\id 2TI - Pokomchi Occidental NT \h 2 TIMOTEO \toc1 Reꞌ ricab hu̱j xitzꞌihmbaj i maꞌ Lu̱ꞌ reh Timote̱yo \toc2 2 TIMOTEO \toc3 2 Ti \mt2 Reꞌ ricab hu̱j xitzꞌihmbaj i maꞌ Lu̱ꞌ reh \mt1 Timote̱yo \c 1 \s1 Reꞌ maꞌ Lu̱ꞌ ricꞌalenej je i Timote̱yo \p \v 1 Reꞌ hin maꞌ Lu̱ꞌ, reꞌ hin quintzꞌihminic je reh hu̱j wili. Ruꞌum chi reꞌ kAja̱w Dios jeꞌ reꞌ xa̱j chiwi̱j, reꞌ Jesus reꞌ Pahbamaj chi Kꞌatal Kꞌoric xiripahba̱ꞌ chi aj kꞌorol reh junelic cꞌacharic rikꞌorom cho ribiral i Dios najtir kꞌi̱j chi nariyeb cho. Reꞌ riyeꞌeric cho cꞌacharic reꞌreꞌ xo̱j woꞌ manlajok wach ku̱cꞌ i hoj reꞌ nkachꞌica̱ꞌ kacꞌux chiri̱j i Jesus. \v 2 Reꞌ aj hu̱j wili cꞌahchiꞌ nitzꞌihmbam je aweh hat Timote̱yo reꞌ wilca̱t chi jeꞌ na acab hat wacꞌu̱n ruꞌum nok kꞌe̱ꞌ tiꞌ tiwicꞌraj. Tinicꞌalenej je kꞌuruꞌ ru̱cꞌ take kꞌoric wili: Reꞌ ta nak kAja̱w Dios chꞌi̱l i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric ruꞌum i Dios, quiyeꞌbok cho catoꞌbil chana̱, tiquicꞌax eh quiyeꞌbok woꞌ cho risukquil acꞌux. \s1 Reꞌ rUxlabal i Dios yeꞌo̱j // reh chi reꞌ take aj niminel // maꞌxta bih naquiyoꞌjic wi̱ꞌ \p \v 3 Reꞌ Dios xquilokꞌej cho wach take kama̱m katiꞌt reꞌ woꞌ reꞌ i nilokꞌej wach i hin chi maꞌxta bih jenoꞌ encojbic nimahc pa nicapew-bal. Chiwach aj i Dios reꞌreꞌ, reꞌ hin xa eli̱c woꞌ kꞌi̱j akꞌab niban johtok niti̱j eh xa cꞌahchiꞌ woꞌ nitioxonic johtok chiwach chawi̱j i hat reꞌ xa wilca̱t woꞌ pa nicꞌux naniban niti̱j. \v 4 Wilic jenaj maꞌ niqꞌuic ta pa nicꞌux, jeꞌ ricab take ri̱s nakꞌ awach xakꞌeꞌb cho chiki̱j naxkachꞌak cho ki̱b. Reꞌreꞌ til riban wi̱ꞌ chi xa ji̱kꞌ chic i wa̱mna chi rilmijic woꞌ chic awach. Til ta nak ewoꞌ chic nwilow awach, kꞌe̱ꞌ nak ensukbic nicꞌux. \v 5 Reꞌ hin maꞌ jaruj ta eniqꞌuic pa nicꞌux i ricorquilal wach acꞌux naxanimej cho i kAja̱w Jesus. Reꞌ ricorquilal acꞌux reꞌreꞌ jeꞌ ricab ricorquilal ricꞌux atu̱t reꞌ tiꞌ Ewni̱se chꞌi̱l aqꞌue̱n tiꞌ Lo̱yra eh nicapaj i hin chi cu yuꞌna chi kꞌi̱j xa cu jeꞌ woꞌ reꞌ acapew-bal chiri̱j i Jesus. \v 6 Reꞌ kꞌoro̱j chiri̱j acapew-bal reꞌreꞌ, reꞌ ok reꞌ camanok aweh chi naricꞌulic cho pan acꞌux i wili: Naxatnipahba̱ꞌ cho chi na̱banam chi hat raj camanom i Dios ru̱cꞌ ricojoric take nikꞌab chana̱, reꞌ Dios xiyew aweh awajawric reꞌ yeꞌo̱j ruꞌum i Lokꞌ laj Uxlabal chi jeꞌ ricab jenoꞌ si̱. Yuꞌna kꞌuruꞌ chi yeꞌo̱j chic aweh i ajawric reꞌreꞌ, chacana̱ꞌ chi nimsjok wach i camanic riban awu̱cꞌ jeꞌ ricab riban i kꞌa̱kꞌ chi xa ntenic chic i xak riban nanwahljic cok. \p \v 7 Jeꞌ reꞌ ajic ruꞌum chi wilic chic ku̱cꞌ rUxlabal i Dios maꞌ riban ta chi enwihꞌic yoꞌjic pan ka̱mna. Reꞌ riwi̱ꞌ chi jeꞌ reꞌ nikꞌor reh chi reꞌ kAja̱w Dios xiyew cho keh rUxlabal reh chi reꞌ hoj maꞌxta bih nakayoꞌjic wi̱ꞌ. Jeꞌ woꞌ, reꞌ rUxlabal i Dios xyeꞌeric woꞌ cho keh reh chi nariwihꞌic kajawric, reh chi nakacꞌaxam woꞌ ki̱b cu̱cꞌ take kich aj niminel eh chi nariwihꞌic kanoꞌjbal reh chi jeꞌ reꞌ nkarak chiri̱j nicꞌ wach cꞌacharic nakaꞌnam. \v 8 Jeꞌ reꞌ nok ruꞌum chi wilic awu̱cꞌ rUxlabal i Dios maꞌ tiqꞌuixꞌic chi rikꞌormojic ribiral ricꞌuhbal i Jesus. Jeꞌ woꞌ, maꞌ tiqꞌuixꞌic chi kꞌoric chiwi̱j i hin chi wilqui̱n pan che̱ꞌ ruꞌum reh rikꞌormojic rikꞌorbal i Jesus. Wi xcꞌulic woꞌ nchel lok i tiꞌcꞌaxic chana̱, maꞌ tiyoꞌjic woꞌ chiwach, ticholok laꞌ ricuyuric jeꞌ woꞌ ricab ricuyuric tiꞌcꞌaxic cꞌahchiꞌ nibanam i hin ruꞌum reh rikꞌormojic ribiral i Jesus. Reꞌ Dios wilic rajawric eh ru̱cꞌ rajawric reꞌreꞌ riban chi reꞌ hat enacuy ransil i tiꞌcꞌaxic. \v 9 Wihꞌok woꞌ pan acꞌux chi ru̱cꞌ i rajawric wilic xojricoꞌlej reh chi maꞌ eta nkacꞌul i tiꞌcꞌaxic ruꞌum reh kamahc eh reꞌ kayukꞌunjic xiban i Dios reh chi nakacꞌacharic chi saksamaj wach kanoꞌjbal, reꞌ woꞌ reꞌ ncꞌuhtunic reh rinimal rajawric wilic. Jeꞌ aj reꞌ, reꞌ kacoꞌljic chꞌi̱l i kayukꞌunjic xbanjic, reꞌ woꞌ Dios xbanic, reꞌ cok ruꞌ maꞌ ruꞌum ta nchel chi holohic ta nak kojbanic xiban chi jeꞌ reꞌ ruꞌum laꞌ chi pa