\id 2TH 2Th \h 2 Tjitjaluniyalakutu \toc2 2 Tjitjaluniyalakutu \toc1 Tjitjaluniyanya Ngurrara Tjuṯaku Piipa Nampa 2 \mt1 Tjitjaluniyanya Ngurrara Tjuṯaku Piipa Nampa 2 \c 1 \p \v 1-2 Nganaṉatju Puulalu, Tjayilitjalu, Timitjiyilu Tjitjaluniyanya ngurrara tjuṯaku nyurrangarrimpa piipa ngaatjanya wakara wantirriyaṉi. Nintingkulatju kuliṉi nyurrangarri mayutju Yiitju Kurayitjaku walytja tjuṯa nyinanyi, paapa Katutjakuṯarra walytja nyurrangarri nyinanyi. Ngayulu Katutjanya Yiitjunyaṯarra tjapilpayi aḻṯururringkula nyurrangarrinya kutu yaṉṯayaṉṯantjaku, nyurrangarri palumpa kutjarra yunypa nyinanytjaku. \v 3 Yilta, nyurrangarri Katutjaku walytja tjuṯa tjukarurru kutu nyinanyi. Yiitjuku walytja kutjupa tjuṯaku nyurrangarri kutu yunytju tjanampa nyinanyi. Yalatjinyurra tjukarurru nyinanytjala Katutjanyalatju kutu waḻkulpayi. \v 4 Ngurra tjuṯawana nganaṉatju Yiitjuku walytja kutjupa tjuṯangka yalatji tjakultjunkupayi, “Yiitjuku yunytjuwiya tjuṯangku panypurangkula pungkunytjala Tjitjaluniyanya ngurrara tjuṯaya kutu tjukarurru nyinanyi.” \p \v 5 Paluru tjana yunytjuwiya tjuṯangku panypurangkula pungkunytjala nyurrangarri alatji kulintjaku, “Katutjanya nganampa yunypa nyinanyi. Paluru nintingku kuliṉi, nganaṉanya tjana panypurangkula pungkunytjala. Ngula palurulanya yilta yaṉṯayaṉṯalku palumpa ngurrangka.” \v 6-7 Ngula Katutjalu yunytjuwiya tjuṯa tjananya kuutawutjungka kulira payira wantirriyalku, kanya nyurrangarrinya tjukarurru yaṉṯayaṉṯalku. Nganaṉanyaṯarra paluru yaṉṯayaṉṯara kanyilku yunytjuwiya tjuṯangkamarra, Yiitju Kurayitjanya piyuku mantakutu ngalyankunytjala, palumpa ilkari ngurrara tjuṯawana tjungu. \v 8-9 Yuḻṯa palula Yiitjuku yunytjuwiya tjuṯa, palumpa wangka kulira wantipayi tjuṯaṯarra tjananya watjara wantirriyalku waru tiṉakutu. Yilta, mayutju nganampa Yiitjulu palunya tjananya warukutu wantirriyalku, Katutjaku wangka ngaatjanya kulira wantingutjangka, tjana. Wiya tjana Katutjaku ngurrangka kana nyinaku, warungkaya kutu kampamalpa. Warungkamarra tjananya Katutjalu ngangkari tiṉatjarrangku wiya yaṉṯayaṉṯalku. \v 10 Yalatji ngaraku Yiitju Kurayitjanya mantakutu piyuku ngalyananyingka. Yuḻṯa palula palumpa wangka kulira walytjarringutja tjuṯangkuya Yiitjulawana tjungurringkula palunya waḻkulku. Nyurrangarriṯarra yalatji palunya waḻkulku, nganampa wangka tjakultjunutja kulira. \p \v 11 Yurrunpa Katutjalu kuliṉu Tjitjaluniyanya ngurrara tjuṯanyurra palumpa walytja tjuṯa nyinanytjaku. Nganaṉatju kutu palunya tjapilpayi nyurrangarri palumpa walytja tjukarurru kutu nyinanytjaku. Yalatjiṯarralatju tjapilpayi, Katutjalu nyurrangarrinya kaṉṯilyankunytjaku palumpa waarrka palyantjaku. Yalatji palyalkitjanyurra yunytjurringanyi Yiitjuku walytja tjuṯa nyinarra. \v 12 Yalatjinyurra palumpa waarrka palyantjala nyakula yaṉangu tjuṯangku Yiitju Kurayitjanya puḻkapungku. Palunyatjanu Katutjalu Yiitju Kurayitjalu nyurrangarrinyalpi puḻkapungku palya nyinapayi kutjarrangku. \c 2 \s1 Mayutju kutjupara Katutjaku yunytjuwiya nyinaku \p \v 1-2 Ngayulu nyurrangarrinya panyapa watjaṉu, nganampa mayutju Yiitju Kurayitjanya piyuku ngalyananyingka, nganaṉa tjungurriku. Wangka ngaatjanyaya kulila! Yaṉangu