\id 2TH Pokomchi Occidental NT \h 2 TESALONICENSES \toc1 Reꞌ ricab hu̱j xitzꞌihmbaj i maꞌ Lu̱ꞌ queh niminel Aj Tesalo̱nica \toc2 2 TESALONICENSES \toc3 2 Ts \mt2 Reꞌ ricab hu̱j xitzꞌihmbaj i maꞌ Lu̱ꞌ queh niminel \mt1 Aj Tesalo̱nica \c 1 \s1 Reꞌ maꞌ Lu̱ꞌ ricꞌalenej je take aj Tesalo̱nica \p \v 1 Reꞌ hin maꞌ Lu̱ꞌ chi cꞌahchiꞌqui̱n quihchꞌilem i maꞌ Si̱las chꞌi̱l i Timote̱yo, cꞌahchiꞌ nitzꞌihmbam je hu̱j wili aweh hat-tak comonil aj niminel aj Tesalo̱nica reꞌ choplic acꞌux tak ru̱cꞌ Ajabe̱s Dios jeꞌ woꞌ chiri̱j i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric. \v 2 Nok cꞌahchiꞌ nitzꞌihmbam je hu̱j wili, jeꞌ wili cꞌalenenic niban je aweh tak: Reꞌ ta nak atoꞌbil chꞌi̱l woꞌ i sukquil cꞌuxlis riyew cho kAja̱w Dios chꞌi̱l i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric, reꞌ ta nak reꞌ wihꞌok pan acꞌacharic tak. \s1 Reꞌ ritioxjic johtok reh Dios // quicꞌacharic take aj Tesalo̱nica \p \v 3 Hat-tak wich aj niminel, chi wi̱n hin chꞌi̱l take wichꞌi̱l xa tanlic woꞌ chi keh chi xa nakatioxonic woꞌ johtok chiwach i Dios pan kati̱j. Ruꞌum aj reꞌ kojtioxonic chawi̱j tak maj xa eli̱c woꞌ cꞌahchiꞌ ricowjic acꞌux tak chipam i lokꞌ laj niminic eh xa eli̱c woꞌ cꞌahchiꞌ acꞌaxam awi̱b hat-tak aj niminel jeꞌ ricab woꞌ naꞌn tak cu̱cꞌ take toco̱m chic. \v 4 Ruꞌum aj take nicꞌ wach ricꞌuluric i tiꞌcꞌaxic naꞌn tak chꞌi̱l woꞌ i nicꞌ wach nxowjic awach tak ruꞌum reh niminic cꞌahchiꞌca̱t tak, reꞌ hoj nakojkꞌoric cu̱cꞌ take juꞌjun chꞌuk chi moloj wach aj niminel reh Dios, nkakꞌor queh chi reꞌ hoj kehtꞌalim chi tare̱t i kacamaj xkaꞌn chaxilac tak ruꞌum nok reꞌ hat-tak cow cꞌahchiꞌ achꞌica̱b acꞌux tak chiri̱j i Jesus. \v 5 Ru̱cꞌ anoꞌjbal tak reꞌreꞌ, enacꞌuhtaj tak lok chi reꞌ ricapew-bal i Dios xa coric woꞌ wach chaweh tak nachikꞌor chawi̱j tak chi jeꞌ wili: \p «Reꞌ take aj niminel wili, til ricꞌul chi queh chi reꞌ hin Dios wilqui̱n chi kꞌatal kꞌoric chi quina̱. Reꞌ take reꞌ xquicoj qui̱b chi riꞌsil wo̱k nikꞌab chi nanikꞌatbic kꞌoric chi quina̱ eh ruꞌum reꞌ xbanjic tiꞌcꞌaxic queh, nqui narikꞌorom i Dios. \p \v 6 Jeꞌ reꞌ ajic reꞌ ricapew-bal i Dios xa coric woꞌ wach eh ruꞌum aj reꞌ ricꞌul woꞌ chi