\id MAL ‘PT MAL 02ed’ Pitjantjatjara Malachi selections 20-FEB-03 (Paul & Ann Eckert (SIL/FRM), c/o PO Box 2129 Alice Springs, NT 0871. Ph: +61-8-82924808 Fax: 08-89524894. E-mail: paul.eckert@biblesociety.org.au
\ide UTF-8
\h Malakaiku
\toc2 Malakaiku
\toc1 Wati Wangkatjarangku Malakailu Walkatjunkunytja (Malachi)
\mt1 Wati Wangkatjarangku Malakailu Walkatjunkunytja
\mt2 Malachi
\imt1 Nyangatja Ngaṉmanytju Nyakula Wangkanytjaku
\ip Nyangatja Godaku tjukurpa wati wangkatjarangku ini Malakailu walkatjunkunytja. Panya wati nyara palulawanungku Godalu wangkangu aṉangu panya palumpa walytja tjuṯangka, panya palumpa tjanampa tjamu munu mama tjuṯangku ngaṉmanytju timpula panya piḻukatinytja palyaṟa wiyaṉu, ka nyara palula maḻangka kuḻi 80 ngaṟala wiyaringu.
\ip Palu paluṟu tjanaya kuliningi tjinguṟu wati panya wangkatjara ngaṉmanyitja tjuṯangku wangkanytja tjukurpa ngunti nguwanpa, munuya palulanguṟu kuliṟa tjituṟu-tjituṟuringi munuya kuliningi, “Yaalaṟa nyangatja palyaringkuku kala pukuḻpa mulapa nyinaku?” Ka panya tjanampa tjukurtjara tjuṯangku Godaku tjukurta kulilwiyangku wantingi munuya palunya tjukaṟurungku waḻkulwiyangku kuḻu wantingi. Kaya aṉangu tjuṯangku kuka wiṟu munu mai wiṟu kuḻu Godanya ungkunytjikitjangku katiwiyangku wantira kurakura tjuṯa kutju katingi.
\ip Palu Malakailu tjananya wangkara mukumukuningi Godalakutu aṟuringkula palumpa tjukurpa wangaṉarangku kulintjaku, kaya palulanguṟu paluṟu tjana nyakuku Godalu tjananya mulapa aṯunytju kanyinnyangka munu wiṟu tjuṯa tjanampa palyannyangka.
\ip Uwa, nyangatja Malakailu tjukurpa walkatjunkunytja maṉkurpa kutju ngarinyi, panya nganaṉa kuwaripangkuṯu palyaṉi, palu uwankarala walkatjuṟa wiyantja wiyaṯu.
\iot Tjukurpa nyanganpa ngarinyi:
\io1 1:6—2:16 Tjukurtjara tjuṯangku ngunti palyantja
\io1 3:1-2 Godalu wati tjakulpa kuranyu iyantjikitjangku kalkuntja
\io1 3:5-7 Godalu aṉangu kura tjuṯa ngurkantaṟa tjarantjikitjangku kalkuntja
\io1 3:8-18 Godanya tjukaṟurungku ungkunytjaku
\io1 4:1-4 Tjiṉṯu maḻatja
\ie
\c 1
\s1 Tjukurtjara Tjuṯangku Ngunti Palyantja
\p
\v 1 Tjukurpa nyangatja Mayatja Godalu wati ini Malakaila wangkangu Israelkunu tjuṯangka tjakultjunkunytjaku.\fig |src="co01432b.tif" size="col" loc="p" ref="1:1"\fig*
\p
\v 6 Nyanga alatji paluṟu wangkangu wati tjukurtjara tjuṯangka, “Ngayuluṉa Mayatja witulya puḻkangku nyurala wangkanyi, kaya kulinma! Panya tjitji tjuṯangku mamangka wangaṉarangku kulilpai, ka wati waṟkaripai tjuṯangku kuḻu mayatjangka wangaṉarangkuṯu kulilpai. Ka panya ngayulu nyurampa Mama munu Mayatja nyinanyi. Ka nyura nyaaku ngayula wangaṉarangku kulintja wiyangku wantinyi? Panya nyura ngayunya ananingi, munu nyura ngayunya kuliṟa wantingi. Palu nyura ngayula tjapilpai alatji, ‘Nyaala wanyu wangkara nyuntunya ananingi?’
