\id 1TH - PMA Paama Language 
\h 1 Tesalonaeka 
\toc1 1 Tesalonaeka 
\toc2 1Tes 
\mt2 Selusien koa helamu ten  
\mt1 1 Tesalonaeka  
\is1 ?Isei mutis selusien koanik?  
\ip Pol, koa vi eiloheh tai onen Iesu Kristo mutis leta koanik\x + \xo 1:0 \xt 1Tes 1:1; 2:18\x* en sua 51 AD (sua keil koa katau en avong Iesu avasi), navong ro mulamu en taon ten out Korin\x + \xo 1:0 \xt 1Tes 3:1-2; Umen 18:1-18\x* en ualien onen koa elu keke vahitehiten more longlongien usil Iesu Kristo min meatin keil.\x + \xo 1:0 \xt Umen 15:36–18:22\x* Amundemi avit Pol mutis leta koanek mulamu en leta sav vasi keil onen.  
\is1 ?Isei vuli selusien koanik mulamu?  
\ip Pol mutis selusien koanik va min Kristin keil koa amul en taon ten out Tesalonaeka. En ualien onen koa elu, Pol va en taon ten out Pilipae ka vitehiten more longlongien usil Iesu Kristo min meatin keil ekonek. Ka tei en meatin keil amumoni keih mini ka alingi en eim takeih. Navong mul en eim takeih enek, alu mulu. Ka navong amaeni vaha vamaluv,\x + \xo 1:0 \xt Umen 16:16-40\x* aring koe keke natotei mun en out Pilipae. Sakini, Pol keilu Saelas luva en meteimal ten out Tesalonaeka.\x + \xo 1:0 \xt Umen 17:1-4\x* Ka ekonek, tei en Siu keil avi elu en Pol, sakini aviles rendemien onen meatin keil keke avalikat Pol vaha ran out Tesalonaeka.\x + \xo 1:0 \xt Umen 17:5-11\x*  
\ip Navong Pol rokol taon ten out Korin, ro ral min Kristin keil ekonek avati teindan outel (18).\x + \xo 1:0 \xt Umen 18:11\x* Ka navong mul mum en out Korin, Pol longe keke demkatien onen tei en Kristin hau keil en out Tesalonaeka mul mot, sakini mutis leta koanek va min keil vahati lat ris rendemien one ka vasuv kat demkatien one.  
\is1 ?Pol mutis selusien koanik vensa?  
\im \bd Pol en vati vatalimal en rendemien one keke mal Kristin keil avahisu en avong keil takeih\bd* – Kristin keil en out Tesalonaeka avisu en avong keil takeih en hen me-Tesalonaeka sav keil etin.\x + \xo 1:0 \xt 1Tes 2:14\x* Ka Pol viteni min keil keke mal Kristin keil ihisu en avong keil takeih ven demkatien one.\x + \xo 1:0 \xt 1Tes 2:14-16\x*  
\ib  
\im \bd Pol en vati vatalimal en rendemien one usil umen onen\bd* – Tei en Kristin keil en out Tesalonaeka aselus karen Pol avit kei mul luvos keil keke vakur tounah ran keil.\x + \xo 1:0 \xt 1Tes 2:3\x* Ka Pol viteni min keil keke sa maen hihiseien keil onen min keil ka rovistei keil ven mani.\x + \xo 1:0 \xt 1Tes 2:4-12\x*  
\ib  
\im \bd Pol en vati vatalimal en rendemien one usil mearisien onen Kristin keil ran matien ka mukave Iesu hemai ris eni\bd* – Kristin keil en out Tesalonaeka amundemi keke Iesu hemai hekalah. Ka navong tei en keil umat, amundemko.\x + \xo 1:0 \xt 1Tes 4:13\x* Ka Pol vati lat rendemien one vit anatin keke Iesu hemai ris, ka navong hemai, koakeil umat tuai imoul eris ran matien en hati avong koa koakeil amoul veah ihina en out nesa.\x + \xo 1:0 \xt 1Tes 4:14-18\x* Sakini, Pol sel kat keil avasak mesein keil veni.\x + \xo 1:0 \xt 1Tes 5:1-22\x*  
\is1 Mari rendemien tai ten selusien koanik mul en 1 Tesalonaeka 3:12-13  
\ipq Metvisi keke Asuv Iesu hesakin envatien onami hemoul hemarite mok ka hemai hemariso hesuval vati envatien onomaitel ven kami keke emi hehathat kami eris ka emi hehat meatin sav vasi keil emun. Ka metvisi mun keke hesakin rendemien onami hekeih imok keke mihehi votut ka mihetolas en meten Ahi Tamer navong Iesu, Asuv orer, hemai hetal min meatin keil onen koa avi votut.  
