\id 1TI - Pokomchi Occidental NT \h 1 TIMOTEO \toc1 Reꞌ pe̱t hu̱j xitzꞌihmbaj i maꞌ Lu̱ꞌ reh Timote̱yo \toc2 1 TIMOTEO \toc3 1 Ti \mt2 Reꞌ pe̱t hu̱j xitzꞌihmbaj i maꞌ Lu̱ꞌ reh \mt1 Timote̱yo \c 1 \s1 Til nah kꞌab maꞌ Lu̱ꞌ ntzꞌihminic // reh i hu̱j wili \p \v 1 Reꞌ cꞌahchiꞌ ritzꞌihminic je reh hu̱j wili, reꞌ hin maꞌ Lu̱ꞌ. Reꞌ hin naxinpahbabjic chi aj kꞌorol ribiral i Jesus reꞌ Pahbamaj chi Kꞌatal Kꞌoric, ar xchalic rikꞌormojic ru̱cꞌ i Dios reꞌ aj coꞌlonel keh eh jeꞌ woꞌ ar xchalic rikꞌormojic ru̱cꞌ i Ajabe̱s Jesus reꞌ nkarak wi̱ꞌ chꞌiquinbal kacꞌux. \v 2 Reꞌ hin cꞌahchiꞌ nitzꞌihmbam je hu̱j wili aweh hat Timote̱yo reꞌ xaꞌn chi til jeꞌ hat wacꞌu̱n naxapꞌut johtok jenaj chic acꞌ cꞌacharic ru̱cꞌ rinimjic i cꞌuhbal xnikꞌor aweh chiri̱j i Jesus. Jeꞌ reꞌ kꞌuruꞌ Timote̱yo tinicꞌalenej je eh niban je niti̱j chawi̱j chiwach i kAja̱w Dios chꞌi̱l i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric chi kana̱. Jeꞌ reꞌ niban reh chi reꞌ ta nak take reꞌ enquiyew cho catoꞌbil chana̱, equicꞌaxbic aweh eh equiyeꞌbic woꞌ sukquil cꞌuxlis pan acꞌacharic. \s1 Reꞌ take chucul aj cꞌuhbalanel curman // chi naquicana̱b i cꞌuhbalanic ncaꞌn \p \v 3 Nok qꞌuisi̱n nak chic maꞌ quino̱j ar Masero̱nya, reꞌ hin xnikꞌor aweh chi na̱cahnic ar E̱peso. Jeꞌ woꞌ, xnipahkaj woꞌ aweh chi na̱kꞌorom queh take aj chucul aj cꞌuhbalanel cꞌahchiꞌ quicꞌuhtunic reh take cꞌuhbal maꞌ cꞌuhtumaj ta kuꞌum hoj aj niminel reh Jesus chi naquimayam i cꞌuhtunic cꞌahchiꞌ caꞌnam. \v 4 Jeꞌ woꞌ chiqui̱j take cꞌahchiꞌ quibirinic reh cꞌuhbal reꞌreꞌ, xnipahkaj woꞌ aweh chi na̱kꞌorom queh chi quimay woꞌ ribirmijic take xa tikꞌimaj wach ribiral chꞌi̱l take tusuj wach bihnal sicꞌbal ri̱j cu haj ntzꞌuhcric cho quijaꞌquil take ma̱m tiꞌt. Reꞌ riwi̱ꞌ chi jeꞌ reꞌ xnipahkaj aweh chi na̱banam reꞌ chi ruꞌum take cꞌuhtunic cꞌahchiꞌ quibiram reꞌreꞌ nbanic chi nchalic wolonic i̱b chi quixilac take cꞌacharel quicꞌulbic reh. Chi wi̱n hin, sak bih nak chi queh chi reꞌ take cꞌacharel reꞌreꞌ ricowsjic ta nak quicꞌux xcaꞌn chiri̱j i Dios, ra̱j wili reꞌ take cꞌuhtunic ncaꞌn maꞌ riyew ta kꞌab queh chi encaꞌn chi jeꞌ reꞌ. Jeꞌ reꞌ nikꞌor maj xa reꞌ woꞌ wach wi xquichꞌica̱ꞌ quicꞌux chiri̱j i Jesus encowjic quicꞌux. \v 5 Jeꞌ woꞌ, reꞌ nwa̱j chiri̱j chi jeꞌ reꞌ na̱banam reh chi reꞌ take aj niminel enquicꞌax qui̱b ru̱cꞌ i cꞌaxoj i̱b nwihꞌic nok maꞌxta nechꞌ ok cꞌahbilal pan ca̱mna, on nok suk wilic quicapew-bal ruꞌum nquicꞌraj chi maꞌxta jenoꞌ mahc ncojoric chiqui̱j ruꞌum i Dios, on nok chꞌiclic quicꞌux chi manlic chiri̱j ruꞌ. \v 6 Reꞌ take chucul laj aj cꞌuhbalanel reꞌreꞌ maꞌ jeꞌ ta chic reꞌ riwi̱ꞌ i cꞌaxoj i̱b ncaꞌn. Ruꞌum chi sahchanak chic quinoꞌjbal xa cꞌahchiꞌ woꞌ que̱b chi cꞌuhbalanic reꞌ maꞌxta bih toꞌbonic riban queh cꞌacharel. \v 7 Jeꞌ woꞌ chic, xa kꞌe̱ꞌ chic ncaꞌn qui̱b ru̱cꞌ ricꞌuhtjic i Cꞌuhbal Yeꞌo̱j reh Moyses xa reꞌ laꞌ maꞌ nquirak ta woꞌ chiri̱j i cꞌuhbal reꞌreꞌ nancaꞌn ricꞌuhtjic. \v 8 Tzꞌa̱b i hoj aj niminel reh Jesus til nkarak chiri̱j chi coric i cꞌuhbal reꞌreꞌ eh ruꞌum reꞌ nkakꞌor chi reꞌ take tijbal wilque̱b chipam til tare̱t take xa reꞌ laꞌ curman chi encꞌamaric na̱ chi coric. \p \v 9 Reh chi jeꞌ reꞌ enbanjic, curman chi narehtꞌaljic i wili: Reꞌ Cꞌuhbal Yeꞌo̱j reh Moyses maꞌ xcanabjic ta cahnok cuꞌum ta nak queh i coric wach quibanic, xcanabjic laꞌ cahnok chi chꞌukbal kꞌoric chi quina̱ take nquikꞌihtaj qui̱b chꞌi̱l take maꞌ nquibiraj ta kꞌoric chiwach i cꞌuhbal reꞌreꞌ. Jeꞌ woꞌ chic chi quixilac take reꞌ wilque̱b woꞌ take jeꞌ wili quinoꞌjbal: Reꞌ take reꞌ maꞌ coric ta quiwach ruꞌum i mahc ncaꞌn, reꞌ take maꞌ nquiyohlej ta wach i Dios ruꞌum chi ncahnic chi seꞌlbal pan nakꞌquiwach, reꞌ take cansanel quitu̱t caja̱w eh chꞌi̱l woꞌ take cansem cas quicha̱kꞌ. \v 10 Jeꞌ woꞌ chic reꞌ cꞌuhbal reꞌreꞌ xcanabjic woꞌ cahnok chi chꞌukbal kꞌoric chi quina̱ take quibanic cꞌoyomal, chi quina̱ take nquituna̱ꞌ qui̱b chi cꞌacharic chi quich winak qui̱b on quich ixok qui̱b, chi quina̱ woꞌ take aj sacanel tumi̱n ru̱cꞌ relkꞌjic jenoꞌ cꞌacharel eh chi quina̱ woꞌ take aj chucul kꞌoric jeꞌ ricab take maꞌ nquikꞌor ta coric nanquiyew quikꞌorbal. Reh aj chi chꞌukbal kꞌoric chi quina̱ take reꞌ, xcanabjic i cꞌuhbal reꞌreꞌ jeꞌ woꞌ chi chꞌukbal kꞌoric chi quina̱ take jarub paꞌ nquikꞌihtaj qui̱b chiwach i xa paꞌ bih tijbal ncꞌuhtunic reh ricorquil ribiral i Dios \v 11 jeꞌ ricab i holohic laj tijbal nkacꞌuhtaj i hoj reꞌ nkꞌoric chiri̱j i Jesus. Reꞌ tijbal reꞌreꞌ, reꞌ nkꞌoric woꞌ chiri̱j rinimal wach rilokꞌil i Dios i Lokꞌ laj Dios nkalokꞌej wach i hoj aj niminel, reꞌ aj reꞌ nicꞌuhtaj i hin ruꞌum chi reꞌ Dios xichꞌica̱ꞌ ricꞌux chiwi̱j nanikꞌorom reꞌreꞌ. \s1 Reꞌ Dios xpahbanic maꞌ Lu̱ꞌ // chi aj kꞌorol riCꞌuhbal i Dios \p \v 12 Reꞌ Lokꞌ laj Ajabe̱s Jesus reꞌ Pahbamaj chi Kꞌatal Kꞌoric chi kana̱ reꞌ woꞌ reꞌ nyeꞌbic wansil chi nanicamanic chiwach chi coric. Reꞌ hin kꞌe̱ꞌ nitioxej johtok reh ruꞌum nok xichꞌica̱ꞌ ricꞌux chiwi̱j chi nanicamanic chiwach chi aj kꞌorol riCꞌuhbal eh reꞌ aj woꞌ reꞌ i camanic cꞌahchiꞌ nibanam. \v 13 Coric ruꞌ, najtir cho kꞌi̱j hin nak cho aj tzꞌuju̱l reh i Dios, hin nak cho banol tiꞌcꞌaxic queh take raj tahkanel i Jesus eh jeꞌ woꞌ hin nak cho aj tzꞌakol wach kꞌoric chiqui̱j. To̱b ta woꞌ jeꞌ nak reꞌ quinbanic cho, reꞌ Dios xiquetelej cho niwach ruꞌum chi maꞌ nirak ta nak chiri̱j chaj bih cꞌahchiꞌ nibanam ruꞌum ricowil ninoꞌjbal chi maꞌ nwa̱j ta nak rinimjic i Jesus. \v 14 Ruꞌum aj xiban i Dios wu̱cꞌ, reꞌ hin nikꞌor reꞌ Lokꞌ laj