\id HAG ‘PT HAG 02ed’ Pitjantjatjara Haggai Selections 20-FEB-03 (Paul & Ann Eckert (SIL/FRM), c/o PO Box 2129 Alice Springs, NT 0871. Ph: +61-8-82924808 Fax: 08-89524894. E-mail: paul.eckert@biblesociety.org.au
\ide UTF-8
\h Akaiku
\toc2 Akaiku
\toc1 Wati Wangkatjarangku Akailu Walkatjunkunytja (Haggai)
\mt1 Wati Wangkatjarangku Akailu Walkatjunkunytja
\mt2 Haggai
\imt1 Nyangatja Ngaṉmanytju Nyakula Wangkanytjaku
\ip Nyangatja Godaku tjukurpa wati wangkatjara ini Akailu walkatjunkunytja. Panya wati nyara palulawanungku Godalu Israelku mayatjangka wangkangu wati ini Tjiṟapapilta munu wati tjukurtjarangka kuḻu ini Tjatjuwala, panya nyara palula aṟangka aṉangu Israelkunu tjuṯa ngura panya Papilantanguṟu maḻaku pitjangu ngura walytjakutu munu panyaya timpula panya piḻuntankunytja piṟuku palyaningi. Ka Aikalu Tjiṟapapilnga tjananya wangkara wituwituningi timpula panya palyaṟa wiyantjaku nguṟurpa pakuringkula wantinytja wiyangku.
\ip Munu paluṟu tjananya timpulanguṟu kulintjaku wangkangi, panya timpulangku nintini panya ngula wiṟu mulapa wirkankuku aṉangu Godaku walytja tjuṯangka. Munu paluṟu tjanala wangkangu panya kura kutjupa kutjupa wirkankunyangka tjana alatji kulintjaku, “Tjinguṟu nganaṉa palunya wantira walytjangku kuliṟa palyaningi ka palulanguṟu nganaṉala kura wirkanu. Kala wanyu maḻaku aṟuriwa palulakutu, ka paluṟu nganampa wiṟu palyalku.”
\ip Uwa, nyangatja Aikalu tjukurpa walkatjunkunytja maṉkurpa kutju ngarinyi, panya nganaṉa kuwaripangkuṯu palyaṉi uwankara walkatjuṟa wiyantja wiyangku.
\ie
\c 1
\s1 Godalu Wangkanytja Timpula Palumpa Piṟuku Palyantjaku
\p
\v 1 Tjukurpa nyangatja Mayatja Godalu palumpa wangkatjarangka wangkangu wati ini Akaila paluṟu wangkanytjaku wati panya mayatja kutjarangka ini Tjiṟapapilta pulala Tjatjuwala. Panya Tjiṟapapilnga manta Judah-ku mayatja puḻka nyinangi ka Tjatjuwanya panya tjanampa tjukurtjara puḻka. Ka wati panya Akailu pulala ankula tjakultjunu. 
\v 2 Alatji paluṟu wangkangu Mayatja Godalu wangkanytja,
\q1 “Aṉangu tjuṯangkuya kuwari alatji wangkanyi,
\q2 ‘Tjiṉṯu nyangatja kuwaripa nganaṉa kuwariṯu Godaku timpula piṟuku palyaṟa wiyantjaku wiya.’”\fig |src="lb00247b.tif" size="col" loc="p" ref="1:2"\fig*
\m
\v 3-4 Palu Godalu ngayulawanungku kuwari nyurala wangkanyi alatji, “Walytja tjuṯa! Waḻi ngayuku miḻmiḻpa kaṯakatira minya-minyaringkunytja ngarinyi mantangka punkaṟa, palu nyura waḻi wiṟu tjuṯangka nyinanyi walytja alatjiṯu. Nyaaku nyura watarkuringu waḻi nyara miḻmiḻku?
\p
\v 5-6 “Uti nyura para-nyangama munuya nyakunytjatjanungku kulinma, ‘Nyaanguṟula pukuḻpa wiya nyinanyi?’ Panya nyura uṉinypa winki mulapa mantangka tjunu mai puḻka pakaltjingantjikitjangku, palu maṉkurpa kutjuya pakaṟa puḻkaringkula maitjararingu. Ka nyura mai tjukutjuku kutju uraṟa kanyini ngalkuntjikitjangku, palu nyura mai palunya ngalkuntjatjanu paḻtjaringkupai wiya. Munu nyura wama kuḻu tjukutjuku kanyini tjikintjikitjangku, palu nyura puṯu taṟangkaripai tjikintjatjanu panya wama tjukutjuku alatjiṯu. Munu nyura mantarangka tjarpapai, palu nyuranya mantara paluṟu tjana unytjunmankupai wiya. Kaya wati tjuṯa kuḻu manikitja waṟkarinyi, palu paluṟu tjanaya mani tjukutjuku kutju mantjilpai munuya tjanampa walytja tjuṯangku kuḻu ngalkula paḻtjaringkunytjaku mai puḻka nguwanpa puṯu payamilalpai. Uwa, mulapa nyura puṯu pukuḻpa nyinanyi.
