\id ROM rom 
\h Ruumalakutu 
\toc2 Ruumalakutu 
\toc1 Ruumanya Ngurrara Tjuṯaku Wantirriyaṉutja 
\mt1 Ruumanya Ngurrara Tjuṯaku  
\mt1 Wantirriyaṉutja  
\c 1  
\s1 Katutjanya waḻkulku  
\p
\v 1-2 Ngayulu Puulalu Ruumanya ngurrara tjuṯaku piipa ngaatjanya wakara wantirriyaṉi, Yiitju Kurayitjaku waarrkanangku. Katutjalu watjaṉu ngayulu palumpa wangka ngurra tjuṯawana tjakultjurinkunytjaku. Wangka palunya Yiitju Kurayitjanyatjarra yaṉangu tjuṯangka tjakultjunkunytjaku Katutjaku wangka watjalpayi tjuṯangku irriṯi watjaṉu. Wangka irriṯitja palunya tjana Kurayitjanyatjarra wakara tjunu Katutjaku piipangka.  
\v 3-4 Wangka palunya nganampa mayutju Yiitju Kurayitjanyatjarra, Katutjaku katjatjarra. Paluru mantangka yutitjarringkula mayutju Tapitaku walytja ngaṉṯitja nyinangu. Katutjalu ngangkari tiṉatjarrangku palunya mirringuru kanantjala palumpa kurrunpangku nganaṉanya nintiṉu, Yiitjunya yilta Katutjaku katja nyinanyi.  
\v 5 Yiitjulu ngayunya aḻṯururringkula watjaṉu ngayulu palumpa waarrkana nyinanytjaku. Paluru kuliṉu ngayulu tjananya Yiitjuku ngurrpa tjuṯa nintintjala tjana kulira Yiitjuku walytjarringkula palumpa wangkawana tjukarurru nyinanytjaku.  
\v 6 Nyurrangarrinya Ruumanya ngurrara tjuṯaṯarra Katutjalu kuliṉu Yiitjuku walytjanyurra nyinanytjaku.   
\p
\v 7 Katutjanya nyurrangarrimpa yunytju nyinarra kuliṉi nyurrangarri palumpa walytja tjuṯa kutu nyinanytjaku. Yalatjikunyurra ninti nyinanytjaku piipa ngaatja ngayulu wakara wantirriyaṉi nyurrangarrilakutu. Ngayulu nyurrangarrimpa Katutjanya tjapilpayi paluru, palumpa katja Yiitju Kurayitjaluṯarra nyurrangarrinya yaṉṯayaṉṯantjaku, nyurrangarri yunypa palumpa kutjarraku nyinanytjaku.   
\s1 Puulalu Ruumanya ngurrara tjuṯa kulira Katutjanya waḻkulku  
\p
\v 8 Nyurrangarri tjukarurru Yiitjuku nyinanytjala yaṉangu ngurra tjuṯawana nyinarra ninti nyinanyi. Nyurrangarri yalatji nyinanytjala ngayulu Katutjanya, Yiitju Kurayitjanyaṯarra puḻkapunganyi.  
\v 9 Ilta ngayulu nyurrangarrimpa Katutjanya tjapilpayi. Katutjala kurungka ngayulu panyapa watjaṉu tjukarurrungku. Palumpa waarrka ngayulu kutu palyalpayi wangka palumpa katja Yiitjunyatjarra ngayulu tjakultjurinkula.   
\p
\v 10-11 Palunya ngayulu tjapilpayi, maa yankula nyurrangarrilawana nyinakitjangku. Paluruṉi palya watjantjala ngayulu yunytjurringanyi nyurrangarrilakutu maa yankula nyinakitja. Nyurrangarrilawana nyinarra ngayulu nyurrangarrinya nintilku Katutjaku kurrunpangku ngayunya Katutjaku wangkawana nintiṉutjangka. Yalatjinyurra yunypangku kulira rapa palumpa nyinaku.  
\v 12 Nyurrangarri tjinguru ngayunya tjakultjunku Katutjaku kurrunpangku nyurrangarrinya palumpa wangkawana nintiṉutjangka. Yalatji yunypangku kulira ngayulu rapa palumpa nyinaku. Nganaṉa tjungu yunyparringkula palumpa raparringku.   
\p
\v 13 Walytja tjuṯa. Nyurrangarri nintingku kuliṉi ngayulu kutu yunytjurripayi maa yankula nyurrangarrilawana nyinakitja. Tjuṯangara ngayulu nyurrangarrilakutu maa yankukitja riirri nyinapayi. Yalatji nyinarra tjuṯangara ngayulu puṯu kulilpayi maa yankukitjangku. Ngayulu yunytjurringanyi nyurrangarrimpa ngurra Ruumala Yiitjuku wangka tjakultjunkunytjaku, kutjupa tjuṯangku kulira Yiitjuku walytjarrinytjaku. Ngurra kutjupa tjuṯawana ngayulu tjanala Tjuwuwiya tjuṯangka yalatji tjakultjunkupayi.  
\v 14 Yaṉangu yuwankarrangka ngayulu wangka Yiitjunyatjarra tjakultjunkunytjaku. Waaḻangka nyinapayi tjuṯa, puutjingka nyinapayi tjuṯa, kuulangka tjarrpapayi tjuṯa, kuulaku ngurrpa tjuṯaṯarra, palula tjanala ngayulu wangka Yiitjunyatjarra tjakultjunkunytjaku.  
\v 15 Yalatji kulira ngayulu yunytjurringanyi nyurrangarrilaṯarra Ruumanya ngurrara tjuṯangka wangka palunya tjakultjunkunytjaku.   
\p
\v 16 Ngayulu kuliṉi yalatji. Wangka Yiitjunyatjarra maṯupurralingku. Wangka palunya yaṉangungku yilta kulintjala Katutjalu palunya ngulytjulku. Yalatji yaṉangu Tjuwungku, yaṉangu Tjuwuwiyangkuṯarra kulintjala Katutjalu palunya ngulytjulku.  
\v 17 Wangka palunya yaṉangungku kulira walytjarringkula paluru Katutjaku kalypalpi nyinaku. Yalatji Katutjaku wangka irriṯi tjunutja ngarrinyi, “Yaṉangungku Katutjaku wangka yilta kulira Katutjaku kalypalpi nyinaku. Yalatji nyinarra kana kutu nyinamalpa.”   
\s1 Uwankarrangku kuya palyalpayi  
\p
\v 18 Yaṉangu kuya palyalpayi tjuṯa Katutjaku wangkaku yunytjuwiya nyinanyi. Tjana kutjupa tjuṯa marrkulpayi wangka palunya kulilwiyangkuya wantinytjaku. Palumpa tjanampa Katutjanya yunytjuwiya nyinanyi marrkulpayi tjuṯaku.  
\v 19-20 Katutjalu manta, watiya tjuṯa puḻi tjuṯaṯarra palyara ngaratjunu. Yalatji palyaṉutja yaṉangu kuya palyalpayi tjuṯangku nyakula yalatji kulinmara, “Yilta Katutjalu ngaa tjuṯa ngangkari tiṉatjarrangku palyaṉu. Nganaṉa kuya palyawiyangku wantirra palumpa tjukarurru nyinanytjaku.” Yalatji tjana kulira tjukarurru nyinanytjawiyangka Katutjalu tjananya ngula pungku. Kuutawutjungka tjana puṯu wangkaku.  
\v 21 Manta watiya tjuṯa, puḻi tjuṯaṯarra tjana nyakula nintingku kuliṉi Katutjanya yilta nyinanytjala. Yalatji kulira tjana wiya palunya puḻkapungkupayi, wantipayiya. Walytjangkuya kutjupawana kulira kuya palyara nyinanyi. Katutjanyaya kulira yunytjuwiyangku wantipayi, mayutju tiṉaku kulira nguḻurrinytjawiyangku. Katutjanya wiyaya puḻkapungangi, wantipayiya. Nyinarraya wiyawanangkulpi kulira nyinangi, pina patingku. Kuya kutjuya kulira nyinarra waṉipayi.  
\v 22 Tjana yalatji watjalpayi, “Nganaṉa Katutjaku ninti nyinanyi palumpa walytja.” Wiya tjana palumpa walytja tjukarurru nyinanyi.  
\v 23 Paluru tjana wiya mayutju tiṉa Katutjanya tjukarurrungku puḻkapungkupayi, Katutjanya nguwanpa tjuṯa kutjupa tjana puḻkapungkula nyinanyi. Yaṉangu nguwanpa palyaṉutja, tjuḻpu nguwanpa palyaṉutjaṯarra, kuka nguwanpa palyaṉutjaṯarra, piḻkaṯi nguwanpa palyaṉutjaṯarra paluru tjana puḻkapungkula nyinanyi.   
\p
\v 24 Yalatji paluru tjana wiyawana nyinarra palunya tjuṯa puḻkapunganyingka Katutjalu tjananya wantingu kutu kuya palyantjaku. Papa kuḻakuḻa nguwanpangkuyanku kuya ngarrirra palyalpayi.  
\v 25 Paluru tjana Katutjanya tjukarurru kulira puḻkapungkunytjawiyangkuya watiya tjuṯalpi, puḻi tjuṯaṯarralpi puḻkapunganyi. Katutjalu palyaṉutja tjuṯa puḻkapungkunytjawiyangkuya wantimara. Tjana Katutjanya tjukarurrungku puḻkapungamara. Nganaṉa uwankarrangku palunya kutju puḻkapungkula nyinanytjaku.   
\p
\v 26 Yalatjiya wiyawana nyinanytjala Katutjalu tjananya wantingu kuya kutu palyantjaku. Kungka tjuṯangkuya wati miiṯa walytja wantirra kungka kutjupangka yankula ngarripayi, kuṉṯawiya.  
\v 27 Palunya tjananya nguwanpa wati tjuṯangkuya kungka miiṯa walytja wantirra wati kutjupangka yankula ngarripayi, kuṉṯawiya. Yalatjiyanku puntura yunytjurrirra ngarripayi, kuṉṯawiya. Yalatjiya kuya palyantjala palya Katutjalu tjananya ngula kuutawutjungka wangkarra warukutu iyalku.   
\p
\v 28 Paluru tjana Katutjaku kulira tjukarurru nyinanytjawiyangka Katutjalu tjananya wantingu walytjangkuyanku kulira wiyawana kutu nyinanytjaku. Kuya palyalkitjangkuya kulira kuya kutu palyara nyinanyi.  
\v 29-30 Yalatji wiyawanaya nyinanyi, tjukarurruwiya. Kutuya kuya palyara nyinanyi. Kutjupa tjuṯa kutuya yunytjurrirra nyinanyi, yulytja mulyaṯangku mantjira kanyilkitja. Kutjupa tjuṯa kutu yaṉangu kutjupaku yunytjuwiya nyinanyi. Kutjupa tjuṯa yaṉangu kutjupakuya ngurrkurringkula yunytjuwiya nyinanyi. Kutjupa tjuṯangkuya yaṉangu tjuṯa mirri punganyi. Kutjupa tjuṯa yaṉangu kutjupaku pikarrirra nyinanyi. Kutjupa tjuṯa ngunytjinytju nyinanyi. Kutjupa tjuṯa yaṉangu kutjupa panypurangkukitja tjaalymara wangkanyi. Kutjupa tjuṯa Katutjaku yunytjuwiya kutu nyinanyi. Kutjupa tjuṯangku yaṉangu kutjupa panypurangkula nyinanyi. Kutjupa tjuṯa walytjangkuyanku puḻkapunganyi. Kutjupa tjuṯangku kuya palyalkitjangkuya kulira nyinanyi. Kutjupa tjuṯangku paapa, maamaṯarra kulilwiya nyinanyi.  
\v 31 Yaṉangu tjuṯangku yalatji kuya palyara nyinanyi. Paluru tjana ngunytjinytjungku kuya palyara nyinanyi, kutjupa tjuṯaku aḻṯururrinytjawiya, tjukarurru tjanampa palyantjawiya.  
\v 32 Paluru tjana nintingku yalatji kuliṉi, “Nganaṉa wiyawana nyinanyingka Katutjalu palumpa luwutjirratjangku nganaṉanya kuutawutjungka watjara warukutulpi waṉiku.” Yalatji kulira tjana kutu kuya palyara nyinanyi. Kutjupa tjuṯangku yalatji kuya palyantjaku paluru tjana tjananya tjingapunganyi.   
\c 2  
\s1 Katutjalu kuya palyalpayi tjuṯa watjara warukutu wantirriyalku  
\p
\v 1-3 Walytja tjuṯa, wangka ngaatjanyaya kulila! Kutjupa tjuṯangkunyurra Katutjaku luwu kilytjuntankupayi. Yalatji kulilwiyangkunyurra yaṉangu kutjupa panypurangkupayi yalatji, “Wati palangku Katutjaku luwu kilytjuntanu. Paluru tjukarurruwiya nyinanyi.” Yalatji panypurangkuwiyangkunyurra wantimara, Katutjaku luwu palunya nyurrangarriṯarra kilytjuntankupayi. Wati palunya panypurangkuwiyangkunyurra yalatji walytjangku watjanmara, “Ngayulu Katutjaku luwu kilytjuntankula tjukarurrulpi ngayulu nyinanytjaku.” Nganaṉa nintingku kuliṉi. Wati paluru nyurrangarriṯarra Katutjaku luwu kilytjuntananyingka Katutjalu wati palunya, nyurrangarrinyaṯarra kuutawutjungka tjungura tjukarurrungku watjalku.  
\v 4 Katutjaku ngurrpa nguwanpangku wiyawananyurra kuliṉi, palumpa wangkanyurra kulira wantinyi yuḻpaṯa nguwanpa. Paluru nyurrangarrimpa aḻṯurunytju nyinapayi. Palumpa ngurrpa nguwanpanyurra nyinanyi. Paluru kaangkinytji nyurrangarrimpa paṯaṉi tjukarurrurrinytjaku. Yalatjikunyurra nintingku kulinmara.  
\v 5 Nyurrangarri Katutjanya kulintjawiya nyinanyi. Kutunyurra palumpa luwu kulira wantinyi. Paluru nyurrangarrinya yilta kuutawutjungka ngula kuru watjalku. Yuḻṯa palula paluru yaṉangu yuwankarra kuutawutjungka ngaratjunkula watjalku.  
\v 6-7 Katutjalu nganaṉanya, kutjupa tjuṯaṯarra kuutawutjungka watjalku. Mantangka yaṉangu tjaampala Katutjaku tjukarurru nyinarra yaṉangu kutjupa tjuṯaku tjukarurru palyalpayi. Paluru tjana Katutjanya kutju puḻkapungkula yunytjurringkupayi palulawana kana kutu nyinakitja. Palunya tjananya kuutawutjungka paluru watjalku kana kutu nyinanytjaku.  
\v 8 Mantangka kutjupa tjuṯangku palumpa wangka kulira wantipayi, tjana walytjangku kulira kuya palyalpayi. Paluru tjananya ngurrkurringkula watjalku warukutu wantirriyalkitjangku.  
\v 9-11 Yuwa, Tjuwu tjuṯangku, Tjuwuwiya tjuṯangkuṯarra kuya palyalpayi tjuṯa ngurra palula tjana mikin puntutjarra nyinaku. Katutjalu wiya kuya palyalpayi Tjuwu tjuṯa aḻṯururringkula wantiku, yilta tjananya warukutu wantirriyalku, kuya palyalpayi Tjuwuwiya tjuṯaṯarra. Tjukarurru nyinapayi tjuṯaku aḻṯururringkula yaṉṯayaṉṯanmalpa. Palunya tjananya puḻkapungkula kanyinmalpa.   
\p
\v 12 Tjuwuwiya tjuṯangkuya Muutjaku luwuku ngurrpangku kuya palyalpayi. Ngula Katutjalu tjananya wiya tjapilku yalatji, “Nyaakunyurra ngayuku luwu kilytjuntankupayi?” Yaṉangu Tjuwu tjuṯangkuya Muutjaku luwuku nintingku kuya palyalpayi. Ngula Katutjalu tjananya kuru watjalku, “Nyaakunyurra ngayuku luwu kulira kilytjuntankupayi? Luwu palunya tjuṯakunyurra tjukarurru nyinamara.”  
\v 13 Nintilpayingku nintintjala Muutjaku luwu wiya kulira wantinytjaku. Luwu palunyanyurra kulira tjukarurru nyinanytjaku. Luwu palulawananyurra tjukarurru nyinarra kutju Katutjaku kalypalpi nyinaku.   
\p
\v 14 Yilta, Tjuwuwiya tjuṯaya Muutjaku luwuwana wiya nyinanyi. Luwu palumpa ngurrpaya nyinarra yaṉangu tjuṯaku tjinguru kaangkinytji tjukarurru nyinaku. Yalatji tjana tjukarurru nyinanytjala Katutjanya tjanampa yunypa nyinaku.  
\v 15 Yalatjiya tjana tjukarurru nyinanytjala Katutjalu kuliṉi yalatji, “Tjuwuwiya pala tjuṯa ngayuku luwuwana tjukarurru nyinanyi. Tjana wiya kuya kutu palyalkitjangku kuliṉi.”  
\v 16 Katutjalu watjalku Yiitju Kurayitjalu ngula yaṉangu tjuṯa tjananya kuutawutjungka tjungura watjalku. Ngurra palula paluru nintingku kulilku yaṉangu mantangka tjukarurruwiya nyinangutjangka. Wangka yalatji ngayulu yaṉangu tjuṯangka tjakultjurinkupayi.   
\s1 Tjuwu tjuṯa Muutjaku luwuwana nyinanyi  
\p
\v 17 Tjaampala nyurrangarri Tjuwu tjuṯa nyinarra Muutjaku luwuwana nyinanyi. Yalatjinyurra tjungurringkula yaṉangu tjuṯangka watjalpayi, “Nganaṉa Katutjaku tjukarurru nyinanyi, palumpa walytja tjuṯa.”  
\v 18 Katutjaku wangkawana riitarringkula nyurrangarri yalatji kuliṉi, “Nganaṉa Katutjaku wangkaku nintirringkula tjukarurru nyinanyi.  
\v 19 Nganaṉa palya nintilpayi tjuṯa nyinanyi. Yaṉangu kutjupa tjuṯa nganaṉa nintintjaku.”  
\v 20 Nyurrangarri piyuku yalatji kuliṉi, “Nganaṉa Katutjaku wangkaku ninti nyinarra ngurrpa tjuṯa nintintjaku, yangupala tjuṯa, yukarra tjuṯaṯarra.”   
\p
\v 21 Wiya nyurrangarri Katutjaku wangkawana tjukarurru nyinanyi, ngurrpa nguwanpanyurra nyinanyi, ngunytjinytju. Nyurrangarri yaṉangu tjuṯakuṉu mulyaṯangku mantjira kutjupa tjuṯa tjananya nintilpayi yalatji, “Katutjaku wangka ngarrinyi nyurrangarri wiya kutjupaku mulyaṯangku mantjintjaku.” Ngunytjinytju tjuṯanyurra nyinanyi.  
\v 22 Nyurrangarri miiṯa kutjupakuṉungka ngarrirra yaṉangu kutjupa tjuṯa nintilpayi yalatji, “Miiṯa walytjawiyangka wiyanyurra ngarrinytjaku.” Katutjanya nguwanpaku tjaatjikutu nyurrangarri tjarrparra yulytja mulyaṯangku mantjira kutjupa tjuṯa nintilpayi yalatji, “Nyurrangarri wiya Katutjanya nguwanpaku tjaatjingka tjarrpanytjaku, wiyanyurra palunya puḻkapungkunytjaku.” Ngunytjinytju tjuṯanyurra nyinanyi.  
\v 23 Muutjaku luwuwana tjukarurru nyinanytjawiyangku nyurrangarri yaṉangu tjuṯa watjalpayi, “Muutjaku luwuwana nganaṉa tjukarurru nyinanytjaku.” Ngunytjinytju tjuṯangkunyurra luwu palunya wantirra Katutjanya yuḻpaṯananyi.  
\v 24 Katutjaku wangka yalatji ngarrinyi, “Tjuwu tjuṯangku Katutjaku luwu wantirra palunya yuḻpaṯankunytjala Tjuwuwiya tjuṯangkuṯarra Katutjanya yuḻpaṯananyi.”   
\p
\v 25 Tjuwu tjuṯangku watjalpayi, “Katutjanya nganampa yunypa nyinanyi, watirringkula nyinanytjala.” Tjinguru Tjuwu kutju watirringkula Muutjaku luwuwana wiya tjukarurru nyinaku. Yalatji paluru tjukarurruwiya nyinanytjala Katutjanya wiya palumpa yunypa nyinaku. Paluru watirringkunytjawiya nyinamara, Muutjaku luwu wantirra.  
\v 26 Tjinguru Tjuwuwiya kutju watirrinytjawiya Muutjaku luwuwana tjukarurru nyinaku. Yalatji paluru tjukarurru nyinanytjala Katutjanya palumpa yunypa nyinarra watjalku, “Tjuwuwiya palatja tjukarurru nyinanyi, Tjuwu palya nguwanpa.”  
