\id 1PE  
\h 1 PEDRO 
\toc1 Tí xroon sa̱oxín tsíkjin chꞌín Pedro 
\toc2 1 PEDRO 
\toc3 1 P. 
\mt1 Tí xroon sa̱oxín tsíkjin chꞌín Pedro 
\c 1  
\s1 Chꞌín Pedro ikjin chꞌán xroon chrꞌénhen chꞌán tí sín tinkáchonki Ìnchéni tjejó ókjé 
\p  
\v 1 Janhan Pedro, mé kjueyána Jesucristo tꞌa̱ha̱ chꞌán xra̱ mé ikjian tí xroon chrꞌanhánrá jahará sátsíkjirá ókjé chjasin tjejorá, mé tjejorá estado Ponto, la ko Galacia, la ko Capadocia, la ko Asia, la ko Bitinia.  
\v 2 Kjueyárá Itꞌéni Dios kíxin jehe chꞌán tsíkjenka̱yáxin chꞌán ósé xi̱kaha. Kótjuáxinrá Ncha̱kuen chꞌán kíxin chrókuítekáonrá chꞌán la ko kótjuáxinrá ijni̱é Jesucristo. Kjuasáyé chꞌán chrókjuintayaonrá chꞌán kíxin a̱ntsí chrókuákjárá tí kjuaxróxin kuènte chꞌán. 
\s1 Tjejóchónhenni kíxin jehe chꞌán sinchekaáni chꞌán 
\p  
\v 3 Tjancheheni kjuasáyé Dios mé Itꞌé Ìnchéni Jesucristo kíxin kjuasáyé jehe chꞌán kui̱konóe̱he̱ni chꞌán kíxin éxí kokjíexínni ni̱xin kíxin xechón Jesucristo. Mé xi̱kaha tjejóchónhenni sinchekaáni chꞌán.  
\v 4 Mé xi̱kaha tsꞌayéhérá jahará tí nkehe tsjanjon Dios chónta chꞌán nkaya nka̱jní mé ijnko nkehe chónhya tsꞌitjáyan, la ko chónhya tso̱kji̱ta̱, la ko chónhya tso̱xámá.  
\v 5 Dios mé tꞌayakuanxínrá chꞌán tí kjuachaxin kuènte chꞌán kíxin jahará tinkachónkirá chꞌán kíxin ntá tsjacha tsaárá éxí tsíkjenka̱yáxin chꞌán ósé mé tjinkaon chꞌán kíxin chrókuaárá tí tsjixixín tsjeje̱ chjasintajni. 
\p  
\v 6 Méxra̱ xi̱kaha chrókócháhará kjónté ichrén nkehe chrókónhanrá iso ya̱on kíxin jehí tꞌichjánxi̱n xi̱kaha itsjé nkehe chrókónhanrá.  
\v 7 Méxra̱ tí tinkachónkirá Ìnchéni la tꞌichjánxi̱n tsjachará nchónhya nkehe chrókónhanrá éxí yóhe̱ chica oro xi̱kaha tꞌichjánxi̱n tsꞌatsínka tí siín xrohi tsotsjexín sín á chaxín jína kohya nkehe tso̱nhen. A̱ ntá a̱ntsí má sínkí tí tinkachónkirá Ìnchéni a̱ ntá tí chica oro la kénhyó sínkí kíxin tí chica oro la chóxin tsjeje̱. Mé xi̱kaha tí tinkachónkirá Ìnchéni tꞌichjánxi̱n xi̱kaha tso̱nhanrá kíxin tsontáchro Dios kíxin jína kjuachará ntá tsꞌayéhérá kjuachaxin tió tsi Jesucristo. 
\p  
\v 8 Jahará tjuèhérá Jesucristo kjónté kꞌuíkonhyará chꞌán. Ijie tinkachónkirá chꞌán kjónté tꞌikonhyará chꞌán la ko tócháhará ijnko kjuachéhe̱ imá jié kohya nkehe sincheyóhe̱ni kíxin imá náxrjón tíha.  
\v 9 Mé xi̱kaha kꞌuitjará nkexrí tsaáxin a̱sánrá. Tíha mé tí nkehe tjejochonhénrá tinkachónkirá. 
\p  
\v 10 Mé xi̱kaha tí sín profeta tsíki ósé la kjueyá sín nkexrí chrókuaáxin chojni la ko kꞌuéchrónkaxín sín tí nkehe kjuasáyé Dios chrókjuanjon chꞌán chrókꞌuayéhérá tí jahará.  
\v 11 Ncha̱kuen Cristo kjuínchenohe tí sín kꞌuéchrónka itén Dios kíxin Cristo tsjasóte la ko chrꞌéxi̱n tsꞌáyéhe̱ chꞌán tí kjuachaxin jié. A̱ ntá tí sín kꞌuéchrónka mé tjinkaon chrókónohe sín nkexro tíha la ko nkesá tso̱nhen tí nkehe chrónkaxín Ncha̱kuan Ìnchéni.  
