\id TIT - Oksapmin NT [opm] -Papua New Guinea 1992 (web version -2014) 
\h Taitas 
\toc1 Taitas ohnong Por oh brak atip ohe meng oh 
\toc2 Taitas 
\toc3 Tai 
\mt1 Taitas  
\mt2 ohnong Por oh brak atip ohe meng oh  
\ip Mama meng moh Por oh Taitas ohnong brak mar adarhetipmur. Taitas oh Grik bap ihirmur. Oh be han hat patin gahan Por oh Hanipyah orhe yah meng oh porpatin oh amrama Hanipyah orhe danong hatipmur. Hapat Por ohsi itait Krit mongnong susa itait atei tap hat tamrein inpamur. Tamreim patimdapat gahan Por oh wan teinong sonmat ohnong Go matei Hanipyah orhe nita ihirnong wamat paptenmur por Taitas ohnong atei mandama wan mongnong sus indipmur. Patdapat gahan Taitas ohe danong akasip matporim mameng moh brak mat adarhetipmur.  
\c 1  
\p
\v 1 Por noh Taitas gonong mama brak mat nasar ohmur. Norhornong oh Got oh Por go norhe natamreio Jisas Krais ohe meng pot pisao hen han gonong norhor kis nahahmur napor kis nahat napat han noh Taitas gonong mama brak mat nasar ohmur. Kis nahat napapat han ohoh ihan Got oh Maihir norhe nita mat papat bap ihirmur por kis mat papat han ihir Got ohwi inahatin hatin hanwa ma dahapti ohe danong oh pomat orhorwi daham ha am hengwe rim noh mama ihat atamreipat ohmur. Got oh Ihir ihat ha songwe ma dahapat ohe yah danong hatin ohe arpin meng oh am hat ha songwe rim noh mama atamreipat ohmur.  
\v 2 Ihir ihat susa Got oh arpin nuhurnong yah hat eimat paten dasi sa nahat napaptepra daham sa am hapri. Ama eimat paten dasi ma nahatipra da meng oh Got oh dasuh na ham arpin mengwi ripat han orhor rih erer oh na darpat patin orhor Ihir ihat eimat paten dasi hat patepriwa napor rit natipmur.  
\v 3 Rit nasarpat Kaput mama dik oh hatporhan noh arpin meng moh ire kinteinong mar pitap matipramur dahatipmur. Dahapat gahan komdapat orhe ma dahatip dik oh hatporhan dire kinteinong ama dahatip arpin meng oh pitap matipmur. Ma pitap matip oh orhe atamrein han ire kinteinong pitap matporhan ire atem teidapat napor dirnong namgiptimur. Namgitperhan it da namburpat han Got orhor norhornonghe Gin go ihirnong nohe meng moh pitap mar pot pisona napor kis nahatporhan noh mama napot napisapat ohmur.   
\p
\v 4 Ama han norhor Taitas go diradir tap hat Got ohnong Ohwi inahatin hatin hanwa daham taptem titwi hat patimur. Ihat ma pati oh go norhe brernap hat pato rim noh mama brak mat nasar ohmur. Ihan noh at Gotsi namburin han Krais Jisas ihitnong Gut gutagute damdapat Yah matpera daham yah deipti da ohsi Taitas ohnong yah mat papayao manap hat paten ohe dasi mat papayao mar paptenmur por Taitas gwe ihat paten ohe meng oh noh nadahadeipatmur.   
\s1 Sios ihirnong wamat papten han kis matin oh mama mihat yah hat pati han ihirnongwi kis matinmur potip ohe meng oh  
\p
\v 5 Nohan Taitas noh gonong Krit mong ama namdatir oh mama ohe tamreindin oh ateidapat patim ha tamreinoh rim atei namdatirmur. Atei patim tamreindin oh mamaru hat tamreindinmur. Tit oh ihir pomat orhor ha dahatingwe rim go it yah mat orhor potinmur. Tit tamreindin oh noh rih ma napongwerru aptei aptei sios ire kakhan ham wamat papten han ihirnong kis mat pisonmur.   
