\id ROM - Oksapmin NT [opm] -Papua New Guinea 1992 (web version -2014) 
\h Rom 
\toc1 Rom ihirnong Por oh brak atip ohe meng oh 
\toc2 Rom 
\toc3 Rom 
\mt1 Rom  
\mt2 ihirnong Por oh brak atip ohe meng oh  
\ip Mama meng rim ma brak matip oh Por orhor brak matipmur. Orhor Korin ap mutuhdapat patim Rom ap mutuh Hanipyah Jisas orhe nita hat pati gonsi ihirnong brak mar adarhetipmur.  
\ip Por orhe rim ma brak mar adarhetip oh Juda hat pati hansi; Juda na hat pati hansi ihir gonsi sama Got orhor Gur yah hanmur ma naporpat oh dire ina teimdapat ihapti danong moh wanaham Got oh Gur yah hanmur na naporpat ma hapat. Damdapat Got orhornong Ohwi inahatin hatin hanwa dahapti ohe pe ohwi Gur yah han bapmur naporpat ma hapat daham ha am hengwe rim brak mar adarhetipmur.  
\c 1  
\s1 Got oh Por ohnong meng pot pisashen han kis matip ohe meng oh  
\p
\v 1 Noh Pormur. Noh Krais Jisas ohe atamreipat hanmur. Got oh nohnong Go norhe mengtei Krais ohe yah meng oh pot pisashenmur napor kis nahat napapat han noh Rom ap mutuh ma pati gurnong mama brak mat nasar ohmur.   
\p
\v 2 Ama yah meng oh rih orhor Got oh orhe meng pot pisashen han propet ire atem teinong rit atporhan ihir Mihtin yah han tit apripramur rim Got orhe meng ritporhan brak matpa brak ban tei oh brak mat sarishemur.  
\v 3 Ama imat brak mat sarishe oh Got orhe mon diradire nambutin han Hanipyah Jisas Krais orhe boknong mar brak deishemur. Ma brak deishe oh Oh kakdah mama hanip brer ham ma tarpatipra oh Depit ohe puh ire bok oh tarpatipramur.  
\v 4 Ma tarpatipra oh yahnap hat paten danong oh Moh Got orhe brer ma hapat dahat paten ohe da oh Got orhe kasip oh ohe boknong pitap mara namgitipramur. Imat ma namgitipra oh orhe kasip ohsi mon ohnong pamsaporhan arpin orhe mon ohnong imat pamsa ma hapat dahatiprimur rim brak matpamur. Imat rim ohe boknong mar ma brak matpa oh diradire Hanipyah Jisas Krais orhe bok oh dam timama dam tarpatipmur.   
\p
\v 5 Ama Krais orhe dap teidapat oh Got oh orhe damdapat orhor Noh Krais orhe dap tei oh imat yah matpora ma dahapat da ohsi nohnong Go norhe mengtei yah meng moh pot pisashen hanmur napor nohnong kis nahat napapatmur. Kis nahat ma napapat oh Noh Juda na hat pati han bap among among ma pati bap ihirnong meng potporhan meng amrama Moh arpin ohwi inahatin hatin han ma hapat daham ha dindeingwemur. Dindeipti Krais orhe winnong adaptuhut ha pisashengwemur rim nohnong meng porin han kis nahat napapatmur.  
\v 6 Got oh Moh Krais ohe danong ham dimtin han bap ha hatingwe napor ma kis nahat napapat oh among among pati han ihirsi; Rom ap mutuh ma pati gursi guragurnong tap mat kis nahat napapatmur.   
\p
\v 7 Ama orhor kis nahat napapat guroh Got orhor gurnong bopor naham Moh norhe nitamur napor kis nahat napapat han bap gurnong noh mama brak mat nasar ohmur. Gure paten ohe meng oh noh diradire At Got ohsi; diradire Hanipyah namburin han Jisas Krais ihitnong Gut taman gutagute damdapat Imat yah matpera ma dahapti da ohsi yah mat paptenmuro. Paptim yah ham manap hat paten ohe dasi mat paptenmuro por gure paten meng oh noh nadahandeipatmur.   
\s1 Por oh Rom ap mutuh gurnong noh yah meng moh napotin ina hat patmur potip ohe meng oh  
\p
\v 8 Nohe ohri ma napotiproh meng oh mohmur. Among among ma pati kuuhan gonsi ihir gure pati meng oh Rom ap mutuh pati ihir Jisas Krais ohe danong hama Ohwi inahatin hatin hanwa dahatin ohe da oh isip hat patimur ritperhan noh amrapatmur. Amrama Ihir Jisas ohe dap teidapat ihat patio rim noh Got ohnong weso porpatmur.  
\v 9 Weso pora noh dipwi Got ohnong ma meng porpat oh gure danong hama gure ihat paten ohe meng oh nadahandeipatmur. Nohe ma dipwi nadahandeipat oh Got orhor Oh ire paten meng oh imat naporpat ma hapat daham orhor am hat patmur. Ama Got orhe atamreindinnong oh noh kasip hama pomat orhor atamreim mon orhe yah meng oh pot pisapatmur.   
\p
\v 10 Noh tit meng por ma dahandeipat oh At Gota. Noh ire patinong sapora dahapat orhor son mandap oh timbas hat patmur. Ihan go Yahwa. Gin ha sonoh dahahhanhe mandap namanhetinmur por dahandeipatmur.  
\v 11 Noh gure patinong apris gursi diradir tap hat ayaneng daham dahandeipatmur. Noh aprisa gure Krais ohnong dahatin da oh Got orhe Yahsup oh titsi naprisa ha kasip nahat napisashenoh rim noh apripor daham Got go mandap namanhetin por dahandeipatmur.  
\v 12 Got orhe Yahsup oh gurnong titsi napris kasip nahat orhor ha napisashenoh daham ma apripor ihpat oh mamarumur. Nohe Krais ohe danong ma hapat da oh gurnong napris kasip nahaho gure Krais ohe danong ma hapti da oh nohnong napris kasip nahayao ham diradir kasip goshat inperim noh gure patinong apripor ihpatmur.   
\p
\v 13 Nohe taptem gur mohnong dahatinmur. Nohe da oh dipwi gure patinong apripora dahapat orhor apripor ihah tei oh ti da ti da oh apris mandap gatnahapatmur. Noh gure patinong apripora ma dahat pat oh nohe mong mong mama Juda na hat pati han bap ihirnong noh meng pot pisapat ohe pe oh ire Krais ohe danong ma hapti da oh gurhe ihat ha dahat patengwe rim noh apripor dahapatmur.   
\p
\v 14 Nohe taptem gur mohnong dahatinmur. Got oh yah naham meng ma napin pat moh nohnongwi na napin pat ma hapat dahapatmur. Kuuhan gonsi ihirnong potin ohesi tap mat napin pat ma hapat. Ihan ihirnong potin ohe dahe yan hat hatin patmur. Meng potin da ma isip yan hat hatin ma pat oh Grik ma poripti han bap ihirsi; Grik na hat pati han bap ihirsi tap mat potin meng oh isip yan hat hatin patmur. Dakuu hat pati han bap ihirsi; da hut pati han bap ihirsi tap mat potin meng oh isip yan hat hatin patmur.  
\v 15 Noh ihat Krais ohe yah meng napotin oh yan hat hatin pat ohoh ihan noh Rom ap mutuhnong apris ama pati gurnongsi kapkap orhor naporneng dahatwi patmur.   
\s1 Krais ohe yah meng oh kasipnap mengmur potip ohe meng oh  
\p
\v 16 Gur mohnong dahenmur. Krais orhe yah meng moh ma pot pisapti ohe pe oh ihir arpin Krais orhor inahatin hatin hanwa dahatperhan Got orhe kasip ohsi ambutin inasi mar papatmur. Ihtin kasip mengo rim noh hanip ihirnong potin oh noh na kas ham potin dawi ham porpatmur. Got oh yah mar ambutin inasi mar ma papat oh Juda nuhurnongri imat nambutin inasi nahat napapatmur. Komdapat Grik han bapo ama be han hat pati bap gurnong oh ihtin inasi nahapatmur.  
\v 17 Ama kasip mengnong amrama Ohwi inahatin hatin hanwa ma dahat patiru ihat dahat pati ohe pe ohwi Got oh Moh yahnap hat pati han ihirmur naporpatmur. Got oh Ama ihat dahat pati ohe pe ohwi noh ihirnong Gur yah hat pati han bapmur potipramur ma dahatip da oh orhe ritporhan ma brak matpa yah meng dap tei orhor orhe ama dahatip da oh pitap teinong mar am nahatipmur. Pitap teinong mar ma am nahatip meng oh mamaru hat patmur. Orhor inahatin hatin hanwa dahapti ohe pe ohwi yahnap bapmur napor eimat yah hat paten dasi nahatipra han bap gurmur ritporhan brak matpamur.   
\s1 Got oh orhe pohon pat da oh pitap teinong matporhan na dahama kom asarishe ohe meng oh  
\p
\v 18 Hanip dir Got ohe dahapat danong na hama amkar er hat ma sapti oh arpin mengnong ama er hat sapti da ohsi amkar er deiptimur. Ama ihat er hat sapti han ihirnong oh aw tei mahat ma pat Got oh gonsi ihirnong bopor heisup mat wamat papatmur. Ama heisup mat papat da oh pitap teinong matporhan hanip dir wamar am haptimur.  
\v 19 Wamar ma am hapti oh Got orhe pohon ma pat da oh gonsi pitap teinong deipatmur. Pitap teinong mat papatin dir gonsi wamar am haptimur.  
\v 20 Got orhe pohon pat da ma pitap teinong deipat oh orhe kopenat ma darpa tei orhor pitap teinong mar paptesuhru papatru papatmur. Imat papat han ohoh ihan dir orhe ihat pat danong na wamtin ina hat pati orhora; orhe erer ma darpam itipnong asoh pitap teinong mar papatin dir wamara ihat pat han ma hapat daham am haptimur. Orhornong mihat pat han ma hapat dahatin ohe da oh orhe darpatip han ohe basnong mat ma papat oh tit oh Orhor eimat kasipnap han pat ma hapat ma dahapti ohmur. Tit oh Orhe gon han hat pat han ma hapat dahapti da ohmur. Ihat pitap teinong mat papat han ohoh ihan dir Noh ohnong hanhanmur potin mandap oh timbasmur.   
\p
\v 21 Orhornong am ham Got orhornong armi matin ohe dao Wes orhor inahat napapat hano potin ohe dao oh pitap teinong mar papatin orhor kat ihir wamar am hapti dir ohnong weso por na armi matiprohe por kom asar sashemur. Kom asar saptin dakuu hatin ohe danong oh da tein taham kwitem dus ha saya hatin hat susa da hut sashemur.  
\v 22 Da hut susa Nuhur dakuu hat sapti han bapmur rishe orhor dahatin danong na dahama hut patim sashemur.  
\v 23 Hut susa yahnap gon han armi matin Got ohnong na armi matiprohemur daham iraire bes teimdapat hanip hatin mat arhuriyao ner hatin mat arhuriyao apop hatin mat arhuriyao hasiap ihir hatin mat arhuriyao mara ama imat arhuriya ire danong ham armi matpera daham armi mat pisashemur.   
\s1 Got oh ihirnong arpit mandatporhan ihir ti da ti da ohe er da hrepnong ham er hat sashe ohe meng oh  
\p
\v 24 Hanip ihir Got ohnong kom asara iraire ma arhuriya han ire danong ham ihat hut saptin Got oh Yahwa. Ihat pati han gur ohoh ihan guragure ina teimdapat noh ihtiprohneng noh ihtiprohneng dahapti ohe er da hrepnong hat patenmur por ama ohe da hrepnong mat mandatipmur. Mandatporhan mian imah ire bisei saw goshat sapti da hatin hat patim irairnong er goshat sashemur.  
\v 25 Ihat er goshat ma sashe oh han ihir Got ohnong Ihtin hanhe. Ihtin hanhe ma poripti arpin mengnong amkar mandama dasuh mengnong amram dimtipera daham dindeishemur. Dimara erer darpatip han kasip armi matin han Got orhornong armi matin han orhor patin orhor orhe darpatip han erernong Got hatin mar ama erer ire danong ham win adaptuhur armi maro imat pisashemur. Imat armi mat pisus armi matin han orhornong ma mandashe oh hanip diradire dipdipwi armi mar win adaptuhur paten Got orhornong mandam ihashemur. Arpinwa.   
\p
\v 26 Arpin armi mar papten Got ohnong mandatperhan ohhe Guragure hanip gure kassi hanip dire na ihapti ohe er da ohe hrepdapat hat patena por kom asar mandatipmur. Mandatporhan kuu ihirhe han ihirsi gamder yah hat paten da oh mandama kuu irairnong gamin hatin hama irairnong bisei saw goshat sashemur.  
\v 27 Han ihirhe irair gamder yah hat paten da oh mandama han irair bisei saw goshat son da oh isip mat paptin han irair saw goshat sashemur. Ama hanip dire kas ham na ihapti da oh ihir na kas ham ihat sasashemur. Ihat saperhan batbethe iraire ma ihat sashe ohe batbet kis orhorwi darishemur.   
\p
\v 28 Ihir Got orhornong dahatin ohe da oh na hatiprohemur daham mandatperhan Got oh Yahwa. Guragure er da hat sapti ohe da er hrepdapat hat patena por arpit mandatipmur. Mandatporhan hanip dire na ihapti ohe er danong hrepdapat hat patim ama hanip dire na ihapti er danong ohwi er hat sashemur.  
\v 29 Er hat susa nitat er hat son ohe da oh isip mara teip mat pisashemur. Ama nitat teip mat pisashe da oh mamaru hat patmur. Tit oh hanip ihirnong indeipti da ohmur. Tit oh arwananah ire asoh nohenengo daham ma abopor deipti da ohmur. Tit oh mahaw gosham er deipti da ohmur. Tit oh ihir ihat na patineng nohwi ihat pat hannengo dahapti ohe da ohmur. Tit oh hanip moh ha haputinoh daham ma supti da ohmur. Tit oh inggoshat sapti da ohmur. Tit oh arwananah ihirnong dasuh mara be ma adaripti da ohmur. Tit oh hanip ihirnong heisup mara komdapat ma aripti da ohmur. Tit oh be inin meng hanip boknong mar aripti da ohmur.  
\v 30 Tit oh arwananah ire kintei asoh tit han ohe winnong aer mar aripti da ohmur. Tit oh Got ohnong dasei mar tumbe gut asaripti da ohmur. Tit oh ihirnong dasei deipti da ohmur. Tit oh norhorwi ihtin hanmur rim tohormi tahat sapti da ohmur. Tit oh rih ti na ihashe ohe er da pamsaripti ohe da ohmur. Tit oh brer ihir supir itapir ire poriya mengnong na amrama sakarap hat sapti da ohmur. Ama er da trun oh ire danong teip mat paptin ihat sashemur.  
\v 31 Ihat ma sapti ihir da hut er hat sapti bap ihirmur. Ihir iraire Noh ihtipramur ma riya mengnong asoh na dindeipti han bap ihirmur. Iraire taptem ihirnong na bopor deipti han bap ihirmur. Ihir hanip ihirnonghe na hinina mar er deipti han bap ihirmur.   
\p
\v 32 Ama er hat sapti han bap ihir Got oh Ama ihat er hat pati bap ihirnong kat han ihirdapat suyarit ha haputingwemur ma ritip meng oh am hat patim orhor ihir ama ritip danong na ham er danong hat orhorwi isip hat saptimur. Isip hat ma sapti oh iraire er hat sapti danong ohwi hat na saptimur. Kat han ire ma er hat saptinong asoh ihir wamara Maihir yah hat sapti han bapmur gigosham er danong hat orhorwi patimur.   
\c 2  
\s1 Got ohe duung dasi hat ma nasatipra ohe meng oh  
\p
\v 1 Gur ire ma ihat sapti da oh gurhe ihat er hat patim orhor ihirnong Maihir iraire er hat ma sapti ohe pe oh Got oh heisup mar er yan apripramur ma poriya meng oh guragure er hat sapti mengnong Nuranure mama er hat sapti ohe pe oh nuhurnong er yan napripramur riptimur. Ihat daham ma ripti gur er da am hat patim orhor giripti ohoh ihan gur kinhat noh Got ohe er yan ma napripra oh hanhan hat patim ihpatmur ritiproh.  
\v 2 Ama ihat er hat sapti ihirnong Got oh be bokdus Go er hanmur na porpatmur. Iraire ma ihapti danong asoh wamara Got oh Go er hanmur por orhe duung da ohsi sapatmur. Got orhe duung dasi imat ma sapat oh dir am hat patimur.  
\v 3 Duung da ohsi nasapat han ohoh ihan kat han er hat sapti han guragurdapat kat han ihir er hat saperhan Maihir iraire er hat sapti ohe pe oh Got oh heisup mar er yan apripramuro ma poripti han bap gurnong oh Got oh Gur hanhan hat patim ihat sapti bap gurmuro napor namdatiprada. Basra. Imat duung dasi mat nasapat han ohoh ihan gurnonghe na namdatipramur.  
\v 4 Kat han ire er hat saperhan Got oh ihirnong hinhina mar ma na supatnong oh gur wamara Got orhor hinhina da ohsi isip hinhina nahat napapat han ohoh ihan nuhur nuranure danong ham mihat sayahan yahwa. Got oh na nitiprohwa dahamhe dasei mar ihat sasipri. Basra. Oh kapkap na nima ma wanahat pat oh guragure er hat sapti da oh mandama yah danong ha hatingwe rim manap da tei wanahat napat ma hapat dahenmur.   
\p
\v 5 Got oh manap da tei ham wanahat napat orhor gur Nuhur wan danong na hatiprohemur. Mama da morhorsiwi mihat pateprimur daham ma ihat sapti guroh guragure batbet datinnong oh ruprup mat sara patan pruptimur. Ama imat ruprup mar patan prupti ohe yan oh Got orhe duung dasi dahanaham orhe bopor heisup da ma pitap teinong matipra dik oh ama patan prupti er yan oh napripramur.  
\v 6 Imat nasama yan ma napripra oh diradire ihat sapti kis yan orhorwi napripramur. Ihan gure am hat patim orhor ihat sapti han gure yan oh isip er hat sapti ohoh ihan yan oh isip datiprimur.  
\v 7 Nohe yah hat sapat ohe pe oh Got oh amamsi naham winsi han naham orhorsi yah hat eimat paten dasi sa nahatipra daham ama ohe danong kasip ham ma yah hat sapti gurnong oh Got orhorsi dipwi yah hat paten ohe dasi nahatipramur.  
\v 8 Arpin yah danong moh mandam nuranure ina boknong daham armi tahat sasipera daham ma er hat sapti bap gurnonghe Got oh ama ihat sapti ohe pe oh orhe bopor heisup da oh tom ohe tan isipnap yohot gure boknong napripramur.  
\v 9 Ma napripra oh er danong hat sapti bap gonsi gurnong ruumsup isip namkara batbet isip napripramur. Imat ma napripra oh Juda ihirnongri dahama ire ma dahah ohe pepuhdapat oh Juda na hat pati han bap ihirnong daham tap mat er hat sapti ohe yan oh namkatipramur.  
\v 10 Oh er hat ma sapti ihirnong imtipra ohmura; yah hat ma sapti bap gurnong oh winsi han nahama orhorsi manap ham yah hat paten ohe has da oh napripramur. Ma napripra oh Juda ihirnongri dahama ire ma dahah ohe pepuhdapat oh Juda na hat pati han bap ihirnong daham ama yah yan oh tap mat napripramur.  
\v 11 Tap mat ma napripra oh hanip diradirnong Moh Juda baphe. Moh Juda na hat pati han baphe daham na nasapatmur. Tap mat tit bapwi nahat napapatim nasapat han ohmur.   
\p
\v 12 Got ohe ma nasatipra oh mamaru mat nasatipramur. Juda na hat pati han bap ihir Moses ohe natip sawa meng hrepnong na hat patim ma er hat sapti han ihirnonghe Moses ohe natip sawa hrepnong mar na sama iraire er hat sapti ohe pe Go er hasuh hanmur por batbet apripramur. Juda hat pati han bap ihir Moses ohe natip sawa ohe hrepdapat hat patim er hat sapti han ihirnonghe ama sawa hrepnong mar sama Go er hasuh hanmur potipramur.  
\v 13 Moses ohe natip sawa mengnong be ma amrapti kuuhan bap ihirnong oh Gur yah hat pati han gurmur na porpatmur. Amram ma dipwi dindeipti kuuhan bap ihirnongwi Gur yah hat pati han bap gurmur porpatmur.  
\v 14 Juda na hat pati han bap ihir Moses ohe natip sawa meng oh na amrat patim orhor iraire damdapat Moses ohe ritip sawa mengnong dindeiya hatin hat ma sapti oh Moses ohe natip sawa meng oh ire mutuh oh pat hatin hat patim ihat saptimur.  
\v 15 Moses ohe natip sawa meng oh ire da mutuh pat hatin hat ma pat oh mamaru hat patmur. Tit dah tit iraire da oh Go er hat sapatmur por am deipatmur. Tit dah tit iraire da oh Gin go yah hat sapatmur porpatmur. Ihat ma porpat oh Moses ohe natip sawa meng oh ire mutuh pat hatin hat pat ma hapat dahaptimur.  