\is1 Mari rendemien tamun ten selusien koanik mul en 1 Tesalonaeka 4:14  
\ipq Ir rokilea keke Iesu mat ka moul eris ran matien. Sakini, rokur anatin keke navong Iesu hemai ris eni, Ahi hesakin koakeil umat tuai koa aling desien one eni, keil emun imoul eris hetal mini.  
\is1 ?Asa mul en selusien koanik?  
\io1 1. Pol masmas Ahi ven demkatien onen Kristin keil en out Tesalonaeka. (1:1-10)  
\io1 2. Pol vit usil umen onen ral min keil ka mukave mul vati lat keil en hisien onen lisenges. (2:1–3:13)  
\io1 3. Pol sel kat keil usil vati moulien koa Ahi si veni. (4:1-12)  
\io1 4. Pol vit kilea min keil usil hemukave Iesu hemai ris eni. (4:13–5:11)  
\io1 5. Selusien ekor. (5:12-28)  
\c 1  
\s1 Hitkileaen onen Pol usil leta koanik  
\p
\v 1 Inau, Pol, ral min Saelas\f + \fr 1:1 \ft Saelas, isen tamun vi Silvanus.\f* ka Timoti, metmutis leta ekek vat ven kami, meatin keil koa avi onen Ahi Tata ka Asuv Iesu Kristo koa mimul en sios ten out Tesalonaeka. Metvisi keke more envatien ka tomat onen Ahi hel en moulien onami. \x + \xo 1:1 \xt 2Tes 1:1; Umen 17:1\x*   
\s1 Pol masmas Ahi ven more moulien ka demkatien onen Kristin keil en out Tesalonaeka  
\p
\v 2 Lises metmasmas Ahi ven kami vasi ka lises metling kami en hisien onomaitel. \x + \xo 1:2 \xt Plp 1:3-4; Kol 1:3; 2Tes 1:11\x*  
\v 3 Navong metvis min Ahi Tamer en usite onami, metmundem kat tounah keitel ekek: mukave demkatien onami mul sakin kami mimum keih, mukave envatien onami mul sakin kami mikataun meatin sav keil, ka mukave desien onami en amairisien onen Asuv Iesu Kristo mul sakin kami mimulomal keih navong sakvisien keil mul umai. \x + \xo 1:3 \xt 1Kor 13:13; Kol 1:4-5\x*  
\v 4 Tuemeitel ka ahinameitel keil, metkilea keke Ahi en vat kami ka rie lat kami tuai mivahi onen.  