ra̱mna i Dios xasjic cho ribanaric xa ruꞌum reh ricꞌaxbal wilic chi kana̱. Jeꞌ reꞌ nikꞌor maj nok cu jaꞌ nchꞌihquic ta nak cho i cꞌacharic ayuꞌ wach acꞌal, reꞌ cꞌaxbal reꞌreꞌ wilic chic cho pa ra̱mna i Dios chi naricꞌuhtam lok ru̱cꞌ ricꞌulic lok i kaKꞌatal Kꞌoric Jesus. \p \v 10 Yuꞌna aj ruꞌ wilco̱j chic chipam take kꞌi̱j reꞌ cꞌahchiꞌ ricꞌuhtunic wi̱ꞌ ricꞌaxbal i Dios. Jeꞌ reꞌ nikꞌor maj reꞌ Jesus reꞌ Pahbamaj chi Kꞌatal Kꞌoric, xcꞌulic chic cꞌacharok ayuꞌ wach acꞌal. Reꞌ Jesus, reꞌ woꞌ reꞌ xcoꞌlonic keh hoj aj niminel reh chi maꞌ eta chic nkacꞌul i tiꞌcꞌaxic ruꞌum reh kamahc eh til reꞌ woꞌ reꞌ xuctic woꞌ chic cho chi quixilac take camnak. Ru̱cꞌ aj ructic reꞌreꞌ, xiban chi maꞌxta chic ransil i quimic chi kana̱. Maꞌ xa reꞌ ta reꞌ xiban, xiban laꞌ woꞌ chi ru̱cꞌ ribirmijic i lokꞌ laj cꞌuhbal chiri̱j ribiral ructic, xsakomsjic pa̱m kacapew-bal i hoj aj niminel reh chi enkarak chiri̱j chi nakojquimok je ekojcꞌacharic chi junelic. \v 11 Jeꞌ aj reꞌ ruꞌum chi reꞌ ribiral ructic i Jesus nsakomonic pan kacapew-bal, reꞌ Dios xiripahba̱ꞌ chi aj kꞌorol riCꞌuhbal chi nawojic cu̱cꞌ take maꞌ reꞌ ta ra̱ꞌ riꞌsil cho maꞌ Israhel eh chi quixilac take reꞌ, reꞌ hin niban nicamaj chi aj kꞌoro̱l jeꞌ woꞌ chi aj cꞌuhtunel reh ribiral ructic i Jesus. \v 12 Ruꞌum aj reꞌ yuꞌna reꞌ hin cꞌahchiꞌ nicꞌulum take xa chiꞌnchel wach tiꞌcꞌaxic. Jeꞌ ricab yuꞌna reꞌ hin wilqui̱n pan che̱ꞌ, xa reꞌ laꞌ maꞌ quinqꞌuixꞌic ta soꞌ chi rikꞌormojic chaj waꞌric nok wilqui̱n ayuꞌ ruꞌum nok wehtꞌalim hab wach aj u̱cꞌ choplic nicꞌux eh chi reꞌ choplic wi̱ꞌ nicꞌux reꞌreꞌ til wilic rajawric chi manlic. Ru̱cꞌ reꞌreꞌ, til wehtꞌalim woꞌ chi cu rehtal rirak cho rikꞌijil ricꞌulic lok i kAja̱w Jesus, reꞌreꞌ naricholic woꞌ ricꞌoloric ri̱j i paꞌ bih xwokxoꞌnej pan kꞌab. \s1 Reꞌ ripahkaljic reh Timote̱yo // chi naricꞌuhtam woꞌ chi coric // i tijbal tijimaj wi̱ꞌ \p \v 13 Chiꞌnchel i hoj reꞌ xkanimej chic i Jesus reꞌ Pahbamaj chi Kꞌatal Kꞌoric npahkaljic keh chi kachꞌica̱ꞌ tak kacꞌux chiri̱j i Dios chi manlic eh kacꞌax woꞌ tak ruꞌ eh jeꞌ woꞌ take kas kacha̱kꞌ. Ru̱cꞌ i pahkanic reꞌreꞌ, wilic woꞌ jenaj chic pahkanic nwa̱j nibanam je aweh chi jeꞌ wili: Reꞌ cꞌuhtunic naꞌn i hat chaꞌn jeꞌ ok woꞌ ricab i coric laj tijinic xawilow chi xnicꞌuhtaj aweh. \v 14 Reꞌ lokꞌ laj tijinic reꞌreꞌ, okxaꞌnjic pan akꞌab reh chi na̱banam i cꞌuhtunic chi manlic. Jeꞌ reꞌ nok til nipahkaj aweh chi chacꞌol ri̱j reh chi maꞌ eta no̱j yojok wach. Reꞌ ok i Lokꞌ laj rUxlabal i Dios wilic pan awa̱mna toꞌbonok aweh chi ribanaric reꞌreꞌ. \s1 Reꞌ Onesi̱poro xiyew ricꞌux chi ritobjic i maꞌ Lu̱ꞌ \p \v 15 Reꞌ hat xawehtꞌalij woꞌ chi qꞌuihal take aj niminel reꞌ wilque̱b pa riyukꞌul i A̱sya xquicana̱ꞌ nitobjic yuꞌna nok chi wilqui̱n pan che̱ꞌ jeꞌ ricab xiban i maꞌ Pije̱lo chꞌi̱l i maꞌ Moj. \v 16 Reꞌ ti cok i maꞌ Onesi̱poro maꞌ xiricana̱ꞌ ta chi wutquel. Ruꞌum aj reꞌ niban niti̱j chiri̱j chi reꞌ kAja̱w Jesus chicꞌuhtaj ta nak cho ricꞌaxbal china̱ chꞌi̱l take raj pan pa̱t maj xa reꞌ woꞌ naxincojoric ayuꞌ pan che̱ꞌ, reꞌreꞌ qꞌuih pech xiyew risukquil nicꞌux eh maꞌ xqꞌuixꞌic ta nechꞌ ok wuꞌum. \v 17 Xa reꞌ woꞌ ricꞌulic lok ayuꞌ i kasbe̱s reꞌreꞌ ayuꞌ pan tinamit Ro̱ma, xiyew ricꞌux chi nisiqꞌuiric cu rehtal xirirak ayuꞌ pan che̱ꞌ. \v 18 Ruꞌum aj reꞌ til niban niti̱j chiri̱j i Onesi̱poro chi reꞌ kAja̱w Jesus chicꞌuhtaj ricꞌaxbal china̱ chipam i kꞌi̱j nawihꞌok cok i Onesi̱poro chiwach. Jeꞌ reꞌ ajic til reꞌ Dios toꞌbonok reh maj kꞌe̱ꞌ woꞌ chic nitobjic xiban jeꞌ ricab awehtꞌalim woꞌ i hat chi xiban keh nok wilco̱j nak cho pan tinamit E̱peso. \c 2 \s1 Reꞌ noꞌjbal curman chi naribanam // i Timote̱yo ru̱cꞌ ricamaj \p \v 1 Hat Timote̱yo reꞌ xa jeꞌ na hat wacꞌu̱n nok wilca̱t chipam i niminic, reꞌ hat awehtꞌalim chi reꞌ Jesus reꞌ Pahbamaj chi Kꞌatal Kꞌoric riyew cho rinimal rajawric chi katobjic. Ruꞌum aj reꞌ til nipahkaj aweh chi chayew kꞌab reh