Ajabe̱s Jesus reꞌ Pahbamaj chi Kꞌatal Kꞌoric chi kꞌe̱ꞌ woꞌ chic cho richakꞌlamil wu̱cꞌ i hin eh ruꞌum reꞌ yuꞌna chi reꞌ nicꞌacharic pan kꞌab chic i Jesus wilic, reꞌ hin nichop riman nicꞌux chiri̱j i Dios eh riman chic nicꞌax take was nicha̱kꞌ. \p \v 15 Jeꞌ reꞌ kꞌuruꞌ, ruꞌum chi reꞌ Dios xiricoj chi hin raj tzꞌeꞌ wa̱ch chi rikꞌormojic rikꞌorbal, nikꞌor aweh i coric laj kꞌoric wili reꞌ nkꞌoric chiri̱j chaj bih xiban i Jesus reꞌ Pahbamaj chi Kꞌatal Kꞌoric eh til kꞌe̱ꞌ woꞌ tare̱t chi enquicꞌul ru̱cꞌ i ca̱mna take chiꞌnchel cꞌacharel. Reꞌ aj wili i kꞌoric reꞌreꞌ: Reꞌ riwi̱ꞌ chi reꞌ kAja̱w Jesus xcꞌulic ayuꞌ wach acꞌal, reh chi quicoꞌljic take aj mahc jeꞌ ricab xiban wu̱cꞌ i hin reꞌ kꞌe̱ꞌ woꞌ chic xi̱cꞌ na̱ rinimal nimahc chi quiwach take aj mahc. \v 16 Reꞌ cok ruꞌ to̱b ta kꞌe̱ꞌ woꞌ chic xi̱cꞌ na̱ rinimal nimahc, reꞌ Dios xicꞌuhtaj cho riquetelbal chi nina̱. Jeꞌ reꞌ nikꞌor maj naxnipahkaj cuybal nimahc reh, reꞌ Jesus reꞌ Pahbamaj chi Kꞌatal Kꞌoric xiquetelej woꞌ cho niwach. Chi jeꞌ aj reꞌ chi cꞌuhtbal reh quichakꞌlamil wilic, reꞌ hin xincahnic chi rehtalil reꞌreꞌ chi quiwach take nca̱j niminic ruꞌum chi nca̱j woꞌ ehtric ru̱cꞌ i junelic cꞌacharic. \v 17 Ruꞌum aj reꞌ chi til woꞌ coric take kꞌoric nikꞌor, jeꞌ wili ti̱j niban: Xa jenaj woꞌ Dios wilic reꞌ nkalokꞌej wach eh xa reꞌ wach reꞌ til manlic aj noꞌjbal. Reꞌ kaDios reꞌreꞌ til manlic Kꞌatal Kꞌoric chi junelic i kꞌi̱j sakom, maꞌ hab ta wach jenoꞌ cꞌacharel ayuꞌ wach acꞌal rilom wach eh maꞌ quimic ta woꞌ ri̱j. Til kꞌormojok chi junelic kꞌi̱j sakom chi reꞌreꞌ kꞌe̱ꞌ rinimal rilokꞌil wilic eh kꞌe̱ꞌ woꞌ nimal wach rajawric, nqui ti̱j niban. \s1 Maꞌ riban ta chi reꞌ Timote̱yo // entzꞌahpic na̱ ricapew-bal ruꞌum // take toco̱m chic cꞌuhbalanic \p \v 18 Reꞌ hat Timote̱yo reꞌ xaꞌn chi til jeꞌ hat wacꞌu̱n ru̱cꞌ rinimjic i cꞌuhbal chiri̱j i Jesus, nikꞌor aweh chi chanimej take kꞌoric wili reꞌ ricꞌuꞌlej ri̱b chꞌi̱l i kꞌoro̱j cho najtir kꞌi̱j ruꞌum i rUxlabal i Dios chawi̱j i hat. Reꞌ aj wili take kꞌoric na̱nimem: Jeꞌ ricab ncaꞌn take sol nquiyew quicꞌux chi manlic chi kꞌakꞌanic jeꞌ woꞌ reꞌ hat chayew acꞌux chi manlic chi rikꞌeteric quiwach take aj cꞌuhbalanel reꞌ maꞌ coric ta quicꞌuhtunic ncaꞌn. \v 19 Timote̱yo, jeꞌ woꞌ chic maꞌ ntzꞌahpic na̱ acapew-bal chi maꞌ eta chic narak chiri̱j haj wilic ricorquilal i ra̱j banaric maj til nikꞌor aweh chi wilic take maꞌxta chic quicapew-bal chi rirakmajic chiri̱j haj wilic i ricorquilal ra̱j banaric eh ruꞌum reꞌ maꞌ ntuhkic ta quicapew-bal chipam rinimjic i Jesus \v 20 jeꞌ ricab xicꞌul maꞌ Himene̱yo chꞌi̱l maꞌ Lej. Reꞌ take reꞌ xnitꞌerej chic take lok chi quixilac take aj niminel eh chi jeꞌ reꞌ xicahnic pan kꞌab i aj Yahm. Jeꞌ reꞌ xniban queh ruꞌum chi kꞌe̱ꞌ xquikꞌihtaj qui̱b chiwach i Dios xa reꞌ laꞌ reꞌ xniban i hin, camanok ta nak queh chi ritijiljic qui̱b chi maꞌ riban ta chi nquikꞌihtaj qui̱b chiwach i Dios. \c 2 \s1 Reꞌ ribanaric i ti̱j reꞌ kꞌe̱ꞌ // nponic chiwach i Dios \p \v 1 Yuꞌna reꞌ chic i wili takꞌanic til curman woꞌ chi nanikꞌorom je aweh: Til chaꞌn ati̱j chiwach i Dios. Reꞌ cok ruꞌ chiqui̱j ok chiꞌnchel take cꞌacharel chaꞌn ati̱j. Chipam ati̱j na̱banam, chapahkaj ritoꞌbal i Dios chi quina̱ chiꞌnchel eh chatioxej reh Dios ru̱cꞌ quitobjic enbanaric. \v 2 Jeꞌ woꞌ, chaꞌn ati̱j tak chiqui̱j take kꞌatal kꞌoric eh jeꞌ woꞌ chiqui̱j take wilic cajawric chaxilac tak. Jeꞌ reꞌ chaꞌn tak reh chi enyeꞌeric quinoꞌjbal ruꞌum i Dios reh chi ekojwihꞌic pan sukquil cꞌuxlis. Ru̱cꞌ reꞌreꞌ ekojcꞌacharic chi suk chi rilokꞌonjic wach i Dios jeꞌ woꞌ chi quitobjic take kas kacha̱kꞌ eh jeꞌ woꞌ chi riyeꞌeric quiwaꞌric ruꞌ. \v 3 Chaꞌn ati̱j tak kꞌuruꞌ chiqui̱j chiꞌnchel ruꞌum nok chiwach i kAja̱w Dios reꞌ aj Coꞌlonel keh, kꞌe̱ꞌ tare̱t chi jeꞌ reꞌ enbanaric eh kꞌe̱ꞌ woꞌ nponic chiwach. \v 4 Til jeꞌ reꞌ nipahkaj maj reꞌ kaDios kꞌe̱ꞌ ra̱j chi chiꞌnchel take cꞌacharel naquirakam chiri̱j i tijinic ncꞌuhtjic wi̱ꞌ ricorquil ribiral i Jesus reh chi jeꞌ reꞌ naquicoꞌljic woꞌ chiwach i tiꞌcꞌaxic chalic reh. \v 5 Reꞌ tijinic reꞌreꞌ ricꞌuhtaj woꞌ keh chi xa jenaj woꞌ Dios wilic reꞌ nkalokꞌej wach i hoj. Jeꞌ woꞌ, ricꞌuhtaj woꞌ chi reꞌ Jesus reꞌ Pahbamaj chi Kꞌatal Kꞌoric xcꞌulic asjok ayuꞌ wach acꞌal jeꞌ ricab asjic nkaꞌn i hoj cꞌacharel eh xa reꞌ woꞌ reꞌ maꞌ hab ta chic jenoꞌ wach ntoꞌbonic queh cꞌacharel chi wihꞌic pan sukquil cꞌuxlis ru̱cꞌ i Dios. \v 6 Jeꞌ reꞌ nikꞌor maj ru̱cꞌ riyeꞌeric ri̱b pan quimic chiki̱j i hoj cꞌacharel, chi kunchelal i hoj aj niminel reh Jesus yeꞌo̱j chic keh chi maꞌ eta chic nkacꞌul i tiꞌcꞌaxic chiri̱j i kamahc. Ru̱cꞌ aj rikꞌormojic i tijinic reꞌreꞌ, chipam i rikꞌijil tikꞌimaj cho wach ruꞌum i Dios, xicꞌuhtaj chi til ra̱j chi chiꞌnchel take cꞌacharel naquicoꞌljic \v 7 eh reh chi naribirmijic i haj wilic ra̱j i Dios, reꞌ Jesus xiripahba̱ꞌ chi aj kꞌorol ribiral ricꞌacharic. Reꞌ cꞌahchiꞌ nikꞌorom wili maꞌ chucuj kꞌoric ta, til laꞌ coric chiwach Jesus. Maꞌ xa reꞌ ta reꞌ xiban wu̱cꞌ i Jesus, xiripahba̱ꞌ laꞌ woꞌ chi hin aj tijinel jeꞌ woꞌ chi aj cꞌuhbalanel queh take tinamit maꞌ reꞌ ta ra̱ꞌ riꞌsil cho maꞌ Israhel reh chi nanikꞌorom queh ricorquilal i cꞌuhbal reꞌreꞌ, reꞌ chꞌiclic wi̱ꞌ kacꞌux i hoj aj niminel reh Jesus. \s1 Reꞌ coric wach noꞌjbal // ra̱j chi naricꞌuhtunic lok // cu̱cꞌ take aj niminel \p \v 8 Reꞌ hin nwa̱j woꞌ chi xa paꞌ yeꞌa̱b nquimol wi̱ꞌ qui̱b chi rilokꞌonjic wach i Dios, reꞌ take aj niminel reh Jesus caꞌn johtok quiti̱j chi maꞌxta nechꞌ ok mahc pan quicꞌacharic, chi