\id 1JN \h 1 Tjaanakuṉu \toc2 1 Tjaanakuṉu \toc1 Wati Tjaanalu Wakara Tjunutja Piipa Nampa 1 \mt1 Wati Tjaanalu Wakara Tjunutja Piipa \mt1 Nampa 1 \c 1 \s1 Katutjaku wangka tjakultjunkupayinya \p \v 1 Nganaṉatju piipa ngaatjanya wakara wantirriyaṉi, Yiitju Kurayitjanya Katutjaku wangka tjakultjunkupayinya watjalkitjangku. Paluru yaṉangu tjuṯa ngulytjura kana nyinatjunkupayi. Manta ngaranytjawiyangka, paluru kutu nyinangi. Paluru mantangkalpi nyinanytjala nganaṉatju palunya kurungku nyakula kuliṉingi. Marangkuṯarra nganaṉatju palunya yunypangku pampulpayi. \v 2 Yuwa, paluru nganaṉanya yaṉangu tjuṯa ngulytjura palumpa ngurrangka kana nyinatjunkuku. Paluru paapa Katutjala nyinarra ngalya yankula mantangka yutitjarringu. \v 3 Nganaṉatju ilta palunya nyakula palumpa wangka kulira nyurrangarrinya tjakultjunanyi nyurrangarriṯarra kulira palumpa walytjarrinytjaku. Yuwa, nganaṉa tjungu Katutjaku walytja tjuṯa nyinanytjaku, Yiitju Kurayitjakuṯarra. Paluru ilta Katutjaku katja nyinanyi. \v 4 Wangka nganaṉatju wakara nyurrangarrilakutu wantirriyaṉi, nyurrangarri kulira palumpa walytjarrinytjaku. Yalatjinyurra palumpa walytja nyinanytjala nganaṉa yunypa nyinaku. \p \v 5 Wangka ngaatjanyaya kulila! Yiitju paluru palumpa katjangku nganaṉala yalatji watjaṉu. Katutjanyakunyu kutu tjukarurru nyinanyi, wiya paluru kuya palyalpayi. \p \v 6 Tjinguru yaṉangungku watjaṉi, “Ngayulu Katutjaku walytja tjukarurru nyinanyi.” Yalatji paluru watjara tjinguru yankula kuya kutu palyanmalpa. Yalatji nyinarra wiya Katutjaku walytja tjukarurru nyinanyi, ngunytjinytju. Nganaṉa kuliṉi paluru ngunytji watjaṉi, “Ngayulu Katutjaku walytja tjukarurru nyinanyi.” \v 7 Yalatji nguwanpa nganaṉa wiya kuya kutu palyantjaku, Katutjaku nganaṉa tjukarurru kutu nyinanytjaku, Katutjanya kutu tjukarurru nyinanytja nguwanpa. Yalatji nyinarra nganaṉa palumpa walytja yunypa nyinaku. Nganaṉa tjinguru kuya palyantjala Yiitjulu nganampa kuya waṉiku. Paluru yurrunpa watiyangka waralyngarala ngurrka yintirra mirrirringu, nganampa kuya waṉinytjaku. \v 8 Tjinguru Yiitjuku walytjangku yalatji watjalku, “Ngayulu Katutjaku tjukarurru nyinanyi, wiyaṉa kuya palyaṉi.” Yalatji kulira nganaṉa kulilku walytjangku, “Paluru ngunytji watjaṉi. Nganaṉa nyinarra aṉangu winkingku kuya palyalpayi.” \v 9 Nganaṉa kuya palyara Katutjanya tjapintjaku, kuya nganampa waṉinytjaku. Nganaṉa yalatji tjapintjala paluru ilta kuyalampa waṉiku. Paluru kuya yuwankarra nganampa waṉiku. \v 10 Yirriṯi Katutjalu watjaṉu, “Yaṉangu winkingku kuya palyalpayi.” Tjinguru Yiitjuku walytjangku yalatji watjalku, “Ngayulu Katutjaku tjukarurru nyinanyi, wiyaṉa kuya palyaṉi.” Yalatji kulira nganaṉa kulilku, “Paluru ngunytji watjalpayi. Katutjalu ilta watjaṉu, nganaṉa winkingku nyinarra kuya palyalpayi, wiya Katutjalu wangka palunya ngunytji watjaṉu, wiya.” \c 2 \s1 Yiitju Kurayitjalu nganaṉanya yaṉṯayaṉṯalpayi \p \v 1 Walytja tjuṯa, wangka ngaatjanya nyurrangarri kulintjaku purinypangku. Wiyanyurra kuya palyara nyinanytjaku. Ngayuku walytja tjuṯa yiltanyurra nyinanyi. Yalatjinyurra kulintjaku. Tjinguru Yiitjuku walytjangku kuya palyalku. Yalatji palyara Yiitjunya tjapintjala paluru Katutjanya tjukarurrungku tjapilku, yaṉangu palumpara kuya waṉinytjaku. \v 2 Yiitju Kurayitjanya tjawirrilyi nguwanpa waralyngarala mirrirringu nganampa kuya waṉinytjaku. Paluru ilta nganampa kuya waṉipayi, yaṉangu kutjupa tjuṯakuṯarra ngurra tjuṯawana nyinapayi tjuṯaku. \p \v 3 Nganaṉa tjinguru Katutjaku wangka kulira wangka palulawana tjukarurru nyinaku. Yalatji tjukarurru nyinarra nganaṉa nintingku kulilku, “Yilta, ngayulu Katutjaku walytja nyinanyi.” \v 4 Tjinguru yaṉangu kutjupangku yalatji