\v 5 Metkilea keke Ahi rie lat kami veni navong metkur more longlongien vat ven kami, romaiteis en selusien enges. Vuo, mai mun ral min keihoen onen \w Ninin Votut\w* ka mikilea revi anatinien teni navong metselus min kami. Kami milei kilea sakien ten moulien onomaitel navong metro ral min kami keke metvakataun kami. \x + \xo 1:5 \xt 1Kor 2:4-5; 4:20\x*  
\v 6 Ka kami mileisungein sakien keil onomaitel ka sakien keil onen Asuv Iesu keke navong mahien mai en kami ven demkatien onami, mikur selusien onen Ahi ral min sien koa Ninin Votut sani min kami. \x + \xo 1:6 \xt 1Kor 4:16; 2Tes 3:9; Umen 17:5-9\x*  
\v 7 En sakien koanek, kami mimai mivi metai min Kristin vasi keil koa amul en provins keilu ten out Masedonia ka Akea keke akilea avaleisungein sakien onami. \x + \xo 1:7 \xt 1Pit 5:3\x*  
\v 8 Kami mivitehiten selusien usil Asuv Iesu min meatin sav keil koa akuri uva rokol meatin keil en provins keilu ekek, ka muli va en out savsav keil emun. Anatin, longlongien usil demkatien onami musel suval amaru keke meatin sav keil koa aro soutin amul araengoni. Sakini, tounah tovuol keke komeitel metvahiteni mun usil demkatien onami veni meatin keil akilea tuai eni. \x + \xo 1:8 \xt Rom 1:8\x*  
\v 9 Anatin, meatin vasi keil koa aro soutin ran kami en out keil ekek amul aselus usil mukave kami mikur revi komeitel navong metsao en kami. Avit usil mukave miviles ran nana keil keke miva netan min Ahi, kei koa moul ka vi anatin. \x + \xo 1:9 \xt Umen 17:4\x*  
\v 10 Keil avit usil mukave mimul mirosin Natnali vaka en out nesa koa Ahi rali lati ran matien. Anatin, avit usil mukave mirosin Iesu koa heting koe ir ran mahien koa hemai ven vurohien onen Ahi va kat tisaen keil.\x + \xo 1:10 \xt Taet 2:13; Umen 17:31; 1Tes 5:9\x*   
\c 2  
\s1 Pol masmas Ahi veni me-Tesalonaeka keil amul arie lati keke demkatien one vi anatin  
\p
\v 1 Tuemeitel ka ahinameitel keil, kami mikilea keke navong metvat ven kami, rovitei heisav. Vuo, heite teni mul. \x + \xo 2:1 \xt 1Tes 1:5,9\x*  
\v 2 Mikilea keke navong metmai ven kami en out Tesalonaeka, metka en taon ten out Pilipae. Ekonek, amumoni tisa min komeitel ka aselus kutut kat komeitel. Ka navong metmai ven kami, avaseini meatin sav keil avit avapurun komeitel, Ahi orer san keihoen min komeitel keke metvahiteni min kami more longlongien koa ka ven kei. \x + \xo 2:2 \xt Umen 16:19-24; 17:1-5\x*  
\v 3 Navong metpeah kami keke mihehiles moulien onami, selusien onomaitel kur heite, veni rokatei en rendemien koa romaltei vuo en sakien tai koa kalkali. Anatin, metroselustei keke metvaluvos etai meatin.  
\v 4 Vuo, lises metselus suval koa Ahi en vat komeitel metvaselus eni, veni kei ling desien onen en komeitel keke metkilea metvahiten more longlongien onen vaha min meatin keil. Sakini, navong metselus, metromumontei keke meatin keil avahasi keil ven komeitel. Vuo, metmumoni keke Ahi enges koa kilea en rendemien ka envatien vasi keil orer hesi kei veni. \x + \xo 2:4 \xt 1Tim 1:11; Kal 1:10; Ser 11:20\x*  
\v 5 Mikilea revi keke navong metmai ven kami, metromaitei vatal min selusien koa kas valeh kami, vuo keke metvakur etai mani ran kami vatal selusien onomaitel. Ahi koa kilea en rendemien keil orer kilea keke asa koa metviteni vi anatin. \x + \xo 2:5 \xt Umen 20:33; 2Pit 2:3; 1Tes 2:10\x*  
\v 6 Metromaitei keke kami vuo meatin sav keil koa mivi meatin enges mivamasmas komeitel. \x + \xo 2:6 \xt Sion 5:41,44\x*  
\v 7 Avaseini komeitel metvi hetetamen keil onen Iesu Kristo koa avise komeitel en \w eiloheh\w*, ka metkilea metvameng kat kami keke mivahouhou min komeitel ka mivasan tounah min komeitel, metromumontei vamukonek. Vuo, navong metro ral min kami, sakien onomaitel memerau enges suval mama tai koa mul lei kat revi titan keil.  
\v 8 Ven envatien onomaitel en kami, metsi komeitel keke metvasan more longlongien koa ka ven Ahi min kami, ka metsi komeitel emun keke metvakataun kami en sise vasi koa metkilea metvoumoni. !Anatin, emeitel vat kami mok!  
