q2
\v 25 ahpw mahsen en Kaun-o kin poatopoat kohkohlahte.”
\m Ih met mahsen me Rongamwahwo kalohkihongkumwailehr.
\c 2
\s1 Takai Mour oh Wehi Sarawi
\p
\v 1 Eri, kumwail soikeweisang rehmwail soangen suwed koaros. Kumwail kesehla likamw oh mwalaun, luwak oh lokaia kepweikeng kan. 
\v 2 Kumwail duwehla seri pwelel kan, me kin ngoangkihte kang pilen dihdi mehlel en pali ngehn pwe kumwail en keirda oh mourkihla. 
\v 3 Pwe duwen Pwuhk Sarawi eh mahsanih, “Kumwail songadahr ia uwen mwahu en kalahngan en Kaun-o.” \x - \xo 2:3 \xo*\xt Mel. 34.8.\xt*\x*
\p
\v 4 Eri, kumwail patohdo rehn Kaun-o, pwe iei ih takai mour me aramas akan keselahr, e ahpw pilipildahr oh kesempwallahr mehlel rehn Koht. 
\v 5 Kumwail patohdo nin duwen takai mour kei oh kumwail mweidala pein kumwail pwe en iang wia tehnpas ehu me Ngehn Sarawi wie kakauwada, wasa me kumwail pahn wia pwihn samworo ehu me kin patohwandahng Koht meirong kan me Ngehn Sarawi kin ketin koangngoangehkin kumwail en wia ni mwaren Sises Krais me Koht pahn kin kupwurperenki. 
\v 6 Pwe Pwuhk Sarawi mahsanih,
\q1 “I piladahr takai kesempwal ehu,
\q2 me met I kihdiong en wia takaien pwukakeimw nan Saion;
\q2 eri, mehmen me pahn pwoson takai wet, sohte pahn sarohdi.” \x - \xo 2:6 \xo*\xt Ais. 28.16 (LXX).\xt*\x* 
\v 7 Takai wet me inenen kesempwal ong kumwail kan me kin pwoson; ahpw ong irail me sohte ar pwoson:
\q1 “Takai me sounkou ihmw kan mwamwahliki oh keselahr,
\q2 e wialahr takai me keieu kesempwal sang koaros.” \x - \xo 2:7 \xo*\xt Mel. 118.22.\xt*\x* 
\v 8 Oh pil ekis wasa mahsanih:
\q1 “Takai wet ih takai me aramas akan pahn dipekelekelki,
\q2 ih paip me pahn keseiraildi.”
\m Re dipekelekel pwehki ar sohte pwoson mahseno; ih duwen met kupwur en Koht ong irail. \x - \xo 2:8 \xo*\xt Ais. 8.14-15.\xt*\x*
\p
\v 9 A kumwail, kumwail wia keinek pilipil ehu, pwihn samworo en Nanmwarkio, kumwail wia wehi sarawi ehu, sapwellimen Koht aramas kei, me pilipildahng kalohkiseli wiewia kapwuriamwei kan en nin limen Koht, me ketin malipeikumwaildo sang nan rotorot ong nan sapwellime marain lingaling. \x - \xo 2:9 \xo*\xt Eks. 19.5-6; Ais. 43.20 (LXX); b Eks. 19.5; Deud. 4.20; 7.6; 14.2; Tait. 2.14; c Ais. 43.21; b Ais. 9.2.\xt*\x* 
\v 10 Mahso kaidehk kumwail sapwellimen Koht, a met kumwail wialahr uhdahn sapwellime. Mahso kumwail sohte ese kalahngan en Koht, a met kumwail aleier sapwellime kalahngan. \x - \xo 2:10 \xo*\xt Os. 2.23.\xt*\x*
\s1 Sapwellimen Koht Lidu kan
\p
\v 11 Kompoakepahi ko, I koangngoangehkin kumwail nin duwen mehn liki kei oh mehn keiru kei nin sampah wet, pwe kumwail en mweisang ineng suwed en paliwaramwail kan, me kin pelipelian ngenomwail kan ahnsou koaros. 
\v 12 Amwail tiahk kan nanpwungen me rotorot akan en kin mwahu, pwe ni ar pahn kin kinehiong kumwail likamw, me dene aramas suwed kei kumwail, eri, ni ar pahn kin kilang amwail wiewia mwahu kan, re en kapingahki Koht ni Rahnen eh pahn ketido.
\p
\v 13 Pwehki Kaun-o kumwail peikiong aramas koaros me ahneki manaman en kaunda wasa: ong nanmwarki lapalapo, me sapwellimaniki manaman unsek en wehi pokon, 
\v 14 oh ong kepina kan, me kin pekederdo sang rehn nanmwarkio pwe re en kin kapwungala aramas suwed kan oh katingih me mwahu kan. 