\p
\v 7-8 “Wiya, nyura kuka tjiipi munu puluka pikatjara tjuṯa katira pungkula ngayunya ungkupai, kuṟu pati tjuṯa, nyumpu tjuṯa kuḻu. Palu nyanga puṟunykuṉa ngayulu pukuḻaripai wiya. Panya nyura nyanga alatji ngunti palyalpai. Ka ngayulu tjituṟu-tjituṟurinyi nyura ngunti palyannyangka. Uti nyura ngayunya kuka wiṟu mulapa katira ungama. Palu nyura kuka kurakura tjuṯa kutju katipai, ka nyara palulanguṟu ngayulu nyurampa ngaḻṯuringkunytja wiyangku wantinyi. Tjinguṟu nyura mayatja mantatja kuka nyanga puṟunypa pikatjara katira ungkunyangka wanyu paluṟu nyurampa nyakula pukuḻariku? Wiya, paluṟu wantiku. Ka nyura nyaaku ngayunya mayatja ilkaṟitja ngunti kuraṉi? Uti nyura kuka palya kutju katima pungkula ngayunya ungkunytjikitjangku, panya ngayuluṉa mayatja puḻka mulapa manta winkitjaku. Ka nyura uti ngayunya tjukaṟurungku pukuḻmanama.” Alatji Godalu wangkangu. 
\v 9 Ka nyura tjukurtjara tjuṯangku Godala puḻkaṟa tjapila nganampa ngaḻṯuringkunytjaku. Palu paluṟu nyura tjapinnyangka kuliṟa wantiku, panya nyura kuka kurakura tjuṯa ngunti katira ungkunyangka.
\c 2
\p
\v 1-2 Kulilaya wanyu wati tjukurtjara tjuṯangku Mayatja Godalu nyurala wangkanytja nyanga alatji, “Tjukurpa nyangatjaṉa ngayulu kuwari nyurala wangkanyi. Uti nyura ngayuku mukuringkulampa ngayunya wangaṉarangku kulinma kurunpa winkingku. Palu nyura panya ngayunya kulilwiyangku wantinyangkaṉa ngayulu kuwari nyuranya tjituṟu-tjituṟu palyaṉu. Panya ngaṉmanytjuṉa nyuranya pukuḻmaṟa kanyiningi, palu nyura ngayunya rawangku wantinyangkaṉa ngayulu nyuranya rawangkuṯu tjituṟu-tjituṟu palyalku.
\p
\v 7-8 “Uti nyura nintingkumpa wiṟu tjuṯa kutju nintinma aṉangu tjuṯangka nyurala kuliṟa tjukaṟuru nintiringkunytjaku. Panya ngayulu witulya puḻkangku nyuranya ngurkantaṟa tjunu tjukurtjara tjuṯa nyinanytjaku, panya iritiṉa Levikunu tjuṯa tjukurtjara tjuṯa tjunu ngayuku waṟka palyantjaku, palu puṟunytjuṉa nyuranya tjunu ngayuku waṟka tjukaṟurungku palyantjaku. Palu nyura ngayunya rawangku kuliṟa wantinyi, munu nyura aṉangu tjuṯa ngunti palyantjaku nintini. Ka nyanga palulanguṟu tjana nyurala kuliṟa ngunti tjuṯaku nintiringkunytjatjanungku kura tjuṯa palyaṉi.” Nyanga alatji Mayatja Godalu witulya puḻkangku nyurala wangkanyi wati tjukurtjara tjuṯangka.