\v 9 Tuemeitel ka ahinameitel keil, mihendem usil sakien onomaitel navong metro ral min kami, mukave metmum keih ka avetin onomaitel mue houlu. Meneai ka vongien, metmum keih en umen sav keil keke metvahotin uite teni keke methersantei umen koa meas min kami navong metviten more longlongien koa ka ven Ahi min kami. \x + \xo 2:9 \xt Umen 20:34; 1Kor 4:12\x*   
\p
\v 10 Navong metro ral min kami koa mikur anatin en Iesu, milei kilea keke sakien onomaitel muto, mal revi, ka tounah tovuol avahotini vatisa en sakien onomaitel. Ka Ahi emun, koa kilea en tounah vasi, lei kilea eni.  
\v 11 Kami mikilea keke komeitel metmumoni tahos min tetai en kami suval etin tata tai mul lei kat revi titan keil.  
\v 12 Anatin, komeitel metsel kat kami, metkataun kami keil koa mivotini keih, ka metpeah kami mivoual en sakien keil koa Ahi si kei veni. Metvis kami keke mihoumon sakien keil en moulien onami koa hetie lati keke mivinvin mivahi meatin keil onen. Veni Ahi vise kami mivahi meatin keil onen keke mivapil en hiasuvien ka hetetamenien onen. \x + \xo 2:12 \xt Efes 4:1; Plp 1:27; 2Tes 1:5; 1Pit 5:10\x*   
\p
\v 13 Lises metmasmas Ahi ven tounah tamun navong metling kami en hisien onomai. Navong metkur selusien onen Ahi emai ven kami, miraengoni ka mikur kati mul en kami. Mirkurtei vasuval selusien onen meatin keil enges. Vuo. Kami mikur kati suval vi selusien onen Ahi kati. Anatin, kei vi selusien onen ka mul mum en kami vasi koa mikur anatin eni. \x + \xo 2:13 \xt 1Tes 1:2; 2Tes 2:13; Kal 1:11-12\x*  
\v 14 Tuemeitel ka ahinameitel keil, asa koa kistal en kami suval etin asa koa kistal en meatin keil onen Iesu Kristo koa amul en sios keil onen Ahi en provins ten out Sudea. Veni kami mun mikur anatin en selusien onen Ahi, ka sakini, me-Gris keil koa avi tuomi keil asan mahien min kami suval koa Siu keil en provins ten out Sudea akuri en hen Siu keil, koa avi tue keil. \x + \xo 2:14 \xt Umen 17:5\x*  
\v 15 Ka Siu keil enek avi koakeil amu vini \w provet\w* keil telamu, amu vini Asuv Iesu, ka alikat rasilin komai ran out vasi. Ven sakien one, amul aleh mahien ten vurohien onen Ahi emai en keil. Uvae kat meatin vasi, \x + \xo 2:15 \xt Umen 2:23; 7:52\x*  
\v 16 ka asak visi mok avating koe komai mevarselustei min koakeil arvitei Siu usil mukave Ahi voutut keil ran \w tisaen\w* one. En sise enek, keil asien tisaen keil one va vio … Ahi lesi vinvin tuai. Sakini, mahien ten vurohien onen mul mita en keil. \x + \xo 2:16 \xt Sen 15:16; Mat 23:32-33\x*   
\s1 Pol en vati vasao en me-Tesalonaeka keil avong tamun  
\p
\v 17 Tuemeitel ka ahinameitel keil, navong meatin keil akeih kat komeitel, metlokovein kami ten avong havivis suval mivi timaru keil. Ka emeitel vati mok keke metvahat metvalei ris kami. Ka avaseini avemeitel mul soutin ran kami, rendemien onomaitel mul ral min kami lises. \x + \xo 2:17 \xt 1Tes 3:10\x*  
\v 18 Anatin, emeitel vati metvamai ris ven kami ka \w Temat|lemma="Setan"\w* ring koe sise onomaitel. Inau, Pol, nasak visi maha ris ven kami avong houlu.  
\v 19 ?Metvit metvales kami eris vensa? Veni metvilelau en sien ven kami veni mivi heite ten umen onomaitel. Ka veni metmundesini keke metheilea methehati kerein komeitel ven kami en meten Iesu Kristo navong hemai ris. \x + \xo 2:19 \xt Plp 2:16; 4:1; 2Tes 1:4\x*  
\v 20 !Anatin eli, demkatien onami mul sakin komeitel metvut komeitel ka metsi komeitel houlu mok!   
