\id PHP php 
\h Pilipayilakutu 
\toc2 Pilipayilakutu 
\toc1 Pilipayinya Ngurrara Tjuṯaku Wantirriyaṉutja 
\mt1 Pilipayinya Ngurrara Tjuṯaku Wantirriyaṉutja  
\c 1  
\p
\v 1 Ngali Puulalu, Timitjiyilu piipa ngaatjanya wakara wantirriyaṉi nyurrangarrimpa, Pilipayinya ngurrara tjuṯaku. Nyurrangarri Katutjaku walytja tjuṯa nyinanyi, Yiitju Kurayitjaku walytjaṯarra. Yuwankarrangkunyurra wangka ngaatja kulintjaku, ingkaṯa tjuṯangkuṯarra.  
\v 2 Paapa Katutjalu, mayutju Yiitju Kurayitjaluṯarra nyurrangarrinya yaṉṯayaṉṯaṉi, yunypanyurra nyinanytjaku. Ngayuluṉa yunytjurringanyi yalatji nyurrangarri yunypa nyinanytjaku.   
\p
\v 3 Ngayulu nyurrangarrimpa rawangku kulira Katutjanya tjapilpayi yalatji, “Pilipayinya ngurrara tjuṯa nyuntupa palya nyinanyi.” Yalatji ngayulu nyurrangarrimpa tjapira yunypa nyinapayi.  
\v 4-5 Ngayulu nyurrangarrimpa yunypa nyinanyi yalatji kulira. Irriṯi nganaṉa tjungungku Pilipayila Yiitjuku waarrka palyalpayi. Ngayulu nyurrangarrinya wangka Yiitjunyatjarra yirriṯi nintintjala nyurrangarri kulira palumpa walytjarringu. Palulanguru tjungungku nganaṉa Yiitjuku waarrka palyalpayi.  
\v 6 Katutjalu nyurrangarrinya Pilipayinya ngurrara tjuṯa ngulytjura nintinmalpa nyurrangarri palumpa waarrka rawangku tjukarurru palyantjaku, Yiitju Kurayitjanya mantakutu piyuku ngalyananyingka. Wangka yalatji ngayulu tjukarurru kuliṉi.   
\p
\v 7 Yuwa, tjungungku nganaṉa Pilipayila Yiitjuku waarrka palyara ngayulu kutu nyurrangarrimpa yunytju nyinanyi. Nyurrangarri kutu Yiitjuku waarrka palyantjala ngayulu tjiilangka yunngu yunypa nyinanyi. Ngayuluṯarra Yiitjuku waarrka palyalpayi tjiila ngaangka.  
\v 8 Yilta, ngayulu nyurrangarrimpa yankula nyakukitja yunytjurringanyi. Yiitju Kurayitjanya nyurrangarrimpa yunytjurringkula nyinanyi, yalatji nguwanpa ngayuluṯarra nyurrangarrimpa yunytjurringkula nyinanyi.  
\v 9-10 Ngayulu Katutjanya nyurrangarrimpa tjapilpayi tjiilangka nyinarra, nyurrangarri yaṉangu kutjupa tjuṯaku puntura yunytjurringkula nyinanytjaku. Ngayulu tjapilpayi nyurrangarrimpa nintinyurra nyinanytjaku Katutjaku wangkaku, yalatjiṯarra nyurrangarri tjukarurru kutu nyinanytjaku. Yunytjurringkula nyinangutja nyurrangarri nintingku tjukarurru kulintjaku. Palulanguru rawanyurra kuya palyalwiya tjukarurru nyinaku, Yiitju Kurayitjanya mantakutu piyuku ngalya yananyingka. Paluru nyurrangarrinya katirralpi nyinatjunku Katutjaku ngurrangka.  
\v 11 Kala, kuwarri Yiitju Kurayitjalu nyurrangarrinya Pilipayinya ngurrara tjuṯa nintilku yaṉangu kutjupa tjuṯaku tjukarurru palyantjaku. Nyurrangarri yalatji tjanampa palyantjala yaṉangu kutjupa tjuṯangku nyakula Katutjanya waḻkulku yalatji, “Nyuntupa walytja pala tjuṯa tjukarurru nyinanyi Yiitjuku.”   
\s1 Yaṉangu tjuṯangkulpi Yiitjukuṉu wangka tjakultjurinanyi  
\p
\v 12-14 Walytja tjuṯa, wangka ngaatja kulila! Ngayulu ngaangka tjiilangka nyinanyingka Yiitjuku walytja tjuṯangku kuliṉi, “Puulanya tjiilangka nyinanyingka nganaṉalpi Yiitjuku wangka tjakultjurinkunytjaku.” Palulanguru paluru tjanalpi nguḻuwiyarringkula palumpa wangka ngurra tjuṯawana tjakultjurinanyi. Ngayuluṯarra ngaangka wangka palunya tjuulytji tjuṯangka tjakultjunkupayi. Paluru tjana, ngaa ngurrara kutjupa tjuṯangkuṯarra kuliṉi, “Puulanya tjiilangka nyinanyi ngurra tjuṯawana Yiitjuku waarrka palyara.”   
