\id HEB - Oyda New Testament
\ide UTF-8
\h Ibraawe
\toc1 Ibraawe Asuntsis Xaafinttide Kiita
\toc2 Ibraawe
\toc3 Ibr.
\mt1 Ibraawe Asuntsis
\mt2 Xaafinttide Kiita
\imt1 Gele
\ip Hyay kiitize xaafinttidanna, damma madha yellin, fa ammantto ashshodes ukkide ammanze asuntsis. Hyay maxaafize xaafize, Yesuus Kiristtoosa wurssutsin turii Xoozze qonccitsi maaqqidanno Ibraawe asuntsis beezane. Yinna ammanze asuntsi fa ammantte minggode fana unttana mintsitsane. E yinne hyaydzdzii aafe qofa waanna mahi beezane.
\ili 1. Yesuusa fa ekkide madhite Ades turo kiitinttide medhina Xoozze Na7a. E Xoozze Na7a maaqqide gisho Gal77a Caaqo wode yeze nabuntsappa, kiitanchchuntsappan Museppa kattara.
\ili 2. Yesuusa Gal77a Caaqo kahinuntsappa gaama aadhize medhina kahine maaqqidanno Xoozii fa ommite markkidhida.
\ili 3. Yesuusa baggara ammanze asi nagarappa, zhashimoppan hyayqoppa attane. Yesuusa kahinunts hyalaqa maaqqidanni gaar, zaga Ibraawunts ammano wogaran hyaars zharshora dasho fana benttize atotitsito hyatte turo mahida.
\ip Xaafize Isra7eele asuntsis taarikera gaama erinttide asunts ammano malla mahi ekkii (Zofa 11) hyay maxaafiza nabbabize asuntsana fa ammantte minggode fana qofizane. Yinnii fana, zofane 12 nabbabizuntsi fa aafto Yesuusalla afa gaddii, fa ammantte minggode fanan akko madhan waayen yellikon, un genccode gaar zorane. Wurssutsite zoren tiirize qaalara fa kiitto kusttane.
\iot Aafe Qofuntsi
\io1 Gele qofa: Xoozii Kiristtoosara qonccidanno \ior 1:1-3 \ior*
\io1 Kiristtoosa kiitanchchuntsappa kattara \ior 1:4—2:18 \ior*
\io1 Kiristtoosa Museppan Iyyaasuppa kattara \ior 3:1—4:13 \ior*
\io1 Kiristtoosa kahinetitsita kattara \ior 4:14—7:28 \ior*
\io1 Kiristtoosa caaqita kattara \ior 8:1—9:22 \ior*
\io1 Kiristtoosa zharshita kattara \ior 9:23—10:39 \ior*
\io1 Ammanora yeze \ior 11:1—12:29 \ior*
\io1 Xoozza ufaysse \ior 13:1-19 \ior*
\io1 Anjjon xaatsi qofa \ior 13:20-25 \ior*
\c 1
\s1 Na7ay kiitanchchuntsappa kattara
\p
\v 1 Zaga Xoozii, nu aduntsis nabunts baggara dumma dumma ogera gaama wode ohida. 
\v 2 Yezin hyanna wurssutsi wodite ubbanno eza laatizide mahi alamito E baggara medhdhide fa Na7ay baggara nuus ohida. 
\v 3 Na7ay Xoozze bonchcho foo7izen kumutsi Xoozze Xoozzetitsito ekkii, fa wolqqa qaalara hyanna alamito katii aykkida. Asuntsana un nagarappa geeshidannippa suuba Ubbappa kattara Xoozze mizaqi zalara salo bettida.
\p
\v 4 Ees ingginttide suntsita kiitanchchuntsi suntsappa kattara maaqqidanni fana E unttappa kattara. 
\v 5 Yikke, Xoozii kiitanchchuntsappa oodego,
\q1 «Neenii ta Na7a;
\q2 ta hyayno nees ade maaqqida» gaydo?
\m Woy mahi oodego,
\q1 «Taanii ees ade maaqqada;
\q2 ezin taas na7a maaqqada» gaydo?\x - \xo 1:5 \xo*\xt Maz. 2:7; 2 Sam. 7:14; 1 Zeena 17:13\xt*\x*
\m
\v 6 Mahi Xoozii fa anggis Na7aya hyanna alamite kiittitera,
\q1 «Xoozze kiitanchchuntsi ubba ees goyno»
\m yagayda.\x - \xo 1:6 \xo*\xt Mahe 32:43\xt*\x* 
\v 7 Xoozii kiitanchchuntsi baz ohitera,
\q1 «Xoozii fa Kiitanchchuntsana ayyaana,
\q2 fa aruntsana tama loxe mahine»
\m yagayda.\x - \xo 1:7 \xo*\xt Maz. 104:4\xt*\x* 
\v 8 Yezin fa Na7ay baz ohitera,
\q1 «Xoozzayo, ne ka7itumtta medhinas yene.
\q2 Ne ka7itumtto ne xillotitsara aho.\x - \xo 1:8-9 \xo*\xt Maz. 45:6-7\xt*\x*
\q1
\v 9 Neenii xillotitsi kadhida; iita ixxida.
\q2 Xoozii, ne Laatstse, nena ne lagguntsappa aatsii doorida,
\q2 ufays zayte\f + \fr 1:9 \fr*\fk Ufays zayte: \fk*\ft E ka7itize wode asuntsi ufayssara loytsi eza ka7itisizanno beezane. \ft*\f* nena tizhida»
\m yagayda. 
\v 10 Xoozii mahi,
\q1 «Laatstsayo, tiino neenii sa7a medhdhida;
\q2 saluntsi ne kushe oocha.\x - \xo 1:10-12 \xo*\xt Maz. 102:25-27\xt*\x*
\q1
\v 11 Yentses ubba dhaboda;
\q2 yezin ne yessada.
\q2 Un ubba afula fana hyal7oda.
\q1
\v 12 Ne magaraja fana xaaxoda;
\q2 mahi un afula fana cinggoda.
\q1 Yezin neenii ubba wode nena;
\q2 ne beritan hyal7oos»
\m yagayda. 
\v 13 Yezin Xoozii kiitanchchuntsappa oodego,
\q1 «Taanii ne morkkuntsana ne tohita
\q2 yedhdhize bessi mahode wontsis,
\q1 hyanne taappa mizaqi zalara betto» gaydo?\x - \xo 1:13 \xo*\xt Maz. 110:1\xt*\x*
\m
\v 14 Kiitanchchuntsi ubba atotitsi denggodes yeze asuntsana maaddodes Xoozii kiittide ayyaanuntsana baane?
\c 2
\s1 Damma anjjo
\p
\v 1 Yinnii gisho, nuunii si7ide turippa melle bessa ekinttaame gaar yinna si7idanno mintsii naagodes beezane. 
\v 2 Yikke, kiitanchchuntsi baggara ohinttide qaaltta turo maaqqiko, eza qohen kiitinttanxi ixxe firdda ki7izebaz maaqqiko, 
\v 3 yeezin, nuunii hyannii gaar damma atotitsi koyoos gayko, wayzi attode? Tiino Laatstsii fa ommite yinna atotitsito ohida; mahi eeppa si7iduntsi nuus geeshi markkidhida. 
\v 4 Mahi Xoozii mallaran, kille bazara, dumma dumma kille baz fa qoftti gaar inggide Geeshi Ayyaana imotitsara markkatitsito mintsida.
\s1 Yesuusa asi maaqqida
\p
\v 5 Xoozii hyanna nuunii ohize tiinoppa ye7ode alamito, kiitanchchuntsis ahizikaaya. 
\v 6 Geeshi Maxaafite fettii bessa hyannigaara yagayda:
\q1 «Neenii asis qoppodes asi akko?
\q2 Woy neenii eza naagodes as na7ay akko?\x - \xo 2:6-8 \xo*\xt Maz. 8:4-6\xt*\x*
\q1
\v 7 Ne E kiitanchchuntsappa xiqina eeratsida;
\q2 E ommite bonchchon nashsho barneexa gaddida.
\q1
\v 8 Mahi ubbabazito E tohitippa oomora gaddida»
\m yagayda. Xoozii ubbabazito ees ahize wode ees aqikaayze bazi akkon baaya. Yezin hyatte ubba bazi ees aqodera nuunii hyaga bi7ikaaya. 
\v 9 Yezin nuunii kiitanchchuntsappa xiqina eeride Yesuusa be7ine. Xoozze aadho keehatitsiti baggara Yesuusa as ubbas hyayqqida. E waaye hyayqo hyayqqide gisho bonchchon nashsho barneexa E ommite gaddida. 
\v 10 Ubba bazi eesin E baggara medhinttide Xoozii, gaama na7untsana faara bonchchisades un atotitsitis omma, Yesuusa waayto folo mahodes ees beezane.
