\id 1JN - PMA Paama Language 
\h 1 Sion 
\toc1 1 Sion 
\toc2 1Sion 
\mt2 Selusien koa helamu ten  
\mt1 1 Sion  
\is1 ?Isei mutis selusien koanik?  
\ip Sion Sepeti vi tai en eiloheh keitel koa Iesu vise rohtoh eni. Suval tunali Tiemes ka Pita, mulamu, Sion son net vasar mesau keil.\x + \xo 1:0 \xt Mak 4:21\x* Sion moul taveah mulin eiloheh sav keil. Ka navong Pol ka Pita ka houlu en eiloheh sav keil umat tuai, Sion va sao en sios keil koa amul en out vasi en out Esia (koa kosa avise en Turkey) en avong tai luhu en sua 85 ka sua 90 AD (sua keil koa katau en avong Iesu avasi). Evus, kei mutis ‘More Longlongien koa Sion Mutisi,’ ka katau eni kei mutis leta enek.  
\is1 ?Isei vuli selusien koanik mulamu?  
\ip Sion mutis selusien koanik va min Kristin vasi keil koa amul en out vasi suval avi titiali keil onen.\x + \xo 1:0 \xt 1Sion 2:1,12,28\x* Leta enek karahit sios vasi. Tiser taluvosien keil houlu amul avahisein Kristin keil en tounah houlu koa rovitei anatin. Sakini, Sion mutis leta koanek vasuv kat demkatien one en tounah koa vi anatin.  
\is1 ?Sion mutis selusien koanik vensa?  
\im \bd Sion vit luvati keke Iesu mai suval meatin ka mat anatin en aiveave\bd* – Sion en vat Kristin keil availea keke Iesu vi Ahi koa vi ‘Vati Selusien ten Moulien.’\x + \xo 1:0 \xt 1Sion 1:1\x* Ka kei mita en out netan anatin.\x + \xo 1:0 \xt 1Sion 1:2-3\x* Sion viteni mukok ven tiser taluvosien keil aviteni keke Iesu vi meatin enges ten out netan koa Ninin onen Ahi sieni en avong avi baptis eni, ka lokovein risi en avong mul en aiveave.\x + \xo 1:0 \xt 1Sion 4:2-3; 5:6-10\x*  
\ib  
\im \bd Sion vit luvati keke Ahi en vati keke sakien keil onen meatin keil onen avatolas\bd* – Tiser taluvosien keil aviteni keke aven meatin ka ninin onen lukeka. En rendemien one, meatin kilea voumon tounah vasi koa en vati voumoni en aven, ka tisaen teni sakras vasakin ninin onen vahilehilu. Sion vit luvati keke meatin keil onen Ahi amul along kat mengkatien keil onen koa mul en Tus Votut onen.\x + \xo 1:0 \xt 1Sion 2:3-6; 3:1-10\x*  
\ib  
\im \bd Sion vit luvati keke Kristin keil e hehathat tue keil en demkatien\bd* – Veni tiser taluvosien keil amul asakin Kristin keil amusel en keil eris, Sion sel kat keil e vahathat Kristin sav keil.\x + \xo 1:0 \xt 1Sion 2:7-11; 3:11-24\x*  
\ib  
\im \bd Sion vit luvati keke Iesu Kristo vi sise tas koa voutut moulien onen meatin keil\bd* – Tiser taluvosien keil aviteni keke meteisauen koa keil enges akuri kilea voutut moulien onen meatin keil.\x + \xo 1:0 \xt 1Sion 1:8-10\x* Ka Sion vit leini keke koakeil akur Iesu Kristo, Natin Ahi, keil enges akur moulien ten lisenges.\x + \xo 1:0 \xt 1Sion 3:1-3\x*  
\is1 Mari rendemien tai ten selusien koanik mul en 1 Sion 5:13  
\ipq Namul namutis va min kami koa mikur anatin en Natin Ahi keke miheilea kami mikur moulien ten lisenges tuai.  
\is1 ?Asa mul en selusien koanik?  