\v 12 Kjánchó Dios kjuínchenohe tí jehe sín kíxin tí nkehe chrónka sín jehya kíxin tjoka chróxiteyá tí kꞌuéjó sín. Náhí. Hasta tí tjejóni jie mé ó xiteyá tíha. Tí nkehe chrónka sín la mé yóhe̱ tí nkehe kuínhínrá, mé tí tan tsaáxinni kꞌuéchrónkaxín tí sín kjua̱ko̱ha̱rá kíxin tí kjuachaxin Ncha̱kuen Dios kui̱xi̱n nkaya nka̱jní mé kjuínki̱tsa tí jehe sín. Kja̱xin tí sín ángel tjinkaon sín chrókꞌuinkon sín nkexrí tíha. 
\s1 Dios kꞌuíye̱he̱ chꞌán tí jeheni kíxin tjóá chrókꞌuejóni 
\p  
\v 13 Méxra̱ chrókjuenka̱yáxinrá jína nkehe chrókjui̱chꞌerá kíxin chrókꞌuejorá jnkojína. Kaín a̱sánrá chrókꞌuejochonhénrá kíxin tí nkehe sintaki̱to̱nhanrá Dios tió tsi Ìnchéni Jesucristo.  
\v 14 Éxí ijnko xjan titekaon mé xi̱kaha jnkojína chrókꞌuejorá jahará, chrókjuenka̱yáxinhyará éxí kꞌuékjenka̱yáxinrá senó na̱xa̱ kꞌuéchonhyará Dios.  
\v 15 Náhí. Jnkojína tjóá chrókꞌuejorá kíxin Dios kꞌuíya̱hará la mé jína chꞌán la ko tjóá chꞌán.  
\v 16 Kíxin ntáchro xroon itén Dios kíxin: “Jahará chrókꞌuejorá tjóá kíxin janhan na mé ijnko nkexro tjóá.”\f + \fr 1:16 \ft Levítico 11.44\f* 
\p  
\v 17 Tí ntáchrorá jahará kíxin Itꞌárá mé Dios la ko ó nohará kíxin jehe chꞌán sinchekito̱exín chꞌán iji̱é jnkojnko chojni, kíxin tꞌikon kíxin jnkokón sínkí jnkojnko chojni, a̱ ntá jahará chróxráxinkáonrá chꞌán jnkochríxín tí na̱xa̱ tjejochónrá ntihi chjasintajni.  
\v 18 Dios mé kjuíntakaárá chꞌán kíxin chrókꞌuejohyará éxí kꞌuékꞌejó tí sín tsíkꞌaxrjeníxinrá. Jahará ó nohará jína kíxin tí nkehe kꞌuínáxi̱nrá tsaáxinrá jehya ijnko nkehe chrókjueje̱ éxí chica oro o̱ chica plata.  
\v 19 Náhí. Ná mé kꞌuínáxi̱nrá ijni̱é Jesucristo imá tjete. Jehe chꞌán mé kꞌóyán sín la kꞌuáyéhe̱ Dios éxí ijnko kolélo ninkehó xéhya va.  
\v 20 Kíxin Cristo mé ósé tsíkónoxín chꞌán tí na̱xa̱ kꞌónahya chjasintajni. Kjánchó jehya tuénxín kónhen tíha hasta tí chrꞌéxi̱n ntá kónoxín chꞌán kíxin jína chrókꞌuejoxi̱nrá tí jahará.  
\v 21 Ntá xi̱kaha kónhen Cristo a̱ ntá jie jahará la kuítekáonrá Dios, mé tí nkexro kjuínchexechón Cristo la ko kjuikosáyehe chꞌán. Mé xi̱kaha jahará tinkachónkirá Dios la ko tjejochonhénrá sintakaárá chꞌán. 
\p  
\v 22 A̱ ntá jie ó kuítekáonrá tí tan chaxín ntoá kíxin tjinki̱tsará Ncha̱kuèn Dios. Tíha mé kótjuáxin a̱sánrá kíxin ntá tsotjuèhérá kíchuárá. Mé xi̱kaha chrótjuèhérá kíchuárá kaín a̱sánrá.  
\v 23 Méxra̱ jahará kokjíhará ni̱xin, jehya kíxin na̱xa̱ chrókꞌuaxrjeníxinrá itꞌárá chjasintajni ntihó tsꞌitjáyan. Náhí. Kokjíaxínrá itén Dios itjen jnkochríxín.  
\v 24 Kíxin ntáchro xroon itén Dios kíxin: 
\q1 Kaín chojni chjasintajni tóyóhe̱ kayoa ó, 
\q1 a̱ ntá tí kjuachaxin chónta la tóyóhe̱ itsjo tꞌóna kayoa. 
