\id REV - Oksapmin NT [opm] -Papua New Guinea 1992 (web version -2014) 
\h Erer tarpatipra 
\toc1 Komdapat erer ma tarpatipra ohe da oh Jon ohnong ma pinggitip ohe meng oh 
\toc2 Erer tarpatipra 
\toc3 Ere 
\mt1 Komdapat erer ma tarpatipra ohe da oh  
\mt2 Jon ohnong ma pinggitip ohe meng oh  
\ip Mameng rim ma brak matip han oh Jon oh tom goh mong Patmos mong oh karapus hat patin Got oh kinpitap hatin mat ohnong pinggitporhan mameng moh brak matipmur. Ma brak matip meng oh Satan oh Hanipyah orhe nita bap dirnong er nahapat moh Got orhor orhe kasip ohsi ohnong ambapte mar timbas matipra ma hapat daham kasip hat ha patengwe rim mameng moh brak matipmur.  
\c 1  
\p
\v 1 Jisas Krais oh Komdapat ma tarpat sasipra ohe meng oh Jon nohe kinteinong pitap matporhan noh mama brak dei ohmur. Nohe kinteinong ma pitap matir oh Got ohdapat Jisas ohnong pinggitirmur. Pinggitporhan Jisas ohdapat Got ohsi pati han enser ihir tit han ohnong pinggitirmur. Ohnong pinggim darhetporhan ohdapat orhe atamreipat han nohe kinteinong pitap matirmur. Nohe kintei ma pitap matir oh Got oh kapkap arpin tarpatiprawa ma dahah da oh orhe atamreipti han bap gurnong namgitinmat nohe kinteinong pitap matirmur.  
\v 2 Nohe kinteinong ma pitap matir ohe meng oh arpin tarpatipra mengo rim gonsi mama brak mat nasarpat ohmur. Nohe kinteinong ma pitap matir ohe meng oh Got ohe mengsi; Jisas Krais orhe arpin meng ma naporpat mengsi nohe kinteinong pitap matir mengo rim noh mama brak mat nasar ohmur.  
\v 3 Noh Got orhe meng napotporhan mama brak dei meng moh ohe tarpatin dik oh kakduup hah ohoh ihan hanip ire kintei mama meng sapti han gur amamsi han gurmur. Mama mengnong amram ma dindeipti han gurhe amamsi han gurmur.   
\s1 Got oh dipdipwi patru patepra hanmur rim Jon oh brak matip ohe meng oh  
\p
\v 4 Gin Jon noh Esia mong ohe beshei aptei Got ohe nita bap sios gurhe sa Yah hat patio rim mama brak mat nasar ohmur. Got rih patesuhru ginhe patru apripra Got oh orhe da orhor Imat yah matpora dahapat dasi; manap hat paten dasi hat sa napaptepra. Yahsup oh Got ohe tongnot pat gwar rum mutuh pat Yahsup oh beshei aptei sios ihirnong kasip mat papat ohe Yahsup oh orhe da orhor gurnong yah nahapat dasi; manap hat paten dasi nahat sa napaptepra.  
\v 5 Jisas Krais Got ohe meng dason teiwi ripat han ohri duuptei masas pip han aw pe mong pe moh ohe kakhan ire duupteinap hat pat han Jisas oh orhe da orhor gurnong yah nahapat dasi; manap gosham yah hat paten dasi sa nahat napaptepra.  
\p Dir er nang ohe natpat pat hrepdapat hat patin Jisas oh bopor nahat napapatdapat dire danong ham hapura ama er nangnong orhe heim ohsi arpit namdatipmur.  
\v 6 Arpit namdama dirnong gin gurnong Got orhe hanat bok han bap nahahmur. Nahama ama inahah han bap gursi; norhorsi dir ihirnong paptemo Got ohe atamreindin oh atamreiyao hen han bap nahahmur napor ihat paten han bap kis nahat napapatmur. Ihtin han bap nahat napapat ohoh ihan dir Orhe kasip ohsi ha napaptenoh rima orhe winnong dipdipwi adaptuhur paptiru hat orhor paptenmur.   
\p
\v 7 We. Oh rian tap apir hatin hapatmur. Apirit guragure kin wamtiprimur. Ma wamtipri oh bestop hanatsi ma sutpa hano aw pe mong pe ambap ambap ihiro gonsi wamtiprimur. Wamara guragure rangrang teinong bes pungpung pora da er ham yimtiprimur. Arpin iham tarpatipramur. Arpinwa.   
\p
\v 8 Hanipyah Got oh Nohri patesuhru patru ihat orhorwi patepra hanmur ginaporpatmur. Ama ginaporpat Got oh orhorwi duuptei kasipnap han rih patesuhru ginhe patru apripra han ohmur.   
\s1 Got ohe Yahsup oh Jon ohe mutuhnong isip hatporhan Jisas ohnong wamtip ohe meng oh  
\p
\v 9 Noh guragure nita Jon noh brak mat mama nasar ohmur. Diradir Jisas ohe nita bap dir Got orhe napapindin hrepnong hat pati bap dirmur. Ama ihat pati han dirnong be han ihirdapat Jisas ohe nita hat pati han bap ma hapat daham ina ruumsup napriptimur. Ina ruumsup diradir titwi daripti han dirmur. Ina ruumsup napripti orhor Jisas orhe tapnong hat pati ohoh ihan dir na gapa ham kasip hat orhorwi saptimur. Noh Got ohe mengsi; Jisas ohe arpin meng ma napor mengsi pot pisapatin ama ohe pe oh ihir nohnong inahama tom goh Patmos mongnong nang natpam namdatpamur.  
\v 10 Nang natpam atei namdatperhan gahan Hanipyah ohnong rotu deipti dik oh Got ohe Yahsup oh nohe mutuh isip ham kasip nahatporhan noh amraoh nohe kom dah moh tom san akitwi pong por meng deiptiru hat meng napor hangop.  
\v 11 Gorhe ma wamtiproh han oh wamara brak matinmur. Brak mara Epesas apteio Sumerna apteio Pergamam apteio Taiataira apteio Sardis apteio Piraderpia apteio Raodisia apteio ama beshei aptei Got ohe nita bap Sios ihirnong adarhetinmur napor hangop.   
\p
\v 12 Napor hahhan nih ginaporpat rim wamtiporim tamburkes rim wandeioh tanggam has mara ohe bas saripti kwei gor ohsi dar hatpa beshei gwar oh patingopa.  
\v 13 Ama beshei gwar ire mutuh oh hanip hatin tit patgop. Watah gon gurus dap tit ara gor kweisi ahep nang tan hatin hatpa tan oh atoheitem mutuh moh an patgop.  
\v 14 Ohe kak bathe nameinap hatin hama rian gon hatin hangop. Ohe kinhe irat has hatin hah hangop.  
\v 15 Ohe tonghe bras kwei hirmat sariya kakeir hatin ham irat tei temtiperhan har hama mianpang hatin hat manda hangop. Orhe menghe tom isip ha kur hatin ham hangop.  
\v 16 Ohe bes oper tandapathe oh beshei merum marin patgop. Atem kat moh bior tansi tansi gret matpa hatin kot patgop. Orhe rumkinhe mongsut atan isip ma heit pat hatin heit manda hangop.   
\p
\v 17 Ihat pathan noh wamara kin porper hatin ham ohe tong duup oh or wandasa hapur ina hatin hat mandatip. Hapur hatin hat patin orhe bes oper tan ohsi nohe inanong moh namrima Go kas hatipra. Nohri patesuhru patru ihat orhorwi patepra hanmur.  
\v 18 Da dipwi pati ohe da duuptei oh norhorwimur. Noh haputip orhor gin mama da pat oh patru dipdipwi patepramur. Noh hanip hapuriya dao hapur sus da pati apo norhorwi wamat papat hanmur.   
\p
\v 19 Go gin ma wamtiproh oh gin orhor ma tarpatiproh ohsi; kaput ma tarpat sasipra ohsi tap mat wamtiprohmur. Ihan gwe ma wamtiproh han oh gonsi tap mat brak matinmur.  
\v 20 Gwe nohe bes oper tan beshei merum marin patin ma wandeio tanggam has mara ohe bas saripti gwar gor kweisi hatpa beshei gwar ma wandeio ama wandei ohe mengnong oh treman pat meng ohmur. Ma treman pat meng oh mamarumur. Beshei merum oh Got ohe nita bap beshei sios ihirnong wamat pati han enser bap ihirmur. Beshei gwar oh ama Got ohe nita bap beshei sios ihirnongmur napongop.   
\c 2  
\s1 Epesas aptei sios ihirnong brak mat atinmur potip ohe meng oh  
\p
\v 1 Naporpat Gin go Got ohe nita bap Epesas aptei sios wamat papat enser ohnong mama meng moh brak mat atinmur. Beshei merum oh bes oper tandapat marim ao tanggam has mar itin ohe gor kweisi hatpa beshei gwar ire mutuh tandeit uso apiro hapat han norhe mengmur. Ihat pat han norhe meng moh Epesas aptei sios wamat papat enser ohnong brak mat atinmur napotporhan noh ama han orhe meng oh mama brak mat nasar ohmur.   
\p
\v 2 Orhordapat gure orhe nita hat patim ma ihat saptinong oh orhor am hat patri. Gurnong ma am hat pat oh gure kasip ham tamreiptio gure ina ruumsup daripti orhor na gapa ham kasip hat ma saptio oh orhor am hat patri. Gure kasip ham ma tamreipti oh mamaru hat tamreiptiri. Er hat sapti han ihirnong Er hat sapti han gur matei na indiprohemur por er mat darheriyao kat han ihir Nuhur Got ohe meng pot pisapti han rim dasuh nahatperhan gur dason mar Maihir dasuh han ihirhe daham am hayao ham kasip ham ma tamrein saptinong oh orhor am hat patri.  
\v 3 Ihirdapat Maihir Jisas ohe nitao rim ina ruumsup nahapti orhor gure na gapa hama kasip hat orhorwi pati oh orhor am hat patri.   
\p
\v 4 Gur ihat yah hat sapti orhor tit ma ihat saperhan ohe ma na amam hapat da oh mamaru hat patiri. Gur kopenat ma orhe nita ham isip bopornap mar ma pateshe da oh gin mandatiriri.  
\v 5 Ihan gur guragure isip bopornap mar ma papteshe danong oh it dahatinri. Dahama Epe. Dir arpin er hatiri sa. Ihan dir gin mama ihapti da oh mandatpera. Mandama rih orhe da orhornong it dimtipera daham dimtinri. Na ihyahan oh gure tanggam has mar saripti gwar oh orhe pat tei oh na pat hatiprari. Orhor apris datiprari.   
\p
\v 6 Ihtin orhor tit gure yah hat saperhan orhor amam nahat ma pat da oh mohri. Kat han gurdapat kat han ihirnong Nikoras ohe er hat sasuh ohe danong hat sapti bap maihir er hat sapti bap ma hapat. Ihan dir er hat sapti han bap maihirnong mandatpera daham dasei mar mandaptiri. Gure ma dasei mar mandapti da oh ohdapathe imat dasei mar papatri. Ihan gure ma ihapti oh yahri.   
\p
\v 7 Hanip nat temsi gur Yahsup ohe sios gurnong naporpat meng moh amratinri. Er danong gure merwi mar suya han gurnong oh Got ohe aptei yahnap rang ru mutuh ohe eimat paten dasi nahatin ohe irat gwe oh gurnongwi Dina napotiprari. Ihtiprio rim noh Epesas sios gurnong mama brak mat nasar ohmur.   
\s1 Sumerna aptei sios ihirnong brak mat atinmur potip ohe meng oh  
\p
\v 8 Gin tit meng moh go Got ohe nita bap Sumerna aptei sios wamat papat enser ohnong mama meng moh brak mat atinmur. Nohri patesuhru patru ihat orhorwi patepra hanmur. Ihtin han noh haputip orhor it da apris pat han norhe meng oh Sumerna aptei sios wamat papat enser ohnong brak mat atinmur napotporhan noh ama han orhe meng oh mama brak mat nasar ohmur.   
\p
\v 9 Orhordapat gure orhe nita hat patim ma ihat saptinong oh orhor am hat patri. Gurnong ina ruumsi nahat napapti dao gure borop han hatin hat pati dao oh orhor am hat patri. Orhor wanahah oh kakdah moh borop han hatin hat pati orhor Got orhe kinteinong oh erer ruumsansi hat pati han bap gurri. Juda hat pati han kat han ihirdapat Nuhurwi Juda bap hat patimur rim gurnong dasuh naham dasei meng naporiyao hat ma sapti oh orhor am hat patri. Ama dasuh nahat napisapti bap ihir arpin Juda bap hat pati basri; ihir Satan ohe nita han bap hat patim ginaporiptiri.  
\v 10 Gur ama ina ruumsup ma daripri oh gur kasa hamhe mandam sasipriri. We. Gur dahatinri. Satan ohe mengtei gurnong kis naham kat gurnong Jisas orhe nitao rim karapus nahayao niyao nahatipriri. Nahatperhan gur ama ohe ina ruumsup dat patina kathei dah timdipriri. Ihtin ohoh ihan gure nohe danongwi hat pati danong oh mandatipriri. Niyarit hapurhanhe yahwa. Nohe Jisas ohe danong ma hat pat da moh na mandatiprohwa dahatwi patenri. Ihapti han bap gurnong ama ohe pe yan oh eimat paten ohe da napriprari.   
\p
\v 11 Hanip nat temsi gur Yahsup ohe sios gurnong naporpat meng moh amratinri. Er danong gure merwi mar suya han gur oh komdapat hapur it eimat dar patepri batbet ma hatipri oh gurnong ama ohe batbet oh na datipriri. Ihtiprio rim noh Sumerna sios gurnong mama brak mat nasar ohmur.   
\s1 Pergamam aptei sios ihirnong brak mat atinmur potip ohe meng oh  
\p
\v 12 Gin tit meng moh go Got ohe nita bap Pergamam aptei sios wamat papat enser ohnong mama meng moh brak mat atinmur. Bior tansi tansi gret mat patsi han norhe mengmur. Ihat pat han norhe meng moh Pergamam sios wamat papat enser ohnong brak mat atinmur napotporhan noh ama han orhe meng oh mama brak mat nasar ohmur.   
\p
\v 13 Orhordapat gure orhe nita hat patim ma ihat saptinong oh orhor am hat patri. Gure aptei oh oh am hat patri. Satan oh duuptei han hat pat apteiri. Ihtin aptei orhor Jisas orhe danong hat ma pati han gur Nuhur Satan gwe han basmur. Nuhurri Jisas orhe nita bap nuhurmur riptiri. Gure orhe danongwi ma kasip hat pati oh orhor am hat patri. Gur orhe danongwi kasip hat patin Antipas ohnong Jisas ohe danongwi ham ohe meng pomat pot pisapat hano rim ohnong Satan ohe napapat aptei oh sutperhan gur na gapa hama orhe danongwi kasip hat patiri.   
\p
\v 14 Gur ihat yah hat sapti orhor tit ma ihat saperhan ohe ma na amam hapat da oh mamaru hat patiri. Guragur kat han ihir rih ma patesuh han Baram ohe ma risuh mengnong amram dindeiptiri. Dasuh propet Baram ohdapat er hat son ohe da oh kakhan Berak ohnong pinggisuhmur. Berak ohdapat Isrer ihirnong ama er da oh pinggisuhmur. Ma pinggisuh oh bisei saw hapti dao hanapsup ihirnong atemar asariya den oh yahwimur. Denmur porin ohe dao oh pinggisuhmur.  
\v 15 Amaru hat orhor guragur kat han ihir Nikoras bap ire er meng ripti danong oh dindeiptiri.  
\v 16 Ihan gur ihapti ohoh Epe. Nuhur er hat sapti sa dahama mandatinri. Na ihyahanoh oh gin orhor apris ama han gursi; ohe atem kat ma bior kot pat ohsi gusutipriri.   
\p
\v 17 Hanip nat temsi gur Yahsup ohe sios gurnong ma naporpat meng moh amratinri. Er danong gure merwi mar suya han gurnong oh Got orhe aptei ma namdipra den oh hanip na wandeipti den oh namdiprari. Namdem has kwei kor tei kopen ohe win nitat nasara napriprari. Napriporhan ama napir han guragur nitat winwi am hatipriri. Ihtiprio rim noh Pergamam sios gurnong mama brak mat nasar ohmur.   
\s1 Taiataira aptei sios ihirnong brak mat atinmur potip ohe meng oh  
\p
\v 18 Gin tit meng moh Go Got ohe nita bap Taiataira aptei sios wamat papat enser ohnong mama meng moh brak mat atinmur. Got ohe brer oh norhormur. Norhe kin oh irat has hatin hat pat han norhormur. Norhe tong oh bras kwei hirmat sariya kakeir hatin hapat han norhormur. Ihat pat han norhe meng moh Taiataira aptei sios wamat papat enser ohnong brak mat atinmur napotporhan Jon noh ama han orhe meng oh mama brak mat nasar ohmur.   
\p
\v 19 Orhordapat gure orhe nita hat patim ma ihat saptinong oh orhor am hat patri. Gure da gosapripti dao orhe danong hapti dao hanip panggeit sapti dao ina ruumsup nahatperhan na garhapti dao ama ihapti danong oh orhor am hat patri. Kopenat ma ihtipa da orhor gin atnap isip mat pisaptio rim orhor am hat patri.   
\p
\v 20 Gur ihat yah hat sapti orhor tit ma er hat saperhan ohe ma na amam hapat da oh mamaru hat patiri. Kuu tit Jeseber uh Noh Got ohe meng pot pisapat kuumur napor er hat son ohe dasuh meng oh napot napisaporhan gur baso na por uhe mengnong ma amrat sapti oh oh da ruumsupsi hat patri. Uhe er hat son ohe dasuh meng napot ma napisapat oh mamaru mat napot napisapatri. Jisas orhe atamreipti han ihirnong bisei saw hapti dao hanapsup iremur por den temar asariya den oh yahwimur. Denmur porpat dao ada ohsi ihirnong er hat son da pinggit pisapatri.  
\v 21 Ama pinggit pisapat ohe da oh uh de dik oh ama er danong kom asar mandatipra rim orhor wamat patri. Wamat patin uhe bisei saw hat er hat ma sapat da oh Nohe ma ihat sapat da moh na mandaproh dahat sapatin oh am ham wamat patri.  
\v 22 Ihat na mandaproh ma dahapat ohe pe oh urhornonghe oh sutiprari. Ma sutipra oh urhe basnong ina ruumsup mar amkatiprari. Amkarpat uhsi ma bisei saw goshat sapti han ihirnonghe uhsi ma ihat sapti da oh na mandayahanoh ama ohe pe oh ihirnongsi tap mat batbet ruumsup isip matiprari.  
