\id COL - Pokomchi Occidental NT 
\h COLOSENSES 
\toc1 Reꞌ hu̱j xitzꞌihmbaj i maꞌ Lu̱ꞌ queh niminel Aj Colo̱sa 
\toc2 COLOSENSES 
\toc3 Col 
\mt2 Reꞌ hu̱j xitzꞌihmbaj i maꞌ Lu̱ꞌ queh niminel 
\mt1 Aj Colo̱sa 
\c 1  
\s1 Reꞌ cꞌalenenic riban je maꞌ Lu̱ꞌ queh niminel aj Colo̱sa 
\p  
\v 1 Reꞌ hin maꞌ Lu̱ꞌ, reꞌ Jesus reꞌ Pahbamaj chi Kꞌatal Kꞌoric, reꞌreꞌ xiripahba̱ꞌ chi aj kꞌorol riCꞌuhbal ruꞌum nok jeꞌ reꞌ camanic xa̱j i Dios chi nanibanam chiwach. Chi jeꞌ aj reꞌ, reꞌ hin chꞌi̱l i kich aj niminel Timote̱yo ribihnal, cꞌahchiꞌ nitzꞌihmbam je i hu̱j wili  
\v 2 aweh hat-tak lokꞌ laj kich aj niminel wilca̱t tak ar Colo̱sa, reꞌ nachꞌica̱ꞌ acꞌux tak chiri̱j i Jesus. Reꞌ aj wili cꞌalenenic niban je: Reꞌ ta nak ratoꞌbil eh jeꞌ woꞌ i sukquil cꞌuxlis riyew cho kAja̱w Dios chꞌi̱l i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric, reꞌ ta nak reꞌ wihꞌok pan acꞌacharic tak. 
\s1 Reꞌ ritioxjic johtok i Dios chiri̱j // quiniminic take aj Colo̱sa 
\p  
\v 3 Reꞌ hin naniban niti̱j chawi̱j tak, xa eli̱c woꞌ nitioxej johtok i Dios reꞌ rAja̱w i kAja̱w Jesus reꞌ Pahbamaj chi Kꞌatal Kꞌoric  
\v 4 ru̱cꞌ take nibiraj chiri̱j acapew-bal tak. Jeꞌ reꞌ nikꞌor maj nibiraj chi reꞌ hat-tak cow choplic acꞌux tak chiri̱j kAja̱w Jesus eh jeꞌ woꞌ nicꞌ wach nachakꞌlamej awi̱b tak cu̱cꞌ chiꞌnchel take aj niminel.  
\v 5 Reꞌ riwi̱ꞌ chi jeꞌ reꞌ naꞌn tak ruꞌum chi xa cow chic nachꞌica̱ꞌ acꞌux tak chiri̱j ricꞌuꞌljic i cuseꞌsbal reꞌ xitikꞌa̱ꞌ cho wach i Dios chi na̱cꞌulum nok wilca̱t tak chic ar pan taxa̱j. Nicꞌ wach nachawehtꞌalij tak chi na̱cꞌulum tak i cuseꞌsbal reꞌreꞌ? Ruꞌum chi xa reꞌ woꞌ naxkꞌormojic aweh tak ribiral i Jesus reꞌ hat-tak xabiraj woꞌ tak cho ribiral ruꞌ reꞌ xkꞌormojic aweh tak ru̱cꞌ i coric laj cꞌuhbal nyeꞌbic sukquil cꞌuxlis queh take quicꞌulbic reh.  
\v 6 Chiri̱j i cꞌuhbal reꞌreꞌ, reꞌ xponic rikꞌormojic awu̱cꞌ tak jeꞌ woꞌ cu̱cꞌ take toco̱m chic cꞌacharel chi junsut wach acꞌal, nwa̱j nikꞌorom chi ruꞌum reh rikꞌormojic ruꞌ, reꞌ Dios cꞌahchiꞌ ribanam chi qꞌuihal take cꞌacharel nquijal wach quinoꞌjbal. Jeꞌ aj reꞌ cꞌahchiꞌ ricꞌuluric jeꞌ ricab woꞌ xcꞌuluric awu̱cꞌ hat-tak naxabiraj tak i cꞌuhbal eh ru̱cꞌ reꞌreꞌ xarak woꞌ tak chiri̱j chi coric chi reꞌ Dios kꞌe̱ꞌ woꞌ chic richakꞌlamil cho chana̱ tak.  
\v 7 Jeꞌ aj reꞌ xarak tak chiri̱j ru̱cꞌ i cꞌuhbal chiri̱j i Jesus reꞌ Pahbamaj chi Kꞌatal Kꞌoric, reꞌ xikꞌor ribiral aweh tak i kich aj niminel maꞌ Epa̱wras ribihnal. 
\s1 Reꞌ maꞌ Lu̱ꞌ maꞌ ripit ta riti̱j // chiqui̱j niminel aj Colo̱sa 
\p Reꞌ kich aj camanom Epa̱wras reꞌ kꞌe̱ꞌ tiꞌ nkicꞌraj chipam ricamaj i Dios ruꞌum chi til chꞌiclic ricꞌux chiri̱j i Jesus chipam ricamaj cꞌahchiꞌ ribanam chaxilac tak  
\v 8 reꞌ aj reꞌ xcꞌulic kꞌorok keh hoj nicꞌ wach i cꞌaxoj i̱b naꞌn chawach tak reꞌ kꞌorel nicꞌ paꞌ wach ricoj pan awa̱mna tak i Lokꞌ laj rUxlabal i Dios.  
\v 9 Ruꞌum aj reꞌ, xa reꞌ woꞌ cho pan pe̱t ribirmijic abiral tak kꞌoro̱j keh ruꞌum maꞌ Epa̱wras, reꞌ hoj ayuꞌ maꞌ kamayam ta ribanaric kati̱j chawi̱j tak chiwach i Dios chi ripahkaljic reh chi ru̱cꞌ ta nak i manlic wach noꞌjbal chꞌi̱l manlic wach capew-bal riyew aweh tak i Lokꞌ laj Uxlabal, charak ta nak tak chiri̱j chi manlic haj wilic i raj i Dios chi na̱banam pan acꞌacharic tak.  
\v 10 Jeꞌ reꞌ pahkanic nkaꞌn pan kati̱j reh chi eticꞌacharic tak chiwach i Dios jeꞌ ricab riwi̱ꞌ chaweh tak chi eticꞌacharic tak chi anaꞌbem tak chic wach i Dios. Jeꞌ woꞌ pan kati̱j, kojpahkanic woꞌ reh chi xa ewoꞌ nponic chiwach i Dios anoꞌjbal enaꞌn tak chiwach. Jeꞌ woꞌ chic, naniban niti̱j chawi̱j tak nipahkaj woꞌ johtok chi reꞌ ribanaric holohic laj camanic chiwach i Dios qꞌuihok ta nak wach awu̱cꞌ tak jeꞌ ricab ncaꞌn take che̱ꞌ chi quiqꞌuihic johtok cu rehtal quiwachanic. Jeꞌ woꞌ, nipahkaj woꞌ chi nimbok ta nak wach awu̱cꞌ tak i noꞌjbal chi rehtꞌaljic wach i Dios chi coric.  
\v 11 Jeꞌ aj reꞌ naniban niti̱j reꞌ hin nipahkaj woꞌ chi riman chic cowsjok acꞌux pan animinic tak ru̱cꞌ rinimal rajawric i Dios. Jeꞌ reꞌ riwi̱ꞌ pahkanic niban reh chi xa ru̱cꞌ woꞌ kꞌuni̱l enachop acꞌux tak chi ricuyuric ransil chiꞌnchel xa paꞌ jaric tiꞌcꞌaxic enchalic chana̱ tak. 
\p  
\v 12 Jeꞌ woꞌ chic, reꞌ niti̱j chawi̱j tak reh chi reꞌ hat-tak xa ru̱cꞌ chic risukquil acꞌux tak enatioxej tak johtok i Dios ru̱cꞌ i rajawric maj ruꞌum reh ruꞌ, reꞌ hoj chiꞌnchel aj niminel wilic woꞌ kajawric reh chi yuꞌna nakehtric cok cuseꞌsbal kꞌoro̱j cahnok chi reꞌ hoj reꞌ wilco̱j chi ritinami̱t chic i Dios na kawihꞌic ar reꞌ wilic wi̱ꞌ i Dios chi sutumaj ri̱j chi rinimal risakomil ar pan taxa̱j.  