\v 27 Tjuwu tjuṯangkuya wangka ngaatjanya kulila! Ngula yaṉangu tjuṯa kuutawutjungka ngaranytjala Tjuwuwiya tjuṯangku watjalku, “Tjuwu tjuṯangku watirringkula piipa Muutjaku wangka kanyira wangka palunya tjuṯa wantipayi. Wangka palumpa tjana tjukarurru nyinamara.” Yuwa, Tjuwuwiya tjuṯa watirrinytjawiya luwu palulawana tjukarurru nyinanyi, Katutjaku walytja.  
\v 28-29 Wangka yalatjiya kulila! Tjuwu tjuṯa Muutjaku luwuwana tjukarurru nyinanytjaku, wiya watirrinytjaku kutju. Muutjaku luwuwana nyinarra Tjuwu yilta nyinanyi Katutjaku walytja. Katutjaku kurrunpangku yaṉangu nintiṉi Tjuwu yilta nyinanytjaku, Katutjaku wangkawana. Katutjalu yaṉangu tjukarurru nyinapayinya Tjuwu palunya puḻkapungku, wiya Tjuwu paluru yunytjurringanyi yaṉangu tjuṯangku Tjuwu palunya puḻkapungkunytjaku, wiya.   
\c 3  
\p
\v 1 Tjinguru Tjuwu tjuṯa watirringkula mungutja nyinanyi. Tjinguru Katutjanya tjanampa wiya yunyparringanyi, tjinguru paluru Tjuwuwiya tjuṯaku kutju yunyparringanyi.  
\v 2 Katutjanya yilta Tjuwu tjuṯaku yunyparringkula palumpa wangka yirriṯi tjanala tjakultjunkupayi.  
\v 3 Tjuwu tjaampalaya Katutjaku wiya tjukarurru nyinanyi. Kutjupangku tjinguru watjalku yalatji. Katutjalu tjananya yaṉṯayaṉṯantjawiyangka tjana palumpa tjukarurruwiya nyinanyi.  
\v 4 Yalatji wiya. Katutjalu tjukarurrungku tjananya yaṉṯayaṉṯara tjukarurru tjananya watjalpayi. Kutu paluru yaṉangu tjuṯa yaṉṯayaṉṯara tjukarurru watjaṉi, yaṉangu tjuṯangku kutju ngunytjitjunkupayi. Katutjaku wangka yirriṯi tjunutja yalatji ngarrinyi,  
\q1 “Katutja, nyuntupa wangka yiltarriku. Nyuntunya panypurangkupayi tjuṯangku ngulalpi yalatji puntura yurrukulilku, ‘Katutjalu yilta tjukarurrungku watjalpayi.’”   
\p
\v 5 Nganaṉa yaṉangu tjuṯangku kuya kutu palyantjala nyakula tjinguru yaṉangu tjukarurru nyinapayingku kulilku yalatji, Katutjanya puḻkapungkukitjangku, “Katutjalu kutju tjukarurrungku palyalpayi, yaṉangu tjuṯangku kuya palyara nyinapayi.” Yalatji ilkari ngurrara tjuṯangku Katutjanya waḻkuntjala nganaṉa kulira tjinguru yalatji watjalku, “Nganaṉanya kuya palyalpayi tjuṯa Katutjalu aḻṯururringkula warukutu wantirriyantjawiyangku wantiku.”  
\v 6 Nganaṉa wiya yalatji wiyawanangku kulintjaku. Katutjalu kuya palyalpayi tjuṯa wiya wantiku, kuutawutjungka paluru tjananya watjalku, warukutu wantirriyalkitjangku. Paluru kutu tjukarurrungku watjara palyalpayi.   
\p
\v 7 Kutjupa tjuṯangku kuya kutu palyara tjukarurruwiya nyinanytjala tjanampa walytja tjuṯangku tjananya nyakula Katutjanya tjingapungku yalatji, “Katutja, nyuntu kutju tjukarurru nyinanyi, yaṉangu tjuṯangku kuya palyara nyinanyi, tjukarurruwiyakampa.” Tjana Katutjanya yalatji puḻkapungkula kulilku, “Katutjalu nganampa walytja kuya palyalpayi tjuṯa wantiku, wiya warukutu wantirriyalku.” Nganaṉa wiya yalatji wiyawanangku kulintjaku.  
\v 8 Kutjupa tjuṯangku yalatji watjalpayi, “Palyala kutu kuya palyantjaku. Kuyala yalatji palyantjala Katutjalu nganampa kuya kutu waṉimalpa.” Yalatji wiyala kulira palyantjaku. Yaṉangu tjaampalangkuya yalatji wiyawanangku watjalpayi, pina patingku, “Puulalungarri yaṉangu tjuṯa tjananya nintilpayi palya tjana kuya kutu palyantjaku. Katutjalu kuya tjanampa waṉimalpa, kutu.” Nganaṉatju wiya tjananya yalatji nintilpayi. Yalatji tjana wiyawanangku watjalpayi, nganampatju yunytjuwiya tjuṯangku. Katutjalu tjananya tjukarurrungku kuutawutjungka kuru watjara warukutu maa wantirriyalku.   
\s1 Yaṉangu yuwankarra tjukarurruwiya nyinanyi  
\p
\v 9 Ngayulu wangka kutjupa nyurrangarrinya watjalku. Tjinguru Tjuwu tjuṯa nganaṉanya Katutjalu ngula kuru watjalwiyangku wantiku? Wiya. Yuwankarra nganaṉanya kuru watjalku Tjuwu tjuṯa, Tjuwuwiya tjuṯaṯarra tjungura. Nganaṉa yuwankarrangku kuya palyara nyinanyi. Yalatji ngayulu yurrunpa nyurrangarrinya watjalpayi.  
\v 10-12 Wangka palunya nguwanpa Katutjaku wangka irriṯi tjunutja yalatji ngarrinyi,  
\q1 “Yaṉangu yuwankarra tjukarurruwiya nyinanyi, Katutjaku kalypanytjuwiya. Yuwankarrangkuya nintiwiyangku palumpa wangka kulira wantinyi. Yuwankarraya tjukarurruwiya nyinanyi.  
\v 13 Ngunytjinytju tjuṯa tjana kutu ngunytji wangkarra nyinanyi.  
\v 14 Yaṉangu kutjupa tjuṯa tjanaya kutu yunytjuwiyangku panypuranganyi tjananya.  
\v 15-16 Yaṉangu kutjupa tjuṯa tjana kulilwiyangku tjitjantananyi, kutjupa tjuṯa tjana kulilwiyangku mirri punganyi.  
\v 17 Yaṉangu tjuṯaku tjana kalypawiya nyinarra, tjana wiya palya tjanampa nyinanyi, wiya.  
\v 18 Katutjaku tjukarurru wiya tjana nyinanyi, palunya puḻkapungkunytjawiya.”   
\p
\v 19 Katutjaku wangka irriṯi piipangka tjunutja ngarrinyi nganaṉa kulintjaku. Yalatjiku nganaṉa ninti nyinanyi. Wangka palunya kulira puṯulanku watjalku Katutjala ngula, “Ngayulu nyuntupa wangka kulilwiya, wiya nyuntu ngayunya warukutu wantirriyantjaku.” Yilta Katutjalu nganaṉanya yuwankarra kuutawutjungka watjalku palumpa luwutjirratjangku, nganaṉa yuwankarrangku palumpa luwu kilytjuntanutjangka.  
\v 20 Nganaṉa Katutjaku luwuwana nyinarra puṯu Katutjaku kalyparriku. Nganaṉa wiya kutu palumpa wangkaku tjukarurru nyinapayi, nganaṉa kuya palyara wangka palunya kilytjuntankupayi. Wangka palunya ngarrinyi nganaṉa riitarringkula yalatji nintingku kulintjaku, “Ngayulu ilta Katutjaku wangka kilytjuntankupayi.”   
\s1 Yiitju Kurayitjanya kulira walytjarringkula nganaṉa Katutjaku kalypalpi nyinaku  
\p
\v 21-22 Katutjaku wangka watjalpayi tjuṯangku watjara wakaṉutja Muutjaku wangkaṯarra nganaṉa riitarringkula nintingku kulilku yalatji. Kala, kuwarri Katutjalu yaṉangu tjuṯa palumpa kalypaṉi, tjana Tjuwu tjuṯa, Tjuwuwiya tjuṯaṯarra Yiitju Kurayitjanya kulira walytjarrinytjala. Wiya paluru kuliṉi tjana Muutjaku luwuwana nyinanytjaku.  
\v 23 Yaṉangu yuwankarrangku nganaṉa kuya palyalpayi, Katutjalu kuya palyalpayi tjuṯa wiya kalypaṉi.  
\v 24 Yalatji yaṉangu tjuṯaku aḻṯururringkula Katutjalu Yiitju Kurayitjanya palumpa katja mantakutu wantirriyaṉu nganaṉanya ngulytjulkitjangku. Paluru nganaṉanya ngulytjura nyinatjunkupayi, kana kutu nyinanytjaku.  
\v 25-26 Katutjalu Yiitju Kurayitjanya mantakutu wantirriyaṉu tjawirrilyi nguwanpa waralyngarala ngurrka yintirra mirrirrinytjaku, yaṉangu tjuṯaku kuya waṉikitja. Nganampa kuya waṉingutja nganaṉa kulira Yiitjuku walytjarrinytjala Katutjanya nganampa kalyparringanyi. Katutjalu tjukarurrungku kulira irriṯi yaṉangu tjuṯaku tjanampa kuya waṉipayi, tjana tjawirrilyi pungkunytjala. Kuwarrilpi paluru tjukarurrungku yaṉangu tjuṯa ngulytjuṉi, tjana Yiitjunya kulira walytjarrinytjala.   
\p
\v 27-28 Nganaṉa Yiitjuku walytja tjuṯa Katutjaku ngulytjurringkula wiya yalatji watjantjaku, “Ngayulu Katutjaku ngulytjurringu palumpa luwuwana kutu tjukarurru nyinarra.” Yalatji wiya. Yiitjunya kulira walytjarringkula nganaṉa Katutjaku ngulytjurringu. Nganaṉa nintingku kuliṉi. Yaṉangu Yiitjuku walytjarringkula Katutjaku ngulytjurringanyi. Wiya Muutjaku luwuwana nyinarra yaṉangu Katutjaku ngulytjurringanyi, wiya.  
\v 29-30 Kutjupa tjuṯangku watjalpayi, “Katutjanya nganampa Tjuwu tjuṯaku walytja kutju nyinanyi.” Yalatji wiya. Paluru yuwankarraku walytja nyinanyi, Tjuwuwiya tjuṯakuṯarra. Tjuwuwiya tjuṯangku, Tjuwu tjuṯangkuṯarra Yiitjukuṉu wangka kulira walytjarrinytjala paluru tjanampa kalyparringkula walytja nyinanyi.  
\v 31 Yalatji Yiitjukuṉu wangka kulira walytjarringkula nganaṉa kuliṉi Muutjaku luwu yilta tjukarurru kutu ngaranyi.   
\c 4  
\s1 Yipuramalu Katutjaku wangka kulilku  
\p
\v 1 Wangka Yipuramanyatjarra ngayulu nyurrangarrinya nintilku. Paluru Tjuwu tjuṯakulampa walytja yurruntitja.  
\v 2 Ngunytjiṉa nyurrangarrinya watjaṉi nintilkitjangku. Tjinguru Yipuramalu tjukarurru palyaṉutjangka Katutjalu palunya ngulytjuṉu?, wiya. Yalatji tjukarurru palyara Yipuramalu yalatji walytjangku puḻkapungamara, “Ngayulu Katutjaku tjukarurru palyaṉutjangka paluruṉi ngulytjuṉu.” Wangka yalatji kulira tjinguru yaṉangu tjuṯa yunyparriku, kanya Katutjalu kulira wiya yunyparriku.  
\v 3 “Yipuramalu Katutjaku wangka watjaṉutja kuliṉutjangka Katutjanyara yunyparringkula palunya ngulytjuṉu.” Yalatji Katutjaku wangka yurrunpa tjunutja ngarrinyi.  
\v 4-5 Yara yalatjiya kulila! Waarrkana waarrkarringanyingka mayutjungku ngaparrtjingku wiitjimani yungkupayi, tjukarurru waarrkarringutjangka. Yara palunya nguwanpa yaṉangu tjaampalangkuya yalatji wiyawanangku kuliṉi, “Katutjaku waarrka ngayulu palyaṉutjangka, paluruṉi ngaparrtjingku ngulytjuṉu.” Yalatji wiya. Nganaṉa palumpa waarrka palyaṉutjangka Katutjalu wiya nganaṉanya ngulytjulpayi. Nganaṉa kuya palyalpayi tjuṯangku Katutjaku wangka kulira walytjarringutjangka paluru nganaṉanya ngulytjuṉi.  
\v 6 Wangka palunya nguwanpa Tapitalu yirriṯi watjaṉu. Yaṉangu tjuṯa Katutjaku walytjarrinytjala paluru yaṉṯayaṉṯara tjukarurru tjanampa palyaṉi. Yuwa, yaṉangungku Katutjaku wangka kulira walytjarrinytjaku, wiya palumpa waarrka palyara kutju walytjarrinytjaku. Tapita paluru Katutjakuṉu wangka yalatji wakaṉu,   
\q1
\v 7-8 “Katutjalu yaṉangu tjuṯaku kuya waṉirra palunya tjananya yaṉṯayaṉṯara tjukarurru kanyiṉi. Kuya waṉingutjangka yaṉangu tjuṯa yunypa nyinaku.”   
\p
\v 9 Wangka panyapa Tapitalu watjaṉu, nganaṉanyaṯarra Katutjalu yaṉṯayaṉṯara tjukarurru kanyilku? Tjinguru Tjuwu tjuṯa kutju?, tjinguru watirringutja tjuṯa kutju? Yalatji nguwanpa wiya Katutjalu kuliṉi. Tjuwuwiya tjuṯaṯarra paluru yaṉṯayaṉṯara tjukarurru kanyilku, watirringutjawiya tjuṯaṯarra paluru tjukarurru kanyilku. Katutjaku wangka yirriṯi tjunutja panyapa ngayulu watjaṉu yalatji, “Yipuramalu Katutjaku wangka watjaṉutjangka kuliṉu. Yalatji kuliṉutjangka Katutjalu yunyparringkula palunya ngulytjuṉu.”  
\v 10 Yaalytjingara Yipuramalu yalatji Katutjalu watjaṉutja kulira walytjarringu? Tjinguru watirringutjangku paluru Katutjalu watjaṉutja kulira walytjarringu?, tjinguru yurrunpa? Yurrunpa ilta Yipuramanya Katutjaku wangka kulira walytjarringu.  
\v 11 Ngula paluru watirringu. Watirringkula paluru yalatji kuliṉu, “Yurrunpa ngayulu Katutjalu watjaṉutja kuliṉutjangka paluruṉi ngulytjuṉu. Ngayulu yilta palumpa walytja nyinarra watirringu.” Tjuwuwiya, watirringutjawiya tjuṯaṯarra Yipuramaku walytja ngaṉṯitja tjuṯa nguwanpa nyinanyi, Katutjaku wangka kulira walytjarringkula.  
\v 12 Tjuwu watirringutja tjuṯangkuṯarra Katutjaku wangka kulira walytjarringkula Yipuramaku walytja ngaṉṯitja nyinanyi. Tjana Yipuramanya nguwanpangku Katutjaku wangka kulira walytjarringu. Yipuramanya yilta Katutjaku walytjarringkula ngulalpi watirringu.   
\s1 Yipuramanyangarri Katutjalu watjaṉu  
\p
\v 13 Yirriṯi Katutjalu Yipuramanya watjaṉu, palumpa ngaṉṯitja tjuṯa manta tjuṯangka kanyira yaṉṯayaṉṯalkitjangku. Yalatji palunya watjaṉu Yipuramanya ngulytjura, paluru palumpa wangka kuliṉutjangka. Yurrunpa Yipuramanya Katutjaku luwuwana tjukarurru nyinanytjala wiya Katutjalu palunya ngulytjura watjaṉu palumpa ngaṉṯitja tjuṯa yaṉṯayaṉṯalkitjangku.  
\v 14 Tjinguru Yipuramanya, palumpa ngaṉṯitja tjuṯaṯarra Katutjaku luwuwana tjukarurru nyinanytjala Katutjalu tjananya ngulytjura watjanmara, yaṉṯayaṉṯalkitjangku. Wangka yalatji nguwanpa Katutjalu wiya kuliṉu. Paluru kuliṉu paluru tjana palumpa wangka kulintjaku. Yalatji tjana nganaṉaṯarra tjungungku kulintjala paluru ilta nganaṉanya ngulytjuṉi yaṉṯayaṉṯalkitjangku.   
\p
\v 15 Tjinguru Katutjaku luwu paluru ngaranytjawiyangka yaṉangu tjuṯangku kuya palyara yuṯuyuṯu nyinamara, palumpa luwu kilytjuntankunytjawiya. Yaṉangungku Katutjaku luwu kulira kuya palyara, paluru luwu palunya yilta kilytjuntankupayi. Yalatji kilytjuntananyingka Katutjanyara puntura ngurrkurriku.  
\v 16 Yuwa, Katutjalu aṉangu tjuṯa aḻṯururringkula ngulytjura yaṉṯayaṉṯaṉi, tjana palumpa wangka kulira walytjarrinytjala. Katutjalu panyapa yirriṯi watjaṉu yaṉangu yuwankarra yaṉṯayaṉṯalkitjangku, Tjuwu tjuṯa Tjuwuwiya tjuṯaṯarra. Yuwa Yipuramaku ngaṉṯitja tjuṯa, Tjuwu tjuṯa Katutjaku luwutjarra nyinanyi. Tjuwuwiya tjuṯaṯarra ngulytjura yaṉṯayaṉṯalkitjangku Katutjalu watjaṉu, tjana palumpa wangka kulira walytjarrinytjala. Tjuwuwiya tjuṯa tjana Yipuramaku walytja ngaṉṯitja nguwanpa nyinanyi, Yipuramanya nguwanpangku tjana Katutjaku wangka kulira walytjarringkula.  
\v 17 Yalatji nguwanpa Katutjaku wangka, yurrunpa paluru watjaṉutja ngaranyi, “Yipurama. Nyuntu wangka ngaatjanya kulila! Nyuntupa walytja ngaṉṯitja tjuṯalingku nyinaku. Kutjupa tjuṯaṯarra nyuntupa ngaṉṯitja tjuṯa nguwanpa nyinaku, tjanaṯarra nyuntupa yunyparringkula nyinaku, walytja yirriṯi nyinapayiku.” Yalatji Katutjalu Yipuramanya watjaṉu, paluru palumpa wangka kulira walytjarringutjangka. Yilta Katutjanya ngangkari tiṉatjarra nyinanyi palumpa wangka nganaṉa kulintjaku puntura. Paluru mirri tjuṯa kanalpayi. Paluru manta, ilkari, watiya tjuṯa, puḻi tjuṯa palyalpayi.   
\p
\v 18-20 Katutjalu Yipuramanya watjaṉu yalatji, “Nyuntupa walytja ngaṉṯitja tjuṯalingkulpiya nyinarra waṉiku, piṉṯirri tjuṯa nguwanpa.” Katja yutirrinytjawiyangka tjiḻpi Yipuramalu kutu Katutjakuṉu wangka kuliṉingi, katja mantjilkitjangku. Paluru rawa nyinarra tjiḻpirringu, waan yantaṯa yiiyangka. Yalatji nyinarra wiya kuliṉu, “Ngayulu tjiḻpi tiṉalingkurringkula nyinanyi. Ngayuku miiṯa Tjaaranyaṯarra ulkuminalingku nyinanyi pipirri mantjintjawiya. Ngalimpa pipirri wiya yutirriku.” Wiya paluru yalatji kuliṉingi. Katutjakuṉu wangka paluru kutu kuliṉu, “Katja ngalimpa yilta yutirriku.” Paluru rapa nyinangi Katutjaku wangka palunya kulira. Kala, ngula paluru katjalpi mantjira yunypalpi nyinangi. Palulanguru yilta palumpa walytja ngaṉṯitja tjuṯalingkulpi nyinapayi, minga.   
\p
\v 21-22 Katutjalu ngangkari tiṉatjarrangku pipirri yungkukitjangku watjaṉutjangka Yipuramalu yilta kuliṉu. Yalatji kuliṉutjangka Katutjalu palunya ngulytjuṉu. Paluru kuliṉu, “Yipuramanya yilta ngayuku tjukarurru nyinanyi.”  
\v 23-24 Wangka palunya Katutjalu Yipuramanya ngulytjuṉu paluru palumpa wangka kuliṉutjangka. Yalatji nganaṉa palumpa wangka Yiitjunyatjarra kulira walytjarrinytjala, paluru ngulytjuṉi. Paluru yilta ngangkari tiṉatjarrangku mayutju nganampa Yiitjunya mirringuru kanaṉu.  