\p
\v 15-16 Yuwa, Yiitjuku walytja tjuṯangku nguḻurringkuwiyangku palumpa wangka tjakultjurinanyi. Tjaampala Yiitjuku walytja ngayuku tuunlayikirringkula nyinanyi. Paluru tjana kuwarrilpi Yiitjuku wangka tjakultjurinanyi. Tjaampala ngayuku yunypa nyinarra tjukarurru Yiitjuku wangka tjakultjurinanyi. Tjana kuliṉi yalatji, “Katutjalu Puulanya watjaṉu Yiitju Kurayitjakuṉu wangka tjakultjunkunytjaku. Ilta paluru mayutjulampa nyinanyi.”  
\v 17 Paluru tjana ngayuku tuunlayiki tjuṯangku Yiitjuku wangka tjakultjurinkupayi, Yiitjuku walytja tjuṯaku mayutju nyinakitjangku. Yalatji tjana wiyawana kuliṉi, “Nganaṉa Yiitjuku wangka tjukarurru nintilpayi. Puulalu tjananya wiyawanangku nintilpayi. Puulanya tjiilangka nyinarra puṯu kulilku, nganaṉa Yiitjuku wangka tjakultjurinanyingka.”   
\p
\v 18 Tjakulpa palunya kulira wiya ngayulu Puulalu puṯu kulira watjilpa nyinanyi. Paluru tjana ngayuku yunytjuwiyangkuṯarra Yiitjukuṉu wangka tjakultjunanyingka, ngayulu puntura yunypa nyinanyi, yaṉangu tjuṯangkulpi Yiitjukuṉu wangka kuliṉingka. Ngayulu puṯu kulintjawiya. Palya ngayuku tuunlayiki tjuṯangku, ngayuku yunypa nyinapayi tjuṯangkuṯarra Yiitjukuṉu wangka yaṉangu tjuṯangka tjakultjurinanyi.  
\v 19 Ngayulu yunypa nyinamalpa yalatji kulira, “Pilipayinya ngurrara tjuṯangku ngayuku Katutjanya tjapilpayi. Yiitjuku kurrunpangku yilta ngayunya tjiilangka yaṉṯayaṉṯaṉi. Palurulpi yilta ngayunya ngaanguru pakaltjingalku.”  
\v 20 Yiitjuku ngayulu yunypa nyinanyi, ngayulu yunytjurringanyi kutu palumpa yunypa nyinanytjaku. Ngayulu yunytjurringanyi palumpa kutu tjukarurru nyinanytjaku panypurangkunytjawiyangku. Ngayulu kutu palumpa waarrka tjukarurru palyantjaku nguḻurringkula wantinytjawiyangku, Yiitjuku tuunlayiki tjuṯangku ngayunyalpi pungkunytjala. Tjinguru ngayunya tjana mirri pungkunytjawiyangka ngayulu rawaṉa nyinarra palumpa waarrka palyanmalpa, tjiḻpirringkula kutjuṉa wiyarriku.   
\p
\v 21 Ngayulu alatji kuliṉi. Tjinguru Yiitjuku tuunlayiki tjuṯangku ngayunya mirri pungkunytjala, ngayulu palya nyinaku Yiitjulawana palumpa ngurrangka pungkupayi tjuṯangkamarra. Tjinguru tjana ngayunya wantinytjala ngayulu rawangku Yiitjuku waarrka yunypangku palyanmalpa, palumpa walytja tjukarurru kutu ngayulu nyinamalpa.  
\v 22 Puṯuṉa kuliṉi, tjinguruṉa yunytjurringanyi mirrirringkula Yiitjulawana nyinakitja. Tjinguruṉa yunytjurringanyi mantangka kutu nyinakitja. Mantangkaṉa kutu nyinarra ngayulu yunytjurringanyi Katutjaku waarrkaṉa kutu palyantjaku.  
\v 23 Ilta ngayulu puṯu kuliṉi. Ngayulu yilta yunytjurringanyiṉa mirrirringkula Yiitju Kurayitjalawana kutu nyinanytjaku palumpa ngurrangka.  
\v 24 Ngayulu yalatji kuliṉi. Pilipayinya ngurrara tjuṯangka nyurrangarrila, Yiitjuku walytja kutjupa tjuṯangkaṯarra ngayulu Yiitjukuṉu wangka rawa nintinmalpa.  
\v 25 Kala, yalatji ngayulu kuliṉi. Yilta ngayulu tjiilanguru pakara mantangka kutu nyinaku, nyurrangarrinya nintira yaṉṯayaṉṯantjaku, tjukarurrunyurra Yiitjuku kutu nyinanytjaku.  
\v 26 Ngayulu tjiilanguru pakara maa yankula nyurrangarrila tjungurringkula nganaṉa yunypa nyinaku. Nganaṉa tjungu nyinarra nyurrangarri Pilipayinya ngurrara tjuṯangku Yiitju Kurayitjanya yalatji waḻkulku, “Yilta, Yiitju Kurayitjanya palya nyinanyi, paluru Puulanya kutu yaṉṯayaṉṯalpayi, tjiilangka paluru nyinanytjala.”   