\v 13 Ruꞌum aj reꞌ katioxej johtok reh Dios maj reꞌreꞌ xojricoꞌlej chiwach aj Yahm naximakꞌ i rajawric wilic nak chi kana̱ i hoj chi cꞌachalco̱j nak pa rikꞌekomil i cꞌahbilal. Jeꞌ woꞌ chic, chi kunchelal i hoj aj niminel xojriyew i Dios chi riꞌsil rajawric i rAcꞌu̱n reꞌ kꞌe̱ꞌ tiꞌ ricꞌraj. 
\s1 Reꞌ Jesus ncꞌuhtunic lok wi̱ꞌ nicꞌ wach riwi̱ꞌ i kAja̱w Dios 
\p  
\v 14 Reꞌ chic rAcꞌu̱n i Dios, reꞌ Jesus ribihnal, reꞌ woꞌ reꞌ xiyew ri̱b chi quimic chiki̱j hoj chiꞌnchel cꞌacharel. Ruꞌum reh riquimic ruꞌ, reꞌ hoj aj niminel reh xojcoꞌljic chic eh maꞌ xa reꞌ ta reꞌ, chiꞌnchel laꞌ woꞌ kamahc cuyuj chic take yuꞌna ruꞌum i Dios. 
\p  
\v 15 Chiri̱j i rAcꞌu̱n i Dios nikꞌor woꞌ aweh tak take kꞌoric wili: 
\q1 Reꞌreꞌ ncꞌuhtunic lok wi̱ꞌ reꞌ nicꞌ wach riwi̱ꞌ i kAja̱w Dios reꞌ maꞌ jancꞌal ta ilo̱j wach. 
\q1 Reꞌ chic chiri̱j rajawric i Dios, xa reꞌ woꞌ Acꞌunbe̱s ncꞌuhtunic lok reh chi manlic 
\q1 ruꞌum nok reꞌ aj woꞌ reꞌ wilic rajawric china̱ nicꞌ paꞌ nimal tikꞌimaj cho. 
\q1  
\v 16 Jeꞌ woꞌ, nicꞌ paꞌ nimal take tikꞌimaj reꞌ woꞌ rAcꞌu̱n i Dios xtikꞌinic reh. 
\q1 Jeꞌ reꞌ ajic chiꞌnchel paꞌ bih wilque̱b wach acꞌal reꞌ nilmijic quiwach chꞌi̱l woꞌ take wilque̱b pan taxa̱j reꞌ maꞌ nilmijic ta quiwach, 
\q1 jeꞌ ricab nicꞌ paꞌ nimal take uxlabal reꞌ wilic cajawric, on wilic quiwaꞌric, on wilic quilokꞌil chi queh take tinamit, 
\q1 on take quichopbic na̱ chiꞌnchel take paꞌ bih nilmijic wach, on maꞌ nilmijic ta wach, 
\q1 reꞌ woꞌ rAcꞌu̱n i Dios xtikꞌinic reh eh wilque̱b woꞌ chi riyohbaljic wach ruꞌ. 
\q1  
\v 17 Jeꞌ reꞌ kꞌuruꞌ reꞌ rAcꞌu̱n i Dios xa wilic woꞌ nak chic cho nok jaꞌ quitikꞌinjic ta nicꞌ nimal take tikꞌimaj 
\q1 eh xa ruꞌum woꞌ reh rajawric chiꞌnchel quichopom qui̱b chi tuslic quiwach. 
\p  
\v 18 Jeꞌ woꞌ nikꞌor woꞌ aweh tak i wili chiri̱j i rAcꞌu̱n i Dios: 
\q1 Reꞌ woꞌ reꞌ nchoponic kana̱ hoj aj niminel jeꞌ ricab nok chi reꞌ rina̱ jenoꞌ cꞌacharel reꞌreꞌ nchoponic je reh ritiꞌjolal. 
\q1 Jeꞌ woꞌ chic, ruꞌum chi reꞌ rAcꞌu̱n i Dios reꞌ woꞌ reꞌ i pe̱t be̱h chi uctic chi quixilac take nacuctic cho chi quixilac camnak, 
\q1 reꞌ woꞌ reꞌ wilic rajawric chi riyeꞌeric woꞌ chic cꞌacharic. 
\q1 Ru̱cꞌ reꞌreꞌ, reꞌ Dios xiban chi reꞌ rAcꞌu̱n xa reꞌ woꞌ reꞌ i pe̱t be̱h wilic rajawric china̱ chiꞌnchel. 
\q1  
\v 19 Reꞌ riwi̱ꞌ chi jeꞌ reꞌ xiban ruꞌum chi reꞌ Ajabe̱s Dios xa̱j 
\q1 eh xponic chiwach chi reꞌ riminjilal i rAcꞌun wilic manlic wach. 
\q1  
\v 20 Maꞌ xa ta reꞌreꞌ, reꞌ Dios xa̱j laꞌ woꞌ chi reꞌ rAcꞌu̱n, 
\q1 reꞌreꞌ xcojbic queh pan jenaj suk laj wihꞌic ru̱cꞌ i Dios chiꞌnchel take maꞌ wilque̱b ta nak pan jenaj suk laj wihꞌic ru̱cꞌ i Dios, 
\q1 jeꞌ chi wilque̱b ar pan taxa̱j eh jeꞌ chi wilque̱b woꞌ ayuꞌ wach acꞌal. 
\q1 Nicꞌ wach riwi̱ꞌ naxiban i rAcꞌu̱n i Dios chi jeꞌ reꞌ? 
\q1 Ru̱cꞌ riquimic wach curu̱s reꞌ xichihcaj wi̱ꞌ riquiqꞌue̱l. 
\q1 Jeꞌ aj reꞌ riwi̱ꞌ ajic reꞌreꞌ xicoj chiꞌnchel take naquiniminic reh pan jenaj suk laj wihꞌic ru̱cꞌ i Dios, 
\q1  
\v 21 jeꞌ ricab xiban cho awu̱cꞌ hat-tak. 
\p Jeꞌ reꞌ nikꞌor maj najtir cho reꞌ hat-tak maꞌ wilca̱t ta nak tak pan suk laj wihꞌic ru̱cꞌ i Dios eh nawixowej nak tak wach ruꞌ ruꞌum reh anoꞌjbal tak chi ribanaric i cꞌahbilal. Raj yuꞌna maꞌ jeꞌ ta chic reꞌ awi̱ꞌ tak, xatyeꞌeric laꞌ tak pan jenaj sukquil chꞌi̱l i Dios  
\v 22 ruꞌum reh quimic xicꞌul i rAcꞌu̱n i Dios naxcꞌacharic ayuꞌ wach acꞌal. 
\p Jeꞌ reꞌ ajic reꞌ hat-tak yuꞌna wilca̱t tak chic pan suk laj wihꞌic ru̱cꞌ i Dios. Chaj camaj nok wilca̱t tak chi jeꞌ reꞌ? Reh chi reꞌ hat-tak etiwihꞌic tak chiwach i Dios chi sak wach acapew-bal tak, chi maꞌxta jenoꞌ chꞌuwaꞌ laj noꞌjbal awu̱cꞌ tak eh jeꞌ woꞌ chi maꞌxta jenoꞌ kꞌilo̱j naribanaric chawi̱j tak.  
\v 23 Reꞌ cok ruꞌ reh chi naribanam chi jeꞌ reꞌ curman chi til nimjok woꞌ take cꞌuhtunic chiri̱j i Jesus. Maꞌ xa ta reꞌreꞌ, jeꞌ laꞌ woꞌ curman chi reꞌ take lokꞌ laj cꞌuhtunic abiram tak reꞌreꞌ eh achꞌica̱b woꞌ tak acꞌux chiri̱j ru̱cꞌ chiꞌnchel awa̱mna tak, ma̱kꞌeb lok chiri̱j acꞌux tak reꞌ laꞌ chaꞌn tak riman laꞌ chic chayew acꞌux tak chiri̱j. 
\s1 Reꞌ Lokꞌ laj Ajabe̱s xpahbanic reh maꞌ Lu̱ꞌ chi aj cꞌuhbalanel 
\p Reꞌ take kꞌoric chiri̱j take lokꞌ laj cꞌuhtunic abiram tak reꞌreꞌ, reꞌ hin nikꞌor aweh tak chi reꞌ woꞌ reꞌ cꞌahchiꞌ quibiram qꞌuihal take cꞌacharel chi junsut wach acꞌal choplic quina̱ ruꞌum i kꞌatal kꞌoric aj Ro̱ma. Jeꞌ woꞌ, nikꞌor aweh tak chi reꞌ Lokꞌ laj Ajabe̱s xpahbanic wi̱n chi aj cꞌuhbalanel reh riCꞌuhbal.  