\v 15 Pwe ih kupwur en Koht en met: kumwail en katokihekihdi ngihl suwed en aramas pweipwei kan amwail wiewia mwahu kan. 
\v 16 Kumwail en kin mour saledek; ahpw kumwail dehpa kin doadoahngki amwail saledek pwehn wia mehn pwaindi mehkot suwed, ahpw kumwail en kin momour nin duwen lidun Koht kei. 
\v 17 Kumwail wauneki aramas koaros, poakohng riamwail souleng kan, lemmwiki Koht, oh wauneki nanmwarki lapalapo.
\s1 Kumwail Kahlemengih Lokolok en Krais
\p
\v 18 Kumwail lidu kan, kumwail uhpah amwail soumas akan oh kasalehiong irail amwail waunekin irail ni mehlel; eri, kaidehkte ong me mwahu oh kalahngan kan, pwe pil ong irail kan me kin lemei. 
\v 19 Pwe Koht pahn ketin kupwuramwahwihkin kumwail met, ma kumwail pahn kanengamahiong amwail lokolok sapwung kan, pwehki amwail ese me iei kupwur en Koht. 
\v 20 Pwe ma kumwail kin kanengamahiong kamakam me konehng amwail sapwung kan, ihs me pahn kapingai kumwail? Ahpw ma kumwail kin kanengamahiong kamakam ni amwail kin wiahda mehkot mwahu oh pwung, Koht uhdahn pahn kupwuramwawihkin kumwail. 
\v 21 Pwe ong ni met me Koht ketin malipehkinkumwaildo; pwe duwen pein Krais eh lokolongkin kumwail oh ketikihong kumwail karasepe mwahu, ih pil duwen amwail pahn idawehn oh kahlemengih. 
\v 22 Sohte sapwung ehu mie rehn Krais; sohte mwahn mahsen widing de likamw ehu me aramas rongasang nin silangi. \x - \xo 2:22 \xo*\xt Ais. 53.9.\xt*\x* 
\v 23 Ni aramas akan ar lahlahwe, e soh mwahn dupukohng irail; nan sapwellime lokolok mwuledek, e sohte angiangihada sounkamakam ko, pwe e ketin mweidalahte sapwellime koapworopwor koaros rehn Koht, Sounkadeik Pwung. \x - \xo 2:23 \xo*\xt Ais. 53.7.\xt*\x* 
\v 24 Pein Krais ketikidahng kahlepe nin lohpwuwo iangahki dipatail kan, pwe kitail en mehla sang dipatail kan oh momourki mour pwung. Sapwellime ohla kan me kamwahwihkumwaillar. \x - \xo 2:24 \xo*\xt Ais. 53.5-6 (LXX).\xt*\x* 
\v 25 Pwe mahs kumwail rasehng sihpw me salongalahr, a met kumwail sapahldohngehr rehn ih me Silepamwail oh Sounepwelpen ngenomwail kan.
\c 3
\s1 Lih Pwopwoud oh Ohl Pwopwoud kan
\p
\v 1 Pil duwehte kumwail lih pwopwoud kan, kumwail peikiong amwail pwoud kan, pwe ma ekei irail sohte pwoson mahsen en Koht, re en alehkihla pwoson amwail mouren wiewia mwahu. Kumwail sohte anahne kapahrekiong irail, \x - \xo 3:1 \xo*\xt Ep. 5.22; Kol. 3.18.\xt*\x* 
\v 2 pwe re pahn pein kilang amwail mour mwakelekel oh duwen amwail wauneki Koht. 
\v 3 Kumwail dehr kin doadoahngki kapwat en paliwar pwe en kalinganahla pein kumwail, duwehte wiepen ingihng en pitenmoang, de mwaramwar elin takai kesempwal oh kisin kohl mehn tiati, de likou kan me kumwail kin likawih. \x - \xo 3:3 \xo*\xt 1 Tim. 2.9.\xt*\x* 
\v 4 Ahpw amwail lingan en mihmi loalamwail ni mour mwakelekel en nan kapehdomwail, me iei ih lingan poatopoat ong me kin kadek oh meleilei, mepwukat me kesempwal mehlel mwohn silangin Koht. 
\v 5 Pwe ih duwen lih sarawien kawa ko, me kin koapworopworki Koht, re kin kalinganahla pein irail pwehki ar kin uhpahiong ar werek kan. 