\io1 1. Ahi vi meneai ka en vat meatin keil onen itie lati keke keil emun amul en meneai. (1:1–2:29)  
\io1 2. Ahi mal revi ka meatin keil onen, moulien one hemal revi. (3:1-10)  
\io1 3. Ahi vi envatien ka en vat meatin keil onen itie lati keke keil emun envatien one hel en meatin sav keil. (3:10–4:21)  
\io1 4. Ahi vi moulien ka mul mutut koakeil akur anatin en Natnali koa vi Iesu Kristo. (5:1-21)  
\c 1  
\s1 Hitkileaen usil kei koa vi Vati Selusien ten Moulien  
\p
\v 1 Inau, Sion, namutis leta koanik va min kami usil kei koa vi ‘Vati Selusien ten Moulien,’ kei koa ro tuai mulamu en tounah sav vasi keil. Kei, komai melonge, ka melesi en metomai. Anatin, melesi ka hemai rokoli. \x + \xo 1:1 \xt Sion 1:1,2; 1Sion 2:13,14; Sion 1:1,4,14\x*  
\v 2 Mulamu, Vati Selusien ten Moulien enek moul lisenges ka ro ral min Ahi Tata, ka katau, mai kistal min ir. Kei komai melesi ka kosa mevitehit usili min kami. \x + \xo 1:2 \xt Sion 1:14\x*  
\v 3 Asa koa komai melesi ka meraengoni, memul meviteni min kami mun keke mikilea mivapil vatal min komai koa mekapil emun ral min Ahi Tata ka Natnali koa vi Iesu Kristo.  
\v 4 Ka navong mihekur anatin en asa koa memul memutis usili, rehesi ir hehi houlu. \x + \xo 1:4 \xt Sion 15:11; 16:24\x*   
\s1 Selkatien keke rovoual en meneai onen Ahi  
\p
\v 5 Selusien koa meraengoni ka ven Natin Ahi mevitehiteni mun min kami. Kei viteni mukok: Ahi mutolas, tisaen tovuol ien. Kei suval meneai koa keih koa mankoli tovuol ien. \x + \xo 1:5 \xt 1Tim 6:16; Tiem 1:17\x*  
\v 6 Munak roviteni rovit rokapil vituai ral mini ka romual veah en mankoli ten tisaen, romul roluvos en selusien orer ka ualien orer romusiltei anatinien. \x + \xo 1:6 \xt 1Sion 2:4; Sion 3:21\x*  
\v 7 Ka munak romual en meneai suval Ahi mul en meneai ka sakien orer mutolas, ir Kristin keil, rokilea rovapil vituai vatal min ir emun. Ka navong romual en meneai enek, ran Iesu, Natin Ahi, mul kas motein ir ran \w tisaen\w* vasi keil keke reheto rehetolas.   
\p
\v 8 Ka munak roviteni rovit tisaen orer tovuol, romul roluvos ir enges, ka anatinien tovuol en ir.  
\v 9 Ka munak rovit lat tisaen orer min Ahi, kei koa lisenges mul mum vasin tounah koa viteni ka mul mumon tounah koa mal, kei herleletei mun hetisa en tisaen keil orer ka hekas motein ir rehetolas ran sakkalkalien keil orer.  
\v 10 Ahi mul vit ir vasi romumon \w tisaen\w*. Ka munak rovit rormumontei etai tisaen, romul roviteni keke Ahi mul luvos. Munak hemukonek, selusien onen romultei en ir.   
\c 2  
\s1 Iesu Kristo mul selus min Ahi en usite orer  
\p
\v 1 Onak eli keil, namul namutis selusien koanik va min kami keke mehermumontei \w tisaen\w*. Ka munak meatin tai mumon tisaen, meatin tai mul vesesal ven Ahi Tamer koa kilea vaselus vatal mini en usite orer, kei vi Iesu Kristo koa mal revi. \x + \xo 2:1 \xt Rom 8:34; Hib 7:25; 9:24\x*  
\v 2 Kei san moulien onen vi sanien votut vahul lat \w tisaen\w* keil orer. Ka rosantei moulien onen ven tisaen orer enges. Vuo, sani ven meatin vasi keil en out netan. \x + \xo 2:2 \xt Sion 1:29; Kol 1:20; 1Sion 4:10,14\x*   
\p
\v 3 ?Ir rehelei kilea keke rokilea revi en Ahi hemukave? Navong rolong kat mengkatien keil onen, rokilea keke rovailea kei.  
\v 4 Ka munak meatin tai mul viteni vit kei kilea en Ahi, ka kei rolong kattei mengkatien keil onen, kei vi uti luvosien ka anatinien tovuol ien. \x + \xo 2:4 \xt 1Sion 1:6\x*  
\v 5 Ka munak rolong kat selusien onen, mul rie keke er vat Ahi en vati sakien koa kei en vati. En sakien koanik rolei kilea keke rokapil ral min Ahi: \x + \xo 2:5 \xt Sion 14:21,23; 1Sion 5:3; 4:12,17; Sion 13:15; 1Pit 2:21\x*  
\v 6 munak roviteni rovit rokapil ral min Ahi, rehoumoni mok keke ualien orer hesuval ualien onen Iesu Kristo.   