\p
\v 6 Kis mat ma pisapra oh mama mihat pati han ihirnongwi kis mat pisonmur. Iraire kintei asoh Moh er hat na sapat han moh ohe boknong matin ohe meng oh timbashe dahat ma pati hano tit kuu dara ama dar kuu uhnongwi pomar papti han ihiro iraire brer ihirhe Krais ohnong Ohwi inahatin hatin hanwa dahat saptin kuuhan ihir wamara Moh ihat sapat brerhe. Mian imah ire hanip kintei ma er hat sapti ohe da hatin hat na sapat brerhe. Supir itapir ire mengnong na sakarap mar amrapat brerhe ma dahat pati brer ire itapiro ama ihtin han ihirnongwi sios ihirnong wamat papten han kakhan mar kis mat pisonmur.  
\v 7 Kis mat ma pisapra oh Got orhe atamreindin oh sios bap ihirnong wamat papten han bap ihirnong kis matipra ohoh ihan ire yah hat saya apriya haptinong asoh wamara ire boknong matin meng oh timbas hat pati han ihirnongwi kis mat pisonmur. Mama mihat pati han bap ihirnongri kis deipra. Nohwi yah hat pat hanhe dahayao kapkap bopor heisup hayao wain tom isip dam da timbas hayao be bokdus hanip ihirnong inin meng por suyao noh titsi titsi datiprohnengo daham er mat dariyao ama ihat pati han bap ihirnongri kis deipra.  
\v 8 Mamaru hat pati han bap ihirnong kis deinmur. Kat han ihir wan apteidapat apriyahanhe yah mar pisus den pandeyao yah hat son danong bopor mat papayao dakuu hat orhorwi sashen danong hat ayao duung dasi hat saya apriya hat ayao Got orhe duung da mutuhdapat hat ayao orhe danong ongeng mat papayao ama ihat pati han ihirnongwi sios ire kakhan ham wamat papten han oh kis mat pisonmur.   
\p
\v 9 Kis mat ma pisapra oh Poro dire arpin meng poriptinong kasip hat dindeipti ihirnongwi kis mat pisonmur. Ihirdapat kuuhan ihirnong pomat meng por ire danong akasip mat sa pisapri. Mengnong ma na amram gardeipti ihirnong oh pomat potperhan ihir amrama Epe. Nure ma ripti meng oh er menghe. Maire naporipti meng moh arpin yah menghe ihirhe sa dahapri. Imat pomat ha ritingwe rim dire arpin meng poriptinong kasip hat dindeipti ihirnongwi kis mat pisonmur.   
\s1 Krit kat han ihir dasuh meng poripti ohe meng oh  
\p
\v 10 Kasip hat dindeipti ihirnongwi kis mat pisonmur ma napor oh mohnong daham ginapormur. Krit ihiroh Sawa meng na amratper. Diradire danong hat sasiper ma dahapti han ihir han trun patimur. Ama ihir hanip gurnong na napanggeitin mengwi rima kat han ire danong dasuh mat pisaptimur. Eit watah gatmar Juda hat pati han bap ihir atnap ihat saptimur.  
\v 11 Ama han bap ihir Dir hanip ihirnong na poripti dasuh meng moh pora ama ohe pe oh dir yan adariprimur daham hanip dire na poripti meng oh pora yan adat pisaptimur. Yan datin ohe danongwi hat patim ma ihapti oh er haptimur. Ama ihapti han bap ihir meng ma poripti ohe pe oh kuu gamder imder tamder ire arpin meng amrapti yah danong oh asum er deiptimur. Ihir ihat dasuh meng pot pisapti ohoh ihan go ire dasuh meng hat saptinong oh baso por atimbas matinmur.  