\v 16 Moses ohe sawa meng hatin oh hanip mutuh pat ohoh ihan pepe dik oh Got oh Gin Jisas Krais go ihirnong dahamar satinmur por ma darhetipra dik oh orhor hanip diradire hanip ire kintei ma ihat sapti dasi; ahar ma ihapti dasi orhap pomat nasatipramur. Nohe yah meng ma ihirnong pot pisapat oh amaru mat orhorwi pot pisapatmur.   
\s1 Juda bap ihir Nuhurwi Got ohe meng marin pati ohoh ihan nuhurwi Got ohe nitamur rim dasuh hat sashe ohe meng oh  
\p
\v 17-18 Gin nuhur Judamur ma ripti han bap gur mohnong dahatinmur. Gur Got ohe sawa meng oh nuhurwi marin pati ohoh ihan nuhur Got ohe kintei yah hat pati han bap dirmur riptimur. Gur Nuhurwi Got ohe nita hat patimur. Nuhurwi Got oh ihir ihat ha patengwe ma dahapat da oh nuhurwi am hat patimur. Got orhe sawa meng oh kat ihirdapat nuhurnong pomat napor am nahatperhan nuhurwi yah hat son ohe danong moh dimar sasipera daham yah hat saptimur rim guragure winnong daptuhut pisaptimur.  
\v 19-20 Gur Nuhurwi sawa meng oh amnap hat pati han bap ohoh ihan nuhur yah han ihirdapat kin kwisi han ihirnong mandap pinggit ma pisaptiru mat nuhurhe ihirnong meng oh pinggit pison ina hat patimur. Nuhur kwitem dus ma pati han ihirnong has teinong mar pinggitin ina hat pati han bap nuhurmur. Nuhur da hut pati han ihirnong da adapetin ina hat pati han bap nuhurmur. Nuhur brer gar ire da hatin hat pati han ihirnong meng por pinggitin ina hat pati bap nuhurmur daham riptimur.  
\v 21 Gur Nuhur ihirnong pinggitin han hat patimur ma ripti oh kianorim guragure danong na pomat patim ihat sapti. Gur ihirnong Gur gapahheri hapri poripti orhor guragurnong kianorim gapah hat sapti.  
\v 22 Gur ihirnong bisei saw hathe sasipri poripti orhor guragur kinham bisei saw hat sapti. Gur kat ihirnong hanip guragure bes tei manhema Moh nure got deiyamur por ihirnong armi mar ma dahandeipti oh ermuro poripti orhor kianorim gur susa iraire dasuh got ihirnong it pati ap oh rosa agapah hapti.  
\v 23 Gur nuhurwi Got ohe sawa mengnong marin pati bap nuhurmur rim guragure winnong daptuhur armi tahat sapti orhora; gur sawa mengnong amram dimtin da oh na ham Got ohe winnong adasei mar amkar ihaptimur.  
\v 24 Gure imat amkar ma ihapti ohe pe oh Juda na hat pati han bap ihirhe gure ihapti danong oh wanahama Got orhe nita Juda hat pati bap ihir ihat sapti moh Got oh gapa hanmur por ohnong dasei meng por ihaptimur. Gurnong wanaham ma ihapti oh ma brak matpa mengru ham ihaptimur. Ma brak matpa meng oh mamarumur. Juda hat pati han iraire Got ohe winnong dasei mar aer deipti ohe pe oh Juda na hat pati han ihirhe orhe winnong dasei mar aer deiptimur rim brak matpamur. Gin ma brak matpa mengru hat orhor gurhe mama ihat sapti ohmur.   
\s1 Arpin Got ohe nita hapti ohe meng oh  
\p
\v 25 Gur mohnong dahenmur. Kat han ihir Nuhur Got orhe nita Juda bapo rim iraire boknong kis mar eit watah gatdeiptimur. Ama imat gatmat patisi bap ihir Got ohe sawa meng amram dindeiyahan ama kis ohsi arpin kissi pati han bap ma hapat poriptimur. Ama kis ohsi patim Got ohe sawa mengnong na amram na dimar amkariyahanoh ama kis ohsi kis han matiprohda. Basra. Ihir orhe kis ohsi na pati hatin hat pati han bap ihirmur.  
\v 26 Ihtin ohoh ihan eit watah na gatmar Juda na hat pati han ihir Moses ohe natip sawa meng oh amram dimatwi ayahanoh Got oh Mama ihapti han bap ihiroh eit watah gatmatpa han bap hatin hat pati bap ihirmur dahapatmur.  
\v 27 Eit watah na gatmat pati han ihir Moses ohe natip sawa meng oh pomat amram dindeiyahan ama dindeiya ohe pe oh sawa meng sam am hapti eit watah gatmatpa han ihir wamara Epe. Dir er hat sapti sa daham am hatiprimur.  
\v 28 Ina teimdapatwi daham eit watah gatdeipti oh arpin Got orhe nita Juda bap haptida. Basra. Ina teimdapat ma iham gatdeiya ohe pe oh Got oh Maihir nohe nita han bap ihirmur na porpatmur.  
\v 29 Sawa meng dimar ina teimdapat ma gatmatpa ohe pe oh Got oh Maihir norhe nita bap ihirmur na porpatmura; damdapat Arpinhe daham ma dindeipti ihirnongwi Got oh Maihir damdapat arpin eit watah gatmat pati hatin hat pati bap ihir ohoh ihan ihir norhe nita han bap ihirmur porpatmur. Ama ihat pati han bap dirnong hanip ihirdapat armi naham dire win na nadaptuhuripti bap dirmur. Got orhordapatwi armi naham dire win nadaptuhur napapat bap dirmur.   
\c 3  
\s1 Got oh orhe da oh na yawar mara duung dasi hat pat hanmur ritip ohe meng oh.  
\p
\v 1 Eit watah ma gatdeiya ohe pe oh Got oh Gur norhe nita han bapmur na naporpatmur. Ihat pat ohoh ihan eit watah gatdeiya ohe pe oh napanggeim winsi han Juda bap hat patimur ma ripti oh dir de ohe pe oh sa dir giripti dahayahanoh mohnong dahatinmur.  
\v 2 Juda bap ham ma yah hat pati oh trun yahnap hat patimur. Ohri duuptei isip yahnap hat ma pat oh Got orhe sawa meng oh be han ire bes teinong na mara Juda nure awher ire bes teinongri matipmur.  
\v 3 Got orhe arpin yah meng oh Juda nure bes teinong nahatip orhor kat ruumsan han gon ihiroh pomat na marim na dindeishemur. Ire pomat ma na dindeishe ohe pe oh Got oh rit natip meng oh it yawar mar dasuh meng hatin matiprada.  
\v 4 Basra. Got oh arpin han ohoh na yawar matin hatin hat pat hanmur. Kuuhan ire patinong asoh wamara Maihir dasuh han bap hat patihe daham am haptimur. Got ohe ma patnong oh ihat dasuh han hat na pat hanmur. Oh arpinwi pat hanmur. Arpin han hat ma pat oh Depit ohe atem teinong Got oh rit atporhan ma brak matip meng oh mamaru hat patmur.  
\q1 Got go kuuhan ihirnong ma satipra oh arpin duung dasi hat pat han orhor nasam inahah ma hapat daham am hatiprimur. Kat han ihirdapat gonong Go dasuh han ihat pathe naporiyahan ma naporiya ohe pe oh dam ti na pat ohoh ihan gwe boknong nahatin menghe timbasmur.  
\m rit atporhan Depit oh brak matipmur.   
\p
\v 5 Gur mamaru hatri dahapri. Nure ma er hat saptinong oh kat han ihirdapat wanaham Got oh Maire er hat sapti da moh hatin hat na pat han ma hapat. Duung dasi hat orhorwi pat han ma hapat daham orhe duung dasi hat ma pat danong oh am haptimur. Nuhur ihat er hat saptin Got orhe duung dasi hat pat danong oh am hapti ohoh ihan orhe duung dasi hat pat danong pitap teinong amar pisapti han nuhurnong nihanoh orhornong er hanmur potiprohe dahaptida.  
\v 6 Basra. Orhornong na gipotiprohemur. Ama ihat daham orhornong gipotipririm hanip gure dahat sapti meng orhor napormur. Got oh er mat nasapat hanhanoh dirnong kinmat duung dasi nasatin ina hatiproh. Orhor arpin duung dasi ham da na yawar deipat han ohoh ihan dirnong pomat nasapatmur.   
\p
\v 7 Kat han ihir mihat dahaptimur. Dire dasuh meng hat sapti ohe pe oh Got ohe arpin meng rim inahapat ohe da oh pitap teinong mat papatmur. Imat papatin kuuhan ihir wamara orhornong winsi han mat pisaptimur. Ihan dire dasuh meng ma rit sapti oh yahmur. Yah ohoh ihan kianorim sa Got oh Go er hanmur napor er batbet yan napripat kat ihir tit ihat dahaptimur.  
\v 8 Ire ihat ma dahapti da oh arpin ihat patihanhe Got orhe yah da oh pitap teinong amtinmat dir gonsi er hatwi sasipera dahat sashenmur. Ama ihat dahapti da oh kat ihirdapat Por ohhe ihat dahat patmur napor be nohe winnong naer deiptimur. Ihat nohnong er meng ma naporipti han bap ihirhe iraire ihat san hat mengripti ohe pe oh Got oh arpin ihirnong Gur er han bapmur por batbet yah tit apripramur.   
\s1 Hanip gonsi dir Got ohe kintei yah hat na pati ohe meng oh  
\p
\v 9 Gur nohe ma napor brak nasar meng moh sapti Juda nuhurnong Got oh norhe kis matip han bapo rim nuhurnong yah mat orhor napripra ma hapat. Wan han bap ihirnong er mat apripra ma hapat dahaptida. Basra. Nohe ma napor meng oh Juda hat pati hansi; Juda na hat pati hansi gonsi tap hat er da ohe hrepdapat hat patim er danong hat sapti bap ohoh ihan tap mat Got oh Gur er han bapmur naporpatmur.  
\v 10 Nohe ma napor brak mat nasar meng moh Got ohe meng napotporhan ma brak matpa meng oh mihtin meng orhorwi hat patmur. Ma brak matpa meng oh mamarumur.  
\q1 Hanip gur tit han tit duung dasi ham yah hat pat hanhe eimat timbasnapmur.  
\v 11 Hanip gur tit han tit Got norhornong am hatin hanhe timbasnapmur. Hanip gur tit han tit Got oh kinhat pat han. Noh ohnong wamar am hatpora dahat pat hanhe timbasnapmur.  
\v 12 Ihat patima gonsi gonsinap gur nohe yah da hat son ohe mandap oh mandama er da hat son ohe mandap ohwi gonsi saptimur. Ihat ma pati han bap gur er hat pati han bap gurmur. Hanip gur yah danong ham duung dasi hat son ohe dahe timbasnapmur.  
\v 13 Hanip gur atem tei mengitin oh gwesi hatwi mengripti han bap gurmur. Gwesi hat ma mengripti oh hanip sein itiri tei sus daputperhan gwe marpat hatin hat mengripti han bap gurmur. Gur hanipnong er matinmat dasuh ambar mengtei pramat pisapti han bap gurmur. Gure imat rim hanipnong er mar supti meng oh inapawam ohe hanip supat gap hatin oh gure atem tei it pati han bap gurmur.  
\v 14 Hanip gure atem tei oh hanip ihirnong Gar yiwit go gin orhor kapkap haputino por ihirnong dasei deipti ohe meng ohwi teip hat patmur.  
\v 15 Hanip gur kapkap heisup ham hanip supti danong hat patimur.  
\v 16 Gur aptei aptei oh sus hanipo erero oh ama ihirnong er matin ohe da ohsiwi ihat susa ihirnong ruumsup apris er mat pisapti han bap gurmur.  
\v 17 Hanip gur guragur manap gosham yah hat paten da oh hanhan hat pati ohoh ihan gurangur yah hat paten dahe timbasnapmur.  
\v 18 Gur Got norhe kintei moh norhornong kasna hatin oh eimat timbas hat pati han bap gurmur.  
\m Got orhor giritporhan brak matpamur.   
\p
\v 19 Dir dahat patimur. Got oh ritporhan ma brak matpa meng oh ama sawa meng ohe hrepnong hat pati han dire boknong naham ritporhan brak matpa ma hapat dahaptimur. Ihtin ohoh ihan Got oh kuuhan bap mong mong ma pati bap gonsi dirnong Gur er hat pati bapmur ma naporpat oh dir tit han tit Nohri yahnap hanmur ritin ina hat patda. Basra. Eimat timbasnap na ritin ina hat patimur.  
\v 20 Got ohe sawa meng ma natip oh hanip dir saptidapat er hayahanoh Epe. Noh gin er hah sa daham ha am hatingwe rim natipmur. Orhe imat natip sawa mengnong oh hanip dir eimatnap na dimtin inasi hat patimur. Dir ihat pati ohoh ihan dir dimtiperhanhe Got oh Gur yah han bapmur na naporpatmur.   
\s1 Krais ohnong Ohwi inahatin hatin hanwa dahapti ohe pe ohwi Got oh gur yah han bapmur naporpat ohe meng oh  
\p
\v 21 Got ohe sawa meng ma dindeipti ohe pe oh Gur yah hanmur na naporpat orhora; tit gure boknong Gur yah han bapmur napotin kat ma namgitip kat oh patmur. Ama yah hanmur napotin ohe kat ma namgitip oh orhe sawa mengnong dindeipti ohe pe oh na namgitipmur. Ama namgitip kat oh rih propeto Moseso ire sawa mengtei Kaput Got oh Gur yah han bapmur napotin kat oh pat hatipramur rishe kat oh gin mama pat ohmur.  
\v 22-23 Ama kat oh mamarumur. Jisas Krais ohe danong ham Ohwi inahatin hatin hanwa dahatperhanwi Got oh Gur yah hat pati bapmur naporpatmur. Juda bapo Juda na hat pati han bapo diradir gonsi Got ohe kintei er hat susa orhe amam nahatin ohe yah danong akap mar ihat saptimur. Diradir tap hat gonsi dir ihat pati ohoh ihan dirnong Gur yah hanmur napotin kat oh tit Juda bap irarhemur. Tit Juda na hat pati han bap irarhemur napotin kat oh yot kathe ti na patmur. Diradir tap hat er hat pati bap dir ohoh ihan tit kat pokwi hat patwimur.  
\v 24 Tit katwi ma hat pat oh Got orhe damdapat Noh ihirnong yah han bap matpora dahapat da ohsi Krais ohnong Go ire gwemat hapura nohe ihirnong sutin da hat pat ohe kak han oh gwe boknong matinmur potporhan oh arpin dire kak han ham hapura gin dire kak han hat patmur. Orhe ma inahat napapat ohe pewi yan timbas be dirnong Gur yah han bapmur naporpatmur.  
\v 25 Got oh Krais ohnong Gin go kakdahnong wayonmur. Wasa ihir er hat saptin nohe ihirnong sutinmat heisup mat papat ohe yan oh gin gwe boknong mar go ire kak han ham haputinmur. Hapur heim tandurketporhan ihir Nure gwemat heim tom durker ma hapat sa dahapri. Ihat ma dahaya ihirnong oh noh it yansi na matipramur por darhetporhan oh wandas dire gwemat kakdah moh haputirmur. Ma haputir oh kuuhan dir er hat sapti ohe yan oh Got oh dirnong kapkap ma na naprisuh oh Got oh Noh be dat amdatpramur na dahama Mon orhe boknong matipramur. Mara norhe duung dasi hat pat da moh pitap teinong mar pinggitipramur daham mon orhe boknongwi mar Gin go ire gwe mat haputina potporhan haputirmur.  
\v 26 Got oh dire er hat sapti yan oh be hanhan mar na namdama mon orhe boknongwi mar ma mandapat oh orhe duung dasi hat pat da oh pitap teinong mar namgipatmur. Namgit napapatin dir wamara dire er hat sapti yan oh ohe boknongwi mar namohotip ma hapat. Ihan orhorwi inahatin hatin han ma hapat ma dahapti dirnong oh Gur yah han bapmur naporpat ma hapat dahaptimur.   
\p
\v 27 Got oh dirnong Gur yah han bapmur ma naporpat oh diradire Got oh ritporhan Moses ohe natip sawa meng pomat amram dindeiyao ihat sapti ohe pemdapat Gur yah han bap na naporpatmur. Krais orhe danong ham Ohwi inahatin hatin hanwa dahapti ohe pe ohwi Gur yah han bapmur naporpatmur. Inahat napapat ohoh ihan dir kinhat Norhe ihat sapat ohe pe oh noh yah hat patmur daham armi tahatiprohe. Dir diradire boknong daham armi tahatin ohe mandap oh timbasnapmur.  
\v 28 Dire ma ihat pati asoh Jisas ohnong Ohwi inahatin hatin hanwa dahapti ohe pe ohwi ihat pati ohoh ihan dir Moses ohe natip sawa meng ma amram dindeiya ohe pe oh Got oh gur yah han bapmur na naporpat ma hapat dahaptimur. Dir ohe danong hatperhan dirnong orhe ma inahapat ohe pe ohwi Got oh Gur yah han bapmur napor napapat ma hapat dahaptimur.  
\v 29-30 Eit watah gatmar Juda bap hat patim Got oh inahatin hatin hanwa ma dahapti ohe pe ohwi Got oh Gur yah han bapmur naporpatmur. Watah na gatmat pati han bap gurnonghe Got ohwi inahatin hatin hanwa ma dahapti ohe pe ohwi Gur yah han bapmur naporpatmur. Juda hat pati han bapsi; Juda na hat pati han bapsi ihat tit dawi hat pati ohe pe oh Gur norhe yah han bapmur naporpat ohoh ihan Got oh Juda ire Gotwi basmur. Diradire Got tit pokwi hat patmur.  
\v 31 Dire Krais ohnong Ohwi inahatin hatin hanwa ma dahapti ohe pe ohwi Gur yah han bapmur naporpat ohoh ihan dir Got orhe sawa mengnong moh amkar amdatper dahatiproheda. Basra. Na mandam marin papten meng mat paptimur.   
\c 4  
\s1 Epraham oh Got ohwi inahatin hatin hanwa dahat patin Got oh Go yah hanmur potip ohe meng oh  
\p
\v 1 Got oh dirnong Gur yah hanmur ma naporpat ohe mengnong dahatinmat oh gur diradire rih awher patesuh han Epraham ohnong dahatinmur.  
\v 2 Epraham orhe kasip ohsi yah hat pip ohe pe oh Got oh Go yah hanmur potipneng oh orhe boknong armi tahatin ohe mandap oh pat hatipnengmur. Ti na ihtip ohoh ihan Got orhe kintei armi tahatin mandap oh ti na pat hatipmur.  
\v 3 Ihtin mandap oh ti na pat hatporhan Got orhordapat Go yah hanmur potipmur. Ma potip oh Got oh Epraham orhe boknong meng potporhan ma brak matpa mengnong moh dahatinmur. Epraham oh Got ohnong Oh inahatin hatin han ohoh ihan oh arpin inahatiprohwa dahat patin Got oh awamara Go yah hanmur potipmur ama meng oh gipotporhan brak matpamur.   
\p
\v 4 Gur mohnong dahatinmur. Dire kakdah mama tamreim ma yan daripti oh orhe damdapat be musum apripora daham napir ma hapat dahaptida. Basra. Diradire tamreipti ohe pe oh tamreipti ohe kis yan orhor napir ma hapat dahaptimur.  
\v 5 Got orhe Gur yah han bapmur napor ma napripat da oh dire tamreim sapti ohe pe oh Ihirnong yan apripora daham yan na napripatmur. Dire Er han nohnong orhorwi inahatin hatin hanwa dahapti ohe pe oh yan timbas be napripatmur.  
\v 6 Dire na tamreipti ohe pe oh Got oh be Go yah hanmur naporpatmur nohe ma naporpat mengru hat orhor Depit ohhe girim brak matipmur. Depit oh girim ma brak matip oh Na tamreipti ohe pe oh Got oh gur yah han bapmur ma porpat bap ihiroh amamsi hat pati bap ihirmur dahat patim mameng moh brak matipmur.   
\q1
\v 7 Got oh ire er hat sapti er gap oh hirmar amdam it yansi na mar er gap danong amkar amdapat bap ihiroh amamsi hat pati kuuhan bap ihirmur.  
\v 8 Got oh Noh hanip ire ma er hat sapti da oh na sama ire boknong oh yansi na mar Gur yah han bapmur por ma papat han bap ihiroh amamsi hat pati han bap ihirmur.  
\m rim Depit oh brak matipmur.   
\p
\v 9-10 Amamsi hat pati han bap ihirmur por ma brak matip meng oh eit watah gatdeipti han ihirnongwi daham gipotipda da eit watah na gatdeipti han ihirnongsi tap mat gipotip. Basra. Eit watah na gatmat pati han ihirsi tap mat amamsi hat pati han ihirmur por brak matipmur. Eit watah na gatmat pati han ihirsi tap mat potip ma hapat ma dahapti oh Epraham ohnong daham giriptimur. Epraham oh eit watah na gat mat patin orhor orhe damdapat orhor Got ohwi inahatin hatin han ohoh ihan arpin orhor inahatiprawa dahat patin Got ohdapat Epraham go yah hanmur potipmur. Ma gipotip oh Epraham oh eit watah gatdeirit gipotipda da na gatmat patin gipotip. Basra. Na gatmat patin orhor gipotipmur.  