watjalku, “Ngayulu Katutjaku walytja nyinanyi.” Yalatji watjara paluru nyinarra Katutjaku wangkaku munupinarringkula nyinamalpa. Nganaṉa palunya nyakula kulilku, “Paluru ngunytji watjaṉingi, paluru wiya Katutjaku walytja nyinanyi.” \v 5 Tjinguru yaṉangu kutjupangku yalatji watjalku, “Ngayulu Katutjaku wangkaku tjukarurru nyinanyi.” Yalatji watjara paluru Katutjaku kutu tjukarurru nyinaku. Nganaṉa palunya nyakula kulilku, “Yaṉangu nyarratja ilta Katutjaku yunytju nyinanyi.” Tjinguru nganaṉa yaṉangu palunya nguwanpa tjukarurru nyinarra nganaṉa walytjangku kulilku, “Ngayulu ilta Katutjaku walytja nyinanyi, palumpa wangkaṉa kulira tjukarurru nyinapayi.” \v 6 “Ngayulu Yiitjuku nyinanyi.” Yalatji watjara nganaṉa Yiitjunya nguwanpa tjukarurru nyinanytjaku. \s1 Yiitjulu watjaṉutja \p \v 7 Walytja tjuṯa, wangka ngaatjanyaya kulila! Ngayulu wiya wangka kutjupa nyurrangarrinya nintiṉi, wangka panyapa ngayulu piyuku nyurrangarrinya nintiṉi yunytjurringkula nyurranku nyinanytjaku. Yalatjinyurra nyinanytjaku ingkaṯa tjuṯangku nyurrangarrinya kutu nintilpayi. \v 8 Wangka palunya Yiitju Kurayitjalu nganaṉanyatju irriṯi watjaṉu. Nyurrangarrilpi wangka ngaatjanya piyuku kuliṉi ngayulu palulawana nintiṉingka. Nyurrangarri kuliṉi, yaṉangu tjuṯangkulpi Yiitjukuṉu wangka kulira palumpa walytjalpiya nyinarra waṉinyi ngurra winkiwana. \v 9-11 Tjinguru yaṉangungku watjalku, “Ngayulu Yiitjuku walytja tjukarurru nyinanyi.” Yalatji watjara tjinguru paluru yaṉangu kutjupaku yunytjuwiya nyinaku. Yalatjira kutu yunytjuwiya nyinarra wiya paluru Yiitjuku walytja nyinaku, Yiitjuku ngurrpa nguwanpa nyinaku. Paluru puṯu kulilku tjukarurru nyinakitjangku, paluru wiyawanalpi nyinaku. Yaṉangu palunya nguwanpa wiya, nganaṉa nyinanytjaku, yaṉangu kutjupa tjuṯaku nganaṉa yunytjurrirra nyinanytjaku. Yalatji nyinarra nganaṉa yilta Yiitjuku walytja tjukarurru nyinaku, kutjupangku nganaṉanya puṯu kulilku panypurangkukitjangku. Yaṉangu palumpa walytjaku yunytjurringkula nyinarra Yiitjulawana tjukarurru nyinanyi. Yiitjuku walytja nyinarra, wiya kuya palyalkitja paluru yunytjurripayi. \p \v 12-14 Walytja tjuṯa, wangka ngaatjanyaya kulila! Nyurrangarri kuya palyantjala Yiitju Kurayitjalu kuya nyurrangarrimpa waṉipayi. Paluru irriṯi watiyangka waralyngarala mirrirringu yaṉanguku kuya waṉikitja, nyurrangarrimpaṯarra. Nyurrangarri paapa Katutjaku walytja palya tjuṯa nyinanyi. Tjiḻpi tjuṯa wulkumina tjuṯaṯarra, wangka ngaatjanyaya kulila! Katutjalu Yiitjuluṯarra uwankarra irriṯi palyalpayi. Palya nyurrangarri irriṯi Yiitjuku wangka kulira palumpa walytjarringu. Palyanyurra kutu palumpa walytja nyinanyi. Yangupala tjuṯa, kungka yukarra tjuṯaṯarra, wangka ngaatjanyaya kulila! Yiitjuku wangka kulira palya nyurrangarri tjukarurru nyinanyi, wiyanyurra mamuku walytja tjuṯa nyinanyi. Yiitjuku walytjanyurra kutu nyinanyi Katutjaku wangkawana. \p \v 15 Yuwankarrangkunyurra wangka ngaatja kulintjaku. Yaṉangu tjuṯaya ngurra kutjupa kutjupawana Katutjaku yunytjurripayiwiya nyinanyi. Paluru tjana kuya palyara nyinanyi. Wiya nyurrangarri palunya tjananya nguwanpa nyinanytjaku, tjukarurrunyurra Katutjaku nyinanytjaku. Tjingurunyurra palunya tjananya nguwanpa nyinarra wiyanyurra Katutjaku yunytjurripayi nyinaku. \v 16-17 Yiltaya paluru tjana wiyawana nyinanyi. Tjaampalangkuyanku walytjangku puḻkawaṉinyi, “Ngayuluṉa mayutju nyinanyi, tjana ngayunya kulintjaku.” Tjaampalangku kuya palyalkitjangku kulira kutu kuya palyalpayi. Tjaampalangkuya yulytjapa mani nyakula mulyaṯangku mantjilpayi. Tjaampalaya kutjupaku miiṯatjarra yankupayi. Katutjalu tjananya wiya yalatji nintiṉu. Paluru tjana ilta rawawiya nyinarra wiyarringkukuya. Katutjaku walytja tjuṯa