\p
\v 11 Yesuusan yentsi E geeshide asuntsi ubba fettii ade na7untsana. Yesuusa unttana, «Ta ishuntsana» ga7i xeegodes yeellidhoosanna yinnisi. 
\v 12 Yesuusa,
\q1 «Taanii ne suntsito ta ishuntsis awaajjoda;
\q2 worzha shiiqite nena galatoda»
\m yagayda.\x - \xo 2:12 \xo*\xt Maz. 22:22\xt*\x* 
\v 13 Mahi E, «Taanii ta ammantto eella afa gaddoda» Mahin, «Xoozii taas inggide na7untsara ta hyanne yene» yagaane.\x - \xo 2:13 \xo*\xt Isa. 8:17-18\xt*\x*
\p
\v 14 Na7untsi ashon suutsi yezuntsana maaqqide gisho Yesuusan un fana asi maaqqida. E yinno oochchidanna, hyayqolla afa wolqqa yeze Xalahiza fa hyayqite dhabsodes. 
\v 15 Mahi fa yeze berite ubba hyayqo zhashmora aridhdhii yezuntsana arotitsappa kessodes.
\p
\v 16 Turo Yesuusa yi7idanna Abrahama kochchi maaddodes fattin kiitanchchuntsana maaddodes baaya.\x - \xo 2:16 \xo*\xt Isa. 41:8-9\xt*\x* 
\v 17 As nagara atto ga7inttode fana Xoozze tiino maarize ammaninttide kahinunts hyalaqa maaqqida. Yinnii gisho, E ubbabazite fa ishuntsana aazodes beezane. 
\v 18 E fa ommite fatanara waayinttide gisho fattaninttizuntsana maaddodes dandda7ane.
\c 3
\s1 Yesuusa Museppa kattara
\p
\v 1 Yinnii gisho, Xoozii xeegide geeshi ishuntso, nu ammanora Laatstso ga7i xeegize hawaaren kahinunts hyalaqa Yesuusa bo7ote. 
\v 2 Muse Xoozze Keetstsa ubba ammaninttidanni fana Yesuusan fana dooride Xoozzes ammaninttidaya. 
\v 3 Keetstsi keexizay keetsitifa aadhii bonchchinttizanni fana Yesuusa Museppa aadhize bonchcho ekkodes beezane. 
\v 4 Feta feta keetsiza keexide asi yene, yezin ubbanno giigizide Xoozii. 
\v 5 Muse Xoozze Keetstsa ubbanne ammaninttide aro maaqqii, Xoozii tiinoppa gawudebazis markka maaqqida. 
\v 6 Yezin Kiristtoosa Xoozze Keetsite na7a fana ammaninttidaya. Nuunii ekkoda ga7i naagize ufaysito mintsii naagiko Xoozze keetstsi maaqqane.
\s1 Xoozze asis yeze shemppo
\p
\v 7 Yinnii gisho, Geeshi Ayyaana gaazanni fana,
\q1 «Hyayno yin Xoozii gaazanno si7ize wode
\q2
\v 8 akko baayze sa7a fattanize qamma,
\q2 yin aduntsi gene hyanttidanni fana,
\q2 yin wozintto mintsippete.
\q1
\v 9 Yin aduntsi tana fattanida;
\q2 oyttam bere ta oochito bi7ida.
\q1
\v 10 Yinnii gisho, ta yentsi yeletuntsana kacci,
\q2 ‹Un ubba wode fa wozintte balane;
\q2 ta ogito erikaaya› yagayda.
\q1
\v 11 Yinnii gisho, taanii zhilora caaqqii,
\q2 ‹Ta shemppo besito mulon geloos› yagayda»\x - \xo 3:11 \xo*\xt Maz. 95:7-11\xt*\x*
\m yagaane.
\p
\v 12 Ta ishuntso, yinttappa ooden, de7o Xoozzeppa yinttana shaakkize iitan ammanoose wozina yezaame gaar naaginttote. 
\v 13 Yinttappa ooden nagara balitsin, fa wozintto mintsaame gaar «Hyayno» ga7intti xeeginttodera qammite qammite fete fetera zorinttote. 
\v 14 Nu tiino ammantto nuunii wurssutsi yellodes mintsii naagiko, Kiristtoosara wolla shaakkinttizuntsana. 
\v 15 Geeshi Maxaafite,
\q1 «Hyayno Xoozii gaazanno yin si7ize wode
\q2 ye wode un cubbora hyanidanni fana,
\q2 yin wozintto mintsippete»
\m yagayda.\x - \xo 3:15 \xo*\xt Maz. 95:7-8\xt*\x*
\p
\v 16 Xoozii gaazebaz si7i cubbudhiduntsi oode? Muse Gibxxeppa kaalitsi kesside ubbuntsana.\x - \xo 3:16-18 \xo*\xt Faydo 14:1-35\xt*\x* 
\v 17 Xoozii oyttam bere oona kaccido? Nagara oochchiduntsanan un ahita akko baayze sa7a wodhdhii attide asuntsana baane? 
\v 18 Mahi Xoozii, «Ta shemppo besito geloos» yaga7i caaqqidanna, ees kiitinttanxide asuntsana baane? 
\v 19 Yikke, un yinna shemppo besito gelanxidanna ammanikaayze gisho maaqqidanno nu be7ine.
\c 4
\p
\v 1 Yikke, Xoozii nuna fa shemppo besito geltsoda gayde qaaltta hyaga tiino yeze gisho yinttappa ooden yinna shemppo besito gelanxi attaame fana naaginttoda. 
\v 2 Unttis misiraachcho qaala sabbakinttidannifana, nuusin sabbakinttida. Yezin un si7ide qaaltto ammanii ekkikaayze gisho unttana maaddikaaya. 
\v 3 Maaqqikon, alame medhinttidannippa aykkii Xoozze oochita folinttida maaqqikon, Xoozii,
\q1 «Taanii ta zhilora caaqqi,
\q2 ta shemppo besito mulon geloos»
\m gaydannigaara, nuunii ammaniduntsi E shemppo besito geloda.\x - \xo 4:3 \xo*\xt Maz. 95:11\xt*\x* 
\v 4 Laappuntso qammabaz fettii besite, «Xoozii laappuntso qammite fa oocha ubbannippa shemppida» yagayda.\x - \xo 4:4 \xo*\xt Medho 2:2\xt*\x* 
\v 5 Mahin yinna besite, «Un ta shemppo besite mulon geloos» yagayda.\x - \xo 4:5 \xo*\xt Maz. 95:11\xt*\x* 
\v 6 Tiino misiraachcho qaala si7i kiitinttanxi shemppo besito gelikaaya. Yeykon, hyatte yinna shemppo besito gelode fettii fettii asuntsi yene. 
\v 7 Yinnii gisho, Xoozii, «Hyayno» ga7i xeegittera fettii qamma nuus qaxaro inggi ersida. Gaama wodeppa suuba Xoozii Dawute baggara,
\q1 «Xoozii gaazebaz hyayno yin si7ize wode
\q2 yin wozintto mintsippete»
\m yaga7i ohida.\x - \xo 4:7 \xo*\xt Maz. 95:7-8\xt*\x* 
\v 8 Iyyaasu unttis shemppo inggidebaz maaqqizeko, Xoozii melle qammabaz suubappa ohoos yeshsha.\x - \xo 4:8 \xo*\xt Mahe 31:7; Iya. 22:4\xt*\x* 
\v 9 Yikke, Xooz asis Sambbata shemppo hyaga naaginttii yene. 
\v 10 Xoozze shemppo besito gelize ooden, Xoozii fa oochchitippa shemppidannifana ezin fa oochchitippa shemppoda.\x - \xo 4:10 \xo*\xt Medho 2:2\xt*\x* 
\v 11 Yinnii gisho, ooden yentsi asunts kiitinttanxi ixxidanno kaallii, gol7aame fana Xoozze shemppo besito gelodes minggoda.
\p
\v 12 Xoozze qaala de7on oochchizaya. Lam77i zalara leefinttide mashshappa aadhii oco. E shemppo, ayyaana, shazhan kolizen yellodes gelii caddane. Mahi as wozintte yeze aachinttide qofan amuto shaakkii firddane. 
\v 13 Xoozze tiino aachinttide akko medhetitsin baaya. E aafti tiino ubba bazi qonccen kallo yene. Nuunii mahe inggodes beeze E tiino.
\s1 Damma kahinunts hyalaqa Yesuusa
\p
\v 14 Yikke, salo kezide damma kahinunts hyalaqize, Xoozze na7ay Yesuusa, nuus yeze gisho nu ammantto mintsii naagoda. 
