\id JAS ‘PT JAS 02ed’ Pitjantjatjara James 20-FEB-03 (Paul & Ann Eckert (SIL/FRM), c/o PO Box 2129 Alice Springs, NT 0871. Ph: +61-8-82924808 Fax: 08-89524894. E-mail: paul.eckert@biblesociety.org.au
\ide UTF-8
\h Jamesaku
\toc2 Jamesaku
\toc1 Lita Jamesalu Walkatjunkunytja (James)
\mt1 Lita Jamesalu Walkatjunkunytja
\mt2 James
\imt1 Nyangatja Ngaṉmanytju Nyakula Wangkanytjaku
\ip Nyangatja Godaku tjukurpa wati ini Jamesalu walkatjunkunytja Jesuku panya maḻanytju. Panya paluṟu ngula kutju Jesuku mulamularingu paluṟu ilunytjatjanu pakannyangka maḻangka munu nyara palulanguṟu kutju mulapa kulinu Jesunya Godaku katja nyinanytja. Ka ngula paluṟu ingkaṯa puḻka nyinangi munu Jesuku walytja tjuṯa aṯunymanangi Jerusalemala nyinanytja tjuṯa. Ka wati panya Paulalu palunya ngurkantanu tjukurtjara Jesulu panya iyantjanya.
\ip Ka Jamesalu lita nyanga palunya walkatjuṟa iyaṉu ngura parari nyinanytja tjuṯakutu aṉangu Jew Jesuku walytja kutjupa tjuṯakutu. Munu paluṟu alatji wangkangu palula tjanala, “Palya nyura Jesuku mulamularinganyi, palu uti nyura mulamularingkunytjatjanungku palula wangaṉarangku kuliṟa palyanma paluṟu wangkanytjitja uwankara.” Alatji Jamesalu Jesunya waṉalpai tjuṯangka wangkangi munu paluṟu tjanala tjukurpa tjuṯa tjakultjunangi tjana kuliṟa tjukurpa Jesunyatjara tjukaṟurungku kulintjaku munu palunya mulamulangku waṉantjaku.
\iot Tjukurpa nyanganpa ngarinyi:
\io1 1:1-18 Godanya pakuringkuwiyangku waṉantjaku
\io1 1:19-27 Godaku tjukurpa wangaṉarangku kuliṟa palyantjaku
\io1 2:1-13 Aṉangu uwankaraku tjungu mukuringkunytjaku
\io1 2:14-26 Mulamularingkupai tjuṯangku wiṟu tjuṯa kutju palyantjaku
\io1 3:1-18 Tjukurpa wiṟu tjuṯa kutju wangkanytjaku tjaa kura nyinawiyangku
\io1 4:1—5:6 Godala wangaṉarangku kulintjaku tjukurpa mantatja tjuṯa wantira
\io1 5:7-12 Kuraṟa pungkunyangka pukuḻpa nyinanytjaku
\io1 5:13-20 Godala tjukaṟurungku tjapintjaku
\ie
\c 1
\s1 Jamesalu Ngaṉmanytju Wangkanytja
\p
\v 1 Ngayuluṉa Jamesanya panya Mama Godaku Mayatja Jesuku Christaku waṟkaripai nyinanyi. Munuṉa lita nyangatja nyurampa walkatjunanyi Godaku walytja tjuṯaku, panya nyura ngura kutjupa kutjupa tjuṯangka parari nyinanyi.
\s1 Godanya Pakuringkuwiyangku Waṉantjaku
\p
\v 2-3 Walytja tjuṯa, kura kutjupa kutjupa tjuṯa nyurala wirkankunyangkampa nyura uti pukuḻarima. Munu kutjupa tjuṯangku nyuranya kurantjikitja ngunti wituwitunnyangkampa nyura uti tjananya kuliṟa wantima, munuya tjituṟu-tjituṟurinytja wiya pukuḻpa nyinama. Panya nyuranya kurannyangka nyura nintiringkuku Jesunya kutju tungun-tunguntu waṉantjikitja. 
\v 4 Munu nyura uti pakuringkunytja wiyangku tiṯutjarangku waṉanma munu nyara palulanguṟu nyura paluṟu mukuringkunytja uwankara rawangku palyaṟa ma-kuṉpuringkula witu ngaṟaku.
\p
\v 5 Tjinguṟu kutjupa-aṟa nyurala alatjirinyangka nyura puṯu kulilku alatji, “Nyaalkuṉa? Yaaltjingaṟaṉa palyalku?” Palu utin puṯu kulintja wiyangku Godala tjapinma panya paluṟu tjapinnyangka wantinytja wiyangku wangaṉarangku kulilpai munu alpamilalpai. 
\v 6-8 Ka nyura Mama Godala tjapiṟampa uti palumpa mulamularingama alatjiṯu kampa kutjara kulintja wiya munu kulinma alatji, “Godaluṉi mulapa alpamilalku.” Panya kampa kutjara kulilpai tjuṯa uṟu puṟunypa, panya waḻpangku uṉṯunnyangka para-uripai tiṯutjara, nyara palu puṟunypa kampa kutjara kulilpai tjuṯa nyinanyi, tjukaṟuru wiya, kaḻikaḻi. Munu tjinguṟu tjana kulilpai alatji, “Ngayulu Godala tjapinnyangka mulapa paluṟu ngayunya alpamilalku.” Palu wiya, kampa kutjara kulinnyangka Godalu puṯu alpamilalpai.
\p
\v 9 Tjinguṟu Jesuku walytja kutjupa tiṯutjara mani wiya nyinanyi, munu uti paluṟu pukuḻarima tjituṟu-tjituṟurinytja wiya, panya Godalu palunya Christala tjunguṟa walytjanmanu. 
\v 10 Ka palu puṟunypa Jesuku walytja kutjupa tjinguṟu mani puḻkatjara nyinanyi munu uti paluṟu pukuḻarima Godalu palunya Christala tjunguṟa walytjanmankunyangka kutju maninguṟu wiya. Tjinguṟu Godalu palumpa mani winki wiyalku, ka paluṟu ngaḻṯutjara nyinaku mani tjukutjukutjara. Palu uti paluṟu mani wiya pukuḻpaṯu nyinama, panya paluṟu mani puḻkatjara pukuḻpa nyinangi, palu puṟunypaṯu uti paluṟu pukuḻpa nyinama. Panya mani puḻkangku puṯu Godaku walytjaringkunytjaku palyaṉi. Palu panya aṉangu mani puḻkatjara nyinanytjatjanu inuntji puṟunypa ilura wiyaringkupai. 