reh chi nariyeb woꞌ tiꞌcꞌaxic tojbal wach quimahc take nicꞌ paꞌ nimal quibanic tiꞌcꞌaxic aweh tak. \v 7 Jeꞌ woꞌ, riwi̱ꞌ woꞌ chi reh chi naribanam chi reꞌ hat-tak reꞌ ixowomaj awach tak eh bano̱j woꞌ tiꞌcꞌaxic aweh tak, maꞌ eta chic nbanjic tiꞌcꞌaxic aweh tak ruꞌum animinic tak. Reꞌreꞌ naribanam i Dios chiki̱j chiꞌnchel i hoj aj niminel chipam i kꞌi̱j nacꞌolok lok i kAja̱w Jesus pan taxa̱j chi ihchꞌilimaj cho cuꞌum take raj tzꞌeꞌ wa̱ch i Dios wilque̱b woꞌ ar pan taxa̱j. Chipam i kꞌi̱j reꞌreꞌ, reꞌ narilmijic wi̱ꞌ rinimal rajawric i kAja̱w Jesus \v 8 eh reꞌ naricꞌuhtunic woꞌ wi̱ꞌ rinimal rilokꞌil reꞌ naribanam chi xa jeꞌ chic ricab i xak kꞌa̱kꞌ xa ntenic chic, reꞌ Jesus nariyeb rikꞌormojic chi nariyeꞌeric cho tiꞌcꞌaxic chi quina̱ take maꞌ xquinimej ta Dios eh maꞌ woꞌ xquicoj ta wach i lokꞌ laj cꞌuhbal nkꞌoric chiri̱j ruꞌ. \v 9 Chi jeꞌ aj reꞌ, chiꞌnchel take cꞌacharel reꞌreꞌ naquicꞌulum rinimal tiꞌcꞌaxic nariyeꞌeric cho chi quina̱ chi junelic chi tojbal wach quimahc. Maꞌ xa reꞌ ta reꞌ, reꞌ take reꞌ maꞌxta laꞌ woꞌ quiwihꞌic cok chiwach i Lokꞌ laj Ajabe̱s Jesus naquiwihꞌok chiwach take naquilokꞌonic wach i Dios ruꞌum reh rinimal i rajawric wilic. \p \v 10 Chipam i kꞌi̱j reꞌreꞌ, reꞌ naricꞌulic woꞌ lok wi̱ꞌ i Jesus, reꞌ take xcaꞌn chic chi ritinami̱t ru̱cꞌ rinimjic i kꞌoro̱j queh chiri̱j ruꞌ, naquiyeb rilokꞌil chi xa sahchanak chic quicꞌux ruꞌum reh rinimal rajawric naquilom eh chi quixilac take reꞌ, na̱wihꞌic woꞌ hat-tak maj xanimej tak chaj bih xkakꞌor aweh tak chiri̱j i Jesus. \v 11 Ruꞌum chi jeꞌ reꞌ naricꞌuluric chipam i kꞌi̱j reꞌreꞌ, reꞌ hoj xa eli̱c woꞌ cꞌahchiꞌ kaꞌnam johtok kati̱j chawi̱j tak chi ripahkaljic johtok reh Dios chi jeꞌ ta nak wili chikꞌor chawi̱j tak: \p «Reꞌ take aj niminel reꞌreꞌ, ricꞌul chi queh chi xniyukꞌej take chi naquiwihꞌic chi quixilac take cꞌahchiꞌqui̱n quilokꞌem, nqui ta nak erikꞌor chawi̱j tak. \p Jeꞌ woꞌ chic, nkapahkaj reh Dios chi ru̱cꞌ i rajawric riyew cho aweh tak, enaꞌn tak i cꞌaxo̱j nawa̱j tak ribanaric yuꞌna chi cꞌahchiꞌ achꞌica̱b acꞌux tak chiri̱j i Jesus. \v 12 Reꞌ riwi̱ꞌ chi jeꞌ reꞌ pahkanic nkaꞌn pan kati̱j, reꞌ chi ru̱cꞌ i cꞌaxoj i̱b na̱banam