\id 2TI  
\h 2 TIMOTEO 
\toc1 Tí xroon yóxin ikjin chꞌín Pablo chrꞌénhen chꞌán tí chꞌín Timoteo 
\toc2 2 TIMOTEO 
\toc3 2 Ti. 
\mt1 Tí xroon yóxin ikjin chꞌín Pablo chrꞌénhen chꞌán tí chꞌín Timoteo 
\c 1  
\s1 Chꞌín Pablo nixje̱he̱ chꞌán tí chꞌín Timoteo 
\p  
\v 1 Janhan Pablo mé kjueyána Jesucristo tꞌa̱ha̱ chꞌán xra̱ kíxin xi̱kaha tjinkaon Dios kíxin mé xi̱kaha ó chrónka chꞌán kíxin tsjanjon chꞌán kjuachaxin tsochónta chojni kjuachón jnkochríxín tí tsinkáchónki sín Jesucristo.  
\v 2 Ikjian tí xroon i chrꞌanhan jaha kíchó ni Timoteo. Tꞌíkua̱n éxí xja̱nna tí jaha mé imá tjua̱ha. Kjuasáyé Itꞌéni Dios la ko Ìnchéni Jesucristo chrókjuintayavan chꞌán la ko chrókui̱konòa̱ha chꞌán la ko chrótjáha chꞌán kjuaxróxin. 
\s1 Chróchrónka chꞌán kíxin tinkáchónki chꞌán Jesucristo 
\p  
\v 3 Xráxinka̱van tí jaha tió níxja̱ha̱ Dios ncha̱kotjin la ko tie la ko tjétjáncháha̱ kjuasáyé Dios kíxin imá tinkachónkia chꞌán. Jehe chꞌán mé tꞌa̱ha̱ xra̱ kaín a̱senná éxí xi̱kaha mé kꞌuékjichꞌe tí sín tsíkꞌaxrjeníxinna.  
\v 4 Xráxinka̱van jnkochríxín nkexrí tsja̱nka la tjínka̱van kíxin chrótsjaha̱ tí jaha ínaá kíxin tso̱chéhe̱ a̱senná.  
\v 5 Ó nòna kíxin kaín a̱sán tinkachónkia Jesucristo. Kja̱xin náchri̱a tjan Loida la ko ìná tjan Eunice mé sa̱oxín kuinkáchónki sín Ìnchéni Jesús la ntá ó nòna kíxin kjá kja̱xin jaha xi̱kaha tinkachónkia chꞌán. 
\p  
\v 6 A̱ ntá ijie nta̱xráxinkávan kíxin chrókꞌuitjáyanhya tí kjua̱cha̱xién Dios kjuanjon chꞌán kꞌuayéhé tió kjuaké tjaná chrítaón tí jaha.  
\v 7 Dios la kjuanjonhya Ncha̱kuen chꞌán kíxin tsochrakonni. Náhí. Kjuanjon chꞌán tí Ncha̱kuen chꞌán kíxin tsochóntani kjuachaxin la ko jína tsotjuèheni chꞌán la ko jína tsjenka̱yáxinni.  
\v 8 Chrókósuàhya chróchro̱nka kíxin tinkachónkia Ìnchéni la ko kja̱xin chrókósuàhya chróchro̱nka kíxin janhan tjéchji̱naxián tí xrja̱nka itén chꞌán. Kjónté la íchá jína chrókjuasótexián tí tjàkua tí tan tsaáxinni kíxin tí kjuachaxin kuènte Dios ó kꞌuayéhé.  
\v 9 Jehe Dios mé kuaáxinni la ko kjueyá chꞌán tí jeheni kíxin jína chrókꞌuejóni. La jehya tí xra̱ jína kjuíchꞌeni ntá chrókuaáxinni. Náhí. Kjuasáyé Dios kjueyá chꞌán tí jeheni kíxin tsinkáchónkini Jesucristo. Tí na̱xa̱ xrankíxixínhya chjasintajni mé tsíkjenka̱yáxin chꞌán tíha kíxin jehe chꞌán mé imá tjuèheni chꞌán.  
