\id 1TH - Pokomchi Occidental NT \h 1 TESALONICENSES \toc1 Reꞌ pe̱t hu̱j xitzꞌihmbaj i maꞌ Lu̱ꞌ queh niminel Aj Tesalo̱nica \toc2 1 TESALONICENSES \toc3 1 Ts \mt2 Reꞌ pe̱t hu̱j xitzꞌihmbaj i maꞌ Lu̱ꞌ queh niminel \mt1 Aj Tesalo̱nica \c 1 \s1 Reꞌ maꞌ Lu̱ꞌ ricꞌalenej je take niminel aj Tesalo̱nica \p \v 1 Reꞌ hin maꞌ Lu̱ꞌ chi cꞌahchiꞌqui̱n quihchꞌilem i maꞌ Si̱las chꞌi̱l i Timote̱yo, cꞌahchiꞌ nitzꞌihmbam je hu̱j wili aweh hat-tak comonil aj niminel aj Tesalo̱nica reꞌ choplic acꞌux tak ru̱cꞌ Ajabe̱s Dios jeꞌ woꞌ chiri̱j i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric. Nok cꞌahchiꞌ nitzꞌihmbam je hu̱j wili, nipahkaj johtok pa niti̱j chi reꞌ ta woꞌ nak kAja̱w Dios chꞌi̱l i Jesus toꞌbonok cho aweh tak eh chiyew ta woꞌ nak cho rinimal suk laj cꞌuxlis pan awa̱mna tak. \s1 Reꞌ maꞌ Lu̱ꞌ ritioxej johtok reh Dios i quicꞌacharic take aj Tesalo̱nica \p \v 2 Hat-tak wich aj niminel nwa̱j nikꞌorom je aweh tak chi reꞌ hoj nankaꞌn kati̱j chiwach i Dios, xa eli̱c woꞌ kojtioxonic johtok chiwach chawi̱j hat-tak reꞌ xa wilca̱t woꞌ tak pan kacꞌux. \v 3 Til pan coric nankaꞌn kati̱j maꞌxta jenoꞌ kꞌi̱j chi niqꞌuic ta nak pan kacꞌux i toꞌbonic naꞌn tak ruꞌum reh acapew-bal nacoj tak ru̱cꞌ i Dios, chꞌi̱l woꞌ i cꞌaxoj i̱b naꞌn tak queh take awich aj niminel tak ruꞌum reh ricꞌaxaric i Dios wilic pan awa̱mna tak. Jeꞌ woꞌ reꞌ nkaꞌn ruꞌum ricowsjic acꞌux naꞌn tak chi ruyuꞌnjic i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric, ruꞌum nok chꞌiclic acꞌux tak chiri̱j chi narisoljic woꞌ chic cho ricaꞌpech. \v 4 Jeꞌ reꞌ kꞌuruꞌ hat-tak wich aj niminel reꞌ kꞌe̱ꞌ tiricꞌax tak i Dios, reꞌ hoj kꞌe̱ꞌ nkatioxej johtok reh i Dios chawi̱j tak eh nkaꞌn woꞌ kati̱j chawi̱j tak maj kehtꞌalim chi reꞌ kAja̱w Dios xchihbic cho awach tak chi racꞌu̱n rixkꞌu̱n. \v 5 Nicꞌ woꞌ wach nakehtꞌalij reꞌreꞌ? Reꞌ hoj kehtꞌalim reꞌreꞌ ruꞌum i rehtalil wili: Naxojwihꞌic cho awu̱cꞌ tak chi rikꞌormojic i holohic laj cꞌuhbal chiri̱j i Jesus, reꞌ Lokꞌ laj Uxlabal xiban chi maꞌ xa ta kakꞌorbal ki̱b xojkꞌoric cho awu̱cꞌ tak til laꞌ ru̱cꞌ ransil i kakꞌorbal xiyew ruꞌ. Jeꞌ reꞌ ajic reꞌ woꞌ reꞌ xbanic chi reꞌ kanoꞌjbal i hoj xcamanic aweh tak chi rinabjic chi reꞌ woꞌ rinoꞌjbal i Jesus nkacꞌam tzꞌeht naxojwihꞌic cho chaxilac tak. Jeꞌ reꞌ nikꞌor maj reꞌ cꞌaxoj i̱b xkacꞌuhtaj chawach tak, reꞌreꞌ ncꞌuhtunic lok wi̱ꞌ chi jeꞌ reꞌ. \v 6 Naxacꞌam tak tzꞌeht reh kanoꞌjbal reꞌ woꞌ rinoꞌjbal i Jesus xacꞌam tak tzꞌeht reh. Naxaꞌn aj tak chi jeꞌ reꞌ, xchalic i tiꞌcꞌaxic chana̱ tak ruꞌum woꞌ reh ricꞌuluric i cꞌuhbal kꞌoro̱j aweh tak. To̱b ta woꞌ jeꞌ reꞌ xacꞌul tak xa xatik woꞌ tak juꞌ ricꞌamaric na̱ i cꞌuhbal reꞌreꞌ ru̱cꞌ i sukquil cꞌuxlis riyew aweh tak i Lokꞌ laj rUxlabal i Dios. \p \v 7 Yuꞌna ajic reꞌ chic anoꞌjbal tak reꞌreꞌ cꞌahchiꞌ ricꞌamaric tzꞌeht reh cuꞌum take toco̱m chic aj niminel jeꞌ ricab take wilque̱b pan tak tinamit pa riyukꞌul Masero̱nya chꞌi̱l pa riyukꞌul Aca̱ya. \v 8 Jeꞌ reꞌ xcꞌuluric ruꞌum nok reꞌ hat-tak xapꞌut tak je rikꞌormojic i cꞌuhbal chiri̱j i Lokꞌ laj Ajabe̱s Jesus cu rehtal xo̱j lok rikꞌormojic chi junsut riyukꞌul Masero̱nya jeꞌ woꞌ chi junsut riyukꞌul Aca̱ya. Jeꞌ reꞌ ajic reꞌ ribiral ricowil acꞌux tak chi rinimjic i kAja̱w Jesus xo̱j woꞌ lok chi junsut take toco̱m chic yukꞌul. Ruꞌum aj reꞌ, reꞌ hoj maꞌxta jenoꞌ kakꞌorbal chiri̱j i holohic laj noꞌjbal naꞌn tak \v 9 maj reꞌ take aj niminel wilque̱b pan tak yukꞌul nponic wi̱ꞌ ribiral anoꞌjbal tak reꞌreꞌ quikꞌoric chiri̱j riholonquil wach anoꞌjbal tak. Jenaj rehtalil quikꞌorbal take aj niminel reꞌreꞌ, reꞌ chi naquikꞌoric chiri̱j i kaponic awu̱cꞌ tak nquikꞌor nicꞌ wach riholonquil wach noꞌjbal xoj-acꞌul tak wi̱ꞌ. Reꞌ take reꞌ nquikꞌor woꞌ ribiral chi ru̱cꞌ kaponic awu̱cꞌ tak, reꞌ hat-tak xacana̱ꞌ tak i lokꞌonic tiyo̱x xatoquic tak chipam rinimjic i Dios eh cu yuꞌna chi kꞌi̱j cꞌahchiꞌ chic ca̱t tak chi cꞌacharic chiwach i cꞌachlic eh coric wach Dios jeꞌ ricab cꞌacharic riban jenoꞌ aj camanom chi niminic chiwach i ajabe̱s. \v 10 Jeꞌ woꞌ chic, reꞌ take reꞌ nquikꞌor abiral