\v 11 Panya tjiṉṯungku pakaṟa katuringkula uwankara kampapai. Ka palulanguṟu inuntji panya wiṟu tjuṯa piḻṯiringkula punkalpai kampanyangka. Nyara palu puṟunypa aṉangu mani puḻkatjara wiyaringkuku watarku waṟkarinytjatjanu.
\p
\v 12 Uwa, kutjupa tjuṯangku nyuranya kuraṟa pungkunyangka nyura uti kuliṟa wantima munu tungun-tunguntu Godanya waṉanma. Ka Godanya nyakula nyurampa puḻkaṟa pukuḻariku, munu nyuranya wanka tiṯutjara nyinanytjaku wangkaku, panya alatji paluṟu kalkuṉu palumpa mukuringkupai tjuṯangka.
\p
\v 13 Ka tjinguṟu kutjupa tjuṯangku nyuranya kura palyantjaku wituwitunnyangka nyura uti ngunti wangkawiyangku wantima alatji, “Godaluṉi uṉṯuṉi kura palyantjaku.” Panya Godalu kura palyantjaku uṉṯulpai wiya, panya kutjupangku puṯu Godanya arkaṉi kura palyantjaku. 
\v 14 Panya aṉangu nyara paluṟu alatjiṯu kura palyantjikitja mukuringkupai, paluṟu kutju, munu paluṟu unngu kuliṟa mukuringkula palyalpai alatjiṯu. 
\v 15 Uwa, paluṟu alatjiṯu mukuringkula kura palyalpai, munu palulanguṟu kura tiṯutjarangku palyalkatinyi wantinytja wiyangku munu kurangka kutju tjakaringanyi. Ka Godalu palunya ngula paiṟa iyalku palula tjungu nyinanytja wiya, ngura kurangka nyinanytjaku.
\p
\v 16 Ngayuku walytja tjuṯa, aṉangu kutjupa tjuṯangku ngunti kurannyangka nyura uti kulilwiyangku wantima, munu ngayulu panya wangkanytja kutju tjukaṟurungku kulinma. 
\v 17 Uwankara panya Godalu nganampa palyantja palya alatjiṯu ngaṟanyi, kura wiya. Godalu panya tjiṉṯu, piṟa, kililpi palulpaingku wiṟu tjuṯa nganampa palyalpai. Munu paluṟu kutjuparinytja wiya paluṟuṯu alatjiṯu nyinanyi, munulanya tiṯutjarangku wiṟuṟa kanyilpai wantinytja wiyangku. 
\v 18 Panya paluṟu nganampa puḻkaṟa mukuringangi nganaṉa palumpa walytja mulapa nyinanytjaku. Munu panya palulanguṟu tjukurpa tjukaṟuru Christanyatjara nganaṉala utinu nganaṉa mulamularingkula palumpa walytja mulapa nyinanytjaku.
\s1 Godaku Tjukurpa Wangaṉarangku Kuliṟa Palyantjaku
\p
\v 19 Walytja tjuṯa, wanyuya kulinma. Aṉangu kutjupangku wangkanyangkaya mapalku waṟuringkula mirpaṉarinytja wiyangku wantima. Palu purkaṟangkuya kulinma munu mapalku wangkanytjikitjangku kulintja wiyangku wantima. 
\v 20 Tjinguṟu nyura mirpaṉarirampa Godaku tjukurpa puṯu tjukaṟurungku palyalku. 
\v 21 Nyura uti kura kutjupa kutjupa uwankara wantima nyura unngu kulintja uwankara. Panya Godalu nyurala unngu tjunu palumpa tjukurpa kutju nyura tjukaṟurungku kulintjaku, panya watingku uṉinypa tjunkupai mantangka pakantjaku, palu puṟunypa Godalu tjukurpa nyurala unngu tjunu. Ka nyura palula kutjungka wangaṉarangku kulinnyangkampa paluṟu nyuranya wankaṟunkuku palula tjungu tiṯutjara nyinanytjaku. Palulanguṟuya kura kutjupa kutjupa uwankara nyura unngu kulintja wantima alatjiṯu.
\p
\v 22 Nyura uti Godaku tjukurpa wangaṉarangku kuliṟa palyanma, pinangku kutju kulintja wiyangku. Panya nyura pinangku kutju kuliṟa nyuranku Godaku walytjanmankupai, palu wiya, nyura alatji ngunti wangkapai. 
\v 23-24 Tjinguṟu aṉangungku paluṟunku yunpa walytjangku kalawatjangka purkaṟangku nyakupai. Munu palulanguṟu paluṟu ankula mapalku watarkuripai palumpa yunpaku. Ka nyara palu puṟunypa aṉangu kutjupa tjuṯangku Godaku tjukurpa nyakula wangkara purkaṟangku kulilpai munuya palulanguṟu ankula mapalku watarkurira palyantja wiyangku wantipai. Nyanga alatji tjana pinangku kutju kulini wangaṉarangku kuliṟa palyantja wiyangku.\fig |src="GT_JAM 1v23-24.tif" size="col" loc="-" ref="1:23-24"\fig* 
\v 25 Panya Godaku tjukurpa kalawatja puṟunypa, munu nganaṉanya nintilpai yaaltjingaṟa Godalu nganaṉanya kuranguṟu wankaṟunu nganaṉa palula wangaṉarangku kulintjaku. Ka aṉangungku palumpa tjukurpa rawangku nyakula wangkara purkaṟangku kulinnyangka munu wangaṉarangku kuliṟa palyannyangka kuḻu Godalu palunya puḻkaṟa pukuḻmankuku.
\p
\v 26 Tjinguṟu aṉangungku kulilpai alatji, “Ngayulu Jesuku walytja mulapa tjana puṟunypa wiya, tjukaṟurungku palyalpai.” Palu tjinguṟu tjaḻinypa kurangku wangkara paluṟunku ngunti rawangku mirawaṉipai tjukaṟurungku-palku. 
\v 27 Palu nyanga alatji Jesuku walytja mulatu palyalpai panya tjitji tjiṯula, minyma wanakaḻa tjuṯa munu ngaḻṯutjara tjuṯa kuḻu mukulyangku alpamilaṟa aṯunymankupai, munu kura tjuṯangka tjunguringkupai wiya mauṉṯalpa nyinapai. Nyara palu puṟunyku Godanya nyakula pukuḻaripai.
