\id 1PE - Pokomchi Occidental NT 
\h 1 PEDRO 
\toc1 Reꞌ pe̱t hu̱j xitzꞌihmbaj i Maꞌ Luch 
\toc2 1 PEDRO 
\toc3 1 P 
\mt2 Reꞌ pe̱t hu̱j xitzꞌihmbaj i 
\mt1 Maꞌ Luch 
\c 1  
\s1 Reꞌ hu̱j xtzꞌihmjic je queh // aj niminel quipuhcam qui̱b // xa haj yeꞌa̱b chi cꞌacharic 
\p  
\v 1 Reꞌ hin maꞌ Luch, hin cꞌahchiꞌ nitzꞌihminic reh i hu̱j wili. Reꞌ hin wilic wajawric chi ritzꞌihmjic i hu̱j wili ruꞌum nok hin pahbamaj chi aj kꞌorol ribiral i Jesus reꞌ Pahbamaj chi Kꞌatal Kꞌoric. Jeꞌ reꞌ ajic aweh hat-tak aj niminel reꞌ xapuhcaj awi̱b tak chipam atinami̱t tak, cꞌahchiꞌ nitzꞌihmbam je hu̱j wili xa paꞌ yukꞌul wilca̱t tak ponok chi cꞌacharic, jeꞌ ricab ar pa riyukꞌul i Po̱nto, pa riyukꞌul i Cala̱sya, pa riyukꞌul i Caparo̱sya, pa riyukꞌul i A̱sya chꞌi̱l woꞌ pa riyukꞌul i Witi̱nya.  
\v 2 Aweh hat-tak chawunchelal tak cꞌahchiꞌ nitzꞌihmbam je hu̱j wili maj reꞌ hat-tak wilca̱t tak chic chi ritinami̱t i Dios. Jeꞌ reꞌ xa̱j i Dios chawi̱j tak eh ruꞌum reꞌ xichih cho awach tak chi xatwihꞌic tak chi ritinami̱t. Jeꞌ woꞌ chic reꞌ Lokꞌ laj Uxlabal xiban chi xayew acꞌux tak chi xatoquic tak chi ritinami̱t i Dios eh ruꞌum reꞌ yuꞌna reꞌ hat-tak nanimej tak chic i Dios. Reꞌ chic chiri̱j riquimic i Jesus reꞌ Pahbamaj chi Kꞌatal Kꞌoric nwa̱j nikꞌorom chi reꞌ riquimic ruꞌ, reꞌreꞌ xbanic chi xcuyuric amahc tak jeꞌ ricab chi reꞌ riquiqꞌue̱l i me̱ꞌ xkꞌahsjic cho chi si̱ chiwach i Dios xesaj lok quimahc take cꞌacharel naxquihrjic cho chi quina̱. 
\p Chiri̱j chic rikꞌormojic lok reꞌreꞌ, reꞌ wili niti̱j niban yuꞌna chawi̱j tak: Reꞌ ta nak i kAja̱w Dios chacꞌuhtaj chi kꞌe̱ꞌ woꞌ chic chakꞌlamil awu̱cꞌ tak eh reꞌ woꞌ yeꞌbok rinimal wach risukquil acꞌux tak. 
\s1 Reꞌ Dios riyew i junelic cꞌacharic chi jeꞌ ricab jenaj co̱ch 
\p  
\v 3 Was tak nicha̱kꞌ aj niminel, kayew tak rilokꞌil i Ajabe̱s Dios reꞌ rAja̱w i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric. Jeꞌ reꞌ nikꞌor chi kaꞌn tak ruꞌum reh rinimal wach quetelenic wachi̱s xicꞌuhtaj cho ku̱cꞌ naxiban chi reꞌ Jesus xipꞌut johtok jenaj chic acꞌ cꞌacharic naxuctic woꞌ chic cho chi quixilac take camnak jeꞌ ricab nancꞌulic wach sakom jenoꞌ haꞌlacꞌun jenaj chic acꞌ cꞌacharel ripꞌut johtok cꞌacharic. Nicꞌ paꞌ wach ncꞌuluric reꞌreꞌ jeꞌ woꞌ reꞌ xkacꞌul i hoj, reꞌ Dios xiyew woꞌ kꞌab keh hoj chi xkarak jenaj chic acꞌ laj cꞌacharic chi junelic. Ruꞌum aj reꞌ yuꞌna til chꞌiclic kacꞌux cꞌahchiꞌ kuyꞌem i kꞌi̱j nok reꞌ cꞌacharic reꞌreꞌ nakaꞌnam risukquil chi coric.  
\v 4 Jeꞌ reꞌ nok jeꞌ ricab ncꞌuluric ru̱cꞌ i co̱ch ritikꞌa̱ꞌ lok wach jenoꞌ ajabe̱s chi naquicꞌulum take rihaꞌlacꞌu̱n, jeꞌ woꞌ reꞌ xiban i Dios chi xiyew keh i hoj i junelic cꞌacharic chi jenaj kaco̱ch. Nok riyeb chic keh chi nakacꞌacharic chi junelic, reꞌ hoj maꞌ eta chic nsahchic kawach, maꞌ eta woꞌ chic nkaꞌn i mahc eh maꞌ woꞌ jalaric ta chic ra̱j wach kacꞌacharic chi junelic. Jeꞌ reꞌ ajic til nariyeꞌeric keh i kaco̱ch xa reꞌ laꞌ reꞌ Dios xitikꞌa̱ꞌ wach chi cu reꞌ nok wilco̱j chic ar pan taxa̱j nakacꞌul  
\v 5 eh ruꞌum chi chꞌiclic acꞌux tak chiri̱j, reꞌ Dios yuꞌna xa cꞌahchiꞌ woꞌ ricojom i rajawric chi acoꞌljic tak. Jeꞌ woꞌ xa naritikim woꞌ juꞌ ribanaric chi jeꞌ reꞌ cu rehtal cho rikꞌijil i cohlsbal wach take kꞌi̱j reꞌ tiklic chic cho wach chi nakilom wi̱ꞌ chi manlic i coꞌlonic naribanam i Dios ku̱cꞌ hoj chiꞌnchel aj niminel reh.  
\v 6 Ruꞌum aj reꞌ, reꞌ wili riwi̱ꞌ chi reꞌ hat-tak narisukbic wi̱ꞌ acꞌux tak. 
\p Coric ruꞌ, chipam i rikꞌijil wili qꞌuihal take tiꞌcꞌaxic nwihꞌic chana̱ tak xa reꞌ laꞌ, reꞌ take reꞌ maꞌxta riwihꞌic chana̱ tak chi junpech eh jeꞌ reꞌ nikꞌor maj reꞌ riwi̱ꞌ chi chiꞌnchel reꞌreꞌ nchalic chana̱ tak yuꞌna reꞌ chi curman chaweh tak chi jeꞌ reꞌ nacꞌul tak  
\v 7 jeꞌ ricab nok curman chi reꞌ kꞌan woric laj chꞌihchꞌ niqꞌuic pan kꞌa̱kꞌ niqꞌuinbal reh. Wi jeꞌ reꞌ ncꞌuluric ru̱cꞌ kꞌan woric laj chꞌihchꞌ ilbal reh ritzꞌakil to̱b ta nchel nariponic i kꞌi̱j chi maꞌ eta chic ncamanic, til woꞌ kꞌe̱ꞌ curman chaweh tak chi reꞌ Dios eripaj nicꞌ wach richꞌiquinjic acꞌux tak cꞌahchiꞌca̱t tak chiri̱j. Jeꞌ reꞌ nikꞌor maj jeꞌ ricab chi reꞌ chꞌihchꞌ reꞌreꞌ wilic ritzꞌakil jeꞌ woꞌ chiwach i Dios til kꞌe̱ꞌ woꞌ ritzꞌakil richꞌiquinjic acꞌux naꞌn tak chiri̱j ruꞌ. Ruꞌum reꞌ, reꞌ Dios tiripaj tak yuꞌna reh chi naponok rikꞌijil naꞌilmijok woꞌ chic wach i Jesus reꞌ Pahbamaj chi Kꞌatal Kꞌoric, enkꞌormojic chawi̱j tak chi kꞌe̱ꞌ holohic richꞌiquinjic acꞌux xaꞌn tak chiri̱j i Dios eh ru̱cꞌ reꞌreꞌ nariyeb woꞌ alokꞌil tak. 
\p  
\v 8 Coric ruꞌ, reꞌ Jesus maꞌ jancꞌal ta awilom tak wach xa reꞌ laꞌ ruꞌ to̱b ta woꞌ cu yuꞌna chi kꞌi̱j maꞌ jancꞌal ta awilom tak wach, reꞌ hat-tak xachꞌica̱ꞌ acꞌux tak chiri̱j eh kꞌe̱ꞌ woꞌ tiꞌ nawicꞌraj tak. Maꞌ xa ta reꞌreꞌ, pan awa̱mna laꞌ hat-tak yuꞌna nawicꞌraj tak i sukquil cꞌuxlis reꞌ maꞌ pajoj ta woꞌ chic rikꞌormojic. Jeꞌ reꞌ nawicꞌraj tak  
\v 9 maj abiram tak chic i wili chi ruꞌum i richꞌiquinjic acꞌux xaꞌn tak chiri̱j i Jesus nariyeꞌeric aweh tak chi eticoꞌljic tak chi manlic ruꞌum i Dios naponok i rikꞌijil reh cohlsbal wach chiꞌnchel. 