\v 12 Ire ihat ma sapti oh rih Krit irair diki awam dapat han tit Krit dir dasuh mengwi ripti han dirmuro. Dir kot samin ire da hatin hat pati bap dirmuro. Dir dennonghe dipwi datar dam ga tam aman ham garhapti bap dirmuro potipmur.  
\v 13 Gin Krit ihirhe ohe ma potip mengru hat pati ohoh ihan Got orhe nita bap ihir dasuh mengsi; arpin mengsi tap mat ma marin pati han ihiroh dasuh meng oh mandama arpin mengnongwi marin ha paptengwe rim go kasip mengtei orhorwi ihirnong pomat potinmur.  
\v 14 Ihir Juda ire pohon ma ihapti meng danongo arpin mengnong dasei mar mandama iraire damdapat sawa mengmur rim ripti mengnongo oh ha mandatingwe rim pomat orhor pora baso por imtinmur.   
\p
\v 15 Hanip dire da oh mamaru hat patmur. Jisas ohe boknong ham ongeng tahat pati han dir Oh awammur ma ripti han erernong oh Moh awammur na rima yahwi hat saptimur. Jisas ohe danong na hat pati bap ihiroh Erer moh awammur daham ongeng tahatin ina hatin hat pati orhor ihir er han bap hama bisei hat patimur. Ihir er da apriporhan Moh er da sa na dahayao er da hatirhanhe Noh er hatir sa na dahayao hat pati ohoh ihan ihir er ham bisei hat pati bap ihirmur.  
\v 16 Ihat pati ihir atem teimdapat Nuhur Got ohnong am hat patimur ripti orhor ire saya apriya ma haptinong oh Got ohnong kom asar saya apriya hat pati bap ihirmur. Ihat patim mengnong kom asar yah danong eimatnap na hatin inasi hat pati ohoh ihan Got ohhe ihirnong dasei mat papatmur.   
\c 2  
\s1 Taitas go aiher san ihirnong meng oh mimat porinmur potip ohe meng oh  
\p
\v 1 Taitas gomdapat kuuhan ihirnong ma potiproh meng oh arpin meng ma naporpat meng orhorwi por am mat pisonmur.  
\v 2 Han aiher san ihirnong am mat pison meng oh mohmur. Gur da timbas hatinmat er tomhe ruumsan dapri. Gure saya apriya hatinhe ihir wanahama Ihir yah hat saya apriya hatin ohe ina ohsi ham ihaptihe napotin ohe inasi ham saya apriya ham patenmur. Gurnong kapkap er nahapat da ohri hapri. Danong ongeng mat paptenmur. Gur arpin meng oh kasip hat orhorwi marin paptenmur. Bopor deipti dahe kasip hat orhorwi marin paptenmur. Yah danong hat ma sapti dahe kasip hat orhorwi marin paptenmur porinmur.   
\p
\v 3 Kuu aiher san ihirnonghe amaru mat orhor porinmur. Mamarumur. Gur danong ongeng mat pisapti kuu ihir hatin hat orhorwi sashenmur. Gur arwananah ihirnonghe komdapat aripri. Wain tom din ohe danonghe kinkin da hatwi patepri. Ihatri patepri. Danong ongeng mat pisapti kuu ihir hatin hat orhorwi sashenmur. Ihat yah hat orhorwi susa kopen kuu ihirnong yah hat son meng ohwi am mat pisashenmur.  
\v 4-5 Am mat pisashen ohe meng oh mamaru mat pot pisashenmur. Kopen kuu gur imanir ire danong ham bopor deiyao guragure brer ire danong ham bopor deiyao guragure danong ongeng mat papayao guragure inanong mihih mat papayao guragure ap tamreindin danong ham tamreiyao kuuhan ihirnong hinhina mar panggeiyao guragure imanir ire hrep ayao henmur por kopen kuu ihirnong yah sawa meng moh pot pisashenmur. Imat pot pisaptin ihir yah hat saptin kat ihirdapat wamara Got ohe kasip ohsi ihat sapti ma hapat daham Got ohe meng pot pisapti mengnong moh ihir na dasei mar yah meng ma hapat sa dahapri. Ihan gur Yah mengwi am mat pisashenmur Taitas go ihirnong por am deinmur.   
