\id 1TH 1th 
\h 1 Tjitjaluniyalakutu 
\toc2 1 Tjitjaluniyalakutu 
\toc1 Tjitjaluniyanya Ngurrara Tjuṯaku Piipa Nampa 1 
\mt1 Tjitjaluniyanya Ngurrara Tjuṯaku Piipa Nampa 1  
\c 1  
\p
\v 1 Nganaṉatju Puulalu, Tjayilitjalu, Timitjiyilu Tjitjaluniyanya ngurrara tjuṯaku nyurrangarrimpa piipa ngaatjanya wakara wantirriyaṉi. Nintingkulatju kuliṉi nyurrangarri mayutju Yiitju Kurayitjaku walytja tjuṯa nyinanyi, paapa Katutjakuṯarra walytja nyurrangarri nyinanyi. Ngayulu Katutjanya tjapilpayi paluru aḻṯururringkula nyurrangarrinya kutu yaṉṯayaṉṯantjaku, nyurrangarri palumpa yunypa nyinanytjaku.   
\p
\v 2-3 Nyurrangarri tjukarurru nyinanytjala nganaṉa paapa Katutjanya yalatji wangkapayi, “Tjitjaluniyanya ngurrara tjuṯaya tjukarurru nyuntupa nyinanyi, nyuntu palya tjananya yaṉṯayaṉṯaṉi. Tjana yilta kutu tjukarurru nyinanyi mayutju Yiitju Kurayitjaku walytja, yaṉangu kutjupa tjuṯa tjana yaṉṯayaṉṯalpayi.”   
\s1 Puulalu watjalku, “Katutjaku kurrunpangku nyurrangarrinya yunypa palyalku.”  
\p
\v 4 Yiitjuku walytja tjuṯangkuya wangka ngaatjanya kulila! Nganaṉa nintingku kuliṉi, yurrunpa Katutjalu kuliṉu nyurrangarri ngula palumpa walytja tjuṯa nyinanytjaku. Paluru ilta nyurrangarrimpa yunytju nyinanyi.  
\v 5 Yurrunpa nganaṉa nyurrangarrila Yiitjuku wangka tjakultjunkunytjala, Katutjaku kurrunpangkulanyatju nintira rapaṉu. Yalatjilatju kuliṉingi, “Ngaatja yilta Yiitjuku wangka maṯupurra, nganaṉa tjakultjunanyi.” Nganampa nyurrangarri ninti nyinangi. Kuliṉunyurra nganaṉa Yiitjuku wangkaku tjukarurru nyinapayi.  
\v 6 Nganampatju wangka nyurrangarri kulira Yiitjuku walytjarringu. Palulangurunyurra tjukarurru nyinangi, nganaṉatju tjukarurru nyinanytja nguwanpa, Yiitjunya tjukarurru nyinanytja nguwanpa. Nganaṉatju nyurrangarrinya Yiitjukuṉu wangka nintintjala, Yiitjuku walytjaku tuunlayiki tjuṯangku nyurrangarrinya panypurangkula pungkupayi. Nguḻuwiyangku nyurrangarri palumpa wangka kulira Yiitjuku walytjarringu. Katutjaku kurrunpangku nyurrangarrinya yunypaṉu.  
\v 7 Yalatji nyurrangarri kulira tjukarurru nguḻuwiya nyinangutjangka, Yiitjuku walytja kutjupa tjuṯangkuya, Matjatuniyanya ngurrara tjuṯangku, Kiritjinya ngurrara tjuṯangkuṯarra kulira yunyparringu. Kuliraya watjaṉu, “Yiitjuku tuunlayiki tjuṯangku nganaṉanya panypuranganyingka tjukarurru nganaṉa nyinanytjaku, Tjitjaluniyanya ngurrara tjuṯa nguwanpa.”  
\v 8 Palunya ngurrara tjuṯangku yaṉangu tjuṯalingku Yiitjuku walytjarringu. Palunyatjanuya Yiitjuku wangka tjakultjurinanyilpi manta tjuṯawana. Wangka yalatjiṯarra tjana tjakultjurinanyi, “Tjitjaluniyanya ngurrara tjuṯaya Yiitjuku tjukarurru nyinanyi.” Yiitjuku walytja yuwankarrangku yalatji kuliṉi, Tjitjaluniyanya ngurrara tjuṯanyurra Yiitjuku tjukarurru nyinanyingka. Wiya nganaṉatju tjananya wangka palunya tjakultjurinku alatji, “Tjitjaluniyanya ngurrara tjuṯaya tjukarurrulpi nyinanyi”, wiya. Kutjupa tjuṯangku tjananya yalatji yurrunpa tjakultjurinangi.  