\v 15 Nu kahinunts hyalaqize nu labbize wode nuus yiqsinttodes dandda7izaya. E nagara oochchikaaya, yezin nu fana ubba baza fattaninttida. 
\v 16 Yikke, maarotitsi ekkodesin maade koshshize wode aadho keehatitsi denggodes aadho keehatitsita yeze bessa Xoozze ka7itumo araatago zhashimo baytsi shiiqoda.
\c 5
\p
\v 1 Fettii fettii kahinunts hyalaqa asunts giddappa doorintti, Xoozara yeltsize baza as gisho imon nagara zharsho zharshodes shuumunttane. 
\v 2 E fa ommite labbitsi maaqqide gisho eroosuntsisin balinttiduntsis yiqsinttodes dandda7ane. 
\v 3 E fa nagara gishon as ubba nagara gisho zharsho zharshodes beezanna yinnisi.\x - \xo 5:3 \xo*\xt Leewe 9:7\xt*\x*
\p
\v 4 Ooden hyanna bonchchito faas ekkodes dandda7oos, yezin Aarona kahinunts hyalaqa maaqqades xeeginttidanni fana Xoozara xeeginttodes beezane.\x - \xo 5:4 \xo*\xt Keze 28:1\xt*\x* 
\v 5 Yinnii fana, Kiristtoosa kahinunts hyalaqa maaqqize bonchchito faas ekkikaaya. Yezin Xoozii eza,
\q1 «Neenii ta Na7a.
\q2 Hyayno ta nees Ade maaqqida»
\m yagayda.\x - \xo 5:5 \xo*\xt Maz. 2:7\xt*\x* 
\v 6 Mahi melle bessa,
\q1 «Malkkexaadiqe kahine shuuma maaqqidanni gaara,
\q2 neenii medhinas kahine maaqqada»
\m yagayda.\x - \xo 5:6 \xo*\xt Maz. 110:4\xt*\x*
\p
\v 7 Yesuusa asi maaqqii hyanna alamite yeze wode fana hyayqoppa ashshodes dandda7ize Xoozza gaama yeeforan afutstsara woossida. E, Xooz bonchchii kiitinttide gisho Xoozii E woosito si7ida.\x - \xo 5:7 \xo*\xt Maato. 26:36-46; Mar. 14:32-42; Luqa. 22:39-46\xt*\x* 
\v 8 Yesuusa Xoozze Na7a maaqqikon ekkide madhite kiitintte tamaarida. 
\v 9 Yinnen, Yesuusa fa oochito folidannippa suuba faas kiitinttize ubba medhina atotitsi demmade fana oge maaqqida. 
\v 10 Yinnan Xoozii Malkkexaadiqe shuuma fana kahinunts hyalaqa mahi eza shuumida.
\s1 Ammanora labbaame fana ingginttide naagize
\p
\v 11 Hyanna nu ohitilla afa gujjii ohodebaz gaama bazi yene, yezin yin qoftta eeratsi maaqqide gisho yinttis ohi geltsodes waayitsane. 
\v 12 Yin hyannii wode asttamaare maaqqades beezane, yezin Xoozze qaala tiino timirtte yinttana mahi tamaarssize melle asi koshshane. Yin mintsii katstsa maades dandda7oose gisho maatsi koshshane.\x - \xo 5:12-13 \xo*\xt 1 Qoro. 3:2\xt*\x* 
\v 13 Maatsi shichinttize ooden zhooga na7a maaqqide gisho lo77on iita shaakkii eroos. 
\v 14 Yezin mintsii katstsa koshshize lo77on iita shaakkize era yeze wozinaama asis.
\c 6
\p
\v 1 Yikke, Kiristtoosa baz tamaarssize tiino timirttito ashshii Kiristtoosa gidda wozinaamunts timirttego yedhdhote. Hyayqo kaalitsize oochappa maaqqize bazin Xooz ammanebaz tiino timirttego suuba maaqqoos. 
\v 2 Yinnii fana, xinqqate baz,\f + \fr 6:2 \fr*\fk Xinqqate baz: \fk*\ft Hyanna besite xinqqate baz ga7inttidanna dumma dumma geeshe wogabaz ohodes. \ft*\f* kushe gaddebaz, hyayqoppa denddo bazin medhina firddabaz mahi tamaaroos. 
\v 3 Xoozii gayko nu yinno oochchoda.
\p
\v 4 Fettii tohe foo7o foo7iduntsana, salo imo ekkiduntsana, Geeshi Ayyaanappa gishinttiduntsana, 
\v 5 lo77o Xoozze qaalan tiinoppa ye7ode alamtti wolqqa bi7iduntsana, 
\v 6 suubappa kaddiduntsana nagarappa lam7intsa mahodes dandda7inttoos. Akkos gayko, un fa dhabes Xoozze Na7a mahi suxxize gaar masqalalla afa eza suxxanen as tiino kawushshane.
\p
\v 7 Ubba wode Eella afa bukkize ira uzhii, wootize atstsa maaddize katstsa inggize sa7ita Xoozara anjjinttidanno. 
\v 8 Yezin anggatsin kinchchikelo dolize sa7ita akko bazin maaddoos; iis baadditsi ukkida; wurssutsite michinttoda.\x - \xo 6:8 \xo*\xt Medho 3:17-18\xt*\x*
\p
\v 9 Nu siiqo ishuntso, nuunii hyannii gaar ohize baz maaqqikon, yinttana atotitsago kaalitsize lo77o baz yinttis yezanno erane. 
\v 10 Xoozii luule firddizaya. Xoozii, yin oochchide oochchiton zaga maaqqin hyatte ammanzuntsana maaddii, ees yeze siiqito beezidanno botoos. 
\v 11 Yin ubba ufayssara naagizanno denggode wontsis hyanna mintsitumtto folo yellodes beezode gaar nu amudhdhane. 
\v 12 Yin ammanoran dandda7ara naagize ufayssito laattize asi maaqqade gaar fattin azal7a maaqqade gaar koyoos.
\s1 Xoozii inggide ufaysita so7izoos
\p
\v 13 Xoozii Abrahamas inggoda ga7i caaqqide wode faappa aadhize melle damma baayze gisho fa ommite caaqqida. 
\v 14 Eego, «Taanii nena anjjoda; ne zartto gantsoda» yagayda.\x - \xo 6:14 \xo*\xt Medho 22:16-17\xt*\x* 
\v 15 Abrahama dandda7ara naagii Xoozii inggoda gayde ufaysito ekkida.
\p
\v 16 Asi caaqqitera faappa dammize asara caaqqane; yinna caaqita ga7inttidebaz mintsii, lalle ubba hyaasane. 
\v 17 Yinnii gisho, Xoozii fa laaminttoose qofa ufays qaala laattizuntsis qonccissades koyde gisho caaqora mintsida. 
\v 18 Xoozii worddidhdhoos. E ufays qaalttan caaqita, lam77untsin laaminttoos. Hyanna lam77i bazite nu tiino yeze ufayssito aykkodes dandda7ode fana kate denggodes eego aachinttide nuunii, damma mintsitimo denggoda.
\p
\v 19 Hyanna ufayssita nu shemppitis, markkabe en7inttaame fana mintsii aykkize meqo fana. Yinna ufaysita magaraajjafa suuba zalara yeze geeshi bessa gelida.\x - \xo 6:19 \xo*\xt Leewe 16:2\xt*\x* 
\v 20 Yesuusa Malkkexaadiqe shuumatitsiti fana medhinas kahinunts hyalaqa maaqqii, nu gisho nuuppa tiinii yinna bessito gelida.\x - \xo 6:20 \xo*\xt Maz. 110:4\xt*\x*
\c 7
\s1 Kahinze Malkkexaadiqe
\p
\v 1 Malkkexaadiqe, Saaleme Kaati, Ubbappa kattara Xoozze kahine. Ye Malkkexaadiqe Abrahama kaatuntsana olii gamii maaqqadera eera yellintti eza anjjida.\x - \xo 7:1-2 \xo*\xt Medho 14:17-20\xt*\x* 
\v 2 Abrahama fa di7idebaz ubbappa ees asraata kessii inggida. Malkkexaadiqe suntsita tiino «Xillotits kaati», lam7intsa, «Saaleme kaati» bilitsita, «Sarotits kaati» ga7e. 
\v 3 Malkkexaadiqes indda woy ade woy kochchi faydo baaya. E yeletitsitis denddo woy E yesttis folo baaya, yezin Xoozze Na7a aazize maaqqii medhinas kahine maaqqane.
\p
\v 4 Malkkexaadiqe akko gaar damma yezako bo7ote. Nu adunts mayze, Abrahama, fa di7idebazappa ees asraata inggida. 