tak, eta nak nyeꞌeric rilokꞌil i kAja̱w Jesus. Ruꞌum chi hat-tak chic aj niminel reh Jesus, reꞌreꞌ nariyeb woꞌ alokꞌil tak eh jeꞌ reꞌ naricꞌuluric awu̱cꞌ tak ruꞌum nok wilic chana̱ tak richakꞌlamil i kAja̱w Dios chꞌi̱l woꞌ richakꞌlamil i Jesus reꞌ Pahbamaj chi Kꞌatal Kꞌoric. \c 2 \s1 Reꞌ kꞌoric chiri̱j ricꞌulic // woꞌ chic lok i kAja̱w Jesus \p \v 1 Yuꞌna hat-tak wich aj niminel, reꞌ hat-tak awehtꞌalim tak chic chi reꞌ Lokꞌ laj Ajabe̱s Jesus reꞌ Pahbamaj chi Kꞌatal Kꞌoric, naricꞌulic lok eh jeꞌ woꞌ chi reꞌ Dios naribanam chi nakamolom woꞌ chic ki̱b richꞌi̱l i Jesus. Ruꞌum aj reꞌ til nkakꞌor aweh tak \v 2 chi maꞌ chi bih najotꞌ wi̱ꞌ acapew-bal tak eh wi xponic nchel pan axiquin tak chi reꞌ kꞌi̱j nok reꞌ Lokꞌ laj Ajabe̱s Jesus naricꞌulic lok xponic chic wach, ma̱yoꞌsaj woꞌ awi̱b tak. To̱b ta nchel wilic ta nak jenoꞌ hab wach cꞌahchiꞌ rikꞌorom chi reꞌ Lokꞌ laj Uxlabal xikꞌor reh chi reꞌ ricꞌulic lok i kAja̱w Jesus xponic chic rikꞌijil, on chi reꞌ hoj xkakꞌor reꞌreꞌ naxojwihꞌic cho chaxilac tak, on chi jeꞌ reꞌ kꞌoric tzꞌihmbimaj kuꞌum pan jenoꞌ hu̱j, \v 3 ma̱cana̱ꞌ awi̱b tak chi etijotꞌoric tak ru̱cꞌ xa paꞌ jaric take kꞌoric cꞌahchiꞌ rikꞌorom aweh tak. Jeꞌ reꞌ nikꞌor maj chi cu jaꞌ ncꞌulic ta lok i kAja̱w Jesus, curman chi naricꞌuluric take wili: Pe̱t nariwihꞌic jenaj rikꞌijil chi yohbal wach take cꞌacharel maꞌxta chic cajwam birinic kꞌoric chiwach i Dios eh chi jeꞌ reꞌ naquikꞌihtam woꞌ qui̱b chiwach riCꞌuhbal. Reꞌ aj reꞌ naricꞌuluric chipam take kꞌi̱j naꞌuctok woꞌ cho jenaj cꞌacharel nahsil banol reh cꞌahbilal reꞌ narikꞌetbic wach i kꞌoro̱j ruꞌum i Dios. Ruꞌum chi jeꞌ reꞌ riban, reꞌ cꞌacharel reꞌreꞌ yeꞌo̱j chic cho chiri̱j ruꞌum i Dios chi naricꞌulum i rinimal tiꞌcꞌaxic \v 4 maj reꞌ cꞌacharel reꞌreꞌ naructic chi rikꞌormojic chi kꞌe̱ꞌ woꞌ rinimal rilokꞌil chiwach rilokꞌil i Dios, on chiwach rilokꞌil take tzꞌakoj tiyo̱x lokꞌomaj wach cuꞌum toco̱m chic cꞌacharel. Maꞌ xa reꞌ ta reꞌ riwi̱ꞌ chi naricꞌulum tiꞌcꞌaxic, jeꞌ laꞌ woꞌ ruꞌum chi nok tzꞌuklic chic chipam i yeꞌa̱b wilic chipam i Lokꞌ laj Pa̱t reꞌ nlokꞌonjic wi̱ꞌ wach i Dios, reꞌ cꞌacharel reꞌreꞌ maꞌ xa reꞌ ta naricojom ri̱b chi quijelow-bal