\p
\v 27 Wangka ngaatjanyaya kulila! Yaṉangu yuwankarraku nyurrangarri palya nyinanytjaku, Yiitjuku walytja tjukarurru. Yalatjinyurra nyinanytjala yaṉangu tjuṯangku watjalku, “Pala tjuṯa tjukarurru nyinanyi Yiitju Kurayitjaku wangkawana.” Yalatjinyurra tjukarurru nyinanytjala ngayulu tjakulpa kulilku yalatji, “Yiitjuku walytja Pilipayinya ngurrara tjuṯaya palya nyinanyi pikawiya. Tjana yuwankarrangku Yiitjuku wangkawanangku tjukarurru kuliṉi, wangka kutjupawana kulintjawiya.” Tjinguru ngayulu nyurrangarrilakutu yankula tjungurringkuku. Nyurrangarrilawana tjungurringkula ngayulu tjakulpa palunya kulira yunyparriku. Yunyparringkula ngayulu nintingku kulilku yalatji, “Pilipayinya ngurrara tjuṯangku tjungungku Yiitjuku waarrka palyaṉi, kutjupa tjuṯangku Yiitjuku wangka kulira palumpa walytjarrinytjaku.”   
\p
\v 28 Yiitjuku yunytjuwiya tjuṯaku tjanampa wiyanyurra nguḻurrinytjaku, tjana pungkukitjangku watjantjala. Nguḻuwiyanyurra kutu nyinanytjaku. Yalatji nguḻuwiyanyurra nyinarra yalatji kulilku, “Yilta Yiitju Kurayitjalu nganaṉanya rapaṉi, nganaṉa yilta palumpa walytja tjuṯa nyinanyi. Paluru nganaṉanya kanyinmalpa palumpa ngurrangka.” Nguḻuwiyanyurra Pilipayinya ngurrara tjuṯa nyinanytjala tjana nyakula alatji kulilku, “Yiitjuku walytja tjuṯa ilta nguḻuwiya nyinanyi Yiitju Kurayitjalu tjananya rapantjala. Nganaṉa tjanampaṉu wangka Yiitjunyatjarra kulinmara, Katutjalulanya ngula kuutamilara pungkupayingka.”  
\v 29 Yilta Katutjanya nyurrangarrimpa Pilipayinya ngurrara tjuṯaku yunypa nyinanyi, nyurrangarri Yiitju Kurayitjaku walytja nyinanytjala. Paluru kuliṉi Yiitjuku tuunlayiki tjuṯangku nyurrangarrinya pungkupayi. Tjana nyurrangarrinya pungkunytjala yalatjinyurra yunypangku kulintjaku. Nganaṉa Yiitjuku walytjarringkula kutu palumpa tjukarurru nyinaku. Yiitjunya tjana pungkupayi nguwanpa nganaṉanyalpi tjana punganyi, palumpa walytja tjuṯa. Yunypa kutula nyinanytjaku.  
\v 30 Yalatji ngayunyaṯarra Yiitjuku tuunlayiki tjuṯangku pungkupayi. Palunya nguwanpa nyurrangarrinyalpiya pungkupayi. Tjaampalangkunyurra yirriṯi ngayunya nyakupayi, Yiitjuku tuunlayiki tjuṯangku ngayunya pungkunytjala.   
\c 2  
\s1 “Yiitju Kurayitjanya palya nyinangi Katutjaku mayutjurrinytjawiya”  
\p
\v 1 Yiitju Kurayitjalu nyurrangarrinya yaṉṯayaṉṯantjala nyurrangarri yunypa nyinanyi. Katutjaku kurrunpangku nyurranya nintintjala nyurrangarri Yiitjuku walytja tjuṯa palya nyinanyi. Yaṉangu kutjupa tjuṯanyurra kulira ilta yaṉṯayaṉṯalpayi.  
\v 2 Yalatjinyurra palya nyinanytjala ngayulu nyurrangarrimpa yunypa nyinanyi. Ngayulu nyurrangarrimpa puntura yunyparriku nyurrangarri yalatji nyinanytjala. Yiitjuku walytja kutjupa tjuṯaku nyurrangarri yunytjurringkula kalypa nyinanytjaku, palya. Wangka kutjuwananyurra kulira palyantjaku tjaatjingka, wiya tjaampalanyurra wangka kutjupawana kulira pikarrinytjaku, wangka kutjuwananyurra kulira tjukarurru palyantjaku.  
\v 3 Yulytja walytjangku kanyilkitja wiyanyurra yaṉangu kutjupangka ngunytji yinkanytjaku, “Yuwaṉi ngunytji ngayuluṉanta ngalya katirra yunganyi kiin.” Yalatji watjara nyurrangarri tjukarurru katirra yungkunytjaku, litjitjangku kanyintjawiya. Yaṉangu kutjupa tjuṯaku wiyanyurra mayutju nyinakitjangku kulintjaku, waarrkana nguwanpa tjanampanyurra palya nyinanytjaku.  
\v 4 Yuwa, waarrkana nguwanpa nyinarra yaṉangu kutjupa tjuṯanyurra yaṉṯayaṉṯantjaku,  
\v 5 Yiitju Kurayitjalu yaṉangu tjuṯa yaṉṯayaṉṯalpayi nguwanpa waarrkana nguwanpa nyinarra.   