\v 11 Giporpatdapat gahan Got oh Epraham ohnong Gin nohe gonong go yah hanmur ma naporpat da oh nohnong Ohwi inahatin hatin hanwa ma dahapti ohe pe ohwi naporpat ma hapat ha dahatingwe rim ama da oh pitap teinong mar Go eit watah gatmatinmur potporhan gatmatipmur. Amaru hat eit watah na gatmat patin orhor Got oh Maihir yah hanmur ha napotinoh rim Orhorwi inahatin hatin hanwa ma dahapti han bap gure ra duuptei han hatin hat ma pat hanhe Epraham ohmur. Gur Epraham ohe da hatin hat pati han bap gur ohoh ihan gure ra hatin ma hat pat han oh Epraham ohmur.  
\v 12 Gure rawi basmur. Gatdeipti han bap nuhurhe eit watahwi gatmat na mandama orhe eit watah na gatmat patim orhor Got orhorwi inahatin hatin hanwa ma dahat patesuh da hatin hat orhor ma pati bap nuhursi diradir tap da ham tit bapwi hat pati ohoh ihan diradire duupteinap aw oh Epraham ohmur.   
\s1 Got oh Epraham ohnong ma rit atip meng oh Epraham oh Orhorwi inahatin hatin hanwa dahat pat ohe pe oh rit atip ohe meng oh  
\p
\v 13 Got ohe Epraham ohnong rit atip danong dahatinmur. Ma rit atip oh Gosi; gorhe puh ma artahat sapri ihirsi mong mong moh gonsi pan ohe tan mat datiprimur por rit atipmur. Ma rit atip oh Got ohe sawa meng oh na apin patin ohoh ihan sawa meng ma dindeipat ohe pe oh rit na atipmur. Epraham oh Got ohnong Ohwi inahatin hatin hanwa dahatporhan ama ohe pe oh Go yah hat pat hanmur daham rit atipmur.  
\v 14 Nuhur sawa mengnong amram dindeipti ohe pe oh Got ohe napripat erer moh dariptiwa dahaptineng Got orhe rit natip meng ohsi; Orhorwi inahatin hatin hanwa dahapti da ohsi ayotnong oh dam timbas nahatin da yot ma hapat daham mandaptinengmur.  
\v 15 Got orhe sawa meng hrepnong ham dimtipera ma dahapti ohe pe ohe dam ma timapat oh pomat na dimtin ina hat pati ohoh ihan Got orhe bopor heisup nahatin ohe dam ohwi timapatmur. Got orhe sawa meng moh na patneng na amkariptinengmur. Pat ohoh ihan amkatperhan dam ma timapat oh Got orhe bopor heisup dam oh timapatmur.   
\p
\v 16 Ihtin ohoh ihan Got oh sawa meng amrapti han bapsi; sawa mengnong hanhan hat pati han bapsi ihir norhe damdapat orhor yah matpora daham rit asarpat meng oh gonsi ihir ha datingwe daham Orhorwi inahatin hatin hanwa dahapti ohe pe ohwi sa daripri rim rit natipmur. Ihtin ohoh ihan Epraham orhe puh gonsi dir rit natip meng oh dariptimur. Orhe puh sawa mengnong ma marin pati puh ihirnongwi basmur. Epraham ohe Ohwi inahatin hatin hanwa ma dahatipru hat dahapti han bap orhe puh hatin hat ma pati han bap ihir gonsi rit natip han oh dariptiimur. Ohri ama da ohe duuptei han hatip ohoh ihan ohri dire aw duuptei hat patmur.  
\v 17 Dire aw duuptei hat patmur ma napor meng oh Got ohe sawa menghe amaru hat rim brak matipmur. Girim ma brak matip oh mamaru hat patmur. Got oh Noh among among ma patepri han ire han rop oh Epraham gonong kis nahahmur potporhan brak matpamur. Ama rit atip meng oh Got orhor Norhe kintei oh ihtin han hat patwa daham ritipmur. Ma ritip Got orhornong Epraham oh Arpin orhorwi inahatin hatin hanwa dahatipmur. Ama ihat pat Got orhor haputpa han ihirnong pamsas dasi deio na tarpat pat han erer asoh patarpao deipat han Got ohmur.   
\p
\v 18 Epraham oh Noh puhsi na hatin ina hatir tei orhor Got orhe rit natir meng moh arpin puhsi hatipra ma hapat daham minhan patesuhmur. Ihat minhan patin dam timdiporhan Got orhe Gwe puh ihir ihat artahatiprimur ma potip mengru hat orhor among among ire han rop duuptei han hatipmur.  
\v 19 Epraham ohe ma duuptei han hatip oh oh Noh 100 krismas birhim pasernap ham brer na manhetin ina hat tei moho. Sera uhhe kusennap ham brer na itin kusen hat moho daham am hat patin orhor Got oh inahatiprada da na inahatipra adanong oh na hatipmur. Arpin inahatiprawa daham kinkin da ham kasip hat orhor minhan patesuhmur.  
\v 20-21 Inahatiprada da na inahatipra adanong na hama arpin inahatiprawa dahatin ohe danong ohwi isip hat susa Got ohnong ma rit natip meng oh na yawar matin han ohoh. Arpin inahatiprawa daham armi mar paptesuhmur.  
\v 22 Inahatiprawa dahat patesuh ohoh ihan Got oh Gwe ihat dahat pat ohe pe oh noh gonong Go yah hanmur napormur potporhan brak matpamur.   
\p
\v 23 Got oh Epraham ohnong Gwe ihat dahat pat ohe pe oh noh gonong Go yah hanmur napormur giritporhan brak matpa meng oh Epraham ohe boknongwi na potipmur.  
\v 24 Na potipmura; dire Hanipyah Jisas ohnong ma da pamsuhup han Got ohnong Arpin inahatin hatin hanwa ma dahapti han dirnongsi tap mat ginapotporhan brak matpamur. Norhornong ihat ma dahat pati han bap ihirnong Gur yah han bapmur potipramur daham dire boknong tap mat napotporhan brak matpamur.  
\v 25 Ama da pamsuhup han ohe ma haputip oh dire er hat sapti ohe gwemat Got oh Go was ire er gap hirmat amdam ire gwemat haputinmur por darhetporhan oh arpin wandas dire er gap ohe gwemat haputipmur. Haputporhan it da ma pamsuhup oh orhe dap teidapat dirnong Gur yah han bapmur napotinmat pamsuhupmur.   
\c 5  
\s1 Jisas Krais ohe dap teimdapat Got orhorsi yah hat pati ohe meng oh  
\p
\v 1 Dir Got ohnong Ohwi inahatin hatin hanwa dahapti ohe pe oh orhordapat Gur yah han bapmur napot napapatmur. Napot napapat ohoh ihan diradire Hanipyah Jisas Krais ohe dire gwemat hapurpat it mashup ohe dap teidapat dirnong Got orhorsi manap goshat yah hat indin dasi nahat napapatmur.  
\v 2 Imat ma napapat ohe dap teimdapat Got orhe damdapat orhor Noh ihirnong imat yah matpora ma dahapat da ohe hrepnong nahatin ohe mandap namanhet napapatmur. Namanhepat Orhorwi inahatin hatin hanwa ma dahat pati han bap dirnong ama orhe hrepnong nahat napapatmur. Imat napapat ohoh ihan orhe has yah da oh diradir tap mat datiprio rim amam hat orhor minhan patimur.  
\v 3 Ama amam ham ma minhan pati oh ama has danong ohwi datinmat amam hat na patimur. Ina ruumsup apirhanhe wes ina ruumsup kasip nahapat han go apiro por amam hat patimur.  
\v 4 Ama ihat apir ina ruumsup oh kasip nahapatin dirdapathe kasip ham Got ohe danong hat pati da oh kapkap na mandatin danong haptimur. Kapkap na mandatin danong ham kasip hat saperhan Got oh wanahama ihat sapti han gur yahmuro napor amam dasi nahapatmur. Amam dasi nahatporhan dir arpin has da wamtipriwa daham amam hat orhorwi minhan patimur.  
\v 5 Wamtipriwa daham amam hat ma minhan pati da oh na kap nahatipra ma hapat gidaham am hat patimur. Got orhe Yahsup oh dire mutuh pat ohe dap teidapat oh orhe damdapat bopor nahat napapat da oh isip mat napripatmur. Ihat napripat ohoh ihan dire minhan pati da oh na kap naham arpin napripra ma hapat daham amam hat minhan patimur.   
\p
\v 6 Got orhe damdapat bopor nahat napapat danong ma namgitip oh dir gapa ham ohnong dahatin mandap oh timbasnap hat patin Got orhor Noh Kaput ihir ihat patin noh ihirnong panggeitinmat darhetiprawa dahatip dik oh hatporhan arpin orhe mon ohnong darhetporhan oh apris dire gwemat haputipmur.  
\v 7 Ohnong Got oh darhetporhan matei ma haputip oh mohnongri dahatinmur. Hanip dir tit han tit ohnong sutinmat apriyahanoh Gur ohnong sutipri nohnong nitinmur potin han oh timbasmur. Duung dasi hat patin orhor ohnong sutipri nohnong nitinmur potin meng oh diradire ina boknong kas ham na giritiprohemur. Kas ham na giritiprohe orhora; yahnap hat pat han tit pathan uut han ihir tit na kas ham Yahnap hat pat han moh ha sutiprohe daham ohe gwemat ama uut han ihir haputin ina hat patimur.  
\v 8 Hanip dir ihat dahat patimur. Got oh ihat na daham dire er hat patin orhor orhe bopor nahat napapat da oh Krais orhe dire gwemat haputip boknong mar namgitipmur.   
\p
\v 9 Dir er hat patin orhor Krais oh heim tandukera dire gwemat hapura ama orhe heim ohsi Got orhe heisup nahat napapat bopor heisup danong nahirmara orhe kintei yah han bap naham napapatmur. Ihat er hat pati dus orhor imat napanggeitip ohoh ihan gin Got orhorsi yah han nahat napapat tei moh Got oh er yan it napriprarim atnap Krais oh nambutipra ma hapat dahat patimur.  
\v 10 Dir Got ohnong mahaw mat papatin dus orhor Got oh Ihirnong norhe bopor heisup batbet moh ihirnong apriprarim mamen mat papat heisup moh norhe mon ohe boknong matpora. Indeipat ama indei ohe dap tei oh ihirsi; norhorsi nuranur yah han bap titwi hatiprimur rima Krais orhe haputip dap teimdapat heisup nahat napapat da oh timbas mara orhorsi yah han hat paten ohe da oh napdapmur. Got ohnong mahaw mat papti mutuh orhor inahatip ohoh ihan dir orhorsi yah han hat pati ohe pe moh Krais orhe masas napanggeit napapat dap tei moh atnap nambutipra ma hapat daham amam ham minhan patimur.  
\v 11 Tit ma amam ham minhan pati da oh Got oh diradire Hanipyah Jisas Krais orhe ma napanggeitip ohe dap teimdapat ginhe orhorsi yah hat indin han bap nahat napapato rim orhornong amamsi mat paptimur.   
\s1 Er da oh isip hat sapatin orhor yah dahe isip hama er danong amkarpat ohe meng oh  
\p
\v 12 Ma yah nahatip oh tit han Krais orhe dap teimdapatwi yah nahatipmur. Ma er hat sapti ohe dahe amaru hat tit han Adam ohe bokdapatwi tarpatipmur. Tarpama ama ohe haputin sup oh tarpatipmur. Tarpama artahat aprisa diradir er hat sapti han bap ohoh ihan ama ohe pe oh gon hapuriptimur.  
\v 13 Ama ihat er hat sapti da oh Got oh Moses ohnong potporhan Moses ohe napotip sawa meng oh na patin orhor ohri patesuhmur. Patesuh orhor sawa meng na patin ohoh ihan Moh er damur por na sashemur.  
\v 14 Na sashe orhor haputin oh sawa meng na apin patin orhor hanip dirnong haputin ohe hrepnong nahat napaptesuhmur. Ihat haputin da oh Adam ohe bokdapat napapatru hat orhor apripatin Moses ohe boknong hatipmur. Sawa meng oh na apin patin ohoh ihan ihir Adam ohe tan Got ohe sawa mengnong sakarap mar na amkarishe orhor haputin oh hapurishemur.  
\p Komdapat ma apripra han Krais ohe bokdapat oh tit da tarpatipra ma hapat dahatin ohe da oh Adam ohe bokdapat kis han ohri tarpatipmur.  
\v 15 Ite bokdapat ihtin da yot ma tarpat apripat oh Adam ohe er hat sus haputin da ma duup matip da oh orhe gon hat patmur. Got oh Krais orhe dap tei yah matiprawa ma dahatip da oh orhe gon hat patmur. Orhe gon ma hat pat oh mamaru hat patmur. Tit han ohe er hat sus ma haputip ohe pe oh kuuhan ihir ruumsan hapuriptimur. Got orhe damdapat Ihirnong yah matpora daham Krais ohnong darhetipmur. Krais orhe damdapathe Noh ihirnong imat yan timbas be ihirnong yah mar panggeitpora daham ma napanggeitip da ohsi haputin ohe danong ambapte mar ruumsannap kuuhan dirnong isipnap napanggeit napapatmur.  
\v 16 Got oh yan timbas be ihirnong imat yah matpora ma dahapat da ohsi; Adam ohe er hat saporhan er da ma tarpatip da ohsi ama da yot ihit tit orhe tit orhe hat ma pati oh tit oh mamaru hat patmur. Tit han ohe bokdapatwi er da tarpatip ohe pe oh kuuhan gonsi dirnong Got oh Gur er han bapmur napor nitin ina nahat napapatmur. Got oh Noh ihirnong yan timbas be panggeitpora ma dahapat dahe kuuhan trun dirnong er hat saperhan napanggeim Gur yah han bapmur napor yah nahapatmur.  
\v 17 Tit han ohe er hat saporhan ohe pe oh gonsi dir haputin ina ohe hrepdapat hat patim dir gonsi hapuripti ma hapat dahaptimur. Ihan Got orhe damdapat imat yah matpora daham yan timbas tit han Jisas Krais orhe dap teimdapat yah nahama Gur yah han bapmur napor ma napapat dir oh arpinnap ohsi yahnap hat orhorwi patepri ma hapat dahaptimur.   
\p
\v 18 Nohe ma naporpat meng oh mamaru hat patmur. Tit han orhap Got ohe meng amkar er hat pip ohe pe oh kuuhan gonsi dirnong Got oh Gur er han bapmur napor orhe bopor heisup batbet oh napin ina nahat napapatmur. Amaru hat orhor tit han orhap duung dasi hat patdapat ma haputip ohe pe oh kuuhan gonsi dirnong Gur er hanmur na napor eimat yah hat paten dasi nahatin mandap oh namanhetipmur.  
\v 19 Tit han orhap Got ohe porpat mengnong na amram amkatip ohe pe oh kuuhan trun bap dir er danong ham er hat saptimur. Ohe ama hatipru hat orhor tit han orhap Got ohe meng gonsi amram yah mat dimtip ohe pe oh kuuhan trun bap dirnong Got oh Gur yah han bap gurmur napotipramur.   
\p
\v 20 Tit han oh er hat saporhan kuuhan gonsi er hat saptin gahan Got oh Gin mama sawa mengnong sama Epe. Nuhur er hat sapti sa daham ha am hatingwe daham Moses ohe bes teimdapat sawa meng brak mar napdapmur. Napriporhan ama ohe pe oh atnap isip er hat saptin orhor Got orhe damdapat Ihirnong yah matpora ma dahapat da oh atnap isip mat pihipmur.  
\v 21 Isip mat ma pihip oh Got oh Kuuhan gonsi ihir er hat saptin haputin ohe hrepnong hat patiru hat orhor norhe damdapat orhor yah matpora ma dahapat da ohe hrepnong isipnap hat ha patengwe. Ihat patin Maihir yah hat pati kuuhan bapmur por diradire Hanipyah Jisas Krais ohe dap teimdapat yah hat eimat paten dasi matipramur daham orhe damdapat Yah matpora ma dahapat da oh isip mat pihipmur.   
\c 6  
\s1 Er danong hanhan mar mandam haputin inasi hat patim Krais ohsi tap hat paten inasi hat pati ohe meng oh  
\p
\v 1 Hanip dir er danong isip hat saptin Got orhe damdapat Ihirnong noh imat yah matpora dahapat dahe isip mat orhor pisapatmur. Got oh orhe damdapat dirnong Imat yah matpora daham ama danong isip mat pisapat han ohoh ihan dir Got orhe damdapat Yah matpor daham yah nahapat da oh dir atnap er hat saperhan atnap isip mat orhor ha pisonoh daham ama ihtin meng oh ritiproheda.  
\v 2 Watina. Mihtin nipat meng mohri it daham na riptimur. Dir er danong hatin da oh mandama hapuriya hatin hat pati ohoh ihan dir er danong hatin oh kinhat it hatiprohe. It na ihtiprohemur.  
\v 3 Dir er danong hatin ohe da oh mandam hapuriya hatin hat ma pati oh mamaru hat patimur. Ihat ma pati han bap dir Jisas Krais orhe tapnong hat pati han bap ma hapat dahatin ohe da oh pinggitinmat orhe tapnong ham tom waihirimur. Ihat ma tom waihiri oh orhorsi tap hat hapuriya hatin ham tom waihirimur. Ihat ma tom waihirinong oh gur am hat patimur.  
\v 4 Ihat ma tom waihiri oh niyarit haputperhan ohsi tap mat sein nasariya hatin ham tom waihirimur. Ihat ma waihiri oh er danong hatin ohe da oh ha haputinoho. Hapurit itap ohe wanohe yahnap kasip ohsi Krais ohnong ma pamsuhupru nohnonghe kopenohe yah danong hat son ohe da inasi nahat ha napamsonoh daham tom waihirimur.   
\p
\v 5 Krais orhe tapnong ham hapuriya hatin hat ma pati han bap dir Arpinnap orhornong ma pamsuhupru mat orhor dirnonghe imat orhor napamsas orhe tapnong nahatipra ma hapat dahat pati han bap dirmur.  
\v 6 Dire ina teimdapat tarpam ma er nahapat da ina oh Krais ohsi tap mar irat bok sur garmar mandatpamur. Sur garmar ma mandatpa oh Orhe hrepnong nahat napapat kasip oh ha timbas hatinohmur. Timbas hama hanip dirnong tit han ohe hrepdapat napapat hatin nahat napapat da moh ha timbas hatinoh daham irat bok sur garmar sum mandatpamur. Imat irat boknong sum mandatpa da oh dir daham am hat patimur.  
\v 7 Hapuriya han ihir it er da ohe nang atpat pat hrepnong hatiproheda. Basra. Ihir haputpa ohoh ihan kinhat it ama ohe hrepnong hatiprohe. Dirhe er danong irat bok sur gardeiya hatin mar sum ma mandatpa oh amaru hat orhor hapura er hat sapti ohe hrepnong na hatin ina da ohsi hat patimur.   
\p
\v 8 Dir Krais ohsi tap hat haputpa hatin hat pati ohoh ihan orhorsi tap hat patepriwa dahat patimur.  
\v 9 Krais oh hapura it ma mashup oh er danong ambapte mar mashup ohoh ihan haputin da oh it ohnong ambapte matporhan it oh haputiprohda. Basra. It na imtin hatin hat pat ma hapat dahaptimur. Ihat pat hano rim orhorsi tap hat patepriwa dahat patimur.  
\v 10 Ohe tit dahwi ma haputip oh er danong eimat amkar timbas matinmat haputipmur. Gin ma masas pat oh Got orhornong armi mar papten ina dasi hat patmur.  
\v 11 Amaru hat orhor gurhe Dir er da ohe kasip hrepnong naham na napapat ma hapat. Krais Jisas orhe tap hat patim Got orhe danong ham Ihir ihat ha sashengwe dahapat da hatin hat sashen da inasi nahat napapat ma hapat dahat patenmur.   
\p
\v 12 Gur ihat pati han bap ohoh ihan mama hapuripti ina moh er da ohe hrepnong mathe paptepri. Ohe hrepnong mat papayahan ama ina teimdapat Ihtipera dahapti er da oh pranahat napisus er teinong nahatiproh ohoh ihan gur ama ihat ina teimdapat pranahat napisapat da hrepdapathe hat patepri.  
\v 13 Guragur orhor er danong Gin go nohe bes tei moh tongnotina. Buh tei moh tongnotina. Kin tei moh tongnotina pora guragure buho beso kino oh er da ohe hrepnong mat pisasipri. Imat er danong apriyahan ama er da oh pranahat napisus er nahatiproh ohoh ihan imat er danongri aprisipri. Imat aprishen oh hapur susa it masas kopenohe da inasi hat pati hatin hat pati gur buho beso ina moh apriper riyahanoh buh bes ina moh ihirnong yah hat saya apriya hat paten ina dasi ha nahatinoh rim Got orhornongwi imat aprishenmur.  
\v 14 Gur sawa meng dindeipti ohe pe oh Gur yah han bapmur na napotin ohe hrepdapat hat na patimur. Got orhe damdapat Yah matpora daham ma yah nahapat ohe da hrepdapat hat pati ohoh ihan er da hrepnong na hatin ina hat patimur.   
\s1 Duung da ohe hrepdapat hat patim ohe danongwi hat sapti ohe meng oh  
\p
\v 15 Nohe ma napor meng moh gur dahama Ei. Dir Got orhe sawa meng hrepdapat hat na pati ma hapat. Got orhe damdapat Yah matpora dahapat da orhe hrepdapat hat pati ma hapat. Ihat Got orhe sawa meng hrepdapat hat na pati han bap dir sawa mengnong amkar er danong hayahan ama ohe pe oh dire boknong san hatin da oh timbas hat pati ma hapat daham er danong asoh sasiproheda. Epe. Kassi da moh nih ihat saproh daham yah hat sashenmur.  