take pa reh chic tiyo̱x nquilokꞌej wach take cꞌacharel jeꞌ laꞌ woꞌ naritzꞌakam woꞌ ri̱b chi reꞌreꞌ til Dios. Ar aj ruꞌ, reꞌreꞌ maꞌ xa ta naritakꞌa̱b rikꞌormojic chi maꞌxta chic riyeꞌeric quilokꞌil take tiyo̱x lokꞌomaj cuꞌum take cꞌacharel, jeꞌ laꞌ woꞌ naritakꞌa̱b woꞌ rikꞌormojic chi maꞌxta chic riyeꞌeric rilokꞌil Dios. \p \v 5 Reꞌ chiꞌnchel xnikꞌor lok reꞌreꞌ, reꞌ hat-tak awehtꞌalim tak chic maj xnikꞌor chic cho aweh tak naxinwihꞌic cho chaxilac tak. \v 6 Ruꞌum aj reꞌ nicapaj i hin chi reꞌ hat-tak yuꞌna awehtꞌalim woꞌ tak hab wach i cꞌahchiꞌ ripitbic cho reh cꞌacharel nahsil banol reh cꞌahbilal reꞌreꞌ chi naricꞌuhtam lok ri̱b ru̱cꞌ rinoꞌjbal. Jeꞌ woꞌ, awehtꞌalim tak chi reꞌ cꞌacharel reꞌreꞌ naricꞌuhtam lok ri̱b cu rehtal nachikꞌor cho Dios chi xponic chic rikꞌijil chi jeꞌ reꞌ naricꞌuluric. \v 7 Yuꞌna reꞌ cꞌahbilal xa pan cꞌolic cꞌahchiꞌ ribanam i cꞌacharel reꞌreꞌ eh jeꞌ reꞌ cꞌahchiꞌ ribanam ruꞌum chi yuꞌna wilic jenaj cꞌahchiꞌ ripitbic reh ricꞌuhtjic cho ri̱b. Jeꞌ reꞌ naritikim juꞌ cu rehtal nesmejic lok pa ribe̱h reꞌ nkꞌetbic reh \v 8 maj naꞌesmejok lok i haj wilic nkꞌetbic pa ribe̱h i cꞌacharel nahsil banol reh cꞌahbilal reꞌreꞌ, cu reꞌ aj ruꞌ naricꞌuhtam lok ri̱b chi coric, xa reꞌ laꞌ ruꞌ reꞌ kAja̱w Jesus nacꞌolok woꞌ chic lok eh nachicꞌuhtaj rinimal wach risakomil rilokꞌil, naricꞌulic risacham wach nicꞌ paꞌ nimal ricamaj i winak reꞌreꞌ. Maꞌ xa reꞌ ta reꞌ naribanam, jeꞌ laꞌ woꞌ jeꞌ ricab chi cꞌahchiꞌ ta nak ricojom jenoꞌ mache̱t chi cansbal, reꞌ Jesus ru̱cꞌ richi̱ꞌ narikꞌorom chi naricansjic i cꞌacharel nahsil banol reh cꞌahbilal reꞌreꞌ. \p \v 9 Reꞌ cꞌacharel reꞌreꞌ, ruꞌum chi ritakꞌanic cho aj Yahm kꞌe̱ꞌ rinimal wach rajawric nariwihꞌic chi kꞌe̱ꞌ woꞌ chic qꞌuihal take tinamit naquijotꞌoric ru̱cꞌ take chucuj laj nawa̱l chꞌi̱l take chucuj laj rehtalil naricꞌuhtam. \v 10 Jeꞌ woꞌ chic, reꞌ cꞌacharel reꞌreꞌ ru̱cꞌ take jotꞌo̱j naribanam, naribanam woꞌ chi yohbal wach cꞌahbilal nacaꞌnam take qꞌuihal tinamit naquicojbic wach. Ruꞌum aj reꞌ, reꞌ take cꞌacharel narisacharic quiwach. Jeꞌ reꞌ nikꞌor maj reꞌ take reꞌ maꞌ xca̱j ta woꞌ quicꞌulum ru̱cꞌ chiꞌnchel i ca̱mna i coric laj kꞌoric