\q1
\v 6-7 Yiitju Kurayitjanya, Katutjanyaṯarra mayutju tiṉa kutjarra ilkaringka nyinangi. Yiitjulungku kuliṉingi yalatji, “Ngayulu wiya ngayuku paapalawana kutu mayutju tiṉa nyinamalpa ngurra ilkaringka, ngayulu mantakutu yankula yaṉangurringkula waarrkana nguwanpa yaṉangu tjuṯawana nyinamalpa.”  
\v 8 Yuwa, Yiitju Kurayitjanya waarrkana nguwanpa nyinapayi. Paluru Katutjaku wangka kulira watiyangka waralyngarala mirrirringu.  
\v 9 Yalatji Yiitjulu Katutjaku wangka kulintjala Katutjalu palunya kanara katirra palumpa ngurrangka mayutju tiṉa nyinatjunu. Paluru yilta mayutju tiṉa nyinanyi, mayutju kutjupa tjuṯangka wirriḻi.  
\v 10 Paluru mayutju tiṉa nyinanyi yuwankarrangku waḻkuntjaku, yaṉangu manta tjuṯawana nyinapayi tjuṯangku, ilkari ngurrara tjuṯangkuṯarra. Yirriṯi mirrirringutja tjuṯangkuṯarra kanarringkulalpiya palunya waḻkulku.  
\v 11 Yuwa, yaṉangu yuwankarrangku yunypangku Yiitju Kurayitjanya waḻkulku yalatji, “Nyuntu yuwankarraku nganampaṯarra mayutju tiṉa yilta nyinanyi.” Yalatjiya Yiitju Kurayitjanya waḻkura paapa Katutjanyaṯarraya waḻkulku.   
\s1 Tjukarurru kutunyurra nyinanytjaku  
\p
\v 12 Pilipayinya ngurrara walytja tjuṯa, kulilaṉiya! Ngayulu nyurrangarrila yirriṯi tjungu nyinanyingka, ngayuku wangkanyurra kulilpayi. Yalatji kuwarri nyurrangarri ngayuku wangka kulintjaku, ngayulu ngurra waṉma nyinanyingka. Rawangkunyurra purinypangku kulintjaku Yiitju Kurayitjaku tjukarurru kutu nyinakitjangku. Yalatji tjukarurru nyinarranyurra palyalpi nyinaku palumpa ngurrangka, kana kutu.  
\v 13 Katutjalu nyurrangarrinya ngulytjura rapalpayi palumpa wangkaku tjukarurru kutunyurra nyinanytjaku.  
\v 14 Yalatji Yiitjuku tjukarurru nyinakitjangku yaṉangu kutjupa tjuṯa yaṉṯayaṉṯantjaku, pikarringkula panypurangkunytjawiyangku.  
\v 15-16 Yalatji tjananya yaṉṯayaṉṯara nyinanytjala nyurrangarri Katutjaku walytja yilta nyinaku, palumpa yuṉṯalpa tjuṯa, katja tjuṯaṯarra. Yaṉangu kuya palyalpayi tjuṯawananyurra nyinanyi. Palunya tjanalawananyurra nyinarra tjukarurru Yiitjuku nyinanytjaku, tjana yalatji nyurrangarrinya watjaltjipingka, “Nyurrangarri Yiitjuku walytja tjuṯa wiya tjukarurru nyinanyi Yiitjuku. Nyurrangarri kuya palyalpayi.” Yuwa, palyanyurra Yiitjuku wangkawana nyinanytjaku, kuya palyalpayi tjuṯangku kulira wangka palunya kulintjaku. Yalatjinyurra tjukarurru kutu nyinanytjala ngayulu ngula nyurrangarrimpa yunypa nyinaku Yiitju Kurayitjanya mantakutu piyuku ngalyananyingka. Ngayulu yalatji kulilku, “Pilipayinya ngurrara tjuṯa Yiitjuku tjukarurru kutu nyinapayi. Ngayulu tjanala Yiitjukuṉu wangka nintintjala yiltaya kulira palumpa walytja kutu nyinanyi. Wiyaṉa tjananya puṯu nintilpayi.”  
\v 17-18 Ngayulu nyurrangarrinya, kutjupa tjuṯaṯarra Yiitjukuṉu wangka nintintjala, nyurrangarri Yiitjuku waarrka palyalpayi Katutjaku tjukarurru nyinakitjangku. Yalatji ngayulu nyurrangarrinya, kutjupa tjuṯaṯarra nintintjala tjinguru kutjupa tjuṯangku ngayunya mirri pungku. Yalatji kulira ngayulu yunypa nyinanyi. Nyurrangarriṯarra yunypa nyinanytjaku ngayunya tjana mirri punganyingka yalatji kulira, “Nganaṉanya nintilpayi paluru wiyarringutjangka nganaṉa kutu yunypa nyinarra Yiitjuku waarrka palyantjaku.”   
\s1 Ngayulu Timitjiyinya Yipaparatatutjanyaṯarra nyurrangarrilakutu wantirriyalku  
\p
\v 19 Yiitju Kurayitjanya mayutju ngayuku nyinanyi. Paluru ngayunya nintintjala ngayulu Timitjiyinya nyurrangarrilakutu wantirriyalku. Ngayulu yunytjurringanyi Timitjiyinya nyurrangarrilakutu yankula nyakula kulintjaku. Nyurrangarrinya nyakula kulira tjakulpa ngalya katirraṉi tjakultjunkunytjaku ngayunya. Tjakulpa palya kulilkitja ngayulu yunytjurringanyi.  
