\id EPH eph 
\h Yipitjalakutu 
\toc2 Yipitjalakutu 
\toc1 Yipitjanya Ngurrara Tjuṯaku Wantirriyaṉutja 
\mt1 Yipitjanya Ngurrara Tjuṯaku Wantirriyaṉutja  
\c 1  
\p
\v 1 Ngayulu Puulalu Yipitjanya ngurrara tjuṯaku piipa ngaatjanya wakara wantirriyaṉi, nyurrangarrimpa. Katutjalu yirriṯi watjaṉu ngayulu Yiitju Kurayitjaku waarrkana nyinanytjaku. Ngayulu kuliṉi nyurrangarri tjukarurru nyinanyi Yiitjuku.  
\v 2 Paapa Katutjalu, mayutju Yiitju Kurayitjaluṯarra nyurrangarrinya yaṉṯayaṉṯaṉi, yunypanyurra nyinanytjaku. Ngayuluṉa yunytjurringanyi yalatjiku nyurrangarri yunypa nyinanytjaku.   
\p
\v 3 Mayutju nganampa Yiitju Kurayitjanya nyinanyi. Paapa Katutjalu Yiitjunya palumpa katja ilkaringuru wantirriyaṉu. Palunyalaka puḻkawaṉi!, Yiitjunya nganampa ngalya wantirriyaṉutjangka. Yilta nganaṉa palumpa walytja nyinanyi. Katutjalu nganaṉanya uwankarra yungkula yaṉṯayaṉṯalpayi. Paluru nganaṉanya nyinatjunku ilkaringka kana kutu nyinanytjaku.  
\v 4 Manta ngaranytjawiyangka yurrunpa Katutjalu Yiitju Kurayitjanya watjaṉu yalatji, “Ngula, nyuntu manta ngurrara tjuṯa ngulytjula!, tjana ngayuku walytja tjuṯa tjukarurrulpi nyinanytjaku.”  
\v 5 Yaṉangu tjuṯakulampa yunytju nyinarra Katutjalu Yiitjunya watjaṉu paluru nganaṉanya ngulytjuntjaku, Katutjaku walytja tjuṯalpi nganaṉa nyinanytjaku. Nganaṉa palumpa walytja, katja tjuṯa, yuṉṯalpa tjuṯa nguwanpa nyinanyi.  
\v 6 Katutjanya Yiitjuku yunypa nyinanyi. Yiitju paluru nganaṉanya ngulytjuntjala Katutjanya nganampa aḻṯurulpi nyinanyi. Yalatji kulira nganaṉa Katutjanya puḻkawaṉinytjaku.   
\p
\v 7-8 Kurayitja paluru ngurrka tjutirra mirrirringu, tjiipi tjawirrilyi nguwanpa wakara mirrintanutja. Yalatji paluru mirrirringu nganampa kuya waṉinytjaku. Yalatjilampa kuya waṉirra nganaṉanya paluru ngulytjuṉu. Yuwa, Katutjalu Yiitjunya wantirriyara nganampa punturalpi aḻṯururringkula nyinanyi.  
\v 9-10 Yiitju Kurayitjanya nganampa waralyngarala mirrirringutjangka nganaṉa yalatji nintingku kuliṉi, “Yilta nganampa aḻṯururringkula Katutjalu palumpa katja wantirriyaṉu.” Katutjalu yurrunpa nintingku kuliṉu Yiitju Kurayitjalu palumpa waarrka mantangka palyarinkunytjaku. Yiitju paluru Katutjalu nintintjawanangka palyara ngula piyuku palyanmalpa. Yiitju Kurayitjanyalpi mayutju tiṉa nyinaku ulaataku.   
\p
\v 11 Ngula palyalkitjangku Katutjalu yurrunpa kuliṉu. Yalatji kulira wiya wantipayi. Yalatji kulira tjukarurru palyalpayi. Yalatji Katutjalu yurrunpa kuliṉu Yiitju Kurayitjalu nganaṉanya ngulytjura kanyintjaku. Palulanguru nganaṉatju Tjuwu tjuṯa, palumpa walytja tjuṯa nyinanyi.  
\v 12 Yurrunpa nganaṉanyatju Katutjalu ngulytjuṉu nganaṉatju palunya waḻkuntjaku yalatji kulira, “Katutjalu yirriṯi watjara Yiitju Kurayitjanyalampa ngalya wantirriyalku.”  
\v 13 Nyurrangarriṯarra Tjuwuwiya tjuṯangkulpi wangka Yiitju Kurayitjanyatjarra kulira palumpa walytjarringu. Paluru nyurrangarrimpa kuya waṉingu nyurrangarrinya palumpa ngurrangka kana nyinatjunkukitjangku. Yalatjinyurra ngulytjurrinytjala Katutjalu nyurrangarrila palumpa kurrunpa tjarrpatjunu, yaṉangu tjuṯangku yalatji kulintjaku, “Tjana Katutjaku kurruntjarra nyinanyi, palumpa walytja tjuṯa yilta.”  
\v 14 Katutjaku kurrunpa nganaṉala tjarrpatjunutjangka yalatji nganaṉa kulintjaku, “Palumpa kurrunpa nganaṉala yilta tjarrpangu. Yalatji nganaṉala tjarrpatjunkula yilta nganaṉanya palumpa ngurrangka nyinatjunku, kana kutula nyinaku. Ngurra palula nganaṉa palya nyinamalpa, nganaṉa Katutjanya kututja puḻkawaṉimalpa.”   
\s1 Katutjanya Puulalu waḻkulku  
\p
\v 15-16 Tjakulpa tjuṯaṉa kulilpayi nyurrangarri Yiitju Kurayitjaku tjukarurru nyinapayi. Yalatjiṯarra ngayulu kulilpayi nyurrangarri Yiitjuku walytja kutjupa tjuṯaku yunytju nyinapayi. Tjakulpa yalatjiṉa kuliṉutjangku Katutjanya waḻkulpayi yalatji, “Yipitjanya ngurrara tjuṯa tjukarurru nyinanyi, nyuntu tjananya yaṉṯayaṉṯaṉingka.”  
\v 17 Nganampa mayutju Yiitju Kurayitjaku paapa Katutjanya nyinanyi. Ngayulu Katutjanya nyurrangarrimpa tjapilpayi paluru nyurrangarrila palumpa kurrunpa tjarrpatjunkunytjaku. Kurrunpa palunyatjarrangkunyurra nintingku kulilku Katutjaku tjukarurru nyinakitjangku.  
\v 18 Katutjanya ngayulu tjapilpayi nyurrangarri Yiitjuku wangkaku puntura nintirrinytjaku, palumpa walytja tjuṯanyurra tjukarurru kutu nyinanytjaku. Yalatji nintirringkula nyurrangarri kulilku, “Katutjalu nganaṉanya ngulytjuṉu palumpa walytja tjuṯa nyinanytjaku. Kurayitjaku nganaṉa ngulytjurringkula palumpa ngurrangka nyinamalpa, palya. Ngurra paluru palyalingku ngaranyi.”   
\p
\v 19-20 Nyurrangarri Yipitjanya ngurrara tjuṯangku wangka ngaatjanya kulintjaku. Katutjanya paawu puntu nyinanyi. Paluru nganaṉanya rapaṉi palumpa waarrka nganaṉa palyantjaku. Paawu puntutjarrangku paluru Yiitju Kurayitjanya mirringuru pakaltjingaṉu. Pakaltjingara katirra nyinatjunu palumpa ngurrangka yilkaringka, mayutju tiṉa tjungupula nyinanytjaku.  