rikꞌor i Jesus eh maꞌ xquicꞌul ta woꞌ i cꞌaxbal riyew chi quicoꞌljic chiwach i tiꞌcꞌaxic. \v 11 Jeꞌ reꞌ nok ruꞌum reh quinoꞌjbal take tinamit reꞌreꞌ, reꞌ Dios nariyeb kꞌab chi jenaj chic maꞌ tob laj uxlabal kꞌe̱ꞌ nimal rajawric narichalic chi jotꞌo̱l quicapew-bal take cꞌacharel reꞌ naribanam chi qꞌuihal take tinamit reꞌreꞌ nacoquic chi ricojoric wach take chucuj laj cꞌuhbal nquibiraj. \v 12 Jeꞌ woꞌ chic, reꞌ Dios narichꞌukum kꞌoric chi quina̱ take tinamit reꞌreꞌ. Jeꞌ reꞌ nikꞌor maj reꞌ take reꞌ maꞌ xquicoj ta wach i coric laj kꞌoric rikꞌor i Jesus reꞌ laꞌ chic kꞌe̱ꞌ suk xquilow ribanaric i mahc. \s1 Til reꞌ Dios xchihbic quiwach // take niminel aj Tesalo̱nica chi naquicoꞌljic \p \v 13 Jeꞌ reꞌ kꞌuruꞌ hat-tak wich tak aj niminel reꞌ kꞌe̱ꞌ tiꞌ tiricꞌraj tak i kAja̱w Jesus, reꞌ hin chꞌi̱l take wich aj niminel reꞌ quinquihchꞌilej xa eli̱c woꞌ kojtioxonic johtok ru̱cꞌ i Dios nankaꞌn kati̱j chawi̱j tak maj nok jaꞌ npꞌuhtic ta cho cꞌacharic ayuꞌ wach acꞌal, reꞌ Dios xatrichih tak chic cho chi na̱coꞌljic tak chiwach i tiꞌcꞌaxic nariyeꞌeric chi quina̱ take aj mahc. Reꞌ aj reꞌ riwi̱ꞌ chi reꞌreꞌ xiban woꞌ chi pe̱t xisakbej wach awa̱mna tak ruꞌum i Lokꞌ laj Uxlabal nok achꞌica̱b chic acꞌux tak chiri̱j i Jesus reꞌ aj kꞌorol reh coric laj cꞌuhbal. \v 14 Jeꞌ reꞌ ajic naxatrichih tak cho i Dios maꞌ xa reꞌ ta chi xatriyukꞌej tak chi na̱coꞌljic tak chiwach i tiꞌcꞌaxic jeꞌ laꞌ woꞌ reh chi ar pan taxa̱j nariwihꞌic rinimal alokꞌil tak jeꞌ ricab rilokꞌil i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric. Reꞌ yukꞌunic reꞌreꞌ xacꞌul tak xa reꞌ nok reꞌ hoj raj kꞌorol i Dios xkakꞌor aweh tak ribiral i Jesus. \v 15 Ruꞌum aj reꞌ hat-tak wich aj niminel, ruꞌum nok xatyukꞌunjic tak reh chi xatcoꞌljic tak, reꞌ aj reꞌ riban chi nipahkaj aweh tak yuꞌna chi chatik tak juꞌ richoporic acꞌux tak chi cow chiri̱j take cꞌuhtunic reꞌ xabiraj tak ku̱cꞌ on xatijej tak ru̱cꞌ riliric wach i pe̱t hu̱j xkatakꞌa̱ꞌ je aweh tak. \p \v 16 Nok kꞌoro̱j chic lok reꞌreꞌ, yuꞌna nanibanam johtok niti̱j chawi̱j tak chiwach kAja̱w Dios chꞌi̱l i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric, chi wehtꞌalim chi quicabchelal take