\id LUK - Oksapmin NT [opm] -Papua New Guinea 1992 (web version -2014) 
\h Ruk 
\toc1 Ruk oh yah meng ma brak matip ohe meng oh 
\toc2 Ruk 
\toc3 Ruk 
\mt1 Ruk  
\mt2 oh yah meng ma brak matip ohe meng oh  
\ip Mama brak matip han Ruk oh Juda na hat patesuh han Grik ihirmur. Oh Jisas ohsi tap hat na sasuh han orhora; orhorsi tap hat ma sashe han ire meng amrama pomat daham am hapat mama brak matip ohmur.  
\ip Ruk oh mama meng rim ma brak matip oh Grik bap ihir Got oh Jisas ohnong dirsi namburin han nadarhetip ma hapat ha dahengwe rim brak matipmur.  
\c 1  
\s1 Ruk oh Noh Tiopiras gonong mama brak mat nasar ohmur potip ohe meng oh  
\p
\v 1 Nohan hanipyah kamoheim hat pat han Tiopirasa. Rih nure mutuh tarpam ma ihat pir ohe meng oh kat han ihirdapat ama meng oh nure bes tei brak matpera daham brak matirimur.  
\v 2 Ire ma brak matiri oh kat han ire kintei Jisas Krais ohe gonsi tamreim saporhan Got orhe meng pot pisapti han ihir wandeipti ritperhan ire wamara ritiri meng ohwi brak matirimur.  
\v 3 Ihir imat brak matiri orhor nohnong oh ama meng oh gonsinong oh noh potahat dahatahama pomat dahapat ohri ma ihat sasuh meng ohri daham brak deipat noh imat tit tit mat brak matpora daham mama brak mat nasar ohmur.  
\v 4 Go ire ma napotiri mengnong oh arpin meng ma hapat ha dahatinoh rim noh it pomat mama brak mat nasar ohmur.   
\s1 Enser oh Sekaraia ohnong Got oh brer tit napripramur potip ohe meng oh  
\p
\v 5 Herot oh Judia mong ohe kakhan hat patina gahan Sekaraia oh Got ohe ap yawar ohe hanat bok han hat patesuhmur. Ti hanat bok han hat ma pateshe han bap ihir Abaisa ihirmur ama porishe han bap ihiroh Sekaraia oh hanat bok han hat patesuhmur. Inap Irisabet uhhe Eron ohe puh ma hanat bok han hat pateshe ire puh orhormur.  
\v 6 Ite gamin dahe Got ohe kintei duutin dasi hat orhorwi susa Got ohe sawa mengo orhe porpat mengo ohwi rum mutuh matwi dindeishemur.  
\v 7 Yah hat sashe orhor brernong inap uh kasip ham brer timbas patin kusen haya paser haya hatpamur.   
\p
\v 8 Gahan tit dah tit Abaisa bap ire ap yawar ohe tamreipti dik oh hatporhan Sekaraia hanat bok han oh Got orhe kintei tamrein indingopri.  
\v 9 Tamreipatin iraire Nih Got ohe ap yawar ongengnap papat mutuh ros gapgwesi han oh Got ohnong atemtiproh rim ma kis deipti kwei ohsi kis deiyaoh Sekaraia ohe boknong hangopri. Hatporhan oh irat gap temtiperhan tuhup maras ma gapgwesi hapatru ama ihtin han irat gap oh atemtinmat Got ohe ap yawar ongeng mat papat dahnong rongopri.  
\v 10 Ros atendeipatin kuuhan kat gon ihirhe Oh ama han atendeipatin dirhe Got ohsi mengitpera daham ihirhe kot dah oh tarmur Got ohsi mengir inpari.   
\p
\v 11 Ihir kot dah oh ihat patin Sekaraia oh wandeioh Hanipyah Got ohe atamreipti han enser ihir tit han tit gapgwesi han atendeipti gwar tan oper tan oh tandeit patgopri.  
\v 12 Tandeit pathan sein bupang rim kas isip tit hatipri.   
\p
\v 13 Kas isip tit hatporhan enser oh We. Go kas hapra. Gwe Got ohnong ma dahandeipat meng oh Got orhor amram am hat patmur. Am hat pat ohoh ihan gwe inan Irisabet uh brer mon tit natipramur. Natporhan ohe win oh Jon potinmur.  
\v 14-15 Ama brer oh hanip yah hatporhan Hanipyah oh wamara yahnap han win isipsi hat pat hanhe dahatipramur. Ihtin han hatiprao rim itap gorhorhe weso rim amam isip tit ham patepramur. Be kuuhan kat ruumsan ihirhe Ihtin brer saro rim Wes ihtin brer saro rim amam hatiprimur. Hanip Brer orhornong oh wain tomo kasip er tomo oh na dapra hanmur. Orhe dahe sup uh ma sar tei orhor Yahsup oh teip mat orhorwi pisasipramur.  
\v 16 Imat isip mat pisapatin ama brer oh Isrer ruumsan kuuhan bap iraire danong hat sapti danong adapurkera Hanipyah Got ohe danong hen ohe danong deipramur.  
\v 17 Ihama Iraija ohe kasip ham ma tamreisuh ohe da hatin hat dara ohe tan hat Hanipyah ohe aprin mandap oh ohri han hat sapramur. Ohri han hat susa brer tamder iraire da na gosat pati da oh it irair tamder da gosat indin dasi mat pisapramur. Got ohe mengnong na amram sakarap mat sapti han ire dahe adapurkera duutin dasi hat ma sapti han ire da hatin mat apisasipramur. Ihama Hanipyah ohe nita hatin han ire danong amamen mat tei orhor sa apripra daham amamen matipramur pongopri.   
\p
\v 18 Gipot mandatporhan Sekaraia oh Wa. Nohhe paser hat tei uhe kusen hat tei moh noh kinhat gwe ma napor meng moh arpinhe dahatiproh potipri.  
\v 19 Gipotporhan enser oh Es. Got ohe duup tandeit pat han Gebrier nohmur. Ihat pat han norhornong Got oh Gin go yah meng mohsi susa ohnong potinmur napor nadarhetporhan noh apris gonong mama napor ohmur.  
\v 20 Gin Got orhor ama dik oh dam ha tarpatinoh potporhan arpin dam timdipra meng ma napor moh go Moh arpin menghe na dahah ohoh ihan go menghe na mengir meng timbas han hatin hat patin mameng moh dam tarpatporhan go it mengitipramur pongopri.   
\p
\v 21 Ameng oh imat ohnong porpatin ihir kot dahdapat trun tit minhan inpari. Trun tit minhan patim Han moh ap yawar mahamdapat kapkap na mara moh kinham sa kapkap na maro daham minhan inpari.  
\v 22 Minhan pater patima ire garhaya tei mah marongopri. Maraoh meng timbas han hatin ham kimiringopri. Oh kimirit mandatporhan ihir Moh Got ohe ap yawar maham wan han tit pinggi ma hapat dahatpari. Ihpat meng timbas han hatin hat patin beswi kis mar pinggim patenipatri.   
\p
\v 23 Iham ap yawar ohe tamreindin oh tamreima ohe tamrein indin dik oh timbas hatporhan it orhe apteinong susa patesuhri.  
\v 24-25 Patin gahan inap Irisabet uh brer ake hangopri. Brer ake hama Gin Hanipyah oh hinhina naham kuuhan ire nohnong naripti da moh gin yah naham napanggei ma hapat. Gin noh brer ake isip hahrit ire kintei pitap hatpor daham urhe ap oh treman indipmur. Treman patin hanen hayop sutipmur.   
\s1 Enser oh Maria uhnong Go mon Jisas ohnong itipramur potip ohe meng oh  
\p
\v 26 Irisabet uh brer akesi treman patin gahan hanen hayop oh sutporhan dop hayop oh Got oh enser Gebrier orhornong Gin go Gariri mong Nasaret apteinong sonmur.  
\v 27 Susa kuu horhor Maria uh Depit ohe puh Josep ohnong ihit sa gosdatipri rim kis mat apapti kuu Maria uhnong meng potinmur por Got oh ama darhetip oh.  
\v 28 Por darhetporhan enser oh arpin Maria uhe patnong susa We. Kor Maria go patda. Got oh gosi patim bapkei dasi isip nahat napapatri pongopri.   
\p
\v 29 Potporhan Maria uh amrama Epe. Got oh gonong bapkei nahat napapatmur ma napor meng moh kian meng sa napor daham da trun darhetipri.  
\v 30 Da trun darhetporhan enser oh We. Maria go da trun darher kas hatipra. Got oh go yahnap kuuo rim orhe da orhor yah nahat napapatri.  
\v 31 Orhor inahat napapat ohoh ihan go brer ake hama brer mon tit itiprari. Sarpat brer ohe winhe Jisas potinri.  
\v 32 Ama brer oh hanipyah winsi han ham tandaptuhutin han win isipsi han hatiprari. Hama putei mahat ma pat han Got orhe brermuro porin han hatiprari. Ihama rop Depit ohe Isrer ihirnong ohe hrepnong mar ma paptesuh ohe ap tan wanin oh oh datiprari.  
\v 33 Darpat Jekop ohe puh ihirnong ohe hrepnong mar eimatnap dipdipwi papteprari. Ohe hrepnong mar ma paptepra oh na timbas ham eimatnap orhe hrepnong mar papten han hatiprari pongopri.   
\p
\v 34 Potporhan Maria uh Epe. Noh han ihir tap na pat tei moh noh kinhat brer ake hama gwe ma napor brer oh itipra potipri.  
\v 35 Potporhan enser oh Es. Got ohe Yahsup oh gwe mutuhnong hatporhan putei mahat ma pat Got ohe kasip oh gonong gianahatipramur. Gianahatporhan ama ohe kasip ohe pe oh brer tarpatipramur. Tarpama go itipramur. Gwe ma itipra brer oh yahnap han ongeng tahat orhorwi patin ihir wamara moh Got orhe brer monmur porin brer itipramur.  
\v 36 Amratin. Gwe amun Irisabet uhhe Brer na sar kasip hatip kuumur ma poripti kuu uhhe gin kusen tei orhor brer ake ham dophei hayop sutmur.  
\v 37 Tit han tit Got oh na imtin hatin handa. Basra. Orhorwi gonsi indeipat han ohoh ihan orhor inahapatmur pongopri.   
\p
\v 38 Potporhan Maria uh Yahwa. Hanipyah orhe atamreipat kuu noh mama pat ohmur. Ihan gwe ma naporru ha nahatinoh potipri. Gipotporhan enser oh amrama mandam sangopri.   
\s1 Maria uh amup Irisabet uhnong wamar pip ohe meng oh  
\p
\v 39 Maria uh meng amrama patdapat gahan Judia mong yei mutuh mongnong kapkapwi hat ruhupri.  
\v 40 Rupat Sekaraia ite gamin ap oh rosa amup Irisabet uhnong Uum go patda por meng potipri.  
\v 41 Potporhan Irisabet uh amratporhan uhe brer ma ake mutuh pat brer oh tandapurkengopri. Tandapurketporhan Yahsup oh uhe mutuh oh ruumsan ham isipnap hangopri.  
\v 42 Ihpat Maria uhnong akitwi Got ohe bapkei naham ma yah nahapat da oh Maria gonong isipnap bapkei naham yah mat napapatmur. Kat kuu ihirnong imat na apripatmur. Gonongwi imat napin patmur. Gorhornonghe inahat napapatmura; gorhe ma itipra brernonghe bapkeisi mat orhor papatmur.  
\v 43-44 Go apris nohnong Uum go patda napotporhan kopen amrapatin orhor nohe brer ake mutuh ma pat brer mohhe amam ham taptaparmur. Taptapatporhan norhe Hanipyah ohnong itipra kuu moh bisei kuu nohe patnong nandarhe moh nohnong yah da tit naham nohe patnong nandarhe ma hapat dahahmur.  
\v 45 Gin Hanipyah ohe meng oh Go ihtipra kuu gomur napotporhan go Arpin nohnong inahatiprawa ma dahah kuu go amam isipnapsi kuu gomur pongopri.   
\s1 Maria uh Got ohe danong ham ga rima armi matip ohe meng oh  
\p
\v 46 Irisabet uh Maria uhnong meng potporhan Maria uh ga tit ama ritip oh.  
\q1 Nohe damdapat Hanipyah ohnong armi mar win isipsi adeipatmur.  
\v 47 Adeipat nohe nambutin Got oh patwa daham damdapat amam isipnap tit deipatmur.  
\v 48-49 Noh orhe atamreipat bisei kuu orhor orhor nohe danong ham inahapat ohoh ihan noh orhornong amam isipnap deipatmur. Kasipnap Got oh yahnap tit nahatporhan kuuhan gonsi ihir nohnong Uhnong Got oh amam isipsi mat papat kuu moho naporwi napapteprimur. Orhorhe ongeng tahat yahnap hat orhorwi pat hanmur.  
\v 50 Orhornong kas ham orhe danongwi hat pati kuuhan dirnong oh orhor hinhina nahat napapatmur. Napapatru han puh han puh ihirhe imat orhorwi orhornong kasa ham orhe danongwi hat ayahanoh ama ihat pati bap ihirnonghe hinhina da ohsi mat orhorwi paptepramur.  
\v 51 Orhe bes tei kasip han indeipatmur. Ma indeipat oh tit hanip ihir Nuhurwi ihtin han bap hat patimur daham iraire danongwi hat sapti han bap ihirnong oh er mat darherpatmur.  
\v 52 Ire hrepnong mar ma papti kakhan ire isip hat pati winnonghe ahatip deipatmur. Nuhurwi ihtin han hat pati ma hapat na daham iraire danong na hat pati bap ihirnong oh winsi han bap mar ire winnong adaptuhurpatmur.  
\v 53 Pahohsi hat pati dirnong oh yah han oh yah mat orhorwi napripatmur. Nuhur erer ohsi yah hat patimur ma dahapti bap ihirnong oh ire boknong andehhe ti na deima be darherpatmur.  
\v 54 Dire awher ihirnong Kaput noh ihtipramur por ma rit asarisuhru mat orhor inahapatmur.  
\v 55 Ma inahapat oh Eprahamo orhe puh dirnongo oh orhe hinhina mat paptepramur ma potip mengnong oh orhor daham hinhina nahat napapatmuro.  
\m rima Maria uh Got ohnong armi mara ga ama ritip oh.   
\p
\v 56 Maria uh ama ga oh rimo hama amup Irisabet uhsi patin hayop yitir sutporhan it urhe apteinong ama waihip oh.   
\s1 Irisabet uh mon Jon ohnong itip ohe meng oh  
\p
\v 57 Gahan Irisabet uh brer ake sum brer mon itipri.  
\v 58 Itporhan tap aptei hano urhorsi taptem bapo ihir Got ohe uhnong hinhina mar isip ma yah dei ohe meng oh amrama uhe patnong sus urhorsi irair tap hat amam hatpari.   
\p
\v 59 Ihama gahan brer itir dik oh patin kir oh hatporhan kuuhan ihir Gin mon ohe eit watah agatmatin dik hah ma hapat daham tap tei hangopari. Tap tei hapti brer ohe win oh itap orhe winsi Sekaraia potinmur pongopari.  
\v 60 Potperhan sup uh Es. Ohe win oh Jon potiprohemur pongopri.  
\v 61 Potporhan ihir Wa. Orhe uum mam ihirhe ihtin win tit patda. Ihan ihtin win oh na atiprohemur pongopari.  
\v 62 Pora itap oh kian win atinmur potiproho rim bes tei kis mar dahandeingopari.  
\v 63 Dahamtiperhan oh iraire ohe tei brak tahapti tan tit bes tei kis mar poprina potporhan ihir dat apingopari. Dat apriperhan oh Brer ohe win oh Jonmur por brak deingopri. Brak matporhan ihir wamara da trun darhengopari.   
\p
\v 64 Ihtiperhan itap ohe meng mandap ma anggut patesuh oh asut orhor kapkap meng mandap oh adaputporhan Got ohnong armi mar mengingopri.  
\v 65 Mengitporhan orhorsi tap aptei han ihir wamara Got oh wan tit dei moho daham ihirhe kas hatpari. Kas hama Judia yei mong aptei aptei moh gospot pipari.  
\v 66 Gospot susa aptei aptei oh ama meng oh amrapti ihir Hanipyah orhe kasip ohsi pat brer moho daham Ihan ohe ma indipra oh kinhatin han hat sa patepra daham ihirhe gospor apetpari.   
\s1 Sekaraia oh Got ohe danong ham ga ritip ohe meng oh  
\p
\v 67 Jon ohe itap Sekaraia ohe Got ohnong ma armi matip oh mamaru ham armi matipmur. Ma armi matip oh Yahsup oh ohe mutuhnong ruumsan hama teip hatporhan oh propet ire Got ohe meng ma poriptiru hat mengitipmur. Ma mengitip oh   
\q1
\v 68 Isrer dire Hanipyah Got oh gin nambutin ina dasi nahat napapat ohoh ihan orhornongwi armi mar papten han ohmuro.  
\v 69 Mama armi mar papten han orhor orhe atamreisuh han Depit ohe puh ire boknong oh dirnong namburin kasipnap han tit matporhan oh tarpam patmuro.  
\v 70 Ihat tarpam ma pat oh orhe meng pot pisashe han propet yahnap han ihirnong Noh gure namburin han tit napripramur potporhan ire ma risheru mat orhor gin dirnong namburin han oh napriporhan oh tarpam patmuro.  
\v 71 Namburin han oh ihat patim dirnong mahaw naham heisup nahat napapti han ire bes teinong nahat napapatin ire bes teimdap dirnong nambur yah teinong nahen han hat patmuro.  
\v 72 Ihat dirnong namburin han ma napin pat oh diradire awher ihirnong Noh gurnong hinhina naham yah nahapramur ma potip meng ohsi; ihirnong ma rit atip meng ohsi gin norhe ritip meng oh gin imtipora daham dirnong gin napin patmuro.  
\v 73 Rih rit ma atip meng oh dire aw Epraham ohnong Arpin noh inahatipramur por awam tuketipmur.  
\v 74 Meng por ma awam tuketip oh Epraham gwe puh ihirnong noh mahaw han ire bes teidapat ambura yah teinong matipramur. Matporhan ihir norhe natamreindin oh kas timbas sa natamreipri.  
\v 75 Natamreima norhe kintei nuhur Got orhe hanmur rim ongeng mat papti da ohsi; duutin da ohsi hat ma sapti da ohsi hat sa patepri rim Epraham ohnong gipor awam tuketipmur.   
\q1
\v 76 Gin nohe mon go Hanipyah ohe aprin mandap oh gori hat sus mandap amanhem amamen matipramuro. Go imat amamen matporhan ihir wanahama gonong Mama han moh putei mahat ma pat Got orhe propetmur naporiprimur.  
\v 77 Gori sus mandap ma amamen matipra oh Hanipyah orhe kuuhan ihirnong Hanipyah oh gure er hat sapti yan oh natimbas deipat nambutipramur por am mat pisashemuro. Go ihirnong gipor am mat pisapatin ihir am hatiprimur.  
\v 78 Got orhor manap dasi naham hinhina nahapat han ohoh ihan orhor dirnong namburin han ma napripra oh atan maras mong da deipat hatin han oh dirnong napripramur.  
\v 79 Imat dirnong napriporhan oh kwitem dus patim haputin ina hat pati bap ihirnonghe has teinong matipramur. Mara manap dasi ham yah hat orhorwi sashen ohe mandap oh namgit napisasipramur.  
\m rima Sekaraia oh Got ohnong armi mar ga ritipmur.   