\s1 Selkatien keke rehousil mengkatien ten envatien  
\p
\v 7 Onak eli keil, namul namutis usil mengkatien tai koa mihousili, ka mengkatien koanik rovitei heite hau. Vuo, vi mengkatien matu koa vit, “Er hehathat ir.” Kei, mikuri tuai navong mikur rohtoh en demkatien onami en Iesu. Anatin, mengkatien matu koanik vi selusien koa milonge tuai. \x + \xo 2:7 \xt 2Sion 1:5-6; 1Sion 2:24; 3:11\x*  
\v 8 Ka mukos, hesuval koa mengkatien koa namul namutisi kosa vat min kami vi heite hau, veni roles anatinien teni mul en moulien onen Iesu Kristo ka en moulien onami emun. Mankoli ka sakien tatisa keil orer koa romul ien mulamu mul vuol, ka meneai ten anatinien koa romul ien kosa mul ritin keih. \x + \xo 2:8 \xt Sion 13:34; Rom 13:12; Sion 1:9\x*   
\p
\v 9 Ka munak meatin tai mul viteni vit, “Inau naro en meneai onen Ahi,” ka en hati avong koanik tin kat tunali keil, kei mules veah en mankoli ten tisaen. \x + \xo 2:9 \xt 1Sion 2:11; 3:10,15; 4:20\x*  
\v 10 Ka kei koa en vat tunali keil, kei ro en meneai onen Ahi anatin. En vati meatin koanek, tounah tovuol val ien koa vasakini vamot en tisaen. \x + \xo 2:10 \xt Sam 119:165; Rom 14:13\x*  
\v 11 Ka meatin koa tin kat tunali keil, kei mules en mankoli ten tisaen. Kei mul mual eni ka rolei kileatei out kave mul va ien, veni mankoli ten tisaen onen mul mutaluh koe meten. \x + \xo 2:11 \xt 1Sion 2:9; Sion 12:35\x*   
\s1 Selkatien va min Kristin keil keke avousil sakien keil koa mal  
\q1
\v 12 Namul namutis vat min kami, koa misuval titiali onak kati keil en demkatien,  
\q2 mivailea keke \w tisaen\w* keil onami herkattei mun kami, Iesu Kristo sakin methos onen Ahi mul en kami. \x + \xo 2:12 \xt Sam 25:11; 1Kor 6:11\x*   
\q1
\v 13 Namul namutis vat min kami, tata keil,  
\q2 veni kami mikilea kei koa ro tuai mulamu en tounah sav vasi.\x + \xo 2:13 \xt Sion 1:1,2; 1Sion 1:1\x*  
\q1 Namul namutis va min kami, meatin hau keil,  
\q2 veni en vaeen ten demkatien, mimuli Temat tuai.   
\q1
\v 14 Anatin, namul namutis vat min kami, titiali onak keil,  
\q2 veni kami mikilea Ahi Tamer.  
\q1 Namul namutis vat min kami, tata keil,  
\q2 veni mikilea kei koa ro tuai mulamu en tounah sav vasi.  
\q1 Namul namutis vat min kami, meatin hau keil,  
\q2 veni demkatien onami keih ka selusien onen Ahi mul moul en kami.  
\q1 Anatin, en vaeen ten demkatien,  
\q2 kami mimuli Temat tuai.   
\p
\v 15 Veni koanik anatin, envatien onami naltei en tounah keil ten out netan. Munak meatin tai en vat tisaen keil ten out netan vuo en sakien keil teni, envatien onen Ahi Tamer romultei en tin \x + \xo 2:15 \xt Rom 8:7; Tiem 4:4\x*  
\v 16 veni tounah keil ten out netan rokatei ven Ahi Tamer. Tounah keil ten out netan amukok: sakien koa meatin vit hekur tounah vasi koa en vati; sakien koa en vati hekur tounah vasi koa leh meten; ka sakien tahasien ven tounah koa kuri. \x + \xo 2:16 \xt Rom 13:14; Efes 2:3; 1Pit 2:11; Pro 27:20; Tiem 4:16\x*  
\v 17 Out netan ka tounah vasi koa meatin keil teni e vati mul vuol; ka koakeil amusil kat rendemien onen Ahi asakras avavuol, keil imoul lisenges. \x + \xo 2:17 \xt 1Kor 7:31; Mat 7:21\x*   
\s1 Selkatien keke rehelekat revi ven vativieh keil en Iesu Kristo  
\p
\v 18 !Titak keil en demkatien, romul en avong ekor keil! Meviteni tuai min kami keke kei koa hehi vativieh en Kristo hemai; ka kosa, rolesi keke meatin houlu koa avi vativieh min Kristo akikistal tuai. Koanik rie lati keke romul en avong ekor keil. \x + \xo 2:18 \xt Mat 24:5,24\x*  
\v 19 Meatin keil enek alokovein lahruaien keil orer veni arkapiltei vatal min ir en anatinien koa rovuli kati. Veni vahit keil avapil vatal min ir anatin, keil avatos vatal min ir. Ka navong keil uva, rolei kilea suk keke tovuol en keil vahi etai en ir. \x + \xo 2:19 \xt Umen 20:30; 1Kor 11:9\x*   
\p
\v 20 Ka kami, Iesu koa vi votut sien kami en \w Ninin Votut\w* tuai, ka kami vasi mikilea anatinien onen Ahi. \x + \xo 2:20 \xt 1Sion 2:27\x*  
\v 21 Sakini, narmutistei vahat min kami veni mirkileatei anatinien. Vuo, namutis va ven kami veni mikilea eni tuai, ka mikilea emun keke anatinien onen Ahi sakras voumon etai luvosien.   