\s1 Kopen na paser hat pati han ihirnong mimat meng porinmur potip ohe meng oh.  
\p
\v 6 Na paser hat pati han ihirnonghe gorhe han pasero kuu kuseno ihirnong meng yah mat ma porpatru mat orhor porinmur. Ihirnong ma poripra oh Gur guragure sapti dao gonsi danong ongeng mat paptenmur kasip mat porinmur.  
\v 7 Pora Taitas gorhe us apir ma hahnonghe yah hat orhorwi pinggim sashenmur. Ihat pinggit sapatin ihirhe gorhe yah hat sapatnong oh wanahama ihirhe ihat yah hat orhor sa sasipri. Ihat susa meng ma am mar poriprahe go arpinnap mengwi porinmur. Deinin meng hatinmathe poripra. Da darherpat pomat mengwi porinmur.  
\v 8 Imat yah mat orhorwi porpatin meng oh dire boknong nahatinmat ma wanahat pati han ihiroh Gin er hat son ohe meng na naporipti ma hapat. Gin dirnong meng naporipti han ire boknong matin meng oh timbas ma hapat daham kas haprimur.   
\s1 Atamreipti han bap ihirnonghe mimat meng porinmur potip ohe meng oh  
\p
\v 9 Kakdah mama ire be ha atamreingwe rim ire hrepnong naham nang natpat napapti hatin hat pati han ihirnonghe Gur guragure imat ma napapti han iraire danong ham iraire atamreindin meng oh naporiyahan gur ama ihat tamreindin ma naporiya mengnong oh amkaripri. Gonsi amram ihenmur. Ihama ihir Nuranure natamreipti han maihir nuranure poriya meng oh amram yah hat orhorwi natamreiptimur daham amamsi hat ha patengwe rim gur yah hat orhorwi atamreinmur. Gur ire naporiya mengnong sakarap mar guragure dahapti danongwi hat sasipri. Ire ma naporiya mengnong amram ihenmur.  
\v 10 Gure napapti han ire erer ohhe agapah hapri. Ihir gurnong wanaham Maihir nuranure mengnongwi amram na gapah ham yah hatwi natamrein sapti han bap ma hapat ha dahengwe rim yah hat orhorwi atamrein sashenmur. Gur ihat sayahanoh Got ohe nambur napapten ohe mengnong amam ham amratin meng matiprohemur. Matperhan ihir wanahama Got ohe nambur napapten meng moh yahnap meng ma hapat sa dahapri. Ihir ihat ha dahatingwe rim gur ihat orhorwi sashenmur por Taitas go ama meng oh am mat pisashenmur.   
\s1 Yah hat patim Jisas ohe apripranong oh wamtinmat minhan patenmur ritip ohe meng oh  
\p
\v 11 Got orhe damdapat orhor Noh ihirnong yah matpora ma dahapat da oh kuuhan gonsi dire kinteinong pitap matipmur. Ma pitap matip oh Jisas Krais ohe dap tei moh kuuhan gonsi ihirnong ambutin mandap amanhetpora daham darhera orhe damdapat Imat yah matpora ma dahapat da oh pitap teinong matipmur.  
\v 12 Pitap teinong mara Gin gur norhe yah da pitap teinong dei moh wandeipti gur Got norhornong kom nasar er hat sapti ohe dao kakdah han guragure ina teimdapat tarpam Noh ihtipora noh ihtipora daham ma er hat sapti ohe dao ama ihat sapti danong ohri kom asar mandatinmur. Mandama kakdah morhor patim potahat daham saya apriya hat ayao yah hat son ohe danong hayao Got orhe dahat pat danongwi hat ayao hat sashenmur.  