\v 23 Mara urhe brer ihirnonghe sutporhan haputipriri. Imtiporhan Got ohe nita aptei aptei sios bap gur amrama am hapti Watina. Hanipyah orhor diradire mutuhdapat ma dahapti da oh gonsi orhorwi am hat pat han ma hapat dahatipriri. Ihat dahat pat han ohoh ihan guragure ma ihat sapti ohe pe kis yan oh napriprari.   
\p
\v 24 Taiataira aptei kat kuuhan gur Jeseber urhe er hat sapat danong dindeipti orhor kat kuuhan gur urhe er hat sapat danong na dimara kat ihir Satan ohe mutuh awam mengnong amram ma dindeipti awam meng oh gur na amraptiri. Ihapti gurnong oh oh ina ruumsuphe gure boknong ti na nahaprari.  
\v 25 Mameng morhorwi napotiprari. Guragure ama ihat pati da morhorwi kasip hat patin orhor apriprari.   
\p
\v 26 Er danong gure merwi mar suma orhe dahat pat danong ham dindeiptiru mong pepe dik ma timbas hatipra dik oh imat orhor dindeipti han gurnong oh aw pe mong pe han ambap ambap ihirnong gure hrepnong namtiprari.  
\v 27 Ma namtipra oh orhe itap oh han ambap ambap ihirnong orhe hrepnong ma matipru gurnonghe imat orhor gure hrepnong namtiprari. Namtiporhan gur kaw kasipsi papti hatin hat pati han bap ohoh ihan gure hrepnong ma namtipra bap ihirnong gurdapat tom san haptor mat sariya ohe tan mar haptor mat tam tambor mat itipriri.  
\v 28 Imtiperhan kutwi yinggarheis ma marapat han hatin has oh napriprari.   
\p
\v 29 Hanip nat temsi gur Yahsup ohe sios gurnong ma naporpat meng moh amratinri. Ihtino rim noh Taiataira aptei sios gurnong mama brak mat nasar ohmur.   
\c 3  
\s1 Sardis aptei sios ihirnong brak mat atinmur potip ohe meng oh  
\p
\v 1 Gin tit meng moh Go Got ohe nita bap Sardis aptei sios wamat papat enser ohnong mama meng moh brak mat atinmur. Got ohe Yahsup oh beshei aptei sios ihirnong kasip mat papat ohe Yahsupo merum beshei marin pat hano norhe mengmur. Ihat pat han norhe meng moh Sardis aptei sios wamat papat enser ohnong brak mat atinmur napotporhan Jon noh ama han orhe meng oh mama brak mat nasar ohmur.  
\p Orhordapat gure orhe nita hat patim ma ihat saptinong oh orhor am hat patri. Kat han ihirdapat Gurnong wanaham Maihir yah hat sapti bapmur naporipti orhora; gure da mutuhdapat oh er hat sapti han bap hat patiri. Ihat ma sapti ohe da oh haputpa da hatin hat patiri.  
\v 2 Gure Got ohe danong hat ma sapti da oh Got orhe dahat pat danong orhor wanahah oh akap mat pisaptiri. Ihan gure yah hat ma sapti ohe da oh eimat timbas hatipririm masasa guragure yah hat sapti ohe danong oh kasip ham dimtinri.  
\v 3 Ihan gurnong rih napotporhan ma amratpa meng orhor it dahama Epe. Nuhur er hat sapti sa. Ihan mama er hat sapti da moh mandatpera daham mandapti rih ma amratpa meng orhor pomat dimtinri. Gur masas na ihyahanoh orhor gapah han hatin hat apris gure na dahat pati dik oh buporinsi naham inahatiprari.   
\p
\v 4 Gure ma yah hat sapti oh mamaru hat saptiri. Uut han Sardis aptei pati uut han gur guragure watahnong na sirapsi mar ongeng mat pisaptiri. Ama guroh guragure yah hat sapti ohe pe oh watah has nameinap hatin ara orhorsi paten inasi hat pati gur ohoh ihan watah has nameinap hatin ara orhorsi patepriri.  
\v 5 Er danong gure merwi mar suya han gur ire ma hatipriru hama watah namei hatin andipriri. Anperhan eimat paten dasi paten ohe brak tei win ma natip oh oh na nabohotiprari. Na nabohoma itapo ohsi pati da enser bapo ire kintei gure winnong oh natiprari.   
\p
\v 6 Hanip nat temsi gur Yahsup ohe sios gurnong ma naporpat meng moh amratinri. Ihtino rim noh Sardis aptei sios gurnong mama brak mat nasar ohmur.   
\s1 Piraderpia aptei sios ihirnong brak mat atinmur potip ohe meng oh  
\p
\v 7 Gin tit meng moh Go Got ohe nita bap Piraderpia aptei sios wamat papat enser ohnong mama meng moh brak mar atinmur. Got ohe danongwi duut pat han arpin han norhe mengmur. Noh Depit oh Jerusarem ap mutuhnong orhe hrepnong mat paptesuhru nohhe kopenohe Jerusarem ap mutuhnong hatin ohe ki oh norhor marin patmur. Norhor marin pat ohoh ihan ap nadapuhanhe it ap nataputin ina hat ma pat han oh nih. Ap natapurhanhe han it ap nadaputin ina hat ma pat han oh nih. Timbasnapmur. Ihat pat han norhe meng moh Piraderpia aptei sios wamat papat enser ohnong brak mat atinmur napotporhan Jon noh ama han orhe meng oh mama brak mat nasar ohmur.   
\p
\v 8 Orhordapat gure orhe nita hat patim ma ihat saptinong oh orhor am hat patri. Gure kasip oh gar hat pat orhor orhe mengnong dimtin ohe dao orhe danong hat pati ohe dao oh na mandaptiri. Kasip hat orhor patiri. Orhor am hat patri. Gur dahatinri. Gure tamrein son kat oh orhor ap gwatei ohe tan nadaput patri. Ma nadaput pat kat oh it nataputin ina hat pat han nih it nataputiprari. Timbasri.  
\v 9 Gur dahatinri. Kat Juda hat pati han ihirdapat Nuhurwi Juda bap hat patimur rim dasuh meng riptiri. Ama ihir Satan ohe nita bap ihirri. Ama dasuh meng ripti han bap ihirnong oh orhor arpin Juda han Got orhe nita bap gure hrepnong namtiprari. Namtiporhan ihir nuhurnong gin ire hrepnong nahah ma hapat daham gure tong duup oh katin takir tongnotipriri. Tongnopti Gurnongwi orhor arpin bopor nahat napapat han gurmuro napotipriri.  
\v 10 Gurnong rih ma Gure boknong ina ruumsup apirhanhe gur kasip hat orhor patenmur ma napotip meng orhorwi gur dindeipti ohoh ihan ina ruumsup mong mong oh gonsi kis mat ma pisapra dik oh gurnong er nahatipra rim orhe doho dahnongwi naham napapindiprari.   
\p
\v 11 Oh kapkap orhor apriprari. Orhor kapkap aprin tei ohoh ihan gure ma yah hat sapti ohe yan oh wan ihir nagatmara nadatipririm ama yah hat sapti ohe da oh kasip hat orhor patenri.  
\v 12 Er danong gure merwi mar suya han gurnong oh orhe Got ohe ap yawar orhe kasip tam nahatiprari. Nahatporhan wan teinonghe na hama ama ap yawar orhorwi patiru patepriri. Ama ihtipri han bap gurnong Moh Got orhe nita bap ma hapat ha dahatingwe rim gure ina boknong oh Got orhe wino Got orhe hrep papat Jerusarem kopenohe aptei aw teidapat kakdahnong ma wandapra aptei wino Jisas orhe kopenohe wino oh gure ina boknong mar nabrak matiprari.   
\p
\v 13 Hanip nat temsi gur Yahsup ohe sios gurnong ma naporpat meng moh amratinri. Ihtino rim noh Piraderpia aptei sios gurnong mama brak mat nasar ohmur.   
\s1 Raodisia aptei sios ihirnong brak mat atinmur potip ohe meng oh  
\p
\v 14 Gin tit meng moh Go Got ohe nita bap Raodisia aptei sios wamat papat enser ohnong mama meng moh brak mar atinmur. Noh arpin mengwi ripat han ohoh ihan noh Got ohe meng oh pomat ripat hanmur. Got ohe erer ma darpatip oh nohsiwi darpatipmur. Ihat pat han norhe meng moh Raodisia sios wamat papat enser ohnong brak mat atinmur napotporhan Jon noh ama han orhe meng oh mama brak mat nasar ohmur.   
\p
\v 15 Orhordapat gure orhe nita hat patin ma ihat saptinong oh orhor am hat patri. Gur er dasi; yah da ite mutuh oh patima da oh tit ohe boknong tit ohe boknong ma hapti da oh orhor am hat patri. Ihan gur er danong hatpero dahayahanhe adanongwi ha hatingwe dahat patri. Yah danong hatper dahayahanhe adanongwi ha hatingwe dahat patri.  
\v 16 Gur ihat na patem mutuh hat ma pati oh den gandut por dasei mar mandaptiru nahatiprari.  
\v 17 Gur Nuhur kamah han hat patim erer oh hatip hatinhe hatip hathe na patimur. Yah hatwi patimur ripti orhor basra guragur borop han hama kin upsi hat ayao ina bokwi hat ayao hat patin hinhin kamaharasi han bap hat patiri. Gure isip ma ihat pati oh guragur hanhan hat patiri.  
\v 18 Gur ihat patio rim oh mama sawa meng moh naporpatri. Gur arpin kamah han bap hatinmat oh orhe gor kwei temtiperhan gornap orhap hatip gor oh mohotinri. Watahhe has nameinap hatin oh mohoma wanahatipririm ina bokwi hahram hat pati oh andinri. Kin watahatinmat hamha kaker tom gap oh dara kin hirmatinri.   
\p
\v 19 Brer ihirnong da adason matinmat ma suptiru orhe bopor nahat napapat gurnong oh da nadason mar inahapatri. Ihan inahah ma hapat daham er hat sapti da oh mandama yah hat sapti da oh pomat dimtinri.  
\v 20 Dahatinri. Oh ap gwatei kat oh maraporim kang kang napora meng naporpatri. Ihan mengrim hahhanhe gur amram adapuyahanoh oh maraprohri. Marasa ama han gosi tongnoma gut den damo ihat patepriri.  
\v 21 Er da ma gure merwi mar suya han gurnong oh orhe tongnoma napapat tei oh Diradir tap ham tongnom papinper napotiprari. Orhe merwi mar suma itap ohe tongnom napapat tei oh orhe itap ohsi ma tap hat tongnotipru hat orhor gurnonghe Diradir tap hat tongnotpera. Tongnoma diradir tap ham hanip ihirnong papinpera napotiprari.   
\p
\v 22 Hanip nat temsi gur Yahsup ohe sios gurnong ma naporpat meng moh amratinri. Ihtino rim noh Raodisia aptei sios gurnong mama brak mat nasar ohmur.   
\c 4  
\s1 Got orhornongwi armi maro haptin wamtip ohe meng oh  
\p
\v 1 Gahan noh ihpat wandei wandein aw tan mahat ron kat oh tanpur hangop. Tanpurhan rih tom san akitwi pong por meng deiptiru hat ma meng napor han orhor it meng tit napor hangop. Mon go manong marona. Marasa komdapat ma ihapra oh namgitiprohmur napor hangop.  
\v 2 Napotporhan Got orhe Yahsup oh nohe mutuh isip naham kasip nahama kapkap orhor nohnong it nambura naprungop. Napruporhan noh watahahoh aw tei mahat pat has ringop. Aw tei mahat pathe daham wandeioh kakhan hama ohe tongnom ihirnong wamat papat ap tan oh pat hangop. Pathan ama ap tan tei oh han tit tongnot patgop.  
\v 3 Tongnot pat han ohe rumkin oh kwei kasip yahnap jaspa kwei daharan hip hatin haho konirian kwei gihirgwe hatin haho ihat ohe rumkin oh kakeirsi hat patgop. Pathan tom hip emerar kwei hapen ina hatin tom hip oh orhe tongnot pat tei oh rupmar kak tahat patgop.  
\v 4 Patgopa; orhe tongnot pat teinong oh kakhan ire tongnopti tei 24 tongnopti tei oh ohnong parper mat paptingopa. Parper mat paptihan han pohon ihirhe 24 han ihir watah nameinap hatin aripti kakunghe hanipyah ire aripti kakung gor kweisi hatpa kakung ara tongnot patingopa.  
\v 5 Ihat pati ire mutuh ma pat han ohe ap tan amdapat amsama has haho meng sinisinse riya hatin hayao minggihim haho hapatgop. Orhe rumkin dason oh beshei tanggam oh has hat patingopa. Ama beshei tanggam oh beshei aptei sios ihirnong kasip mat papat ohe Yahsup ohmur.  
\v 6 Tit orhe rumkin dason ma pat hatip oh tom sor hru tan oh tom kakeir hatin hat patgop.  
\p Gahan kat dah kat dah ohnong ma parper mat papti hatpa oh hatriphei dasi bap ire ina bok oh kinwi hatpa bap oh parper mat paptingopa.  
\v 7 Ama hatriphei bap ire rumkin oh nitat rumkin bap hangopa. Tit ohe rumkin oh raion ire rumkin hatin hat patgop. Tit ohe rumkin oh burmakau ire rumkin hatin hat patgop. Tit ohe rumkin oh hanip dire rumkin hatin hat patgop. Gahan tit ohe rumkin oh buhor putei mahat sapat han ohe rumkin hatin hat patgop.  
\v 8 Ama hatriphei bap ire kaspas oh dopheisiwi hangopa. Kinhe ina gonsi moh kinwi hangopa. Ama ihat pati bap ihir mong da timbas kwitem timbas ihir dipwi mutuh tongnot pat han ohnong  
\q1 Hanipyah Gota. Kasipnap han rih patesuhru patru ihat patepra han go ongengnap yahnap hat pat hanmura; yahnap hat pat hanmura  
\m ga tei poriptiru pot orhorwi haptingopa.   
\p
\v 9 Ama dasi bap hatriphei ihir mutuh ap tan ma tongnom papat han da dipdipwi pat han ohnong has yahnap hanmur porin ohe gao armi mat papten han ohe gao weso por papten han ohe gao ama ga oh poriptingopa.  
\v 10 Potperhan 24 han pohon ihirhe Mutuh ap tan ma tongnot pat han moh da dipdipwi pat han moho daham ohe duup oh bos hamnong ham armi deiptingopa. Armi mara iraire kakung an pati oh dapera ohe rumkin dason oh sariptingopa.  
\v 11 Sara  
\q1 Hanipyah nure Got go erer gon moh gonsi go nadarpatip hanmuro. Gorhorwi dahatporhan erer moh tarpatip oh gin mama pat ohmuro. Gorhorwi ihtin han ohoh ihan gorhornongwi has yahnap hanmur naporin hano armi nahen hano kasipnap hanmur naporin hano oh gorhor pokwimuro  
\m poriptingopa.   
\c 5  
\s1 Brak tein matpa gon bok ma wamtip ohe meng oh  
\p
\v 1 Gahan noh wandeioh mutuh ap tan ma tongnot pat han oh orhe bes oper tan oh brak tein matin gon bok tit marin patgop. Kat dahdapat kat dahdapathe brak matpa bok tit marin patgop. Marin pat oh be han ihir dapetipririm beshei gata gap ohsi kasip matpa bok oh marin patgop.  
\v 2 Marin pathe daham wandeioh Got ohsi tap hat pat han enser kasipnap han tit kasip mengtei Wo. Wo. Han nih ongeng tahat patdapat gata moh emara brak moh dapetin ina hat pato rit ungop.  
\v 3 Rit utporhan ama brak oh dapem satin han tit aw tei mahat ma Got ohsi tap hat pati hano kakdah mama pati hano haputpa ire pati mong tem hrep maham ma pati hano ihir ama brak oh dapem satin han ihir ti na pati hangopa.  
\v 4 Na patihan ongeng tahat patdapat gata gap moh emara brak moh dapem satin han tit na pat moho daham noh ruumsan yimtip.  
\v 5 Yimtiporhan han pohon maihir tit We. Go yimapra. Wamtin. Juda bap ire kasip han raion hatin hat pat han Depit ohe puh ohdapat mahaw ihirnong ambapte matir ohoh ihan ohwi gata gap emara dapetin ina hat patmur napongop.   
\s1 Jon oh sipsip bap wamaro hatip ohe meng oh  
\p
\v 6 Gahan noh wandeioh mutuh ohe ap tan tongnoma ihirnong ohe hrep papti ohe ap tan tei oh sipsip bap tit tandeit pat hangop. Oh mutuh tandeit pat hangopa; hatriphei dasi bapo han pohono ihir ohnong parper mat paptingopa. Sipsip bap ma tandeit pat hatip oh inamdapat sutpa han orhor pat hangop. Orhe kak tei ambah hatin oh beshei hangop. Kinhe beshei kin hangop. Ama beshei kin oh beshei aptei sios ihirnong kasip mat papat ohe Yahsup Got oh aw pe mong pe ma darhetip Yahsup ohmur.  
\v 7 Ihat pat han sipsip bap oh susa ap tan mutuh tongnot pat han ohe bes oper tan brak tein bok oh oh daringop.  
\v 8 Datporhan hatriphei dasi bapo 24 han pohono ihir sipsip bap orhe danong hama orhe hrep oh bos hamnong hangopa. Ihir nitat gita hatin ros hatin oh marin ayao gor kweisi hatpa dis oh nitat marin ayao hat pati hangopa. Dis ma marin pati hatpa oh Got ohe rum tem ha ronoh rim gapgwesi han ma atendeishe ohe gapgwe han oh dis dah oh teip mar marin patingopa. Ama gapgwe han dis dahnong mar ma marin pati hatpa oh orhe nita han bap dire Got ohsi mengripti ohe gapgwe ohmur.  
\v 9 Ama ihir bos hamnong hama kopenohe ga tit riptingopa. Kopenohe ga tit ma ritpa oh mamarumur.  
\q1 Gonong nitpawa; Gonong nitpawa. Nitperhan gwe heim oh tanduketipwa; tanduketipwa. Tandukera ama heim ohsi kakdah han ihirnong amohotipwa; amohotipwa. Ihir Got ohe nita ha hatingwe rim amohotipwa; amohotipwa. Han ambap ambap amohotipwa; amohotipwa. Han ameng ameng nitatsi han amohotipwa; amohotipwa. Ina nitasi han amohotipwa; amohotipwa. Mong mong nitatsi han amohotipwa; amohotipwa. Gowi ihtin hanmura; ihtin hanmura. Ihan brak tein bok oh gowi datin hanmura; datin hanmura. Dara gata emtin hanmura; emtin hanmura.  
\v 10 Ihirnong dire Got ohe nita bap matipwa; nita bap matipwa. Iham ihirnong gorhorsi tap ham kat han ihirnong papindin han matipwa; papindin han matipwa. Mara Got ohe hanat bok han matipwa; hanat bok han matipwa. Imtip han ihir kakdah mong ohe kakhan hatipriwa; kakhan hatipriwa  
\m ihat ga rim armi deiptingopa.   