\c 2
\s1 Aṉangu Uwankaraku Mukulya Nyinanytjaku
\p
\v 1 Walytja tjuṯa, nyura uti aṉangu uwankaraku mukulya nyinama tjara wantinytja wiya, panya nganaṉa uwankara Jesuku walytjapiti, ka paluṟu nganampa Mayatja witulya puḻka mulapa. Wanyuya kulila, kaṉa aṟa nyangatja nyurala wangka nyura kulintjaku. 
\v 2 Nyura tjinguṟu tjunguringkula nyinaku Godanya waḻkuntjikitja, ka wati kutjara pitjaku nyuralakutu nyurala tjunguringkula waḻkuntjikitja. Kutju mantara wiṟu mulartjara munu manyirkitja wiṟutjara panya gold-nguṟu palyantjitja. Palu panya wati kutjupa ngaḻṯutjara mulapa, mantara kurakuratjara.\fig |src="GT_JAM 2v3 rich and poor.tif" size="col" loc="p" ref="2:3"\fig* 
\v 3 Ka tjinguṟu aṉangu kutjungku nyuralanguṟu pukuḻarira wangkaku wati panya mantara wiṟutjarangka, “Pitjala nyangangka nyinakati wiṟungka nyanga.” Munu wati panya ngaḻṯutjarangka kuraṟa wangkaku, “Nyuntu nyarangka wati-pitjala ngaṟama nyara paṯu.” Ka alatji palya wiya. 
\v 4 Panya paluṟu wiṟutjaraku kutju ngurkantaṟa pukuḻarinyi munu wati ngaḻṯutjara papulaṟa paini. Ka nyura nyanga alatji palyaṟa puṯu tjukaṟurungku ngurkantananyi, palu nyura uti pulampaṯu puḻkaṟa mukuringama kutju kurantja wiya.
\p
\v 5-7 Uwa, walytja tjuṯa, kulilaya. Nyaaku nyura Jesuku walytja tjuṯangku ngaḻṯutjara tjuṯa ngunti mirpaṉṯu kuraṉi? Panya nyura mani puḻkatjara tjuṯa pitjanyangka nyakula pukuḻarira aḻṯira kuranyu nyinatjunkupai wiṟungka. Palu aṉangu nyara paluṟu tjana nyuranya pauntjingaṟa wangkapai, munuya nyuranya ngaḻṯuringkuwiyangku witiṟa kuutpakutu katipai munu wati ngurkantankupaingka kuranyu ngaṟatjunkula nyuranya kuranmankupai. Wiya, aṉangu nyara paluṟu tjana panya nyurampa mayatja analpai, Jesunya panya. Palu panya Godalu aṉangu ngaḻṯutjara tjuṯa ngurkantanu paluṟu tjana palumpa puḻkaṟa mulamularingkunytjaku. Munu paluṟu tjananya walytjanmaṟa wiṟuṟa aṯunymaṟa kanyini palula tjungu, panya paluṟu alatji kalkuṉu palumpa mukuringkupai tjuṯa wiṟuṟa kanyintjikitjangku. Ka nyura palu puṟunypaṯu ngaḻṯutjara tjuṯa kurantja wiyangku wiṟuṟa kanyinma.
\p
\v 8 Panya Godalu tjukurpa puḻka tjuṯa iriti walkatjunkunytja ngarinyi nyiringka, palu tjukurpa kutju puḻka mulapa uwankarangka waintarinytja nyanga alatji,
\mi “Aṉangu kutjupa uwankaraku puḻkaṟa mukuringama, panya nyuntunkun walytja mukuringkupai, palu puṟunypa.” \x * \xo 2:8 \xo*\xt Leviticus 19:18\xt*\x*
\m Ka tjukurpa nyanga palunya wangaṉarangku kuliṟa palyaṟampa nyura tjukaṟuru palyanyku nyinaku. 
\v 9 Tjinguṟu nyura aṉangu kutjupa tjaraku kutju nyakula pukuḻarinyi munu tjara kutjupa nyakula wantinyi, ka alatji palya wiya. Panya nyura tjukurpa nyara palunya kulintja wiyangku wantira kuraṉi.
\p
\v 10 Uwa, Godalu tjukurpa paintjitja tjuṯa nganampa wangkara tjunu. Ka tjinguṟu aṉangu kutjupangku tjukurpa kutju kulilwiyangku wantinyi, ka aṉangu kutjupangku tjukurpa uwankara kulilwiyangku wantinyi. Palu Godalu palunya pulanyaṯu tjungu kura ngurkantananyi munu paini. 
\v 11 Panya Godalu wangkangu alatji, “Aṉangu kutjupangka kampangkaṯu ngariwiyangku wantima, munu kuri walytjangka kutju ngarima.” Munu piṟuku kutjupa kuḻu wangkangu nyanga alatji, “Aṉangu iluntankunytja wiyangku wantima.” Ka tjinguṟu nyupali kuriṟara tjungu ngarinyi palatja palya, palu nyuntu piṟuku aṉangu kutjupa iluntankunyangkampa Godalu nyuntunya paini alatjiṯu wantinytja wiyangku, panya tjukurpa palumpa nyuntu kuraṉu alatjiṯu.
\p
\v 12 Panya Godalu nyuranya kurangka nyinanyangka mantjinu nyura palumpa tjukurpa kutju kulintjaku. Munu tjukurpa nyara palulanguṟu paluṟu nyuranya ngula ngurkantankuku, tjinguṟu nyura palumpa tjukurpa kulinu, munta tjinguṟu wiya. Kaya palulanguṟu purkaṟangku kulinma nyura wangkanytja, munu kulintja, munu palyantja uwankara, panya ngula Godalu nyuranya kutju kutju ngurkantananyi. 
\v 13 Tjinguṟu nyura aṉangu kutjupaku nyakula ngaḻṯuringkunytja wiya nyinanyi, ka Godanya ngapartji nyurampa ngaḻṯuringkunytja wiyaringkuku tjiṉṯu panya maḻatjangka. Palu tjinguṟu nyura aṉangu tjuṯaku ngaḻṯunytju nyinanyangkampa Godalu ngapartji palu puṟunytjuṯu nyuranya ngaḻṯunytjungku aḻṯiku, ka nyura palula miṟangka nguḻu wiya rapa ngaṟaku.
\s1 Mulamularingkupai Tjuṯangku Wiṟu Kutju Palyantjaku
\p
\v 14 Kulilaya tjukurpa nyangatja. Panya aṉangu kutjupa tjinguṟu mukulya wiya nyinanyi munu paluṟu tjinguṟu wangkaku alatji, “Ngayulu mulamularinganyi Godaku.” Palu wiya, paluṟu alatji ngunti wangkanyi panya paluṟu Godaku tjukurpa tjukaṟurungku kulilpai wiya munu aṉangu tjuṯaku ngaḻṯuringkupai wiya. Paluṟu tjaangku kutju ngunti wangkanyi. Ka Godalu wanyu palunya wankalku alatji wangkanyangka? Wiya alatjiṯu.