tak chi reꞌ hat-tak cꞌahchiꞌ ayeb acꞌux tak chi ruyuꞌnjic richalic i Jesus reꞌ rAcꞌu̱n i Dios. Reꞌ aj i Jesus wili reꞌ cꞌahchiꞌ awuyꞌem tak, reꞌ woꞌ reꞌ xucsjic cho chi quixilac take camnak eh chi kojricoꞌlej woꞌ i hoj aj niminel chiwach i tiꞌcꞌaxic chalic reh ruꞌum rijoskꞌil i Dios chi quina̱ take aj mahc. \c 2 \s1 Reꞌ take niminel aj Tesalo̱nica // til xcamanic queh i cꞌuhbalanic // xiban i maꞌ Lu̱ꞌ \p \v 1 Hat-tak wich aj niminel, reꞌ noꞌjbal xniban naxincꞌuhbalanic cho chaxilac tak, til coric wach jeꞌ ricab awehtꞌalim woꞌ tak hat-tak. Jeꞌ reꞌ nikꞌor maj reꞌ cꞌuhbalanic xkaꞌn naxojponic cho chaxilac tak maꞌ xcahnic ta chi kꞌe̱b, til laꞌ xiban ricamaj chipam acꞌacharic tak. \v 2 Coric ruꞌ, ruꞌum reh cꞌuhbalanic nkaꞌn, reꞌ hoj xkacꞌul i tiꞌcꞌaxic chꞌi̱l i tzꞌujuric jeꞌ ricab xabiraj woꞌ tak chi xkacꞌul ar pan tinamit Pili̱po. To̱b ta woꞌ jeꞌ reꞌ xkacꞌul ar reꞌ hoj maꞌ xojyoꞌjic ta nechꞌ ok, xkatik laꞌ juꞌ rikꞌormojic i riCꞌuhbal i Dios ruꞌum i ricowil kacꞌux riyew. Ru̱cꞌ i ricowil kacꞌux reꞌreꞌ, reꞌ hoj xkakꞌor woꞌ aweh tak take kꞌoric xiyew keh i Dios chi nakakꞌorom eh jeꞌ reꞌ xkaꞌn to̱b ta woꞌ yohbal wach kacꞌaxquilal xkarak chipam atinami̱t tak. \p \v 3 Reꞌ cꞌuhbal xkakꞌor aweh tak naxojwihꞌic awu̱cꞌ tak, reꞌreꞌ til coric wach, maꞌ xa ta tikꞌimaj wach ru̱cꞌ maꞌ reꞌ ta ricorquil laj noꞌjbal, xa ta nak woꞌ ru̱cꞌ cꞌahbil laj noꞌjbal. Jeꞌ woꞌ, naxojponic cho cꞌuhbalanel chaxilac tak xkakꞌor i cꞌuhbal reꞌreꞌ chi maꞌ no̱c ta jotꞌo̱j ru̱cꞌ. \v 4 Reꞌ laꞌ hoj xponic kakꞌor i cꞌuhbal reꞌreꞌ chi hoj ripahba̱b je i Dios reꞌ nok rilom chic chi tare̱t kanoꞌjbal, xichꞌica̱ꞌ ricꞌux chiki̱j chi nakakꞌorom i cꞌuhbal reꞌreꞌ. Ruꞌum aj reꞌ, reꞌ rikꞌormojic riCꞌuhbal i Dios nkaꞌn, maꞌ cꞌahchiꞌ ta co̱j lok reh ta nak chi enkarak kalokꞌil chi enkarak kalokꞌil chi quiwach take cꞌacharel china̱ acꞌal wili, nkaꞌn laꞌ reh chi nakarakam kalokꞌil chiwach i Dios reꞌ nilbic cho reh chaj bih wilic pan ka̱mna. \p \v 5 Naxojponic awu̱cꞌ tak, reꞌ hat-tak awehtꞌalim woꞌ tak chi maꞌ jancꞌal ta xkakꞌunej awach tak ru̱cꞌ take tijimaj ri̱j kꞌoric. Jeꞌ woꞌ chic, reꞌ Dios rehtꞌalim woꞌ chi maꞌ xkaꞌn ta chi xa suk kojkꞌoric awu̱cꞌ tak xa ruꞌum ta nak ricꞌaxaric wach atzꞌa̱k tak. \v 6 Maꞌ xkasicꞌ ta woꞌ kalokꞌil chi quiwach toco̱m chic cꞌacharel on chawach ta nak hat-tak. Jeꞌ woꞌ xa ta nak xkapahkaj aweh tak chi na̱yeb tak kalokꞌil to̱b ta nak ricꞌul chi keh chi xkaꞌn chi jeꞌ reꞌ ruꞌum i kajawric wilic chi hoj aj kꞌorol reh riCꞌuhbal i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric. \v 7 Maꞌ reꞌ ta reꞌ xkaꞌn kꞌuruꞌ, xojcꞌacharic laꞌ chaxilac tak pan chꞌublic wach cꞌuxlis jeꞌ ricab nok jenoꞌ tutbe̱s chꞌublic wach ricꞌux chi riliric jeꞌ woꞌ chi riqueteric take racꞌu̱n rixkꞌu̱n. \v 8 Jeꞌ aj reꞌ ruꞌ ruꞌum reh chi kꞌe̱ꞌ tiꞌquil tikicꞌraj tak, maꞌ xa reꞌ ta xkachꞌica̱ꞌ kacꞌux chawi̱j tak chi nakakꞌorom aweh tak i holohic laj kꞌoric chiri̱j i Jesus reꞌ takꞌamaj cho rikꞌormojic keh ruꞌum i Dios, jeꞌ laꞌ woꞌ til xkacoj pan kacapew-bal chi enkayew kacꞌacharic pan tiꞌcꞌaxic chawi̱j tak wi laꞌ curman chi jeꞌ reꞌ encꞌuluric ku̱cꞌ ruꞌum chi kꞌe̱ꞌ tiꞌquil tikicꞌraj tak. \p \v 9 Was tak nicha̱kꞌ aj ninimel, reꞌ hat-tak awehtꞌalim tak chi coric nicꞌ wach naxkaniqꞌuej kakꞌi̱j chi camanic naxojwihꞌic cho chaxilac tak. Wilic woꞌ na pech xoj-johtic akꞌab, on chi cu wahkꞌek woꞌ ti xoj-uctic chi camanic sicꞌbal ritzꞌakil paꞌ bih keh. Jeꞌ aj reꞌ ruꞌ noꞌjbal xkaꞌn, reh chi maꞌ xkacoj ta jenoꞌ ihk chana̱ tak chi kilmijic nok wilco̱j chaxilac tak chi rikꞌormojic riCꞌuhbal i kAja̱w Jesus. \v 10 Jeꞌ reꞌ ajic was tak nicha̱kꞌ aj niminel, reꞌ ta hat-tak chꞌi̱l woꞌ i Dios til awehtꞌalim tak chi coric chi reꞌ hoj naxojwihꞌic cho chaxilac hat-tak aj niminel, xojcꞌacharic cho ru̱cꞌ risakil wach kacapew-bal, ru̱cꞌ ricorquilal wach kacꞌux, jeꞌ woꞌ chi maꞌxta jenoꞌ kꞌoric chiki̱j ru̱cꞌ i camanic xiyew keh i kAja̱w Dios. \v 11 Jeꞌ woꞌ, reꞌ hat-tak awehtꞌalim woꞌ tak naxojwihꞌic cho chaxilac tak, reꞌ hoj xkaꞌn jeꞌ ricab riban jenoꞌ ajabe̱s