\s1 Sipsip bap taman ihitnong armi deiptin wamtip ohe meng oh  
\p
\v 11 Gahan noh wamar amraoh Got ohsi pati da bap enser ihir wanohe tam ban na satin hatin hat patim ap tan mutuh ma tongnot pat hano hatriphei dasi bapo han pohono ihirnong parper mara ga riptingopa.  
\v 12 Ga ma ritpa oh mamaru hat patmur.  
\q1 Sipsip bap mohnong sutpawa; sutpawa. Ihtin han orhorwi kakhan hatin ohe kasip datin hanmura; orhorwi datin hanmura. Orhorwi Got ohe da ohe kamah hanmura; kamah hanmura. Orhorwi dakuu hannapmura; dakuu hannapmura. Orhorwi kasipnap hanmura; kasipnap hanmura. Oh ihtin han ohoh ihan orhornongwi winsi matin hanmura; winsi matin hanmura. Orhornongwi has yahnapsi hanmuro porin hanmura; porin hanmura. Orhornongwi armi matin hanmura; armi matin hanmura  
\m por armi mara ga poriptingopa.   
\p
\v 13 Gahan noh amraoh Got ohe ma dasi matip erer oh aw tei mahat Got ohsi pati ohe dasi erero mong tei moh ohe dasi erero mong hrep ohe dasi erero tom hru tem dasi erero oh gonsi gon ihitnongwi armi mar ga poriptingopa. Ga ma potpa ga oh mamaru hat patmur.  
\q1 Mutuh ap tan ma tongnot pat hansi sipsip bap ihitnongmura; ihitnongmura. Ihitnongwi winsi matin hanmura; winsi matin hanmura. Ihitnongwi has yahnapsi hanmuro porin hanmura; porin hanmura. Ihitnongwi kasipnap hanmuro porin hanmura; porin hanmura. Ihitnongwi ihtin han ohoh ihan ihitnongwi eimat armi mar papteprimura; papteprimura  
\m por ga poriptingopa.  
\v 14 Potperhan hatriphei dasi bap maihir oh Arpinmuro potperhan ama han pohon ihir bos hamnong ham timama ihitnong armi deiptingopa.   
\c 6  
\s1 Dophei gata emtiporhan erer ma wamtip ohe meng oh  
\p
\v 1 Gahan noh wandeioh sipsip bap oh be han ihir dapem wamtipririm beshei gatasi kasip matpa gata oh tit ohri endeingop. Emtiporhan noh amraoh hatriphei dasi bap tit minggihim gurir dei hatin We. Sono pot ungop.  
\v 2 Utporhan noh wandeioh hos tohan ohe bas oh han tit tongnom sapatgop. Sapat oh dup marima hanipyah iraire kakung aripti kakungsi han tit hos bas tongnoma sapatgop. Sapat oh rih ihirnong ohe merwi mar susuh han ohoh ihan it ohe merwi mar sutinmat hos ohe bas tongnom sapatgop.   
\p
\v 3 Saporhan sipsip bap oh tipnerip gata oh endeingop. Emtiporhan noh amraoh tipnerip dasi han oh We. Sono pot ungop.  
\v 4 Utporhan hos heimsi wam irat has hatin tit pitap ham sapatgop. Ohe bas tongnom sapat han ohnong Kakdah han ihir manap dasi hat ma pati oh ha timbas hatingwemur. Ihan go wasa ihir gusum ha timbas hatingwe rim go ihirnong gusutin inasi matinmur pora gusutin inasi matin ohe kasip ohsi apriporhan sapatgop. Biorhe dapsi bior tit apriporhan marim sapatgop.   
\p
\v 5 Saporhan sipsip bap oh bimrip gata oh endeingop. Emtiporhan noh amraoh bimrip dasi han oh We. Sono pot ungop. Utporhan noh wandeioh hos kwi tit sapatgop. Ohe bas ama tongnom sapat han oh ake erwip ham den ung ka mandem mohom din ohe dason deipti han ohsi marim sapatgop.  
\v 6 Sapatin noh amraoh hatriphei dasi bap ire mutuhdapat hanip ha mengriya hatin girim hangop. We. Denhe ake erwip hat pat tei moh wit oh tit kiro orhor yan oh isip hanen pu mohoptimuro. Bari oh yitir kiro orhor yan oh isip hanen pu mohoptimuro. Ihtin orhor irat gwe gap wain daripti ohsi; irat gwe gap wer daripti ohsi er deipri gipor hangop.   
\p
\v 7 Gipotporhan sipsip bap oh hatrip gata oh endeingop. Emtiporhan noh amraoh hatrip dasi han oh We. Sono pot ungop.  
\v 8 Utporhan noh wandeioh hos argom hatin tit sapatgop. Ohe bas tongnom sapat han ohe win oh haputin han oh tongnom sapatgop. Saporhan ohe sapat pe orhor hapur sus ma pati aptei ohhe itait tap hat saptingopa. Ama yot ihitnong Gut mong mong moh yitir aptei han mandama tit aptei tit aptei han ihirnong sut pisonmuro. Sut pison oh mama gusutin supo ake erwip supo tihetin supo kot samin ire sutin supo ohsi sut pisonmuro por ihirnong ama sun ohe kasip inasi dei oh saptingopa.   
\p
\v 9 Saperhan sipsip bap oh hathat gata oh endeingop. Emtiporhan noh wandeioh han ihir Got ohe meng oh yah matwi pot pisaptin ihirnong garmar sushe han ire da oh Got ohe apop atendeipti gwar duup oh patingopa.  
\v 10 Gwar duup oh patimdapat kasip mengtei Got go kasip han yahnap ongengnap yahnap hat pat hanmuro. Go arpinnap hanmuro. Ihat pat han go desut nuhurnong ma nitpa han kakdah ma pati han ihirnong desut dahamar ama inahatpa pe batbet oh apriprao por dahandeingopa.  
\v 11 Dahamtiperhan oh watah has dapsi ti dara nitat deingop. Nitat deipat Kopenmuro. Gur ihat patina. Guragure tap tamreipti kat han ihirnonghe mahaw han ihir gurnong ma nisheru mat orhor ha sutingwe dahapatmur. Ama norhe kis mat papat han ihirnong suyarit norhor dahamar yan apripramur dahat patmur. Ihan gurhe ihat kimirit patinmuro pongop.   
\p
\v 12 Potporhan noh wandeioh sipsip bap oh dop ohe gata oh endeingop. Emtiporhan bipi isip tit sangop. Saporhan atan oh ung gate kin hatin gon hatin hangop. Hatporhan hayop ohe inahe heimsi gon hatin hangop.  
\v 13 Hatporhan merumhe irat pik gwe na wu hat patin inim aprisa ungang matporhan gwe takapot wanpatru hat merum oh tapet wandongop.  
\v 14 Tapet wanporhan aw tanhe ruprup taham suh bipnok mar tein deiya hatin bipnok tahat susa timbas hangop. Timbas hatporhan yei gonsio tom hru tei ohe mong goh kat gonsio ihir tunggosheit sus timbas hangopa.   
\p
\v 15 Ihtiporhan mong ire hrep papti kakhano duuptei hano dupsi han ire duuptei hat pati hano kamah hano kasip hano ire hrepdapat yan timbas be ma tamreipti hano be ma pati hano gonsi gon ihir wamara kas ham kwei tem mong tem tremayao yei mutuh kwei parkah tremayao hangopa.  
\v 16 Hama yeio kweio ihirnong Gur kapkap het apris namkatino. Mutuh ap tan ma tongnot pat hansi; sipsip bap ihit wanaham nuhurnong heisup naham batbet nahatiprio. Ihan ihit wanaham nitipririm gur kapkap het apris gianaham namkatino.  
\v 17 Ite bopor heisup isip nahatin dik gin tarpa moh han nih kasip ham pat hatiproho. Ihan kapkap het apris gianahatino rit ngangangopa.   
\c 7  
\s1 Jon oh inim apat ayao hanip kinbi tei abrak deiyao haptin wamtip ohe meng oh  
\p
\v 1 Ihama timbas hatporhan gahan noh wandeioh hatriphei Got ohsi pati da enser bap ihir mong tan tei ohom tit da oh mahan pedapat tandeit patgop. Tit da oh mahan pedapat tandeit patgop. Tit da oh kat ohe gatgat mahan pedapat tandeit patgop. Tit da oh kat gatgat mahan pedapat tandeit patgop. Ihat tandeit pati da ire pati kat oh inim oh aprisa mongo irato tom hruo ihirnong er matipririm ihir inim mandap apat patingopa.   
\p
\v 2 Gahan noh wandeioh it Got ohsi pati da ihir tit han atan marapat katdapat apripatgop. Apripat oh kuuhan ihir wamara Moh dasi patru pat Got orhe nita ma hapat ha dahengwe rim ire boknong abrak matin han oh marim apripatgop. Apris hatriphei Got ohsi pati bap maihirnong Got oh mongo tom hruo ihirnong er matin ohe kasip oh apriporhan kopen na mamen mat patin gin ihir er matiprohekin daham  
\v 3 ihirnong kasip mengtei We. Kopen ohoh gur er matipri. Dire Got ohe atamreipti nita bap ire kinbi tei abrak matin oh kopen ohoh ihan gur mongo irato tom hruo ihirnong kapkap er matipri. Abrak deiyarit ihirnong er matinmur kasip mengtei gipot uangop.  
\v 4 Utporhan abrak matperhan noh amraoh Got ohe nita bap kinbi teinong abrak matinsi ma pati ihir 144,000 ihirmuro rim hangop. Ama 144,000 ihir Isrer ohe nathei brer ire puh ihirmur.  
\v 5 Juda ohe puh ihir 12,000 ihirnongwi abrak matinsi patimur. Ruben ohe puh ihirhe 12,000 ihirmur. Gat ohe puh ihirhe 12,000 ihirmur.  
\v 6 Asa ohe puh ihirhe 12,000 ihirmur. Naptari ohe puh ihirhe 12,000 ihirmur. Manasa ohe puh ihirhe 12,000 ihirmur.  
\v 7 Simion ohe puh ihirhe 12,000 ihirmur. Ripai ohe puh ihirhe 12,000 ihirmur. Isakar ohe puh ihirhe 12,000 ihirmur.  
\v 8 Seburun ohe puh ihirhe 12,000 ihirmur. Josep ohe puh ihirhe 12,000 ihirmur. Benjamin ohe puh ihirhe 12,000 ihirmur. Got ohe nita kinbi tei abrak matinsi han ihiroh ama ihirwimur.   
\s1 Kuuhan isip tit tarmur Got ohnong armi deiptin wamtip ohe meng oh  
\p
\v 9 Ihat mandatporhan noh wandeioh kuuhan wanohe tam ban na satin hatin ban tit tarmut mandaya hangop. Ama ihir aw pe mong pe among among ina nitatsi han bapo ambap ambap bapo among among nitatsi bapo ameng ameng nitatsi bapo ihir watah has dapsi ara gaku rin tan marima mutuh ap tan tongnot pat hansi; sipsip bap ite rumkin dason oh tarmut mandaya hangop.  
\v 10 Tarmuripti kasip mengtei  
\q1 Dirnong napapindin ap tan tei tongnot pat han dire Got ohsi; sipsip bap ihitwi nambura yah nahatin inasi nahatin han yot oh ihit pokwimuro  
\m kasip mengtei gipongopa.  
\v 11 Gipotperhan han pohono hatriphei dasi bapo ire komdah oh Got ohsi pati da enser bap gonsi ihir tandeim ihirnong parper mat patingopa. Ihat parper mat patimdapat ohe hrep napapindin ap tan ohe duupnong ham bos hamnong ham timama Got ohe danong ham armi deingopa.  
\v 12 Ma armi matpa oh  
\q1 Ire ma giporiya oh arpinnap mengmuro. Diradire Got oh orhorwi dakuunap hanmuro. Orhorwi kasipnap hanmuro. Oh ihtin han ohoh ihan orhornongwi armi mar papten ohe dao orhornongwi has yahnap hanmur por papten ohe dao orhornongwi Weso por papten ohe dao orhornongwi win isipsi mar papten ohe dao orhornongwi kasipnap hanmur por papten ohe dao ada orhorwi patru eimat patepra hanmuro. Arpinwa  
\m por armi deingopa.   
\s1 Watah has dapsi an patin Jon oh wamtip ohe meng oh  
\p
\v 13 Gahan han pohon ihir tit han tit Jon nohnong Watah has dapsi an patisi moh de han ihira. Ihir de aptei han ihira napora dahanahangop.  
\v 14 Dahanahatporhan noh ohnong Hanipyaha. Nohri hanhan hat patmur. Gorhor am hat patmur potip. Potporhan oh Maihir iraire mahaw han ihir ina ruumsup isip tit apriya orhor ihir Jisas orhe panggeitin ohe kasip ohsi na gapa ham kasip ham yah hat ma pati han bap ihirmur. Ire watah has dapsi mohhe sipsip bap ohe heim ohsi gahmara ongeng mar has mar mama an pati han ihirmur.  
\v 15 Ihir ihat pati han bap ihir ohoh ihan Got ohe tongnom napapat ap tan rum dason moh tandeima kwitemhe timbas mong dahe timbas dipwi Got ohe ongeng tahat pat ap yawar moh atamrein mama pati ohmur. Ihapti han ihir ohoh ihan Got orhor mutuh ap tandapat tongnot patim orhor ihirnong wamat papatru imat orhor paptepramur.  
\v 16-17 Imat papatin sipsip bap mutuh ap tan duup ma pat han oh ire saham papat han oh pisusa tom uuptem tom marapat tom oh ihir damwi ha patengwe rim pinggipramur. Pinggipatin ihirhe dipwi dam saya apriya ham yah hat orhorwi pateprimur. Indipra ohoh ihan ihir pahoh timbas tom din timbas atan haro irat haro ihir ire boknong batbet matin timbas hat pateprimur. Ihir ihat patin Got oh kin tom agatmaro ham imat ihirnong paptepramur napongop.   
\c 8  
\s1 Sipsip bap ohe pepe bes gata emtip ohe meng oh  
\p
\v 1 Gahan sipsip bap oh pepe bes gata oh endeingop. Emtiporhan aw tei moh erer oh meng timbas ham kimirit mandangop. Kimirit patemo hama  
\v 2 noh it wandeioh Got ohe kintei oh pohon Got ohe meng pisaya popriya hapti beshei enser ihir tomsan pong poripti hatin beshei apiroh nitat marin patingopa.  
\v 3 Marin patihan Got ohe meng pisaya popriya hapti enser ihir tit aprisa gor kweisi hatpa san Got ohnong gapgwesi matin ohe san oh marim aprisa Got orhe pohon atendeipti gwar duup oh tandeit patgop. Tandeit patin Got oh Gin go nohe nita bap ire nohsi ma mengriya ohe meng oh gapgwesi han mohe tapnong mara natemtinmur. Ma natemtiproh oh apop ma natendeiptiru mat orhor norhe tongnom napapten ohe rum dason gor kweisi hatpa pohon natendeipti tan tei moh natemtinmur pora ohe bes teinong mar gapgwesi han ruumsan apingop.  
\v 4 Apriporhan Got ohe nita bap ire mengriya meng ohe tapnong mara atemtiporhan ama ohe tuhup gapgwe oh enser oh marin pat bes tei amdapat Got ohe rum temnong gapgwe oh ropatgop.   
\p
\v 5 Gahan enser oh apop atendeipti tei ohe irat hur oh deima gapgwesi san dahnong saripti san dahnong mara teip mara tahe pora kakdahnong ohom deingop. Matporhan awnari hatin kuro minggihim puro amsama has haho hama bipi tit apingop.   
\s1 Hatriphei enser ihir pong poripti han oh meng matperhan wamtip ohe meng oh  
\p
\v 6 Gahan ama beshei enser Got ohe meng pisaya popriya hapti ihir tom san pong poripti san oh meng matperim ihangopa.  
\v 7 Ihapti tipan enser ohri meng deingop. Meng deioh aw gweo heim haso oh duket kakdahnong deingop. Kakdahnong matporhan mongo irato oh tit dus taurpat yot dus mandapat ihat orhorwi gonsi mong mong taut sangop. Unuho kot ohe hapen ha mongo taut orhorwi sangop.   
\p
\v 8 Gahan tipnerip enser oh pong poripti han oh meng deioh has oh yei isip gon hatin tahe pora tom sor hru dahnong matporhan het wangop. Waporhan tom oh tit dus heim tanwi has yot dus tom yah gap has ihatwi sangop.  
\v 9 Ama tom hru heimsi hah dus ohe dasi han ma pat erer oh gonsi haput sangopa. Ama heimsi hah dus ohe sip ohhe gonsi turkat sus timbas hat sangopa.   
\p
\v 10 Gahan bimrip enser oh pong poripti han oh meng deioh merum isip oh tanggam has hatin hat tapet kakdah wangop. Wasa sapat tomo marpat uuptemo oh tit su yot manda mat pisangop.  
\v 11 Ama merum ohe win oh irat gap ator hatin merummur. Ihtin merum oh tom ma su oh ator gapsi tom orhor hat sangop. Ihtin tom hat saporhan ihir diperhan kat han ruumsan ihir haput sangopa.   
\p
\v 12 Gahan hatrip enser oh pong poripti han oh meng deioh atano hayopo merumo ihirnong sungop. Sutporhan ihir tit aua na has haya yot aua has haya hat sangopa.   
\p
\v 13 Ihtiporhan wandeioh ner buhor isip tit putei mahat ut apingop. Epo. Epo. Yitir enser ire ma pong por meng matipri oh kakdah han bap gurnong hinhinsi naham nitin han oh ha tarpatinoh rim meng matiprimuro. Ihan kakdah han bap gur kamahara hinhinsi han baprano. Epo rit ut apingop.   
\c 9  
\s1 Hathat enser oh pong poripti han meng matporhan tarparit wamtip ohe meng oh  
\p
\v 1 Gahan hathat enser oh pong poripti han oh meng matporhan noh wandeioh merum tit tapet wasa kakdah pat hangop. Patin tanggap ditinhe timbas ohe tanggap tem daputin ohe ki oh apingop.  
\v 2 Apriporhan oh dara tanggap tem apat pati oh dapus potporhan tuhup isip rang andoriya hatin tuhup kwi tuhup isip tit marasa atano mong dao moh kwi deingop.  
\v 3 Kwi matiporhan tuhup mutuh amdapat pri ban wanohe pri ban ihirnong tohah ire hanip supti ohe kasip ohsi matporhan ihir kakdah ohe mong teinong wangopa.  
\v 4 Ihirnong Gur irato unuho irat beko ama erer ihirnongri gur sum er deipri. Hanip ire kinbi teinong Got ohe win timbas ma pati bap ihirnongwi sunmur.  
\v 5 Sutinnong oh sein matinmat basmur. Be batbet mat paptina hanen hayop sa sutipra pora ama ohe batbet matin ohe kasip ohsi matporhan ihir mong teinong wangopa. Ama batbet oh tohah ire ha nit pati ohe batbet hatin ohmur.  