reꞌ xa eli̱c woꞌ kojquicꞌax cho eh xa eli̱c woꞌ nquicꞌuhtaj cho quichakꞌlamil keh. Ruꞌum aj reꞌreꞌ hoj maꞌ xa reꞌ ta ncowjic kacꞌux chi ricꞌamaric na̱ i niminic wilco̱j wi̱ꞌ jeꞌ laꞌ woꞌ eli̱c nkatik juꞌ richꞌiquinjic kacꞌux chiqui̱j take reꞌ. \v 17 Chiwach aj kAja̱w Jesus jeꞌ woꞌ chiwach Ajabe̱s Dios niban niti̱j. Jeꞌ woꞌ nipahkaj queh chi quicowsaj acꞌux tak reh chi na̱tikim tak juꞌ ribanaric i holohic laj cꞌacharic eh jeꞌ woꞌ chi na̱tikim tak juꞌ rikꞌormojic holohic laj kꞌoric. \c 3 \s1 Reꞌ maꞌ Lu̱ꞌ ripahkaj queh aj // niminel chi nacaꞌnam quiti̱j chiri̱j \p \v 1 Chiri̱j chic ribanaric niti̱j reꞌreꞌ, yuꞌna hat-tak wich aj niminel nwa̱j nipahkam aweh tak chi nanaꞌn ati̱j tak chiri̱j kacamaj chi aj kꞌorol reh rikꞌorbal i Dios, chapahkaj tak johtok reh Dios chi reꞌ rikꞌorbal eno̱j lok rikꞌormojic chi maꞌ hab ta wach enkꞌetbic wach. Chi jeꞌ reꞌ, reꞌ take cꞌacharel equibirinic reh eta nak nquicꞌul chi lo̱kꞌ eh ewoꞌ nquinimej jeꞌ ricab xaꞌn hat-tak. \v 2 Jeꞌ woꞌ chic nachaꞌn ati̱j tak chiki̱j, chapahkaj woꞌ tak johtok reh Dios chi ekojcoꞌljic chi quiwach take winak yibel quiwach eh maꞌ holohic ta quinoꞌjbal. Jeꞌ reꞌ chapahkaj tak johtok reh maj china̱ acꞌal wili wilic take cꞌacharel cꞌahbil quinoꞌjbal. Jeꞌ reꞌ nikꞌor ruꞌum nok maꞌ chiꞌnchel ta suk nquibiraj chi naquichꞌica̱b quicꞌux chiri̱j i Jesus. \v 3 Reꞌ cok ruꞌ, chiwach i yibel wach noꞌjbal nchalic cu̱cꞌ take cꞌacharel reꞌreꞌ, maꞌ tiyoꞌjic tak maj reꞌ rikꞌorom cho Dios chi naca̱t tak ricoꞌlem chiwach i noꞌjbal reꞌreꞌ eh jeꞌ woꞌ chi nariyeb awansil tak reh chi encowjic acꞌux tak chipam i niminic, reꞌreꞌ til naribanam woꞌ chi narimanlajic wach. \v 4 Ruꞌum aj reꞌ, reꞌ hoj til chꞌiclic woꞌ kacꞌux chi reꞌ kakꞌorom aweh tak, reꞌ na̱cꞌamam woꞌ tak na̱ cu yuꞌna chi kꞌi̱j reꞌ hat-tak na̱tikim woꞌ tak juꞌ ricꞌamaric na̱ maj reꞌ kAja̱w Dios ntoꞌbonic aweh tak. \v 5 Jeꞌ reꞌ kꞌuruꞌ reꞌ hin nipahkaj chi reꞌ ta nak i Jesus reꞌ Pahbamaj chi Kꞌatal Kꞌoric, ericꞌuyuꞌsaj awa̱mna tak chi enatik tak juꞌ i noꞌjbal chi tiꞌ enawicꞌraj tak i Dios eh jeꞌ woꞌ, chiyew ta nak cho awansil tak chi ricuyuric take tiꞌcꞌaxic nacꞌul tak jeꞌ ricab nok reꞌ Jesus