\p
\v 22 ?Isei mul liluvos? Koakeil avit Iesu rovitei Mesaea anatin onen Ahi, keil amul aliluvos. Meatin keil enek avi vativieh en Kristo veni arkurtei anatin keke Iesu vi Natin Ahi ka Ahi vi Tamen. \x + \xo 2:22 \xt 1Sion 4:3; 2Sion 1:7\x*  
\v 23 Anatin, veni koakeil asesein Natin Ahi, asesein Tamen. Ka koakeil akur anatin en Natin Ahi, akur anatin en Tamen emun. \x + \xo 2:23 \xt Sion 5:23; 15:23; 1Sion 4:15; 5:1; 2Sion 1:9\x*   
\p
\v 24 Sakini, selusien ten anatinien koa milonge navong mikur rohtoh en demkatien, mihekur kati hel en moulien onami. Munak mivuli kat selusien enek koa vit Iesu vi Kristo anatin, hesakin kami miheto miheapil hetal min Iesu, Natin Ahi, ka Tamen.  
\v 25 Ka munak reheto reheapil hetal min keilu, rehekur asa koa Iesu Kristo vat kati vasani min ir: moulien ten lisenges. \x + \xo 2:25 \xt Sion 3:15; 6:40\x*   
\p
\v 26 Namul namutis min kami keke masel kat kami usil koakeil asak aval avaluvos kami.  
\v 27 Ka kami, Iesu Kristo sien kami tuai en Ninin Votut onen. Sakini, navong Ninin Votut onen mules en kami, kei enges kilea vahisein kami en asa koa vi anatin ka asa koa vi luvosien. Mirvistei meatin etai mun hemai hehisein ris kami en tounah sav keil. Sakini, mihetos miheapil hetal Iesu Kristo, suval koa Ninin Votut visein kami eni tuai. \x + \xo 2:27 \xt Sion 14:26; Ser 31:34\x*   
\p
\v 28 Anatin, onak eli keil, mihetos miheapil hetal min Iesu keke navong hekistal eris ka rehelomal en meten, rehermemoutei. \x + \xo 2:28 \xt 1Sion 4:17\x*  
\v 29 Sakini, veni mikilea keke sakien keil onen Iesu Kristo mal revi mok, kami koa mimul mimusil sakien koa mal revi suval kei mimul mirie lati keke Ahi sakin kami mimai mivi heite hau mivi titan kati.\x + \xo 2:29 \xt 1Sion 3:10\x*   
\c 3  
\s1 Sakien mal koa titan Ahi keil umoni  
\p
\v 1 !Ahi Tamer en vat ir houlu mok! Anatin, rokilea envatien onen marite mok veni vise ir en titan. !Ka anatin eli, ir rovi titan kati! Ka meatin keil ten out netan arlei kileatei keke rovi titan Ahi veni arkileatei Ahi. \x + \xo 3:1 \xt Sion 1:12,13; 1Sion 3:10; Sion 16:3\x*  
\v 2 Onak eli keil, anatin keke rovi titan Ahi tuai, ka rorkilea revitei veah keke aver ilesi hemukave en avong keil koa hemai. Ka avaseini, rokilea enges keke navong Iesu Kristo hemai hekistal, ir rehelei kilea suk kei hesuval asa. Ka aver hehiles hemai hesuval aven. \x + \xo 3:2 \xt 2Kor 3:18; Plp 3:21\x*  
\v 3 Ka meatin vasi koa akur desien koanik, ilei kat revi moulien one hetolas, hesuval koa moulien onen Iesu Kristo mutolas.   