\v 6 Batbet mat paptin orhor hanen hayop ma sutipra oh han ihir Dir haputiprohenengo dahapri orhora; haputin mandap oh meih pat ohoh ihan haputinnong oh na haputiprimur.   
\p
\v 7 Ama pri ban ihiroh gusutinmat hos ihirnong namya hatin ara mamen deiptiru hat patingopa. Kakhe duupteinap han ire gor kweisi hatpa kakung aripti hatin hat an patingopa. Rumkinhe hanip ire rumkin hatin hat patingopa.  
\v 8 Kak bathe kuu ire kak bat dap muk hatin hat patingopa. Gahe kotwa raion ire ga hanat rara hatin hat patingopa.  
\v 9 Rangrang tanhe kapa hatin hatpa namya hatin an patingopa. Ire kaspas menghe hawer wih ire tandeim saya kaspas meng hatin hangopa.  
\v 10 Ire weimhe tohah ire hanip supti ambah hatinsiwi hangopa. Ama ohsi hanip ihirnong sum batbet mat orhorwi paptin hayop hanen sutin inasi dei hangop.  
\v 11 Ire duuptei han ihirnong ma papat han oh er enser tit ohmur. Oh ditin timbas tanggapnong wamat pat han ohmur. Ohe win oh Hibru ire mengtei Abadon poriptimur. Grik ire mengtei Aporion poriptimur. Aporion ma poripti oh hanipo erernong oh timbas deipat han poripti han ohmur.   
\p
\v 12 Buhor oh yitir er sup oh tarpam kakdah han ire boknong ham hinhinsi hatiprimur ma ritir oh tit timbas hahmura; yot ma hinhinsi hatiprohe oh kopen na apin patimur.   
\s1 Dop enser oh ire pong poripti han oh meng matporhan wamtip ohe meng oh  
\p
\v 13 Gahan dop enser oh pong poripti han oh meng matporhan noh amraoh Got orhe pat rum dason gor kweisi hatpa gwar tan katpe ka yotdapathe mengir katpe ka yotdapathe mengir ham hangop.  
\v 14 Ma mengritip oh dop enser ohnong Gin go meng pisaya popriya hapti er enser yotayota ihirnong Yupretis win isipsi tom duup ma nang atpat pati ihirnong arpit mandatinmuro por hangop.  
\v 15 Ama er enser yotayota han ihirnong Got oh Yupretis tom duup oh nang atpat papatmur. Nang atpat ma papat oh kaput norhe dahat pat dik oh hatporhan Gin dop enser go sus ihirnong arpit mandatinmur potporhan oh arpit mandatporhan ihir susa tit han suya yot han mandaya hat sa sapri daham nang atpat papatmur. Ihat daham papatdapat gahan ama ihat son ohe dik oh hatporhan ama dop enser ohnong gin arpit mandatina potporhan arpit mandangop.   
\p
\v 16 Gahan noh amraoh Gusun han bap ihir hos bas tongnom mamen tahat pati han ihir tom dinin ban na satin hatin 200 mirionmuro rim hangopa.   
\p
\v 17 Gahan noh tei patin orhor kinpitap hatin mat wandeioh hos ohsi; hos ire bas tongnot pati han ihirsi pati hangopa. Ire rangrang tan namya hatin ma an pati oh gih hatino awkwitam tan hatino hop ina hatino ihtin han an patingopa. Ama hos ire kakhe kotwa raion ire kak hatin hangopa. Ihtin han ire atem kat oh irat haso tuhupo hanip er nahatin ohe er gwe tuhupo ihir tap hat orhe atem kat oh maraptingopa.  
\v 18 Marasa ama yitir er sup ihir kuuhan ihirnong tit suya yot mandaya mat pisangopa.  
\v 19 Hos ire weim oh inapawam bok hatin kaksi hat patingopa. Ama katpe katpe kak yot ihit hanip sum batbet matin inasi kasip hama sut pisaptingopa. Sut pisaperhan hapungopa.   
\p
\v 20 Ama yitir er sup ire ma yot mandaya tit suya ma hayanong oh na sum ma mandaya han ihirdapat wandeipti Epe. Dire ma hanip kaksi mengriyao kweisi mengriyao ma hat sapti moh dir er hat sapti sa. Ihan dirri moh mandatper na daham na mandatin ina hangopa. Tamam ire duuptei han ohnong armi deiyao ketsup mongsup ama sup bap ihirnong armi deiyao ama ihtin danong na mandatin ina hangopa. Dire Gotmur por gor kweio sirpa kweio bras kweio be kweio irato ohsi iraire bes tei manhepti ama kin timbas nat tem timbas buh timbas ama ihtin da timbas bap ihirnong Moh dire dasi Gotmur por armi deipti danong oh na mandatin ina hangopa.  
\v 21 Ihir iraire amkimon hatin ohe dao tamam hatin ohe dao hanip sutin ohe dao bisei saw hat son ohe dao gapah hat son ohe dao ama da oh na mandatin ina hama ihat orhorwi patepera daham ihat orhor marin angopa.   
\c 10  
\s1 Jon ohe brak tein gar ma dip ohe meng oh  
\p
\v 1 Gahan noh kakdahdapat patim wandeioh enser kasipnap tit aw teidapat kakdahnong moh wanpatgop. Ohe ina bok moh rian gonwi tein taham ara kak moh atan hip porper tahat mandama wanpatgop. Rumkinhe atan has hapatgwer hatin has hat mandangop. Buhhe irat has hama ap tam hatin hat manda hangop.  
\v 2 Ohe bes tei oh brak gar tein matin bok tit dapet marin patgop. Ama han oh wandasa buh oper tan oh sor tom hru teinong tonggandeingopa; watah tan oh mong teinong tonggandeingop.  
\v 3 Tonggamar ohe ma ur oh minggihim brak dei hatin hat ungop. Meng tit rit utporhan beshei minggihim ihir gurir mar meng tit rit ungopa.  
\v 4 Meng rit utperhan noh brak matpor ihpatin aw teidapat We. Beshei minggihim ire ma riya meng oh brak mar ritipra. Gorhe damdapat ham kimirit patenmur napor hangop.   
\p
\v 5 Ihtiporhan rih ma wandei enser orhor awam tuketinmat bes oper tan oh aw teinong mahat daptuhungop.  
\v 6 Daptuhurpat Patesuhru patru patepra Got oh aw tan mong tan tom hru darpama ama pat han erer oh darpatip hano rima orhe boknong mar awam tukermuro. Got ohe ihtipor ma dahah da oh sunhat na imtipramur. Gin orhor arpin imtiprohmur.  
\v 7 Sunhat na patema bes enser oh pong poripti han oh pong potporhan gin orhor imtiprohmur. Ma imtiproh oh Got orhe dahat patesuh da ohoh orhe damdapatwi hat pat da oh orhe meng pot pisapti han ihirnong mengwi Noh ihtipramur rim damdapat dahat patesuh da oh gin imtiprohmuro rim awam tukengop.   
\p
\v 8 Awam tuketporhan rih aw teidapat ma napor han oh it Gin go sus enser tit buh sor tom hru teinong tonggwandei tit buh mong teinong tonggwandei ma hat pat enser orhe brak dapet marin pat tein gar oh go sus datinmuro napor hangop.  
\v 9 Napotporhan noh enser ohe pat teinong susa Gin brak gar tein bok oh nohnong napina potip. Potporhan oh Yahwa. Moh dar dina. Diporhan atem teidapat ambar dason nahatiprohmura; ake mutuhdapat ake bapak nahatiprohmur napor napingop.  
\v 10 Napriporhan noh ambura dip. Diporhan atem teidapat ambar dasan nahangop. Nahatporhan gurmitporhan ake mutuhdapat ake bapak nahangop. Ma inahatip oh atem teimdapat ritin meng yah orhor ina ruumsi hatipri meng ohoh ake bapaksi nahangop.  
\v 11 Ihtiporhan nohnong Gin go Got ohe han among among pati bapo han ambap ambap ma pati hano ameng ameng nitat natip han bapo among among duuptei hat pati hano ire mutuh Got oh ihtin han tit ha tarpatinoh dahatporhan ma tarpat sasipra ohe meng oh it pomat potinmuro napongop.   
\c 11  
\s1 Got ohe meng pot pison han yot ite ihtiperhan wamtip ohe meng oh  
\p
\v 1 Gahan enser tit oh ap kis deipti kaw toh hatin oh Jon nohnong napingop. Naprisa Gin go susa Got ohe ap yawarsi; orhe apop atendeipti kwei tan ohsi kaw mohsi kis matinmur. Kis mara atei ma Got ohnong armi mar papti kuuhan ihirnong kinhei patio rim satinmur.  
\v 2 Kis matin oh kot ohe doho ohsi kis matipra. Kot ohe doho oh be han Got ohe tapnong na hat pati han ire ohoh ihan kis matipra. Ama ihir Jerusarem awam ap mutuh oh er mar tonggamar saya apriya haptin hayop oh 42 sutipramur. Ihan ire dohonong akis matipra. Mandatinmur.  
\v 3 Ihir er mar tonggamar saya apriya hatwi patin timori masori hat patina 1,260 dah hatipramur. Ihir ihat orhorwi patin Got oh orhe meng pot pisapti han yot ihitnong Gin gut susa norhe meng oh pot pisonmur por ihitnong imat pison ohe inasi mar darhetipramur. Darhetporhan ihir Moh ina ruumsi er nahatin ohe meng ma hapat ha dahatingwe rim ihit saheih ham watah simbap hatin mat ara susa ihirnong Got ohe meng oh poriprimur. Poriptin ama 1,260 dah oh hatipramur napongop.   
\p
\v 4 Ama yot han ihit rih irat orip yotnong paham mat ma kis matpa han yot maihitnongmur. Tanggam has mar ohe bas saripti yot oh mama han yot maihitmur. Ihit dire aw pe mong pe moh ohe hanipyah hat pat han ohe kintei mamen taham ma tandeit pati han yot ihitmur.  
\v 5 Ihitnong garmar sutper daham ihitnong sutper ihya han ihirnong oh ite atem katdapathe irat has marasa ama mahaw ihirnonghe ihitdapat andora timbas matiprimur. Ihtin han yot ohoh ihan Ihitnong imtipera ma dahapti han ihiroh irairnong timbas hatinmat imtiprimur.  
\v 6 Ihit Dit Got ohe meng pot pisapti dik moh tom wandasipra. Ihan dit tom mandapnong apatper dahayahan imtin ohe kasip ohsi pati ohoh ihan apatin hatin hat patimur. Ite tit kasip oh tom uuptem marpat tomnong oh dapurkera heim tom matin inasi hat patimur. Ite tit kasip oh Dit kuuhan maihirnong ina ruumsup mohsi sutper dahayahan ama tihan tihan ina ruumsup apin ohe kasip oh itaitsi patimur.   
\p
\v 7 Ama kasipsi han yot ihit meng poriptin kuu han ihir gon amratperhan ditin timbas tanggap mutuh pat han kurwah oh orhe ap tanggap mutuhdapat marasa ihitsi gusuma ohe merwi mara ihitnong sutporhan ihit haputiprimur.  
\v 8 Haputperhan ite sein oh itaite Hanipyah ohe irat bok sur garmar ma sutpa ap mutuh ohe mandap mutuh orhor mandatiprimur. Ama ap mutuhnong oh er apteio rim paham mengtei Sodom aptei poriyao Isip aptei poriyao haptimur.  
\v 9 Ite sein oh mandap tei patin among among ihiro ambap ambap ihiro meng nitatsi ihiro watah nitatsi ihiro gonsi kat han ihir aprisa sein yotnong oh wamat patim Gur ite sein ohri itipri por baso pora dasei mar wamat indiprimur.  
\v 10 Mong mong ma pati ihir aprisa wamara Sei haputirio rima amam isipnap tit hatiprimur. Ihama mama han yot maihit kakdah han nuhurnong ina ruumsup napripti yot moh wesnap haputirio rima ihir birhimo dawar gosapriso hama wamat patina yitir dah hatiprimur. Hapti hatrip oh katket matiprimur.  
\v 11 Katket matperhan Got oh da it pamson ohe nah oh darhetipramur. Darhera ite mutuhnong mara mimat pamsapramur rim kis mar ihitnong pamsangop. Pamsaporhan ihit it da apris tandeingopa. Tandeitperhan ihirhe ihitnong wamara kas isip tit hangopa.  
\v 12 Kas isip tit hatperhan ihit amrayaoh aw tei mahatdapat kasip han mengteiwi Gin gut marono por hangop. Potporhan mahaw ire kintei orhor rian tap aw teinong rusa ruhum mandangopa.   
\p
\v 13 Ihit ruptin orhor bipi isip tit apingop. Aprisa ama ap mutuhnong kat ap oh supat tohathei ap oh mandapat imat orhorwi pisangop. Imat pisusa ma sutip ihirnong 7,000 kuuhan ihirnong sungop. Sutporhan na su ihiroh kas isip tit hapti Aw tei pat Got oh arpin kasipsi pat hanmuro por armi deingopa.   
\p
\v 14 Tipnerip hinhinasi matin oh gin timbas hahmura; bimrip oh imtinmat kakduup hat patmur.   
\s1 Bes enser oh tom san pong poripti han pong potporhan ma tarpatip ohe meng oh  
\p
\v 15 Gahan bes enser oh pong poripti han oh pong potporhan noh amraoh aw tei mahatdapat kasip mengtei  
\q1 Gin kakdah han ihirnong ohe hrepnong mar papindin inasi hat ma pati oh diradire hanipyah Got ohsi; orhor Go ihirnong amburin hanmur por ma kis matip han Krais ohsi ihit pokwimuro. Ama yot ihit pokwi ihirnong paptiru dipdipwi papteprimuro  
\m gigosham hangopa.  
\v 16 Gigoshaptin 24 han pohon ihir Got ohe rum dason tongnopti tei ma tongnot pati han bap ihir bos hamnong ham timama Got ohnong armi deingopa.  
\v 17 Ma armi matpa oh  
\q1 Nure Hanipyah kasipnap han go patesuhru patru hat pat hanmuro. Ihtin han go gorhe kasip ohsi erer moh gorhe hrepnong gin nahah ma hapat rim nuhur gonong weso naporiyamuro.  
\v 18 Go haputpa han ihirnong dahamar satin dik hahmuro. Ihtin dik haho rim be han ihir Got oh Gin nuhurnong heisup naham nitin dik hah ma hapat daham gononghe ihirdapat heisup nahayamuro. Gin gorhe meng pot pisapti bap ihiro gorhe nita hapti bap ihiro gorhe danong ham armi nahapti bap ihiro ama gorhe natamreipti han bap winsi han bap ihirsi; win timbas han bap ihirsi ama bap ihirnong tap da yan yah mat apin dik hahmuro. Gin kakdah han bap ihirnong er da pinggit pisapti bap ihirnong timbas matin dik hahmuro  
\m pora ohnong armi deingopa.  
\v 19 Por armi matperhan aw tei ohe ap yawar oh dapungopa. Dapuyaoh Got ohe rit atporhan ma brak mar itpa san oh patgop. Pat hatporhan amsama gwaheiro minggihim gurir deio awnari kuro bipi apiro tom awgwe wandaso hangopa.   
\c 12  
\s1 Dam oh brer iman ihitnong mahaw matip ohe meng oh  
\p
\v 1 Gahan noh wandeioh kaput Mihtin han tit tarpatipramur rim wanohe na wandeipti kis tit pitap hat patgop. Ma pitap hat pat hatip oh kuu tit atan gon oh watah aripti hatin mat ara tongnopat tong oh hayop ohe basnong tonggamat patgop. Uhe kakunghe kakhan ire aripti hatin kakung nathei merumsi turhur matpa kakung oh an patgop.  
\v 2 Ihat patin brer ake sutporhan ama batbet ohsi ngangarpatgop.  
\v 3 Uh kopen ihpatin ma tarpatipra kis han tit aw tei mahat pitap hangop. Ama pitap hatip kis han oh tom hru tem pat han dam isipnap oh heimsi ina hatin hama kak oh beshei kaksi dam oh pitap hangop. Ambahhe kathei ambahsi kak tei patgop. Kakunghe kakhan ire kakung aripti hatin beshei kaknong an patgop.  
\v 4 Pat oh weim ohsi merumnong tit pet kakdahnong dei yot manda imatwi pet pisangop. Ihama brer ake supat kuu uhe duup oh uh brer sarit brer oh dat adiporim wamat patgop.  
\v 5 Wamat patin uh brer mon saringop. Saroh aw pe mong pe mong mama ihirnong ohe hrepnongwi mara kasip mengtei papten han mon oh saringop. Itporhan Got ohsi pati han ihir kapkap brer ohnong tapama Got ohe napapat aw teinong prungopa.  
\v 6 Ihtiperhan kuu mauh Got ohe hanip timbas dus mong amamen matip teinong tandungop. Tandutporhan ihir apris paptin timori masori ham orhorwi patin 1,260 dah sa hatipra dahatip teinong tandut saporhan ihir paptingopa.   
\p
\v 7 Uhnong imat paptin orhor Got ohe enser Maikero orhe hrep pati han ensero ihirsi; dam ohsi aw tei mahat tandarpama gusungopa.  
\v 8 Gusuma damo orhe hrep papat er ensero ihirnong enser ire merwi mara Gur aw tei moh na indin hatin han bapmuro pora tahe por kakdahnong moh deingopa.  
\v 9 Ama kakdahnong tapan andutpa dam oh pohon patesuh Satan ma poripti han ohmur. Oh dasuh inin meng oh dire boknong ma nahapat han ohmur. Oh aw pe mong pe mong mong moh dasuh naham er hat son dasi nahapat han ohmur. Ama han orhorsi; orhe meng pisaya popriya hapti han ihirsi tap mat kakdahnong moh tapan andungopa.   
\p
\v 10 Tapan andutperhan noh amraoh aw tei mahat kasip meng tit  
\q1 Kwitem timbas mong da timbas dipwi Got ohnong hanip dire boknong dasuh meng nahama Got ohnong porpat han moh sei tapan kakdahnong deiyao rima Gin diradire Got ohe kasip oh Satan ohe kasipnong ambapte mara dirnong orhe hrepnong naham nambutmuro. Ma inahat oh orhe napapten ohe kasip oh namgitmuro. Gin orhe ihirnong amburin han darhetipramur ma dahatip han Krais oh kasipsi hat patmuro.  
\v 11 Dire taptem ihir sipsip bap ohe heim ohe kasip ohsi; arpin meng pot ma pisapti ohe kasip ohsi ama yot ite kasip ohsi Satan ohnong ambapte matamuro. Ihir Dir ihat saptin niyarit hapuriyahan yahwa daham ihat sashe han ihirmuro.  