\c 3  
\p
\v 1 Veni metrolestei kami tuetin ka demvoen houlu en kami, komal Saelas koa melmul en out Atens metmundemi tahos \x + \xo 3:1 \xt Umen 17:15\x*  
\v 2 keke melsila Timoti vat ven kami vakataun kami ka vasakin demkatien onami vakeih tamun. Kei vi tuomal koa mum vituai ral min komal en umen onen Ahi keke metmul metvitehiten more longlongien usil Iesu Kristo min meatin keil. \x + \xo 3:2 \xt Umen 16:1-3\x*  
\v 3 Kei va ven kami vasakini tovuol en kami vahiles eris ran demkatien onen ven mahien keil ekek koa mimul mikuri. Anatin, kami mikilea keke Ahi ling kati keke rehekur mahien keil en moulien orer. \x + \xo 3:3 \xt Efes 3:13; 2Tim 3:12\x*  
\v 4 Veni navong metro semau ral min kami, metviteni min kami keke ir rehekur mahien. Ka suval kami mikilea revi tuai, tounah koa kur out musil asa koa metviteni. \x + \xo 3:4 \xt Umen 14:22\x*  
\v 5 Navong nakur longlongien keke sakvisien keil emai en kami, tinok mah. Sakini, nasila Timoti vahotini keke demkatien onami mukave. !Nametauni keke Temat nalamun kami minaha ran sise koa mal ka nasakin umen vasi keil onomaitel nahi heisav enges! \x + \xo 3:5 \xt Plp 2:16\x*   
\s1 Pol si kei houlu mok ven longlongien usil more sakien keil onen me-Tesalonaeka keil  
\p
\v 6 Kosa, Timoti mai ris. Ka kei kur more longlongien mai ven komal usil demkatien ka envatien onami. Kei viteni min komal keke, lises, kami mirendem tahos en komeitel, ka emi vati mivales komai suval etin koa komeitel emeitel vati mok metvales kami. \x + \xo 3:6 \xt Umen 18:5\x*  
\v 7 Sakini, tuemeitel ka ahinameitel keil, avaseini metmul metkur mahien ka sakvisien keil houlu, longlongien enek usil demkatien onami vati lat rendemien onomaitel houlu. \x + \xo 3:7 \xt 2Tes 1:4\x*  
\v 8 Anatin, navong metlonge keke mimulomal keih veah en demkatien onami en Asuv Iesu, moulien onomaitel mai ris tahos.  
\v 9 Metsakras metvamasmas Ahi vavinvin ven sien koa mariso mok koa metkuri ven kami navong metva netan mini en hisien keil onomaitel.  
\v 10 Meneai ka vongien metvis Ahi keih keke vamaen komeitel metvales ris veinami ka metvasan hihiseien sav keil koa mirkurtei veah vakataun demkatien onami.   
\p
\v 11 Metvisi keke Ahi Tamer ka Iesu, Asuv orer, luhesak mesein sise keke metvahat eris ven kami.  
\v 12 Metvisi keke Asuv Iesu hesakin envatien onami hemoul hemarite mok ka hemai hemariso hesuval vati envatien onomaitel ven kami keke emi hehathat kami eris ka emi hehat meatin sav vasi keil emun.  
\v 13 Ka metvisi mun keke hesakin rendemien onami hekeih imok keke mihehi votut ka mihetolas en meten Ahi Tamer navong Iesu, Asuv orer, hemai hetal min meatin keil onen.\x + \xo 3:13 \xt Plp 1:10; Sak 14:5; 2Tes 1:7,10\x*   
\c 4  
\s1 Pol sel kat keil usil vati moulien koa Ahi si veni  
\p
\v 1 Tuemeitel ka ahinameitel keil, navit mahit ekor en selusien onak. Komeitel metvisein kami tuai en sakien tetahos keil koa Ahi si mivousili, koa suval etin asa koa mimul mimumoni tuai. Ka kosa, metpeah kami li mok en isen Asuv Iesu keke mihoumoni hetahos tamun emau. \x + \xo 4:1 \xt 2Tes 3:6\x*  
\v 2 Mihelong kat hihiseien keil koa metsani veni mikilea keke metmul metselus en isen Asuv Iesu.   