mantangka tjukarurru nyinarra kana kutu nyinamalpa. \s1 Yaṉangu nguwanpa kutjupa ngalyanku Kurayitjaku yunytjuwiya \p \v 18 Walytja tjuṯa, wangka ngaatjaya kulila! Katutjalu watjara wantingutja yuḻṯa paluru yilarringulpi, manta ilkariṯarra wiyarringku. Yuḻṯa palula yurrunpa yaṉangu kutjupa ngalyanku Kurayitjaku yunytjuwiya. Yirriṯi tjana nyurrangarrinya yalatji tjakultjunkupayi. Kurayitjaku yunytjuwiya tjuṯa ngurra tjuṯawana kuwarri nyinanyi. Wangka palunya nganaṉa kulira yalatji kuliṉi, “Yuḻṯa palunya yilarringulpi manta ilkariṯarra wiyarrikuku.” \v 19 Paluru tjana, Kurayitjaku yunytjuwiya tjuṯangku nganaṉanya Yiitjuku wangka wiyawanangku nintilpayi. Tjana ngunytjinytju tjuṯa nyinanyi, wiyaya Yiitjuku walytja ilta. Tjinguru tjana Yiitjuku walytja tjuṯa nyinarra nganaṉalawanaṯarra tjana kutu nyinamara. Wiya. Tjana nganaṉanya wantirra kutu yanu. Nganaṉa kuliṉi wiyaya Yiitjuku walytja tjuṯa nyinanyi, wiyalpi. \v 20 Nyurrangarri palya tjuṯa nyinanyi. Yiitju Kurayitjalu nyurrangarrila palumpa kurrunpa tjarrpatjunutjangka nintingkunyurra kuliṉi, palumpa wangka yilta ngaranyi. \v 21-22 Yiitjukuṉu wangka palunya nintingkunyurra kuliṉi, tjukarurru tjanala nyurrangarri wangka palulawana tjakultjunkupayi. Wiya tjanala nyurrangarri wangka kutjupawana tjakultjunkupayi, wiya. Nintingkunyurra kuliṉi paluru tjana wiyawanangku tjakultjunkupayi yalatji, “Yiitjunyakunyu wiya Katutjaku katja nyinanyi, wiya palurukunyu Kurayitjanya nyinanyi.” Tjana yilta ngunytjinytju tjuṯa nyinanyi. Yiitju Kurayitjaku yunytjuwiya nyinarra tjana Katutjakuṯarra yunytjuwiya nyinanyi. \v 23 Palunya tjananya nguwanpa tjinguru yaṉangu kutjupa Yiitju Kurayitjaku yunytjuwiya nyinarra paapa Katutjakuṯarra paluru yunytjuwiya nyinanyi. Tjinguru yaṉangu kutjupa Yiitju Kurayitjaku walytjarrirra Katutjaku walytjaṯarra paluru nyinaku. \v 24 Yirriṯi tjana Yiitjukuṉu wangka palunya nyurrangarrinya nintiṉingi. Wangka palulawananyurra kutu tjukarurru nyinanytjaku. Yalatjinyurra nyinarra kutu Yiitjuku walytja tjuṯa nyinaku, paapa Katutjaku walytjaṯarranyurra nyinaku. \v 25 Yalatji nganaṉa palumpa kutjarraku walytja nyinarra nganaṉa kana kutu nyinamalpa, irriṯi Yiitjulu kala, yalatji watjaṉu. \p \v 26 Piipa ngaatja ngayulu wakara nyurrangarrilakutu wantirriyaṉi yalatji pinangkatjunkukitjangku. Wiyawana nintilpayi palumpa tjanampa wangka wiyanyurra kulintjaku. \v 27 Nintilpayi ngananya nyinanyi?, Katutjaku kurrunpa. Yiitju Kurayitjalu kurrunpa palunya nyurrangarrilakutu wantirriyara tjarrpatjunu. Kurrunpa paluru nyurrangarrinya nintinmalpa. Paluru nyurrangarrinya wiya ngunytjinytjunku wangka tjukarurru kutju nyurrangarrinya nintilku. Yiitju Kurayitjaku walytja tjukarurruya nyinama!, kurrunpa paluru nyurrangarrinya yalatji nyinanytjaku nintiṉi. \s1 Katutjaku walytjanyurra nyinanyi \p \v 28 Walytja tjuṯa, wangka ngaatjaya kulila! Ngayulu piyuku nyurrangarrinya watjaṉi, Yiitju Kurayitjaku walytja tjukarurruya nyinama! Yalatjinyurra kutu tjukarurru nyinanytjaku. Nganaṉa tjungu yalatji kutu tjukarurru nyinanytjaku. Yalatji nganaṉa nyinarra yunypa nyinaku, Yiitjunya mantakutu piyuku ngalyananyingka. Tjinguru nganaṉa wiyawana kutu nyinarra nganaṉa kuṉṯarringkula yunypawiyalpi nyinaku, Yiitjunya piyuku ngalyananyingka mantakutu. \v 29 Yiitju Kurayitjanya kutu tjukarurru nyinangutjangka nyurrangarri ninti nyinanyi. Paluru Katutjaku katja walytja nyinanyi. Yaṉangu Yiitjunya nguwanpa tjukarurru nyinanytjaku. Yalatji tjukarurru nyinarra yaṉangu paluru Katutjaku walytja nyinaku, katja nguwanpa, yuṉṯalpa nguwanpaṯarra. \c 3 \s1 Katutjaku walytja tjuṯa \p \v 1 Wangka ngaatjaya kulila! Paapa Katutjanyalampa yunytjulingku nyinanyi. Paluru