\p
\v 7-8 “Uti nyura nyanga palula tjanalanguṟu kulinma munuya tjukaṟurungku ngayula kulinma. Panya nyura ngayuku watarkurira ngayuku timpula kuḻu palyantja wiyangku wantingu. Palulanguṟu nyura pukuḻpa wiya nyinanyi. Palu kuwariya puḻi nyara murpu tjuṯakutu ankula puṉu waṟa tjuṯa kaṯaṟa punkatjingaṟa ngalya-kati, munuya palulanguṟu timpula palyala ngayuku. Ka nyara palulanguṟu nyura alatji palyannyangka ngayulu nyakula pukuḻariku, ka nyura kuḻu ngayunya tjukaṟurungku waḻkulku.”
\p
\v 12 Ka palulanguṟu Tjiṟapapiltu pula Tjatjuwalu munu aṉangu tjuṯangku kuḻu wangaṉarangku kulinu panya Godalu ngayulawanungku wangkanyangka, munuya kuliṟa palunya waḻkuningi.
\p
\v 13 Kaṉa ngayulu aṉangu panya tjuṯangka wangkangu, “Kulilaya, nyanga Mayatjalu wangkanytja alatji, ‘Ngayuluṉa nyurala tjungu nyinanyi.’” 
\v 14-15 Munu nyanga alatji wangkanyangka Mayatja Godalu Tjiṟapapilnga pulanya Tjatjuwanya kurunpa rapaṉu aṉangu uwankara kuḻu, kaya kuliṟa raparingkula Godaku timpula palyantjikitja puḻkaṟa mukuringangi, munuya piṟa pala palulaṯu tjaata wangaṉarangku timpula palyaningi Mayatja panya Puḻkaku.
\c 2
\p
\v 1-4 Ka tjana piṟa kutju palyannyangka maḻangka Mayatja Godalu ngayula piṟuku wangkangu Tjiṟapapilta pulala Tjatjuwala wangkanytjaku munu aṉangu tjuṯangka kuḻu. Alatjiṉi wangkangi tjanala tjapiṟa kulintjaku, “Kutjupangku wanyu kulini panya timpula nyanga paluṟu iriti ngaṟanytja? Panya wiṟu mulapa ngaṉmanypa ngaṟangi. Munu kuwari wanyu nyura palyantjitja wiṟuṯu ngaṟanyi? Wiya, kuwari panya ngaṉmanyitja puṟunypa ngaṟanytja wiya alatjiṯu. Kaya kuliṟa tjituṟu-tjituṟurinytja wiyangku wantima, panya ngayulu nyurala tjungu tiṯutjara nyinanyi mayatja puḻka mulapa. Kaya rawa waṟkarima munuya tjungungku palyanma wantinytja wiyangku.
\p
\v 5 “Iriti panya nyurampa walytjapiti Itjipalanguṟu ngalya-pakaṉu, ka panya ngayulu kalkuṉu palula tjanala tjungu tiṯutjara nyinanytjikitjangku. Munuṉa kuwari nyurala kuḻu tjunguṯu nyinanyi. Kaya nguḻuringkunytja wiya rapa nyinama.
\p
\v 6-7 “Panya kuwari nguwanpa ngayulu ilkaṟi manta uṟu kuḻu puḻkaṟa uritjingalku, kaya aṉangu ngura winkitjangku nyakula puḻkaṟa nguḻuringkula tjanampa kutjupa kutjupa wiṟu tjuṯa munu mani kuḻu ngalya-katiku timpula nyanga palulakutu, panya ngayulu kutju uwankaraku mayatja nyinanyi manta winkitjaku. 
\v 8 Panya manta uwankarangka wiṟu tjuṯa ngaṟanyi gold munu tjiilpa kuḻu nyara paluṟu tjana kuḻu ngayuku alatjiṯu.
\p
\v 9 “Ka nyura wiṟu nyara palunya tjananya katinyangka mantjiṟa ngayuku nyanga timpulangka tjunkuku, ka nyanga paluṟu wiṟu mularariku, panya timpula ngaṉmanyitjangka waintaṟa. Kaṉa ngayulu ngayuku aṉangu tjuṯa pukuḻmaṟa kanyilku ngayula tjungu.” Alatji wangkangu Mayatja Godalu, panya paluṟu kutju-maṉṯul Mayatja puḻka.
\p
\v 17-19 Munu paluṟu piṟuku wangkangu, “Panya ngaṉmanytju nyura kaanangka puḻkaṟa waṟkaringi mai tjuṯa pakaltjingantjikitja, ka panya ngayulu mina puḻka iyaṉu kunaṯa kuḻu, ka nyara palulanguṟu nyurampa mai uwankara kuraringu. Ka panya nyura nyara palunya nyakunytjatjanungku ngayulakutu maḻaku aṟuringkunytja wiyangku wantingi. Palu kuwari nyanga nyura kura wantira maḻaku pitjangu ngayulakutu munu nyanga nyura timpula palulalta palyaṉi. Kaṉa ngayulu Mayatja puḻkangku nyuranya kuwaringuṟu nyanga alatjiṯu pukuḻmaṟa kanyilku.”
\p Uwa, alatji Mayatja Godalu tjanala wangkangu.