\p
\v 80 Iham patdapat brer Jon oh hanip yah hapat Got ohnong dahatin ohe da oh isip hat pipmur. Isip hat sapatin oh Got orhe danong hatinmat hanip timbas irat timbas mong dusnong susa atei indipmur. Patdapat gahan Isrer ire kinteinong pitap hatin dik hah ma hapat daham ire kintei tamrein sasuhmur.   
\c 2  
\s1 Maria uh Jisas ohnong itip ohe meng oh.  
\r (Matyu 1:18-25)  
\p
\v 1 Jon oh kopen brer gar hat patin Rom ire mong gonsi ohe hrepnong mat papat kakhan oh Sisa Ogastas oh Gin Rom nure hrep napapti kuuhan gur gonsi guragure nitat tarpatpa apteinong susa win oh ha nabrak matingwemur pora brak mar aptei aptei ama darhetip oh.  
\v 2 Ama hanip win ma abrak matpa oh Rom ire kopenat ma hanip win atpa ohmur. Ama kopenat win atpa oh Sairinias oh Siria mong ohe duuptei kamoheim ham papat han hat patin win atpamur.  
\v 3 Aptei aptei oh meng darhetporhan kuuhan gonsi ihir Gin nuranure nitat tarpatpa aptei win ha natingwe daham iraire nitat tarpatpa apteinong ama pipa oh.   
\p
\v 4 Josep ohhe Depit ohe puho rim rop Depit ohe tarpatip aptei Betrehemnong saporo rim Gariri mong Nasaret aptei mandama ihit gamin Judia mong Betrehem apteinong ama ruhpa oh.  
\v 5 Ma ruhpa oh Maria uhhe itait sa gosdatipri rim kis mat pati kuu uh brer akesi hat patin orhor win ha natingwe daham itait ama ruhpa oh.  
\v 6 Rus Betrehem aptei patin Maria uh brer ake suma  
\v 7 duuptei brer mon ama itip oh. Hanip ire ma timapti ap oh hanip bokota tei ohoh uh brer oh burmakau ire timapti ap ama itip oh. Sarpat watah tansi parpar mara burmakau ire den asaripti dah oh ama itip oh.   
\s1 Maria uhe brer sar ohe meng oh enser tit apris sipsip papti han ihirnong potip ohe meng oh  
\p
\v 8 Maria uh brer ma itip kwitem oh sipsip papti han ihir ap mutuh ohe kot pe ohom kwitem iraire sipsip ihirnong ama papinpa oh.  
\v 9 Ihir iraire sipsip ihirnong paptin Hanipyah orhe enser tit ire pati tei oh pitap hatipmur. Pitap hatporhan Hanipyah orhe has isip tit ire pati tei oh gonsi ama has matip oh. Has isip matporhan ihir ama kas isipnap hatpa oh.  
\v 10 Kas isipnap hatperhan enser oh We. Gur kas hatipri. Nohri gurnong yahnap meng kuuhan gonsi gur amamnap hatin ohe meng tit napotinmat popripatmur.  
\v 11 Gure amamnap hatin ohe meng oh mamarumur. Gin mama kwitem morhor Depit ohe ap mutuh moh kakdah pati kuuhan gurnong namburipra brer tit sariyamuro. Oh Got orhor Ihirnong sa amburipra rim kis mat pat han Hanipyah Krais ohnong sariyamuro.  
\v 12 Gin gur sus wandeiyaoh burmakau ire den asaripti dah oh brer oh watah tansi parpar mar it pat hatiprohmuro. It pathan gur wamara moh arpin ihtin brer ma hapat dahatiprohemuro ama potip oh.   
\p
\v 13 Gipotporhan kapkapwi aw tei mahat ohe enser ruumsannap ihir pitap ham ohsi tap hat patingopari. Ihat patima Got ohnong armi matin ga oh rimo hangopari.  
\v 14 Armi matin ga oh rimo ma hatpa oh Puteinap aw tei mahat ma pat Got oh hassi Got ohoh ihan orhornongwi armi mat paptenmuro. Orhordapat amam nahat napapat kuuhan gur manap dasi goshat patenmuro rim Got ohnong armi matin ga oh ringopari.   
\s1 Sipsip papti han ihir Jisas ohnong wamtipa ohe meng oh  
\p
\v 15 Enser ihir meng oh pora it aw teinong ruhum mandatperhan sipsip papti han ihir Gin dir Betrehem ap mutuhnong sapera. Susa Hanipyah ohe gin mama napor meng oh sus wamtipera gosham  
\v 16 kapkapwi angmat pipari. Angmat sus wandeiyaoh Mariasi Josep ihit patingopari. Brer oh burmakau ire den asaripti dahnong mat saroh patgopri.  
\v 17 Pathan ihir wamara enser ohe ma Ihtin brer tit sarmur ma por meng oh ihir meng oh kuuhan ihirnong pot ama pihipa oh.  
\v 18 Pot pisaperhan ama kuuhan amraya bap ihir Sipsip papti han ihir kian meng naporiya daham da trun ama darhetpa oh.  
\v 19 Maria uh ire ma riya meng oh amrapat uh ire ma rit saya meng oh urhe da mutuhnong mar ama dahat patesuh oh.  
\v 20 Sipsip ma papti han ihirhe Enser ohe ma naporru hat pat hah moho ihan nure amraya wandeiya haya moh Got oh arpin ihtin han hat pat ma hapat daham Got ohnong armi maro win adaptuhuro ihat it ama pipa oh.   
\s1 Jisas ohnong win atpa ohe meng oh.  
\p
\v 21 Maria uh brer mon oh sarpat gahan beshei dah timama kir oh eit watah agatdeipti dik oh hatporhan Gin win atpera daham rih enser ohe brer oh uhe ake mutuhnong na hat patin Kaput go brer sarpat winhe Jisas potinmur ma potip wanin win orhor ara Jisasmur ama potpa oh. Pora ama inpa oh.   
\s1 Simionsi Ana ihit Got ohe ap yawar Jisas ohnong wamaro amam maro matpa ohe meng oh  
\p
\v 22 Rih Moses oh brer sariya kuu ihiroh 40 dah timama ire a sup oh timbas hapatmur ma ritipru hat ihit gaminhe atei orhor patin a sup oh timbas hatporhan Gin dite duuptei brer mon moh Got orhe bes teinong matpera daham Jerusarem ap mutuhnong ruhpari.  
\v 23 Brer mon moh Got orhe bes teinong matpero rim ma ruhpa oh rih Hanipyah ohe sawa meng ritporhan ma brak matpa mengnong daham ihtipamur. Ma brak matpa meng oh mamarumur. Erer oh duuptei brer sara han mon haho orhein bap haho hahhanoh Moh Got orhe ongeng mat apapat han bapo rim ongeng mat apaptenmur ritporhan brak matpamur. Ihit gamin ama giritporhan brak matpa mengnong oh daham mon duuptei brer ohsi pruhupari.  
\v 24 Prusa Hanipyah oh sawa meng ritporhan ma brak matpa oh Ner kurwam yotdo kuptutur bap yotdo sum natinmur ritporhan ma brak matpa meng oh dahama sum apinmat ner yot oh marima brer ohsi Got orhe ap yawarnong ruhpari.   
\p
\v 25 Ire tamder ma ruhpa oh Jerusarem ap mutuh oh tit han tit Simion oh patesuhmur. Oh Got ohe danong hat patim duutin danongwi hat sasuh han ohmur. Oh Isrer dirnong Got orhor sa nambutipra daham minhan patesuh han ohmur. Got ohe Yahsup oh ohe mutuhnong hat ma patesuh han ohmur.  
\v 26 Ihat pat han ohnong Got ohe Yahsup oh ohnong Go na haput patin orhor Hanipyah oh ihirnong sa amburipra rim kis mat papat han Krais oh apirit go wamtipramur potporhan oh amengnong dahat patesuh han ohmur.  
\v 27 Ihat pat han ohnong gahan Yahsup oh Gin go Got ohe ap yawarnong ronmur por am matporhan oh ama ruhup oh. Simion oh ros patin gahan Maria ihit gamin sawa mengnong amram iraire duuptei brer mon ihirnong ma deiptiru matpero rim apnong ama pruhupa oh.  
\v 28 Properhan Simion oh wandeipat Nohe minhan pat brer oh gin moh ma hapat daham brernong ambura Got ohnong Weso pora ama armi matip oh.  
\v 29 Ma armi matip oh  
\q1 Hanipyaha. Gwe ma Go na haput patin orhor ihtin han tit apirit go wamtipramur ma napongop meng oh gin noh wamara da yah hahmuro. Gin gwe natamreipat han nohnong gorhor Gin go timbas hahmur naporhan noh da yah ham amam dasi hat orhor timbas hatipramuro.  
\v 30-31 Gwe namburin han kuuhan gonsi ire kintei mamen mat ma napin pat oh gin norhe kin wandeimuro.  
\v 32 Ama namburin han oh Juda na hat pati han bap ihirnong am mar amburin ohe has han ohmuro. Gorhe han Isrer dirnonghe has isipsi nahat has nahat napapten han ohmuro.  
\m pora Simion oh Got ohnong weso por ama armi matip oh.   
\p
\v 33 Ameng oh potporhan supsi itap ihit amrapti Epe. Moh ihtin brer ohoh oh ihtin meng por sa daham ihit ama da darhetpa oh.  
\v 34 Da darhetperhan Simion oh ihitnong Got oh gutnong bapkeisi nahat sa napaptepra ama potip oh. Pora sup uhnong Brer mohri Got oh Go sus Isrer kat han er hat pati han ihirnong timbas deinmur. Kat han ihirnong eimat paten dasi mar amburinmur por kis matip brermur. Oh Got orhe imat napapat ohe da oh namgitin han hat patin kat han gon ihir ohnong garmar er meng por indeiprimur.  
\v 35 Indeipti ire ma dahat pati da oh pitap teinong matiprimur. Mon ohnong imtiperhan sup gwe danonghe hanat tong napor bopor nakapotiprimur ama potip oh.   
\p
\v 36 Simion oh meng oh sup uhnong gipor mandatporhan Got ohe ap yawar ma pat kuu uh patgopri. Ama kuu uhe win oh Ana uhmur. Uh Panyuer ohe kor Asa ohe puh ihirmur. Uh Got ohe meng pot pisapat propet hat pat kuu uhmur. Uh han dar gamin patina beshei krismas birhitporhan imap oh haputipmur.  
\v 37 Haputporhan urhe tahem hat patesuhmur. Ihat patin urhe krismas oh 84 hatipmur. Ama kuu kusennap uh Got ohe ap yawar oh na mandama kwitem timbas mong da timbas Got ohsi mengitinmat tit dah den na dam Got ohsi mengiro ohnongwi armi maro hat pat kuu kusen uh patgopri.  
\v 38 Ihat ma pat kuu kusen uh Mariasi Josep ihit brer ohsi ap yawar oh ros patin uh apris ite duupnong oh hama Got ohnong Wes Got go brer moh napino por weso pongopri. Weso pora Jerusarem ap mutuh pati kuuhan dirnong Got oh nambutiprawa daham ma minhan pati ihirnong Ana uh brer ohe meng oh ama am mar porisuh oh.   
\s1 Nasaret apteinong it sus patin brer ma dok hatip ohe meng oh  
\p
\v 39 Maria ihit gamin brer ohnong Hanipyah ohe sawa meng oh Brer duuptei brer han mon sariyahanoh mimat pisashenmur ritporhan ma brak matpa mengru mat orhor ama pihipa oh. Pisusa gahan Gariri mong iraire aptei Nasaret ap mutuhnong it ama pipa oh.  
\v 40 Sus patim brer oh barip hapat dok ham kasip hat ama pip oh. Kasip hat susa dahe dakuu ham isip hat ama pip oh. Got ohe damdapat ma yah deipat da ohhe bapkei mar isip mat ama pihip oh.   
\s1 Jisas oh dok hah tei Got ohe ap yawarnong ruhup ohe meng oh  
\p
\v 41 Ihama Jisas ohe sup gamin ihit dipwi krismas dik haya tei Gin heimsi apnong einggahara na sutip ohe dik Pasopa rim tarmur den ruumsan dapti dik haya ma hapat daham Jerusarem ap mutuhnong rushemur.  
\v 42 Ihaptin gahan brer ohe krismas oh nathei hatporhan gahan Pasopa dik haya ma hapat daham ma ruptiru hat irair tamder ama ruhpa oh.  
\v 43-44 Rusa tarmur den dapti dik oh timbas hatporhan supsi itap ihit It Nasaret apteinong wapero rim ama waihpa oh. Mon oh hanip trun waptin ohoh ihirsi tap hat wapat ma hapat daham sup gamin ihithe ama waihpa oh. Basra mon oh Jerusarem ap mutuh orhor patin ama mandam waihpa oh. Wasa mandap oh timdinmat sup ihit gamin Brer oh ditadite nitao ditadite yah hano ire tap patkin daham ama angmat pipa oh.  
\v 45 Angmat sayaoh mon oh ama ti na pat hatip oh. Ti na pathan it Jerusarem ap mutuhnong angmat ama ruhpa oh.   
\p
\v 46-47 Angmat rusa Jerusarem ap mutuh oh angdeiptin yot dah ama timdipa oh. Gahan bimrip oh angmat susa Got ohe ap yawar oh ros wandeiyaoh Got ohe meng por am deipti han ire mutuh oh tongnom ire meng amramo ire ma poriya meng oh it dahamaro it diteim poro hatporhan ihir amrapti Epe. Brer moh dakuu ham am hat pat mengwi napor moho daham ihirhe bupang rim aperiptin oh ire mutuh oh ama tongnot pat hatip oh.  
\v 48 Tongnot pathan sup gamin ihit wamara ama sein bupang ritpa oh. Sein bupang rim sup uh Ita nuhut gonong da er ham ma angnahapti oh brer go kianorim nuhutnong ihtin ruumsup da nahato ama potip oh.  
\v 49 Potporhan oh Gut nohnong kianorim ina ruumsupsi hat angnahapti. Gut Ohe ma tarpatir oh itap orhe ap moh atamreindinmat tarpatir ma hapat. Ihan oh itap orhe ap oh pat ma hapat na daham gut nohnong angnahaptida ama potip oh.  
\v 50 Potporhan ohe Noh at orhe apnong moh atamreindinmat tarpatirmur ma por meng oh sup gamin ihit ama na dahatpa oh.   
\p
\v 51 Ihama ap yawar oh mandama brer oh supsi; itap itaitsi it Nasaret ap mutuhnong ama waihpa oh. Wasa supsi itap ite poriya mengnongwi amram patesuhmur. Sup uh ohe ma ihtirnong oh da mutuhnong mar ama dahat patesuh oh.  
\v 52 Ihat patin Jisas oh hanip yah ham dakuu ham am hat son ohe da oh isip hat ama pip oh. Isip hat isip hat saporhan Goto kuuhano ire amam matin dahe isip isip mat dapsi mat ama pihipa oh.   
\c 3  
\s1 Jon oh Jisas ohe aprin mandap ma amanhetip ohe meng oh  
\r (Matyu 3:1-12; Mak 1:2-8; Jon 1:19-28)  
\p
\v 1 Rom ire gapman oh Taibirias Sisa oh duuptei kakhan hat patin krismas rumhei ama birhitip oh. Gahan ihat patina ohe hrep oh Pontias Pairat oh Judia mong ohe duuptei gapman ham patesuhmur. Herot oh Gariri mong ohe duuptei gapman ham patesuhmur. Herot ohe nap Pirip oh Ituria mongsi Trakonaitis mongsi among yot ohe duuptei gapman ham patesuhmur. Raisenias oh Abirini mong ohe duuptei gapman ham patesuhmur.   
\p
\v 2 Ihat patin Anassi; Kaiapas ihithe hanat bok han ire duuptei han hat pateshemur. Ama ire ihat pateshe dik oh Sekaraia ohe mon Jon oh irat timbas hanip timbas dusnong oh sus patesuhmur. Sus patin Got oh orhe meng oh Jon ohe da mutuhnong ama matip oh.  
\v 3 Imtiporhan oh susa Jodan but mong aptei aptei oh sus Kuuhan ihirnong Gure er hat sapti pe oh Got oh er yan naham gure boknong napripramur ma dahat pat yan oh it yansi na naham hanhan mar ha mandatinoha daham da tamburketinmuro. Da tamburkera kuuhan ihir Gin er danong kom asar mandaya ma hapat ha dahengwe rim tom wayonmuro pot ama pisasuh oh.  
\v 4 Pot ma pisasuh oh rih Got ohe meng ritporhan propet Aisaia ohe brak matip mengru mat pisasuhmur. Ritporhan Aisaia ohe ma brak matip meng oh mamarumur.  
\q1 Irat timbas hanip timbas dusdapat han tit aprisa We. Hanipyah ohe aprin mandap oh duutinwi mar amanhem amamen matinmuro.  
\v 5 Ma amamen matipri oh tom but mong ma gonsi pat mong oh mongsi teip matiprimuro. Teip mara yei monghe gatong pora tap kat tit tanwi matiprimuro. Mandaphe tathosi mandap oh duutin mandapwi matiprimuro. Runo wano mandaphe tap kat yahnap tan titwi matiprimuro.  
\v 6 Imtiperhan kuuhan gonsi ihir Got ohe namburpat da oh wamar am hatiprimuro por uarpatmur.  
\m ritporhan Aisaia oh brak matipmur.   
\p
\v 7 Amaru hat orhor Jon oh Aisaia ohe ma brak matipru hat patin kuuhan kat gon ruumsan ihir ohe patnong ama apdapa oh. Apriperhan Jon oh Gur ina teimdapat yah hat pati hatin hat pati orhora; damdapat inapawam bap hatin hat pati han bap gurmuro. Gurnong nih Gur tomwi wayahanoh gure er hat saperhan Got oh heisup naham er yan napinmat kakduup mamen mat ma nat pat oh dat namdatiprohmur nih naporit gur tomwi wapero daham apripti.  
\v 8 Gur tomwi wapero daham apripti gur guragure er hat sapti da oh mandatperhan ihir wanaham Ire er hat saptingweri da oh gin mandata ma hapat. Gin yah hatwi sapti ma hapat dahatin da oh ihirnong pinggit pisaptidapat apris tom wayonmur. Gur Nuhur Epraham ohe puh nuhur ohoh ihan Got oh batbet yan oh na napriprawa ma dahapti da oh dahapri. Gur Nuhurwi Epraham ohe puh ohoh ihan er dasi hat patin orhor nambutiprawa dahapri. Basra. Wan kweinong mohhe Got oh Epraham ohe puh matin hatinmur.  
\v 9 Gin orhor Got oh sen marima irat gwe moh dam na timahanoh kakersi gatmar mandatinmat mamen tahat patmur. Ihat mamen tahat pat ohoh ihan yah hat son ohe da oh dam na timahan ama dam na tima han gurnong irat ohe tan sen ohsi kakersi gat nahama irat teinong nahatipramuro ama giporisuh oh.   
\p
\v 10 Giporpatin ihir Ihan nuhur yah hat indinmat kinhatper por ama dahamtipa oh.  
\v 11 Por dahamtiperhan oh Gur watah yot hat patihanoh tit watah timbas hat ma pati han ihirnong aprishenmur. Denhe timbas hat pati han ihirnong ti aprishenmur ama potip oh.   
\p
\v 12 Potporhan takis yan ma daripti han ihirhe aprisa Jon ohnong Tisa. Nuhur yah hat indinmat oh kinhatper por ama dahamtipa oh.  
\v 13 Por dahamtiperhan Jon oh Gur gapman ohe takis yan ma daripti oh iraire ma naporiya kis orhorwi darinmur. Titsi napin por wan ohsi adaripri ama potip oh.   