\v 24 Reꞌ aj reꞌ riwi̱ꞌ nok cꞌahchiꞌ nicꞌulum i tiꞌcꞌaxic ayuꞌ pan che̱ꞌ. Raj i hin to̱b ta nchel jeꞌ reꞌ cꞌahchiꞌ nicꞌulum kꞌe̱ꞌ nsukbic nicꞌux ruꞌum i wili: Chi reꞌ take tiꞌcꞌaxic xikꞌor i Jesus reꞌ Pahbamaj chi Kꞌatal Kꞌoric chi nanicꞌulum, reꞌ aj woꞌ reꞌ cꞌahchiꞌ nicꞌulum yuꞌna. Jeꞌ reꞌ niban ruꞌum reh acꞌuhbaljic hat-tak aj niminel reꞌ najalwachej tak ritiꞌjolal i Jesus. Jeꞌ reꞌ nikꞌor maj jeꞌ ricab chi reꞌ ritiꞌjolal i Jesus tikꞌimaj ruꞌum qꞌuihal chi bakil, jeꞌ woꞌ reꞌ nok reꞌ ritinami̱t i Dios tikꞌimaj wach ru̱cꞌ riqꞌuihal aj niminel. 
\p  
\v 25 Reꞌ aj nipahbabjic chi acꞌuhbaljic hat-tak ritinami̱t i Dios, reꞌ woꞌ Dios xtikꞌinic wach. Jeꞌ reꞌ nikꞌor maj reꞌ aj reꞌ xyeꞌbic woꞌ nicamaj chi aj ilo̱l reh acꞌacharic hat-tak aj niminel. Jeꞌ reꞌ ajic reꞌ hin, hin pahbamaj ruꞌum i Dios reh chi ru̱cꞌ lokꞌ laj riCꞌuhbal enisakomej wach aweh tak chi manlic i noꞌjbal wili:  
\v 26 Chi wilic jenaj nim wach noꞌjbal reꞌ najtir kꞌi̱j sakom xa reꞌ woꞌ cho pan chꞌiquinbal cho jarub paꞌ tahn ro̱k quicꞌacharic take cho kama̱m katiꞌt xa cu ar woꞌ cho cꞌolo̱j cho ri̱j, xa reꞌ laꞌ yuꞌna reꞌ Dios ritehem wach keh hoj nicꞌ nimal ritinami̱t.  
\v 27 Reꞌ riwi̱ꞌ chi jeꞌ reꞌ xiban reh chi reꞌ hoj nicꞌ nimal ritinami̱t enkanaꞌbej chi reꞌ noꞌjbal reꞌreꞌ, reꞌ kꞌoro̱j woꞌ queh take aj niminel jeꞌ ru̱cꞌ maꞌ reꞌ ta ra̱ꞌ riꞌsil cho maꞌ Israhel riyew keh hoj chiꞌnchel aj niminel jenaj rinimal sakom chiri̱j ribiral hab wach i Jesus. Jeꞌ woꞌ chic, reꞌreꞌ xa̱j chi nkehtꞌalij wili: Reꞌ Jesus reꞌ Pahbamaj chi Kꞌatal Kꞌoric wilic woꞌ pan ka̱mna hoj aj niminel. Chi jeꞌ aj reꞌ nok riwi̱ꞌ chaweh tak chi na̱chꞌica̱b acꞌux tak chiri̱j reh chi jeꞌ reꞌ, reꞌ nim laj sakom sutumaj wi̱ꞌ ri̱j i kAja̱w Dios narisutem woꞌ awi̱j tak natiquimok tak je. 
\p  
\v 28 Jeꞌ reꞌ nok chi kehtꞌalim chic i noꞌjbal ritehem wach i Dios chiri̱j i Jesus, reꞌ hoj aj niminel reh nkakꞌor queh chiꞌnchel quibirinic keh chi reꞌ Pahbamaj chi Kꞌatal Kꞌoric reꞌ woꞌ i Jesus eh ruꞌum chi karakam chiri̱j chi manlic i ribiral reꞌreꞌ, reꞌ hoj nakaꞌn woꞌ cꞌuhtunic, nkakꞌor queh cꞌacharel chi caꞌn i coric wach noꞌjbal. Reꞌ nka̱j chiri̱j ru̱cꞌ rikꞌormojic reꞌreꞌ, reꞌ chi naquipahꞌok chiwach i Dios, coric ok wach i noꞌjbal tijimaj wi̱ꞌ ru̱cꞌ rinimjic i Ajabe̱s Kꞌatal Kꞌoric Jesus.  
\v 29 Ruꞌum aj chi jeꞌ reꞌ nka̱j, reꞌ hin til cꞌahchiꞌ niyeb nicꞌux chipam nicamaj ru̱cꞌ rinimal rajawric i Jesus eh ruꞌum reh rajawric ruꞌ, reꞌ hin wilic woꞌ rinimal wajawric chi ribanaric take paꞌ bih niban chipam ricamaj. 
\c 2  
\nb  
\v 1 Til coric ruꞌ chi chipam nicamaj wilic rinimal wajawric eh jeꞌ woꞌ nwa̱j woꞌ chi na̱wehtꞌalim tak chi wilic woꞌ take quikꞌetbic pa̱m nibe̱h chi atobjic hat-tak aj niminel aj Colo̱sa jeꞌ woꞌ chi quitobjic take aj niminel wilque̱b ar pan tinamit Lahorise̱ya eh jeꞌ woꞌ take nicꞌ qꞌuihal take was nicha̱kꞌ maꞌ xquehtꞌalij ta niwach naxiniqꞌuic cho chaxilac tak.  
\v 2 Reꞌ cok ruꞌ to̱b ta woꞌ wilic take quikꞌetbic pa̱m nibe̱h, reꞌ hin nicuy chiꞌnchel reꞌreꞌ reh chi reꞌ hat-tak na̱cowsam acꞌux tak. Jeꞌ woꞌ, reh chi enatik tak juꞌ wihꞌic pan jenaj wach cꞌuxlis chawibil awi̱b tak ruꞌum reh ricꞌaxbal i Dios wilic pan awa̱mna tak chi jeꞌ ricab ncꞌuluric nok nrakmajic jenoꞌ bihomal, enarak tak chiri̱j chi manlic i tijinic reꞌ hat-tak tijimaj wi̱ꞌ. Ru̱cꞌ reꞌreꞌ, reꞌ hat-tak ewoꞌ nawehtꞌalij tak i nim wach noꞌjbal wili reꞌ xiteh cho wach i Dios chiri̱j i Jesus reꞌ Pahbamaj chi Kꞌatal Kꞌoric:  
\v 3 Chi jeꞌ ricab nok wilic take bihomal cꞌolo̱j pan jenoꞌ cꞌola̱b, jeꞌ woꞌ reꞌ i Dios xicꞌol woꞌ ri̱j rinoꞌjbal chꞌi̱l ricapew-bal reh chi xa reꞌ woꞌ i Jesus narisakomonic lok wach.  
\v 4 Reꞌ noꞌjbal reꞌreꞌ, reꞌ aj woꞌ reꞌ nikꞌor je aweh tak reh chi jeꞌ reꞌ maꞌ hab ta wach enjotꞌbic aweh tak ru̱cꞌ take maꞌ coric ta wach cꞌuhbalanic ncaꞌn to̱b ta laꞌ xa suk chic rikꞌormojic ncaꞌn.  
\v 5 Ruꞌum aj reꞌ chacoj tak rehtal i nikꞌor je aweh tak maj reꞌ hin nikꞌor je reꞌreꞌ ruꞌum reh capewenic niban chawi̱j tak. Coric, reꞌ hin maꞌ wilqui̱n ta chaxilac tak xa reꞌ laꞌ xa cꞌahchiꞌ woꞌ qui̱n chi capewenic chawi̱j tak chi suk nicꞌux ruꞌum wilic pa nicapew-bal nicꞌ wach naxatwilow tak cho chi xa jenaj chic wach acapew-bal tak chi richoporic acꞌux tak chiri̱j rinimjic i Jesus reꞌ Pahbamaj chi Kꞌatal Kꞌoric. Jeꞌ woꞌ reꞌ yuꞌna chi xa cu choplic woꞌ acꞌux tak chipam i niminic to̱b ta nchel maꞌ wilqui̱n ta ponok awu̱cꞌ tak.  