\p
\v 4 Meatin koa mules mumon \w tisaen\w* mul kum vulvul mengkatien keil onen Ahi, veni vatte ten tisaen vi kumvulvulien ten mengkatien onen. \x + \xo 3:4 \xt Mat 7:23\x*  
\v 5 Mikilea keke Iesu Kristo kistal valah lat tisaen keil, ka tisaen tovuol ien. \x + \xo 3:5 \xt Sion 1:29; 1Pit 2:24; 1Sion 2:2; 4:10; Aes 53:9; Sion 8:46; 2Kor 5:21; Hib 4:15; 7:26; 9:14; 1Pit 1:19; 2:22; 3:18\x*  
\v 6 Sakini, meatin vasi keil koa moulien one kapil ral min Iesu Kristo, keil analtei anahikiti anoumon \w tisaen\w*. Ka koakeil amules avikit tisaen, arie lati keke arkapiltei vatal Iesu ka arkileatei kei varei. \x + \xo 3:6 \xt Rom 6:2,14; 1Sion 3:9\x*   
\p
\v 7 !Kami koa misuval titak keil, minamaentei meatin etai naluvos kami! Koakeil amumon sakien koa mal, keil amal revi mok suval Iesu Kristo emun mal revi. \x + \xo 3:7 \xt 1Sion 2:29\x*  
\v 8 Koakeil amules avikit tisaen, keil avi titan Temat, veni Temat mum tisa en avong mulamu rokol kosa. Ka Natin Ahi kistal ven koanik, vou rasilin tounah keil koa Temat mul mumoni. \x + \xo 3:8 \xt Sion 8:44\x*   
\p
\v 9 Meatin keil koa Ahi sakin keil avi heite hau avi titan kati, keil irmultei ihikit tisaen, veni suvalien onen Ahi mul en moulien one. Ka ven Ahi koa tisaen tovuol ien vi Tame, keil asakras aval avahikit tisaen. \x + \xo 3:9 \xt 1Sion 5:18\x*  
\v 10 Rolei kilea isei vi titan Ahi vuo titan Temat en sise koa mukok: koakeil armumontei asa koa mal vuo envatien one romul entei tue keil, keil arvitei titan Ahi keil, keil avi titan Temat varei. \x + \xo 3:10 \xt Sion 1:12,13; 1Sion 3:1\x*   
\s1 Selkatien keke emi hehathat kami  
\p
\v 11 Selusien koa melonge navong mikur rohtoh en demkatien onami mukok: er hehathat ir. \x + \xo 3:11 \xt Sion 13:34; 15:12,17; 2Sion 1:5\x*  
\v 12 Ronasuvaltei \w Ken\w* koa vi onen Temat ka mu vini tunali kati Ebel. ?Ken mu vini vensa? Veni tounah keil kei sasen mumoni romaltei, ka tounah keil koa tunali mumoni mal. \x + \xo 3:12 \xt Sen 4:8\x*   
\p
\v 13 Sakini, tuak keil, navong meatin keil ten out netan tine kat kami, minatimanintei eni. \x + \xo 3:13 \xt Sion 15:18,19; 17:14\x*  
\v 14 Rokilea keke ir romaluv ran keihoen ten matien ka romul tuai en moulien koa ten lisenges. Rokilea en koanik veni envatien orer mul en tuer keil. Koakeil envatien tovuol amul veah en keihoen ten matien. \x + \xo 3:14 \xt Sion 5:24; 1Sion 2:11\x*  
\v 15 Koakeil tine kat tue keil vuo ahine keil, en meten Ahi suval keil avou vini keil tuai. Ka mikilea tuai keke moulien ten lisenges romultei en koakeil amu vini meatin. \x + \xo 3:15 \xt Mat 5:21,22; Kal 5:20-21; Rev 21:8\x*  
\v 16 Iesu Kristo rie lat sakien ten envatien min ir mukok: kei kataun ir navong maen moulien onen vavuol vahinat ir. En sakien enek, ir emun rehekataun tuer ka ahiner keil, avaseini munak moulien orer hevuol ven keil. \x + \xo 3:16 \xt Sion 13:1; 15:13; Kal 2:20; 1Tim 2:6; Taet 2:14; Plp 2:17; 1Tes 2:8\x*  
\v 17 ?Navong roles meatin sav koa tounah onen tovuol, ka ir koa tounah orer mul rorkatauntei, hemukave rokilea rovahiteni keke er vat Ahi? \x + \xo 3:17 \xt Dut 15:7-8\x*  
\v 18 Titak keil, envatien orer nahiteis en selusien vuo en hiliver enges. Vuo, envatien koa vi anatin hekistal en sakien ten kataunien ka en ualien orer. \x + \xo 3:18 \xt Tiem 2:15-16\x*   
\s1 ?Rokilea rovahati ir ka rehermetautei en meten Ahi hemukave?  
\p
\v 19 Navong rorie lat envatien en sakien ka ualien orer, rokilea keke roro en anatinien onen Ahi. Sakini, navong rovit rovamai vesesal ven Ahi, rehendem usili hetal min tomat  
\v 20 en avong vasi koa milonge keke Ahi mul lele tisa en ir ven tounah koa mimumoni romaltei. Veni rokilea keke more envatien onen Ahi marite mok mulin rendemien orer ka kei kilea en tounah vasi en moulien orer.  