\v 16 Guragur mohnong hanhan hat patida. Gur tit han ohe hrepnong ham be atamreinpera daham ama han orhe hrepnong hahhan ama han orhe danong hatinmat ihaptimur. Amaru hat orhor er da hrepnong hatpera daham ihyahanhe ohe danongwi ham haputin mandap teinong hat patim ihaptimur. Got ohe danong ham orhe hrepnong hatpera daham ihyahanhe duung dasi hat son ohe mandap teinong hat patim ihaptimur.  
\v 17-18 Gur rih ma pateshe oh er da ohe nang oh natpat pat hrepdapat hat patim ama ohe danong hat sashemur. Gin ma pati oh Got orhe meng oh napotperhan gur Mamengnong moh amram pomat dimtipera daham ohe hrepnong hat patim arpin amram dindeiptimur. Dimtipera dahaptin Got oh gure er nang natpat napapat hrepdapat narpit namdama duung dasi hat son ohe hrepnong naham nang natpat hatin nahat napapatmur. Gur ihat pati han bapo rim noh Got ohnong Got go wes imat ihirnong yah mat papato rim weso naporpatmur.  
\v 19 Gur kakdah mohe danong hat patim kapkap pomat na dahapti han bap gur ohoh ihan noh meng oh diradire kakdah wamar am hapti han morhe boknong mar mama naporpat ohmur. Gur rih er da hrepdapat hat patim buh bes ina mohsi Er hat sona por er danong isip mat pisashemur. Imat isip mat ma pisasheru mat orhor ginhe nure buh bes ina moh Got gorhewimur. Ihan go duutin dasi ongengnap mat orhorwi napisashenmur por orhornongwi aprishenmur.   
\p
\v 20 Gur rih er da ohe hrepnongwi oper hat ma pateshe oh yah duung da ohe hrepdapat hat na pateshemur.  
\v 21 Er da ohe hrepnongwi oper hat patim kas hatin danong moh ma ihat sashe ohe pe oh napanggeit napapindin ohe yah dahe ti dar ihat sashenda. Basra. Na napanggeim hapura Got oh dar wan teinong nahatin ohe danong dinggosham ihat sashemur.  
\v 22 Gin mama pati oh Got oh er da hrepdapat nang narpit namdama orhornong dahatin ohe da hrepdapat hat patimur. Ihat pati ohe pe oh Got oh orhe ongengnap mat papat da oh isip mat napisusa yah hat eimat paten dasi nahapatmur.  
\v 23 Er da hrepdapat hat patim er hat ma sapti han ihirnong er yan ma apripra oh hapura dipwi batbet dar patepri apteinong matipramur. Got orhe damdapat Gin yan timbas be musum yahnap han tit apripora daham ma napripra yah yanhe diradire Hanipyah Jisas Krais ohe tapnong hat pati dirnong oh eimat yah hat paten ohe yah yan oh napripramur.   
\c 7  
\s1 Pohon sawa mengnong hapur mandaya hatin ham Krais orhe hrepdapat hat pati ohe meng oh  
\p
\v 1 Nohe taptema. Gur diradire kakdah moh ohe sawa meng ohe hrepdapat hat ma pati oh gur am hat patimur. Ihan gur diradire pohon sawa meng hrepdapat hat patim orhor hapur timbas hayahanwi ama sawanong ma mandapti oh gur am hat patimur.  
\v 2 Hapur timbas hayahanwi sawa mengnong ma mandapti ohe meng oh mamaru hat patmur. Sawa meng oh Gut gamin inap go iman oh patin orhor han wan asoh datipra naporpatmur. Imap oh patin oh uh ama sawa meng orhe hrepdapat hat patmur. Oh haputporhanwi uh ama ohe sawa meng orhe hrepdapat hat na patmur.  
\v 3 Oh patin oh uh ama sawa meng orhe hrepdapat hat pat ohoh ihan uh han wan darhanoh Go bisei saw hapat kuumur poriptimur. Oh haputporhan uh ama ohe sawa meng ohe hrepdapat hat na pat ohoh ihan uh han wan darhanoh Go bisei saw hapat kuumur na poriptimur.   
\p
\v 4 Gin gure Krais ohe hrepnong hat ma pati oh kuu uhe han oh haputporhan sawa meng hrepdapat hat na pat hatin hat patru hat orhor gurhe ihat sawa meng hrepnong hat orhor gur na patimur. Gure ma ihat pati oh Krais ohe ma haputip dap teimdapat sawa mengnong tap mat hapur ha mandaya ina hatin hat patimur. Ihat patim ama wan han Got orhe pamsuhup han orhe hrepdapat hat patim orhe danong hat patimur. Ihat patim Got orhornong winsi mat ha pisashengwe rim yah da hat orhorwi saptimur.  
\v 5 Dir rih ma pateshenong oh ihat na pateshemur. Ma pateshe oh ina teimdapat tarpam ihtiper ihtiper ma dahapti ohe da oh namkat napaptesuhmur. Namkat napapatin ohoh ihan sawa meng oh We. Go ihapra ma napor danong asoh Noh kis tahatpora daham ama ohe danong isip mat pisashemur. Isip mat pisaptin hapur sus eimat batbet dar paten ohe da oh dam timasuhmur.  
\v 6 Gin ma patinong oh Krais ohe tapnong ham hapuriya hatin hat pati ohoh ihan ma natip sawa meng hrepdapat hat na patimur. Sawa meng ohe hrepdapat hat na pati ohoh ihan sawa meng oh Gur Got ohe danong hatinmat mihat indinmur ma naporpat da ohe hrepdapat hat na patimur. Gin Got orhe Yahsup oh kopenohe indin da ina oh nahat napapatin dir ihat saptimur.   
\s1 Damdapat Got ohe yah danong hatpor dahapti da ohsi; ina teimdapat tarpapat er da ohsi inggoshat pati ohe meng oh  
\p
\v 7 Gin dir Got oh ritporhan Moses ohe napotip sawa mengnong mandaya hatin hat ma pati moh ihan er nahapat meng mandatirikin dahatiproheda. Basra. Oh na er nahapat mengmur. Oh diradire er hat sapti ohe danong nadapem namgipat meng ohmur. Oh imat na namgipatneng dir Ei. Noh er hat sapat han sa daham na am haptinengmur. Imat ma namgipat oh tit gur ire erernong asoh abopor deipri ritip ohe pe oh noh erer ma abopor deipat oh Noh er hapat han sa daham am haptimur.  
\v 8 Noh ihat am hat patdapat orhor ihapri ma ritip danong asoh hatpora daham tihan tihan abopor matin ohe danongwi hat sapatmur. Ama ihtin erer sawa meng oh ihapri na ritipneng ama da oh isip ham bapkei tahat na susa ihtipora ihtipora dahapat danong oh mandam hapuriya hatin hat patnengmur.  
\v 9 Ama sawa meng oh noh na amrat patin ohoh Noh yah hatwi pat ma hapat dahat patesuhmur. Gahan Got orhe sawa meng oh Go ihathe sasipra napotporhan noh amrama Epe. Nohe ihat ma sapat oh er hat sapat ma hapat dahatin ohe da oh nohe mutuhnong am nahatporhan Noh eimat timbas nahatin ohe hrepnong hat patesuhru pat ma hapat daham am hatipmur.  
\v 10 Got oh Norhe sawa meng moh ihir amrama eimat paten dasi ha hatingwe daham natip orhora; nohnong Go eimat timbas nahatin ohe hrepnong hat patmur napotin ohe danongwi namgitipmur.  
\v 11 Eimat paten dasi nahatin ohe sawa meng hrepdapat hat pat ma hapat dahasuh orhor We. Go ihapra ma napor danong asoh noh kis taham wamtipor dahatporhan er han oh dasuh naham eimat timbas nahatin ohe hrepnong hat patesuhmur.  
\v 12 Ama ihat pat Got orhe sawa meng oh yahnap duung dasi hat paten ohe ongeng tahat pat sawa meng ohmur.   
\p
\v 13 Ama yahnap sawa meng oh norhe yah hat paten ohe da namdama eimat batbet dar paten ohe da hrepnong mat namdatipda. Basra. Got orhe sawa meng oh We. Go ihapra ma napor danong asoh noh kis taham wamtipor daham wamar ihtiporhan ama da oh pranahat napisus eimat batbet dar paten ohe da hrepnong nahat napaptesuhmur. Got ohe sawa meng ohsi ma inahatip oh norhe er hat sapat da oh Moh atnap er da dasei mar mandatin da ma hapat daham ha mandatinoh rim ama sawa meng ohsi namgitipmur.   
\p
\v 14 Dir mohnong dahat patimur. Got ohe sawa meng oh orhe Yahsup ohe bokdapat tarpam apris orhe dahat pat da namgipat sawa meng ohmur. Nohe ma patnong oh kakdah ohe da oh ina teimdapat tarpam er nahapat ohe da ohe hrepnong nahah hatin nahat napapatmur.  
\v 15 Ohe hrepnong nahah hatin nahat napapat ohoh ihan nohe er danong asoh noh na ihtiprohneng ma dahah danong asoh noh it ihpatmur. Ma ihpat oh nohe yah danong yaho por ihtiprohneng dahah danong asoh na ihpatmur. Nohe ero por dasei deipat danong asoh noh ihpatmur. Nohe ma ihpat oh noh kinham sa ihpat daham norhor hanhan ham aperpatmur.  
\v 16 Nohe ma er hat sapatnong oh norhe ero ma dahat pat oh Got ohe sawa meng ohdapathe moh ero naporpatmur. Nutanut tap da ham tap mat ero poripti ohoh ihan nohe ma dahapat oh sawa mengnong arpin yah meng ma hapat dahapatmur.  
\v 17 Ihat dahapat ohoh ihan nohe ma ihpat oh hanip norhor Er danong moh hatpor daham na ihpatmur. Hanip diradire ina teimdapat ma tarpapat er da orhap inahat napisapatmur.  
\v 18 Nohe kakdah mama ina teimdapat tarpam Noh ihtipor ihtipor dahapat danong oh yah da oh ti na tarpapat ma hapat. Er da orhap tarpapat ma hapat daham am hapatmur. Norhe ihat sus ma it dahapat oh mamarumur. Noh mama yah danong moh hatpora dahapat orhora; noh ama danong oh na ihtin ina hat patmur.  
\v 19 Ihat patim Noh ihtipor ma dahapat danong oh na hama nohe Na ihtipor ma dahapat er danong ohwi hapatmur.  
\v 20 Noh na ihtipor ma dahapat er da ohnong ma hapat oh norhe damdapat Ihtipora ma dahapat ohe pe oh noh na ihpatmur. Ina teimdapat Noh ihtipor ihtipor ma dahapat ohe er da oh ihtin ina da naham pranahat er da teinong pranahat napisapatmur.   
\p
\v 21 Noh ihat pat han ohoh ihan noh ama yah danong hatpor dahatporhan it er da oh namrin orhorwi napapatmur.  
\v 22 Noh ma ihat pat oh mamarumur. Norhe damdapat Got orhe sawa yah mengnong moh amam ham dimtipora dahapat orhor  
\v 23 ina teimdapat tit da oh namkarpatmur. Ama imat ma namkarpat da ohdapat norhe damdapat Got orhe yah danong hatpora ma dahapat danong oh ambapte mara orhe er hat son ohe da hrepnong nahat napapatmur.  
\v 24 Nohe ma ihat er hat sus haputin mandapnong napison ina nahat napapat moh Nih sa nambur yah teinong nahatiproh daham noh Epe. Noh ernap hat pat han sa daham da ernap hat patmur.  
\v 25 Basra. Got oh diradire Hanipyah Jisas Krais orhe dap teimdapat nohnong nambur yah teinong nahatin han hat patwa daham Got ohnong weso porwi paptepera dahapatmur.  
\p Noh yah danong hatpor dahapat orhor er da hatin ohe danong oh hat ma sapat oh damdapat Got orhe yah danong hatpor ma dahapat da oh Got orhe sawa hrepdapat hat patmur. Ina teimdapat ma tarpapat sapat da oh er da ohe hrepdapat hat napapatin noh ihat er hat sapatmur.   
\c 8  
\s1 Yahsup oh dire mutuh patim yah nahapat ohe meng oh  
\p
\v 1-2 Krais Jisas orhe tapnong hat pati dirnong oh Krais orhe dap teimdapat dirnong yah hat orhorwi paten da nahapat Yahsup oh dir er nang ohe eimat batbet dar paten ohe hrepdapat nang natpat napapatin orhor nang narpima yah teinong nahat napapatmur. Inahat napapat ohoh ihan Got oh ihat napapat dire boknong nahatin menghe timbasnapmur.  
\v 3 Dire boknong nahatin meng timbas hat ma pati moh diradire kasip ohsi ihat na patimur. Ina teimdapat er da tarpam pranahat napisapat ohe kasip oh Got ohe sawa mengnong amram dimtin danong oh gapa nahat napapat ohoh ihan dir kinmat diradire kasip ohsi dimtiperhan dire boknong nahatin meng timbas hatiproh. Ihtin kasip oh diradir timbasmur. Got orhorwi ihtin kasipsi han ohoh inahapatmur. Ma inahapat oh orhe mon Krais orhornong darhetipmur. Darhetporhan oh er hat sapti han dire ina ham dire gwemat apdapmur. Ihat apriporhan itap orhor er hat sapti han dire batbet er nang oh orhe boknong mara dire bat gwe han mar sutipmur.  
\v 4 Dire bat gwe han mar ma sutip oh dir Got ohe sawa meng oh pomat orhor amram ha dindeingwe rim imat sutipmur. Dir ama yahnap sawa meng amram pomat ma dindeipti oh diradire ina teimdapat er da tarpam pranahat napisapat ohe kasip ohsi na ihaptimur. Yahsup orhe dire mutuh napapat ohe kasip orhorsiwi ihat saptimur.   
\p
\v 5 Mohnong dahenmur. Ina teimdapat er da tarpam Noh ihtipor ihtipor daham dindeipti gurhe ama ina teimdapat er da tarpapat danong marim ohe danongwi hat pati bap gurmur. Yahsup orhe danongwi hat sapti bap gurhe Yahsup orhe Ihir ihat ha songwe ma dahapat danongwi marin pati bap gurmur.  
\v 6 Ama ina teimdapat er da tarpapat ohe danongwi hat pati ihir yah hat paten ohe danong na dara eimat batbet dar paten ohe da oh dat pati bap gurmur. Yahsup orhe danongwi hat ma sapti bap gurhe eimat manap hat yah hat paten ohe da oh dar ihat sapti bap gurmur.  
\v 7 Ina teimdapat er da tarpapat ohe danongwi hat pati bap ihiroh Got orhornong mahaw mat papti bap ihirmur. Mahaw mat paptim orhe sawa mengnong dimtin ina na hat patim kom asar mandaptimur.  
\v 8 Ama han bap ihirnong ina teimdapat er da tarpapat ohe er da ohe hrepnong mat papat ohoh ihan kinhat Got ohe amam hat pat danong hatiprohe. Na ihtin ina hat patimur.   
\p
\v 9 Oh ina teimdapat er da tarpapat ohe hrepnong mat papat han bap ihirmura; gurnong oh ihat na patimur. Gurnong oh gure mutuh oh Got orhe Yahsup oh patin ohoh orhe hrepnong naham napapatmur. Krais ohe Yahsup oh gure mutuh oh na pathanoh ama han gur Krais ohe nita bap hat na pati bap gurmur.  
\v 10 Krais oh gure mutuh ma pat bap guroh gure ina oh er hat sapti ohe pe oh hapur timbas hatipri orhora; da oh Krais oh gure mutuh oh pat ohoh ihan Got oh gurnong Gur yah hat pati han bapmur ma naporpat ohe pe oh da oh patru eimat patepramur.  
\v 11 Ama inahat napapat han gure mutuh oh Jisas Krais orhornong pamsuhup han Got orhe Yahsup oh gure mutuh oh patmur. Pat ohoh ihan Jisas Krais orhornong ma pamsuhup han orhor orhe Yahsup oh gure mutuh pat ohe dap teimdapat gure kakdah mama hapuripti inanong oh it ama ina orhor napamsapramur.   
\s1 Yahsup orhe kasip ohsi Got orhe brer hat pati ohe meng oh  
\p
\v 12 Nohe taptema. Got orhe Yahsup oh dire mutuhdapat patim ma yah nahapat oh dir ina teimdapat er danong ha hengwe rim na yah nahapatmur. Orhe danong hat ha patengwe rim yah nahat napapatmur.  
\v 13 Imat napapat ohe Yahsup orhe danong na hama ina teimdapat er da tarpam er da tei pranahat napisapat ohe danongwi hayahan eimat Got ohsi yah hat na patepri ohe danong oh dar ihat saptimur. Yahsup orhe inahat napapat ohe kasip ohsi guragure ina teimdapat er da tarpam ihat sapti danong asoh kom asar mandayahanoh yah hat eimat paten danong dar ihat saptimur.   
\p
\v 14 Got orhe Yahsup ohe danongwi ham ma dindeipti gur Got orhe brer gur ohoh ihan ama imat dindeipti guroh eimat yah hat paten da dar ihat sapti bap gurmur.  
\v 15 Got orhe brer hat ma pati oh gur rih Got orhornong kas hat pateshe danong it ha hengwe rim orhe brer nahat napapatda. Basra. Orhe brer nahapat ohe Yahsup ohe kasip ohsi hat patim orhor orhornong Ata. Ata por ha patengwe rim orhe brer nahat napapatin ama Yahsup ohsi Ata. Ata poriptimur.  
\v 16 Yahsup orhe ma inahapat oh diradire damdapat Noh Got orhe brer hat patwa ma dahapat ohe da oh arpin orhe brer hat pat ma hapat dahatin ohe da oh pitap teinong mar dirnong namgipatmur.  
\v 17 Dir Got orhe brer hat pati ohoh ihan orhe nat pat erer oh orhe brer Krais orhe darpatru mat orhorwi orhorsi taman titwi datiprimur. Orhe batbet ma datipru mat dariyahanoh ama imat dariya han bap dir has yahnap da oh orhorsi taman tap mat datiprimur.   
\s1 Has yahnap danong datinmat yimapti ohe meng oh  
\p
\v 18 Ama has yahnap datipri da ma dire kintei pitap teinong matipra oh isipnap hat pat ma hapat. Ama isipnap hat pat han ohe hrep oh kakdah mohe batbet daripti batbet oh pat ma hapat. Ihan kakdah mohe batbet daripti danong hapri dahapatmur. Isip ma datipri has yahnap danongwi hat patepera dahapatmur.  
\v 19 Orhe brer nahat napapat dire boknong has yahnap da ma pitap matipra oh orhe gonsi darpatip gonsi erer oh imat pitap matipra ma hapat daham kinkin da ham wamat patimur.  
\v 20-21 Ama darpatip erer ihir iraire da orhor Nuhur timbas hatin han bap hatper na dahatpamur. Got orhordapat Norhe darpatip erer maihir tumnuhur timbas hapat hrepdapat hat ha patengwe. Ihat patin kaput norhe brer ihirnong ma has yahnap dasi matipra oh ihirnong tumnuhur timbas hapat hrepdapat hat ma pati oh norhor it yah teinong mara norhe brer ihirnong has yahnap dasi matipraru mat orhor ihirnonghe imtipramur daham tumnuhur timbas hapat hrepnong mat mandatipmur. Ma imat mandatip oh ihir Orhor kaput inahatiprawa dahat ha patengwe rim imat mandatipmur.   
\p
\v 22 Imat mat mandatporhan ma minhan patinong oh dir wamar am hat patimur. Wamar ma am hapti oh mamaru hat patmur. Kuu ihir brer ake sutporhan Noh brer kapkap sara batbet moh kapkap ha timbas hatinoh ma dahaptiru hat orhor orhe darpatip erer ihirhe ihat daham batbet dar yimam ma minhan patesheru hat orhorwi patiru patimur.  
\v 23 Ama ihat pati oh ama erer ihirwi ihat na patimur. Orhe brer naham Yahsup ohri napin pat ohe kamen tei it titsi ma napripra han dirsi tap hat yimam minhan patimur. Yimam ma minhan pati oh Norhe brer ihirnong erer moh apriprawa daham mamen mat nat pat erer oh orhe brer nohnong isip mat orhor sa napripra daham yimam minhan patimur. Isip mat ma napripra oh dire ina moh wan inasi nahatipramur.  
\v 24 Got oh orhe brer naham nambut napapat ohoh ihan dir Orhor arpin has yahnapsi da nahatiprawa daham minhan patimur. Minhan patimdapat dariyahanoh ithe minhan na indiprimur. Minhan patimdapat wamar dariyahanoh it datporo rim minhan indiproheda. Basra. Dariyanong oh it minhanhe na patimur.  
\v 25 Na dat pati han ohnongwi datpera daham kasip ham minhan patimur.   
\p
\v 26 Datipriwa daham ma minhan pati ohe da oh ma kasip nahapatru hat orhor Yahsup ohhe dirnong kasip naham napanggeipatmur. Ma napanggeipat oh dir Got ohnong meng por dahamtinmat oh Noh de meng sa potiproh daham bakbak tahat mengriptin Yahsup oh hanip dire na ritin yahnap meng orhor Got ohnong por nadahandeipatmur.  