chi narikꞌil take racꞌu̱n rixkꞌu̱n, riyew woꞌ risukquil quicꞌux eh jeꞌ reꞌ xkaꞌn i hoj chaxilac tak, xatkakꞌil tak eh xkayew woꞌ risukquil acꞌux tak chi ajuꞌjunal chipam animinic tak. \v 12 Jeꞌ woꞌ, nok wilco̱j ponok awu̱cꞌ tak, xkakꞌor woꞌ aweh tak chi reꞌ Dios xatriyukꞌej tak chi nariwihꞌic chi kꞌatal kꞌoric chana̱ tak eh jeꞌ woꞌ chi na̱cꞌacharic tak chi riꞌsil rinimal rajawric. Jeꞌ reꞌ kꞌuruꞌ chacuy, til ticꞌacharok tak jeꞌ ricab ricꞌul chi queh take yukꞌumaj take ruꞌum i Dios. \p \v 13 Chi jeꞌ aj reꞌ cꞌuhbalanic xkaꞌn chaxilac tak naxojwihꞌic cho awu̱cꞌ tak, reꞌ hoj maꞌ nkacana̱ꞌ ta woꞌ johtok ritioxjic i kAja̱w Dios chawi̱j tak maj nok abiram tak chic take kꞌoric xikꞌor i Dios aweh tak ru̱cꞌ kachi̱ꞌ i hoj, reꞌ hat-tak xacꞌul pan awa̱mna tak take kꞌoric reꞌreꞌ. Reꞌ cok ruꞌ reꞌ take kꞌoric reꞌreꞌ xacꞌul tak chi maꞌ jeꞌ ta xa rikꞌorbal jenoꞌ cꞌacharel china̱ acꞌal wili, xacꞌul laꞌ tak chi coric chi til reꞌ Dios xtakꞌanic cho rikꞌormojic. \p Cu aj yuꞌna chi kꞌi̱j reꞌ Dios cꞌahchiꞌ ribanam chi ru̱cꞌ riCꞌuhbal, reꞌ hat-tak aj niminel wilca̱t tak ar Tesalo̱nica, eriban chi eli̱c enjahlic wach anoꞌjbal tak. \v 14 Maꞌ xa ta reꞌreꞌ xiban i Dios, xiban laꞌ woꞌ chi xacꞌuꞌlej tak na̱ pan awa̱mna ricꞌuluric i tiꞌcꞌaxic pan quikꞌab take awich atinami̱t tak jeꞌ ricab xquicꞌul woꞌ quicomonil take awich aj niminel reh Dios wilque̱b ar pa riyukꞌul i Jure̱ya reꞌ nquimol woꞌ qui̱b pa ribihnal i kAja̱w Jesus. Ru̱cꞌ i xaꞌn tak reꞌreꞌ, cꞌahchiꞌ acꞌamam tak tzꞌeht reh noꞌjbal xcaꞌn take awich aj niminel tak reꞌreꞌ naxchalic i tiꞌcꞌaxic chi quina̱ cuꞌum take quich quitinami̱t ra̱ꞌ riꞌsil cho maꞌ Israhel \v 15 jeꞌ ru̱cꞌ maꞌ ncaꞌn ta ribanaric reꞌ haj wili nponic chiwach i kAja̱w Dios. Reꞌ take ra̱ꞌ riꞌsil cho i maꞌ Israhel reꞌreꞌ, junchꞌuk queh xicansanic cho queh take aj kꞌorol riCꞌuhbal i Dios. Junchꞌuk chic take xicansanic cho reh kAja̱w Jesus reꞌ Ajabe̱s cho chi kana̱ yuꞌna. Junchꞌuk woꞌ xiꞌesenic cho keh chipam atinamital tak. \v 16 Coric ruꞌ, jeꞌ reꞌ xcaꞌn ku̱cꞌ reh chi maꞌxta nak kakꞌorom i cꞌuhbal chiri̱j i Jesus aweh hat-tak maꞌ reꞌ ta ra̱ꞌ riꞌsil cho maꞌ Israhel ruꞌum nok maꞌ nca̱j ta chi enarak tak i coꞌlbal ri̱j acꞌacharic tak. Ru̱cꞌ i nicꞌ paꞌ nimal ncaꞌn reꞌreꞌ, reꞌ take cꞌacharel reꞌreꞌ xa cꞌahchiꞌ quimolsam wach riqꞌuihal quimahc chiwach i Dios. Ruꞌum reꞌreꞌ, yuꞌna reꞌ rinimal wach rijoskꞌil i Dios narichalic chi quina̱ chi naquicꞌulum tiꞌcꞌaxic ruꞌum i nicꞌ paꞌ nimal ncaꞌn ribanaric. \s1 Reꞌ maꞌ Lu̱ꞌ xa cu ra̱j woꞌ rikꞌoꞌrem // take niminel aj Tesalo̱nica \p \v 17 Was tak nicha̱kꞌ aj niminel, ruꞌum chi reꞌ take wich ra̱ꞌ riꞌsil cho maꞌ Israhel xojquesaj cho chipam atinami̱t tak, reꞌ hoj yuꞌna cu jaꞌ riban ta chic chi nakawihꞌic awu̱cꞌ tak. Reꞌ cok ruꞌ to̱b ta nchel maꞌ nkilow ta chic awach tak, maꞌ kacana̱b ta acapewjic tak xa eli̱c laꞌ woꞌ wilca̱t tak pan kacꞌux. Til coric, xa reꞌ woꞌ cho naxoj-esmejic cho chaxilac tak, reꞌ hoj xa nka̱j nak chic chi nkilow ta woꞌ nak chic awach tak \v 18 eh ruꞌum reꞌ xa nkitowej nak chic ojic awu̱cꞌ tak. Reꞌ hin maꞌ Lu̱ꞌ qꞌuih pech woꞌ nak xniniqꞌuej nikꞌi̱j chi ojic awu̱cꞌ tak chi akꞌoꞌrjic tak, xa reꞌ laꞌ aj Yahm xikꞌet pa nibe̱h chi maꞌxta chic quino̱j. \v 19 Chaj bih riwi̱ꞌ chi qꞌuih pech xniniqꞌuej nikꞌi̱j chi ojic awu̱cꞌ tak? Xwa̱j nak ojic ruꞌ ruꞌum chi reꞌ hat-tak kꞌe̱ꞌ hat-tak lo̱kꞌ chi kawach eh jeꞌ woꞌ chic kꞌe̱ꞌ nsukbic kacꞌux i hoj ruꞌum reh i holohic laj cꞌacharic naꞌn tak. Ruꞌum chi jeꞌ reꞌ riwi̱ꞌ acꞌacharic tak kꞌuruꞌ, reꞌ hoj chꞌiclic kacꞌux chi nacꞌolok woꞌ chic lok i Jesus, ekojpahꞌic chiwach eh jeꞌ wili enkakꞌor reh chi suk kacꞌux: \p «Jeꞌ ricab chi jenoꞌ co̱ch ricꞌul jenoꞌ aj ajamanel reꞌreꞌ ncꞌuhtunic lok wi̱ꞌ chi xiqꞌuic chipam jenoꞌ pajbal i̱b cojo̱j chiwach, jeꞌ woꞌ reꞌ take aj niminel wili reꞌreꞌ quicꞌuhtunic lok wi̱ꞌ chi reꞌ hoj xkaꞌn chi coric i kacamaj chi aj kꞌorol riCꞌuhbal i Dios, nqui enkakꞌor reh. \p \v 20 Pa ricorquil, reꞌ hoj xa suk woꞌ chic kacꞌux awuꞌum tak eh jeꞌ woꞌ ruꞌum reh riholonquil acꞌacharic