maꞌxta nechꞌ ok chꞌiꞌc pan ka̱mna eh chi maꞌxta woꞌ soꞌ cꞌahanic i̱b cu̱cꞌ. \v 9 Jeꞌ woꞌ chic, nwa̱j chi reꞌ take kana̱b pan niminic xa coric ok woꞌ ti wach ritikꞌinjic qui̱b caꞌn ru̱cꞌ quisoꞌ maꞌ ok nquitikꞌa̱ꞌ qui̱b xa ruꞌum quiyusquil. Reꞌ wili ra̱j rikꞌorom chi maꞌ curman ta chi naquitikꞌa̱b qui̱b ru̱cꞌ qꞌuih tzꞌa̱k laj tzꞌih, on chi naquixoyem wach quina̱ ru̱cꞌ take nworwotic laj chꞌihchꞌ, on nworwotic laj abaj. Til nipahkaj je kꞌuruꞌ chi quicꞌuhtaj lok coric wach noꞌjbal \v 10 reꞌ ncꞌutunic lok wi̱ꞌ i holohic laj bano̱j jeꞌ ricab ncaꞌn take kana̱b pan niminic reꞌ nquiyohbalej wach i Dios chi coric. \p \v 11 Chꞌi̱l i kꞌoro̱j lok reꞌreꞌ, nwa̱j woꞌ nikꞌorom aweh i wili chiqui̱j take kana̱b pan niminic: Nanquimol qui̱b i comonil aj niminel chi ritijiljic ri̱j rikꞌorbal i Dios, tare̱t chi reꞌ take ixok equiwihꞌic chi quixilac take winak xa reꞌ laꞌ quiwihꞌok ar chi xa aj birinel ok take eh quibiraj woꞌ kꞌoric ru̱cꞌ chaj bih nkꞌormojic chi quina̱. \v 12 Jeꞌ ok reꞌ caꞌn maj reꞌ hin maꞌ niyew ta kꞌab chi reꞌ take ixok equiꞌoquic chi cꞌuhtunic china̱ i winak on chi enwihꞌic rajawric china̱ chi ribanjic jenoꞌ cꞌuhtunic. Junpech woꞌ chic nikꞌor aweh tak i wili: Tare̱t chi reꞌ take ixok quiwihꞌok chi quixilac take winak chi tijinic xa reꞌ laꞌ xa birinel ok take. \p \v 13 Reꞌ ribiral i Aran chꞌi̱l i E̱wa ncamanic keh chi enkarak chiri̱j i cꞌahchiꞌ nikꞌorom. Cꞌolok pan acꞌux tak chi pan pꞌutbal cho reh cꞌacharic maꞌ reꞌ ta E̱wa xtikꞌinjic chi pe̱t, reꞌ laꞌ Aran eh cu chiri̱j ruꞌ xtikꞌinjic i E̱wa. \v 14 Jeꞌ woꞌ cꞌolok pan acꞌux tak chi maꞌ reꞌ ta Aran xjotꞌoric ruꞌum aj Yahm, reꞌ laꞌ i E̱wa. Ruꞌum chi jeꞌ reꞌ xcꞌuluric, reꞌ E̱wa xmahcanic chiwach i Dios. \v 15 Reꞌ cok ruꞌ to̱b ta woꞌ jeꞌ reꞌ xiban, xa xehtric woꞌ coꞌlbal ruꞌum reh Acꞌunbe̱s xasjic. Jeꞌ woꞌ reꞌ ncꞌuluric cu̱cꞌ take ixok yuꞌna chi quiꞌehtric woꞌ coꞌlbal, reꞌ cok ruꞌ wi reꞌ take reꞌ xa cꞌahchiꞌ chic quichꞌubsam qui̱b enquikꞌahsaj quicapew-bal chi naquichꞌica̱b quicꞌux chiri̱j Jesus, chi equicꞌacharic pan cꞌaxoj i̱b eh jeꞌ woꞌ chi equiwihꞌic pan tzꞌiro̱j wach cꞌacharic. \c 3 \s1 Reꞌ take noꞌjbal ra̱j ilmijic cu̱cꞌ // take aj ilo̱l reh ritinami̱t i Dios \p \v 1 Wilic jenaj chic kꞌoric reꞌ til ricorquilal nkꞌoric chiri̱j jenoꞌ hab wach ra̱j ribanam chi aj ilol reh ritinami̱t i Dios. Jeꞌ wili rikꞌor i kꞌoric reꞌreꞌ: \p «Hab wach ra̱j ribanam chi aj ilo̱l reh ritinami̱t i Dios, lo̱kꞌ riwaꞌric i camanic ricꞌax wach ribanaric, nqui rikꞌor i kꞌoric reꞌreꞌ. \p \v 2 Ruꞌum aj reꞌ, reꞌ hin nikꞌor i wili: Tare̱t chi xa hab wach ericꞌax wach i camanic reꞌ lo̱kꞌ riwaꞌric reꞌreꞌ, reꞌ cok ruꞌ reꞌ ncꞌaxbic wach reꞌreꞌ til ok coric wach ricꞌacharic chi maꞌ haj ta kꞌilmajic ra̱j soꞌ ru̱cꞌ jenoꞌ maꞌ holohic ta laj bano̱j eh til xa jenaj ok woꞌ rehqꞌue̱n wilic chiwach. Jeꞌ woꞌ chic, reꞌ winak reꞌreꞌ curman chi yeꞌo̱j ok woꞌ riwaꞌric rikꞌorbal, maꞌ ok xa mahnicꞌ chi mahcanic nchol laꞌ ok ribehsjic ricapew-bal. Jeꞌ woꞌ, xa tehlic ok woꞌ kꞌab chi quicꞌulmujic take xa hab wach equiponic chi aj pahkem patal ru̱cꞌ, cꞌuhtunok woꞌ lok chi wilic rinoꞌjbal eh tꞌulic ok chi cꞌuhtunic. \v 3 Ruꞌum chi jeꞌ reꞌ noꞌjbal ra̱j uyuꞌnjic reh i cꞌacharel reꞌ ra̱j ribanam chi aj ilol reh ritinami̱t i Dios, maꞌ riban ta woꞌ chi aj xohcꞌrel laj winak, maꞌ woꞌ aj cojol wolic, xa ta woꞌ nak chi aj cꞌaxol wach tumi̱n. \p Jeꞌ reꞌ kꞌuruꞌ, reꞌ cꞌacharel reꞌ ra̱j ribanam chi aj ilo̱j queh ritinami̱t i Dios cꞌuhtunok lok chi wilic chakꞌlamil ru̱cꞌ eh chi wilic woꞌ kꞌochlic wach cꞌuxlis ru̱cꞌ. \v 4 Jeꞌ woꞌ chic, reꞌ cꞌacharel reꞌreꞌ curman chi naricholic rilmijic take raj pan pa̱t maj xa chi jeꞌ reꞌ enyeꞌjic rilokꞌil cuꞌum take rihaꞌlacꞌu̱n eh ewoꞌ quibirinic kꞌoric chiwach. \v 5 Maꞌ xa reꞌ ta reꞌreꞌ jeꞌ laꞌ woꞌ, curman chi ewoꞌ ncꞌuhtunic lok chi enchol quibehsjic take aj niminel maj hab wach nchol ricꞌamaric quibe̱h take raj pan pa̱t, ewoꞌ nchol ricꞌamaric quibe̱h take ritinami̱t i Dios. \v 6 Jeꞌ woꞌ, curman chi maꞌ reꞌ ta cu acꞌnel chipam i niminic maj wi cu acꞌnel enchopbic reh camanic reꞌreꞌ, maꞌ rinimslom nchel ri̱b eh chi jeꞌ reꞌ narichꞌukuric wach rimahc ruꞌum i Dios ruꞌum reh rinoꞌjbal jeꞌ ricab xcꞌuluric ru̱cꞌ aj Yahm naxinimsaj ri̱b chiwach i Dios. \v 7 Jeꞌ woꞌ chic, curman woꞌ chi holohic ok ribiral ricꞌacharic wilic lok chi quiwach take maꞌ jaꞌ reꞌ ta aj niminel take maj wi maꞌ holohic ribiral ricꞌacharic, maꞌ riban nchel chi reꞌ aj Yahm ericoj cho take chꞌiꞌc, on wolic reꞌ enpitbic reh ricamaj chi cꞌamol be̱h. \s1 Reꞌ riwi̱ꞌ cꞌacharic ra̱j // ilmijic cu̱cꞌ take caj toꞌo̱l aj // cꞌamol be̱h ritinami̱t i Dios \p \v 8 Xa hab paꞌ wach take nca̱j caꞌnam chi aj toꞌo̱l queh take cꞌamol be̱h ritinami̱t i Dios, curman woꞌ chi coric ok wach quinoꞌjbal. Reꞌ wili ra̱j rikꞌorom chi xa maꞌ ok no̱j nchalic quikꞌorbal. Jeꞌ woꞌ chic, maꞌ ok aj xohcꞌrel take eh maꞌ woꞌ chi aj cꞌaxol wach tumi̱n take. \v 9 Jeꞌ woꞌ, curman chi reꞌ take reꞌ chi sak pa̱m quicapew-bal ruꞌum chi maꞌxta chic quimahc chiwach i Dios, naquicꞌamam na̱ chi coric haj wilic i cꞌuhbal maꞌ kehtꞌalim ta nak ruꞌum chi maꞌ jaꞌ nquichꞌica̱ꞌ ta nak quicꞌux chiri̱j i Jesus. \v 10 Ruꞌum chi jeꞌ reꞌ ra̱j banaric, xa hab paꞌ wach ra̱j richopom na̱ camanic chi aj toꞌo̱l, curman woꞌ chic chi pe̱t naquiliric wi cꞌahchiꞌ quicꞌamam na̱ i cꞌuhbal reꞌreꞌ eh cu chiri̱j aj chic ruꞌ, wi xiliric chi maꞌxta chic bih ncalajic wi̱ꞌ ru̱cꞌ ricꞌamaric na̱ i cꞌuhbal reꞌreꞌ, erichop i camanic chi aj toꞌo̱l. \p \v 11 Jeꞌ woꞌ chic, chipam i camanic reꞌreꞌ curman woꞌ chi reꞌ quehqꞌue̱n take aj toꞌo̱l coric ok woꞌ wach quinoꞌjbal, maꞌ ok xa aj molol cꞌuta̱j take, maꞌ ok xa mahnicꞌ take chi mahcanic quichol laꞌ ok ribehsjic quicapew-bal eh chi xa naquiniminic chi manlic ru̱cꞌ paꞌ bih ra̱j banjic. \v 12 Jeꞌ woꞌ chic, jeꞌ ricab xnikꞌor chiqui̱j take aj cꞌamol quibe̱h ritinami̱t i Dios, reꞌ take aj toꞌo̱l queh curman chi xa jenaj ok quehqꞌue̱n eh quichol ok woꞌ ricꞌamaric quibe̱h take caj pan pa̱t. \v 13 Jeꞌ reꞌ kꞌuruꞌ xa hab wach naroquic chi camanic chi caj toꞌo̱l queh take cꞌamol be̱h chiban chi coric i ricamaj maj xa hab wach riban ricamaj chi coric chi caj toꞌo̱l take cꞌamol be̱h no̱j wihꞌok ribiral chi tare̱t laj aj camanom chiwach i Dios eh ru̱cꞌ reꞌreꞌ, reꞌ take aj niminel enquichꞌica̱ꞌ quicꞌux chiri̱j ruꞌum chi richꞌica̱ꞌ woꞌ ricꞌux ruꞌ chi manlic chiri̱j i kAja̱w Jesus. \p \v 14 Jeꞌ aj reꞌ riwi̱ꞌ kꞌuruꞌ i cꞌacharic ra̱j i Dios chi nacaꞌnam take raj camanom. Reꞌ kꞌoric reꞌreꞌ xiban nak chi cu reꞌ nanikꞌorom aweh naquiponok awu̱cꞌ eh jeꞌ reꞌ nikꞌor maj chꞌiclic je nicꞌux chi xa nicꞌ yuꞌ naniponic awu̱cꞌ Timote̱yo. Xa reꞌ laꞌ tob laꞌ jeꞌ reꞌ nicapaj ribanaric, reꞌ hin cꞌahchiꞌ nitzꞌihmbam je aweh wili yuꞌna \v 15 reh chi wi xinchahmic chic je soꞌ chi ojic, reꞌ hat awehtꞌalim chic nicꞌ wach riwi̱ꞌ ra̱j i Dios chi na̱banam acamaj chi aj ilol queh take aj niminel chopo̱j cho quina̱ ruꞌum i Dios jeꞌ ricab nok pan jenoꞌ pa̱t reꞌ woꞌ ajabe̱s nchopbic quina̱ take racꞌu̱n rixkꞌu̱n. Cꞌolok pan acꞌux chi nicꞌ paꞌ qꞌuihal hat-tak aj niminel wilca̱t tak ar chꞌi̱l woꞌ chiꞌnchel i hoj wilco̱j pan tak toco̱m chic yeꞌa̱b, no̱j kaꞌn xa hoj chic jenaj comonil reꞌ wilic wi̱ꞌ i cꞌachlic Dios chi kAjabe̱s. Chi jeꞌ reꞌ kawi̱ꞌ kunchelal i hoj aj niminel, kojwihꞌic chipam i comonil wili chi aj ilol reh chi maꞌ eta nyoj wach i Lokꞌ laj Cꞌuhbal ncꞌuhtunic reh ricorquilal ribiral i Dios jeꞌ ricab riban i tzꞌak chꞌiquimaj cho wi̱ꞌ jenoꞌ pa̱t on reꞌ take ro̱k pa̱t, reꞌ woꞌ take reꞌ cojo̱j take chi chopbal reh pa̱t reh chi maꞌ eta nyoj je. \v 16 Chipam aj i cꞌuhbal reꞌreꞌ, nkarak jenaj tijbal cꞌaxic nak cho rirakmajic chiri̱j cu rehtal xsakomsjic wach ruꞌum i Dios. Reꞌ tijbal reꞌreꞌ, til pan coric nikꞌor aweh chi kꞌe̱ꞌ woꞌ chic curman chi birmajic maj reꞌreꞌ jeꞌ wili rikꞌor: \q1 «Naxilmijic chi xcꞌacharic ayuꞌ wach acꞌal jeꞌ ricab ncꞌacharic jenaj cꞌacharel, \q1 reꞌ i Lokꞌ laj Uxlabal xcꞌuhtunic lok reh chi ntꞌoric wach rinoꞌjbal. \q1 Reꞌ take raj tzꞌeꞌ wa̱ch i Dios xquilow naxuctic woꞌ chic cho chi quixilac take camnak. \q1 Ru̱cꞌ reꞌreꞌ xkꞌormojic woꞌ ribiral queh take tinamit maꞌ reꞌ ta ra̱ꞌ riꞌsil cho maꞌ Israhel \q1 eh chi jeꞌ reꞌ xa haj tinamit wilque̱b wi̱ꞌ take reꞌ, wilic queh xiniminic reh ribiral reꞌreꞌ. \q1 Chiri̱j chic riwihꞌic ayuꞌ wach acꞌal, \q1 xcꞌulmujic woꞌ chic johtok ar pan taxa̱j, nqui tijbal reꞌreꞌ. \c 4 \s1 Reꞌ cꞌo̱j laj capew-bal nquicoj // take jotꞌo̱l laj aj cꞌuhbalanel \p \v 1 To̱b ta woꞌ jeꞌ reꞌ rikꞌor keh tijbal reꞌreꞌ, wilic take aj niminel cꞌahchiꞌ quicana̱b richꞌiquinjic quicꞌux chiri̱j i Jesus jeꞌ ricab woꞌ kꞌoro̱j chic cho ruꞌum i Lokꞌ laj Uxlabal chi jeꞌ reꞌ naricꞌuluric chipam take kꞌi̱j cꞌahchiꞌ koquic cok wi̱ꞌ chi kawach ruꞌum chi reꞌ chic take jotꞌo̱l laj cꞌuhbalanel reꞌ quicꞌuhtunic reh i kꞌoric nyeꞌeric queh cuꞌum maꞌ tob laj uxlabal, reꞌ chic reꞌ cꞌahchiꞌ quibiram. \p \v 2 Reꞌ take aj cꞌuhbalanel reꞌreꞌ xa jenaj cꞌo̱j laj capew-bal cꞌahchiꞌ quicojom, xa reꞌ laꞌ jeꞌ ricab nok jenoꞌ chicop nancojoric rehtalil ru̱cꞌ jenoꞌ tzꞌaꞌ laj chꞌihchꞌ ncꞌuhtunic lok chi ehchemaj chic i chicop reꞌreꞌ, jeꞌ woꞌ reꞌ take aj cꞌuhbalanel reꞌreꞌ nok maꞌ nquirak ta chic chiri̱j ribanaric i coric, nquiyew lok chi cꞌuhtjic chi reꞌ aj Yahm nehchenic queh. Chi jeꞌ reꞌ nancaꞌn i cꞌuhtunic, maꞌ nquikꞌor ta i coric \v 3 jeꞌ ricab ncaꞌn nancaꞌn i cꞌuhtunic chi maꞌ to̱b ta chi reꞌ take acꞌun ixkꞌun naquisiqꞌuim quehqꞌue̱n on quibahi̱l pan quicꞌacharic. Jeꞌ woꞌ chic, reꞌ take reꞌ cow nquikꞌor chi wilic take chicop maꞌ tare̱t ta chi cꞌuxuric to̱b ta chiwach i Dios reꞌ xtikꞌinic reh chiꞌnchel take chicop, maꞌ cꞌahchiꞌ ta kamahcanic i hoj aj niminel nankacꞌux take chicop reꞌreꞌ. Reꞌ cok ruꞌ, reꞌreꞌ ritakꞌa̱ꞌ woꞌ keh hoj reꞌ kehtꞌalim chic wach i coric laj cꞌuhbal chi nankaꞌn kawaꞌ kaha̱ꞌ, xa wilic ok woꞌ johtok katioxbal chiwach i Dios. \v 4 Jeꞌ reꞌ kꞌuruꞌ xa paꞌ bih cꞌuxbal nyeꞌeric aweh tak, chacꞌul tak eh ma̱kꞌor tak chi chiwach i Dios maꞌ tare̱t ta chi cꞌuxuric. Jeꞌ reꞌ nikꞌor ruꞌum nok nicꞌ paꞌ nimal take ritikꞌinic i Dios, tare̱t take chiꞌnchel xa reꞌ cok ruꞌ nachaꞌn awaꞌ aha̱ꞌ tak til chatioxej tak johtok reh Dios \v 5 maj chiꞌnchel i paꞌ bih nyeꞌeric chi cꞌuxuric, reꞌ Dios rikꞌorom cho chi lo̱kꞌ eh chi cuseꞌsemaj woꞌ cho ruꞌum nok reꞌ hat-tak naꞌn ati̱j tak china̱. \s1 Reꞌ noꞌjbal chi ribanaric chi // manlic raj camanom i Dios \p \v 6 Hat Timote̱yo, reh chi na̱banam chi hat manlic raj camanom i Jesus reꞌ Pahbamaj chi Kꞌatal Kꞌoric, curman chi reꞌ nicꞌ paꞌ nimal cꞌahchiꞌ nikꞌorom je aweh na̱kꞌorom woꞌ pan acꞌuhtunic cu̱cꞌ take aj niminel ar. Jeꞌ woꞌ chic jeꞌ ricab nok jenoꞌ tꞌuch acꞌun riban riwaꞌ riha̱ꞌ chi manlic reh chi nariqꞌuihic johtok chi suk, jeꞌ woꞌ reꞌ i hat curman woꞌ chi xa wilic ok woꞌ pan awa̱mna take kꞌoric kꞌoro̱j reh chi reꞌ take cꞌacharel enquichꞌica̱ꞌ quicꞌux chiri̱j i Jesus. Jeꞌ woꞌ reꞌ chaꞌn chiri̱j take tijinic cꞌahchiꞌ atahkem ri̱j reꞌ quicꞌuhtunic