\p
\v 13-16 Kaya wanyu aṉangu tjuṯangku ngapartji kulila! Panya nyura kuwari pukuḻpa nyinanytja wiyaringu panya nyura kuka katira pungkula Godanya ungkunyangka paluṟu nyurampa pukuḻarinytja wiyangku wantinyi. Ka nyura puḻkaṟa ulara iḻanypa puḻka tjutingi Mayatjaku pitjilpangka paluṟu nyurampa ngaḻṯuringkula pukuḻarinytjaku. Palu nyaaku Mayatjalu nyuranya nyakula nyurampa pukuḻarinytja wiya ngaṟanyi nyura ungkunytjitjaku? Wiya, panya nyura palunya wangaṉarangku kulintja wiyangku wantinyi. Palulanguṟu nyara paluṟu nyurampa pukuḻarinytja wiyaringu. Panya nyura ngaṉmanytju wati yangupalangkulpi kungka aḻṯira kalkuṉu kuringka tiṯutjara tjungu nyinanytjikitjangku, palu nyura kalkuntja panya palunya wantingu. Ka Godalu nyuranya minyma kutjupa tjuṯangka ngunti ngarinyangka nyakula pukuḻarinytja wiya alatjiṯu. Panya paluṟu nyupalinya kutjaritja kutjuṉu nyupali kutjuringkula kuriṟara pukuḻpa tjungu nyinanytjaku munu tjitjitjararingkula tjitjingka nintintjaku yaaltjingaṟa Godaku walytja wiṟuṟa nyinanytjaku. Uwa, kulilaya wati tjuṯa! Munuya nyurampa kuri minyma kutjupakitjangku wantikatinytja wiyangku wantima, panya watingku minyma kuri wantikatinyangka Mayatja Godanya pukuḻaripai wiya alatjiṯu. Ka nyura uti nyurampa kuri wantikatiwiyangku rawangku aṯunymaṟa kanyinma mukulyangku.
\c 3
\s1 Godalu Wati Tjakulpa Kuranyu Iyantjikitjangku Kalkuntja
\p
\v 1 Munu Mayatja Godalu witulya puḻkangku tjukurpa nyangatja kuḻu alatji wangkanyi nyurala, “Ngayuluṉatju tjakulpa iyalku ngayula kuranyu. Ka nyara paluṟu ankula kuranyungku ngayuku iwarankuku mayatja puḻka pitjanytjaku. Ka nyara palula maḻangka mayatja paluṟu wirkankuku, panya nyura palunya nyakunytjikitja aḻa-aḻa paṯaṟa nyinanyi. Ka paluṟu pitjala palumpa timpulangka nyinaku munu aṉangu tjuṯangka tjakultjunkuku ngayulu tjananya kalkuntja. 
\v 2 Palu tjiṉṯu nyara palula aṉangu uwankara puḻkaṟa nguḻuringkula palula miṟangka ngaṟaku. Panya paluṟu pitjanyi kura uwankara wiyantjikitja, panya minymangku mantara raputji paltjilpai kilina wiṟu ngaṟanytjaku, palu puṟunypa Godalu kura uwankara wiyalku.
\s1 Godalu Aṉangu Kura Tjuṯa Ngurkantaṟa Tjarantjikitjangku Kalkuntja
\p
\v 5 “Panya ngayuluṉa pitjaku nyuranya uwankara ngurkantaṟa tjarantjikitja. Munuṉa ngayulu puḻkaṟa wangkaku aṉangu panya kura palyalpai tjuṯa, panya mamungka kuliṟa iraṯingka kuralpai tjuṯa, munu kuri walytja wantikatira minyma kutjupangka ngaripai tjuṯa, munu kuutpangka ngunti wangkapai tjuṯa. Munuṉa mayatja kura tjuṯa kuḻu wangkaku, panya tjana waṟkaripai tjuṯa kuraṟa mani tjukutjuku ungkupai tjukaṟurungku ungkunytja wiyangku. Munu ngayulu tjananya puḻkaṟa wangkaku aṉangu panya wanakaḻa tjuṯaku tjiṯula tjuṯaku ngaḻṯuringkuwiyangku wantipai tjuṯa, munuṉa tjananya puḻkaṟa wangkaku aṉangu malikitja tjuṯaku ngaḻṯuringkuwiyangku wantinyangka. Panya aṉangu nyara paluṟu tjana ngayula wangaṉarangku kulilpai wiya, kaṉa tjananya uwankara puntuṟa wangkaku munuṉa tjananya ngurkantaṟa tjaralku. 
\v 6-7 Nyurampa panya walytjapiti iriti nyinanytjaya kulila, Jacobanya tjananya. Panya tjana iriti ngayula tungunpungkula kura palyaningi, kaṉa palunya tjananya tjara pungkula wiyaningi munuṉa tjara wanka kanyiningi. Ka kuwari nyura Jacobakunu maḻatja maḻatja tjuṯa palu puṟunypaṯu ngayula tungunpungkupai alatjiṯu ngayuku tjukurpa wangaṉarangku kulintja wiyangku. Ka ngayulu kuwari ngaṉmanypa puṟunytju nyuranya tjara pungkula wiyaṉu nyurampa panya walytja tjuṯa, munuṉa nyuranya nyanga maṉkurpa kutju wanka kanyini, panya ngayulu kampa kutjuparinytja wiya alatjiṯu paluṟuṯu nyinapai. Ka palulanguṟu nyura uti ngayulakutu maḻaku aṟuringama, kaṉa nyuranya piṟuku walytjanmankuku.