naꞌn tak reꞌreꞌ, eriban chi enkakꞌor chi xkaꞌn i kacamaj chi coric. \c 3 \nb \v 1 Ruꞌum aj chi maꞌ xkacuy ta chic ruyuꞌnjic ribiral nicꞌ wach i behic cꞌahchiꞌ ca̱t-tak chi rinimjic i Jesus, reꞌ hin chꞌi̱l i Si̱las chꞌi̱l woꞌ i Timote̱yo xkatikꞌa̱ꞌ cho wach chi kawach chi jenaj kichꞌi̱l i narojic awu̱cꞌ tak. Jeꞌ reꞌ xkatikꞌa̱ꞌ wach to̱b ta reꞌ wili xa̱j rikꞌorom chi qui̱b keh hoj xojcahnic ar chipam tinamit Ate̱nas. \v 2 Ru̱cꞌ aj i tikꞌinic xkaꞌn reꞌreꞌ, xkakꞌor chi reꞌ narojic awu̱cꞌ tak, reꞌ i kich aj niminel Timote̱yo reꞌ raj camanom woꞌ i kAja̱w Dios eh aj toꞌo̱l woꞌ keh chipam kacamaj chi rikꞌormojic i cꞌuhbal nkꞌoric chiri̱j i kAja̱w Jesus. Jeꞌ reꞌ ajic nok wilic chic awu̱cꞌ tak i Timote̱yo, xatrikꞌil tak eh ru̱cꞌ i kꞌilo̱j xiban aweh tak, xiban woꞌ chi xachop tak riman ricowil acꞌux tak chipam rinimjic i Jesus reꞌ Pahbamaj chi Kꞌatal Kꞌoric. \v 3 Ru̱cꞌ richoporic acꞌux cꞌahchiꞌca̱t tak, maꞌ hab ta wach aweh tak enkajic ricapew-bal ruꞌum take tiꞌcꞌaxic cꞌahchiꞌ awiqꞌuic tak wi̱ꞌ. Jeꞌ woꞌ naxponic awu̱cꞌ tak i Timote̱yo, reꞌreꞌ xkꞌoric woꞌ awu̱cꞌ tak chiri̱j i noꞌjbal awehtꞌalim tak chic hat-tak chiri̱j ricꞌuluric i tiꞌcꞌaxic maj reꞌ hat-tak awehtꞌalim woꞌ tak chi chiꞌnchel i hoj aj niminel reh Jesus tanlic chi kana̱ chi nakacꞌulum i tiꞌcꞌaxic ruꞌum reh rinimjic i Dios. \v 4 Nicꞌ wach nok awehtꞌalim tak reꞌreꞌ? Awehtꞌalim tak maj nok cu wilco̱j cho chaxilac tak xkakꞌor aweh tak chi reꞌ tiꞌcꞌaxic xa wilic woꞌ chi kana̱ maꞌ haj ta iqꞌue̱l keh eh awehtꞌalim woꞌ tak chi jeꞌ reꞌ ruꞌum nok reꞌ woꞌ hat-tak cꞌahchiꞌ acꞌulbic tak reh tiꞌcꞌaxic kꞌoro̱j cho reꞌreꞌ. \v 5 Ruꞌum aj i tiꞌcꞌaxic reꞌreꞌ, reꞌ hin xnitakꞌa̱ꞌ je awu̱cꞌ tak i kacha̱kꞌ Timote̱yo reh chi naricꞌulic woꞌ rikꞌorom wi̱n i chaj bih narilom cho chiri̱j nicꞌ wach i cꞌacharic naꞌn tak chiwach i Dios ruꞌum nok maꞌxta chic nicuy ruyuꞌnjic abiral tak. Til pan coric, reꞌ hin xa quincapewenic woꞌ je chawi̱j tak maj chaj bih nakehtꞌalim wi reꞌ aj Yahm xiyoj ok nchel acapew-bal tak eh ru̱cꞌ reꞌreꞌ, reꞌ camanic xkaꞌn chaxilac tak naxanimej tak i kAja̱w Jesus, eno̱j ok nchel chi kꞌe̱b. \p \v 6 Naxsoljic aj woꞌ chic cho ku̱cꞌ i Timote̱yo, reꞌreꞌ xcꞌulic rikꞌor keh i holohic laj ribiral chiri̱j nicꞌ wach ricowil acꞌux tak chipam rinimjic i kAja̱w Jesus, jeꞌ woꞌ chiri̱j i cꞌaxoj i̱b cꞌul naꞌn tak chawibil awi̱b tak. Jeꞌ woꞌ chic, reꞌreꞌ xikꞌor woꞌ keh chi reꞌ hat-tak xa eli̱c woꞌ kojcꞌulic cho pan acꞌux tak ruꞌum chi kꞌe̱ꞌ tiꞌ koj-awicꞌraj tak cho eh ruꞌum reꞌreꞌ, reꞌ hat-tak xa nawa̱j woꞌ nak chic awilom tak kawach jeꞌ ricab woꞌ nkaꞌn je hoj chawi̱j hat-tak. \v 7 Jeꞌ reꞌ ajic was tak nicha̱kꞌ aj niminel, ru̱cꞌ chiꞌnchel xikꞌor keh i kacha̱kꞌ Timote̱yo chiri̱j animinic tak chi cꞌahchiꞌ achopom acꞌux tak chi manlic chiri̱j i kAja̱w Jesus, reꞌ hoj to̱b ta wilic kacꞌaxquilal pan kacꞌacharic, on wilic tiꞌcꞌaxic chiki̱j ayuꞌ, kꞌe̱ꞌ naxsukbic kacꞌux naxkabiraj chiꞌnchel reꞌreꞌ. \v 8 Maꞌ xa ta reꞌreꞌ xsukbic wi̱ꞌ kacꞌux, nsukbic laꞌ woꞌ kacꞌux ruꞌum chi reꞌ hat-tak xa cu choplic woꞌ acꞌux tak chiri̱j i kAja̱w Jesus eh ruꞌum reꞌ, reꞌ hoj yuꞌna cꞌahchiꞌ kacꞌacharic chi maꞌxta bih capewenic cꞌahchiꞌ kaꞌnam je chawi̱j tak. \v 9 Jeꞌ reꞌ kꞌuruꞌ wich niminel aj Tesalo̱nica, reꞌ hoj kꞌe̱ꞌ nsukbic kacꞌux awuꞌum aweh tak eh awuꞌum woꞌ aweh hat-tak maꞌ nkacana̱ꞌ ta johtok ritioxjic reh Dios chawi̱j hat-tak to̱b ta nchel maꞌ nicꞌ ta ti nimal katioxonic chiwach ruꞌ. \v 10 Jeꞌ reꞌ nok chi kꞌi̱j chi akꞌab reꞌ hoj maꞌ nkamay ta ripahkaljic johtok reh kAja̱w Dios chi nariyeb kꞌab keh chi nakilom woꞌ chic awach tak reh chi jeꞌ reꞌ nicꞌ paꞌ chic nimal i noꞌjbal curman chaweh tak chi na̱cowjic tak wi̱ꞌ chipam animinic tak, reꞌ hoj eno̱j kakꞌor aweh tak ar. \p \v 11 Jeꞌ woꞌ chic, chipam kati̱j nkaꞌn johtok nkapahkaj chi reꞌ ta woꞌ nak Ajabe̱s Dios chꞌi̱l i kAja̱w Jesus reꞌ wilque̱b chi kana̱ chi Ajabe̱s take, reꞌ ta woꞌ nak take reꞌ enquiyew kꞌab keh eh equicꞌuhtunic keh ricorquil jaruj nponic chi quiwach chi nakojic awu̱cꞌ tak. \v 12 Reꞌ hoj nkapahkaj