\v 6 Ih duwen Sara, me peikiong Eipraam oh kin ekerki eh kaun. Eri, kumwail wialahr nah seri, ma kumwail pahn mour mwahu oh sohte masak mehkot. \x - \xo 3:6 \xo*\xt Sen. 18.12.\xt*\x*
\p
\v 7 Kumwail ohl pwopwoud kan pil duwehte, ni amwail pahn kin werekiong amwail pwoud kan, kumwail uhdahn pahn kin pohnese me iei irail me luwet, oh kumwail uhdahn pahn waunekin irail; pwe irail pil pahn ale kapaien mour sang rehn Koht duwehte kumwail. Kumwail pahn kin wia met pwe en dehr mie mehkot me pahn korompwa amwail kapakap akan. \x - \xo 3:7 \xo*\xt Ep. 5.25; Kol. 3.19.\xt*\x*
\s1 Lokolongki Wia me Pwung
\p
\v 8 Eri, kumwail en kin soangen lamalamteieu oh kupwurteieu; kumwail limpoakpene nin duwen souleng, oh kadekpene oh aktikitikpene. 
\v 9 Kumwail dehr dupungki me suwed ong me suwed, de lokaia suwed ong lokaia suwed; ahpw dupungkihong me suwed amwail kupwuramwahu, pwe iei kupwuramwahu me Koht ketin inoukihong kumwail ni eh ketin malipei kumwail. 
\v 10 Duwen Pwuhk Sarawi eh mahsanih,
\q1 “Mehmen me kin men nsenamwahuki mour oh rahn kaperen kan,
\q2 en perehsang ewe lokaia suwed,
\q2 oh tokedihsang lokaia likamw. \x - \xo 3:10 \xo*\xt Mel. 34.12-16 (LXX).\xt*\x*
\q1
\v 11 e uhdahn anahne mweisang me suwed oh wia me mwahu,
\q2 oh rapahki popohl ni eh kehl unsek.
\q1
\v 12 Pwe silangin Kaun-o kin mahmahsanih me pwung kan,
\q2 oh e kin karonge ar pekipek kan ahnsou koaros;
\q2 a e kin sohpeisang me kin wia me suwed.”
\p
\v 13 Ihs me kak kauweikumwailla, ma kumwail kin ngoangkihte wia dahme mwahu? 
\v 14 Ahpw ma kumwail pahn kamakamki amwail wiewia pwung kan, meid pai kumwail! Kumwail dehr masak aramas akan, oh pil dehr pwunodki mehkot. \x - \xo 3:14 \xo*\xt Mad. 5.10.\xt*\x* \x - \xo 3:14 \xo*\xt Ais. 8.12-13.\xt*\x* 
\v 15 Ahpw kumwail lemmwiki Krais nan kapehdomwail kan, oh wiahki amwail Kaun. Onopada ahnsou koaros pwe kumwail en kak sapeng mehmen me peki rehmwail kumwail en kawehwehiong koapworopwor me mi rehmwail. 
\v 16 Ahpw kumwail wia ni tiahk en kadek oh wahu. Nan kapehdomwail kan en kin mwakelekel, pwe irail kan me kin kinehiong kumwail likamw ni amwail wiewia mwahu rehn Krais, re en sarohdi oh namenengkihla ar likamw akan. 
\v 17 Pwe ma ih kupwur en Koht en iei lokolongki wiewia mwahu, e mwahusang kowahlap lokolongki wiewia sapwung. 
\v 18 Pwe Krais ketin pwoukinkumwailla; e ketin pwoukihla dipamwail kan pahn mehpak; me lelepeko wiliandi me dipan akan, pwe en ketin kaluweikumwaildohng rehn Koht. E ketin pwoula ni paliwar, e ahpw ketin ieias ni pali ngehn. 
\v 19 Oh ni pali ngene e ahpw ketidihla oh ketin kapahrekiong ngehn en me sensel kan. 
\v 20 Eri, ngehn pwukat, iei ngenen irail ko me sohte peikiong Koht, ni ahnsou me Koht ketin awiawih oh kanengamahiong irail erein ahnsou me Noha wiewia warihmwo. Irail koaros nan warihmwo me welimen oh re pitla pwehki pihlo. \x - \xo 3:20 \xo*\xt Sen. 6.1—7.24.\xt*\x* 
\v 21 Pihl wet iei sansal en pilen papidais me ahnsou wet kin komourkumwailla, e sohte kin wiawi ni tiahk en kamwakelehsang pwelen paliwar, ahpw ni inou me kin wiawihong Koht sang ni pepehm mwahu en loalen aramas. Papidais kin komourkumwailla sang ni iasadahn Sises Krais, 
\v 22 me ketidalahngehr nanleng oh ketidiongehr ni palimaun en Koht, oh ketin kakaun tohnleng koaros, me manaman akan oh me lapalap akan.