\q1 Tí ka la tso̱xámá a̱ ntá tí tsjo la tsꞌanótjen 
\q1  
\v 25 a̱ ntá tí tan kuènte Ìnchéni la tsjakꞌe jnkochríxín.\f + \fr 1:25 \ft 1.24-25 Isaías 40.6-8\f* 
\m Tí tan í mé tsaáxinni la kuinhínrá tí jahará. 
\c 2  
\p  
\v 1 Méxra̱ ti̱to̱hérá kaín nkehe jínahya, la ko kaín kjuachꞌia, la ko tí ntoáhya tjenka̱yáxinrá, la ko tí kjuachji̱no̱xínhin, la ko tí xrikoará kaín xín kjuachꞌia.  
\v 2 Chrókꞌuejorá éxí chánjan na ntá tsíkokjíhi la itsjen ó chrókꞌui, mé xi̱kaha jahará chrókjuéyárá itén Dios, tíha mé chrókónohará la chrókꞌuánkíxin kjuaxrexinkaon kuèntárá kíxin chrókuaáxinrá,  
\v 3 tí chaxín kjuátso̱anrá kíxin Ìnchéni la jína. 
\s1 Cristo mé tí xro̱ tjechón 
\p  
\v 4 Chrókóchjineherá Ìnchéni, mé jehe chꞌán me éxí tí xro̱ tjechón. A̱ ntá tí chojni la kuítekakonhya tí xro̱ a, a̱ ntá Dios la kjueyá chꞌán tí xro̱ a imá tjete sínkí.  
\v 5 Mé xi̱kaha Dios kjuíchꞌénará tí jahará éxí xro̱ tjechón la Dios chrókjuichꞌéna chꞌán tí jahará jnkoko̱á ni̱nko kuènte chꞌán, la mé tsꞌónará ncha̱tꞌá tsíkjinchetjóá Dios, a̱ ntá chróchje̱hérá chꞌán tí nkehe tóxrjínhi̱n chꞌán kíxin tinkachónkirá Jesucristo.  
\v 6 Mé xi̱kaha kja̱xin xroon itén Dios ntáchro kíxin: 
\q1 Tsjaké chjasin Jerusalén ijnko xro̱ tꞌe̱to̱an tsꞌóna nchia, ijnko xro̱ tsíkónoxín imá tjete sínkí 
\q1 a̱ ntá tí sín tsitekaon tí jehe chꞌán mé tso̱suèhya sín.\f + \fr 2:6 \ft Isías 28.16\f* 
\m  
\v 7 A̱ ntá jahará títekáonrá tí xro̱ kíxin imá tjete. A̱ ntá tí sín kuítekakonhya, la mé tsoxiteyá éxí ntáchro xroon itén Dios kíxin: 
\q1 Tí xro̱ náxrjónhya kuíto̱enta tí sín chꞌéna tja̱tꞌo̱, 
\q1 mé ijie mé kꞌóna tí xro̱ tjetoan.\f + \fr 2:7 \ft Salmo 118.22\f* 
\m  
\v 8 La ko kja̱xin tsoxiteyá tí nkehe ntáchro xroon itén Dios kíxin: 
\q1 Tí xro̱ mé tsóténki̱xi̱n sín la mé tíha ijnko tjo tsjitsínkaxín sín.\f + \fr 2:8 \ft Isaías 8.14\f* 
\m Kjánchó jehe sín kóténki̱xin sín tí xro̱ kíxin kuítekakonhya sín tí itén Dios mé xráxín tsíki̱to̱enxín sín xi̱kaha tso̱nhen sín. 
\s1 Tí sín tinkáchónki Dios 
\p  
\v 9 A̱ ntá jahará tsíkꞌaxrjeníxinrá tí sín tsíkjeyá Dios la ko tsíkꞌónará ncha̱tꞌá chꞌeherá xra̱ tí rey, la ko tsíkꞌónará ijnko nación tjóá, la ko tsíkꞌónará ijnko chjasin kuènte Dios kíxin ntá tsochro̱nka̱rá tí xra̱ náxrjón kuènte Dios. Kꞌuíya̱hará chꞌán kíxin tsꞌaxrjéxi̱nrá tí sítié ntá tsꞌixe̱nhénrá tí siín xrohi náxrjón tꞌinkaséyan kuènte chꞌán.  
\v 10 A̱ ntá jahará tí ósé la jehya chjasén Dios, a̱ ntá jie la tsíkꞌónará chjasén chꞌán. Tí ósé la Dios kꞌuéki̱konóa̱hyará. A̱ ntá jie la kui̱konóa̱hará Dios. 