reh coric chiri̱j i Dios. \v 7 Chiri̱j lok wili ma̱coj ru̱cꞌ acapew-bal take xa paꞌ bih take cꞌuhtunic chiri̱j i xa tikꞌimaj wach ribiral on xa memil laj noꞌjbal, reꞌ laꞌ hat xa chiri̱j ok woꞌ noꞌjbal nyeꞌbic rilokꞌil i Dios chayew acꞌux reh chi jeꞌ ricab chi cꞌahchiꞌ ta nak ayeb acꞌux chi rikꞌochjic wach atiꞌjolal, enatik juꞌ awihꞌic chi cow acꞌux pan niminic. \v 8 Jeꞌ reꞌ nikꞌor maj jeꞌ ricab chi wilic take cꞌacharel jeꞌ ru̱cꞌ kꞌe̱ꞌ nquiyew quicꞌux chiri̱j rikꞌochjic wach quitiꞌjolal ruꞌum nok nquicꞌraj chi ru̱cꞌ reꞌreꞌ suk wilque̱b chi cꞌacharic ayuꞌ wach acꞌal, jeꞌ woꞌ reꞌ til kꞌe̱ꞌ woꞌ chic tare̱t chi enachop acꞌux chi cꞌacharic chipam i noꞌjbal xnikꞌor aweh. Jeꞌ reꞌ nikꞌor maj kꞌoro̱j cahnok chi hab paꞌ wach jeꞌ reꞌ cꞌacharic eriban, maꞌ xa reꞌ ta ayuꞌ wach acꞌal naricꞌacharic chi suk jeꞌ laꞌ woꞌ reꞌ nachalok i kꞌi̱j nabanjok i cꞌacharic ar pan taxa̱j. \v 9 Ruꞌum chi reꞌ kꞌoro̱j cahnok reꞌreꞌ til woꞌ coric laj kꞌoric, kꞌe̱ꞌ woꞌ tare̱t chi encꞌuluric cuꞌum chiꞌnchel cꞌacharel ru̱cꞌ i ca̱mna. \v 10 Ruꞌum aj reꞌ, reꞌ hat chꞌi̱l i hin cꞌahchiꞌ kacamanic chi cow chiwach i Dios chi rikꞌormojic i kꞌoro̱j cahnok reꞌreꞌ to̱b ta nkacꞌul take tiꞌ ruꞌum reh kacamaj. Reꞌ kacamaj reꞌreꞌ cꞌahchiꞌ kaꞌnam chi chꞌiclic kacꞌux chiri̱j i cꞌachlic Dios reꞌ kajCoꞌlonel i hoj nicꞌ nimal kojniminic chic reh. Reꞌ Dios ra̱j woꞌ ricoꞌlem take chiꞌnchel cꞌacharel. \p \v 11 Jeꞌ aj reꞌ ruꞌ Timote̱yo nicꞌ paꞌ nimal xnikꞌor je aweh chachop woꞌ acꞌux chi ricꞌuhtjic queh take aj niminel. Reꞌ hat chakꞌor chaj bih take takꞌamaj aweh chi na̱cꞌuhtam \v 12 eh ma̱cana̱ꞌ chi hab wach enpitbic aweh ru̱cꞌ acamaj chi cꞌamol be̱h xa ruꞌum chi cu hat qꞌuijol, reꞌ laꞌ ok i cꞌacharic naꞌn chipam aqꞌuijolal camanok chi quiwach take awich aj niminel chi cꞌuhtbal queh nicꞌ wach i holohic laj cꞌacharic raj chi encaꞌn. Jeꞌ woꞌ chic, reꞌ anoꞌjbal camanok woꞌ chi quiwach ruꞌ cꞌuhtbal queh i holohic laj noꞌjbal ra̱j chi nacaꞌnam. Nicꞌ paꞌ woꞌ nimal take akꞌorbal naꞌn chi quiwach, camanok woꞌ chi cꞌuhtbal queh nicꞌ wach take holohic laj kꞌoric ra̱j chi narelic pan quichi̱ꞌ. Reꞌ cꞌaxoj i̱b nacꞌuhtaj chi quiwach take awich aj niminel reꞌreꞌ, camanok woꞌ queh chi cꞌuhtbal queh nicꞌ wach riwi̱ꞌ i cꞌaxoj i̱b ra̱j chi nacaꞌnam chi quibil qui̱b. Jeꞌ woꞌ chacꞌam quibe̱h chi richꞌiquinjic quicꞌux chiri̱j i Jesus ru̱cꞌ jenaj cꞌacharic tzꞌiro̱j wach chiwach i Dios. \v 13 Chiri̱j chic lok chiꞌnchel reꞌreꞌ, yuꞌna chi cu jaꞌ quinponic ta pe awu̱cꞌ nwa̱j woꞌ chi reꞌ hat chachop acꞌux chi ribanaric take wili chipam take moloj i̱b reh lokꞌonbal wach i Dios: Pe̱t, chawilow pa̱m Lokꞌ laj riCꞌuhbal i Dios chi quiwach take awich aj niminel. Jeꞌ woꞌ chic, chacꞌuhbalej take aj niminel ru̱cꞌ paꞌ bih narak chiri̱j chipam Lokꞌ laj Cꞌuhbal eh chatijej take chi naquicꞌamam na̱ riCꞌuhbal i Dios. \v 14 Jeꞌ woꞌ, nwa̱j nikꞌorom aweh i wili: Reꞌ cꞌuhtunic yeꞌo̱j aweh ruꞌum i rUxlabal i Dios reꞌ tichol lok ricꞌuhtjic, ma̱cana̱ꞌ lok ribanaric. Cꞌolok pan acꞌux chi naxyeꞌeric aweh i ribanaric reꞌreꞌ, pe̱t xkꞌormojic cho ribiral ruꞌum i rUxlabal i Dios eh ruꞌum reꞌ, reꞌ take aj cꞌamol be̱h aj niminel xquicoj quikꞌab chana̱ rehtalil chi xatpahbabjic chi hat aj cꞌuhtunel. \p \v 15 Jeꞌ reꞌ kꞌuruꞌ chachop acꞌux chi ribanaric chiꞌnchel xnikꞌor aweh reꞌreꞌ eh ticuyunok woꞌ reh chi chiꞌnchel take tinamit naquilbic reh nicꞌ wach i cꞌacharic naꞌn naquilow chi cꞌahchiꞌ aqꞌuihic chipam i niminic. \v 16 Maꞌ xa reꞌ ta reꞌreꞌ, ticuyunok laꞌ woꞌ chipam chiꞌnchel xnikꞌor aweh reh chi reꞌ hat chꞌi̱l woꞌ take nicꞌ paꞌ nimal naquibirinic aweh eticoꞌljic tak chiwach i tiꞌcꞌaxic riyew i Dios ruꞌum reh mahc. Ruꞌum aj reꞌ nikꞌor woꞌ aweh chi chacoj rehtal i wili: Reꞌ paꞌ bih cꞌuhtunic naꞌn jeꞌ ok woꞌ reꞌ cꞌacharic cꞌahchiꞌca̱t. \c 5 \s1 Reꞌ riwi̱ꞌ banoj kꞌilo̱j raj banaric \p \v 1 Timote̱yo, reꞌ wili noꞌjbal niyew je aweh chiri̱j nicꞌ wach i kꞌilo̱j na̱banam: Nachakꞌil jenoꞌ rijeb laj winak ma̱kꞌil pan eht laj kꞌoric xa pa ricorquil laꞌ woꞌ ti chakꞌil jeꞌ ricab chi reꞌ ta nak awaja̱w cꞌahchiꞌ akꞌilim. Nachakꞌil woꞌ take qꞌuijolak chakꞌil take chi jeꞌ ricab reꞌ ta nak take awas on acha̱kꞌ cꞌahchiꞌ akꞌilim. \v 2 Jeꞌ woꞌ cu̱cꞌ take rijeb tak ixok, chakꞌil woꞌ take jeꞌ ricab reꞌ ta nak atu̱t cꞌahchiꞌ akꞌilim. Reꞌ take kꞌahxokak, chakꞌil take jeꞌ ricab chi reꞌ ta nak take awana̱b cꞌahchiꞌ akꞌilim. Reꞌ cok ruꞌ chakꞌoꞌrej take pa ricorquil maꞌ ok ru̱cꞌ xa ntuquic laj capew-bal enaꞌn. \s1 Reꞌ riwi̱ꞌ tobjic ra̱j banaric queh // take ixok camnak chic quibahi̱l \p \v 3 Timote̱yo, jeꞌ woꞌ niyew je aweh noꞌjbal wili chiqui̱j take rijeb tak ixok: Nicꞌ paꞌ qꞌuihal take ixok camnak chic quibahi̱l reꞌ take til pan coric maꞌ hab ta chic wach ta̱j queh chachop tak quina̱ reh chi eli̱c na̱toꞌbem tak ru̱cꞌ i toꞌbal enamol tak wach chaxilac hat-tak aj niminel. \v 4 Raj wi wilic jenoꞌ ixok camnak chic ribahi̱l cu wilic take racꞌu̱n rixkꞌu̱n, on rihrima̱m, reꞌ take acꞌunbe̱s ixkꞌunbe̱s on ihmambe̱s reꞌreꞌ tanlic chiqui̱j chi encaꞌn chi coric haj wilic i ra̱j banaric jeꞌ ricab rikꞌor i kaniminic. Reꞌ chic i noꞌjbal kꞌe̱ꞌ tare̱t eh kꞌe̱ꞌ nponic chiwach i Dios, reꞌ chi reꞌ take acꞌun ixkꞌun enquicꞌax quitu̱t caja̱w on quiqꞌue̱n on reꞌ enquilow hab wach queh pan quipa̱t reh chi ru̱cꞌ reꞌreꞌ encaꞌn soꞌ jelow-bal i quiqꞌuihsjic xbanaric cho. \v 5 Jeꞌ aj reꞌ ruꞌ ra̱j banaric cu̱cꞌ take ixok camnak chic quibahi̱l reꞌ cok ruꞌ, jeꞌ reꞌ na̱banam xa cu̱cꞌ take til coric chi xacutquelem