\p
\v 3 Ahi en vati mok vasakin kami mivahi votut ka mihermatiltei hetal min koakeil mirtetalihetei veah vatal min keil. \x + \xo 4:3 \xt 1Tes 5:23; Hib 10:10; 1Pit 1:16\x*  
\v 4 Tetai en kami helei kat revi sakien keil koa kei mul mumoni ral min aven keke vatolas ka vasakin meatin keil avahouhou mini. \x + \xo 4:4 \xt 1Kor 6:13,15\x*  
\v 5 Namaentei envatien ten aven naleh rendemien onen keke noum natisa natal meatin sav nasuval koakeil arvitei Siu koa areingeingen Ahi amul amumoni. \x + \xo 4:5 \xt Sam 79:6; Ser 10:25\x*  
\v 6 Sakini, tovuol en kami houmoni hetisa min tunali vuo ahinali tai koa vi Kristin. Suval koa metviteni min kami tuai ka metsel kat kami eni keih, Asuv Iesu hesa kes mahien min koakeil umon vati saktisaen keil enek. \x + \xo 4:6 \xt Sam 94:1\x*  
\v 7 Veni Ahi rovisetei ir rovoumon saktisaen keil. Vuo, kei en vat ir rovahi votut ka rovoumon sakien keil koa muto. \x + \xo 4:7 \xt 2Tes 2:13-14; 1Pit 1:15-16\x*  
\v 8 Sakini, navong meatin etai sesein hihiseien keil enek, roseseintei meatin tai. Vuo, kei mul sesein Ahi varei koa san \w Ninin Votut\w* onen min kami. \x + \xo 4:8 \xt Luk 10:16; Esek 36:37; 37:14; Rom 5:5; 2Kor 1:22; Kal 4:6; 1Sion 3:24\x*   
\p
\v 9 Kami mikilea tuai en sakien koa emi hehathat tuomi ka ahinami keil veni Ahi visein kami eni tuai. Sakini, methermutistei mun usili hehat min kami. \x + \xo 4:9 \xt Sion 13:34; Ser 31:33-34\x*  
\v 10 Anatin eli, kami mimul mumoni tuai min tuomi ka ahinami keil vasi koa avi Kristin koa amul en provins keisom ten out Masedonia. Ka kami koa envatien onomaitel mul en kami, komeitel metpeah kami keke mihoumoni hekeih tamun. \x + \xo 4:10 \xt 2Tes 3:4\x*   
\p
\v 11 Metpeah kami keke miheling rendemien onami hekeih en sakien keitel ekek: miheto en tomat hetal min meatin sav keil; minaha ramattei en usite onen meatin savsav keil ka miheles usite onami enges; ka mihoum hekeih en umen onami keke mivalei kat revi onami keil. Tounah keitel enek suval asa koa metviteni tuai navong metro ral min kami mulamu. \x + \xo 4:11 \xt Efes 4:28; 2Tes 3:8,12\x*  
\v 12 En sise enek, kami minahiramtei en mesav keil keke avamai avakataun kami, ka koakeil arkurtei anatin en Ahi ihouhou min kami ka ilei kilea sakien tetahos onami. \x + \xo 4:12 \xt 1Kor 5:12-13; Kol 4:5\x*   
\s1 Pol vit luvat asa koa hekistal navong Asuv Iesu hemai ris eni  
\p
\v 13 Tuemeitel ka ahinameitel keil, emeitel vati keke mivailea anatinien usil asa koa hekistal en koakeil umat tuai koa aling desien one en Iesu. Emeitel rovattei keke mivalonge vatisa vasuval koakeil desien one tovuol, koa arkurtei anatin en mearisien. \x + \xo 4:13 \xt Efes 2:12\x*  
\v 14 Ir rokilea keke Iesu mat ka moul eris ran matien. Sakini, rokur anatin keke navong Iesu hemai ris eni, Ahi hesakin koakeil umat tuai koa aling desien one eni, keil emun imea ris ilah ruai hetal min Iesu ka kei helamun keil ihina en out nesa. \x + \xo 4:14 \xt Rom 14:9; 1Kor 15:3-4,12\x*  
\v 15 Asa koa metmul metvisein kami eni en avong enek vi hihiseien onen Asuv Iesu varei. Kei viteni keke ir koa romoul veah en avong koa kei hemai ris eni, rosakras rovahina valamu en koakeil umat tuai. \x + \xo 4:15 \xt 1Kor 7:10,25; 15:51\x*  
\v 16 Vuo, tounah keil enek hekistal. Asuv Iesu varei hemita ran out nesa ka hemakul en rea takeih. Ka en avong netin enek, vativar onen angelo keil heselus hekeih ka tai en angelo keil houh amaru onen Ahi. Hevus, koakeil umat tuai koa aling desien one en Iesu Kristo, keil imoul eris ran matien helamu. \x + \xo 4:16 \xt 1Tes 1:10; 2Tes 1:7; 1Kor 15:52\x*  
\v 17 Hevus, ir koa romoul veah en avong enek, rehehina out hetas en mahmah keil keke rovahisu min Asuv Iesu en teilang. Ka en avong koanek heha, reheto hetal mini lises. \x + \xo 4:17 \xt Sion 12:26; 17:24\x*  
\v 18 Sakini, mihehati lat rendemien onami hetal min selusien keil ekek.   