\v 20 Timitjiyilu kutju nyurrangarrimpa rawa tjapilpayi, Pilipayinya ngurrara tjuṯaku.  
\v 21 Kutjupa tjuṯangku walytjangkuyanku kulira nyinapayi, Yiitju Kurayitjaku waarrka tjukarurru palyalkitja kulintjawiya.  
\v 22 Nyurrangarri Timitjiyiku ninti nyinanyi, tjukarurru kutu nyinangutjangka. Yiitjuku waarrka tjungungku ngalitju palyara wangka Yiitjunyatjarra tjakultjurinkupayi, katjararrangku nguwanpa. Yiitjuku walytjarringkula paluru ngayuku katja nguwanpa nyinanyi.  
\v 23 Timitjiyi palunya nyurrangarrilakutu wantirriyalkitjangku ngayulu kuliṉi, kuutawutjuku mayutjungkuṉi watjantjala ngaṉṯi.  
\v 24 Timitjiyinya nyurrangarrilakutu maa yananyingka, ngaṉṯi ngayulu nyurrangarrilakutu maa yankukitjangku kuliṉi, mayutju Yiitjuluṉi yalatji nintintjala.   
\p
\v 25 Wati Yipaparatatutjanya ngayulu nyurrangarrilakutu wantirriyalkitjangku kuliṉi, wati paluru nganampa walytja. Tjungungku ngalitju Katutjaku waarrka palyarinkupayi. Yilta paluru Kurayitjaku waarrkana nyinanyi, ngayunya nguwanpa. Nyurrangarri irriṯi wati palunya ngayulakutu ngalya wantirriyaṉu, yaṉṯayaṉṯantjakuṉi.  
\v 26-27 Kuwarri ngayulu palunya nyurrangarrilakutu wantirriyalku. Yurrunpa wati paluru miiṉṯa puntu mirri nguwanpa ngarringi. Palulanguru Katutjalu yaḻṯururringkula palunya kanaṉu, ngayulu wiḻa kuya nyinatjipingka. Yipaparatatutja paluru watjilpa kutu nyurrampa nyinanyi yalatji kulira, “Pilipayinya ngurrara tjuṯa ngayuku kutu watjilpa nyinanyi, ngayunya miiṉṯa puntukutjura kulira.”   
\p
\v 28 Yuwa, kuwarri ngayulu wati palunya watjalku nyurrangarrilakutu rayitpayiki yankunytjaku. Palunya nyakulanyurra yilta yunyparriku. Paluru miiṉṯa puntu ngarrinyingka ngayulu puntura watjilarripayi. Kala, paluru nyurrangarrilakutu yankula nyinanyingka ngayulu palyalpi nyinaku.  
\v 29-30 Yipaparatatutja paluru Yiitju Kurayitjaku waarrka tjukarurru palyara nguwanpa mirrirringu. Palurulitju Katutjaku waarrka tjungungku palyaṉangi. Nyurrangarri waṉma nyinanyingka wati paluru ngalya yankula tjungungkulitju Katutjaku waarrka palyaṉingi. Paluru nyurrangarrilakutu yankula nyinanyingka palunyanyurra puntura waḻkuntjaku, Yiitjuku waarrka paluru palyaṉutjangka. Yiitjuku waarrka palyalpayi kutjupa tjuṯaṯarra nyurrangarri nyakula puntura waḻkuntjaku.   
\c 3  
\s1 Yiitjuku walytja tjuṯa tjukarurru nyinapayi  
\p
\v 1 Walytja tjuṯa, wangka ngaatjanyanyurra kulintjaku. Kuwarri nyurrangarri mayutju Yiitjuku walytja nyinarra yunypanyurra nyinanytjaku. Ngayulu nyurrangarrinya piyuku wangka palunya nintilku, wiyaṉa purrkarringkula wantiku, piyukuṉa nyurrangarrinya nintilku. Piyuku nyurrangarri wangka palulawana kulira tjukarurru nyinaku.  
\v 2 Muutjaku wangkawana nintilpayi tjuṯangku nintintjala wiyanyurra wangka tjanampaṉu kulintjaku. Tjana yunytjurringanyi nyurrangarri Muutjaku luwuwana watirrinytjaku. Tjana wiyawanangku kuliṉi, yaṉangu wiya Katutjaku kalyparriku Muutjaku luwuwana nyinarra.  
\v 3 Nganaṉa Yiitjuku walytja tjuṯa nyinarra yilta Katutjaku kalyparringu. Katutjaku kurrunpangkulanya nintira rapalpayi Yiitju Kurayitjanya tjukarurru waḻkuntjaku. Nganaṉa kuliṉi, Yiitjuku walytja tjuṯa wiya Muutjaku luwuwana watirrinytjaku. Wiya nganaṉa walytjangku waḻkulpayi yalatji, “Nganaṉa watirringkula Katutjaku tjukarurru nyinanyi.”  
\v 4 Paluru tjana palunya nguwanpa walytjangku waḻkulpayi, ngayulu wiya yalatji walytjangku waḻkulpayi watiṉa nyinarra. Ngayulu Tjuwu tjukarurru nyinapayi. Yalatji nyinarra ngayulu puntura walytjangku puḻkawaṉimara. Nintingku nyurrangarri kulintjaku ngayulu yalatji nyurrangarrinya nintilku.  