\v 6 Ruꞌum aj reꞌ til chꞌiclic nicꞌux chawi̱j tak, eriban chi enipahkaj aweh tak chi jeꞌ ricab i niminic xaꞌn tak naxacꞌul tak i kacꞌuhbalanic reꞌ rikꞌor chi reꞌ Lokꞌ laj Ajabe̱s Jesus reꞌ i Pahbamaj chi Kꞌatal Kꞌoric, jeꞌ ok woꞌ reꞌ niminic chaꞌn tak chi cꞌahchiꞌca̱t tak chi ritahkaljic i Jesus.  
\v 7 Chiri̱j aj woꞌ Jesus cꞌahchiꞌ achopom acꞌux tak chi cow jeꞌ ricab nok jenoꞌ che̱ꞌ rirak ricowil nano̱j jok take ritzꞌi̱ꞌ ra̱ꞌ pan acꞌal, on jeꞌ woꞌ ricab jenoꞌ pa̱t chꞌiclic chi cow nok cu pan acꞌal chꞌiquimaj cho riraꞌil. Jeꞌ ok reꞌ animinic tak kꞌuruꞌ eh chi jeꞌ reꞌ chi choplic chic acꞌux tak chi manlic chiri̱j take cꞌuhtunic hat-tak tijimaj wi̱ꞌ, maꞌ qꞌuisi̱n ta tioxonic ru̱cꞌ Dios enwihꞌic pan awa̱mna tak chi junelic. 
\s1 Reꞌ take aj niminel maꞌ nquicana̱ꞌ // chi enjotꞌoric quicapew-bal ru̱cꞌ // take toco̱m chic cꞌuhbal 
\p  
\v 8 Hat-tak wich aj niminel, ma̱cana̱ꞌ awi̱b tak chi hab wach etirijotꞌ tak ru̱cꞌ take tijinic chiri̱j i Dios jeꞌ ru̱cꞌ xa pan quicapew-bal take cꞌacharel nchalic eh maꞌxta bih jenoꞌ toꞌbonic ricꞌam cho aweh tak ruꞌum nok maꞌ ricorquilal ta nkꞌoric chiri̱j i Dios. Reꞌ take tijinic reꞌreꞌ maꞌ reꞌ ta ru̱cꞌ i Jesus reꞌ Pahbamaj chi Kꞌatal Kꞌoric xchalic rikꞌormojic xa cu̱cꞌ laꞌ take cꞌacharel xchalic chi nacaꞌnam ricꞌuhtjic on xa cu̱cꞌ take maꞌ tob laj uxlabal reꞌ wilic cajawric chi quina̱ take cꞌacharel maꞌ quiniminic ta reh i Dios.  
\v 9 Jeꞌ reꞌ kꞌuruꞌ ma̱yew awi̱b tak chi jotꞌoric ruꞌum nok reꞌ hat-tak awehtꞌalim tak chic i wili: Xa reꞌ woꞌ cho ricꞌulic i Jesus ayuꞌ wach acꞌal nok wilic chic ritiꞌjolal ribakil, reꞌ hoj nkilow chi xa reꞌ wach i Jesus i manlic wach riminjilal Dios.  
\v 10 Ruꞌum aj reꞌ manlic chic wach anoꞌjbal hat-tak, maꞌxta chic bih ra̱j mahsjic reh ruꞌum nok wilca̱t tak chic chi riꞌsil ro̱k kꞌab i Jesus reꞌ til wilic woꞌ rajawric chi quina̱ chiꞌnchel nicꞌ nimal take uxlabal wilic quiwaꞌric quilokꞌil.  
\v 11 Jeꞌ woꞌ chic, cꞌolok pan acꞌux tak chi xacꞌul tak i rehtalil reꞌ cꞌuhtumaj ruꞌum i Jesus reꞌ Pahbamaj chi Kꞌatal Kꞌoric chi hoj ritinami̱t. Reꞌ cok ruꞌ reꞌ rehtalil reꞌreꞌ maꞌ jeꞌ ta ricab i cojo̱j ruꞌum jenoꞌ cꞌacharel nkꞌatbic lok reh ritzꞌuhmal na̱ acꞌachanbal tak, reꞌ laꞌ rehtalil reꞌreꞌ ncꞌuhtunic lok ru̱cꞌ i camanic xiban i Dios naxesaj lok pan awa̱mna tak i cꞌahbilal nbanic nak chi timahcanic tak.  
\v 12 Jeꞌ reꞌ kꞌuruꞌ naxacꞌul tak i rehtalil reꞌreꞌ jeꞌ woꞌ xaꞌn woꞌ tak i kahsanic haꞌ reꞌ rijalwachej rimuhkic i Jesus. Maꞌ xa ta reꞌreꞌ xaꞌn tak jeꞌ laꞌ woꞌ ru̱cꞌ rikahsjic aha̱ꞌ tak xcꞌuluric woꞌ awu̱cꞌ tak jeꞌ ricab xcꞌuluric ru̱cꞌ i Jesus naxuctic woꞌ chic cho chi quixilac take camnak ruꞌum reh rinimal rajawric i Dios. Jeꞌ reꞌ nikꞌor maj reꞌreꞌ xuctic woꞌ chic cho chi quixilac take camnak reh chi naricꞌacharic woꞌ chi junpech. Jeꞌ woꞌ, reꞌ hat-tak naxatuctic tak cho riꞌsil haꞌ xachop tak jenaj acꞌ chic cꞌacharic ruꞌum chi xacoj tak wach chi reꞌ Dios xucsaj cho i Jesus chi quixilac camnak. 
\p  
\v 13 Coric aj ruꞌ, najtir cꞌachalca̱t nak tak pan mahc eh maꞌ awehtꞌalim ta nak tak chi hat-tak ritinami̱t i Dios, xa reꞌ laꞌ Dios xiyew aweh tak jenaj acꞌ laj cꞌacharic jeꞌ ricab xiban ru̱cꞌ rucsjic cho Jesus eh jeꞌ woꞌ xicuy xisach rinimal amahc tak.  
\v 14 Maꞌ xa reꞌ ta reꞌ xiban jeꞌ laꞌ woꞌ ruꞌum reh riquimic i Jesus naxjapꞌaric ar wach curu̱s, reꞌ hu̱j nchꞌukbic nak wach kamahc chiwach i Dios reꞌ rikꞌor wi̱ꞌ chi reꞌ hoj, hoj aj mahc xicoj lok pa reh i Dios eh ru̱cꞌ xiban reꞌreꞌ, reꞌ hu̱j reꞌreꞌ xicana̱ꞌ chi maꞌxta chic rajawric chi kana̱.  
\v 15 Jeꞌ laꞌ woꞌ ru̱cꞌ riquimic i kAja̱w Jesus, xyeꞌeric pan acꞌal i cajawric nicꞌ nimal take uxlabal reꞌ wilic cajawric quilokꞌil. Maꞌ xa ta reꞌreꞌ jeꞌ laꞌ woꞌ naxquimic wach curu̱s xicꞌuhtaj lok chi quiwach take cꞌacharel chi xiyew pa ro̱k i cajawric take chiꞌnchel uxlabal reꞌreꞌ chi reꞌreꞌ kꞌe̱ꞌ nimal wach rajawric wilic chi quiwach chiꞌnchel ruꞌ. 
\p  
\v 16 Jeꞌ aj reꞌ kꞌuruꞌ was tak nicha̱kꞌ, ruꞌum chi xa reꞌ wach i Jesus wilic rajawric chi quina̱ chiꞌnchel, ma̱cana̱ꞌ tak chi hab wach erichꞌuk kꞌoric chana̱ tak chi rikꞌormojic aweh tak haj wilic eriban on maꞌ eriban chi enacꞌux on enawuqꞌuej tak. Jeꞌ woꞌ, ma̱cana̱ꞌ tak chi hab wach erichꞌuk kꞌoric chana̱ tak chi rikꞌormojic aweh tak chi curman chi enaꞌn tak take ni̱m nkaꞌn hoj ra̱ꞌ riꞌsil cho maꞌ Israhel jeꞌ ricab take nkaꞌn eli̱c juꞌjun ha̱b, on eli̱c juꞌjun poh nok riban xa coten chic i poh, on reꞌ nkaꞌn chiwach i hiꞌlbal kꞌi̱j reh juꞌjun xama̱na.  