\s1 Reꞌ take aj kꞌorol riCꞌuhbal i Dios xikꞌoric cho chiri̱j i Pahbamaj chi Kꞌatal Kꞌoric 
\p  
\v 10 Reꞌ kꞌoro̱j wili chiri̱j i coꞌlbal riyew i Dios ruꞌum reh richakꞌlamil, xa nok woꞌ kꞌoro̱j cho ribiral cuꞌum take aj kꞌorol riCꞌuhbal i Dios. Reꞌ take reꞌ naxikꞌoric cho chiri̱j i coꞌlbal reꞌreꞌ pe̱t xquiyew quicꞌux chi ritijiljic ri̱j chi coric  
\v 11 jaruj encꞌuluric take tiꞌcꞌaxic naribanjic reh i Pahbamaj chi Kꞌatal Kꞌoric. Jeꞌ woꞌ xquitijej ri̱j hab wach i pahbamaj reꞌreꞌ. Jeꞌ aj reꞌ xcaꞌn maj chiri̱j i pahbamaj reꞌreꞌ nkꞌoric i Lokꞌ laj Uxlabal nanwihꞌic cu̱cꞌ take aj kꞌorol reꞌreꞌ chi rikꞌormojic queh chiri̱j take tiꞌcꞌaxic naricꞌulum i pahbamaj reꞌreꞌ eh jeꞌ woꞌ nkꞌoric chiri̱j i lokꞌil nariyeꞌeric woꞌ reh pahbamaj reꞌreꞌ nok ricꞌulum chic take tiꞌcꞌaxic kꞌoro̱j chi naricꞌulum. 
\p  
\v 12 Ruꞌum reh i tijinic xcaꞌn take aj kꞌoro̱l reꞌreꞌ, reꞌ Dios xicꞌuhtaj queh chi coric reꞌ haj wilic i kꞌoro̱j cho chiri̱j i Pahbamaj chi Kꞌatal Kꞌoric. Reꞌ xkꞌormojic aj chiri̱j reꞌreꞌ, maꞌ xcꞌuluric ta chic chiwach quikꞌijil take cꞌacharel xicꞌacharic chipam i rikꞌijil reꞌreꞌ, xcꞌuluric laꞌ pan jenaj chic rikꞌijil eh yuꞌna cꞌahchiꞌ rikꞌormojic ribiral cuꞌum take quikꞌoric ribiral i lokꞌ laj kꞌoric reh coꞌlbal i̱b chi yeꞌo̱j quikꞌorbal ru̱cꞌ rajawric i Lokꞌ laj Uxlabal reꞌ takꞌamaj cho cu pan taxa̱j. Reꞌ kꞌoric nbirmijic chiri̱j i kꞌoro̱j wili til kꞌe̱ꞌ woꞌ chic holonquilal chi reꞌ take raj tzꞌeꞌ wa̱ch i Dios ar pan taxa̱j xa xca̱j nak chic rirakmajic chiri̱j nicꞌ paꞌ nimal kꞌoro̱j cho reꞌreꞌ. 
\s1 Ru̱cꞌ riquimic i Jesus reꞌ Dios xiban chi xicoꞌlej take cꞌacharel 
\p  
\v 13 Ruꞌum chi chipam rikꞌijil wilco̱j wi̱ꞌ wili cꞌahchiꞌ ricꞌuluric i kꞌoro̱j cho cuꞌum take aj kꞌorol cho reh rikꞌorbal i Dios, reꞌ hin nipahkaj aweh tak chi chatikꞌa̱ꞌ awi̱b tak chi rirakmajic chiri̱j i kꞌoro̱j aweh tak jeꞌ ricab nok jenoꞌ winak naritikꞌa̱ꞌ ri̱b ribacꞌ riwe̱x chi coric. Cu rehtal aj nmanlajic wach i naribanam i Dios ruꞌum chi tiꞌ tiricꞌraj tak, chapahba̱ꞌ acꞌux tak chi ruyuꞌnjic. Reꞌ aj wili naribanam i Dios: Reꞌreꞌ naribanam chi naꞌilmijok woꞌ chic wach i Jesus reꞌ Pahbamaj chi Kꞌatal Kꞌoric reꞌ hat-tak eticoꞌljic tak chi junpech ruꞌum.  
\v 14 Jeꞌ reꞌ nok ruꞌum chi hat-tak chic racꞌu̱n rixkꞌu̱n i Dios, curman chi na̱banam tak jeꞌ ricab riban i acꞌunbe̱s reꞌ rinimej i raja̱w. Til nipahkaj aweh tak kꞌuruꞌ chi ma̱yew acꞌux tak chiri̱j ribanaric i cꞌahbilal jeꞌ ricab xaꞌn tak cho najtir kꞌi̱j ruꞌum chi maꞌ anaꞌbem ta nak tak chiri̱j ribiral i Dios. 
\p  
\v 15 Reꞌ chic yuꞌna chi wilca̱t tak chic chi racꞌu̱n rixkꞌu̱n i Dios ruꞌum i yukꞌunic xiban aweh tak, riwi̱ꞌ chaweh tak chi na̱wihꞌic tak chi coric ok wach anoꞌjbal jeꞌ ricab i rinoꞌjbal ruꞌ chi lo̱kꞌ woꞌ.  
\v 16 Jeꞌ reꞌ nikꞌor maj jeꞌ woꞌ reꞌ tzꞌihmbimaj chipam i Lokꞌ laj Hu̱j reꞌ wilic wi̱ꞌ i riCꞌuhbal i Dios reꞌ kꞌoro̱j wi̱ꞌ chi jeꞌ wili: 
\q1 “Coric ok wach anoꞌjbal tak 
\q1 maj reꞌ hin xa coric woꞌ wach ninoꞌjbal, nqui kꞌoro̱j cho. 
\p  
\v 17 Ruꞌum chi reꞌ hat-tak nanaꞌn ati̱j tak nakꞌor tak johtok reh Dios chi reꞌreꞌ awAja̱w tak, reꞌ hin nikꞌor aweh tak chi jeꞌ wili: Reꞌ kꞌorel nicꞌ paꞌ wach bano̱j caꞌnam take cꞌacharel, reꞌ woꞌ reꞌ richꞌukuric quimahc naribanam chi quijuꞌjunal maj reꞌ Dios maꞌ richih ta quiwach take cꞌacharel narichꞌukum kꞌoric china̱ quimahc. Ruꞌum aj reꞌ curman chaweh tak chi cu rehtal riponic wach acꞌacharic tak ayuꞌ wach acꞌal, chayohbalej wach i Dios chi cꞌahchiꞌ ayeb tak rilokꞌil chi coric pan acꞌacharic tak.  
\v 18 Jeꞌ reꞌ nipahkaj aweh tak chi na̱banam tak ruꞌum chi awehtꞌalim tak chic chi xatcoꞌljic tak cho chiwach i cꞌacharic nbanaric cho najtir kꞌi̱j, reꞌ to̱b ta nak xa maꞌxta cho ricorquilal xa xcanabjic woꞌ cahnok aweh tak cuꞌum atu̱t awaja̱w tak. Maꞌ xa reꞌ ta reꞌ, awehtꞌalim laꞌ woꞌ tak chi reꞌ acoꞌlbal tak reꞌreꞌ, maꞌ xarak ta tak xa ru̱cꞌ ta nak nchel take xa paꞌ bih jaric reꞌ ru̱cꞌ xa sahchel woꞌ wach, jeꞌ ricab i kꞌan woric laj chꞌihchꞌ on reꞌ sak laj chꞌihchꞌ,  
\v 19 reꞌ laꞌ acoꞌljic tak xbanaric xa ru̱cꞌ i lokꞌ laj quicꞌ reꞌ kꞌe̱ꞌ woꞌ chic ritzꞌakil chiwach quitzꞌakil take chꞌihchꞌ reꞌreꞌ. Nikꞌor chi jeꞌ reꞌ maj ru̱cꞌ i riquiqꞌue̱l i Jesus reꞌ Pahbamaj chi Kꞌatal Kꞌoric xrakmajic i coꞌlbal aweh tak. Til pa ricorquil, reꞌ Jesus xichihcaj riquiqꞌue̱l chiki̱j chi maꞌ xiban ta jenoꞌ mahc. Chi jeꞌ reꞌ, ru̱cꞌ reꞌreꞌ xcꞌuluric jeꞌ ricab ncꞌuluric ru̱cꞌ i jenaj me̱ꞌ nankꞌahsjic chi si̱ chiwach i Dios chi curman chi reh chi maꞌxta jenoꞌ yaꞌbilal pa ritiꞌjolal ribakil. 
\p  
\v 20 Jeꞌ reꞌ kꞌuruꞌ ru̱cꞌ riquimic i Jesus reꞌ Dios xatricoꞌlej tak chiwach cꞌahbil laj cꞌacharic xaꞌn tak cho najtir kꞌi̱j. Reꞌ quimic xicꞌul i Jesus xa nok woꞌ tikꞌimaj cho wach ruꞌum i Dios nok cu jaꞌ tikꞌimaj ta woꞌ cho wach acꞌal wili xa reꞌ laꞌ maꞌ xcꞌuluric ta nok maꞌ jaꞌ xta bih tikꞌimaj cho. Ruꞌum aj reh ricꞌaxbal i Dios wilic chana̱ tak, xiban cho chi cu reꞌ xcꞌuluric chiwach take kꞌi̱j wilco̱j wi̱ꞌ yuꞌna, reꞌ narichalic wi̱ꞌ jenaj kꞌi̱j narojic manlajok wi̱ꞌ wach chiꞌnchel xcꞌulic riban i Jesus chi kacoꞌljic ayuꞌ wach acꞌal.  
\v 21 Ruꞌum aj xabiraj tak chi xiban i Jesus, reꞌ hat-tak yuꞌna kꞌuruꞌ chꞌiclic acꞌux tak chiri̱j i Dios. Maꞌ xa ruꞌum ta reꞌ chꞌiclic acꞌux tak, jeꞌ laꞌ woꞌ ruꞌum chi reꞌ Jesus xucsjic cho chi quixilac take camnak reꞌ hat-tak chꞌiclic woꞌ acꞌux tak chiri̱j i Dios chi reꞌreꞌ naca̱t woꞌ tak rucsam cho chi quixilac take camnak. Jeꞌ woꞌ chic, ruꞌum chi reꞌ Dios xiyew rinimal rilokꞌil i Jesus naxponic woꞌ chic ar pan taxa̱j, yuꞌna reꞌ hat-tak cꞌahchiꞌ woꞌ awuyꞌem tak i kꞌi̱j nayeꞌerok woꞌ alokꞌil tak. 