Jesus chi ericowsaj acꞌux. \v 2 Jeꞌ woꞌ, nipahkaj aweh chi reꞌ take tijbal abiram cho wu̱cꞌ chiwach qꞌuihal aj niminel xiꞌilbic aweh naxatpahbabjic chi aj kꞌorol reh riCꞌuhbal i Dios, reꞌ woꞌ take cꞌuhtunic reꞌreꞌ chacꞌuhtaj queh take winak aj niminel jeꞌ ru̱cꞌ aj chꞌiquem cꞌuxlis take reh chi reꞌ take reꞌ, ewoꞌ chic ncaꞌn i cꞌuhtunic queh take toco̱m chic aj niminel. \p \v 3 Reꞌ chic chiri̱j i tiꞌcꞌaxic nchalic chana̱ xa ruꞌum chi xanimej i Jesus reꞌ Pahbamaj chi Kꞌatal Kꞌoric, nipahkaj woꞌ chi chacuy take ransil jeꞌ ricab nok jenoꞌ sol ricuy ransil take paꞌ bih tiꞌcꞌaxic niqꞌuic take wi̱ꞌ ruꞌum ricamaj wilic wi̱ꞌ. \v 4 Reꞌ anoꞌjbal kꞌuruꞌ jeꞌ ok ricab i rinoꞌjbal i sol. Reꞌreꞌ maꞌ rimin ta ri̱b chipam toco̱m chic jenoꞌ camanic pa reh lok maj rehtꞌalim chi reꞌ nahsil sol xcojbic reh chi jeꞌ reꞌ ricamaj, kꞌe̱ꞌ ensukbic ricꞌux wi xa chiwach cꞌahchiꞌ cok chi camanic. \v 5 Jeꞌ woꞌ chic, reꞌ anoꞌjbal jeꞌ ok ricab rinoꞌjbal i aj ajamanel. Reꞌreꞌ naripaj ri̱b chꞌi̱l take toco̱m chic aj ajamanel, ricꞌam na̱ chiꞌnchel take paꞌ bih take noꞌjbal nchopbic na̱ i pajoj i̱b chi ajamanic maj xa chi jeꞌ reꞌ naricꞌulum rico̱ch wi xiban canar ajamanic. \v 6 Jeꞌ woꞌ chic, reꞌ anoꞌjbal jeꞌ ok ricab rinoꞌjbal i aj abixo̱m laj winak. Reꞌreꞌ pe̱t riban ricꞌaxquilal ricamanjic wach i acꞌal xa reꞌ laꞌ nanponic rikꞌijil chi narimolom wach take tic, reꞌ aj abixo̱m reꞌreꞌ riban risukquil wach i ricamaj. \p \v 7 Jeꞌ aj reꞌ kꞌuruꞌ Timote̱yo, ticapewenok ru̱cꞌ take xnikꞌor aweh reꞌreꞌ eh reꞌ ta nak i kAja̱w Dios chiyew riman anoꞌjbal chi rirakmajic chiri̱j take noꞌjbal reꞌreꞌ. \v 8 Jeꞌ woꞌ wilic toco̱m chic take kꞌoric nwa̱j chi na̱capewenic chiri̱j. Jeꞌ ricab nwa̱j chi na̱capam chiri̱j i ribiral wili chiri̱j i Jesus reꞌ Pahbamaj chi Kꞌatal Kꞌoric: Reꞌ Jesus reꞌ ra̱ꞌ riꞌsil woꞌ cho i kꞌatal kꞌoric aj najtir kꞌi̱j maꞌ Tawiy, xuctic woꞌ chic chi quixilac take camnak. Reꞌ take holohic laj kꞌoric wili, reꞌ woꞌ reꞌ nikꞌor ribiral i hin queh cꞌacharel \v 9 eh ruꞌum reh rikꞌormojic reꞌreꞌ, reꞌ hin cꞌahchiꞌ woꞌ nicꞌulum take tiꞌcꞌaxic ayuꞌ pan che̱ꞌ chi jeꞌ na nicab jenoꞌ aj cansanel nok wilqui̱n. Xa reꞌ laꞌ ruꞌ maꞌ nikꞌor ta bihnal chi wilqui̱n ayuꞌ pan che̱ꞌ ruꞌum nok maꞌ ra̱j ta rikꞌorom chi reꞌ rikꞌormojic riCꞌuhbal i Dios tzꞌaplic ta nak woꞌ ayuꞌ pan che̱ꞌ. \v 10 Jeꞌ reꞌ kꞌuruꞌ ruꞌum reh rikꞌormojic riCꞌuhbal i Dios reꞌ hin cꞌahchiꞌ woꞌ nicꞌulum tiꞌcꞌaxic, xa reꞌ laꞌ ruꞌ cu ewoꞌ nicuy ransil take tiꞌcꞌaxic reh chi reꞌ take aj niminel reꞌ chiho̱j take ruꞌum i Dios chi ritinami̱t enquichꞌica̱ꞌ quicꞌux chi manlic chiri̱j i Jesus reꞌ Pahbamaj chi Kꞌatal Kꞌoric. Ruꞌum chi jeꞌ reꞌ encaꞌn, reꞌ take reꞌ equicꞌacharic woꞌ chi junelic ar reꞌ wilic wi̱ꞌ i Dios chi sutumaj ri̱j ru̱cꞌ rinimal wach sakom. \p \v 11 Chꞌi̱l take kꞌoric reꞌreꞌ, wilic woꞌ take kꞌoric til chꞌiclic woꞌ wi̱ꞌ nicꞌux. Reꞌ wili take kꞌoric reꞌreꞌ: \q1 “Jeꞌ ricab xicꞌul i Jesus reꞌ Pahbamaj chi Kꞌatal Kꞌoric chi xquimic je, chi xuctic woꞌ chic cho chi quixilac take camnak eh chi yuꞌna cꞌachlic woꞌ chic, \q2 jeꞌ woꞌ reꞌ naricꞌuluric ku̱cꞌ hoj raj niminel chi nakojquimok je, nakucsjic woꞌ chic cho eh nakacꞌacharic woꞌ chi junpech. \q1 \v 12 Jeꞌ woꞌ, jeꞌ ricab xcꞌuluric ru̱cꞌ i Jesus chi reꞌreꞌ xpahbabjic chi Kꞌatal Kꞌoric, \q1 jeꞌ woꞌ reꞌ i hoj nakehtric woꞌ ru̱cꞌ i rilokꞌil reꞌreꞌ. \q2 Jeꞌ reꞌ nakacꞌulum xa reꞌ wach wi reꞌ hoj enkayew kꞌab chi enkacꞌul i tiꞌ cꞌaxic nchalic chi kana̱ ruꞌum reh i kaniminic. \q2 Ra̱j nchel wi chipam i tiꞌcꞌaxic reꞌreꞌ, reꞌ hoj enkakꞌor chi reꞌ Jesus maꞌ reꞌ ta Ajabe̱s chi kana̱, reꞌreꞌ narikꞌorom woꞌ keh chi maꞌ reꞌ ta hoj raj tahkanel. \q1 \v 13 Reꞌ kAja̱w Jesus manlic wach i rikꞌor. \q1 To̱b ta nchel reꞌ hoj maꞌ manlic ta kawach ru̱cꞌ nkakꞌor chi nakaꞌnam, \q1 reꞌreꞌ xa naribanam woꞌ i haj wilic rikꞌorom chi naribanam maj reꞌ rikꞌor i Jesus chi naribanam, \q1 maꞌ eta