woꞌ chi reꞌ ta nak i kAja̱w Dios toꞌbonok aweh tak chi nariwihꞌic riman cꞌaxoj i̱b chaxilac hat-tak aj niminel, jeꞌ woꞌ cu̱cꞌ take toco̱m chic tinamit jeꞌ ricab nok reꞌ hoj tiꞌ tikicꞌraj tak je. \v 13 Jeꞌ woꞌ, nkapahkaj johtok reh Dios chiyew ta nak ricowil awa̱mna tak chi coric chiri̱j i Jesus. Jeꞌ woꞌ nkapahkaj woꞌ johtok reh i Dios, chi sakbej ta woꞌ nak wach awa̱mna tak chi manlic. Reꞌreꞌ i pahkanic nkaꞌn johtok reh Dios maj nka̱j chi nasoljok woꞌ chic cho i kAja̱w Jesus chꞌi̱l take raj tzꞌeꞌ wa̱ch i Dios, reꞌreꞌ maꞌxta bih jenoꞌ mahc erirak chi wilca̱t tak wi̱ꞌ nachiban i chꞌuk kꞌoric chana̱ tak. \c 4 \s1 Reꞌ sakil wach cꞌacharic // nponic chiwach i Dios \p \v 1 Wich aj niminel, naxojwihꞌic cho chaxilac tak reꞌ hat-tak xatijej tak ku̱cꞌ i hoj nicꞌ wach i cꞌacharic ra̱j banaric reh chi ensukbic ricꞌux i Dios. Ruꞌum aj woꞌ chi reꞌ hoj cꞌamol abe̱h tak hoj pahbamaj ruꞌum i kAja̱w Jesus, yuꞌna nkapahkaj je ricuyuric aweh tak chi chatik tak juꞌ i cꞌacharic jeꞌ ricab xatijej tak ku̱cꞌ. Reꞌ takꞌanic cꞌahchiꞌ kaꞌnam je aweh tak wili, \v 2 awehtꞌalim tak chic nicꞌ wach rinimjic ra̱j. Jeꞌ reꞌ nikꞌor maj nicꞌ paꞌ wach take tijinic xiyew keh kAja̱w Jesus chi toꞌbal aweh tak, xkakꞌor aweh tak naxojwihꞌic cho chaxilac tak. \v 3 Jenaj queh take cꞌuhtunic reꞌreꞌ rikꞌor chi reꞌ Dios kꞌe̱ꞌ ra̱j chi xa sak ok chic wach acꞌacharic tak eh ruꞌum reꞌreꞌ, reꞌ Dios ra̱j chi ma̱min awi̱b tak chi cꞌacharic pan cꞌoyomal. \v 4 Jeꞌ woꞌ, reꞌ Dios raj chi reꞌ hat-tak reꞌ wilic chic awehqꞌue̱n tak, chacꞌax awi̱b tak chi xa ru̱cꞌ woꞌ awehqꞌue̱n na̱cꞌacharic tak maj jeꞌ reꞌ riwi̱ꞌ i cꞌacharic tzꞌiro̱j wach rilow i Dios eh kꞌe̱ꞌ woꞌ holonquilal ncꞌuhtunic lok chi quiwach cꞌacharel ayuꞌ wach acꞌal. \p \v 5 Chi nikꞌorom chic reꞌreꞌ, jeꞌ woꞌ nikꞌor aweh tak chi maꞌ ticꞌacharic tak chic jeꞌ ricab riwi̱ꞌ cꞌacharic ncaꞌn take awich tiꞌjolal tak reꞌ maꞌ reꞌ ta ra̱ꞌ riꞌsil cho maꞌ Israhel jeꞌ ru̱cꞌ maꞌ quibirinic ta kꞌoric chiwach i Dios. Reꞌ take reꞌ xa hab paꞌ wach ixok no̱j quimin wi̱ꞌ qui̱b ruꞌum i cꞌahbilal wilic cho pan ca̱mna. \v 6 Raj laꞌ chaxilac hat-tak maꞌ ok jeꞌ reꞌ noꞌjbal enaꞌn tak maj xkakꞌor chic aweh tak chi reꞌ Dios nariyeb cho tiꞌcꞌaxic tojbal wach rimahc i hab wach riban i cꞌoyomal. Ruꞌum aj reꞌ nkakꞌor aweh tak i wili: Maꞌ hab wach aweh tak rimakꞌ rehqꞌue̱n jenoꞌ chic cꞌacharel maj ru̱cꞌ reꞌreꞌ, maꞌ xa reꞌ ta cꞌahchiꞌ relkꞌam i ras richa̱kꞌ jeꞌ laꞌ woꞌ cꞌahchiꞌ rimahcanic chiwach i ras richa̱kꞌ reꞌreꞌ. \v 7 Chaj waꞌric nankakꞌor je aweh tak reꞌreꞌ? Nkakꞌor aweh tak ruꞌum chi reꞌ kAja̱w Dios maꞌ xojriyukꞌej ta ru̱cꞌ chi nakacꞌacharic chipam i yibel wach noꞌjbal, xojriyukꞌej laꞌ cho chi nakacꞌacharic pan jenaj tzꞌiro̱j wach cꞌacharic. \v 8 Til aj ticꞌacharok tak kꞌuruꞌ jeꞌ ricab ra̱j i Dios eh ma̱kꞌeb lok chiri̱j acꞌux tak i kꞌoro̱j chic aweh tak maj hab wach reꞌ maꞌ ra̱j ta ricꞌamam na̱ i kꞌoro̱j, maꞌ xa ta chiwach i winak cꞌahchiꞌ rikꞌehtam ri̱b til laꞌ woꞌ cꞌahchiꞌ rikꞌehtam ri̱b chiwach i Dios reꞌ xyeꞌbic cho reh Lokꞌ laj rUxlabal chi naricholic cꞌacharic pan holonquilal. \s1 Reꞌ cꞌaxoj i̱b ncaꞌn take // aj nimanel aj tesalo̱nica \p \v 9 Reꞌ tijinic chiri̱j i cꞌaxoj i̱b cu̱cꞌ take awas acha̱kꞌ tak, reꞌreꞌ jenaj chic kꞌoric xkaꞌn naxojwihꞌic cho chaxilac tak xa reꞌ laꞌ yuꞌna reꞌ kꞌoric reꞌreꞌ maꞌ curman ta chi cu ewoꞌ chic nitzꞌihmbaj je aweh tak maj reꞌ hat-tak xa cꞌahchiꞌ woꞌ abanam tak i noꞌjbal reꞌreꞌ ruꞌum chi xarak tak chic chiri̱j chi manlic haj wilic rikꞌor i Dios. \v 10 Reꞌ noꞌjbal cꞌahchiꞌca̱t tak reꞌreꞌ, reꞌ woꞌ reꞌ cꞌahchiꞌ abanam tak cu̱cꞌ take chiꞌnchel cꞌacharel wilque̱b chi junsut riyukꞌul i Masero̱nya. Haj ti cok wilic i pahkanic nanibanam aweh tak yuꞌna chipam i hu̱j wili, reꞌ chi ma̱cana̱ꞌ tak ricꞌaxaric awi̱b tak, riman laꞌ ok chic chacowej acꞌux tak chi ribanaric reꞌreꞌ cu̱cꞌ take awich aj niminel tak. \v 11 Jeꞌ woꞌ, nipahkaj je aweh tak chipam take kꞌi̱j wili reꞌ cꞌahchiꞌ awuyꞌem tak wi̱ꞌ risoljic cho i kAja̱w Jesus, chacowej acꞌux tak chi cꞌacharic pan sukquil