\v 10 Ntá jie ó kjua̱ko̱xi̱n Dios kíxin tjuèheni chꞌán kíxin ó kui tí nkexro tsaáxinni mé Jesucristo. Kjuínchekꞌitjáyan chꞌán tí kjuachaxin kꞌuéchónta tí kjuachꞌén kíxin kjuacha chꞌán xechón chꞌán ínaá. Chronkaxín itén chꞌán nkexrí tsaáxinni ntá ó kónoexínni kíxin tí kjuachón kjua̱ko̱xi̱n chꞌán mé xitjahya tsꞌitjáyan. 
\p  
\v 11 Dios mé kꞌue̱tua̱nna sátsjixrja̱nka itén chꞌán la ko kjueyána chꞌán tsjáko̱ha̱ tí sín jehya sín judío tí tan jína.  
\v 12 Mé xi̱kaha tjétjasótexinna kaín tí nkehe i la kjónté tósuànahya kíxin ó choxian jína tí nkexro tinkachónkia. Mé ó nòna kíxin chónta chꞌán kjuachaxin tsꞌàyakonhenni chꞌán tsjixrakájia tí ya̱on tsokjan chꞌán. Méxra̱ janhan tja̱ha̱ chꞌán a̱senná kíxin tsꞌayakonhen chꞌán. 
\p  
\v 13 Tꞌitjáyanhya tjàkua kaín nkehe jína ó kjuáko̱ha. Na̱xa̱ títekávan la ko tjuèhé kíchuárá kíxin tinkachónkia Cristo Jesús.  
\v 14 Kjua̱cha̱xién tí Ncha̱kuen Dios chóntani jnkojnkoni mé tꞌàyakonhén jína tí tan tjàkua kjuíntaki̱to̱nhan Dios kꞌuayéhé. 
\p  
\v 15 Jaha mé ó noha kíxin kaín tí sín estado Asia mé jehe sín kuíto̱na sín la ko kja̱xin tí chꞌín Figelo la ko chꞌín Hermógenes.  
\v 16 Tjáncháha̱ Ìnchéni kíxin imá tsi̱konóe̱he̱ chꞌán tí sín tjejó nto̱e tí chꞌín Onesíforo kíxin jehe chꞌán mé imá kjuínki̱tsana chꞌán la ko kósuèhya chꞌán ikui chꞌán kjónté tjéchji̱na.  
\v 17 Tí na̱ntá kjuíji chꞌán chjasin Roma ntá kuíto̱ehya chꞌán kjueyána chꞌán hasta kꞌuitjana.  
\v 18 Tjáncháha̱ Ìnchéni kíxin tí ya̱on itsi chꞌán ntá chrókui̱konóe̱he̱ chꞌán tí chꞌín a kíxin jaha ó noha jína kíxin nkexrí kjuínki̱tsa chꞌán tí janhan tí chjasin Éfeso kja̱xin. 
\c 2  
\s1 Kjuíncheyóe̱xin chꞌín Pablo kíxin jeheni éxí yóhe̱ ijnko soldado jína kuènte Jesucristo 
\p  
\v 1 Jaha xje̱enni tákjá tí kjuachaxin kjuasáyé Jesucristo kjuanjon chꞌán kíxin tsjinki̱tsa kíxin tinkáchónkini chꞌán.  
\v 2 Tí nkehe kuínhín kjuàkua nkayakon nchónhya chojni mé xi̱kaha chje̱hé tí xra̱ tí sín jína choxian jína chꞌe xra̱ kíxin ntá jehe sín mé xi̱kaha chrókjua̱ko̱he̱ sín í so chojni ínaá. 
\p  
\v 3 Jaha la kjónté nchónhya nkehe kjuasótia la chrókjuacha kíxin ijnko soldado jína kuènte Jesucristo.  