\s1 Godanya Tjukaṟurungku Ungkunytjaku
\p “Palu nyura ngayula tjapilpai alatji, ‘Nyaalkula maḻaku aṟuringkunytjikitjangku nyuntulakutu?’ 
\v 8 Palu alatji ngayula tjapintja wiyangkuya wantima. Panya ngayuluṉa nyurala tjapini alatji, ‘Mulapa wanyu palya ngaṟanyi aṉangungku Godanya ngunti kurantjaku palyangku-palku munu kura walytjangku kutitjunkunytjaku?’ Wiya alatjiṯu. Panya nyura mulapa ngayunya ngunti kuralpai. Panya nyura kutjupa kutjupa wiṟu mantjintjatjanungku ngayunya tjaraṟa ungkunytja wiyangku ngurtjungku uwankaraṯu kanyilpai. 
\v 9 Kaṉa ngayulu nyuranya puḻkaṟa wangkaku nyangatja nguraṟa uwankara, ka kura tjuṯa nyurala uwankarangka utiringkuku.
\p
\v 10 “Palu kulilaya! Ngayuluṉa ngaḻṯunytju puḻka mulapa nyinanyi. Kaya wanyu mukuringkulampa arkaṟa tjukaṟurungku palyaṟa kati ngayunya ungkunytjikitjangku munu nyura nyara palulanguṟulta nintiringkula kulilku, ‘Munta, Godanya ngaḻṯunytju puḻka nyinanyi munulanya munytjangku ungkupai.’ Kaya palulanguṟulta nyura mantjintjatjanungku uṯuḻu tjara kutjupatjara kutjupa 10-pa tjura uwankara lipula, munuṉiya palulanguṟu 10-nguṟu tjaraṟa kutju ngayunya uwa, munuya 9 maḻaringkula ngarinytja nyuranku kanyinma. Munuya rawangku nyanga alatji palyalkatima kutjupa kutjupa mantjintjatjanungku. Kaṉa ngayulu ngapartji nyurampa puḻka mulapalta palyalku. Munuṉa tiṯutjarangku nyurampa wiṟu tjuṯa kutju iyalku nyura pukuḻarinytjaku. 
\v 11 Munuṉa tjiṉṯilyka tjuṯa ukiṟi mai kuḻu ngalkuntjaku-tawara wiyalku. Ka nyurampa puṉu panya kiṟipitji tjuṯa mai puḻkatjararingkuku. 
\v 12 Kaya aṉangu tjuṯangku ngura malikitja tjuṯanguṟu nyakula kulilku alatji, ‘Munta, mulapa Godalu tjananya wiṟuṟa alatjiṯu aṯunytju kanyini. Ka tjanampa ngura wiṟu mulapa ngaṟanyi.’ Alatjiya nyakula kulilku.
\p
\v 13 “Palu nyura panya ngayunya rawangku ngunti wangkara kuranmanangi. Munu nyura ngayulu painnyangka ngayula ngunti tjapilpai, ‘Tjukurpa nyaangkala wanyu nyuntunya wangkara kuranmanangi?’ 
\v 14-15 Wiya, tjukurpa panya nyangatja nyura wangkangi, ‘Nyaakula tiṯutjarangku Godanya waṉaṟinama? Panya nganaṉa paluṟu wangkanytjitja uwankara wangaṉarangku kuliṟa palyaningi munula kura palyantjatjanu palula miṟangka tjituṟu-tjituṟurira piiwiyaringangi, ka paluṟu nganaṉanya nyakula nganampa pukuḻarinytja wiya alatjiṯu. Nyawa, aṉangu nyara kaṉany-kaṉanypa tjuṯa tiṯutjara alatjiṯu pukuḻpa nyinapai. Kaya aṉangu kura palyalpai tjuṯaya wiṟu tjuṯa mantjiṟa pukuḻpa nyinanyi, kala nganaṉa kutjupa kutjupa wiṟu tjuṯa kanyintja wiya alatjiṯu nyinanyi. Nyara paluṟu tjanaya tiṯutjarangku Godala miṟangka kura palyalkatipai kuṉṯa wiyangku, ka Godalu tjananya pungkunytja wiyangku wantipai.’ Alatji nyura ngunti wangkapai.”