chic qui̱b eh xicahnic pan nibaꞌil. Jeꞌ woꞌ reꞌ na̱banam cu̱cꞌ take ixok camnak chic quibahi̱l nquichop quicꞌux chi ti̱j chi kꞌi̱j chi akꞌab chi ripahkaljic quitoꞌbal reh Dios. \v 6 Jeꞌ reꞌ nikꞌor maj wilic take ixok quicahnic chi cutquel chic chi cꞌacharic nanquimic je quibahi̱l xa reꞌ laꞌ maꞌ riban ta chi equitobjic ruꞌum nok reꞌ take ixok reꞌreꞌ, reꞌ chic risiqꞌuiric i chopoj cꞌuxlis chiri̱j paꞌ bih nyeꞌbic sukquil quicꞌux nquiyew wi̱ꞌ quicapew-bal eh ru̱cꞌ noꞌjbal reꞌreꞌ ncaꞌn jeꞌ ricab take camnak chi maꞌ reꞌ ta chic ribirmijic kꞌoric chiwach i Dios nquicapaj. \p \v 7 Jeꞌ reꞌ kꞌuruꞌ Timote̱yo nicꞌ paꞌ qꞌuihal take aj niminel wilic quicahnel ixok reꞌ raj ilmijic queh, chakꞌor ricorquil queh i chaj bih cꞌahchiꞌ nikꞌorom je aweh wili reh chi maꞌxta bih equikꞌiliric take wi̱ꞌ ru̱cꞌ quinoꞌjbal. \v 8 Jeꞌ reꞌ nikꞌor maj jenoꞌ aj niminel maꞌ ricꞌul ta chi reh chi enkꞌormojic reh chi aj niminel wi maꞌ ricapaj riliric take paꞌ take cho reh eh xa ta woꞌ nak ricapaj take raj pan pa̱t reꞌ cꞌaxic woꞌ ncaꞌn. Ruꞌum reh riban reꞌreꞌ, nariwihꞌic kꞌilo̱j china̱ maj reꞌ rimahc kꞌe̱ꞌ woꞌ chic cꞌahbil chiwach i paꞌ bih mahc riban jenoꞌ maꞌ reꞌ ta aj niminel. \v 9 Jeꞌ reꞌ ajic reꞌ hat cu na̱wilom ricorquil haj wilic take ixok camnak quibahi̱l na̱cojom take chi quixilac naquicꞌulum quitoꞌbal chipam acomonil. Reꞌ take ixok na̱chihim take, reꞌ jeꞌ wili quiwi̱ꞌ: Reꞌ manlic oxcꞌahl (60) ha̱b wilic queh eh nok chi cu cꞌachlic cho ribahi̱l maꞌ jancꞌal ta xichꞌak ri̱b chi narituhnic ru̱cꞌ toco̱m chic winak. \v 10 Jeꞌ woꞌ, holohic ok ribiral quicꞌacharic wilic, ribanam ok toꞌbonic, riqꞌuihsam ok woꞌ take cho rihaꞌlacꞌu̱n chi coric eh ricꞌulum ok woꞌ take toco̱m chic aj niminel chi riyeꞌeric ripatal pa ripa̱t. Jeꞌ woꞌ, ricamanem ok woꞌ quiwach take toco̱m chic aj niminel ru̱cꞌ chꞌublic cꞌuxlis, kakꞌor jeꞌ ricab ru̱cꞌ ritzꞌajaric i co̱k take rich aj niminel naquiꞌo̱j cꞌolok chi aj patal take ru̱cꞌ. Chꞌi̱l i noꞌjbal reꞌreꞌ, ritoꞌbem ok take cho cꞌaxic ti ncaꞌn eh xa yeꞌlic ok woꞌ kꞌab chi toꞌbonic naxiban cho. \p \v 11 Reꞌ chic take cahnel ixok maꞌ jaꞌxta queh oxcꞌahl ha̱b naxquimic je quibahi̱l ma̱coj take pa riman. Jeꞌ reꞌ nikꞌor maj chaj bih awehtꞌalim wi xquicꞌax ok woꞌ chic wach chi nariwihꞌic woꞌ chic ribahi̱l eh ewoꞌ chic ncaꞌn caxarahil? Ru̱cꞌ ribanaric reꞌreꞌ, enquikꞌeb lok ri̱j quicꞌux i quikꞌorbal xquiyew nak chiwach i Dios chi maꞌxta chic quisiqꞌuim quibahi̱l reꞌ laꞌ chic nacaꞌnam, naquicamanic nak ru̱cꞌ chiꞌnchel quicꞌux chiwach i Jesus reꞌ Pahbamaj chi Kꞌatal Kꞌoric. \v 12 Wi xcaꞌn aj woꞌ chic caxa̱ra, reꞌ wili erikꞌor i Dios chiqui̱j: \p «Reꞌ take wili wilic chic mahc chiqui̱j ruꞌum xquicana̱ꞌ rinimjic quikꞌorbal xquiyew chi niwach chi naquinimem nak chi coric, nqui erikꞌor i Dios. \p \v 13 Ruꞌum aj reꞌ, maꞌ riban ta chi enacoj take ixok reꞌreꞌ chi quixilac take nquicꞌul quitoꞌbal maj wi jeꞌ reꞌ xaꞌn, reꞌ take reꞌ enquipꞌut cꞌacharic pan siquilal, encaꞌn xa quiꞌo̱j quichalic chiꞌ tak pa̱t chi moloj tak wach cꞌuta̱j eh encocsaj qui̱b chi jeꞌ reꞌ. Jeꞌ woꞌ, encaꞌn xa haj chic minmin take chi rikꞌormojic take xa paꞌ bih kꞌoric reꞌ ru̱cꞌ maꞌ queh ta chic rikꞌormojic. \v 14 Ruꞌum aj reh chiꞌnchel reꞌreꞌ, reꞌ hin yuꞌna nikꞌor je aweh chi reꞌ take ixok camnak quibahi̱l eh cu jaꞌxta queh oxcꞌahl (60) ha̱b, sakbih nak chi ewoꞌ chic ncaꞌn caxarahil. Chiri̱j chic ruꞌ, jarub paꞌ chic quihaꞌlacꞌu̱n nariwihꞌic, quiqꞌuihsaj lok pa ricorquil eh quicamanej pa̱m quipa̱t chi coric reh chi jeꞌ reꞌ maꞌ hab ta wach queh take quikꞌetbic wach kacꞌuhtunic enkꞌoric chiri̱j chi maꞌ holohic ta i niminic wilco̱j wi̱ꞌ. \v 15 Jeꞌ reꞌ kꞌuruꞌ tare̱t chi queh take ixok reꞌreꞌ chi nacaꞌnam woꞌ chic caxa̱ra reh chi maꞌ hab ta wach queh take erikꞌeb ri̱b pan cꞌahbilal. Jeꞌ reꞌ nikꞌor maj wilic ixok jeꞌ ru̱cꞌ camnak chic je quibahi̱l xquicana̱ꞌ rinimjic i Jesus ruꞌum chi reꞌ chic i paꞌ bih noꞌjbal ricoj cho aj Yahm pan quicapew-bal, reꞌ chic reꞌ nquicꞌam na̱. \p \v 16 Chiri̱j chic rikꞌormojic lok wili nikꞌor woꞌ chic aweh, wi chi quixilac take raj pan pa̱t jenoꞌ aj niminel wilic jenoꞌ ixok camnak chic je ribahi̱l jeꞌ ru̱cꞌ jaꞌxta reh oxcꞌahl (60) ha̱b, curman chi naritoꞌbem reh chi reꞌ ritobjic ixok reꞌreꞌ maꞌ eta ncahnic pan quikꞌab take moloj wach aj niminel eh chi jeꞌ reꞌ, reꞌ toꞌbal moloj wach maꞌ eta nmakꞌaric queh take ixok camnak chic je quibahi̱l reꞌ til maꞌ hab ta chic wach ta̱j queh. \s1 Juꞌjun chic take noꞌjbal // chiqui̱j aj cꞌamol be̱h \p \v 17 Yuꞌna nwa̱j kꞌoric awu̱cꞌ chiqui̱j take quinahsil aj niminel chipam i comonil wilca̱t wi̱ꞌ. Wi ncaꞌn chi coric quicamaj chi aj cꞌamol be̱h take eh til pa ricorquil, til woꞌ nquiyew quicꞌux chi rikꞌormojic jeꞌ woꞌ chi ricꞌuhtjic riCꞌuhbal i Dios, curman chi lo̱kꞌ ok quiwaꞌric chawach tak eh til ricꞌul woꞌ chi queh chi enayew tak jenoꞌ quitojbal \v 18 jeꞌ ricab rikꞌor chipam Lokꞌ laj Hu̱j reꞌ tzꞌihmbimaj wi̱ꞌ cꞌuhbal reꞌ jeꞌ wili rikꞌor: \q1 “Nok cꞌahchiꞌ chi camanic aboyex chi ribehljic cho wach atic, \q1 maꞌ riban ta chi enabacꞌ pan juꞌ pitbal riwaꞌ, nqui rikꞌor. \m Jeꞌ woꞌ pan jenaj chic ribiral jeꞌ wili rikꞌor: \q1 “Reꞌ aj camanom cꞌahchiꞌ chi camanic ricꞌul chi reh chi naricꞌulum ritojbal, nqui rikꞌor. \p \v 19 Reꞌ wili jenaj chic noꞌjbal niyew je aweh chiqui̱j take nahsil chipam acomonil hat-tak aj niminel: Wi hab wach jenoꞌ cꞌahchiꞌ ricojom jenoꞌ mahc chiri̱j jenoꞌ cꞌamol be̱h pan acomonil, ma̱cohjaj pe ti wach chaj bih cꞌahchiꞌ rikꞌormojic