\v 17 Jeꞌ reꞌ nikꞌor maj jeꞌ ricab chi reꞌ jenoꞌ nachbal xa ricꞌuhtaj keh chi wilic jenoꞌ hab wach rijil cho ri̱b, jeꞌ woꞌ reꞌ ru̱cꞌ i wiꞌc chꞌi̱l i haꞌ chꞌi̱l woꞌ take ni̱m nkaꞌn reh chi maꞌxta nak chic riwihꞌic kamahc, reꞌ take reꞌ xa xquicꞌuhtaj keh hoj ra̱ꞌ riꞌsil cho maꞌ Israhel chi wilic jenaj naricꞌulic lok chi risacharic wach kamahc eh reꞌ til xkilow chi xcꞌulic lok reꞌreꞌ, reꞌ i Jesus reꞌ Pahbamaj chi Kꞌatal Kꞌoric. 
\p  
\v 18 Jeꞌ aj reꞌ ruꞌ maꞌ hab ta wach eriban chi erikꞌor aweh tak chi reꞌ hat-tak maꞌ reꞌ ta riwi̱ꞌ niminic naꞌn tak jeꞌ ricab ncaꞌn take xa eli̱c woꞌ cꞌahchiꞌ quikꞌoric aweh tak chi reꞌ hat-tak maꞌ chꞌublic ta wach acꞌux tak, on nanquikꞌor woꞌ aweh tak chi curman chi na̱lokꞌem tak quiwach take raj tzꞌeꞌ wa̱ch i Dios. Jeꞌ aj reꞌ kꞌoric ncaꞌn take reꞌ reh chi xa ncaꞌn chic lok qui̱b chi quilom wach take raj tzꞌeꞌ wa̱ch i Dios jeꞌ ricab nquikꞌor, xa reꞌ laꞌ nquikꞌor reꞌreꞌ, xa maꞌ coric ta woꞌ. Haj cok wilic i coric, reꞌ chi reꞌ take cꞌacharel reꞌreꞌ maꞌ chꞌublic ta wach quicꞌux eh reꞌ paꞌ bih nquikꞌor xa pan quicꞌux nchalic rikꞌormojic i kꞌoric ncaꞌn.  
\v 19 Jeꞌ woꞌ chic, reꞌ take cꞌacharel reꞌreꞌ, maꞌ wilque̱b ta chi riꞌsil i rajawric i Jesus jeꞌ ricab xitikꞌa̱ꞌ wach i Dios reh chi reꞌ ritinami̱t nariqꞌuihic wach, jeꞌ woꞌ ricab ncꞌuluric ru̱cꞌ katiꞌjolal kabakil. Jeꞌ reꞌ nikꞌor maj reꞌ katiꞌjolal i hoj wilic woꞌ jenaj rina̱ nchopbic reh eh reꞌ katiꞌjolal reꞌreꞌ riwi̱ꞌ woꞌ chi reh chi naribanam riwaꞌ riha̱ꞌ reh chi nariqꞌuihic johtok eh chi wilic woꞌ ricowil take tikbal reh kabakil nchopbic reh katiꞌjolal. 
\s1 Maꞌxta chic bih queh aj niminel // chi naquicꞌamam woꞌ chic na̱ take // kꞌoric maꞌ reꞌ ta ritakꞌanic i Dios 
\p  
\v 20 Reꞌ hat-tak yuꞌna wilca̱t tak chic riꞌsil rajawric i Jesus reꞌ Pahbamaj chi Kꞌatal Kꞌoric. Ruꞌum aj reꞌ ncꞌuluric awu̱cꞌ tak jeꞌ ricab xicꞌul i Jesus eh jeꞌ ricab chi reꞌreꞌ xicana̱ꞌ cꞌacharic china̱ acꞌal wili naxquimic je, jeꞌ woꞌ reꞌ hat-tak xacana̱ꞌ woꞌ tak cꞌacharic chi riꞌsil rajawric take cꞌuhbal reꞌ nquikꞌor i tinamit chi nchoponic quina̱. Wi til coric chi reꞌ hat-tak xacana̱ꞌ tak chic i cꞌacharic chi jeꞌ reꞌ, chayohbalej awi̱b tak kꞌuruꞌ chi maꞌ eta woꞌ chic namin awi̱b tak chi riꞌsil rajawric take takꞌanic ncaꞌn take cꞌacharel reꞌreꞌ.  
\v 21 Reꞌ take reꞌ jeꞌ wili takꞌanic ncaꞌn: Ma̱tzꞌaꞌj tak reꞌreꞌ, ma̱cꞌux tak i wuluꞌ, ma̱yew tak pan akꞌab tak take paꞌ bih wuluꞌ. 
\p  
\v 22 Ma̱coj chic awi̱b tak chi cꞌacharic chi riꞌsil rajawric take cꞌuhbal reꞌreꞌ kꞌuruꞌ maj chiꞌnchel take takꞌanic reꞌreꞌ xa winak woꞌ ti xtakꞌanic wach chi rinoꞌjbal ri̱b jeꞌ ricab take takꞌanic rikꞌor chi wilic take paꞌ bih maꞌ eta ncꞌuxuric to̱b ta woꞌ nak reꞌ Dios xikꞌor chi tare̱t chi cꞌuxuric.  
\v 23 Coric ruꞌ chi ruꞌum reh take takꞌanic reꞌreꞌ, wilic take wilic quibiral chi kꞌe̱ꞌ woꞌ chic quinoꞌjbal xa ruꞌum ti ruꞌ chi til nquiyew quicꞌux chiri̱j i paꞌ bih nquilokꞌej wach on ruꞌum chi kꞌe̱ꞌ woꞌ chic nquiyew chi tiꞌ i quitiꞌjolal, xa reꞌ laꞌ ruꞌ to̱b ta jeꞌ reꞌ quibiral, reꞌ hin nikꞌor aweh tak chi reꞌ take takꞌanic reꞌreꞌ maꞌxta bih camanel aweh tak wi ta nak ru̱cꞌ take reꞌ nawa̱j ayeb pan awo̱k tak i maꞌ holohic ta laj noꞌjbal ricꞌax wach atiꞌjolal tak. 
\c 3  
\s1 Reꞌ ribanaric i noꞌjbal // nponic chiwach i Dios 
\p  
\v 1 Ruꞌum chi reꞌ hat-tak acꞌ laj cꞌacharic chic wilic aweh tak jeꞌ ricab chi reꞌ Jesus reꞌ Pahbamaj chi Kꞌatal Kꞌoric xicꞌul jenaj acꞌ laj cꞌacharic naxuctic cho chi quixilac take camnak, reꞌ hin nikꞌor aweh tak chi chayew acꞌux tak chiri̱j rirakmajic chiri̱j take tijinic nchalic rikꞌormojic ar pan taxa̱j, reꞌ yeꞌo̱j wi̱ꞌ rilokꞌil i Jesus chi rich kꞌatal kꞌoric cok Dios jeꞌ ricab nanyeꞌeric rilokꞌil jenoꞌ cꞌacharel nantzꞌukunjic cok chi riche̱l jenoꞌ kꞌatal kꞌoric.  
\v 2 Chiri̱j ok take tijinic nchalic rikꞌormojic ar pan taxa̱j chayew acapew-bal tak eh maꞌ ok chiri̱j take tijinic npokꞌ cho pan quicꞌux take cꞌacharel wilque̱b ayuꞌ wach acꞌal.  
\v 3 Jeꞌ reꞌ nikꞌor maj jeꞌ ricab nok reꞌ ricꞌacharic i Jesus xcuxꞌic wach nah acꞌal wili naxquimic je, jeꞌ woꞌ reꞌ hat-tak xcuxꞌic woꞌ wach i cꞌacharic naꞌn tak chi rehquen take rajawric tijinic reꞌreꞌ. Coric ruꞌ jeꞌ ricab chi reꞌ Jesus reꞌ Pahbamaj chi Kꞌatal Kꞌoric maꞌ nilmijic ta wach chi wilic cok ru̱cꞌ i Dios, reꞌ lokꞌil yeꞌo̱j aweh tak chi cꞌacharic chi riꞌsil rajawric i Dios maꞌ nilmijic ta woꞌ wach yuꞌna  
\v 4 xa reꞌ laꞌ ruꞌ naꞌilmijok woꞌ chic wach ayuꞌ i Jesus reꞌ Pahbamaj chi Kꞌatal Kꞌoric reꞌ til xyeꞌbic woꞌ reh acꞌacharic tak, narilmijic woꞌ wach i lokꞌil yeꞌo̱j aweh tak jeꞌ ricab narilmijic wach i rinimal wach i lokꞌil yeꞌo̱j reh Jesus. 