\v 5 Pipirri wiimaṉa tjiṉṯu tjapanpala nyinarra ngayulu watirringu, Muutjaku luwu yalatji ngaranytjala. Yitjurilaku walytja ngaṉṯitja yilta ngayulu nyinanyi, palumpa katja Pintjiminakuṉu. Tjuwu yilta ngayulu nyinanyi, ngayuku paapa maamaṯarra Tjuwu nyinanytjala. Paluru kutjarra Muutjaku luwuwana nyinapayi, ngayuku walytja kutjupa tjuṯaṯarra. Ngayulu Paratji nyinarra Tjuwuku luwuwana tjukarurru nyinapayi.  
\v 6 Luwu palulawana tjukarurru nyinakitjangku ngayulu kutu kulira nyinapayi. Luwu palulawana tjukarurru nyinakitjangku ngayulu Yiitjuku walytja tjuṯa katirra tjiilangka tjarrpatjunkupayi. Yalatji ngayulu kulilpayi, “Yiitjuku walytja tjuṯa wiya nganampa luwuwana tjukarurru nyinanyi.”   
\p
\v 7 Ngayuluṉa yalatji kulilpayi, “Ngayulu Tjuwu yilta nyinarra Muutjaku luwuwana tjukarurru nyinanytjala Katutjanyatju yunypa nyinanyi.” Kuwarri wiyaṉa wangka palunya kuliṉi ngayulu Yiitju Kurayitjaku wangkawanalpi nyinanyi.  
\v 8 Paluru ngayuku mayutju nyinanyi. Ngayulu palumpa walytjarringkula puntura yunypa nyinanyi. Luwu palunya wantirra ngayulu yiwarra palyangka nyinanyi. Yiitju Kurayitjaku kutju tjukarurru nyinakitja ngayulu yunytjurringanyi.  
\v 9 Ngayulu yilta palumpa walytja nyinanyi. Katutjalu ngayunya nyakula kulilpayi yalatji, “Puula, nyuntu Yiitjuku walytjarringkula nyinanytjala ngayulu nyuntupa kalyparringkula yunypa nyinanyi.” Ngayulu Muutjaku luwuwana kutu nyinarra wiya Katutjaku kalyparringamara. Katutjanya ngayuku kalypa nyinanyi, ngayulu Yiitjuku walytjarringkula palumpa wangkawana tjukarurru nyinanytjala.  
\v 10 Katutjalu ngangkari tiṉatjarrangku Yiitju Kurayitjanya yirriṯi mirringuru kanaṉu. Ngayulu yunytjurringanyi yalatji Katutjalu ngangkari tiṉatjarrangku ngayunyalpi rapantjaku, ngayulu tjukarurru kutu palumpa nyinanytjaku kuya palyantjawiya. Yiitju Kurayitjanya nganampa mirrirringu kuya waṉinytjaku. Ngayulu yunytjurringanyi kuya palyantjawiya tjukarurru nyinanytjaku.  
\v 11 Yalatji tjukarurru nyinarra ngayulu yalatji kulilku, “Ngayulu ngula wiyarringanyingka Katutjaluṉi ngayunya kanara yaṉṯayaṉṯanmalpa palumpa ngurrangka.”   
\s1 Ngayulu wati riitjarripayi nguwanpa  
\p
\v 12-13 Ngayulu wiya yalatji kuliṉi, “Palyalpiṉa nyinanyi, kuya palyantjawiya.” Ngayuluṉa kutu kuya palyalpayi. Kala, ngayulu yunytjurringanyi Yiitju Kurayitjaku tjukarurru kutu nyinanytjaku. Paluru ngayunya ngulytjuṉu ngayulu palumpa tjukarurru nyinanytjaku. Yuwa, yirriṯi ngayulu puntura kuya palyalpayi. Kala, kuwarri ngayulu yunytjurringanyi tjukarurru kutu nyinakitja.  
\v 14 Wati riitjarripayi wiinarrikitjangku kulilpayi, “Ngayulu puntura yunytjurringanyi wiinarrikitja.” Wati palunya nguwanpa ngayulu puntura yunytjurringanyi Katutjaku ngurrangka nyinakitja. Nganaṉa ngurra palula nyinanytjaku Katutjalu watjaṉu, Yiitju Kurayitjaku nganaṉa walytjarringutjangka.  
\v 15 Nganaṉa Yiitju Kurayitjaku rawa tjukarurru nyinapayi tjuṯangku wangka panyapa tjuṯa kulintjaku. Tjinguru tjaampalangkunyurra yalatji wiyawanangku kuliṉi, “Nganaṉa palyalpi nyinanyi, kuya palyantjawiya.” Tjinguru yalatjinyurra kuliṉingka Katutjalu nyurrangarrinya nintilku tjukarurru yalatji kulintjaku. “Nganaṉa yuwankarrangku kuya palyara nyinapayi.”  
\v 16 Nganaṉa wangka kutjupa kutjupa kulintjawiya, nganaṉa yuwankarra kutu Yiitjuku tjukarurru nyinanytjaku, palumpa wangkawana.   