\s1 Maꞌ jaruj ta sahchel wach i // acꞌ cꞌacharic riyew i Dios 
\p  
\v 22 Nok reꞌ hat-tak ru̱cꞌ ritoꞌbal i Lokꞌ laj Uxlabal xacꞌul tak i coric wilic chipam i riCꞌuhbal i Dios, xyeꞌeric woꞌ aweh tak ruꞌum i Dios chi xatcahnic tak chi sak chic wach awa̱mna tak eh ru̱cꞌ reꞌreꞌ xyeꞌeric woꞌ aweh tak chi nachacꞌax awi̱b tak ru̱cꞌ ok chiꞌnchel awa̱mna tak chacꞌuhtaj tak i coric laj cꞌaxoj i̱b cu̱cꞌ awich aj niminel tak. Chi jeꞌ aj reꞌ chi saksamaj chic wach awa̱mna tak chacꞌax awi̱b chawibil awi̱b tak.  
\v 23 Reꞌ hin niban i takꞌanic reꞌreꞌ maj jeꞌ ricab nanasjic jenoꞌ tꞌuch haꞌlacꞌun npꞌuhtic jenaj chic cꞌacharic, jeꞌ woꞌ reꞌ hat-tak xyeꞌeric woꞌ aweh tak jenaj chic acꞌ acꞌacharic tak. Reꞌ cꞌacharic reꞌreꞌ maꞌ jeꞌ ta ricab i cꞌacharic reꞌ xa nicꞌ yuꞌ ensahchic wach ruꞌum chi xa tiwic woꞌ ti take katu̱t kaja̱w reꞌ xiyeꞌbic kacꞌacharic, ra̱j laꞌ i cꞌacharic reꞌreꞌ maꞌ jaruj ta sahchel wach maj reꞌ Dios xyeꞌbic aweh naxacoj tak wach rikꞌorbal eh chiwach ruꞌ reꞌ paꞌ bih rikꞌorbal riyeb xa ewoꞌ nwihꞌic eh xa ewoꞌ ncꞌacharic chi junelic  
\v 24 jeꞌ ricab rikꞌor i Lokꞌ laj Hu̱j tzꞌihmbimaj wi̱ꞌ riCꞌuhbal. Ar jeꞌ wili rikꞌor: 
\q1 “Reꞌ quicꞌacharic take chiꞌnchel cꞌacharel jeꞌ ricab i qꞌuiche̱ꞌ 
\q1 maj reꞌ quiwaꞌric xa nsahchic woꞌ wach jeꞌ ricab ncꞌuluric ru̱cꞌ rixmacꞌal take qꞌuiche̱ꞌ 
\q1 chi quikꞌehbic woꞌ ti naquichikic take xak. 
\q1  
\v 25 Ra̱j laꞌ i kꞌoro̱j ruꞌum i Dios 
\q1 xa chi junelic woꞌ wilic, nqui rikꞌor. 
\p Reꞌ kꞌoro̱j cho reꞌreꞌ ruꞌum i Dios, reꞌ woꞌ reꞌ i cꞌuhbal chiri̱j i Jesus. Reꞌ cꞌuhbal reꞌreꞌ ricꞌam cho sukquil cꞌuxlis queh take quicꞌulbic reh. 
\c 2  
\s1 Reꞌ hat-tak xatrichih tak i Dios chi aj kꞌorol reh riholonquilal i bano̱j xiban awu̱cꞌ tak 
\p  
\v 1 Ruꞌum chi xyeꞌeric chic aweh tak chi na̱cꞌacharic tak chi junelic, reꞌ hin nipahkaj aweh tak chi chakꞌeb lok chiri̱j acꞌux tak take chiꞌnchel maꞌ holohic ta laj noꞌjbal, chiꞌnchel jotꞌoj i̱b, take cakcatil ruꞌum ricꞌaxaric wach xa chajaric wilic reh jenoꞌ, take qui̱b wach cꞌuxlis eh chꞌi̱l woꞌ take tzꞌuju̱j i̱b.  
\v 2 Jeꞌ woꞌ chic, jeꞌ ricab chi reꞌ jenoꞌ tꞌuch haꞌlacꞌun reꞌ cu reꞌ ti xasjic cho, xa reꞌ wach ri̱s chꞌu̱chꞌ reꞌ maꞌ cojo̱j ta haꞌ ru̱cꞌ rotowej cho, jeꞌ woꞌ reꞌ chaꞌn hat-tak chawotowej tak ritijiljic ri̱j i riCꞌuhbal i Dios jeꞌ ricab riban i tꞌuch haꞌlacꞌun ru̱cꞌ i ri̱s richꞌu̱chꞌ i ritu̱t. Reꞌ cok ruꞌ curman chi reꞌ cꞌuhbal reꞌreꞌ maꞌ hab wach njopbic wach reh chi yuꞌna johtok chi kawach cu rehtal rimanlajic wach acoꞌljic tak chi junpech xa cꞌahchiꞌ ok woꞌ atikim tak juꞌ ricowsjic acꞌux tak chiri̱j i Dios.  
\v 3 Jeꞌ reꞌ chaꞌn tak kꞌuruꞌ maj reꞌ hat-tak til xawilow tak chic pan acꞌacharic chi reꞌ Dios kꞌe̱ꞌ chakꞌlam jeꞌ reꞌ rikꞌor chipam i Lokꞌ laj Hu̱j reꞌ tzꞌihmbimaj wi̱ꞌ riCꞌuhbal i Dios. 
\p  
\v 4 Reꞌ hin nipahkaj woꞌ chic aweh tak chi chajil tak cok awi̱b ru̱cꞌ i Jesus reꞌ cꞌachlic chi junelic. Til coric, ru̱cꞌ i Jesus ncꞌuluric jeꞌ ricab ncꞌuluric ru̱cꞌ i abaj cojo̱j nak chi tikꞌinbal jenoꞌ pa̱t. Jeꞌ ricab nok chi ru̱cꞌ abaj reꞌreꞌ wilic take cꞌacharel maꞌ nca̱j ta quicojom chi tikꞌinbal jenoꞌ pa̱t jeꞌ woꞌ reꞌ ncꞌulmujic ru̱cꞌ i Jesus, wilic take cꞌacharel maꞌ nca̱j ta quicꞌulum chi naquinimem. Reꞌ cok ruꞌ to̱b ta woꞌ wilic take cꞌacharel jeꞌ reꞌ ncaꞌn, ru̱cꞌ i Dios maꞌ jeꞌ ta reꞌ ncꞌuluric maj reꞌ laꞌ xiban ruꞌ xichih cho i Jesus reh chi enwihꞌic rinimal rilokꞌil chiwach.  
\v 5 Jeꞌ reꞌ ajic ruꞌum chi xa nakacꞌacharic woꞌ jeꞌ ricab i Jesus reꞌ xa cꞌachlic woꞌ chi junelic, reꞌ hin nikꞌor woꞌ aweh tak chi jeꞌ ricab nok wilic i Jesus reꞌ Pahbamaj chi Kꞌatal Kꞌoric, reꞌ hat-tak jeꞌ woꞌ acab tak i abaj cojo̱j chi tikꞌinbal reh jenoꞌ pa̱t. Nikꞌor chi jeꞌ reꞌ maj chawunchelal hat-tak wilca̱t tak chi quixilac take awich cꞌacharel chi enalokꞌej tak wach i Dios ru̱cꞌ ritoꞌbal i Lokꞌ laj Uxlabal jeꞌ ricab chi ar chipam i Lokꞌ laj Pa̱t reꞌ nlokꞌonjic wi̱ꞌ wach i Dios, nalokꞌej tak wach. Jeꞌ reꞌ ajic jeꞌ ricab nok reꞌ aj kꞌahsem si̱ wilic chi rikꞌahsjic si̱ chiwach i Dios, jeꞌ woꞌ reꞌ chi ajuꞌjunal hat-tak wilca̱t woꞌ tak chi lokꞌ laj aj lokꞌonel wach i Dios. Reꞌ lokꞌonic reꞌreꞌ, reꞌ chic i Lokꞌ laj Uxlabal ntoꞌbonic aweh tak chi riyeꞌeric chiwach i Dios eh nanaꞌn tak natilokꞌonic, reꞌ Dios ricꞌul cho ruꞌum chi hat-tak chic aj niminel reh Jesus.  
\v 6 Jeꞌ reꞌ nikꞌor maj reꞌreꞌ kꞌe̱ꞌ lo̱kꞌ riwaꞌric jeꞌ ricab rikꞌor chipam i Lokꞌ laj Hu̱j reꞌ tzꞌihmbimaj wi̱ꞌ i riCꞌuhbal i Dios. Ar jeꞌ wili rikꞌor: 
\q1 “Chacoj tak rehtal i wili: Jeꞌ ricab nok reꞌ caj tzꞌuꞌc laj maꞌ laj abaj ncamanic chi chꞌiquinbal cho reh pa̱t, 
\q1 reꞌ hin nanibanam chi ar china̱ i yu̱kꞌ “Siyon” ribihnal nanicojom i jenaj reꞌ naribanic chi reꞌ take cꞌacharel naquichꞌica̱b quicꞌux chiwi̱j. 
\q1 Reꞌ nanicojom reꞌreꞌ, nichiho̱j eh til kꞌe̱ꞌ lo̱kꞌ riwaꞌric chi niwach, nqui rikꞌor. 
\p Ruꞌum aj woꞌ reꞌ, jeꞌ woꞌ wili tzꞌihmbimaj cho pan Lokꞌ laj Hu̱j reꞌreꞌ: 
\q1 “Xa hab wach narichꞌica̱b ricꞌux chiri̱j, 
\q1 maꞌ jaruj ta narojic chi kꞌe̱b i riniminic, nqui tzꞌihmbimaj cho. 
\p  
\v 7 Jeꞌ aj reꞌ ruꞌ chaweh hat-tak reꞌ tiniminic tak reh Jesus, kꞌe̱ꞌ lo̱kꞌ riwi̱ꞌ chawach tak ruꞌ, raj laꞌ chi queh take maꞌ quiniminic ta reh maꞌ jeꞌ ta reꞌ. Ruꞌum aj reꞌ cu̱cꞌ take reꞌ no̱j elok wach i tzꞌihmbimaj cho pan Lokꞌ laj Hu̱j reꞌ tzꞌihmbimaj wi̱ꞌ riCꞌuhbal i Dios narikꞌor chi jeꞌ wili: 
\q1 “Reꞌ cajtzꞌuꞌc laj maꞌ laj abaj maꞌ cojo̱j ta pa riman cuꞌum take toco̱m chic aj tzꞌako̱l, 
\q1 reꞌ peꞌ chic reꞌ xoquic chi pe̱t maꞌ laj abaj chꞌiquinbal cho reh ricajtzꞌuꞌc i pa̱t wili, nqui rikꞌor. 