\p  
\v 5 Jeꞌ reꞌ kꞌuruꞌ ruꞌum nok chi riꞌsil chic rajawric i Jesus cꞌacharic naꞌn tak, til nikꞌor je aweh chi chawesaj tak lok chiri̱j acꞌux cꞌahbil laj noꞌjbal jeꞌ ricab take wili: Reꞌ cꞌoyomal, reꞌ chꞌuwaꞌrsanic i̱b ru̱cꞌ cꞌahbil laj capew-bal, reꞌ suksunic i̱b ru̱cꞌ ribanaric on ricꞌaxaric wach take ra̱j maꞌ ra̱j banaric, reꞌ ribanaric i chaj bih ricꞌax wach katiꞌjolal, chꞌi̱l woꞌ i ricꞌaxaric wach bihomal reꞌ no̱j cahnok chi jeꞌ na ricab i mahc chi lokꞌonic tiyo̱x maj maꞌ reꞌ ta chic chiri̱j i Dios wilic ca̱mna.  
\v 6 Chawesaj tak lok rij acꞌux tak take noꞌjbal reꞌreꞌ maj reꞌ hat-tak awehtꞌalim tak chic chi reꞌ rijoskꞌil i Dios nchalic chi quina̱ take cꞌacharel maꞌ quibirinic ta kꞌoric chiwach ruꞌ.  
\v 7 Coric ruꞌ, najtir kꞌi̱j xatcꞌacharic tak cho chipam take noꞌjbal reꞌreꞌ  
\v 8 xa reꞌ laꞌ yuꞌna maꞌ jeꞌ ta chic reꞌ cꞌacharic naꞌn tak. Ruꞌum aj reꞌ maꞌ eta woꞌ chic riban chi enbanjic take wili: Reꞌ cꞌahanic i̱b, reꞌ joskꞌil, reꞌ maꞌ tob laj capew-bal chi ribanaric cꞌahbilal, reꞌ tzꞌuju̱j i̱b chꞌi̱l i cꞌahbil laj kꞌoric nelic xak achi̱ꞌ tak.  
\v 9 Jeꞌ woꞌ, ma̱ban tak chic chucuj kꞌoric chawach tak maj jeꞌ ricab nok reꞌ hat-tak nawesaj tak lok i tzꞌakic laj tzꞌih chawi̱j tak nok abanam tak chic i kahsanic haꞌ, jeꞌ woꞌ reꞌ hat-tak xawesaj tak chic lok rij acꞌux tak i noꞌjbal naꞌn nak tak cho najtir kꞌi̱j reꞌ xbanic nak cho chi xaꞌn tak cho i maꞌ holohic ta laj bano̱j.  
\v 10 Ruꞌum aj reꞌ yuꞌna reꞌ hat-tak toco̱m chic riwi̱ꞌ acꞌacharic tak jeꞌ ricab nok toco̱m chic tzꞌih nacoj tak chawi̱j natelic tak cho reh kahsanic haꞌ. Chi toco̱m chic riwi̱ꞌ acꞌacharic tak jeꞌ ricab tikꞌimaj wach ruꞌum i Dios chi hat-tak na̱cꞌuhtunic tak lok reh rinoꞌjbal, curman woꞌ chi eli̱c ok cꞌahchiꞌ ricorjic wach anoꞌjbal tak maj xa chi jeꞌ reꞌ na̱rakam tak chiri̱j chi manlic i toco̱m laj cꞌacharic wilca̱t wi̱ꞌ.  
\v 11 Chipam i toco̱m chic cꞌacharic wili, maꞌ hab ta wach nim ta nak riwaꞌric. Haj cok wilic til wilic riwaꞌric, reꞌ chi reꞌ Jesus reꞌ Pahbamaj chi Kꞌatal Kꞌoric wilic chic pan kacꞌacharic. Reꞌ wili ra̱j rikꞌorom chi reꞌ take cꞌacharel xa jenaj wach quiwaꞌric. Jeꞌ ricab take aj criye̱co xa jenaj quiwach chꞌi̱l take ra̱ꞌ riꞌsil cho maꞌ Israhel. On reꞌ take quikꞌatam lok ritzꞌuhmal na̱ quicꞌachanbal rehtalil chi aj niminel take chiwach i Dios xa jenaj woꞌ quiwach quichꞌi̱l take aj niminel jeꞌ ru̱cꞌ maꞌ quikꞌatam ta lok ritzꞌuhmal na̱ quicꞌachanbal. Jeꞌ woꞌ, chipam i toco̱m chic cꞌacharic wili maꞌxta cꞌacharel nim on tꞌuch ta nak wach. Jeꞌ ricab take wilic on maꞌxta quitijinic, on reꞌ take ehcham reh jenoꞌ camanic chꞌi̱l take xa aj camanom take, xa jenaj woꞌ wach quiwaꞌric. 
\p  
\v 12 Chi jeꞌ aj reꞌ i toco̱m chic cꞌacharic wilca̱t tak wi̱ꞌ, reꞌ hat-tak xatrichih tak i Dios chi xaꞌn tak chi ritinami̱t xisakbej wach acꞌacharic tak eh tiꞌ woꞌ tiricꞌraj tak cho. Ruꞌum aj reꞌ jeꞌ ricab nok reꞌ hat-tak toco̱m chic tzꞌih nacoj tak chi rijalaric awi̱b tak, curman woꞌ chi toco̱m chic noꞌjbal wihꞌok awu̱cꞌ tak chi cꞌacharic chi coric. Reꞌreꞌ ra̱j rikꞌorom jenaj cꞌacharic ru̱cꞌ quetelenic wachi̱s, ru̱cꞌ chakꞌlamquil eh ru̱cꞌ chꞌublic wach cꞌuxlis.  
\v 13 Wi hab wach aj jenoꞌ xcalajic chawach tak, maꞌ njohtic pe ti acꞌa̱ tak. Wi wilic jenoꞌ mahc ra̱j cuyuric reh, chacuy tak jeꞌ ricab xiban i kAja̱w Jesus maj reꞌreꞌ xicuy eh xisach woꞌ amahc tak. 
\p  
\v 14 Ru̱cꞌ aj i noꞌjbal enaꞌn tak reꞌreꞌ curman woꞌ chi nariwihꞌic cꞌaxoj i̱b chaxilac tak maj ru̱cꞌ reꞌreꞌ na̱banam tak chi xa jenaj wach awi̱ꞌ etiwihꞌic tak pan niminic tak eh chi na̱wihꞌic tak pan manlic jenaj wach cꞌuxlis chawibil awi̱b tak.  
\v 15 Maꞌ xa reꞌ ta aj reꞌ ra̱j banaric, ra̱j laꞌ woꞌ chi reꞌ sukquil cꞌuxlis ra̱j i Dios chi na̱cꞌacharic tak wi̱ꞌ wihꞌok pan awa̱mna tak reh chi reꞌreꞌ behsenok aweh tak chi richꞌukuric wach pan chakꞌlamil i xa paꞌ jaric jenoꞌ wolic enwihꞌic chaxilac tak. Jeꞌ reꞌ nikꞌor maj jeꞌ ricab naxatriyukꞌej tak cho i Dios chi na̱banam tak chi ritinami̱t chi xa jenaj wach acꞌux tak chiwach, jeꞌ woꞌ reꞌ xatriyukꞌej tak cho chi na̱wihꞌic tak pan suk laj cꞌuxlis chawibil awi̱b tak. Ru̱cꞌ anoꞌjbal tak chi jeꞌ reꞌ, reꞌ hin nipahkaj aweh tak chi xa wilic ta nak woꞌ atioxbal tak johtok ru̱cꞌ i Dios ruꞌum reh yukꞌunic xiban cho aweh tak.  
\v 16 Jeꞌ woꞌ, nipahkaj woꞌ aweh tak chi reꞌ lokꞌ laj ricꞌuhbal i Jesus reꞌ Pahbamaj chi Kꞌatal Kꞌoric, xa wilic ta woꞌ nak pan awa̱mna tak reh chi maꞌ pajoj ta enwihꞌic anoꞌjbal tak maj curman chi ru̱cꞌ tꞌulic laj noꞌjbal na̱cꞌuhbalem on na̱kꞌilim awi̱b tak chaxilac hat-tak. Jeꞌ woꞌ chic nipahkaj woꞌ aweh tak chi wilic ta nak tioxonic pan awa̱mna tak chi etibichinic tak johtok chiwach i Dios ru̱cꞌ take bi̱ch tikꞌimaj ru̱cꞌ take kꞌoric wilic chipam i Lokꞌ laj Hu̱j wilic wi̱ꞌ riCꞌuhbal i Dios, on ru̱cꞌ take bi̱ch yeꞌo̱j ruꞌum i Lokꞌ laj rUxlabal, on ru̱cꞌ take bi̱ch tzꞌihmbimaj chi riyeꞌeric rilokꞌil i kAja̱w Jesus.  