\v 4 Kohya nijnko soldado jína chꞌe xra̱ chrókꞌuixenhen ókjé xra̱ kíxin tꞌichjánxi̱n jnkojínxón xra̱ sichꞌe chꞌán kíxin éxí tjinkaon tí nkexro tꞌe̱tue̱nhen chꞌán.  
\v 5 Mé xi̱kaha éxí yóhe̱ ijnko nkexro tsotsítán. Ntá tsjachahya tsꞌáyéhe̱ chꞌán nijnko nkehe tí sinchexiteyèhya chꞌán tí sín tꞌe̱to̱an.  
\v 6 La éxí yóhe̱ ijnko nkexro chꞌe xra̱ nonte ntá chónta chꞌán kjuachaxin sa̱oxín tsakja chꞌán tí nkehe tsꞌóna.  
\v 7 Chróxraxinkávan jína kaín tí nkehe xrja̱nka la ìnchéni mé tsjinki̱tsa tsiénxian kaín nkehe. 
\p  
\v 8 Xráxinkávan kíxin Jesucristo la ó xechón chꞌán. Jehe chꞌán mé kꞌuaxrjeníxin chꞌán chꞌín rey David. Tíha mé tí tan jína tsaáxinni tjétjàkua.  
\v 9 Tí tan tjéxrja̱nka mé tjasótexinna. Tíha mé tjéchrontetoxínna cadena éxí ijnko chojni tsíkjàya la kjónté tí itén Dios la jehya tjechrontetoxín cadena.  
\v 10 Méxra̱ kjónté nchónhya tꞌatsínka tí janhan la nta̱xiteyá kíxin tí í so sín kjueyá Dios tsaáxin sín chꞌán kíxin tsochónta sín kjuachón jnkochríxín kíxin tinkáchónki sín Jesucristo. 
\q1  
\v 11 Tíhi mé chaxín: 
\q1 Tí jehe chꞌán kꞌuénxinni chꞌán a̱ ntá chrꞌéxi̱n tsꞌejókoni chꞌán. 
\q1  
\v 12 La tí tsjasótexínni tí jehe chꞌán la ntá kja̱xin tsꞌáyéhe̱ni kjuachaxin kuènte chꞌán tsꞌe̱to̱anni. 
\q1 A̱ ntá tí chrókjuinchemáni tí jehe chꞌán na ntá kja̱xin chꞌán la xi̱kaha sichꞌe chꞌán. 
\q1  
\v 13 Kjónté nchexiteyèhyani chꞌán la jehe chꞌán tjenchexiteyá chꞌán 
\q1 kíxin Dios la xitjahya sichꞌia chꞌán. 
\s1 Chrókjuichꞌeni tí xra̱ jína 
\p  
\v 14 Nchexraxinkávan sín kaín tí nkehe i. Dios tjetsjehe tétue̱nhén sín kíxin chrókuíto̱he sín tí nixja sín tjanjo̱nxi̱n sín kíxin ó chónkó tíha la ninkehó sínkíhya. Tí xi̱kaha chꞌe sín la sinchekꞌitjáyan sín tí sín tjejótinhin.  
\v 15 Si̱chꞌe xra̱ jína kíxin tso̱xrjínhi̱n Dios tí xra̱ tjechꞌe a. Ntoá chrókjuàkua tí tan jína chaxín kíxin ntá chrókꞌuichjánxi̱nhya chrókósuàha.  
\v 16 La ti̱to̱hé tí nkehe náxrjónhya la ko chónkó nixja iso sín kíxin tí sín nixja xi̱kaha la a̱ntsí tsinkákꞌánkí tí nkehe jínahya nixja sín.  
\v 17 Tí nkehe jehya jína tjako sín mé éxí yóhe̱ ijnko ito̱n sóa sítinkáchrꞌenka. Mé xi̱kaha tjako tí chꞌín Himeneo la ko chꞌín Fileto.  