\v 5 Kahine maaqqide Leewe kochchi Isra7eele asappa, yentsesin Abrahama kochchi maaqqide fa ishuntsappa asraata ekkode gaar higgita kiittane.\x - \xo 7:5 \xo*\xt Faydo 18:21\xt*\x* 
\v 6 Malkkexaadiqe Leewe kochchi maaqqanxikon Abrahameppa asraata ekkida; ufays qaala yeze Abrahama anjjida. 
\v 7 Geezay anggiseppa anjjinttizanna lallizoos.
\p
\v 8 Fettii baggara, asraata ekkizuntsi hyayqize asuntsana, yezin melle baggara asraata ekkizuntsi de7o yene yaga7i ohinttida. 
\v 9 Yikke, asraata ekkize Leewe, Abrahama baggara asraata inggida gawudes dandda7inttane. 
\v 10 Akkos gayko, Malkkexaadiqe Abrahamera yelinttize wode Leewe yelinttikaayzebaz maaqqikon, fa mayze Abrahama bunqite yene.
\p
\v 11 Isra7eele asuntsis higge Leewe kahinetitsi baggara ingginttida. Hyanna Leewe kahinetitsita folo maaqqide baz yezako Aaronanni fana maaqqikaayzin, Malkkexaadiqe fana melle kahine shuumodes akkos koshshido? 
\v 12 Yikke, kahinuntsi laaminttize wode higgitan mahi laaminttodes beezane. 
\v 13 Hyay nu E baz ohize atstse melle kochchi; E kochchitippa ooden zharsho bessa kahinetitsa oochchikaaya. 
\v 14 Nu Laatstse Yihuda kochchappa yi7idanna erinttizanno. Maaqqo yezin, Muse kahinuntsibaz ohitera Yihuda kochchi baz akkon ohikaaya.
\p
\v 15 Malkkexaadiqe fana melle kahinunts yi7idebaz maaqqizako hyanna nu ohizanna aadhii qonccoda. 
\v 16 E kahine maaqqidanna dhaboose de7o wolqqite fattin E mayze higgiten wogite baaya. 
\v 17 Geeshi Maxaafize,
\q1 «Malkkexaadiqe kahinetitsi fana,
\q2 neenii medhinas kahinunts»
\m yaga7i markkidhane.\x - \xo 7:17 \xo*\xt Maz. 110:4\xt*\x* 
\v 18 Tiino higgita labbide bazin maaddoose baz maaqqide gisho shaarinttida. 
\v 19 Muse higge akkoran folo oochchodes dandda7ikaaya. Yezin nuunii E baggara Xoozago shiiqize ubbappa aadhize ufays qaala nuus ingginttida.
\p
\v 20 Kiristtoosa kahine maaqqize wode Xoozii caaqqida, yezin melluntsi kahinunts maaqqize wode yinnii fana caaqo baaya. 
\v 21 Yezin Yesuusa caaqora kahine maaqqida. Xoozi ga7i caaqqida;
\q1 «Laatstsii caaqqida; E fa qoftto laammoos;
\q2 ‹Neenii medhina kahine› »
\m yagayda.\x - \xo 7:21 \xo*\xt Maz. 110:4\xt*\x* 
\v 22 Hyanna caaqitii baggara Yesuusa nuus ubbappa aadhize qaala caaqitis waase maaqqida.
\p
\v 23 Kahinetitsi medhinas oochaame fana hyayqo unttana kayde gisho tiino kahinuntsi faydita gaama. 
\v 24 Yezin Yesuusa medhinas yeze gisho E kahinetitsito melle laattoos. 
\v 25 Yinnii gisho, E ubba wode un gisho woossodes medhina yeze gisho Xoozago E baggara ye7izuntsana folo ashshodes dandda7ane.
\p
\v 26 Yikke, nuus koshshize baz inggize, geeshi, boren tuna baayzuntsi, nagaranchchuntsappa shaakkinttidayin saloppa aadhii dhoqqa yeze kahinunts hyalaqa nuus koshshane. 
\v 27 E hyankko kahinunts hyalaquntsi gaar tiino fa nagartti gisho kaallii as nagartti gisho qammite qammite zharsho zharshodes koshshoos. E fana zharshide wode lam7intsoosse ogera fettii tohe fana zharshida.\x - \xo 7:27 \xo*\xt Leewe 9:7\xt*\x* 
\v 28 Muse higgita labbitsi asi kahinunts hyalaqa mahi shuumane. Yezin higgefa suuba yi7ide caaqo qaaltta medhina folo maaqqide Xoozze Na7aya shuumida.
\c 8
\s1 Yesuusa nu kahinunts hyalaqa
\p
\v 1 Nuunii ohize damma bazita hyanno. Salo Ubbappa kattara Xoozze araatappa mizaqi zalar bettide hyay fana yeze kahinunts hyalaqa nuus yene.\x - \xo 8:1 \xo*\xt Maz. 110:1\xt*\x* 
\v 2 E asara maaqqikaayzin Laatstsara eqqide turii dunkkaantte Xoozze Keetstsa oochchane.
\p
\v 3 Kahinunts hyalaqa ubbanna imon zharsho zharshodes shuumunttane. Yinnii gisho mahi, ye kahinze zharshodes fettibazi yessades koshshane. 
\v 4 Higge kiittizannifana zharshize kahinuntsi yeze gisho Kiristtoosa sa7a yeze baz maaqqizako kahine maaqqoos. 
\v 5 Un kahinetitsa oochchize dunkkaantta salo yezes aazizen dasho. Muse dunkkaane essize wode Xoozii eego, «Taanii nena derella afa beezide aazize kaallii oochcho» yagayda.\x - \xo 8:5 \xo*\xt Faydo 18:21\xt*\x* 
\v 6 Yezin Yesuusa igintsize gidda maaqqide caaqo, tiino caaqoppa aadhizannifana E ekkide oochita unttisitippa aadhane. Yinna eqqidanna aadhize caaqo qaalara.
\p
\v 7 Tiino caaqite bala baayze baz maaqqizako lam7intsa caaqo koshshoos. 
\v 8 Yezin Laatstsii unttana borii, hyannigaara yagayda:
\q1 «Taanii Isra7eele asuntsaran Yihuda asuntsara
\q2 kille caaqo caaqqize wode ye7oda.\x - \xo 8:8-12 \xo*\xt Er. 31:31-34\xt*\x*
\q1
\v 9 Yinna caaqita ta un aduntsana Gibxxe sa7appa kushito aykkii,
\q2 gochchi kesside wode unttara caaqqide caaqitii gaar baaya.
\q2 Un ta caaqite ammaninttikaayze gisho
\q2 taanii unttana olii ashshida yagayda Laatstsii.
\q1
\v 10 Yezin yikkeppa suuba Isra7eele asuntsara
\q2 ta caaqqode caaqita hyanno yagayda Laatstsii.
\q2 Taanii ta higgito un guugite gaddoda;
\q2 un wozintte xaafoda.
\q2 Taanii un Xoozii maaqqada;
\q2 unttin ta asi maaqqada.
\q1
\v 11 Unttappa ooden fa dootsiza woy fa isha,
\q2 ‹Laatstsi ero› yaga7i tamaarssoos.
\q1 Un eeratsappa damma yellodes
\q2 ubbuntsi tana eroda.
\q1
\v 12 Taanii un qohidanno atto gawuda;
\q2 un nagartto mahi qoppoos» yagayda.
\p
\v 13 Xoozii hyay caaqiza «Kille» ga7i xeegittera tiinosaya gal7izida. Yikke, gal7izen cinggide dhabize wode yellida.
\c 9
\s1 Salo goynon sa7a goyno
\p
\v 1 Tiino caaqitis Xooz goynize wogan sa7a Xoozze Keetstsi yene. 