\v 12 Satan ohnong tapan kakdahnong anduta ohoh ihan aw tei mama pati han gur amam henmuro. Kakdah ama tom hru tem pati bapo mong tei pati bapo gur hinhinsi han bapo. Satan oh Nohnong kakdahnong ma nahaya oh noh gar dik pok tit inporhan it nang natpatipri ma hapat daham heisup isip ama hah ohmuro. Ama heisup hah ohe pe oh gurnong er nahatipra ohoh ihan gur hinhinsi han baprano.  
\m kasip mengtei gigosham hangopa.   
\p
\v 13 Gigoshatperhan dam oh Epe. Nohnong kakdahnong nahaya sa daham kuu brer mon itip kuu uhnong sutporim dinggoshat sangop.  
\v 14 Dinggoshat saporhan uh urhe hanip timbas dus amamen matip teinong tandeim put ha sonoh rim buhor isip ohe kaspas tan yotsi matporhan tandeim put sangop. Sus atei patin dam oh susa na sutin dus patin ohoh ihir paptin krismas yitir rima tit oh katket hatipra ma dahatip tei sus patin  
\v 15 dam oh uh ihat pato rima oh tom oh ha dinoh rim tomnong tom usan gut asara bapkei deingop.  
\v 16 Bapkei matiporhan tom oh susa uhnong diprarim mong oh tanggap tanputporhan tom oh gonsi tanggap tem ohom wangop.  
\v 17 Waporhan dam oh heisup isip tit hama urhe brer kat han ma Got ohe sawa mengnong dimaro Jisas ohe mengnong amram dimaro hapti han ihirsi gusutporim sangop.  
\v 18 Susa sor tom hru dinin tei oh tandeingop.   
\c 13  
\s1 Kurwah yot ite pateshe ohe meng oh  
\p
\v 1 Gahan noh wandeioh kurwah tit sor hru mutuhdapat marapatgop. Ama marapat kurwah ohe kakhe besheisi ambahhe katheisi ihtin kurwah oh marapatgop. Kathei ambahnong oh kakung kakhan ire aripti kakung hatin oh ambahnong nitat mat an patgop. Beshei kaknong oh Got orhornongwi dasei mar arin ohe win oh nitat kak tei oh brak nitat mat itipsi kurwah oh patgop.  
\v 2 Ama ihtin han ohe ina oh buhdapat kot samin isip bea poripti han ire buh hatin hangop. Inamdapat pusi isipnap repa poripti han ire ina hatin hangop. Atemdapat kotwa isip raion ire atem hatin hangop. Ama kurwah ohnong dam ohdapat Go nohe hanip ihirnong norhe meng tei kasip mat papat hatin hat orhor gohe ihtin kasip orhorsi paptenmur pora kasip mara orhor hatin deipatgop.  
\v 3 Ama kurwah orhe tit kak oh sein sutpa orhora it si hama yah hat patgop. Yah hat pathan kakdah han ihir gonsi wandeipti sein bupang rima ohnong dindeiptingopa.  
\v 4 Ama dindeipti bap ihir dam ohnong Oh kurwah ohnong moh orhe mengtei ihirnong kasip mat papindin han mat papat hano rim orhe danong ham amam mar armi deiptingopa. Armi deipti kurwah orhornonghe Mama han moh ohe kasip oh orhe gon hanmuro. Ihan nih ohsi gusum ohnong ambapte matiproho. Timbasnapmuro dahama armi mara orhornongwi dindeiptingopa.   
\p
\v 5 Ihaptihan kurwah oh Got ohnong dasei mara orhornong armi taham orhe winnong daptuhut papatin Got oh ha ihenoh. Ihat patin hayop oh 42 sa sutipra daham wamat patgop.  
\v 6 Gidaham wamat patin kurwah oh Got ohnong orhe winnongo orhe apteio aw tei ohe Got orhe hrep papat hano erernong oh gonsi adasei deipatgop.  
\v 7 Adasei deipatin gahan Got oh Norhe nita ihirnong ohe merwi mar ha sutinoh. Suma ama han bap ama han bap ihirnongo among among ma pati han bap ihirnongo meng nitatsi ihirnongo ina nitatsi bap ihirnongo ihirnong gonsi orhe hrepnong mar ha paptenoh rim kurwah ohnong ihirnong ama imtin ohe kasip ohsi mar wamat patgop.  
\v 8 Imat wamat patin mong mong mama pati gonsi ihir ama kurwah ohe danong ham ihir armi deiprimur. Gonsi armi deipri orhor kat ihir mong na tarpat patin orhor da dipwi paten ohe brak tei ma win atip ihir ohnong na armi deiprimur. Da dipwi ma patepri ohe brak oh sipsip bap hatin ma sutpa han ohe brak ohmur.   
\p
\v 9 Gin hanip nat temsi gur meng moh pomat amranmur.   
\p
\v 10 Karapus nahatin inasi hat pati han gurhe arpin karapus nahatiprimur. Biorsi nitin inasi hat ma pati han gurhe arpin biorsi orhor nitiprimur. Ihan Got orhe danong hat ma pati da oh kas ham mandaprio. Kasip hat orhorwi dahat patenmur napor mama nabrak dei ohmur.   
\p
\v 11 Gahan noh wandeioh it kurwah tit mong mutuhdapat marpatgop. Ama kurwah ohe ambahhe sipsip bap ohe gar ambah yot hatin hangop. Ohe ma mengirnong oh dam ohe ha mengir hatin hangop. Ihtin kurwah tit mong mutuhdapat marpatgop.  
\v 12 Marasa ohri ma pat han kurwah oh wamat patin komdapat ma mara kurwah oh ohri ma pat kurwah orhe atemdapat ha por meng hatin mat orhor Kakdah mama pati han gur ohri kurwah kak moh sein sutperhan it si hama ma yah hatip han moh ohe danong ham armi matwi paptenmuro pora ohnong armi matin inasi mat porpatgop.  
\v 13 Porpat hanip dire na imtin han oh wanohe kasip tit pinggit pisapatgop. Tit wanohe kasip tit ma pinggitip oh ihir wamat patin orhor Gin aw teidapat irat has go kakdah moh wandonmur potporhan has oh arpin wandongop.   
\p
\v 14 Ohri pat han ohe kintei na wandeipti han ma imtip oh Got oh ha imtinoh daham wamat patin indeingop. Imtiporhan kakdah pati han ihir gonsi ohe dasuh da ma indeinong wamara Moh arpinhe dahaya hangopa. Ihat dahatperhan kurwah oh Gur ohri kurwah kak moh sein sutperhan it si hama it dasi ham ma pat han ohe danong ham orhe win adaptuhutinmuro. Orhe winnong adaptuhutinmat oh orhor hatin irat bok tit gatmara orhor hatin arhur kis mar orhe winnong adaptuhutinmuro por kasip mengtei pongop. Potporhan ihir arpin ihangopa.   
\p
\v 15 Ihir ihtiperhan Got oh kom ma marhur kurwah oh orhe da oh ha ihenoh daham wamat patin komdapat marhur kurwah ohdapat irat bok ohri marhup kurwah hatin mara ma kis mata irat bok ohnong Irat bok go dasi ham mengiro gorhornong ma na armi nahaya ihirnong sumo henmur pora kurwah orhe nah ohsi ohe mutuhnong amara dasi deingop.  
\v 16-17 Dasi mat mandapat ama kuuhan gonsi ama pati ihirnong mamaru winsi hat ma pati bapo win timbas hat ma pati bapo borop hat pati han bapo kamah hat pati han bapo tit han orhe hrepdapat hat patim be atamrein pati han bapo yah hatwi ma pati han bapo ama ihat pati bap ihirnong Gur ohri ma marhup kurwah ohe hrepnong hat pati ma hapat dahatin ohe kis win brak oh guragure bes oper tando kinbi teido oh guragure mah suptiru mat brak mat pisonmur. Ama brak ohsiwi pati han gurwi gure erer oh ihirsi mohoyao ire erer oh gursi mohoyao haprimur por kasip deipatgop. Ihat kasip mengtei kasip deipatin ihir kas ham iraire ina boknong brak mat pisangopa.   
\p
\v 18 Ama kurwah ohe win kis oh hanip ohe win kis orhormur. Mamaru 666mur. Ihtin ohoh ihan hanip dasi han gur win paham brak moh wamara ama han ohe boknong mara paham meng moh rit ma hapat daham am hatinmur.   
\c 14  
\s1 Got oh kopenat ohri ma ambutip han ire meng oh  
\p
\v 1 Gahan noh wandeioh sipsip bap oh Got ohe aptei Saion yei ka oh tandeit patgop. Ohsi kat han ma orhe wino itap ohe wino ohsi ire kinbi tei ma abrak matip ihir 144,000 ihir ohsi tap hat patingopa.  
\v 2 Ihat patihan noh amraoh aw mutuh mahatdapat meng tit tom kurpat hatin hat mengiro minggihim hatin gurir deio ros ma meng deipti ohe tan mat meng deiyao ihat mengrim hangopa.  
\v 3 Ma mengitpa oh ama 144,000 ihir hanip yah orhe pohon tongnopat tei dason oh tandeima dasi bap hathat timbas ire kinteio han pohon bap ire kinteio oh tandeima kopenohe ga yah tit riptingopa. Ama ga yah tit ripti hatpa ga oh kakdah han maihir gonsi na am hatin ohe ga ohmur. Ama ambur papapat han irairwi am hatin ga oh riptingopa.  
\v 4 Ama han bap ihir kuu ihir tap na saw ham ongeng taham yahnap hatwi ma pati han ihirmur. Ihir sipsip bap ohe Noh anong sapora daham saporhan ihirhe ohe komnongwi ma dinggoshapti bap ihirmur. Kakdah han maire mutuhdapat ihirnong ma ambutip oh kopen pa awduup pera han pohon ihirnong apriptiru Got ihit taman kopenat ma amburiya moh nute taman tit pokwimur rim ma ambutpa han ihirmur.  
\v 5 Ihir dasuh da oh timbas hama yah hat paten ohe danong ongeng mat papteshe han ihirmur. Ama ihiroh irairwi am hatin ohe kopenohe ga oh riptingopa.   
\s1 Yitir enser ire ritpa ohe meng oh  
\p
\v 6 Gahan noh wandeioh Got ohe meng pisaya popriya hapti enser ihir tit han tit aw mutuh mahat ner hatin put sapatgop. Ma put sapat hatip oh eimat yahnap mengsi kakdah pati han bap gonsi ina nitatsi bapo ama han bap ama han bapo ameng ameng nitatsi bapo among among pati han bapo ama gonsi ihirnong meng pot pisonmat put sapatgop.  
\v 7 Sapat dus orhor akit kasip mengteiwi Gin Got oh kakdah pati han gonsi gon gurnong gin dahanaham nasatin dik hahmuro. Inahatin dik hah ohoh ihan gur kas hama orhe winnongwi adaptuhur paptenmuro. Orhorwi aw tano mong tano tom sor hru tomo tom marapat uuptemo moh wes natip hano rim armi mat paptenmuro pot pisangop.   
\p
\v 8 Tipan enser oh pot pisa tei gahan tipnerip enser oh it aprisa We. Babiron ap mutuh winsi ap mutuh moh tambor taham timbas hahmuro. Ama ap mutuh pati ire er da oh pahoh isip hapuriya hatin hashemuro. Hat patim ama ihashe da ohsi gonsi ihirnong wain er tom ma pandepti ohe tan mat pandema among among gonsi ihirnong er dasi mat pisashemuro pot sangop.   
\p
\v 9-10 Tipnerip enser oh us tei gahan bimrip enser oh aprisa akit kasip mengtei We. Kurwah ohe kis han ma bes tei nasaro kinbi tei nasaro nahatporhan orhornongo orhornong kis matpa irat boknongo ama ihitnong armi deipti han bap gurnong oh Got orhe bopor heisup oh wain tom kasip hatin mat napripramuro. Ma napripra oh wain tom be tomsi gapa deiya hatin mat na napripramuro. Orhe bopor heisup kasipnap batbet isip tit napripramuro. Ma napripra oh kasip wain tom ma yohot asaripti ohe tan mat yohot nat pat san oh namdipramuro. Namdiporhan yahnap dasi ensero sipsip bapo ire kintei gure boknong wanohe hanip er nahatin ohe er gwe tuhup yah oh gure boknong kwei har hatin sahar nahaya batbet hatin dar pateprimuro.  
\v 11 Ihat batbet dar ma patepri ohe tuhup oh dipdipwi tuhup oh maras patru patepramur. Ama kurwah orhe kis han oh gure boknong nahatporhan orhornongo orhe kis matpa irat boknongo ama yotnong daham ma armi deipti gure ina bok oh na tihih hama batbet har sup ohsi patiru hat pateprimuro pot sangop.   
\p
\v 12 Ihtin supsi hat apiro rim Got ohe nita ham ohe sawa meng amram dindeipti guroh orhe danong hat sapti danong mandapri. Kasip hama ma kasip haya da orhorwi hat patenmur rim Jon noh mama nabrak dei ohmur.   
\p
\v 13 Gahan noh amraoh aw tei mahatdapat meng tit We. Go mameng moh brak matinmuro. Hanipyah orhe nita ma nahat napapat han gure ma haputipri oh da yah ham amam dasi hat hapuriprimur rim brak matinmuro napor hangop. Napotporhan Yahsup ohhe Ohe ma napor oh arpin meng napormuro. Ire ma yah hat atamreipti meng ohri hat sapat ohoh ihan ire ruumsan ma tamreipti da oh mandama pang inasi ham tuper tongnotiprimuro napor hangop.   
\s1 Got orhe bopor heisup mutuhnong nahatipra ohe meng oh  
\p
\v 14 Gahan noh wandeioh awgapar bas oh hanip brer hatin hat tongnot patgop. Kak tei oh kakhan ire kakung aripti kakung gor kweisi hatpa kakung tit ara bes tei oh bior gawatengsi gretnap tit marin tongnot patgop.  
\v 15 Pat hatporhan gahan tit enser tit Got ohe ap yawar amdapat marasa kasip mengtei awgapar bas mama tongnot pat han ohnong Gin kakdah mong mong moh gonsi yahnap irat gwe wu hatmuro. Gin orhor kapotin hatmuro. Ihan go gwe bior gawatengsi ohsi gatmar kapotinmuro pongop.  
\v 16 Potporhan arpin awgapar bas ma tongnot pat han oh orhe bior gret gawatengsi ma marin pat ohsi kakdah ohom ma kapotin han ma wu hat oh gatmara kapot pisangop.   
\p
\v 17 Gahan noh it wandeioh tit enser tit aw tei mahat Got ohe ap yawar amdapat bior gawatengsi gretnap tit marima marangop.  
\v 18 Maraporhan gahan tit enser tit apop ma atendeipti ohe irat tautiporhan wamat pat han tit Got ohe apop atendeipti kwei tan tei patdapat marangop. Marasa bior gret gawatengsi marin pat enser ohnong kasip mengtei Mono. Kakdah mong among among ohom ohe er irat gwe ru oh gonsi gon wu hat ohoh ihan gwe bior gret ohsi gonsi gatmara kapot pisonmuro pongop.  
\v 19 Potporhan enser oh arpin amrama kakdah irat gwe nang gatmara gwe oh kapoma ruprup mat it pisangop. It pisusa dara Got oh er irat gwe hahhan oh irat gwe dupreripti san hatin norhe bopor heisup mat papat san dahnong moh sa matipri daham mamen mat pat dahnong ohom tapan andur mandangop.  
\v 20 Dupreripti tom san dahnong ma matip tom san oh ap mutuh ohe kot dah ohom patina ama tem dahnong deingop. Matporhan ihir dupretperhan heim oh teip hat marasa tanduket kot kat sangop. Heim oh maras sapatin ma usnong oh 300 kiromita hangop. Heim oh ipip hat ma mara oh hanip dire tandeiya ohe kis hatin hangop.   
\c 15  
\s1 Beshei enser ire beshei er sup ma marin inpa ohe meng oh  
\p
\v 1 Gahan noh wandeioh komdapat ma tarpatipra oh mihtin han tit tarpatipramur rim hanip dire na wandeipti han wanohe isip kis tit aw tei mahat pitap teinong mar namgingop. Pitap teinong mar ma namgitip kis oh Got oh beshei enser ihirnong Gin nohe er han ihirnong pepe batbet apin ohe bopor heisup beshei moh beshei enser gur nitat marindinmur por nitat mat apriporhan ihir nitat marin patingopa.  
\v 2 Marin patihan noh it wandeioh tom sor hru tan oh tom kakeir tan hatin ohsi; irat has hatin ohsi tap hat has hat patgop. Ama tom kakeir tan ohe manggap hir ohon oh kurwah ohnong ambapte mar suyao orhe irat bok kis matpa boknong ambapte deiyao orhe kis matpa winnong ambapte deiyao ma hashe han bap ihir tandeit patingopa. Tandeit patin Got orhor ihirnong gita hatin ros hatin nitat mar ma apir ros oh nitat marin patingopa.  
\v 3 Marin patim Got ohe atamreisuh han Moses ohe ga wanino sipsip bap ohe ga wanino oh riptingopa. Ga ma ritpa oh  
\q1 Hanipyah kasipnap hanmura; kasipnap hanmura. Kasipnap han go erer moh ha indeipata; ha indeipata. Mong mong moh ohe kakhan gorhorwimura; gorhorwimura. Gorhe duutin yah da orhorsiwi inahapatmura; inahapatmura.  
\v 4 Gorhap yah dawi ongeng mat papat hanmura; ongeng mat papat hanmura. Go ihtin han ohoh ihan nih gonong na kas hapata; na kas hapata. Gonsi gonong kas ham winsi nahapti hanmura; winsi nahapti hanmura. Gwe yah mat orhorwi indeipat da oh pitap tei patmura; pitap tei patmura. Ihat pat ohoh ihan aw pe mong pe mong mama pati ihir wamara am hama armi nahaptimura; armi nahaptimura.  
\m por ihat ga riptingopa.   
\p
\v 5 Ihir ga rit mandatperhan gahan noh wandeioh aw tei ohe ap yawar oh tanputporhan noh wandeioh Got orhe ap yawar orhor pat ser ap yawar oh patgop.  
\v 6 Noh pathe dahatporhan ama ap mutuh amdapat beshei enser hanip ihirnong batbet matin ohe er sup beshei marim marongopa. Marim marayaoh watah namei hatin hasnap ariyao gor kweisi ahep nang tan hatin hatpa tan oh atoheitem mutuh moh ariyao hama marangopa.  
\v 7 Maraperhan hatriphei dasi bap ihir tit han tit beshei dis nitat mat apingop. Got dipdipwi patru pat han ohe bopor heisup da oh ama beshei dis dahnong teip mat it patdapat nitat mat apingop.  
\v 8 Apriporhan Got ohe kasip yah has da ohe tuhup oh marasa ap yawar dus ohom teip hat mandangop. Tuhup oh teip hat patin hanip ihir ap yawarnong ohom kinhat ron ina hangopa. Kinhat ron ina hat patin beshei enser ire er sup oh timbas deiyarit ropera daham minhan patingopa.   