\v 25 Nganampa kuya waṉinytjaku Katutjalu Yiitjunya mantakutu wantirriyaṉu waralyngarala mirrirrinytjaku. Paluru Yiitjunya mirringuru kanaṉu nganaṉa Yiitjuku wangka kulira Katutjakuṯarra kalypalpi nyinanytjaku.   
\c 5  
\s1 Kuya waṉirralanya tjukarurru nyinatjunu  
\p
\v 1 Yuwa, Katutjalu nganaṉanya kalyparringkula ngulytjuṉu, palumpa wangka Yiitjunyatjarra nganaṉa kulira walytjarrinytjala. Nganaṉa palumpa walytja nyinarra yunypa nyinanyi, palumpa kalypa.  
\v 2 Yiitju Kurayitjaku wangka nganaṉa kulira walytjarringkula Katutjakuṯarra kalypalpi nyinanyi. Katutjaku kalyparringkula nganaṉa yunypa nyinanyi, ngula palulawana tjungu nyinakitja.  
\v 3-4 Kutjupa tjuṯangku nganaṉanya panypurangkula pungkunytjala nganaṉa kutu yunypa nyinanyi yalatji kulira, “Tjana nganaṉanya panypurangkula pungkunytjala nganaṉa tjukarurru kutu nyinanyi. Yalatji nganaṉa tjukarurru nyinanyingka Katutjanya yunyparringanyi.” Nganaṉa yalatji tjukarurru nyinarra nintingku kuliṉi palumpa ngurrangka ngula nyinakitjangku.  
\v 5 Wiya nganaṉa ngurra palula nyinakitja puṯu paṯara nyinanyi. Ngurra palula kanyilkitjangku Katutjalu nganaṉala palumpa kurrunpa tjarrpatjunutjangka nganaṉa kuliṉi paluru nganampa yilta yunytju nyinanyi.   
\p
\v 6 Nganaṉa kuliṉi. Yirriṯi nganaṉa Katutjaku ngurrpangkuwarri kutu kuya palyara nyinangi. Puṯula tjukarurru nyinakitjangku kuliṉingi. Katutjalu yirriṯi walytjangku kuliṉingi yuḻṯa palula Kurayitjanya mirrirrinytjaku, kuya nganampa waṉikitja. Yiitju Kurayitjanya yilta nganampa watiyangka waralyngarala mirrirringu.  
\v 7 Yaraṉa nyurrangarrinya watjalku. Tjinguru wati walytja pikangka mirri pungkupayingka nyuntu yangatjunkula watjalku, “Ngayunyaṉi mirri puwa!, wati palatja wanti!, ngayuku walytja.” Wati kutjupa walytjawiya palya nyinapayi pikangka mirri pungkupayingka tjinguru nyuntu wangka palunya nguwanpa watjara yangatjunku. “Ngayunyaṉi mirri puwa!, wati palatjanya wanti!” Wati kutjupa kuya palyara nyinapayi pikangka mirri pungkupayingka wiya nyuntu wangka palunya nguwanpa watjara yangatjunku, nyuntu palunya wantiku.  
\v 8 Wati kuya palyalpayi palunya nguwanpa nganaṉa kutu kuya palyalpayi. Yalatji kulira Katutjanya nganampa yunytju nyinarra Yiitju Kurayitjanya wantirriyaṉu nganampa waralyngarala mirrirrinytjaku.  
\v 9 Yalatji paluru tjawirrilyi nguwanpa waralyngarala mirrirringu. Mirrirringkula ngurrka yintirra paluru nganaṉanya ngulytjura Katutjaku kalypalpi nyinatjunu. Yalatji nganaṉa palumpa kalyparrinytjala paluru wiya nganaṉanya warukutu waṉiku, wiya.  
\v 10 Katutjalu yirriṯi kuliṉu nganaṉanya ngulytjulkitjangku. Yurrunpa paluru kuliṉu nganaṉa palumpa yunytjuwiya nyinanytjala. Yalatji palunya paluru kulira katja palumpalpi ngalya wantirriyaṉu nganaṉanya ngulytjuntjakitjangku. Palurulanya ngulytjuṉu Yiitju Kurayitjanya nganampa mirrirringutjangka. Katutjaku kalypa nyinarra nganaṉa palumpa walytja tjuṯa nyinanyi. Paluru kanarringkula ngangkari tiṉatjarrangku yilta nganaṉanya yaṉṯayaṉṯara kanyinmalpa, kana kutu.  
\v 11 Wangka ngaatjanyalpi nganaṉa kulintjaku. Nganaṉa yunypa nyinanyi Katutjalu Yiitju Kurayitjanya mantakutu ngalya wantirriyaṉutjangka. Yiitjunya nganampa mayutju nyinanyi. Paluru mirrirringkula nganaṉanya Katutjaku kalypa nyinatjunu.   
\s1 Yatamanya, Kurayitjanyaṯarra nganaṉa kulintjaku  
\p
\v 12 Yirriṯi wati Yatamalu nyinarra kuya palyaṉu. Yalatji paluru kuya palyantjala Katutjalu watjaṉu paluru ngula mirrirrinytjaku. Palumpa ngaṉṯitja tjuṯangkuṯarra kuya palyara mirrirringkupayi. Yaṉangu yuwankarra yalatji kuya palyara mirrirringkupayi.  
\v 13 Yalatji irriṯi yaṉangu tjuṯangku kuya palyara nyinapayi. Palulanguru Katutjalu palumpa luwutjarra Muutjanya yungu. Irriṯi paluru tjana Katutjaku luwuku ngurrpa nyinanyingka Katutjalu tjananya kuru watjalwiyangku wantingu, luwu tjanampa ngaranytjawiyangka.  
\v 14 Yatamalungarri kuya palyara nyinarra mirrirringkupayi. Palulanguru palumpa ngaṉṯitja tjuṯangku kutu kuya palyara nyinarra mirrirringkupayi. Yalatjiya kuya palyara nyinarra mirrirringkula wati Muutjanyalpi nyinangu. Yurruntitja paluru tjana wiya Katutjaku wangka kulira kilytjuntanu, Yatamalu kilytjuntanutja nguwanpangku, palumpa wangkakuya ngurrpa nyinapayi.  
\p Yatamanya kulira nganaṉa Yiitju Kurayitjanyaṯarra kulintjaku.  
\v 15-17 Yatamalu Katutjaku wangka wantirra kuya palyantjala, Katutjalu palunya mirritjunu. Yaṉangu kutjupa tjuṯangkuṯarraya wati palunya nguwanpa tjukarurruwiya nyinarra kuya palyalpayi. Palulanguruya nyinarra mirrirringkupayi. Yalatji irriṯi Yatamalu kuya palyara mirrirringutjangka, yaṉangu tjuṯaya palunya nguwanpa mirrirringkupayi. Nganaṉaṯarra palunya nguwanpa mirrirringkuku. Yuwa, wati paluru kuya palyaṉutjangka, Katutjalu mirritjunu. Nganaṉa, yaṉangu tjuṯangkuṯarra kuya palyantjala Katutjalu yaṉangu uwankarralanya mirritjunkupayi. Yiitju Kurayitjalu wiya kuya palyalpayi. Paluru palya nyinarra nganaṉanya ngulytjulkitja mirrirringu. Yaṉangu tjuṯangku palumpa wangka kulira kana kutu nyinamalpa, mayutju tiṉa tjuṯa nguwanpa. Nganaṉa yalatji kana kutu nyinanytjaku Katutjalu nganampa aḻṯururringkula palunya mantakutu wantirriyaṉu. Nganaṉa kuya palyalpayi tjuṯangku palumpa wangka kulira walytjarringkula Katutjaku kalypalpi nyinaku. Yiitju Kurayitjalu nganaṉanya ngulytjulkitja mirrirringutjangka, nganaṉa punturalpi yunyparringanyi.   
\p
\v 18 Wati paluru Yatamalu kuya palyaṉutjangka, yaṉangu yuwankarrangkula kuya palunya nguwanpa palyalpayi. Kuya palyalpayi tjuṯa Katutjalu mirritjunkula warukutu waṉiku. Yiitju Kurayitjanya kuya waṉikitja mirrirringutjangka, Katutjalu nganaṉanya yaṉangu yuwankarra ngulytjura kanyilku kana kutu nyinanytjaku.  
\v 19 Wati paluru Yatamanya Katutjaku tjukarurruwiya nyinangutjangka, yaṉangu yuwankarralpiya palumpa tjukarurruwiya nyinapayi. Yiitju Kurayitjanya Katutjaku tjukarurru nyinarra mirrirringutjangka, Katutjanya yaṉangu tjuṯaku kalyparringu. Paluru tjana tjukarurrulpi nyinaku, palumpa.   
\p
\v 20-21 Yirriṯi Katutjalu palumpa luwutjarra Muutjanya yungu. Yaṉangu tjuṯangkuya luwu palunya kulira nintirrirra yalatji kuliṉu, “Katutjaku luwu nganaṉa kilytjuntankula yilta kuya nyinanyi.” Yalatji kulira tjana kutu kuya palyalpayi. Punturalpiya kuya palyalpayi. Paluru tjana kuya kutu palyara mirrirringkupayi, kutjupa tjuṯaṯarra kuya kutu palyara mirrirringkupayi. Yalatji tjana puntura kuya palyara nyinanytjala Katutjanya tjanampa yaḻṯurunytju nyinapayi. Nganampaṯarra kuya kutu palyalpayiku yaḻṯurunytju nyinanyi. Aḻṯururringkula nganaṉanya ngulytjuṉu, Yiitju Kurayitjanya nganampa kuya waṉikitja watiyangka waralyngarala mirrirringutjangka. Palulanguru nganaṉa kana kutu nyinamalpa palumpa ngurrangka.   
\c 6  
\s1 Yiitju Kurayitjanya mirringuru kanarringutja nguwanpa nganaṉaṯarralpi mirringuru kanarringkula nyinaku  
\p
\v 1 Nganaṉa nintingku yalatji kuliṉi. Nganaṉa kuya palyantjala, Katutjalu yaḻṯururringkula nganampa kuya waṉipayi. Nganaṉa tjinguru tjukarurru nyinanytjawiya kuya kutu palyalku, yalatji kulira, “Palya nganaṉa kutu kuya palyalku, Katutjalu kutu aḻṯururringkula kuya nganampa waṉimalpa.”  
\v 2 Yalatji kulira kuya palyantjawiya nganaṉa tjukarurru palumpa nyinanytjaku, Yiitju Kurayitjanya waralyngarala kuya waṉikitja mirrirringutjangka.  
\v 3-4 Nganaṉa papatatji mantjira Yiitju Kurayitjaku walytjarringu. Yalatji Katutjalulanya ngulytjuṉu. Nganaṉa yalatji kulintjaku, Yiitju Kurayitjanya watiyangka waralyngarala mirrirringu. Paluru tjana mirri palunya kuḻpingka tjarrpatjunkula ngarritjunu. Paluru mirri ngarrinytjala Katutjalu ngangkari tiṉatjarrangku palunya kanara pakaltjingaṉu. Palunya nguwanpa nganaṉa papatatji mantjintajala Katutjalu ngangkari tiṉatjarrangku nganaṉanya ngulytjulpayi kana kutu nyinanytjaku. Yalatji ngulytjuṉutjangka nganaṉa kuya palyantjawiya tjukarurru nyinanytjaku.   
\p
\v 5 Yuwa, nganaṉa papatatji mantjintjala Katutjalulanya ngulytjulpayi nganaṉa Yiitju Kurayitjaku walytjaṯarra nyinanytjaku. Nganaṉa kuliṉi Yiitjunya mirrirringkula ngarrinytjala Katutjalu palunya kanara pakaltjingaṉu. Palunya nguwanpa nganaṉanyaṯarra Katutjalu kanara pakaltjingalku kana kutu nyinanytjaku.  
\v 6-7 Kuya palyara nyinapayi tjuṯaku Yiitju Kurayitjanya waralyngarala mirrirringu kuya waṉikitja. Nganampaṯarra paluru mirrirringu, nganaṉa tjukarurru nyinanytjaku kuya palyantjawiya. Yurrunpa nganaṉa mamuku mayutjuku wangka kulira kuya palyara nyinapayi. Paluru nganampa mayutju nyinapayi. Kuwarrilpi Yiitjunya nganampa mayutju nyinanyi palumpa wangka kulira nganaṉa tjukarurru nyinanytjaku. Nganaṉa wiya mamuku wangka kulira kuya palyantjaku.  
\v 8 Yalatji paluru mirrirringu nganampa kuya ilta waṉikitja. Nganampa kuya waṉirra paluru nganaṉanya ilta ngulytjura ngurra palumpaṉungka nganaṉanya kana kutu kanyinmalpa.  
\v 9 Paluru mirringuru kanarringkula piyuku mirrirrinytjawiya kana kutu nyinamalpa. Yalatji nganaṉa nintingku kuliṉi.  
\v 10 Yuwa, paluru mirrirringu yaṉangu uwankarraku kuya waṉikitja, ngula paluru wiya piyuku mirrirriku kuya waṉikitja. Kana paluru nyinamalpa Katutjaku tjukarurru kutu.  
\v 11 Yiitju Kurayitjanya Katutjaku tjukarurru nyinapayi nguwanpa nyurrangarriṯarra Katutjaku tjukarurru nyinanytjaku, Yiitjuku walytjarringkula.   
\p
\v 12 Kuya palyantjawiyangkunyurra wantirra nyinanytjaku. Wiyanyurra kuya palyalkitjangku kulintjaku.  
\v 13 Wiyanyurra kuya yalatjingku palyantjaku. Kurungku nyakula kuya palyantjawiya. Pinangku kulira kuya palyantjawiya. Marangku wiyanyurra pampura kuya palyantjaku. Tjina yankulanyurra wiya kuya palyantjaku. Katutjanya kutju kulira tjukarurru kutunyurra nyinanytjaku. Yalatjiya kulinma!, “Katutjalu nganaṉanya ngulytjuṉu kana kutu nyinanytjaku. Nganaṉa yunytjurringanyi palumpa tjukarurru kutu nyinanytjaku.”  
\v 14 Muutjaku luwuwana ngayulu kutu nyinanytjala Katutjaluṉi ngulytjulku. Yalatji wiya. Nyurrangarri Yiitjuku walytjarringutjangka Katutjalu nyurrangarrinya aḻṯururringkula ngulytjura kuya waṉingu. Palumpa walytjarringutjangka Katutjalu nyurrangarrinya rapaṉi tjukarurru nyinanytjaku.   
\s1 Katutjaku waarrkana nganaṉa tjukarurru nyinanytjaku  
\p
\v 15 Tjinguru kutjupa tjuṯangku kulilku, “Katutjalu nganaṉanya ngulytjuṉu nganaṉa Yiitjuku walytjarringutja. Muutjaku luwuwana nyinanytjawiyangku nganaṉa palya kuya palyalku, Katutjalu nganampa kuya waṉimalpa.” Nganaṉa wiya yalatji kulira kuya kutu palyantjaku.  
\v 16 Mayutjuku tjukarurru nyinakitjangku nganaṉa kulira nyinapayi, waarrkana palya nyinakitjangku. Nyurrangarri tjinguru mamuku mayutjuku waarrkana nyinarra kuya palyara nyinaku. Yalatji kuya palyara nyinanytjala ngula Katutjalu nyurrangarrinya warukutu wantirriyalku. Nyurrangarri Katutjaku waarrkana nyinarra palumpa tjukarurru kutu nyinanytjaku. Yalatjinyurra tjukarurru nyinanytjala ngula kuutawutjungka Katutjanya nyurrangarrimpa kalypalpi nyinaku.  
\v 17 Yirriṯi nyurrangarri kuya palyara nyinapayi, mamuku waarrkanyurra palyara nyinapayi. Ngayulu nyurrangarrinya nintintjala wangka Yiitjunyatjarranyurra kulira palumpa walytja tjuṯalpi nyinanyi. Yalatji kulira ngayulu Katutjanya puḻkapungkupayi.  
\v 18 Kuya kutu palyantjawiyalpinyurra nyinanyi, tjukarurrulpinyurra nyinanyi.   
\p
\v 19 Yara panyapa ngayulu watjaṉu, tjaampala mamuku waarrkana tjuṯa nyinanyi, kutjupa tjuṯa Katutjaku waarrkana nyinanyi. Yara panyapa ngayulu nyurrangarrinya watjaṉu nintilkitjangku puṯunyurra kuliltjipingkamarra. Yuwa yirriṯi nyurrangarri mamuku waarrkana tjuṯangku kuya palyara nyinapayi yalatji. Marangku pampuranyurra kuya palyara nyinapayi. Kurungku nyakulanyurra kuya palyara nyinapayi. Tjina yankulanyurra kuya palyara nyinapayi. Kuwarrilpi nyurrangarri Katutjaku tjukarurru nyinanytjaku yalatji. Marangku pampuranyurra tjukarurru palyantjaku. Kurungku nyakulanyurra tjukarurru palyantjaku. Tjina yankulanyurra tjukarurru nyinanytjaku, Katutjaku.   
\p
\v 20 Yirriṯinyurra kuya kutu palyalpayi Katutjanya kulilwiyangku. Wiyanyurra kulilpayi Katutjaku tjukarurru nyinakitjangku, wiya.  
\v 21 Tjinguru nyurrangarri yalatji kuya palyara puntura yunypa nyinapayi? Wiya. Kuwarrinyurra kuṉṯarringanyi kuya panyapa yurrunpangku palyaṉutjangku kulira. Yaṉangungku kuya kutu palyantjala Katutjalu ngula palunya warukutu wantirriyalku.  
\v 22 Kala, kuwarri nyurrangarri Katutjaku waarrkana tjuṯa tjukarurru nyinanyi, kuya kutu palyantjawiya. Palumpa kutjunyurra tjukarurru nyinarra yunypa nyinanyi. Ngula paluru nyurrangarrinya palumpa ngurrangka nyinatjunku, kana kutu nyinanytjaku.  
\v 23 Yaṉangungku kuya kutu palyantjala paluru mirrirringkula waru tiṉangka nyinaku. Yaṉangu kutjupangku wangka Yiitjunyatjarra kulira walytjarrinytjala Katutjalu palunya palumpa ngurrangka nyinatjunku kana kutu nyinanytjaku, Yiitju Kurayitjalawanaṯarra. Paluru ilta nganampa mayutju puntu nyinanyi.   
\c 7  
\s1 Muutjaku luwuwana wiyanyurra nyinanytjaku  
\p
\v 1 Walytja tjuṯa, nintinyurra nyinanyi panya Muutjaku luwuku. Wangka ngaakuṯarra nyurrangarri ninti nyinanyi. Yaṉangungku kana nyinarra luwu palumpa kulilpayi, tjukarurru nyinakitjangku. Paluru mirrirringkula wiya luwu palumpa kulilpayi. Mirri kulilwiya ngarripayi.  
\v 2-3 Wati kana nyinanyingka kutju, palumpa miiṯaku tjukarurrura nyinanytjaku, kungka paluru wiya wati kutjupa yankula mantjintjaku. Kungka paluru wati kutjupa mantjira Muutjaku luwu kilytjuntanku. Yalatji Muutjaku luwu ngaranyi. Wati paluru mirrirringanyingka ngaṉṯi, palya kungka paluru wati kutjupa mantjintjaku, luwu palunya kulilwiyangku.   
\p
\v 4 Walytja tjuṯa, Yiitju Kurayitjaku walytjarringkula nyurrangarriṯarra Muutjaku luwu kulilwiya nyinanytjaku. Paluru nyurrangarrinya tjukarurruṉu Katutjaku waarrka palyantjaku. Yiitju Kurayitjaku walytja tjuṯalpinyurra nyinanyi, palunya kanara pakaltjingaṉutja nguwanpa.  
\v 5 Yaṉangungku walytjangku kulira kuya palyara nyinapayi Muutjaku luwuwana tjukarurru nyinanytjawiyangku. Yalatji nganaṉa wiyawana kutu nyinanytjala Katutjalu nganaṉanya warukutu wantirriyalku. Yaṉangu paluru Muutjaku luwuwana riitarringkula kulilpayi, “Katutjalu marrkuṉutjawana ngayulu yunytjurringanyi kuya palyalkitja.”  
\v 6 Nganaṉa wiya Muutjaku luwuwana kutju nyinakitja yunytju nyinanyi. Nganaṉa Yiitjuku walytjarringkula Katutjaku kurrunpa wangkanytjala kulira tjukarurru nyinanytjaku, palumpa waarrka palyalkitja.   
\s1 Yaṉangungku Muutjaku luwu kulira kutu kuya palyalpayi  
\p
\v 7 Tjinguru kutjupangku watjalku Muutjaku luwu kuya ngaranyi. Yalatji wiya. Luwu paluru palya. Irriṯi ngayulu luwu palulawana riitarringkula kuya tjuṯaku nintirringangi. Muutjaku wangka yalatji ngarrinyi, “Yaṉangu wiya yunytjurrinytjaku kutjupakuṉu yulytjaku, wiya yunytjurrinytjaku kutjupakuṉu miiṯaku.” Yalatji wiya riitarringkula ngayulu luwu palumpa ngurrpa nyinamara.  