tjaampalangku wiyawana watjaṉingi, “Yiitjunya yurrunpa piyuku mantakutu ngalyanukunyu.” Wiyanyurra puṯu kulira nyinanytjaku. Paluru wiya piyuku ngalyanu, ngula ngalyanku. Tjinguru paluru tjana nyurrangarrinya watjaṉu yalatji, “Katutjaku kurrunpangkuṉi nintiṉu, Yiitjunya yilta piyuku ngalyanu.” Tjinguru tjana yalatji watjaṉu, “Yiitjuku walytja tjuṯangkulanyatju watjaṉu Yiitjunya yilta piyuku ngalyanu.” Tjinguru tjana yalatji watjaṉu, “Puulalungarri piipangka watjaṉu Yiitjunya yilta piyuku ngalyanu.” \v 3 Wangka palunya nguwanpa wiyanyurra kulintjaku, kuliranyurra wantinytjaku. Yiitjunya piyuku ngalyankunytjala yurrunpaya yaṉangu yuwankarra Katutjaku yunytjuwiya nyinaku. Yaṉangu nguwanpa mayutju kutjupara Katutjaku yunytjuwiya nyinaku. Katutjalu yurrunpa palunya kulira watjaṉu warukutulpi ngula wantirriyalkitjangku. \v 4 Katutjaku yunytjuwiya paluru walytjangku kulilku, “Yaṉangu tjuṯangku wiya Katutjanya puḻkapungkunytjaku. Katutjanya nguwanpa tjuṯa kutjupaṯarra wiya tjana puḻkapungkunytjaku, ngayunya kutjuya kulira puḻkapungkunytjaku.” Palulanguru Katutjaku tjaatji tiṉangka Katutjaku yunytjuwiya paluru yankula nyinaku. Nyinarra yaṉangu tjuṯangka ngunytjinytjunku yalatji, “Ngayulu Katutjanya yilta nyinanyi, nyurrangarri ngayunya kutju puḻkapungkunytjaku.” \v 5 Yurrunpa ngayulu nyurrangarrilakutu yankula wangka palunya watjaṉu. Wangka palunyanyurra kuliṉi, yilta? \p \v 6 Katutjaku yunytjuwiya palunya mayutju kutjupangku marrkura kanyiṉi ngalyankutjipingkamarra. Marrkura kanyilpayi palumpa nyurrangarri ninti nyinanyi. Yurrunpa ngayulu nyurranya watjaṉu. Ngula Katutjaku yunytjuwiya paluru ngalyanku. Katutjanya kutju ninti nyinanyi palumpa tayimiku. \v 7 Yunytjuwiya paluru palumpa ngangkaritjarrangku yaṉangu tjuṯa kuwarri tjingapunganyi kuya palyantjaku. Marrkura kanyilpayi paluru wiya kuwarri yuti mantangka nyinanyi, yunytjuwiya palunya marrkura kanyiṉi. Marrkura kanyilpayi paluru yunytjuwiya palunya ngalya wantirriyalku, kutjupangku ngula watjantjala. \v 8 Yalatji watjantjala Katutjaku yunytjuwiya paluru ngalyankula yuti nyinaku. Palulanguru Yiitju Kurayitjalulpi palunya mirri pungku, ngaalymankula puyura ngangkaritjarrangku mirri pungkuku. Nganampa mayutju Yiitju Kurayitjalu piyuku mantakutu ngalyankula Katutjaku yunytjuwiya palunya mirri pungku. \p \v 9-11 Yaṉangu tjuṯangku Katutjaku wangka kulira wantiku. Tjinguru tjana Katutjaku wangka kulintjala Katutjalu tjananya walytja tjuṯa kanyilku. Yaṉangu paluru tjana palumpa wangka kulira wantiku. Katutjaku yunytjuwiya paluru, mamuku mayutjukuṉu ngangkaritjarra nyinarra kutjupa kutjupa palyanmalpa. Paluru tjananya yaṉangu tjuṯawana tjakultjurinkula tjingapungamalpa, Katutjanya kulilwiyangku wantinytjaku. Palulanguru Katutjalu tjananya wantiku yunytjuwiyaku wangkaku kutju nyinanytjaku. \v 12 Wangka palunya wiyawanangkuya kuliṉutjangka Katutjalu tjananya mirritjunku, kutu kuya palyalpayi tjuṯa, Katutjaku wangkaya kulintjawiyangka. \s1 Tjukarurrunyurra kutu nyinanytjaku \p \v 13 Walytja tjuṯa, kulilaṉiya! Katutjanya nyurrangarrimpa yunytju nyinanyi. Paluru kuliṉu nyurrangarri yurrunpa nganampatju wangka kulira Yiitjuku walytjarringkula