\p
\v 14 Potporhan Rom ire dupsi han bap ami ihirhe aprisa Gin nuhuroh yah hat indinmat oh kinhatiprohe por ama dahamtipa oh. Por dahamtiperhan oh Gur ire mani adatinmathe guragure kasip haya ohe pe oh net por adaripri. Tit oh ire mani oh adatinmat Noh gonong Oh ihat er hat patgwer hanmur potiprohmur pora dasuh kas meng por ire mani oh behe adaripri. Guragure tamreim mani ma dariptihe Titsi napriyaneng dahapri. Guragure kis ma napriya oh Yahwa dahat patenmur ama potip oh.   
\p
\v 15 Jon oh ama ihtin meng oh kuuhan ihirnong porpatin ihir amrama Gin Got oh ihirnong amburin han tit adarhetipramur rim ma kis matip han Krais oh gin aprin kakduup hah ma hapat ama dahatpa oh. Dahat pati tei ohoh ihan Mama han moh Krais orhorda da Krais oh kom apripra ihat daham ama apetpa oh.  
\v 16 Ihat daham apetperhan Jon oh Es. Noh oh basmur. Noh tomwi napatirpatmur. Kasipnap han oh kom apripramur. Ma apripra han oh kasip isipsi han oh apripramur. Nohe kasip oh ohe kasip hrepdapat hat patepramur. Oh kasip yahnapsi han ohoh ihan noh bisei han hatin hat pat ohoh ihan noh orhe tongap nangnong noh na arpitin inasi hat patmur. Ihtin kasipnap han tit aprisa gurnong Got ohe Yahsup ohsi; gure danong nahirmatin ohe irat has hatin ohsi nohe tom ma napatirpatru nahat gure mutuhnong namtipramur.  
\v 17 Ohe ma apripra oh wit gwe pomtin ohe sapor ohsi marim apripramur. Aprisa ama sapor ohsi aim orhe dam orhe matinmat saksak matipramur. Saksak mara wit dam oh orhe saripti apnong matipramura; aim oh ruprup mara hirmar irat teinong matipramur. Irat teinong ma matipra irat oh na tikimapat irat teinong matipramur ama potip oh.   
\p
\v 18 Jon oh amaru mat orhor kuuhan ihirnong Got ohe yah meng oh sawa mengtei ama porisuh oh.   
\s1 Kamoheim Herot oh Jon ohnong karapus matip ohe meng oh  
\p
\v 19 Jon oh sawa meng imat porpatdapat gahan Gariri mong ohe gapman hat pat han Herot ohnong Go arwan ohe inap Herodias uhnong adaro gorhe ti er da ti er da hat uso ma ihat sapat oh go er hat sapat hanmuro ama potip oh.  
\v 20 Potporhan Herot ohe er hat ma sasuh da oh gahan tit ma er hatip oh Jon ohnong ambura karapus ama matip oh.   
\s1 Jon oh Jisas ohnong tom patitip ohe meng oh  
\r (Matyu 3:13-17; Mak 1:9-11)  
\p
\v 21 Jon oh na karapus hat patina kuuhan ihir apriperhan tom patirisuhmur. Tom patirpatdapat gahan kom Jisas oh apriporhan tom ama patitip oh. Patitporhan oh maras kot tei oh Got ohsi mengripatin gahan aw tan mahat tanpura  
\v 22 Got ohe Yahsup oh ner kurwam hatin hat wandasa ohe bas oh tongnongopri. Tongnotporhan aw tei mahatdapat meng tit Jisas ohnong Go norhe bopor nahat napapat brermuro. Gwe ma ihat sapat oh norhor da yah ham amam nahat patmuro gipor hangopri.   
\s1 Jisas ohe han ropir ire win oh  
\r (Matyu 1:1-17)  
\p
\v 23 Jisas orhe krismas oh 30 birhitporhan Gin tamreinpora daham orhe tamreindin oh duup mar ama tamreindip oh. Duup mara tamrein sapatin kuuhan ihir Han moh Josep ohe mon ma hapat ama dahashe oh. Josep oh Hirai ohe monmur.  
\v 24 Hirai oh Matat ohe monmur. Matat oh Ripai ohe monmur. Ripai oh Merkai ohe monmur. Merkai oh Janai ohe monmur. Janai oh Josep ohe monmur.  
\v 25 Josep oh Matataias ohe monmur. Matataias oh Emos ohe monmur. Emos oh Neam ohe monmur. Neam oh Esrai ohe monmur. Esrai oh Nagai ohe monmur.  
\v 26 Nagai oh Meat ohe monmur. Meat oh Matataias ohe monmur. Matataias oh Semen ohe monmur. Semen oh Josek ohe monmur. Josek oh Joda ohe monmur.  
\v 27 Joda oh Joanan ohe monmur. Joanan oh Resa ohe monmur. Resa oh Serababer ohe monmur. Serababer oh Siartier ohe monmur. Siartier oh Nerai ohe monmur.  
\v 28 Nerai oh Merkai ohe monmur. Merkai oh Edai ohe monmur. Edai oh Kosam ohe monmur. Kosam oh Ermadam ohe monmur. Ermadam oh Er ohe monmur.  
\v 29 Er oh Josua ohe monmur. Josua oh Eriesa ohe monmur. Eriesa oh Jorim ohe monmur. Jorim oh Matat ohe monmur. Matat oh Ripai ohe monmur.  
\v 30 Ripai oh Simion ohe monmur. Simion oh Juda ohe monmur. Juda oh Josep ohe monmur. Josep oh Jonam ohe monmur. Jonam oh Eraiakim ohe monmur.  
\v 31 Eraiakim oh Meria ohe monmur. Meria oh Mena ohe monmur. Mena oh Matata ohe monmur. Matata oh Natan ohe monmur. Natan oh Depit ohe monmur.  
\v 32 Depit oh Jesi ohe monmur. Jesi oh Obet ohe monmur. Obet oh Boas ohe monmur. Boas oh Sarmon ohe monmur. Sarmon oh Nason ohe monmur.  
\v 33 Nason oh Aminadap ohe monmur. Aminadap oh Atmin ohe monmur. Atmin oh Anai ohe monmur. Anai oh Hesron ohe monmur. Hesron oh Peres ohe monmur. Peres oh Juda ohe monmur.  
\v 34 Juda oh Jekop ohe monmur. Jekop oh Aisak ohe monmur. Aisak oh Epraham ohe monmur. Epraham oh Tira ohe monmur. Tira oh Neho ohe monmur.  
\v 35 Neho oh Serak ohe monmur. Serak oh Reu ohe monmur. Reu oh Perek ohe monmur. Perek oh Eber ohe monmur. Eber oh Sera ohe monmur.  
\v 36 Sera oh Kenan ohe monmur. Kenan oh Apaksat ohe monmur. Apaksat oh Siem ohe monmur. Siem oh Noa ohe monmur. Noa oh Ramek ohe monmur.  
\v 37 Ramek oh Metusara ohe monmur. Metusara oh Inok ohe monmur. Inok oh Jaret ohe monmur. Jaret oh Mahararer ohe monmur. Mahararer oh Kenan ohe monmur.  
\v 38 Kenan oh Inos ohe monmur. Inos oh Set ohe monmur. Set oh Adam ohe monmur. Adam oh Got ohe monmur.   
\c 4  
\s1 Satan oh Jisas oh er hat ha sonoh rim kis mat pihip ohe meng oh  
\r (Matyu 4:1-11; Mak 1:12-13)  
\p
\v 1 Got orhe Yahsup oh Jisas ohe mutuhnong ruumsan ham teip hatporhan oh Jodan tom dah oh mandama it orhe apteinong saporo rim ama pip oh. Sapatin mandap oh Yahsup oh Gin go hanip timbas irat timbas mongnong sonmur por pisaporhan oh ama hanip timbas irat timbas mongnong sus ama indip oh.   
\p
\v 2 Sus patin Satan oh apris Gin Jisas oh er danong hat ha sonoh daham ohe danong kis mar wamat angopri. Imat wamat patin Sande dophei ama hatip oh. Sande dophei ma ritip oh Jisas oh den na dama be patin Sande dophei ripat be patin ohoh pahoh isip hatipri.  
\v 3 Pahoh isip hatporhan er da nahapat han Satan oh Jisas go Noh Got orhe brermur ripat ohoh ihan go gin kwei moh den mara dinmur pongopri.  
\v 4 Potporhan oh Go giritipra. Brak matpa mengnong moh dahatinmur. Ma brak matpa oh Hanip gur den ohe kasip ohsiwi yah hat eimat paten dasi na haptimur rim brak matpamur. Ihat brak matpa ohoh ihan den dam eimat paten dasi na haptio rim noh gwe ma napor meng oh amram na imtiprohmur potipri.   
\p
\v 5 Potporhan gahan Satan oh Jisas ohnong Dit wannong tit sapera pora mong yei kanong prungopri. Prusa ka hatdapat kakhan ire hrepnong mar papti mong oh aw pe mong pe mong moh asut orhor gonsi pinggis pongopri.  
\v 6 Pinggis pora Gin go aw pe mong pe mong mong mama ire hrepnong mat papti ohe kasipo ire papti ohe pe ma win isip hapti ohe dao oh go wamtin. Ama ohe kasip oh norhe kasip hrepnong mat papatmur.  
\v 7 Ihan go norhe danong ham Norhe napapat Gotmur napor armi nahahanoh norhor ama namgi ohe kasip oh gonong napriprohmur pongopri.   
\p
\v 8 Potporhan Jisas oh Es. Got ohe ritporhan ma brak matpa meng oh mamaru hat patmur. Gur guragure Hanipyah Got orhe danongwi ham armi deiyao orhe atamreindin oh atamreiyao ham patenmur ritporhan brak matpamur. Ihtin ohoh ihan noh Got ohe danongwi ham armi matiprohmur. Gwe danong ham na armi nahatiprohmur potipri.   
\p
\v 9 Potporhan gahan Satan oh Gin Jerusarem ap mutuhnong sapera pora pisangopri. Pisusa Got ohe ap yawar putei hame kat kanong mahat prungopri. Prusa Gin go Noh Got orhe brermur ripat ohoh ihan go pung rim kakdahnong maham wayonmur.  
\v 10-11 Wahanoh ma brak matpa meng moh arpin tarpatiprohmur. Ma brak matpa meng oh mamarumur. Got oh orhe enser ihirnong Erer ihir ohnong er matipri. Ihan gur ohnong kwei trah tei tapdiprarim gur marin orhorwi pomat paptenmur porpatmur rim brak matpamur. Ihan go Got orhe brer ohoh ihan ama brak matpa mengru nahatiprohe ohoh ihan go pung rim kakdahnong wayonmur pongopri.   
\p
\v 12 Potporhan Jisas oh Es. Got oh ritporhan ma brak matpa mengnong moh dahatinmur. Gur Hanipyah ohnong be bokdushe kis deipri ritporhan brak matpamur. Ihtin ohoh ihan noh Got ohe danong akis mar hatin gwe meng namram pung rim na waprohmur potipri.   
\p
\v 13 Potporhan Satan oh Oh er da hat ha sonoh rim ti da ti da er hat son ohe da oh kis matipnong oh Jisas oh na imtiporhan oh Kimsi orhe gapa ham er hah tei oh noh kis deipramur daham mandam sangopri.   
\s1 Jisas oh Kopenat ma tamreindip ohe meng oh  
\r (Matyu 4:12-17; Mak 1:14-15)  
\p
\v 14 Satan oh Jisas ohnong mandam saporhan gahan Got orhe Yahsup oh Jisas ohe mutuhnong ruumsan mar teip matporhan ama ohe kasip ohsi it Gariri mongnong ama pip oh. Sus patin orhe ma ihat pat ohe meng oh kuuhan ihir rit saperhan aptei aptei ihir gon ama amratpa oh.  
\v 15 Amratperhan gahan Jisas oh iraire rotu ap ap oh ros meng ama am deisuh oh. Am deipatin ihir amrama gonsi ihir orhe winnong adaptuhur ama amam deishe oh.   
\s1 Jisas oh orhe aptei Nasaretnong saporhan imtipa ohe meng oh  
\r (Matyu 13:53-58; Mak 6:1-6)  
\p
\v 16 Jisas oh rotu ap ap oh ros meng am deipatdapat gahan orhe hanip yah hatip aptei Nasaret apteinong apingopri. Aprisa gahan Juda iraire tuperipti dik sabat oh hatporhan Jisas oh orhe tuperipti dik rotu ap rosa meng am deipatru mat meng am matporo rim rotu ap rongopri. Rosa Got ohe ritporhan ma brak matpa meng oh satporim tandeingopri.  
\v 17 Tandeitporhan ihir Got ohe meng ritporhan Aisaia ohe brak matip bok oh dat apingopari. Apriperhan oh dapema wandeipat mama brak matip meng moh satpora rim sangopri.  
\v 18 Ma sa oh  
\q1 Kakhan ihirnong wer kak tei amor ma kis deiptiru mat orhor nohnong Got oh orhe Yahsup ohsi Go gin mama Yahsup mohe kasip ohsi susa borop hat pati han bap ihirnong norhe yah meng moh pot pisashenmur. Pot ma pisasipra oh nang tatpat pati han ihirnong Gin gure nang tatpat ma pati oh Got oh gin arpit namdamur poro Gin gure kin kwi hat ma pati oh Got oh gin kin nadipekamur poro gipot pisashenmur. Gipot pisusa kat han ire hrepnong mar er mat papti bap ihirnonghe ambura iraire yah hat sashen ohe teinong mat pisashenmur.  
\v 19 Imat pisusa Gin Hanipyah orhe napanggeim yah nahatin dik oh gin hahmuro pot pisashenmur napor nohnong kis naham nadarhetirmur.   
\m
\v 20 potporhan Aisaia ohe brak matip meng oh Jisas oh sapat it tein mara rotu ap ma tamreipat han ohnong it aprisa ihirnong meng potinmat tongnongopri. Tongnotporhan kuuhan gonsi ihir Kian meng napotiproho daham kin oh ohnongwi wamat inpari.   
\p
\v 21 Wamat patin Jisas oh Gin Noh Aisaia ohe ma brak matip meng moh satporhan gur amram wanahat patin orhor dam tarpamur pora imat meng por am deingopri.  
\v 22 Imat meng por am matporhan ihir Er mat na rima yah mat orhorwi napor moho dahama amam mar win isip mat ama apihipa oh. Apisusa Han mohra hanip tap bap diradire Josep ohe brermuro. Gin ohe yah mat orhor dahatin mengwi naporpat moh kinhat sa am ham yah mengwi naporpato gigosham da darher ama apetpa oh.   
\p
\v 23 Apetperhan Jisas oh Gur guragure kusem han ihirnong ma poripti meng oh Kusem han go gorhe sik hat pat boknongri potahahrit nuhur wanahama Arpin hanhe dahatper ma poripti meng hatin mat gurdapat nohnong napotin ina hat patimur. Gur ihat napotin ina hat ma pati da oh gur Go Kapaneam aptei imtiporhan nuhur ma amratiri meng oh gin gorhe aptei mohhe ihtin da tit matporhan nuhur wamara Moh arpin ihpat hanhe daham am hatper napotin ina hat patimur pongopri.   
\p
\v 24 Porpat Gin noh gurnong arpin meng napotiprohmur. Got ohe meng pot pisapti han ihir wan apteinong sus meng potperhan wan ihir amram amam mar winsi deiptimur. Winsi deiptimura; iraire aptei oh meng potperhan amram amam mar winsi na deiptimur.  
\v 25 Wan aptei ihirdapatwi ihirnong winsi deipti ma hapat dahatinmat oh gur Iraija ohe ma patesuhnong dahatinmur. Oh patin oh tom mandap titapat patin krismas yitir birhima tit oh katket matipmur. Ihat patin den timbas ham pahoh isipnap hat pateshemur. Pahoh isip hat patin Isrer mong oh kuu tahem ihir arpin pahohsi patin orhor  
\v 26 Got oh Iraija ohnong Gin go sus ihirnong panggeitina por na darhetipmur. Wan mong Saidon mong ohe Sarepat aptei pat kuu tahem uhnongwi ha panggeitinoh rim Got oh Gin go urhe patnong sus panggeitinmur por darhetip.   
\p
\v 27 Iraisa ohe ma patesuhhe orhe han Isrer ihir trun han ihir ina mong mong moh tohohet susa er isipsi hat patin orhor ihirnong na yah matipmur. Wan mong Siria mong Neman ohnongwi yah matipmur pongopri.   
\p
\v 28 Jisas oh ama ihtin meng oh pot mandatporhan rotu ap ma pati kuuhan ihir amrapti Ohe mihat mengir moh nure danong na ham wan han ire danong ham ihat mengir ma hapat daham ihir gonsi heisup isip deingopari.  
\v 29 Heisup isip deipti ihir tandeima ohnong net pora ap mutuh ohe kot dahnong prongopari. Propti ap mutuh oh mong ka hatpa ohoh kuumat pas katnong matpero rim pas penong mat pisongopari.  
\v 30 Imat pisaya dus orhor oh ire mutuh amdapat orhor susa patru oh ama pip oh.   
\s1 Jisas oh mongsup ga at pat han ohnong mongsup ga apetip ohe meng oh  
\r (Mak 1:21-28)  
\p
\v 31 Jisas oh susa Gariri mong ohe ap mutuh Kapaneamnong ama waihip oh. Wasa patim iraire tuperipti dik oh rotu apnong rosa kuuhan ihirnong meng am deingopri.  
\v 32 Am matporhan ihir amrama Epe. Meng moh kasipnap meng amram dindeipti han ire meng hatin mat naporpat moho daham da tupnet ritpari.  
\v 33 Jisas oh rotu ap ros patdapat wandeioh mongsup oh ohe mutuhnong ga at pat han tit patgopri. Ihat patdapat akit kasip mengteiwi Jisas ohnong  
\v 34 Ai. Jisas Nasaret han go mongsup nure ma ihapti da moh go kinnahatporim ihpat. Noh gonong am hat patmur. Go Got oh Moh norhe ongeng mat papat brermur. Norhe darhetipramur rim nadarhetir han oh gomur. Ihtin han go mongsup nuhurnong er naham timbas nahatporim apripatkin pongopri.   
\p
\v 35 Potporhan Jisas oh Go meng kimirim ga taper maras sonmur por indeingopri. Por imtiporhan mongsup ga taper saporim hanip ohe mutuh orhor hanip ohnong eiprehet kakdah oh or sara ga taper maras sangopri. Maras ma pip oh hanip orhe ina bok oh yah hatwi patgopri. Mongsup oh na er mar us hangopri.   
\p
\v 36 Ihtiporhan kuuhan ihir Epe. Kasip mengsi pat han moh ohe atem tei ritporhan mongsup ihir amram maras sapti moho. Ohe meng oh wanohe kasipnap meng tit pat moho gosham ihirhe sein bupang rim da tupnet ritpari.   
\p
\v 37 Ihama ohe ma indeipat ohe meng oh ama mong ohe aptei aptei oh gonsi gospot ama pipa oh.   
\s1 Jisas oh Saimon Pita ohe birip uhnong yah matip ohe meng oh  
\r (Matyu 8:14-15; Mak 1:29-31)  
\p
\v 38 Jisas oh mongsup ga aperpat gahan ama rotu ap mandama kot tei ros Saimon ohe ap rongopri. Ap roporhan kat ihir aprisa Saimon ohe birip uh ina harsupsi ham timon patmur. Ihan go ros pomtinmur pongopari.  
\v 39 Potperhan oh uhe pat dahnong rosa uhe duup oh tandeipat Gin mama ina harsup go uhnong ma sut pat oh gin uhnong mandam timbas ham sonmur por imtiporhan ama ina harsup oh timbas hatporhan uh asut orhor kapkap masasa den temaro hama ihirnong pandengopri.   