\v 13 Ihat susa kakdah morhor Jisas Krais oh diradire nambutin han kasipnap Got oh ma hapat. Ama kasip han oh yahnap hat apripra ma hapat daham amam hat orhor minhan patenmur napor orhe yah matpora ma dahapat ohe da oh pitap teinong mar namgitipmur.  
\v 14 Ama minhan pati han Krais orhor Noh ire er nang hrepnong hat pati moh norhor ambura yah teinong matpora. Yah teinong mara ire er gap ahirmara eimat norhe kuuhan hat paten han bap matpora. Mara yah hat pan hat sashen ohe da ohsi matpora daham orhe yah hat paten ohe danong na hama dire danong ham dire gwemat haputipmur. Ama inahapat han orhornong apripra ma hapat daham minhan patimur.   
\p
\v 15 Taitas go nohe ma napor meng moh dipwi kuuhan ihirnong por am deinmur. Am mara go norhe mengtei porpat han ohoh ihan go kasip mengtei ihirnong Gur mameng moh amram dindeinmur por kasip deinmur. Kasip mara na amraya kuuhan ihirnong imtin meng hatin mat porinmur. Ihirdapat Moh be han naporpathe daham dasei nahatipririm go Noh orhe mengtei imat naporpatmuro porinmur.   
\c 3  
\s1 Taitas go Got ohe nita kuuhan ihirnong mameng moh por paptenmur potip ohe meng oh  
\p
\v 1 Taitas go Got ohe nita hat pati kuuhan ihirnong Gur gapman bap kakhan hat pati han ire hrepnong hat inpera daham ire hrepnong hat patim ire naporiya meng oh marim amram dindeinmur. Dimara ire yah tamreindin ohnong oh tamreindina naporiyahanoh naporiya meng oh gur damdapat pan hat pati da orhorsi tamreinmur.  
\v 2 Kuuhan gonsi ire win oh kat han ire kintei asohhe adasei mar win aer deipri. Kuuhan ihirsihe sakarap goshamo mengin goshamo hapri. Gonsi ire danong ham manap da tei orhor paptim guragure yah han bap mat orhor paptenmur por Taitas go ama meng ohsi Got ohe nita hat pati ihirnong ire danong apamsaswi paptenmur.   
\p
\v 3 Nohe Go ire danong apamsaswi paptenmur ma napor oh diradire rih ma pateshe danong oh dahama ginapormur. Rih ma pateshe oh da oh mamaru hat pateshemur. Rih ma pateshe oh da ban tahat patim hanip meng naporiya mengnong na amram sakarap deishemur. Dir hanip ire dasuh meng naporiya mengnong oh amratperhan ameng oh pranahat er da basnong napisasuhmur. Diradire er da orhor noh ihahneng noh ihahneng ma dahapti da ohe hrep naham namrin napaptesuhmur. Ihama er da ham susa tit han ohe ihahnong asoh nohhe ihahneng daham abopor deishemur. Ihat patina kat han ihirdapat dirnong dasei nahayao diradirhe dasei gosham mahaw goshat pateshemur.   
\p
\v 4 Dir ihat patin orhor dire namburpat han Got oh orhe bopor naham yah nahapat da oh pitap teinong mara dirnong nambutipmur.  
\v 5 Ma nambutip oh hanip diradire yah hat sapti ohe pe oh ambutpora daham na nambutipmur. Basra. Dir er hat patin orhor orhor hinhina dasi han ohoh ihan dirnong hinhina naham nambutipmur. Ma nambutip oh dire er gap hirmat namdama orhe Yahsup ohsi orhorsi yah hat paten ohe kopen brer nahama kopenohe han nahatipmur.  
\v 6 Ma inahatip oh orhe Yahsup oh diradire namburpat han Jisas Krais orhe dap teidapat dire mutuhnong isip mat orhor namtipmur.  