\p
\v 15-16 Wanyu kaṉa tjukurpa nyangatja nyurala wangka nyura uti kulintjaku. Tjinguṟu Jesuku walytja kutjupa mantara wiya mai wiya nyinanyi. Ka tjinguṟu nyuntu palunya nyakula pukuḻmankuku alatji wangkara, “Pukuḻpa nyinama, panya Godalunta mai ungkuku mantara kuḻu unytjunpa nyinanytjaku.” Palu nyuntu alatji wangkangku kutju wangkanyangka paluṟu paḻtjaringkunytja wiya munu unytjunarinytja wiya. Kulila, nyuntu palunya pukuḻmankunytjikitja mukuringkula mai mantara ungama tjukurpa kutju wangkanytja wiyangku. Nyara palulanguṟu kutju paluṟu pukuḻariku.\fig |src="JK_JAM2v15 -faith in action.tif" size="col" ref="2:15-16"\fig* 
\v 17 Uwa, uti nyura Godaku mulamularingkunytjatjanungku wiṟu tjuṯa palyanma aṉangu tjuṯaku. Panya wiṟu tjuṯa palyantja wiyangku wantirampa nyuranku ngunti Godaku walytjanmananyi.
\p
\v 18 Palu aṉangu kutjupangku tjinguṟu alatji wangkaku, “Wiya, palya nyuntu wiṟu tjuṯa palyalpai, palu ngayulu mulamularingkupai kutju.” Palu wiya, panya ngayulu Godaku mulamularingkunytjatjanungku wiṟu tjuṯa palyalpai alatjiṯu pukuḻtju puḻkangku. Ka nyara palulanguṟu wiṟu tjuṯa palyannyangka nyakulaya ngayunya ngurkantaṟa kulilpai, “Ai, nyara paluṟu Godaku walytja mulapa, panya paluṟu wiṟu tjuṯa pukuḻtjungku palyalpai.”
\p
\v 19 Uwa, nyuntu mulamularinganyi Godaku, panya paluṟu kutju puḻka mulapa nyinanyi. Palu kulila, mamu tjuṯa kuḻu Godaku mulamularingkupai, palu nyara paluṟu tjana Godala wangaṉarangku kulilpai wiya munuya puḻkaṟa nguḻuringkula tjititingkupai. Ka nyuntu mulamularingkunytjatjanungku wiṟu tjuṯa palyantja wiya nyinarampa mamu palunya tjananya puṟunypaṯu nyinanyi. 
\v 20-22 Uwa, nyuntu ngunti wangkapai nyinanyi.
\p Palu wanyu nintiringkunytjikitjangku kulila tjukurpa panyatja, panya Aipuṟamanya Godalu walytjanmankunytja. Palu nyaanguṟu palunya walytjanmanu? Wiya, wati nyara paluṟu panya mulamularingkula wangaṉarangku kulinu Godalu palunya wangkanyangka, munu paluṟu palumpa katja katingu alatjiṯu pitjilta katu tjunkula pungkula Godanya ungkunytjikitjangku, munu panya nguwanpa wakaṟa iluntanu. Ka nganaṉa tjukurpa nyangatja kulintjatjanungku kulini panya mulapa paluṟu kutjaraṯu kuliningi mulamularingkunytja munu wangaṉarangku kuliṟa palyantja. 
\v 23 Ka tjukurpa nyanga paluṟu nyiringka ngaṟanyi iriti walkatjunkunytja nyanga alatji,
\mi “Aipuṟamanya mulamularingu Godaku. Ka nyara palulanguṟu Godalu palunya mulamularingkunyangka nyakula tjukaṟurunmankula walytjanmanu.” \x * \xo 2:23 \xo*\xt Genesis 15:6\xt*\x*
\m Munu Godalu Aipuṟamanya wangkangu, “Nyuntu ngayuku maḻpa nyinanyi, walytja mulapa.” 
\v 24 Ka aṟa nyanga palulanguṟula uti nintiringama munula Godaku mulamularingkunytjatjanungku wangaṉarangku kuliṟa tiṯutjarangku palyanma wiṟu tjuṯa kutju. Ka nyara palulanguṟulta Godalu nganaṉanya walytjanmankuku nganaṉa mulamularingkunyangka nyakula munu tjukaṟurungku wiṟu tjuṯa palyannyangka kuḻu.
\p
\v 25 Wanyuya kulinma minyma panya Rayapanya. Panya paluṟu wati tjuṯangka ngunti ngaripai. Palu nyara palulanguṟu paluṟu wati Godaku walytja kutjara kutitjuṟa kanyiningi wati nguratja tjuṯangku iluntankunytjaku-tawara. Munu pulanya minyma paluṟu nintinu iwara kutjupawanu kumpiṟa ankunytjaku. Ka Godalu nyangu minyma nyara paluṟu wiṟuṟa aṯunymankunyangka, munu palunya walytjanmanu palula miṟangka wiṟuṟa palyannyangka.
\p
\v 26 Kaya nyangatja kulinma panya aṉangu kurunpa wiya puṯu wanka nyinapai munu paluṟu ilupai alatjiṯu. Ka palu puṟunypa aṉangu kutjupangku mulamularingkunytjatjanungku wiṟu tjuṯa palyalwiyangku wantira ilunytja puṟunypa nyinanyi. Ka nyura uti mulamularingkunytjatjanungku wantinytja wiyangku wiṟu tjuṯa palyalkatima.
\c 3
\s1 Tjaa Kura Nyinawiyangku Wiṟu Kutju Wangkanytjaku
\p
\v 1 Walytja tjuṯa, wanyuya kulila. Panya Godalu aṉangu nintilpai tjuṯa puḻkaṟa alatjiṯu nyanganyi palumpa tjukurpa tjukaṟurungku nintinnyangka ngurkantankunytjikitjangku. Ka nyara palulanguṟu nyura uwankarangku tjukurpa nintintjikitja mukuringkunytja wiyangku wantima, ka tjarangku kutju nintinma atatjuṟa kuliṟa. Panya Godalu nintilpai tjuṯa puḻkaṟa nyanganyi aṉangu kutjupa tjuṯangka waintaṟa. 