\v 8 Ngayulu kutu kuya palyara nyinapayi. Muutjaku wangka ngayulu riitarringkula yalatji kuliṉingi, “Muutjaku wangka yalatji ngaranyi, ‘Yaṉangu wiya yunytjurrinytjaku kutjupakuṉu yulytjaku, wiya yunytjurrinytjaku kutjupakuṉu miiṯaku.’” Yalatji riitarringkula ngayulu kutu yunytjurringangi kutjupakuṉu miiṯaku. Ngayulu kutu yunytjurringangi kutjupakuṉu yulytjaku. Ngayulu kutu kuya palyara nyinapayi Muutjaku wangka kilytjuntankula. Luwu palunya ngayulu riitarrinytjawiya nyinarra ngurrpa nyinamara.  
\v 9-11 Yirriṯi ngayulu pipirri nyinarra palya nyinangi, Muutjaku luwuku ngurrpa. Pipirri wiimanguru ngayulu maa tiṉarringkula luwu palumpa nintirringu. Nintirringkula ngayulu kuliṉu, “Yilta, ngayulu kuya palyara Katutjaku wangka kilytjuntankupayi.” Katutjalu Muutjanya watjaṉu yaṉangu tjuṯangku kulira luwu palulawana tjukarurru nyinanytjaku, kilytjuntankunytjawiya. Yalatji tjana nyinarra yaṉangu kana kutu nyinaku. Ngayulu tjukarurruwiya nyinarra yalatji kuya palyara nyinanytjala Katutjalu kuliṉu ngayunya warukutu wantirriyalkitjangku. Ngayulu Puulalu kuliṉi. Yalatji kana kutu nyinanytjawiya ngayulu warungka nyinaku, Muutjaku wangka kilytjuntankula. Luwu palumpa tjanampa ngayulu puṯu tjukarurru nyinapayi. Puṯu tjukarurru nyinarra ngayulu warungkalpi nyinaku.  
\v 12 Ngayulu kuliṉi Muutjaku luwu paluru palya ngaranyi, tjukarurru.   
\p
\v 13 Kutjupa tjuṯangku tjinguru yalatji kuliṉi, “Muutjaku luwu tjukarurru ngaranytjala Katutjalu Puulanya warukutu wantirriyalku.” Tjana yalatjiṯarra kulintjaku. “Puulalu kuya kutu palyantjala Katutjalu palunya warukutu wantirriyalku.” Yilta ngayulu kuya kutu palyantjala Katutjaluṉi warukutu wantirriyalku. Yuwa, Muutjaku wangka nganaṉa riitarringkula kuliṉi yalatji. Nganaṉa yilta kuya palyara nyinanyi.   
\p
\v 14 Luwu palunya Katutjalu Muutjanya nintira irriṯi yungu. Luwu paluru Katutjakuṉu. Yalatjiku nganaṉa ninti nyinanyi. Ngayulu Katutjakuṉu wiya, ngayulu manta ngurrara kuya palyara nyinapayi.  
\v 15 Tjukarurru nyinakitjangku ngayulu wiyawana palyalpayi. Tjukarurru palyalkitjangku ngayulu kuyalpi palyalpayi. Kuya palyalkitja wiyaṉa yunytjurringanyi. Yalatji nyinarra ngayulu puṯu kulilpayi, tjukarurru nyinakitjangku.  
\v 16 Muutjaku luwu paluru ngarrinyi nganaṉa tjukarurru nyinanytjaku. Tjukarurru nyinakitjangku ngayulu puṯu kulira ngayulu kuliṉi, luwu paluru ilta palya ngarrinyi.  
\v 17 Yiltaṉa yunytjurringanyi Katutjaku tjukarurru nyinakitja. Yalatjiṉa yunytjurringkula nyinarra kuyalpi kututja ngayulu palyalpayi, mamuku mayutjungkuṉi kutu tjingapungkunytjala.   
\p
\v 18 Nintingku ngayulu yalatji kuliṉi. Ngayulu wiya kutu tjukarurru nyinapayi. Kutu tjukarurru nyinakitja yunytjurringkula ngayulu kuyalpi kututja palyalpayi.  
\v 19 Ngayulu wiya yunytjurringanyi kuya palyantjaku. Yalatjiku wiya yunytjurringkula ngayulu kuyalpi palyalpayi, tjukarurru nyinanytjawiyangku.  
\v 20 Yuwa, kuya palyantjawiya nyinakitjangku ngayulu puṯu kuliṉi, ngayulu kuya palyara kutu nyinapayi mamuku mayutjungkuṉi kutu tjingapungkunytjala.   
\p
\v 21 Yalatji ngayulu nyinanyi. Kuya palyantjawiya ngayulu yunytjurringkula kuyalpi palyara nyinapayi.  
\v 22 Ngayulu yilta kuliṉi Katutjaku luwu palya ngaranyi, palulawana tjukarurru nyinakitja ngayulu ilta yunytjurringanyi.  
\v 23 Yalatji kulira ngayulu marangku pampura kuya palyalpayi. Panyapa kulira ngayulu tjina yankula kuya palyalpayi. Yuwa, yalatji ngayulu kuya palyalpayi mamuku mayutjungkuṉi kutu tjingapungkunytjala.  
\v 24-25 Yuwa, pinangkuṯarra ngayulu kulilpayi Katutjaku luwuwana tjukarurru nyinakitjangku. Yalatji nyinarra kuya palyalkitja yunytjurringkula iltalpiṉa ngayulu kuya palyalpayi. Yalatji kuya palyara ngayulu puṯu kuliṉi, watjilpaṯarra nyinarra. Yalatji ngayulu kutu nyinanytjala Katutjaluṉi ngula warukutu wantirriyalku. Yaalytjirrikuṉa? Kala, Yiitju Kurayitjaluṉi ngulytjura kanyilku kana kutu nyinanytjaku. Yalatji kulira ngayulu Katutjanya puḻkapunganyi.   
\c 8  
\s1 Katutjaku kurrunpa nganaṉalawana nyinarra nganaṉanya ngulytjuṉi, rapa nyinanytjaku  
\p
\v 1 Yiitjuku walytja nganaṉa kutu nyinanytjala ngula Katutjalu nganaṉanya wiya payira warukutu wantirriyalku, wiya.  
\v 2 Paluru nganaṉanya palumpa kurrunpa tjarrpatjunu yaṉṯayaṉṯalkitjangku, kuya palyantjawiya kutula Yiitjuku walytja nyinanytjaku. Kurrunpa palunyatjarra nganaṉa Yiitju Kurayitjaku tjukarurru nyinaku. Nganaṉa kutu kuya palyara nyinanytjala Katutjalu nganaṉanya warukutu wantirriyalku.  
\v 3 Yaṉangu tjuṯa Muutjaku luwuwana nyinarra kutu kuya palyalpayi, wiya tjana Katutjaku ngulytjurringkupayi luwu palulawana tjana nyinarra, wiya. Katutjalu palumpa katjalpi mantakutu wantirriyara yaṉangu tjuṯa ngulytjuṉu kuya tjanampa waṉirra. Palumpa katja Yiitjunya yaṉangu nguwanpa mantangka nyinarra watiyangka waralyngarala mirrirringu tjanampa kuya waṉikitja.  
\v 4 Yiitjuku walytjarringkula nganaṉa Katutjaku kurrunpatjarrangku kulira luwu palulawana tjukarurru nyinanyi, wiya nganaṉa walytjangku kulira kutju nyinanyi, wiya.   
\p
\v 5-6 Yaṉangungku walytjangku kulira kuya kutu palyalpayi. Yalatji kutu nyinanytjala Katutjalu ngula palunya warukutu wantirriyalku. Yaṉangungku Katutjaku kurrunpa kulira paluru Katutjaku tjukarurru nyinapayi. Yalatji kutu nyinarra mantangka yunypa paluru nyinaku. Ngurra ilkaringkaṯarra kana kutu nyinamalpa.  
\v 7 Yaṉangungku walytjangku kulira wiya Katutjaku wangkaku tjukarurru nyinanyi. Yaṉangu paluru Katutjaku luwu kulira wantiku tjukarurru nyinanytjawiyangku.  
\v 8 Yaṉangu walytjangku kulira nyinapayi wiya Katutjaku kalypa nyinaku. Katutjanyara wiya yunypa nyinaku.   
\p
\v 9 Katutjaku kurrunpangku nyurrangarrila tjarrparra nintintjala nyurrangarri kulira tjukarurru nyinanyi, wiya nyurrangarri walytjangku kulira kuya kutu palyalpayi. Kutjupa tjuṯangka wiya Yiitju Kurayitjaku kurrunpa tjarrparra nyinanyi, tjana wiya palumpa walytja tjukarurru nyinanyingka. Yilta tjana wiya palumpa walytja nyinanyi.  
\v 10 Yilta yaṉangu yilytjanpa kutju nganaṉa mirrirriku, kuya palyara. Yiitju Kurayitjaku walytja nganaṉa nyinarra kurrunpa nganampa kana nyinamalpa Katutjalu nganaṉanya ngulytjuṉutjangka.  
\v 11 Yiitjunya mirri kutu wiya ngarringi, Katutjalu palunya kanara pakaltjingaṉu ngangkari tiṉatjarrangku. Katutjaku kurrunpangku nyurrangarrilawana nyinarra ngula nyurrangarri mirrirringanyingka kanara nyurrangarrinya pakaltjingalku.   
\p
\v 12 Walytja tjuṯa, wangka ngaatjanyaya kulila! Wiya nganaṉa walytjangku kulira kuya kutu palyantjaku, wantilaka!  
\v 13 Yalatjinyurra kuya kutu palyantjala Katutjalu nyurrangarrinya ngula warukutu wantirriyalku. Katutjaku kurrunpa nyurrangarri kulira tjukarurru nyinanytjala Katutjalu nyurrangarrinya palumpa ngurrangka nyinatjunku kana kutu nyinanytjaku.  
\v 14 Katutjaku kurrunpa kulira tjukarurru nyinapayi tjuṯa yilta palumpa walytja tjuṯa nyinanyi, palumpa katja tjuṯa, yuṉṯalpa tjuṯaṯarra.  
\v 15 Kurrunpa paluru nyurrangarrilawana nyinarra wiya nyurrangarrinya tjingapungkupayi Katutjaku waarrkana nguḻunytju tjuṯa nguwanpa nyinanytjaku. Kurrunpa paluru nyurrangarrinya ngulytjulpayi palumpa katja tjuṯa, yuṉṯalpa tjuṯaṯarra yunypa nyinanytjaku. Kurrunpa palunyatjarrangku nganaṉa Katutjanya yalatji waḻkulpayi, “Paapa, palya nyuntu nganampa nyinanyi.”  
\v 16 Katutjaku kurrunpangku nganaṉanya ngulytjura nintilpayi, “Nyurrangarri ilta Katutjaku walytja tjuṯa nyinanyi, palumpa katja tjuṯa, yuṉṯalpa tjuṯaṯarra.”  
\v 17 Palumpa katja tjuṯa, yuṉṯalpa tjuṯa nganaṉa nyinanyingka, tjungukulampa Kurayitjakuṯarra ngula tjukarurru Katutjalu palyalku. Yalatji nganampa tjukarurru palyalku Yiitju Kurayitjanya nguwanpala nguḻuwiya nyinangutjangka. Yalatji nganaṉa tjukarurru nyinapayi, kutjupa tjuṯangku nganaṉanya panypurangkula pungkunytjala. Yiitju Kurayitjanya tjana panypurangkula yitjipunganyingka nguḻuwiya paluru nyinangi. Ngula Katutjalu palunya puḻkawaṉiku. Nganaṉanyaṯarra paluru puḻkawaṉiku nguḻuwiyala palumpa tjukarurru kutu nyinangutjangka.   
\s1 Nganaṉa yilta ngula yunypa nyinaku, palumpa ngurrangka  
\p
\v 18 Mantangka nganaṉa miiṉṯarringkupayi. Kutjupa tjuṯangku nganaṉanya panypurangkula pungkupayi. Nganaṉa watjilpa nyinapayi. Ngula Katutjaku ngurrangka nganaṉa palulawana yunypalingku nyinaku, miiṉṯarrinytjawiya. Ngurra palula kutjupa tjuṯangku wiya nganaṉanya panypurangkula pungkuku, wiya. Yalatji ngayulu nintingku kuliṉi.  
\v 19 Yirriṯi Katutjalu manta, puḻi tjuṯa, tjiṉṯu, piṉṯirri tjuṯaṯarra palyaṉu. Puḻi tjukurrpa tjuṯa yaṉangu tjuṯa nguwanpa paṯaṉi Katutjalu palumpa walytja tjuṯa yutintjaku, tjanala kurungka. Tjiṉṯu tjukurrpa yaṉangu nguwanpa paṯaṉi Katutjalu palumpa walytja tjuṯa yutintjaku. Piṉṯirri tjukurrpa tjuṯa paṯaṉi Katutjalu palumpa walytja tjuṯa yutintjaku, tjanala kurungka.  
\v 20-22 Nganaṉa kuliṉi tjukurrpa paluru tjana yaṉangu nguwanpangku puṯu kuliṉi, “Nganaṉa ngarala wiyarringanyi. Ngula nganaṉa nyaarriku?” Katutjalu yurrunpa kuliṉu, “Puḻi tjuṯa ngarala wiyarriku. Tjiṉṯu ngarala wiyarriku. Piṉṯirri tjuṯaṯarra ngarala wiyarriku.” Palulanguru Katutjalu kuliṉingi, “Puḻi tjuṯa palya kutu ngaraku. Tjiṉṯu palya kutu ngaraku. Piṉṯirri tjuṯaṯarra palya kutu ngaraku. Palumpa tjanampa ngayulu yunypa nyinaku, ngayuku walytja palya nyinapayi tjuṯaṯarra ngayulu yunypa tjanampa nyinaku.”   
\p
\v 23 Tjukurrpa paluru tjana paṯantja nguwanpa nganaṉaṯarra Katutjaku kurruntjarrala paṯaṉi Katutjalu nganaṉanya walytjarringutja tjuṯa palumpa ngurrangka nyinatjunkula yaṉṯayaṉṯantjaku. Ngurra palula nganaṉa yilytjanpawiya nyinaku.  
\v 24-25 Yalatji ngurra palula nyinakitja nganaṉa Kurayitjakuṉu wangka kulira walytjarringu. Kuwarri wiya nganaṉa yaṉangu kutjuparrinytja nyinanyi. Yalatji yaṉangu kutjuparringkula nyinakitja nganaṉa yunypa paṯara palya kutu nyinanytjaku.   
\p
\v 26-27 Nganaṉa tjukarurru nyinakitjangku puṯu kulintjala Katutjaku kurrunpangku nganaṉanya nintilpayi. Nganaṉa Katutjanya tjapilkitjangku puṯu kulintjala, Katutjaku kurrunpangku nganampa Katutjanya tjapilpayi. Paluru palumpa kurrunpa kulira nganampa tjukarurru palyalpayi. Yuwa, Katutjaku kurrunpangku kutu Katutjanya tjapilpayi nganampa tjukarurru palyantjaku.  
\v 28 Nganaṉa nintingku kuliṉi. Katutjaku yunytju nyinapayi tjuṯa paluru tjananya kutu yaṉṯayaṉṯara kanyiṉi. Yirriṯi manta ngaranytjawiyangka paluru kuliṉu paluru tjana palumpa walytjarringkula palumpa waarrka palyantjaku.  
\v 29-30 Yirriṯi tjananya kulira paluru kutu kulilpayi tjananya ngulytjulkitjangku. Paluru kuliṉingi paluru tjana palumpa walytja tjuṯa nyinanytjaku, palumpa katja walytja nguwanpa. Katja paluru yurrunpa palumpa walytja nyinangi, palulanguru yaṉangu tjuṯalpi mayutju tiṉa Katutjaku walytja tjuṯa nyinangi.   
\s1 Katutjanya nganampa yunytju nyinanyi  
\p
\v 31-32 Wangka palunya kulira nganaṉa kuliṉi Katutjanya yilta nganampa walytja nyinanyi, paluru nganaṉanya kutu yaṉṯayaṉṯalpayi. Paluru nganampa yunytju nyinarra palumpa katja mantakutu wantirriyaṉu nganampa waralyngarala mirrirrinytjaku. Yuwa, Katutjalu nganaṉanya yaṉṯayaṉṯara uwankarra puntura yunganyi.  
\v 33-34 Katutjalu yirriṯi kuliṉu nganaṉa palumpa walytja tjuṯa nyinanytjaku. Yalatji kulira nganaṉanya ngulytjuṉu, wiya paluru nganaṉanya watjara warukutu wantirriyalku, wiya. Kutjupangku puṯu watjalku nganaṉanya warukutu wantirriyalkitjangku. Yiitju Kurayitjaluṯarra nganampa Katutjanya tjapilpayi kutu yaṉṯayaṉṯalkitjangku warukutu wantirriyantjawiyangku. Paluru nganampa waralyngarala mirrirringu. Katutjalu palunya kanara mayutju tiṉalpi nyinatjunu, nganampa.  
\v 35 Yiitju Kurayitjanya nganampa kutu yunytju nyinanyi. Kutjupangku palunya puṯu tjingapungku, nganaṉanya yaṉṯayaṉṯalwiyangku wantinytjaku. Paluru kutu nganampa yunytju nyinamalpa. Yiitjuku yunytjuwiya tjuṯangku nganaṉanya panypurangkula pungkunytjala nganaṉa palumpa tjukarurru kutu nyinaku, Katutjanyalampa yunytju nyinanytjala. Tjinguru mangarriwiya mantarrawiyapaka nyinarra nganaṉa palumpa tjukarurru kutu nyinaku, Katutjanyalampa yunytju nyinanytjala. Tjinguru kutjupa tjuṯangku nganaṉanya mirri pungkukitjangku watjantjala, nganaṉa palumpa tjukarurru kutu nyinaku, Katutjanyalampa yunytju nyinanytjala. Paluru ngangkari tiṉatjarrangku nganaṉanya rapalku, yunytjulampa nyinarra nganaṉanya yaṉṯayaṉṯalku.  
\v 36 Wangka palunya nguwanpa Katutjaku wangka yirriṯi tjunutja yalatji ngarrinyi,  
\q1 “Katutjaku walytja nganaṉa nyinanyingka, kutjupa tjuṯa kutu yunytjurringanyi nganaṉanya mirri pungkukitja. Nganaṉanya tjiipi nguwanpa mirri pungkukitjangku tjana kutu kulilpayi.”   
\p
\v 37 Yuwa, Yiitjunya nganampa yunytju nyinarra rapantjala nganaṉa palumpa tjukarurru kutu nyinaku.  
\v 38-39 Ngayulu nintingku kuliṉi wangka ngaatjanya. Katutjanyaṯarra nganampa yunytju nyinanyi. Wiya paluru kutjarra nganaṉanya yaṉṯayaṉṯalwiyangku wantiku, wiya. Mantangka nganaṉa nyinanytjala kutjupa tjuṯangku nganaṉanya panypurangkula marrkulpayi, Yiitjuku wangka wantinytjaku. Paluru kutjarra nganaṉanya rapantjala nganaṉa wiya Yiitjuku wangka wantiku, wiya. Tjinguru Yiitjuku yunytjuwiya tjuṯangku nganaṉanya panypurangkula mirri pungkukitjangku watjantjala nganaṉa wiya Yiitjuku wangka wantiku. Ilkari ngurrara kuya tjuṯangkuya puṯu palunya kutjarra tjingapungku nganaṉanya yaṉṯayaṉṯantjawiyangku wantinytjaku. Mayutju ilkari ngurrara tjuṯangku, mayutju manta ngurrara tjuṯangkuṯarra palunya kutjarra puṯu tjingapungku nganaṉanya yaṉṯayaṉṯantjawiyangku wantinytjaku. Mayutju kuwarri nyinapayi tjuṯangku, mayutju ngula nyinapayi tjuṯangkuṯarraya puṯu palunya kutjarra tjingapungku, nganaṉanya yaṉṯayaṉṯantjawiyangku wantinytjaku. Tjinguru nganaṉa ngurra walytja wantirra waṉmalingku yankula nyinanyingka paluru kutjarra nganaṉanya ilangku yaṉṯayaṉṯanmalpa, wantinytjawiyangku. Yuwa, Katutjanya Yiitjunyaṯarra yunytju nganampa puntura nyinanyi. Paluru kutjarra nganaṉanya rapara yaṉṯayaṉṯanmalpa kutjupa tjuṯangku nganaṉanya tjingapungkunytjala Yiitjuku wangka wantipayingkamarra. Paluru ilta nganampa mayutju tiṉa nyinanyi.   
\c 9  
\s1 Katutjanya Yitjurilaku walytja ngaṉṯitja tjuṯaku yunypa nyinapayi  
\p
\v 1-3 Ngayuku walytja Tjuwu tjuṯaku ngayulu Puulanya puntura yunytjurringanyi tjana Yiitju Kurayitjaku walytja tjuṯalpi nyinanytjaku. Kurayitjaku walytjaṉa nyinarra wangka palunya ngayulu kutu kulilpayi. Walytja panyapa tjuṯaku ngayulu puntura yunytjurringangi, wangka yalatji ngayulu tjukarurru watjaṉi, ngunytjinytjunkunytjawiyangku. Katutjaku kurrunpangkuṉi nintilpayi panyapa watjantjaku. Ngayulu ilta watjilpa nyinanyi paluru tjana Yiitjuku walytja nyinanytjawiyangka. Yuwa, ngayulu puntura yunytjurringanyi tjana Yiitjuku walytjarringkula Katutjaku kalypalpi nyinanytjaku.  