\v 27 Yahsup oh Got orhe nita dire paten meng imat por ma nadahandeipat oh Got orhe ihir ihat ha patengwe ma dahapat meng orhor Yahsup oh Got ohnong imat nadahandeipat ohoh ihan dire danong ma nadason mat napapat han Got orhor Yahsup ohe dahapat danong oh orhor am hat patwimur. Am ham imat napanggeipatmur.   
\p
\v 28 Got orhe inahapatnong oh dir am hat patimur. Orhornong bopor mat papti han bap dirnong yah hat indin da ohsi; ti da ti da ohsi dire bok apirhanhe Got orhor it yah nahatin ohe danongwi deipatmur. Ama ihat pat danong yah nahatin da ma deipat oh dirnong Go norhe han ham norhe dahat pat danongwi hat sashenmur napor kis nahat napapat han dirnongwi inahat napapatmur.  
\v 29 Imat ma napapat oh rih orhor Maihir norhe han hatipri bap ihirmur daham orhor am hat patesuhmur. Ama orhor am hat patesuh dirnong oh Kaput ihir norhe brer orhor hatin sa hatipri napor orhe kasip ohsi kis nahat napaptesuhmur. Inahat ma napaptesuh oh Krais oh duuptei brer ham nanip hat sa patepra. Ihir ohe nap gapinir hat sa patepri daham dirnong imat kis nahat napaptesuhmur.  
\v 30 Ama kis nahat napaptesuh han dirnong oh Gur norhe nita hatinmur napor orhe nita bap nahat napapatmur. Orhe nita nahat napapat dirnong oh Gur yah han bapmur naporpatmur. Gur yah han bapmur ma naporpat dirnong oh yahnap has da napris napapatmur.   
\s1 Got orhe bopor nahat napapat danong oh amkar na timbas hatinmur ritip ohe meng oh  
\p
\v 31 Got oh imat kis naham napapat han ohoh ihan dire boknong er nahatin han oh nih. Dire boknong naham er nahatin hanhe eimat timbasnapmur.  
\v 32 Imat ma napapat Got oh orhe brer tit pokwi oh Norhorsiwi patepramur na daham dire gwemat nadarhetipmur. Orhe boporsi brer oh dirnong imat napdap ohoh ihan erer asoh tap mat dirnong be napripat basda. Erer hanhe be napripat hanmur.  
\v 33 Got oh Maihir norhe han ihirmur napor kis nahat napapat dirnong oh Yah han bapmur napot napapat tei ohoh ihan de han oh Moh er hanmur napor dire boknong meng nahatiproh. Eimat timbasnapmur.  
\v 34 Jisas Krais oh dire gwemat haputporhan itap oh it pamsuhupmur. Pamsasa Gin norhe armisi bes oper tan moh tongnotina potporhan ama tongnotip han Krais orhor dire sang rim nadahandeipatmur. Imat nadahandeipat ohoh ihan dirnong Gur er ham batbet dar pateprimur napotin han oh nih. Timbasnapmur.  
\v 35 Krais orhe bopor nahat napapat da oh isipnap nahat napapatin ohoh ihan kian da oh apris namkatiproh. Timbasnapmur. Saheih hatin da tit apirhano ina ruumsup datin da tit apirhano Moh Krais orhe nitamur napor ina ruumsup napriyahano pahoh sup apirhano hanip dire aripti watah timbas hatin sup apirhano hanip nim er nahatin ohe da tit apirhano nim haputin sup tit apirhano ama erer sup gon oh Krais orhe bopor nahat napapat danong oh amkar timbas matin hatinda. Basra. Kasipnap bopor nahat napapat kasip ohoh ihan na timbas matin hatin bopor nahat pat da ohmur.  
\v 36 Ama ihtin ruumsup oh apripramur Depit oh girim ma brak matip oh mamaru hat patmur.  
\q1 Kat ihirdapat nuhurnong Gur Got ohe nita kuuhan bapmur napor suyarit ha haputingwe napor nitin danong nahat napaptimur. Inahat ma napapti oh sipsip bap ihirnong Sutin han moh sutpera daham ma suptiru dirnong imat orhor nitin da nahat napaptimur.  
\m girim brak matipmur.  
\v 37 Inahat napapti orhor bopor nahat napapat Got orhor napanggeit napapat ohoh ihan ama danong oh ambapte marwi paptimur.  
\v 38 Got oh imat isip bopor nahat napapat ohoh ihan bopor nahat napapat ohe da oh kinhat amkar timbas matiprohe. Eimat amkar na timbas matin hatin da ohmur dahapatmur. Nitperhan hapuriyahanoh ama orhe bopor nahat napapat danong oh timbas matin hatinda. Basra. Na timbas matin da ohmur. Patin orhor inahaya oh ama bopor nahat napapat danong oh amkar timbas matin hatinda. Basra. Na timbas matin hatin da ohmur. Enser ihiro mongsup erer ihiro gin mama ihat patio komdapat ma ihat pateprio tihan tihan kasip erero  
\v 39 aw tei ohe pat erero mong tei mohe kasip erero tihan tihan erero aw pe mong pe ma pati han erero ama ihtin han bap ihiroh Got orhe bopor nahat napapat danong moh amkar timbas matin hatinda. Basra. Ama erer ihir na imtin hatinmur. Ama bopor nahat napapat da oh diradire Hanipyah Jisas Krais orhe dap teimdapat napin pat ohoh ihan ohnong na timbas matin da ohmur.   
\c 9  
\s1 Por oh orhe aptei han ihirnong ake tom mat paptesuh ohe meng oh  
\p
\v 1 Krais ohe tapnong hat pati diroh dasuh menghe na ripti ohoh ihan Krais orhe tapnong hat pat han noh arpin meng napotiprohmur. Norhe da oh noh arpin meng ripat han ma hapat dahapatmur. Yahsup ohdapathe Go arpin ripat hanmur naporpatmur.  
\v 2 Noh arpin meng ma napotiproh oh mamarumur. Norhe aptei han Juda ihir Krais ohe danong na hat patio rim noh ihirnong ake tom isip mat papatmur.  
\v 3 Noh ihirnong Got ohhe ambur paptepraneng daham ake tom mat ma papat oh noh de mandap katdapat ihirnong panggeitiproh dahat patmur. Got orhordapat nohnong Go Krais orhe tapnong hat pat da oh namdapat norhe bopor heisup nahat napapat hrepnong hatinmur. Hahhan ihirnong ambutin dasi mar ambutiprohmur naporhanhe noh ihirnong ake tom isip mat papat ohoh Yahwa. Go inahatina potiprohmur dahat patmur.  
\v 4 Ama ihir Isrer ohe brer ire puh ihirmur. Ihir Got oh Norhe brer matipramur ma ritip bap ihirmur. Ama bap ihirnong Got oh orhe has da oh pinggisuh bap ihirmur. Ama bap ihirnong Got oh dik asarisuhmur. Got oh orhe sawa meng poro orhornong daham pomat armi mar papten ohe da pinggimo mar pinggisuh bap ihirmur. Orhor noh ihtin han tit gurnong napripramur por rit asarisuh han bap ihirmur.  
\v 5 Ama han bap ire ropir ihiroh nuranure duupteinap awher ihirmur. Ama awher duuptei han ire puh ire bokdapat Krais oh hanip brer tarpam apdapmur. Ama apdap Krais oh dire kakhan titwi ham erer gon moh orhe hrepnongwi naham napapat han Got orhormur. Orhornongwi dipdipwi armi mar papten han ohmur. Arpinwa.   
\s1 Got orhe damdapat orhor Noh imtipora daham ma inahapat ohe meng oh  
\p
\v 6 Ama Krais ohe danong na hat pati Isrer bap ihir Got ohe rit asarisuh mengnong oh dam timbas mar ihat patida. Basra. Isrer ohe puh ihirhe gonsi Got orhe nitawi hama arpin Isrer na haptimur.  
\v 7 Amaru hat orhor Epraham ohe puh ihirhe gonsi Got orhe nitawi hama arpin Isrer bap hat patida. Basra. Kat tit Got orhe nita na hat pati bap ihirmur. Got orhor Noh Aisak ohe puh ihirnongwi Gur norhe nita bapmur potipramur ritipmur.  
\v 8 Ama giritip oh be hanip puh artahat saptinong asoh daham norhe nitamur na ripatmur. Orhe daham ma rit atip bap ihirwi arpin norhe nita ihirmur ripatmur.  
\v 9 Ama Epraham ohnong rit atip oh mamaru mat rit atipmur. Norhe dahat pat dik oh aprisa Sera uhnong kusen tei orhor brer manhetin ina dasi matporhan manhem brer mon itipramur por rit atipmur.   
\p
\v 10 Got orhe nita ma deipat ohe meng tit mama pat ohmur. Nure aw Aisak ohe inap Rebeka uh brer yot tap mat ma itipnong oh dahenmur.  
\v 11-12 Ama brer yot oh kopen na it patin orhor ite sasiprinong oh yah hat sasiprido da er hat sasiprio na wamar hanhan hat patin orhor Got oh Ohri ma wandapra han oh kom ma wandapra han ohe hrepnong mat paptepramur ritipmur. Ma ritip oh Got oh Ama han ohnong noh ihtin han matipramur daham ma kis deipat da oh hanip dire ihat saya ohe pe oh imat na kis deipatmur. Orhe Noh imtipora ma dahapat ohe pe ohwi kis deipat han ma hapat ha dahengwe rim ama da oh imtipmur.  
\v 13 Got orhe damdapat ma imtip meng oh ite boknong mar ritporhan ma brak matip oh mamaru hat patmur. Ohri ma wanhup han Esa ohnong oh noh na bopor mat paptesuhmur. Kom ma wanhup han Jekop ohnong noh bopor mat paptesuhmur ritporhan brak matipmur.   
\p
\v 14 Got orhe da orhor dirnong ti da ti da ma napripat han moh Oh er dahat patim dirnong ti da ti da napripat hanhe potiproheda. Basra. Orhe da oh yahnap hat patim ohoh inahapatmur.  
\v 15 Got oh Norhe da orhor ti da ti da apripat moh yaho ma dahat pat oh Moses ohnong mama meng moh potipmur. Noh norhe da orhor tit han ohnong tit hinhina mar ambutpor dahahhanhe hinhina mar ambutiprohmur. Tit han ohnong tit hinhina mar panggeitpor dahahhanhe hinhina mar panggeitiprohmur gipotipmur.  
\v 16 Moses ohnong ma gipotipru mat orhorwi inahapat han ohoh ihan hanip dire Oh ha inahatinoh dahapti ohe pemdapatdo da diradire kasip hat sapti ohe pemdapatdo oh ti da ti da napripatda. Basra. Dire ma ihapti ohe pe oh na inahapatmur. Orhe damdapat ma imtipora dahapat ohe pe ohwi inahapat hanmur.   
\p
\v 17 Orhe da orhor ma inahapat ohe meng oh tit mama brak matpa ohmur. Ma brak matpa meng oh Got oh Isip mong ohe kakhan Pero ohnong Gwe kakhan hat pat moh gorhe da ohsi kakhan ham ihat na patmur. Norhe da orhor Mama han ohnong kakhan mara norhe Imtipora dahapat da oh ohe boknong mat papatin kuuhan ihir norhe kasipnong oh wamara ihir ha am hatingwe. Am hama norhe mama ihat pat winnong moh nadaptuhura aw pe mong pe mong mong moh ha napishengwe daham gonong kis naham mama inahat napapat ohmur gipotipmur. Gipotporhan brak matpamur.  
\v 18 Ma imtip oh dir wamara orhe da orhor tit han ohnong tit hinhina mar panggeitpor dahahhanhe hinhina mar panggeipat ma hapat. Tit han ohnong tit na hinhina mar ohe danong aban matpora dahahhanhe ohe danong aban deipat ma hapat dahaptimur.   
\p
\v 19 Got orhe da orhor imtipora dahah da oh inahapat hanmur ma napor meng moh gur sama dahapti gurdapat it nohnong mama ohe meng oh napotiprohekin. Gurdapat Nuhur Got orhe damdapat ma inahapat da oh nuhur amkar mandatin hatinda. Basra. Amkar na mandatin hatin hat pati ohoh ihan yah hat sayado er hat sayado oh orhe napin pat da orhorsiwi hat saptimur. Nuhur orhe napin pat da ohsiwi hat sapti ohoh ihan nuhurnong kianorim Gur er han bapmur napotiproh gurdapat nohnong ginapotiprohekin daham noh gurnong mameng moh napotpor ihpatmur.  
\v 20 Hanip diradir ohoh ihan dir namanhetip Got ohnong Go kianorim nohnong mihtin dasi naham namanhetip potiproheda. Basra. Hanip dire geim ma manheptinong oh dahenmur. Geim ohdapat ma manhe han ohnong Go nohnong kianorim mihtin geim namanhe potiprohda. Basra. Oh ma manhe han ohnong na gipotiprohmur.  
\v 21 Manhepat han orhor arpak darema Gin geim yot manhetpora daham pus geimsi; ga geimsi manhepatmur. Orhe damdapat daham imat ma manhepat oh er basmur. Oh yahmur.   
\p
\v 22 Got orhe da orhor ma inahapat da oh amaru hat orhor inahapatmur. Ma inahapat oh heisup mar timbas matiprawa dahat papat bap ihirnong Nohe kasip dao heisup dao moh wanaham ha am hatingwe daham timbas matiprawa dahapat orhor orhe manap da tei it wamat papatmur. Orhe heisup mar sutin han ihirnong manap da tei wamat papatnong oh dirdapat ero potiproheda. Basra. Na gipotin hatinmur.  
\v 23 Imat manap da tei ma wamat papat oh orhor rih orhor Mama han ihirnong hinhina mar panggeitipramur. Panggeima norhe has yah da oh ire boknong matipramur. Matporhan norhe yahnap hat patim ma papat da oh ihir wamar sa am hatipri daham imat papatmur.  
\v 24 Hinhina mar panggeitipramur ma ritip han bap oh dirmur. Ma ginapotip oh Juda hat pati han nuhurnongwi ginapotipda. Ma ginapotip oh Juda hat pati hansi; Juda na hat pati hansi dirnong tap mat ginapotipmur.  
\v 25 Imat ma napotip meng orhor tit Hosea ohnong potporhan oh brak matipmur. Ma brak matip oh mamaru hat patmur.  
\q1 Mama nohe nita hat na pati kuuhan maihirnong oh kaput norhe nita bapmur potipramur. Nohe na bopor mat papat kuuhan bap maihirnong kaput norhe bopor mat papat bapmur potipramur.  
\m gipotporhan Hosea oh brak matipmur.  
\v 26 Ihtin meng orhor tit ma ohnong potporhan ma brak matip oh mamaru hat patmur.  
\q1 Ire pati tei oh gur norhe nita bap basmur ma gipotip tei oh atei orhor noh it Gurnong oh patru patepra han Got norhe brermur potipramur.  
\m ritporhan Hosea oh brak matipmur.   
\p
\v 27 Tit meng ma gipotip oh Aisaia oh Isrer ohe puh ire boknong kasip mengtei Isrer ohe puh ihir han artaham tom dinin ban hatin na satin hatin haya han ihiroh tom dinin ban na satin hatin hat patin orhora; Got oh uut han pok tit ambutipramur.  
\v 28 Hanipyah oh kakdah mong moh kapkap nasam yan oh pomat napripra ohoh ihan uut han pok tit ambutipramur potipmur.  
\v 29 Aisaia oh Got oh uut han pokwi ambutipramur ma ritip meng orhor tit meng ohri ma ritip meng oh mama mihat pat ohmur. Aw tei ohe erernong gonsi orhe hrepnong mat papat han Hanipyah orhor Juda dire danong na hama dire puh ihirnong uut han na mandatipneng dirnong Sodom aptei hano Gomora aptei hano ihirnong mat sum timbas matipru naham timbas nahatipnengmur Aisaia oh girim brak matipmur.   
\s1 Juda hat pati han ihir Krais ohe boknong tung rim or wandas mandapti ohe meng oh  
\p
\v 30 Dire mama riya mengnong moh dahama Mama mihat pat ma hapat dahaptimur. Juda na hat pati han bap ihir Got oh nuhurnong Gur yah han bapmur napotin ohe mandap oh na angdeishemur. Na angdeishe orhor ihir Krais orhorwi inahatin hatin hanwa dahat pati ohe pe oh Got orhordapat Gur yah han bapmur por papatmur.  
\v 31 Juda hat pati bap nuhurnong oh Got ohe sawa mengnong ohwi amram dindeiptin Got oh dirnong yah hanmur napotiprakin daham isip mar papteshemur. Isip mar papteshe orhor tap kat mat na dindeipti ohe pe oh Gur yah han bapmur na naporpatmur.  
\v 32 Gur yah han bapmur ma na naporpat oh Juda bap nuhur Krais ohwi inahatin hatin hanwa dahapti ohe danong dasei mar ma mandapti oh ama danong oh kwei hatin hat pat boknong oh tung rim or wandas mandaptimur. Or wandas mandatperhan Gur yah han bapmur na naporpatmur.  
\v 33 Ama kwei boknong tung rim or wandas mandapti ohe meng oh tit meng Got oh Aisaia ohnong potporhan ma brak matip meng oh mamaru hat patmur.  
\q1 Gur amratin. Noh Saion Jerusarem ap mutuh oh kwei hatin han tit itipramur. Kwei hatin han tit ma matipra oh hanip ihir ama kwei bok oh tung rim or wandas hen ohe kwei hatin han tit itipramur. Hanip ihir ero por dasei mar mandatin kwei hatin oh itipramur. Itporhan ama itipra han ohnong Ohwi arpin inahatin hatin hanhe ma dahaya bap ihiroh Noh kinham sa mama han ohe boknong moh hatir na dahaprimur.  
\m potporhan brak matipmur.   
\c 10  
\s1 Juda ihir sawa meng hrepdapat hat patim Krais oh inahatin hatin hanwa dahatin ohe mengnong amkat pateshe ohe meng oh  
\p
\v 1 Nohe taptem Rom aptei ma pati bap gur amratin. Noh Got oh norhorsi tap han bap Juda hat pati bap ihirnong oh gonsi ha ambutinoh dahapat danong oh noh batbet hat patmur. Batbet hat patim Got ohnong Go ihirnong ambutinmur por adahandeipatmur.  
\v 2 Ire ma ihat pati oh noh am hat patmur. Ihir mamaru hat patimur. Ihir Got ohe danong hatinmat kasip hapti orhora; ihir potahat na daham hanhan hat patim ihat saptimur.  
\v 3 Ihir hanhan hat patim ma ihat sapti oh Got oh Gur mihat ma pati ohe pe oh Gur yah han bapmur ma potipra ohe danong oh na daham amkar mandam ihat saptimur. Ihat susa Moses ohe natip sawa meng amram ma dindeipti ohe pe moh Got oh nuhurnong yah han bapmur napotiprakin daham ihat saptimur.  
\v 4 Basra. Ama sawa mengnong dimtiperhan ama dindeiya ohe pe ma Gur yah han bapmur ma naporpatnong oh Krais orhor timbas matipmur. Imat ma timbas matip oh orhornong Orhorwi inahatin hatin hanwa ma dahaya han ihirnong Gur yah han bapmur ha porinoh rim imat timbas matipmur.   
\p
\v 5 Moses oh Gur Got ohe sawa mengnong moh amram dindeiptin Got oh gurnong yah hanmur napotipramur rim ma brak matip meng oh mamaru hat patmur. Gur sawa mengnong amram tap kat mat pisaptinwi gurhe eimat paten da dariprimur rim brak matipmur.  
\v 6 Oh Moses ohe girim ma brak matip meng oha; Krais ohwi inahatin hatin hanwa dahat patin Got oh Gur yah han bapmur naporpatmur ma dahapti bap dirnong oh mamaru hat daham riptimur. Hanip guragure damdapat Krais ohnong ambur pukdayarit kakdah moh meng ha napotinoh. Ihan han nih rus ambur puhdaproh dahapri.  
\v 7 Krais oh dire hapur da sus mong tem ma pati apteimdapat Krais ohnong pitap teinong moh deiyarit oh meng ha napotinoh. Ihan nih ambur wasa ambur pitap teinong moh matiproh dahapri riptimur.  
\v 8 Basra. Krais oh dire duup moh pato rim mama meng moh rim brak matpamur. Ma brak matpa meng oh Got ohe meng oh dire duup moh patin dire damdapat dahayao atem teimdapat riyao mama hapti ohmur rim brak matpamur. Ama Krais ohwi inahatin hatin hatin hanwa dahatinmur girim ma brak matpa meng oh napor dire boknong am nahat napapat ohe meng ohmur. Ama imat napin pat meng oh noh mama napot napisapat ohe meng ohmur.  
\v 9 Ihan gur damdapat Got oh Krais ohnong arpin pamsuhup han ma hapat dahama atem teimdapat Jisas oh norhe Hanipyahnap hat pat hanmur riyahanoh ama ihat daham giriya han gurnong oh Got oh nambutin han naham nambutipramur.  
\v 10 Damdapat Got oh Krais ohnong arpin pamsuhup han ma hapat dahatperhan Got oh Gur yah hanmur naporpatmur. Atem teimdapat orhornong dahapti da oh pitap teinong matperhan nambutin inasi naham nambur napapatmur.   
\p
\v 11 Krais ohnong Ohwi inahatin hatin hanwa dahapti ohe meng tit ritporhan ma brak matpa oh mamaru hat patmur. Ohwi inahatin hatin hanwa ma dahapti ihiroh Noh nen orhe boknong hatir oho daham kas hatinhe na kas haprimur ritporhan brak matpamur.  