\v 18 Jehe sín mé ó kjuixin kuíto̱he sín tí nti̱a ntoá la ntáchro sín kíxin ó kjuixin kꞌuátsínka tí tsoxechón chojni. Ntá xi̱kaha chꞌiyehe sín tí í so sín la tsjitóxi̱nhin sín tí nkehe tinkáchónki sín.  
\v 19 Kjánchó tí sín tinkáchónki Dios éxí yóhe̱ tí xro̱ xrankíxixín tja̱tꞌo̱ xitjahya tsoxíka la chónta éxí ijnko sello tí itén Dios ntáchro kíxin: “Ìnchéni mé tjatso̱an chꞌán tí chojni kuènté chꞌán”,\f + \fr 2:19 \ft Números 16.5; Juan 10.14\f* la kja̱xin ntáchro kíxin: “Kaín tí sín tinkáchónki Cristo mé tꞌichjánxi̱n chrókuíto̱he sín kaín nkehe jínahya,” mé xi̱kaha ichro itén Dios. 
\p  
\v 20 Ijnko nchia jié kuènte tí sín rico la siín vaso tsíkꞌóna chica oro la ko vaso tsíkꞌóna chica plata. La kja̱xin siín nkehe tsíkꞌóna ntachiso la ko nkehe tsíkꞌóna nchetje. Iso la xra̱ ó tsíkꞌóna kuènte tí xra̱ tjetoan la í so la tsíkꞌóna kuènte tí xra̱ tjetuanhya.  
\v 21 A̱ ntá ijnko chojni chrókuíto̱he kaín jie̱ chrókóyóhe̱ éxí ijnko vaso tjóá jína kíxin chrókuicháxinhin Ìnchéni. A̱ ntá tí nkexro xi̱kaha chrókjuichꞌehya tí nkehe jínahya kíxin chrókuicháxinhin Ìnchéni tí xra̱ jína. 
\p  
\v 22 Ti̱to̱hé kaín tí nkehe jehya tí jína tóxrjínhi̱n í so tí sín ntasoá a. Chrókjuakꞌe tí nti̱a ntoá la ko kaín a̱sán chrókuinkachónkia Cristo la ko chrótjuèhé kaín chojni la ko kjuaxróxin chrókꞌuejokoa kaín sín. Mé xi̱kaha chrókꞌuéjó kaín xín tí sín kótjóá a̱sén mé kaín tí sín tinkáchónki Ìnchéni.  
\v 23 Jaha chrókuahya kuènté tí sín lo̱nti̱ tjenka̱yáxinhya jína kíxin jaha ó noha kíxin xra̱hya chrókjuanjo̱nko kíchó sín.  
\v 24 A̱ ntá ninkexro chꞌehe xra̱ Ìnchéni chrókjuanjo̱nko kíchó sín kíxin jína chrókjuinki̱tsa kíchó sín. Chrókónohe sín kaín nkehe jína chrókjuako sín la ko chrókónínkakuenhya sín kíchó sín.  
\v 25 Kaín a̱sén sín jnkojína chrónixje̱he̱ sín tí sín titekakonhya kíxin chróchónhen sín kíxin Dios chrókjuinki̱tsa tí sín a chrókꞌuíxinkí tí ntoáhya tjenka̱yáxin sín kíxin ntá chrókónohe sín tí nkehe chaxín ntoá chrókjuichꞌe sín  
\v 26 kíxin tꞌichjánxi̱n chrókónohe sín nkexrí chrókuaáxin sín kíxin chꞌín Tsochren tjinkaon chrókjuichꞌiyehe sín ntá chrókjuasin sín jie̱. 
\c 3  
\s1 Nkexrí tsꞌejó tí chojni chjasintajni tí ya̱on tsjixixín 
\p  
\v 1 Tꞌichjánxi̱n chrókónoha kíxin tí ya̱on tsjixixín ntá itsi tí ya̱on kjuaxróxinhya tsꞌejó chojni.  