\v 9 Palunya ngurrara tjuṯangku, Yiitjuku walytja yuwankarrangku tjakultjurinkupayi yalatji, “Puulalungarriya yurrunpa ngurra Tjitjaluniyalakutu yankula Yiitjuku wangka tjakultjunanyingka, paluru tjana kulira Yiitjuku yunyparringu. Yunyparringkulaya Katutjanya nguwanpa tjuṯa wantirra Katutjanyalpiya puḻkapungangi. Katutja paluru yiltalampa kutju nyinanyi.”  
\v 10 Yalatjiṯarra Yiitjuku walytja yuwankarrangku tjakultjurinkupayi, “Paluru tjana Tjitjaluniyanya ngurrara tjuṯa paṯaṉi, Katutjaku katjaku, Yiitjunya piyuku mantakutu ngalyankunytjaku.” Katutjaku katja paluru yurrunpa mirri ngarrinyingka paapa Katutjalu kanara pakaltjingaṉu. Katutjaku katja paluru nganaṉanya palumpa walytja tjuṯa ngula, patjuri wangkarra kanalku, Katutjalu nganaṉanya kuutawutju puntungka watjaṉingka.   
\c 2  
\s1 Puulalu watjalku, “Nganaṉatju Yiitjuku wangka tjukarurru tjakultjunkupayi.”  
\p
\v 1 Yiitjuku walytja tjuṯangkuya wangka ngaatjanya kulila! Yurrunpalatju maa yankula Yiitjuku wangka nyurrangarrila tjakultjunu. Wangka palunyanyurra kulira yunyparringu, wiyanyurra kulira wantingu. Kuliranyurra Yiitjuku walytjarringu. Yalatjikunyurra ninti nyinanyi.  
\v 2 Yurrunpalatju yanu ngurra Pilipayilakutu, Yiitjuku wangka tjakultjunkukitja. Pala ngurrara tjuṯangku nganaṉanyatju panypurangkula wiipatjarrangku pungkupayi. Palunyatjanulatju maa yanu nyurrangarrilakutu, ngurra Tjitjaluniyalakutu. Tjitjaluniyanya ngurrara tjuṯangkulpilanyatju panypurangkupayi. Katutjalulanyatju kaṉṯilyankupayi nganaṉatju nyurrangarrinya Katutjaku wangka Yiitjunyatjarra tjakultjunkunytjaku.  
\v 3 Nganaṉatju nyurrangarrinya Yiitjuku wangka tjukarurru tjakultjunkupayi, wiyalatju wiyawana tjakultjunkupayi mani mantjilkitjangku. Wiyalatju yalatji kulilpayi, “Tjinguru ngaa ngurrara tjuṯangku mani, yulytjaṯarra nganaṉanya yungku, Yiitjuku wangka nganaṉatju tjakultjunkunytjala.” Yalatji wiyalatju kulilpayi.  
\v 4 Yilta, tjukarurrulatju nyurrangarrila tjakultjunkupayi, Katutjakuṉu wangka Yiitjunyatjarra. Katutjalulanyatju ngaratjunu palumpa wangka tjakultjurinkunytjaku. Katutjalu yurrunpa yalatji kuliṉu, “Yilta, ngaa tjuṯangku ngayukuṉu wangka tjananya tjukarurru tjakultjunku.” Wiyalatju kulilpayi yalatji, “Katutjaku wangka maṉkurrpa kutjula tjanala tjakultjunku, tjana kulira nganaṉanya yunypangku waḻkuntjaku.” Wiya alatji wangka maṉkurrpalatju tjakultjunkupayi, Katutjaku wangka ulaatalatju nyurrangarrila tjakultjunkupayi. Kuliṉulatju Katutjanya nganampatju yunyparrinytjaku. Paluru nganaṉanya nintingku kuliṉingi, nganaṉatju tjukarurrungku palumpa wangka tjakultjunkupayi.   
\p
\v 5 Nganaṉatju nyurrangarrilakutu ankula tjukarurru tjakultjunkupayi, wiyalatju mayutju tjuṯangka yunypa yunypalpayi mani mantjilkitjangku. Yalatjiku Katutjanya ninti nyinanyi.  
\v 6 Wiyalatju kuliṉingi nyurrangarri nganaṉanya waḻkuntjaku, wiya.  
\v 7 Yurrunpa Yiitjuluṉi Puulanya watjaṉu ngayulu palumpa wangka ngurra tjuṯawana tjakultjurinkunytjaku. Palya ngayulu nyurrangarrinya Yiitjuku waarrkanangku inkamara mangarri, kukaku. Wiya ngayulu nyurrangarrinya yalatji inkapayi, mayutju nguwanpangku. Waarrkana tjuṯa nguwanpalatju nyinarra nyurrangarrinya yaṉṯayaṉṯalpayi, maama nguwanpangku, maamangku palumpa pipirri tjuṯa yaṉṯayaṉṯalpayi nguwanpa.  