ricana̱ꞌ ribanaric, nqui rikꞌor take kꞌoric reꞌreꞌ. \s1 Reꞌ Timote̱yo npahkaljic // reh chi camanok chi coric \p \v 14 Reꞌ hat wilic awajawric reꞌ yeꞌo̱j aweh ruꞌum i Dios. Jeꞌ reꞌ kꞌuruꞌ reꞌ take kꞌoric cu reꞌ xnicohlaj lok rikꞌormojic aweh chatik juꞌ rikꞌormojic queh take aj niminel reh chi maꞌ eta niqꞌuic pan quicꞌux. Jeꞌ woꞌ, chakꞌor queh chi maꞌ nquibanlom take kꞌoric chi xa maꞌxta bih riwi̱ꞌ maj reꞌreꞌ xa maꞌxta bih eritik queh, reꞌ laꞌ encaꞌn ru̱cꞌ reꞌreꞌ xa riyojoric quicꞌux take cꞌacharel reꞌ equibirinic reh take kꞌoric reꞌreꞌ. \v 15 Tzꞌa̱b ruꞌ reꞌ riCꞌuhbal i Dios rikꞌor keh i ricorquilal eh ruꞌum reꞌ curman chi chaꞌn ricꞌuhtjic chi coric. Maꞌ xa reꞌ ta reꞌ ra̱j banaric ra̱j laꞌ woꞌ chi ru̱cꞌ chiꞌnchel awa̱mna chaꞌn acamaj reh chi reꞌ Dios erikꞌor chipam i kꞌi̱j reꞌ natiwihꞌok wi̱ꞌ chiwach chi reꞌ hat kꞌe̱ꞌ tare̱t i camanic xaꞌn eh jeꞌ woꞌ reh chi etiwihꞌic chiwach i Dios jeꞌ ricab i jenaj aj camanom reꞌ naxwihꞌic chiwach rajabe̱s maꞌ xqꞌuixꞌic ta chi rikꞌormojic reh nicꞌ wach i camanic xiban. \v 16 Jeꞌ woꞌ, chipam i camanic wilca̱t wi̱ꞌ ma̱min awi̱b ru̱cꞌ take kꞌoric wi maꞌ reꞌ yeꞌbal rilokꞌil i Dios eh maꞌ toꞌbonel ta woꞌ queh take quibirinic reh. Jeꞌ reꞌ nikꞌor aweh maj reꞌ take nquimin qui̱b ru̱cꞌ take kꞌoric jeꞌ reꞌ riman chic nquimin qui̱b chipam i noꞌjbal jeꞌ ru̱cꞌ maꞌ riyew ta rilokꞌil Dios. \v 17 Chi jeꞌ reꞌ ru̱cꞌ i cꞌuhtunic ncaꞌn, nquijotꞌ ricapew-bal take toco̱m chic cꞌacharel jeꞌ ricab jotꞌo̱j riban i rex kꞌa̱ nok xa eli̱c chic cꞌahchiꞌ ricꞌuxum je ri̱b. Wilic quib take cꞌacharel jeꞌ reꞌ cꞌahchiꞌ caꞌnam, reꞌ Himene̱yo chꞌi̱l i maꞌ Pile̱to. \v 18 Reꞌ take qui̱b cꞌacharel reꞌreꞌ xquicana̱ꞌ ricꞌuhbaljic i coric cꞌuhtumaj keh hoj eh yuꞌna cꞌahchiꞌ chic quikꞌorom chi reꞌ cuctic cho take camnak xcꞌuluric chic cho eh ru̱cꞌ take kꞌoric ncaꞌn reꞌreꞌ, wilic take cꞌacharel cꞌahchiꞌ riyojic quicꞌux chiri̱j i Jesus. \p \v 19 Jeꞌ reꞌ ajic wilic take kꞌoric riban chi reꞌ take cꞌacharel maꞌ cow ta nquichꞌica̱ꞌ quicꞌux chiri̱j i Jesus. Tzꞌa̱b ruꞌ take kꞌoric nchalic ru̱cꞌ i Dios, reꞌ take reꞌ xa jeꞌ na nchel cow laj chꞌiquinbal cho reh jenoꞌ maꞌ laj pa̱t. Jeꞌ reꞌ nikꞌor maj reꞌ take kꞌoric reꞌreꞌ riban chi reꞌ take cꞌacharel cow enquichꞌica̱ꞌ quicꞌux chiri̱j i Jesus. Jeꞌ woꞌ chic, jeꞌ ricab ritzꞌihmjic jenoꞌ bihnal nbanjic chiwach i chꞌiquinbal cho reh jenoꞌ pa̱t reh chi narehtꞌaljic hab wach aj eh i pa̱t reꞌreꞌ, reꞌ take kꞌoric nchalic ru̱cꞌ i Dios toꞌbonel woꞌ take chi rehtꞌaljic i nicꞌ paꞌ nimal rehtꞌalim i Dios. Jeꞌ reꞌ nikꞌor maj reꞌ kAja̱w Dios rehtꞌalim woꞌ hab wach take racꞌu̱n rixkꞌu̱n eh rikꞌorom woꞌ chi hab wach nkꞌoric chi aj niminel reh Jesus reꞌ Pahbamaj chi Kꞌatal Kꞌoric, curman chi naricana̱b woꞌ ribanaric chiꞌnchel i cꞌahbil laj noꞌjbal. \p \v 20 Yuꞌna nwa̱j nikꞌorom woꞌ aweh tak i wili: Chipam jenoꞌ maꞌ laj pa̱t reꞌ ncꞌacharic wi̱ꞌ jenoꞌ biho̱m, xa chiꞌnchel wach take camanbal wilic chipam. Wilic take tikꞌimaj ru̱cꞌ take kꞌan woric laj chꞌihchꞌ. Wilic take tikꞌimaj ru̱cꞌ nworwotic laj sak chꞌihchꞌ. Wilic woꞌ take tikꞌimaj ru̱cꞌ che̱ꞌ eh wilic woꞌ take tikꞌimaj xa ru̱cꞌ kꞌantzꞌaꞌp. Maꞌ xa ta reꞌ ta reꞌ nikꞌor aweh tak, nikꞌor laꞌ woꞌ chi quijuꞌjunal take camanbal reꞌreꞌ rehreh wach nquicamanej. Wilic take lo̱kꞌ wach quicamanic wi̱ꞌ eh wilic woꞌ take xa paꞌ ti bih quicamanic wi̱ꞌ. \v 21 Jeꞌ woꞌ reꞌ ncꞌuluric ku̱cꞌ i hoj aj niminel. Jeꞌ reꞌ nikꞌor maj hab wach jenoꞌ aj niminel ricꞌol ri̱j ricꞌacharic chi maꞌxta rimahcanic chiwach i Dios, reꞌreꞌ lo̱kꞌ chiwach i Ajabe̱s Jesus eh lo̱kꞌ woꞌ i camanic riban chiwach, jeꞌ ricab nok jenoꞌ holohic laj camanbal, lo̱kꞌ woꞌ i camanic ncojoric wi̱ꞌ. \v 22 Reꞌ aj reꞌ riwi̱ꞌ kꞌuruꞌ Timote̱yo, chi nikꞌorom chic aweh chi chakꞌeb lok chiri̱j acꞌux chiꞌnchel cꞌahbilal no̱j wi̱ꞌ quicapew-bal take qꞌuijolak. Reꞌ laꞌ chaꞌn chayew acꞌux chi cꞌacharic chi coric wach anoꞌjbal. Coric