nyinanytjaku. Kutjupa tjuṯa ngaṉṯi nganampatju wangka kulira Yiitjuku walytjarringu. Katutjaku kurrunpangku nyurrangarrinya nintiṉu Yiitjukuṉu wangka kulira tjukarurrulpi nyinanytjaku. Yalatjinyurra palumpa walytjarringanyingka nganaṉatju Katutjanya kutu waḻkulpayi. \v 14 Katutjalu kuliṉu nganaṉatju nyurrangarrilakutu yankula tjakultjunkunytjala, nyurrangarri kulira palumpa walytjarrinytjaku, walytjarringkula Yiitju Kurayitjalawanalpi kana nyinanytjaku. Paluru ilta nganampa mayutju nyinanyi. \v 15 Yurrunpalatju nyurrangarrilakutu yankula Katutjaku wangka nintiṉingi. Ngaṉṯilatju nyurrangarrilakutu piipa wakara wantirriyaṉu nintilkitjangku. Wangka palulawana nyurrangarri kutu tjukarurru nyinama! \p \v 16-17 Yuwa, paapa Katutjanyalampa yunytju nyinanyi. Nganampa aḻṯururringkula nintiṉu nganaṉa yalatji kulintjaku, “Nganaṉanya Yiitjuku walytja tjuṯa Katutjalu manta ngaangka yaṉṯayaṉṯara palumpa ngurrangka nyinatjunku, kana kutula nyinanytjaku.” Kutulatju nyurrangarrimpa tjapiṉingi, Yiitju Kurayitjalu paapa Katutjaluṯarra nyurrangarrinya kaṉṯilyankunytjaku, nguḻuwiyanyurra nyinarra tjukarurru palyara wangkanytjaku. \c 3 \s1 Nyurrangarri Katutjanyalampa tjapintjaku \p \v 1 Walytja tjuṯa, wangka ngaatjanyalpiya kulila! Nyurrangarri Katutjanyalampatju tjapinma! Yalatjiya tjapinma!, yaṉangu tjuṯangku ngurra tjuṯawana Yiitjukuṉu wangka kulira palumpa walytjarrinytjaku, nyurrangarri yurrunpa kulira palumpa walytjarrinytja nguwanpa. \v 2 Yalatjiya tjapinma!, Yiitjuku yunytjuwiya tjuṯangku nganaṉanya panypurangkula pungkutjipingkamarra. Paluru tjana wiya Yiitjuku wangka kuliṉi. \p \v 3 Wangka ngaatjanyaya kulila! Ilta, Katutjalulanya yaṉṯayaṉṯaṉi paluru nyurrangarrinya yilta kaṉṯilyankula kanyilku, Yiitjuku tuunlayiki tjuṯangku pungkutjipingkamarra. \v 4 Kuliṉilatju Katutjalu nyurrangarrinya yaṉṯayaṉṯaṉingi. Palulanguru nyurrangarri nganampatju wangkawana kulira tjukarurru nyinanyi. Nganaṉatju kuliṉi nyurrangarri wangka palulawana kutu tjukarurru nyinamalpa. \v 5 Katutjanya ngayulu tjapilpayi, nyurrangarri yaṉangu tjuṯaku kutu yunytju nyinanytjaku, Katutjanya nganampa yunytju nyinanytja nguwanpa. Yiitju Kurayitjalu Katutjaku waarrka kutu palyalpayi, wantiwiyangku, tjana palunya panypurangkunytjala. Nyurrangarriṯarra palunya nguwanpa palumpa waarrka kutu palyantjaku, tuunlayiki tjuṯangku nyurrangarrinya panypurangkula pungkunytjala. \s1 Waarrkarringkulanyurra nyinanytjaku, liitjipakawiya \p \v 6 Walytja tjuṯangkuya wangka ngaatjanyalpi kulila! Nganampa mayutju Yiitju Kurayitjaluṉi watjaṉu ngayulu nyurrangarrinya nintintjaku. Palulanguru ngayulu nyurrangarrinya watjaṉi mangarriku waarrkarrinytjaku, purrkarringkula wantinytjawiya. Nyurrangarrimpa ngurrangka Yiitjuku walytja tjaampalangku waarrka wantirra liitjipaka nyinanyi. Tjana waarrka wantinytjala wiyanyurra tjanalawana tjungurrinytjaku. Paluru tjana nganampatju wangka kulira wantipayi. \v 7 Yurrunpa nganaṉatju nyurrangarrilawana nyinarra maniku waarrkarringangi, wiya nganaṉatju liitjipaka nyinapayi. Palulanguru nganaṉatju nyurrangarrinya Katutjaku wangka nintilpayi. Yalatjikunyurra ninti nyinanyi. Nganaṉatju waarrkarripayi nguwanpa