\s1 Chrókꞌuejóni chꞌeheni xra̱ Dios 
\p  
\v 11 Kíchóni, xrja̱nóa̱hará tí jahará kíxin éxí chojni tsíkji̱xi̱n ókjé chrókꞌuejorá ntihi chjasintajni chrókjuánjonhyará kjuachaxin chrókóxrjínhi̱n a̱sánrá tí nkehe siín chjasintajni, mé tí nkehe tjanjo̱nko a̱sánrá.  
\v 12 Jína chrókꞌuejorá tí siín tí sín chónhya Dios kíxin kjónté tꞌántaxínhanrá sín éxí chojni jínahya chónta jie̱ tí jahará, ichro sín, la ntá tí chrókꞌuikon sín kíxin jína tjejochꞌerá xra̱ ntá tsjanchehe sín Dios kjuasáya tsjixraká tí ya̱on tsjanchia chꞌán nkehe tí xra̱ kjui̱chꞌerá. 
\p  
\v 13 Jahará tinkachónkirá Ìnchéni chrókjui̱nchexiteyéhérá kaín tí sín tꞌe̱to̱an kuènte chjasintajni, á tí chꞌín rey kíxin imá tꞌe̱to̱an chꞌán,  
\v 14 o̱ á tí chꞌín gobernador ichrꞌán Dios kíxin sinchekjasóte chꞌán tí sín tjasin jie̱, a̱ ntá tsjikosáyehe chꞌán tí sín chꞌe tí nkehe jína.  
\v 15 Dios tjinkaon kíxin jína chrókꞌuejorá kíxin tí sín noehya la ko tí sín lo̱nti̱ la kohya jie̱ tsꞌekará sín tí jahará. 
\p  
\v 16 Chrókꞌuejorá éxí chojni tꞌítuenhya, a̱ ntá tí kjuachaxin chontará jehya kíxin chróchontaxínrá kjuachaxin kíxin chrókjui̱chꞌerá tí jínahya. Náhí. Chrókjuáko̱xi̱nrá éxí chojni chꞌehe Dios xra̱.  
\v 17 Chrókjuíkosáyehérá kaín chojni. Chrótjuèhérá tí sín kíchó ni, la ko chróchonteherá Dios kjuasáya, la ko chrókjuíkosáyehérá tí chꞌín gobierno tꞌe̱to̱an. 
\s1 Tóyóe̱xin éxí tí nkehe kjuasótexín Cristo 
\p  
\v 18 Jahará chojni chꞌexón xra̱, chrókjui̱nchexiteyéhérá tí lámo̱árá, chróchontehérá kjuasáyé sín, kjónté tí sín jína la o̱ tí sín jínahya.  
\v 19 Tíha mé ijnko nkehe jína chrókjuáko̱xi̱nrá kjónté chrókjuasótiaxínrá ijnko nkehe jínahya kíxin xi̱kaha mé chrókjui̱nchexiteyéhérá Dios.  
\v 20 A̱ ntá tí tjejochꞌerá ichrén nkehe jínahya, ntá nchekjasótiaxínrá sín la ¿nkehe tso̱nhen kíxin chrókóninkákonhyará? A̱ ntá tí chrókjuasótiaxínrá ijnko nkehe jína la ntá chrókjuachará chrókóninkákonhyará, la tíha mé tóxrjínhi̱n Dios.  
\v 21 Méxra̱ xi̱kaha kꞌuíya̱hárá Dios kíxin Cristo kjuasóteyákonhánrá. Tíha mé kjua̱ko̱xi̱n chꞌán kíxin mé xi̱kaha chrókjui̱chꞌerá.  
\v 22 Kíxin Cristo la ninkehó jie̱ kjuasinhya chꞌán la ko ninkexró kjuíchꞌiyehya chꞌán,  
\v 23 la ko ninkehó kjuáte̱ehya chꞌán tió kꞌuántaxínhi̱n sín chꞌán; a̱ ntá tió kjuínchekjasóte sín chꞌán la ninkehó kꞌókja̱nxi̱nhya chꞌán. Náhí. Jehe chꞌán kjuanchia chꞌán kíxin Dios tsꞌayakonhen tí jehe chꞌán kíxin Dios mé ntoá nchekito̱exín iji̱é chojni.  
\v 24 Cristo mé kuamá chꞌán tí iji̱éni kíxin tí cuérpo̱é chꞌán kjuákꞌenkáni ntacruz kíxin éxí tsíkꞌenni kꞌuékꞌejóni kíxin tí jie̱ kꞌuéchóntani, a̱ ntá jie chrókꞌuejóni jnkojína. Kíxin Cristo kjuasóte chꞌán, chrítꞌo̱ chꞌán kíxin jahará chrókuito̱axínrá jína.  
\v 25 A̱ ntá jahará kꞌuékꞌejorá éxí kolélo tsíkjichroe. A̱ ntá jie kꞌuitjará tí nkexro tsꞌayakonhen a̱sánrá. 