\v 2 Tí sín chjasintajni tsinkáchónkihya Ìnchéni mé imá chrókꞌue̱to̱an sín jehó la ko imá tso̱xrjínhi̱n sín chichaon la ko sinchehnke sín la ko imá tsꞌántaxínhi̱n sín Dios. Sinchexiteyèhya sín itꞌé sín la ko ìné sín la ko tsochóntahya sín kjuasáya la ko tsinkáchónkihya sín ninkehó dios.  
\v 3 Tsotjuèhya sín kíchó sín la ko tsi̱konóe̱hya kíchó sín la ko tsjonta sín kíchó sín la ko ninkexró tsochrakuenhya sín la ánto̱sén sín tsjasin sín jie̱, la ko imá tso̱jie̱he sín la ko imá tso̱nínkakonhen sín kaín nkehe jína.  
\v 4 Jehe sín mé sinchekji kíchó sín la ko tsjenka̱yáxinhya sín jína la ko sinchehnke sín. Tsotjinkaon sín tsjeyá sín tí nkehe ntáchro a̱sén sín ó a̱ ntá tsjeyáhya sín Dios.  
\v 5 Jehe sín la éxí chojni tinkáchónki Dios xi̱kaha tsꞌejó sín. Kjánchó chaxínhya. Tsinkáchónkihya sín tí kjuachaxin kuènte Dios chaxín ntoá. 
\p Méxra̱ jaha la chrókuankíehya tí chojni chꞌe xi̱kaha.  
\v 6 Iso tí sín a mé ixri sín tꞌixenhen nto̱e ókjé chojni la chꞌiyehe sín tí chojni chjin lo̱nti̱ tjasin jie̱ la nchexiteyéhe̱ sín kaín tí ntáchro a̱sén sín.  
\v 7 La xráxín ó tinkákꞌitja sín kjánchó nunca kuíenxínhya sín tí nkehe chaxín ntoá.  
\v 8 A̱ ntá éxí yóhe̱ tí sín kꞌuékjinchexro̱a̱n mé chꞌín Janes la ko chꞌín Jambres mé kꞌuénínkakonhen sín chꞌin Moisés mé xi̱kaha tí sín tjako ijie nínkakonhen sín tí nkehe chaxín ntoá. Imá jínahya tí kjuaxrexinkaon kuènte sín la ko titekakonhya sín tí nkehe chaxín tinkáchónkini.  
\v 9 Kjánchó tsjachahya sín sichꞌia sin isé kíxin kaín chojni tso̱nohe kíxin tí sín a mé lo̱nti̱ sín kíxin éxí xi̱kaha tsíkónhen tí yaá sín kꞌuékónínkakonhen chꞌín Moisés. 
\s1 Tí nkehe kjuixixín kꞌue̱tue̱nhen chꞌín Pablo tí chꞌín Timoteo 
\p  
\v 10 A̱ ntá jaha mé ó kuítekávan tí nkehe kjuàkua. Ó noha nkexrí kjuakꞌé janhan la ko ó noha tí xra̱ kjui̱tꞌa janhan. Ó noha nkexrí tinkachónkia Ìnchéni la ko noha kíxin tjokahya kónínka̱van la ko noha nkexrí tjua̱ha̱ chojni. Ó noha kíxin kjónté kónínkaon chojni la kui̱to̱a̱hya tí xra̱ a  
\v 11 kjónté chónkìna sín la ko kjuasótena. Ó noha nkehe kònna tí chjasin Antioquía la ko Iconio la ko Listra. Chrókꞌóyánna sín la kjuínchekjuasótena sín kjánchó Ìnchéni mé kjuínki̱tsana kjónté kaín tí nkehe chrókònna.  
\v 12 Kaínxín tí sín tjinkaon tjóá chrókꞌuꞌejó sín nchexiteyéhe̱ Cristo Jesús la tꞌichjánxi̱n tsjasóte sín.  