\s1 Jisas oh sahsah sik hat pati han ihirnong yah mat pihip ohe meng oh  
\r (Matyu 8:16-17; Mak 1:32-34)  
\p
\v 40 Ihama atan wayon kakduup hah tei sahsah sik hat pati han ihirnong arwapir ihir Jisas oh ha pomtinoh rim ohe patnong popingopari. Popriperhan oh ama ire boknong gonsi bes marim pisusa yah mat pisangopri.  
\v 41 Yah mat pisaporhan mongsup oh ruumsan kuuhan ire mutuhdapat ga taper maras saperim akit kasip mengteiwi Jisas ohnong Go Got orhe brermuro pora ga taper maras saya saya hangopari. Ihat mengir maras saptin Jisas oh Mongsup ihir nohnong Got oh ihirnong sa amburipra daham nohnong kis naham ma nadarhetip han nohnong ihir am hat pati ohoh ihan ihir kuuhan ire kintei Moh Got orhe darhetip brerhe potipririm mongsup ihirnong baso pora indeingopri.   
\s1 Jisas oh Noh aptei aptei oh gonsi meng pot pisonmat apdormur potip ohe meng oh  
\r (Mak 1:35-39)  
\p
\v 42 Ihama timorimdapat kutkutwi orhor masasa Gin norhe teinong hama Got ohsi mengitporo daham hanip timbas dusnong ama pip oh. Sus patin kuuhan ihir De tei pato rim angmat sus ama wamtipa oh. Wamara ohnong Go wan apteinonghe sasipra. Nuhursiwi matei pateprimur por ama baso potpa oh.  
\v 43 Baso potperhan oh Es. Got oh nohnong Go Isrer ire aptei aptei oh gonsi Got norhe ihirnong paptepra ohe yah meng moh pot pisonmur napor nadarhetporhan noh apris yah meng oh napot mama napisapat ohmur. Ihan noh wan aptei ihirnong asohhe meng pot pisasiprohmur ama potip oh.  
\v 44 Pora Judia mong aptei aptei ohe rotu ap ap oh rosa meng pot ama pisasuh oh.   
\c 5  
\s1 Jisas oh aning ohe tei pinggitporhan Saimon Pitao ihir orhe danong ham erer mandam ohe kom pipa ohe meng oh  
\r (Matyu 4:18-22; Mak 1:16-20)  
\p
\v 1 Gahan tit dah tit Jisas oh tom hru Genesaret dinin tei oh tandeit patin kuuhan trun Got ohe meng amratperim ohe patnong apris ohnong rupnet pongopari.  
\v 2 Rupnet potperhan oh wandeioh aning supti han ihir irair aning mipti ohe ung oh gahmatinmat iraire bot yot oh tom dinin tei oh it patin aning mipti ohe ung oh gahdeiptingopari.  
\v 3 Ihaptihan Jisas oh tit bot oh Saimon ohe bot ohoh ama bot dahnong rusa bot nita han ohnong Gin noh masoteidapat ihirnong meng potiprohmur. Gin go mer nahat napisus tom hru teinong asoh nahatporhan noh ateidapat ihirnong meng potiprohmur potporhan oh imtiporhan oh bot bas tongnot patim kuuhan ihirnong meng por am deingopri.   
\p
\v 4 Meng por am mat mandapat Saimon ohnong Go gin bot moh kawsi mer mar pisusa tom hru dah ohe dason mutuhnong oh mat pisonmur. Pisusa guragure aning mipti ung oh aning oh ung ha tamitinoh rim ama tom hru danong matina pongopri.   
\p
\v 5 Potporhan Saimon oh Napapat hana. Nuhur aning ha tamitinoh rim ung oh kwi hapatin orhor tom hru dahnong mat patiru patin mong ma dahat oh aning oh ung ti na tamitmur. Onhamnap mong da hatmur. Ihat orhora; go ginapor ohoh ihan nuhur ung bot tei pisusa tom hru dahnong matiprohemur potipri.  
\v 6 Pora ihir arpin ung oh pisusa tom hru mutuh dahnong matpari. Matperhan aning oh ruumsannap tamima ung turkatin ina hangopri.  
\v 7 Ung oh turkatin ina hatporhan irair tap hat ma tamreipti han ihir tit bot ohsi apris ha napanggeitingwe daham bes poriang poriang potpari. Potperhan ihir arpin tit bot oh pisusa aning oh dara ama bot yot ite dahnong oh dar matpari. Dar deiptin bot yot oh teip hama ruum ham tom mutuhnong wayon ina hangopari.  
\v 8-10 Ihat orhor pisusa manggap tom dinin teinong deipti Saimon Pitao orhorsi tap hat tamreipti han Sebedi ohe mon yot Jemissi; Jon ihito ama tap tamreipti han gonsi ihir aning ruumsan ma taminong oh wamara Epe. Moh kinhatin da namgi daham da tupnet ritpari. Da tupnet ripti Saimon Pita oh Jisas ohe tong duup oh katin takir tongnom mem hapat Han moh orhe da oh duutin dawi hat sapat han ma hapat. Noh ohe tan hat na pat ma hapat daham ohnong Hanipyaha. Noh duutin dasi ham yah hat na pat han ohoh ihan go nohnong namdam sonmur potipri.  
\p Potporhan Jisas oh Saimon ohnong Go ihtin daham kas hatipra. Gin gorhe mama patru ma patepranong oh aning ung tamitperhan daripti ohe tan mat orhor hanip ihirnong ambur norhe han nadein han oh gorhor hat patepramur pongopri.  
\v 11 Potporhan ihir boto erer oh gonsi poprisa tom dinin tei orhor saripti ohe danong na ham eimat mandapti Jisas ohsi irair tap hat pipari.   
\s1 Jisas oh ina mong mong moh tohohet sapat han tit ma yah matip ohe meng oh  
\r (Matyu 8:1-4; Mak 1:40-45)  
\p
\v 12 Jisaso ihir susa tit ap mutuh tit patina gahan han ina gonsi moh tohohet sapat han tit apingopri. Aprisa Jisas ohe duup oh bos hamnong ham timama Hanipyaha. Er nahat napapat sup moh go yah nahatiprohhan yah nahatinmur por kandeingopri.   
\p
\v 13 Por kamtiporhan Jisas oh Dawa noh gonong yah nahatiprohwa pora bes oh ohe boknong marima Gin noh gonong yah nahahmur pongopri. Gipotporhan ohe ina mama gonsi tohohet sapat er oh asut orhor timbas hat mandangopri.   
\p
\v 14 Timbas hat mandatporhan Jisas oh kasip meng tei Gin gwe ina er mama yah hah oh be han ihirnongri sus poripra. Got ohe ap yawarnong susa hanat bok han ohnongri pinggitinmur. Pinggitporhan oh wanahama Gin yah hahhe. Gin ongeng tahat pati han ire boknong tohohet son sup apin ina timbas hahhe ha dahatinoh rim gorhe ina oh sus pinggitinmur. Pinggima Gin kuuhan ihir ohe ina tohohet sapat moh timbas hat ma hapat daham ha am hatingwe rim Moses ohe napor ma brak matip mengru apop tit pisusa hanat bok han ohnong apinmur. Apriporhan oh sum temar Got ohnong sa atiproh gipor darhengopri.   
\p
\v 15 Be han ihirnong poripra por anggutip orhor orhe ma indeipat meng oh aptei aptei oh isip hat ama pip oh. Isip hat saporhan kuuhan trun trun ihir Gin dirhe ohe pat teinong susa ohe meng amramo dire ma sik hat pati moh amaru naham yah nahamo ha nahatinoh daham ohe pat teinong apris tap tei hangopari.  
\v 16 Ihir ihat Jisas ohe pat teinong apriptin orhora; oh Norhe teinong hapat at ohsi mengira it apris kuuhan ihirsi mengitiprohwa daham hanip timbas irat timbas dusnong orhe sus itap ohsi ama mengrisuh oh.   
\s1 Jisas oh buh girirnet bes girirnet ritip han ohnong yah matip ohe meng oh  
\r (Matyu 9:1-8; Mak 2:1-12)  
\p
\v 17 Gahan tit dah tit Parisi bapo sawa meng am deipti han bapo ihir Gariri mong ohe aptei apteio Judia mong ohe aptei apteio Jerusarem ap mutuho ama aptei aptei amdapat apris kuuhan ihirsi tap ham tongnom amrat patin Jisas oh meng am deingopri. Hanipyah orhe sik hat pati han ihirnong yah matin ohe kasip ohsi hat patim meng am deingopri.   
\p
\v 18 Imat meng am deipatin kat han ihir buh girirnet bes girirnet ritip han tit kaw tei sara popingopari. Poprisa Jisas ohe duupnong matperim popris wandeiyaoh  
\v 19 hanip tambokot patihanoh kinmat pros ohe duupnong mandatin hapti ap hamekat san oh prusa Jisas ohe pat dason oh hamekat anggihir dapuma sik han ohe timon pat gwar oh kuuhan ire pati mutuhnong oh pasa Jisas ohe duupnong deingopari.  
\v 20 Matperhan Jisas oh popriya han ire danong awamar ihir Jisas ohwi yah matin hatin hanwa daham popriya ma hapat daham ire danong am hapat sik han ohnong Gwe er da hat saporhan Got oh ama ohe pe oh heisup nahat napapat da oh gin noh dat namdamur pongopri.   
\p
\v 21 Potporhan sawa meng am hat pati hano Parisio ihir ameng oh amrapti damdapat Wa. Hanip dire er da hat saperhan Got oh heisup nahat napapat da oh orhorwi hirmat namdapat hanmur. Hanip dir nih imat hirmat amdatiproh. Ihan ohe Got orhor hatin ham ma mengir moh oh Got orhornong dasei mar ihat mengirmur dahaya hangopari.   
\p
\v 22 Ihat dahayahanoh ire ihat dahaya da oh Jisas oh awamara am hapat Gur kianorim nohnong Oh Got ohnong dasei mar ihat mengirmur dahayao.  
\v 23 Noh gin gwe er da oh eimat dat namdamur porhanoh gur mutuh danong oh wamara Moh arpin indeihe daham am hatin hatinda. Basra. Na am hatin hatin da ohoh. Noh Gin go yah ham masas tandeim sona potporhan gur wamara Oh arpin indeipat hanhe daham am hatiprohemur.  
\v 24 Ihan gur Hanip Brer nohnong Oh arpin hanip dire er gap dat namdapat hanhe ha dahatingwe rim gin noh sik han ohnong Gin go yah hat tandeima gorhe napopriya gwar oh dar marim sona potiprohmur pora sik han ohnong Gin go yah hat tandeima gorhe napopriya gwar oh dat marima gorhe apnong sonmur pongopri.  
\v 25 Potporhan oh asut orhor ire kintei orhor yah hat tandeima orhe timon pat gwar oh dat marima Got ohnong armi mat orhorwi tandeim orhe apnong sangopri.   
\p
\v 26 Saporhan ama kuuhan ihir Gin dir wanohe da tit wandeiya moho gosham ihirhe da tupnet ripti bupat patiru ham Got ohe winnong adaptuhur armi deingopari.   
\s1 Jisas oh Ripai ohnong Go nohsi tap hat saper por ambutip ohe meng oh  
\r (Mak 9:9-13; Mak 2:13-17)  
\p
\v 27 Iham patdapat gahan Jisas oh susa takis yan darpat han Ripai oh takis yan darpat ap oh tongnot patin Jisas oh sus ama wamtip oh. Sus wamara Ripai go nohsi sashen han ham aprina. Nohsi sapera por aprina pongopri.  
\v 28 Potporhan oh arpin tandeima orhe erer oh atei mandapat Jisas ohe tapnong ham irair tap hat pipari.   
\p
\v 29 Tap hat susa Ripai oh Jisas ohe danong hatinmat orhe ap oh den isip tit tendeingopri. Temara den dinmat orhe yah han takis yan daripti han ruumsan bap ihiro orhe yah han kat han ihiro irair den dinmat tap tei hama den dipari.  
\v 30 Den daptin sawa meng ma am hat pati Parisio be Parisi bapo ihir wamara Jisas orhe pinggit pisapat han ihirnong We. Gur kinham takis yan kat pe gapah ham daripti hano sawa meng na amram er hat pati han bapo ihirsi tap ham den daptio por indeingopari.   
\p
\v 31 Por imtiperhan Jisas oh Es. Gur dahenmur. Gur kusem han ihirnong ma amburipti oh yah hat pati han ihirnong ha yah matingwe rim amburiptida da sik hat pati han ihirnong ha yah matingwe rim amburipti. Basra. Sik hat pati han ihirnong ha yah matingwe rim amburiptimur.  
\v 32 Amaru hat orhor noh yah hat pati han ihirnong Gur er danong kom asar mandanmur potinmat na apdapmur. Nohe ma apdap oh er danong hat ma sapti han ihirnong Gur er danong kom asar mandama Got ohe danong hat sonmur potinmat apdapmur pongopri.   
\s1 Jisas ohnong gwe pinggit pisapat han ihir kianorim Kakun den na diprohemur na ripti por dahamtipa ohe meng oh  
\r (Matyu 9:14-17; Mak 2:18-22)  
\p
\v 33 Jisas oh ihirnong gipotporhan kat han ihir Jisas ohnong Jon ohe pinggit pisapat han ihir Got ohsi mengitinmat oh ihir kakun den na dam Got ohsi mengitin danong ohwi ham ihir trun dah tit ihat saptimur. Parisi nure ma pinggit pisapti han ihirhe irair tap da orhorwi hat saptimur. Gwe ma pinggit pisapat han maihir den dino tom dino ohe danongwi ham sapti moh kianorim nure tan hat na saptio pongopari.   
\p
\v 34 Gipotperhan Jisas oh Ai. Gur mohnong dahenmur. Guragure yah han oh kopen kuu datporhan Kopen kuu daro rim ama han ohsi tap ham den amam ham daptimur. Oh patin oh kakun den awammur na riptimur.  
\v 35 Kwit ohnong mahaw ihir wan teinong matperhan oh na pat moho daham ohe danong ham saheih ham kakun den awammur rim na deyahanoh oh yahmur pongopri.   
\p
\v 36 Giporpat rihohe da ohsi; kopenohe da ohsi sahsah matipririm mama paham meng moh pongopri. Rihohe watah oh tem tahatporhan kopenohe watah oh gatmara bra tit dara rihohe watah temnong na apaptimur. Indeiyahanoh kopenohe watahnong gatmar er deiptimur. Rihohe watahnong oh orhe gon hat patin orhor kopenohe watah bra oh ohe boknong deiyaoh er deiptimur pongopri.   
\p
\v 37 Pora Tit dahatin ohe paham meng oh mohnong dahatinmur. Kopenohe irat gwe gap wain tom oh dara rihohe sahapti han ire watah san temnong na yohoptimur. Yohoyahanoh kopenohe irat gwe tom gap ohoh pipira purpat san ohsi tap hat timbas hatiprohemur.  
\v 38 Ihtin ohoh ihan irat gwe gap ohsi; san ohsi yah hat ha patengwe rim kopenohe irat gwe gap oh kopenohe sahapti han ire watah san temnong orhorwi yohoptimur. Amaru hat orhor kopenohe dasi; rihohe dasi sahsah na deiptimur pongopri.   
\p
\v 39 Pora Gin mama paham meng titnong mohhe dahenmur. Rihohe irat gwe wain tom gap dapti han ihir Kopenohe wain tom gapnong moh dipera dahaptida. Basra. Ihir Rihohe wain tom gapnong mohwi yahnapmur. Ihan rihohenong mohwi dam patepera dahaptimur pongopri.   
\c 6  
\s1 Jisas oh Tuperipti dik oh mihat patmur por meng am matip ohe meng oh  
\r (Matyu 12:1-8; Mak 2:23-28)  
\p
\v 1 Gahan tit dah tit Juda ire tuperipti dik oh Jisas ohsi; orhe pinggit pisapat han ihirsi den wit ru dahnong rosa den ru mutuh oh pipari. Susa orhe pinggit pisapat han ihir wit dam oh kapoma am oh bessi bipnok mar hir deipti dam oh dipari.  
\v 2 Daptin Parisi kat han ihir wamara We. Sawa meng oh Tuperipti dik oh denhe daripri. Awammur ritip dik moh gur kianorim den kapom daptio por indeingopari.   
\p
\v 3 Por imtiperhan Jisas oh Wa. Gur Depito orhorsi pati hano ire pahoh ham ihtiperhan ma brak matpa meng oh gur sam ti na dahaptida.  
\v 4 Ihir mamaru hatpamur. Ihir pahoh ham Depit oh Got ohe ap oh rosa Moh Got ohe asariyamur por asaripti den oh Depit oh dara dipmur. Dama kat orhorsi pati han ihirnong apriporhan ihirhe dipamur. Ire ma dipa den oh dire sawa meng oh Ama den oh be han bap ihir na daptimura; hanat bok han ihirwi dapti denmur sawa meng ohe ma giripat den oh dat dashemur. Den awam dat dipa orhora ire boknong ti na tarpatipmur. Ama ihtipa meng oh gur sama na dahaptida pongopri.   
\p
\v 5 Giporpat Tuperipti dik moh Hanip Brer norhe hrepnong mat papat ohoh ihan norhe da orhor Norhor ihtipora daham ihahhanhe yahwimur pongopri.   
\s1 Jisas oh tuperipti dik oh bes tan wasi han ohnong pomtiporhan garmatpa ohe meng oh  
\r (Matyu 12:9-14; Mak 3:1-6)  
\p
\v 6 Gahan tit tuperipti dik tit hatporhan Jisas ohsi; orhe pinggit pisapat han ihirsi rotu apnong susa ruhpari. Rosa Jisas oh kuuhan ihirnong meng am deingopri. Bes oper tandap wa hatip han tit patin meng am deingopri.   
\p
\v 7 Oh ihat meng am deipatin sawa am hat pati hano Parisi bapo ihir Tuperipti dik moh bes tan wasi han mohnong yah deihanoh tuperipti awam dik moh tamreipti dik hatin deihe por meng oh orhe boknong mar imtiprohemur daham wamat angopari.   
\p
\v 8 Ihat daham wamat patin Jisas oh ire danong awamar Ihat dahat pati ma hapat daham am hapat bes tan wasi han ohnong Gin go apris ire kintei moh tandeitina pongopri. Potporhan oh arpin sus ire kintei oh tandeingopri.   
\p
\v 9 Oh sus ire kintei oh tandeitporhan Jisas oh Sawa meng oh tuperipti dik oh hanip tamreim arwapnanah ihirnong panggeim yah deiyahan yahmur ripatda da na panggeim er deiyahan yahmur ripat. Tuperipti dik oh ha haputinoh rim er mar mandayahan yahmur ripatda da ambur yah deiyahan yahmur ripat. Guragur daham ritinmur pongopri.  
\v 10 Giporpat ire rumkin inanong sam wandeipat bes tan wasi han ohnong Mona. Gwe bes wa tan oh dirhis potina potporhan oh arpin dirhis poroh yahnap hat mandangopri.   
\p
\v 11 Yahnap hat mandatporhan Parisio ihir wandeipti Jisas ohnong heisup isipnap mara Gin dir ohnong kian nang tit ohe boknong matper ama gigoshatpa oh.   
\s1 Jisas oh nathei han ihirnong kis matip ohe meng oh  
\r (Matyu 10:1-4; Mak 3:13-19)  
\p
\v 12 Gahan tit dah tit Jisas oh Got ohsi mengitinmat yei mongnong susa Got ohsi mengir patru kwi has rima it mong ama dahatip oh.  
\v 13 Mong da hatporhan it aprisa orhorsi sapti han ihirnong Gin gur norhe pat teinong moh ruprup tahatina potporhan ihir ohe pat teinong sus ruprup tahatperhan Gin noh nathei han gurnong norhe mengtei norhe meng pot pisashen han aposer gurmur rim kis naham gure win natiprohmur pora kis mar ama ire win oh angopri.   