\c 3  
\s1 Nkexrí chrókꞌuejó tí sín tsíkóte̱he 
\p  
\v 1 Kja̱xin jahará chojni chjin ó tsíkóta̱hará chrókuítekákonhénrá tí xìyará, kíxin kja̱xin jnkojín tí sín titekakonhya itén Dios chrókuitekaon sín kíxin jína tjen tí tjachjin, kjónté tꞌichjánxi̱nhya chróchrónka tjan kíxin jína tjen tjan,  
\v 2 kíxin chrókꞌuikon sín xi̱kaha kíxin jína tjen tí tjachjin chónta kjuasáyé tjan.  
\v 3 Chrókjui̱nchehnkexinhyará nkehe náxrjón chróchontará la ko tí nkehe náxrjón chróchónta ka̱xi̱hará la ko nkehe náxrjón tsíkꞌóna chica oro la ko tí ikárá imá náxrjón.  
\v 4 Náhí. Chrókjui̱nchejínará a̱sánrá, kíxin tí nkehe náxrjón chrókꞌuitjáyanhya na mé tí a̱sén chojni tóji̱ehya la ko náxrjón. Tíha mé imá sínkí nkayakon Dios.  
\v 5 A̱ ntá tí ósé xi̱kaha kꞌuékjenka̱yáxin tí chojni chjin jína. Jehe sín mé kuinkáchónki sín Dios la ko kjuínchexiteyéhe̱ sín xìi sín.  
\v 6 Mé xi̱kaha kjuíchꞌe tjan Sara kjuínchexiteyéhe̱ tjan tí chꞌín Abraham, mé kja̱xin ntáchro tjan kíxin ìnché tjan tí jehe chꞌán. A̱ ntá tí jahará tí xje̱en tí jehe tjan la chrókjui̱nchexiteyárá jína la ko ninkehó kjuachrakon chróchontahyará. 
\p  
\v 7 Kja̱xin jahará chojni ntoará tsíkóta̱hará chróchontehérá ichjiánrá kjuasáya kíxin ó nohará kíxin kánhyó tse̱he̱ tjan la ko ó nohará kíxin yóírá tjáhará Dios tí kjuachón. Xi̱kaha chrókjui̱chꞌerá ntá tió chrónixje̱hérá Dios la kohya nkehe chrókꞌuinkákonhe̱n. 
\s1 Tí sín tjasótexín sín kíxin jína kjuíchꞌe sín 
\p  
\v 8 Méxra̱, jnkoko̱á chrókjuenka̱yáxinrá kaín rá chrókui̱konóe̱hérá kíchuárá, chrótjuèhérá kíchuárá. Jnkojína chrónixje̱hérá kíchuárá la chrókjui̱nchehnkehyará a̱sánrá.  
\v 9 Tí ichrén nkehe jínahya chrókjuitꞌahará sín la jahará la xi̱kahya chrókjui̱chꞌehérá sín. Tí chrókꞌuántaxínhanrá sín la jahará chrókꞌuantaxíenhyará sín. Náhí. Íchá jína chrókjuancheherá Dios kíxin chrókjuincheyaon chꞌán sín kíxin Dios la kꞌuíya̱hárá chꞌán kíxin chrókꞌuayéhérá kjuachaxin kuènte chꞌán.  
\v 10 Kíxin: 
\q1 Tí nkexro tjinkaon tsotjuèhe a̱sén kíxin jína chrókjuakꞌe kaín ya̱on 
\q1 la chrónixjahya chꞌán ninkehó nkehe jínahya 
\q1 la ko ninkehó kjuachꞌia chrókꞌuaxrjexínhya irꞌva chꞌán. 
\q1  
\v 11 Tí nkexro la chrókuíto̱he tí nkehe jínahya la íchá jína chrókjuichꞌe tí nkehe jína, 
\q1 la ko íchá jína chrókjueyá chꞌán kjuaxróxin chrókjuakꞌe chꞌán. 
\q1  
\v 12 Kíxin Ìnchéni tꞌayakonhen tí nkexro jína 
\q1 la ko tinhin chꞌán tí nixje̱he̱ sín chꞌán, 
\q1 a̱ ntá tí sín chꞌe tí jínahya la tjinki̱tsahya chꞌán.\f + \fr 3:12 \ft 3.10–12 Salmo 34.12–16\f* 
\p  
\v 13 ¿Xá nkexro chrókjuitꞌahará nkehe jínahya tí jahará tjejochꞌerá nkehe jína?  
\v 14 Kjónté chrókjuasótexínrá tí nkehe jína tjejochꞌerá kjónté la chrókócháhará chróchrakuenhyará ninkexró la ko chróchrakonhyará.  