ok woꞌ wach akꞌorbal, chacꞌam woꞌ na̱ paꞌ bih nkꞌormojic aweh. Jeꞌ woꞌ, chacꞌax i Dios eh tiwihꞌok tak pan sukquil cꞌuxlis, jeꞌ ricab ncaꞌn take xsaksjic chic wach i ca̱mna ruꞌum i Dios eh chi jeꞌ reꞌ nquilokꞌej wach. \s1 Maꞌ ricꞌul ta chi reh jenoꞌ // cꞌamol be̱h ucsunic tak wolic \p \v 23 Chiri̱j take memil laj noꞌjbal, reꞌ hat awehtꞌalim woꞌ chi reꞌreꞌ xa wolinic i̱b rucsaj cho. Ruꞌum aj reꞌ nipahkaj aweh chi naquiꞌoquic chi kꞌoric chiri̱j take noꞌjbal maꞌ nrakmajic ta woꞌ chiri̱j, ma̱ban hat jenaj chi quixilac take cꞌacharel jeꞌ reꞌ ncaꞌn \v 24 maj awehtꞌalim woꞌ i hat chi reꞌ hoj raj camanom i Dios maꞌ ricꞌul ta chi keh i sicꞌoj wolic reꞌ laꞌ curman chi keh chi nakacꞌuhtam i kachakꞌlamil cu̱cꞌ chiꞌnchel take cꞌacharel. Ruꞌum chi wilic i ihk chi kana̱ i hoj chi aj cꞌuhtunel reh riCꞌuhbal i Dios, curman woꞌ chi tikilco̱j ok chi ricꞌuhtjic chi coric. Wi ruꞌum reh kacꞌuhtunic reꞌreꞌ xchalic i tiꞌcꞌaxic chi kana̱, maꞌ nkaꞌn jelow-bal i tiꞌcꞌaxic nbanjic keh. \v 25 Jeꞌ reꞌ ajic, reꞌ hoj raj camanom i Dios til curman chi maꞌ reꞌ ta ru̱cꞌ wolic nakaꞌnam i cojoj noꞌjbal, ru̱cꞌ laꞌ chakꞌlamil enkakꞌil take sahchel take chipam quinoꞌjbal wilque̱b wi̱ꞌ reꞌ rikꞌehtjic quib ncaꞌn chiwach i Dios. Jeꞌ reꞌ nikꞌor chi nakaꞌnam reh chi jeꞌ reꞌ, kꞌi̱j ta nak reꞌ Dios eriquetelej cho quiwach chi equiꞌoquic chipam rehtꞌalij i coric laj ricꞌuhbal ruꞌ. Jeꞌ reꞌ naribanam wi laꞌ reꞌ take reꞌ enquiyotꞌ quicꞌux chiri̱j i quimahc. \v 26 Wi jeꞌ reꞌ xcaꞌn kꞌuruꞌ reꞌ Dios naribanam chi naquesam take cho pa rixoꞌrbal aj Yahm reꞌ nchukunic queh chi nacaꞌnam haj wilic nponic chiwach ruꞌ ruꞌum nok pan kꞌab wilic quicꞌacharic. \c 3 \s1 Yohbal wach take // cꞌahbilal narilmijic pan // cohlsbal wach take kꞌi̱j \p \v 1 Hat Timote̱yo, curman woꞌ chi na̱wehtꞌalim take wili: Chipam take kꞌi̱j wilco̱j wi̱ꞌ wili cu rehtal cho risoljic i kAja̱w Jesus, naricꞌulic lok take kꞌi̱j cꞌaxic chic wach chi keh hoj aj niminel reh Jesus. \v 2 Jeꞌ reꞌ nikꞌor aweh maj chiwach take kꞌi̱j kꞌoro̱j reꞌreꞌ, wilic take cꞌacharel xa reꞌ chic i queh naquiyeb qui̱b chi suk ru̱cꞌ paꞌ bih nquicꞌax wach. Wilic woꞌ take xa nacotowem chic chi nariwihꞌic quitzꞌa̱k reh chi naquibihomric. Jeꞌ woꞌ, wilic take naquinimsam qui̱b eh nacaꞌnam qui̱b chi xa nim chic quiwaꞌric. Maꞌ xa reꞌ ta reꞌ noꞌjbal naribanjic, wilic laꞌ woꞌ take cꞌacharel til reꞌ chic ritzꞌujuric i cas quicha̱kꞌ nacaꞌnam. Wilic woꞌ take maꞌxta chic quibirinic kꞌoric chiwach quitu̱t caja̱w. Wilic woꞌ take maꞌxta chic riwi̱ꞌ quitioxbal eh wilic woꞌ take maꞌxta chic quiyohlem wach i Dios. \v 3 Jeꞌ reꞌ ajic ruꞌum chi reꞌreꞌ i noꞌjbal nariwihꞌic, nakilom chi reꞌ take cꞌacharel reꞌreꞌ maꞌxta riwihꞌic cꞌaxoj i̱b cu̱cꞌ. Maꞌ woꞌ nariwihꞌic soꞌ cuybal cu̱cꞌ. Xa na̱ ruꞌ, naquitzꞌakam wach cꞌuta̱j chiqui̱j take cas quicha̱kꞌ. Jeꞌ woꞌ, naquicꞌacharic chi xa chaꞌn chic aweh cꞌacharic nacaꞌnam. Kꞌe̱ꞌ woꞌ naquicꞌuhtam quijoskꞌil eh naquixowem wach take haj wilic coric quibanic. \v 4 Maꞌ xa reꞌ ta reꞌ nacaꞌnam take cꞌacharel reꞌreꞌ, naquikꞌahsam laꞌ woꞌ take cas quicha̱kꞌ pan quikꞌab take aj ixowonel. Naricowjic woꞌ quicapew-bal chi xa reꞌ chic ribanaric i cꞌahbilal nacaꞌnam. Jeꞌ woꞌ, nariqꞌuic na̱ quikꞌitkꞌitil chiwach i Dios eh maꞌxta chic quicꞌaxam i Dios, reꞌ laꞌ chic ricꞌaxaric wach i sicꞌoj sukquil quicꞌux china̱ acꞌal wili nacotowem ribanaric chiwach risiqꞌuiric i Dios. \p \v 5 Chi jeꞌ reꞌ riwi̱ꞌ quinoꞌjbal nacaꞌnam, reꞌ take cꞌacharel reꞌreꞌ na woꞌ caꞌnam qui̱b chi jeꞌ woꞌ ti chic aj niminel take xa reꞌ laꞌ pan ca̱mna maꞌ nquiyew ta kꞌab reh Dios reh chi ru̱cꞌ rajawric erijal i quinoꞌjbal. Ruꞌum aj chiꞌnchel reꞌreꞌ nikꞌor aweh chi cu̱cꞌ aj take cꞌacharel reꞌreꞌ ma̱min awi̱b. \v 6 Jeꞌ reꞌ chaꞌn maj maꞌ xa reꞌ ta reꞌ cꞌahbil laj noꞌjbal ncaꞌn, jeꞌ laꞌ woꞌ ncaꞌn ribanaric take wili: Naquiꞌoquic chi cꞌuhtunic xa suk chic wach kꞌoric ncaꞌn reh