nganaṉanya watjaṉi, “Nyurrangarri ngayuku walytja tjuṯa nyinanyi.” Wangka palumpa yilta ngaranyi, nganaṉa yilta Katutjaku walytja tjuṯa nyinanyi. Yiitju Kurayitjanya Katutjaku walytja nyinangutjangka yaṉangu tjuṯangku wiya kuliṉingi. Nganaṉaṯarra Katutjaku walytja nyinanyingka paluru tjana wiya kuliṉi. \v 2 Katutjaku walytja tjuṯangku nganaṉa nyinarra kuya palyalpayi. Nganaṉa yalatji puṯu kuliṉi, “Ngula, nganaṉa nyaa nguwanpa nyinaku?, Yiitjunya mantakutu piyuku ngalyananyingka.” Yalatji nganaṉa kulintjaku, “Yuḻṯa palula nganaṉa Yiitjunya nguwanpa nyinaku, tjukarurru.” Katutjalu yuḻṯa palula nganaṉanya yaṉangu kutjupalku, wiya nganaṉa kuya palyanmalpa. Yiitjunya nguwanpa nganaṉa nyinaku. \v 3 Yalatjila nyinakitja Yiitjunya nguwanpa paṯara tjukarurru kutu nyinanytjaku. \p \v 4 Yaṉangungku kuya palyara Katutjaku wangka kilytjuntananyi. \v 5 Yiitju Kurayitjanya tjukarurru nyinanyi kuya palyantjawiya. Paluru wiya yunytjurringanyi kuya palyalkitja. Paluru mantakutu ngalya yanu, nganampa kuya waṉikitja. Yalatjikunyurra ninti nyinanyi. \v 6 Yiitjunya nguwanpa nganaṉa wiya yunytjurringkupayi kutu kuya palyalkitja, tjukarurru nyinakitja nganaṉa yunytjurringanyi. Tjinguru yaṉangu kutjupa tjuṯa yunytjurringkupayi kutu kuya palyalkitja. Tjana yalatji nyinarra kuya kutu palyara wiya Yiitju Kurayitjaku walytja nyinanyi, palumpa walytjawiyalpiya nyinanyi. \p \v 7 Tjinguru wiyawana nintilpayingku nyurrangarrinya yalatji watjalku, “Palyanyurra Yiitjuku walytjarringkula kuya kutu palyantjaku, wiyanyurra tjukarurru kutu nyinanytjaku.” Wangka panyapa kuliranyurra wantinytjaku. Walytja tjuṯa, wangka ngaatjaya tjukarurru kulila! Tjinguru yaṉangu Yiitjuku tjukarurru nyinanytjala, Katutjalu watjalku, “Yaṉangu palatja tjukarurru nyinanyi ngayuku walytja, paluru Yiitjunya nguwanpa tjukarurru nyinanyi.” \v 8 Tjinguru yaṉangu kutjupangku kuya palyanmalpa, wiya paluru Katutjaku walytja nyinaku, mamuku mayutjuku walytja paluru nyinaku. Irriṯi Katutjalu manta ilkariṯarra palyantjala mamu paluru kuya palyalpayi, kuwarri kutu paluru kuya palyaṉi. Paluru yaṉangu tjuṯa tjingapunganyi kuya palyantjaku. Katutjaku katja paluru mantakutu ngalyanu nganaṉanya nintilkitja, kuya palyalwiya nganaṉa nyinanytjaku. Yalatji nganaṉanya nintiṉu mamuku mayutjukuṉu wangkala wantirra Yiitjuku walytjalpi nyinanytjaku. \v 9 Tjinguru yaṉangu Katutjaku walytja nyinarra wiya yunytjurringanyi kuya kutu palyantjakitja. Katutjalu palunya ngulytjura rapaṉi paluru tjukarurru nyinanytjaku. \v 10 Yalatji yaṉangu tjuṯa Katutjaku walytja nyinanyi, yaṉangu kutjupa tjuṯa mamuku walytja nyinanyi. Tjinguru nganaṉa yalatji puṯu kulilku, “Tjinguru yaṉangu palatja Katutjaku walytja nyinanyi?, tjinguru mamuku walytja nyinanyi?” Wiya nganaṉa yalatji puṯu kulintjaku. Tjinguru nganaṉa yaṉangu nyaku kuya kutu palyantjala. Paluru wiya yaṉangu kutjupaku yunytju nyinaku. Paluru ilta mamuku mayutjuku walytja nyinanyi, wiya Katutjaku walytja nyinanyi. \s1 Yunytjurringkula nyurrangarri nyinanytjaku \p \v 11 Yirriṯi Yiitjuku walytja tjuṯangku nyurrangarrinya tjakultjunkupayi yalatji, “Nyurrangarri yaṉangu kutjupa tjuṯaku yunytjurrirra nyinanytjaku.” \v 12 Irriṯi wati kutjupa yini Kayinanya kuya nyinapayi. Nganaṉa wiya palunya nguwanpa kutjupaku yunytjuwiya nyinanytjaku. Paluru palumpa maḻanypa Yipulaku yunytjuwiya nyinarra mirri pungu palunya, mamuku walytjangku. Nyaanguru palumpa maḻanypa pungu? Paluru palumpa maḻanypaku yunytjuwiya nyinarra mulyarrarripayi, Yipulanya tjukarurru nyinanytjala. Kayinalu kuya kutu palyalpayi. \v 13-14 Walytja tjuṯa, wangka ngaatjanyaya kulila! Yaṉangu Katutjaku ngurrpa tjuṯa nyurrangarrimpa yunytjuwiya nyinaku. Palunya tjananya