\v 21 Ngurra palula Yiitju Kurayitjanya mayutju tiṉa nyinanyi. Paluru yuwankarraku mayutju tiṉa nyinanyi, ilkari ngurrara tjuṯaku, manta ngurrara tjuṯakuṯarra. Ngula mayutju kutjupa tjuṯa nyinaku. Yiitju Kurayitjanya tjanampa mayutju tiṉa nyinaku.  
\v 22 Katutjalu Yiitju Kurayitjanya nyinatjunu yuwankarraku mayutju tiṉa nyinanytjaku, Yiitjuku walytja tjuṯakuṯarra. Paluru ilta nganampa mayutju tiṉa nyinanyi.  
\v 23 Nganaṉa Yiitjuku walytja tjuṯa pamuli kutju palumpa nyinanyi, paluru nganampa tjamu tiṉa nyinanyi. Palurulampa maṯupurra walytja tjuṯaku nyinanyi, yaṉṯayaṉṯalpayi. Palurulanya watjantjala nganaṉa kulira palumpa waarrka palyalpayi.   
\c 2  
\s1 “Yirriṯinyurra kuya palyara nyinapayi”  
\p
\v 1 Yirriṯi nyurrangarri kuya kututja palyara nyinapayi Katutjanya kulintjawiya.  
\v 2 Katutjaku ngurrpa tjuṯangku kuya palyantja nguwanpa nyurrangarri kuya kutu palyalpayi. Mamuku mayutjungku nyurrangarrinya tjingapunganyingka kuliranyurra palyalpayi. Paluru Katutjaku ngurrpa tjuṯaku mayutju tiṉa nyinanyi.  
\v 3 Katutjaku ngurrpa tjuṯa nguwanpa, nganaṉa yurrunpa nyinangi yalatji. Nganaṉa tjaalpangku kutju kulira kuya kutu palyalpayi. Nganaṉa yalatji nyinanytjala Katutjalulampa ngurrkurringkula kuliṉu, “Yipitjanya ngurrara tjuṯa, Puulanyaṯarra ngayulu warungka waṉiku, kuya palyalpayi kutjupa tjuṯaṯarra.”   
\p
\v 4-5 Palunyatjanu Katutjanya nganampa puntura yunytjurringkula yaḻṯururringu. Yaḻṯururringkulalpi paluru kuliṉu, “Ngayulu Yiitju Kurayitjanyaṉa mantakutu wantirriyalku, kuya palyalpayi tjuṯangku palumpa wangka kulira walytjarringkulalpi ngayuku kalyparrinytjaku.” Yalatji Katutjalu nganaṉanya yilta ngulytjura nyinatjunu, aḻṯururringkula.  
\v 6 Yiitju Kurayitjanya mirringuru pakara kana nyinanytja nguwanpa nganaṉa palumpa walytja tjuṯa kana kutu nyinaku palumpa ngurrangka. Ngurra palula nganaṉa mayutju tjuṯa nguwanpa nyinaku, Yiitjulawana. Yalatji Katutjalu watjaṉu nganaṉa Yiitjulawana kana kutu nyinanytjaku.  
\v 7 Yalatji Katutjalu nganaṉanya ngulytjuṉu, yaṉangu tjuṯangku, yaṉangu ngaṉṯitja tjuṯangkuṯarraya yalatji kulintjaku, “Katutjanya yilta aḻṯurunytju nyinanyi nganampa, yaṉangu kutjupa tjuṯakuṯarra. Paluru nganampa aḻṯururringkula palumpa katja Yiitju Kurayitjanya mantakutu ngalya wantirriyaṉu, waralyngarala mirrirringkula kuyalampa waṉinytjaku.”  
\v 8-9 Katutjanyalampa kalyparringkula ngulytjurringu, nganaṉa palumpa wangka Yiitjunyatjarra kulintjala. Yaṉangu Katutjaku ngurrpa tjuṯangku palumpa wangka kulintjawiyangku yaṉangu kutjupa tjuṯangka tjana kututja tjukarurru palyalpayi, pikarrinytjawiya. Tjinguru Katutjanya tjanampa kalyparringkula ngulytjurringu, yilta?, wiya. Tjana wangka Yiitjunyatjarra kulira kutju Katutjaku kalyparringamara. Tjinguru Katutjanya tjanampa kalyparringkula ngulytjurringanyingka, tjana walytjangku puḻkawaṉimara, “Nganaṉa palya kututja nyinanytjala Katutjanyalampa kalyparringkula ngulytjurringu.” Yaṉangu yalatji nyinanytjala wiya Katutjanya kalyparringkula ngulytjurriku, wiya. Tjana Katutjaku wangka Yiitjunyatjarra tjukarurru kulinmara. Palunyatjanu Katutjanya tjanampa kalyparringkula ngulytjurringamara.  
\v 10 Katutjalu kuliṉi nganaṉa Yiitju Kurayitjaku walytjarringkula yaṉangu tjuṯaku tjukarurru palyantjaku, tjanampa palya nyinanytjaku. Nganaṉa yalatji nyinanytjaku paluru Yiitjunya mantakutu wantirriyaṉu.   
\s1 Tjuwu tjuṯa, Tjuwuwiya tjuṯaṯarra palumpa walytja nyinanyi  
\p
\v 11 Tjuwuwiya tjuṯa, kulilaṉiya! Yirriṯi, Tjuwu tjuṯangku nyurrangarrinya nyakula yalatji watjalpayi, “Pala tjuṯaya watirrinytjawiya nyinanyi, Katutjaku ngurrpa. Nganampa watirringutja tjuṯaku Katutjanya yunypa nyinanyi.”  
\v 12 Yirriṯi nyurrangarri Yipitjanya ngurrara tjuṯa, Yiitju Kurayitjaku, Katutjakuṯarra ngurrpa nyinangu. Katutjalu yirriṯi tjananya Yitjurilaku walytja ngaṉṯitja tjuṯa watjaṉu kutu tjananya yaṉṯayaṉṯalkitjangku. Paluru tjanala wiya nyurrangarri tjungurripayi, nyakula tjananya nyurrangarri wantirra watjalpayi, “Pala tjuṯa Tjuwu tjuṯa nyinanyi, nganampa ngulytjuwiya. Katutjalu wiya nganaṉanya yaṉṯayaṉṯalpayi.” Nyurrangarri yilta Katutjaku ngurrpa nyinangi, ngula kana nyinakitjangku puṯu kulira.  
\v 13 Yiitju Kurayitjanyalpi mantakutu ngalya yankula waralyngarala mirrirringu, kuka tjawirrilyi yiluntanutja nguwanpa kuya nyurrangarrimpa waṉinytjaku, kalypalpinyurra Katutjaku nyinanytjaku, palumpa walytja tjuṯalpi.   
\p
\v 14-15 Yipitjanya ngurrara tjuṯa nyurrangarri ninti nyinanyi yalatjiku, Tjuwu tjuṯaya Tjuwuwiya tjuṯaku tuunlayiki nyinanyi. Kuwarri Yiitju Kurayitjaku wangka ngaranyi nganaṉa kulintjaku. Paluru nganaṉanyatju nintilpayi nganaṉatju Tjuwu tjuṯa palumpa walytjarringkula Tjuwuwiya tjuṯaku kalypalpi nyinanytjaku. Muutjaku luwuwana nganaṉatju yirriṯi nyinapayi. Kuwarri nganaṉa kuliṉi Yiitju Kurayitjanya waralyngarala mirrirringutjangkalpi nganaṉa palumpa wangkawanalpila nyinanytjaku, luwu palunya kulintjawiyalpi. Nganaṉatju Tjuwuwiya tjuṯaku palya nyinanytjaku.  