cꞌuxlis. Reꞌ cok ruꞌ ruꞌum chi til cꞌahchiꞌ awuyꞌem tak risoljic cho i Jesus maꞌ ruꞌum ta reꞌ enamay tak paꞌ bih alahtzꞌil tak wilic eli̱c i kꞌi̱j, chaꞌn laꞌ tak jeꞌ ricab xkakꞌor cho aweh tak naxojwihꞌic cho chaxilac tak. Jeꞌ reꞌ nikꞌor maj reꞌ hoj xkakꞌor cho aweh tak chi na̱camanic tak eh na̱cholic woꞌ tak risiqꞌuiric ri̱j nicꞌ wach ribehsjic acꞌa̱y na̱banam tak. \v 12 Jeꞌ reꞌ chaꞌn tak kꞌuruꞌ maj ru̱cꞌ reꞌ nariwihꞌic ribiral chi quixilac take cꞌacharel jaꞌ quiniminic ta reh i Dios chi tichol tak cꞌacharic chi coric. Jeꞌ woꞌ chic, ru̱cꞌ acamaj na̱banam tak enaꞌn tak canar atzꞌa̱k eh chi jeꞌ reꞌ enwihꞌic paꞌ bih aweh tak. \s1 Reꞌ kꞌoric chiri̱j risoljic // woꞌ chic cho i kAja̱w Jesus \p \v 13 Chi kꞌoro̱j chic lok aweh tak take noꞌjbal reꞌreꞌ, yuꞌna kꞌuruꞌ wich aj niminel nanikꞌoric je awu̱cꞌ tak chiri̱j risoljic woꞌ chic cho i kAja̱w Jesus. Jeꞌ reꞌ nanibanam ruꞌum nok til nwa̱j chi na̱rakam tak chiri̱j chaj bih naricꞌuluric cu̱cꞌ take kich aj niminel camnak chic take. Reꞌ nwa̱j chawi̱j tak ru̱cꞌ take kꞌoric reꞌreꞌ, reꞌ chi ma̱cansaj awi̱b tak ruꞌum tiꞌquil cꞌuxlis chiri̱j jenoꞌ queh aj niminel nquimic je jeꞌ ricab ncaꞌn take maꞌxta jenoꞌ cuyuꞌnbal chi narucsjic woꞌ chic cho i hab wach queh nquimic je. \v 14 Jeꞌ reꞌ kꞌuruꞌ jeꞌ woꞌ wili nikꞌor je aweh tak chiri̱j risoljic cho i Jesus: Reꞌ hoj aj niminel til nkacoj wach chi jeꞌ ricab naxuctic woꞌ cho Jesus chi quixilac take camnak naxquimic je, jeꞌ woꞌ reꞌ nachucsaj cho Dios take kich aj niminel camnak chic je take. Reꞌreꞌ naricꞌuluric nacꞌolok woꞌ chic lok i Jesus chiri̱j chi reꞌ Dios ribanam chic cho takꞌanic chi naricꞌamam johtok pan taxa̱j take aj niminel. \v 15 Ruꞌum aj reꞌ, reꞌ hoj nkakꞌor woꞌ aweh tak i kꞌoric wili reꞌ kꞌoro̱j woꞌ cho ruꞌum i kAja̱w Jesus: Reꞌ hoj aj niminel, reꞌ cu cꞌachalco̱j nacꞌolok lok i Jesus ricaꞌpech, maꞌxta pe ti kojic chiri̱j i kAja̱w Jesus chi reꞌ take kich aj niminel camnak take je, cꞌahchiꞌ ta nak quicahnic pan mukꞌunbal. Reꞌ laꞌ take reꞌ pe̱t nacuctic cho reh chi jenaj wach ojic nakaꞌnam johtok chiri̱j i kAja̱w Jesus. \v 16 Nicꞌ wach nacꞌulurok reꞌreꞌ? Jeꞌ wili riwi̱ꞌ nacꞌulurok ruꞌ: Reꞌ kAja̱w Jesus til reꞌ woꞌ reꞌ naricꞌulic cho pan taxa̱j. Chiri̱j aj reꞌ, reꞌ Dios nariyeb i takꞌanic reh cꞌamol quibe̱h take raj tzꞌeꞌ wa̱ch ar pan taxa̱j chi naquisubem pa̱m quisu̱b kꞌoꞌrbal queh take aj niminel camnak chic take, reh chi nacuctic cho chi junpech. \v 17 Chiri̱j chic cuctic cho take aj niminel camnak chic je take, reꞌ take reꞌreꞌ kichꞌi̱l hoj aj niminel reꞌ cu cꞌachalco̱j pe chipam take kꞌi̱j reꞌreꞌ nakacꞌamaric johtok juntar su̱tzꞌ reh chi ar pan te̱w nakojic kacꞌulum ki̱b ru̱cꞌ i kAja̱w Jesus. Ruꞌum aj chi reꞌ hoj chiꞌnchel aj niminel nakojic cꞌacharok ar pan taxa̱j ru̱cꞌ kAja̱w Jesus chi junelic, \v 18 til nikꞌor aweh tak chi maꞌ ntiꞌbic acꞌux tak chiqui̱j take aj niminel camnak chic je take. Reꞌ aj take kꞌoric nikꞌor je wili, camanok aweh tak chi ricowsjic acꞌux tak naꞌilmijok wach i hu̱j wili chaxilac tak. \c 5 \nb \v 1 Jeꞌ reꞌ kꞌuruꞌ hat-tak wich aj niminel, reꞌ hin nikꞌorom chic cho aweh tak naxinwihꞌic cho chaxilac tak chi nacꞌolok woꞌ chic lok i kAja̱w Jesus, nariwihꞌic jenaj nimal cꞌaxquilal. Ruꞌum aj reꞌ maꞌ curman ta chic chi enitzꞌihmbaj je aweh tak chaj bih take naricꞌuluric nachirak cho rikꞌijil ricꞌulic i kAja̱w Jesus. \v 2 Jeꞌ reꞌ nikꞌor maj reꞌ hat-tak awehtꞌalim tak chic chi coric chi reꞌ kꞌi̱j nok reꞌ Lokꞌ laj Ajabe̱s Jesus nachiyew cho tiꞌcꞌaxic chi quina̱ take maꞌ reꞌ ta aj niminel, maꞌ ehtꞌalamaj ta nacꞌolok lok. Chi jeꞌ aj reꞌ riwi̱ꞌ ricꞌulic cho kꞌi̱j reꞌreꞌ, reꞌ take tinamit maꞌ reꞌ ta aj niminel take naquicꞌulum queh jeꞌ ricab ncꞌuluric chipam jenoꞌ pa̱t chi maꞌ hab ta wach nehtꞌalanic reh ricꞌulic lok jenoꞌ aj lekꞌ pan chakꞌab. \v 3 Jeꞌ reꞌ kꞌuruꞌ nok reꞌ take tinamit maꞌ reꞌ ta aj niminel take nacoquic chi rikꞌormojic chi xa pan sukquil cꞌuxlis chic wilque̱b wi̱ꞌ, cu reꞌ chic queh ruꞌ narichalic chi quina̱ i rinimal tiꞌcꞌaxic eh maꞌ hab ta wach jenoꞌ queh eniqꞌuic