\p
\v 14 Ama nathei han ire win ma atip oh tit oh Saimon Jisas oh win tit Pita ma potip han ohmur. Tit oh Saimon orhe arwap Andru ohmur. Tit oh Jemis ohmur. Tit oh Jon ohmur. Tit oh Pirip ohmur. Tit oh Batoromyu ohmur.  
\v 15 Tit oh Matyu ohmur. Tit oh Tomas ohmur. Tit oh Arpias ohe mon Jemis ohmur. Tit oh Saimon ohmur. Saimon ohnong Moh Serot bap ihirmur poripti han ohmur. Tit oh Jemis ohe mon Judas ohmur.  
\v 16 Tit oh Judas Iskariot oh Jisas ohnong ma nang hatip han ohmur. Ama nathe han ihirnong Jisas oh kis deingopri.   
\s1 Jisas oh kuuhan ruumsan ihirnong tihan tihan mongsup ga apetip ohe meng oh  
\r (Matyu 4:23-25; Mak 3:7-12)  
\p
\v 17 Jisas oh orhe nathei han ihirnong kis mat mandapat yei ohotdapat irair tap hat waihpari. Wasa mong but yah tan tei oh koripti Jisas oh kuuhan ihirnong meng potporim ama mong but yah tan tei oh tandeitporhan orhorsi ma sapti kuuhan ruumsan kat ihir apris ohe duupnong hangopari. Hatperhan Judia mong Jerusarem ap mutuh ma pati kuuhano be aptei aptei ma pati kuuhano tom hru duup ma pati Taiasi Saidon aptei ma pati kuuhano ama aptei aptei gonsi pati kuuhan ihirhe aprisa Jisas ohe meng amramo nure tihan tihan sik ma hat pati oh Jisas oh yah nahamo ha nahatinoh rim tap tei hangopari.  
\v 18 Tap tei hatperhan tihan tihan mongsup oh dama er deipat bap ihirnong oh Jisas oh ti han ti han mongsup ga oh apera yah mat apisangopri.  
\v 19 Yah mat apisaporhan kuuhan gonsi ihir Hanip yah nahapat ohe kasip oh orhe bokdapat patin yah nahapat moh ihan orhe ina boknong marinpera daham orhe boknong marindinmat ohe duupnong hangopari.   
\s1 Jisas oh Amam dasi ina ruum dasi hat patimur potip ohe meng oh  
\r (Matyu 5:1-12)  
\p
\v 20 Jisas oh ihirnong yah mat pisus mandapat orhorsi sapti han kuuhan gonsi ihirnong wamaro hama meng am deingopri. Meng ma am matip meng oh mamarumur. Bisei hat ma pati gur Got ohe napapat hrepnong hat pati gur ohoh ihan ama gur amamsi hat pati bap gurmur.   
\p
\v 21 Pahohsi hat pati bap gur komdapat den ruumsan dam pei hatipri ohoh ihan gur amamsi hat ma pati bap gurmur. Saheih ham ma yimat sapti bap gur kaput da yah ham kretipri ohoh ihan amamsi hat pati bap gurmur.   
\p
\v 22 Kat kuuhan ihirdapat gurnong Maihir Hanip Brer Jisas ohnong dindeipti ma hapat daham gurnong heisup naham gurarhe teinong naham kom nasariyao dasei meng naporiyao gure winnong naer deiyao nahayahanoh gur amamsi hat pati bap gurmur.  
\v 23 Inahayahanoh gur Mama inahaya ohe pe oh Got oh yan isip tit aw tei mahat mamen mat nat patwa daham amam deininsi ham patenmur. Dirnong mama inahapti moh rih diradire awher ihir Got ohe meng pot pisashe han ihirnong ma indeisheru mat orhor gin dirnonghe mama inahapti ma hapat daham amamsi hat patenmur.   
\p
\v 24 Erer ruumsansi ham kamah hat pati bap guroh guragure erernong dar amam hapti ohe da oh ama pok daripti ohmur. Kaput komdapathe gur tit na datipri bap ohoh ihan gur hinhinsi hat pati bap gurmur.   
\p
\v 25 Ake erwip na hama dipwi dam kasip hat pati han bap guroh kaput pahoh hatwi patepri ohoh ihan ama ohe ina ruumsup oh namkat pat han bap gurmur. Amam ham kretwi pati han bap guroh kaput saheih ham yimapri ohoh ihan gur hinhinsi hat pati bap gurmur.  
\v 26 Rih gure aranir gonsi ihiroh dasuh propet ihirnongwi armi mat papteshemur. Ama imat papteshe da ohsi kuuhan gon ihir gurnong armi nahayahanhe gur dasuh propet ihir hatin hat patin armi nahapti ohoh ihan gur hinhinsi hat pati bap gurmur pora Jisas oh ihirnong imat meng am deingopri.   
\s1 Jisas oh Gur mahaw han ihirnongsi tap mat bopor mat paptenmur potip ohe meng oh  
\r (Matyu 5:38-48)  
\p
\v 27 Jisas oh ihirnong ameng oh am deipat Norhe meng ma amrapti kuuhan guroh gurnong ma mahaw nahat napapti han ihirnonghe gur bopor mar paptenmur. Gurnong heisup nahat napapti han ihirnonghe gurdapat ihirnong yah mat orhorwi paptenmur.  
\v 28 Gurnong Er moh kapkap ha haputinoh ma naporipti han ire menghe gurdapat ihirnong Got oh bapkeisi mar ha paptenoh rim adahandeinmur. Gurnong dasei naham er nahat napapti han ihirnonghe gurdapat Got ohnong adahandeinmur.  
\v 29 Gurnong mahaw han ihir apris bes tansi dak tan moh dong napor niyahanoh gurdapat heisup ham it ihirnong indeipri. Gin dak tandapathe nitina por dak tandapat asarinmur. Tit han tit apris gwe tei ohe watah dapsi ma an pat watah oh gapah ham nadarhanoh gomdapat heisup deipra. Mutuh ohe watah mohsi datiprohhan datinmur porinmur.  
\v 30 Ihir apris gurnong ire ma dahaya han oh Tit napin napor deip nahayahanhe gurdapat iraire ma riya han oh aprishenmur. Ihir apris gure erer oh ti nadar sayahanhe gurdapat yansi mar it napina poripri.  
\v 31 Gure hanip ihirnong da apris ma papti da oh Ihir imat nohnong da napris napaptinengo ma dahapti daru mat orhor ihirnonghe imat orhor paptenmur.   
\p
\v 32-33 Sawa meng na amram er hat ma sapti han ihirhe er dasi hat patim orhor iraire yah han ihirnong bopor mar yah deiptimur. Ihan gurhe ama ire ihapti ohe tan hama guragure yah han ihirnongwi bopor mar yah deiyahanoh ama ihya ohe pe oh Got oh gurnong Gur yah han bapmur napotiprohda. Basra. Ama guragure yah han ihirnongwi bopor deipti ohe pe oh Got oh Gur yah han bapmur na napotiprohmur.   
\p
\v 34 Sawa mengnong na amram er hat ma sapti han ihirhe er dasi hat patim orhor iraire erer oh Nuhur er hat pati han ihirnong apriperhan ihir it moh ohe yan oh sa napripri daham apriptimur. Ihan gurhe ire ma ihat daham apriptiru mat apriyahanoh ama ohe pe oh Got oh Gur yah hanmur napotiprohda. Basra. Ama ihapti ohe pe oh Got oh Gur yah hanmur na napotiprohmur.  
\v 35 Ihan gur ihathe paptepri. Gur gurnong mahaw nahat ma napapti han ihirnong bopor mar yah dawi mar yah mat paptenmur. Paptim gure erer oh napina naporiyahanhe yansi mar aprisipri. Be musum aprishenmur. Puteinap mahat ma pat han oh er hat sapti hano yah han erer oh dar orhor Weso na poripti hano ama ihirnongsi; gonsi dirnong tap mat yah da naham yah nahat napapatmur. Ihan gurhe mahaw nahat napapti han ihirnonghe imat yah mat orhorwi papayahanoh ama ihapti guroh puteinap mahat pat han orhe brer ham yan isip datipri han bap gurmur.   
\p
\v 36 Gur guragure ita Got oh ihirnong gonsi hinhina mar ma yah deipatru mat orhor gurhe imat ihirnong gonsi hinhina mar paptenmur pongopri.   
\s1 Jisas oh Gur arwananah ihirnong Ihat pat hanhe por sapri potip ohe meng oh  
\r (Matyu 7:1-5)  
\p
\v 37 Jisas oh giporpat hanip ihirnong Ohe ma ihat pat mohri er hat patmur por sapri. Ihat hanipnong sat na ayahanoh Got ohhe imat gurnong na nasatipramur. Arwananah ihirnonghe Moh er hanhe por kapkap gardeipri. Imat kapkap na gardeiyahanoh Got ohhe imat gurnonghe na garnahatipramur. Gur ire er hat saya ohe pe oh yansi na mar eimat hanhan mar mandayahanoh Got ohhe gure ma er hat sapti ohe pe yan oh Got oh yansi na naham eimat hanhan mar namdapatmur.  
\v 38 Gur guragure yah han erer oh ihirnong apinmat na sam yah mat orhorwi aprishenmur. Imat apriyahanoh Got ohhe gurnong imat yah mat orhorwi naprisipramur. Orhe yah mat ma naprisipra oh ket ung mima teip hatporhan it kaw toh mara it tei it tei mima teipnap ham tatophot wandon ina hapatin ma sariptiru mat orhor napripramur. Guragure ma apripti ohe kis orhorwi Got ohhe gurnong imat orhor naprisipramur pongopri.   
\p
\v 39 Giporpat Gin mama am hatin ohe paham meng oh napotiprohmur. Mamarumur. Tit kin kwi hat pat han ohdapat dahat son ohe mandap oh am hapat tit kin kwi hat pat han ohnong Mandap gin makat son hatinmur por pinggit pisaprohda. Basra. Na pinggitin hatin ohoh itait yotyot kin kwi hat pati ohoh ihan yotyot tanggap temnong waprohemur.   
\p
\v 40 Tit oh mamaru haptimur. Pinggit pisapat han ohnong orhe ma pinggit pisapat han ihirdapat it pinggipat han orhornong ire hrepnong matiproheda. Basra. Ohdapat ihirnong pinggit pisapatin ihir gonsi am hat mandapti orhorsi irair tap da hatiprohemur pongopri.   
\p
\v 41-42 Giporpat Gur arwananah ihirnong Oh ihtin han hat patmur por ma sapti oh guragure kin irat barak isip ma titapat patnong oh na dahama ire kin huhun garnong oh daham gur saptimur. Gur kinham imat saptio. Gur guragure kin irat barak isip ma titapat patnong oh dat mandatpora na daham ire garnong oh Nohana. Gwe huhun gar oh noh dat namdatpora poriptimur. Gipor ma ihirnong sapti oh kianorim gur ihirnong imat saptio. Pang yotsi hat pati han gur ihapri. Guragure kin irat barak isip hatin ma titapat pat andehri dat mandapti kin yah hat watahama arwananah ire gar huhun tambor andehhe dat amdatin ina ham dat amdatiprohemur pongopri.   
\s1 Jisas oh ket dam oh wamara moh yah sanhe moh er sanhe por am haptimur potip ohe meng oh  
\r (Matyu 7:16-20, 12:33-35)  
\p
\v 43 Jisas oh giporpat Gin mohnong dahenmur. Ket oh dam yah san oh dam ma tima oh na sohor hapatmur. Yah dam orhorwi timapatmur. Sohor san ohhe dam ma tima oh yah dam na timama sohor dam orhorwi timapatmur.  
\v 44 Ihat timdiporhan hanip dir wamara ihtin san hat pathe daham am haptimur. Irat gwe ma timapat oh tit ohe irat gwe orhe tima tit ohe irat gwe orhe tima hapat ohoh ihan nang bar ohe bok andeh kairap timdiporhan kapom daptida. Er nang bar gahsi ohe bok andeh ket timdiporhan kapom daptida. Basra. Ihat dam na timaptimur.  
\v 45 Amaru ihtin da oh hanip dire mutuh ma teip mat papti da oh pamrasa atem teinong mar mengriptimur. Yah danongwi ruprup mar ma saripti han ihirhe ama yah da orhorwi hat sasiper daham yah danong orhorwi dam mat pisaptimur. Er danong ruprup mar ma saripti han ihirhe ama er danong orhorwi hat sasipera daham er danong orhorwi dam mat pisaptimur. Imat dam mat pisaptin hanip dir wamar am haptimur pongopri.   
\s1 Jisas oh ap yot ite tei paham meng potip ohe meng oh  
\r (Matyu 7:24-27)  
\p
\v 46 Jisas oh giporpat Gur nohe meng napotporhan na amrapti gur gin nohnong Hanipyaha. Hanipyaha ma naporipti oh kianorim ginaporipti.  
\v 47 Nohe tapnong hama nohe meng amram dinahapti han bap gur mama dakuu han moh hatin hat patimur.  
\v 48 Ama han oh Noh ap kasipnap tit hatpora daham kasip mong tei orhor ap tam gonom kasip mar hatipri. Hat manda tei tom isip ran hat aprisa apnong tom oh gusher sutporim ihangopri. Imtip orhor kasip mongtei hatip tei ohoh na gushengopri. Nohe mengnong amram dinahapti han gur amaru hat pati han bap gurmur.   
\p
\v 49 Nohe meng amram orhor na dindeipti bap gur nohe ma napotiproh han bap hatin hat pati han bap gurmur. Ama han oh ap tit hatpora daham kasip tam dar mong pohmat pas na pandira tom dinin tei orhor tei sar hatipri. Hat manda tei tom wandasa tom ran hat apris apnong ungang mar gushera tambor mar sungopri. Nohe meng amram na dindeipti han gur ap na daham hatip han ohe tan hat pati han bap gurmur pongopri.   
\c 7  
\s1 Jisas oh ami ire duuptei han tit ohe atamreipat han ohnong yah matip ohe meng oh  
\r (Matyu 8:5-13)  
\p
\v 1 Jisas oh ameng oh pot mandama Gin Kapaneam apteinong sapora daham orhe pinggit pisapat han ihirsi irair pipari.  
\v 2-3 Susa aptei patin Jisas oh Kapaneam aptei patmur ritperhan Rom ire dupsi han ire duuptei han oh ama amratip oh. Amrapat Norhe bopor mat papat norhe natamreipat han moh sik isip ham haputin ina hat moh Jisas oh apris ha yah matinoh daham Juda han pohon ihirnong Gur sus Jisas ohnong potinmur. Nohe natamreipat han moh sik ham haputin ina hah ohoh ihan oh apris ha nayah matinoh rihe potinmur por ihirnong ama adarhetip oh.   
\p
\v 4-5 Por darhetporhan ihir apris Jisas ohnong Ama han oh yahnap han ohoh Juda dire danong ham napanggeim dire rotu ap oh nahamo imat napanggeim napapat han ohoh ihan go ohe ma ri meng oh amram sus ohe atamreipat han ohnong ayah matinmur pongopari.   
\p
\v 6 Potperhan Jisas oh amrama irair tap hat pipari. Susa orhe ap kakduup oh koriyaoh duuptei han orhe yah han kat ihirnong darher oh mandap kongopari. Kora ihir Hanipyaha. Gin gonong nambur ma napopriya moh ina ruumsupsi nahaya oh kimur. Ihan ateidapat orhor pomar ha sonohmur rihe. Go yahnap hanri. Noh bisei han nuhur ohoh ihan oh nohe ap gwateinong mohri hatipra rihe.  
\v 7 Go yahnap hano rim oh bisei han hat pat ohoh ihan gwe patnonghe na apriprohmur rihe. Ihan go mateidapat orhor mengwi ha yah hatinoh potporhan ha yah hatinohri.  
\v 8 Orhorhe orhe duuptei han ire hrepdapat hat patem ire poriya meng oh amram ihapatri. Orhordapathe kat dupsi han ihirnong orhe hrepnong mar papatri. Paptema tit han ohnong Gin go sona potporhan oh arpin amram sapatri. Tit han ohnong Gin go aprina potporhan oh arpin amram apripatri. Orhe atamreipat han ohnonghe Go mihat tamreindinmur potporhan oh arpin orhe ma por mengru hat orhor tamreipatri. Oh ihat kasip mengsi pat han ohoh ihan mateidapat orhor oh ha yah hatinoh potinri pongopari.   
\p
\v 9 Potperhan Jisas oh amrama da tupnet rim da darherpat it orhorsi tap hat apriya kuuhan ihirnong tamburker wamara Ihirnong Noh arpin meng napotiprohmur. Mama han oh nohnong Ohwi yah matin hatin han ma hapat ohe ihat isip ma dahat pat da moh Isrer han gurri ihat dahatin han orhor gure mutuh ohri mihat isip ma dahat pat han oh noh ti na wandeipatmur pongopri.  
\v 10 Giporpat dupsi han ire duuptei hat pat han ohe ma darher han ihirnong Gin noh yah deimur. Gur it sus wamtinmur por darhengopri. Por darhetporhan ihir it sus wandeiyaoh kakhan orhe atamreipat han oh ama yah hah hatip oh.   
\s1 Jisas oh han haput tei pamsuhup ohe meng oh  
\p
\v 11 Ihama gahan tit dah Jisas oh Nen ap mutuhnong sapora rima Jisaso orhe pinggit pisapat hano kuuhan ruumsan kat ihiro irair Nen ap mutuhnong pipari.  
\v 12 Sus ap mutuh ohe doho gwatei kat oh koriyaoh kopen brer han hapat han tit hapur oh sein itperim popriptingopari. Sup uh ama brer ohwi papatin itap oh haputip oh ama brer saha oh ohe sein oh ama ap mutuh kuuhan ruumsan ihir sup uh tap sein oh popriptingopari.   
\p
\v 13 Imat popriptihan Hanipyah oh sup uhnong wandeipat hinhina isip tit deipat Go da er ham yimapra pongopri.  
\v 14 Pora susa ihir atei ha kimiritingwe rim sein popripti gwarnong oh bes maringopri. Marinporhan sein popripti han ihir kimiritperhan oh Brera. Go da it apris masona pongopri.  
\v 15 Potporhan arpin takapteng rim masas mengiro hangopri. Hatporhan Jisas oh sup uhe pat duupnong pisusa mandangopri.   
\p
\v 16 Imat pamsaporhan ihir wamara kas isip tit hapti Got ohe meng pot pisapti han ihir wanohe kasip isipsi han tit dire pati tei moh apirmuro. Got orhe han Juda dirnong napanggeitinmat apirmuro pora Got ohnong armi deingopari.  
\v 17 Armi mara Jisas ohe ma ihah ohe meng oh Judia mong aptei apteio Judia mong ohe kakduup pati mong ohe aptei apteio oh gonsi gospot ama pipa oh.   
\s1 Jon oh orhe pinggit pisapat han yot ihitnong darhetporhan Jisas oh meng am matip ohe meng oh  
\r (Matyu 11:2-19)  
\p
\v 18 Jisas ohe ihat sapat ohe meng oh aptei aptei oh gospot saperhan Jon ohe pinggit pisapat han ihir amrama Jon ohnong ama potpa oh. Potperhan oh orhe han ihirnong  
\v 19 Yot han gut nohe pat aprin potporhan ihit ohe pat duupnong saperhan Gin gut susa Hanipyah Jisas ohnong Go nure Oh apripramur rim naminhan pati han oh goda da nure minhan pati han oh kopen na apin pat dahamtinmur pora ama darhetip oh.   
\p
\v 20 Por darhetporhan ihit Jisas ohe pat tei oh apingopari. Aprisa Jon tom patirpat han oh Gut Jisas ohe patnong susa ohnong Nure oh apripramur rim naminhan pati han oh goda da nure minhan pati han oh kopen na apin pat por dahamtinmur napor nadarherhe pongopari.   