\v 17 Ru̱cꞌ take nipahkaj je aweh tak reꞌreꞌ, nwa̱j woꞌ nipahkam aweh tak chi xa paꞌ jaric ra̱j kꞌormojic on xa paꞌ jaric camanic ra̱j banaric, chiꞌnchel reꞌreꞌ chakꞌor tak eh chaꞌn tak chi cꞌahchiꞌ acꞌuhtam tak lok chi hat-tak chic aj niminel reh Lokꞌ laj Ajabe̱s Jesus eh ru̱cꞌ reꞌreꞌ nachaꞌn tak johtok ritioxjic i Jesus ruꞌum reh rajawric, nariyeꞌeric woꞌ ritioxjic i Dios reꞌ rAja̱w i Jesus. 
\s1 Wilic toco̱m chic pahkanic riban je maꞌ Lu̱ꞌ queh take aj Colo̱sa 
\p  
\v 18 Hat-tak ehqꞌuenbe̱s nipahkaj aweh tak chi tiwihꞌok chi riꞌsil rajawric abahi̱l tak ruꞌum nok jeꞌ reꞌ riwi̱ꞌ acꞌacharic tak ra̱j banjic yuꞌna chi wilca̱t tak chic chi riꞌsil rajawric i kAja̱w Jesus.  
\v 19 Hat-tak bahilbe̱s, reꞌ wili nipahkaj aweh tak chi na̱banam tak: Chacꞌax awehqꞌue̱n tak eh ma̱banlom tak cow laj kꞌoric chi quina̱.  
\v 20 Reꞌ hat-tak acꞌunbe̱s ixkꞌunbe̱s, til tiniminok tak chiwach rikꞌorbal atu̱t awaja̱w tak ru̱cꞌ chiꞌnchel jeꞌ ricab ricꞌul chi queh take quiniminic chic reh kAja̱w ruꞌum nok jeꞌ reꞌ ra̱j i Dios chi na̱banam tak yuꞌna chi wilca̱t tak chic chi riꞌsil rajawric i kAja̱w Jesus.  
\v 21 Jeꞌ woꞌ hat-tak tutbe̱s ajabe̱s, ma̱johsaj quicꞌux take awacꞌu̱n awixkꞌu̱n tak reh chi maꞌ eta riban qui̱b quicꞌux awu̱cꞌ tak. 
\p  
\v 22 Reꞌ hat-tak cꞌacharel, reꞌ hat-tak ehchemaj chi camanic chanimej woꞌ tak take quiꞌehchenic aweh tak chi camanic ayuꞌ wach acꞌal ru̱cꞌ chiꞌnchel paꞌ bih tiquitakꞌa̱ꞌ tak wi̱ꞌ, maꞌ ok xa reꞌ tiniminic tak nok nawilow tak quiwach chi wilque̱b cok awu̱cꞌ tak jeꞌ ricab ncaꞌn take xa ncaꞌn chic quiwach chiwach i aj ehcham camanic xa reꞌ laꞌ nok maꞌ hab ta chic wilic cu̱cꞌ maꞌxta chic bih ncaꞌn. Reꞌ hat-tak kꞌuruꞌ ticamanok tak chi coric ru̱cꞌ acꞌux tak ruꞌum reh riyohbaljic i Dios wilic awu̱cꞌ tak eh ma̱ban tak chi xa hat-tak kꞌitkꞌit,  
\v 23 tiniminok laꞌ tak chi coric ruꞌum nok reꞌ nicꞌ paꞌ nimal camanic nquipahkaj aweh tak curman chi na̱banam tak ru̱cꞌ chiꞌnchel acꞌux tak chi lokꞌonbal wach i Dios, maꞌ ok xa reh rakbal alokꞌil tak chiwach jenoꞌ cꞌacharel.  
\v 24 Cꞌolok tak pan acꞌux i wili: Wi jeꞌ reꞌ xaꞌn tak reꞌ kꞌoro̱j cahnok ribiral chi na̱cꞌulum tak pan taxa̱j nariyeꞌeric cho aweh tak ruꞌum i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric ruꞌum nok chiwach aj reꞌ ruꞌ cꞌahchiꞌ acamanic tak.  
\v 25 Tzꞌa̱b ruꞌ wi reꞌ hat-tak maꞌ xaꞌn tak i coric, ra̱j rikꞌorom chi reꞌ ritzꞌakil i paꞌ bih cꞌahbilal xaꞌn tak, reꞌ woꞌ reꞌ na̱cꞌulum tak ruꞌum nok chiwach i Dios maꞌxta jenoꞌ cꞌacharel nim ta nak wach on tꞌuch ta nak wach, xa jenaj laꞌ wach i chꞌukuj kꞌoric nariban china̱ aj ehcham camanic chꞌi̱l i xa aj ehchemaj laj aj camanom ti. 
\c 4  
\nb  
\v 1 Ruꞌum aj reꞌ, reꞌ hat-tak aj ehcham reh i camanic chaꞌn woꞌ tak haj wilic tare̱t chi banaric cu̱cꞌ take awaj camanom tak eh jeꞌ woꞌ, xa coric ok wach acꞌux tak cu̱cꞌ. Cꞌolok pan acꞌux tak chi ar pan taxa̱j wilic woꞌ jenaj ntakꞌanic chana̱ tak. 
\s1 Til riwi̱ꞌ chi queh aj niminel // chi nacaꞌnam quiti̱j 
\p  
\v 2 Yuꞌna, reꞌ aj chic chiri̱j i banoj ti̱j chiwach i Dios, nipahkaj aweh chi chayew acꞌux tak chi junelic eh ma̱pohꞌaj acꞌux tak chi ti̱j, xa cꞌahchiꞌ laꞌ ok woꞌ ca̱t tak chi tioxonic chiwach i Dios ru̱cꞌ take paꞌ bih riban chawi̱j tak.  
\v 3 Jeꞌ reꞌ kꞌuruꞌ nachaꞌn ati̱j tak, koj-awicꞌsaj woꞌ pan ati̱j tak i hoj aj cꞌuhbalanel. Jeꞌ woꞌ reꞌ chaꞌn tak chiwi̱j i hin reꞌ tzꞌapalqui̱n pan che̱ꞌ ruꞌum reh rikꞌormojic i rinimal noꞌjbal maꞌ sakomomaj ta cho wach chiri̱j i Jesus reꞌ Pahbamaj chi Kꞌatal Kꞌoric. Chi jeꞌ aj reꞌ wilqui̱n wi̱ꞌ, chaꞌn tak ati̱j chiwi̱j reh chi reꞌ kAja̱w Dios eriteh kocbal cu̱cꞌ take tinamit eh chi jeꞌ reꞌ nakꞌormojok i lokꞌ laj riCꞌuhbal i Dios queh, reꞌ take reꞌ enquirak chiri̱j i noꞌjbal cꞌolo̱j nak ri̱j reꞌreꞌ.  
\v 4 Maꞌ xa ta chiri̱j take reꞌ na̱banam ati̱j tak, chaꞌn laꞌ woꞌ ati̱j tak chiwi̱j hin reh chi reꞌ rikꞌormojic i noꞌjbal maꞌ sakomomaj ta cho wach reꞌreꞌ, enisakomej lok wach chi coric jeꞌ ricab tanlic chi nina̱ chi nanibanam. 
\p  
\v 5 Chi jeꞌ reꞌ pahkanic niban chawach tak, nipahkaj woꞌ chic aweh tak i wili: Wi xirak achi̱ꞌ tak rikꞌormojic i Lokꞌ laj riCꞌuhbal i Dios queh take jaꞌ quehtꞌalim ta wach i Dios, chakꞌor tak queh, ma̱kꞌeb tak i juncꞌam reꞌreꞌ chi kꞌoric chiri̱j. Reꞌ cok ruꞌ maꞌ ok xa reꞌ ti reꞌ naꞌn tak, til laꞌ ok cꞌuhtunok lok anoꞌjbal tak chi toco̱m chic riwi̱ꞌ cꞌacharic naꞌn tak.  