\v 2 Nganaṉa kutjupa-aṟa uwankarangku kura palyalpai. Palu panya aṉangu palya mulapa nyanga alatji nyinapai paluṟu kutjupa tjuṯa kuralpai wiya munu kampangkaṯu wangkapai wiya, wiṟu kutju wangkapai. Uwa, aṉangu paluṟu wiṟu kutju wangkarampa palyanyku tjukaṟuru nyinapai. Kala uti palu puṟunypaṯu tjaḻinypa uriṟa wiṟu kutju wangkama.
\p
\v 3-5 Palu tjaḻinypa panya nyanytjuku puṟala puṟunypa, panya watingku nyanytju tjaangka puṟala tjunkupai, ka nyanytjungku wangaṉarangku kulilpai wati paluṟu ilaṟa pinkurtjingannyangka. Puṟala paluṟu tjukutjuku, palu nyanytju puḻkanya puṟalangku pinkurtjingalpai. Ka palu puṟunypa nganampa tjaḻinypa tjukutjukuṯu ngaṟanyi, palu tjukutjuku nyanga paluṟu wangka puḻkalpai, ka puḻkaringkula lipiringkupai, ka aṉangu tjuṯangku kulilpai.
\p Munuya pauta kuḻu palu puṟunypa kulila. Panya pauta nyara paluṟu puḻka, palu wati kutjungku uṟungka pinkurtjingaṟa katiṟinkupai paluṟu mukuringkunytjitjakutu. Panya paluṟu maḻarkunguṟu puṉu tjukutjuku uritjingalpai, ka puṉu tjukutjuku paluṟu pauta panya puḻkanya pinkurtjingalpai. Ka palu puṟunypaṯu nganampa tjaḻinypa tjukutjukuṯu ngaṟanyi, palu tjukutjuku nyanga paluṟu wangka puḻkalpai, ka aṉangu tjuṯangku kulilpai.\fig |src="GT00133.tif" size="col" loc="p" ref="3:3-5"\fig*
\p
\v 6 Wanyuya kulila waṟu ngapartji. Panya purku tjukutjuku puuṟa tilinnyangka tilingaṟala puḻkaringkupai. Ka palu puṟunypa nganaṉa tjaḻinypa tjukutjuku uriṟa wangkanyi, ka wangka puḻkaringanyi, ka panya aṉangu tjuṯangku kulini. Ka mamungku panya tjaḻinypa kura tjuṯa wangkanytjaku palyalpai, ka wangka paluṟu waṟu puṟunytju lipiringkula aṉangu tjuṯa kuralpai.\fig |src="MB_JAM 3v6 embers.tif" size="col" loc="p" ref="3:6"\fig*
\p
\v 7 Munu kuka tjuṯa kuḻuya ngapartji kulila. Panya kuwaripatjaranguṟu aṉangu tjuṯangku kuka kutjupa kutjupa tjuṯa witiṟa nintiningi tjuḻpu, liru, uṟutja tjuṯa kuḻukuḻu tjananya wangaṉarangku kulintjaku, ka kuwari nintintjaku ngaṟanyiṯu. 
\v 8 Palu wanyu kulila. Kutjupangku tjaḻinypa nyangatja nintintjaku ngaṟanyi? Wiya alatjiṯu. Kutjupangku puṯu nintini tjaḻinypa nyanga palunya wiṟu tjuṯa kutju wangkanytjaku. Panya tjaḻinypa nyangatja kura puḻkatjara aṉangu mukuringkunyangka tiṯutjara urira wangka puḻkalpai munu aṉangu iluntankupai alatjiṯu, panya lirungku patjaṟa iluntankupai, palu puṟunypa.
\p
\v 9 Ka nganaṉa kutjupa-aṟa tjaḻinypa uriṟa Mayatja Godanya waḻkulpai, munula piṟuku aṉangu tjuṯa warkipai tjaḻinypa panya palunya urira, aṉangu panya Godalu palunya puṟunypa nyinanytjaku paluntja tjuṯa. 
\v 10 Ka alatji palya wiya. Uti nganaṉa palya munu kura tjunguṟa wangkawiyangku wantima. 
\v 11 Panya warngalyku kutjunguṟu mina palya munu kura tjungu pakalpai wiya. 
\v 12 Ka palu puṟunypa mai alipa tjuṯa puṉu iḻingka pakalpai wiya, munu iḻi tjuṯa puṉu kiṟipitjingka pakalpai wiya alatjiṯu. Nganaṉa mina palya puṯu mantjilpai mina tjaltutjaranguṟu. Kala uti aṟa nyanganpa kulintjatjanungku tjaḻinypa uriṟa palya munu kura tjunguṟa wangkawiyangku wantima.
\p
\v 13 Aṉangu kutjupa wanyu nyuralanguṟu nintipuka nyinanyi tjukaṟurungku kulilpai? Munu uti paluṟu tjukaṟuru nyinama, munu aṉangu uwankaraku mukuringama munu pukuḻṯu alpamilanma kurunpa tjaṟuringkula, kaṉany-kaṉanyarira walytjangku mirawaṉinytja wiyangku. Ka nyara palulanguṟu kutjupa tjuṯangku nyakula kulilku, “Mulapa paluṟu nintipuka nyinanyi, tjukaṟurungku kulilpai.”
\p
\v 14 Palu tjinguṟu nyura aṉangu kutjupa tjuṯaku nyakula rawa nyaṟaringkupai munu tjananya kuranmankupai. Munu tjinguṟu nyura aṉangu ngaḻṯutjara nyakula kutjupa kutjupa nyura kanyintja ungkunytja wiyangku ngurtjungku kanyilpai. Munu tjinguṟu nyura alatji mukulya wiya nyinara kaṉany-kaṉanytju wangkara walytjangku wiṟunmankupai palya-palku nyinara. Palu wiya, nyangatja kura. Uti nyura mukulya wiya nyinanytjatjanungku ngunti walytjangku mirawaṉiwiyangku wantima munuyanku tjukaṟurungku kulinma. 
\v 15 Godalu wanyu nyuranya nintinu alatji kulintjaku? Wiya alatjiṯu. Nyangatja nyura mamungka kuliṟa nintiringu aṟa mantatja, panya mamungku alatji nintilpai, Godalu wiyangku. 
\v 16 Panya aṉangungku walytjangku puḻkanmaṟa kutjupa tjuṯaku nyaṟaringkula pikaringkunyangka pika paluṟu lipiringkupai aṉangu winkingka, ka nyara palulanguṟu kura puḻkaringkupai.