\p
\v 21 Ama gipotpa sut oh Jisas oh tihan tihan sik hat pati kuuhan bapo mongsup oh ga at pat kuuhan bapo kin kwisi hat pati kuuhan bapo ama ihat pati han ihirnong yah mat pisapatin Jon ohe darher han yot ihit Jon ohe ma ri meng oh apris pongopari.  
\v 22 Potperhan Jisas oh ihitnong Gute nohe kuuhan ihirnong yah mat pisapatin wanahaya meng moh susa Jon ohnong potinmur. Ohe ma tamreipat ohe pe oh kin kwi hat pati kuuhan ihir kin watahayao buhdapat ma haputpa kuuhan bap ihir buhdapat yah ham tandeit sayao ina mong mong tohohet sapti han bap ihirnong it yah ina bok hayao nat ma kit patisi bap ihirhe it nat tem tanpur hanip meng amrayao hapuripti han ihirnong da pamsaporhan it da apris masayao borop hat pati kuuhan bap ihir Got ohe yah meng oh potperhan amrayao ihat saptingwerimur potinmur. Potporhan oh ha dahatinohmur.  
\v 23 Hanip bap gur nohe ma ihat sapatnong moh wanahama Moh arpin hande dasuh hande na daham Arpin han orhorwa daham tit dawi hat pati kuuhan gur amamsi hat pati kuuhan bap gurmur pongopri.   
\p
\v 24 Potporhan Jon ohe darhetir han yot ihit it saperhan Jisas oh kuuhan ihirnong Jon oh ihat pat han ma hapat ha dahatingwe rim meng tit am deingopri. Gur Jon ohnong wamtiperim hanip timbas irat timbas mongnong wamar ma pipa oh kinhatin han pato daham wamar pipa. Gur wamar ma pipa oh bur dap tit inim oh amber anong anong deipat hatin dasi hat pat han tit patkin daham wamar pipada. Basra. Kasip ham tit dawi hat pat han ohnong wamtiperim pipamur.  
\v 25 Gure wamar ma pipa oh han kamah watah yahnap an patsi han tit patkin daham wamar pipada. Basra. Watah yahnap an pati han ihir ihtin dus na patimur. Ihir kakhan iraire yahnap ap ohwi patimur.  
\v 26 Ihan gure wamar ma pipa oh propet ohnong wamar pipada. Dawa. Gur propet ohnong wamar pipamur. Gure wamar ma pipa propet oh Krais ohe mandap amanhem amamen matin han orhe gon han propet ohnong wamar pipamur.  
\v 27 Ama han orhe boknong mar ma brak matpa meng oh Got oh Krais ohnong meng tit potporhan mamaru mat brak matpamur. Kaput nohe meng pot pison han tit ohri darhetipramur. Darhetporhan oh gwe mandap namanhem namamen matipramur potporhan brak matpamur. Ma brak matpa meng oh Jon orhe boknong tarpatir ohoh ihan orhe gon propet hat patmur.  
\v 28 Ihat orhe gon propet hat pat ohoh ihan hanip bap gonsi gur Jon ohe hrepdapat hatwi patimur. Ihtin bap hat pati orhor ginnong oh gur norhe ma inahat napapatnong moh ma wandeipti oh Got ohe napapindin hrepnong naham napapindin danong oh gur wamar am haptimur. Jon ohnong nohe ma ihat sapatnong oh na wamat pat ohoh ihan oh gure hrepdapat hatin hat patmur pongopri.   
\p
\v 29 Potporhan takis yan daripti han ihirsi; kuuhan bap ihirsi irair gonsi Jon ohe bes tei tom patirisuh kuuhan bap ihir ohoh ihan ihir Jisas ohe por meng amrapti Got orhe mama inahat napapat moh yahnapmuro potpamur.  
\v 30 Parisio sawa meng am hat pati hano ihir Jon ohe bes tei dir tom na waprohemur rim tom na washe han bap ihir Got ohe yah da ma Ihir mihat ha sashengwe por ma pinggipat danong oh ihir kom atpamur.   
\p
\v 31 Jisas oh Gin mama pati kuuhan gure ma pati da oh Nure da oh ihat pati ma hapat ha dahatingwe rim noh mameng moh naporit guragur dahatinmur.  
\v 32 Mamarumur. Brer ihiroh iraire tarmuriya tei oh kat brer ihirnong Gur amam ham ha birhitingwe rim nuhur waron meng matperhan gur garham na birhiyahe. Gur saheih ham ha yimtingwe rim nuhur saheih ham yimtiperhan gur garham na yimayahe poriptimur. Ire ma ihyanong na ihen ina ham garhaptiru hat orhor mama pati bap gur Jon nute boknonghe amaru nahat orhor napapti bap gurmur.  
\v 33 Imat ma napapti oh Jon tom patirpat han oh saheih da hatin hat apris den ruumsan na damo wain tom gap na damo hatporhan gur ohnong Er han mongsup ohe kasip ohsi patim ihapat han moho por gardeiptimur.  
\v 34 Hanip Brer nohhe aprisa den ruumsan deo wain tom gap deo hatporhan gur nohnong Den ruumsan dapat han moh ake yot hat patin ihpatkino. Wain tom mama dapat moh orhe danong timbas hatinmat ihpatkino. Takis yan er mat daripti hano er hat sapti hano ire tapnong hat sapat moh ihirsi yah han hatporim ihpatkino napor garnahaptimur.  
\v 35 Kat gur dasuh mengkin dahapti orhor Got orhe dakuu meng oh arpin dam timdiporhan gur wamar am hatiprimur pongopri.   
\s1 Jisas oh Saimon ohe ap oh ros den dapatin er da hat sapat kuu tit ohe patnong apriporhan yah matip ohe meng oh  
\r (Matyu 26:6-13; Mak 14:3-9; Jon 12:1-8)  
\p
\v 36 Gahan tit dah tit Parisi bap ihir tit han tit Jisas ohnong Gin go ditadit tap hat sus nohe ap oh den diprohemur pongopri. Potporhan arpin ihit susa ohe ap ros tongnoma den dipari.   
\p
\v 37 Den daptin ama ap mutuh oh er da hat sapat kuu tit Ama Parisi ohe ap oh den damo patiheri ritperhan uh amrama urhe gapgwesi yahnap tom gap kwei san tem panditpa san oh dara marim apingopri.  
\v 38 Aprisa Jisas ohe tongnom hios rit patim den dapat buh pe puh oh apris tandeingopri. Tandeipat yimangopri. Yimtiporhan kin tom oh Jisas ohe tong bas oh wanporhan urhe kak bat ohsi ahirdeingopri. Ahirdeipat tongdapat amam mara urhe gapgwesi tom san oh durker ohe tongnong amongopri.   
\p
\v 39 Uh indeipatin Parisi Jisas ohnong den diperim ambur ohe apnong popir han oh wandeipat Mama han mohra arpin propetneng ohnong marim amam maro hapat kuu mauhnong uhe er hat sapatgwer danong oh am hapat uhnong baso pornengmur. Uhnong baso na por moh propet baskin dahah hangopri.   
\p
\v 40 Ihat dahahhan Jisas oh ohe danong am hapat ohnong Nohan Saimona. Nohe gonong napotin meng oh tit patmur pongopri. Potporhan Saimon oh Mai. Gwe meng oh napotina pongopri.  
\v 41 Potporhan oh Noh paham meng tit gonong napotiprohmur.  
\p Yot han tit patesheri. Ama han yot ihit tit han ohe yan tit ayan hat patesheri. Ayan hat ma pateshe oh tit han oh isipnap 500 kina ayan hat patesuhri; tit han oh 50 kina pok tit ayan hat patesuhri.  
\v 42 Ihat ayan hat patim ihit it ohnong apin yan oh timbas hat patin ohoh ohnong kinmat yan apin ina hat patinoh Gut nohnong yan napin oh de teidapat nohnong dat napripri ihan mandayamur por mandangopri. Ihtipari pongopri.  
\p Porpat Saimon ohnong Gin ama han yot ihitoh de han ohdapat yan hat ma pati han ohnong isip bopor matiproh. Go daham napotinmur pongopri.   
\p
\v 43 Potporhan Saimon oh Nohe dahah oh yan isip hat pat han ohdapat Nohe yan isip moh namdao rim amam mar ruumsan bopor matiprohkin dahahmur pongopri. Potporhan Jisas oh Gwe ihat ma dahah han oh arpinmur pongopri.  
\v 44 Arpinmur pora tamburkes rim kuu uhnong wandeipat Saimon ohnong Gin Saimon go kuu mauhnong wamtinmur. Noh gwe ap mama mara oh nohe tong gahmatin ohe tom oh yohom na napirmur. Kuu mauh urhe kin tom ohsi nohe tongnong moh nagahmara urhe kak bat ohsi nahirdeimur.  
\v 45 Noh ap moh marporhan go nohnong tuhup naham na amam nahahmur. Mama kuu mauh noh kopen marpatin orhor nohe tongnong tuhup naham amam nahapatru dipwi mama amam nahat orhor mama napapat ohmur.  
\v 46 Noh ap maraporhan go nohe kak teinong moh gwe wer ohsi na namormur. Mama kuu mauhe gapgwesi san duker nohe tongnong namormur.  
\v 47 Uhe mama inahah moh urhe er hat sapat ohe er yan isip oh Wes dat namdao daham nohnong isip amam naham mama bopor nahah ohmur. Gur Nuhur gar er hat sapti ohe er yan gar yan dat namdawa ma dahapti gur mihat amam naham na bopor nahaptimur. Garpok dat namdao rim garpok bopor nahaptimur pongopri.   
\p
\v 48 Pora kuu uhnong Gin gwe er hat sapat ohe pe yansi hat ma pat yan oh gin noh dat namdamur pongopri.   
\p
\v 49 Potporhan ihir amrama Wa. Hanip diradir orhor Noh gwe er hat sapat yan oh dat namdamur ma por moh oh kinhatin han hat patim gipor ire damdapat ama gidahaya hatpa oh.  
\v 50 Ihat dahaya ina hatperhan Jisas oh kuu uhnong Gorhe damdapat Ohwi inahatin hatin hanwa daham ma apir ohe pe oh noh yah nahahmur. Gin go Got orhe yah nahat napapat da ohsi inahah ma hapat daham amam hat sonmur pongopri.   
\c 8  
\s1 Kat kuu ihir Jisas ohe tapnong ham panggeit pisashe ohe meng oh  
\p
\v 1 Gahan Jisas oh ap mutuh ohe aptei apteio be aptei apteio oh kuuhan ihirnong Got ohe napapat yah meng oh pot pisaporo rim orhe pinggit pisapat han nathei han ihirsi meng pot pihipari.  
\v 2 Kat kuu rih Jisas ohe mongsup ga apero sik hat pati ihirnong yah deio mat pihip kuu ihirhe ohe tap irair pipari. Ama kuu ihir tit Makdara aptei Maria uh rih Jisas oh beshei mongsup ga ma apetip kuu uhmur.  
\v 3 Tit Joana uhmur. Uhe imap Kusa oh Herot ohe atamreipti han ihirnong wamat papat han ohmur. Tit Susana uhmur. Ama yitir kuu ihirsi; kat kuu ruumsan ihirsi Jisas ohe tapnong hama iraire deno ihseno erer oh dara Jisaso orhe pinggit pisapat hano ihirnong apris ama panggeit pisashe oh.   
\s1 Jisas oh den gwe tei paham meng potip ohe meng oh  
\r (Matyu 13:1-9; Mak 4:1-9)  
\p
\v 4 Jisas oh meng am mat pisapatin aptei aptei amdapat kuuhan ruumsan ihir apris tarmungopari. Apris tarmutperhan Jisas oh paham meng moh pongopri.   
\p
\v 5 Tit han tit patesuhri. Gahan den gwe rang tei sakmatporim pipri. Susa sakmatipri. Sakdei oh ti mandap tei wandangopari. Mandap tei wanperhan pitap tei ohoh hanip tonggadeiyao ner ihir dat dayao hangopari.  
\v 6 Ti kwei kiki tei wandangopari. Wandasa yah hat maras orhora; mong ariar tei ohoh kaker oh dah na wasa atan oh hahmatporhan gattahat sangopari.  
\v 7 Ti den gwe oh gah amgap ire mutuh oh wandangopari. Wandas gah amgap ihirsi tap hat marangopari. Marasa gah amgap ihirnong yah hat marasa den amgapnong oh amkar hotmatperhan dam oh yah hat na timongopari.  
\v 8 Ti ihir mong yah tei oh wandasa yah hat marasa dam oh yah hat orhor ruumsan dam timongopari. Ihangopari pongopri.  
\p Jisas oh giporpat kasip mengteiwi We. Kuuhan nat temsi gur paham meng mama amraya mengnong moh dahatinmuro pongopri.   
\s1 Jisas oh be han ihir orhe mengnong oh daham am hatipririm Noh paham mengwi porpatmur potip ohe meng oh  
\r (Matyu 13:10-17; Mak 4:10-12)  
\p
\v 9 Jisas oh ama paham meng oh pot mandatporhan orhorsi ma pati bap ihir Jisas ohnong Gwe paham meng ma napot ohe mutuh meng oh kian meng napot. Go napotinmur por dahamtipari.  
\v 10 Por dahamtiperhan oh Norhorsi sapti han guroh Got orhe napapat hrepnong nahat napapat ohe meng hanhan hat pati meng oh pitap teinong mar gurnong naporpat ohoh ihan gur am hat patimur. Be ma pati ihirnong oh mutuh mengnong dahatipririm paham mengteiwi porpatmur. Imat potporhan wamtin wandeipti orhor dahatinnong na dahaptimur. Amratin amrapti orhor dahatinnong na dahaptimur pongopri.   
\s1 Jisas oh irat gwe paham meng pitap teinong mar potip ohe meng oh  
\r (Matyu 13:18-23; Mak 4:13-20)  
\p
\v 11 Jisas oh Nohe tit han tit den gwe sakmar pipmur ma napot ohe paham meng ohe mutuh meng oh mamarumur. Ama den gwe oh Got ohe meng ohmur.  
\v 12 Den gwe mandap tei wanpat meng oh Got ohe meng amratperhan Satan oh aprisa ihir Mameng moh pomat amram dimtiperhan Got oh ambutiprahan dahama ama amraya mengnong oh Satan oh dat amdapatmur.  
\v 13 Kwei kiki tei ma wanpat ohe den gwe oh Got ohe mengnong oh amratpera daham amam hat orhorwi ma amrapti bap ihirmur. Amam ham amrapti orhor kaker oh dahnong na waihim pat ohoh ire danong akis matin supo ina ruumsupo ama sup ihir ire boknong kis matperhan kapkap orhor mandaptimur.  
\v 14 Gah amgap ire mutuh ma wanpat ohe den gwe oh Got ohe meng amrapti dindeipti orhor kakdah ohe ina ruumsupo ihsen ruumsan dar kamah hatin ohe dao kakdah mohe amam hat indin ohe dao ama ohe da oh Got ohe mengnong amkar hotmatperhan Got ohe yah meng oh dam timapat orhor it bukurpatmur.  
\v 15 Mong yah dus ma wanpat den gwe oh Got ohe meng oh amrama Amram dimtipera daham yahnap dasi hat pati ihiroh mengnong na mandama kasip ham marin patin orhor dam timapatmur pongopri.   
\s1 Jisas oh Nohe meng moh has teinongwi mar paptenmur napotip ohe meng oh  
\r (Mak 4:21-25)  
\p
\v 16 Jisas oh orhe han ihirnong Nohe meng oh mamaru hat patmur. Hanip gur ram oh has mara baketsi teimdapat giadeiyao geih hrepnong remayao na deiptimur. Has mara Hanip ihir has tei orhor watahat ha marongwe rim has mar orhe pohon saripti gwar ka orhor sariptimur.  
\v 17 Gin ma treman pat erer oh pitap teiwi hatipramur. Giamat ma papti erer ohhe pitap teinongwi matporhan wamar am hatiprimur.   
\p
\v 18 Gur nohe mengnong moh pomat amram dahenmur. Nuhur mama amraya meng moh kimur ma dahapti ihirnong oh titsi na aprisa ama amraya meng oh it dat amdatipramur. Arpin mengnong moh nuhur titsi amratper ma dahapti han ihirnong oh titsi apris isip mat orhor aprisipramur. Ihtin ohoh ihan gur meng moh pomat amrama dahenmur pongopri.   
\s1 Jisas oh Got ohe mengnong amram dindeipti ihir nohsi taptem ihirmur potip ohe meng oh  
\r (Matyu 12:46-50; Mak 3:31-35)  
\p
\v 19 Gahan Jisas oh meng am deipatin orhe nap gapiniro supo ihir Jisas ohnong wamtiperim ama apdapa oh. Apriyaoh kuuhan ihir ap oh tambokot patin ohoh ihir ohe duupnong kinhat ron ham kot tei ama inpa oh.  
\v 20 Kot dah oh patin tit han tit maras Jisas ohnong Gin gwe suao arwaniro ihir imder gosi mengitinmat kot dah maroh wanahat patimur pongopri.  
\v 21 Potporhan Jisas oh Got ohe mengnongwi amram ma dindeipti bap ihiroh nohe emhero nohsi taptemo ihirmur pongopri.   
\s1 Jisas oh inimsi; tom kopisi Gut gatetina potip ohe meng oh  
\r (Matyu 8:23-27; Mak 4:35-41)  
\p
\v 22 Gahan tit dah tit Jisas oh orhe pinggit pisapat han ihirnong Gin dir tom hru han tannong deprohemur potporhan irair bot dahnong rus tongnoma deihpari.  
\v 23 Deiptin Jisas oh kin timdin ham timongopri. Oh timon patin inim isip tit tom kopinong mer mat popris bot dahnong deis pongopri. Deis pora bot dah moh tom oh teip ham sutin ina deingopri.   
\p
\v 24 Imtiporhan ihir sus Jisas ohnong Napapat hana. Dirhe tom oh nadiporhan ma ihah por pamsuhpari. Pamsaperhan Jisas oh masasa Inim go gatetina. Tom kopi go timbas ham ganetina potporhan arpin inim oh gater tom kopi oh ganer ham na ihah mong hatin ham kimirit mandangopri.  
\v 25 Gater kimirit mandatporhan Jisas oh Gur Hanipyah ohwi inahatin hatin hanwa ma dahapti ohe da oh de tei patin kas haya por indeingopri. Por imtiporhan ihir Epe. Hanip ihirnong imat meng potperhan ihir meng amram kimiriptio. Mama han moh tom kopio inimo ihirnongsi meng potporhan ihir amram gateriya moho. Mama han mohri wan han moho gigosham kas hatpari. Ihamo hama deihpari.   
\s1 Han tit mongsup ihir ohe mutuhnong rosa mamter mat pisaptin ma yah matip ohe meng oh  
\r (Matyu 8:28-34; Mak 5:1-20)  
\p
\v 26 Jisaso orhe pinggit pisapat hano ihir Gariri mong dason orhor Gariri tom hru han tannong desa Gegesa aptei tom dinin tei oh kotpari.  
\v 27-29 Kora Jisas oh bot dahdapat kakdahnong wapatin orhor ama aptei han ihir tit han tit kongopri. Ama han oh mongsup trun ihir ohe mutuh patin oh watah na ar eit pitawi patim ap na timam orhe hanip sein ma saripti kwei temo ohwi timon sapat han ohmur. Ama ihat sapat han ohnong mongsup oh mamter mat pisasiprarim arwapir kat han ihir sen nang kasip ohsi atpama wamat papti orhor mongsup ohe kasip ohsi sen nangnong tambor mat itporhan mongsup oh mamter mat pisusa hanip timbas mongnong pumat pisapatmur. Mongsup oh ama imat pisapat han oh aprisa Jisas ohnong wamara ngangar tit orhor ohe tong duup oh bos hamnong ham or wandangopri. Wanporhan Jisas oh Mongsup oh imat pumat pisapat han moho dahama Gin mongsup go ga taper maras sona pongopri.  