\v 16 Yiitju Kurayitjalu watiyangka mirrirringkula nganaṉanya nintiṉu wiya kutjupa tjuṯaku tuunlayiki nyinanytjaku. Nganaṉa palumpa walytja tjungu nyinanyi, Tjuwu tjuṯa Tjuwuwiya tjuṯaṯarra. Yalatji nyinarra nganaṉa kalypalpi Katutjaku nyinanyi. Yalatji Yiitju Kurayitjalu nganaṉanya nintiṉi.  
\v 17-18 Yuwa, yirriṯi nyurrangarri Yipitjanya ngurrara tjuṯa Tjuwuwiya Katutjaku wangkaku ngurrpa nyinapayi, kanya nganaṉatju Tjuwu tjuṯa Katutjaku wangkaku ninti nyinapayi. Yiitju Kurayitjalu mantakutu ngalya yankula yaṉangu tjuṯa nintilpayi Katutjaku kalypalpi nyinanytjaku, yaṉangu kutjupa tjuṯakuṯarra kalypa nyinanytjaku. Paluru tjananya yalatji nintiṉu nyurrangarri kulintjaku, Tjuwu tjuṯangkuṯarralatju kulintjaku. Yiitjulu waralyngarala mirrirringkula nganaṉanya ngulytjuṉutjangka nganaṉa Katutjaku kalypalpi nyinanyi, Tjuwuwiya tjuṯa Tjuwu tjuṯaṯarra.   
\p
\v 19 Nganaṉatju Tjuwu tjuṯa Yiitjuku walytjarringkula Katutjaku walytja tjuṯa nyinanyi. Nyurrangarri Tjuwuwiya tjuṯa Yiitjuku walytjarringkulalpi Katutjaku walytja nyinanyi, mungutjawiya. Nganaṉa Katutjaku pamuli nyinanyi, palumpa walytja.  
\v 20-22 Yara ngaatjanyaya kulila! Kaaka tjuṯa nyinaku. Kaaka yurruntitja mayutju tjanampa nyinaku, mayutju Yiitjunya nguwanpa. Palumpa maḻanypa tjuṯa nyinaku, Yiitjuku kutunguḻu tjuṯa nguwanpa. Katja yuṉṯalpa tjuṯa tjanampa nyinaku. Katja yuṉṯalpa paluru tjana nguwanpa nganaṉatju Tjuwu tjuṯa nyinanyi. Katja yuṉṯalpa kutjupa tjuṯa tjanampa nyinaku. Palunya tjananya nguwanpa Tjuwuwiya tjuṯa nyurrangarri nyinanyi. Yalatji nganaṉa Yiitjuku pamuli nyinanyi Yiitjulu nganampa mayutjungku nganaṉanya yaṉṯayaṉṯaṉi nganaṉa palumpa wangka kulira nintirringkunytjaku, Katutjaku kutju walytja tjuṯa nganaṉa nyinaku, palumpa kurrunpatjarra.   
\c 3  
\s1 Puulalu watjalku, “Tjuwuwiya tjuṯawana ngayulu tjakultjurinkupayi”  
\p
\v 1 Ngayulu kuwarri tjiilangka nyinanyi. Yiitju Kurayitjaku waarrka ngayulu nyurrangarrila Tjuwuwiya tjuṯangka palyantjala, ngayunyaṉiya tjana witira tjiilangka tjarrpatjunu.  
\v 2 Nyurrangarri Yipitjanya ngurrara tjuṯa ninti nyinanyi Katutjalu ngayunya yaḻṯururringkula watjaṉu, palumpa waarrka nyurrangarrilawana palyantjaku.  
\v 3-4 Wangka Yiitju Kurayitjanyatjarraku yaṉangu kutjupa tjuṯa ngurrpa nyinapayi. Katutjalu ngayunyalpi wangka palunya nintiṉu. Wangka panyapa Katutjalu nintiṉutja ngayulu piipa ngaangka wakaṉi. Piipa ngaatja riitarringkula nyurrangarri kulilku yalatji, “Yiitju Kurayitjakuṉu wangkaku Puulanya ninti nyinanyi.”  
\v 5 Yirriṯi yaṉangu yuwankarra ngurrpa nyinapayi wangka Kurayitjanyatjarraku. Wiya Katutjalu tjananya yirriṯitja tjuṯa nintiṉu. Yiitjunya mantangka nyinanytjala ngaṉṯilpilanyatju Katutjaku kurrunpangku nintiṉu Yiitjuku waarrkana tjuṯangka, Katutjaku wangka watjalpayi tjuṯangkaṯarra.  
\v 6 Wangka Kurayitjanyatjarra yalatji ngaranyi. Katutjalu yirriṯi watjaṉu, Yiitju Kurayitjanya mantangka yaṉangu tjuṯaku mayutju nyinatjunkukitjangku. Irriṯi Yiitjunya ngalyankunytjala nganaṉatju Tjuwu tjuṯangku kulilpayi. Tjuwuwiya tjuṯangkuṯarra palumpa wangka kulira walytjarringkupayi. Yiitju Kurayitjaku walytjarringkula nganaṉa tjungu Katutjaku walytja tjuṯa nyinanyi, Tjuwu tjuṯa, Tjuwuwiya tjuṯaṯarra.   
\p
\v 7 Katutjaluṉi yaḻṯururringkula watjaṉu ngayulu palumpa waarrkana nyinanytjaku. Paluruṉi rapaṉu palumpa wangkaṉa ngurra tjuṯawana tjakultjunkunytjaku.  
\v 8 Katutjaku walytja kutjupa tjuṯa ngayula munkarra nyinanyi Yiitjuku walytja tjana rawa tjukarurru nyinapayi. Ngayulu rawa wiya palumpa walytja nyinapayi, wiyawana ngayulu palumpa walytja tjuṯa tjiilangka tjarrpatjunkupayi. Katutjalu ngayunya yaḻṯururringkula watjaṉu Tjuwuwiya tjuṯawana wangka Yiitjunyatjarra tjakultjunkunytjaku yalatji. Yiitju Kurayitjanyalampa mayutju palyalingku nyinanyi. Paluru kuyalampa ilta waṉipayi, nganaṉanya paluru yuwankarra yaṉṯayaṉṯaṉi.  
\v 9 Katutja paluru ngayunya watjaṉu yaṉangu tjuṯangka ngayulu nintintjaku, palumpaṉu wangka Yiitjunyatjarra. Katutjanya yilta mayutju tiṉa nyinanyi, yuwankarra palyalpayi. Katutja paluru wiya yurrunpa tjanala yaṉangu tjuṯangka wangka palunya yutiṉu. Paluru wangka palunya yarrkatjunkula wantingu,  
\v 10 nganaṉa palumpa walytja tjuṯangku kuwarri kutju wangka palunya yutitjalpi kulintjaku. Katutjalu kuliṉu kutjupa tjuṯangkuṯarra wangka palunya yutitjalpi kulintjaku. Nganaluya kulintjaku?, nyaḻpitjarra tjuṯangkuṯarra. Paluru tjana yalatji kuliṉingi, “Katutjanya palya nyinanyi, paluru munkarra kulilpayi. Paluru nintingku Yiitju Kurayitjanya mantakutu wantirriyaṉu yaṉangu tjuṯaku tjanampa kuya waṉinytjaku. Paluru tjananya yaḻṯururringkula ngulytjuṉu.” Yalatji nyaḻpitjarra tjuṯangku, nyakula kulintjaku Katutjanya yunytjurringu.   