chi nacaꞌnam canar oquic pan quipa̱t take aj niminel. Ruꞌum chi chipam take pa̱t reꞌreꞌ wilic pech wilic take ixok maꞌxta soꞌ quinoꞌjbal chi rirakmajic chiri̱j i cꞌahbil laj cꞌuhtunic ncaꞌn take cꞌacharel reꞌreꞌ, reꞌ take ixok jeꞌ ricab reꞌreꞌ quikajic chipam i quicꞌuhtunic take cꞌacharel reꞌreꞌ. Reꞌ wili ncꞌuluric pan tak pa̱t reꞌ wilque̱b wi̱ꞌ take ixok reꞌ behsemaj quicapew-bal chi ribanaric i mahc eh xa quimahcanic woꞌ, to̱b ta quicahnic chi maꞌ suk ta pa̱m i ca̱mna. \v 7 Reꞌ take ixok maꞌxta soꞌ quinoꞌjbal reꞌreꞌ quibiram chic i kacꞌuhtunic i hoj xa reꞌ laꞌ ruꞌum chi nca̱j quitijem qui̱b ru̱cꞌ toco̱m chic cꞌuhtunic, maꞌ nquicꞌuꞌlej ta chic na̱ i kacꞌuhtunic i hoj chi reꞌreꞌ i coric. \v 8 Reꞌ laꞌ chic nquicꞌuꞌlej na̱ i quicꞌuhtunic take cꞌacharel reꞌreꞌ, reꞌ maꞌ cꞌulu̱j ta chic take ruꞌum i Dios chi ritinami̱t take eh moysomaj chic pa̱m i quinoꞌjbal chi rirakmajic chiri̱j i riCꞌuhbal i Dios. Til nikꞌor aweh chi reꞌ take cꞌacharel reꞌreꞌ ruꞌum chi nquikꞌihtaj qui̱b chiwach i kacꞌuhbal, ncaꞌn queh jeꞌ ricab xcaꞌn take quib chi winak aj war jeꞌ wili quibihnal: Reꞌ Ja̱nes chꞌi̱l i Ja̱mres. Jeꞌ reꞌ nikꞌor maj reꞌ take reꞌreꞌ xquikꞌihtaj qui̱b chiwach i Moyses najtir kꞌi̱j naxikꞌoric ru̱cꞌ i quikꞌatal kꞌoric aj Eji̱pto chi maꞌ ricꞌuꞌlej na̱ rinoꞌjbal i Moyses. \v 9 Jeꞌ reꞌ nok, ruꞌum chi reꞌ quinoꞌjbal take jotꞌo̱l laj cꞌacharel reꞌreꞌ jeꞌ ricab quinoꞌjbal i Ja̱nes chꞌi̱l i Ja̱mres, nikꞌor woꞌ aweh chi xa maꞌ naht ta woꞌ nacaꞌnam chi jeꞌ reꞌ. Jeꞌ reꞌ nikꞌor maj reꞌ take cꞌacharel naquicojom rehtal chi xa sahchel wach i quinoꞌjbal jeꞌ ricab xcꞌuluric cho cu̱cꞌ take quib chi aj war reꞌreꞌ. \s1 Wilic juꞌjun chic noꞌjbal // nyeꞌeric je reh Timote̱yo \p \v 10 Timote̱yo, reꞌ anoꞌjbal i hat maꞌ jeꞌ ta ricab i quinoꞌjbal take jotꞌo̱l laj cꞌacharel reꞌreꞌ. Cu yuꞌna chi kꞌi̱j, reꞌ hat cꞌahchiꞌ acꞌamam na̱ i cꞌuhbal xabiraj wu̱cꞌ eh xacoj pan acapew-bal chi na̱cꞌacharic jeꞌ ricab i cꞌacharic xnicoj pa nicapew-bal i hin chi nanibanam. Reꞌ hin cꞌahchiꞌ nichꞌica̱b nicꞌux chi manlic chiri̱j i Jesus eh jeꞌ woꞌ reꞌ naꞌn i hat. Jeꞌ woꞌ, reꞌ hat cꞌahchiꞌ acꞌaxam take tinamit jeꞌ ricab riwi̱ꞌ xawilow chi xniban i hin. Reꞌ hin wilic woꞌ wuyunbal chi ricuyuric take tiꞌcꞌaxic nchalic chi nina̱ eh jeꞌ woꞌ reꞌ hat wilic woꞌ awuyuꞌnbal. \v 11 Maꞌ xa reꞌ ta reꞌ, reꞌ hat acꞌulum laꞌ woꞌ take tiꞌcꞌaxic jeꞌ ricab nicꞌulum cho hin. Reꞌ hin xnicꞌul cho tiꞌcꞌaxic ar Antiyoqui̱ya, ar Ico̱nyo chꞌi̱l woꞌ ar Li̱stra xa reꞌ laꞌ ruꞌ reꞌ kAja̱w Jesus xiritoꞌbej chi xiniqꞌuic chipam take tiꞌcꞌaxic xchalic chi nina̱ chipam take tinamit reꞌreꞌ. \v 12 Jeꞌ reꞌ kꞌuruꞌ Timote̱yo, reꞌ hat chꞌi̱l i hin kacꞌulum chic take tiꞌcꞌaxic, xa reꞌ laꞌ ruꞌ maꞌ nsahchic kacꞌux chi jeꞌ reꞌ nkacꞌul maj kehtꞌalim chi nicꞌ paꞌ qꞌuihal take quiniminic reh Jesus reꞌ nca̱j cꞌacharic ru̱cꞌ coric wach cꞌuxlis chiwach i Dios narixowjic quiwach. \v 13 Jeꞌ aj reꞌ ruꞌ nkacꞌul ruꞌum rinimjic i Jesus xa reꞌ laꞌ take cꞌacharel aj jotꞌo̱l reꞌreꞌ ru̱cꞌ i jotꞌo̱j ncaꞌn, xa rehreh nacojic sahchok chipam i maꞌ holohic ta laj quinoꞌjbal. Jeꞌ reꞌ nikꞌor maj jeꞌ ricab chi reꞌ take caj tijinel xjotꞌoric quinoꞌjbal ru̱cꞌ i cꞌuhtunic xbanaric queh, reꞌ take cꞌacharel reꞌreꞌ naquitikim woꞌ juꞌ rijotꞌoric quinoꞌjbal take toco̱m chic cꞌacharel ru̱cꞌ woꞌ cꞌuhtunic ncaꞌn. \p \v 14 Jeꞌ reꞌ nok ruꞌum reh cꞌuhtunic ncaꞌn take cꞌacharel aj jotꞌo̱l reꞌreꞌ, til nipahkaj aweh chi reꞌ hat chatik juꞌ ricꞌuhtjic i cꞌuhbal nkꞌoric chiri̱j i Jesus, reꞌ atijem chic i hat chi coric. Reꞌ cꞌuhbal reꞌreꞌ til awehtꞌalim i hat chi til coric. Nicꞌ wach nanawehtꞌalij? Ruꞌum chi awehtꞌalim woꞌ nicꞌ wach i kanoꞌjbal i hoj awaj tijinel. \v 15 Jeꞌ woꞌ chic reꞌ hat cꞌolok pan acꞌux chi cu pan atꞌuchal awehtꞌalim cho take cꞌuhbal tzꞌihmbimaj chipam Lokꞌ laj Hu̱j tzꞌihmbimaj wi̱ꞌ riCꞌuhbal i Dios. Reꞌ lokꞌ laj hu̱j reꞌreꞌ, reꞌ woꞌ reꞌ nyeꞌbic