\v 12 Ritporhan ma brak matpa oh Got oh Juda hat pati han irarhe hat patimura; Juda na hat pati irarhe hat patimur daham ameng oh ritipda. Basra. Juda hat pati bapsi; Juda na hat pati bapsi Got orhor tit bapwi nahat napapatmur. Inahat napapat han oh diradire gonsi Hanipyah tit pokwimur. Ama inahat napapat han ohnong dir Gorhor nuhurnong napanggeitina por dahamtiperhan orhe damdapat Noh imat bapkei matpora ma dahapat da oh ama imat dahandeiya han gonsi dirnong tap mat bapkei naham isip mat orhor napripatmur.  
\v 13 Ma inahapat ohe meng tit ma brak matip oh mamaru hat patmur. Hanipyah orhornong gonsi dahandeiya han ihirnong amburipramur rim brak matipmur.   
\p
\v 14 Gin gur mohnong dahenmur. Hanipyah ohe danong na hat patim oh imat dahamtiproheda. Basra. Imat na dahandeiptimur. Ohe danong hatinhe ohnong hanhan hat patim oh kinhat orhe danong hatiprohe. Am hamwi orhe danong haptimur. Orhe mengnong amram orhornong am ham dahatinhe meng pot na pihim patin oh kinhat ihir amram am hatiprohe. Pot pisaperhanwi ihir amram am hatiprohemur.  
\v 15 Meng pot pisonhe Got oh meng pot pison han ihirnong na darhet patin oh ihir pot pisaproheda. Basra. Orhor darhetporhanwi ihir pot pisaptimur. Orhor darhetporhan gin mama pot pisapti ohmur. Ama pot pisapti ohe meng rim ma brak matip oh mamaru hat patmur. Hanipyah ohe yah meng ohsi popriya moh yaho daham amam haptimur rim brak matipmur.   
\s1 Juda hat pati bap ihir Got ohe yah mengnong amrashe orhor daham na dindeishe ohe meng oh  
\p
\v 16 Got oh orhe yah meng pot pison han ihir darhetporhan pot pisapti orhor hanip ihirdapat kat ihir tit na dindeiptimur. Kat ire ma na dindeipti ohe meng oh Aisaia oh rih gipor brak matipmur. Ma brak matip oh mamaru hat patmur. Hanipyaha. Nure meng pot pisapti mengnong moh de ihir amrapti. Hanip ti na amraptimur. Uut han pok tit arpin menghe daham amraptimur rim brak matipmur.  
\v 17 Meng amram arpinhe daham ma amrapti oh Krais orhe yah mengnong moh pot pisaperhan amraptimur. Amrama Krais oh arpin ihtin hanhe daham orhe danong haptimur.  
\v 18 Juda hat pati bap Isrer ihir meng na amraptida. Basra. Ihir gonsi amraptimur. Gonsi amrapti ohe meng tit ma brak matip meng oh mamaru hat patmur.  
\q1 Got ohe meng oh aw pe mong pe mong mong moh gonsi sapatin amram am hat patimur.  
\m rim brak matipmur. Ihan amratin oh amrapti orhora; dimtinnong oh kat tit na dindeiptimur.  
\v 19 Ihir meng amrapti hanhan hat patida. Basra. Ihir gonsi am hat orhor patimur. Moses ohe ma brak matip oh Isrer ihir gonsi am hat patio rim Juda na hat pati han ire boknong mar brak matipmur. Ma brak matip oh mamaru hat patmur.  
\q1 Juda hat pati bap gurdapat Maihir be kuuhan bapmur ma poripti ihirnong asoh norhe da apriporhan gur ihirnong wamara heisup deiprimur. Hut pati han bap maihir kinhaya rim ihirnong heisup deiprimur.  
\m ritporhan Moses oh brak matipmur.   
\p
\v 20 Gahan Aisaia oh Isrer ihir nohnong inahatiprohekin daham na kas hama Got ohe meng moh pomat brak matipmur. Ohnong potporhan ma brak matip meng oh mamaru hat patmur.  
\q1 Juda na hat pati han ihir ohe danong hatper daham na angnahapti orhor ihir nohnong wanaham nohe danong haptimur. Ihir Got oh kinhat pat han rim ti na dahatahapti orhor noh ire kinteinong pitap hapatmur.  
\m Got oh gipotporhan Aisaia oh brak matipmur.  
\v 21 Isrer hat pati bap ire boknong ritporhan ma brak matip oh mamaru hat patmur. Ihir nohnong Gwe meng oh nuhur na amratiprohemur napor kasip ham sakarap nahat napaptin orhor noh ihirnong ambutinmat bes arhat orhorwi patmur ritporhan Aisaia oh brak matipmur.   
\c 11  
\s1 Got oh Isrer pati bap gonsi na mandama kat ihirnong ambutipramur ma dahatip ohe meng oh  
\p
\v 1 Got oh Isrer bap nuhurnong gonsi dasei naham namdat patda. Basra. Na namdat patmur. Ma na namdat pat oh Epraham ohe puh artahat apris Benjamin ohe puh hat pat han Isrer han nohnong dahenmur. Daham Isrer bap nuhurnong gonsi na namdat pat ma hapat dahenmur.  
\v 2 Got oh rih orhor Maihirnong norhe han nita matipra han bapmur ma ritip han ihirnong mandapatda. Basra. Na mandapatmur. Imat ma na mandapat oh Got orhe brak tei Iraija ohe ma ihtip meng ma brak matpa mengnong oh dahenmur. Iraija oh meng oh Isrer iraire boknong matinmat Got ohnong  
\v 3 Hanipyaha. Go ama bap ire ma ihat saptinong moh dahenmur. Ihir apop sum gorhe danong ham natendeipti gwar oh gonsi urkamat sar pisaptimur. Pisusa gorhe meng pot pisapti han ihirnonghe sum timbas deiptimur. Timbas matperhan norhap patmur. Ihat patin nohnonghe angnaham nitperim ihaptimur potipmur.   
\p
\v 4 Norhap patmur potporhan Got ohe it ma potipnong oh dahenmur. Ma potip meng oh Es. Gorhap patda. Norhe nita 7,000 han ihirnong norhe danong hat paten ohe da ohsi mat papatmur. Imat papat ohoh ihan ihir dasuh got Bar ohe danong ham na armi deiptimur potipmur.  
\v 5 Ginhe ihirnong ambur paptesuhru mat orhor kat Juda nuhurnonghe nambur orhe hrepnong nahat napapatmur. Got orhe damdapat imat ma nambur napapat oh rih orhor Maihir norhe nita matipramur napor ma kis nahatip bap nuhurnong oh imat nambur orhe nita nahat napapatmur.  
\v 6 Orhe damdapat orhor imat Isrer nuhurnong inahapat ohoh ihan nuranure ma yah hat sapti ohe pe oh na inahapatmur. Got orhe damdapat Imat yah matpora ma dahapat ohe pe ohwi nuhurnong imat nambur napapatmur. Nuranure yah hat sapti ohe pe namburpatneng orhe damdapat orhor imat yah mar ambutpora ma dahapat danong amkar mandapatnengmur.   
\p
\v 7 Got oh Noh Isrer kat bap ihirnongwi ambutiprawa dahatip ohoh ihan orhe norhe ambutipra ma dahatip han ihirnongwi orhe ambutipra ma dahatip da ohsi amburpatmur. Kat gonsi Isrer bap ihiroh ama da oh nuhurnonghe ha napinoh daham sawa mengnong kasip ham tamreipti orhor Got oh orhe ambutin danong am hatipririm ire danong aban matporhan ihir na dariptimur.  
\v 8 Got oh ihirnong da aban deipat ohe meng oh brak teinong mamaru mat brak matpamur. Got oh ihir orhe ambutin danong oh daham am hatipririm danong aban deio kin wamar am hatipririm kinnong akwi mar apatao nat tem oh amratipririm nat tem apatao mat paptesuhru papatru imat orhor papatmur girim brak matpamur.  
\v 9 Ire Dir sawa mengnong amram kasip hat sapti ohe pe oh Got oh nambutiprawa ma dahapti han ire boknong oh Depit oh mamaru mar brak matipmur.  
\q1 Ire amam ham den dapti dao oh ambir tapaya ohe tan mar iraire boknong tasuyao tarmin ohe tan bapen apin teinong pramat pisus mer mat tanggapnong hayao hapti iraire er hat sapti ohe pe yan oh batbet dar ha patengwemur.  
\v 10 Got gorhe danong ihir hapririm go ire kinnong apat apaptenmur. Apat apapatim iraire ma ihat sapti ohe ruumsup ung ohsi dipwi iraire kom dahnong suhum aptahat apaptenmur.  
\m Depit oh Got ohnong imat paptenmur por brak matipmur.   
\s1 Juda na hat pati han ihirnong ambura rih Juda hat ma pateshe han ire boknong dip matip ohe meng oh  
\p
\v 11 Juda bap Isrer ihir Krais ohe danong na ham ohe bok tung rim or wandaya hatin hat ma sapti ohe pe oh Got oh gonsi ihirnong eimat mandapatda. Basra. Ihir ha dahatingwe rim Got orhor Ihir er hat sapti moh norhor Juda na hat pati ihirnong moh ambutpora. Amburpat Juda hat pati ihir norhe Juda na hat pati han ihirnong imat ma yah deipat ohe da moh wamara ihirhe Nuhurnong na minahapatgwer. Gin ihirnong imat yah deipathe daham Krais ohe danong sa hatipri daham Got orhor indeipatmur.  
\v 12 Juda ihir iraire er hat sapti ohe pe oh Got oh Juda ire er hat sapti moh noh ihan Juda na hat pati han ihirnong bapkei mar yah matin da apripora daham bapkei deipatmur. Ihir Krais ohe danong na hatperhan oh Juda na hat pati ihirnong yah da oh bapkei mat orhorwi apripatmur. Ihir Krais ohe danong na hat patin Juda na hat pati ihirnong indeipat ohoh ihan Juda ihirhe Krais orhe danong ham Got ohe tapnong hatper dahatperhan atnap imat bapkei matiproh basda. Basra. Atnap imat bapkei matiprohmur.   
\p
\v 13 Gin Juda na hat pati bap gurnong oh mama meng moh napotiprohmur. Got oh gurnong meng napot napisapat han kis nahat napapat ohoh ihan noh ama ihat tamrein son ohe danong oh amam isip deipatmur.  
\v 14 Noh imat ma gurnong meng napot napisapat ohe pe oh tap han bap Juda nuranur ihir gurnong wanahama Ihir Got ohe bapkei mat papat danong ham ihat patihe. Ihan dirhe ihat orhor Got ohe danong hatpera dahatperhan Got oh kat ihirnong ambutin dasi mar ha ambutinoh daham noh Juda na hat pati bap gurnong imat meng napot napisapatmur.  
\v 15 Got oh Juda hat pati han ihirnong ma mandapat ohe pe oh mong mong mama Juda na hat pati han bap gurnong orhorsi yah hat paten ohe dasi naham orhe yah han nahat napapatmur. Imat napapatin Juda hat pati bap ihirnong ma amburipra oh haput pati hatin hat patin it da pamsas amburipramur.  
\v 16 Ihirnong ma amburipra oh mamaru hat patmur. Ohri ma daripti den oh Got gorhe denmur ma poripti oh komdapat ohe denhe gonsi gorhe denwimur por ihaptimur. Irathe kaker oh yah hat pathanoh te ohsi yah hat pat hapatmur. Amaru hat orhor Juda hat pati han nure awher ihir Got orhe han hat ma pateshe oh komdapat han ihirhe orhe han hatiprio rim ihat pateshemur.   
\p
\v 17 Juda na hat pati bap gur Got orhe nita ham ma ihat patinong oh dahatinmur. Irat orip hanip ma amgap itpa irat orip te oh tan oh patina tanwi gatmar mandatper dahayahanhe gatmar mandatiprohemur. Ama gatmar mandaya tandapat oh kot dus ohe orhap ma marpat orip te oh gatmar pisus ama gatmar mandaya ohe boknong dip matiprohemur. Amaru mat orhor Juda na hat pati bap gurnong nambura kat Juda ma Got orhe danong ham orhe boknong hat pateshe orhe boknong asoh nahat napapatmur. Inahat napapatin rihohe gatmar mandaya orip dam bok ohdapat kopen ohe popris ohe boknong dip deiya tenong tom gap apris ma yah deipatru mat orhor gurnonghe Got orhe Juda ihirnong yah da ma bapkei mat apripat da orhor gurnong napripatmur.  
\v 18 Inahat napapat gurdapatheri gatmat mandatiri ihirnonghe Nuhur yah hat patimur. Ihir er hat patin gatmat mandatiro rim guragurnong armi tahapri. Armi tahatin da tit naham hahhanoh mihat dahatinmur. Nuhur irat orip boknong dip tahat pati moh nuhurdapat irat orip boknong moh paptida da ohdapat nuhurnong napapat. Basra. Bok ohdapat nuhurnong napapat ma hapat daham armi tahapri.   
\p
\v 19 Noh gurnong Armi tahapri napotporhan gur Es. Got oh ihirnong ma gatmat mandatir oh nuhurnong ama ohe boknong dip nahatinmat mandatirmur napor armi tahapririm noh mameng moh naporpatmur.  
\v 20-21 Gatmat ma mandatir oh iraire Ohwi inahatin hatin hanwa na dahapti ohe pemdapat gatmat mandatirmur. Mandama gin Juda na hat pati han bap gurnong ma it dip nahat napapat oh guragure yah hat sapti pe inahat na napapatmur. Damdapat Orhorwi inahatin hatin han ma hapat dahapti ohe pe ohwi inahat napapatmur. Ihan gur Nuhur yah hat pati ma hapat daham armi tahat sasipri. Ihat armi tahat sus ohe danong hatin ohe da oh mandayahanoh Rih arpin tenong gatmat mandatip ma hapat. Gin nuhurnong be te hat pati moh atnap gatmar namdatiproh ma hapat daham kas hat orhorwi patenmur.   
\p
\v 22 Imat gatmar namdatiprarim orhe hinhina naham yah nahapat da ohsi; heisup nahat napapat da ohsi ayot danong oh dahat patenmur. Ohe danong na ham ma mandaya ihirnong oh heisup da tei papatmur. Orhe danong hat patiru hat orhorwi ayahanoh ama ihat pati bap gurnong oh orhor hinhina da tei orhorwi napapatmur. Ihat na ayahanoh gursi tap mat gatmar namdatiprohmur.  
\v 23 Orhe danong na ham ma mandaya Juda bap ihirhe Krais orhorwi inahatin hatin hanwa dahayahanoh Got oh it dip matin inasi hat pat han ohoh ihan ihirnong it dip matiproh basda. Ama irat boknong mar it dip matiprohmur.  
\v 24 Ma dip matiproh oh Got oh rih oh hanip dire na ihapti da oh irat orip orhap ma kot dus murhup te hatin hat pati bap Juda na hat pati bap gurnong oh gat naham popris hanip itpa boknong dip nahatipmur. Ihat pati bap gurnong imat inahatip ohoh ihan arpin irat bok orhe te hat pati bap Juda ihirnong oh it popris dip deipramur.   
\s1 Juda hat pati bap ihirnong Got oh it gonsi ambutipramur ritip ohe meng oh  
\p
\v 25 Nohe taptem Juda na hat pati han bap gur mohnong dahenmur. Gur Got oh Juda ihirnong noh imtipramur rim reman paptesuh meng moh hanhan hat patim Nuhurwi ihtin han hat patimur daham armi tahapririm noh ama daham reman paptesuh meng oh napotiprohmur. Got oh mihat dahapatmur. Norhor Juda na hat pati han ihirnong ambutinmat Isrer bap ihirnong nohnong dasei nahat napapten ohe da ohsi mar paptepramur. Ihirnong imat papatim Juda na hat pati bap ihirnongri amburipramur. Amburpatin norhe dahat pat kis oh hatperhan  
\v 26 Juda hat pati bap ihirnong gonsi ambutipramur dahat patmur. Imtipra meng ma Aisaia ohnong potporhan ma brak matip oh mamaru hat patmur.  
\q1 Juda hat pati han irair orhor tit han tit irairnong amburin han tit apripramur. Aprisa Jekop ohe puh ire Got orhe dahat pat danong amkar er hat sapti danong oh gonsi dat amdam atimbas matipramur.  
\v 27 Imat ma atimbas matipra oh norhe rih orhor Ire er hat sapti pe yan oh ire boknong na matipramur rim ma dik atip meng oh arpin dam timdipramur.  
\m Got orhor gipotporhan brak matipmur.   
\p
\v 28 Ama imat yah matipra han oh ihir Krais ohe yah mengnong na amratperhan Got ohdapat ihirnong mahaw mat papatmur. Ama imat papat ohe pe oh be Juda na hat pati han gurnong napanggeim yah nahapatmur. Ihirnong imat papat orhora; rih ropir ihirnong Gure puh ihirnong asoh noh imat amburipramur daham rit atip da oh pat ohoh ihan it ropir ihirnong asoh dahama puh ihirnong da asar bopor mat orhor papatmur.  
\v 29 Got oh Norhor ama ihirnong imat yah da aprisa amburipramur rihanoh ama giri meng danong oh na yawar deipat han ohoh ihan na yawar mara ihirnong bopor mat papatmur.   
\p
\v 30 Gur rih ma pateshe oh Got ohe mengnong sakarap mar amkar er hat sashemur. Ama ihat er hat sapti gurnong Juda hat pati han ihir Got ohe mengnong sakarap mar amkar ihat sapti ohe pe oh Got oh Juda na hat pati bap gurnong hinhina naham yah da napripatmur.  
\v 31 Gin ire ma imat sakarap mar pisapti pe oh Got oh gurnong ma hinhina naham yah da napripatru mat orhor ihirnonghe imat orhor sa aprisipra.  
\v 32 Got oh Norhe hinhina da oh Juda hat pati hansi; Juda na hat pati hansi gonsi gon ihirnong apinmat oh norhe mengnong sakarap mar namkar sapti ohe hrepnong mat paptepora daham ama sakarap meng ohe hrepnong mat papatmur.   
\s1 Got orhornongwi armi mar papten han ohmur ritip ohe meng oh  
\p
\v 33 Got orhe dakuu hat patim ma ihpat dao orhe am hat pat dao oh isip isipnap hat patmur. Orhe imtipora daham ma indeipat da oh hanip dir duupteinong wamar am hatiproheda. Basra. Na am hatin hatinmur. Orhe ma inahat napapat ohe danong oh dir na am hatin hatinmur.  
\v 34 Orhe ihat pat ohe meng ma brak matip meng oh mamaru hat patmur.  
\q1 Hanipyah orhe ihat dahapat ohe da oh hanip dir nih am hat pat. Dir na am hat patinapmur. Ihat dahat pat han orhornong nih Got go ihat dahat indinmura; ihat dahatinmur potiproh. Dir timbasnapmur.  
\v 35 De han oh ohnong tit han tit apriporhan ohdapat it dirnong yansi nahatiproh. Basra. Dirdapat tit han tit ohnong yan mar apin oh timbasnapmur.  
\m rim brak matipmur.  
\v 36 Orhorwi duupteinap hat pat han ohoh ihan erer gon moh gonsi orhorwi darpama orhe hrepnongwi mat papat ohoh ihan dirdapat tit han tit ohnong apinhe na apin hatinmur. Ihat pat han orhornongwi dir dipdipwi win adaptuhur armi mar papten han ohmur. Arpinwa.   
\c 12  
\s1 Da ina gonsi Got ohnong aprishenmur ritip ohe meng oh  
\p
\v 1 Nohe taptem bapa. Got oh dirnong hinhina da isip nahat napapato rim noh gurnong kasip mengtei napotiprohmur. Ire Got gwemur por apop sum ma apriptiru mat orhor gure da ina oh dasi orhor patim Got orhornong aprishenmur. Imat apin oh Got gorhemur por ongengnap mar pomat papatdapat orhornong aprishenmur. Got oh Imat orhor naprisa ha armi nahengwe dahapat ohoh ihan imat ma apripti oh orhor amam hapatmur.  
\v 2 Da ina imat ma apripti han bap guroh kakdah mama dahat sapti da hatin hathe sasipri. Kakdah mama da hat sapti da moh Got oh dat namdama orhe dahapat kopenohe da ohsi ha nahatinoh. Nahatporhan noh kopenohe da hat son dasi nahah mohsi hat sasipora daham ama kopenohe da ohsi saya apriya hatwi sashenmur. Ihat susa Got orhe Moh yah damur dahapat ohe danong am hayao orhe amam mat papat danong am hayao orhe ihat ha sashengwe dahapat danong yah hat orhor am hayao hat sa sasipri.   
\s1 Got orhe damdapat orhor nitat atamreindin da ma napripat ohe meng oh  
\p
\v 3 Got oh orhe damdapat orhor Noh ama da oh ohnong apripora daham nohnong ma napin pat da ohsi noh gonsi gurnong naporpatmur. Gur Got orhe danong hat pati ohe pe oh nitat atamreindein da napin patmur. Imat napin pat ohoh ihan gur Nuhurnongwi mihtin tamreindin da oh napin pat ma hapat daham gorhornong Nohwi ihtin han hat pat ma hapat dahapri. Ma napin pat moh Got orhorwi imat napin pat ma hapat daham kimirim tamrein sashemur.  
\v 4 Nitat tamreindin da ma napris napapat oh diradire ina boknong dahenmur. Dire ina moh tit pokwi orhor diradire ina pe oh nitat atamreindin hat patimur.  