\c 16  
\s1 Got ohe bopor heisup dis dah it patdapat duket atpa ohe meng oh  
\p
\v 1 Gahan noh amraoh ap yawar mutuh ohondapat kasip mengtei beshei enser ihirnong Gur Got ohe bopor heisup beshei dis dahnong mat papat heisup moh gin prosa dukera kakdahnong matinmuro pot ur hangop.  
\v 2 Por utporhan tipan enser oh ohe dis ma marin pat oh arpin pamrasa duket kakdah mong teinong deingop. Imtiporhan kurwah ohe win kis matipsi ma pati han bapo irat bok orhor hatin kis matpa irat boknong armi deipti han bapo ama ire ina bok oh batbetsi ham tumnuhut son ohe er gwesi han tarpat sangopa.   
\p
\v 3 Tarpat saperhan gahan tipnerip enser oh ohe dis ma marin pat oh pamrasa tom sor hrunong duket asaringop. Atporhan tom gonsi heim kohar tan hatin hatwi sangop. Ihat saporhan ama tom sor hru tem dasi ma pat erer oh gonsi tapariya hangop.   
\p
\v 4 Tapar timbas hatperhan gahan bimrip enser ohe dis ma marin pat oh pamrasa sapat tomo uuptem marapat tomo ihirnong duker asaringop. Atporhan ama tom ihir heimsi na din tom hangopa.  
\v 5 Ihtiperhan noh amraoh tom sup enser oh Got ohnong  
\q1 Go dipwi patesuhru patru hat patepra hanmuro. Go yah danongwi ongeng mat papat hanmuro. Go be bok dus na indeipat hanmuro. Go pomat sama iraire ma ihapti oh duungnap ohwi indeipat hanmuro.  
\v 6 Ihir Got gwe meng pot pisashe hano gwe nita han bapo ihirnong sutperhan ire heim maras ma sasuh ohe yan oh gin gohe ire yan oh mama heim tom oh ihirnonghe imat pande oh eimat yahnapmuro. Iraire san hashe pe ohmuro  
\m por hangop.  
\v 7 Potporhan noh it amraoh apop atendeipti gwar duup amdapat meng tit  
\q1 Hanipyah kasipnap Got go arpin hanip ihirnong be bokdus na indeipat hanmuro. Pomat sama iraire ma ihapti oh duung dawi indeipat hanmuro  
\m por hangop.   
\p
\v 8 Potporhan gahan hatrip enser ohe dis ma marin pat oh pamrasa atan ohe boknong ruh okmat asaringop. Okmat atporhan atan ohe mumun oh irat har isipnap hama hanip ihirnong bapkunmat atin ina deingop.  
\v 9 Matporhan ama har isip oh ihirnong bapkunmat asaringop. Bapkunmat atporhan ihir Got orhe kasip ohsi imtiporhan Dirnong inahah ma hapat dahapti Got ohnong heisup mar orhe winnong adasei deingopa. Got ohe kasip ohsi inahah ma hapat dahatpa orhora; ihir Orhe kasip ohsi inahapat han moh ihan dire er hat sapti da moh mandatpera. Mandama orhe kasip ohsi inahapatnong moh armi maro hatpera na dahangopa.   
\p
\v 10 Ihir na dahat mandatperhan hathat enser ohe dis ma marin pat oh pamrasa kurwah ohe ihirnong orhe hrepnong mar tongnom wamat pat dahnong oh duket asaringop. Atporhan orhe hrepnong mat papat mong oh gonsi kwi hat manda hangop. Kwi hatporhan batbet isipnap hapti ga tikikit sangopa.  
\v 11 Ga tikikit sapti Dire ina bok moh tumnuhut sayao batbet isip dariyao mama haya moh Got oh inahah ma hapat dahangopa. Ihat dahatpa orhor Diradire er hat sapti danong moh mandatpera na daham na mandangopa. Na mandama aw tei pat han Got ohnong dasei deingopa.   
\p
\v 12 Ihtiperhan gahan dop enser ohe dis ma marin pat oh pamrasa Gin noh sapat tom isip Yupretisnong moh duket atpora. Duket atporhan atan marpatdapat ma pati kakhan bapo ire hrepnong mar papti han bapo ama mahaw bap ire gusutin mandap oh amanhetpora daham sapat tom Yupretisnong oh orhe marin pat dis oh durket asaringop. Atporhan tom oh ganera ire apris gusutin mandap oh amanhengop.  
\v 13 Mandap amanhetporhan noh wandeioh dam bok ohe atem kato duuptei kurwah ohe atem kato komdapat kurwah dasuh propet ohe atem kato ama yitir han ire atem kat amdapat yitir mongsup er bap ihir sat hatin ham ama yitir han ire atem kat maraptingopa.  
\v 14 Ama mongsup er bap ire atem kat maraya bap ihir hanip dire na wandeipti da ma deipti mongsup bap ihirmur. Ihir marasa aw pe mong pe ohe kakhan bap ire patinong susa Gin gur kasipnap Got ohe isipnap dik ma natip dik oh gin hah ma hapat dahatinmuro. Daham ohsi gusutinmat tap tei hatinmuro pora ambur tap teinong matinmat ambur sangopa.   
\p
\v 15 Hanipyah nohe ma apripra oh kakdah han gonsi gur amratinmur. Noh gapah han ihir hatin hat apris buporinsi nahatipra ohoh ihan gur Oh apris buporinsi nahatporhan noh eit pita uso a pita uso hatporhan ihir wanahatipri. Ihir wanahatperhan noh kas hatiprakin daham gure andin watah oh mamen mat dat sara kinkin da ham mamen tahat wanahat patenmur. Ihat ma mamen tahat pati kuuhan bap gur amam dasi hat wamat pati han bap gurmur napotporhan Jon noh mama nabrak dei ohmur.   
\p
\v 16 Gahan ama mongsup er bap ihir mong pe aw pe kakhan bap ihirnong ambura ama gusutin teinong tap tei deingopa. Ama gusutipri tei oh Hibru ire mengtei Amagedon poriptimur. Ama mong teinong oh tap tei deingopa.   
\p
\v 17 Imtiperhan gahan bes enser ohe dis ma marin pat oh pamrasa be bimbok dusnong duket asaringop. Duket atporhan ap yawar ohe nita hanipyah hat pat han ohe tongnopat duup amdapat kasip mengtei tit Gin beshei bopor heisup oh gin bes moh pepe timbas deimuro girit ur hangop.  
\v 18 Utporhan amsama gwaheiro minggihim gurir deio awnari kuro ihangop. Ihpat orhe gon bipi tit apingop. Ama apdap bipi oh rih hanip tarpaya teihe ihtin bipi ti na wandeisheru patiru ginhe na wandeipti wanohe bipi isip tit apingop.  
\v 19 Aprisa winsi ap mutuh Babiron ap mutuh mongnong oh kiskwes pora yitir aptei mong rumbup rumbup mat pisusa saringop. Rumbup rumbup mat pisus ma itip oh among among ohe ap mutuh ap mutuh oh gonsi tambor mar timbas deingop. Winsi Babiron ap mutuhnong ma imtip oh Got oh Gin noh Babiron ap mutuho be ohe ap mutuh ap mutuho ire er hat sapti ohe pe yan oh gin apripora daham orhe bopor heisup wain tom ma pandepti ohe tan mat ihirnong gonsi pandengop.  
\v 20 Imtiporhan tom goh mong muk muk oh wasa timbas haho yei gon gon timbas hama mong tap tan titwi hangop.  
\v 21 Mong tanwi hatporhan tom awgwe isip kwei gon muk hatin wandas hanip ihirnong sut pisangop. Hanip ihirnong sut ma pihip ohe ruum oh 45 kiro kis hatin awgwe oh wandas hanip ihirnong sut pisangop. Sut pisaporhan hanip ihir wanohe batbet er sup tit napiro rim Got ohnong dasei mara indeingopa.   
\c 17  
\s1 Bisei saw winsi kuu uhe meng oh  
\p
\v 1 Gahan dis ma marin pati beshei enser irair tit han wandasa Jon nohnong Go apris wamtin. Noh Got ohe bopor heisup oh winsi bisei saw kuu urhe er hat sapat ohe pe apin bopor heisup oh namgitiprohmur. Bisei saw kuu ma potpa oh winsi ap mutuh ma trun tom sapat duup ohe pat ap mutuhnong oh er apteio pora gipotpamur. Gin ama ap mutuhnong bopor heisup matin ohe da oh namgitiprohmur. Go wamat patinmur.  
\v 2 Ama ap mutuh oh bisei saw hapat kuu hatin hat pat ohoh ihan among among ohe kakhan hat pati han ihirhe ama ap mutuh ire tapnong ham er da oh irair tap mat dara ihat saptimur. Be han ma among among pati bap ihirhe ama ap mutuh ire er hat sapti da oh dara wain er tom dama da timbas hapti ohe da hatin hat patimur. Ama ap mutuh bisei saw kuu hatin hat pat ap mutuh ohnong bopor heisup matin da oh namgitiprohmur napongop.   
\p
\v 3 Naporpat Got orhe Yahsup oh nohe mutuhnong kasip nahat napapatin ohoh meng ma napor enser orhor Got ohe Yahsup ohe kasip ohsi nambura hanip timbas tom timbas dusnong ha napisa ina hatin nahangop. Nahatporhan noh wandeioh kuu tit kurwah heimsi ina hatin ohe bas andeh tongnot patgop. Kurwah ohe bok andeh Got orhornongwi adasei matin ohe win oh nitat mat ina pepe moh gonsi itipsi kurwah oh patgop. Ama kurwah ohe kak oh beshei hangop. Ambah oh kathei hangop. Ama ihtin kurwah ohe bas andeh kuu uh tongnot patgop.  
\v 4 Urhe watahhe heimsi tita; gih tamsi tita an patgop. Uhe ina boknong awat tahat pat oh gor kweisi hatpa hano yahnap kwei yan ruumsan mohopti hano suat baneng yahnap hano ama han erer ohsi awat tahat patgop. Urhe bes tei oh gor kweisi hatpa boporsi tom san tit marin patgop. Yahnap san orhor mutuhdapat urhe bisei saw hat sapat ohe eit gap a gap ti da ti da gwesi ham tumnuhurpat han pandit itip san oh marin patgop.  
\v 5 Urhe kinbi tei win oh paham win tit patgop. Ama paham win oh aptei aptei gonsi ma bisei saw hat er hat sapti ohe sup hatip ap mutuh oh winsi Babiron ap mutuh mohmur por Babiron ap mutuhnong kis mar kuu uhe kinbi teinong brak matpasi kuu uh patgop.   
\p
\v 6 Ihat pathe dahama noh wandeioh urhe bes teidapat Got ohe nita bap ihirnong Got ohe danong hapti da moh na mandapti moh noh sutpora daham supat heim oh it urhor dama wain tom dama da ban taham deinin hat sapti ohe tan hat sapatgop. Ihat sapathan noh wamara da trun trun darhetip.  
\v 7 Da trun trun darherpatin enser oh Go kinham da trun trun darherpat. Gin noh kurwah beshei kaksi; kathei ambahsi kurwah ohe meng ohsi; kurwah orhe bas tongnot pat kuu ite ma ihapti danong oh gur na dahat pati meng oh pitap teinong mar napotiprohmur.  
\v 8 Mamarumur. Gwe ma wandei kurwah oh rih patesuhmur. Gin na patmur. Ihtin orhora; kimsidapat ditin timbas tanggapdapat marasa it pat hatipramur. Pat hatporhan eimat timbas matin teinong matipramur. Na mat patin oh kuuhan ire win rih mong na tarpat patin orhor da dipwi paten ohe brak teinong win na atip ihir wamar Epe. Rih patesuh ma hapat. Gahan timbas hatip ma hapat. Gin it pat ma hapat daham da trun darhetiprimur.   
\p
\v 9 Hanip dakuu gur daham am hatinmur. Beshei kak oh Rom aptei mutuh pat ohe beshei mong muk ka ohmur. Kuu uh ama beshei mong muk ka tongnot patmur. Beshei mong muk ma ripti moh beshei kakhan ihirnong ma hapat dahatinmur.  
\v 10 Ama beshei kakhan ihiroh hanen gon han ihir aprisa haputirimur. Yot han ihitnong oh gin tit han oh apris patmur. Tit han oh kopen na apin patmur. Na apin pat han ohe ma apripra oh aprisa gar dik pok tit kakhan hat patema timbas hatipramur.  
\v 11 Timbas hatporhan kir ma apripra han oh rih beshei kakhan ma pateshe han irair tit han tit apripramur. It ma apripra han oh rih patesuh gin na pat kurwah orhor it kakhan hama apripramur. Aprisa eimat timbas hatin teinong hatinmat apripramur.   
\p
\v 12 Gwe kathei ambah ma wandeioh kathei kakhan ma hatipri han ire kis oh wandei ohmur. Ama kathei han ihir kopen apris kakhan na hat patimur. Kimsi aprisa ma kakhan hatipri oh kurwah orhe hrepdapat kathei han maihir kakhan hapti orhorsi gar dik tit aya hatin hama ire kakhan hat ma inda oh timbas hatiprimur.  
\v 13 Ire kakhan hat ma indipri oh Gin dire kasipo dire mengtei ihirnong ma papindipri ohe kasipo oh gonsi kakhan dir tap mar kurwah moh ohe boknongwi matiprohemur. Matperhan ohwi ha kasip hat indinoh goshapti tit dawi hama kakhan hat indiprimur.  
\v 14 Ihat ma indipri oh ihir sipsip bap ohsi gusutiprimur. Gusupti sipsip bap oh orhapnap hanipyah hat pat han ohoh ihan orhapnap kakhan hat pat hanmur. Orhapnap ihtin han ohoh ihan ohdapat ihirnong ambapte mara orhe hrepnong matipramur. Orhoro orhordapat Gur nohe nitamur potporhan ma ohe danong ham na mandam pan ham dindeipti bap ihiro ihirdapat ihirnong ambapte matiprimur napongop.   
\p
\v 15 Naporpat it nohnong Gin gwe bisei saw hapat kuu uh trun tom sapat duup tongnot patin ma wandei trun tom oh mamarumur. Among among pati bapo ama han ama han bapo ina nitatsi bapo ameng ameng nitatsi bapo ama ihirnong tom trun hatin hat patin wandeimur.  
\v 16 Gwe kathei ambah ma wandei ambaho kurwaho ama ihirdapat kuu bisei saw kuu mauhnong heisup mar sutinmat ap was ros hoyap sum erer atimbas deipti ohe tan mara urhe ina bokwi mar sutiprimur. Suma hit oh bak mar diprimur. Dama ap andoripti ohe tan mar timbas matiprimur.  
\v 17 Kathei han ire tit dawi hama kurwah ohe boknongwi ma matipri da oh iraire da oh na imtiprimur. Got orhor Noh imtipora imtipora ma dahapat da oh ire mutuhnong matporhan ama da ohsi ihir imtiprimur. Imat patin Got ohe sa tarpatipra ma ripat meng oh arpin gonsi dam sa tarpatipra.  
\v 18 Gin gwe bisei saw kuu ma wandeioh Rom ap mutuh winsi ap mutuhnong oh wandeimur. Ama ap mutuh oh mong mong moh ohe kak hat pati han bap ihirnong gonsi orhe hrepnongwi mar papatmur napongop.   
\c 18  
\s1 Babiron ap mutuh ire er hat sapti ohe pe oh mimat sutipramur rim ma pinggitip ohe meng oh  
\p
\v 1 Napor mandapat gahan noh wandeioh enser tit aw tei mahatdapat kakdahnong moh wanpatgop. Ama wanda han oh hanip ihirnong Ihat indinmur. Ihat indinmur potin ohe meng kasipnapsi hat pat han enser tit ina has oh kakeirsi hat wandasa mong mohsi has mat saringop.  
\v 2 Has mat sara Babiron ap mutuh mihat timbas hatipramur daham kasip mengtei  
\q1 Gin timbas hahmuro. Winsi Babiron ap mutuh moh gin tambor taham timbas hahmuro. Timbas hatporhan gin mongsupo heim kapkapirian er dao er nero por ma dasei deipti nero ama er bap ire paten ap mutuh mong hahmuro.  
\v 3 Ama ap mutuh ire bisei saw hat sapti ohe da oh pahoh isip hapuriya hatin hat sapti ohe da oh among among ma pati ihir wain er tom ha daya hatin haptimuro. Among among ohe kakhan hat pati ihir ama ap mutuh ohsi ha bisei saw haya hatin haptimuro. Ama ap mutuh ihir erer mohom it titsi darneng ma dahapti ohe pe oh mong mong mama tamohopti han ihir han kamah han haptimuro. Ama ihat sapti ohe pe oh gin ama ap mutuh oh tam tambor tahat susa timbas hahmuro  
\m girit ut tit wandangop.   
\p
\v 4 Ihtiporhan gahan noh amraoh aw tei mahatdapat meng tit ri oh  
\q1 Got nohe nita kuuhan gur ama ap mutuh ire er hat sapti da oh nahatiprohe ohoh ihan gur ire tapnong hat indipri. Gur ama ap mutuh oh mandama wan teinong sonmuro. Gur ire tap ohwi ayahanoh ire er hat sapti pe batbet sup oh gur tap datiprohe ohoh ihan gurri wan teinong hat indinmuro.  
\v 5 Ire er hapti da oh noh wandeioh tap tei mar ma patan prupti oh kakdah moh patru aw tei mahat patru mat paptimuro. Ama ihapti ohe pe yan oh noh gin yan apripora dahapatmuro. Ihat pati ap mutuh ohoh ihan gur wan teinong hat indinmuro.  
\v 6 Gur ama ap mutuh er han ihirdapat gurnong er nahasheru yan ma apripri oh ire ma er hasheru imat orhor gurdapathe batbet matinmuro. Ma batbet matipri oh inahashe ohe kis orhorwi apriprio. Yot batbet orhor isip mat orhor apinmuro. Gurnong ma er nahashe oh kasip wain tom namdeya hatin naham isip er nahashe ohoh ihan gurdapathe Got norhe bopor heisup gap oh kasip wain tom pandeya ohe tan mat pandema isipnap batbet apinmuro.  
\v 7 Ama ap mutuh han ihir iraire danong armi tahayao noh titsi titsi darneng daham titsi titsi daripti dao ama ihtin danong isip hat pateshemuro. Ihan ire ihat ma pateshe ohe pe oh gurdapathe ama ihat pateshe ohe kis orhor ina batbet ruumsupo saheih ham ruumsan yimtin supo oh apinmuro. Ihirhe kakhan ohe pohon tongnopat teinong tongnom Noh ihtin han hat patwa ma dahapat ohe tan hat ihirhe ihat dahat patimuro. Dahama Noh kuu tahem ire saheih hapti da hatin eimat na hapramuro. Yah hat patepramur dahaptimuro.  
\v 8 Ihat dahapti ohoh ihan ire ma ihat dahat pati ohe pe oh tihetin supo saheih ham yimtin supo ake erwip supo oh tit dahwi tarpama ire boknong mar er deipramuro. Er mara apsi er mar ap urkamar irat tei asaripti ohe tan mar timbas matipramuro. Noh kasipnap han ohoh ihan noh pomat sama batbet yan aprisa timbas matipramuro  
\m rim hangop.   
\p
\v 9 Imtiporhan ama indei ohe tuhup oh marporhan mong mong mama er han bap kak hat pati han bap ihir wamar Epo. Ama ap mutuh oh kak hat patin dir wamar bisei saw hat sayao titsi titsi dariyaneng daham ruumsan dariyao haptio. Gin dire ihat sapti kak hat pat ap mutuh moh hanip su tuhup ma marao. Epo. Ha suo rima saheih ham yimtiprimur.  
\v 10 Ma yimtipri oh ihir Ire batbet ma dariya hatin morhor dirhe ha datiprio daham kas hama meihdapat patima  
\q1 Epo. Hinhin apteio. Babiron ap mutuh winsi kasip ap isip mutuh moh ha suo. Got oh mama ap mutuh maihir er hat saptio rim gin orhorwi sama sumuro. Epo. Ha indeio  
\m gigosham yimtiprimur.   
\p
\v 11 Tamohopti han ihirhe ama tuhupnong wamara.  
\q1 Epe. Dire erer mohom yan daripti mandap oh gin gater ma hapat daham da er ham yimtiprimur.  
\v 12 Ire erer mohom daripti yan ma agatmatipra oh mama erer mohmur. Gor kweio sirpa kweio sup tapan pat kweio suat banengo watah yahnap tan tito gihtamsi watah tan tito heimsi watah tan tito gaw apsi hatpa manap yah watah tan tito gapgwesi yahnap irato erepan ambahsi hatpa hano irat yan isip mohopti ohsi hatpa hano sahsah matpa kwei brassi hatpa hano ain kweisi hatpa hano supsi kweisi hatpa hano  
\v 13 sinamon daran hatin hano den ator deipti hano temtiperhan gapgwe tuhup marapat hano irat gwe gapgwesi gapo gapgwesi tom gapo wain tomo diapo boris yahnap hano wito burmakauo sipsipo hoso hos ire pramat pisapti hano hanip ire hrepdapat hat patim be atamreipti hano be hanipo ama erer mohom daripti yan mandap oh gin gater timbas hah ma hapat  
\m daham yimtiprimur.   
\s1 Yahnap ap mutuhnong surit yimtipri ohe meng oh  
\p
\v 14 Yimama ama ap mutuh ire yahnap yahnap han oh titsi datper titsi datper daham daripti da oh gin eimat gonsi timbas hahmuro. Ire yahnap yahnap awat deipti han oh gin eimatnap timbas hahmuro. Gin it ti na pat hatipramuro.  
\v 15 Dire erer oh ama ap mutuh ihirsi mohoma yan dar kamah han hat ma pati ohe pe oh gin dirnonghe amaru tap mat sa batbet nahatiprao daham meihdapat tandeim saheih ham yimtiprimur.  
\v 16 Yimama  
\q1 Epo. Hinhina apteio. Epo. Winsi ap mutuh moh ha suo. Watah has yahnap wataho gihtam hatin wataho heimsi wataho ihtin watah yah anwi pat aptei moh ha suo. Kwei yan ruumsan mohopti kweio suat baneng yahnap hano ohsi ma awat hat pati aptei moh ha suo.  
\v 17 Kapkap tit dahwi ap mutuh mohe yahnap erer ma timbas dei moh Epo. Ha suo  
\m por yimtiprimur.  
\p Ihtiperhan sip ma pisapti hano hanip sip temnong ham sapti hano sipnong wamat paptem tamreipti han bapo erer sip temnong mara darhera mani daripti han bapo ihir gonsi meihdapat tandeit patin  
\v 18 winsi ap mutuh timbas hah ohe tuhup oh marporhan ihir wamara Epo. Mama taur ap mutuh moh wan ap mutuh mihtin ap timbasmuro. Morhap ap mutuh yahnap taurmuro por saheih isip ham yimtiprimur.  
\v 19 Yimama saheih isip yah tit ham sirap oh iraire kak tei ara  
\q1 Epo. Hinhina ap teio. Epo. Winsi ap mutuh moh ha suo. Sip temnong mar darheripti han gonsi dirnong kamah nahapat ap mutuh moh ha suo. Kapkap tit dahwi timbas mar su moh epo. Ha indeio  
\m por saheih ham yimtiprimur.   
\p
\v 20 Gahan noh amraoh Aw tei pati hano Got ohe nita hano Jisas ohsi sashe nathei hano Got ohe meng pisapti hano gur mama ap mutuh ma pati han ihirdapat gurnong er nahapti moh gin Got oh pomat sama ama inahashe ohe yan oh gin mama aprisa timbas dei moh wes indeio dahama amam hat patenmur rim hangop.  
\v 21 Ritporhan kasipnap enser tit wit tambor deipti kwei hatin isip tit dara sor hru dahnong ohom tahe pongop. Tahe pora  
\q1 Nohe ma indei moh mamaru mat orhor Got oh winsi Babiron ap mutuh mohnong mihtin kasipsi orhor eimat timbas matipramuro. Eimat timbas matporhan ithe ti na wamtiprimuro.  
\v 22 Ros ma meng deiptio pormik ma meng deiptio tom san pong pong por ma meng deiptio ga riptio oh gonsi ama ap mutuh moh ama ihtin meng erer oh ithe eimat ti na amratiprimuro. Ire bes tei ma manhepti erer oh manheptin ithe ti na wamtiprimuro. Ihir wit tambor deiptin na wamtiprimuro.  
\v 23 Ama ap mutuh oh tanggam hashe it ti na wamtiprimuro. Kuu han gosdatperhan kuumi asar meng saripti menghe it ti na amratiprimuro. Rih mama ap mutuh maire tamohopti han ihir kasip han hama ire hrepnong mat papteshemuro. Ama ap mutuh ihirdapat mong mong gonsi ihirnong mareip deipti ohe tan mara danong amareip deishemuro. Ihashe ap mutuh oh gin eimat timbas matipramuro  
\m ringop.   
\p
\v 24 Enser oh giritporhan noh dahah oh Mama Babiron ap mutuh moh Got ohe nita ihirnong suyao orhe meng pot pisapti han ihirnong suyao mong mong ama pati han ihirnong mahaw mar suyao ma hashe ohe san pe oh gin mama Babiron ap mutuh maihirnong su ma hapat dahatip.   
\c 19  
\s1 Kuuhan ire Got ohnong armi matipri ohe meng oh  
\p
\v 1 Gahan noh amraoh aw tei mahat kuuhan ire tarmur akit meng nurur riptiru hat mengir hangopa.  
\q1 Got ohnongwi armi mar amam matinmuro. Ohwi nambutin hanmuro. Ohwi winsi han kasipnap hanmuro.  
\v 2 Hanip ihirnong satpor rihanhe pomatwi sama iraire ma ihapti oh duung dawi indeipat hanmuro. Indeipat han ohoh ihan Babiron ap mutuh ire bisei saw hapti er da oh among among ihirnong ma pinggit pisapti ohe pe oh gin ihirnonghe pomat sama iraire ma ihapti ohe pe yan oh apirmuro. Ama ap mutuh ihirdapat orhe atamreipti han ihirnong sushe ohe pe oh gin ihirnonghe ama ohe yan oh sumuro  
\m rim hangopa.  
\v 3 Girima it kasip mengtei  
\q1 Got ohnongwi armi mar amam mat paptenmuro. Winsi ap mutuh ma taur ohe tuhup oh duut orhorwi maras patru pateprao rim Got ohnonghe amam mat paptenmuro  
\m girim hangopa.  
\v 4 Giritperhan han pohon 24 han ihirsi; yotayota dasi han ihirsi tap ham Got orhe pohon tongnopat duup oh bos hamnong ham orhe danong hama  
\q1 Got ohnongwi armi mar amam mat papten hanmuro. Arpinmuro  
\m girim hangopa.  
\v 5 Giritperhan noh amraoh Got orhe pohon tongnot pat tei amdapat meng tit  
\q1 Got ohe atamreipti han bap kamah hat pati hansi; borop hat pati hansi ama han guro orhornong kas hama orhe danong hat pati han bap kamah hat pati hansi; borop hat pati hansi ama han bap guro gur gonsi tap ham orhornong armi mar amam mat paptenmuro  
\m rim hangopa.   
\s1 Sipsip bap oh kuu kopen dara amam ham den dapti ohe tan mat nambutipra ohe meng oh  
\p
\v 6 Gahan Jon noh amraoh kuuhan ruumsan tarmura ha meng sariya hatin hat mengrim hangopa. Ma mengriya oh tom war isip kuro minggihim isip gurir deio hatin ham hangopa.  
\q1 Dire napapat han oh Hanipyah kasipnap han orhorwi erer gon oh gonsinap orhe hrepnongwi mat papat hanmuro. Ihtin han ohoh ihan orhornongwi armi mara amam mat paptenmuro.  
\v 7-8 Sipsip bap oh Ama kuu uhnong noh datiprohwa ma dahat pat kuu uhnong Got oh Watah has yahnap moh ara mamen tahat indinmur potporhan uh arpin ara mamen tahat patmuro. Gin ite gosdatin ohe dik oh gin hahmuro. Ihtin dik hah ohoh ihan dir da yah ham amam hayamuro. Amam hama orhorwi yahnap hano rim armi mat pateprimuro.  
\m rim hangopa. Watah has yahnap ma apdap oh Got orhe nita dire yah hat sapti ohe da ohmur.   
\p
\v 9 Gahan enser oh Jon nohnong Gin go mama meng moh brak matinmur. Sipsip bap oh Gin noh kopen kuu dara amam ham den ruumsan dinmat norhe nita gurnong Gin apris amam ham den dinmur napor unatipramur. Ma unatipra gur oh amamsi bap gurmuro napor ama meng oh brak matina napongop. Naporpat it nohnong ama meng oh Got ohe arpinnap meng ohmur napongop. Napotporhan noh mama nabrak dei ohmur.   
\p
\v 10 Enser oh napotporhan noh ohe duup oh bos hamnong ham timama ohe danong ham armi matpor ihpatin oh Es. Nohe danong ham armi nahatipra. Noh ditadit tap Got ohe atamreipti han ditaditmur. Gure taptem bap Jisas ohe arpin meng ma dindeipti ihirsi; diradir tap atamreipti bap diradir ohoh ihan nohe danong ham armi nahatipra. Got orhe danong ham armi mat paptenmur napongop. Got ohe meng pot pison ina mara ma kasip deipat sup oh dirnonghe Jisas ohe meng oh pot pison ina dasi nahat napapat ohmur.   
\s1 Hos tohan bas tongnom ohe merwi mar supatin wamtip ohe meng oh  
\p
\v 11 Gahan Jon noh wandeioh aw tan mahat tanputporhan hos tohan tit patgop. Ohe bas oh han tit tongnot patgop. Ama han oh hanipnong dahamar satpor dahaho ihirsi gusutpor dahaho ihat dahahhanoh duung dasiwi ihpat hano rim ohe win oh yot winsi patgop. Tit win oh duung han ohmura; tit win oh arpin han ohmur. Ama win yot ohsi tongnot patgop.  
\v 12 Ama win yotsi han ohe kinhe irat has hatin hangop. Kakhe kakhan ire aripti kakung hatin trun an patgop. Orhe ina bok oh orhe gon win tit orhorwi am hat pat win tit brak matpa oh patgop.  
\v 13 Orhe watah dapsi ma an pat oh heim hru dahnong mara heimsi matin watah dap tit an patgop. Ire ohnong ma win poripti oh Got ohe dahat pat da oh namgipato rim winnong oh Got ohe meng ohmur poriptimur.  
\v 14 Ihtin han tit hos tohan bas tongnoma sapatgop. Saporhan ohe kom oh aw tei ohe dupsi han ami bap ihir watah has yahnap namei hatin watah oh ara hos tohan bap ire bas oh nitat tongnoma ohe kom saptingopa.  
\v 15 Ohri hat ma us han ohe atem tei oh bior gretnap tit atem kat oh kot patgop. Ama bior gret atem kat kot pat ohsi among among kuuhan er bap ma pati ihirnong ohe merwi mar sutipramur. Suma orhe hrepnongwi mara heisup mat orhorwi paptepramur. Heisup mat orhorwi ma paptepra oh kasip Got orhe bopor heisup mat papat san dahnong oh mar paptepramur.  
\v 16 Ama han oh among among dire kakhanhe orhorwimur. Dire hanipyah hat pat oh orhapnap kakhan hat pat hano rim orhe watah dapsi an pat ohe boko orhe mun boko oh ama ihat pat ohe win oh abrak matpasi han oh patgop.   
\p
\v 17 Ihat pathe daham noh it wandeioh enser tit atan ohe heirpat tei mutuh ohon tandeit patgop. Tandeit patdapat kasip meng tit ner put sapti ner gonsi ihirnong Ei. Got ohe den yahnap ruumsan namdin dik oh ginmuro. Ihan gur gonsi apris tap tei hatinmuro.  
\v 18 Tap tei hama mong mong kak hat pati han ire seino ami ma kak hat pati han ire seino han kasip bap ire seino hos bas tongnom sapti han ire seino hos ire seino han gonsi bap be bap hansi; ire hrepnong matperhan be atamreipti han bapsi winsi hansi; win timbas hansi ire seino oh gonsi gur apris dinmuro. Dinmat apris tap tei hatinmuro rim girit ungop.   
\p
\v 19 Girit utporhan noh it wandeioh ohri ma murhup kurwaho er han bap ma mong mong moh ohe kak hat ma pati hano ire ami dupsi bapo ihir gonsi Gin dir Hanipyah hos bas tongnom sapat han ohnongsi; orhe ami dupsi han bap ihirsi gusutpera rima gusutinmat tap tei hangopa.  
\v 20 Gusutinmat tap tei hatperhan hos bas tongnom sapat han orhordapat kurwah ohnongsi; orhe kasip apriporhan ihirnong dasuh deisuh han ohnongsi ama ihitnong net pongop. Kurwah orhe kasip apriporhan orhe kintei orhor na imtin hatin han ma indei ohsi kurwah ohe win braksi bapo irat bok kurwah arhutperhan ohe danong hapti bapo ama ihirnong dasuh deisuhmur. Ama indeishe han yot ihitnong hos bas tongnot sapat han ohdapat ihitnong net pora da patin orhor tahe por kwei har ham mianpang hatin hapat kurgwesi ham har hapat dahnong tahe por mandangop.  
\v 21 Tahe por mandama orhe atem kat kot pat bior ohsi ite ami bap ihirnong sut pisangop. Sut itporhan ner ihir apris sein daptin ake pisut mandangopa.   
\c 20  
\s1 Dam bok gon ohnong Satano rima karapus matip ohe meng oh  
\p
\v 1 Gahan noh wandeioh enser tit tanggap tem ditin timbas tem ohe ki ohsi; sen kasip nang ohsi marima aw teidapat wanpatgop.  
\v 2 Wandasa dam ohnong Rih patesuh han inapawam hatin hat hanip susuhmuro. Oh kuram hatin Satan ohmuro rima ohnong akit net pora kasip nangsi biking bokong pora atpat papatin krismas 1,000 sa birhitipra pora nang atpangop.  
\v 3 Nang atpat mandapat tahe pora tanggap ditin timbas tanggap temnong deingop. Mat mandapat Gin kuuhan among among pati ihirnong dasuh matiprarim tem ohom oh ha indinoh. Patin krismas 1,000 birhima sa timbas hatipra. Timbas hahrit tem adapuma nang oh arpit mandatporhan gar dik tit kot marasa sa indipra rima tem oh apama kimin daken dara rambup mara kanmat mandangop.   
\p
\v 4 Kanmat mandatporhan gahan noh wandeioh Jisas ohnong na mandatin ina ham orhe mengo Got ohe mengo oh ihir kasip ham marin patio rima ihirnong mahaw mar sutperhan ma haputpa da bap ihiroh masasa patingopa. Ama bap ire ma pateshe oh kurwah ohe danong na hamo orhornong arhur irat bok kis matpa ohe danong na hamo orhe win kis oh ire kinbi teio bes teio na brak matpao ama ihat pateshe han bap ire da oh masas patingopa. Ihir ihat patin Krais oh Gin Satan ohnong tanggap tem apat mandamur. Gurhe nohsi tap ham ihirnong papindin ohe kakhan hat patin krismas 1,000 birhim timbas hatipramur pora kuuhan ihirnong dahamar satin inasi matporhan ihir kakhan ire tongnopti tei oh tongnoma ire hrepnong mar paptingopa.  
\v 5 Ohri it dasi ham ma masapri bap ihiroh amaru hat ihirnong Got ohe meng pisaptio rima mahaw mar ma supti han ihirri ihat masaprimur. Komdapat krismas 1,000 birhim timbas hatporhan ma masapri ihiroh be hapuripti bap kuuhan dirmur.  
\v 6 Ohri ma masapri bap ihiroh Got ohe ongeng mat papat han ihir ohoh ihan ihir amamsi bap ihirmur. Ama ihiroh komdapat it hapura dipdipwi batbet dar ma patepri ohe batbet oh ihir na datiprimur. Na dara Got ohe ap yawar nita bap hama atamreima Krais ohsi kakhan ham patin krismas 1,000 birhitipramur.   
\s1 Satan ohnong sutipra ohe meng oh  
\p
\v 7 Ama 1,000 Krismas birhim timbas hatporhan Satan ohnong ap akanmar ma ataputip oh it oh adapuma arpit mandatipramur.  
\v 8 Arpit mandatporhan oh marasa Goksi; Magoksi aw pe mong pe mong mong mama pati han bap gonsi Goko Magoko ma poripti ihirnong dasuh mat pisapramur. Dasuh mat pisaporhan ihir Arpin ma hapat dahama Satan ohe danong na hat pati bap ihirsi gusutinmat tam ban hatin na satin hatin han bap ihir tap tei hatiprimur.  
\v 9 Tap tei hama en tahat susa aw pe mong pe gonsi en tahat saprimur. Susa Got ohe nita bap ire imin apnong parper maro orhe bopor mat pat ap mutuhnong parper maro matiprimur. Parper mara sutpero ma dahaya tei mah aw teidapat irat has tit wandasa ihirnong suma timbas matipramur.  
\v 10 Ihirnong sum timbas matporhan Satan oh ihirnong dasuh mat pisapat hano rim Got oh tahe por kwei mianpang hatin har hapat dahnong matipramur. Ma matipra dah oh kurwahsi; kurwah orhe dasuh meng pisapat hansi ite ma matir dahnong oh tahe por mandatipramur. Tahe por mandatporhan ihir batbet oh duut orhor kwitem timbas mong da timbas dipdipwi batbet dar pateprimur.   