\p  
\v 8 Jeꞌ woꞌ chic, cu̱cꞌ take reꞌ no̱j woꞌ elok wach i jenaj chic kꞌoric wilic chipam i riCꞌuhbal i Dios reꞌ rikꞌor chi jeꞌ wili: 
\q1 “Jeꞌ ricab nok jenoꞌ cꞌacharel ricoj jenoꞌ abaj kꞌetbal pa̱m quibe̱h take cꞌacharel chi enquitohxaj nah co̱k china̱, 
\q1 reꞌ hin nanibanam woꞌ chi ar Siyon enwihꞌic jenoꞌ naribanam chi kꞌetbal reh quiniminic take ra̱ꞌ riꞌsil cho maꞌ Israhel, nqui rikꞌor. 
\p Jeꞌ aj reꞌ ruꞌum chi maꞌ nquicꞌul ta riCꞌuhbal i Dios riban chi cu̱cꞌ take cꞌacharel reꞌreꞌ ncꞌuluric i xitikꞌa̱ꞌ cho wach wili chi narichalic i tiꞌcꞌaxic chi quina̱.  
\v 9 Raj laꞌ awu̱cꞌ tak maꞌ jeꞌ ta reꞌ ncꞌuluric maj chiho̱j chic cho awach tak ruꞌum i Dios chi ritinami̱t. Jeꞌ woꞌ til wilic chic abiral tak chi hat-tak chic aj kꞌahsem si̱ chiwach eh kꞌe̱ꞌ alokꞌil tak chiwach. Jeꞌ woꞌ, reꞌreꞌ xatrichih tak chi aj kꞌorol reh riholonquilal i bano̱j xiban awu̱cꞌ tak naxatriyukꞌej tak cho chi na̱cꞌacharic tak chi sutumaj chic awi̱j tak ru̱cꞌ riholonquilal risakomil i Dios. Reꞌ sakom reꞌreꞌ, reꞌ woꞌ reꞌ nsakomonic pa̱m acapew-bal tak reh chi jeꞌ reꞌ maꞌ eta chic ticꞌacharic tak chipam rikꞌekomil acapew-bal tak ricꞌam cho i cꞌahbil laj cꞌacharic xaꞌn tak cho.  
\v 10 Jeꞌ reꞌ ajic to̱b ta najtir cho kꞌi̱j maꞌ reꞌ ta nak hat-tak ritinami̱t cho i Dios, yuꞌna hat-tak chic ritinami̱t. Chi jeꞌ chic reꞌ awi̱ꞌ tak, maꞌ jeꞌ ta chic acab cho najtir chi maꞌxta nak cho riquetelbal i Dios chana̱ tak, reꞌ laꞌ chic yuꞌna wilic chic riquetelbal i Dios chana̱ tak. 
\s1 Reꞌ kAja̱w xpahbanic queh // take takꞌanel china̱ acꞌal 
\p  
\v 11 Was tak nicha̱kꞌ aj niminel reꞌ kꞌe̱ꞌ tiꞌ tiwicꞌraj tak, reꞌ hat-tak ar wilca̱t tak ponok pan tak toco̱m chic tinamit reꞌ maꞌ reꞌ ta atinamital tak. Reꞌ wilca̱t tak ponok ar kꞌuruꞌ, nipahkaj aweh tak chi ma̱yew tak kꞌab chi wilic awu̱cꞌ tak reꞌ cꞌahbilal nbanic chi nawotowej tak ribanaric i mahc eh reꞌ npitbic aweh tak reh chi maꞌ eta naꞌn tak i coric laj bano̱j.  
\v 12 Jeꞌ woꞌ, ruꞌum chi cꞌahchiꞌ acꞌacharic tak chi quixilac take cꞌacharel reꞌ ru̱cꞌ maꞌ reꞌ ta aj niminel reh Dios take, nipahkaj aweh tak chi xa coric ok wach tibanok tak to̱b ta yohbal wach take chucuj laj kꞌoric wilic take nquitzꞌak chawi̱j tak maj chi queh ruꞌ, reꞌ hat-tak xa je nchel maꞌ to̱b ta tibanic tak nanquikꞌor. Wi jeꞌ reꞌ xaꞌn tak, reꞌ take reꞌ naquikꞌorom woꞌ chi xa coric woꞌ naꞌn tak nachalok i Dios chi rikꞌataric kꞌoric chi quina̱ chiꞌnchel i tinamit. 
\p  
\v 13 Jeꞌ woꞌ chic, ruꞌum chi reꞌ kAja̱w Jesus xipahba̱ꞌ take chiꞌnchel wilic cajawric chi takꞌanic ayuꞌ wach acꞌal jeꞌ ricab nok wilic i kꞌatal kꞌoric aj Ro̱ma, reꞌ hin nipahkaj aweh tak chi tiniminok tak chi quiwach maj reꞌ take reꞌ wilque̱b chi nahsil chi kana̱ chiꞌnchel i hoj cꞌacharel ruꞌum i Dios.  
\v 14 Jeꞌ woꞌ reꞌ ra̱j banaric chi quiwach take aj nahsil reꞌ xipahba̱ꞌ take chi raj toꞌo̱l chi kꞌatal kꞌoric chipam take juꞌjun chi yukꞌul. Reꞌ take nahsil reꞌreꞌ wilque̱b woꞌ chi riyeꞌeric tojbal wach mahc chi quina̱ take maꞌ holohic ta quibanic eh jeꞌ woꞌ chi naquicꞌaxam take holohic quibanic.  
\v 15 Chaj waꞌric nanipahkaj aweh tak chi jeꞌ reꞌ? Jeꞌ reꞌ nipahkaj ruꞌum chi reꞌ Dios ra̱j chi na̱banam tak i wili: Chi reꞌ hat-tak ru̱cꞌ ribanaric i holohic eh jeꞌ woꞌ chi ru̱cꞌ i coric laj cꞌacharic, chatzꞌap tak quichi̱ꞌ take tinamit reꞌ maꞌ nquirak ta chiri̱j chaj bih nquikꞌor ruꞌum quimemil. 
\p  
\v 16 Jeꞌ reꞌ kꞌuruꞌ ticꞌacharok tak pan jenaj holohic laj cꞌacharic ruꞌum chi tehlic chic awi̱j tak, xa reꞌ laꞌ maꞌ nchel nacapaj tak chi ruꞌum chi tehlic chic awi̱j tak ra̱j rikꞌorom chi yeꞌo̱j kꞌab aweh tak chi ribanaric i maꞌ holohic ta laj bano̱j. Maꞌxta! Ma̱capaj tak chi jeꞌ reꞌ, reꞌ laꞌ chaꞌn tak ticꞌacharok tak chi hat-tak raj camanom i Dios.  
\v 17 Jeꞌ woꞌ chayew alokꞌil chawibil awi̱b tak, chacꞌax tak take awich aj niminel, chayohbalej tak wach i Dios eh chayew woꞌ tak rilokꞌil i cꞌacharel nkꞌatbic kꞌoric chana̱ tak. 
\s1 Reꞌ cꞌacharic ra̱j i Dios chi naribanaric chiwach 
\p  
\v 18 Yuꞌna aweh hat-tak jeꞌ ru̱cꞌ wilca̱t tak chi mosahic chiwach jenoꞌ ajabe̱s ehcham camanic, nikꞌor chi tiniminok tak chiwach eh wilic ok riwaꞌric chawach tak, reꞌ cok ruꞌ maꞌ xa chi quiwach ta take ajabe̱s holohic quinoꞌjbal eh chꞌublic ti wach quicꞌux chi quetelenic na̱banam tak jeꞌ reꞌ, jeꞌ laꞌ woꞌ reꞌ cu̱cꞌ take kꞌe̱ꞌ joskꞌ laj ajabe̱s.  
\v 19 Nikꞌor chi jeꞌ reꞌ maj reꞌ ricuseꞌsbal i Dios naricꞌulum i cꞌacharel reꞌ ricana̱ꞌ ri̱b chi ricꞌul i tiꞌcꞌaxic to̱b ta pa ra̱mna rehtꞌalim cho chi chiwach i Dios maꞌxta jenoꞌ rimahc reꞌ ricꞌul chi reh chi ericꞌul i tiꞌcꞌaxic reꞌreꞌ.  
\v 20 Raj laꞌ i cꞌacharel nmahcanic maꞌ jeꞌ ta reꞌ naricꞌulum. Nikꞌor chi jeꞌ reꞌ maj pa rimahc woꞌ naricꞌulum i tiꞌcꞌaxic. Jeꞌ reꞌ nok to̱b ta nak chicuy i tiꞌcꞌaxic, reꞌ cꞌacharel reꞌreꞌ xa maꞌ eta woꞌ ricꞌul ricuseꞌsbal i Dios, reꞌ laꞌ naricꞌulbic reh, reꞌ i cꞌacharel reꞌ ricꞌul i tiꞌcꞌaxic ruꞌum chi coric wach nbanic. 
\p  
\v 21 Jeꞌ reꞌ kꞌuruꞌ to̱b ta nchel enacꞌul tak i tiꞌcꞌaxic, reꞌ hat-tak chaꞌn tak i coric maj til reꞌ wili riwi̱ꞌ chi xatyukꞌunjic tak chi rinimjic i Jesus reꞌ Pahbamaj chi Kꞌatal Kꞌoric. Reꞌreꞌ ruꞌum chi xiban i coric, xicꞌul i tiꞌcꞌaxic eh ru̱cꞌ reꞌreꞌ xicꞌuhtaj aweh tak chaj bih ra̱j chi na̱banam tak. Chaꞌn aj tak kꞌuruꞌ jeꞌ ricab xiban ruꞌ  
\v 22 maj reꞌreꞌ maꞌ xmahcanic ta eh maꞌ jancꞌal ta woꞌ xbirmijic jenoꞌ kꞌoric ru̱cꞌ chi xa jotꞌbal ta nak quicapew-bal take cꞌacharel xiban.  