\v 5 Amaru hat orhor dirhe trun han hat pati orhor Krais orhe boknong ham tit inawi hat patimur. Ihat tit inawi hat patim nitat atamreindin nitat ma hat pati oh irair gospanggeit ha indingwe rim nitat ina pesi hat patimur.   
\p
\v 6 Got orhe damdapat orhor Imat nitat atamreindin da apripora daham nitat atamreindin da napin pat ohoh ihan orhe ma napin pat danong orhorwi hat patim atamreinmur. Mamarumur. Orhe meng pot pison da napris napapathanhe orhe arpin meng napris napapat danong orhorwi ham meng pot pisashenmur.  
\v 7 Kuuhan ihirnong panggeit papten da napris napapathanhe ama imat napin pat da ohsi panggeit paptenmur. Ihirnong meng por da adapetin da napris napapathanhe ama da ohsi meng por da adapet pisashenmur.  
\v 8 Ire danong akasip mat papten da napin pathanhe ama da ohsi ire danong akasip mat paptenmur. Ire erer ma hatip hat patinong asohhe panggeim yah matin da napris napapathanhe ama da ohsi ihirnong asoh isip yah mat orhor apris panggeinmur. Ihirnong wamat papten da napris napapathanhe ama da ohsi pan da tei orhorwi wamat paptenmur. Ihirnong hinhina mar panggeit papten da napris napapathanhe ama da ohsi amam da tei orhor patim panggeit paptenmur.   
\s1 Kuuhan ihirnong bopor mar ma da apris papti ohe meng oh  
\p
\v 9 Ihirnong bopor mat papten dahe ina teimdapatwi bopor mat paptepri. Damdapat da ohsi tap mat bopor mat paptenmur. Imat paptim er danong dasei mar mandama yah danongwi kasip ham marin paptim ihirnong bopor mat paptenmur.  
\v 10 Diradire taptem ihirnong da apris paptiru mat orhor kuuhan gonsi ihirnong asohhe da apris bopor mat paptenmur. Guragure boknong ma dahapti da oh mandama ire danong ham bopor mat paptenmur.  
\v 11 Tamreindin dahe gapa hat patepri. Got orhe Yahsup oh pan hat tamreindin da oh napris napapat ohe da orhorsiwi hat patim Hanipyah orhe atamreindinnong oh pan ham kasip hat orhor atamrein patenmur.  
\v 12 Got oh inahatiprawa daham ma minhan pati moh Got oh arpin inahatiprawa daham amam hat patenmur. Ruumsup tit apris gure boknong nahahhanhe gur gapa ham mandapri. Kasip hat orhorwi patenmur. Orhorsi mengrinhe dipwi mengir patenmur.  
\v 13 Got orhe nita bap guragur hatip hat patihanhe gospanggeit patenmur. Wan aptei han ihir apriyahanhe ambur pomat paptenmur.   
\p
\v 14 Kat han ihirdapat gurnong inaham ina ruumsup napriyahanhe gurdapat Got ohdapat ihirnong ha heisup matinoh rimhe Got ohnong Got go ihirnong imat heisup mar sutinmur poripri. Got gorhor ihirnong hinhina mar yah mat orhor panggeit paptenmur por adahandeinmur.  
\v 15 Ihir amam da tit dariptihanhe gur Wes imat amam da dariya rim guragur tap hat amam henmur. Ihir ruumsup tit dar saheih ham yimaptihanhe guragur tap hat ruumsan dara saheih ham yimonmur.  
\v 16 Gorhe ma Noh ihtin han tit dara noh ihtin han hat patneng ma dahapat da oh ihirhe ihtin da hat patikin daham gorhe ma ihat dahapat da oh ihirnong apris panggeinmur. Nohwi ihtin han hat pat ohoh ihan noh be bisei hat pati han ire tapnong ham na indiprohmur dahapri. Ire tapnong ham guragur tap hat patenmur. Gurdapat Nohwi dasi han hat patmur dahapri. Ihirhe ihat dahat pati ma hapat daham guragur tap hat patenmur.   
\p
\v 17 Ihir inaham er nahayahanhe gurdapathe Nuhur inahaya ohe yan oh nuhurdapathe ihirnong it er matpera daham ihirnong it yansi mar er deipri. Ire kin teinong asoh Maihir yah hat sapti baphe napotin ohe danong ohwi pinggit pisashenmur.  
\v 18 Ihirsi inggoshat paten ohe dasi hat patepri. Yah da tei manap goshat patepera daham manap goshat paten da orhorwi apris paptenmur.   
\p
\v 19 Nohanhera. Gurnong inaham er nahayahanhe gurdapat heisup mar it yansihe deipri. Got orhorwi heisup mar it yansi deipat han ma hapat daham orhe bes teinongwi mar mandanmur. Got norhorwi heisup mar it yansi deipat hanmur ritporhan ma brak matpa meng oh mamaru hat patmur. It yansi matin oh Hanipyah norhorwi it yansi mar apin han ohoh ihan norhor yansi deipramur ritporhan brak matpamur.  
\v 20 Ihat pat han ohoh ihan it yansihe deipri. Mama rim ma brak matpa mengru mat orhor panggeinmur. Tit ma brak matpa meng oh mamaru hat patmur. Guragurnong mahaw nahat napapti han ihir pahoh hayahanhe gurdapat den kasip mar pandenmur. Tom din hayahanhe gur tom ayohom pandenmur. Imat paptin iraire ma ihat pati danong asoh kas hatiprohemur giritporhan ma brak matpa mengru hat patenmur.  
\v 21 Ihat patim ihir er nahatperhan it ihirnong yansi matpera dahatin ohe da oh gurnong namkaripra. Gurdapathe yah da ohsi ire er hapti danong asoh amkarinmur.   
\c 13  
\s1 Gapman hat pati han ire hrepdapat hat patim meng amrapti ohe meng oh  
\p
\v 1 Nohe taptem bapa. Gapman ma tamreipti bap ihir iraire da orhor Nuhur gapman bap hat patepera daham na tamreiptimur. Got orhor Gur ihtin han bap hat patenmur por kis mat papatinwi ihir ihat patim tamreiptimur. Ihan gonsi gur ire meng amram ire hrepdapat hat patenmur.  
\v 2 Got orhor gapman bap ihirnong kis mat papat ohoh ihan kuuhan gur ire mengnong sakarap deipri. Sakarap deiyahanoh Got orhe dahat pat danong sakarap deipti ohoh ihan ihirnong sakarap deipri. Sakarap mar ihat sayahanoh guragur ihat saya ohe batbet oh datiprohemur.   
\p
\v 3 Yah hat ma sapti han ihirdapat gapman ham tamreipti han ihirnong kasa haptida. Basra. Er hat ma sapti bap ihirdapat gapman ham tamreipti han ihirnong kasa haptimur. Ihtin ohoh ihan gur Noh gapman hat pati han ihirnong na kasa hatin inasi hat pateprohmur dahayahanhe ama ihat dahaya gur yah hatwi sashenmur. Ihat yah hat sayahan ihir wanaham Maihir yah hanmur napor amam nahaprohemur. Amamsi nahat napaptin gurhe kas hathe na pateprohemur.  
\v 4 Dahenmur. Gapman ihirnong gonsi Got oh norhe natamreindin han matpor. Matporhan ihir ire hrepnong mar papindin han ihirnong panggeit ha paptengwe daham guragurnong napanggeit napapten han bap ihirnong kis mat papatmur. Er hat ma sapti ihirnong oh Got oh Norhe heisup mat papat yan oh sa apripri daham kis mat papatmur. Inahat napapti han ihir ohoh ihan guragur er hat sayahanhe Nuhur gin er hat saya sa daham kas hat sashenmur.  
\v 5 Ihan gur Nuhurnong Got orhe heisup da ohsi nahatipririm ire hrepnong ham meng amratper daham suswi ire hrepnong na haptimur. Got orhor nuhurnong Gur ire hrepnong ham ire meng amrat patenmur napotip ma hapat daham ire hrepnong ham meng amram patenmur.   
\p
\v 6 Takis yan ma apriptihe Got orhor Gur norhe natamreipti han gur ihirnong wamat paptim tamrein sashenmur por papatin ihir dipwi kasip ham wanahat napapti ma hapat daham ihirnong takis yan oh aprishenmur.  
\v 7 Takis yan ma ihapti ohe meng ohwi na naporpatmur. Kuuhan ihir napanggeiyahanhe ire imat ma napanggeiya ohe yan oh panggeinmur. Gurdapathe imat panggein oh takis yan ma daripti han ihirnonghe takis yan oh aprishenmur. Wan mong teimdapat erer ma popripti han ohe kastam manio rim daripti han ihirnonghe ama kastam mani orhor aprishenmur. Ire hrepnong ham ire danong hat paten han ihirnonghe ire danong ham iraire meng amram patenmur. Winsi matin han ihirnonghe winsi mat orhor paptenmur.   
\s1 Arwananah ire danong ham bopor mat paptenmur ritip ohe meng oh  
\p
\v 8 Kakdah mama orhe erer moh yan hat ma pati oh yan hathe patepri aprishenmur. Aprisa gin timbas dei ma hapat dahaptimur. Hanip ihirnong bopor mar da apripti da oh imat yan ohe tan mat apris na timbas deipti da ohmur. Dipdipwi yan hat patim ma apripti ohe tan mat apriswi paptenmur. Imat ma da apris papti han ihiroh Got ohe sawa mengnong pomat amrat patim ihat patimur.  
\v 9 Sawa meng oh mihat patmur. Gur bisei sawhe hapri. Hanip ha haputingwe rim sutinhe supri. Gapah hatinhe gapah hapri. Arwananah ire asoh abopor matinhe abopor deipri. Ama sawa meng ohe gonsi ohe doho kamen hat ma pat sawa meng oh mohmur. Gorhe danong ham ma bopor tahapatru hat orhor arwananah ire danong hatin ohe dahe imat orhor bopor mat paptenmur ritip sawa meng oh doho kamen ohe tan ohri duuptei kamen tahat patin erer asoh ihapri ma ripti sawa meng gonsi oh ohe hrepdapat hat patmur.  
\v 10 Imat ma hanip da apris gonsi bopor mat papti guroh guragure bopor mat papti han ihirnong imar er matiproheda. Basra. Gur bopor mat papti ohoh ihan na er matiprohemur. Ire danong hat pati ohoh ihan sawa mengnong amkar ihtiproheda. Basra. Da apris bopor mat papti ohe pe oh sawa mengnong gonsi amram dam mar indeiptimur.   
\s1 Krais ohe it apris nambutin oh kakduup hat pat ohoh ihan yah hat sashenmur ritip ohe meng oh  
\p
\v 11 Ihat patenmur ma napor oh dire gin mama pati danong moh daham ginapormur. Rih dir kopenat Got ohe danong ma hatpa oh Krais orhe it apris nambutin dik oh meihdapat hat patesuhmur. Gin mama pati dik moh orhe it apris nambutin oh kakduup nahat napapatmur. It apris nambutin oh kakduup nahat napapat ohoh ihan gin masas tei pati dik hatin hat patimur.  
\v 12 It apris nambutin dik oh kakduup nahat ma napapat oh mong moh kwitem hat ma pat oh gin mong da hatin kakduup hahmur. Kakduup nahat napat ohoh ihan kwitem dus ma er hat sapti da oh gonsi oh hariri por mandatinmur. Mandama gin has teinong ham er dasi gusutin ohe yah da oh namya hatin mat ar mamen taham yah hat sashenmur.  
\v 13 Yah hat son oh mong da tei yah hat ma sapti da hatin hat orhorwi sashenmur. Er tom dam tohor goshat indin ohe atornong oh hathe patepri. Bisei saw gosham er hat son ohe atornong ohhe hat patepri. Miano imaho ire da hatin hathe patepri. Ire erernong asoh abopor mar abap matin dao sakarap goshatin ohe dao ama da ohri hapri.  
\v 14 Ama ihat son ohe er da oh mandama Krais orhe yah da oh gon gurus rim orhe da hatin ham yah hat orhorwi sashenmur. Guragure ina teimdapat er da tarpam Noh ihtipora ihtipora daham ihat son ohe danong ohri hat sasipri. Ama danong oh kom asar mandama yah hat orhorwi sashenmur.   
\c 14  
\s1 Taptem bap guragur Go er hat sapat hanmur. Noh yah hat sapat hanmur goshapri ritip ohe meng oh  
\p
\v 1 Kat gur Got ohnong Orhorwi inahatin hatin hanwa dahat pati orhor Nure mama ihat sapti moh Got oh nuhurnong amam nahat napapatda da na amam nahat napapat daham yot da ham da gapa hat hatin hat patimur. Kat gur ihat na daham kasip hat patimur. Kasip hat ma pati gurdapat oh tap Got orhe nita ham gapa hat hatin hat ma pati bap ihirnonghe Gure yot da ham mama gapa hat hatin hat pati moh gur er hat patimur por sakarap goshatin meng hatinmathe ihirnong poripri.  
\v 2 Ama kasip hat pati gur Deno apopo erer gonsi moh dayahan Got oh yaho napor amam nahapat ma hapat daham apopo gonsi erer oh daptimur. Gapa hatin hat pati guroh Apop na dama denwi dayahanoh Got oh yaho napor amam nahapat ma hapat daham tohan pa erer ohwi daptimur.  
\v 3 Erer oh dapti han gurdapat apop ma na dapti han ihirnong asoh Gur er hanmur por dasei deipri. Apop ma na dapti han gurdapathe den gonsi yahwimur rim dapti han ihirnong asohhe Ihir er hapti han bapmur por aripri. Got oh tap mat guragurnong namburpat ohoh ihan guragur ihat dahapri.  
\v 4 Imat ero poripririm mohnong dahenmur. Tit han orhe atamreipat hannong asoh Moh er hat atamreipatmur apotiproheda. Basra. Ama nita han orhorwi Go er hat tamreipatmur. Go yah hat tamreipatmur porpatmur. Ama han ohnong Hanipyah oh Oh er hatiprarim kasip mat papat ohoh ihan ohnong er hanmur na potiprohmur.   
\p
\v 5 Kat han gur Sande dik orhe gonmur. Got oh nitat dik natipmur daham ihat saptimur. Gure ma ihat dahat sapti diknong oh kat han guroh yahwimur daham tit dikwi mar saptimur. Ihat nitat dahat ma sapti han guragur Nohe ma ihat sapat da moh yah hat sapatwa daham gorhe ma dahat sapat danong hat orhorwi sashenmur.  
\v 6 Got oh nitat dik natip ma hapat daham ma ihat sapti han guroh Got orhe danong ham ihat saptimur. Ti den ti den moh gonsi yahwiwa daham ma dapti han gurhe amaru hat orhor Got orhe danong ham weso por ihat saptimur. Mama den moh na dapti denmur rim ma na dapti han bap gurhe amaru hat orhor Got orhe danong ham weso por ihat saptimur.   
\p
\v 7-8 Mohnong dahenmur. Gin mama mihat pati oh diradire danongwi hat indinmat mihat patida. Basra. Hanipyah Krais orhe han dir ohoh ihan orhe amam hat pat danong hatinmat gin mama ihat pati ohmur. Ma hapuriptihe diradire danong hatinmat hapuriptida. Basra. Orhe han hat pati dir ohoh ihan orhe hrepnong ham orhe amam hat pat danong hatinmat hapuriptimur.  
\v 9 Ma ihapti oh oh Gin ma pati iresi hapuripti iresi noh pokwi ire Hanipyah titwi hatiprohmur rim hapura dire Hanipyah titwi ham mashupmur. Ihtip ohoh ihan dire gin mama patio hapuriyao oh orhe danongwi hat indinmat ihat patimur.   
\p
\v 10 Diradir gonsi Got orhe kintei oh tandeitperhan orhor nasam Go er hat pat hanhe. Go yah hat pat hanhe napor nasatipramur. Orhor imat nasatipra ohoh ihan gur Moh er hat sapat hanmur por dasei maro hapri.  
\v 11 Got oh gonsi dirnong nasam inahatipramur ritporhan ma brak matpa meng oh mamaru hat patmur.  
\q1 Hanipyah norhor da dipwi patru pat han ohoh ihan norhe napotiproh meng moh arpin meng napotiprohmur. Kuuhan gonsi guroh norhornong Hanipyah gorhorwimuro napotinmat oh gur katin takir tongnom Hanipyah gorhor pokwimur napor armi nahaprimur.  
\m ritporhan brak matpamur.  
\v 12 Ihtin han ohoh ihan ma brak matpa mengru mat orhor gonsi dir diradire ma ihashe menghe orhornong diradir gonsi nitat potiprimur.   
\s1 Arwananah ire da mutuh ma Got orhe pat danong oh aer matipri ritip ohe meng oh  
\p
\v 13 Got orhorwi gonsi dirnong imat nasatipra ohoh ihan guragurhe Go er hat pat hanmur por sapri. Ihan gur mamaru hat dahat patenmur. Noh arwananah ihir ambir tem royao sareng put teinong ham tapayao hapririm noh ihirnong ihtin er da na pinggiprohmur dahat patenmur.  
\v 14 Noh Hanipyah Jisas ohsi tap hat patin orhor am nahatporhan noh mama meng moh am ham dahapatmur. Erer ma gonsi dapti ohe pe oh Got orhe kintei er hat na sapti ma hapat dahapatmur. Tit han tit Mama han moh awam na dapti hanmur ripathanoh ama han orhe boknong ohwi awam han hat patmur.  
\v 15 Noh ihat dahapat orhor ire Ama han oh awam na dapti hanmur pot papatnong oh gur ire kintei oh dapri. Dayahanoh orhorhe Ihir daya moh nohhe dipora rim diprohmur. Dama orhe da oh Gin noh er hah sa dahatiprohmur. Ma ihtiproh oh gur ohe danong na ham ihtiperhan orhor dam da er hatiprohmur. Gure ma ihapti da oh ama ihat pat han orhe gwemat Krais oh haputip ohoh ihan gur Dir ohe Krais ohe danong hat pat da moh sum aer matipri daham guragure Moh yahwiwa daham ma dapti den oh ire kintei oh dapri. Mandanmur.  
\v 16 Gur imat na mandama yahwiwa ma dahapti danong asoh ham tit han ohe dahat pat danong asoh aer deiyahanoh kat kuuhan ihir gurnong wanahama Gur moh aer deiyamur napotiprohe ohoh ihan gur Dir ihyahanoh tit ohe dahat pat danong asoh aer matiprohekin daham mandanmur.  
\v 17 Dir Got orhe napapindin hrepnong hat ma pati oh Moh yah tommur. Moh er tommur. Moh yah denmur. Moh er denmur ripti ohe danong hatinmat ihat patida. Basra. Duung dasi hat son ohe dao manap goshat indin ohe dao Yahsup orhe ma inahapat ohe amam danong hat son ohe dao ama isip hat pat danong oh hatinmat orhe napapat hrepnong hat patimur.  
\v 18 Krais orhe danong ham manap goshat indin ohe dao duung dasi hat son ohe dao ama danong hat patihanhe Got orhor ama ihat pati gurnong wanaham amam nahapatmur. Kuuhan ihirhe gurnong wanaham ihir yah hat pati bapmur napor amam nahaptimur.   
\p
\v 19 Manap gosham yah hat indin ohe danong asoh isip hat indinmat ihat pati ohoh ihan manap gosham yah hat indin da ohsi; Got orhe da hatin ham gospanggeit son ohe da ohsi tap mat isip mat pisapera daham ama danong oh isip mat orhor pisashenmur.  
\v 20 Erer moh gonsi dapti hanwi pat orhora; gur kat ire Mohri na dapti denmur rim ire na dapti den oh gur ire kintei dapri. Diperhan Ihir daya moh gin dirhe dipera daham dapti Epe. Gin nuhur er haya sa dahatiprohemur. Nuhur er haya sa dahatin ohe da oh ihirnong pinggim dayahan ermur. Ihan gur Nuhur dayahanoh ire mutuh ma Got orhe pat danong oh aer matipri daham den din ohe danong ham yahwiwa daham ire kintei ohri dapri.  
\v 21 Ire danong aer matin ina matin den awammur ripti apop hito wain tomo oh pathanhe gur Ire awammur rit pati den moh nuhur dayahanoh ire danong aer matiprohekin daham dapri.   
\p
\v 22 Guragure damdapat Erer moh gonsi dapti hanwi patmur ma dahapti da meng oh guragur Nohe ma dahapat dahe mihat patmur gosham guragure ihat dahapti da meng oh gosporipri. Gure ma ihat dahapti da gonsi oh Got orhe am hat pat ohe hrepnong mat mandatpora daham orhe am hat pat hrepnong mar mandanmur. Mandama guragure Nure mihat ayahan yahwa ma dahapti danong ohwi dimar patenmur. Imat dimarwi ayahanoh Noh gin nohe ma ihah moh er hah sa dahatin da oh na naham amam hat paten ohe danong ohwi nahatiprohmur.  
\v 23 Gur Noh mama den moh dehan Got ohe yaho napotiprohda da ero napotiproh daham yot da ham ihat da gapa hat pati guroh dayahanoh ama ihat dahat patimdapat de ohe pe oh komdapat gorhornong Noh gin er hah sa dahatin da oh komdapat nahatiprohmur. Diradire damdapat noh ihtipor ma dahah da moh Got oh yaho napotiprohda da ero napotiproh dahat patimdapat ihyahanoh komdapat Gin nuhur Got orhe kintei er haya sa dahaya da ohsi arpin orhe kintei er haptimur.   