aweh. Cu chabiraj laꞌ pe pan quichi̱ꞌ quib xib ok chi cꞌacharel wi til coric chi wilic jenoꞌ rimahc i cꞌamol be̱h reꞌreꞌ. Wi xabiraj cu̱cꞌ take cꞌacharel chi til coric chi wilic rimahc, cu reꞌ aj ruꞌ chacoj wach eh chakꞌil woꞌ ti pa ricorquilal. \v 20 Tzꞌa̱b ruꞌ wi xa xitik woꞌ juꞌ wihꞌic chipam rinoꞌjbal reꞌreꞌ chiri̱j chi akꞌilim chic i hat, chi quiwach aj chic chiꞌnchel i comonil chakꞌil reh chi reꞌ quich cꞌamol be̱h naquilow chi jeꞌ reꞌ, enquiyohbalej qui̱b reh chi maꞌ eta ncaꞌn jenoꞌ cꞌahbilal. \p \v 21 Timote̱yo, reꞌ chiꞌnchel nicꞌ nimal xnikꞌor je aweh wili til nipahkaj je aweh chi chacꞌam na̱ chi manlic. Reꞌ hin til wilic wajawric chi ripahkaljic je aweh reꞌreꞌ maj reꞌ kAja̱w Dios chꞌi̱l i Jesus reꞌ Pahbamaj chi Kꞌatal Kꞌoric, chꞌi̱l woꞌ take lokꞌ laj raj tzꞌeꞌ wa̱ch i Dios wilque̱b johtok pan taxa̱j cꞌahchiꞌ woꞌ quiyeb rajawric i kꞌoric cꞌahchiꞌ nibanam je aweh yuꞌna. Chi jeꞌ reꞌ ajic nipahkaj woꞌ je aweh chi nachaꞌn acamaj chi quiwach take cꞌacharel, chaꞌn ru̱cꞌ chiꞌnchel acꞌux, maꞌ xa ta reh chi reꞌ take cꞌacharel naquicahnic chi suk quicꞌux awu̱cꞌ. \v 22 Jeꞌ woꞌ chic, nachachih wach take aj camanom chi naquicamanic chipam quicomonil take aj niminel ma̱cojlom pe ti akꞌab china̱ i hab wach nacapaj ricojoric chi camanic maj chaj bih awehtꞌalim wi reꞌ nacapaj ricojoric chi camanic wilic ok cho jenoꞌ rimahc? Nachacoj akꞌab china̱ jenoꞌ cꞌacharel wilic cho rimahc, enanih awi̱b i hat ru̱cꞌ rimahc ruꞌ. Ruꞌum aj reꞌ nikꞌor aweh chi coric ok wach anoꞌjbal reh chi maꞌxta nechꞌ ok mahc pan acꞌacharic. \v 23 Ru̱cꞌ wili maꞌ nwa̱j ta nikꞌorom chi maꞌ ta nak chic enawuqꞌuej soꞌ aweh i cꞌah laj haꞌ tikꞌimaj chi ikꞌo̱m. Reꞌ hat ma̱wuqꞌuej xa haꞌ chi rutquel, chaxilaquej laꞌ aha̱ꞌ ru̱cꞌ ikꞌo̱m reꞌreꞌ reh chi maꞌ eta chic tirijotꞌ riyaꞌbilal apa̱m natirichop cho chi xa cucꞌlam xilac. \p \v 24 Jeꞌ reꞌ kꞌuruꞌ Timote̱yo, ilmijok chi cꞌahchiꞌ abanam acamaj chi coric maj jeꞌ ricab chi sakom chic wach rimahc jenoꞌ cꞌacharel nanponic chiwach aj chꞌukul wach mahc, on nok cu reꞌ chic nelic lok wach sakom i rimahc nanchꞌukuric kꞌoric china̱, \v 25 jeꞌ woꞌ reꞌ narelic cho wach sakom take coric laj camanic naꞌn i hat naquilow take tinamit. To̱b ta maꞌ nilmijic ta ti wach yuꞌna, nariponic i kꞌi̱j chi narelic woꞌ lok wach sakom chi holohic laj camanic cꞌahchiꞌ abanam. \c 6 \s1 Reꞌ kꞌoric chiqui̱j take aj // camanom chꞌi̱l woꞌ i kꞌoric // chiri̱j i coric laj cꞌuhtunic \p \v 1 Chiꞌnchel take aj niminel wilque̱b riꞌsil ro̱k kꞌab jenoꞌ aj ehcham camanic eh ncaꞌn quicamaj chi maꞌ tojo̱j ta take til ricꞌul chi queh chi naquiyeb riwaꞌric i ajabe̱s nchopbic quina̱ eh naquibirinic woꞌ kꞌoric chiwach reh chi maꞌ hab ta wach erikꞌor cꞌahbilal chiri̱j i Dios on chiri̱j i cꞌuhtunic nkaꞌn. \v 2 Jeꞌ ricab jenoꞌ cꞌacharel xa quich aj niminel ok qui̱b chꞌi̱l aj ehcham camanic, maꞌ ra̱j ta rikꞌorom chi xa ruꞌum chi aj niminel reꞌ ncamanic cok wi̱ꞌ, eta nak riban chi maꞌ eta riyew riwaꞌric. Maꞌxta, naricamanic laꞌ cok chiwach chi coric ruꞌum i cꞌaxo̱j wilic pa ra̱mna chiri̱j reꞌ ncamanic cok wi̱ꞌ eh til woꞌ chic kꞌe̱ꞌ naricꞌuhtunic rinoꞌjbal chi coric ruꞌum nok reꞌ ncamanic cok wi̱ꞌ xa cas quicha̱kꞌ qui̱b pan niminic. Reꞌ aj noꞌjbal wili chacꞌuhtaj eh chakꞌor queh take aj niminel reh chi naquirakam chiri̱j nicꞌ wach i camanic nacaꞌnam chi quiwach take quicamanic cok wi̱ꞌ. \p \v 3 Timote̱yo, wi xa hab wach cꞌahchiꞌ rikꞌorom jenoꞌ toco̱m chic cꞌuhtunic jeꞌ ru̱cꞌ maꞌ jenaj ta wach ru̱cꞌ i nikꞌorom cho aweh eh chi reꞌreꞌ maꞌ riban ta woꞌ jenaj wach ru̱cꞌ i coric laj tijinic nchalic ru̱cꞌ i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric, on ru̱cꞌ take cꞌuhtunic jeꞌ ru̱cꞌ rikꞌor keh nicꞌ wach nakacꞌacharic chi holohic chiwach i Dios, \v 4 reꞌ cꞌacharel reꞌreꞌ moysomaj pa̱m ricapew-bal eh maꞌxta bih rehtꞌal chiri̱j i cꞌuhtunic riban. Maꞌ xa reꞌ ta reꞌ, reꞌ laꞌ woꞌ ricapew-bal maꞌ suk ta wilic ru̱cꞌ i Dios eh chi jeꞌ reꞌ nanoquic chi kꞌoric cu̱cꞌ take toco̱m cꞌacharel kꞌe̱ꞌ richoplom ri̱b chiri̱j take kꞌoric riban. Ruꞌum chi jeꞌ reꞌ ricapew-bal chipam take kꞌoric riban cu̱cꞌ toco̱m chic cꞌacharel, xa wilic woꞌ i cakwachanic, ixowonic i̱b, tzꞌuju̱j chꞌi̱l i yojoj cꞌuxlis ru̱cꞌ. \v 5 Reꞌ cꞌacharel reꞌreꞌ chꞌi̱l toco̱m chic cꞌacharel nquichop qui̱b chiri̱j take kꞌoric ncaꞌn, nquicꞌuhtaj lok chi jotꞌo̱j chic quicapew-bal eh ruꞌum reꞌ maꞌ nquirak ta chic chiri̱j ricorquil ribiral i Jesus, xa reꞌ laꞌ chic ribihomsjic qui̱b nquicapaj naxiꞌoquic chi rinimjic i Jesus. Ruꞌum reh noꞌjbal reꞌreꞌ, til nipahkaj aweh chi reꞌ take winak jeꞌ reꞌ quinoꞌjbal maꞌ riban jenaj wach anoꞌjbal tak cu̱cꞌ. \p \v 6 Chiri̱j nok nikꞌorom chic lok reꞌreꞌ chiri̱j take bihomal, yuꞌna nikꞌor woꞌ aweh i wili: Wi laꞌ reꞌ hat wilca̱t chi suk acꞌux pan rinimjic i Jesus to̱b ta xa nicꞌ paꞌ ti nimal wilic aweh, kꞌe̱ꞌ woꞌ chic ricuseꞌsbal i Dios wilic cho chana̱. \v 7 Ruꞌum aj reꞌ ma̱yew acꞌux chi ribihomsjic awi̱b maj jeꞌ ricab naxojcꞌulic wach kꞌi̱j sakom maꞌxta woꞌ bih wilic keh, jeꞌ woꞌ chic reꞌ nachirak cho rikꞌijil kaquimic maꞌxta woꞌ bih enkacꞌam je chiki̱j. \v 8 Jeꞌ aj reꞌ ruꞌ Timote̱yo, to̱b ta maꞌ chi bih wilic aweh, xa reꞌ wach wi wilic awaꞌ aha̱ꞌ, chꞌi̱l asoꞌ socbal aweh, sukbok acꞌux ru̱cꞌ chiꞌnchel reꞌreꞌ. \v 9 Ma̱ban aweh jeꞌ ricab encaꞌn take cꞌacharel reꞌ xa reꞌ wach ricꞌaxaric wach bihomal ncaꞌn. Jeꞌ reꞌ nikꞌor aweh maj reꞌ take jeꞌ reꞌ quinoꞌjbal quikajic chipam i cꞌahbilal laj noꞌjbal jeꞌ ricab ricꞌul jenoꞌ chicop nok nkajic pan jenoꞌ xirab. Chi jeꞌ aj reꞌ quinoꞌjbal maꞌ nquicapaj ta chic ri̱j chi ru̱cꞌ ribihomsjic qui̱b nca̱j caꞌnam, xa naricamanic chi jotꞌbal reh quicꞌacharic. Reꞌ take cꞌacharel reꞌreꞌ ru̱cꞌ ribihomsjic qui̱b nca̱j caꞌnam, enquisach wach i quicꞌacharic chi junpech jeꞌ ricab nansahchic wach jenoꞌ maꞌ laj cano̱wa nanbutꞌlujic jok riꞌsil haꞌ. \v 10 Chaj waꞌric naxnikꞌor reꞌreꞌ? Nikꞌor chi jeꞌ reꞌ maj riwi̱ꞌ chaweh chi nawehtꞌalim chi reꞌ cꞌacharel ncꞌaxbic wach bihomal maꞌ xa ta jenaj i tiꞌquilal ricꞌul, yohbal laꞌ wach nchalic china̱. Til coric wilic take aj niminel jeꞌ reꞌ xquicꞌul ruꞌum chi xquicana̱ꞌ richꞌiquinjic quicꞌux chiri̱j i Dios eh chiri̱j chic ricꞌaxmajic wach bihomal xquiyew quicapew-bal. \p \v 11 Jeꞌ reꞌ ajic Timote̱yo raj camanom i Dios, reꞌ hat reh chi maꞌ eta nacꞌul aweh chi jeꞌ reꞌ, til nipahkaj aweh chi ma̱ban aweh i maꞌ holohic ta laj noꞌjbal reꞌreꞌ, reꞌ laꞌ chaꞌn chakꞌeb lok rij acꞌux. Jeꞌ woꞌ chic chachop acꞌux chi cꞌacharic ru̱cꞌ coric wach cꞌuxlis eh cꞌahchiꞌ ok acꞌamam na̱ take cꞌuhbal reh kaniminic. Jeꞌ woꞌ chic chatik juꞌ richꞌiquinjic acꞌux chiri̱j i Dios chꞌi̱l ricꞌaxaric take awas acha̱kꞌ. Maꞌ xa reꞌ ta reꞌreꞌ, jeꞌ laꞌ woꞌ wilic ok woꞌ awuyuꞌnbal ru̱cꞌ i Dios chi ricuyuric take tiꞌcꞌaxic ncꞌulic lok ruꞌum reh kaniminic eh xa hat ok woꞌ chakꞌlam ru̱cꞌ anoꞌjbal cu̱cꞌ chiꞌnchel take cꞌacharel. \p \v 12 Reꞌ niminic wilco̱j wi̱ꞌ to̱b ta ricꞌam cho cꞌaxquilal jeꞌ ricab ricꞌam cho jenoꞌ kꞌakꞌanic ncaꞌn take sol, kꞌe̱ꞌ tare̱t chi keh ritahkaljic. Chayew acꞌux chiri̱j i niminic reꞌreꞌ kꞌuruꞌ jeꞌ ricab riyeꞌeric quicꞌux ncaꞌn take sol naquiꞌoquic chi kꞌakꞌanic. Cꞌolok pan acꞌux chi reꞌ hat chi paꞌlic acꞌux chi coric, xayew achi̱ꞌ chi quiwach take qꞌuihal cꞌacharel chi reꞌ hat na̱tahkem chi manlic i kaniminic. Naxaꞌn reꞌreꞌ, reꞌ Dios xatriyukꞌej woꞌ chi na̱wehcham i junelic cꞌacharic. Chi jeꞌ reꞌ xiban awu̱cꞌ i Dios, chachop woꞌ acꞌux chi nawehcham chi manlic i junelic cꞌacharic. \p \v 13 Yuꞌna kꞌuruꞌ reh chi wilic take enquiyew quichi̱ꞌ chi reꞌ hin coric wach i cꞌuhtunic cꞌahchiꞌ nibanam je aweh, nicoj jenaj i kAja̱w Dios wu̱cꞌ reꞌ nyeꞌbic quicꞌacharic take chiꞌnchel paꞌ bih wilic china̱ acꞌal wili. Jeꞌ woꞌ nicoj woꞌ jenaj wu̱cꞌ i Jesus reꞌ Pahbamaj chi Kꞌatal Kꞌoric eh reꞌ maꞌ xyoꞌjic ta woꞌ chi riyeꞌeric richi̱ꞌ chiri̱j riniminic naxpahbabjic chiwach i Po̱nsyo Pila̱to. Chi quiwach take reꞌ, til nipahkaj aweh chi \v 14 chacꞌam na̱ chi coric take takꞌanic bano̱j aweh reh chi jeꞌ reꞌ sak ok wach anoꞌjbal eh chi maꞌ eta nwihꞌic jenoꞌ kꞌilo̱j chawi̱j. Jeꞌ aj reꞌ chaꞌn cu rehtal enkilow risoljic woꞌ chic cho i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric. \v 15 Reꞌ aj chic risoljic cho Jesus, til reꞌ woꞌ i Lokꞌ laj Dios naritikꞌenic cho wach rikꞌijil chi narilmijic wach. Ruꞌum aj reꞌ kayew tak rilokꞌil i Dios pan ti̱j chi jeꞌ wili: Xa reꞌ wach i Dios, xa reꞌ wach reꞌ wilic rajawric chi quina̱ take wilic cajawric chi takꞌanic. Reꞌreꞌ wilic chi pe̱t kꞌatal kꞌoric chi quixilac take kꞌatal kꞌoric . Reꞌreꞌ wilic chi pe̱t kꞌatal kꞌoric chi quixilac take kꞌatal kꞌoric. Reꞌreꞌ wilic chi pe̱t ajabe̱s chi quixilac take ajabe̱s china̱ acꞌal wili. \v 16 Jeꞌ woꞌ, xa reꞌ wach i Dios cꞌachlic chi junelic. Reꞌreꞌ ar ncꞌacharic chipam jenaj rinimal sakom reꞌ maꞌ riyew ta kꞌab chi narilmijic wach i Dios eh ruꞌum reꞌ maꞌ jenoꞌ cꞌacharel til ta nak rilom wach i Dios, on til ta narilom cok wach yuꞌna chipam rilokꞌil wilic wi̱ꞌ. Til kꞌormojok kꞌuruꞌ chi reꞌ Dios til kꞌe̱ꞌ woꞌ chic rinimal rilokꞌil eh chi reꞌ woꞌ reꞌ nkꞌatbic kꞌoric chi junelic kꞌi̱j sakom. Til jeꞌ ta nak reꞌ kꞌormojok chiri̱j i Dios. \p \v 17 Ar chipam comonil wilca̱t wi̱ꞌ, wilic take aj niminel kꞌe̱ꞌ biho̱m take ruꞌum reh rinimal wach quibihomal quimolom wach ayuꞌ wach acꞌal. Chiqui̱j take reꞌ nipahkaj aweh chi chapahkaj queh chi maꞌ nquinimsaj qui̱b ru̱cꞌ paꞌ bih wilic queh jeꞌ woꞌ maꞌ nquichop quicꞌux chiri̱j i quibihomal, reꞌ laꞌ caꞌn quichop quicꞌux chiri̱j i cꞌachlic Dios reꞌ xa yeꞌlic woꞌ cho kꞌab chi kana̱ chi riyeꞌeric paꞌ bih keh nakiqꞌuic wi̱ꞌ kꞌi̱j chi suk kacꞌux. \v 18 Jeꞌ woꞌ, chakꞌor queh take niminel wilic quibihomal reꞌreꞌ chi caꞌn i coric eh nicꞌ paꞌ wach nok chi wilic quibihomal jeꞌ ok woꞌ reꞌ take chi ribanaric i holohic laj toꞌbonic. Chakꞌor woꞌ queh chi chakꞌlam ok take cu̱cꞌ cas quicha̱kꞌ eh xa yeꞌlic ok quikꞌab ru̱cꞌ i paꞌ bih wilic queh \v 19 reh chi jeꞌ reꞌ jeꞌ ricab chi cꞌahchiꞌ ta nak quimolom wach quibihomal, yohbal chic wach quico̱ch naquikꞌatam lok ri̱j pan quicꞌacharic je chi quiwach reꞌ naquicꞌacharic wi̱ꞌ chi junelic. \p \v 20 Timote̱yo, reꞌ yeꞌo̱j aweh ruꞌum i Dios chi na̱coꞌlem ri̱j, chacoꞌlej woꞌ ri̱j chi coric. Nipahkaj woꞌ aweh chi reꞌ take kꞌoric maꞌ yeꞌbal ta rilokꞌil i Dios eh maꞌ toꞌbonel ta woꞌ queh take quibirinic reh, chawicꞌsaj lok ri̱j axiquin take kꞌoric reꞌreꞌ. Jeꞌ woꞌ reꞌ chaꞌn ru̱cꞌ quikꞌorbal take xa nquikꞌihtaj woꞌ qui̱b ru̱cꞌ take xa tikꞌimaj wach kꞌoric. Reꞌ take cꞌacharel reꞌ, to̱b ta woꞌ maꞌ coric ta take kꞌoric nquikꞌor, xa cꞌahchiꞌ woꞌ quikꞌorom chi ru̱cꞌ take kꞌoric reꞌreꞌ nquirak quinoꞌjbal. \v 21 Chayohbalej awi̱b kꞌuruꞌ chiwach take noꞌjbal reꞌreꞌ. Jeꞌ reꞌ nikꞌor aweh maj wilic take aj niminel xquicana̱ꞌ richꞌiquinjic quicꞌux chiri̱j i Jesus xa ruꞌum ritahkaljic take kꞌoric reꞌreꞌ. Jeꞌ aj reꞌ ruꞌ Timote̱yo, reꞌ ta nak ratoꞌbil i Dios wihꞌok awu̱cꞌ chi junelic acꞌacharic. Jeꞌ ta nak reꞌ banarok awu̱cꞌ.