\p
\v 17 Palu panya Godalu nintipuka puḻkangku nganaṉanya nintilpai palya mulapa nyinanytjaku pukuḻpa kalypa mulapa aṉangu tjuṯangka tjungu. Nyara paluṟu kutjungku nintilpai aṉangu tjuṯangka purkaṟangku kulintjaku, munu kuranyitja tjuṯangka wangaṉarangku kulintjaku munu tjungungku palyantjaku, munu ngaḻṯunytjungku aṯunymaṟa kanyintjaku, munu aṉangu uwankaraku puḻkaṟa mukuringkunytjaku tjara wantinytja wiya, munu wangkara kalkuntjatjanungku tjukaṟurungku palyantjaku, tjaangku kutju wangkanytja wiyangku. 
\v 18 Uwa, Godalu kutjungku nganaṉanya nintilpai aṉangu tjuṯangka tjunguringkula pukuḻpa kalypa nyinanytjaku. Ka nganaṉa aṉangu tjuṯa ngapartji-ngapartji pikaringkunyangka markulku pika wantira kalypa nyinanytjaku. Kaya palulanguṟu kalyparingkula pukuḻpa tjungu nyinaku Godalu nyakula pukuḻarinytjaku.
\c 4
\s1 Godala Wangaṉarangku Kulintjaku
\p
\v 1 Nyaanguṟu nyuranku pikaringkula pungkula waṉinyi, nyaa-tjiratjangku? Munta tjinguṟu nyura alatji tiṯutjara pukuḻpa-palku nyinanytjikitja mukuringanyi munu nyura ngunti tiṯutjarangku kura palyalpai nyuranku pukuḻmankunytjikitjangku. 
\v 2-3 Panya nyura aṉangu kutjupangku kutjupa kutjupa tjuṯa kanyinnyangka nyakula mukuringkupai munu nyura aṉangu panya palunya iluntankupai palumpa kutjupa kutjupa tjuṯa mantjintjikitjangku. Munu nyura aṉangu kutjupa tjuṯaku kuḻu nyakula nyaṟaringkupai panya nyura aṉangu nyara paluṟu tjana puṟunytju wiṟu tjuṯa kanyintja wiya. Nyara palulanguṟu nyura pikaringkula tiṯutjarangku ngaparku wangkapai.
\p Palu nyaanguṟu nyura pala mukuringkunytja palunya puṯu mantjini? Wiya, nyura Godala tjapintja wiyangku wantira puṯu mantjini. Munta tjinguṟu nyura Godala tjapini, palu Godalu nyuranya kulintja wiyangku wantinyi, panya nyura tjinguṟu nyuranku kutju walytjangku tjapini walytja pukuḻarinytjikitjangku.
\p
\v 4 Mulapa nyura Godanya wantinyi. Nyara palulanguṟu nyura mantatja kura kutjupa kutjupa tjuṯaku mukuringkula Godaku kuraringkupai. Nyura panya watingku kuri wantikatinytja puṟunypa nyinanyi, panya paluṟu kuri wantira kutjupa tjuṯangka ngaripai, palu puṟunypa nyura Godanya wantikatira kutjupa tjuṯangka tjunguringkupai. Munu nyura kura tjuṯangka ngunti pukuḻarinytjikitja mukuringkula Godaku kuraringanyi munu palumpa maḻpa nyinanytja wiyaringanyi. 
\v 5 Panya nyiringka Godaku tjukurpa tjukaṟuru ngaṟanyi munu tjakultjunanyi alatji Godalu palumpa panya kurunpa nganaṉala nyinanytjaku tjunkunytjatjanu nyaṟaringkupai nganaṉa kutjupa tjuṯangka kulinnyangka palula kutju kulintja-tjiratja. Panya paluṟu mukuringkupai nganaṉa palula kutju kulintjaku. Munu nganaṉa kutjupa tjuṯangka kulinnyangka paluṟu pukuḻaripai wiya. 
\v 6 Godanya ngaḻṯunytju mukulya puḻka mulapa tiṯutjara nyinanyi munulanya kanyini. Panya ngaṉmanytju nyiringka walkatjunkunytja ngaṟanyi alatji, “Aṉangu kaṉany-kaṉanyarinyangka Godalu kulintja wiyangku wantipai, palu paluṟu ngaḻṯunytjungku kanyilpai kurunpa tjaṟuringkula kaṉany-kaṉanypa wiyangku kulinnyangka.”
\p
\v 7 Ka nyura uti nyanga palulanguṟu Godalu wangkanyangka wangaṉarangku kuliṟa palyanma. Munu mamungku wangkanyangka kulintja wiyangku wantima. Ka mamu paluṟu nyuranya puṯu wituwituṟa mapalku wantikatira ankuku nyuralanguṟu. 
\v 8 Ka nyura Godala ilaringkunyangka paluṟu ngapartji nyurala ilaringkukuṯu. Kaya kura wantira kampa kutjaparira Godanya kutju kuliṟa mulamulangku waṉanma. 
\v 9 Puḻkaṟaya piiwiyariwa kura tjuṯa palyantjatjanu munuya kuranguṟu pukuḻarira ikaringkunytja wiyangku wantima munuya puḻkaṟa kuṉṯaringkula tjituṟu-tjituṟurira ulama.\fig |src="cs_lady crying -1.tif" size="col" loc="p" ref="4:8-10"\fig* 
\v 10 Kulilaya, uti nyura Mayatja Godala miṟangka kaṉany-kaṉanyarinytja wiya tjukutjukuringama, ka nyuranya paluṟu nyakula pukuḻarira puḻkanma.
\p
\v 11 Nyura uti Jesuku walytja tjuṯangku walytja kutjupa tjuṯa nyakula kuranmankuwiyangku wantima. Panya nyura tjukurku nintingku-palku Jesuku walytja kutjupa tjuṯa kura ngurkantaṟa Godaku tjukurpa kuraṉi. Munu nyura tjinguṟu kulini tjukaṟurungku wangkara-palku. Palu wiya, nyura Godaku tjukurku mayatja wiya. Nyurampa ngaṟanyi mulamularingkula palunya kutju waṉantjaku, kaya ngunti mayatjarira Jesuku walytja kutjupa tjuṯa kuranmankuwiyangku wantima. 
\v 12 Panya Godanya kutju nyinanyi tjukurpa tjunkunytjatjanu, munu paluṟu kutjungku ngurkantaṟa wangkaku tjukaṟuru munu kura nyinanytjanguṟu. Munu paluṟu kutjungku tjara wankalku, munu tjara wiyalku. Nyanga alatji paluṟu kutjungku palyalku. Ka nyura nyaaku mayatjangku-palku ngurkantaṟa kuranmananyi aṉangu kutjupa tjuṯa, panya nyura nyakula ngurkantaṟa kuranmankunytjaku wiya ngaṟanyi.