\v 7 Got orhe yahsup oh dire mutuhnong isip mat ma namtip oh orhe damdapat orhor Noh ihirnong imat isip mat orhor apripora. Apriporhan ihir ama Yahsup oh norhe kintei yah han bap mar sa paptepra. Imat papatin brer ihir itapir ire pan erer oh datipriwa ma dahaptiru hat orhor ihirhe Nuhur Got ohsi ihat eimat yah hat paten da oh dara Got orhorsi yah hat patepriwa sa dahapri daham napdapmur.   
\p
\v 8 Nohe ma napor meng moh arpin dam timdin meng ohoh ihan Taitas go ohe danongwi kasip hat patim orhor kasip mat orhor Got orhe danong ham Ohwi inahatin hatin hanwa ma dahapti kuuhan gur yah danongwi ham yah hat orhorwi sashenmur porinmur. Yah hat sapti ohe da oh kuuhan gonsi ihirnong panggeitin yahnap da ohoh ihan yah hat orhorwi sashenmur porinmur.   
\p
\v 9 Nohan Taitas go dasuh han ihir iraire damdapat orhor ropir ire boknong mar meng sang riptinongo Juda nure pohon sawa mengnongo ihir ama mengnong oh hut patim na daham meng gusum sakarap goshayao hayahan ama ihya han ire meng ohri amrapra. Gori ire mengnong kom asarinmur. Ihtin meng oh dam na timam na napanggeitin meng ohoh ihan ameng ohsi amrapra. Kom asarinmur.   
\p
\v 10 Tit han tit Got ohe nita ihirnong irair mahaw gosham katket tahatin dasi matin ina hahhanoh Go ihapra por imtinmur. Por imtiporhan na amrahanoh it titsi Ihapra por imtinmur. Imtiporhan oh na amratin inawi hat ahanoh go Ama ihtin dasiwi hat pat han go ihtin meng ohsi manongri apripra por baso por eimat kom asar er mat darherinmur.  
\v 11 Ama ihat sapat han oh yah danong mandama er danongwi kweireh tahat patim ihat sapat han ohoh ihan orhe ma er hat sapat da oh hanip orhornongsi er han mat papat ma hapat dahenmur.   
\s1 Kapkep matip ohe meng oh  
\p
\v 12 Gin noh Taitas gwe patnong Atemissi; Tikikas ihitnong tit han tit darhetiprohmur. Darhetporhan nohe ma darhetiproh han oh gwe pat tei oh apirit go nohe pat aprin ohe danong oh kasip ham Sapora dahat patdapat orhor kapkap nohe patnong aprinmur. Nohe da oh Kimsi mong er hat ma indipra dik oh noh matei na indipramur. Nikoporis ap mutuh sus indipramur dahapatmur. Ihan gohe noh atei patin aprinmur.  
\v 13 Sawa meng am hat pat han Sinas ohsi; Aporos ihit nohe patnong ha apringwe rim panggeim mamen matinmur. Indeipat mandap aprin ohe ererhe pomat panggeim apinmur.   
\p
\v 14 Krit ihir gospanggeit indin ohe danong asoh na hat pati bap ohoh ihan Got orhe nita kuuhan bap ihir gospanggeit indin ohe danong asoh na hama be patepririm Taitas go ihirnong Gur beheri gapa hat patepri. Kat kuuhan ihir ire din hano erer oh hatip hat patihanhe moh panggeitin kat oh patin orhor dir kapkap na panggeiyahan er hatiprohekin daham ama ihat hatip hat pati kuuhan ihirnong panggeitin ohe da oh kasip hat orhor am ham pomar panggeit paptenmur porinmur.   
\p
\v 15 Mama kuuhan nohsi pati maihirhe gonong Ohhe sa yah hat pato napor dahatahayamur. Got ohe danong hat patim dirnong bopor nahat napapti bap ihirnong Ihirhe sa yah hat patio rim Por oh dahatahat hangwermur potinmur.  
\p Got orhe damdapat orhor bapkei naham yah nahapat da oh gursi ha napaptenohmur.  
\p Gin nohe meng oh kimur.