\v 4 Paluru tjana Yitjurilaku walytja ngaṉṯitja tjuṯa nyinanyi, Katutjaku walytja. Yirriṯi palumpa tjanampa walytja tjuṯa nyinangiya. Palunya tjananya Katutjalu nyakula ngulytjura yaṉṯayaṉṯalpayi ngangkari tiṉatjarrangku. Ngurra tjuṯangka tjananya paluru watjaṉu ngaṉṯitja tjuṯaṯarra kutu yaṉṯayaṉṯalkitjangku. Paluru Muutjanya puḻi kutjarra luwutjarra palumpa yungu tjana palulawana Katutjanya puḻkapungkula nyinanytjaku. Tjuṯangara Katutjalu tjananya watjaṉu yaṉṯayaṉṯara nyakula kanyilkitjangku.  
\v 5 Palumpa tjanampa walytja tjuṯa yini yalatjiya nyinangu, Yipuramanya, Yatjikanya, Tjikupanya. Kurayitjanyaṯarra Yipuramakungarri walytja ngaṉṯitja nyinangi. Nganaṉa yalatji kulira Katutjanya puḻkapungkunytjaku. Paluru yaṉangu uwankarraku mayutju tiṉa nyinanyi.   
\p
\v 6-7 Yitjurilaku walytja ngaṉṯitja kutjupa tjuṯaya wiya Katutjaku tjukarurru nyinanyi. Yalatji kulira tjinguru yaṉangu kutjupangku watjalku, “Katutjalu palumpa wangkawanangku wiya Yitjurilaku walytja ngaṉṯitja uwankarra yaṉṯayaṉṯaṉi. Kutjupa tjuṯa munupinarringkula nyinanytjala Katutjalu tjananya wantingu, yaṉṯayaṉṯantjawiyangku. Wiya tjana palumpa walytja nyinanyi.” Yirriṯi kutjupa tjuṯaṯarra Yipuramaku walytja ngaṉṯitja wiya Katutjaku walytja nyinangi. Katutjalu Yipuramanya yalatji, watjaṉu, “Nyuntupa katja Yatjikakuṉu walytja ngaṉṯitja tjuṯa kutju ngayuku walytja tjuṯa nyinaku.”  
\v 8 Yipuramaku katja kutjupa kungka Yayikakuṉu nyinangi. Palumpa walytja ngaṉṯitja tjuṯaṯarra wiya Katutjaku walytja tjuṯa nyinangi, kanya Tjaarakuṉu katja, palumpa walytja ngaṉṯitja Katutjaku walytja tjuṯa nyinangi, Katutjalu Tjaaranya katja yungkukitjangku watjaṉutjangka.  
\v 9 Yirriṯi Katutjalu Yipuramanya yalatji watjaṉu, “Ngula, tayimingka ngayulu ngalyananyingka, ulkumanu Tjaaralu katja mantjilku.”   
\p
\v 10 Katutjalu walytjangku kulira Tjaarakuṉu walytja ngaṉṯitja tjuṯa walytjanmanu. Kutjupa tjuṯa Yayikaku walytja ngaṉṯitja tjuṯa walytjangku kulira wiya ngulytjuṉu. Yirriṯi nganampa walytja yurruntitja Yatjikanya nyinangu. Palumpa miiṯa Ripikalu katja kutjarra mantjiṉu.  
\v 11-12 Katja paluru kutjarra yutitjarringanyingka, yurrunpa Katutjalu walytjangku kulira Ripikanya yalatji watjaṉu, “Katja kutjarran kanyilku. Tiṉarringkulapula watilpi nyinaku. Maḻanypa paluru mayutju nguwanpalpi nyinaku palumpa kaakaku.” Paluru kutjarra yutitjarrinytjala yurrunpa Katutjalu panyapa watjaṉu walytjangku kulira. Yalatji Ripikanya Katutjalu watjalkitjangku wiya paṯaṉu paluru kutjarra tiṉarringkunytjaku, yurrunpa paluru watjaṉu mayutjura kaakaku nyinanytjaku. Tjinguru katja kutju tiṉarringkula Katutjaku tjukarurru nyinanytjala Katutjalu nyakula yunyparringkula watjanmara, “Ngaatja mayutju kaakakura nyinaku.” Yalatji wiya, Katutjalu walytjangku kulira yurrunpa watjaṉu palumpa maḻanypa kaakaku mayutju nyinanytjaku.  
\v 13 Palunya nguwanpa Katutjaku wangka ngaranyi, “Tjikupanya ngayulu walytjanmanu. Yitjuwunya ngayulu ngulytjulwiyangku wantingu.”   
\p
\v 14 Tjinguru kutjupangku watjalku, “Katutjalu wiya tjukarurrungku kuliṉi, paluru walytjangku kulira palunya kutjarra ngulytjunmara.” Yalatji wiya. Katutjalu tjukarurrungku kulilpayi walytjangku kulira.  
\v 15 Paluru Muutjanya watjaṉu yalatji, “Walytjangku kulira ngayulu yaṉangu tjaampalaku aḻṯururringkupayi, kutjupa tjuṯaku ngayulu wiya aḻṯururringkupayi.”  
\v 16 Yaṉangungku palya nyinarra mayutju nguwanpangku Katutjanya yalatji watjalku, “Ngayulu palya nyinanyi, nyuntu ngayunya ngulytjuntjaku.” Katutjalu wiya palumpa wangka kulilku. Paluru walytjangku kulira yaṉangu aḻṯururringkula ngulytjulku.  
\v 17 Palunya nguwanpa Katutjaku wangka ngaranyi. Katutjalu mayutju Piirula Yitjipinya ngurrarangka watjaṉu yalatji, “Ngayulu walytjangku kulira nyuntunya mayutju nyinatjunu, yaṉangu manta tjuṯa ngurrarangkuya yalatji kulintjaku, ‘Katutjalu tjananya palumpa walytja tjuṯa ngangkari tiṉatjarrangku yaṉṯayaṉṯalpayi, manta Yitjipila.’”  
\v 18 Yuwa, yalatji nganaṉa kulintjaku. Katutjalu yaṉangu tjaampala aḻṯururringkula ngulytjulpayi. Yaṉangu kutjupa tjuṯa paluru ngulytjulwiyangku wantipayi tjana palumpa militjitji kutu nyinanytjaku.   
\s1 Katutjalu tjaampala aḻṯururringkula ngulytjulpayi, kutjupa tjuṯa paluru ngulytjulwiyangku wantipayi  
\p
\v 19 Wangka palunya kulira tjinguru yaṉangu kutjupangkuṉi watjalku yalatji, “Katutjalu walytjangku kulira yaṉangu tjaampalakunyu ngulytjulwiyangku wantipayi. Yalatji ngulytjulwiyangku wantinytjala yaṉangu paluru tjana puṯu kulilku palumpa walytjarrinytjaku. Paluru tjananya kuya palyalpayi tjuṯa wantintjaku, kuru watjantjawiyangku.”  
\v 20 Yaṉangu paluru wiya yalatji mayutju nguwanpangku Katutjanya panypurangkunytjaku. Ulkumanungku watiya yatura katirra kaṉilpalpi tjinkalku. Wiya kaṉilpangku yaṉangu nguwanpangku yalatji watjantjaku, “Palyatjun palyanmara tiṉa nguwanpa.” Yalatji wiya. Ulkumanungku walytjangku kulira tjukarurrungku palyalpayi.  
\v 21 Palya ulkumanungku walytjangku kulira tjukarurru palyalpayi. Kutjupangku wiya mayutju nguwanpangku palunya watjantjaku, “Nyuntu yalatji nguwanpa palyantjaku, tjukarurru.” Katutjaluṯarra palya walytjangku kulira tjukarurru palyalpayi.   
\p
\v 22 Yara yalatji nguwanpa Katutjalu walytjangku kulira ngulytjulwiyangku yaṉangu tjaampala wantipayi. Tjana kuya kutu palyantjala paluru ngurrkurringkula kuliṉu ngangkari tiṉatjarrangku tjananya pungkukitjangku. Yalatji kulira wantirra paluru tjanampa paṯaṉingi, tjukarurrurrinytjaku.  
\v 23-24 Yurrunpa paluru walytjangku kuliṉu nganaṉanya aḻṯururringkula ngulytjulkitjangku. Paluru paṯaṉingi nganaṉa Tjuwu tjuṯa, Tjuwuwiya tjuṯaṯarra palumpa walytjarringkunytjaku. Paluru kuliṉu yaṉangu tjuṯangku yalatji kulintjaku, “Mayutju tiṉa paluru Katutjanya yilta yaṉangu tjuṯaku aḻṯurunytju nyinanyi.”  
\v 25 Tjuwuwiya tjuṯaṯarra Katutjaku walytja nyinanytjaku wati Wutjiyalu piipangka yirriṯi wakaṉu yalatji,  
\q1 “Katutjalu watjaṉu. Yaṉangu tjuṯa yirriṯi wiya ngayuku walytja tjuṯa nyinangu. Kuwarrilpi ngayulu tjananya puḻkawaṉiku yalatji, ‘Nyurrangarri ngayuku walytja tjuṯa yilta nyinanyi.’ Yirriṯi palumpa tjanampa ngayulu yunytjuwiya nyinangi. Kuwarrilpi ngayulu tjanampa yunytju kutu nyinanyi.”  
\v 26 Wangka kutjupa wati Wutjiyalu yalatji watjaṉu, “Yirriṯi Katutjalu tjananya watjaṉu, ‘Nyurrangarri wiya ngayuku walytja tjuṯa nyinanyi.’ Kuwarrilpi Katutjalu tjananya watjalku, ‘Nyurrangarri yilta ngayuku walytja tjuṯa nyinanyi, kana kutu nyinapayiku walytja tjuṯa.’”   
\p
\v 27 Katutjaku wangka kutjupa wati Yaatjayalu yirriṯi yalatji watjaṉu, Tjuwu tjuṯatjarra,  
\q1 “Yiltaya Yitjurilaku walytja ngaṉṯitja tjuṯalingkuya nyinarra waṉiku, talitjanu manta puṯu kaantamilantja nguwanpa. Kutjupa tjuṯa kutju Katutjalu ngulytjulku, kutjupa tjuṯa ngulytjulwiyangku tjananya wantiku.  
\v 28 Yilta yaṉangu tjuṯa paluru rawawiya paṯara kuutawutjungka ngaratjunku.”   
\p
\v 29 Katutjaku wangka kutjupa wati Yaatjayalu yirriṯi watjaṉu yalatji,  
\q1 “Katutjalu mayutju tiṉangku nganaṉanya Yitjurilaku walytja ngaṉṯitja kutjupa tjuṯa tjananya ngulytjuṉu. Kutjupa tjuṯa tjananya ngulytjulwiyangku wantingu. Nganaṉanya ngulytjuntjawiyangka nganaṉa uwankarra wiyarringamara, tawunu Tjutumanya, Kumuranya ngurrara tjuṯa, yuwankarraya wiyarringutja nguwanpa.”   
\s1 Yitjurilaku walytja ngaṉṯitja tjuṯa Yiitjuku wangka kulira palumpa walytjarrinytjaku  
\p
\v 30 Wangka yalatji nganaṉa kulintjaku. Tjuwuwiya tjuṯangkuya Katutjaku tjukarurru nyinakitjangku puṯu kulira nyinanyingka, Katutjalu tjananya ngulytjuṉu, Yiitju Kurayitjaku wangka tjana kulira walytjarringutja.  
\v 31-32 Kanya Tjuwu tjuṯa, Yitjurilaku walytja ngaṉṯitja tjuṯa Muutjaku luwuwana nyinapayi. Yalatjiwana tjana nyinanytjala Katutjalu tjananya wiya ngulytjuṉu. Yiitju Kurayitjaku wangka tjana kulira walytjarringamara.  
\v 33 Yalatji Katutjaku wangka yurrunpa tjunutja ngarrinyi,  
\q1 “Tjuwu tjuṯaku ngurrangka tawunu Tjayunala ngayulu wati kutjupa nyinatjunku Kurayitjanya. Yaṉangu tjuṯangku palumpa wangka kulira wantirra kuyawanalpi nyinaku, kanya kutjupa tjuṯangku palumpa wangka kulira walytjarriku.”   
\c 10  
\p
\v 1 Walytja tjuṯa, wangka ngaatjanyaya kulila! Ngayulu puntura yunytjurringanyi ngayuku walytja Tjuwu tjuṯangku Yiitjuku wangka kulira tjana palumpa walytjarrinytjaku. Tjana walytjarringkunytjaku ngayulu kutu Katutjanya tjanampa tjapilpayi.  
\v 2-4 Paluru tjana yilta puntura yunytjurringanyi Katutjaku tjukarurru nyinakitja. Yalatji nyinakitjangku wiyawanangkuya kulira iwarra kutjupawanaya nyinanyi, Muutjaku luwuwana. Katutjaku wangka Kurayitjanyatjarra tjana kulira wantipayi. Muutjaku wangkawana kutju wiya, Tjuwu tjuṯangku Kurayitjaku wangkawana kulira nyinanytjaku. Yalatji Tjuwuwiya tjuṯangkuṯarra kulira nyinanyingka Katutjalu tjananya ngulytjulku. Muutjaku wangka ngatalpa nguwanpa ngaranyi, Yiitjuku wangka maṯupurra ngaranyi, tjana wangka palulawanalpi tjukarurru nyinanytjaku.   
\s1 Uwankarra Yiitjuku walytjarrinytjaku, Tjuwu tjuṯa Tjuwuwiya tjuṯaṯarra  
\p
\v 5 Wati Muutjalu irriṯi wangka yalatji wakaṉu, “Ngayulu tjananya Katutjaku luwu nintilpayi. Yaṉangu luwu palumpa tjanampa uwankarraku tjukarurru nyinarra kana kutu nyinaku.” Luwu palumpa tjanampa yuwankarraku nganaṉa wiya tjukarurru nyinapayi.  
\v 6 Katutjaku wangka Yiitjunyatjarra kulira walytjarringutja tjuṯangku nganaṉa wiya yalatji tjapilku, “Nganalu ilkarikutu kaḻparra Kurayitjanya yaḻṯirra ngalya katiku?” Wiya nganaṉa wangka panyapa nguwanpangku tjapintjaku, Kurayitjanya yiltalampa ngalya yanu.  
\v 7 Nganaṉa wiya yalatji tjapintjaku, “Nganalu mirri tjuṯakutu yankula Kurayitjanya yaḻṯirra ngalya katiku?” Wiya yalatji tjapintjaku, Kurayitjanya yiltalampa mirringuru pakaṉu.  
\v 8 Katutjaku wangka yalatji ngaranyi, “Katutjakuṉu wangka yutitja ngaranyi. Kurayitjakuṉu wangkanyurra pinangku kuliṉi.” Wangka palunya Kurayitjanyatjarra nganaṉatju tjanalawana tjakultjurinkupayi.  
\v 9-10 Katutjakuṉu wangka yilta yutitja ngaranyi yalatji. Katutjalu Yiitjunya mirringuru pakaltjingaṉutjangka nganaṉa kulira palumpa walytjarringkunytjaku. Yalatji kulira nganaṉa yaṉangu kutjupa tjuṯangka tjakultjunkunytjaku yalatji, “Ngayulu kuliṉi yalatji, ngayuku mayutju Yiitjunya Katutjalu ilta mirringuru kanaṉu.” Yalatji nganaṉa kulira tjakultjunkunytjala Katutjalu nganaṉanya katirra kana kutu kanyilku, palumpa ngurrangka. Mayutju Yiitju Kurayitjaku nganaṉa kulira walytjarringkula nyinanytjala Katutjalu nganaṉanya ngulytjura nyinatjunku palumpa ngurrangka.  
\v 11 Katutjaku wangka yirriṯitja yalatji ngarrinyi, “Yaṉangu tjuṯangku wangka Kurayitjanyatjarra kulira tjana yunypa nyinaku.”  
\v 12 Yuwankarrangku palya yalatji wangka Kurayitjanyatjarra kulintjaku, Tjuwu tjuṯangku, Tjuwuwiya tjuṯangkuṯarra. Katutjanya yuwankarraku nganampa mayutju tiṉa nyinanyi. Paluru nganampa tjukarurru palyalpayi, nganaṉa tjapintjala.  
\v 13 Yalatji Katutjaku wangka irriṯi tjunutja ngarrinyi, “Yaṉangungku mayutju Katutjanya tjapintjala, Katutjalu yilta palunya kulira kana kutu nyinatjunku palumpa ngurrangka.”   
\p
\v 14-15 Katutjalu palumpa walytja tjuṯa wantirriyalpayi palumpa wangka tjakultjurinkunytjaku. Nganaṉa palunya kulira palumpa wangka Yiitjunyatjarra yaṉangu tjuṯawana tjakultjurinkunytjaku. Nganaṉa tjakultjurinkunytjawiyangka yaṉangu tjuṯa wangka Yiitjunyatjarraku ngurrpa nyinapayingka. Tjana wangka palumpa kulintjawiyangku puṯu kulilku Katutjaku kalypa nyinakitjangku, wiya tjana Yiitjunya tjapilku, kuya tjanampa waṉinytjaku. Yalatji Katutjaku wangka irriṯi tjunutja ngarrinyi, “Wangka palya tjakultjunkupayi tjuṯa ngalya yankula tjakultjunanyingka, yaṉangu tjuṯangku kulira yunyparriku.”  
\v 16 Wangka Yiitjunyatjarra palunya yaṉangu tjaampalangkuya kulira wantipayi. Yalatji wati Yaatjayalu irriṯi watjaṉu, “Mayutju kulilaṉi! Yaṉangu aapangku kutju nyuntupa wangka kulira tjukarurru nyinanyi, ngayulu tjanala tjakultjunanyingka.”  
\v 17 Yuwa, yaṉangu Yiitjuku walytjarringanyi wangka Yiitjunyatjarra kulira. Wangka palunya tjana kuliṉi nganaṉa wangka Yiitju Kurayitjanyatjarra tjakultjunanyingka.  
\v 18 Tjinguru Tjuwu tjuṯaya ngurrpa nyinanyi, wangka Yiitjunyatjarraku. Tjinguru kutjupangku tjanala wiya tjakultjunu. Wiya. Yiltaya wangka Yiitjunyatjarra tjanala tjakultjunkupayi. Yalatji Katutjaku wangka yirriṯi tjunutja ngarrinyi,  
\q1 “Yaṉangu tjuṯangku tjanala ngurra tjuṯawana yurungka munkarraṯarra Katutjaku wangka Kurayitjanyatjarra tjakultjurinkupayi, yaṉangu tjuṯangka, ngurra tjuṯawana.”   
\p
\v 19 Wangka Kurayitjanytjatjarra tjinguru Tjuwu tjuṯangku puṯu kuliṉu? Wiya tjana puṯu kuliṉu, tjukarurrungkuya kulira, wantingu. Yirriṯi Muutjalu watjaṉu Tjuwu tjuṯa yalatji,  
\q1 “Ngayulu Katutjanya manta kutjupa ngurrara tjuṯaku yunypa nyinaku, tjana ngayuku wangka kulira walytjarrinytjala. Yalatji ngayulu tjanampa yunypa nyinanyingka nyurrangarri kulira ngayuku ngurrkurringkula nyinaku. Nyurrangarri ngayuku wangka wantirra wiyawanangku kulilku yalatji, ‘Manta kutjupa ngurrara tjuṯa mungutja nyinanyi, nganaṉakampa Katutjaku walytja tjuṯa nyinanyi.’”   
\p
\v 20 Mirri pungkupayi tjuṯaku nguḻurrinytjawiyangku wati Yaatjayalu Katutjakuṉu wangka wakaṉu yalatji. Katutjalu Tjuwu tjuṯangka yalatji watjaṉu,  
\q1 “Ngayuku ngurrpa Tjuwuwiya tjuṯangku ngayuku wangka kulira yunyparringkupayi. Ngayulu tjananya tjungurringkula yaṉṯayaṉṯalpayi.”   
\p
\v 21 Wati Yaatjayalu piyuku watjaṉu Tjuwu tjuṯangku Katutjaku wangka kulira wantipayi, yalatji,  
\q1 “Paluru tjana ngayuku wangka kulira wantipayi. Puṯu ngayulu tjanampa paṯalpayi tjukarurrurrinytjaku ngayuku wangkawana, yaṉṯayaṉṯalkitja.”   