\s1 Nintingku-palku Ngaṉmanytju Kuliṟa Wangkanytja Wiya
\p
\v 13 Ala, wanyuya kulila, panya nyura kutjupa kutjupa tjuṯatjara ankupai ngura tjuṯakutu tjalamilaṟa mani palyantjikitja. Munu nyura wangkapai alatji, “Munta-uwa, kuwarila ma-wirkananyi munta tjinguṟula mungawinki ngura pala palula wirkankuku. Munula pala palulalta nyinaku yiya kutju tjalamilaṟa mani puḻka palyantjikitja.” Alatji panya nyura ngaṉmanytju wangkara tamalmankupai. 
\v 14 Palu kulilaya, alatji wangkawiyangkuya wantima. Nyura ngurpa. Tjinguṟu nyura ngunti wangkaku, ka mungawinki wiya ngaṟaku, panya nyura watarku wangkapai nintingku-palku. Palu nyuntu nganaṉa uwankara aṟuma puṟunypa, panya aṟumangku puḻi angatjunkupai munu mapalku wiyaringkupai, nyara palu puṟunypala nyinanyi wanka tjukutjukutjara munula mapalku wiyaringkupai. 
\v 15 Ka nyanga palulanguṟu nganaṉa uti alatji wangkama, “Wiya, Godanya mukuringkunyangka kutju ngayulu wanka nyinaku munuṉa ngura kutjupa tjuṯakutu ankula palyalku, ngayulu mukuringkunytjitjangka wiya.” 
\v 16 Wiya, utilanku nintingku-palku kaṉany-kaṉanytju ngaṉmanytju wangkawiyangku wantima, panya alatji wangkanyangka Godanya pukuḻaripai wiya.
\p
\v 17 Tjinguṟu aṉangungku nintingku kulini tjukaṟuru nyinanytjikitjangku, palu nyara paluṟu tjukaṟurungku palyantja wiyangku wantira paluṟu Godala tungunpunganyi, ka Godalu ngurkantananyi palumpa kura.
\c 5
\s1 Mani Puḻkatjara Tjuṯa Nguḻutjunkunytja
\p
\v 1 Kuwariṉa nyurala wangkanyi mani puḻkatjara tjuṯangka. Nyura uti puḻkaṟa ulama, panya ngula nyurala tjituṟu-tjituṟu puḻka wirkankuku. 
\v 2-3 Panya nyura kuwari kanyintja uwankara wiyaringkuku tiṯutjara ngarinytja wiya. Ka nyurampa mai tjuṯa uṉaringkuku, munu nyurampa mantara wiṟu tjuṯa akulyungku ngalkuku, munu nyurampa mani tjiilpa gold kuḻu kuraringkuku. Ka nyura nyanganpa utiringkunyangka nyakula kulinma panya Godalu nyuranya waṟu puḻka puṟunytju wiyalku alatjiṯu. Nyanga alatjiriku panya nyura wiṟu tjuṯa mantjiṟa ngurtjungku kanyiningi munu nyuranku kutju pukuḻmanangi. Ka nyara palulanguṟu nyurampa kuwaringuṟu alatjiṯu ulanytjaku ngaṟanyi.
\p
\v 4 Ka panya nyurampa ngurangka nyura wati tjuṯa tjunkupai waṟkarinytjaku munu nyura kalkulpai mani ungkunytjikitjangku uwankara palyaṟa wiyannyangka. Munu nyura waṟka uwankara palyaṟa wiyannyangka mani tjukutjuku tjananya ungkupai, panya nyura tjananya ngunti kalkuṉu tjukaṟurungku ungkunytjikitjangku-palku. Kaya nyara palulanguṟu waṟkaripai panya tjuṯa kurunpa tjituṟu-tjituṟurira kuliṟa ulangi, “Kuraṟalanya ungu.” Ka panya Mayatja Godalu tjananya ulanyangka kuliṟa nyanganyi alatjiṯu munu witulya puḻkangku nyurampa tjituṟu-tjituṟu puḻka palyalku.
\p
\v 5 Palu panya nyura nyanga mantangka nyinara kutjupa kutjupa wiṟu tjuṯa mantjiṟa kanyilpai nyura kutju pukuḻpa nyinanytjikitjangku. Palu alatji nyinara nyura Godanya mirpaṉpa palyaṉi, ka ngula paluṟu tjiṉṯu maḻatjangka nyuranya kura nyakunytjatjanungku ngurkantaṟa tjaraṟa ngura kurangka waṉiku. 
\v 6 Nyangatja kuḻuya kulinma. Panya aṉangu kutjupa tjuṯa wiṟuṟa palyanyku nyinanyi, palu nyura kura nyinara tjanampa kuraringkula tjananya ngukalpai wiyanguṟu alatjiṯu, kaya paluṟu tjana puṯu wiyanmankupai. Palu nyura tjananya tungunpungkula wangkara iluntankupai alatjiṯu. Ka nyara palulanguṟu nyuranya Godalu kura ngurkantaṟa wiyalku ngapartji.
\s1 Nyuranya Anannyangkaya Pukuḻpa Nyinama
\p
\v 7 Ngayuku walytja tjuṯa, kulinmaya. Aṉangu kutjupa tjuṯangku nyuranya anaṟa kuraṟa pungkunyangkaya ngapartji wangkawiyangku wantima. Palu pilunpa purkaṟaya nyinama kaar-kaararinytja wiya, munuya rawangku pukuḻṯu aḻa-aḻangku paṯanma Mayatjanya maḻaku pitjanytjaku. Wati panya kaana kanyilpai kulila. Panya paluṟu uṉinypa tjuṯa tjunkula waṉaṟa wantipai mantangka. Munu paluṟu nyinara paṯalpai minangku puyiṟa uṉinypa panya palunya tjananya pakaltjingantjaku. 
\v 8 Ka nyara palu puṟunypa nganaṉa rapa pukuḻpa paṯantjaku ngaṟanyi pakuringkunytja wiya, panya Mayatjanya mulapa pitjaku kuwari nguwanpa.
\p
\v 9 Nyuranya kutjupa tjuṯangku kurannyangkaya ngapartji wangkawiyangku wantira pukuḻpa nyinama nyuranya kuḻu Godalu kura ngurkantankunytjaku-tawara. Panya Mayatjanya waṯalpi ilaringanyi nganaṉanya ngurkantankunytjikitja. 