\p
\v 11 Katutjalu wangka palulawana kulira yilta Yiitju Kurayitjanya mantakutu wantirriyaṉu. Wantirriyaṉutja paluru nganampa mayutjulpi nyinanyi. Yiitju paluru Katutjaku wangka kulira waralyngarala mirrirringu kuyalampa waṉinytjaku. Yalatji nganampa kuya waṉinytjaku Katutjalu yurrunpa kuliṉu.  
\v 12 Yiitju Kurayitjaku wangka nganaṉa kulira walytjarringkula Katutjaku kalypalpi nyinanyi. Nganaṉa nguḻuwiyangku palunya tjapintjaku.  
\v 13 Yalatji kuliranyurra yunypa nyinanytjaku. Tjiilangkaṉa nyinanyingka wiyanyurra ngayuku watjilpa nyinanytjaku. Yipitjanya ngurrara tjuṯa, yalatjiya kulila! Ngayulu nyurrangarrila Yiitjukuṉu wangka tjakultjunkunytjala nyurrangarri kuwarri palumpa walytja tjuṯa nyinanyi. Yalatji kulira ngayulu watjilpawiya nyinanyi, yunypa.   
\s1 Yiitju Kurayitjanya nganampa yunytju nyinanyi  
\p
\v 14-16 Katutjanya mayutju palyalingku nyinanyi yilta. Paluru ngangkari tiṉatjarrangku ilkari ngurrara tjuṯa manta ngurrara tjuṯaṯarra kana kanyiṉi. Ngayulu paapa Katutjanya tjapilpayi palumpa kurrunpangku nyurrangarrinya rapantjaku, tjukarurrunyurra Yiitjuku nyinanytjaku.  
\v 17-18 Paapa Katutjanya ngayulu yalatji tjapilpayi, nyurrangarri Yiitju Kurayitjaku walytja kutu nyinanytjala Yiitjuku kurrunpa nyurrangarrila tjarrparra nyinanytjaku. Palumpa kurrunpatjarranyurra tjukarurru kutu palumpa nyinanytjaku. Nyurrangarri, Katutjaku walytja kutjupa tjuṯangkuṯarra yalatji kulintjaku, “Yiitjunya ilta nganampa puntura yunytjurringu, palulanguru watiyangka waralyngarala mirrirringu nganampa kuya waṉinytjaku. Wiya palurulanya kuyatjarra wantingu warukutu waṉinytjaku, wiya. Puntura yunytju nganampa nyinarra paluru mirrirringu.”  
\v 19 Yuwa, paluru ilta nganampa puntura kutu yunytju nyinanyi. Ngayulu yunytjurringanyi nyurrangarri kutu nintirringkunytjaku Yiitjuku, nganampa puntura yunytju nyinapayiku. Yilta paluru yaṉangu tjuṯaku puntura yunytju nyinapayi. Palunya nguwanpa nganaṉa yaṉangu tjuṯaku puntura yunytju nyinanytjaku.   
\p
\v 20-21 Nganaṉa, Yiitjuku walytja kutjupa tjuṯangkuṯarra Katutjanya kutu puḻkawaṉinytjaku, Yiitjulu nganampa kuya waṉingutjangka. Katutjalu ilta ngangkari puntutjarrangku ngananya kutu yaṉṯayaṉṯalpayi. Paluru nganaṉanya kulira mangarri kuka, walytja tjuṯaṯarra yungkupayi, nganaṉa tjapintjawiyangka. Nganaṉa yalatji kulira kutu palunya waḻkuntjaku. Alatji palya.   
\c 4  
\s1 Yiitjuku walytja nganaṉa pamuli nyinanyi  
\p
\v 1 Yiitjuku waarrka ngayulu palyarinkunytjala tjana ngayunya witira tjiilangka tjarrpatjunu. Kutuṉa tjiilangka nyinarra nyurrangarrinya pinangkatjunanyi Yiitjuku tjukarurru nyinanytjaku. Katutjalu nyurrangarrinya ngulytjuṉu tjukarurru palumpa nyinanytjaku.  
\v 2 Yuwa, yalatji nyurrangarri tjukarurru nyinarra yaṉangu kutjupa tjuṯaku palya nyinanytjaku, pikarrinytjawiya. Wiya nyurrangarri walytjangku puḻkawaṉinytjaku, rikiniwiya. Kutjupa tjuṯaku nyurrangarri yunytjurringkula nyinanytjaku. Nyurrangarri palya kutu tjanampa nyinanytjaku parrpaṯu wayilarrinytjawiya.  
\v 3 Kutjupa tjuṯakunyurra kalypa nyinanytjaku, Katutjaku kurrunpangku nintintjala kulira. Kurrunpa palurulanya nintilpayi kalypa nyinanytjaku.  
\v 4-6 Yiitjuku walytja tjuṯanyurra pamuli nyinanyi. Pamuli palya nguwanpanyurra kalypa nyinanytjaku. Nganaṉa yuwankarrangku papatatji mantjira pamuli palumpa nyinanyi. Nganaṉa uwankarra Yiitjuku wangka kulira nyinanyi. Nganaṉa yuwankarra paṯaṉi Yiitjulawana palumpa ngurrangka nyinakitja. Nganaṉa kalypa nyinanytjaku. Katutjaku kurrunpa walytjalampa nyinanyi, Yiitju Kurayitjanyalampa walytja nyinanyi. Katutjanyalampa walytja nyinanyi nganampa paapa. Paluru nganaṉanya ngulytjuṉu. Paluru mayutju tiṉa yaṉangu yuwankarraku nyinanyi, palumpa ngurrpa tjuṯakuṯarra. Paluru yaṉangu yuwankarra yaṉṯayaṉṯalpayi.   
\p
\v 7 Ngangkari nguwanpa Kurayitjalulanya yunyparringkula tjarrpatjunu, nganaṉa kutjuṯu kutjuṯungku palumpa waarrka palyarinkunytjaku.  
\v 8 Yalatji nganaṉala ngangkari nguwanpa tjarrpatjunkunytjaku, Katutjaku wangka yirriṯi tjunutja ngarrinyi yalatji,  
\q1 “Mayutju paluru katukutu kaḻparra katiku tjananya puritjina tjuṯa. Paluru tjananya kaḻparra katikitjangku yaṉangu tjuṯangka ngangkari nguwanpa tjarrpatjunamalpa.”   
\p
\v 9 Wangka panyapa ngarrinyi yalatji, “Katukutu kaḻparra tjananya katikukunyu.” Yalatjila kulintjaku yurrunpa Kurayitjanya tjarukatingu manta yunngukutu.  
\v 10 Paluru tjarukatirra piyuku katukutu kaḻpangu ilkaringka wirriḻi, yuwankarraku mayutju nyinakitja, ilkaringka nyinapayi tjuṯakuṯarra.   