\v 8 Yilta, nganaṉatju nyurrangarrimpa puntura yunytju nyinapayi. Yalatji yunytjulatju nyinarralatju nyurrangarrila Yiitjuku wangka tjakultjunkupayi. Wiyalatju nguḻurringkula wantingu. Wiyalatju yalatji kuliṉu, “Yiitjuku tuunlayiki tjuṯangku nganaṉanya pungkutjipingka, nganaṉa tjakultjunkuwiyangku wantinytjaku.” Wiya yalatjilatju kuliṉu, nyurrangarrinya nguḻurringkula wantinytjaku. Tjukarurrungku nganaṉatju nyurrangarrinya Yiitjukuṉu wangka tjakultjunkupayi.   
\p
\v 9 Tjingurunyurra Yiitjuku walytja tjuṯangku kuliṉi, yilta?, nganaṉatju nyurrangarrilawana nyinanyingka. Kutulatju nyurrangarrilawana nyinarra waarrkarringkupayi. Tjiṉṯu kutjupa tjiṉṯu kutjupangkalatju waarrka kutjupa palyalpayi, mani mangarriku mantjintjaku, nyurrangarrila yinkatjipingkamarra. Yalatji waarrkarringkula nganaṉatju kutu nyurrangarrinya Yiitjuku wangka tjakultjunkupayi.  
\v 10 Yiitjuku walytja tjuṯangka palyalatju nyurrangarrilawana nyinangi tjukarurru, Katutjala kurungka, nyurrangarrila kurungkaṯarra.  
\v 11-12 Paapangku pipirri tjuṯa nintilpayi. Nganaṉatju nyurrangarrinya paapa maṉkurrpa nguwanpangku nintilpayi. Nintiralatju nyurrangarrinya pinangkatjunkupayi, tjukarurru nyurrangarri Katutjaku nyinanytjaku. Kutjupa tjuṯangku nyurrangarrinya panypurangkunytjala nganaṉatju nyurrangarrila tjungu watjilpa nyinapayi. Yalatjikunyurra ninti nyinanyi. Katutjalu yurrunpa nyurrangarrinya ngurrtjaṉu palumpa walytja tjuṯarringkula nyinanytjaku.   
\p
\v 13 Nganaṉatju nyurrangarrinya yurrunpa Yiitjukuṉu wangka nintintjala, wangka palunyanyurra yilta kulira palumpa walytjarringu. Wiyanyurra yalatji wiyawana kuliṉangi, “Ngaatja yaṉanguku wangka, Katutjakuṉu wiya. Puulalungarri ngunytji Katutjaku wangka nganaṉala nintilpayi.” Wiyanyurra yalatji kuliṉu, Katutjakuṉu wangkanyurra yilta kuliṉu. Palunyatjanu kuwarri Katutjalu nyurrangarrinya kutu nintiṉi, tjukarurru palumpa kutu nyinanytjaku.  
\v 14 Yiitjuku walytja tjuṯaya manta Tjuutiyalawana nyinanyi. Yurrunpa Yiitjuku tuunlayiki tjuṯangku, palunya ngurrara tjuṯangku panypurangkula tjananya pungkupayi, Yiitjuku walytja tjuṯaya nyinanyingka. Yalatji nyuntupaṉu ngurrangka Tjitjaluniyala Yiitjuku tuunlayiki tjuṯangku nyurrangarrinya panypurangkula pungkupayi.   
\p
\v 15-16 Ngurra Tjuutiyala Tjuwu tjuṯa paluru tjana mayutju Yiitjunya yiluntanu. Irriṯi Katutjaku wangka watjalpayi tjuṯaṯarra, palunya ngurrara tjuṯangku mirri pungkupayi. Nganaṉanyaṯarra palunya ngurrara tjuṯangku panypurangkula payira iyaṉu. Palulanguru Katutjanya tjanampa wiya yunypa nyinanyi, wiya. Tjana nganaṉanya marrkulpayi, “Nyurrangarri wiya yankula Tjuwuwiya tjuṯangka Yiitjukuṉu wangka tjakultjunkunytjaku, wantiya!” Tjana kulinmara Tjuwuwiya tjuṯangku palya Yiitjuku wangka kulira walytjarringkula kana kutu nyinanytjaku, Katutjaku ngurrangka. Yalatjiya kututja Katutjaku wangka kilytjuntankupayi. Palulanguru Katutjanya tjanampa ngurrkurringkula kuwarrilpi tjananya wantiku, yaṉṯayaṉṯara kanyintjawiyangku.   
\s1 Puulanya Tjitjaluniyanya ngurrara tjuṯa nyakukitja yunytjurriku  
\p
\v 17 Ngayuku walytja tjuṯangkuya wangka ngaatjanya kulila! Kutulatju kulilpayi nyurrangarrilakutu yankula piyuku nyakunytjaku. Watjilpalatju nyinanyi. Puṯulatju kuliṉi maa yankula nyurrangarrilawana nyinakitjangku.  