\v 2 Dunkkaane eqqida. Ize xomppe gaddize bessi, xarphezan Laatstse tiino gaddize boora yene; yinna besita Geeshi Bessi ga7inttane.\x - \xo 9:2 \xo*\xt Keze 26:1-30; 25:31-40\xt*\x* 
\v 3 Lam7intsa magaraajjafa suuba zalara yeze besita Ubbappa Geeshi Bessi ga7inttane.\x - \xo 9:3 \xo*\xt Keze 26:31-33\xt*\x* 
\v 4 I gidda ixaane cugize worqqa saaxinen worqqara goozinttide caaqo Taabote yene. Ye caaqo Taabotize gidda manna yeze worqqa xaaro, aacide Aarona gufen Muse higge xaafinttide lam77i lochche shuchchuntsi yene.\x - \xo 9:4 \xo*\xt Keze 30:1-6; 25:10-16; 16:33; Faydo 17:8-10; Keze 25:16; Mahe 10:3-5\xt*\x* 
\v 5 Ye Taabotizeppa katta zalara maarotits goozitsi fa qefite aachize bonchcho kiruubele yene. Yezin hyatte hyanna ubbanno qonccizi ohodes dandda7oos.\x - \xo 9:5 \xo*\xt Keze 25:18-22\xt*\x*
\p
\v 6 Hyanna ubbanna hyannigaara giigidannippa suuba, kahinuntsi ubba wode fa oochito oochchodes dunkkaanttis tiino kifilite gelane.\x - \xo 9:6 \xo*\xt Faydo 18:2-6\xt*\x* 
\v 7 Yezin kahinunts hyalaqa xalaala dunkkaanttis lam7intsa kifilite bereppa fettii tohe gelane. E yeyga gelittera fa nagartti gishon asuntsi erikaayzara oochchide nagartti gisho suutsi zharsho ekkikaayzara geloos.\x - \xo 9:7 \xo*\xt Leewe 16:2-34\xt*\x* 
\v 8 Tiino dunkkaane eqqii yezin, Ubbappa Geeshi Bessi kanggize ogita hyaga bugunttikaayzanno Geeshi Ayyaana yinne beezane.
\p
\v 9 Yinna hyanna woditis aazize; Xoozzes ingginttize imottan zharshita goynize atstse wozintto geeshodes dandda7oosanno hyanna beezane. 
\v 10 Yentses muntta baz, ushshibaz dumma dumma meechchi wogito ohizuntsana. Un kille woga ye7ode wontsis oochinttize bale woga.
\p
\v 11 Yezin Kiristtoosa hyatte nu denggide lo77o bazis kahinunts hyalaqa maaqqii yi7ida. E gelide dunkkaantta damman folo. Yinna dunkkaantta as kushera oochinttikaaya mahi hyanna alamitibaz baaya. 
\v 12 Kiristtoosa Ubbappa Geeshi Bessi gelize wode deeshi suutsin duro suutsi ekkii gelikaaya. Yezin medhina atotitsi inggodes fa suutsito ekkii lam7intsoose ogera fettii tohe gelida. 
\v 13 Deeshi suutsin kormma suutsi, michinttide okka budo, tunide asuntsalla afa wuxurkkin unttana geeshizebaz maaqqiko,\x - \xo 9:13 \xo*\xt Leewe 16:15-16; Faydo 19:9, 17-19\xt*\x* 
\v 14 medhina Geeshi Ayyaana baggara bore baayzin zharsho oochchii, Xoozis fana inggide Kiristtoosa suutsita, de7o Xooz goynode fana hyayqo kaalitsize oochappa nu wozintto wayzi aatsii geeshosa?
\p
\v 15 Yinnii gisho, xeeginttiduntsi Xoozii inggide medhina laata ekkode gaar Kiristtoosa kille caaqos gidda maaqqii igintsizaya maaqqida. Yinna hyanidanna asuntsi tiino caaqoppa oomora yeze wode oochchide nagarappa unttana ashshodes E hyayqqida.
\p
\v 16 Yikke, keeke yeziko, ye keekide atstse hyayqita erinttodes koshshane. 
\v 17 Keekide atstse hyayqqiko E keekita minggane. Keekide atstse hyayqqanxi attiko E keekita oochchoos.
\p
\v 18 Melle atto yezin, tiino caaqitan suutsi baayzin miinggikaaya. 
\v 19 Muse higge kiita ubba asis ohidannippa suuba duro suutsin deeshi suutsi hyaatsara worqqii, zoqo duro isintsen hisophe tashe ekkii, maxaafize galliton asunts gallito wuxurkkane.\x - \xo 9:19-20 \xo*\xt Keze 24:6-8\xt*\x* 
\v 20 Muse asuntsago, «Yin naagode gaar Xoozii kiittide suuts caaqita hyanno» yagayda. 
\v 21 Yinnii gaara, dunkkaanize galliton oochchize miishe ubbanni gallito suutsi wuxurkkane.\x - \xo 9:21 \xo*\xt Leewe 8:15\xt*\x* 
\v 22 Turon higgita gaazanni fana eeratsibaz fattin ubba bazi suutsara geezhane. Suutsi lanttikaayzin maarotitsi baaya.\x - \xo 9:22 \xo*\xt Leewe 17:11\xt*\x*
\s1 Yesuusa folo zharshintte
\p
\v 23 Salo bazis aazize maaqqiduntsi ubba hyaars zharshora geeshshades koshshane. Yezin salo bazita fa ommite yinnippa aadhize zharshora geeshshades koshshane.
\p
\v 24 Kiristtoosa turii Xoozze Keetstsis aazize maaqqide, as kushera oochinttide Ubbappa Geeshi Bessa gelikaaya. Yezin E hyatte nu gisho Xoozze tiino benttodes salo gelida. 
\v 25 Kahinunts hyalaqize berite berite fa suutsi maaqqikaayzanno ekkii, Ubbappa Geeshi Bessa gelane. Yezin Kiristtoosa gaama tohe fana zharshodes salo gelikaaya. 
\v 26 Yinnii gaara hyanide baz maaqqizako, Kiristtoosa alame medhinttidannippa aykkii gaama tohe waayinttodes koshshane yeshsha. Yezin hyatte wode wurssutsite nagara hyaasodes fana zharshi lam7intsoosse ogera fettii tohe benttida.
\p
\v 27 Asi ubba fettii tohe hyayqqodes yinnippa suuba firddinttodes beezane. 
\v 28 Yinnii fana, Kiristtoosa gaama asunts nagara hyaasodes fettii tohe zharshinttida. Yezin E nagara tookkodes maaqqikaayzin fana naagizuntsana ashshodes lam7intsa benttoda.\x - \xo 9:28 \xo*\xt Isa. 53:12\xt*\x*
\c 10
\p
\v 1 Muse higge yo7odes yeze lo77o bazis dasho fattin fa ommite waanna baaya. Yinnii gisho, berite berite face baayzin zharshinttize zharshita goynodes shiiqize asuntsana folo mahodes dandda7oos. 
\v 2 Higge unttana folo mahodes dandda7idebaz maaqqizako un zharsho zharshizanno ashshoda yeshsha. Mahi goynodes shiiqize asuntsi fa nagarttippa geeshshada; un wozinttan unttana bala ga7i mootoos. 
\v 3 Yezin yinna zharshuntsi berite berite nagara qofizane. 
\v 4 Akkos gayko kormma suutsin deeshi suutsi nagara dhabisodes dandda7oos.
\p
\v 5 Yinnii gisho, Kiristtoosa hyanna alamite yi7ide wode hyannigaara yagayda:\x - \xo 10:5-7 \xo*\xt Maz. 40:6-8\xt*\x*
\q1 «Neenii zharshon imo koykaaya;
\q2 yezin taas asho giigizida.
\q1
\v 6 Neenii eexize zharshon
\q2 nagara zharshite ufayttikaaya.
\q1
\v 7 Ye wode ‹Ta gisho maxaafite xaafinttidannigaara,
\q2 Laatstso, taanii ne qoftto oochchodes yi7ida› gayda» yagaane.
\p
\v 8 Zharshita zharshinttode gaar higge kiittizebaz maaqqizako, Kiristtoosa tiino, «Neenii zharshon imo, eexize zharshon nagara zharsho koykaaya; unttara ufayttikaaya» yagayda. 
\v 9 Kaallin E, «Laatstso, hyaychche taanii ne qoftto oochchodes yi7ida» yagayda. Yinnii gisho, Kiristtoosa lam7intsa essodes tiinosaya shaarida. 
\v 10 Yesuus Kiristtoosa Xoozze qofa oochchii, lam7intsoose ogera fettii tohe fa ashito zharshide gisho nuunii geezhida.
\p
\v 11 Kahinunts ubba, nagara hyaasodes dandda7oos yinna zharshito qammite qammite zharshitera eqqii fa oochito oochchane.\x - \xo 10:11 \xo*\xt Keze 29:38\xt*\x* 
\v 12 Yezin Kiristtoosa ubba wodes maaqqize fettii nagara zharsho zharshi, Xoozappa mizaqi zalara bettida.\x - \xo 10:12-13 \xo*\xt Maz. 110:1\xt*\x* 
\v 13 Ye wodeppa aykkii E morkkuntsi E tohita yedhdhize bessi mahode wontsis naagane. 
\v 14 E lam7intsoose ogera fettii tohe fana zharshide zharshite geeshshuntsana medhinas folo oochchida.