\p
\v 11 Wangka panyapa ngaranyi yalatji, “Yaṉangu tjuṯangka ngangkari nguwanpa tjanala tjarrpatjunkukunyu.” Kurayitjalulampa palumpa walytja tjuṯangka ngangkari nguwanpa tjarrpatjunu Katutjaku waarrkala palyantjaku. Kutjupa tjuṯangka tjanala paluru tjarrpatjunu palumpa waarrkana tuwalpala nyinanytjaku. Kutjupa tjuṯangka nganaṉala ngangkari nguwanpa tjarrpatjunu palumpa wangka kulira tjakultjunkunytjaku. Kutjupa tjuṯangka nganaṉala tjarrpatjunu Yiitju Kurayitjaku wangka ngurra tjuṯawana tjakultjurinkunytjaku. Kutjupa tjuṯangka nganaṉala ngangkari nguwanpa tjarrpatjunu ingkaṯa nyinanytjaku. Kutjupa tjuṯangka nganaṉala tjarrpatjunu palumpa wangka tjukarurru nintintjaku.  
\v 12 Yalatji nganaṉala kutjuṯu kutjuṯungka ngangkari nguwanpa tjarrpatjunu Yiitjuku walytja kutjupa tjuṯaṯarra nintira rapantjaku, tjana tjukarurru nyinarra palumpa waarrka palyantjaku.  
\v 13 Nganaṉa Yiitjukuṉu wangkawana nintirringkula nganaṉa pamuli palya nyinaku kalypa. Nganaṉa yuwankarrangku kulilku yalatji, “Nganaṉa yuwankarra palumpa wangkaku nintirringkula tjukarurru kutu nyinanytjaku, Yiitju Kurayitjaku, Katutjaku katjaku. Paluru tjukarurru nyinanytja nguwanpa nganaṉa tjukarurru nyinaku.”   
\p
\v 14 Katutjaku wangka wiyawana nintilpayi tjuṯa wiya nganaṉa kulintjaku. Nganaṉa wangka tjanampa kulira wantinytjaku.  
\v 15-16 Wiyawana nintilpayi tjuṯaku nganaṉa palya tjanampa nyinanytjaku pikarrinytjawiya. Nganaṉa tjanala purinypa wangkarra nintintjaku wangka Yiitjunyatjarra. Nganaṉa palya tjanampa nyinanytjaku, Yiitjunya nguwanpa. Paluru wiyawana kulilpayi tjuṯaku palya nyinapayi. Paluru ilta nganampa mayutju palya nyinanyi, nganampa tjamu tiṉa. Palurulanya palumpa walytja ngaṉṯitja tjuṯa nintiṉi palumpa waarrka nganaṉa palyantjaku, palumpa walytja kutjupa tjuṯaku kalyparringkula yunytju nyinarra.   
\s1 Wiya nganaṉa Katutjaku ngurrpa nguwanpa nyinanytjaku  
\p
\v 17 Ngayulu nyurrangarrinya Yipitjanya ngurrara tjuṯa Kurayitjaku walytjangku pinangkatjunanyi. Wiyanyurra Katutjaku ngurrpa nguwanpa nyinanytjaku.  
\v 18-19 Paluru tjana Katutjaku ngurrpa tjuṯangku wiyawana kulira kuya palyara nyinapayi. Tjana Katutjaku wangka wantirra wiyawana nyinanyi, wiya tjana Katutjaku ngurrangka kana nyinaku, wiya. Paluru tjana puṯu kuliṉi tjukarurru nyinakitjangku. Tjana miiṯa walytjawiyawanangka kutu kuya palyalpayi. Miiṯamiiṯawanaya ngarrikitja kulira nyinapayi. Yalatjiya kuya palyara tjana wiya kuṉṯarripayi.   
\p
\v 20-21 Tjinguru ngayulu nyurrangarrinya yalatji nguwanpa nyinanytjaku yurrunpa nintilpayi?, wiya. Ngayulu nyurrangarrinya wangka tjukarurru Yiitjunyatjarra nintilpayi. Nyurrangarri wangka palunya kulira ilta palumpa walytjarringu.  
\v 22 Ngayulu nyurrangarrinya yalatji nintilpayi. Yirriṯi nyurrangarri wiyawana kulira kuya palyara kutu nyinapayi. Yiitjuku walytjarringkula wiya yalatji kutu nyurrangarri kuya palyara nyinanytjaku.  
\v 23-24 Katutjanyaya tjapila!, palumpa kurrunpangku nyurrangarrinya nintintjaku, tjukarurrulpinyurra Katutjaku nyinanytjaku. Yirriṯi Katutjalu nyurrangarrinya mantangka nyinatjunkukitjangku kuliṉu yalatji, “Yaṉangu ngaa tjuṯa mantangka nyinarra ngayunya nguwanpa tjukarurru nyinanytjaku.” Wangka palunya nguwanpa nyurrangarri yilta Katutjaku tjukarurru nyinanytjaku, ngunytjiwana wiya.   
\p
\v 25 Nganaṉa yuwankarra Yiitjuku walytja tjuṯa, Katutjaku pamuli nyinanyi. Wiya nganaṉa walytja kutjupangka ngunytjinytjunkunytjaku, nganaṉa tjukarurru wangkanytjaku.  
\v 26-27 Yiitjuku walytja kutjupaku ngurrkurringkula wiya nyuntu pikarrinytjaku. Ngurrkurringkula nyuntu yankula yaṉangu palula piyuku kalypa wangkanytjaku. Wiya nyuntu rawa nyinanytjaku kalypa wangkanytjawiya, mamungku nyuntunya tjingapungkunytjala, nyuntu yalatji kuliltjipingka, “Ngayulu yaṉangu palunya yankula pungku.” Nyuntu nyinarra yalatji kulintjawiya. Rawawiya nyinarra nyuntu yankula kalypa wangkanytjaku.   
\p
\v 28 Kutjupa tjuṯangkunyurra yirriṯi waarrkawiyangku mulyaṯangku mani yulytjaṯarra mantjilpayi, tjalamilara mangarri kuka payimilalkitjangku. Yiitjuku walytjarringkula wiyanyurra yalatji nguwanpa mulyaṯangku mantjintjaku. Tjukarurrulpinyurra nyinarra waarrkarrinytjaku maniku. Yalatji mani mantjiranyurra mangarri kuka yulytjaṯarra walytja payimilara kanyilku. Yalatji kanyiranyurra maralpa tjuṯaku yungkunytjaku.   
\p
\v 29 Wati tjuṯa, wangka ngaatjanyaya kulila! Tjungurringkula wiyanyurra kungka kutjupangka kuya palyalkitja wangkanytjaku. Yara palyanyurra wangkanytjaku. Kungka tjuṯa, wangka ngaatjanyaya kulila! Tjungurringkula wiyanyurra wati kutjupangka kuya palyalkitja wangkanytjaku. Tjungurringkula yalatji wiya nyurrangarri wangkanytjaku. Tjungurringkula wangka palya kutjunyurra wangkanytjaku, kutjupangku yalatji kulintjaku, “Yuwa palyanyurra wangkangu, nganaṉa yalatji palya nyinanytjaku.”   
\p
\v 30 Nyurrangarri Yiitjuku walytjarringkula Katutjaku kurrunpatjarra nyinanyi. Paluru nganaṉanya nintilpayi tjukarurru nyinanytjaku. Palurunta yalatji nintintjala tjinguru nyuntu kulira wantiku. Nyuntu kulira wantinytjala paluru watjilpa nyinapayi. Katutjaku kurrunpa paluru yalatji watjilpa nyinatjipingka nyuntu palumpa wangka kulira tjukarurru nyinanytjaku. Kurrunpa palurulanya nintilpayi yalatji, “Nyuntu Yiitjuku walytja nyinanytjala Katutjalunta katirra nyinatjunku palumpa ngurrangka. Ngurra palula nyuntu kuya palyalwiyalpi nyinamalpa.”   