\v 21 Sakini, onak eli keil, munak rehendem usil tounah keil enek, rokilea rovahati ir keke rehermetautei en meten Ahi.  
\v 22 Mukonek, rokilea keke rehekur tounah koa rovisi rani, veni romul rolong kat mengkatien keil onen ka romumon asa koa kei si veni. \x + \xo 3:22 \xt Mat 21:22; Mak 11:24; Sion 14:13; 15:7; 16:23-24\x*   
\p
\v 23 Ka koanik mengkatien onen: ir reheling demkatien orer en Natnali, Iesu Kristo; ka er hehathat ir, suval koa Iesu Kristo meng kat ir eni. \x + \xo 3:23 \xt Sion 6:29; 13:34; 15:12,17\x*  
\v 24 Koakeil along kat mengkatien keil onen Ahi, keil akapil ral min Ahi ka kei mun mul kapil ral min keil. Ka rokilea keke Ahi mul kapil ral min ir navong Ninin Votut koa kei sani mul en ir.\x + \xo 3:24 \xt Rom 8:9; 1Sion 4:13\x*   
\c 4  
\s1 Sakien koa rokilea rovalei rahit umen ka selusien onen meatin tai vaka ien  
\p
\v 1 Onak eli keil, kosa, provet taluvosien keil houlu uva en out vasi. Sakini, minakurtei anatin en selusien onen meatin vasi koa avit akur Ninin Votut. Ka mihesak vis keil keke mivahotini keke ninin koa mul en keil ka ven Ahi anatin. \x + \xo 4:1 \xt 1Tes 5:21; Mat 7:15; 1Sion 2:18; 2Sion 1:7\x*  
\v 2 En sakien koanik miheilea keke vi Ninin onen Ahi koa mul en keil: meatin koa vit lati keke Iesu Kristo mai vi meatin koa aven mul, kei kur Ninin Votut koa ka ven Ahi. \x + \xo 4:2 \xt 1Kor 12:3\x*  
\v 3 Ka meatin koa sesein anatinien koanik usil Iesu, kei rokurtei Ninin Votut koa ka ven Ahi. Ninin koa mul ien ka ven koakeil avi vativieh ral min Iesu Kristo. Mulamu, milonge keke ninin koanik hemai, ka kosa, mul tuai en out netan. \x + \xo 4:3 \xt 2Sion 1:7; 1Sion 2:18\x*   
\p
\v 4 Ka onak eli keil, kami mivi onen Ahi, ka mimulin provet keil taluvosien tuai veni misesein hihiseien keil one. Mimulin keil veni Ninin Votut koa mul en kami keih imok mulin ninin onen Temat koa mul en koakeil ten out netan. \x + \xo 4:4 \xt Mat 12:29\x*  
\v 5 Provet keil taluvosien enek avi ten out netan ka amul aselus usil tounah keiles ten out netan. Sakini, koakeil ten out netan amul araengon selusien one. \x + \xo 4:5 \xt Sion 15:19\x*  
\v 6 Ka ir, rovi onen Ahi. Sakini, koakeil akilea Ahi, amul araengon hihiseien orer. Ka koakeil arraengontei, keil arvitei onen Ahi. En sakien enek, rokilea rovalei kilea isei kur Ninin ten anatinien ka isei kur ninin taluvosien. \x + \xo 4:6 \xt Sion 8:47\x*   
\s1 Sakien ten envatien mul rie lat isei keil amul amusil kat Ahi ten envatien  
\p
\v 7 Onak eli keil, er hehat tuer keil, veni envatien ka ven Ahi. Meatin koa envatien mul ien mul rie lati keke Ahi sakini vi heite hau ka vi titan kati koa kilea eni.  