nguwanpa wiya nganaṉa kutjupa tjuṯaku yunytjuwiya nyinanytjaku, Katutjalulanya ngula watjara warungka waṉitjipingka. Nganaṉa tjanampa yunytju nyinanytjaku. Nganaṉa tjanampa yunytju nyinarra yalatji kulilku, “Nganaṉa yilta Katutjaku walytjalpi nyinanyi. Palurulanya nganaṉanya kana kanyilku palumpa ngurrangka.” \p \v 15 Yaṉangu kutjupaku puntura yunytjuwiya nyinarra Katutjaku wangka kilytjuntanku. Tjinguru yaṉangu kutjupangku yaṉangu kutjupaku yunytjuwiya nyinarra mirri pungku. Paluruṯarra yalatji mirri pungkula Katutjaku wangka kilytjuntanku. Yalatji puntura yunytjuwiya nyinapayinya, mirri pungkupayinyaṯarra wiya kana kutu nyinaku Katutjaku ngurrangka. Wangka yalatjiku nganaṉa ninti nyinanyi. \v 16 Yiitjunya nganampa puntura yunytju nyinarra paluru mirrirringu nganampa kuya waṉikitja. Palulanguru nganaṉa nintingkulpi kuliṉi Yiitjunyalampa yunytjulingku nyinanyi. Palunya nguwanpa nganaṉa yaṉangu kutjupa tjuṯaku yunytju nyinanytjaku. Yalatji yunytju tjanampa nyinarra nganaṉa tjukarurru tjanampa kutu palyantjaku. Tjinguru Yiitjuku yunytjuwiya tjuṯangku Yiitjuku walytja kutju mirri pungkukitja ngaranytjala nganaṉalpi yankula palula patjuri ngaranytjaku, nganaṉanyalpi tjana mirri pungkunytjaku. Nganaṉanya tjana mirri pungkunytjala Yiitjuku walytja paluru pakara kana yankunytjaku. \v 17 Tjinguru Yiitjuku walytjangku kulilku, “Ngayulu Katutjaku yunytju nyinanyi, palumpa walytja.” Yalatji kulira tjinguru paluru mani mangarriṯarra mantjilku. Mantjira paluru yankula nyaku yaṉangu kutjupa mangarriwiya nyinanyingka. Yaṉangu palumpa paluru aḻṯururringkula mangarri palunya yungkunytjaku. Wiyangka ngunytjinytju paluru nyinanyi, wiya Katutjaku walytja yilta nyinanyi. \v 18 Walytja tjuṯa, wangka ngaatjanyaya kulila! Yaṉangungku kutjupa ngunytji yalatji watjalku, “Ngayulu yaṉangu tjuṯaku yunytju nyinapayi.” Yalatji watjara paluru wiya yaṉangu tjuṯanya aḻṯururringkula yungkuku. Nganaṉa wiya palunya nguwanpa nyinanytjaku. Nganaṉa ilta yalatji watjantjaku, “Ngayulu yaṉangu tjuṯaku yunytjulingku nyinanyi.” Yalatji watjara nganaṉa kutjupa tjuṯanya aḻṯururringkula yungkunytjaku. \p \v 19 Tjinguru nganaṉa yaṉangu tjuṯaku yunytju nyinarra nganaṉa tjanampa tjukarurru palyalku. Yalatji tjukarurru palyara nganaṉa yilta yalatji kulilku, “Ngayulu Katutjaku tjukarurru nyinanyi, palumpa walytja.” Yalatji kulira nganaṉa Katutjanya rapangku tjapilku. \v 20 Tjinguru Yiitjuku walytja kutjupangku alatji kulilku, “Ngayuluṉa mungutja. Katutjanya kutju nganampa mayutju tiṉa nyinanyi. Paluru wiya ngayuku wangka kulilku ngayulu tjapintjala.” Yalatji kulira paluru tjapilkitjangku puṯu kulilku. Paluru yalatji kulintjaku, “Katutjalu nintingku kuliṉi, ngayulu ilta palumpa walytja nyinanyi. Palya ngayulu palunya tjapintjaku.” Yalatji kulira paluru Katutjanya rapangku tjapintjaku. \v 21-22 Walytja tjuṯa, wangka ngaatjanyaya kulila! Nganaṉa kuṉṯakuṉṯawiyangku Katutjanya tjapilkitjangku yalatji kulintjaku, “Yilta Katutjaluṉi kulira tjukarurru palyalku.” Katutjalu yalatji kulilku, “Ngaatja ngayuku walytja tjukarurru nyinapayingku tjapiṉiṉi. Kulira ngayulu palumpa yungku.” \v 23 Katutjalu yalatji watjaṉi, “Yaṉangu tjuṯa Yiitjuku walytjarringkula yaṉangu kutjupa tjuṯakuya yunytju nyinanytjaku.” Yalatji Yiitju Kurayitjalu nganaṉanya nintilpayi, nganaṉa yaṉangu kutjupa tjuṯaku yunytju nyinanytjaku. \v 24 Katutjaku wangkaku nganaṉa tjukarurru nyinarra palumpa walytja kutu nyinamalpa. Paluru nganaṉanya yilangku yaṉṯayaṉṯanmalpa. Paluru nganaṉanya palumpa kurrunpa tjarrpatjunutjangka nganaṉa wangka yalatji kuliṉi, “Nganaṉa yilta Katutjaku walytja nyinanyi, palumpa kurrunpangkulanya rapalpayi nganaṉa palumpa waarrka palyantjaku.” \c 