\v 15 Náhí. Íchá jína chrókjuíkosáyehérá Cristo nkaya a̱sánrá kíxin Ìnchárá. Chrókꞌuejorá listo chrókjuáte̱herá tí nkehe chrókjuanchankíhará kaín chojni kíxin nkexrí tinkachónkirá Ìnchéni, la chrókjui̱nchehnkehyará la kjuasáya chrókjuáte̱herá.  
\v 16 Chróchontará ijnko kjuaxrexinkaon jína kíxin ntá tí sín xrichꞌia sín tꞌántaxínhanrá sín kjónté jína tjejorá tinkachónkirá Cristo la mé chrókósuèhe̱ sín kíxin tí nkehe ntáchro sín la ntoáhya.  
\v 17 Íchá jína chrókjuasótiaxínrá kíxin tí jína tjejochꞌerá tí xi̱kaha tjinkaon Dios, a̱ ntá chrókósuàhará chrókjuasótiaxínrá tí ichrén jie̱ chrókjui̱chꞌerá. 
\p  
\v 18 Kíxin Cristo kjuasóte chꞌán la ko kꞌuénxin chꞌán tí jie̱ kuènteni, ónaá kꞌuén chꞌán kixin para jnkochríxín. Jehe chꞌán la jína chꞌán la kjuasóteyákonhe̱nni chꞌán kjónté jínahyani, kíxin ntá jína sáchrókjui̱koni chꞌán tí tjen Dios. A̱ ntá ikꞌuén chꞌán éxí chojni, a̱ ntá Ncha̱kuen chꞌán la kꞌuénhya mé xechón ínaá,  
\v 19 kíxin tí Ncha̱kuen chꞌán sákjuíkja̱ko̱he̱ tí ncha̱kuen tí sín tsíkꞌen tjejóchjina.  
\v 20 Tí sín a mé kuítekakonhya sín tí ósé tió kjuákꞌe chꞌín Noé na mé Dios la kónínkakonhya chꞌán kjuákꞌechónhen chꞌán nachrohe sítꞌóna tí arca, na mé ijníko̱á chojni kuítekaon sín mé kuaá sín tí kui̱te̱e sín nta̱.  
\v 21 Tí nta̱ a mé tóyóhe̱ tí tikitexín chojni ijie kíxin tí xi̱kaha tso̱nhenni la tsaáxinni ijie. A̱ ntá tí tikite chojni la jehya kíxin tso̱tjuáxin tí cuerpo. Náhí. Tsjancheheni Dios kíxin sinchetjóá chꞌán tí tjenka̱yáxinni. A̱ ntá tí nkehe tsaáxinni la mé tí xechón Ìnchéni Jesucristo,  
\v 22 mé tí nkexro sátsíkji̱ nkaya nka̱jní itjen chꞌán itja chjina Dios. A̱ ntá jehe chꞌán la mé tꞌe̱tue̱nhen tí sín ángel la ko tí sín tꞌe̱to̱an. 
\c 4  
\s1 Chrókjuichꞌeheni Dios xra̱ éxí tí kjuachaxin kjuanjon chꞌán 
\p  
\v 1 Méxra̱ éxí Cristo kjuasóte tí cuérpo̱é chꞌán ntá kja̱xinrá kjónté xi̱kaha chrókjuasóterá chrókóxakuanhyará kíxin tí nkexro kjuasóte tí cuérpo̱é la ó kuíto̱he tí jie̱.  
\v 2 A̱ ntá tí na̱xa̱ chrókꞌuejochónrá intsí la chrókꞌuejorá éxí tóxrjínhi̱n Dios. Jehya éxí kꞌuékóxrjínhanrá.  
\v 3 A̱ ntá tí ósé nchónhya nkehe kꞌuékji̱chꞌerá éxí chꞌe tí sín na̱xa̱ chónhya Dios. Kꞌuékꞌejorá kꞌuékjenka̱yáxinrá tí nkehe jínahya la ko kꞌuékjásinrá jie̱ kꞌuéchontará ókjé chojni chjin la ko kꞌuékókoanrá la kꞌuekjásinrá kia ntá ntiha kjuánjo̱nxi̱n chojni la ko kꞌuékinkachónkirá tí nkehe tsíkjano̱ya.  
\v 4 A̱ ntá ijie la jahará tꞌitohyará tí sín a kíxin tí jínahya chꞌe sín. Méxra̱ xi̱kaha tꞌántaxínhanrá sín.  
\v 5 A̱ ntá tí jehe sín tsjanjon sín kuentá tsochénka sín tí nkexro tjechónhen sinchekito̱exín iji̱é tí sín tjejóchón la ko tí sín tsíkꞌen.  
\v 6 Méxra̱ kjónté tí sín tsíkꞌen tsíxráko̱he̱ sín tí itén Dios kíxin tí ncha̱kuen sín chrókꞌuejó éxí tjinkaon Dios kjónté na̱xa̱ kꞌuéjó sín ntihi chjasintajni la kuíto̱exín tí iji̱é sín éxí tsito̱exín iji̱é kaín chojni. 