\v 8 Meatin koa en rovattei meatin sav keil rokileatei Ahi, ven Ahi vi vatte ten envatien. \x + \xo 4:8 \xt 1Sion 4:16\x*  
\v 9 Ka Ahi rie lat envatien onen min ir navong san natnali koa tas mita en out netan keke rokilea rovakur moulien koa ten lisenges ka en kei. \x + \xo 4:9 \xt Sion 3:16\x*  
\v 10 Vatte ten envatien rovitei sakien koa ir rorie lati va min Ahi. Vuo, vatte ten envatien koa mal revi vi asa koa Ahi rie lati min ir navong san Natnali keke hekur mahien keil orer ka hemat hesuval sanien votut keke vahinat \w tisaen\w* keil orer. \x + \xo 4:10 \xt Rom 5:8,10; 1Sion 2:2\x*  
\v 11 Onak eli keil, veni Ahi en vat ir en sakien enek, ir emun er hehat tuer keil. \x + \xo 4:11 \xt Mat 18:33\x*  
\v 12 Meatin tovuol veah vales Ahi kati. Ka munak ir Kristin keil er hehat ir, Ahi ro neim en ir ka envatien onen mul mumon umen vasi keil onen ka en moulien orer. \x + \xo 4:12 \xt Sion 1:18; 1Sion 2:5; 4:17\x*   
\p
\v 13 ?Ir reheilea keke rokapil ral min Ahi ka kei kapil ral min ir hemukave? Rokilea eni navong rolei kilea keke Ninin Votut koa sani min meatin keil onen mul en ir. \x + \xo 4:13 \xt Rom 8:9; 1Sion 3:24\x*  
\v 14 Ahi Tata san Natnali mai voutut meatin keil ten out netan. Ka komai, eiloheh keil, meles Iesu ka mevitehiteni keke asa koa mumoni min meatin keil keke vi anatin. \x + \xo 4:14 \xt Sion 3:17\x*  
\v 15 Munak ir rovit lati keke Iesu vi Natin Ahi, rokapil ral min Ahi ka kei mun kapil ral min ir. \x + \xo 4:15 \xt 1Sion 5:5\x*  
\v 16 Sakini, rokilea envatien onen mul en ir ka romundesini keke Ahi heles hetie lat envatien onen en ir en avong vasi. \x + \xo 4:16 \xt 1Sion 4:8\x*  
\p Ahi vi vatte ten envatien, ka koakeil envatien mul en keil, amul akapil ral min Ahi ka Ahi mul kapil ral min keil.  
\v 17 Ka navong envatien onen mum vasi umen onen en moulien orer, rokilea rovahati ir keke rehermetautei en meten Ahi en Avong ten Mari Kot. Anatin, metauen hetovuol en ir veni moulien orer mul rie lat sakien ten envatien suval Iesu. \x + \xo 4:17 \xt 1Sion 2:5; 4:12\x*  
\v 18 Metauen hetovuol en koakeil envatien onen Ahi mul en keil. Sakini, veni envatien mul mum vasin umen onen en moulien orer, mul likat rasilin metauen ran ir. Sakini, koakeil ametaun asa koa Ahi hesani min keil navong helei rahit usite one, arie lati keke envatien onen Ahi romum vasitei veah umen onen en moulien one.   
\p
\v 19 Ir rokilea er vahat Ahi ka er vahat meatin sav keil veni, mulamu, Ahi en vat ir.  
\v 20 Munak roviteni rovit er vat Ahi, ka tiner kat tuer vuo ahiner tai, ir rovi meatin keil taluvosien. ?Veni navong er rovattei tuer keil ka ahiner keil koa romul roles keil en meter, hemukave suk er hehat Ahi koa rorlestei?  
\v 21 Rorie lat envatien min meatin sav keil veni Ahi san mengkatien enek min ir: meatin koa envatien onen mul en Ahi, kei en hehat tunali ka tunahin sav keil emun.\x + \xo 4:21 \xt Mat 5:44-45; Mak 12:29-31\x*   
\c 5  
\s1 Koakeil aling demkatien one en Iesu Kristo akilea avalin sakvisien keil ten out netan  
\p
\v 1 Meatin koa kur anatin keke Iesu vi Mesaea koa Ahi sani, mul rie lati keke Ahi sakin kei vi heite hau vi titan kati. Navong meatin tai en vat tata tai, mul en vat titan emun. \x + \xo 5:1 \xt 1Sion 4:15; 1Pit 1:22-23\x*  
\v 2 Sakini, rokilea keke er vat titan Ahi keil anatin, navong er vat Ahi ka rolong kat mengkatien keil onen.  
\v 3 Ir rorie lat envatien orer min Ahi navong rolong kat mengkatien keil onen. Ka mengkatien keil onen rokeih tei min ir, \x + \xo 5:3 \xt Sion 14:15,23,24; 2Sion 1:6; Dut 30:11; Mat 11:30\x*  
\v 4 veni koakeil vasi Ahi sakin keil avi heite hau titan kati keil akilea avasesein sakien keil ten out netan. Demkatien orer en Iesu Kristo mul sakin ir rokilea rovalin sakien tatisa keil ka sakvisien keil ten out netan.  