anoꞌjbal chi enarak chiri̱j chi xa hab wach ra̱j chi encoꞌljic ruꞌum i Dios chiwach i tiꞌcꞌaxic riyew cho ruꞌum i mahc, curman chi reh chi erichꞌica̱ꞌ ricꞌux chiri̱j i Jesus reꞌ Pahbamaj chi Kꞌatal Kꞌoric. \v 16 Jeꞌ reꞌ kꞌuruꞌ nicꞌ paꞌ nimal take kꞌoric tzꞌihmbimaj chipam i Lokꞌ laj Hu̱j reꞌreꞌ, reꞌ woꞌ rUxlabal i Dios xyeꞌbic reh. Ruꞌum aj reꞌ camanel take reh bano̱j cꞌuhtunic, reh banoj kꞌilo̱j, reh yeꞌo̱j noꞌjbal eh jeꞌ woꞌ chi tijbal queh take cꞌacharel ru̱cꞌ ricorquilal i holohic laj noꞌjbal ripahkaj i Dios. \v 17 Chiꞌnchel reꞌreꞌ nkaꞌn reh chi jeꞌ reꞌ nicꞌ paꞌ qꞌuihal take quiniminic reh Dios xa tikilque̱b ok woꞌ chi manlic chi ribanaric chiꞌnchel wach holohic laj camanic chiwach ruꞌ. \c 4 \s1 Ma̱cana̱ꞌ rikꞌormojic riCꞌuhbal i Dios \p \v 1 Yuꞌna reh chi wilic take enquiyew quichi̱ꞌ chi reꞌ hin coric wach i cꞌuhtunic cꞌahchiꞌ nibanam je aweh, nicoj jenaj i kAja̱w Dios chꞌi̱l woꞌ i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric. Reꞌreꞌ wilic rajawric chi rikꞌataric kꞌoric chi quina̱ take cu cꞌacharic ncaꞌn nacꞌolok woꞌ chic lok eh jeꞌ woꞌ reꞌ chi quina̱ take camnak chic take je. Chi quiwach aj take reꞌ, til nipahkaj aweh chi \v 2 xa tikilca̱t ok woꞌ chi rikꞌormojic ricorquilal riCꞌuhbal i Dios. Chaniqꞌuej akꞌi̱j kꞌuruꞌ chi rikꞌormojic nok xa riyew ri̱b chi kꞌormojic eh jeꞌ woꞌ nok chi cꞌaxic chic rikꞌormojic. Ru̱cꞌ i cꞌuhbal reꞌreꞌ chakꞌil take cꞌacharel, chacoj woꞌ quinoꞌjbal chi nacaꞌnam i coric, chachꞌubsaj quicꞌux ru̱cꞌ i cꞌuhbal eh ticuyunok woꞌ chi quitijiljic ru̱cꞌ i coric laj cꞌuhbal reꞌreꞌ. \p \v 3 Jeꞌ reꞌ ajic nipahkaj aweh chi na̱banam jeꞌ ricab xnikꞌor aweh chi na̱banam maj cꞌulic lok reh take kꞌi̱j chi kawach nok reꞌ take tinamit maꞌxta ricꞌulum quicꞌux ribirmijic tijbal ncꞌuhtunic reh ricorquil ribiral i Dios, reꞌ laꞌ chic nacaꞌnam, nacoquic chi ribanaric haj wilic ncotowej ribanaric. Chi jeꞌ reꞌ naquitahkem take toco̱m chic aj tijinel reꞌ naquikꞌoric reh xa paꞌ jaric tzꞌakoj wach ribiral jeꞌ ru̱cꞌ xa ricꞌul chic quixiquin ribirmijic. \v 4 Ru̱cꞌ reꞌreꞌ ajic maꞌxta chic cajwam ribirmijic i coric laj cꞌuhbal, reꞌ chic take xa tzꞌakoj wach ribiral suk naquibiram. \v 5 Ruꞌum aj reꞌ nikꞌor je aweh chi reꞌ anoꞌjbal i hat maꞌ ok jeꞌ ricab quinoꞌjbal take reꞌ, xa naꞌlic laꞌ ok woꞌ aweh chi ricojoric rehtal chaj bih take cꞌahchiꞌ ricꞌuluric. Jeꞌ ricab wi xcꞌulic lok tiꞌcꞌaxic chana̱ ruꞌum i camanic naꞌn chacuy ransil eh chatik juꞌ rikꞌormojic i ribiral i Jesus reh chi jeꞌ reꞌ na̱banam acamaj chi manlic wach \v 6 maj xa nicꞌ yuꞌ maꞌ eta chic tinitoꞌbej chipam acamaj ruꞌum nok reꞌ hin xa maꞌ naht ta chic wilqui̱n china̱ acꞌal wili. Jeꞌ ricab nanponic riꞌorahil riquimic jenoꞌ me̱ꞌ ncꞌataric chi si̱ chiwach i Dios, reꞌ haꞌ tikꞌimaj ru̱cꞌ ri̱s u̱wa nchihcjic china̱ i me̱xa reꞌ ncꞌataric wi̱ꞌ i me̱ꞌ, jeꞌ woꞌ reꞌ i hin yuꞌna, xcꞌulic woꞌ lok i kꞌi̱j chi nanicansjic je. \v 7 Wi jeꞌ reꞌ xcꞌuluric, ta woꞌ re̱t chi wi̱n maj wehtꞌalim chi jeꞌ ricab nok jenoꞌ aj ajamanel xa cow chic riyew ricꞌux nanoquic chipam jenoꞌ pajoj ajamanic, cow woꞌ xniyew nicꞌux i hin chi ribanaric nicamaj chiwach i Jesus. Wehtꞌalim woꞌ chi xninimej chi manlic i camanic yeꞌo̱j wi̱n chi nanibanam eh reꞌ take kꞌoric takꞌamaj rikꞌormojic wi̱n ruꞌum i Dios xnikꞌor chic chi manlic. \v 8 Yuꞌna kꞌuruꞌ xa reꞌ chic nwuyꞌej chi nachirak cho rikꞌijil richꞌukbal kꞌoric china̱ chiꞌnchel cꞌacharel, reꞌ kAja̱w Jesus, reꞌ manlic aj chꞌukul wach mahc, nariyeb i nico̱ch cꞌolo̱j lok wi̱n ruꞌum jeꞌ woꞌ nariyeb queh take nicꞌ nimal tiꞌ nquicꞌraj i Jesus eh ruꞌum reꞌ cꞌahchiꞌ cuyꞌem chi naricꞌulic woꞌ chic lok. \s1 Reꞌ take atoꞌbil ripahkaj // je maꞌ Lu̱ꞌ reh Timote̱yo \p \v 9 Reꞌ chic yuꞌna nipahkaj je aweh chi chaloqꞌuej ti cho awi̱b chi etichalic chi wiliric, \v 10 maj wilic take wichꞌi̱l maꞌ wilque̱b ta chic wu̱cꞌ jeꞌ ricab i maꞌ Te̱mas. Reꞌreꞌ ruꞌum reh ricꞌaxaric