\p  
\v 7 Ó kuichjina tsjeje̱ chjasintajni a̱ ntá xi̱kaha chrókꞌuejorá jnkojína la ko chrókꞌuejotsjehérá chrónixje̱hérá Dios.  
\v 8 Tí nkehe imá tjetoan kíxin a̱ntsí chrótjuèhérá kíchuárá. A̱ ntá tí tjuèhérá kíchuárá la mé tíha chrókꞌuitjáyanxín tí nchónhya jie̱ chonteherá kíchuárá.  
\v 9 Chrókjuánjonrá kjuachaxin chrókuito̱he jnkojín kíchuárá nto̱ará chrókóninkákuénhyará nijnko tí jehe sín.  
\v 10 Jnkojnkorá nkehe tí xra̱ tjáhará Dios kꞌuayéhérá chrókjuínki̱tsará kíchuárá. Xi̱kaha jína chrókjuáko̱xi̱nrá tí kjuasáyé chꞌán tjáhará chꞌán kíxin nchónhya xra̱ kꞌuayéhérá.  
\v 11 Tí jnkojínrá tjinkáonrá chrónixjará ichrén nkehe la chrónixjará éxí nixja itén Dios. Ti jnkojínrá tjinkáonrá chrókjuínki̱tsará la chrókjuáko̱xi̱nrá tí kjuachaxin tjáhará Dios. Kaín tí xra̱ chrókjui̱chꞌerá chrókjuanchehérá Dios kjuasáya kíxin kjuasáyé Jesucristo tinkachónkirá tí jehe chꞌán. Kíxin jehe chꞌán la kaín tí kjuachaxin siín la kuènte chꞌán jnkochríxín. Mé xi̱kaha chaxín. Amén. 
\s1 Íchá jína chrókjuasótexínni kíxin tí tinkáchónkini Cristo 
\p  
\v 12 Kíchóni, chrókóxakuanhyará kjónté ichrén nkehe jínahya chrókónhanrá. Ó jehí tꞌichjánxi̱n xi̱kaha tso̱nhanrá. Chróntáchrohyará kíxin ókjé nkehe tjasótiaxínrá.  
\v 13 Náhí. Íchá jína chrókócháhará kíxin xi̱kaha chrókjuasóterá éxí kjuasótexín Cristo, kíxin kja̱xinrá tso̱cháhará imá tió tsꞌikonrá tí kjuachaxin tsi̱ka̱o Ìnchéni tí itsi chꞌán.  
\v 14 Chrokócháhará tí tꞌántaxínhanrá sín kíxin tinkachónkirá Cristo kíxin tí Ncha̱kuen Dios chónta kjuachaxin tꞌayakonhanrá. Jehe sín tꞌántaxínhi̱n sín chꞌan, a̱ ntá jahará tjíkosáyehérá chꞌán.  
\v 15 A̱ ntá tí jnkojínrá tjejotjasóterá chrókójehya kíxin ichrén nkehe chrókjui̱chꞌerá chrókjuàya̱rá o̱ chrókue̱erá o̱ ichrén nkehe jínahya chrókjui̱chꞌerá o̱ chrókjia̱térá kjuanínkaon kuènte ókjé chojni.  
\v 16 Náhí. A̱ ntá jnkojínrá chrókjuasótiaxínrá kíxin tinkachónkirá Cristo la chrókósuàhyará. Náhí. Chrókjuanchehérá Dios kjuasáya kíxin xi̱kaha kónhanrá. 
\p  
\v 17 Ntá jie ó kui tí tsito̱exín iji̱é chojni mé xrankíxixín tí sín tsíkꞌóna xje̱en Dios. A̱ ntá tí xi̱kaha tsito̱exín iji̱é tí jeheni xrankíxixín, a̱ ntá íchá tí ó tsjixixín tí sín titekakonhya tí itén Dios.  
\v 18 Íchá tí sín jína la ko xi̱kaha tso̱nhen sín ntá tsaá sín a̱ ntá íchá tí sín jínahya chónta jie̱ kjá a̱ntsí tsjasóte sín.\f + \fr 4:18 \ft Proverbios 11.31\f* 
\v 19 A̱ ntá tí nkexro tjasóte éxí tjinkaon Dios la kjónté xi̱kaha la na̱xa̱ chrókjuichꞌe sín nkehe jína la ko chrókjuanjon sín a̱sén sín chrókꞌuayakonhen Dios mé tí nkexro kjuíchꞌéna sín la mé jehe chꞌán xráxín jína chꞌán. 