xicuy ransil nicꞌ nimal take tiꞌcꞌaxic xicꞌul. \s1 Reꞌ kꞌoric chiqui̱j take // maꞌ nca̱j ta camanic \p \v 6 Chi jeꞌ aj reꞌ kꞌuruꞌ wich aj niminel, chi yeꞌo̱j kajawric chi takꞌanic chana̱ tak ruꞌum Lokꞌ laj Ajabe̱s Jesus reꞌ Pahbamaj chi Kꞌatal Kꞌoric, reꞌ hin nipahkaj aweh tak rinimjic i kꞌoric wili: Reꞌ hat-tak ma̱junehtej awi̱b tak cu̱cꞌ take aj niminel cꞌahchiꞌ que̱b chi cꞌacharic pan siquilal eh maꞌ cꞌahchiꞌ ta quicꞌamam na̱ i cꞌuhbal kakꞌorom cho aweh tak chiri̱j camanic. \v 7 Reꞌ riwi̱ꞌ chi cꞌahchiꞌ nipahkam je aweh tak rinimjic reꞌreꞌ, reꞌ chi reꞌ hat-tak awehtꞌalim tak chic chi curman chi nakacamanic tak. Chaj aj bih noꞌjbal xawilow tak ku̱cꞌ hoj kꞌuruꞌ? Reꞌ hat-tak xawilow tak chi naxojwihꞌic awu̱cꞌ tak, til katꞌul kawach chi camanic eh maꞌxta bih xkasiquilej wach. \v 8 Jeꞌ woꞌ, xawilow tak chi maꞌ hab ta wach aweh tak xkachꞌiꞌtaj ru̱cꞌ kawaꞌ kaha̱ꞌ reꞌ laꞌ hoj xoj-johtic akꞌab on cu wahkꞌek woꞌ ti xoj-uctic chi camanic sicꞌbal ritzꞌakil paꞌ bih keh reh chi jeꞌ reꞌ maꞌ xcahnic ta jenoꞌ ihk chana̱ tak chi kilmijic i hoj. \v 9 Reꞌ nak til ricꞌul chi keh chi xkaꞌn, reꞌ chi xkapahkaj nak katoꞌbal aweh tak ruꞌum chi cꞌahchiꞌ kacamanic chaxilac tak xa reꞌ laꞌ maꞌ jeꞌ ta reꞌ xkaꞌn ruꞌum nok ru̱cꞌ kanoꞌjbal chi camanic xka̱j kacꞌuhtam aweh tak chi jeꞌ woꞌ reꞌ na̱banam hat-tak. \v 10 Maꞌ xa reꞌ ta reꞌ xkaꞌn, xkakꞌor laꞌ aweh tak chi na̱nimem tak i noꞌjbal wili naxojwihꞌic woꞌ cho chaxilac tak: \p «Maꞌ hab ta wach jenoꞌ cꞌacharel tanlic chiri̱j chi eriyew riwaꞌ riha̱ꞌ jenoꞌ cꞌacharel maꞌ raj ta camanic, nqui xkakꞌor cho aweh tak. \p \v 11 Yuꞌna cꞌahchiꞌ woꞌ chic kacaꞌpechem je rikꞌormojic aweh tak maj xcꞌulic lok ribiral ku̱cꞌ chi wilic take aj niminel chaxilac tak cꞌacharic ncaꞌn pan siquilal eh xa chamo̱l toco̱m chic camanom nok wilque̱b. \v 12 Queh take jarub paꞌ take chi aj niminel jeꞌ reꞌ ncaꞌn chaxilac tak, nkapahkaj je queh wili jeꞌ ricab chi reꞌ ta nak i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric cꞌahchiꞌ ripahkanic je queh: \p «Chacuy, maꞌ tiwihꞌic tak chic pan siquilal ticamanok laꞌ tak rakbal ritzꞌakil awaꞌ aha̱ꞌ tak, nqui nkakꞌor je queh. \p \v 13 Reꞌ hat-tak