\c 15  
\s1 Krais orhe dahapat da hatin hama arwananah ire danong hat patenmur ritip ohe meng oh  
\p
\v 1 Got orhe nita hat pati bap diradir kat han diroh Got oh mihat patenmur naporpat ma hapat daham kasip hat orhor patimur. Ama ihat kasip hat pati gurdapat Got oh mihat paten naporpatda da mihat na paten naporpat daham ma ire da na kasip hat pati ihirnong asoh gurdapat kapkap heisuphe deipri. Ama ihat pati ihirnong asoh yah da tei orhor kasip mar panggeim paptenmur. Ihirnong imat panggeim papti han gur guragure amam hat paten ohe danongwi hat patepri.  
\v 2 Ire dahe amam kasip hat orhorwi ha sashengwe rim ire danong ham yah mat orhorwi paptenmur.  
\v 3 Krais ohhe orhe danong na ham itap orhe danong hat ma patesuhru hat orhor gure dahe ire danong ham yah mat orhorwi panggeim paptenmur. Krais oh itap orhe danong hat ma patesuh da meng oh mamaru hat ritporhan brak matpamur. At Got gonong dasei meng ma naporipti meng oh norhe boknong naham inahaptimur ritporhan brak matpamur.  
\v 4 Rih Got ohe meng ritporhan ma brak matpa meng gonsi meng oh amrama dir da yah hat patim kasip hat orhor Orhor imat yah nahatiprawa daham minhan ha patengwe rim meng oh gonsi ritporhan brak matpamur.   
\p
\v 5 Da yah naham kasip hat orhorwi paten ohe da nahapat Got orhornong Rom gure ihat paten meng oh noh nadahandeipatmur. Ma nadahandeipat oh At Got go ihirnong Jisas Krais orhe namgitip da hatin hat susa iraire tit dawi hat paten ohe da oh apris paptenmur.  
\v 6 Tit dawi ham tit atemwi hat patimdapat nuranure Hanipyah Jisas Krais orhe itap gorhornong armi nahayao gorhe win nadaptuhuriyao naham ha napaptengwe por noh nadahandeipatmur.   
\s1 Juda hat pati hansi; Juda na hat pati hansi Got orhornong tap mat armi mar papteprimur ritip ohe meng oh  
\p
\v 7 Rom aptei Krais ohe danong hat pati bap guroh guragurnong irhaha goshat indin ohe danong hat patepri. Krais oh Got ohnong armi mar winsi mat orhorwi ha paptengwe rim nambur yah han nahat napapatru mat orhor Guragur yah han bap titwi goshat patenmur.  
\v 8 Krais orhe apris ma ihat sasuh oh Juda hat pati bap nuhurnong napanggeitin han oh aprisa rih ma awher ihirnong Got ohe rit asarisuh mengnong arpin meng mar dam matinmat apdapmur.  
\v 9 Juda na hat pati bap ihirnonghe Got orhe hinhina mar yah deipat da oh wamara orhornong ha armi matingwe rim apdapmur. Juda na hat pati bap ire Got ohnong imat armi deipri ohe meng ritporhan ma brak matpa oh tit meng oh mamaru hat patmur.  
\q1 Noh Juda na hat pati han ihirsi tap hat patim gorhornong armi naham win nadaptuhuro armi naham ga naporo nahapramur.  
\m ritporhan brak matpamur.  
\v 10 Tit han ohe rih ma brak matip menghe mamaru hat patmur.  
\q1 Juda na hat pati han bap gurhe Got orhe nita bap ihirsi tap hat guragur amam hat patenmur.  
\m rim brak matipmur.  
\v 11 Tit han ohe tit ma brak matip menghe mamaru hat patmur.  
\q1 Among among ma Juda na hat pati bap gurhe guragur tap ham orhornong armi matin ga por armi mar paptenmur.  
\m rim brak matipmur.  
\v 12 Gahan Aisaia ohe rim ma brak matip menghe mamaru hat patmur.  
\q1 Jesi ohe puh ihir tit han tit kaput tarpama Juda na hat pati han bap ire kakhan ham papindipramur. Imat kakhan hat papatin ihir Orhor yah nahatiprawa daham minhan pateprimur.  
\m Aisaia oh girim brak matipmur.   
\p
\v 13 Ama orhor yah nahatiprawa daham minhan pati ohe da ma napripat han oh Got orhorwimur. Ama Got orhornong noh Rom aptei Got orhe danong hat pati han bap gure paten meng oh nadahandeipatmur. Ma nadahandeipat oh Got go ire gorhornong Ohwi inahatin hatin hanwa dahapti ohe dap teidapat oh amam hat paten da ohsi; manap goshat yah hat indin da ohsi isip mat orhor teip mat apaptenmur. Imat teip mat apapatin gorhe Yahsup ohe kasip ohsi Orhor yah nahatiprawa daham ma minhan pati da oh isipnap mara teip mat orhorwi apris paptenmur por noh Rom aptei Got orhe danong hat pati kuuhan bap gure paten meng oh nadahandeipatmur.   
\s1 Por oh orhe tamreindin danong amam hatip ohe meng oh  
\p
\v 14 Nohe taptem bapa. Gure ma pati oh mihat patikin dahapatmur. Guragure ma saptihe yah hat orhorwi sapti ma hapat. Guragure Got ohe mengnong ma dahaptinonghe yah hat orhorwi daham am hat pati ma hapat. Am ham ihirnong meng por am matin inasi hat pati ma hapat dahapatmur.  
\v 15-16 Noh ihat dahapat orhor nohe kat meng mama brak mat nasar moh kasip mengtei orhor nasarmur. Kasip mengtei orhor ma nasar meng moh Got orhe damdapat orhor Go Jisas Krais orhe atamreindin han hat patim Juda na hat pati han ire mutuh sus hanat bok han hatin hat patim norhe yah meng moh pot pisashenmur napor kis nahat napapat hano rim kasip mengtei napor gure danong napamsapatmur. Imat ma meng napot napisapat moh Got orhe Yahsup oh Juda na hat pati bap gurnong Got orhe ongengnap han bap nahat napapatin Got gwemur por erer oh apriperhan orhor amam hapatru hat orhor gurnonghe imat orhor ha amam nahenoh rim noh mama meng moh gurnong naporpatmur.   
\p
\v 17 Noh Krais orhorsi tap hat patim orhe kasip ohsi Got orhe atamreindin oh yah hat orhor atamreipato rim norhe ama ihat atamreipat danong oh amam hapatmur.  
\v 18 Noh wannong tamreindin meng oh na ritiprohmur. Noh Krais orhe kasip orhorsiwi Juda na hat pati gurnong meng naporo norhe ihat ma napapat da oh namgimo nahatporhan gur amram meng dindeipti ohe penong ohwi noh amam ham Krais orhornong armi matiprohmur.  
\v 19 Noh ihtin da ma namgipat oh hanip dire na imtin hatin hano Got orhe kasipnong am hatin ohe kasip hano oh Yahsup orhe kasip ohsi inahatporhan imat pitap teinong mar namgim atamreipatmur. Imat Jerusarem apteidapat Krais ohe meng oh pot pisusa mong mutuh ohe aptei aptei gonsinong oh meng pot pisusa Iririkam mong kotipmur.  
\v 20 Noh imat meng oh pot ma aptei aptei oh pisapat oh noh Krais ohnong hanhan hat pati bap ihirnongwi meng pot pisapora daham ihirnongwi meng pot pisapatmur. Krais ohnong hanhan hat pati ihirnongwi meng pot ma pisapat oh kat han ihir tit susa ap tam ohe tan mat gonot mandatiri tei noh it tei hatporim ha us hatin hat na sapatmur. Norhe ma sapat oh norhor ap tam gonomo hamo hatinmat norhor ihat sapatmur.  
\v 21 Nohe ihat ma Krais ohe yah meng oh pot pisapat oh meng rim ma brak matpa meng oh dam ha timdinoh rim noh ihat mama sapat ohmur. Ama meng oh mamaru hat patmur.  
\q1 Oh ihtin han hat patmur ritporhan na amrat pati ihirhe orhe ma ihat pat danong oh wamar am hatiprimur. Ama meng na amrat pati bap ihiroh amram am hatiprimur.  
\m rim brak matpamur. Imat rim ma brak matpa mengru hat orhor noh na amrat pati han ihirnongwi meng pot pisapatmur.   
\s1 Por oh Spen mongnong sonmat noh Rom aptei pati gurnong wanaham apripramur ritip ohe meng oh  
\p
\v 22 Noh na amrat pati han ihirnongri meng pot pisapora daham nohe ma ihat sapat mohoh gure patinong kapkap aprin mandap oh gaheinahat hatin napaptesuhmur.  
\v 23 Ginnong oh ama ihat pati han ire apteinong sonhe timbas ohoh ihan noh rih orhor Noh sus ihirnong wamtipraneng dahat patesuh da oh gin arpin Rom aptei pati gurnong wanaham apripramur dahapatmur.  
\v 24 Wanaham ma apripra oh noh Spen mongnong sonmat oh gure pati kat apripramur. Apris gursi diradir gar dik tit atei indiprimur. Patemo hama nohe dahe yah hamo hama gur nohe Spen mongnong son mandap oh napanggeimo hatperhan noh sapramur.   
\p
\v 25 Noh kimsi apris ihtipramur. Gin noh Jerusarem ap mutuhnongri saprohmur.  
\v 26 Jerusarem ap mutuhnong ma saproh oh Got orhe nita kuuhan bap Masedonia mongo Akaia mongo ma pati ihir Got orhe nita bap Jerusarem ap mutuh ma pati ihir erer oh hatip hat patio rim ma atiri mani mohri noh apisaprohmur.  
\v 27 Ire imat ma atiri oh iraire damdapat orhor ihirnong panggeitpera daham yah da tei orhor mani oh atirimur. Imat mani ma atiri oh yan hat hatin hat patimdapat atirimur. Yan hat hatin hat patimdapat ma atiri oh Got orhe yah da oh Juda hat pati bap ihirnongri apriporhan ihirdapat Juda na hat pati Masedonia mongo Akaia mongo ihirnong apriptimur. Apriperhan ihir Dirnong Got ohe yah da oh napripti ma hapat. Ire ma napripti oh dir yan hat hatin pati ohoh ihan dirdapat it ina tei ohe panggeitin ohe erer oh apripera daham mani oh atirimur.  
\v 28 Imat ma atiri mani oh noh pisusa gonsi apripat Spen mongnong sonmat gure pati kat oh apripramur.  
\v 29 Gure pati kat ma apripra oh Krais orhe dir kasip goshat yah hat indin ohe da oh isipnap napin pat da ohsi hat apripra ma hapat dahat patmur.   
\p
\v 30 Nohe taptema. Gur amratin. Diradire Hanipyah Jisas Krais ohsi tap hat patim orhe Yahsup oh dirnong hinhina gosham gospanggeit indin da napin pato rim noh gurnong kasip mengtei napotiprohmur. Gur nohnong Got oh napanggeit napapten ohe meng oh norhe kasip hat Got ohnong dahandeipatru mat orhor gurhe imat orhor nadahamar paptenmur.  
\v 31 Nadahamar papten meng oh mamaru mat nadahandeinmur. Got go Por oh Jerusarem ap mutuhnong ma saproh oh Got gorhe meng ma na amrapti Judia mong ma pati han ire bes teinong matipririm Got go ire besnong arahmat paptenmur. Arahmat papatim gorhe nita kuuhan bap ihirnonghe Por oh ire ma atiri mani oh pisus apriporhan ihir Epe. Nuhurnong mama mani moh kianorim natiri dahatipririm Wes natiri daham amam ham ha datingwe rim gur ire imat datin ohe meng oh adahamar paptenmur.  
\v 32 Nadahamar paptin Got orhor Gin ire patinong ha sonoh dahahhanoh noh amam hat orhor aprisa diradir pan inasi gosham indiprimur.  
\v 33 Gin manap gosham yah hat indin ohe dasi nahapat ohe duuptei han Got gorhor ihirsi tap hat patenmur por nadahandeipatmur. Arpinwa.   
\c 16  
\s1 Rom ap mutuh Got orhe nita bap sios gonsi ihirnong Gurhe sa yah hat pati por brak atip ohe meng oh  
\p
\v 1 Gin diradire kor taptem Pibi uh sios bap Senkria aptei ihirnong panggeim tamreipat kuu uhmur. Ihan gurhe Ihat pat kuu ma hapat daham amburinmur.  
\v 2 Ama ihat pat kuu uh apriporhan gur Got orhe nita dirdapat Hanipyah orhe atamreipti kuuhan ihirnong ma amburiptiru mat orhor uhnonghe imat orhor ambutpera daham ambutinmur. Ambura uhe datin han tit hatip hat pathanhe gur Mauh Got orhe nita ihirnong panggeio Por ohnong panggeio hapat kuu ma hapat. Ihan dir panggeitper daham panggeinmur.   
\p
\v 3 Nohsi tap hat Got ohe atamreipti kuu gamin Prisirasi; Akwira ihit gaminnong Por oh gut gaminnong dahatahat hangwermur potinmur.  
\v 4 Ama kuu gamin ihit kat han ihir nohnong niyarit haputiprarim ihit gamin nohe haputin mandap oh ihit tare nahat napapteshemur. Inahat ma napapteshenong oh nohwi weso na porpatmur. Juda na hat pati sios kuuhan gonsi ihirsi ihitnong Wes Por ohe haputin mandapnong agaheimat papteshe rima weso poriptimur.  
\v 5 Ama kuu gamin ite ap ma sios bap ihir tarmur rotu hapti kuuhan gonsi ihirnonghe sa yah hat patio rim dahatahat hangwermur potinmur.  
\p Norhe yah han bopor mat pat han Epinitas ohnonghe Oh sa pato rim dahatahat hangwermur potinmur. Ama han oh Esia mong oh ohri kopenat orhor Krais ohwi inahatin hatin hanwa dahatip han ohmur.   
\p
\v 6 Kasip hat tamreim napanggeipat kuu Maria uhnonghe Uhhe sa yah hat pato rim dahatahat hangwermur potinmur.   
\p
\v 7 Norhorsi tap bap Juda bap kuu gamin ma nohsi tap hat karapus hat pateshe Andronikassi; Junias ihithe sa yah hat patio rim dahatahat hangwermur potinmur. Nohe ma Krais ohwi inahatin hatin hanwa ma dahatip oh komdapatmur. Ihitri ama danong oh hatpamur. Ama ihitnong oh aposer ihir winsi mat papti yot ihitmur.   
\p
\v 8 Amprietas oh Hanipyah ohsi tap hat pat hano rim nohe yah han bopor mat pat ohnonghe dahatahat hangwermur potinmur.   
\p
\v 9 Nohsi tap hat Krais ohe atamreipat han Eban ohnongsi; nohe yah han bopor mat pat han Stekis ohnongsi Ihithe sa yah hat patio rim dahatahat hangwermur potinmur.   
\p
\v 10 Aperis ohe boknong ruumsup hatporhan oh Krais ohe danong hat pat ohe da oh na gapa ham kasip hat orhorwi pat han ohnonghe sa yah hat pato rim dahatahat hangwermur potinmur.  
\p Aristoburas orhorsi tap aptei pati ihirnonghe sa yah hat patio rim dahatahat hangwermur potinmur.   
\p
\v 11 Norhorsi tap gap Juda bap Herodion ohnonghe sa yah hat pato rim dahatahat hangwermur potinmur.  
\p Nasisas ohe aptei Hanipyah orhe danong hat pati ihirnonghe sa yah hat patio rim Por oh dahatahat hangwermur potinmur.   
\p
\v 12 Traipinasi; Traiposa ihit kuu yot Hanipyah ohe atamreindin oh kasip hat atamreipti kuu yot ihitnonghe sa yah hat patio rim dahatahat hangwermur potinmur.  
\p Pesis Hanipyah orhe atamreindin oh kasip hat orhor atamreipat han norhe bopor mat papat yah han ohhe sa yah hat pato rim dahatahat hangwermur potinmur.   
\p
\v 13 Rupas oh Hanipyah orhe danong hat son ohe da oh kasip hat sapat hanhe poripti han ohsi; sup uh nohnong uh nitip hatin nahat napapat kuu em uhsi ihit imannong sa yah hat patio rim dahatahat hangwermur potinmur.   
\p
\v 14 Asinkritaso Prigono Hemiso Patrobaso Hemaso ihirsi; Got orhe nita hat patim ihirsi tap hat ma pati ihirsi irair gonsi sa yah hat patio rim dahatahat hangwermur potinmur.   
\p
\v 15 Pirorogaso Juriao Neriaso Nerias ohe koro Orimpaso ihirsi; Got orhe nita hat patim ihirsi tap hat ma pati ihirsi irair gonsi sa yah hat patio rim dahatahat hangwermur potinmur.   
\p
\v 16 Krais orhe nita bap sios gonsi aptei aptei mama pati bap ihiroh gurnong dahataptimur potinmur ritperhan noh mama brak nasar ohmur.  
\p Got orhe rim ma ongeng tahat pati bap ire tuhup gosham amam goshaptiru hat orhor gurhe wanggosham ihat tuhup gosham amam goshenmur.   
\s1 Got ohe nita gurnong er da napris er nahatipririm yah hat patenmur potip ohe meng oh.  
\p
\v 17 Nohe taptem bapa gur amratinmur. Sios bap gurnong er naham katket nahat napisusa Krais orhe yah meng ma napotpanong oh amkara er da teinong pranahat napisapti han bap ihirnong inin hat patim kom asar mandanmur. Ire tapnong hathe patepri.  
\v 18 Ama ihat pati han bap ihiroh Hanipyah orhe danong hatinmat na ihapti han bap ihirmur. Iraire ina teimdapat er da tarpam tohormi tahat son ohe danong hat sapti han bap ihirmur. Ama ihirdapat Nuhurnong er nahatin han bap ihat apripti ma hapat ma na dahat pati ihirnong oh ambar yah meng tei pora gapa mar wan mandapnong pramat pisapti han bap ihirmur.  
\v 19 Gurnong oh ihat na pati han bap gurmur. Gure ma pati oh Got ohe yah mengnong amram kasip hat orhor dindeipti han bap gurmur. Gure ma ihat pati mengnong oh Got orhe nita bap aptei aptei pati bap ihir amram Ihir ihat pati ma hapat daham am hat patimur. Nohhe gure ma ihat kasip hat patinong oh amrama noh Gur ihat patio rim noh amam hat patmur. Ama ihat pati kuuhan gur yah danong am ham dakuu hat orhorwi ha sashengwemur. Dakuu hat susa er danong oh na kis taham hanhan hat ha patengwe daham mameng moh gurnong napormur.  
\v 20 Ihat sayahanoh manap gosham yah hat paten dasi nahapat Got orhor kimsi orhor er han Satan ohnong ambapte mar gure hrepnong matipramur.  
\p Gin Got gorhe damdapat orhor Noh ihirnong imat yah matpora ma dahapat da oh ihirnong apris pomat paptenmur por nadahandeipatmur.   
\s1 Kat sios ihirdapat Rom aptei pati sios ihirnong kapkep matpa ohe meng oh  
\p
\v 21 Nohsi tap hat tamreipat han Timoti oh gurhe sa yah hat patio rim dahatahatporhan noh mama gurnong brak mat nasar ohmur. Norhorsi tap bap Juda ihirhe Rusiaso Jesono Sosipatao ihirhe gurnong Ihirhe sa yah hat patio rim dahatahatperhan noh mama brak mat nasar ohmur.  
\v 22 Por oh meng ritporhan nohe bes tei abrak deipat han Tetias noh diradire Krais orhe tapnong hat pati bapo rim noh Gurhe sa yah hat patio rim noh mama brak nasar ohmur.  
\v 23 Nohnong nambur napapao Sios gonsi bap ihirnong yah mar papao deipat han Gaias ohhe gurnong Ihirhe sa yah hat patio rim dahatahatporhan noh gurnong mama brak mat na sar ohmur. Mama ap mutuh han ire mani itperhan wamat pat han Erastas ohsi diradire taptem Kwotas ihit gurnong Ihirhe sa yah hat patio rim dahatahatperhan noh mama brak nasar ohmur.  
\v 24 Gin Got gorhe damdapat orhor Noh ihirnong imat yah matpora ma dahapat da oh ihirnong apris pomat paptenmur por nadahandeipatmur. Arpinwa.   
\p
\v 25 Nohe yah meng napot napisapatru hat orhor Got ohhe inahat orhor kasip nahat napapten han Got orhormur. Nohe ma napot napisapat meng oh Jisas Krais orhe yah meng orhor napot napisapatmur. Ama napot napisapat yah meng oh rih orhor treman patesuhru patesuhmur. Gahan ama ihat treman patesuh meng oh Got orhor pitap teinong mar papatmur.  
\v 26 Pitap teinong mar ma papat oh rih orhor patesuhru patru patepra Got oh Propet ihirnong rit asarpat meng moh kaput among among pati kuuhan bap gonsi ihir ha amratingwe rim pitap teinong matipramur. Pitap teinong matporhan ihir amram am hama arpinhe daham sa dindeipri daham reman paptesuhmur. Reman paptesuhdapat gin pitap teinong matporhan orhe ma dahatipru gin among among pati kuuhan ihir gonsi amrama am haptimur.  
\v 27 Ama ihat patesuhru patru patepra Got oh orhor pokwimur. Orhorwi dakuunap han Got oh orhorwimur. Ama ihat pat Got ohnong Jisas Krais ohe dap teidapat dipdipwi armi mar papten Got oh orhor pokwimur. Arpinwa.