\p
\v 17 Walytja tjuṯa, wangka ngaatjanyanyurra kulintjaku. Ngayulu tjukarurru nyinanytja nguwanpa, tjukarurrunyurra nyinanytjaku. Nganaṉatju irriṯi nyurrangarrilawana Pilipayila Yiitjuku tjukarurru nyinapayi. Nganaṉatju yalatji tjukarurru nyinapayi nguwanpa kutjupa tjuṯanyurra tjukarurru nyinanyi. Yuwankarranyurra palunya tjananya nguwanpa tjukarurru nyinanytjaku.  
\v 18 Yirriṯi ngayulu nyurrangarrinya watjalpayi yalatji, “Yaṉangu tjuṯaya yurrunpa Yiitju Kurayitjaku tjukarurru nyinarra wiyawanalpiya nyinanyi. Wiyaya kuliṉi Yiitjunya tjanampa waralyngarala mirrirringu kuya waṉikitja, tjana kulira wantipayi.” Ngayulu tjanampa kulira yulapayi. Wangka palunya piyuku ngayulu watjaṉu nyurrangarri yalatji kulintjaku.  
\v 19 Palunya tjananya Katutjalu yilta warungka waṉiku. Paluru tjana kutu kuya palyara nyinapayi. Tjana kutjupaku yungkuwiyangku mangarri tiṉa ngalkupayi. Mani yulytja tiṉa mantjilkitjangku tjana kulira nyinapayi. Paluru tjana kuya palyara walytjangku waḻkulpayi, “Kuwarri nganaṉa palya nyinanyi, kuya palyalpayi tjuṯa.”  
\v 20 Nganaṉa Yiitju Kurayitjaku walytja tjuṯa nyinanyi. Palurulanya watjaṉu yilkaringka katirra nyinatjunkukitjangku palumpa ngurrangka. Yiitjunya kuwarri ngurra palula nyinanyi. Nganaṉa paṯaṉi paluru mantakutu piyuku ngalyankunytjaku. Paluru nganampa mayutju nyinanyi.  
\v 21 Paluru ngangkari tiṉatjarrangku manta yilkariṯarra kanyiṉi. Nganaṉanya kuya palyalpayi tjuṯaṯarra ilta paluru ngula ngangkari tiṉatjarrangku nyinatjunku yaṉangu kutjupalpi, nganaṉa Yiitjunya nguwanpa nyinaku kuya palyantjawiya.   
\c 4  
\p
\v 1 Yuwa, nyurrangarri ngayuku walytja tjuṯa nyinanyi. Ngayulu yunytjurringanyi maa yankula nyurrangarrilawana nyinakitja. Nyurrangarrimpa ngayulu yunypangku watjalpayi, “Pilipayinya ngurrara tjuṯaya Yiitjuku tjukarurru nyinanyi.” Yalatjinyurra kutu mayutju Yiitjuku tjukarurru nyinanytjaku.   
\s1 Yalatjinyurra tjukarurru nyinanytjaku  
\p
\v 2 Kungka kutjarra yini yalatji nyinanyi, Yutiyanya, Tjintikinya. Paluru kutjarrangku Yiitjuku walytjangku wangka ngaatjanya kulintjaku. Nyupali mayutju Yiitjuku walytja kutjarra nyinanyi. Wiya nyupali pikarringkula wangkanytjaku, kalypalpi nyupali wangkarra nyinanytjaku.  
\v 3 Yirriṯi kungka paluru kutjarra, wati Kilimintanya, kutjupa tjuṯaṯarra ngayulawana tjungungku Yiitjuku waarrka palyalpayi. Yini palunya tjuṯaya Katutjaku piipangka ngarrinyi. Yini ngarrinytjala kana kutula nyinamalpa. Wati yini Tjitjikitjalu wangka ngaatjanya kulintjaku. Nyuntu yankula kungka palunya kutjarrangka wangka!, kalyparrinytjaku.   
\p
\v 4 Nyurrangarri wangka ngaatjanya kulintjaku. Mayutju Yiitjuku walytjanyurra nyinarra kutunyurra yunypa nyinanytjaku.  
\v 5 Yaṉangu kutjupa tjuṯakunyurra aḻṯurunytju nyinanytjaku, pikarrinytjawiya, Yiitjuku wangkawana kutju tjukarurru nyinanytjaku, paluru piyuku ngalya yankunytjala.  
\v 6 Puṯu kulira Katutjanya nyurrangarri tjapintjaku, paluru nyurrangarrinya nintintjaku. Katutjalu nyuntunya yurrunpa pukuḻmankunytjala kulira palunya nyuntu waḻkuntjaku. Yurrunpanta nyuntunya yungutja palunya kulira nyuntu waḻkuntjaku. Yalatji waḻkura kutju palunya tjapintjaku.  
\v 7 Nyurrangarri Yiitjuku walytja nyinanytjala Katutjalu nyurrangarrinya pukuḻmanku. Yalatji nyurrangarrinya pukuḻmankunytjala nyurrangarri yunypa Yiitjuku nyinaku.   