\p
\v 31-32 Nyurrangarri tjukarurru nyinanytjaku yalatji. Yaṉangu kutjupaku ngurrkurringkula wiya nyuntu yunytjuwiya palumpa kutu nyinanytjaku, kalyparringkula nyuntu palumpa palya nyinanytjaku, kaangkinytji. Yaṉangu kutjupaku nyuntu wiya pikarringkula wangkanytjaku, nyuntu palumpa kalyparringkula palya nyinanytjaku, kaangkinytji. Wiyanyurra tjungurringkula tjaalymara wangkanytjaku yaṉangu kutjupa panypurangkukitja. Yaṉangu kutjupangkunta kuya palyantjala, nyuntu wiya palumpa tuunlayiki nyinanytjaku, nyuntu palumpa kalyparringkula nyinanytjaku Katutjanya nguwanpa. Nyuntu Yiitju Kurayitjaku walytjarrinytjala Katutjanya nyuntupa kalyparringu. Kalyparringkula, kaangkinytjilpi nyuntupa nyinanyi.   
\c 5  
\s1 Yiitjuku tilingka nguwanpanyurra ninti nyinanyi  
\p
\v 1 Nyurrangarri Katutjaku walytja tjuṯa nyinanyi. Katutjanya nyurrangarrimpa kalypa nyinanyi. Nyurrangarri yaṉangu kutjupa tjuṯaku yalatji kalypa nyinanytjaku, Katutjanya nguwanpa.  
\v 2 Yaṉangu kutjupa tjuṯaku nyurrangarri yunytju nyinanytjaku. Yalatji Yiitju Kurayitjanyalampa yunytju nyinarra watiyangka waralyngarala tjawirrilyi tjiipi nguwanpa mirrirringu, nganaṉa katirra Katutjaku tjunutja nguwanpa. Katutjalu tjawirrilyi palunya yini Yiitjunya nyakula yunyparringkula nganampa kuya waṉingu.   
\p
\v 3 Katutjaku walytja tjuṯanyurra nyinanyi. Katutjanya nguwanpanyurra tjukarurru nyinanytjaku. Wiyanyurra miiṯa walytjawiyangka kuya palyantjaku. Wiya nyurrangarri yalatji kuya palyalkitjangku kulintjaku. Mani yulytja tiṉa kanyilkitjangku wiyanyurra kulira yunytjurringkula nyinanytjaku. Mangarri kuka tiṉa wiyanyurra yungkuwiyangku ngalkuntjaku yaṉangu kutjupa tjuṯanyurra nyakula yungkunytjaku.  
\v 4 Yaṉangu kutjupa warrkinytjawiyanyurra nyinanytjaku. Wiya nyurrangarri tjungurringkula kutu wangkanytjaku miiṯamiiṯangka ngarrikitja. Tjungurringkula Katutjaku wangkawananyurra tjukarurru wangkarra Katutjanya waḻkuntjaku.  
\v 5 Wangka ngaatjanyaya kulila! Wangka palulawana kuya palyalpayi tjuṯa wiya Katutjaku walytja tjuṯaya nyinanyi, wiya tjana Yiitju Kurayitjaku walytja nyinanyi. Paluru tjana wiya Katutjanya yunyparringkula waḻkulpayi, Katutjaku wangka tjana wantirra kuya palyalkitja yunyparringkupayi. Tjana maniku, mangarriku miiṯa kutjupaku yunyparringkula nyinapayi, Katutjaku wiya.   
\p
\v 6 Paluru tjana tjinguru watjalku yalatji, “Nganaṉa Yiitjuku walytja tjuṯa palya tjungurringkula wangkanytjaku miiṯatjarra ngarrikitja. Palya nganaṉa miiṯa kutjupa kutjupa kanyintjaku. Palya nganaṉa mangarri kuka tiṉaṯarra yungkuwiyangku ngalkunytjaku, kutjupa tjuṯa paḻtjalwiyangku.” Wangka palunya tjana yalatji wiyawanangku kuliṉi. Yalatji tjana kuya palyantjala Katutjalu tjananya ngula kuutamilara payilku.  
\v 7 Palula tjanalawana wiya nyurrangarri tjungurrinytjaku, wantiya!   
\p
\v 8 Irriṯi nyurrangarri Katutjaku ngurrpa nyinangu kuya palyalpayi tjuṯa. Kuwarri nyurrangarri Yiitju Kurayitjaku walytjarringkulalpi Katutjaku nintilpi nyinanyi. Yiitju paluru ilta nganampa mayutju nyinanyi. Katutjaku nintirringkula nyurrangarri palumpa tjukarurru nyinanytjaku.  
\v 9 Yalatji tjukarurru nyinanytjaku. Yaṉangu kutjupa tjuṯaku palya nyinanytjaku, pikarrinytjawiya. Yaṉangu kutjupaku palyalkitjangku tjukarurru watjara palyantjaku, wantinytjawiyangku.  
\v 10 Mayutju Yiitjuku nyurrangarri tjukarurru nyinanytjaku ngunytjinytjunkunytjawiya.  
\v 11 Yiitju Kurayitjaku ngurrpa tjuṯangkuya tjaalpangku kuya palyalpayi, kutjupa tjuṯangku nyakupayingka. Yalatji wiyanyurra tjanala tjungurringkula kuya palyantjaku, wantinytjaku. Tjana yalatji kuya palyantjala, marrkula tjananya!, wantinytjakuya, tjukarurrulpiya nyinanytjaku.  
\v 12 Paluru tjana tjaalpangku kuya puntu palyalpayi. Yaṉangu kutjupangku tjakulpa kulira yilta puntura kuṉṯarringkula yalatji kulilpayi, “Kuya puntu paluru palyaṉi.”  
\v 13-14 Nganaṉa Yiitju Kurayitjakuṉu wangkaku nintirringkula nganaṉa yalatji kuliṉi, “Paluru tjana tjaalpangku kuya puntu palyalpayi.” Yalatji Katutjaku wangka yirriṯi wakara tjunutja ngarrinyi.  
\q1 “Kuya palyara nyinapayi tjuṯangkunyurra Kurayitjakuṉu wangkalpi kulintjaku.”   
\p
\v 15-17 Walytja tjuṯa, kulilaṉiya! Yiitju Kurayitjaku wangka nintirringkula nyurrangarri palumpa tjukarurru nyinanytjaku, wiya Katutjaku ngurrpa tjuṯa nguwanpa nyinanytjaku. Kuwarri ilta kuya palyara nyinapayi tjuṯa nyinanyi. Tjanala tjungurrinytjawiya nyurrangarri Yiitju Kurayitjanya tjapila yalatji!, “Nyuntupa waarrka nyaa nguwanpaṉa ngayulu palyalku? Nintilaṉi!, ngayulu waarrka palunya tjukarurru nyuntupa palyantjaku.” Yalatjiku nintirringkula nyurrangarri palumpa waarrka palyantjaku.  
\v 18 Waama tjikira turaangkarrinytjawiyaya nyinama! Kutu turaangkarringkula nyinarra yaṉangu tiltirrmankupayi. Wiyanyurra waamaku kutju kulira nyinanytjaku, Katutjaku kurrunpaku kutjunyurra tjukarurru kulira nyinanytjaku. Kurrunpa paluru nyurranya nintintjala yalatjinyurra palyara tjukarurru nyinanytjaku.  