4 \s1 Wangka nintilpayinya nganaṉa kulintjaku, “Tjinguru Katutjaku kurrunpangku ngaatjanya nintiṉi?, tjinguru wiya” \p \v 1 Walytja tjuṯa, wangka ngaatjanyaya kulila! Wangka nintilpayingku nyurrangarrinya nintintjala, nyurrangarri yalatji kulintjaku, “Tjinguru wangka palatja Katutjakuṉu yilta, tjinguru wangka kutjupa.” Wangka nintilpayi tjuṯangku Katutjaku wangka nguwanpa ngunytji tjakultjurinanyi. \v 2 Yaṉangu nintilpayingku nyurrangarrinya tjinguru yalatji tjakultjunku, “Yiitju Kurayitjanya Katutjakuṉu nyinanyi, paluru mantakutu ngalyankula yaṉangu yilta nyinangi.” Wangka yalatji tjakultjunutjangka kuliranyurra kulintjaku yalatji, “Yilta, nintilpayi palangku nganaṉanya Katutjakuṉu wangka tjukarurru tjakultjunanyi.” \v 3 Tjinguru wangka nintilpayi kutjupangku nyurrangarrinya yalatji tjakultjunku, “Yiitjunya mungutja, wiya paluru Katutjaku katja nyinangi.” Yalatji nyurrangarrinya tjakultjunanyingka wangka palumpanyurra kulira wantinytjaku, wiya paluru Katutjaku wangka tjukarurru nintiṉi. Paluru Yiitjuku yunytjuwiya nyinanyi. Irriṯinyurra kuliṉu, mayutju kutjupa ngula ngalyankuku Yiitjuku yunytjuwiya. Palumpa walytja tjuṯa kuwarri mantangka nyinanyi, Yiitjuku yunytjuwiya. \p \v 4 Walytja tjuṯa, wangka ngaatjanyaya kulila! Katutjaku walytja tjuṯanyurra nyinarra wiyawana nintilpayi tjuṯanyurra kulira wantinytjaku. Paluru tjana mamukuṉu ngangkaritjarra nyinanyi, kanya nyurrangarri Katutjaku kurrunpatjarra nyinanyi. Kurrunpa paluru nyinanyi ngangkari puntutjarra. Kurrunpa paluru nyurrangarrinya rapara kanyilpayi. \v 5 Yunytjuwiya paluru tjana Katutjaku ngurrpa nyinanyi. Palumpa tjanampa wangka yaṉangu tjuṯangku Katutjaku ngurrpa tjuṯangku kulira yunyparringkupayi. \v 6 Nganaṉa Katutjaku walytja tjuṯa nyinanyi. Yaṉangu kutjupa tjuṯa nganampa wangka kulira yunyparringanyi, Katutjaku walytja tjuṯa. Yaṉangu kutjupa tjuṯa, Katutjaku yunytjuwiya tjuṯangku nganampa wangka Yiitjunyatjarra kulira wantipayi. Tjinguru nintilpayingku nganampa wangka Yiitjunyatjarra kulintjala nganaṉa yalatji kulilku, “Paluru ilta Katutjakuṉu wangka nintiṉi.” Nintilpayi ngunytjinytju tjuṯangku nganampa wangka Yiitjunyatjarra kulira wantiku. Yalatji kulira wantinytjala nganaṉa palumpa tjanampa ninti nyinaku. \s1 Katutjanyalampa yunytju nyinanyi \p \v 7 Walytja tjuṯa, wangka ngaatjanyaya kulila! Katutjanya nganampa yunytju nyinanyingka, nganaṉa kutu Yiitjuku walytja tjuṯaku palunya nguwanpa yunytju nyinanytjaku. Nganaṉa tjanampa yalatji yunytju nyinanyingka, Katutjalu kulilku, “Pala tjuṯa yilta ngayuku walytja tjuṯa nyinanyi, tjana yilta tjukarurru nintirringkula nyinanyi.” \v 8 Katutjanya nganampa yunytju nyinanyi. Nganaṉa palunya nguwanpa kutjupa tjuṯaku yunytju nyinanytjaku. Tjinguru yaṉangu yunytjuwiya kutjupa tjuṯaku nyinanyingka nganaṉa kulintjaku, “Yaṉangu palatja wiya Katutjaku walytja nyinanyi, ngunytjinytju nyinanyi, Katutjaku ngurrpa.” \v 9 Yirriṯi Katutjalu palumpa katja mantakutu ngalya wantirriyaṉu mirrirrinytjaku. Palunya nganampa wantirriyaṉu nganaṉa palumpa wangka kulira kana kutu nyinanytjaku. Katja paluru kutju walytja palumpa nyinanyi. Palulanguru nganaṉa yalatji kuliṉi, “Yilta nganampa Katutjanya yunytju nyinanyi. Palumpa katja paluru wiya witira kanyiṉingi ngurra ilkaringka, paluru yaṉangu tjuṯaku nganampa yunytjurringkula, ngalya wantirriyaṉu nganampa waralyngarala mirrirrinytjaku.” \v 10 Ngananya yaṉangu tjuṯaku puntura yunytju nyinanyi?, ilta Katutjanyalampa puntura yunytju nyinanyi. Yalatjilampa puntura yunytju nyinarra palumpa katja ngalya wantirriyaṉu nganampa mirrirrinytjaku. Paluru watiyangka mirrirringutjangka Katutjalulampa kuya waṉingu. Nganaṉa palumpa yunytju nyinanyi, kanya