\v 23 Jeꞌ woꞌ chic naxicꞌul take tzꞌujuric cuꞌum take quixowonic wach, reꞌreꞌ maꞌ xicꞌuꞌlej ta woꞌ take ru̱cꞌ tzꞌuju̱j on naxicꞌul take tiꞌcꞌaxic cu̱cꞌ take cꞌacharel, maꞌ xicapaj ta woꞌ ribanjic rijelow-bal queh take xibanic reh, reꞌ laꞌ xiban xikꞌahsaj pan kꞌab i Dios reꞌ nchꞌukbic kꞌoric pa ricorquilal.  
\v 24 Jeꞌ woꞌ ruꞌum take tiꞌcꞌaxic xicꞌul, reꞌ Jesus xiban chi xwihꞌic chic i sukquil cꞌuxlis pan awa̱mna tak. Jeꞌ reꞌ nikꞌor maj reꞌreꞌ naxiyew ri̱b chi quimic ar wach curu̱s, xiban chi reꞌ hat-tak xcuyuric amahc tak. Maꞌ xa ta reꞌreꞌ, yuꞌna jeꞌ ricab nanquimic jenoꞌ cꞌacharel ncahnic chi maꞌ nmahcanic ta chic, jeꞌ woꞌ reꞌ hat-tak xyeꞌeric aweh tak ruꞌum Jesus chi eticꞌacharic tak chi maꞌ cꞌahchiꞌ ta abanam tak i mahc, reꞌ laꞌ chic i coric laj bano̱j cꞌahchiꞌ abanam tak.  
\v 25 Coric ruꞌ, najtir kꞌi̱j jeꞌ nak acab tak take cho sahchel me̱ꞌ reꞌ quipuhcam qui̱b xa haj paꞌ yeꞌa̱b, raj yuꞌna xatsoljic woꞌ tak chic cho ru̱cꞌ i kAja̱w Jesus reꞌ nchaꞌjanic jeꞌ woꞌ nilbic aweh tak chi coric jeꞌ ricab riban aj ilol me̱ꞌ chi rilow take eh richaꞌjej woꞌ take rime̱ꞌ. 
\c 3  
\s1 Reꞌ noꞌjbal ra̱j chi nacaꞌnam take // ehqꞌuenbe̱s chꞌi̱l take bahilbe̱s 
\p  
\v 1 Reꞌ chic hat-tak ehqꞌuenbe̱s aj niminel reh Jesus, yuꞌna til nikꞌor aweh tak chi chanimej abahi̱l tak eh reꞌ hat-tak reꞌ wilic abahi̱l tak reꞌ ru̱cꞌ maꞌ reꞌ ta aj niminel reh rikꞌorbal i Dios tiniminok woꞌ tak chi quiwach. Jeꞌ reꞌ nikꞌor aweh tak chi chaꞌn tak maj wi jeꞌ reꞌ naꞌn tak to̱b ta yuꞌna maꞌ nquinimej ta i rikꞌorbal i Dios nakꞌor tak queh, narichꞌukic woꞌ quicꞌux chi rinimjic ruꞌum i holohic laj noꞌjbal naꞌn tak.  
\v 2 Jeꞌ woꞌ wi jeꞌ reꞌ naꞌn tak, naquilom chi xa sak woꞌ wach cꞌacharic naꞌn tak chi hat-tak aj niminel eh jeꞌ woꞌ chi cꞌahchiꞌ ayeb tak rilokꞌil i Dios.  
\v 3 Jeꞌ woꞌ chic hat-tak chiꞌnchel ehqꞌuenbe̱s aj niminel reh Jesus til nikꞌor woꞌ aweh tak chi reꞌ axoyba̱l nacoj tak, maꞌ riban nchel chi xa chawi̱j tak wilic lok chi xa xoybal reh atiꞌjolal tak jeꞌ ricab chi xa holohic chic ritikꞌinjic rixihiric wach ana̱ tak, reꞌ ricojoric chawalak tak jeꞌ woꞌ ricojoric chaxiquin tak take kꞌan woric laj chꞌihchꞌ tikꞌimaj chi xoybal eh jeꞌ woꞌ reꞌ ricojoric take holohic laj tzꞌih xa qꞌuih chic quitzꞌakil,  
\v 4 reꞌ laꞌ tare̱t chi reꞌ holohic laj noꞌjbal nelic cho pan awa̱mna tak wihꞌok chi axoyba̱l tak maj reꞌ riholonquilal i xoybal wili maꞌ jaruj ta sahchel wach. Maꞌeta aj nsahchic wach ruꞌ wi reꞌ anoꞌjbal tak chꞌublic wach eh wi wilic woꞌ awu̱cꞌ tak i tuklic wach cꞌuxlis reꞌ til nponic chiwach i Dios.  
\v 5 Jeꞌ reꞌ ajic reꞌ noꞌjbal wilic cho pan awa̱mna tak wihꞌok chi axoyba̱l tak maj jeꞌ woꞌ reꞌ ritikꞌinjic qui̱b xcaꞌn cho najtir kꞌi̱j take lokꞌ laj ixok quiniminic cho reh Dios. Jeꞌ woꞌ chic, reꞌ take ixok reꞌreꞌ jenaj woꞌ cho wach quinoꞌjbal chꞌi̱l quibahi̱l chi rinimjic i Dios eh chi jeꞌ reꞌ xiniminic woꞌ chiwach quibahi̱l.  
\v 6 Reꞌ tiꞌ Sa̱ra jeꞌ reꞌ xiban, reꞌreꞌ xinimej cho maꞌ Awraham reꞌ ribahi̱l eh cꞌuhtbal reh chi rinimej “ajabe̱s” nqui rikꞌor reh. Jeꞌ woꞌ reꞌ chaꞌn hat-tak kꞌuruꞌ maj reꞌ hat-tak xatcahnic tak chi hat-tak rixkꞌu̱n i tiꞌ Sa̱ra. Ho̱ꞌ, wi laꞌ naꞌn tak i coric laj cꞌacharic eh wi maꞌ nayohbalej tak wach ricꞌuluric i tiꞌcꞌaxic reꞌ nacꞌul tak ruꞌum rinimjic i Dios. 
\p  
\v 7 Jeꞌ woꞌ reꞌ hat-tak bahilbe̱s, til nikꞌor aweh tak chi chasicꞌ ri̱j anoꞌjbal tak chi rirakmajic chiri̱j ricorquilal i cꞌacharic ra̱j banaric ru̱cꞌ awehqꞌue̱n tak. Coric ruꞌ, to̱b ta nchel reꞌ ricowil quitiꞌjolal quibakil maꞌ jenaj ta wach ru̱cꞌ ricowil atiꞌjolal abakil hat-tak, curman chi chayew tak quilokꞌil maj reꞌ take reꞌ awichꞌi̱l hat-tak awehcham woꞌ tak i xiban i Dios wili ruꞌum chi kojricꞌax: Chi ekojcꞌacharic chi junelic. Jeꞌ reꞌ ajic ticꞌacharok tak chi coric cu̱cꞌ reh chi maꞌ eta npitiric reꞌ xa paꞌ jaric napahkaj tak johtok pan ati̱j tak. 
\s1 Reꞌ noꞌjbal ra̱j banaric // cu̱cꞌ take aj ixowonel 
\p  
\v 8 Chi cohlsbal wach take xnikꞌor lok, nwa̱j nikꞌorom aweh tak i wili: Tiwihꞌok tak chawunchelal chi xa jenaj wach anoꞌjbal tak, chaquetelej awach chawibil awi̱b tak, chacꞌax take awas acha̱kꞌ tak, chaquetelej tak quiwach i toco̱m chic awich cꞌacharel eh xa chꞌu̱b ok awach tak.  
\v 9 Wi nchel paꞌ bih jenoꞌ maꞌ coric ta laj bano̱j xbanaric aweh tak on wi xatsihtjic tak, reꞌ hat-tak ma̱ban tak chic jelow-bal, reꞌ laꞌ chaꞌn tak chapahkaj tak i cuseꞌsbal chi quina̱. Jeꞌ woꞌ, wi laꞌ xat-tzꞌujuric tak ma̱ban tak jenaj wach cu̱cꞌ, tipahkanok laꞌ tak pan ati̱j chiqui̱j take cꞌahchiꞌ quibanic aweh tak, reh chi naquicuseꞌsjic cho maj wi jeꞌ reꞌ naꞌn tak reꞌ woꞌ Dios naricuseꞌsenic aweh hat-tak. 
\p  
\v 10 Jeꞌ reꞌ ajic reꞌ hat-tak chaꞌn tak i coric maj chipam i Lokꞌ laj Hu̱j reꞌ tzꞌihmbimaj wi̱ꞌ i riCꞌuhbal i Dios jeꞌ wili rikꞌor: 
\q1 “Wi jenoꞌ cꞌacharel ra̱j cꞌacharic chi suk ricꞌux eh ra̱j woꞌ chi enwihꞌic sukquilal pa ricꞌacharic chiwach johtok take kꞌi̱j pa ricꞌacharic, 
\q1 reꞌ cꞌacharel reꞌreꞌ curman chi naricana̱b rikꞌormojic take chuh laj kꞌoric eh jeꞌ woꞌ curman chi maꞌxta chic relic cho xak chi̱ꞌ rikꞌormojic i chucuj laj kꞌoric. 
\q1  
\v 11 Jeꞌ woꞌ curman chi naresam lok pa ricapew-bal take maꞌ holohic ta laj noꞌjbal eh reꞌ chic i holohic laj noꞌjbal chiban ribanaric. 
\q1 Jeꞌ woꞌ chic til chiyew ricꞌux chi wihꞌic pan sukquil laj cꞌuxlis cu̱cꞌ chiꞌnchel cꞌacharel. 
\q1  
\v 12 Til jeꞌ reꞌ chiban maj reꞌ nakꞌ wach i kAja̱w wilic cho chi quina̱ take reꞌ xa coric woꞌ wach quicꞌux. 
\q1 Jeꞌ woꞌ, reꞌ kAja̱w xa tehlic woꞌ cho xiquin chi ribirmijic quiti̱j ncaꞌn johtok. 