\p
\v 15 Mahi Geeshi Ayyaana nuus hyanno markkidhane. Tiino hyannigaara yagayda:
\q1
\v 16 «Yinna qammitippa suuba,
\q2 taanii unttara caaqqize caaqita hyanno:
\q1 Laatstsii ta higgito un wozintte gaddoda;
\q2 un guugite xaafoda»
\m yagayda.\x - \xo 10:16 \xo*\xt Er. 31:33\xt*\x* 
\v 17 Kaallii,
\q1 «Taanii un nagartton
\q2 un iita oochito mahi qoppoos»
\m yagayda.\x - \xo 10:17 \xo*\xt Er. 31:34\xt*\x* 
\v 18 Yikke, nagara atto ga7inttidannippa suuba nagaras zharshinttize zharsho koshshoos.
\s1 Ane Xoozago shiiqoda
\p
\v 19 Yikke, ta ishuntso, nuunii Yesuusa suutsiti baggara Ubbappa Geeshi Bessi gelodes nuus ammantsize yene. 
\v 20 Nu gelodanna Kiristtoosa fa magaraajjito, yinnan fa ashtii baggara nuus bugide killen de7o maaqqide oge. 
\v 21 Nuus Xoozze Keetstsa kattara shuumunttide damma kahinunts hyalaqa yene. 
\v 22 Yinnii gisho Nuunii iita qofappa geeshshades nu wozintto wuxurkkintti, nu gallito xillo hyaatsara meeccii, luule wozinaran folo ammanora Xoozago shiiqoda.\x - \xo 10:22 \xo*\xt Leewe 8:30; Hiz. 36:25\xt*\x*
\p
\v 23 Nuus ufays qaala inggide Xoozze ammaninttidaya maaqqide gisho nu markkidhize ufaysito mizaqi workkita gaykaayzara mintsii aykkoda. 
\v 24 Fetay feta siiqosin lo77o oochas wayzi dentsitsod yezako ane qoppoda. 
\v 25 Fete fete limdde mahi shiiqizanno ashshidanni fana nuunii wolla shiiqizanno ashshoos. Yezin Laatstse qammita ukkidanno yin be7ize gisho yinno zagannippa aatsii oochchote.
\p
\v 26 Nuunii turii eratitsi ekkidannippa suuba eriite nagara oochchoos, yikkeppa nu nagara gisho zharshinttode zharsho baaya. 
\v 27 Yezin yikke attidanna zhashize firddan Xoozze morkkuntsana michchodes giigide damma tama.\x - \xo 10:27 \xo*\xt Isa. 26:11\xt*\x* 
\v 28 Muse higgito kiitinttanxide ooden lam77i woy hyaydzdzii asi eella afa markkidhiko yiqsimo baytsi hyayqqane.\x - \xo 10:28 \xo*\xt Mahe 17:6; 19:15\xt*\x* 
\v 29 Yeezin, Xoozze Na7aya toochiday, fana geeshide Xoozze caaqo suutsito tunizide, mahi aadho keehatitsi Ayyaana cazhiday, akko gaar iita firdda ekkodes beezizako ane qoppote.
\p
\v 30 Yikke, «Kushe mahe ta baz, ta kushe mahoda» gaydanno nu erane. Mahin, «Laatstsii fa asuntsana firddoda» yagayda.\x - \xo 10:30 \xo*\xt Mahe 32:35, 36\xt*\x* 
\v 31 De7o Xoozze kushite gol7e gaama zhashane.
\p
\v 32 Yinttis Xoozze foo7o foo7idannippa suuba yin gaama waayera, damma olara genccide zaga wodito qoppote. 
\v 33 Fettii fettii tohe yin as tiino cazhinttida; bay7inttida; fettii fettii tohe yinnii fana waaye yellide asuntsara wolla waayinttida. 
\v 34 Achcha yeze asuntsisin yiqsinttida. Yinttis lo77on dhaboose qolo salo yezanno yin eride gisho yin qoltta bonqinttize wode ufayssara dandda7ida.
\p
\v 35 Yinnii gisho, damma anjjo yeze yin ammaninttidaya olippete. 
\v 36 Xoozze qofa folii, E yinttis inggoda gayde ufayssito ekkode wontsis genccodes koshshane. 
\v 37 Yikke, Geeshi Maxaafite,
\q1 «E, ye7oda gayday eeratsi wodeppa suuba ye7oda; gam7oos.\x - \xo 10:37-38 \xo*\xt Ibr. 2:3-4\xt*\x*
\q2
\v 38 Yezin xillize, ammanora yessada;
\q2 ooden suub maaqqiko tana ufayssoos»
\m yagayda. 
\v 39 Nuunii ammanii attize asunts bagga fattin suuba maaqqii dhabize asunts bagga baaya.
\c 11
\s1 Ammano
\p
\v 1 Ammano gaazanna, denggoda ga7i ufayssara ammaninttii naagize bazin nu bi7ikaayze baz bi7ide fana mahi ekkizebaz. 
\v 2 Zaga aduntsi ammanora Xoozappa markkatitsi ekkida.
\p
\v 3 Alame Xoozze qaalara medhinttidanno nu ammanora erane. Mahi benttize baz benttoosse bazappa medhinttida.\x - \xo 11:3 \xo*\xt Medho 1:1; Maz. 33:6, 9; Waha. 1:3\xt*\x*
\p
\v 4 Aabeela Qaa7elaseppa aadhize zharsho Xoozis zharshidanna ammanora. Xoozii Aabeela imot ufaytti ekkide wode E xillo maaqqidanno markkidhida. Aabeela melle atto yezin, hyayqqin E ammantta hyayno yellodes ohinttane.\x - \xo 11:4 \xo*\xt Medho 4:3-10\xt*\x*
\p
\v 5 Heenoka hyayqqikaayzara salo ekinttidanna ammanora. Xoozii eza ekkide gisho ooden eza be7ades dandda7ikaaya. Heenoka salo ekinttodannippa tiino E Xoozze ufaysside asi maaqqizanna ohinttida.\x - \xo 11:5 \xo*\xt Medho 5:21-24\xt*\x* 
\v 6 Ammano baayzin ooden Xooz ufayssodes dandda7oos. Xoozago ye7ize ooden Xoozii yezannon fana koyezuntsis anjjo inggizanno ammanodes koshshane.
\p
\v 7 Nohe hyaga benttoosse bazis Xoozii ees ohide wode Xoozis zhashtii, fanan fa kara asuntsana ashshodes ammanora markkabe keexxida. Yeyzi fa ammanttira alamito firddi, ammanora benttize xillotitsi Xoozappa ekkida.\x - \xo 11:7 \xo*\xt Medho 6:13-22\xt*\x*
\p
\v 8 Abrahama laata mahi ekkode sa7a qitode gaar Xoozii eza xeegide wode melle atto yezin, E aba qitizako eranxikon kiitinttidanna ammanora.\x - \xo 11:8 \xo*\xt Medho 12:1-5\xt*\x* 
\v 9 Abrahama Xoozii ees inggoda gayde sa7ite bete asi fana yezidanna ammanora. Xoozii ye inggoda gaydanno eera wolla laattodes yeze Yisaaqaran Yayqoobara dumma dumma dunkkaane gidda yezida.\x - \xo 11:9 \xo*\xt Medho 35:27\xt*\x* 
\v 10 E, Xoozii qoppii keexxide xaala baasa yeze katama naagane.
\p
\v 11 Saara fa ommite cinggidanno maaqqikon ufayssi inggide Xoozze ammaninttidaya maaqqidanno eride gisho wodaxodes wolqqa dengidanna ammanora.\x - \xo 11:11 \xo*\xt Medho 18:11-14; 21:2\xt*\x* 
\v 12 Yinnii gisho, hyayqqide asi aazize fettii dhiiratseppa salo xoolintto gaaran abba gaxa yeze faydo baayze shafe fana kochchi yelinttida.\x - \xo 11:12 \xo*\xt Medho 15:5; 22:17; 32:12\xt*\x*
\p
\v 13 Yentsi asuntsi ubba faas ga7inttide ufays qaala ekkikaayzara ammanora hyayqqida. Yezin hyaakora yinno bi7i, denggide fana mahi, ufayssara ekkida. Mahi un sa7alla zaqqon bete asi maaqqizanno erida.\x - \xo 11:13 \xo*\xt Medho 23:4; 1 Zeena 29:15; Maz. 39:12\xt*\x* 
\v 14 Yinnii fana gaaze asuntsi fa sa7ito naagizanno qoncce beezane. 
\v 15 Un ashshii kezide sa7ito suuba qoppidebaz maaqqizako suuba maaqqades dandda7ane. 
\v 16 Yezin hyatte aadhize salo gade amudhdhane. Yinnii gisho, Xoozii unttis katama giigizide gisho «Un Xooz» ga7intti xeeginttodes yeellidhoos.