\p
\v 8 Walytja tjuṯa, wangka ngaatjanyalpinyurra kulintjaku. Tjukarurru nyurrangarri yalatji kulintjaku, kuya palyalkitjangku kulintjawiya. Kutu tjukarurru nyinakitjangkunyurra kulintjaku. Yalatji tjukarurrunyurra nyinanytjala Katutjanya nyurrangarrimpa yunypa nyinaku. Yaṉangu tjuṯakuṯarra nyurrangarri tjukarurru nyinarra aḻṯurunytju tjanampa nyinanytjaku.  
\v 9 Ngayulu nyurrangarrilawana tjukarurru nyinapayi nguwanpa nyurrangarri tjukarurru nyinanytjaku. Ngayulu nyurrangarrinya nintiṉutja kutju kuliranyurra tjukarurru nyinanytjaku. Yalatjinyurra tjukarurru nyinanytjala Katutjalu nyurrangarrinya pukuḻmara yaṉṯayaṉṯalku.   
\s1 Puulalu watjalku, “Palya nyurrangarri ngayuku mani tjawirrilyi wantirriyaṉu”  
\p
\v 10 Yurrunpa nyurrangarri ngayuku mani yulytjaṯarra wantirriyalpayi. Palulanguru yalatji wantirriyantjawiyalpinyurra nyinangu. Kutunyurra ngayuku kulira yunypa nyinapayi. Kuwarrilpinyurra piyuku mani yulytjaṯarra wantirriyaṉu, palya. Mayutju Yiitju Kurayitjaku walytja ngayulu yunypa nyinanyi. Nyurrangarrimpaṯarra ngayulu yunypa nyinanyi panyapanyurra wantirriyaṉutjangka.  
\v 11-12 Ngayulu wiya panyapa watjaṉu yulytja manikuṯarra puṯu kulira, wiya. Ngayulu kuliṉi yalatji. Mangarri mani wiimatjarra nyinarra ngayulu yunypa nyinapayi. Mangarri mani tiṉatjarra nyinarra ngayulu yunypa nyinapayi.  
\v 13 Mayutju Yiitju Kurayitjaluṉi rapaṉingka tjukarurruṉa Katutjaku waarrka palyanmalpa mani yulytja wiimatjarrangku, tjinguru mani yulytja tiṉatjarrangku.   
\p
\v 14 Palyanyurra panyapa wantirriyaṉu ngayulu ngaangka tjiilangka watjilpa nyinanyingka.  
\v 15 Yirriṯi manta Matjatuniyalawana ngayulu yurrunpa Yiitjuku waarrka palyara ngurra kutjupa tjuṯawana palyarinkupayi. Tjanalawana ngayulu nintirinanyingka, Yiitjuku walytja kutjupa tjuṯangku wiya mani mangarriṯarra wantirriyara yungkupayi, nyurrangarri kutju ngayuku wantirriyara yungkupayi. Ngayulu nyurrangarrila Yiitjuku wangka ngaparrtji nintilpayi. Nyurrangarri Pilipayinya ngurrara tjuṯa yalatjiku ninti nyinanyi.  
\v 16 Ngayulu tjanalawana tawunu Tjitjaluniyangka Yiitjuku waarrka palyaṉingka nyurrangarri kutjarrangara mangarri maniṯarra wantirriyara yungkupayi, ngayuku. Tawunu Tjitjaluniyanya ngurrara tjuṯangku yungamara ngayunya. Tjana wiya ngayunya yungu. Nyurrangarri kutju ngayuku wantirriyara yungkupayi.  
\v 17 Wiya ngayulu manikitjangku watjaṉi. Ngayulu yunytjurringanyi Katutjalu nyurrangarrinya pukuḻmankunytjaku, mani yulytja ngayuku nyurrangarri wantirriyaṉutjangka.   
\p
\v 18 Ngayulu wiya yunytjurringanyi mani tiṉa kutjupaku, naapaṉa kanyiṉi panya nyurrangarri ngayuku yungutjangka. Yipaparatatutjalu palunya ngalya katirra yungu, ngayuku. Mani palunya nyurrangarri tjawirrilyi yungu, ngayulu Katutjaku waarrka palyantjaku. Paluru ilta nyurrangarrimpa yunypa nyinanyi.  
\v 19 Katutjanya ngayulu tjapinmalpa paluru nyurrangarrinya yaṉṯayaṉṯantjaku Yiitju Kurayitjaku walytja tjuṯanyurra nyinanyingka, paluru nyurrangarrinya yilta yaṉṯayaṉṯanmalpa.  
\v 20 Paapa Katutjanya nganaṉa kutu waḻkuntjaku. Yalatji palya ngaranytjaku.   
\s1 Piipa wakara wiyarrikitjangku watjalku  
\p
\v 21-22 Wangka ngaatjanya kutju ngayulu watjalku. Yiitjuku walytja tjuṯangka nyurrangarri watjala yalatji!, “Puulanyangarri nyurrangarrimpa yunypa nyinanyi.” Yiitjuku walytja ngaa ngurrara tjuṯangku, mayutju Yukatjatjaku waarrkana tjuṯangkuṯarra watjaṉu, “Pilipayinya ngurrara tjuṯaku tjanampa wakala! Nganaṉa tjanampa yunypa nyinanyi.”  
\v 23 Mayutju Yiitjunya ngayulu nyurrangarrimpa tjapinmalpa paluru aḻṯururringkula nyurrangarrinya yaṉṯayaṉṯantjaku.