\q1 Haj cok wilic maꞌ nponic ta chiwach i kAja̱w 
\q1 reꞌ i quinoꞌjbal take cꞌacharel reꞌ maꞌ coric ta wach quibanic 
\q1 eh reꞌ take reꞌ, chꞌiꞌc rilow take, nqui rikꞌor. 
\s1 Maꞌ riwi̱ꞌ ta chi nakayoꞌjic // chi quiwach take aj cojol tiꞌcꞌaxic 
\p  
\v 13 Wi reꞌ hat-tak xa reꞌ woꞌ i coric wach noꞌjbal nasicꞌ tak ribanaric, maꞌ hab ta wach naricojbic reh tiꞌcꞌaxic chana̱ tak,  
\v 14 raj laꞌ wi paꞌ bih jenoꞌ tiꞌcꞌaxic nacꞌul tak ruꞌum i coric wach cꞌuxlis, kꞌe̱ꞌ je ato̱b aweh tak. Ruꞌum aj reꞌ ma̱yohbalej woꞌ tak quiwach take aj cojol tiꞌcꞌaxic chana̱ tak. Jeꞌ woꞌ maꞌ nchel riban chi xa ntꞌortꞌotic chic awa̱mna tak cuꞌum,  
\v 15 reꞌ laꞌ chaꞌn tak chayew tak rilokꞌil i Jesus reꞌ Pahbamaj chi Kꞌatal Kꞌoric. Jeꞌ woꞌ chic, xa eli̱c ok tikilca̱t tak chi kꞌoric cu̱cꞌ take cꞌacharel nquipahkaj quinoꞌjbal aweh tak chiri̱j i niminic reꞌ cꞌahchiꞌca̱t tak eh nachaꞌn tak quicꞌuꞌljic tikꞌorok tak cu̱cꞌ pan chakꞌlamil eh jeꞌ woꞌ pa ricorquilal. 
\p  
\v 16 Jeꞌ reꞌ ajic chaꞌn tak take holohic laj noꞌjbal reꞌ awehtꞌalim tak chi coric wach bano̱j take, reh chi jeꞌ reꞌ ru̱cꞌ take kꞌoric cꞌahchiꞌ quikꞌorlom lok take quixowonic aweh tak enelic lok quiqꞌuixbilal ruꞌum reh wolic ncaꞌn chiri̱j acꞌacharic tak ruꞌum nok hat-tak chic aj niminel reh Jesus reꞌ Ajabe̱s Pahbamaj chi Kꞌatal Kꞌoric.  
\v 17 Wi nchel reꞌ Dios ra̱j chi enacꞌul tak i tiꞌcꞌaxic ruꞌum i kꞌoric naꞌn tak chiri̱j rikꞌorbal i Dios, chacꞌul woꞌ tak i tiꞌcꞌaxic nyeꞌeric chana̱ tak ruꞌum nok kꞌe̱ꞌ woꞌ chic ato̱b ricꞌulmujic i tiꞌcꞌaxic ruꞌum ribanaric take coric laj noꞌjbal, chiwach chi enacꞌul tak i tiꞌcꞌaxic ruꞌum ribanaric i cꞌahbilal. 
\p  
\v 18 Jeꞌ aj reꞌ nikꞌor maj jeꞌ woꞌ reꞌ xcꞌuluric ru̱cꞌ i Jesus reꞌ Ajabe̱s reꞌ Pahbamaj chi Kꞌatal Kꞌoric chi xicꞌul i tiꞌcꞌaxic naxquimic je to̱b ta nak til woꞌ coric wach ricꞌux. Reꞌ aj riquimic reꞌ xa junpech woꞌ xicꞌul ruꞌum reh kamahc, reꞌreꞌ xcamanic chi chiꞌnchel i hoj cꞌacharel reꞌ maꞌ coric ta nak wach kacꞌux ekojwihꞌic chic ar chiwach i Dios. To̱b ta woꞌ xcansjic i Jesus, reꞌ Lokꞌ laj Uxlabal xiban chi xa cu xcꞌacharic woꞌ  
\v 19 eh chi jeꞌ aj reꞌ chi xa cꞌachlic woꞌ i Jesus ruꞌum i Lok laj Uxlabal, reꞌreꞌ xo̱j cu̱cꞌ take tzꞌahpel laj uxlabal eh xicana̱ꞌ cu̱cꞌ ribiral jenaj cꞌuhbal.  
\v 20 Reꞌ take uxlabal wili reꞌ aj woꞌ ru̱cꞌ take cho aj najtir kꞌi̱j reꞌ maꞌ xiniminic ta cho reh rikꞌorbal i Dios chiwach take rikꞌijil cho ricꞌacharic i maꞌ Noheh. Chiwach take kꞌi̱j reꞌreꞌ nok reꞌ maꞌ Noheh cꞌahchiꞌ ritikꞌa̱b i maꞌ laj cano̱wa pa̱t riwi̱ꞌ, reꞌ Dios xuyꞌej chi reꞌ take cꞌacharel xquinimej nak rikꞌorbal xa reꞌ laꞌ maꞌ xcaꞌn ta chi jeꞌ reꞌ. Ruꞌum aj reꞌ xa maꞌ qꞌuih ta take cꞌacharel xicoꞌljic chiwach i tiꞌcꞌaxic, xa reꞌ laꞌ ti wach i wahxaki̱b chi cꞌacharel xiꞌoquic chipam i cano̱wa pa̱t riwi̱ꞌ. Reꞌ take reꞌ xicoꞌljic chiwach i buht haꞌ chiwach take kꞌi̱j naxkajic cho rinimal jab china̱ acꞌal. 
\p  
\v 21 Reꞌ xcꞌuluric cu̱cꞌ reꞌreꞌ ncamanic keh yuꞌna chi rehtalil reꞌ ncꞌuluric wili chiri̱j i coꞌlbal i̱b cu̱cꞌ take nkahsjic quiha̱ꞌ: Nok wilque̱b pan haꞌ, reꞌ take reꞌ maꞌ reꞌ ta ritzꞌajnil quitiꞌjolal quibakil nelic lok reꞌ laꞌ ncaꞌn take reꞌ nquiyew quikꞌorbal chiwach i Dios chi nacaꞌnam i holohic laj noꞌjbal reꞌ quehtꞌalim chi coric laj bano̱j take. Jeꞌ aj woꞌ reꞌ ncaꞌn xa ruꞌum ructic woꞌ chic cho Jesus chi cꞌacharic, reꞌ Ajabe̱s Pahbamaj chi Kꞌatal Kꞌoric.  
\v 22 Reꞌreꞌ xuctic woꞌ chic chi quixilac take camnak eh chiri̱j chic ruꞌ xo̱j woꞌ chic johtok pan taxa̱j eh jeꞌ ricab i lokꞌil ricꞌul jenoꞌ cꞌacharel ntzꞌuhkic cok chi riche̱l jenoꞌ kꞌatal kꞌoric, reꞌ Jesus naxwihꞌic woꞌ chic cok ru̱cꞌ i Dios, xicꞌul woꞌ rinimal rilokꞌil chi nariwihꞌic rajawric chi quina̱ take raj tzꞌeꞌ wa̱ch i Dios ar pan taxa̱j eh jeꞌ woꞌ chi quina̱ take toco̱m chic wilic quiwaꞌric on quitakꞌanic ar pan taxa̱j. 
\c 4  
\s1 Chi kajuꞌjunal nakakꞌahsam i paꞌ bih // bano̱j xkaꞌn chiwach i Dios 
\p  
\v 1 Naxcꞌacharic ayuꞌ wach acꞌal i Ajabe̱s Jesus reꞌ Pahbamaj chi Kꞌatal Kꞌoric, reꞌreꞌ xicꞌul i tiꞌcꞌaxic. Ruꞌum chi reꞌreꞌ xcꞌacharic chi xa tiklic woꞌ chi ricꞌuluric i tiꞌcꞌaxic, reꞌ hin nipahkaj aweh tak chi chaꞌn woꞌ aweh tak i noꞌjbal jeꞌ ricab xiban ruꞌ eh nipahkaj chi jeꞌ reꞌ maj xa hab wach aj niminel tiklic chi ricꞌuluric tiꞌcꞌaxic ruꞌum reh riniminic ruꞌ, reꞌ aj niminel reꞌreꞌ ricꞌuhtaj lok chi maꞌ ra̱j ta chic ribanaric i take mahc xiban cho najtir.  
\v 2 Wi pan acapew-bal xacoj tak chi jeꞌ reꞌ, raj woꞌ rikꞌorom chi chiwach take kꞌi̱j reh acꞌacharic tak reꞌ cu cꞌahchiꞌca̱t tak ayuꞌ wach acꞌal, ra̱j chi na̱banam tak ribanaric take noꞌjbal ra̱j i Dios eh maꞌ reꞌ ta chic take noꞌjbal reꞌ nponic chi quiwach take tinamit. 
\p  
\v 3 Reꞌ rikꞌijil reꞌ xaꞌn tak wi̱ꞌ i noꞌjbal bano̱j cho cuꞌum take maꞌ quilokꞌonic ta wach i kAja̱w Dios xiqꞌuic chic lok. Chipam take kꞌi̱j reꞌreꞌ, reꞌ hat-tak xaniqꞌuej woꞌ tak cho ribanaric i cꞌahbilal jeꞌ ricab take cꞌoyomal, take xohcꞌsonic i̱b xaꞌn tak ar pan tak maꞌ holohic ta laj ninkꞌi̱j xamol wi̱ꞌ awi̱b tak chi ricꞌuxuric xa paꞌ bih jaric. Chipam woꞌ take cho kꞌi̱j reꞌreꞌ, xaꞌn woꞌ tak cho i cꞌahbilal reꞌ rilokꞌonjic take tikꞌimaj tiyo̱x,  
\v 4 raj laꞌ chiꞌnchel take cꞌahbil laj noꞌjbal reꞌreꞌ maꞌxta chic abanam tak ribanaric eh ruꞌum aj reꞌ, reꞌ take awich cꞌacharel reꞌ aj banol take reh cꞌahbilal, xa nsahchic chic quicꞌux nanquilow chi reꞌ hat-tak maꞌ hat ta tak chic jenaj cu̱cꞌ chi ribanaric i cꞌahbil laj noꞌjbal. Ru̱cꞌ aj reꞌ, reꞌ take cꞌacharel reꞌreꞌ naquipꞌutum atzꞌujuric tak  
\v 5 xa reꞌ laꞌ take cꞌacharel reꞌreꞌ xa na woꞌ richꞌukuric kꞌoric chi quina̱ reꞌ kꞌorel nicꞌ paꞌ wach quibano̱j caꞌnam. Ar naquikꞌahsam chiwach i Dios reꞌ aj chꞌukul wach mahc tiklic chic cho chi richꞌukuric kꞌoric chi quina̱ take cu cꞌachalque̱b eh jeꞌ woꞌ chi quina̱ take camnak chic take je. 