\v 13 A̱ ntá tí sín jínahya la ko tí sín ixri chꞌia sín mé tsꞌóna sín a̱ntsí jínahya. Jehe sín xrichꞌia sín la chꞌiaxín sín nkehe jínahya. 
\p  
\v 14 Jaha la jína chrókjuakꞌe la í chrókjuínkíhya tí nkehe kꞌuítjá la ko tí nkehe ó kuítekávan. Jaha la ó noha tí nkexro kjua̱ko̱ha.  
\v 15 Jaha la desde xja̱nntsia kꞌuítjá nkexrí nixja xroon itén Dios la tíha mé tónoexínni kíxin Cristo Jesús tsaáxinni kíxin tinkáchónkini chꞌán.  
\v 16 Ntá kuenté xroon Biblia kjua̱cha̱xién Ncha̱kuen Dios kjuínki̱tsa tí nkexro ikjin la tíha mé jína tsoxrácue̱xinni tí nkehe chaxín la ko tíha mé jína tsjentuéheni la ko tsjinki̱tsani tso̱noheni nkexrí chrókꞌuejóni ntoá  
\v 17 kíxin tí nkexro tinkáchónki Dios chrókónohe jína la ko chrókjuacha sichꞌe kaín tí xra̱ jína. 
\c 4  
\p  
\v 1 Kjua̱cha̱xién Dios la ko Ìnchéni Jesucristo, tí nkexro itsi éxí ijnko rey la sinchekito̱exín iji̱é kaín chojni tjejóchón la ko tí chojni tsíkꞌen,  
\v 2 mé tétua̱nhan chrókjuàkua itén Dios kaín a̱sán kjónté á chrókuinhin sín o̱ náhí. Nixje̱hé sín jnkojína kíxin tsitekaon sín la ko tjéntuéhé sín jnkojína. Chrókóninkákonhya chrókjuákohé sín.  
\v 3 Itsi ijnko ya̱on ntá tsotjinkakonhya sín tsinhin sín tí nkehe jína. A̱ ntá sinchexiteyéhe̱ sín tí nkehe ntáchro a̱sén sín ó. Tsjeyá sín nchónhya maestro tsja̱ko̱he̱ sín jehó tí nkehe tóxrjínhi̱n sín chrókuinhin sín.  
\v 4 Méxra̱ tsíto̱he sín tí nkehe chaxín ntoá la ntá itsa sín kuènté kaín nkehe chaxínhya.  
\v 5 Méxra̱ jaha jína chrókjuenka̱yáxian la chrókjuacha kjónté tsjasótia. Chrókjuintaxín chrókjui̱chꞌe xra̱ chrókjuákohé chojni itén Dios tsaáxinni mé xi̱kaha si̱nchexiteyá jína tí xra̱ chonta. 
\p  
\v 6 Ntá janhan ó kjuixraká tí hora tsjasótena la ko ó kjuixraká tí hora itsꞌèn.  
\v 7 Ó kjuánjo̱nkian jína kaín tí nkehe jínahya la ko ó kjuixinna tí xra̱ kuènta̱na la ko kui̱to̱a̱hya jína kuinkachónkia Ìnchéni.  
\v 8 A̱ ntá ijie la tí nkehe tsi̱to̱nna mé tjechónhen kíxin jína kjuakꞌé ntihi. Tíha mé tsjanjon Ìnchéni tí ya̱on itsi chꞌán. Jehe chꞌán mé ijnko juez jína. Jehya kíxin janhván tsákjaá tí nkehe tsjanjon chꞌán. Náhí, kja̱xin kaín tí nkexro kuítekaon sin chꞌán la ko chéhe̱ sín tjejóchónhen sín tió tsi chꞌán. 