\p
\v 17 Abrahama fattaninttide wode Yisaaqa zharshidanna ammanora. Yinna ufays qaaltto ekkide Abrahama fa fettii na7a zharshodes giigida.\x - \xo 11:17 \xo*\xt Medho 22:1-14\xt*\x* 
\v 18 Xoozii Abrahamago, «Ne zartta Yisaaqa baggara xeeginttoda» yaga7i ohida.\x - \xo 11:18 \xo*\xt Medho 21:12\xt*\x* 
\v 19 Xoozii hyayqoppa dentsodes dandda7izanno Abrahama ammanide gisho Yisaaqa hyayqoppa faxii denddide fana mahi ekkida.
\p
\v 20 Yisaaqa wodeppa hyanodebaz erii Yayqooban Eesawo anjjidanna ammanora.\x - \xo 11:20 \xo*\xt Medho 27:27-29, 39-40\xt*\x*
\p
\v 21 Yayqooba hyayqqodes yiiter, feta feta Yoosefa na7untsana anjjidannan guufella katii goynidanna ammanora.\x - \xo 11:21 \xo*\xt Medho 47:3; 48:1-20\xt*\x*
\p
\v 22 Yoosefa hyayqqodes ukkide wode Isra7eele asuntsi Gibxxeppa kezodanno ohidanna fa meqatsito yiissadebaz unttana kiittidanna ammanora.\x - \xo 11:22 \xo*\xt Medho 50:24-25; Keze 13:19\xt*\x*
\p
\v 23 Muse yelinttidannippa suuba E inttan E aday bishshita lo77o na7a maaqqidanno bi7i hyaydzdzii agina aachchidanna ammanora; un kaat awaajjes zhashtikaaya.\x - \xo 11:23 \xo*\xt Keze 1:22; 2:2\xt*\x*
\p
\v 24 Muse diccidannippa suuba Gibxxe kaat urtti na7a ga7inttodanno ixxidanna ammanora.\x - \xo 11:24 \xo*\xt Keze 2:10-12\xt*\x* 
\v 25 Muse nagarara eerats wodes ufayttodannippa, Xoozze asara madha ekkodanno doorida. 
\v 26 E tiinoppa denggode anjjito phircci yiizii bi7ide gisho Gibxxe qoloppa aatsii Kiristtoosa gisho borinttodanno gaama aadhize duretitsi maaqqidanno erida.
\p
\v 27 Muse Kaat kachchi zhashtikaayzara, Gibxxeppa kezidanna ammanora. Benttoosse Xoozza bi7ide asfana yii7i fa qoftte genccida. 
\v 28 Hyayqo ki7ize kiitanchchuntsi Isra7eele asunts angis na7untsana wodhaame gaar Muse Faasikan suutsi wuxurike woga oochchidanna ammanora.\x - \xo 11:28 \xo*\xt Keze 12:21-30\xt*\x*
\p
\v 29 Isra7eele asuntsi mela sa7ara yedhdhize fana yedhdhii, Zoqo Abba fiinggidanna ammanora. Yezin Gibxxe asuntsi gelodes fattanii be7adera haatsita unttana qoodhdhida.\x - \xo 11:29 \xo*\xt Keze 14:21-31\xt*\x*
\p
\v 30 Isra7eele asuntsi Iyaarkko katama shuchchi gase laappun wode wutii, gol7izidanna ammanora.\x - \xo 11:30 \xo*\xt Iya. 6:12-21\xt*\x* 
\v 31 Olalera erinttidanna Re7aaba gade geedizuntsana mokkide gisho kiitinttoose asuntsara hyayqqanxi attidanna ammanora.\x - \xo 11:31 \xo*\xt Iya. 2:1-21; 6:22-25\xt*\x*
\p
\v 32 Yikke, melle ta akko ga7o? Gediyoona baz, Baaraqebaz, Samsoonabaz, Yofttaahebaz, Dawutebaz, Saamu7eela baz, mahi nabuntsbaz ohodes taas wode maaqqoos.\x - \xo 11:32 \xo*\xt Danu. 6:11—8:32; 4:6—5:31; 13:2-16; 11:1-12; 1 Sam. 16:1; 1 Kat. 2:11\xt*\x* 
\v 33 Un ammanora ka7itumtto gamida; xillotitsara ahida; Xoozii inggoda gayde ufayssito ekkida; gaammuntsi doona gorddida;\x - \xo 11:33 \xo*\xt Dane. 6:1-27\xt*\x* 
\v 34 tama wolqqa wodhida; morkkunts mashshappa attida; fa labbisite minggida; olara wolqqaama maaqqida; allaga tooranchuntsana bay7ida.\x - \xo 11:34 \xo*\xt Dane. 3:1-30\xt*\x* 
\v 35 Maachuntsi un iginuntsi hyayqqiduntsi hyayqoppa faxin ekkida.
\p Mahi melluntsi aadhize hyayqoppa denddo ekkodes koyi dumma dumma waaye ekkida; achchappa bilinttodanno ixxida.\x - \xo 11:35 \xo*\xt 1 Kat. 17:17-24; 2 Kat. 4:25-37\xt*\x* 
\v 36 Melluntsi asara borinttii allanggara garafinttida; melluntsi santsalaatara acinttii achi keetstsa olinttida.\x - \xo 11:36 \xo*\xt 1 Kat. 22:26-27; 2 Zeena 18:25-26; Er. 20:2; 37:15; 38:6\xt*\x* 
\v 37 Un shuchchara dhoginttida; magaazera lam77i kezii phalqqinttida; fattaninttida; mashshara hyayqqida; unttis ubba bazi dhabin madhidhida. Duro mo7on deeshi mo7o ma77i hyanttida.\x - \xo 11:37 \xo*\xt 2 Zeena 24:21\xt*\x* 
\v 38 Unttis hyanna alamtta giiganxi ixxin akko baayze sa7an, derella afa, wom7on olla giddan wutida.
\p
\v 39 Xoozii un ammanttibaz markkidhikon, yinna ubba ga7inttide ufays qaaltto ekkikaaya. 
\v 40 Xoozii nuus lo77o baz qoppida; yinnii gisho un nu baytsi folo maaqqoos.
\c 12
\s1 Xoozii nuus ade
\p
\v 1 Yikke, dhonne fana nu kantto wutii gaanggi hyannii fana markkuntsi nu kale yeze gisho nuna dhubbize ubbannon aykkinttii yeze nagara hyaasii, nu tiino yeze galgaade wotsito gencci woxxoda. 
\v 2 Nu ammanttis oge bugidayan nuna folo yeltsize Yesuusalla afa nu aafito gaddoda. Yesuusa tiinoppa yeze ufayssiti gisho masqalalla waaye dandda7i, yeella hyayqo leqqii, Xoozappa mizaqi zalara bettida.
\p
\v 3 Yikke, yin doccii ufayssi gachchaame fana nagaranchchunts ixa dandda7ide Yesuusa qoppote. 
\v 4 Nagarara yeze bute hyaga suuts lalode wontsis eqinttikaaya. 
\v 5 Xoozii fa qaaltte, fa na7unts fana yinttana zoridanno botida.\x - \xo 12:5-6 \xo*\xt Iyo. 5:17; Aazi. 3:11-12\xt*\x*
\q1 «Ta na7ayo, Xoozze seere leqqippe;
\q2 E nena seerize wode ufayssi gachchippe.
\q1
\v 6 Laatstsii fa kadhize atstsa seerane;
\q2 mahi fa na7a fana ekkiza ubba garaafane»
\m yagayda. 
\v 7 Xoozii yinttana fa na7unts fana seerize wode genccote; Aday seeroosse na7ay oode? 
\v 8 Xoozii fa na7untsana ubba seerane; yin seerinttanxiko turii E na7a baayzin balako na7a. 
\v 9 Mahi nuna yelide nu aduntsi nuna seerane; nuunin unttana bonchchane. Yeezin, nuunii de7o yessades nu ayyaana Ades wayzi aadhii aqoso? 
\v 10 Yikke, nu aduntsi faas lo77o yessade fana eerats wodes nuna seerida. Yezin Xoozii nu maades, nu E geeshshatitsito gishinttode fana seerane. 
\v 11 Nu seerinttize wode zhilizane fattin ufayssoos. Yezin suubappa seeretsito lammadinttide asis seeritsita, saro kumide xillotitsi aafe aafizane.
\s1 Zoren naagizen
\p
\v 12 Yikke, yin arggacide kushiton yin labbide bunqqito mintsote.\x - \xo 12:12 \xo*\xt Isa. 35:3\xt*\x* 
\v 13 Wobbide faxode gaar fattin aadhii meqqaame gaar yin tohitis luule oge giigizote.\x - \xo 12:13 \xo*\xt Aazi. 4:26\xt*\x*
\p
\v 14 Asi ubbara saro yessadesin geeshshatitsara yessades minggote; geeshshatitsi baayzin ooden Laatstsii be7ades dandda7oos. 