\c 4
\s1 Kawiliakapwalahn Mour
\p
\v 1 Pwehki Krais eh ketin lokolok ni paliwar, kumwail pil kehlailkihda soangen lamalamohte me e sapwellimaniki; pwe me kin lokolok ni paliwar, e sohpeisangehr dihp. 
\v 2 Eri, sang met kohla, erein luhwen amwail mour, kumwail pahn dadaurete weweidki kupwur en Koht, a kaidehk ineng en aramas. 
\v 3 Pwe ahnsou reirei en amwail mouren mahs, kumwail wiewiahier dahme me rotorot akan kin mwahuki wia. Kumwail wiadahr tiahk suwed kanamenek kei, tiahk en nenek, kamam sakau, kapehd en mwenge, kamwoaronge wasa, oh tiahk en kaudok kasaut ong dikedik en eni kan. 
\v 4 Eri, met ihme me rotorot akan pwuriamweikilahr amwail sohte kin patehng irail iang wia soangen mwoarong suwed oh kanamenek pwukat, re ahpw kin lahlahwei kumwail. 
\v 5 Ahpw re pahn wehkadahng Koht pein irail, ong Koht me pahn ketin kadeikada me momour oh me melahr akan. 
\v 6 Eri, ih kahrepen Rongamwahu eh pil kalohk ong me melahr ako, eri, irail ko me aleier kadeik ni paliwar nin duwen eh kin wiawi rehn aramas akan koaros; eri, e lohk ong irail pwe re en kak mourki mouren Koht ni pali ngehn.
\s1 Sounkohwa Mwahu en Sapwellimen Koht Kapai kan
\p
\v 7 Eri, imwin mehkoaros kerendohr. Kumwail uhdahn pahn kaunda paliwaramwail kan oh mwasamwasahn pwe kumwail en kak kapakap. 
\v 8 Mwohn mehkoaros kumwail nantihong en limpoakpene, pwe limpoak kin mahkohng soahng tohto. \x - \xo 4:8 \xo*\xt Lep. Pad 10.12; Dop 12.9.\xt*\x* 
\v 9 Kumwail ritingadahng emenemen kumwail koaros imwamwail kan, sohte mwahn kin kaulimala. 
\v 10 Emenemen kumwail, nin duwen sounkohwa mwahu en sapwellimen Koht kapai kan, en kin doadoahngki ong ni kamwahupen meteikan, kapai me e alehsangehr rehn Koht. 
\v 11 Me kin padahk, en padahkihwei mahsen en Koht; me kin papah, en papah uwen kak me Koht ketikihong, pwe kaping en kowohng Koht ni mehkoaros ni mwaren Sises Krais, me ketin sapwellimaniki wahu oh kaping erein dih koaros kohkohlahte. Amen.
\s1 Ale Lokolok nin duwen Souleng men
\p
\v 12 Kompoakepahi ko, kumwail dehr kin pwuriamweiki songosong kalok kan me kin lelohng kumwail, duwehte ma soahng wet sohte pahn kin lelohng kumwail. 
\v 13 Ahpw kumwail perenkihda amwail iang pwaisanki en Krais eh lokolok, pwe, ni sapwellime lingaling eh pahn sansalda, kumwail en pil iang perenda kowahlap. 
\v 14 Meid pai kumwail ma aramas akan lahlahwei kumwail pwehki mwaren Krais; pwe met wehwehki me Ngehn lingalingo, Ngenen Koht, ketidiongehr rehmwail. 
\v 15 Ma emen kumwail ale lokolok, kaidehn en lokolongki eh pahn kamaramas, de lipirap, de loallap suwed, de lidere en aramas teikan ar doadoahk kan. 
\v 16 Ahpw ma kumwail lokolok pwehki amwail sapwellimen Krais, kumwail dehr namenengki, ahpw kapingahki Koht amwail iang mwarenki mwaren Krais.
\p
\v 17 E leledohr ahnsoun kadeik, oh e pahn tepida sang rehn sapwellimen Koht souleng kan. Eri, ma e pahn tepida sang rehtail, ia pahn imwilahn irail kan me sohte pwoson Rongamwahwo sang rehn Koht? 
\v 18 Duwen Pwuhk Sarawi eh mahsanih,
\q1 “Me apwal mehlel ong me lelepek kan en mourla,
\q2 a dahme pahn wiawihong me seupwoson oh me dipan akan?” \x - \xo 4:18 \xo*\xt Lep. Pad 11.31 (LXX).\xt*\x* 
\v 19 Eri, irail kan me kin lokolok pwehki iei kupwur en Koht ong irail, re en likih ong Koht arail wiewia mwahu kan, ong Koht me ketin wiairailda, oh kin ketin kapwaiada sapwellime inou.