\c 11  
\s1 Katutjanya kutu yunytju nyinanyi Tjuwu tjuṯaku  
\p
\v 1 Tjinguru Katutjalu Tjuwu tjuṯa puṯu yaḻṯirra wantingu. Wiya yalatji. Paluru tjananya yaṉṯayaṉṯalkitjangku kutu kuliṉi. Ngayulu Puulanyaṯarra Tjuwu nyinanyi Yipuramaku walytja ngaṉṯitja, wati Pintjiminaku walytja ngaṉṯitjaṯarra.  
\v 2 Yirriṯi Katutjalu walytjangku kulira Tjuwu tjuṯa nganaṉanya ngulytjulkitjangku watjaṉu. Yalatji watjara kutu kuliṉi nganaṉanya yaṉṯayaṉṯalkitjangku. Katutjalu nganaṉanya yaṉṯayaṉṯalkitjangku kuliṉutja palumpa wangka Yilaatjalu irriṯi tjunutja ngarrinyi yalatji,  
\v 3 “Mayutju kulila! Nyuntupa wangka watjalpayi tjuṯa tjananya Tjuwu tjuṯangku mirri pungangi. Tiipula puḻitjanu palyaṉutja tjuṯa paluru tjana yuḻpura wiyaṉu, nyuntupa walytja tjuṯangku kuka tjawirrilyi kutjalpayingka. Ngayulu kutjulpiṉa nyuntupa walytja tjukarurru nyinanyi. Tjana kuliṉi ngayunya mirri pungkukitjangku.”  
\v 4 Katutjalu Yilaatjanya yalatji watjaṉu, “Nyuntu kutju wiya, ngayuku walytja kutjupa tjuṯa tjukarurru nyinanyi, wati tjapan tjawutjuna. Wiya tjana Paalanya puḻkawaṉipayi, wiya. Ngayulu tjananya yaṉṯayaṉṯaṉi.” Yalatji Katutjalu Yilaatjanya yirriṯi watjaṉu.  
\v 5 Tjukarurru nyinapayinya palunya tjananya nguwanpa kuwarri Tjuwu kutjupa tjuṯa Katutjaku tjukarurru nyinanyi. Katutjalu yirriṯi walytjangku kuliṉu tjana palumpa walytja tjuṯa nyinanytjaku.  
\v 6 Palunya tjananya ngulytjulkitjangku wiya paluru yalatji kuliṉu, “Tjuwu pala tjuṯangku ngula nyinarra ngayuku waarrka tjukarurrungku palyalku. Tjana yalatji ngula tjukarurru palyantjala ngayulu tjananya ngulytjulkitjangku kuliṉi.” Wiya Katutjalu panyapa kuliṉu. Paluru walytjangku kulira watjaṉu tjana ngula palumpa walytja tjuṯa nyinanytjaku. Yaṉangungku wiya walytjangku kulira Katutjaku ngulytjurringanyi. Katutjalu mayutju tiṉangku walytjangku kulira nganaṉanya yaṉangu tjuṯa ngulytjuṉi.   
\p
\v 7 Yuwa, Yitjurilaku walytja ngaṉṯitja tjaampala kutju Katutjaku yunytjurringkula palumpa walytja nyinapayi. Tjuwu kutjupa tjuṯangkuya palumpa wangka kulira wantipayi, Katutjakuya militjitji nyinapayi.  
\v 8 Yalatji Katutjaku wangka irriṯi tjunutja ngarrinyi,  
\q1 “Katutjalu tjananya pina patiṉu palumpa wangka kulilwiyalpiya nyinanytjaku. Kuwarriṯarra puṯu kulilpayiya nyinanyi.”   
\p
\v 9-10 Katutjaku wangka kutjupa ngaranyi Tjuwu tjuṯangku kulira wantipayinyatjarra. Mayutju Tapitalu yalatji watjaṉu,  
\q1 “Katutja, kuya palyara nyinapayi tjuṯa tjananya nyuntu pungkunytjaku. Nyuntu tjananya miiṉṯara wanti!, yaṉṯayaṉṯantjawiyangku.”   
\p
\v 11 Tjuwu tjuṯangku Katutjaku wangka Yiitjunyatjarra wantinytjala tjinguru Katutjalu tjananya wantingu yaṉṯayaṉṯalwiyangku?, yilta? Wiya. Paluru tjana yalatji kulira wantinytjala Tjuwuwiya tjuṯangkukampa wangka Yiitjunyatjarra kulira walytjarringkula kana kutu nyinaku. Tjana yalatji Yiitjuku walytjarrinytjala Tjuwu tjuṯangku nyakula yalatji ngula kulilku, “Nganaṉaṯarra Yiitjuku walytjarringkula kana kutu nyinanytjaku.”  
\v 12 Yuwa, Tjuwu tjuṯangku wangka Yiitjunyatjarra kulira wantinytjala Tjuwuwiya tjuṯa wangka palunya kulira Yiitjuku walytjarringu. Ngula Tjuwu tjuṯangku wangka Yiitjunyatjarra kulira walytjarrinytjala Katutjanya tjanampa yunypalingku nyinaku. Tjuwuwiya tjuṯakuṯarra paluru yunypalingku nyinaku.   
\p
\v 13-14 Tjuwuwiya tjuṯa, wangka ngaatjanya nyurrangarri kulintjaku. Yiitju Kurayitjaluṉi watjaṉu palumpa wangka nyurrangarri Tjuwuwiya tjuṯawana tjakultjurinkunytjaku. Ngayulu kutu nyurrangarrilawana palumpa wangka nintinmalpa. Yalatji ngayulu nyurrangarrila nintintjala, tjinguru ngayuku walytja Tjuwu tjuṯangkulpi yalatji kulilku, “Nganaṉaṯarra Yiitjuku wangka kulira palumpa walytjarrinytjaku.”  
\v 15 Yurrunpa Katutjalu tjananya Tjuwu tjuṯa yaṉṯayaṉṯalwiyangku wantingu. Palulanguru Tjuwuwiya tjuṯangkulpi palumpa wangka Yiitjunyatjarra kulira walytjarringu. Ngula Katutjanya Tjuwu tjuṯaku kalyparriku tjana Yiitjuku walytjarringkula nyinanytjala. Paluru, yaṉangu palumpa walytja tjuṯaku puntura yunypa nyinaku, Tjuwu tjuṯaku.  
\v 16 Yurrunpa Yipuramakungarrimpa Katutjalu ngulytjura tjananya kanyilpayi. Palumpa tjanampa ngaṉṯitja tjuṯaṯarra, Tjuwu tjuṯa paluru ngulytjura kanyilku, wantinytjawiyangku.   
\p
\v 17 Kaana kanyilpayingku watiya tjiiṯa mantangka tjunkula pakaltjingalku. Watiya paluru tiṉa ngaraku mangarriwiya. Paluru watiya aapa kilytjuntankula waṉiku mantakutu, piyuku pakara mangarritjarralpi ngaranytjaku. Ipaḻu tjiiṯa paluru mantangka watiya palula tjunkula pakaltjingalku. Watiya palulawana tayimapira nguwanpa pakalku mangarritjarra. Tjuwu tjuṯa watiya palunya nguwanpa Katutjalu puṯu pakaltjingalpayi, tjana tjukarurru palumpa nyinanytjawiya. Palulanguru paluru ipaḻu nguwanpa Tjuwuwiya tjuṯa pakaltjingalku palumpa walytja tjuṯa tjukarurru nyinanytjaku, wangka Yiitjunyatjarra tjana kulira walytjarrinytjala.  
\v 18 Tjuwuwiya tjuṯangku wiyanyurra walytjangku puḻkawaṉinytjaku yalatji, “Katutjanya nganampa yunytjulpi nyinanyi, Tjuwu tjuṯaku paluru yunytjuwiyalpi nyinanyi.” Yalatji wiya. Katutjanya kutu tjanampa Tjuwu tjuṯaku yunytju nyinanyi.  
\v 19 Tjingurunyurra Tjuwuwiya tjuṯangku yalatji watjalku, “Katutjanya nganampa ipaḻu mangarritjarra nguwanpaku yunytju nyinanyi. Paluru wiya Tjuwu tjuṯaku yunytju nyinanyi tjana palumpa wangka kulira wantinytjala.”  
\v 20-21 Yilta, Katutjalu tjananya yaṉṯayaṉṯalwiyangku wantingu, tjana wangka Yiitjunyatjarra kulira wantinytjala. Nyurrangarri Tjuwuwiya tjuṯaṯarra wangka palunya kutu kulira nyinanytjaku walytjangku puḻkawaṉinytjawiya. Nyurrangarri wangka palunya wiya kulintjala Katutjalu nyurrangarrinyaṯarra yaṉṯayaṉṯalwiyangku wantipayingkamarra.   
\p
\v 22 Wangka ngaatjanya nganaṉa kulintjaku. Katutjanya tjanampa Tjuwu tjuṯaku yunytjuwiya nyinanyi, tjana palumpa wangka kulintjawiyangka. Paluru nyurrangarrimpa Tjuwuwiya tjuṯaku kaangkinytji nyinanyi, palumpa wangkaku nyurrangarri kutu tjukarurru nyinanyingka. Tjingurunyurra palumpa wangka wantinytjala paluru nyurrangarrimpaṯarra yunytjuwiya nyinaku.  
\v 23 Tjuwu paluru tjana wangka Yiitjunyatjarra kulira walytjarrinytjala Katutjalu yilta ngangkari tiṉatjarrangku tjananya ngulytjulku.  
\v 24 Katutjalu yurrunpa Yipuramanyangarri ngulytjura palya palumpa walytja ngaṉṯitja tjuṯaṯarra ngulytjulku tjana wangka Yiitjunyatjarra kulira walytjarrinytjala. Tjuwuwiya tjuṯa nyurrangarrinya ngulytjura paluru yilta Tjuwu tjuṯa tjananya ngulytjulku.   
\s1 Katutjanya yaṉangu uwankarraku yunytjurringanyi palumpa walytjarrinytjaku  
\p
\v 25 Tjuwuwiya tjuṯa, wangka ngaatjanyanyurra kulintjaku. Wiyanyurra yalatji wiyawanangku kulintjaku, “Nganampa kutju Katutjanya ngulytjurringkula yunyparringanyi, Tjuwu tjuṯaku wiya.” Yalatji wiya. Wangka ngaatjanyanyurra kulintjaku. Tjuwu tjuṯangku wiya kutu wangka Yiitjunyatjarra kulira wantimalpa, ngulaya kulilku. Yalatji tjana kulilwiya nyinarra Yiitjuku walytjarriku, Tjuwuwiya tjuṯalingku Katutjaku walytja nyinanytjala ngaṉṯi.  
\v 26-27 Yalatji ngula Tjuwu tjuṯa, Yitjurilaku walytja ngaṉṯitja uwankarra Yiitjuku walytjarringkula kana kutu nyinaku. Yalatji Katutjaku wangka irriṯi tjunutja ngarrinyi,  
\q1 “Yaṉangu kanalpayi paluru ngurra Tjayunala yutitjarringkula Tjikupaku walytja ngaṉṯitja tjuṯaku kuya waṉiku. Yalatji ngayulu Katutjalu watjara wantinyi yaṉṯayaṉṯalkitjangku, kuya tjanampa waṉinytjala.”   
\p
\v 28 Tjuwu tjuṯangkuya wangka Kurayitjanyatjarra wantinytjala Katutjanya wiya tjanampa yunyparringanyi. Paluru Tjuwuwiya tjuṯaku yunyparringanyi, tjana wangka Kurayitjanyatjarra kulira walytjarrinytjala. Paluru kutu Tjuwu tjuṯaku yunytjurringanyi yirriṯi yalatji watjara, “Manta ngaranytjawiyangka ngayulu kuliṉi Yipuramanya palumpa ngaṉṯitja tjuṯaṯarra ngayuku walytja tjuṯa nyinaku.”  
\v 29 Katutjalu yalatji watjara wiya wantipayi kutu tjanampa yunytjurringanyi tjana palumpa walytja tjuṯa nyinanytjaku.   
\p
\v 30 Tjuwuwiya tjuṯa nyurrangarriṯarra yirriṯi Katutjaku ngurrpa nyinangi, palumpa wangka kuliranyurra wantipayi. Kuwarri Tjuwu tjuṯangkulpiya Katutjaku wangka kulira wantinyi. Kuwarri Katutjanya nyurrangarrimpa aḻṯururringkula yunypa nyinanyi Yiitjuku walytjanyurra nyinanytjala.  
\v 31 Yalatji Katutjalu Tjuwu tjuṯakuṯarra aḻṯururringkula yunypa nyinaku.  
\v 32 Yaṉangu uwankarrangku Tjuwu tjuṯangku Tjuwuwiya tjuṯangkuṯarra kuya palyantjala Katutjanya tjanampa wiya yunypa nyinapayi. Palulanguru paluru aḻṯururringkula kuliṉu tjana Yiitjuku walytjarrinytjaku.   
\p
\v 33 Katutjanya yilta ngangkari tiṉatjarra nyinanyi, nintilingku. Paluru tjukarurrungku kulira kutu nintingku palyalpayi.  
\v 34 Yalatji Katutjaku wangka irriṯi tjunutja ngarrinyi,  
\q1 “Yaṉangungku puṯu kuliṉi Katutjanya nintilkitjangku, paluru uwankarraku ninti nyinanyi.  
\v 35 Yaṉangungku puṯu kuliṉi Katutjanya yungkukitjangku, paluru uwankarra yunganyi.”   
\p
\v 36 Katutja paluru yuwankarra palyara kutu kanyiṉi. Manta ilkari yaṉangu tjuṯaṯarra yuwankarra ngaranyi, palumpa. Palulanguru Katutjanya kutju nganaṉa puḻkawaṉinytjaku, kututja. Yalatjiku nganaṉa yunytjurringanyi.   
\c 12  
\s1 Yiitju Kurayitjaku walytjarringkula kana kutu nyinamalpa  
\p
\v 1 Walytja tjuṯa, wangka ngaatjanyaya kulila! Katutjanya nganampa aḻṯurunytju nyinanyingka, nyurrangarri palumpa tjukarurru kutu nyinanytjaku. Yalatji nyinarranyurra Katutjaku waarrka tjukarurru kutu palyantjaku.  
\v 2 Katutjaku ngurrpa tjuṯangku kuya kutu palyara nyinanyi. Palunya tjananya nguwanpa, wiyanyurra kuya kutu palyara nyinanytjaku yarrkara. Nyurrangarri yunytju kutu nyinama!, Katutjalu nyurrangarrinya nintira tjukarurruntjaku. Yalatji paluru Katutjalu nyurrangarrinya nintira tjukarurruntjala nintinyurra nyinaku palumpa tjukarurru kutu nyinanytjaku.   
\p
\v 3 Nintingku ngayulu kuliṉi Katutjaluṉi kutu rapalpayi palumpa waarrka tjukarurru palyantjaku, wiyaṉa walytjangku kulira palyalpayi. Wiyanyurra yalatji kulintjaku, “Ngayulu Katutjaku waarrka tjukarurru kutu palyalpayi, kutjupa tjuṯangkuya wiyawanangku palyalpayi.” Yalatjinyurra kulintjaku, “Ngayulu Katutjaku waarrka palyalpayi paluruṉi nintintjala kutju. Kutjupa tjuṯangkuṯarra palumpa waarrka palyalpayi, paluru tjananya nintintjala.”  
\v 4 Yara panya yaṉangu walytjararranpatjarraya kulila! Kutjupa tjuṯangkuya kuka kuṉṯilpayi. Kutjupa tjuṯangkuya katipayi kutjantjaku. Kutjupa tjuṯangku yitjiḻinkupayi. Kutjupa tjuṯangku katirra tjananya yungkupayi ngalkuntjaku.  
\v 5 Yara panyapa nguwanpa nganaṉa kulintjaku. Yiitju Kurayitjaku walytjararranpala nyinanyingka palumpa walytja kutjupa tjuṯakuṯarra nganaṉa walytja nyinanyi.  
\v 6 Nganaṉa yuwankarrangku Katutjaku waarrka palyalpayi. Katutjalu Yiitjuku walytja kutju nintintjala, paluru yalatji Katutjaku waarrka palyantjaku. Yiitjuku walytja kutjupa paluru nintintjala yalatji walytja paluru Katutjaku waarrka palyantjaku. Yalatji nganaṉa Katutjaku waarrka palyantjaku, Katutja paluru nganaṉanya nintintjala. Tjinguru Katutjalu Yiitjuku walytja nintilku palumpa wangka yaṉangu tjuṯangka rapangku tjakultjunkunytjaku. Yalatji Katutjalu nintintjala, paluru yilta Katutjaku wangka tjanala rapangku tjakultjunkunytjaku.  
\v 7 Tjinguru Katutjalu Yiitjuku walytja kutjupa nintilku yaṉangu tjuṯa tjananya yaṉṯayaṉṯantjaku. Yalatji Katutjalu nintintjala, paluru yilta yaṉangu tjuṯa tjananya yaṉṯayaṉṯantjaku. Tjinguru Katutjalu Yiitjuku walytja kutjupa nintilku yaṉangu tjuṯa tjananya Katutjaku wangka nintintjaku. Yalatji Katutjalu nintintjala, paluru yilta yaṉangu tjuṯa tjananya nintintjaku.  
\v 8 Tjinguru Katutjalu Yiitjuku walytja kutjupa nintilku yaṉangu tjilurutjiluru tjuṯa tjananya pukuḻmankunytjaku. Yalatji Katutjalu nintintjala, paluru yilta yaṉangu tjilurutjiluru tjuṯa tjananya pukuḻmankunytjaku. Maralpa tjuṯaku mani tjawirrilyi Yiitjuku walytjangku katirra tjananya yungkupayi. Paluru tjukarurrungku tjananya yungkunytjaku ngaparrtji mantjilkitjangku kulintjawiya. Tjaatjiku mayutju tjuṯangku Yiitjuku walytja tjuṯa tjananya tjukarurrungku yaṉṯayaṉṯantjaku. Miiṉṯa tjuṯa, tjiḻpi tjuṯa, ulkumina tjuṯaṯarra nyinanyi. Palunya tjananya yaṉṯayaṉṯalpayi tjuṯangku yunypangku tjananya yaṉṯayaṉṯantjaku.   
\p
\v 9-10 Yaṉangu kutjupa tjuṯaku nyurrangarri yilta yunytju nyinanytjaku. Palunya tjananya kulira yaṉṯayaṉṯantjaku, panypurangkunytjawiyangku. Kuya palyalpayi tjuṯangka wiyanyurra tjungurringkula kuya kutu palyantjaku. Wantirra tjananya Yiitjuku tjukarurru nyinama! Walytja kutjupa tjuṯangkunyurra yunytju nyinarra tjukarurru tjanampa palya nyinanytjaku, mayutju nguwanpa tjuṯaku.  
\v 11 Mayutju Kurayitjaku waarrka kutuya tjukarurru palyantjaku, yunypangku, purrkarringkula wantinytjawiyangku.  
\v 12 Yunypanyurra kutu nyinanytjaku, ngula kana kutu nyinakitja. Kutjupa tjuṯangku nyurrangarrinya panypurangkula punganyingka kutunyurra tjukarurru nyinanytjaku. Puṯu kulira kutunyurra Katutjanya tjapintjaku.  
\v 13 Yiitjuku walytja kutjupa tjuṯangkuya mangarriku tjinguru maniku puṯu kulintjala yuwa tjananyaya! Yiitjuku walytja ngurra kutjupanguru ngalya yankunytjala yunyparringkula palunya ngurrangka paḻtjara ngarritjurra!   
\p
\v 14 Yunytjuwiya tjuṯangku nyurrangarrinya panypurangkula punganyingka, Katutjanya tjanampa tjapila!, paluru tjukarurru tjanampa palyantjaku. Katutjanya wiya tjanampa tjapintjaku, ngaparrtjingku pungkula tjananya wiyantjaku, wiya.  
\v 15 Yaṉangu kutjupa yunyparringkula nyinanyingka tjungurringkulanyurra palumpa yunyparringkunytjaku. Yaṉangu kutjupa wiḻa kuyarringkula nyinarra yulanyingka tjungurringkulanyurra palulawana yulanytjaku.  
\v 16 Yaṉangu yuwankarraku nyurrangarri palya kalypa nyinanytjaku, pikapikarrinytjawiya. Walytjangku puḻkawaṉinytjawiya kutjupa tjuṯaku waarrkana nguwanpanyurra nyinanytjaku. Maralpa tjuṯaku palya nyinarra walytjarrinytjaku, tjananya nyakula wiya wantinytjaku.  
\v 17 Kutjupangkunta kuya palyantjala wiya nyuntu ngaparrtjingku kuya palyantjaku. Tjukarurru kutunyurra nyinanytjaku kutjupa tjuṯa nyurrangarrimpa yunypa nyinanytjaku.  
\v 18 Yaṉangu yuwankarraku nyurrangarri kalypa nyinanytjaku pikapikarrinytjawiya.   
\p
\v 19 Walytja tjuṯa, wangka ngaatjanyaya kulila! Kutjupangkunta kuya palyantjala, wiya ngaparrtjingku palula kuya palyantjaku. Katutjalu kutju ngula palunya ngaparrtjingku kaatjimilara warukutu wantirriyalku. Palunya nguwanpa Katutjakuṉu wangka yalatji ngaranyi,  
\q1 “Ngayulu Katutjalu watjaṉi yalatji. Yaṉangungku yaṉangu kutjupangka kuya palyantjala ngayulu palunya ngula kaatjimilara wantirriyalku warukutu.”   