\s1 Pepe dik oh hanip sama imtipra ohe meng oh  
\p
\v 11 Gahan noh wandeioh kakhan ire pohon tongnopti tei has namei hatin tit patgop. Has namei hatin tit pat oh ohe bas oh orhor tongnot patgop. Tongnot pathan aw tansi mong tan ihit ohnong wamara kas ham ruprup taham timbas hangopa. Timbas ham it ti na tarpangopa.  
\v 12 Timbas hatporhan gahan noh it wandeioh han kamah winsi hat pateshe hano borop win timbas hat pateshe hano ama haputpa han ire da bap oh er dasi; yah dasi gonsi gon orhe tongnot pat rum dason oh tandeit patingopa. Ihir ihat tandeit patina tit brak ban oh meng eimat paten dasi ohe brak oh dapengopa; ti brak ban ma dape oh hanip iraire ma ihat sashe ohe meng brak ban oh dapengop. Dapema sama iraire ma ihashe oh Hanipyah oh brak teinong ma matip meng oh wamara ama meng ohe kis yan orhorwi apingop.  
\v 13 Ma apdap oh tom sor hruo haputin supo hapuriya han ire da ma sus pati ap teio ama ihir haputpa han ire da ma marin paptidapat Gin pepe diko rim it dahamar ha satinoh rim orhe pat duupnong darhengopa. Darhetperhan orhor pomat sama ire ma ihashe ohe pe yan kiswi nitat mat apingop.  
\v 14 Aprisa haputin supo hapuriya han ire da ma sus pati apteio ama ihitnong tanggap isip mong tan hatin hat irat taurpat dahnong ohom tahe por mandangop. Ama tanggap isip mong tan hatin irat taurpat dah oh it hapura dipdipwi batbet dar patepri tanggap tem ohmur. Ihtin dahnong ohom tahe por mandangop.  
\v 15 Mandapat eimat paten ohe brak matip tei oh ire win ma na brak matip ihir ama win timbas ihirnonghe tahe pora ama irat taurpat tanggap isip dahnong ohom tihi tahe por mandangop.   
\c 21  
\s1 Aw tano mong tano erer kopenohe ma hatipra ohe meng oh  
\p
\v 1 Rihohe mong tano aw tano sor hru tano oh timbas hatporhan noh wandeioh kopenohe mong tansi; aw tansi tarpaya hangop.  
\v 2 Tarpatperhan noh it wandeioh awam ongeng mat papat ap mutuh kopenohe Jerusarem ap mutuh oh aw tei mahat Got ohsi patdapat wanpatgop. Kuu ire han datperim ma awat tahaptiru hat awat yahnap tit ara wanpatgop.  
\v 3 Wanporhan noh amraoh orhe pohon tongnopat bas amdapat kasip mengtei We. Gur gin amratinmuro. Gin Got ohe ma patepra oh orhe kuuhan ire mutuh oh patepramuro. Oh ihat patin ihirhe orhe nita bap kuu han ham pateprimuro. Arpin napormuro. Got orhorsi; orhe nita kuuhan ihirsi tap hat pateprimuro.  
\v 4 Ihat tap hat patema kin tom oh agatmatipramuro. Agatmara rihohe ma ihapti erer oh timbas hah ohoh ihan haputin dao saheih ham yimapti dao batbet hapti dao oh gonsi timbas hatipramuro rim hangop.   
\p
\v 5 Ritporhan gahan kakhan ire pohon tongnopti hatin tei ma tongnot pat han Got orhor Gur amratino. Noh erer moh kopenohewi deimuro ringop. Ripat it nohnong Nohe meng moh arpin tarpatin meng ohoh ihan go brak matinmur napongop.  
\v 6 Naporpat it Noh rih patesuhru patru patepra hanmur. Norhor duup mara tamreima timbas deipat hanmur. Ihpat han norhor erer oh gonsi mamen mat manda ohmur. Hanip ihir tom din ham diper riyahanoh noh Yahwa. Gur mama tom uuptem eimat paten dasi nahatin tom uuptem moh yan timbas be dina poripramur.  
\v 7 Er danong ire merwi mar suya han ihirnong noh ama han ihirnong norhe brer mara nohe erer oh apripramur. Aprisa Got noh ire armi nahatin han itap hat paptepramur.   
\p
\v 8 Oh norhe brer ihirnong ma paptepra ohe meng oha; kat han ihir Noh Jisas ohnong dindeipatin kat han ihirdapat nohnong nitiprio rim kas ham mandapti ihiro Jisas ohe danong na hapti bapo Got nohnong bisei nahapti bapo hanip supti bapo bisei saw hat sapti bapo amkimon hapti bapo hanapsup ihirnong armi deipti bapo dasuh hapti bapo ama ihapti kuuhan ihirnong oh noh tahe pora kwei mianpang hatin har hapat irat taurpat dahnong tahe por mandatipramur. Ama har hapat dah oh komdapat it hapur dipdipwi batbet dar patepri dah ohmur. Ama ihtin dahnong ama ihapti ihirnong tihi tahe por mandatipramur napongop.   
\s1 Kopenohe ap mutuh patepri ohe meng oh  
\p
\v 9 Gahan Got orhe bopor heisup beshei dis nitat ma marin pati enser ihir bes enser oh pepe ruumsup apin ohe beshei dis oh marin pat enser oh aprisa Jon nohnong Gin sipsip bap ohe kuu ma datiproh oh gin noh gonong namgitiprohmur. Go apris wamtinmur napongop.  
\v 10 Naporpat noh Got ohe Yahsup oh nohe mutuhnong maham kasip nahat napapatin ohoh nambura yei isip putei kanong mahat naprungop. Naprusa Jerusarem ap oh ama ongeng mat papat ap mutuh oh aw tei ohot Got ohsi patdapat wanpatin noh wamtip.  
\v 11 Ama ap mutuh oh Got ohe has ohsi has hat wanpatgop. Ama has oh kwei yan isip mohopti kwei jaspa hatin hama tom kakeir wandeiya hatin kakeirsi pitap teinap hat wanpatgop.  
\v 12-13 Ama ap mutuh parper mara kwei doho ma patan pruhupa oh puteinapmur. Ama kwei doho ohe gwatei oh atan marpatdaphe yitir gwatei hangopa. Atan wapatdapathe yitir gwatei hangopa. Kat gatgatdapathe yitir gwatei hangopa. Kat gatgat dapathe yitir gwatei hangopa. Ihtiporhan tap mat oh nathei gwateisi hangop. Ama nathei gwatei bok oh Isrer nathei han bap ire winsi gwatei kat kat oh nitat winsiwi mar abrak mat pihipa hangop. Ihtin nathei gwateisi oh pat hatporhan nathei enser ihir ama nathei gwatei kat kat oh nitat goshama wamat patingopa.  
\v 14 Ama ap mutuh ohe doho kamenhe nathei kwei kasip kamensi hangop. Ama kwei kamen ohe bok oh sipsip bap orhorsi tap sashe nathei han ire win oh nitat brak mat itpa hangop.   
\p
\v 15 Ihtiporhan nohnong apris wamtin ma napor enser oh ap kis kaw gor kweisi hatpa kis kaw oh marin patdapat Gin noh kis kaw mohsi ap mutuh moh kis deio doho boknong kis deio gwateinong kis deio mat pisaprohmur rim kis deingop.  
\v 16 Kis deioh katwamtin ohesi hios potin ohesi tap kis 2,400 kiromita orhorwi hangop. Hapat hatnonghe tap kis orhor 2,400 kiromita hangop.   
\p
\v 17 Ama ap mutuh ohe kis oh tap dawi hatporhan gahan enser oh it doho boknong kis kaw dip mar kis mat prungop. Kis mat pruoh 144 kaw hangop. Ma kis matip oh hanip diradire mat kis deiptiru mat kis deingop.  
\v 18 Ap mutuh ohe doho bok oh jaspa kwei yan ruumsan sar mohopti kweisi hatpa hangop. Ap mutuhnonghe gor yahnap kweisiwi hatperhan kakeirsi hama pitap teinap hangop.  
\v 19 Ap mutuh ohe doho kwei kamenhe tihan tihan kwei yan ruumsansi ma mohopti kwei yahnap yahnap kwei ohsi isip kwei kamen nathei kwei moh ohe boknong oh mar awat matpa hangop. Awat matpa oh tit kwei kamen ohe boknong oh jaspa kwei ohsi awat matpa hangop. Tit kwei kamen ohe boknong oh awkwitam tan hatin sapaia kwei ohsi awat matpa hangop. Tit kwei kamen ohe boknong oh namei hatin aget kwei ohsi awat matpa hangop. Tit kwei kamen ohe boknong oh hapen hatin emerar kwei ohsi awat matpa hangop.  
\v 20 Tit kwei kamen ohe boknong oh gihsi; tohansi bopok tahatip sadonikis kwei ohsi awat matpa hangop. Tit kwei kamen ohe boknong oh gihtam konirian kwei ohsi awat matpa hangop. Tit kwei kamen ohe boknong oh hop hatin krisorait kwei ohsi awat matpa hangop. Tit kwei kamen ohe boknong oh hapen hatin berir kwei ohsi awat matpa hangop. Tit kwei kamen ohe boknong oh hop hatin orhe kwei topas kwei ohsi awat matpa hangop. Tit kwei kamen ohe boknong oh hapensi; hopsi bopok tahatin kwei krisopres kwei ohsi awat matpa hangop. Tit kwei kamen ohe boknong oh awkwitam hatin orhe kwei haiasin kwei ohsi awat matpa hangop. Tit kwei kamen ohe boknong oh gihtamsi; kwei ametis kwei ohsi awat matpa hangop. Ama nathei kwei kamen ire boknong oh imat yahnap kwei ohsi awat matpa hangop.  
\v 21 Nathei gwatei oh gonsi girpomsiwi hat patgop. Ap mutuh ohe nitat ap mandap ma sapti oh gor yahnap kweisi itperhan kakeirsi pitap teinap hangop.   
\p
\v 22 Ama ap mutuh oh ap yawar oh ti na patgop. Hanipyah kasipnap Got ohsi; sipsip bap ohsi itait ap yawar hatin hat pati ohoh ihan ap yawarhe ti na patgop.  
\v 23 Ama ap mutuh ohe hashe Got orhe has oh atan hatin heiro sipsip bap ohe has oh tanggam has hatin heiro hat papti ohoh ihan atano hayopo ire has oh timbas ham ti na pati hangopa.  
\v 24 Ihitwi imat has mat paptin among among aw pe mong pe kuuhan pati ihir gonsi ama has tei oh saya apriya ham pateprimur. Ihat patin among among kakhan hat pati ihir iraire win kasip kamah hano ama erer oh ama ap mutuhnong oh poprisiprimur.  
\v 25 Ama ap mutuh oh kwitem timbas mong da timbas mong da titwi hat patepra tei ohoh ihan ap mutuhnong sapti gwatei kathe tapuriyao dapuyao na haprimur. Tanput orhorwi patiru pateprimur.  
\v 26 Ihtin ap mutuhnong ihir iraire win isipo kamah hano ama yah han erer oh ama ap mutuhnong poprisiprimur.  
\v 27 Yah erer oh poprisiprimura; ongeng tahat na pati hano bisei hapti hano dasuh hapti hano ama ihapti han ihir ama ap mutuhnong oh na rosiprimur. Sipsip bap orhe eimat paten ohe brak teinong win ma atip bap ihirwi rosiprimur.   
\c 22  
\s1 Got orhe has teiwi dipdip patepri ohe meng oh  
\p
\v 1 Gahan enser oh tom tit dama eimat paten dasi hatin ohe tom tit Jon nohnong namgingop. Ama tom oh Gotsi sipsip bap itaite pohon tongnopti tei duupdapat marasa kakeirsi hasnap tom apripatgop.  
\v 2 Aprisa ama ap mutuh ohe mandap mutuh oh sapatgop. Sapathan tom kat pepuk kat pepuk irat dam gwe dama eimat paten dasi hen ohe irat yot oh marhupa hangopa. Ama irat yot ite gwe ma dam timapat oh tit hayop tit tima tit hayop tit tima ihatwi dam timapat irat yot oh patingopa. Ama ohe irat yot ite rin oh among among pati kuu han ihirnong gonsi wan hatinmat ara ire ina bok ayah deipat ohe irat rin ohmur.   
\p
\v 3 Ama ap mutuhnong oh Got oh na bopor mara heisup mat papat han erer oh ama ap mutuhnong oh ham eimat na patepramur. Gotsi sipsip bap itaite pohon tongnopti tei oh tongnot patin Got orhe atamreipti han bap ihir orhe danong hama armi mar papteprimur.  
\v 4 Ihir orhe win oh ire kinbi tei patin orhornong wamaro armi maro haprimur.  
\v 5 Ihat ma patepri oh Hanipyah Got orhe has ohsiwi kwitem timbas mong da timbas has teiwi orhor mong da teiwi pateprimur. Ihat patepri ohoh ihan atan oh ha has hatinoh. Tanggam suhum has matpera ti na dahatiprimur. Has titwi hat patina kuuhan ihir Got ohsi kakhan titwi hat dipdipwi pateprimur.   
\s1 Jon ohe wamar brak matip meng oh gonsi dam tarpatipra ohe mengmur ritip ohe meng oh  
\p
\v 6 Gahan enser oh Jon nohnong Gwe wamara ma brak dei meng moh gonsi arpinnap dam tarpatipra ohe mengmuro. Got oh orhe meng pot pison han ihirnong orhe Yahsup ohsi kasip mara ma darherpat Got orhor nohnonghe Gin mama erer moh kimsi orhor ma tarpatipra meng oh go susa ohnong pinggitinmuro napor nohnong nadarhetporhan noh mama apris gin namgi ohmur napongop.  
\v 7 Napotporhan gahan Jisas oh Gin gur amratino. Nohe aprin oh noh kapkap apripramuro. Ihan Jon ohe wamara ma brak dei meng moh amram dindeiya kuuhan gur amamsi gurmuro ringop.   
\p
\v 8 Noh Jonmur. Norhor mama ihtipra ohe erer moh noh wamaro amramo hama noh mama brak dei ohmur. Gahan noh erer oh amrama wandeipat enser ma namgi enser ohe duup oh bos hamnong ham timama ohe danong ham armi matporim ihtip.  
\v 9 Noh kopen armi matpor ihpatin oh Es. Go nohnong inahatipra. Noh gwe ma tamreipato Got ohe meng pisapti han gwe taptemo mama brak meng amram dindeipti hano ihirsi; diradir gonsi tap Got ohe atamreipti han bap dir ohoh ihan go nohe danong ham armi nahatipra. Got orhe danongwi ham armi mat paptenmur napongop.   
\p
\v 10 Napora it nohnong Gwe wamara ma brak dei meng moh ihir satipri daham remdipra. Ama tarpatin oh kakduup hah ohoh ihan ama ihtipra ohe meng oh ha am hatingwe daham pitap teinong matinmur.  
\v 11 Jisas noh kapkap apripra ohoh ihan er da hat ma sapti han ihirhe ama er danong orhorwi hat ha sashengwemur. Bisei da hat ma sapti han ihirhe ama bisei da hat orhorwi ha sashengwemur. Duutin dasi ma ongeng tahat pati han ihirhe duung dasi hat ongeng tahat orhorwi ha sashengwemur ginapongop.   
\p
\v 12 Napotporhan Jisas oh Gin gur amratino. Nohe kimsi orhor kapkap ma apripra oh hanip gure ma ihapti ohe yan oh gonsi napinmat apripramur.  
\v 13 Noh rih orhor patesuhru ginhe patru kaputhe patepra hanmur. Norhor duup mara tamreima timbas deipat hanmur.   
\p
\v 14 Ihtin ohoh ihan kuuhan gure da oh watah gahmar has mat paptem aripti gur ama ap mutuh ohe ap gwatei oh rosa eimat paten ohe dasi hen ohe irat gwe oh kapom din inasi nahat napapat bap gur ohoh ihan ama kuuhan gur amamsi hat paten han gurmur.  
\v 15 Oh ap mutuh ron inasi nahat napapat bap gure meng ohmura; ap mutuh ohe kot dahdapat hat pati ihiroh mamarumur. Mian da hatin hat ma sapti bapo amkimon hat sapti bapo bisei saw hat sapti bapo hanip supti bapo dasuh Got ohe danong ham armi deipti bapo hanip ihirnong dasuh deiyahan yaho daham ma dasuh deipti bapo ama kuuhan ihir ap mutuh ohe kot dahdapat hat pati bap ihirmur.   
\p
\v 16 Gahan Jisas oh Noh Jisasmur. Noh patin orhor nohe pepuh oh Depit oh irat bap ohe tan hat marhupmur. Gahan Depit oh irat ohe tan hetporhan noh it ohe puh ire bokdapat irat bap hatin hat tarpatipmur. Noh yinggarheis mong da hatin hah tei ma has hapat hatin han oh nohmur. Ihat ma pat han noh norhe enser ohnong Gin go susa ma ihtipra ohe meng erer oh sus sios ihirnong potinmur pora darhetporhan oh susa Jon ohnong gonsi meng erer oh pinggimur ringop.   
\p
\v 17 Got ohe Yahsup ohsi; sipsip bap ohe kopen ma dat kuu ihitdapat dirnong Guragur sipsip bap ohnong Gin go aprina porinmur. Potperhan ama amraya kuuhan gurhe tap meng amaru mat orhor Aprina porinmur. Ama giporipti han bap gur tom din ham dipera dahaptihanhe apris mama tom eimat paten dasi hen ohe tom oh yan timbas be napin tom ohoh ihan apris be daprimur.   
\p
\v 18 Jon nohnong namgitporhan brak mat nasar meng moh gurhe kassi hat sama ihirnong potin ohe meng brak mat nasarmur. Guragure kassi hat ma pat meng oh mamaru. Gur mama kis tei meng moh patin wan meng tit ohe pe dip mar poriyahanoh ama han gurnong oh Got ohe mama brak tei er matipra ritip ohe er sup oh ama kuuhan gure boknong nahatipramur.  
\v 19 Gur mama kis tei meng moh patin orhor kat meng na riyahanoh ama kuuhan gurnong oh Got oh Gin gur ongeng tahat pat ap awam mutuhnong rosa irat gwe eimat paten dasi nahatin ohe irat gwe oh kapot dina na napotipramur. Na napora orhor baso napor namdatipramur. Ihan gur mama meng moh amrama pomat marin ha patengwe rim noh mama kasip mengtei napor mama nabrak dei ohmur.   
\p
\v 20 Mama erer ihtipramur ma ripat han oh Noh arpinnap kapkap kimsi orhor apripramur napotporhan noh mama brak dei ohmur. Gin noh Hanipyah Jisasa. Arpinwa. Gin gorhor aprina porpatmur.   
\p
\v 21 Gin Got orhe gonsi nita gurnong Hanipyah Jisas orhe da orhor yah naham bapkei nahapat da ohsi nahat ha napaptenoh rim noh gurnong mama meng moh gurnong nabrak mara mama nadarher ohmur.  
\p Gin nohe meng oh kiwa.