palurulampa yilta puntura yunytju nyinanyi. \v 11 Katutjanyalampa yalatji puntura yunytju nyinanyingka, nganaṉa yaṉangu kutjupa tjuṯaku palunya nguwanpa yunytju nyinanytjaku. \v 12 Yaṉangu tjuṯangku wiya Katutjanya kurungku nyakupayi, nganaṉanya kutju tjana nyakupayi, palumpa walytja tjuṯa. Nganaṉa Yiitjuku walytja kutjupa tjuṯaku yunytju nyinanyingka tjana nyakula kulilku, “Tjana Katutjaku walytja tjuṯa tjukarurru nyinanyi. Nganaṉa Katutjanya nyakuwiyangku palumpa walytja tjuṯalpi yuti nyanganyi.” \p \v 13 Katutjalu nganaṉanya palumpa kurrunpa tjarrpatjunutjangka nganaṉa nintingku yalatji kuliṉi, “Nganaṉa rapangku Katutjaku waarrka palyaṉi palumpa kurrunpalanya tjarrpatjunutjangka. Nganaṉa yilta palumpa walytja tjuṯa nyinanyi. Paluru nganaṉanya nyinarra yaṉṯayaṉṯaṉi.” \v 14 Paluru palumpa katja mantakutu ngalya wantirriyaṉu nganaṉa palumpa wangka kulira kana kutu nyinayananytjaku. Nganaṉatju palunya kurungku nyakula wangka Katutjaku katjatjarranya yaṉangu tjuṯangka tjakultjunkupayi. \v 15 Tjinguru yaṉangungku nguḻuwiyangku yaṉangu tjuṯangka yalatji tjakultjunku, “Ngayulu Yiitjuku walytja nyinanyi, paluru ilta Katutjaku katja nyinanyi.” Paluru wangka panyapa tjakultjurinkula ilta Katutjaku walytjalingku nyinanyi, Katutjalu palunya yaṉṯayaṉṯanmalpa. \v 16 Yaṉangu paluru yalatji kulinmalpa, “Katutjanya yilta ngayuku yunytju nyinanyi.” Katutjanya nganampa yuwankarraku yunytju nyinanyi. Nganaṉa kutjupa tjuṯaku palunya nguwanpa yunytju nyinanytjaku. Nganaṉa yalatji yunytju tjanampa nyinanyingka Katutjalu nganaṉanya yaṉṯayaṉṯanmalpa, nganaṉa yilta palumpa walytja tjuṯa nyinamalpa. \v 17 Yirriṯi Yiitjunya nyinapayi yunytju yaṉangu tjuṯaku. Nganaṉa tjanampa yaṉangu tjuṯaku Yiitjunya nguwanpa yunytju nyinanytjaku. Yalatji nganaṉa tjanampa yunytju nyinanyingka ngula Katutjalu wiya nganaṉanya kuutawutjungka warukutu watjara iyalku, nganaṉa nguḻuwiya kuutawutjungka ngaraku. \v 18 Tjinguru yaṉangu yilta Katutjaku yunytju nyinarra wiya paluru palumpa nguḻu nyinaku, wiya. Tjinguru yaṉangu kutjupa Katutjaku nguḻunguḻu nyinarra wiya Katutjaku yunytju nyinaku. Paluru yalatji kulilku, “Tjinguru Katutjaluṉi watjara warukutulpi iyalku, ngayulu kuya palyara nyinapayimaṉṯu.” \v 19 Katutjanya nganampawarri yunytju nyinangu, palunyatjanu nganaṉa palumpalpi ngaparrtji yunytju nyinanyi. Nganaṉalpi yaṉangu tjuṯaku yunytju nyinanytjaku. \v 20 Tjinguru yaṉangu kutjupaku yunytjuwiya nyinarra yaṉangu kutjupangku yalatji watjalku, “Ngayulu Katutjaku yunytju nyinanyi.” Yaṉangu paluru ngunytjinytju ngunytjinytju nyinanyi. Yaṉangu yuwankarraku nganaṉa yunytju nyinarra Katutjakuṯarra yunytju nyinaku. Tjinguru nganaṉa yaṉangu walytjaku yunytjuwiya nyinarra Katutjakuṯarra yunytjuwiya nyinaku. \v 21 Wangka palunya Katutjalulanya watjaṉu nganaṉa palumpa tjukarurru nyinarra yaṉangu kutjupa tjuṯaku yunytju nyinanytjaku. \c 5 \s1 Yunytjuwiya tjuṯangku nganaṉanya puṯu tjingapungku \p \v 1-2 Yaṉangu Katutjaku walytja nyinarra yalatji kulilpayi, “Katutjalu yilta Yiitjunya mantakutu ngalya wantirriyaṉu, paluru yilta Kurayitjanya nyinanyi.” Nganaṉa Katutjaku yunytju nyinarra palumpa katjakuṯarra yunytju nyinanytjaku. Nganaṉa Katutjaku yunytju nyinarra palumpa walytja tjuṯakuṯarra yunytju nyinanytjaku. Nganaṉa yalatji palumpa wangkawana tjukarurru kutu nyinanytjaku. \v 3 Nganaṉa Katutjaku wangkawana tjukarurru nyinanytjala, paluru kulilku, “Yilta, ngaa tjuṯa ngayuku yunytju nyinanyi, tjana ngayuku wangkawana tjukarurru nyinanyi.” Nganaṉa wiya yalatji kulintjaku, “Ngayulu Katutjaku wangkawana puṯu tjukarurru nyinaku.” \v 4-5 Nganaṉa Yiitju Kurayitjanya Katutjaku katja kulintjala Katutjalu nganaṉanya rapalku palumpa