\p
\v 20 Katutjaku wangka kutjupa yalatji ngaranyi,  
\q1 “Nyuntupa yunytjuwiya nyinaku paḻtjatjirratja. Paluru paḻtjatjirratja nyinanyingka, nyuntu palunya kalypangku paḻtjara yungkunytjaku. Tjinguru kutjupa nyuntupa yunytjuwiya nyinaku kapiku paarritjirringkula. Paluru paarritjirringkula nyinanyingka, nyuntu palumpa kapi kalypangku yungkunytjaku. Palulanguru paluru kutjarra punturalpi kulira kuṉṯarriku, nyuntupa yunytjuwiyapula nyinangutja.”   
\p
\v 21 Kutjupangkunta kuya palyantjala, tjukarurrura palyala!, ngaparrtjingku kuya palyantjawiyangku. Yalatji tjukarurrura palumpa palyala!, paluru kulira nyuntupa kalypalpi nyinanytjaku.   
\c 13  
\s1 Kamanta ngurrara tjuṯaku nganaṉa tjukarurru nyinanytjaku  
\p
\v 1 Mayutju kamanta ngurrara tjuṯaku tjanampa nganaṉa tjukarurru nyinanytjaku. Katutjalu kuliṉi palya tjana mayutju nganampa nyinanytjaku. Ilta paluru kamanta ngurrara tjuṯa, kuutawutju ngurrara tjuṯaṯarra nyinatjunu mayutju nganampa tjana nyinanytjaku.  
\v 2 Mayutju palumpa tjanampa yaṉangu kulilwiya nyinanytjala mayutju paluru yaṉangu palunya pungku, paluru Katutjaku wangka mayutju nyinatjunkunytjatjarra kulira wantingutja.  
\v 3 Yaṉangu tjukarurru mayutju palumpa nyinanytjala wiya mayutju paluru palunya kuru watjalku. Yaṉangu kuya kutu palyalpayi nyinanyingka mayutju paluru kuru watjara pungku. Tjinguru kamantaku mayutjungka kurrunpa rapa nyinakitjanyurra yunytjurringanyi. Yalatji nyinakitjangkunyurra tjukarurru kutu yaṉangu tjuṯaku nyinanytjaku, mayutju palumpaṯarra. Palulanguru nyurrangarrimpa mayutju kamanta ngurrara tjuṯa yunypa nyinaku.  
\v 4 Katutjalu palunya tjananya nyinatjunu, nyurrangarrinya yaṉṯayaṉṯantjaku.  
\p Tjinguru nyuntu tjukarurru nyinanytjawiya, kuya kutu palyalpayi. Kamantaku mayutju palurunta watjara tjiilakutu wantirriyalku. Katutjalu tjananya nyinatjunu kuya palyalpayi tjuṯa watjara tjiilakutu wantirriyantjaku. Katutjaluṯarra kuya palyalpayi tjuṯa watjara warukutu wantirriyalku.  
\v 5 Palulanguru tjanampa nyurrangarri kamantaku mayutju tjuṯaku tjukarurru nyinanytjaku, Katutjalu nyurrangarrinya watjara warukutu wantirriyaltjipingka. Yalatji nyurrangarri kulintjaku, “Walytjangku ngayulu kuliṉi mayutju palumpa tjanampa tjukarurru nyinakitjangku, Katutjakuṯarra tjukarurru nyinakitjangku.”   
\p
\v 6-7 Katutjalu tjananya nyinatjunu kamanta ngurrara tjuṯa, waarrkarringkula tjukarurrungkunyurra mani tjukutjuku tjanampa kutu yungkunytjaku. Palya kamanta ngurrara tjuṯangkuya mani palunyatjarrangku yaṉangu tjuṯa yaṉṯayaṉṯantjaku. Waarrka yalatjiya palyantjala Katutjanya yunyparringanyi. Yuwa, tjukarurru tjanampa nyurrangarri panypurangkunytjawiya nyinanytjaku, mayutju kamanta ngurrara tjuṯaku.   
\s1 Yaṉangu yuwankarraku yunytju nyurrangarri nyinanytjaku  
\p
\v 8 Yuwa, yuwankarraku nyurrangarri yunytju nyinanytjaku. Yuwankarraku yunytju nyinarra nyurrangarri Muutjaku luwukuṯarra tjukarurru nyinaku.  
\v 9 Muutjaku wangka yalatji ngaranyi, “Yaṉangu kutjupakunyurra yunytju nyinanytjaku, walytja tjuṯaku yunytju nyinanytja nguwanpa.” Yuwa, yalatjinyurra yaṉangu yuwankarraku yunytju kutu nyinanytjaku maḻpa nyinarra. Wati tjuṯangku wangka ngaatjanya kulintjaku. Wati kutjupaku nyuntu maḻpa nyinaku. Nyuntu palulawana nyinarra palumpa miiṯa wiya nyakula waṉngira katikitjangku kulintjaku, wiya. Yalatji wiya waṉngira katinytjaku Muutjaku wangka ngaranyi. Yaṉangu kutjupaku nyuntu maḻpa nyinarra wiya palunya mirri pungkunytjaku. Yalatji wiya mirri pungkunytjaku Muutjaku wangka ngaranyi. Yaṉangu kutjupaku nyuntu maḻpa nyinarra wiya palumpa yulytja mulyaṯangku mantjintjaku. Yalatji wiya mulyaṯangku mantjintjaku Muutjaku wangka ngaranyi. Yaṉangu kutjupaku nyuntu maḻpa nyinarra wiya palumpa yulytja, tjinguru mani nyakula kanyilkitjangku kulintjaku. Yalatji wiya kanyilkitjangku kulintjaku Muutjaku wangka ngaranyi.  
\v 10 Yaṉangu kutjupaku nyuntu maḻpa nyinarra palumpa, wiya nyuntu palulawana kuya palyantjaku. Yalatji nyurrangarri yuwankarraku yunytju nyinarra Muutjaku luwuku nyuntu tjukarurru nyinaku.   
\p
\v 11 Mayutju Yiitju Kurayitjanya mantakutu piyuku ngalya yankukitja nyinanyi. Yuḻṯa paluru ilarringanyingka wangka palunya nguwanpanyurra yaṉangu yuwankarraku yunytju kutu nyinanytjaku. Yuḻṯa palula Katutjalu nganaṉanya palumpa ngurrangka nyinatjunku kana kutu nyinanytjaku.  
\v 12-13 Mantangka nganaṉa nyinarra tjukarurru nyinanytjaku yuḻṯa paluru ilarringanyingka. Nganaṉa wiya tjikira turaangkarrinytjaku. Miiṯa kutjupa kutjupangka wiya nganaṉa ngarrinytjaku. Yaṉangu kutjupangka nganaṉa wiya akumanarrinytjaku. Yaṉangu kutjupaku nganaṉa wiya pikarrinytjaku.  
\v 14 Yuwa, mayutju nganampa Yiitju Kurayitjanya nyinanyi. Palumpa nganaṉa tjukarurru kutu nyinanytjaku, walytjangku kulira kuya palyantjawiya.   
\c 14  
\s1 Yaṉangu kutjupa panypurangkunytjawiya nyinanytjaku  
\p
\v 1-2 Yiitjuku walytja kutjupa tjuṯangku puṯu kulilpayi kuka Katutjanya nguwanpaku tjunutjaku ngalkukitjangku, tjana mangarri kutju ngalkupayi. Tjana mangarri kutju ngalkunytjala wiya nyurrangarri tjanampa akumanarrinytjaku. Yiitjuku walytja kutjupa tjuṯangku kuka palunya ngalkupayi mangarri tjuṯaṯarra.  
\v 3 Kuka mangarriṯarra ngalkupayi tjuṯangku wiya panyapa tjuṯa tjananya panypurangkunytjaku. Katutjanya tjanampa yunypa nyinanyi. Mangarri kutju ngalkupayi tjuṯangku wiya kuka ngalkulpayi tjuṯa tjananya panypurangkunytjaku. Katutjanya tjanampaṯarra yunypa nyinanyi.  
\v 4 Paluru tjana Katutjaku waarrkarripayi tjuṯa nyinanyi, Katutjanya tjanampa mayutju nyinanyi, wiya nyurrangarri mayutju tjanampa nyinanyi, wiya. Nyurrangarri wiya mayutjurringkula tjananya watjantjaku. Katutjalu tjananya nintilku tjukarurru nyinanytjaku.   
\p
\v 5-6 Yiitjuku walytja kutjupa tjuṯangkuya yalatji kuliṉi, “Tjuuntiyi tjiṉṯu puntu ngaranyi, Katutjanya waḻkuntjaku. Maṯupurra nganaṉa palunya kutu waḻkuntjaku.” Yiitjuku walytja kutjupa tjuṯangkuya yalatji kuliṉi, “Tjiṉṯu tjuṯangka nganaṉa Katutjanya waḻkuntjaku, Tjuuntiyingka kutju, wiya.” Nganaṉa purinytju kulira Katutjanya waḻkuntjaku tjinguru Tjuuntiyingka, tjinguru tjiṉṯu kutjupa tjuṯangka. Yiitjuku walytja kutjupa tjuṯangku kuka Katutjanya nguwanpaku tjunutja mangarriṯarra ngalkura Katutjanya tjana waḻkulpayi. Ngalkukitjangku paluru tjana yalatji watjalpayi, “Katutjalu nganaṉanya kuka ngaatja yungu, nganaṉa palunya waḻkuṉi.” Yiitjuku walytja kutjupa tjuṯangku mangarri kutju ngalkukitjangku yalatji watjalpayi, “Katutjalu nganaṉanya mangarri ngaatjanya yungu, nganaṉa palunya kutju waḻkuṉi.” Yuwankarrangkuya yalatji Katutjanya waḻkulpayi.   
\p
\v 7-8 Yiitjuku walytja yuwankarraku nganampa Yiitjunya mayutju nyinanyi, wiyala walytjangku kulira mayutju nguwanpangku kutjupa tjuṯa panypurangkula watjantjaku. Palumpa wangkawana nganaṉa nyinanyi, palumpa walytjarringkula. Mirrirringkula nganaṉa palumpa walytja nyinaku ngurra ilkaringka. Mantangka kana nyinarra mirrirringkula nganaṉa yilta palumpa walytja kutu nyinaku palulawana.  
\v 9 Yiitju Kurayitjanya mirrirringkula kanarringu mayutju tiṉa nganampa kuwarri nyinanyi, kana tjuṯaku, mirri tjuṯakuṯarra.  
\v 10 Wiya nyurrangarri Yiitjuku walytja kutjupa tjuṯa panypurangkunytjaku. Nyurrangarri wiya mayutju nguwanpangku tjananya watjantjaku. Katutjalu kutju tjananya watjantjaku. Ngula paluru yuwankarra nganaṉanya kuutawutjungka ngaratjunkula watjalku.  
\v 11 Palunya nguwanpa Katutjaku wangka yirriṯi tjunutja yalatji ngarrinyi,  
\q1 “Ngayulu Katutjalu nyurrangarrinya tjukarurru watjaṉi yalatji. Ngula yaṉangu yuwankarrangku ngayunya pupakatirra waḻkulku.”   
\p
\v 12 Nganaṉa yuwankarrangku kuutawutjungka Katutjala ngarala tjakultjunku, mantangka nyinangutjangku.   
\s1 Yiitjuku walytja kutjupa wiya panypurangkunytjaku  
\p
\v 13 Nganaṉa wiya Yiitjuku walytja kutjupa mayutju nguwanpangku palunya watjantjaku. Purinypa nganaṉa wangkanytjaku paluru kulira Yiitjuku tjukarurru kutu nyinanytjaku.  
\v 14 Mayutju Yiitjuluṉi nintiṉu yalatji. Katutjalu kuliṉi nganaṉa palya kuka yuwankarra, mangarri yuwankarraṯarra ngalkunytjaku. Tjinguru Yiitjuku walytja kutjungku kulilku kuka Katutjanya nguwanpaku tjunutja wiya ngalkunytjaku. Yalatji paluru kulira palya kuka palunya wantirra Yiitjuku tjukarurru nyinanytjaku.  
\v 15 Tjinguru nyuntu kuka palunya ngalkuṉingka, Yiitjuku walytja kutjupangkunta nyakula watjilpa nyinaku, nyuntu kuya palyaṉutjakutjura kulira. Yalatji kuka palunya ngalkura nyuntu wiya yunytjurringkula nyinaku, Yiitjuku walytja palumpa. Nyuntu wati palumpa kulintjawiyangku kuka palunya kutu ngalkunytjala, Yiitjuku walytja paluru nyuntunya nguwanpa kuka palunya ngalkura kulilku, “Ngayulu kuka palunya ngalkura kuyalpiṉa palyaṉu.” Yalatji paluru kuya kutu palyara munupinarringkula Yiitjuku walytjawiyalpi nyinatjipingkamarra. Palunya nguwanpa wiya nyurrangarri kutjupaku kulilwiyangku kuka palunya ngalkunytjaku, wantinytjaku. Yiitjuku walytja palumpaku, kukawiya ngalkulpayiku Kurayitjanya mirrirringu, kana nyinatjunkunytjaku.  
\v 16 Nyuntu kuliṉi kuka Katutjanya nguwanpaku tjunutja palya ngalkunytjaku. Tjinguru Yiitjuku walytja kutjupangkunta watjalku, “Nyuntu kuka palunya ngalkura kuya palyalku.” Yalatji nyuntu kuka palunya ngalkura kuya palyaṉutjakutjura kuliltjipingkamarra, kuka palunya nyuntu wantinytjaku, ngalkulwiyangku.  
\v 17 Kukanguru mangarringuruṯarra wiyala akumanarrinytjaku. Nganaṉa Katutjaku walytja tjuṯangku kutjupa tjuṯaku palya nyinanytjaku, kaangkinytji. Nganaṉa Katutjaku tjukarurru nyinanytjaku. Yalatji tjukarurru nyinanytjaku Katutjaku kurrunpangku nganaṉanya nintilpayi. Yalatji nganaṉa nyinarra yunypa nyinaku.  
\v 18 Yaṉangu yalatji Kurayitjaku tjukarurru nyinanyingka Katutjanyara yunyparriku, yaṉangu tjuṯaṯarraya palumpa yunypa nyinaku.  
\v 19 Nganaṉa yalatji kulintjaku. Kutjupa tjuṯaku nganaṉa palya nyinanytjaku pikarrinytjawiya. Nganaṉa tjanala palya wangkanytjaku, tjana kulira tjukarurru kutu Yiitjuku nyinanytjaku.   
\p
\v 20 Kuka mangarri yuwankarraṯarra nganaṉa palya ngalkunytjaku. Yiitjuku walytja kutjupangkunta kuka Katutjanya nguwanpaku tjunutja ngalkuṉingka nyakula kuya palyaṉutjakutjura kulilku. Nyuntunya nguwanpa kuka ngalkula tjinguru munupinarringkula Yiitjuku walytjawiyalpi nyinaku. Katutjaku walytjawiyalpi nyinaku. Katutjaku walytjawiya nyinatjipingka nyuntu kuka palunya ngalkuwiyangku wantinytjaku, paluru kutu Katutjaku walytja tjukarurru nyinanytjaku.  
\v 21 Yiitjuku walytja kutjupa tjuṯaku nyuntu kulintjaku. Tjana tjinguru yalatji kuliṉi, “Nganaṉa kuka Katutjanya nguwanpaku tjunutja wiya ngalkuntjaku.” Yiitjuku walytja kutjupa tjuṯangku tjinguru yalatji kuliṉi, “Nganaṉa wiya wayina tjikintjaku.” Yiitjuku walytja kutjupa tjuṯangku yalatji kuliṉi, “Nganaṉa wiya Tjuuntiyingka kutju Katutjanya waḻkuntjaku, tjiṉṯu kutjupa tjuṯangkaṯarra.” Yalatji tjana kuka ngalkuwiyangku kulintjala nyuntu wiya kuka palunya ngalkuntjaku. Yalatji kutjupa tjuṯangku wayina tjikilwiyangku kulintjala, nyuntu wiya wayina tjikintjaku. Yalatji kutjupa tjuṯangku tjiṉṯu tjuṯangka Katutjanya waḻkulkitjangku kulintjala, nyuntu wiya Tjuuntiyingka kutju Katutjanya waḻkuntjaku.  
\v 22 Tjinguru nyuntu kuliṉi, kuka palunya palya ngalkunytjaku. Yalatji ngalkulkitjangku kulira wiya yaṉangu kutjupangka wangkanytjaku, Katutjala kutju wangka! Tjinguru nyuntu kuliṉi kuka palunya ngalkuwiyangku wantinytjaku. Yalatji kulira Katutjala kutju wangka!, yaṉangu kutjupangka wiya. Yaṉangungku palya kuka ngalkunytjaku, tjukarurru kuliṉutjangku. Yaṉangu kutjupangku palya wantinytjaku, tjukarurru kutju kuliṉutjangku. Tjinguru nyuntu kuliṉi, wayina palyaṉa tjikintjaku. Yalatji tjikilkitjangku kulira wiya yaṉangu kutjupangka wangkanytjaku, Katutjala kutju wangka! Tjinguru nyuntu kuliṉi wayina tjikilwiyangku wantinytjaku. Yalatji kulira Katutjala kutju wangka!, yaṉangu kutjupangka wiya. Yalatji kulira nyuntu yunypa nyinaku.  
\v 23 Tjinguru yaṉangu kutjupangku kuka palunya ngalkukitjangku puṯu kulilku. Yalatji puṯu kulira, wiya paluru ngalkunytjaku. Ngalkura kuyalpi palyalku, ngalkulkitjangku tjukarurru kulintjawiyangku. Tjukarurru palyalkitjangku puṯu kulira, wiya yalatji palyantjaku. Puṯu kulilpayingku kuyalpi palyalku, tjukarurru palyalkitjangku kulintjawiya.   
\c 15  
\s1 Kutjupa tjuṯaku kulira palyantjaku  
\p
\v 1-2 Tjinguru kutjupa tjuṯanyurra Yiitjuku tjukarurru nyinakitjangku puṯu kulira nyinapayi. Kutjupa tjuṯanyurra tjinguru Yiitjuku walytjarringkula rawangku palumpa waarrka palyalpayi tjukarurru kutu. Nyurrangarri panyapa tjuṯa tjananya purinypangku wangkarra tjukarurruntjaku. Palumpa tjanampa nyurrangarri kulintjaku, tjana kulira tjukarurru kutu nyinanytjaku. Wiya nyurrangarri walytjangku kulira palyantjaku.  
\v 3 Yiitju Kurayitjalu wiya walytjangku kulira nyinapayi, Katutjaku wangkawana paluru kulira tjukarurru nyinangi. Katutjaku wangka irriṯi tjunutja ngarrinyi yalatji,  
\q1 “Katutja. Nyuntupa tjana yunytjuwiya nyinarra ngayunyalpi tjana panypurangkupayi.” Yalatji palumpa yunytjuwiya tjuṯangku Yiitju Kurayitjanya panypurangkupayi, Katutjaku wangkawana paluru kulira tjukarurru nyinanyingka.   
\p
\v 4 Katutjaku wangka yirriṯi wakara tjunutja yuwankarra ngarrinyi, nganaṉa kulira nintirrinytjaku. Wangka palunya nganaṉa nintingku kulira yunypa nyinaku. Kutjupa tjuṯangku nganaṉanya panypurangkula pungkunytjala nganaṉa wangka palunya kulira yunypalpi nyinaku. Wangka palunya kulira nganaṉa yalatji kulilku, “Yilta nganaṉa Katutjaku ngurrangka kana kutu nyinaku.”  
\v 5 Katutjalu nganaṉanya pukuḻmankupayi, kutjupa tjuṯangku panypurangkula pungkunytjala. Ngayulu yunytjurringanyi paluru nyurrangarrinya nintintjaku, kalypangku palumpa waarrka tjungungku palyantjaku, yunypangku. Yiitju Kurayitjanya tjukarurru nyinangutja nguwanpa nyurrangarri tjukarurru kutu nyinanytjaku.  
\v 6 Yalatjinyurra kalypa nyinarra tjungungkunyurra Katutjanya puḻkawaṉinytjaku. Paluru ilta mayutju Yiitju Kurayitjaku paapa nyinanyi.   
\s1 Wangka Yiitjunyatjarra ngaranyi Tjuwu tjuṯaku, Tjuwuwiya tjuṯakuṯarra  
\p
\v 7 Yiitjuku walytja kutjupa tjuṯakunyurra yunytju nyinanytjaku, Kurayitjanya nyurrangarrimpa yunytju nyinapayi nguwanpa. Yalatjinyurra nyinanytjala kutjupa tjuṯangku nyurrangarrinya nyakula Katutjanyalpiya waḻkulku.  