\c 5  
\s1 Pol sel kat Kristin keil keke isak mesein moulien one ven amairisien onen Iesu Kristo  
\p
\v 1 Tuemeitel ka ahinameitel keil, methermutistei mun hehat min kami usil avong keil koa tounah keil enek hekur out, \x + \xo 5:1 \xt Mat 24:36\x*  
\v 2 veni kami mikilea revi keke avong ten amairisien onen Asuv Iesu hesakin meatin keil itimanin eni hesuval amutimanin en tarhena tai koa mai en vongien. \x + \xo 5:2 \xt Mat 24:42-44; Luk 12:39-40; 2Pit 3:10; Rev 3:3; 16:15\x*  
\v 3 Anatin, en avong enek, meatin keil il ihiteni ihit, “Tomat mul en out vasi ka roro en tahosien.” !Ka hatte hetas, keil itimanin ka Ahi hesan mari mahien hesut keil. Anatin, keil asakras avalohosai rani vasuval ahin tai sakras valohosai ran mahien keil koa emai eni navong vakur tivava. \x + \xo 5:3 \xt Ser 6:14; 8:11; Esek 13:10; Mat 24:39; Luk 21:34-35; Sion 16:21-22\x*  
\v 4 Ka kami, tuemeitel ka ahinameitel keil, mirrotei en mankoli. Mikilea en asa koa hemai hekistal. Sakini, kami mihertimanintei en avong enek hesuval navong tarhena tai hemai.  
\v 5 Veni kami vasi mivi meatin keil koa mimumon sakien tetahos suval mimual en meneai. Ir rorvitei meatin keil koa romum kalkali suval koakeil amual en mankoli ten vongien. \x + \xo 5:5 \xt Rom 13:12; Efes 5:9\x*  
\v 6 Sakini, ronamatiltei nasuval meatin sav keil. Meter helele lises ka rehelei kat sakien keil orer keke housil rendemien tetahos keil.  
\v 7 Vongien vi avong meatin keil amul amatil. Vongien vi avong meatin keil amul amunmun.  
\v 8 Ka veni ir rovi meatin keil ten meneai, sakien orer housil rendemien tetahos keil. En demkatien orer, ir rehoumoni hesuval koa rovi meatin tavaeen keil onen Iesu Kristo. Rehesin revi ir en demkatien ka envatien hesuval koa vi eisin ten vaeen koa mul koe veimaser. Ka desien keke Ahi houtut ir, rehesin eni hesuval tounah koa mul koe vatir. \x + \xo 5:8 \xt Aes 59:17; Efes 6:14,17\x*  
\v 9 Rehoumoni hemukonek veni navong Ahi rie lat ir, rovitei keke rovakur mahien ten vurohien onen. Vuo, kei rie lat ir rovakur mututien koa ka en Iesu Kristo, Asuv orer. \x + \xo 5:9 \xt 1Tes 1:10; 2Tes 2:14\x*  
\v 10 Kei mat vinat ir keke rovato out vatas vatal mini navong hemai ris, avaseini ir romoul veah vuo romat tuai. \x + \xo 5:10 \xt Rom 14:8-9; 1Tes 4:14\x*  
\v 11 Sakini, mihehati lat rendemien onami ka mihekakataun kami hesuval koa mimul mimumoni tuai. \x + \xo 5:11 \xt Siud 1:20\x*   
\s1 Selkatien ekor  
\p
\v 12 Tuemeitel ka ahinameitel keil, komeitel metpeah kami keke mihouhou revi mok min koakeil amul amum ven kami en isen Asuv Iesu, koa alosil kat kami ka aralimal en kami. \x + \xo 5:12 \xt 1Kor 16:18; 1Tim 5:17\x*  
\v 13 Mihouhou revi min keil en sakien ten envatien ven umen koa amul amumoni. Ka miheto en tomat hetal min kami.   