\c 5
\s1 Pwihn Sihpw en Koht
\p
\v 1 I koangngoangehkin kumwail ire ieu, kumwail me mah kan nan amwail mwomwohdiso, ngehi me pil emen me mah kan. I wiahier sounkadehdehn lokolok kan en Krais; oh I pahn iang pwaisanki lingan me pahn sansalda. Eri, I koangngoangehkin kumwail: 
\v 2 kumwail en kin wia doadoahk en silepen sihpw me Koht ketikihong kumwail, oh apwalih irail, kaidehk ni menseiren ahpw ni kupwur mwahu duwen kupwur en Koht. Kumwail wia amwail doadoahk, kaidehk pwehki amwail pahn ale pweipweiki, a pwehki amwail kin uhdahn ngoangki papah. \x - \xo 5:2 \xo*\xt Sohn 21.15-17.\xt*\x* 
\v 3 Kumwail dehr kin aksoupeidi ong irail kan me mi pahn epwelpamwail, ahpw kumwail en kin wia kahlemengipen pwihn sihpw. 
\v 4 Pwe ni Silepe Lapalapo eh pahn pwarodo, kumwail en ale mwar lingan ehu me sohte kin sohrala.
\p
\v 5 Pil duwehte kumwail me pwulopwul kan, kumwail peikiong me mah kan. Oh kumwail koaros pwuhriong nan likoun karakarahk oh uhpahpene nanpwungamwail; pwe Pwuhk Sarawi mahsanih, “Koht kin ketin pelianda me aklapalap akan, a e ketikihong sapwellime kalahngan me karakarahk kan.” \x - \xo 5:5 \xo*\xt Lep. Pad 3.34 (LXX).\xt*\x* 
\v 6 Eri, kumwail pein karakarahkala pahn nin limen Koht manaman, pwe en ketin kasapwilkumwailda ni ahnsou me konehng. \x - \xo 5:6 \xo*\xt Mad. 23.12; Luk 14.11; 18.14.\xt*\x* 
\v 7 Kumwail mweidohng ih amwail pwunod koaros, pwehki eh kin ketin apwahpwalih kumwail. \x - \xo 5:7 \xo*\xt Sir 2.1-18.\xt*\x*
\p
\v 8 Kumwail onohnop oh mwasamwasahn. Pwe amwail imwintihtio, Tepil, kin kohkohseli duwehte laion emen me kin weriwer, raparapahki ihs me e pahn kadallehla. 
\v 9 Eri, kumwail tengeteng ni amwail pwoson oh kehlail ong ih, pwe kumwail ese me riamwail souleng kan wasa koaros nin sampah kin iang kumwail mihla nan soangen lokolok me kumwail kin mihla loale. 
\v 10 Ahpw mwurin amwail lokolok pwukat en ahnsou kis, Koht en kalahngan koaros, me ketin malipeikumwaildo pwe kumwail en iang paieki sapwellime lingan ni amwail miniminiong Krais, e pahn ketin kaunsengkumwailla, kakehleikumwailda, oh poahsoaneikumwailda. 
\v 11 Ong ih manaman koaros erein dih koaros kohkohlahte. Amen.
\s1 Kaimwiseklahn Rahnmwahu
\p
\v 12 I wiadahr kisinlikou mwotomwoto kiset sang ni sawasepen Sailas, me duwen ei lamalam, uhdahn riatail souleng mehlel men. I men panawihekin kumwail oh kadehdehiong kumwail me iei met kalahngan mehlelo en Koht. Eri, kumwail dadaurete. \x - \xo 5:12 \xo*\xt Wie. 15.22, 40.\xt*\x*
\p
\v 13 Riamwail mwomwohdiso nan Papilon,\f a \fr 5:13 \fr*\fk PAPILON: \fk*\ft Papilon nan ire wet duwehte nan pwuken Kaudiahl, mweinele e wehwehki Rom.\ft*\f* me pil pilipildahr pahn kupwur en Koht, kadarowohng kumwail ar rahnmwahu, pil duwehte nei pwutak Mark. \x - \xo 5:13 \xo*\xt Wie. 12.12, 25; 13.13; 15.37-39; Kol. 4.10; Pail. 24.\xt*\x* 
\v 14 Kumwail rahnmwahupene nin duwen pirien ehu rehn Krais.
\p Popohl en ieiang kumwail koaros me mi miniminiong Krais.