\v 18 Yiltalatju kutu kuliṉi, maa yankula nyurrangarrinya nyakukitja. Ngayulu Puulalu kutu puṯu kuliṉingi, maa yankula nyurrangarrinya nyakukitjangku, mamuku mayutjungku nganaṉanya yangayangatjunkula kanyintjala.  
\v 19-20 Nganaṉatju yunyparringanyi nyurrangarrimpa Tjitjaluniyanya ngurrara tjuṯaku, Yiitjukunyurra tjukarurru kutu nyinanyingka. Ngula, mayutju Yiitjunyalampa piyuku ngalyananyingka nganaṉatju palunya tjakultjunkuku yalatji, “Nganaṉatju nyuntupa wangka tjananya yaṉangu Tjitjaluniyanya ngurrara tjuṯaṯarra tjakultjunu, palunyatjanuya kuwarri nyuntupa walytja tjuṯalpi nyinanyi. Yalatji nyuntupa waarrkalatju palyalpayi.”   
\c 3  
\s1 Puulalu Tjitjaluniyalakutu Timitjiyinya wantirriyalku  
\p
\v 1-2 Nganaṉa nyurrangarrimpa puntura watjilarrirra puṯu kuliṉingi, maa yankula nyakukitjangku. Yalatjilatju kuliṉingi, “Tjinguru Tjitjaluniyanya ngurrara tjuṯa palya Yiitjuku tjukarurru nyinanyi, tjinguru wiya.” Yalatjilitju Timitjiyinya watjaṉu, “Timitjiyi. Nyuntu ngurra Tjitjaluniyalakutu yarra!, Yiitjuku walytja tjuṯa nyakunytjaku. Ngalitju ngaangka kutu nyinarra Yiitjuku waarrka palyanmalpa.” Palulanguru ngalitju Timitjiyinya nyurrangarrilakutu maa wantirriyaṉu, tawunu Yatjanytjalanguru. Paluru nganampa walytja nyinanyi, Yiitju Kurayitjakuṉu wangka paluru palya tjakultjunkupayi, Katutjaku waarrkana palya. Ngali kuliṉu Timitjiyilu nyurrangarrilakutu maa yankula nintintjaku, nyurrangarri kaṉṯilya Yiitjuku nyinanytjaku. Kuliṉulitju paluru nyurrangarrila nyinarra ngalyankula ngalinya tjakultjunkunytjaku.  
\v 3-4 Irriṯi nganaṉa nyurrangarrilawana nyinarra watjaṉu, “Katutjalu nintingku kuliṉi, paluru tjana tuunlayiki tjuṯangku nganaṉanya palumpa walytja tjuṯa panypurangkula pungku.” Yalatjikunyurra ninti nyinanyi. Yilta nganaṉanya nyurrangarrinyaṯarra irriṯi, Tjitjaluniyanya ngurrara tjuṯangku panypurangkula pungkupayi. Tjana piyuku nyurrangarrinya panypurangkula punganyingka, kutunyurra tjukarurru Yiitjuku nyinanytjaku, wiyanyurra nguḻurringkula palunya wantinytjaku. Yalatjilatju kuliṉingi, Timitjiyinya wantirriyalkitjangku.  
\v 5 Yuwa, ngalitju nyurrangarrilakutu Timitjiyinya wantirriyalkitjangku yalatji kulira Katutjanya tjapiṉu, “Tjitjaluniyanya ngurrara tjuṯa tjananya yaṉṯayaṉṯara kanyintjaku, mamuku mayutjungku tjingapungkunytjala, tjana yiwarra kutjupawana yankutjipingkamarra. Tjinguruya wiyawana nyinanytjala, ngayulu tjanalawana tjinguru puṯu Yiitjuku waarrka palyaṉu.” Yalatjilitju kuliṉingi.   
\p
\v 6 Kala, kuwarri Timitjiyilu nyurrangarrilawana nyinarra ngalyankula nganaṉanya tjakultjunu yalatji, “Palyaya kutu nyinanyi Yiitjuku, tjukarurru. Palumpa walytja kutjupa tjuṯakuya yunytju nyinanyi.” Wangka yalatjilatju kulira yunyparringu. Timitjiyilu nganaṉanya piyuku tjakultjunu yalatji, “Yiitjuku walytja Tjitjaluniyanya ngurrara tjuṯakunyu nyurrangarrimpa Puulakungarrimpa yunypa nyinanyi. Tjana paṯaṉi nyurrangarrimpa yankula tjananya nyakunytjaku.” Timitjiyiku tjakulpa yalatjilatju kulira yunyparringu. Yiltalatju puntura yunytjurringanyi yankula nyurrangarrinya nyakukitja.   