\p
\v 14 Tuemeitel ka ahinameitel keil, metpeah kami keih imok keke mihesel kat tarmah keil, mihehati lat rendemien onen koakeil ametau, mihekataun koakeil amemerau en demkatien one, ka mihoumon rendemien onami hetaveah keke minavuroh kalahtei natal min meatin sav keil. \x + \xo 5:14 \xt 2Tes 3:6,11,15\x*  
\v 15 Mihelei kat revi keke tovuol en kami hesa kes tounah koa tisa min meatin tai koa mum tisa mini. Ka en avong vasi, mihesak visi keke mihoumon tounah koa tahos min kami ka min meatin sav keil. \x + \xo 5:15 \xt Pro 20:22; Rom 12:17; 1Pit 3:9\x*   
\p
\v 16 Mihesi kami lises, \x + \xo 5:16 \xt Plp 4:4\x*  
\v 17 mihehikit hisien, \x + \xo 5:17 \xt Luk 18:1; Rom 12:12; Kol 4:2\x*  
\v 18 ka mihemasmas Ahi en tounah keil koa mul mai ven kami, avaseini atahos vuo atisa. Ahi en vati mok keke mihoumon sakien keitel enek veni moulien onami mul kapil ral min Iesu Kristo. \x + \xo 5:18 \xt Efes 5:20\x*   
\p
\v 19 Minating koetei umen keil onen Ninin Votut, \x + \xo 5:19 \xt Efes 4:30\x*  
\v 20 suval navong Ahi san selusien min meatin tai onen, minalong seseintei. \x + \xo 5:20 \xt 1Kor 14:1,39\x*  
\v 21 Tahos imok, mihelei rahit revi selusien vasi keil koa hemai: asa koa tahos, mihehuli kati, \x + \xo 5:21 \xt 1Sion 4:1\x*  
\v 22 ka asa koa tisa, miheseseini. \x + \xo 5:22 \xt Siob 1:1,8; 2:3\x*   
\p
\v 23 Mevisi keke Ahi koa san tomat min ir hesakin kami mivahi votut imok en usite vasi keil. Anatin, mevisi keke heting koe kami ran tisaen: heting koe moulien onami, rendemien onami ka ninin onami. Hemukonek, navong mihelomal en meten Ahi en avong koa Iesu Kristo hemai ris eni, tounah tovuol avahotini vatisa usil sakien onami. \x + \xo 5:23 \xt Rom 15:33; 2Tes 3:16\x*  
\v 24 Mikilea mivaling desien onami en kei koa vise kami keke mivi onen veni kei kilea voumoni. \x + \xo 5:24 \xt 1Kor 1:9; 2Tes 3:3\x*   
\p
\v 25 Tuemeitel ka ahinameitel keil koa envatien onomaitel mul en kami, mihehis eli mun ven komeitel. \x + \xo 5:25 \xt 2Tes 3:1\x*   
\p
\v 26 Mihehiten ‘more’ onomaitel heha min tuemeitel ka ahinameitel keil en demkatien, ka miheav kat kami en envatien koa vi votut onen Ahi. \x + \xo 5:26 \xt Rom 16:16; 1Kor 16:20\x*  
\v 27 Inau, Pol, napeah kami ral min hetetamenien koa Asuv Iesu sani minau keke mihehuli leta koanik min Kristin vasi keil keisom.   
\p
\v 28 Metvisi keke more envatien onen Iesu Kristo, Asuv orer, heto ven kami.