\v 19 Nyurrangarri tjungurringkula Katutjaku tuḻkungka warrantjaku Katutjanya waḻkulkitjangku. Tuḻku kuwarritja tjuṯa anta irriṯitja tjuṯaṯarranyurra warrantjaku, tuḻku mayutju Tapitalu wakaṉutja tjuṯaṯarra palyanyurra warrantjaku.  
\v 20 Yiitju Kurayitjanya nganampa mayutju nyinanyingka nganaṉa kuṉṯarrinytjawiyangku kutu paapa Katutjanya waḻkuntjaku yalatji, “Nyuntu nganaṉanyatju yaṉṯayaṉṯara yuwankarra yungkupayi. Nganaṉatju nyuntunya waḻkuṉi.”   
\s1 Miiṯararrapula yalatji nyinanytjaku  
\p
\v 21 Yiitju Kurayitjaku walytja kutjarra nyupali nyinanyi miiṯararra. Palya nyupali tjungu nyinanytjaku pikarrinytjawiya. Kungkangku watjantjala watingku kulira palyantjaku. Watingku watjantjala kungkangku kulira palyantjaku.  
\v 22 Kungka miiṯatjarra tjuṯangkunyurra yalatji kulintjaku. Mayutju Kurayitjakunyurra tjukarurru nyinanyi, palumpa wangka kulira. Palunya nguwanpa nyuntupa miiṯaku wangka kulira tjukarurru nyinanytjaku.  
\v 23 Kungka miiṯatjarra tjuṯangkunyurra yalatji piyuku kulintjaku. Mayutju Kurayitjalu nganaṉanya palumpa walytja tjuṯa yaṉṯayaṉṯaṉi. Palunya nguwanpa wati miiṯatjarrangku mayutjungku miiṯa walytja yaṉṯayaṉṯantjaku. Yiitju Kurayitjanya yaṉangu tjuṯangka munkarralingku mayutju tiṉa nyinanyi paluru nganaṉanya ngulytjura kanyinmalpa palumpa ngurrangka.  
\v 24 Wangka palunya nguwanpa kungka miiṯatjarra tjuṯangku miiṯa walytjaku wangka kulira nyinanytjaku, nganaṉa mayutju Yiitjuku wangka kulira nyinapayi nguwanpa.  
\v 25 Wati miiṯatjarra tjuṯangku wangka ngaatjanya kulintjaku. Yiitju Kurayitjalu nganaṉanya palumpa walytja tjuṯa kutu yaṉṯayaṉṯalkitja yunytju nyinarra mirrirringu. Yalatji nguwanpa nyurrangarri miiṯa walytja kutu yaṉṯayaṉṯalkitja yunytju nyinanytjaku.  
\v 26 Paluru watjaṉu palumpa walytja tjuṯa papatatjimilantjaku wangka yalatji watjara, “Ngayuluṉanta papatatjimilaṉi. Mayutju nyuntupa nyinanyi yini yalatji, paapa Katutjanya, palumpa katja, palumpa kurrunpaṯarra.” Paluru yalatji watjaṉu tjana papatatji mantjira Katutjaku walytja tjuṯalpiya nyinanytjaku.  
\v 27 Yiitju Kurayitjalu panyapa watjara yalatji kuliṉu, “Ngayuku walytja tjuṯaya palya nyinaku, tjukarurru kutu.”   
\p
\v 28-30 Wati miiṯatjarra tjuṯangku wangka ngaatjanya kulintjaku. Nganaṉa wiya walytjangkulanku pungkupayi yayinatjarrangkupaka marangku, nganaṉa walytjangku yaṉṯayaṉṯalkitjangku kulilpayi yalatji, “Ngayuluṉa paḻtjatjirrangku ngalkura palya nyinaku. Warringkamarraṉa ngayulu tjaampa mantjira tjarrpaku.” Yalatji nguwanpa nganaṉa kulira walytjangku yaṉṯayaṉṯalpayi. Wangka palunya nguwanpa nganaṉa wati miiṯatjarra tjuṯangku miiṯa walytja kulira yaṉṯayaṉṯantjaku. Palunya nguwanpa Yiitju Kurayitjalu nganaṉanya palumpa walytja tjuṯa kulira yaṉṯayaṉṯaṉi.  
\v 31 Katutjaku wangka yirriṯi wakara tjunutja yalatji ngarrinyi, “Watingku paapa maamaṯarra wantirra kungka yaḻṯirra miiṯararralpipula nyinanyi. Yalatjipula rawa nyinarra walytja yilatja nguwanpa nyinapayi.”  
\v 32 Nganaṉa puṯu kuliṉi, “Yaalytjiyaalytji?, kungka waṉma ngurrara ngalya yankula marriṯirringkula wati palumpa walytja yilatja nguwanpangka nyinanyi? Wati paluru kungka palumpa yilta walytjarringanyi.” Yara palunya nguwanpa Yiitju Kurayitjanya yilta nganampa walytjarringu, palumpa walytja tjuṯangka.  
\v 33 Wangka palunyanyurra kulintjaku. Nganaṉa walytjangku kulira yaṉṯayaṉṯalpayi. Wangka palunya nguwanpa nganaṉa wati miiṯatjarra tjuṯangku miiṯa walytja kulira yaṉṯayaṉṯantjaku. Wangka palunya nguwanpa kungka miiṯatjarra tjuṯangku miiṯa walytja kulira yaṉṯayaṉṯantjaku.   
\c 6  
\s1 Mayutju kulira tjukarurru nyinanytjaku  
\p
\v 1 Pipirri tjuṯa, nyurrangarri Yiitjuku walytjarringkula, wangka ngaatjanyaya kulila! Yiitju Kurayitjaku walytjanyurra nyinarra paapaku maamaku wangkakunyurra tjukarurru kulira nyinanytjaku. Yalatjinyurra tjukarurru nyinanytjaku.  
\v 2-3 Katutjaku wangka tiṉa, wangka kutjupa tjuṯangka munkarra yalatji piipangka ngarrinyi, “Paapaku maamakuṯarranyurra tjukarurru nyinanytjaku. Wangka pulampa kulira palyantjaku.” Wangka panyapa watjara Katutjalu wangka kutjupalpi yalatji watjaṉu, “Palumpa kutjarrakunyurra tjukarurru nyinarra, manta ngaangkanyurra palya nyinamalpa rawa.”   
\p
\v 4 Paapa tjuṯangku, maama tjuṯangkuṯarra Yiitjuku walytjarringkula wangka ngaatjanyaya kulila! Pipirri tjuṯa tjananya wiya nyurrangarri yunytjuwiyangku payintjaku, tjana pikarringkula nyinapayingka nyupalimpalpi. Yunytjungku nyurrangarri tjananya tjukarurru yaṉṯayaṉṯantjaku. Kanyira tjananya nyupali Yiitju Kurayitjakuṉu wangka nintintjaku, tjana kulira Yiitjuku tjukarurru nyinanytjaku.  