\p Potporhan mongsup oh Nohnong yah hat na indin teinong nahatipra daham Jisas ohnong Puteinap mahat ma pat han Got orhe brer Jisas go nohnong kinnahatporim apir. Go nohnong batbet napripra kasip mengtei orhor por patwi hangopri.   
\p
\v 30 Kasip mengtei gipotporhan Jisas oh Gwe win oh kian win por dahandeingopri. Dahamtiporhan oh Hanip nohe mutuh ma ros pati han ihir trun han ros patio rim ihan nohe winhe trun hanmur pongopri.  
\v 31 Porpat mongsup muk ihir kasip mengtei orhor Go nuhurnong dipwi batbet dar paten ohe ditin timbas tanggap temnong nahatipra pongopari.  
\v 32 Potperhan ire pati dason bok andeh imah wih isip tit bu ariptingopari. Bu ariptihan mongsup ihir Jisas ohnong Gin nuhurnong wan teinong son napotipra. Imah ire ina mutuhnong mandeh ron napotinmur por kandeingopari.  
\p Por kamtiperhan Jisas oh Mai. Rona pongopri.  
\v 33 Potporhan ihir ga taper marasa imah ire ina mutuhnong rongopari. Roperhan imah wih ihir gurir mat sakar pas marpen kat oh wasa tom dahnong ham wasa tom atem was hapungopari.   
\p
\v 34 Ihtiperhan imah wamat papti han bap ihir ma ihyanong oh wamara kas ham tandungopari. Tanduripti ap mutuho aptei apteio oh ire ma wandeiya ohe meng oh pot ama pihipa oh.  
\v 35 Pot pisaperhan ihir amrapti ama ihyanong oh wamtiperim apingopari. Apris Jisas ohe pat tei apris wandeiyaoh mongsup ihir ohe mutuh ros mamter mat pisapti han ohnong mandam saperhan it orhe daham da yah hapat watah aro ham Jisas ohe tong duup oh tongnot patgopri. Ihat tongnot pathan ihirhe sein bupang rim ama kas hatpa oh.  
\v 36 Kas hatperhan ma wandeiya ihirdapat imat yah deihemur por meng am matpari.   
\p
\v 37 Am matperhan Gegesa ap mutuh pati hano ama ap mutuh ohe kakduup ma pati hano ihir wamar am hapti kas isip tit hapti Jisas ohnong Go nure mong tei mohri go na indiprohmur. Wannong sonmur pongopari. Potperhan arpin it bot dahnong hama pipari.  
\v 38 Ihir saperim ihtiperhan mongsup ihir ohe mutuh ma pateshe han ohhe Jisas ohnong Nohana. Nohhe ditadit saprohemur por kandeingopri.   
\p
\v 39 Por kamtiporhan Jisas oh Es. Go gorhe apteinong susa gorhornong ma Got ohe yah nahah ohe meng moh gorhe ap mutuh ma pati kuuhan ihirnong porinmur pongopri. Potporhan oh arpin orhe ap mutuhnong susa Jisas oh orhornong ma imat yah dei ohe meng oh pomat orhor ama ap mutuh pati kuuhan ihirnong ama pot pihip oh.   
\s1 Jisas oh brer kuunang bap titsi; kuu kwapran hat patesuh kuu titsi ihitnong ma yah matip ohe meng oh  
\r (Matyu 9:18-26; Mak 5:21-43)  
\p
\v 40 Jisaso orhe pinggit pisapat hano irair Gariri tom hru kat tannong it mandeihpari. Mandesa koriyaoh kuuhan ruumsan gon tit tarmur wamat minhan patingopari. Wamat minhan patimdapat Jisas ohnong Wes it mandeo por amam deingopari.  
\v 41-42 Amam matperhan rotu ap wamat papti han Jairas oh apris Jisas ohe tong duup oh bos hamnong ham timapat Nohana. Nohe brer kor tit pokwimur. Urhe krismas oh natheimur. Gin uh sik ham haputin ina hat patmur. Ihan go sus ha pomtinoh rim noh gonong nambur apirmur por kandeingopri. Por kamtiporhan Jisas oh ihit saperhan kuuhan gon ama ihirhe gonsi Jisas ohnong huupmat ama pihipa oh.   
\p
\v 43 Huupmat ma saya dus oh kuu kwapran hat patin krismas nathei ma birhitip kuu uh uhnong hanip pomtinhe na pomtin ina hat pat kuu tit uh tap ire mutuh ama ihat pipa oh.  
\v 44 Ma ihat saya dus oh uh Noh Jisas ohnong marihanoh yah hatiprohwa daham Jisas ohe watah an pat ohe watah rumpe amdapat ama marindip oh. Maripatin orhor kwaparan oh gateng ringopri.   
\p
\v 45 Ihtiporhan Jisas oh nohe kasip oh us ma hapat daham kuuhan ihirnong Gur nih nohnong namri por dahandeingopri. Dahamtiporhan ihir gonsi Hah. Nohri timbasmur goshat sangopari. Goshat saperhan Pita oh Wanahat pat hana. Kuuhan mihtin gonong huupnahat napopriya tei moh go Nih namrei rim dahanahapatda potipri.   
\p
\v 46 Potporhan Jisas oh Oho. Nohe hanipnong yah matin ohe kasip oh ushan tit uh tit ha yah nahatinoh daham tit namriwa daham am hahmur pongopri.  
\v 47 Potporhan Jisas oh yah nahatiprohwa daham bes ma mari kuu uh kuuhan mihtin ruumsan sapti dus moh kinhat remdiproh dahapat bupat apris Jisas ohe tong duup oh bos hamnong ham timongopri. Timapat kuuhan iraire kintei orhor urhe ma ha yah nahatinoh rim ma mari ohe mengo urhe maripatin orhor ma yah hah ohe mengo oh pongopri.  
\v 48 Potporhan Jisas oh Kora. Gorhe ma Oh yah nahatiprohwa daham ma namri ohe pe oh gorhornong yah nahahmur. Gin amam dasi ham da manap hat sonmur pongopri.   
\p
\v 49 Porpatin orhor rotu ap wamat pat han ohe apdapat tit han tit mengsi aprisa rotu wamat pat han ohnong Jairas gwe kor uh gin da ushemur. Ihan go tisa mohnong be ina ruumsup mar pisapra pongopri.  
\v 50 Potporhan Jisas oh ameng oh amrama Jairas ohnong We. Itap go da tupnet rim da darhetipra. Ohwi imtin hatin hanwa dahatwi ahanoh gwe brer oh yah hatiprohmur pongopri.   
\p
\v 51 Pora ihir pipari. Susa aptei koripti brer sein pat apnong roperim Jisas oh kuuhan ihirnong gonsi baso pora Pitao Jono Jemiso brer urhe sup gamino ihirnongwi ambura brer sein pat apnong ruhpari.  
\v 52 Royaoh kuuhan ihir gonsi gon saheih ham payimaptingopari. Payimaptihan Jisas oh Gur yimapri. Brer oh na hapura be timon pat ohoh ihan gur yimapri pongopri.  
\v 53 Potporhan ihir Wa. Hanip Brer moh haput tei moh han moh kinhat mengir gosham kre angopari.   
\p
\v 54 Kre atperhan Jisas oh brer seinnong bes tandapat marima kasip mengtei orhor Brer go masona por pamsangopri.  
\v 55 Por pamsaporhan urhe da oh it aprisa kapkap masangopri. Masporhan Jisas oh Gin den tit pandinmur pongopri.  
\v 56 Potporhan sup ihit gamin orhe pamsanong wamara It da pamsa moho daham ihithe sein bupang rim kas hatpari. Kas hatperhan Jisas oh sup ihit gaminnong Gut brer pamsa ohe meng moh kuuhan ihirnonghe poripri por anggungopri.   
\c 9  
\s1 Jisas oh orhe nathei han ihirnong hanip yah matin ohe kasip apris darhetip ohe meng oh  
\r (Matyu 10:5-15; Mak 6:7-13)  
\p
\v 1-2 Gahan Jisas orhe nathei han ihirnong Gur apris matei tap tei hatina pongopri. Potporhan ihir apris tap tei hatperhan Jisas oh Gin noh gurnong kuuhan ti han ti han sik hat patio mongsup ire mutuh ros patio ihirnong yah mat pisashen ohe kasip ina ohsi nahahmur pora ama kasip ina ohsi deingopri.  
\v 3 Deipat Gin gur mama kasip napir ohsi gur aptei aptei oh susa Got ohe napapindin meng poriyao er hat ma pati kuuhan bap ihirnong yah mat pisayao hat sashenmur.  
\v 4 Ihat sonmat oh guragure mandap son ohe erer ohsi hat sapri. Mandap oh sonmat oh tohhe marim sapri. Den ungsihe sapri. Manihe mim sapri. Watahhe yot mat pisapri. Be kombita sonmur.  
\v 5 Susa ap mutuho be apteido koriyaoh tit han oh tit nambura Gin nohsi indiprohemur naporhanhe ama nambur han orhorsiwi ap oh indinmur. Orhorsiwi patimdapat Gin wan apteinong sapera dahayahan sonmur.  
\v 6 Ap mutuh pati han ihir hahap naham na namburiyahanoh ihir Diradir san ham ihirnong na amburiya ohe pe oh dirnong atnap batbet napripra ma hapat ha dahatingwe rim gure tong huhun tambor oh atei orhor hirmat mandam sonmur pora darhengopri.  
\v 7 Por darhetporhan ihir aptei aptei oh Got ohe yah meng oh pot pisayao er hat pati kuuhan ihirnong yah mat pisayao mat pihipari.   
\s1 Jisas ohe ihat sapat meng oh Herot oh amrama da huutip ohe meng oh  
\r (Matyu 14:1-2; Mak 6:14-16)  
\p
\v 8 Gahan Jisas oh orhe han ihirsi ihat sapti ohe meng oh kuuhan kat ihir am hapti Moh Jon tom patirisuh han orhor it da apris ihat sapatkin. Kat ihir Moh Iraija orhor it apris ihat sapatkin. Kat ihir Moh rih ma Got ohe meng pot pisashe han propet ihir tit it apris ihat sapatkin gigoshat saperhan Gariri mong ohe kakhan Herot oh ama meng muk oh amrapat da huung ama ritip oh.  
\v 9 Da huung rima Jon ohra rih nohe mengtei ma kak agatmatpa oh gin ihtin han tit ihat apripatmur ma ripti oh oh kinhatin han ihat apripat rim ihan noh wamtipora ama dahatip oh.   
\s1 Jisas oh kuu brer ihirsi; han 5,000 ihirsi ihirnong den pandip ohe meng oh  
\r (Matyu 14:13-21; Mak 6:30-44; Jon 6:1-13)  
\p
\v 10 Gahan Jisas orhe nathei ma darhetir han ihir it apdapari. Aprisa iraire ihat ma piri meng gonsi oh Jisas ohnong potpari. Potperhan Jisas oh Gin dirarhe Betsaida apteinong sus indiprohemur potporhan Jisas ohsi irarhe pipari.   
\p
\v 11 Irarhe saperhan gahan kuuhan ruumsan ihir Ihir anong sayamur ritperhan ihir amrama ire kom apingopari. Ire kom apriperhan Jisas oh ihirnong Gur kom ma apriya oh yahwa pora Got ohe napapindin ohe meng oh poro sik hat pati kuuhan ihirnong yah mat pisao deingopri.   
\p
\v 12 Indeipat kwihan orhe nathei han ihir Jisas ohe pat duupnong hama ohnong Matei hanip timbas tei moh den oh de teimdapat dar pandiprohe. Ihan go ihirnong Gur den rusi ire patio aptei apteio oh sus guragure den mohom din apo timdin apo angmat sonmur por darhetinmur potpari.   
\p
\v 13-14 Potperhan Jisas oh Es. Guragur den oh pandinmur pongopri. Potporhan kuu brer ihirsi; han gon 5,000 ihirsi patin ohoh ihan ihir Epe. Nuhur denhe hanena; aning ephe yot boka ohpokwi patmur. Ruumsan maihirnong moh kinmat den mohom pandiprohe potpari. Potperhan Jisas oh Gin gur ihirnong 50 50wi ham amuk amuk ham tongnotin potinmur pongopri.  
\v 15 Potporhan orhe han ihir orhe ma porru mat potperhan ihir amuk amuk ham tongnongopari.   
\p
\v 16 Tongnotperhan Jisas oh den hanen ohsi; aning ep yot ohsi darpat aw tei mahatnong watahama Got ohnong Weso pora brisbras pora orhe han ihirnong Gin gur ihirnong nitat mar pandinmur por apingopri. Apriporhan ihir nitat mar pandipari.  
\v 17 Pandema ihir gonsi dama pei ham ma mandaya oh it dara ung mima nathei ung oh teip mat itpari.   
\s1 Pita oh Jisas ohnong Got oh nadarhetipra ma ritip han oh gomur potip ohe meng oh  
\r (Matyu 16:13-19; Mak 8:27-29)  
\p
\v 18 Gahan tit dah tit Jisas oh orhap teinong sus Got ohsi mengripatin orhe pinggit pisapat han ihir orhe mengripat teinong pipari. Saperhan oh Kuuhan gon ihir nohnong de hana naporiptingweri por dahandeingopri.  
\v 19 Dahamtiporhan ihir Kat han ihir gonong Jon tom patirisuh han orhormur naporiptimur. Kat ihir rih patesuh han propet Iraija orhormur naporiptimur. Kat ihir rih propet pateshe han ihir tit han it masas da apris pat han orhormur naporiptimur potpari.  
\v 20 Potperhan oh Gin guragurwa. Nohnong de hano naporipti por dahandeingopri. Por dahamtiporhan Pita oh Gora Got oh ihirnong amburin hanmur napor kis naham nadarhetip han oh gomur potipri.   
\s1 Jisas oh nohnong dinahatper dahayahanoh mamaru mat dinahatinmur potip ohe meng oh  
\r (Matyu 16:20-28; Mak 8:30–9:1)  
\p
\v 21 Pita oh ameng oh potporhan Jisas oh We. Nohe boknong arpin meng ri mohri gur tirip hat sasipri por baso por anggungopri.  
\v 22 Anggurpat Hanip Brer nohnong rotu ap ohe han pohono ap yawar ohe hanat bok han ire duuptei hano sawa mengnong am hat pati hano ihir nohnong garnaham batbet ruumsup nahatiprimur. Nahat patimdapat nitperhan noh haputipramur. Hapura yot dah timama bimrip oh Got oh it da napris it napamsapramur pongopri.   
\p
\v 23 Pora orhorsi sapti han gonsi ihirnong Gur Noh ohe danong ham dimtipora ma dahapti kuuhan gur guragure ma nuhur ihat inpera ma dahapti da oh mandama noh Jisas ohe danongwi hat sapatin nohnong ruumsup naham nitperhan hapurhanhe yahwa dahat orhorwi nohe danong ham dinahenmur.  
\v 24 Gur Matei orhorwi trun mihat orhorwi pateprineng daham inin hat ma sapti bap guroh eimat yah hat paten ohe da oh na datipri han bap gurmur. Nuhur Jisas ohe danong hat saptin niyarit hapuriyahan yahwa daham ma dinahapti bap gur eimat yah hat paten ohe dasi hat patepri bap gurmur.  
\v 25 Gur yah hat eimat paten ohe da oh mandama kakdah ohe erernong moh ruumsan datpora daham ruumsan erer oh gonsi dariyahanoh gure erer ruumsan ma dariya han oh gurnong batbet naham er nahatipra tei oh ama ihir napanggeim yah nahatiprida. Basra. Ama erer ihir na napanggeitiprimur.  
\v 26 Gur norhornongo norhe mengnongo oh kasna nahayahanoh kaput Hanip Brer noh norhe has da ohsi; ato yahnap hat pati ensero ire has ohsi gon gurus rim apris gurnonghe noh kasna nahatipramur.   
\p
\v 27 Noh gurnong arpin meng napotiprohmur. Kat mama pati gur na haput patin orhor Got orhe napapat da oh pitap hatporhan gur wamtiprimur pongopri.   
\s1 Jisas oh orhe ina oh gon ina hama haputpa han yot ihitsi mengitip ohe meng oh  
\r (Matyu 17:1-13; Mak 9:2-13)  
\p
\v 28 Jisas oh ama meng oh pora gahan tit Sande rima Gin Pitao Jono Jemiso ama yitir han gur nohsi yei kanong ruprohemur. Rusa noh Got ohsi mengitiprohmur pora ihirnong ambur ihir ruhpari.  
\v 29 Rusa yei ka hat koripti Jisas oh Got ohsi mengingopri. Mengripatin orhe rumkin oh wan rumkin tit tamburker hangopri. Hama orhe watahhe wanohe has namenap hat manda hangopri.   
\p
\v 30 Ihat mandapat rih ma haputpa han yot Mosessi; Iraija ihit pitap ham ihir mengriptingopari.  
\v 31 Mosessi; Iraija ihithe has ohsi aprisa Jisas ohe Jerusarem ap mutuhnong sus ma haputipra ohe meng oh gosporiptingopari.  
\v 32 Jisas oh orhe has ohsi has hat patim ama yot han ihitsi mengriptin Pitao ama yitir han ihir timon patimdapat masas wamtipari.  
\v 33 Wamara yot han ihit Jisas ohnong mandama sapera ritperhan Pita oh Wanahat napapat hana. Dir matei mihat pati oh yahmur. Ihan dir matei indinmat nuhur tom ap tem yitir hatiprohemur. Tit gwea; tit Moses ohea; tit Iraija ohe imat hatiprohemur potipri. Pita oh kian meng potin ham hanhan hat patim ameng oh potipmur.   
\p
\v 34 Pita oh ameng oh porpatin awgapar isip tit giamtiporhan ama yitir han ihirhe kas hatpari.  
\v 35 Kas hatperhan awgapar mutuh amdapat meng tit Moh norhe brer kis mar darhetip brermur. Ihan ohe ma naporpat meng oh gur amranmur rim hangopri.  
\v 36 Girit mandatporhan ihir it wandeiyaoh Jisas orhap pat hangopri. Ihtiporhan ihirhe Gin mama wandeiya meng moh dirhe na riprimur rima na tirip ham ama kimirit inpa oh.   
\s1 Jisas oh brer tit ketsup ga at patin ga apetip ohe meng oh  
\r (Matyu 17:14-21; Mak 9:14-29)  
\p
\v 37 Jisaso orhe yitir hano ihir yei ka timorimdapat kutwi it apteinong wapero rim waihpari. Waptin but ham koriyaoh Jisas orhe pinggit pisapat tohathei han ihirsi; be kuuhan kat ruumsan ihirsi mandap ririmat apris tarmur Jisas ohnong wamat patingopari.  
\v 38 Wamat patimdapat tit han tit mutuh ohomdapat tandeima Tisa. Nohe mon ohe ma ihat pat meng oh gonong pomat napotiprohmur. Go wamar ha pomtinoh rim pomat orhor napotiprohmur. Nohe brer oh morhapmur.  
\v 39 Ohnong oh ketsup tit ohe mutuhnong hama da aban matporhan oh kapkap orhor ngangara atem kat purmaksi hama ama ketsup oh kapkap na mandam orhe inanong er deipatmur.  