\v 5 ?Isei kilea valin tounah tatisa keil koa mul en out netan? Koakeil enges akur anatin keke Iesu vi Natin Ahi anatin. \x + \xo 5:5 \xt Rom 8:37; 1Sion 4:4\x*   
\s1 Ahi vothot eni keke Iesu vi Natnali anatin  
\p
\v 6 Iesu Kristo, Natin Ahi, vi kei koa ka en out nesa mita, ka koa avi baptaes eni en oai ka ran mue en matien onen. Anatin, Ahi vothot eni keke Iesu vi anatin ral min oai ka ara, rovi teis en oai. Ka Ninin Votut, kei varei mul vothot en anatinien usil Iesu min ir veni kei Ninin vi vatte ten anatinien. \x + \xo 5:6 \xt Sion 19:34\x*  
\v 7 Tounah etel mul vothot en anatinien koanek keke Iesu ka ven Ahi: \x + \xo 5:7 \xt Sion 15:26\x*  
\v 8 Ninin Votut, oai, ka ara.\f + \fr 5:8 \ft Rokilea keke Iesu vi Natin Ahi anatin en sise keitel enek: navong Ninin Votut mul vothot eni en moulien orer; navong Sion vi baptaes eni en oai Ahi selus; ka navong ran mue en matien onen, Ahi sakin out mai malikelik ka alu mulu.\f* Keitel vasi enek telsan rendemien vatte tas keke Iesu vi onen Ahi anatin.  
\v 9 Navong meatin etai mul viten tounah tai min ir, rokur anatin eni. Ka navong Ahi mul viteni, koanek rehekur anatin eni hekeih imok. Ka kei viteni vit Iesu vi Natnali. \x + \xo 5:9 \xt Sion 5:32-34; 5:37; 8:18\x*  
\v 10 Sakini, meatin koa mul ling demkatien onen en Iesu Kristo koa vi Natin Ahi, kei kur anatin en selusien onen Ahi. Ka meatin koa rokurtei anatin en asa koa Ahi viteni usil Natnali, kei les Ahi suval kei vi uti luvosien. \x + \xo 5:10 \xt Rom 8:16; Kal 4:6\x*  
\v 11 Asa koa Ahi mul viteni keie: Ahi san moulien ten lisenges min ir, ka mumon Natnali vi sise teni.  
\v 12 Sakini, meatin koa kur Natin Ahi en moulien onen, kei kur moulien ten lisenges. Ka meatin koa rokurtei Natnali en moulien onen, kei rokurtei moulien ten lisenges. \x + \xo 5:12 \xt Sion 3:36\x*   
\s1 Munak roling demkatien orer en Iesu, rokilea keke rehekur moulien ten lisenges  
\p
\v 13 Namul namutis va min kami koa mikur anatin en Natin Ahi keke miheilea mikur moulien ten lisenges tuai. \x + \xo 5:13 \xt Sion 20:31\x*  
\v 14 Sakini ronametau tei navong rova ven Ahi. Anatin, navong rovisi en tounah keil koa mal en rendemien onen, rokilea keke kei mul raengoni. \x + \xo 5:14 \xt Mat 7:7; Sion 14:13; 15:7,16; 16:23; 1Sion 3:21-22\x*  
\v 15 Ka veni rokilea keke kei raengon hisien keil orer, rokilea emun keke rokur ui hisien keil orer tuai.   
\p
\v 16 Munak tai en kami les tunali tai vuo tunahin tai mumon \w tisaen\w*, tahos hehis min Ahi veni. Ka Ahi helonge ka hehilesi ran sise ten matien ka heling risi en sise ten moulien ten lisenges. Ka meatin tei amumon vati tisaen koa hesan keil iha imat en Ahang koa sakras vavus, ka narvitentei keke kami mihehis min Ahi ven keil.\f + \fr 5:16 \ft Tisaen keil enek asuval koa aselus usili en \xt Mat 12:31; Mak 3:29; Hib 6:4; 10:28-29\ft .\f* \x + \xo 5:16 \xt Mat 12:31; Hib 6:4-6\x*  
\v 17 Anatin keke sakkalkalien vasi keil vi tisaen, ka tisaen tei mul koa sakras vasan matien ten lisenges min meatin.   
\p
\v 18 Ir rokilea keke koakeil Ahi sakin keil avi heite hau koa vi titan keil armultei avahikit tisaen. Anatin, Natin Ahi mul lei kokoe en keil keke Temat koa vi uti tisaen sakras vasut keil.  
\v 19 Ir rokilea keke rovi onen Ahi, avaseini meatin sav vasi keil ten out netan amul en hen Temat. \x + \xo 5:19 \xt 1Sion 3:9; Sion 17:15\x*  
\v 20 Rokilea keke Natin Ahi mai en out netan ka san ileilien min ir keke rovailea kei eris koa vi anatin. Ka moulien orer mul kapil ral mini koa vi Natnali, Iesu Kristo. Kei vi Ahi anatin, ka kei enges mul san moulien ten lisenges min meatin keil. \x + \xo 5:20 \xt Sion 17:3\x*   
\p
\v 21 !Onak eli keil, mihelei kat kami keke minousiltei ahi keil taluvosien!\x + \xo 5:21 \xt 1Kor 10:14\x*