\p
\v 7-8 Ngurra ngaangka Kurinytjiyala tuunlayiki tjuṯangku nganaṉanya panypurangkula pungkupayi. Kutulatju Katutjaku kaṉṯilya nyinanyi, yalatji kulira, “Tjitjaluniyanya ngurrara tjuṯa kutu tjukarurru nyinanyi Yiitjuku. Palulanguru nganaṉa yunypangku Katutjaku waarrka palyantjaku, kutjupa tjuṯaya ngaa ngurrara, palunya ngurrara tjuṯa nguwanpa Yiitjuku tjukarurru nyinanytjaku.”  
\v 9 Yuwa, Katutjalu nyurrangarrinya Tjitjaluniyanya ngurrara tjuṯa kaṉṯilyara kanyiṉi, tjukarurru nyinanytjaku. Yalatji nyurrangarri tjukarurru nyinanytjala nganaṉa yunyparringkula Katutjanya waḻkulpayi.  
\v 10 Kutu nganaṉatju Katutjanya tjapilpayi, maa yankula nyurrangarrinya nyakukitjangku. Nyakula nganaṉatju nyurrangarrinya Katutjaku wangka nintilku, tjukarurrunyurra palumpa kutu nyinanytjaku.   
\p
\v 11 Paapa Katutjanya, mayutju Yiitjunyaṯarra nganaṉatju tjapilpayi kuwarri yankula nyurrangarrinya nintintjaku.  
\v 12 Yalatjiṯarralatju nyurrangarrimpa tjapilpayi, Katutjalu nyurranya nintintjala, yaṉangu walytja tjuṯaku nyurrangarri puntura yunytjurringkula nyinanytjaku. Yalatji puntura yunytjurrirra nyinarra nyurrangarri yaṉangu kutjupa tjuṯakuṯarra puntura yunytjurringkula nyinanytjaku. Yalatjilatju nyurrangarrimpa puntura yunytjurringkula nyinanyi.  
\v 13 Yalatji nyurrangarri kutjupa tjuṯaku yunytjurrirra nyinangutja palya kuutawutjungka nyinaku, mayutju Katutjala. Yuḻṯa palula, mayutju Yiitju Kurayitjanya piyuku mantakutu ngalyanku, palumpa walytja tjuṯatjarra.   
\c 4  
\s1 Yalatji nganaṉa tjukarurru nyinanytjaku  
\p
\v 1 Walytja tjuṯangkuya wangka ngaatjanya kulila! Nganaṉatju nyurrangarrinya yirriṯi nintiṉu Yiitjuku tjukarurru nyinanytjaku. Palunyatjanu kutunyurra yalatji tjukarurru nyinapayi. Kuwarrilatju nyurrangarrinya watjaṉi, yalatji kutu tjukarurru Yiitjuku nyinanytjaku purrkarringkula palumpa waarrka wantinytjawiya. Yalatjinyurra tjukarurru kutu nyinanytjala Katutjanya nyurrangarrimpa yunypa nyinaku.  
\v 2 Yirriṯi nganaṉatju nyurrangarrinya nintilpayi, Yiitjuku walytja tjukarurrunyurra nyinanytjaku. Wangka palunya tjingurunyurra kuliṉi, yilta? Yalatjilatju nyurrangarrinya Katutjaku wangka nintilpayi  
\v 3-5 Katutjalu watjaṉu, wiya nyurrangarri miiṯa kutjupa kutjupangka ngarrinytjaku, miiṯa walytjangka kutju nyurrangarri tjukarurru nyinanytjaku. Wati tjuṯangkunyurra miiṯa walytja tjukarurru kanyintjaku, wiyara wayilarringkula pikarringkunytjaku. Katutjaku ngurrpa tjuṯangkuya miiṯa wayilarringkula pungkupayi.  
\v 6 Yiitjuku walytja tjuṯa nyurrangarri nyinanyi. Wiyanyurra miiṯa kutjupakuṉungka ngarrinytjaku. Irriṯilatju nyurrangarrinya watjaṉu wiya yalatji nyinanytjaku. Nganaṉa nyurrangarrinya pinangkatjunanyi, ngula Katutjalu nyurrangarrinya panypurangkula warukutu waṉitjipingkamarra. Yalatjilatju nyurrangarrinya irriṯi pinangkatjunu.  
\v 7 Katutjalu nganaṉanya nyinatjunu palumpa walytja tjukarurru nyinanytjaku, wiyala kuya palyara nyinanytjaku.  