nyurrangarri waarrkarringkula nyinanytjaku. \v 8 Nyurrangarri mangarri tjinguru kuka yungkunytjala nganaṉatju ngaparrtjingku mani nyurrangarrinya yungkupayi. Yalatjilatju kuliṉingi, “Tjitjaluniyanya ngurrara tjuṯangku wiya mani tiṉa kanyiṉi. Nganaṉa waarrkarringkula mani mantjira mangarri an kuka payimilalku, tjanala yinkatjipingkamarra.” Yalatji kulira nganaṉatju mungangka tjiṉṯungkaṯarra waarrkarringkupayi. \v 9 Yurrunpalatju nyurrangarrilawana nyinarra yalatji kuliṉu, “Katutjaku waarrkalatju tjanalawana palyantjala, Tjitjaluniyanya ngurrara tjuṯangku nganaṉanya mangarri an kuka ngaparrtjingku yungkunytjaku. Yalatjiya ngurra tjuṯawana ingkaṯa tjuṯa yungkula paḻtjaṉi.” Yalatjilatju kulira wantingu. Piyuku kuliralatju yalatji watjaṉu, “Nganaṉa waarrkarringkula mani mantjira mangarri an kuka payimilalku, tjanala yinkatjipingkamarra. Tjana nyakula yalatji kulintjaku, ‘Puulanyangarri mangarriku waarrkarringkula nyinapayi. Tjananya nguwanpa nganaṉa waarrkarringkula nyinanytjaku.’” \v 10 Nganaṉatju nyurrangarrilawana nyinarra watjaṉingi yalatji, “Yaṉangungku waarrka wantirra nyinanyingka, wiyanyurra paḻtjantjaku.” \v 11 Panyapalatju nyurranya watjaṉu, kutjupangkulanyatju tjakultjunutjangka. Palurulanyatju kuwarri tjakultjunu, “Tjitjaluniyanya ngurrara Yiitjuku walytja tjaampalaya waarrka wantirra liitjipaka nyinanyi. Tjana tjungurringkula tjaalymara wangkapayi.” \v 12 Yaṉangu paluru tjana tjukarurrulpi waarrkarringkula nyinanytjaku, mangarri walytjangku payimilara ngalkuntjaku. Nganampa mayutju Yiitju Kurayitjalu yurrunpa watjaṉu ngayulu nyurrangarrinya nintintjaku. Palulanguru ngayulu nyurrangarrinya watjaṉi nyurrangarri palumpa walytja tjuṯa yalatji mangarriku waarrkarrinytjaku. \v 13 Walytja tjuṯangkuya kulila! Waarrka wantirra nyinapayi tjuṯaku tjanampa wiya yunytjuwiya nyinanytjaku, nyurrangarri tjukarurru tjanampa palyanma! Kutjupa tjuṯakuṯarra tjukarurruya palyanma!, purrkarrinytjawiyangku. \p \v 14 Piipa ngaatja nyurrangarri tjanala riitarringanyingka, tjinguru tjaampalangkuya kulira wantiku yalatji, “Wiya Puulalungarri nganaṉanya watjantjaku.” Yalatji kulira wantipayi tjuṯawana wiya nyurrangarri tjungurringkula tjaalymara wangkanytjaku, tjananya wantinytjaku. \v 15 Palumpa tjanampa wiyanyurra yunytjuwiyarringkula nyinanytjaku, nyakula tjananya palya wangkanytjaku, Yiitjuku walytja kutjupangka palya wangkanytja nguwanpa. \s1 Puulalu piipa wakara wiyalkitjangkulpi tjananya watjaṉutja \p \v 16 Katutjalulanya yaṉangu tjuṯa yunypalpayi. Palulanguru nganaṉatju palunya tjapiṉi, nyurrangarrinya yunypara yaṉṯayaṉṯantjaku. Yunytjurringanyilatju Katutjalu nyurrangarrinya yilangku yaṉṯayaṉṯantjaku. \v 17 Wati kutjupangku nyinarra ngayuku maḻpangku piipa ngaatjanya wakaṉingi, tjungungkulitju ngayulu Puulalu wangkanytjala. Kala, wangka ngaatjanyalpi ngayulu Puulalu marangku tjayinamilaṉi yalatji, Puula. Nyakulanyurra yalatji kulilku, “Puulalu yilta, piipa ngaatjanya wantirriyaṉu. Paluru yini wakaṉutja ngaatja yalatji paluru kutu piipangka wakara wantirriyalpayi.” \v 18 Ngayulu Katutjanya tjapinmalpa, nganampa mayutju Yiitju Kurayitjalu aḻṯururringkula nyurrangarrinya yaṉṯayaṉṯantjaku.