\p
\v 16 Ka nyara palulanguṟu aṉangu panya Mayatja Godanya wangaṉarangku kulilpai tjuṯangku wangkara tjungungku kuliningi ngapartji-ngapartjingku. Ka Godalu tjananya kuliningi. Ka nyara palulanguṟu kutjupangku palumpa tjanampa ini nyiringka walkatjunu aṉangu maḻatja tjuṯangku ngula nyakula kulintjaku. 
\v 17 Munu palulanguṟu alatji wangkangu, “Nyanga paluṟu tjanaya ngayuku walytja mulapa nyinanyi. Kaṉa ngayulu ngula mantakutu pitjaku aṉangu manta winkitja ngurkantaṟa tjarantjikitja munuṉatju aṉangu nyanga palunya tjananya aṯunymaṟa wankaṟu kanyilku ngaḻṯunytjungku, panya mamangku tjitji aṯunytju kanyilpai, palu puṟunypa. 
\v 18 Kaya nyara palula aṟa aṉangu winkingku nyakuku kura puḻka mulapa utiringkunyangka ngayunya kuliṟa wantipai tjuṯangka. Ka wiṟu mulapalta utiringkuku aṉangu panya ngayula wangaṉarangku kulilpai tjuṯangka.”
\c 4
\s1 Tjiṉṯu Maḻatja
\p
\v 1 “Panya tjiṉṯu maḻatja wirkankunyangkaṉa wangkaku aṉangu panya kaṉany-kaṉanypa nyinapai tjuṯa munu tungunpungkula kura palyalpai tjuṯa waṟu puḻkangka waṉinytjaku ka tjananya kampaku, panya tjanpi waṟu puḻkangku kampara wiyalpai palu puṟunypa tjananya kampara wiyalku alatjiṯu. 
\v 2 Palu panya ngayula wangaṉarangku kulilpai tjuṯangka nyurala wiṟu mulapa utiringkuku, panya tjiṟirpingku mungawinki ngalya-pakaṟa irnyaṟa unytjunmankupai, palu puṟunypa Godalu nyurampa wiṟu mulapa palyalku, ka nyura pukuḻpa mulapa nyinaku. Panya puluka kuḻunypa tjuṯaya minangku puyinnyangka pukuḻarira waṟarakatira inkara para-para-wirtjapakalpai, palu puṟunypa nyura tjiṉṯu nyara palula pukuḻpa mulapa nyinaku. 
\v 3-4 Panya tjiṉṯu nyara palula nyura aṉangu panya kuliṟa wantipai tjuṯangka waintariku alatjiṯu, kaya paluṟu tjana tjaṟuringkula uparingkuku manta ulpuru puṟunypa.
\p “Kaya tjukurpa panya ngayulu Mosenya ungkunytja rawangku wangaṉarangku kulinma, panya ngayulu palunya ungu puḻi panya murpu Tjaniyala aṉangu Israelkunu tjuṯaku nyura uwankarangku wangaṉarangku kuliṟa palyantjaku. Uwa, ngayulaṉa Mayatja Godalu witulya puḻkangku nyurala wangkanyi.”
\p
\v 5 “Kulilaya! Ngula tjiṉṯu panya paluṟu wirkankuku puḻka mulapa uwankara urulyaraṟa nguḻuringkunytjaku. Palu tjiṉṯu panya palula kuwaripangkaṉa ngayulu wangkatjara Ilaitjanya iyalku, 
\v 6 ka paluṟu wangkara nintilku mamangka ngunytjungka tjana tjitji walytjangku mukulyangku aṯunymankunytjaku. Munu paluṟu tjitji tjuṯangka ngapartji nintilku tjana kuḻu ngunytjungka mamangka wangaṉarangku mukulyangku kulintjaku. Ka tjinguṟu tjukurpa nyanga palunya nyura wangaṉarangku kulilwiyangku wantinyangkampa ngayulu pitjaku munuṉa nyurampa ngurangka tjituṟu-tjituṟu puḻka palyalku.”