\m \em Irriṯi Puulanya nyinanytjala mayutju kutjungku waarrkana tjuṯa kanyilpayi palumpa ngurrawana kutu waarrkarrinytjaku. Luwu tjanampa ngarangu waarrkana tjuṯa mayutju walytjaku kutju tjana kutu waarrkarrinytjaku, mayutju kutjupaku waarrkarrinytjawiya. Mayutju paluru tjananya wiitjimani yungkuwiyangku mangarri mantarraṯarra yungkula yaṉṯayaṉṯalpayi.\em*   
\p
\v 5-6 Waarrkana tjuṯa Yiitjuku walytjarringkula, wangka ngaatjanyaya kulila! Mayutju walytjakunyurra kutu tjukarurru nyinanytjaku. Yiitju Kurayitjaku wangka nyurrangarri kulira tjukarurru palyalpayi. Wangka palunya nguwanpa nyurrangarri Mayutju walytjaku wangka kulira tjukarurru palyantjaku. Nyuntupa mayutjungku wiya nyanganyingka kutu palumpa wangkawana kulira tjukarurru waarrkarrinytjaku. Nyurrangarri Yiitju Kurayitjaku waarrkana tjuṯa nyinanyi, Katutjakuṯarra. Katutjalu kuliṉi nyurrangarri mayutju walytjaku tjukarurru nyinanytjaku.  
\v 7 Tjinguru nyuntupa mayutju waaḻangka nyinanytjawiyangka Yiitju Kurayitjanya yankula waaḻa palula mayutju nyinamara. Nyuntu palumpa wangka kulira tjukarurru palyanmara. Palunya nguwanpa nyuntu mayutju walytjaku wangka kulira tjukarurru palyantjaku.  
\v 8 Tjinguru nyuntu mayutju walytjaku kulira kutu tjukarurru palyantjala ngula Katutjalu nyuntunya yunyparringkula kana kanyilku palumpa ngurrangka. Tjinguru yaṉangu kutjupangku waarrkanawiyangku yaṉangu kutjupa tjuṯaku tjukarurru palyalku. Yalatji palya tjanampa palyantjala, waarrkana nguwanpaku Katutjalu palunya yunyparringkula kana kanyilku palumpa ngurrangka.   
\p
\v 9 Waarrkanaku mayutju tjuṯanyurra Yiitjuku walytjarringkula wangka ngaatjanyaya kulila! Waarrkana tjuṯa nyurrangarri purinypa yaṉṯayaṉṯara kanyintjaku, pungkula kanyintjawiyangku. Mayutju tiṉa ilkari ngurraranyurra mayutju tjuṯangku kulila! Paluru waarrkana tjuṯaku mayutju nyinanyi, nyurrangarrimpa mayutju tjuṯakuṯarra. Paluru wiya mayutju tjuṯaku kutju yunyparringanyi, yuwankarraku yunyparringanyi, waarrkana tjuṯakuṯarra.   
\s1 Mamuku mayutjungku tjingapunganyingka wiyanyurra kulintjaku  
\p
\v 10-11 Nyurrangarri wangka ngaatjanyalpi kulintjaku. Yiitju Kurayitjaku walytjanyurra nyinarra palunya tjapintjaku, paluru nyurrangarrinya rapantjaku, mamuku mayutjungkamarra. Katutjaluṯarra nyurrangarrinya rapalku Yiitjuku tjukarurrulpi nyinanytjaku. Paluru nyurrangarrinya rapalku mamuku mayutjungku tjingapunganyingka kuliranyurra wantinytjaku.  
\v 12 Yaṉangu tjuṯangku kutju wiya nganaṉanya tjingapunganyi, Yiitjuku wangka wantinytjaku, mamuku mayutjungku, palumpa waarrkana tjuṯangkuṯarra nganaṉanya tjingapunganyi.  
\v 13 Nganaṉa Katutjanya tjapintjaku paluru nganaṉanya rapantjaku. Nganaṉa rapa yalatji kutu ngaranytjaku, mamuku mayutjungku nganaṉanya tjingapunganyingka, Yiitjuku wangkawana kutju nyinanytjaku tjukarurru, kulira kutjupawana yankunytjawiya.  
\v 14 Nyurrangarri Katutjaku wangkawana kutu nintirringkunytjaku. Nintirringkula tjukarurru nyinanytjaku, wangka tjukarurru kutju wangkanytjaku, ngunytji watjantjawiya. Yalatjinyurra tjukarurru nyinarra mamuku mayutjungku tjingapunganyingka palumpa wangkanyurra kulira wantiku, Katutjaku wangkawana kutju nyurrangarri nyinanytjaku.  
\v 15 Yiitjukuṉu wangkawananyurra nintirringkula parra tjakultjurinkunytjaku. Yaṉangu tjuṯangku wangka palunya kulira Katutjaku kalypalpiya nyinaku.  
\v 16 Kutu nyurrangarri Yiitjuku wangka kulira tjukarurru nyinanytjaku, mamuku mayutjungku tjingapunganyingka palunya kulilwiya tjukarurru kutu nyinanytjaku.  
\v 17 Nyurrangarri Katutjaku walytjarringkula yankula yaṉangu tjuṯangka tjakultjunkunytjaku. Katutjaku kurrunpangku nyurrangarrinya nintilku palumpa wangka tjukarurru tjananya tjakultjunkunytjaku.   
\p
\v 18 Katutjaku kurrunpangku nyurrangarrinya nintiṉingka, kutjupa tjuṯaku tjapintjaku. Kutu tjanampa nyurrangarri Katutjanya tjapintjaku, purrkarrinytjawiyangku. Yiitjuku walytja tjuṯakuṯarra nyurrangarri tjapintjaku.  
\v 19 Ngayukuṯarra nyurrangarri tjapintjaku ngayulu Yiitjuku wangka tjukarurru tjakultjunkunytjaku, nguḻurrinytjawiyangku. Wangka Yiitju Kurayitjanyatjarra palunya yirriṯi Katutjalu kutju kulilpayi, paluru wangka palunya yutiṉulpi ngayulu tjakultjurinkunytjaku.  
\v 20 Katutjaluṉi iyaṉu waarrka palunya palyarinkunytjaku. Palumpa wangka Yiitjunyatjarra ngayulu tjakultjurinutjangka tjana ngayunya tjiilangka tjarrpatjunu. Kuwarri ngayulu tjiilangka kutu nyinanyi. Yuwa, ngayukutju nyurrangarri Katutjanya tjapintjaku, ngayulu palumpa waarrka tjukarurru palyantjaku.   
\s1 Piipa wakara wiyarrikitjangku watjalku  
\p
\v 21-22 Wati Titjikatjanya ngayulu nyurrangarrimpa wantirriyalku, paluru nyurrangarrinya wangka ngayunyatjarra tjakultjunku. Paluru nyurrangarrinya tjakultjunku ngayulu tjiilangka nyinarra Yiitjuku waarrka palyaṉutjangka. Paluru nyurrangarrinya wangka ngayunyatjarra, Katutjaku wangkaṯarra nintintjala nyurrangarri yunypalpi nyinaku. Titjikatja paluru nganampa walytja nyinanyi, paluru Yiitjuku waarrkana palya nyinanyi.   
\p
\v 23 Ngayulu paapa Katutjanya tjapinmalpa paluru Yiitju Kurayitjaluṯarra nyurrangarrinya yaṉṯayaṉṯantjaku. Yalatji paluru kutjarrangku nyurrangarrinya yaṉṯayaṉṯantjala nyurrangarri yunypa nyinaku, yaṉangu kutjupa tjuṯaku yunytju nyinarra Yiitjuku tjukarurru nyinamalpa.  
\v 24 Ngayulu yunytjurringanyi Katutjalu nyurrangarrinya aḻṯururringkula yaṉṯayaṉṯantjaku, nyurrangarri kutu Yiitju Kurayitjaku tjukarurru nyinanytjala. Yiitju paluru ilta nganampa mayutju nyinanyi.