\v 8 Wangka palunya Katutjaku wangka, wiya nganampa kutju. Tjinguru nyurrangarri Yiitjuku walytja tjuṯangku wangka palunya kulira wantiku. Yalatjinyurra Katutjaku kurrunpaṯarra kulira wantiku. Katutjalu palumpa kurrunpa nganaṉanya tjarrpatjunkupayi, nganaṉa palunya kulira tjukarurru nyinanytjaku.   
\p
\v 9 Yiltanyurra Yiitjuku walytja kutjupa tjuṯaku yunytjurrirra nyinanyi. Wiyalatju piyuku wakara nintilku, yunytju tjanampa nyinanytjaku, nintinyurra nyinanyi. Katutjalu nyurrangarrinya nintiṉu yunytju tjanampa nyinanytjaku. Yuwa, palunyanyurra kulira yunytju tjanampa nyinanyi.  
\v 10 Manta Matjatuniyanya ngurrara tjuṯakuṯarra nyurrangarri yunytju nyinanyi. Kutu tjanampa nyurrangarri yunytju nyinanytjaku.  
\v 11-12 Wangka yalatjiṯarra nyurrangarri kulintjaku. Yaṉangu tjuṯaku nyurrangarri palya kutu nyinanytjaku, yaṉangu kutjupaku pikarrinytjawiya. Wiyanyurra waarrkawiya nyinanytjaku, waarrkarringkulanyurra nyinanytjaku, maniku, kuka mangarrikuṯarra. Wiyanyurra kutjupa tjuṯangka yinkarra kutu mantjira nyinanytjaku. Yalatjinyurra waarrkarringkula nyinanytjaku nganaṉa nyurrangarrinya irriṯi nintilpayi. Yalatjinyurra waarrkarringkula nyinanytjala, Yiitjuku ngurrpa tjuṯa nyurrangarrimpa yunypa nyinaku.   
\s1 Puulalu tjananya nintilku, “Mayutju Kurayitjanya ilkaringuru wararrakatiku”  
\p
\v 13 Walytja tjuṯangkuya wangka ngaatjanya kulila! Tjukarurrunyurra kulintjaku Yiitjuku walytja mirri tjuṯa ngula pakantjala, wiyanyurra puṯu kulintjaku. Wiya nyurrangarri yalatji wiyawana kulintjaku, “Ngayuku walytja, Yiitjuku walytja wiyarringu. Tjinguru paluru ngula kanarriku, tjinguru wiya.” Katutjaku ngurrpa tjuṯaya puṯu kuliṉi, mirri tjuṯaku.  
\v 14 Yiitjuku walytja tjuṯangkula kuliṉi, Yiitjunya ilurra paluru ngarrirra kanarringu. Katutjaku ngurrangka paluru kuwarri nyinanyi. Ngula Katutjalu palumpa walytja tjuṯaku kurrunpa tjuṯa, Yiitjunyaṯarra mantakutu ngalya iyalku. Paluru tjana Yiitjuku walytja tjuṯa kurrunpa tjuṯa paṉangka irriṯi tjukarurru nyinapayi.  
\v 15 Wangka ngaatjanya nganaṉa nyurrangarrinya nintiṉi, Yiitjulu nganampa mayutjungku tjananya irriṯi watjaṉu. Ngula, Yiitjuku walytja mirri tjuṯa paṉanguru kanarringkula pakalku. Kanarringkulaya Yiitjulakutu yankula tjungurriku, paluru ilkaringuru mantangka ila ngalya tjarukatinytjala. Nganaṉa Yiitjuku walytja paṉangka kana nyinanytja tjuṯa paṉangka nyinaku. Palunya tjuṯangka ngaṉṯi nganaṉa yanku Yiitjula tjungurrikitja.   
\p
\v 16 Katutjanya raapa mirraku. Palumpa ilkari ngurrara mayutju tiṉaṯarra raapa mirraku. Mayutju tiṉa paluru mirrarra turampata mirratjingantjala, Yiitjunya mayutju nganampa tjarukatirra ngururrpa ilkaringka ngaraku. Palunyatjanu Yiitjuku walytja mirri tjuṯa mantanguru pakara kanarringkula pakalku.  
\v 17 Palulanguru nganaṉa Yiitjuku walytja mantangka kana nyinanytja tjuṯa, yankula yutuwariwana Yiitjula tjungurringku, palumpa walytja yurruntitja tjuṯangka ngaṉṯi. Palulanguru nganaṉa mayutju Yiitjulawana kutu nyinamalpa.  
\v 18 Tjinguru Yiitjuku walytja tjaampalangku yalatji puṯu kulilku, “Nganampa irriṯi ilunytjatjanu tjinguru ngula kanarriku, tjinguru wiya.” Yalatjiya puṯu kulira watjilpa nyinanytjala, nyurrangarri wangka palunya tjananya tjakultjurra!, kuliraya yunypa nyinanytjaku.   