i tiꞌcꞌaxic reꞌreꞌ china̱ jeꞌ ricab jenoꞌ yowa̱b ixok maꞌ iqꞌue̱l ta china̱ i ricꞌaxquilal nanchalic ritiꞌquil nancꞌulic ricꞌux. \p \v 4 Jeꞌ aj reꞌ ruꞌ naricꞌuluric cu̱cꞌ take tinamit reꞌreꞌ, ruꞌum chi reꞌ quicapew-bal pan kꞌekom wilic eh jeꞌ woꞌ ruꞌum chi xa ta nak xquirak chiri̱j chi chalic reh jenaj kꞌi̱j reꞌ nariyeꞌeric cho wi̱ꞌ tiꞌcꞌaxic chi quina̱ take maꞌ reꞌ ta aj niminel take. Raj i hat-tak wich aj niminel maꞌ reꞌ ta chic pan kꞌekom wilic acapew-bal tak eh ruꞌum reꞌ maꞌ eta ticahnic tak pan sachbal cꞌuxlis nacꞌolok lok i kꞌi̱j reꞌreꞌ jeꞌ ricab nquicꞌul take aj ehcham pa̱t chi nansahchic quicꞌux noquic aj lekꞌ pan quipa̱t. \v 5 Chaj bih riwi̱ꞌ nanikꞌor chi jeꞌ reꞌreꞌ? Jeꞌ reꞌ nikꞌor je aweh tak maj reꞌ hat-tak sakomomaj chic pa̱m anoꞌjbal tak chiri̱j ricꞌulic lok i kꞌi̱j reꞌreꞌ. Ruꞌum aj chi reꞌ anoꞌjbal hat-tak maꞌ reꞌ ta chic pan kꞌekom wilic, sakom chic wach tibanic tak eh maꞌ cꞌahbil ta chic tibanic tak jeꞌ ricab ncaꞌn take nquisicꞌ i kꞌekom chi ribanaric i cꞌahbilal. \v 6 Jeꞌ reꞌ kꞌuruꞌ wich aj niminel, ruꞌum chi sakomomaj chic wach aweh tak chi chalic reh i kꞌi̱j reꞌ nariyeꞌeric wi̱ꞌ tiꞌcꞌaxic chi quina̱ take maꞌ reꞌ ta aj niminel, maꞌ nsahchic acapew-bal tak chi ruyuꞌnjic ricꞌulic lok i kꞌi̱j reꞌreꞌ. Ruꞌum aj reꞌ nikꞌor aweh tak chi kaꞌn tak jeꞌ ricab ncaꞌn take maꞌ quiwiric ta chi richaꞌjaljic quipa̱t eh maꞌ nkaꞌn tak jeꞌ ricab ncaꞌn take nkajic quiwiric nok cꞌahchiꞌque̱b chi chaꞌjanic. \v 7 Jeꞌ woꞌ, maꞌ nkaꞌn jeꞌ ricab ncaꞌn take reꞌ ncamanic queh chakꞌab xa reh wiric, on xa reh xohcꞌsonic i̱b maj reꞌ take reꞌ xa jeꞌ reꞌ nquicꞌsaj wi̱ꞌ chakꞌab. \p \v 8 Reꞌ hoj kꞌuruꞌ reꞌ sakom wach kojbanic, maꞌ nkaꞌn jeꞌ ricab ncaꞌn take nkajic quiwiric nok cꞌahchiꞌ que̱b chi chaꞌjanic, xa uyunic laꞌ ok woꞌ riban kacapew-bal chiri̱j i kꞌi̱j kꞌoro̱j lok reꞌreꞌ maj xa chi jeꞌ reꞌ nakawihꞌic chi tikilco̱j ru̱cꞌ ricꞌulic lok i kꞌi̱j reꞌreꞌ jeꞌ ricab ritikꞌa̱ꞌ ri̱b jenoꞌ sol naricoj i chꞌihchꞌ laj tzꞌih chiꞌ ricꞌux coꞌlbal reh ritiꞌjolal, on jeꞌ ricab naricoj ripune̱t chꞌihchꞌ chi coꞌlbal reh rina̱. Jeꞌ reꞌ kꞌuruꞌ wi chꞌiclic chic kacꞌux chiri̱j i Jesus, jeꞌ woꞌ reꞌ katik tak juꞌ ricꞌaxaric take kas kacha̱kꞌ eh chi katik woꞌ juꞌ ruyuꞌnjic chi chꞌiclic kacꞌux i kacoꞌlbal nariyeb keh Jesus maj wi jeꞌ reꞌ nkaꞌn ra̱j rikꞌorom chi reꞌ hoj tikilco̱j chic ru̱cꞌ ricꞌulic lok i kꞌi̱j reꞌreꞌ. \v 9 Maꞌ xa reꞌ ta reꞌ, jeꞌ laꞌ woꞌ maꞌ eta chic kojyoꞌjic chiwach i kꞌi̱j reꞌreꞌ maj kehtꞌalim chic chi reꞌ Dios xitikꞌa̱ꞌ wach chi maꞌ reꞌ ta hoj nakacꞌulbic reh i tiꞌcꞌaxic naritakꞌa̱b cho ruꞌum reh rijoskꞌil china̱ quimahc take aj mahc. Chiri̱j chic lok reꞌreꞌ, reꞌ hoj kehtꞌalim chic chi reꞌ Dios xitikꞌa̱ꞌ wach chi reꞌ Jesus reꞌ Pahbamaj chi Kꞌatal Kꞌoric, xcoꞌlonic keh chiwach i tiꞌcꞌaxic reꞌreꞌ. \v 10 Reꞌ Jesus reꞌreꞌ, reꞌ woꞌ reꞌ xquimic chi katobjic i hoj reh chi enwihꞌic junelic kacꞌacharic ru̱cꞌ. Ruꞌum aj reh katobjic reꞌreꞌ, reꞌ hoj maꞌxta bih enkojcapewenic wi̱ꞌ chiri̱j risoljic cho kAja̱w Jesus to̱b ta ekojcꞌulic rirak chi hoj chic camnak on chi cu cꞌachalco̱j. Jeꞌ reꞌ nikꞌor maj kehtꞌalim chic chi xa paꞌ narojic wihꞌok i Jesus ar woꞌ nakawihꞌic i hoj chi junelic. \v 11 Jeꞌ reꞌ kꞌuruꞌ ruꞌum chi kehtꞌalim reꞌreꞌ, nkakꞌor aweh tak chi chayew tak ricowil acꞌux chawibil awi̱b tak eh cꞌul ok woꞌ chatoꞌbej awi̱b tak jeꞌ ricab cꞌahchiꞌca̱t tak cu yuꞌna chi kꞌi̱j. \s1 Juꞌjun chic take pahkanic nbanjic // je queh take aj Tesalo̱nica \p \v 12 Jeꞌ woꞌ chic yuꞌna was tak nicha̱kꞌ aj niminel, til nka̱j kapahkam aweh tak jenaj atoꞌbil chiqui̱j take raj camanom i kAja̱w Jesus wilque̱b chaxilac tak reꞌ xipahbabjic woꞌ ruꞌum i Jesus chi ricꞌamaric abe̱h tak, jeꞌ woꞌ chi ricojoric anoꞌjbal tak. Til aj nkapahkaj atoꞌbil aweh tak chi chalokꞌmej tak quiwach take aj camanom reꞌreꞌ. \v 13 Maꞌ xa reꞌ ta na̱lokꞌmem tak quiwach, jeꞌ laꞌ woꞌ nacꞌaxam tak take ru̱cꞌ sukquil acꞌux tak. Jeꞌ reꞌ nipahkaj je aweh tak ruꞌum nok reꞌ take aj camanom reꞌreꞌ nquiyew quicꞌux chi atobjic tak. \p Chi kꞌoro̱j aj chic lok