\v 10 Kulinmaya wati panya wangkatjara tjuṯa iriti nyinanytja. Nyara paluṟu tjana panya Mayatjaku tjukurpa wangkangi, kaya aṉangu tjuṯangku tjananya kuraṟa pungangi munu pikantanangi, kaya wantinytja wiyangku tungun-tunguntu alatjiṯu Godanya waṉaningi. Ka nganaṉa ngapartji palunya tjananya arkaṟa Godanya waṉantjaku ngaṟanyi. 
\v 11 Panya nganaṉa wati wangkatjara tjuṯa kulintjatjanungku wangkapai alatji, “Wati nyaranpaya tjukaṟuru mulapa pukuḻpa nyinangi.” Munu panyala wati Tjuupanya kuḻu kulini.\f * \fr 5:11 \fr*\ft Tjukurpa Tjuupanyatjara ngarinyi Bible-ta, palu nganaṉa Pitjantjatjara walkatjunkunytja wiyaṯu kuwaripa.\ft*\f* Panya wati nyara palula pika kura tjuṯa wirkanangi, ka panya paluṟu tungun-tungunpa alatjiṯu Godaku mulamularingangi wantinytja wiya. Ka Godalu wati panya palunya alpamilaṉu munu palumpa tjukaṟurungkuṯu uwankara palyaṉu panya ngaṉmanyitja puṟunypaṯu. Kala tjukurpa nyanga palulanguṟu kulini mulapa Godanya ngaḻṯunytju mukulya puḻkanya nyinanyi.
\p
\v 12 Walytja tjuṯa, nyangatjaṉa tjukurpa puḻka mulapa nyurala wangkanyi kaya purkaṟangku kulinma. Panya aṉangu kutjupangku tjukaṟurungku wangkanytjikitja mukuringkula alatji wangkapai puṯu mulamularingkunytjaku-tawara, “Tjukaṟurungkuṉa wangkanyi Godala miṟangka.” Ka kutjupangku ngapartji palu puṟunypaṯu puṯu mulamularingkunytjaku-tawara tjinguṟu alatji wangkapai, “Ilkaṟitja tjuṯaya ngayuku ninti. Kaṉa tjukaṟurungku wangkanyi.” Ka piṟuku kutjupangku palu puṟunypaṯu wangkapai alatji, “Ngayuku mantatja tjuṯaya ninti. Kaṉa nyurala tjukaṟurungku wangkanyi.” Palu nyangatja palya wiya. Uti nyura ini ilkaṟitja mantatja kutjupa kutjupa tjuṯa tjunguṟa wangkawiyangku wantima. Munu nyura tjukaṟurungku wangkanytjikitja mukuringkula uwanmanama kutju munu wiyanmankunytjikitja mukuringkula wiyanmanama kutju. Palu nyura ini kutjupa tjuṯa tjunguṟa wangkanyangka Godalu nyuranya kura ngurkantankuku.
\s1 Mama Godala Rawangku Tjapintjaku
\p
\v 13 Tjinguṟu aṉangu kutjupa nyuralanguṟu tjituṟu-tjituṟu puḻka nyinanyi kura kutjupa kutjupa palula utiringkunyangka. Uti paluṟu Godala tjapinma palunya alpamilantjaku. Ka tjinguṟu kutjupa nyuralanguṟu pukuḻpa nyinanyi. Uti paluṟu inma tjuṯa inkara Godanya waḻkunma. 
\v 14 Ka tjinguṟu kutjupa nyuralanguṟu pikatjararingkula ngarinyi. Uti paluṟu aṉangu kutjupa iyanma wati aṯunymankupai tjuṯa ankula aḻṯinytjaku tjana pitjala palumpa Godala tjapintjaku. Kaya pitjala palula uwila tjutiṟa maṟa tjunkula Mayatja Jesula tjapilku palunya palyaṟunguntjaku.\fig |src="GT_JAM 5v15 prayer for sick.tif" size="col" loc="p" ref="5:14-15"\fig* 
\v 15 Panya tjana puḻkaṟa Godaku mulamularingkula tjapinnyangka aṉangu nyara pikatjara Godalu mulapa palyaṟungulku. Tjinguṟu aṉangu nyara paluṟu kura kutjupa kutjupa palyantjatjanu pikatjararingu, ka Godalu tjapinnyangka palunya kalypangku wantiku paluṟu kura palyantjitjanguṟu. 
\v 16 Palulanguṟu nyura uti kura palyantjatjanungku piiwiyaringkula Jesuku walytja kutjupangka tjakultjunama, munu nyara palulanguṟu nyura Godala tjapinnyangka paluṟu nyuranya pikatjara ngarinyangka palyaṟungulku. Panya Godalu kulilpai aṉangu wiṟu tjukaṟuru nyinapaingku palula tjapinnyangka munu palumpa puḻka mulapalta palyalku.
\p
\v 17 Nyura ninti wati panya Ilaitjaku. Wati nyara paluṟu panya aṉangu nganaṉanya puṟunypa alatjiṯu. Paluṟu panya iriti nyinangi Godaku walytja munu paluṟu Godala tjapinu mina iyantja wiyangku wantinytjaku. Ka Godalu mulapaṯu kulinu palunya munu mina iyalwiyangku wantingu. Ka yiya maṉkurpa minangku puyintja wiya rawa ngaṟangi. 
\v 18 Munu nyara palula maḻangka Ilaitjalu piṟuku Godala tjapinu mina iyantjaku. Ka mapalkungku alatjiṯu minangku puyinu ka mai tjuṯa mantangka pakaṉu. Ka nganaṉa nyanga palulanguṟu nintiringkunytjaku ngaṟanyi, panya aṉangu tjukaṟuru nyinapaingku tjapinnyangka Godalu kuliṟa palyalpai puḻka mulapa.
\p
\v 19-20 Walytja tjuṯa kulinmaya! Tjinguṟu kutju nyuralanguṟu Jesuku walytja iwara palumpa wantira iwara kutjupangka ankuku, kurangka. Ka nyura uti nyakula palunya arkaṟa alpamilaṟa aḻṯima Jesulakutu maḻaku pitjanytjaku, ngula palunya Godalu ngurkantaṟa paiṟa iyantjaku-tawara. Ka tjinguṟu paluṟu kuliṟa mulapa maḻaku aṟuringkuku, ka Godalu palunya kura tjuṯa palyantjitjanguṟu kalypangku pungkuwiyangku wantiku, ka paluṟu kaṟalyarira wankaringkuku.