wach xa suk laj wihꞌic ricꞌam cho i na̱ acꞌal wili, xo̱j pan tinamit Tesalo̱nica. Reꞌ chic i maꞌ Crese̱nte xo̱j rilow take aj niminel wilque̱b pa riyukꞌul i Cala̱sya eh reꞌ Ti̱to xo̱j chipam i riyukꞌul i Talma̱sya chi quilmijic woꞌ take aj niminel wilque̱b ar. \v 11 Yuꞌna xa chic ti reꞌ maꞌ Cax wilic wu̱cꞌ eh ruꞌum reꞌ nipahkaj je atoꞌbil aweh chi natichalok wu̱cꞌ, chacꞌam cho maꞌ Cus chawi̱j ruꞌum nok reꞌreꞌ kꞌe̱ꞌ encamanic wi̱n ayuꞌ chi waj toꞌo̱l chipam ricamaj i kAja̱w Dios. \v 12 Wilic jenaj chic waj toꞌo̱l maꞌ wilic ta woꞌ chic wu̱cꞌ reꞌ Ti̱quico ribihnal. Reꞌreꞌ xnitakꞌa̱ꞌ je ar pan tinamit E̱peso. \v 13 Natichalok ayuꞌ, chacuy chacꞌam cho wi̱n take paꞌ bih wi̱n xnicana̱ꞌ cho pa ripa̱t i kasbe̱s maꞌ Ca̱rpo ar Tro̱yas, jeꞌ ricab i maꞌ laj nijuc ro̱k tzꞌih nicoj reh nicꞌuxic, chꞌi̱l take nihu̱j quicamanic wi̱n eh reꞌ til kꞌe̱ꞌ nwa̱j chi na̱cꞌamam cho wi̱n reꞌ take nihu̱j tikꞌimaj ru̱cꞌ queꞌemaj wach tzꞌuhu̱m. \p \v 14 Jeꞌ woꞌ chic Timote̱yo nwa̱j nikꞌorom je aweh, chi reꞌ maꞌ Lej reꞌ aj chꞌeyol wach chꞌihchꞌ, yohbal wach tiꞌ xiban wi̱n, xa reꞌ laꞌ hin xnicana̱ꞌ pan kꞌab i kAja̱w Dios chi reꞌreꞌ tikꞌinok wach reh ru̱cꞌ nicꞌ paꞌ nimal i cꞌahbilal xiban wi̱n. \v 15 Ruꞌum aj woꞌ reh jotꞌo̱j riban, reꞌ hin nikꞌor je aweh chi reꞌ hat chayohbalej awi̱b ru̱cꞌ i winak reꞌreꞌ ruꞌum nok maꞌ nechꞌ ricꞌul wach i cꞌuhbalanic nkaꞌn, cꞌahchiꞌ laꞌ rikꞌehtam ri̱b chiwach riCꞌuhbal i Dios. \p \v 16 Chiwach take cho kꞌi̱j reꞌreꞌ nok cu reꞌ pe̱t nikꞌorbal chi ricoꞌljic wi̱b chiri̱j riCꞌuhbal i Dios, xa wutquel ti xinwihꞌic maj maꞌ hab ta wach queh take wichꞌi̱l xiwihꞌic wu̱cꞌ. Ruꞌum aj reh xcꞌuluric lok reꞌreꞌ, reꞌ hin nipahkaj reh Dios chi nicꞌ paꞌ nimal take xicananic wi̱n chi wutquel, maꞌ ta encojoric mahc chi quina̱ ru̱cꞌ xcaꞌn wi̱n reꞌreꞌ. \v 17 Jeꞌ reꞌ kꞌuruꞌ to̱b ta woꞌ xincahnic chi maꞌ jenoꞌ chic waj toꞌo̱l wilic wu̱cꞌ, reꞌ kAja̱w Dios xa xwihꞌic woꞌ wu̱cꞌ eh xa xiyew woꞌ wansil chꞌi̱l ricowil nicꞌux chi rikꞌormojic ricꞌuhbal queh take tinamit xiwihꞌic chipam i pe̱t nikꞌorbal xniban chi ricoꞌljic wi̱b. Chi jeꞌ reꞌ, reꞌ take maꞌ reꞌ ta ra̱ꞌ riꞌsil cho maꞌ Israhel xiwihꞌic ar xquibiraj woꞌ take kꞌoric xniban chi quiwach. Ruꞌum chi ar xwihꞌic wu̱cꞌ i kAja̱w Dios, reꞌ hin xincoꞌljic woꞌ chi quiwach take waj ixowonel jeꞌ ricab nanesmejic jenoꞌ chakꞌlam laj chicop chiwach jenoꞌ cakcoj reꞌ naricꞌuxbic nak reh. \p \v 18 Yuꞌna kꞌuruꞌ ruꞌum reh nicoꞌljic ribanam cho Dios riman chic nichꞌica̱ꞌ nicꞌux chiri̱j i wili: Reꞌreꞌ naquiricoꞌlem chiwach take maꞌ holohic ta laj bano̱j nca̱j caꞌnam johtok wi̱n chi niwach eh jeꞌ woꞌ chic, reꞌreꞌ til naquirichaꞌjem reh chi reꞌ hin equinwihꞌic chi quixilac take narikꞌataric kꞌoric chi quina̱ ar pan taxa̱j. Lokꞌomaj ta nak i kAja̱w Jesus chi junelic kꞌi̱j sakom. Jeꞌ ta nak reꞌ banarok. \s1 Reꞌ take cohlsbal wach rikꞌorbal // i maꞌ Lu̱ꞌ ru̱cꞌ i Timote̱yo \p \v 19 Timote̱yo, nipahkaj je aweh chi chayew risukquilal ricꞌux i tiꞌ Pirsi̱la chꞌi̱l Aqui̱la reꞌ ribahi̱l. Jeꞌ woꞌ chayew risukquil ricꞌux i maꞌ Onesi̱poro chꞌi̱l chiꞌnchel take i raj pan pa̱t. \v 20 Nikꞌor woꞌ je aweh chi reꞌ Era̱sto xcahnic cho ar Cori̱nto eh reꞌ Tro̱pimo xnicana̱ꞌ cho ar Mile̱to ruꞌum chi xchop cho reh jenaj yowabjic. \v 21 Jeꞌ reꞌ kꞌuruꞌ Timote̱yo til chaloqꞌuej ti cho awi̱b chi chalic wu̱cꞌ chi cu jaꞌ nponic ta rikꞌijil i kꞌelej. Reꞌ take aj niminel ayuꞌ cꞌahchiꞌ woꞌ quitakꞌa̱b je risukquil acꞌux jeꞌ ricab maꞌ E̱wulo, reꞌ maꞌ Pure̱nte, reꞌ maꞌ Li̱no, reꞌ tiꞌ Cala̱wya chꞌi̱l woꞌ take chiꞌnchel aj niminel wilque̱b ayuꞌ. \v 22 Ru̱cꞌ ricohlsjic wach i hu̱j wili, reꞌ wili i ti̱j niban i hin yuꞌna: Reꞌ ta nak kAja̱w Jesus enwihꞌic awu̱cꞌ chi ricowsjic acꞌux eh reꞌ ta woꞌ nak ricꞌaxbal i Dios wihꞌok chana̱ i hat chꞌi̱l take nicꞌ qꞌuihal aj niminel wilque̱b ar. Jeꞌ ta nak reꞌ banarok awu̱cꞌ tak. Reꞌ wili niti̱j niban chiwach i kAja̱w Dios.