\s1 Chꞌín Pablo kꞌue̱to̱an tsjijitsjehe sín chꞌán 
\p  
\v 9 Jaha chrókóxakonhan tjoka chrókꞌuinkatsjehé tí janhan  
\v 10 kíxin chꞌín Demas la kuíto̱he chꞌán tí janhan kíxin imá kóxrjínhi̱n chꞌán tí nkehe kuènte chjasintajni. Sátsíkji chꞌán chjasin Tesalónica. Chꞌín Crescente mé sátsíkji chꞌán chjasin Galacia a̱ ntá chꞌin Tito sátsíkji chꞌán chjasin Dalmacia.  
\v 11 Jehó chꞌín Lucas na̱xa̱ tjéki̱an chꞌán. Tjíkjéyá chꞌín Marcos la tsjíkuana chꞌán ntihi kíxin jehe chꞌán mé jína tsjinki̱tsa chꞌán tí xra̱ chonta ntihi.  
\v 12 A̱ ntá chꞌín Tíquico mé kuétua̱nha̱n chꞌán sátsji chꞌán chjasin Éfeso.  
\v 13 Tió tsꞌinka tsꞌinkakuana tí ka tꞌítsa̱te kuíto̱ha̱ chjasin Troas nto̱é chꞌín Carpo la ko kja̱xin tsꞌinkakuana tí libro kuènta̱na la ko koí tí tjo̱é iko tsíkꞌóna xroon. 
\p  
\v 14 Tí chꞌín Alejandro tí chꞌín chꞌe xra̱ chica mé nchónhya nkehe jínahya kjuíchꞌena chꞌán. Kjánchó Ìnchéni mé tsje̱nke̱he chꞌán kaín nkehe kjuíchꞌe chꞌán.  
\v 15 Jaha mé tóxakonhan kíxin tí jehe chꞌán kíxin imá nínkakonhen chꞌán tí nkehe tjakoni. 
\p  
\v 16 A̱ ntá tí sa̱oxín kꞌuèya tí síxre̱e tí kjuia tí tjejó sín la ninkexró kjuinki̱tsahyana. Kaín sín me kuíto̱na sín janhván. Kjónté xi̱kaha la tjáncháha̱ Dios kíxin chrókuahya chꞌán kuèntá kíxin xi̱kaha kjuíchꞌe sín.  
\v 17 Kjánchó Ìnchéni mé chaxín kjuínki̱tsana chꞌán la kjuanjon chꞌán kjuachaxin kíxin tsjachana na̱xa̱ jína tsjàkua itén chꞌán. Ntá kuínhin kaín tí sín jehya judío. A̱ ntá Ìnchéni kjuínki̱tsana kíxin kjónehyana koxra̱.  
\v 18 Ìnchéni mé tsjinki̱tsana kíxin na̱xa̱ tso̱nnahya kaín nkehe jínahya. Jehe chꞌán mé tsꞌayakonna chꞌán tsꞌixa̱nha̱n tí tjetꞌe̱to̱an chꞌán nkaya nka̱jní. Kjuasáyé chꞌán kíxin xi̱kaha jnkochríxín tsoxiteyá. Amén. 
\s1 Chꞌín Pablo kjuixixín nixja chꞌán 
\p  
\v 19 Jaha nixje̱hé tí tjan Prisca la ko chꞌín Aquila la ko nixje̱hé tí sín siín nto̱e chꞌín Onesíforo.  
\v 20 Kuíto̱he chꞌín Erasto chjasin Corinto. A̱ ntá chꞌín Trófimo kuíto̱he chjasin Mileto kíxin kóníhi chꞌán.  
\v 21 Tóxakonhan chrókꞌuinka na̱xa̱ tꞌixenhya ncha̱kuen kin. Tí chꞌín Eubulo la ko chꞌín Pudente la ko chꞌín Lino la ko tjan Claudia la ko kaín sín kíchó ni ntihi nixja̱ha sín jnkojína. 
\p  
\v 22 Ìnchéni Jesucristo chrókꞌuajikoa chꞌan la Dios chrókjuintayaonrá kaín rá mé xi̱kaha tsoxiteyá. Amén. Ó tjen.