reꞌreꞌ, nka̱j woꞌ kapahkam aweh tak chi tiwihꞌok tak pan sukquil cꞌuxlis chawibil awi̱b tak. \v 14 Jeꞌ woꞌ chic, nkapahkaj woꞌ je aweh tak chi chakꞌil tak take xa kꞌeboj kꞌi̱j ncaꞌn, chayew tak quinoꞌjbal chi coric eh reꞌ take nyoj quicꞌux chi niminic chayew woꞌ tak ricowil quicꞌux. Jeꞌ woꞌ, chatoꞌbej tak take maꞌ cow ta quicꞌux pan niminic, reꞌ cok ruꞌ wilic ok akꞌunil tak chi ribanaric take kꞌilo̱j na̱banam tak cu̱cꞌ take awich aj niminel tak reꞌreꞌ. \p \v 15 Jeꞌ woꞌ, chacoj tak rehtal ribanaric i capew-bal wili: Wi hab wach jenoꞌ aweh tak xbanjic tiꞌcꞌaxic reh ruꞌum jenoꞌ chic cꞌacharel, maꞌ riban chic jelow-bal i tiꞌcꞌaxic xbanaric reh. Maꞌ xa reꞌ ta reꞌ chaꞌn tak, jeꞌ laꞌ woꞌ cow chayew acꞌux tak chi ritobjic awi̱b tak jeꞌ ricab woꞌ enaꞌn tak cu̱cꞌ take maꞌ reꞌ ta aj niminel. \v 16 Jeꞌ woꞌ chic, nkapahkaj aweh tak chi xa tiwi̱ꞌ woꞌ tak chi suk acꞌux tak, \v 17 xa cꞌahchiꞌ ok woꞌ ca̱t tak johtok chi ti̱j chiwach i Dios \v 18 eh xa cꞌahchiꞌ ok woꞌ atioxem tak johtok reh i Dios chiꞌnchel nicꞌ paꞌ nimal riban cho awu̱cꞌ tak. Jeꞌ reꞌ chaꞌn tak maj reꞌreꞌ til ra̱j i Dios chi nakaꞌnam i hoj aj niminel nakojpahkanic johtok ru̱cꞌ. Jeꞌ woꞌ chic, nkapahkaj chi na̱banam tak chi jeꞌ reꞌ ruꞌum nok jeꞌ woꞌ reꞌ xkabiraj chi xiban i kAja̱w Jesus. \p \v 19 Reꞌ chic yuꞌna nipahkaj aweh tak chi ma̱ban tak ru̱cꞌ i Lokꞌ laj rUxlabal i Dios jeꞌ ricab naꞌn ru̱cꞌ i kꞌa̱kꞌ nanachup tak. Jeꞌ reꞌ nikꞌor maj wi reꞌ hat-tak xa eli̱c woꞌ nakꞌihtaj awi̱b tak chiwach, ta chic riwihꞌic awajawric tak reꞌ yeꞌo̱j aweh tak ruꞌum. \v 20 Ruꞌum aj reꞌ nok jenoꞌ cꞌacharel rikꞌor chi reꞌ take cꞌuhbal cꞌahchiꞌ rikꞌorom ar ru̱cꞌ i Dios nchalic, nkapahkaj aweh tak chi ma̱kꞌohraj pe tak ti chi maꞌ jeꞌ ta reꞌ xa ruꞌum ti ruꞌ chi jeꞌ reꞌ nchalic pan acapew-bal tak. \v 21 Reꞌ laꞌ chaꞌn tak, chasicꞌ tak ri̱j chi coric take cꞌuhbal erikꞌor aweh tak, ilbal reh wi til coric chi ar ru̱cꞌ i Dios nchalic take kꞌoric reꞌreꞌ. Wi til coric aj i cꞌahchiꞌ rikꞌorom, chacꞌul tak eh chacꞌam woꞌ tak na̱. \v 22 Tzꞌa̱b ruꞌ wi maꞌ coric i rikꞌor, chakꞌeb tak lok chiri̱j acꞌux tak chi junpech i paꞌ jaric maꞌ holohic ta laj noꞌjbal wilic chipam take cꞌuhbalanic riban i cꞌacharel reꞌreꞌ. \p \v 23 Chiri̱j chic take pahkanic xniban je aweh tak, reꞌ wili niti̱j niban je chawi̱j tak: Reꞌ ta nak i Dios reꞌ yeꞌol sukquil kacꞌux i hoj aj niminel, chicꞌol ta nak acꞌacharic tak chiwach i mahc cu rehtal riban chi chiꞌnchel acꞌacharic, reꞌ acapew-bal, reꞌ awa̱mna chꞌi̱l atiꞌjolal abakil tak, xa tzꞌiro̱j ta nak chic wach chiwach. Jeꞌ reꞌ ti̱j niban reh nok chi nacꞌolok woꞌ chic lok i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric, maꞌxta ok bih etikꞌilmijic tak wi̱ꞌ. \v 24 Reꞌ nipahkanic niban je chawi̱j tak reꞌreꞌ, til chꞌiclic nicꞌux chi naribanaric awu̱cꞌ tak ruꞌum nok reꞌ Dios xsicꞌbic cho awach tak, coric wach rikꞌorbal chi ribanaric paꞌ bih take rikꞌorom jeꞌ woꞌ chi rimahsjic wach i camanic ripꞌutum cho awu̱cꞌ tak. \s1 Reꞌ maꞌ Lu̱ꞌ ricohlaj wach kꞌoric cu̱cꞌ take aj tesalo̱nica \p \v 25 Yuꞌna hat-tak was tak nicha̱kꞌ aj niminel, nka̱j kapahkam woꞌ jenaj atoꞌbil aweh tak chi eli̱c na̱banam ati̱j tak chiki̱j, jeꞌ ricab woꞌ chi reꞌ hoj nkaꞌn je kati̱j chawi̱j tak. \v 26 Jeꞌ woꞌ, nka̱j kapahkam je aweh tak chi chayew tak risukquil quicꞌux take toco̱m chic kich aj niminel nquimol woꞌ qui̱b awu̱cꞌ tak ar. Ru̱cꞌ ricꞌalenjic awi̱b enaꞌn tak chawibil awi̱b tak, chacꞌuhtaj woꞌ tak i cꞌaxoj i̱b wilic chawibil awi̱b tak. \v 27 Jeꞌ aj reꞌ nipahkaj je aweh tak eh til woꞌ chic nipahkaj aweh tak chi reꞌ hu̱j cꞌahchiꞌ nitakꞌa̱b je aweh tak wili chawilow tak wach chi quiwach chiꞌnchel i kich aj niminel nquimol qui̱b chi niminic ar Tesalo̱nica. Ru̱cꞌ i pahkanic niban je aweh tak wili, chana̱ chic hat-tak wilic i ihk chiwach i kAja̱w Jesus chi ribanaric reꞌreꞌ. \v 28 Kꞌoro̱j chic chiꞌnchel reꞌreꞌ, yuꞌna niban niti̱j chi reꞌ ta Lokꞌ laj Ajabe̱s Jesus reꞌ Pahbamaj chi Kꞌatal Kꞌoric chiyew cho ratoꞌbil chana̱ tak. Jeꞌ reꞌ nwa̱j chi chiban cho awu̱cꞌ tak.