\c 5  
\s1 Yaṉangu tjuṯaya yuṯuyuṯu nyinanytjala Yiitjunya piyuku ngalyanku  
\p
\v 1 Walytja tjuṯangkuya wangka ngaatjanya kulila! Yaṉangu tjuṯangku tjapilpayi yalatji, “Yiitjunya yaalytjingara piyuku ngalyankuku, tjiṉṯu nampa yaalytjingka?” Ngayulu wiya nyurrangarrinya wangka palulawana rawangku nintinmalpa, nintingkunyurra kuliṉi.  
\v 2 Wiya yaṉangu ninti nyinanyi tayimi palumpaku, Yiitjunya piyuku ngalyananyingka. Yaṉangu tayimiku ngurrpa yara yalatji. Mulyaṯanytjungku kulilku yulytja mantjilkitjangku. Paluru yankula mantjilku waaḻa ngurrara yuṯuyuṯu yanku ngarrinyingka. Yara palunya nguwanpa Yiitjunya piyuku ngalyanku, yaṉangu tjuṯa yuṯuyuṯu nyinanytjala.  
\v 3 Yuḻṯa palula yalatjikutjuraya kulira watjalku, “Palyala nyinanyi mani, yulytjatjarra. Kutjupangku wiyalanya pungku.” Yiitjulu piyuku ngalyankula tjananya wantinytjala, paluru tjana watjara waṉiku, “Nganaṉanyaṯarra paluru katimara. Wiyalpi nganaṉa Katutjaku ngurrangka kana kutu nyinaku, kuunyi warungkalpi nganaṉa nyinaku.”   
\p
\v 4 Nganampa walytja tjuṯa palyanyurra nyinanyi, wiya nyurrangarri kuya palyalpayi tjuṯa nguwanpa. Tjukarurru nyinarra nyurrangarri paṯaṉi paluru piyuku ngalyankunytjaku.  
\v 5-7 Yuwa, tjukarurrunyurra Yiitjuku walytja tjuṯa nyinanyi, wiya kuya palyalpayi tjuṯa nguwanpa.  
\v 8 Nganaṉa kutu Yiitjuku tjukarurru nyinanytjaku, wiya kuya palyantjaku. Nganaṉa yaṉangu kutjupa tjuṯaku palya nyinanytjaku, kaangkinytji. Yalatji nganaṉa yunypa nyinanytjaku, yalatji kulira, “Yilta, Yiitjunya nganampa piyuku ngalyanku. Paluru ngalyankunytjala nganaṉa palumpa ngurrangka kana kutu nyinamalpa.”   
\p
\v 9 Katutjalu kuliṉi, nganaṉa Yiitjuku walytja tjuṯa kana kutu nyinanytjaku, mayutju Yiitjunyalampa walytja nyinanytjala, paluru wiya kuliṉi ngula nganaṉanya kuutawutjungka kuru watjara warukutu waṉinytjaku, wiya.  
\v 10 Yiitju Kurayitja palurulampa watiyangka mirrirringu, nganampa kuya waṉikitja, nganampa kuya waṉinytjala nganaṉa palulawana kana kutu palumpa ngurrangka nyinamalpa. Yiitjunya nganampa piyuku manta ngaakutu ngalyananyingka, palumpa walytja yurrunpa nyinangitja tjuṯa, nganaṉaṯarra kuwarri nyinanytja tjuṯaṯarra tjungu kana kutu palulawana nyinaku.  
\v 11 Tjinguru Yiitjuku walytja tjaampalaya wangka ngaaku ngurrpa nyinarra walytja yurrunpa nyinangitja tjuṯaku puṯu kulilku. Yalatjiya puṯu kulintjala nyurrangarri tjananya wangka palunya tjakultjunkunytjaku, tjana kulira yunypa nyinanytjaku. Ngayulu nintingku kuliṉi, nyurrangarri tjananya Katutjaku wangka kutu nintira pukuḻmankupayi.   
\s1 Mayutju tjuṯakunyurra palya nyinanytjaku, Yiitjuku walytja tjuṯaku  
\p
\v 12 Walytja tjuṯangkuya wangka ngaatjanya kulila! Ingkaṯa tjuṯa nyurrangarrimpa nyinanyi. Palumpa tjanampa tjukarurrunyurra palya nyinanytjaku. Katutjaku waarrka nyurrangarrimpa tjana palyalpayi, tjukarurrunyurra nyinanytjaku.  
\v 13 Palumpa tjanampa nyurrangarri yunytju nyinanytjaku, tjana nyurrangarrinya Katutjaku wangka kutu nintintjala. Yiitjuku walytja kutjupa tjuṯakuṯarra nyurrangarri yunytju nyinanytjaku.   