\p  
\v 6 Ruꞌum aj woꞌ chi chiꞌnchel narichꞌukuric kꞌoric chi quina̱, wilic riwi̱ꞌ chi reꞌ tijbal nyeꞌbic reh sukquil cꞌuxlis queh cꞌacharel xkꞌormojic woꞌ ruꞌum i Jesus queh take camnak chic take je. Jeꞌ ricab ncꞌuluric cu̱cꞌ chiꞌnchel cꞌacharel ayuꞌ wach acꞌal, reꞌ take reꞌ xiquimic reh chi narichꞌukuric kꞌoric chi quina̱ xa reꞌ laꞌ ru̱cꞌ rikꞌormojic i tijbal reꞌreꞌ, xyeꞌeric woꞌ queh take xicꞌulbic reh tijbal reꞌreꞌ chi xquicꞌul i junelic cꞌacharic yeꞌo̱j ruꞌum i Lokꞌ laj Uxlabal ar reꞌ wilic woꞌ wi̱ꞌ i Dios. 
\s1 Reꞌ holohic laj noꞌjbal yeꞌo̱j ruꞌum // i Dios camanok chi ribanaric i holohic 
\p  
\v 7 Reꞌ aj i cohlsbal wach chiꞌnchel cꞌulic chic lok reh. Jeꞌ aj reꞌ kꞌuruꞌ hat ok tak tꞌulic ru̱cꞌ anoꞌjbal tak eh ma̱cana̱ꞌ tak ribanaric johtok ati̱j tak chiwach i Dios reh chi jeꞌ reꞌ naponok i kꞌijil reꞌreꞌ icꞌlic ok ana̱ tak chi uyunic reh.  
\v 8 Jeꞌ woꞌ chic til kꞌe̱ꞌ curman chi chawunchelal tak chatik tak juꞌ ribanaric i cꞌaxoj i̱b maj reꞌ noꞌjbal reꞌreꞌ eriban chi enacuy nicꞌ paꞌ nimal amahc tak chawibil awi̱b tak. 
\p  
\v 9 Jeꞌ ricab wi chaxilac tak quiponic take behenel reꞌ cꞌahchiꞌ quisiqꞌuim quihiꞌlbal, reꞌ hat-tak chacꞌuhtaj woꞌ tak achakꞌlamil cu̱cꞌ chi riyeꞌeric quiwaꞌ quiha̱ꞌ jeꞌ woꞌ quipatal. Jeꞌ reꞌ chaꞌn tak reh chi maꞌ eta nawicꞌraj tak chi jenaj chꞌiꞌo̱j cꞌahchiꞌ ribanaric aweh tak ru̱cꞌ i toꞌbonic enaꞌn tak.  
\v 10 Ruꞌum aj reh ratoꞌbil i Dios chana̱ tak, chi ajuꞌjunal hat-tak xyeꞌeric aweh tak chi jeꞌ ricab jenoꞌ si̱ i qꞌuihal wach noꞌjbal reꞌ encamanic aweh tak chi ribanaric ricamaj i Dios. 
\p Chi jeꞌ aj reꞌ chi wilca̱t tak chi rilmijic nicꞌ wach quitobjic take cꞌacharel enaꞌn tak ru̱cꞌ take noꞌjbal yeꞌo̱j aweh tak, nipahkaj aweh tak chi camanok aweh tak chi coric take juꞌjun chi noꞌjbal reꞌreꞌ.  
\v 11 Jeꞌ reꞌ ajic wi jenoꞌ cꞌacharel xyeꞌeric rinoꞌjbal chi cꞌuhbalanic, holohic ok rikꞌormojic rikꞌorbal i Dios chiban chi cꞌuhbalanic. Wi jenoꞌ cꞌacharel yeꞌo̱j reh i cojo̱j noꞌjbal queh take toco̱m chic cꞌacharel, chiban woꞌ i cojo̱j noꞌjbal ru̱cꞌ rajawric yeꞌo̱j reh ruꞌum i Dios. Chi jeꞌ aj reꞌ ru̱cꞌ ribanaric chiꞌnchel reꞌreꞌ, reꞌ Dios naricꞌulum i rilokꞌil reꞌ naquiyeb take toco̱m chic awich aj niminel chi cꞌahchiꞌ quitobjic take ruꞌum i Ajabe̱s Jesus reꞌ Pahbamaj chi Kꞌatal Kꞌoric. Reꞌ aj reꞌ riwi̱ꞌ chi niban niti̱j chawi̱j tak eh pa niti̱j niyew woꞌ rilokꞌil reh i Dios chi cꞌahchiꞌ nikꞌorom chi til coric, chi junelic kꞌi̱j sakom reꞌ Dios til nim wach rilokꞌil eh til nim woꞌ wach i rajawric. 
\s1 Kꞌe̱ꞌ ato̱b reh cꞌacharel ricꞌul // i tiꞌcꞌaxic ruꞌum reh ribanaric // i holohic laj noꞌjbal 
\p  
\v 12 Was tak nicha̱kꞌ aj niminel reh Jesus reꞌ kꞌe̱ꞌ tiꞌ tiwicꞌraj tak, nikꞌor aweh tak chi maꞌ nsahchic nchel acꞌux tak nok reꞌ ransil ritiꞌquilal i pajaric nchalic chana̱ tak chi xa jeꞌ nchel xa reꞌ hat-tak cꞌahchiꞌ acꞌulbic tak reh.  
\v 13 Reꞌ laꞌ hat-tak sukbok acꞌux tak ruꞌum chi hat-tak chic jenaj chipam ricuyuric take tiꞌcꞌaxic xicꞌul woꞌ cho kAja̱w Jesus reꞌ Pahbamaj chi Kꞌatal Kꞌoric. Jeꞌ reꞌ chaꞌn tak reh chi nachirak cho rikꞌijil chi naricꞌuhtam woꞌ chic ri̱b ru̱cꞌ i rinimal i rilokꞌil, yohbal woꞌ wach nasukbok acꞌux tak.  
\v 14 Jeꞌ woꞌ chic, kꞌe̱ꞌ woꞌ chic ato̱b chaweh tak nok nacꞌul tak i tzꞌujuric ruꞌum reh rinimjic i kAja̱w Jesus reꞌ Ajabe̱s Pahbamaj chi Kꞌatal Kꞌoric. Nikꞌor chi jeꞌ reꞌ maj nanacꞌul tak i tiꞌ ruꞌum reh animinic tak, reꞌ Lokꞌ laj rUxlabal i Dios nwihꞌic awu̱cꞌ tak chi awaj toꞌo̱l tak. Coric aj ruꞌ, reꞌ take cꞌacharel reꞌ maꞌ reꞌ ta aj niminel take maꞌ holohic ta laj noꞌjbal nquikꞌor chiri̱j i kAja̱w Jesus xa reꞌ laꞌ hat-tak riyeꞌeric chic rilokꞌil i naꞌn tak.  
\v 15 Jeꞌ aj reꞌ ruꞌ maꞌ ok hab wach jenoꞌ aweh tak ericꞌul i tiꞌcꞌaxic ruꞌum chi aj cansanel ras richa̱kꞌ ta nak, on ruꞌum chi aj lekꞌ ta nak, on ruꞌum chi ta nak maꞌ holohic ta wach ribano̱j, on ruꞌum chi rimin ta nak ri̱b chipam ricꞌacharic jenoꞌ chic cꞌacharel reꞌ maꞌ reꞌ ta reh chi nariminim wi̱ꞌ ri̱b ru̱cꞌ.  
\v 16 Ra̱j nchel wi̱ꞌ jenoꞌ cꞌacharel ricꞌul i tiꞌcꞌaxic ruꞌum reh niminic riban, reꞌreꞌ maꞌ nqꞌuixꞌic ruꞌum i cꞌahchiꞌ ricꞌulum, reꞌ laꞌ chiban chiyew johtok rilokꞌil i Dios ruꞌum chi cꞌahchiꞌ ricꞌulum take tiꞌcꞌaxic reꞌreꞌ ruꞌum reh niminic. 
\p  
\v 17 Jeꞌ reꞌ ajic, maꞌ ta nak nsahchic acꞌux tak ruꞌum reh tiꞌcꞌaxic nchalic chana̱ tak eh jeꞌ reꞌ nikꞌor maj xponic chic rikꞌijil chi naripꞌutum chꞌukuj kꞌoric i Dios eh nachiban reꞌreꞌ maꞌ xa ta chi quina̱ take racꞌu̱n rixkꞌu̱n jeꞌ ru̱cꞌ cu cꞌahchiꞌ quimahcanic erikꞌat kꞌoric chi enkajic i tiꞌcꞌaxic chi quina̱ jeꞌ laꞌ woꞌ reꞌ naribanam cu̱cꞌ chiꞌnchel cꞌacharel. Wi chi quina̱ take racꞌu̱n rixkꞌu̱n i Dios reꞌreꞌ enkajic jenoꞌ cow laj tiꞌcꞌaxic, reꞌ ta na chic take cꞌacharel reꞌ maꞌ quiniminic ta reh i riCꞌuhbal i Dios maꞌ eniqꞌuic na̱ ricowil wach tiꞌcꞌaxic chi quina̱?  