\c 5  
\s1 Tí kꞌuítuenhen tí sín tꞌe̱to̱an kuènte ni̱nko 
\p  
\v 1 Tjínka̱van tétua̱nha̱n tí chojni tꞌe̱to̱an kuènte tí ni̱nko tjejorá ntiha kíxin kja̱xin janhan této̱an kuènte ni̱nko éxí tí jehe sín, a̱ ntá janhan mé kꞌuíkua̱n kíxin nkexrí kjuasóte Cristo, la ko kja̱xin janhan mé tsochonta kjuachaxin kuènte Dios éxí tsochónta tí jehe sín tió itsi Ìnchéni chrꞌéxi̱n.  
\v 2 Jahará chrókꞌuayakonhénrá tí kolélo kuènte Dios ntiha kíxin xi̱kaha tí xra̱ kꞌuayéhérá. Jnkojína chrókjuínki̱tsará sín éxí tjinkaon Dios la jehya kíxin ijnko chojni chrókꞌue̱tua̱nhanrá chrókjui̱chꞌerá xra̱, la ko kja̱xin jehya kíxin imá chrókóxrjínhanrá chichaon. Náhí. Kaín a̱sánrá chrókjui̱chꞌerá xra̱ jína.  
\v 3 Jehya jahará kuèntará tí jehe sín kíxin chji̱ni chrókuétue̱nhénrá sín. Náhí. Jnkojína chrókjuákoéxínrá tí jehe sín.  
\v 4 A̱ ntá tió tsi tí Pastor chaxín tꞌe̱to̱an ntá jahará tsꞌayéhérá ijnko corona náxrjón tsjehe̱hya. 
\p  
\v 5 Kja̱xin jahará ntasoárá chrókjui̱nchexiteyéhérá tí sín tꞌe̱to̱an kuènte ni̱nko. Kaínrá chrókjui̱nchexiteyéhérá kíchuárá chrókjui̱nchehnkehyará kíxin: 
\q1 Dios la tso̱nínkakonhen tí sín nchehnke, 
\q1 a̱ ntá tí sín nchehnkehya mé tsjinki̱tsa chꞌán.\f + \fr 5:5 \ft Proverbios 3.34\f* 
\p  
\v 6 Méxra̱ chrókjui̱nchehnkehyará, chrókjui̱nchexiteyéhérá Dios kíxin jehe chꞌán imá tsꞌe̱to̱an chꞌán kíxin tsjixraká tí ya̱on mé jehe chꞌán tsotjáhará chꞌán kjuachaxin kíxin tséto̱anrá.  
\v 7 Chróchje̱hérá Dios kaín tí kjuaxrexinkaon chontará kíxin kja̱xin jehe chꞌán tóxakonhen chꞌán tí jahará. 
\p  
\v 8 Chrókóxakonhanrá jína chrókꞌuejorá. A̱ ntá ijie ixri tí nkexro nínkakonhanrá mé tí chꞌín Tsochren éxí ijnko koxra̱ tsjánka va xritjeyá va nkehe sine va.  
\v 9 Tjánjonhyará kjuachaxin kíxin jehe chꞌán chrókjuacha chꞌán chrókjuachroerá chꞌán, kíxin ó nohará kíxin kaín tí sín kíchuárá nkuíxín chjasintajni xi̱kaha tjejótjasóte sín kíxin tinkáchónki sín Ìnchéni.  
\v 10 Kjánchó kánhyó sé tsjasótiará, a̱ ntá Dios a̱ntsí tsjinki̱tsará chꞌán kíxin tsjachará tsꞌejorá jína. A̱ ntá jehe Dios a mé tjuahará chꞌán la kꞌuíya̱hará chꞌán kíxin tsꞌejokoará chꞌán jnkoko̱á tí tjen Jesucristo chónta kjuachaxin jnkochríxín.  
\v 11 Jehe chꞌán tsjancheheni chꞌán kjuasáya kíxin chónta chꞌán kjuachaxín tsꞌe̱to̱an chꞌán jnkochríxín. Amén. 
\s1 Kjuixixín nixja chꞌín Pedro 
\p  
\v 12 Chꞌín Silvano mé tꞌíkua̱n ijnko kíchó ni jína mé kjuínki̱tsa ikjinni tí xroon kjónté kánhyó tsjé nixja, la nta̱xraxinkáonrá kíxin kjuíntayaonrá Dios ntá xi̱kaha kjua̱ko̱xi̱n chꞌán kíxin chaxín tjuahará chꞌán. Méxra̱ xi̱kaha jína chrókꞌuejorá kíxin tjuahará chꞌán. 
\p  
\v 13 Tí ni̱nko tjen Babilonia mé tsíkjeyá Dios éxí tsíkjeyá chꞌán tí jahará nixjahará sín la ko kja̱xin nixjahará chꞌín Marcos, mé éxí xja̱nna tꞌíkua̱n tí jehe chꞌán. 
\p  
\v 14 Nixje̱hérá kíchuárá jnkojína. Kjuaxróxin chrókꞌuejorá tinkachónkirá Jesucristo. Amén.