wangkawana tjukarurru nyinanytjaku, kutu kuya palyara nyinanytjawiya. \p \v 6 Yurrunpa Yiitju Kurayitjanya watiyangka waralyngaranytjala tjuulytjingku kuḻaṯatjarrangku kultu wakaṉu. Ngurrka kapitjarra yintingu, wiya kapi kutju yintingu, ngurrka kapitjarra. Yiitjunya yilta yalatji mirrirringutjangka Katutjaku kurrunpangku nganaṉanya nintilpayi. Kurrunpa paluru nganaṉanya tjukarurru nintilpayi, wiyawana wiya, tjukarurrulingku kutju. \v 7-8 Nganaṉa yalatji kulintjaku, “Yiitjunya nganampa yilta mirrirringu. Nganaṉa yalatji kuliṉi, yaṉangu tjuṯangku kurungku nyakula tjakultjunutjangka nganaṉanya. Ngurrka kapitjarra palula yaṉangunguru yintingu. Katutjaku kurrunpangkuṯarra nintilpayi Yiitjunya yilta nganampa mirrirringu.” \v 9 Yaṉangu tjuṯangku kurungku nyakula nganaṉanya tjakultjunanyingka nganaṉa tjanampa wangka kulilpayi. Katutjaluṯarra nganaṉanya watjaṉu palumpa katja wantirriyara. Palumpa wangka nganaṉa yilta kuliṉi kutju paluru tjukarurru watjalpayi. \v 10 Yuwa, Katutjalu nganaṉanya yalatji watjaṉu Yiitjunya palumpa katja wantirriyara. Yaṉangungku Yiitjunya Katutjaku katja kulira walytjarringkula Katutjaku wangkaṯarra kuliṉi. Yaṉangu kutjupangku tjinguru Katutjaku wangka palunya katja wantirriyaṉutjatjarra kulira wantiku. Paluru yalatji kulira wantirra Katutjanya yalatji nguwanpa watjaṉi, “Nyuntu ngunytjinytju, nyuntu wiya nyuntupa katja ngalya wantirriyaṉu.” \v 11-12 Katutjalu wangka kutjupaṯarra yalatji watjaṉu. Yaṉangu Yiitjunya palumpa katja kulira walytjarringanyingka Katutjalu yaṉangu palunya kana kutu kanyilku palumpa ngurrangka. Tjinguru yaṉangu kutjupangku wangka Yiitjunya Katutjaku katjatjarra kulira wantinytjatjanu Katutjaku ngurrangka wiya kana nyinaku. \s1 Yiitjuku walytja nganaṉa kutu kana nyinamalpa \p \v 13 Wangka tjuṯa piipa ngaangka ngayulu wakaṉu nyurrangarri riitarringkula yalatji tjukarurru kulintjaku. Yiitjuku walytjarringkulanyurra kana kutu nyinamalpa Katutjaku ngurrangka. \v 14 Katutjaku wangkawana nganaṉa Katutjanya tjapintjala paluru yilta nganampa wangka kuliṉi. \v 15 Yalatji Katutjalu nganampa wangka kulilpayi. Paluru nganampa wangka kulira wangka palulawana palyalpayi. Yalatjiku nganaṉa ninti nyinanyi. \p \v 16-17 Katutjalu kuliṉi yalatji. Yaṉangu tjuṯangku kuya palyara nyinanyi. Yiitjuku walytjangku kuya kulilwiyangku palyantjala nyurrangarri nyakula yaṉangu palumpa tjapintjaku, kuya palumpa waṉinytjaku. Paluru Yiitjuku tjukarurru kutu nyinarra Katutjaku ngurrangkalpi kana kutu nyinaku. Yiitjuku walytja kutjupangku munupinarringkula kuya kutu palyantjala wiya ngayulu nyurrangarrinya watjaṉi palumpa kutu tjapintjaku. \p \v 18 Nganaṉa yalatji nintingku kuliṉi. Katutjaku walytjangku wiya kuya palyalkitjangku kulira kuya kutu palyalpayi, paluru wiya kuya palyalkitja yunytjurringanyi. Katutjaku katjangku nganaṉanya nintiṉi kuya palyalkitja yunytjurrinytjawiya nyinanytjaku. Yalatji nganaṉa Katutjaku walytja tjukarurru nyinanytjala mamuku mayutjungku nganaṉanya puṯu tjingapunganyi. \v 19 Yaṉangu tjuṯaya Katutjaku yunytjuwiya nyinanyi ngurra tjuṯawana, tjana mamuku mayutjuku walytja tjuṯa nyinanyi, kanya nganaṉa, Yiitjuku walytja kutjupa tjuṯaṯarra Katutjaku walytja tjuṯa nyinanyi. \v 20 Wangka ngaaku nganaṉa ninti nyinanyi. Katutjaku katja Yiitjunya mantakutu ngalya yankula tjananya nintiṉingi. Palumpa wangka kulira nganaṉa yalatji kuliṉi, “Nganaṉa yilta Katutjaku walytja tjuṯa nyinanyi.” Yiitju Kurayitjaku walytjarringkula nganaṉa palumpa ninti nyinanyi. Paluru nganaṉanya kana kutu kanyilku palumpa ngurrangka. \v 21 Walytja tjuṯa, wangka ngaatjanyalpiya kulila! Wiyanyurra Katutjanya nguwanpa kutjupa tjuṯa waḻkuntjaku, Katutjanya kutju waḻkuntjaku.