\v 8 Wangka ngaatjanyaya kulila! Katutjalu Yipuramanyangarri irriṯi watjara Yiitju Kurayitjanya ilta mantakutu wantirriyaṉu, wiya paluru panyapa tjanala watjara wantingu, paluru ilta palunya wantirriyaṉu. Paluru ngalyankula Katutjaku waarrka palyaṉingi, Tjuwu tjuṯa tjananya yaṉṯayaṉṯalkitjangku. Paluru mantakutu ngalyanu.  
\v 9 Tjuwuwiya tjuṯaṯarra palumpa walytjarringkula Katutjanyalpi tjana waḻkuntjaku yalatji, “Katutjanya yilta nganampa aḻṯurunytju nyinanyi.” Katutjaku wangka Tapitalu irriṯi wakaṉutja Kurayitjalu Katutjala watjaṉu yalatji,  
\q1 “Palulanguru nganaṉatju nyuntunya waḻkulku, Tjuwuwiya tjuṯangkuṯarra. Nganaṉatju nyuntunya warrara waḻkulku.”   
\p
\v 10 Katutjaku wangka kutjupa yalatji ngarrinyi. Yaṉangu kutjupangku Tjuwuwiya tjuṯangka yalatji watjaṉu,  
\q1 “Yunyparriwaya! Nyurrangarriṯarra Katutjaku walytja tjuṯalpi nyinanyi.”   
\p
\v 11 Katutjaku wangka kutjupa yalatji ngarrinyi, “Tjuwuwiya tjuṯangkunyurra mayutju Katutjanya puḻkawaṉinytjaku. Yaṉangu yuwankarrangkula palunya puḻkawaṉinytjaku.”   
\p
\v 12 Wangka ngaatjanyaṯarraya kulila! Wati Yaatjayalu yirriṯi watjaṉu yalatji,  
\q1 “Mayutju Tapitaku ngaṉṯitja mayutju tiṉa nyinaku. Paluru manta tjuṯa ngurraraku mayutju nyinaku. Paluru tjana kulilku, ‘Mayutju palaku wangka nganaṉa kulira yilta Katutjaku ngurrangka kana nyinaku.’”   
\p
\v 13 Ngayulu yunytjurringanyi Katutjalu nyurrangarrinya rapara kanyintjaku ngulanyurra palumpa ngurrangka nyinanytjaku. Yalatji nyurrangarrinya kanyintjala nyurrangarri Yiitjuku walytja nyinarra yunypalpi nyinaku. Katutjaku kurrunpangku nyurrangarrinya rapalku yukiri nguwanpa kutu pakantjaku yalatji kulira, “Nganaṉa yilta Katutjaku ngurrangka kana kutu nyinaku.”   
\s1 Puulalu watjalku, “Katutjaluṉi watjaṉu palumpa waarrka palyantjaku”  
\p
\v 14-15 Walytja tjuṯa, wangka ngaatjanya kulila! Ngayulu kuliṉi nyurrangarri tjukarurru Yiitjuku nyinanyi. Nintingkunyurra Yiitjuku walytja kutjupa tjuṯa nintilpayi Katutjaku wangkawana. Piipa ngaangka ngayulu nyurrangarrinya nguḻuwiyangku nintira marrkuṉingi, pina alytjurankukitjangku. Yalatji ngayulu nyurrangarrinya marrkuṉingi, Katutjaluṉi palumpa waarrka palyantjaku watjaṉutja.  
\v 16 Paluruṉi watjaṉu Yiitju Kurayitjaku waarrkana nyinanytjaku. Paluruṉi watjaṉu Tjuwuwiya tjuṯawana tjakultjurinkunytjaku. Yirriṯi tuḻkuku mayutjungku kuka tjawirrilyi kutjantjala, Katutjalu kukatjanu paṉṯira yunyparringkupayi. Yara palunya nguwanpa Katutjanya yunyparringkupayi Tjuwuwiya tjuṯangku wangka Yiitjunyatjarra kulira walytjarrinytjala. Ngayulu tjanalawana wangka palunya tjakultjurinkupayi. Katutjaku kurrunpangku tjananya ngulytjulpayi tjana kulira Katutjaku tjukarurru nyinanytjaku.   
\p
\v 17 Yiitju Kurayitjaluṉi nintira rapantjala, ngayulu Katutjaku waarrka palyalpayi. Yalatji kulira ngayulu yunypalpi nyinanyi.  
\v 18 Yiitju Kurayitjaluṉi kutu rapantjala ngayulu nyurrangarrinya tjakultjunanyi rapangku. Ngayulu miiṉṯa tjuṯa palyara palumpa wangka tjakultjunkunytjala Yiitjulu tjananya Tjuwuwiya tjuṯa nintilpayi palumpa walytjarrinytjaku.  
\v 19 Yiitju Kurayitjakuṉu ngangkari tiṉatjarrangku ngayulu kutjupa kutjupa palyantjala paluru tjana nyakula kulira Yiitjuku walytjarringkupayi, Katutjaku kurrunpangku tjananya nintiṉutjangka. Tawunu Tjarutjalumalanguru yankula ngayulu wangka Yiitjunyatjarra tjanala tjakultjurinangi ngurra tjuṯawana. Yalatji tjanala ngayulu tjakultjurinkula manta Yilirrikumalakutu yanu. Yalatji ngayulu Yiitju Kurayitjakuṉu wangka ngurra tjuṯawana tjanala tjakultjurinkupayi.  
\v 20 Ngurra kutjupa tjuṯawana Yiitjuku walytja kutjupa tjuṯangku tjananyaya Kurayitjakuṉu wangka yurrunpa tjakultjurinangi. Ngayulu wiya ngurra palunya tjuṯawana piyuku tjakultjurinkupayi. Wantirra ngayulu tjanala ngurra kutjupa tjuṯawana tjakultjurinkupayi, Yiitju Kurayitjaku ngurrpa tjuṯawana. Yalatji ngayulu kulira nintirinkupayi, “Kurayitjaku ngurrpa tjuṯa kutjuṉa tjananya nintilku.”  
\v 21 Palunya nguwanpa Katutjaku wangka irriṯi tjunutja yalatji ngarrinyi,  
\q1 “Kutjupa tjuṯangkulpiya Kurayitjanya kulilku, ngurrpa nyinangutja tjuṯangku. Kuliraya nintirriku, yurrunpa tjana kulilwiya nyinarra.”  
\p Yalatji Katutjaku wangka ngarrinyi.   
\s1 Puulanya yunytjurriku Ruumanya ngurrara tjuṯawana yankula nyinanytjaku  
\p
\v 22-23 Rawangkuṉa ngurra ngaa tjuṯawana tjakultjurinkula puṯu kulilpayi nyurrangarrilakutu, Ruumalakutu yankula nyinakitjangku. Yiitju Kurayitjaku waarrka ngurra ngaa tjuṯawana ngayulu palyarinkula wiyarringulpi. Palumpa walytja tjuṯalingkulpiya nyinanyi.  
\v 24 Kala, ngayulu nyurrangarrilakutulpi yananyi. Nyurrangarrilawana nyinarra ngayulu manta Piinalakutu yankuku. Ngayulu nyurrangarrilawana yunypa nyinanytjala tjinguru nyurrangarri ngayunya mangarri maniṯarra yungkula maa wantirriyalku manta Piinalakutu. Yalatjikuṉa yunytjurringanyi.   
\p
\v 25-26 Yurrunpawarrilatju Tjarutjalumalakutu yananyi palunya ngurrara tjuṯa mani yungkukitja, maralpa tjuṯaku. Mani palunya manta Matjatuniyanya ngurrara tjuṯangkuya yunypangku tjunu, manta Kiritjinya ngurrara tjuṯangkuṯarra. Paluru tjana mani palunya tjunu Yiitjuku walytja Tjarutjalumanya ngurrara tjuṯaku, katirra tjananya yungkunytjaku.  
\v 27 Tjuwuwiya paluru tjana walytjangku kulira yunypangku tjunu tjanampa. Paluru tjana tjanampa tjunkukitjangku yalatji kulinmara, “Nganaṉa tjanampa tjukarurru mani tjunkunytjaku, Tjuwu paluru tjana nganaṉanya irriṯi wangka Yiitjunyatjarra tjakultjunutjangka. Palya nganaṉa tjanampa Tjuwu tjuṯaku tjunkunytjaku.”  
\v 28 Mani palunya nganaṉatju katirra tjananya yungku. Palulanguru ngayulu manta Piinalakutu yanku. Yankula ngururrpa ngurra Ruumala ngayulu nyurrangarrilawana nyinaku.  
\v 29 Ngayulu maa yankula nyurrangarrila nyinanyingka Yiitju Kurayitjalu nganaṉanya tjungu pukuḻmanku. Paluru nganaṉanya rapalku palumpa waarrka yunypangku palyantjaku.   
\p
\v 30-31 Walytja tjuṯa, mayutju Yiitjunya, Katutjaku kurrunpaṯarra nganampa yunytju nyinanyi. Palunya nguwanpa nyurrangarri ngayuku yunytju nyinarra, ngayuku Katutjanya tjapintjaku, paluru ngayunya yaṉṯayaṉṯara katiyinkunytjaku, Yiitjuku yunytjuwiya tjuṯangku, Tjuutiyanya ngurrara tjuṯangku ngayunya pungkupayingkamarra. Yalatji nyurrangarri ngayuku kutu tjapintjaku, Yiitjuku walytja Tjarutjalumanya ngurrara tjuṯa ngayuku yunypa tjana nyinanytjaku, nganaṉatju mani palunya katirra tjananya yungkunytjala. Wangka palulawana ngayulu kutu Katutjanya tjapilpayi. Paluru nyurrangarrinya nintira rapalku yalatji ngayuku kutu nyurrangarri tjapintjaku.  
\v 32 Katutjalu tjinguru kuliṉi ngayulu nyurrangarrilakutu yankula nyinanytjaku. Nyurrangarri Katutjanya tjapila!, ngayulu nyurrangarrilakutu maa yankula nganaṉa tjungu yunypa nyinanytjaku. Ngayulu nyurrangarrilawana nyinanytjala nyurrangarri ngayula wangkarra pukuḻmankunytjaku. Yalatji kutju nyurrangarri Katutjanya tjapintjaku.  
\v 33 Ngayulu palunya nyurrangarrimpa tjapinmalpa paluru nyurrangarrinya yaṉṯayaṉṯara kutu kanyintjaku, yunypanyurra kutu nyinanytjaku. Yalatjiku ngayulu Puulanya yunytjurringanyi.   
\c 16  
\s1 Walytja tjuṯangka wangkanytjaku  
\p
\v 1-2 Kungka yini Piipinya Yiitjuku walytja nyinanyi, nganampa walytjaṯarra. Yiitjuku walytja Kinkiriyanya ngurrara tjuṯaku mayutju tjuṯa nyinanyi, kungka paluruṯarra. Paluru nyurrangarrimpa ngurrakutu maa yankula nyinanyingka, yunyparringkula palunya yaṉṯayaṉṯala! Paluru ngurra kutjupakutu yankukitja nyinanyingka mani palunya yungkula wantirriyala!, Katutjaku walytja tjuṯangkuya Yiitjuku walytja kutjupa ngurrara tjuṯa yunyparringkula yaṉṯayaṉṯalpayi nguwanpa, palunyaṯarra nyurrangarri yaṉṯayaṉṯantjaku. Kungka Piipilu Yiitjuku walytja tjuṯa nintira yaṉṯayaṉṯalpayi, ngayunyaṯarra.   
\p
\v 3 Kungka Piritjilanya, wati Yakuwilanyaṯarra watjala yalatji!, “Puulanyangarri palya Yiitjuku walytja nyinanyi.” Paluru kutjarra tjungungkulatju Yiitju Kurayitjakuṉu wangka tjakultjurinkupayi.  
\v 4 Paluru kutjarra ngayuku patjuri ngarangi, yunytjuwiya tjuṯangku ngayunya pungkupayingkamarra. Tjana palunya kutjarra mirri pungamara. Yiitjuku walytja Tjuwuwiya tjuṯaṯarra palumpa kutjarra yunypa nyinanyi.  
\v 5 Palumpa kutjarraku waaḻangka tjana Yiitjuku walytja tjuṯa tjungurringkupayi. Tjungurringkupayi tjuṯanya yalatji watjala!, “Puulanyangarri palya Yiitjuku walytja nyinanyi.”  
\p Manta Yayitjala wati Yipanitatjanya yurrunpa Yiitju Kurayitjaku kulira walytjarringu. Wati palunyaṯarra yalatji watjala!, “Puulanyangarri palya Yiitjuku walytja nyinanyi.”  
\v 6 Kungka Miirilu rawangku Katutjaku waarrka palyalpayi. Palunyaya watjala!, “Puulanyangarri palya Yiitjuku walytja nyinanyi.”  
\v 7 Wati Yanturunikatjanya, wati Tjuniyatjanyaṯarra yalatji watjala!, “Puulanyangarri palya Yiitjuku walytja nyinanyi.” Tjuwu tjuṯalatju tjungu tjiilangka nyinangi. Paluru kutjarra Yiitjuku waarrkana palya nyinanyi. Paluru kutjarra yurrunpa Yiitjuku walytjarringu, ngayulu ngaṉṯi Yiitjuku walytjarringu.   
\p
\v 8 Wati Yampuliyatatjanyaya watjala!, “Puulanyangarri palya Yiitjuku walytja nyinanyi.” Paluru ilta Yiitjuku walytja nyinanyi, ngayuku walytjaṯarra.  
\v 9 Wati Wupanatjanya wati Tatjatjanyaṯarra panyapa watjala!, “Puulanyangarri palya Yiitjuku walytja nyinanyi.” Wupanatja paluru Kurayitjaku waarrka kutu palyalpayi, nganaṉatju palyantja nguwanpa. Tatjatja palumpa ngayulu kulira yunyparringanyi.  
\v 10 Wati Yapilitjanya, wati Yaritjupulitjanyangarriṯarra watjala!, “Puulanyangarri palya Yiitjuku walytja nyinanyi.” Yapilitjalu ilta Yiitju Kurayitjaku tjukarurru nyinapayi.  
\v 11 Wati Yirutiyunya Tjuwu ngayunya nguwanpa nyinanyi. Palunya wati Nakitjatjanyangarriṯarra watjala!, “Puulanyangarri palya Yiitjuku walytja nyinanyi.”   
\p
\v 12 Kungka tjuṯangka tjanala watjala!, yini ngaa tjuṯangka Turipanya, Turiputjanya Patjitjanyaṯarra, “Puulanyangarri palya Yiitjuku walytja nyinanyi.” Paluru tjana mayutju Yiitjuku tjukarurru waarrkarringkupayi.  
\v 13 Wati Ruputjanya palumpa maamaṯarraya watjala!, “Puulanyangarri palya Yiitjuku walytja nyinanyi.” Wati paluru yilta mayutju Yiitjuku waarrka tjukarurru palyalpayi. Palumpa maamangku ngayunya yaṉṯayaṉṯalpayi, katja walytja nguwanpa.  
\v 14 Yiitjuku walytjaya yini yalatji nyinanyi, Yatjinkiritatjanya, Pulikunya, Yamitjanya, Paturupatjanya, Yamatjanya. Yiitjuku walytja wati kutjupa tjuṯa palumpa tjanalawana nyinanyi. Palunya tjananya watjala!, “Puulanyangarri palya Yiitjuku walytja nyinanyi.”  
\v 15 Yiitjuku walytja kutjupa tjuṯa yalatji nyinanyi, wati Pilulukutjanya, kungka Tjuliyatjanya, wati Nirutjanya, palumpa kangkuruṯarra, wati Wulumpatjanyaṯarra. Katutjaku walytja kutjupa tjuṯa tjanala tjungu nyinapayi. Palunya tjuṯa tjananya watjala!, “Puulanyangarri palya Yiitjuku walytja nyinanyi.”  
\v 16 Yiitjuku walytja tjuṯangka tjungurringkula mara witira tjananya palyanyurra wangkanytjaku. Yiitjuku walytja ngaa ngurrara tjuṯangku watjaṉu, “Nganaṉa Yiitjuku walytja Ruumanya ngurrara tjuṯaku yunypa nyinanyi.”   
\p
\v 17 Walytja tjuṯa, wangka ngaatjanyaya kulila! Palya nyurrangarri tjanalawana nyinama!, pikarringkunytjawiya, Yiitjuku wangkanguru pikapikarringkupayi tjuṯangkamarra. Paluru tjana wangka kutjupawana nyurrangarrinya nintilpayi. Kutjupa tjuṯangku nyurrangarrinya yirriṯi Yiitjuku wangka tjukarurru nintiṉingi. Wangka kutjupawana nintilpayi palula tjanala wiya tjungurrinytjaku, wanti tjananya!  
\v 18 Paluru tjana wiya mayutju Yiitjuku waarrka palyaṉi, walytjangkuyanku kulira wiyawanangku palyaṉi. Yiitjuku walytja tjuṯa tjana yara wangkarra pukuḻmankupayi. Pukuḻmankula tjananya tjana wangka kutjupawana nintilpayi. Yiitjuku walytja paluru tjana wangka tjanampa kulira yunyparringkupayi. Paluru tjana wiya kuliṉi ngunytji wangkapayi tjuṯa, tjana tjukarurru nintilpayikutjura kuliṉi.   
\p
\v 19 Ilta nyurrangarri mayutju Yiitjuku tjukarurru kutu nyinapayi. Yiitjuku walytja ngurra tjuṯawana nyinapayi tjuṯangku nintingku kuliṉi nyurrangarri tjukarurru nyinapayi. Paluru tjana yalatjiku ninti nyinanyingka ngayulu yunypa nyinanyi. Yalatji nyurrangarri kutu Yiitjuku tjukarurru nyinanytjaku munupinarringkula kuya palyantjawiya.  
\v 20 Yaṉangungku kuya palyantjaku mamuku mayutjungku tjingapunganyi. Ilta Katutjalu ngula palunya pungkuku nyurrangarrinya tjingapungkupayingkamarra. Katutjalu nganaṉanya yaṉṯayaṉṯaṉi. Ngayulu palunya tjapinmalpa mayutju Yiitjuluṯarra nyurrangarrinya kutu yaṉṯayaṉṯantjaku.   
\p
\v 21 Wati Timitjiyilu tjungungku ngali Yiitjuku waarrka palyalpayi. Paluru watjaṉu yalatji, “Ngayulu yunypa nyinanyi nyurrangarrimpa Ruumanya ngurrara tjuṯaku.” Ngayuku walytja kutjupa tjuṯaṯarra nyinanyi yini yalatji, Lutjiyatjanya, Tjayitjunanya Tjupipatanya. Paluru tjana watjaṉu, “Nganaṉa yunypa nyinanyi nyurrangarrimpa Ruumanya ngurrara tjuṯaku.”   
\p
\v 22 Piipa ngaatjanya ngayulu Tatjiyatjalu Puulaku wakaṉi, wantirriyalkitjangku. Nyurrangarrimpa, mayutju Yiitjuku walytja tjuṯaku ngayulu yunypa nyinanyi. Ngayuluṯarra palumpa walytja nyinanyi.  
\v 23-24 Wati Kiyatjaku ngurrangka ngayulu Puulanya nyinanyi. Ngaangkaya Yiitjuku walytja tjuṯa tjungurringkupayi. Kiyatjalu watjaṉu yalatji, “Ngayulu Ruumanya ngurrara tjuṯaku yunypa nyinanyi.” Wati Yiratjatatjalu tawunu ngaa ngurrara tjuṯaku mani tjanampa ngunytji kanyiṉi. Paluru, wati Kuwatatjaluṯarra watjaṉu, “Ngali Ruumanya ngurrara tjuṯaku yunypa nyinanyi.” Kuwatatjanya nganampa walytja nyinanyi.   
\s1 Puulalu Katutjanya puḻkapungku  
\p
\v 25 Katutjanya nganaṉa puḻkawaṉinytjaku. Paluru nganaṉanya rapalpayi Yiitju Kurayitjaku tjukarurru nyinanytjaku. Wangka palunya Yiitjunyatjarra ngayulu nyurrangarrila yirriṯi tjakultjunkupayi. Wangka palunya kulira nyurrangarri Yiitjuku tjukarurru kutu nyinaku. Wangka Yiitjunyatjarra yirriṯi nyinapayi tjuṯangku wiya kuliṉu, ngurrpaya nyinangi. Katutjalu wiya tjanala wangka palunya nintilpayi.  
\v 26-27 Kala, kuwarrilpi yaṉangu tjuṯangku wangka palunya kulilpayi. Katutjaku wangka watjalpayi tjuṯa tjananya Katutjalu watjaṉu piipangka wangka Yiitju Kurayitjanyatjarra wakantjaku, yaṉangu uwankarrangku, manta kutjupa kutjupa ngurrara tjuṯangku riitarringkula kulira palumpa walytjarrinytjaku. Katutjanya palya nganampa mayutju nyinanyi. Paluru nintingku kulira Yiitju Kurayitjanya mantakutu wantirriyaṉu nganampa kuya waṉinytjaku. Paluru kutu nyinamalpa mayutju nganampa. Nganaṉa palunya kutu puḻkawaṉinytjaku.