\p
\v 14 Yiitjuku walytja tjaampalaya liitjipaka nguwanpa nyinanyi. Watjala tjananya!, waarrkarrinytjaku. Tjaampalangkuya puṯu kuliṉi Yiitjuku tjukarurru nyinakitjangku. Nintinma tjananya!, tjukarurruya Yiitjuku nyinanytjaku. Tjaampalangkuya Yiitjuku walytja tjuṯangku wiyawana kulira nyinanyi. Palunya tjananya nyurrangarri purinypangku nintintjaku, wiya tjanampa purrkarrinytjaku. Tjinguru tjaampala nguḻu nyinanyi Yiitjuku tuunlayiki tjuṯangku tjananya panypurangutjangka. Nintira tjananya pukuḻmarra!, nguḻuwiyangkuya Yiitjukuṉu wangka tjakultjurinkunytjaku.  
\v 15 Tjinguru Yiitjuku walytja tjuṯa nyurrangarrimpa tuunlayiki nyinanytjala, wiya palumpa tjanampa nyurrangarri tuunlayiki nyinanytjaku. Palumpa tjanampa nyurrangarri palya nyinanytjaku, Katutjaku ngurrpa tjuṯakuṯarra.   
\p
\v 16-18 Kutunyurra Yiitjuku walytja tjuṯa yunypa nyinanytjaku. Katutjalanyurra kutu tjapira waḻkuntjaku. Yalatjinyurra Yiitjuku walytja tjuṯa nyinanytjaku. Katutjalu nyurrangarrinya yalatji nintilpayi. Tjinguru nyurrangarrinya tuunlayiki tjuṯangku panypurangkula pungkunytjala, kutunyurra Katutjanya waḻkuntjaku, yalatji kulira, “Katutjalulanya yilta yaṉṯayaṉṯaṉi, Yiitjuku walytjala nyinanyingka.” Tjinguru wati mulyaṯanytjungku nyuntupa mani, yulytja mantjira katinytjala, wiya nyuntu Katutjaku ngurrkurrinytjaku. Katutjanya kutunyurra waḻkura tjapiranytjaku, yalatji kulira, “Katutjalulanya yilta yaṉṯayaṉṯaṉi, Yiitjuku walytjala nyinanyingka.” Tjinguru nyuntupaka miiṉṯa ngarrirra kutu Katutjanya waḻkuranytjaku, yalatji kulira, “Katutjaluṉi yilta yaṉṯayaṉṯaṉi, Yiitjuku walytjaṉa nyinanyingka.” Nyurrangarri yalatji nyinanytjaku Katutjalu nyurranya kuliṉingka.   
\p
\v 19 Katutjaku kurrunpangkunta nintintjala, nyuntu kulira palyantjaku, wiya kulira wantinytjaku.  
\v 20-22 Tjinguru Yiitjuku walytja kutjupangkunta yalatji watjalku, “Kuwarri Katutjalu ngayunya nintiṉu, alatji nyuntu palyantjaku.” Wangka yalatji nyuntu kulira Katutjanya yurrunpa tjapintjaku yalatji, “Katutja, nintilaṉi! Tjinguru wangka palunya yilta nyuntupa?, tjinguru wiya. Tjukarurruṉi nintila!, tjapintjalaṉanta.” Tjinguru Katutjalunta nintilku wangka palunya yilta palumpa. Palunyatjanu nyuntu wangka palunyaku tjukarurru nyinanytjaku. Tjinguru Katutjalunta nintilku wangka palunya yaṉangukuṉu. Palunytjanu nyuntu wangka palunya kulira wantinytjaku.   
\p
\v 23 Katutjalulanya nintilpayi yunypa nyinanytjaku. Palunya ngayulu tjapilpayi, paluru nyurrangarrinya nintintjaku, kutunyurra tjukarurru nyinanytjaku. Ngayulu kuliṉi paluru nyurrangarrinya kutu yaṉṯayaṉṯara tjukarurru kanyintjaku, mayutju Yiitjunya piyuku mantakutu ngalyananyingka.  
\v 24 Yilta, Katutjalu nyurrangarrinya nintilku yalatji tjukarurru nyinanytjaku. Wiya paluru kulira wantiku, wiya, yilta nyurrangarrinya nintilku.   
\p
\v 25 Nyurrangarri nganampa walytja tjuṯa nyinanyi. Nyurrangarri nganampa Katutjanya tjapinma!  
\v 26 Nyurrangarri kulintjaku nganaṉa palya nyinanyi.   
\p
\v 27 Mayutju Yiitjulu ngayunya palumpa waarrkana nyinatjunutjangka ngayulu nyurrangarrinya watjaṉi, piipa ngaatjanya nyurrangarri riitamilantjaku, Yiitjuku walytja yuwankarra tjungurrinytjala.  
\v 28 Katutjanya ngayulu tjapinmalpa, paluru aḻṯururringkula nyurrangarrinya yaṉṯayaṉṯantjaku, kutu.