kich aj niminel reꞌ cꞌahchiꞌ abanam tak i haj wilic tare̱t chi banaric, nkapahkaj woꞌ je aweh tak chi maꞌ nkajic acꞌux tak chi ribanaric i holohic laj noꞌjbal chi camanic xa ruꞌum nawilow tak chi wilic take cꞌacharel maꞌ nca̱j ta camanic. \p \v 14 Chi kꞌoro̱j chic lok reꞌreꞌ, yuꞌna nikꞌor woꞌ chic aweh tak i wili: Wi wilic ok nchel jenoꞌ hab wach maꞌ ra̱j ta rinimem take kꞌoric xkatakꞌa̱ꞌ rikꞌormojic je aweh tak chipam i hu̱j wili, chakꞌor tak lok ribiral queh take toco̱m chic awich aj niminel tak reh chi naquinaꞌbem woꞌ nicꞌ wach rinoꞌjbal aj niminel reꞌreꞌ. Ru̱cꞌ rinoꞌjbal aj niminel reꞌreꞌ, nkapahkaj woꞌ jeꞌ aweh tak chi ma̱tuna̱ꞌ chic awi̱b tak ru̱cꞌ cu rehtal rijal wach rinoꞌjbal, reh chi jeꞌ reꞌ nachicꞌraj ri̱b chi maꞌ holohic ta cꞌahchiꞌ ribanam, enoquic cho riqꞌuixꞌic chawach tak. \v 15 Ru̱cꞌ ripahkaljic aweh tak chi maꞌxta chic atuna̱b awi̱b tak ru̱cꞌ aj niminel reꞌreꞌ, nkapahkaj woꞌ aweh tak ma̱ban tak chi maꞌ nawa̱j ta tak chic wach, chacoj laꞌ tak rinoꞌjbal chi coric jeꞌ ricab naꞌn tak queh awich aj niminel tak reꞌ take sukquil awu̱cꞌ tak. \s1 Reꞌ cohlsbal wach kꞌoric cu̱cꞌ // take niminel aj Tesalo̱nica \p \v 16 Yuꞌna hat-tak wich aj niminel nkapahkaj johtok reh Dios chi reꞌ ta nak i kAja̱w Jesus reꞌ aj yeꞌol reh sukquil cꞌuxlis xa chi chiyew ta woꞌ nak cho rinimal sukquil cꞌuxlis chana̱ tak reh chi maꞌxta ok cꞌaxquilal chana̱ tak. Jeꞌ woꞌ, nkapahkaj johtok reh chi reꞌ ta woꞌ i Jesus wihꞌok pan acꞌacharic chawunchelal tak. \p \v 17 Chiri̱j chic i kapahkanic reꞌreꞌ, yuꞌna nikꞌor je aweh tak chi reꞌ take kꞌoric reꞌ nikꞌorom jok aweh tak wili chi riyeꞌeric risukquil acꞌux tak, til reꞌ hin maꞌ Lu̱ꞌ cꞌahchiꞌ nitzꞌihminic reh. Reꞌ riwi̱ꞌ chi reꞌ take cohlsbal wach nikꞌorbal pan tak juꞌjun chi nihu̱j nitakꞌa̱ꞌ je, til hin quintzꞌihminic je reh ru̱cꞌ nah nikꞌab, reꞌ chi reꞌ take aj niminel naquicꞌul nihu̱j enquirak chiri̱j chi til hin woꞌ cꞌahchiꞌ nitakꞌanic je reh. \v 18 Jeꞌ aj reꞌ kꞌuruꞌ, nicohlaj wach i hu̱j wili ru̱cꞌ take kꞌoric wili: Reꞌ ta nak i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric chiyew cho ratoꞌbil chana̱ tak. Jeꞌ reꞌ nwa̱j chi chiban cho awu̱cꞌ tak.