\v 15 Yinttappa oodesin Xoozze aadho keehatitsita faccaame fana, mahi camo aafe aafize xapho dolii gaama asi tunizen dhabsize budutsi fana maaqqaame gaar naaginttote.\x - \xo 12:15 \xo*\xt Mahe 29:18\xt*\x* 
\v 16 Yin gidda olalize asi woy fettii tohe muuze katstsas fa anggistimo leqqii bayzide Eesawo fana asi yezaame gaar naaginttote.\x - \xo 12:16 \xo*\xt Medho 25:29-34\xt*\x* 
\v 17 Suubappa Eesawo yinna anjjito ekkodes koyze wode kaydanno erane. E yinna anjjito afutstsara miinggi koykon, denggodes dandda7ikaaya; E nagarappa maaqqades ixa denggikaaya.\x - \xo 12:17 \xo*\xt Medho 27:30-40\xt*\x*
\p
\v 18 Yin kushite bochinttize Siina derego, eexize tamago, dhumago, qayqayogon, gotego,\x - \xo 12:18-19 \xo*\xt Keze 19:16-22; 20:18-21; Mahe 4:11-12; 5:22-27\xt*\x* 
\v 19 moyze oolle woy qaala sinttize bessago yi7ikaaya. Yinna qaaltto si7ide asuntsi melle guja qaala si7aame fana woossida. 
\v 20 Akkos gayko, «Melle atto yezin, xootsii ye deriza bochchiko, shuchchara dhoginttii hyayqo» yaga7i kiita un tookkodes dandda7ikaaya.\x - \xo 12:20 \xo*\xt Keze 19:12-13\xt*\x* 
\v 21 Yinna hyanize bazita gaama dagantsize baz maaqqide gisho Muse, «Taanii zhashimora goqida» yagayda.\x - \xo 12:21 \xo*\xt Mahe 9:19\xt*\x*
\p
\v 22 Yezin yin Xiyoone Derizego, de7o Xoozii yeze Yerusalaame katama, fettilla shiiqii ufayttize gaama mukul kiitanchchuntsago salo yi7ida. 
\v 23 Un suntsita salo xaafinttide woosa keetstsis anggis na7untsago, as ubba firddize Xoozago, folo maaqqide xillo asunts ayyaanago yi7ida. 
\v 24 Kille caaqitis gidda maaqqii igintsize Yesuusago, Aabeela suutsappa aadhizebaz ohize wuxurkkinttide suutsago yi7ida.\x - \xo 12:24 \xo*\xt Medho 4:10\xt*\x*
\p
\v 25 Yinttis ohize atstse qaaltto si7oos ga7aame gaar naaginttote. Zaguntsi sa7appa ohide kiitto si7anxi ixxii attikaayzebaz maaqqiko yeezin, saloppa ohize qaaltto nuunii koyoos gayko wayzi attode?\x - \xo 12:25 \xo*\xt Keze 20:22\xt*\x* 
\v 26 Ye wode E qaaltta sa7a en7izida. Yezin hyatte taanii, «Sa7a xalaala maaqqikaayzin fettii tohe mahi salo en7isada» yagayda.\x - \xo 12:26 \xo*\xt Hag. 2:6\xt*\x* 
\v 27 «Fettii tohe mahi» gaaze qaaltta en7inttoosebaz miinggi yessade gaar en7inttize medhinttide bazita dhabodanno beezane.
\p
\v 28 Nuunii en7odes dandda7oosse ka7itumo ekkize gisho Xoozza galatane; Xoozza ufayssize ogera bonchchoran zhashimoran eza goynoda. 
\v 29 Yikke, nu Xoozze turippa michchize tama.\x - \xo 12:29 \xo*\xt Mahe 4:24\xt*\x*
\c 13
\s1 Wurssutsi zore
\p
\v 1 Ammanze asi fana fetay fetera folo siiqinttote. 
\v 2 Zaqqo mokkizanno botifete. Fettii fettii asuntsi yinnii gaara oochitera erikaayzara kiitanchchuntsana mokkida.\x - \xo 13:2 \xo*\xt Medho 18:1-8; 19:1-3\xt*\x* 
\v 3 Achcha yezuntsana yinttin unttara wolla achcha yezefana mahi unttana qoppote. Madha ekkize asuntsara wolla yinttin madha ekkizefana mahi unttana qoppote.
\p
\v 4 Machcho ekken gelen as ubba kale bonchchinttidebaz maaqqe. Mahi Xoozii olale hyanttizuntsanan laammizuntsana firddodes yeze gisho azinzen machchita fetay fetes ammaninttodes beezane.
\p
\v 5 Bira siiqoppa yinttana naagote; yinttis yezanna maaqqada. Xoozii, «Taanii nena muloran oloosi woy ashshoosi» yagayda.\x - \xo 13:5 \xo*\xt Mahe 31:6, 8; Iya. 1:5\xt*\x* 
\v 6 Yinnii gisho, nuunii ammaninttii,
\q1 «Laatstsii tana maaddizaya;
\q2 zhashtoos; asi tana akko yissade?»
\m gawuda.\x - \xo 13:6 \xo*\xt Maz. 118:6\xt*\x*
\p
\v 7 Xoozze qaala tiino yinttis ohide yinttana kaalitsizuntsana qoppote. Un wayzi yezezako un yestto bi7i un ammantto kaallote.
\p
\v 8 Yesuus Kiristtoosa omatsen hyaynon medhinas laaminttoos. 
\v 9 Dumma dumma kille timirttera melle bessa qitii dhabippete; qitippete. Nu wozuntta Xoozze aadho keehatitsite minggodes beezane fattin mu7in maaddoose katstsaran woga folera maaqqippe.
\p
\v 10 Nuus zharsho bessi yene. Yezin dunkkaane gidda oochchize kahinuntsi yinna zharsho katsitifa ma7ades unttis adetits wolqqa baaya. 
\v 11 Kahinunts hyalaqize nagara zharshos hyaars suutsi ekkii zharshodes Ubbappa Geeshi Bessa gelane. Yezin ye hyaarsize ashito gaseppa bale michchane.\x - \xo 13:11 \xo*\xt Leewe 16:27\xt*\x* 
\v 12 Yinnii fana, Yesuusa asuntsana nagarappa fa suutsite geeshshodes katama furtsafa balera waayinttida. 
\v 13 Yikke, nuunii E bortto tookkii gaseppa bale eego yedhdhote. 
\v 14 Yikke, nuus hyanne medhinas yeze katama baaya, yezin nuunii ye7ode katamito naagane.
\p
\v 15 Yikke, Yesuusa baggara ubba wode E suntsitis markkidhize doona galata zharsho Xoozis inggoda. 
\v 16 Lo77o baz oochchen yinttis yeze bazappa melle asis ingge botifete. Yikke, yinnii fana yeze zharsho Xooz ufayssane.
\p
\v 17 Yinttana kaalitsizuntsis kiitinttote; un gaazebaz oochchote. Un fa oochchize bazitis Xoozze tiino oocinttodes yeze gisho yinttana yenggane. Yin unttis kiitinttiko, fa oochito ufaytti oochchoda; yinna hyananxiko, un azzanora oochchoda; yinna yinttana akko bazin maaddoos.
\p
\v 18 Nuus Xooz woossote. Nu wozintta geeshi; nu ubba wode lo77o baz oochchodes koyane. 
\v 19 Taanii yinttago ellisii ye7ode fana yin taas mintsii Xooz woossode fana ta yinttana hyadara gaane.
\s1 Wurssutsi woosa
\p
\v 20 Sarotits Xoozze, duro yenggize nu Laatstse Yesuusa, fa medhina caaqo suutsite hyayqoppa dentsiday, 
\v 21 E qoftto oochchode fana lo77o baz ubbanne E yinttana danccizo. Eza ufayssize baz Yesuus Kiristtoosa baggara nu gidda Xoozii oochcho. Yesuus Kiristtoosa baggara Xoozis medhinappa medhina yellodes bonchcho maaqqe. Amin77e.
\p
\v 22 Ta ishuntso, ta hyay xaafide kiitiza yinttis hyaatara xaafide gisho yin ta zortto azal7ikaayzara ekkode fana ta yinttana woossane.
\p
\v 23 Nu ishe, Ximotiyoosa achchappa bilinttidanno erote. E ellisii taago yi7iko ta eera yinttana hyanggi be7ada.
\p
\v 24 Yinttana kaalitsizuntsanan ammanzuntsana ubba saro ga7ote. Xaaleppa yi7ide ammanze asuntsi yinttana saro yagaane.
\p
\v 25 Xoozze aadho keehatitsita yin ubbuntsara maaqqe. Amin77e.