\v 18 Nikꞌor chi jeꞌ reꞌ maj reꞌ riCꞌuhbal i Dios rikꞌor chi jeꞌ wili: 
\q1 “Wi nchel reꞌ cꞌacharel reꞌ xa coric woꞌ wach ricꞌux xa ru̱cꞌ tiꞌ laj cꞌaxic naricoꞌlem ri̱j ricꞌacharic chiwach take tiꞌcꞌaxic yeꞌo̱j cho chi tojbal wach mahc, 
\q1 haj woꞌ ti chic i cꞌacharel reꞌ maꞌ n-niminic ta reh i Dios eh aj mahc, maꞌ enkajic rinimal tiꞌcꞌaxic china̱? nqui rikꞌor. 
\p  
\v 19 Ruꞌum aj woꞌ chi reꞌ take cꞌacharel reꞌ quicꞌulbic reh i tiꞌcꞌaxic nquicꞌul ruꞌum chi jeꞌ reꞌ ra̱j i Dios, quicoj qui̱b kꞌuruꞌ pan kꞌab i Dios reꞌ aj tikꞌinel reh chiꞌnchel wilic china̱ acꞌal eh caꞌn ta woꞌ nak i til coric laj noꞌjbal. 
\c 5  
\s1 Chaꞌn tak chi coric acamaj tak chi cꞌamol be̱h 
\p  
\v 1 Reꞌ hin maꞌ Luch, hin woꞌ jenaj chi quixilac take aj cꞌamol be̱h reh ritinami̱t i Dios eh jeꞌ woꞌ cꞌahchiꞌ niyeb nichi̱ꞌ chi rikꞌormojic take tiꞌcꞌaxic xicꞌul cho i kAja̱w Jesus reꞌ Ajabe̱s Pahbamaj chi Kꞌatal Kꞌoric. Reꞌ hin xinehtric woꞌ rilokꞌil reꞌ naricꞌuhtjic xa chi loqꞌuil ti kꞌi̱j. Chi jeꞌ aj reꞌ, reꞌ hin reꞌ i wili nipahkaj je queh take quinahsil aj niminel wilque̱b ponok chaxilac tak:  
\v 2 Reꞌ take ritinami̱t i Dios reꞌ wilic pan akꞌab tak quilmijic, coric ok wach quilmijic chaꞌn tak jeꞌ ricab nbanaric ru̱cꞌ quilmijic juntuhm ok chi me̱ꞌ. Ru̱cꞌ quilmijic cꞌahchiꞌca̱t tak, ma̱ban tak xa ruꞌum ta nak chi hat-tak mino̱j chipam, chaꞌn laꞌ tak ruꞌum chi ru̱cꞌ chiꞌnchel acꞌux awa̱mna tak nawa̱j tak ribanaric reꞌreꞌ. Jeꞌ woꞌ ma̱ban tak reꞌreꞌ xa ruꞌum ta nak risahqꞌuil tumi̱n nyeꞌeric chi toꞌbal, chaꞌn laꞌ tak ruꞌum chi jeꞌ reꞌ rikꞌor acꞌux tak ribanaric.  
\v 3 Maꞌ riban woꞌ nchel chi ruꞌum ta nak chi wilic awajawric tak chi quina̱ take yeꞌo̱j pan akꞌab tak quilmijic eno̱j riban chi xa reꞌ chic takꞌanic nawa̱j abanam tak chi quina̱. Reꞌ laꞌ chaꞌn tak, cꞌuhtunok awu̱cꞌ tak i holohic laj noꞌjbal reh chi jeꞌ reꞌ jeꞌ woꞌ reꞌ equibanic ruꞌ.  
\v 4 Chaꞌn tak acamaj chi coric kꞌuruꞌ reh chi naponok woꞌ i rikꞌijil chi naricꞌuhtam ri̱b i Jesus reꞌ Aj Nahsil keh hoj chiꞌnchel jeꞌ ru̱cꞌ wilco̱j chi aj ilol reh ritinami̱t i Dios na̱cꞌulum woꞌ tak jenaj aco̱ch tak jeꞌ ricab nyeꞌeric queh take aj ajamanel quicꞌulbic reh jenaj coten kꞌan woric laj chꞌihchꞌ reꞌ ncojoric wach quina̱. Xa reꞌ laꞌ ruꞌ reꞌ co̱ch na̱cꞌulum tak reꞌreꞌ maꞌ jaruj cꞌuhlel sahchel wach i rilokꞌil. 
\p  
\v 5 Yuꞌna aweh hat-tak qꞌuijolak chꞌi̱l hat-tak kꞌahxokak, enikꞌor i wili: Tiniminok tak chiwach quikꞌorbal anahsil hat-tak aj niminel eh chawunchelal i hat-tak cꞌul chanimej awi̱b tak ru̱cꞌ chꞌublic wach cꞌuxlis chawibil awi̱b tak maj jeꞌ wili rikꞌor chipam i Lokꞌ laj Hu̱j reꞌ wilic wi̱ꞌ riCꞌuhbal i Dios: 
\q1 “Ruꞌum reh quinoꞌjbal take cꞌacharel reꞌ xa nquinimsaj chic qui̱b reꞌ Dios ricoj ri̱b chi caj ixowonel, 
\q1 ra̱j take cꞌacharel reꞌ xa chꞌu̱b ti wach quicꞌux, reꞌ ritoꞌbal i Dios wilic cho chi quina̱, nqui rikꞌor. 
\p  
\v 6 Jeꞌ aj reꞌ kꞌuruꞌ chanimej awi̱b tak chiwach i Dios reꞌ xiqꞌuic na̱ rinimal wach rajawric eh chaꞌn tak reꞌreꞌ chi xa chꞌublic wach acꞌux tak reh chi reꞌ Dios narijohsam wach awaꞌric tak naponok i rikꞌijil chi jeꞌ reꞌ naricꞌuluric.  
\v 7 Ruꞌum chi xa cꞌahchiꞌ woꞌ ca̱t tak rilom cho i Dios, chakꞌahsaj woꞌ tak reh chiꞌnchel acapew-bal tak nchalic pan acꞌux tak reꞌ riban xa ji̱kꞌ chic acꞌux tak chiri̱j.  
\v 8 Maꞌ nchel nsahchic acapew-bal tak ru̱cꞌ animinic tak eh xa icꞌlic ok woꞌ ana̱ tak chi chaꞌjanic reh chi na̱wihꞌic tak chi naꞌlic aweh tak, jeꞌ ricab ncaꞌn reꞌ take aj chaꞌjanel pa̱t chi maꞌ quiwiric ta chi chaꞌjanic. Curman aj ruꞌ chi naꞌlic ok aweh tak maj reꞌ aj Yahm reꞌ til nxowonic awach tak, xa no̱j nchalic chic chi risiqꞌuiric ri̱j nicꞌ wach na chikꞌet pa̱m abe̱h tak, jeꞌ ricab riban i jenaj cakcoj chi xa qꞌueric chic chi̱ꞌ ruꞌum chi xa hab nak chic wach ra̱j chi naribikꞌim. 
\p  
\v 9 Jeꞌ reꞌ kꞌuruꞌ chiꞌnchel i pajaric ricoj pan abe̱h tak aj Yahm, chacuy tak ransil ru̱cꞌ i ricowil acapew-bal tak wilic ruꞌum richꞌiquinjic acꞌux naꞌn tak chiri̱j i Dios eh chaꞌn tak chi jeꞌ reꞌ chi cꞌahchiꞌ ricꞌulic pan acꞌux tak chi jeꞌ woꞌ reꞌ ricuyuric tiꞌcꞌaxic ncaꞌn take toco̱m awich aj niminel tak reꞌ cꞌacharic ncaꞌn pan tak toco̱m chic yeꞌa̱b chi junsut wach acꞌal.  
\v 10 Xa reꞌ laꞌ chawehtꞌalij woꞌ tak nok hat-tak chic iqꞌuinak chipam take tiꞌcꞌaxic reꞌreꞌ, reꞌ Dios nariyeb riman ricowil acapew-bal tak, naca̱t tak rucsam ru̱cꞌ acapew-bal tak eh naripahba̱b woꞌ acꞌux tak chi coric. Reꞌ Dios reꞌ nyeꞌbic reh chiꞌnchel i cuseꞌsbal reꞌ woꞌ reꞌ xyukꞌunic aweh tak chi niminic chiri̱j i Jesus reh chi enacꞌul tak rilokꞌil reꞌ maꞌ jaruj ta cꞌuhlel sahchel wach.  
\v 11 Reꞌ aj reꞌ riwi̱ꞌ chi nok niban niti̱j reꞌ hin nikꞌor chi til coric, chi junelic kꞌi̱j sakom reꞌ Dios nim rilokꞌil wilic eh nim woꞌ rajawric wilic. 
\s1 Reꞌ kꞌoric cohlsbal wach i hu̱j wili 
\p  
\v 12 Reꞌ hu̱j wili xnitzꞌihmbaj ru̱cꞌ i toꞌbonic xiban wi̱n i maꞌ Silwa̱no reꞌ jenaj wich aj niminel coric wach ricꞌux. Reꞌ riwi̱ꞌ chi xnitzꞌihmbaj je aweh tak i hu̱j wili reh riyeꞌeric anoꞌjbal tak jeꞌ woꞌ chi richꞌoboric ribehil aweh tak chi til coric chi reꞌ Dios til xicꞌuhtaj aweh tak rinimal wach richakꞌlamil. Jeꞌ reꞌ nok chatik tak juꞌ riyeꞌeric acꞌux tak chiri̱j reꞌreꞌ.  
\v 13 Reꞌ take moloj wach aj niminel wilque̱b ayuꞌ pan tinamit wili reꞌ ribihnej chi “Wawilo̱nya”, reꞌ take awich chiho̱j woꞌ take cho ruꞌum i Dios, nquitakꞌa̱ꞌ je risukquil acꞌux tak. Ritakꞌa̱ꞌ woꞌ je risukquil acꞌux tak i Cus, reꞌ jeꞌ na wacꞌu̱n nok wilic chi niwach. 
\p  
\v 14 Chayew risukquil acꞌux tak chawibil awi̱b tak cꞌuhtbal reh i cꞌaxoj i̱b wilic chaxilac tak. Reꞌ ta nak Dios banok chi enwihꞌic risukquil acꞌux hat-tak reꞌ xa jenaj chic awi̱ꞌ tak richꞌi̱l Jesus reꞌ Pahbamaj chi Kꞌatal Kꞌoric. Jeꞌ ta nak reꞌ.