\v 6 Ru̱cꞌ anoꞌjbal tak wilic na̱wehtꞌalim tak nicꞌ wach quicꞌuꞌljic na̱banam tak take cꞌacharel reꞌreꞌ nancaꞌn jenoꞌ pahkanic aweh tak chiri̱j animinic naꞌn tak. Ruꞌum aj reꞌ, reꞌ hin nipahkaj woꞌ aweh tak chi jeꞌ ricab i nansukbic i cꞌuxbal nancojoric ratzꞌamil, jeꞌ ta woꞌ nak reꞌ chiban akꞌorbal tak natikꞌorok tak pan atoꞌbil chi rikꞌormojic i ribiral i Jesus reh chi jeꞌ reꞌ xa suk woꞌ quicꞌux i tinamit naquibiraj i cꞌuhbalanic naꞌn tak. 
\s1 Reꞌ maꞌ Lu̱ꞌ ricohlaj je kꞌoric cu̱cꞌ take aj niminel 
\p  
\v 7 Reꞌ aj take wili nikꞌor je aweh tak wich aj niminel. Reꞌ chic take ribiral chiri̱j nicꞌacharic reꞌ chic i kich aj niminel Ti̱quico reꞌ kꞌe̱ꞌ tiꞌ nwicꞌraj narisakomem wach aweh tak. Reꞌ Ti̱quico reꞌreꞌ wich aj camanom woꞌ chipam ricamaj i kAja̱w Dios eh maꞌxta bih npohꞌic wi̱ꞌ ricꞌux chi nitobjic pa ricamaj i kAja̱w Jesus.  
\v 8 Ruꞌum aj reꞌ cꞌahchiꞌ nitakꞌa̱b je awu̱cꞌ tak reh chi nachiban i camanic cꞌahchiꞌ niyeb china̱, reꞌreꞌ eriyew woꞌ ricowil acꞌux tak jeꞌ woꞌ encꞌulic rikꞌor wi̱n nicꞌ wach i niminic cꞌahchiꞌca̱t tak chiwach i Dios.  
\v 9 Richꞌi̱l i Ti̱quico cꞌahchiꞌ woꞌ nitakꞌa̱b je awu̱cꞌ tak i kich aj niminel One̱simo ribihnal reꞌ jenaj awich atinami̱t tak reꞌ kꞌe̱ꞌ woꞌ tiꞌ nwicꞌraj eh riban woꞌ ricamaj chi manlic. Reꞌ take quib reꞌreꞌ naquikꞌorom aweh tak ricorquil chaj bih cꞌacharic cꞌahchiꞌ nibanam i hin ayuꞌ. 
\p  
\v 10 Chipam nihu̱j wili, wilic take nquitakꞌa̱ꞌ je risukquil acꞌux tak, jeꞌ ricab i kich aj niminel maꞌ Arista̱rco reꞌ wich tzꞌahpel pan che̱ꞌ eh chꞌi̱l woꞌ i kich aj niminel reꞌ Cus ribihnal reꞌ rica̱n cho Wernaweh. Reꞌ hat-tak abiram tak chic ribiral i pahkanic nibanam je chiri̱j i Arista̱rco eh ruꞌum aj reꞌ nikꞌor je aweh tak yuꞌna i wili: Wi reꞌreꞌ xo̱j cꞌolok awu̱cꞌ tak naꞌelok je pan che̱ꞌ, chacꞌul tak pa ricorquil jeꞌ woꞌ pan sukquil laj cꞌuxlis.  
\v 11 Jeꞌ woꞌ i wich aj niminel maꞌ Chus reꞌ ribihnej woꞌ chi Ju̱sto ritakꞌa̱ꞌ je risukquil acꞌux tak. Chi quixilac take wich aj niminel jeꞌ ru̱cꞌ take ra̱ꞌ riꞌsil cho maꞌ Israhel, xa reꞌ ti take kich aj niminel wili cꞌahchiꞌqui̱n quitoꞌbem ayuꞌ pan che̱ꞌ chipam nicamaj niban reh chi toco̱m chic take cꞌacharel equehtric woꞌ wihꞌic chi rehquen rajawric i Dios chi kꞌatal kꞌoric eh ru̱cꞌ i toꞌbonic ncaꞌn wi̱n, reꞌ hin nirak risukquil nicꞌux.  
\v 12 Jeꞌ woꞌ, reꞌ kich aj niminel maꞌ Epa̱wras reꞌ awich tinamit tak cho eh raj camanom woꞌ i Jesus reꞌ Pahbamaj chi Kꞌatal Kꞌoric, cꞌahchiꞌ ritakꞌa̱b je risukquil acꞌux tak. Reꞌ maꞌ Epa̱wras reꞌreꞌ, nikꞌor aweh tak chi xa cꞌahchiꞌ woꞌ riyeb ricꞌux chi ti̱j chawi̱j tak eli̱c kꞌi̱j chi ripahkaljic johtok reh Dios chi ru̱cꞌ rajawric, reꞌ hat-tak cow enapahba̱ꞌ acꞌux tak chipam i cꞌuhbal xatijej tak chiri̱j ribiral i Jesus. Jeꞌ woꞌ, cꞌahchiꞌ ribanam riti̱j chawi̱j tak chi maꞌ ta nak chaj chic bih jenoꞌ noꞌjbal curman chaweh tak, chiꞌnchel ta laꞌ nak take noꞌjbal xarak ta nak tak chipam rinimjic i Jesus reh chi na̱banam tak haj wilic ra̱j i kAja̱w Dios.  
\v 13 Reꞌ ti̱j riban i maꞌ Epa̱wras reꞌ woꞌ reꞌ riban chiqui̱j take toco̱m chic aj niminel. Jeꞌ reꞌ nikꞌor maj reꞌ hin wilom eh til niyew nichi̱ꞌ chi coric chi reꞌreꞌ eli̱c tiricapa̱j tak pan ti̱j, jeꞌ ricab woꞌ riban chiqui̱j take aj niminel wilque̱b pan tinamit Lahorise̱ya chꞌi̱l woꞌ take wilque̱b pan tinamit Yera̱polis.  
\v 14 Chiri̱j chic rikꞌormojic aweh tak ribiral i maꞌ Epa̱wras, nikꞌor woꞌ aweh tak chi reꞌ maꞌ Te̱mas chꞌi̱l i maꞌ Cax reꞌ aj ikꞌomonel reꞌ kꞌe̱ꞌ tiꞌ nwicꞌraj, cꞌahchiꞌ woꞌ quitakꞌa̱b je risukquil acꞌux hat-tak nicꞌ qꞌuihal aj niminel wilca̱t tak ar.  
\v 15 Chipam woꞌ i hu̱j wili nipahkaj woꞌ aweh tak chayew tak risukquil quicꞌux take i kich aj niminel wilque̱b ar pan tinamit Lahorise̱ya. Jeꞌ woꞌ, chayew woꞌ tak risukquil ricꞌux i maꞌ Ni̱npa chꞌi̱l take nicꞌ nimal aj niminel nquimol qui̱b pa ripa̱t.  
\v 16 Jeꞌ reꞌ kꞌuruꞌ reꞌ hat-tak aj Colo̱sa nok awilom tak chic wach i hu̱j wili chi quixilac take aj niminel ar, nwa̱j woꞌ chi chakꞌahsaj tak je queh aj niminel aj Lahorise̱ya reh chi naquilom woꞌ wach ruꞌ. Reꞌ jenaj chic hu̱j takꞌamaj woꞌ je queh ruꞌ chakꞌor tak queh chi naquiyeb woꞌ aweh tak reh chi na̱wilom woꞌ tak wach i hat-tak.  
\v 17 Jeꞌ woꞌ, nipahkaj aweh tak jenaj chic atoꞌbil wili: Chakꞌor tak reh wi̱n i Arqui̱po chi chiyew ricꞌux chiri̱j i camanic xyeꞌeric reh ruꞌum i kAja̱w Jesus eh chiban woꞌ chi coric i camanic yeꞌo̱j reh reꞌreꞌ. 
\p  
\v 18 Reꞌ aj chic take kꞌoric na̱wilom tak jok wach wili, til reꞌ hin maꞌ Lu̱ꞌ cꞌahchiꞌ nitzꞌihminic reh: Sukquil cꞌuxlis chaweh tak. Chꞌi̱l i wili nikꞌor woꞌ aweh tak: Chacuy chaꞌn woꞌ ti ati̱j tak chiwi̱j nacꞌolok cho pan acꞌux tak chi tzꞌapalqui̱n pan che̱ꞌ. Reꞌ ta nak ratoꞌbil i Dios kꞌuruꞌ wihꞌok awu̱cꞌ tak chi junelic. Jeꞌ ta nak reꞌ banarok.