\v 40 Indeipato rim noh brer ohsi apris gorhe pinggit pisapat han ihirnong Gur brer moh ohe mutuh mahan ketsup ros er deipat ketsup moh gur dat amdatin por pomat potporhan ihir kis tahayaoh dat na amdatin ina hayamur. Ihan go ketsup ohnong dat kot teinong mar darhetinmur por akit kasip mengtei orhor pongopri.   
\p
\v 41 Gipotporhan Jisas oh Epe. Gin mama pati kuuhan gur da ban tahat orhorwi patimur. Gur nohnong Oh yah matin hanwa na dahaya moh noh gursi napapatru mama napapat oh gur desut da darhetipri pora itap ohnong Gin mon ohsi aprina pongopri.   
\p
\v 42 Potporhan ihit taman Jisas ohe duupnong apriptin ketsup oh ohe mutuhnong ros da aban mara kakdahnong eiprehet sara dapurkem dapurkem mat pisongopri. Imat pisaporhan Jisas oh Mama mihpat ketsup er go hanip brer ohnong mandama eimat maras sonmur pora brer ohnong yah deingopri. Yah deipat itap ohnong Brer moh gin yah hahmur. Itap go it ambur pisona pongopri.  
\v 43 Potporhan kuuhan ihir Epe. Got ohe kasip ohsi indei moh Got orhor kasipnap hanmur daham sein bupang ringopari.  
\s1 Jisas orhe haputipra meng oh orhe han ihirnong potporhan ihir na dahatpa ohe meng oh  
\r (Matyu 17:22-23; Mak 9:30-31)  
\p Kuuhan ihir Jisas ohe ma ihpato meng ma ripato moh yahnapwi hapat han moho gosham da trun trun darhet patin Jisas oh orhe pinggit pisapat han ihirnong  
\v 44 Nohe ma napotiproh meng oh pomat amrat patinmur. Hanip Brer nohnong nang han oh mahaw han ire bes teinong nahatipramur pongopri.  
\v 45 Potporhan ama meng ohe mutuh meng oh Got oh ire kinteinong na pitap mat patin ohoh ihir hanhan hatpari. Hanhan hapti kas ham ama mutuh meng oh na dahamtipari.   
\s1 Win timbas han ihir winsi han hatiprimur ritip ohe meng oh  
\r (Matyu 18:1-5; Mak 9:33-37)  
\p
\v 46 Gahan Jisas orhe pinggit pisapat han ihir Got ohe napapindin teinong hatinmat oh nohri winsi han ham atei hatipramur gosham irair sakarap goshatpari.  
\v 47 Iham sakarap goshatperhan Jisas oh ire ma ihat daham ma sakarap goshaya danong oh wamar am hapat brer gar tit ambur popris ohe duup oh mandapat  
\v 48 Gur norhe danong ham mama mihtin brer ihirnong ambur yah deiyahanoh ama indeipti han gur nohnongwi na namburiptimur Nohnong ma nadarhetip han at nuhutnong tap mat nambur yah nahaptimur. Got orhor gin kakdah moh patim Maihir win timbasnap hat pati bapmur ma naporipti bap gurnong oh win isipsi bap nahatipra han bap gurmur pongopri.   
\s1 Jisas oh Gurnong ma na mahaw nahat pati han ihiroh gure yah han ihirmur potip ohe meng oh  
\r (Mak 9:38-40)  
\p
\v 49 Gahan Jon oh Jisas ohnong Napapat hana. Nuhur wandeiyaoh tit han tit Noh Jisas ohe kasip ohsi mongsup gur maras sona naporpatmur por mongsup ga pet apisapatgwermur. Ihpathan oh dire tap na sapat hano rim nuhur baso potirimur potipri.   
\p
\v 50 Potporhan Jisas oh Gur mohnong dahenmur. Gurnong na mahaw nahapti han ihir guragure yah han ihirmur. Ihan ama ihat napanggeipti han ihirnong baso poripri pongopri.   
\s1 Samaria mong pati ihir Jisas ohnong garmar Go maptei na timdiprohmur potpa ohe meng oh  
\p
\v 51 Gahan Jisas oh Got oh nohnong nambur aw teinong mahat naprun dik oh gin kakduup hah ma hapat dahama Gin Jerusarem ap mutuhnong sapora daham irair pipari.  
\v 52 Susa mandap oh kat ihirnong Dir Samaria mong mutuh oh saprohemur. Ihan gurri hat susa Samaria mong ohe aptei oh tit ap tit matei timdina ha napotingwe rim gurri hat sus dahahat sonmur. Dahahat susa Yahwa. Jisas ohsi gur map timdina naporiyahanoh gur ama ap oh mamen tahaptinmur por darhengopri.   
\p
\v 53 Por darhetporhan ihir susa potperhan ama Samaria ihir Jisas oh dire na sapti Jerusarem ap yawarnong sapato rim ihir Ihan oh matei na timdiprohmur por baso por indeingopari.  
\v 54 Baso por imar garmatperhan Jisas orhe pinggit pisapat han yot Jemissi Jon ihit baso poriya meng oh amrama Jisas ohnong Hanipyaha. Gwe da oh Ihit aw tei mahatdapat irat has go wandono. Wandasa mama kuuhan ap baso riya ihirnong adur timbas matino ihit imat ha potingwe go dahapatda por dahamtipari.  
\v 55 Por dahamtiperhan Jisas oh it tamburker ihitnong wamara Epe. Gutnong nih ihtin meng oh ritin naporhe por indeingopri.   
\p
\v 56 Ihama atei na timama wan aptei tit sus timdipari.   
\s1 Jisas oh nohe tapnong ham dinahatpera ma dahaya han gur tit dawi ham dinahenmur potip ohe meng oh  
\r (Matyu 8:19-22)  
\p
\v 57 Gahan irair mandap saptin tit han tit Jisas ohnong Nohana. Gwe ma sasipra kat oh nohri ditaditwi saptiru sasiprimur pongopri.  
\v 58 Potporhan Jisas oh Go nohsi sasipramur ma ri oh mohnong dahatinmur. Kotwa ihiroh deip temhe apit manhem timaptimur. Ner ihirhe ap ham patimur. Hanip Brer nohnong oh aphe timbas hanmur. Hanip wan ire ap wanin ohwi timon sapatmur pongopri.   
\p
\v 59 Gahan Jisas oh tit han tit ohnong Go nohsi sashenmat go aprinmur pongopri. Potporhan oh Hanipyaha. Ditadit son ina hat pat orhora; noh it apteinong susa at oh hapurit sein sara apris ditadit sasiprimur pongopri.  
\v 60 Potporhan Jisas oh Es. Damdapat ma haputpa da hatin hat pati bap ihirdapat kat hapuriya han ire sein oh sa saripri. Gori gin orhor nohe tapnong ham susa Got ohe napapindin ohe meng oh pot pisashenmur pongopri.   
\p
\v 61 Gahan tit han oh Hanipyaha. Noh gwe tapnong ham sasipramur. Sonmat oh noh it norhe apteinong sus norhe nita ihirnong kapkep maro hama dit sasiprimur. Go Yahwa ihtina napotiprohda rim dahanahapatmur pongopri.  
\v 62 Potporhan Jisas oh Es. Mohnong dahenmur. Tit han ohe da duung rim tamreipat da asoh wan han ihir apris go mihat tamreindinmur potperhan oh ire mengnong amram dindeihanoh orhe tamreindin oh na yah hatiprohmur. Ihat dahapti han ihir Got ohe napapindin tei ohe atamreindin danong na hatin ina hat pati han bap ihirmur pongopri.   
\c 10  
\s1 Jisas oh 72 han ihirnong Gur meng pot pisonmur por darhetip ohe meng oh  
\p
\v 1 Gahan Hanipyah oh orhe kis matip nathei han ihir orhorsi patina gahan komdapat 72 han ihirnong ambura Gin gur yot han yot hanwi hama nohe kwit ma ihat sasipra ohe ap mutuho be ohe aptei apteio anong sonmur.  
\v 2 Ma ihat sapri aptei atei oh Got ohe meng amram ohe danong hatin ohe da oh ruumsan ihir den dam datin ohe tan hat patimur. Ihan gur susa den dam suhdin han hatin hat sus Got ohe danong hatin ohe meng oh pot pisonmur. Pot pisonmat oh dam suhdin oh ruumsan hat pat ohoh ihan gur Nure bes teiwi na yah hatiproh ma hapat daham ru nita han ohnong Gorhe den dam nasuhdin han nuhur pang hat pati ohoh ihan gorhor kat han gon tit darhetinmur. Darhetporhan nuhur den dam oh ruumsan han ham nadatiprohemur por dahamtinmur.   
\p
\v 3 Gur sonmat oh mamengnong mohhe dahat sonmur. Gur sipsip bap hatin hat pati orhor sipsip bap ihirnong kotwa ihir sum dapti dusnong nadarhermur.   
\p
\v 4 Gur sonmat oh manio mandap kasip hatin ohe den ungo tong apo ohsi hat sapri. Be kombita sonmur. Saptin kuuhan ihir mandap apriptihanhe ihirsi meng saro hat sapri. Guragure ma saper riya teinong oh kapkap sonmat oh saptiwi henmur.  
\v 5 Susa aptei kora Gin map ropera daham ap gwatei kat ronmat oh gurdapat ihirnong Map ma pati kuuhan gurnong Got oh orhe manap goshat paten ohe da ohsi nahat ha napaptenohmur por ronmur.  
\v 6 Rosa wandeiyaoh Got ohe yah mat papindin danong hatin han ti patihanhe gure por ma roya meng oh dam timam ihirsi patepramur. Ihtin han ti na patihanhe gure por ma roya meng oh dam na timam it guragure boknong naham napaptepramur.   
\p
\v 7 Ap gwatei ap gwatei hathe sasipri. Guragure ma roya ap ohwi indinmur. Patin deno tomo ma namdeya oh tamreipti han ihir yan daripti ohoh ihan nure tamreiya ohe pe oh napriya ma hapat daham denmur.   
\p
\v 8-9 Gur ap mutuhnong saperhan ihir gurnong amam naham namburiyahanoh ama ap mutuh orhor indinmur. Patim ire den ma napriya den oh damo ama ap mutuh ohe sik hat pati han ihirnong yah maro Got orhe hrepnong naham napapindin oh gin kakduup hahmur poro hat indinmur.  
\v 10 Gur ap mutuhnong saperhan ihir gurnong na nambur hahap naham kom nasariyahanoh ama ap mutuh oh mandam saperim gur ama ap mutuh orhe mandap tei oh tandeima ama ap mutuh kuuhan ihirnong  
\v 11 We. Gur gin moh wamtin. Gure nuhurnong ma san nahaya ohe pe oh nure tong bok moh ap mutuh moh ohe huhun tambor ma tamder oh nuhur ap mutuh mama it hirmat namdaya ohmur. Hirmat namdaya orhora; Got orhe hrepnong naham napapindinheri gin kakduup hah ma hapat daham potahat dahat indinmur gipora tong bok ohe huhun tambor ma tamder oh hirmat mandam sonmur.   
\p
\v 12 Noh arpin meng napotiprohmur. Kaput Got ohe pepe dik bopor heisup ma nahatipra dik oh Sodom ap mutuh ma pateshe kuuhan ihirnong orhe heisup mat papat ohe batbet isip oh apripra orhor gurnong ma hahap naham kom nasariya bap ihirnong oh batbet isipnap apripramur pongopri. Giporpat ihirnong darhengopri.   
\s1 Jisas ohe mengnong kom asariya bap ire batbet ma datipri ohe meng oh  
\r (Matyu 11:20-24)  
\p
\v 13 Jisas oh Korasin apteio Betsaida apteio gur Got ohe heisup nahat napapat ohe da ohsi batbet isip ma napripra oh gur hinhinsi han baprano. Gurnong na wandeipti da namgipat orhor gur Nuranure er da moh na mandama orhorsi hat patepera dahat ma pati oh ermuro. Gurnong ma namgipat da moh rih Taia apteio Saidon apteio ihirnonghe pinggisuhneng ihir Nure er hat pati da moh gin mandatpera daham saheih ham simbap ariyao sirap ariyao hapti mandatpanengmur.  
\v 14 Ihtin ohoh ihan Got oh Taia apteisi Saidon aptei ihitnong ma heisup mat papat ohe batbet ma apripra oh isip orhor ama batbet oh garpok batbet apripramur. Gin namgitperhan am hat patim ma ihapti aptei gurnong oh batbet oh isipnap nahatipramur.   
\p
\v 15 Kapaneam aptei ma pati bap gurhe Nuhur yah hat pati ohoh ihan Got oh nambura nure win nadaptuhur aw teinong nahatipramur dahaptida. Basra. Gur er hat pati bapo rim kurwam ohe ga teinong tapan nadutipramur pongopri.   
\p
\v 16 Giporpat orhe han ihirnong Gur susa meng oh ihirnong potperhan gure meng amram dindeiyahanoh oh nohe mengnong amram dinahaptimur. Gure meng na amram kom nasariyahanoh oh nohnongsi; nohnong ma nadarhetip han nuhutnong tap mat kom nasariptimur pongopri.   
\s1 Jisas orhe ma darhetip 72 han ihir amam ham apris meng potpa ohe meng oh  
\p
\v 17 Gahan Jisas orhe 72 han ma darhetir han ihir meng pot pisaptidapat amam isip tit hat it apingopari. Aprisa Hanipyaha. Nure gorhe kasip ohsi ma imat pihiri oh be sik hat pati han ihirnongwi na pomtirimur. Mongsup ihirnongsi Nuhur Jisas orhe kasip ohsi gin mongsup gur maras sona naporiyamur potperhan ihir maras sayao mat pihirimur pongopari.   
\p
\v 18 Potperhan Jisas oh gur indeiptin noh wandeioh Satan oh aw teidapat kakdahnong moh wandangwermur.  
\v 19 Gur nohe kasip ma napir mengnong moh amratinmur. Noh gurnong inapawamo tohaho mahaw nahaya hano ihirnong tonggamar ambapte matin ohe kasip ohsi nahat napapatmur. Ihtin kasipsi nahat napapat ohoh ihan gure boknong er nahatin oh timbasmur.  
\v 20 Ihtin kasipsi nahatporhan gur Nuhur ama ohe kasip ohsi mongsup ihirnong maras sona potperhan nure meng amram maras saptihe daham ama ohe danong ham amam hapri. Nure win oh Got oh aw tei mahat brak mar nat patwa daham ama ohe danong amam ham patenmur pongopri.   
\s1 Jisas oh Got ohnong weso potip ohe meng oh  
\r (Matyu 11:25-27, 13:16-17)  
\p
\v 21 Jisas oh ameng oh pot manda tei Got orhe Yahsup oh amam da apriporhan amam hangopri. Amam hapat itap ohnong Nohe ata. Aw tano mong tano gonsi ma pat han oh gorhorwi Hanipyahnap hat patmur. Ihat pat han go gorhe da oh hanip ihir noh dakuu amsi hanmur ma dahapti han ihirnong na pinggima aremama brer ire da hatin hat sus Noh dakuu hat indin ohe da oh timbas hat patwa ma dahat pati han ihirnong asoh pinggipatmur. Go ihat pati han ihirnong gorhe da oh pinggipato rim noh gonong weso napor amam nahapatmur. Ma ihpat oh at gorhe damdapat orhor ihtipora daham ihpatmur pongopri.  
\v 22 Pora kuuhan ihirnong At oh erer oh gonsi norhe bes teinongwi namat pat ohoh ihan norhor pokwi am hat patmur. Orhe brer nohnong pomat am hatin ohe da oh gur gonsi nohnong pomat na dahat patimur. At orhor pokwi am hat patmur. At ohnong am hatin ohe dahe gur gonsi hanhan hat patimur. Mon norhorsi; norhe ma namgipat han gursi dir pokwi at ohnong am hat patimur pongopri.   
\p
\v 23 Giporpat bos tamburkera orhe pinggit pisapat han ihirnongwi Gurnong oh nohe ma namgipat da oh wamar am hapti ohoh ihan amamsi hat pati bap gurmur.  
\v 24 Gure amramo wamaro ma hapti da moh rih oh propet bapo mong ohe kakhan hat pateshe han bapo ihir gure ma wandeipti da oh Nuhurhe wandeiptineng dahashemur. Gure ma amrapti meng oh Nuhurhe ihtin meng amraptineng dahashemur. Ihat dahashe orhor ihir mihtin danong wandeiyao mihtin meng amrayao ti na hashemur. Gur wandeiyao amrayao hat pati ohoh ihan gur amamsi hat pati han bap gurmur pongopri.   
\s1 Hanip bap ihirnong gonsi bopor deinmur rim paham meng boknong matip ohe meng oh  
\p
\v 25 Gahan Jisas oh meng am deipatin pohon sawa mengnong amnap hat pat han tit tandeima Jisas ohe mengnong adason matporim ohnong Tisa. Noh kinhahrit dipwi yah hat paten ohe da oh datiproh por dahandeingopri.   
\p
\v 26 Por dahamtiporhan Jisas oh Got ohe ritporhan Moses ohe ma natip sawa meng oh de meng oh go sama Mama mengnong moh noh dimat ahanoh noh eimat paten dasi hatipra ma hapat dahapat pongopri.  
\v 27 Potporhan oh Noh mama ohe brak matip mengnong mohwi sam dahapatmur. Tit oh Guragure Hanipyah Got ohnong bopor mat papten oh da muhutdapat orhor orhornongwi bopor mat paptenmur. Dahe orhornongwi dahat patenmur. Kasiphe orhornongwi kasip hat patenmur. Amaru hat orhorwi bopor mat paptenmur ritporhan ma brak matip ohe meng ohmur. Tit oh Guragure Noh ihat yah hat inpora daham gorhe boknong ma yah hat dahapatru hat orhor arwananah ihirnong asohhe imat orhor da apris bopor mat paptenmur ritporhan ma brak matip meng ohmur. Ama yot mengnong oh noh dahapatmur pongopri.   
\p
\v 28 Potporhan Jisas oh Dawa go arpin kis dei meng rimur. Go ama yot mengnong oh dimat ahanoh go eimat paten dasi ham patepramur pongopri.  
\v 29 Potporhan oh Amrat pati han maihir nohnong Go dahat pat meng orhor ohnong kianorim ohnong dahandeipat napotipri dahapat it Jisas ohnong Noh arwananah ihirnong bopor mat papindin oh de ihirnong bopor mat ha papindinoh dahapat por dahandeingopri.   
\p
\v 30 Por dahamtiporhan Jisas oh Noh mama paham meng moh napotporhan go ama han ihirnong imat papindinmur napotip ma hapat dahatinmur. Paham meng oh mamaru hat patmur.  
\p Tit han tit Jerusarem ap mutuh oh patesuhri. Patdapat gahan Gin noh Jeriko apteinong waporo rim waihipri. Wapatin mandap oh gapah han bap ihir aprisa ohe erer oh adatinmat kawsi sutperhan oh haputin ina hat patin ohoh erer oh sa adar pipari.  
\v 31 Saperhan oh haputin ina hat mandap tei oh patin Got orhe ap yawar hanat bok han ihir tit han ama mandap kup apingopri. Aprisa hanipnong wamara na panggeim kom asar mandap manggap pe puh amdapat sangopri.  
\v 32 Saporhan Ripai bap Got ohe ap yawar atamreipti han bap ihir tit han apingopri. Aprisa wandeipat na panggeim kom asara mandap manggap pe puh amdapat sangopri.   
\p
\v 33 Saporhan gahan iraire mahaw goshat pati han Samaria ihir tit han apris wamara hinhina isipnap tit deingopri.  
\v 34 Hinhina isip mara ohe duupnong aprisa gapah han ihir ma ina mong mong suta ohe batbet oh ha pang hatinoh rim orhe wer sano wain tom gap sano oh dar amongopri. Amorpat aban deingopri. Aban deipat tapama orhe donki basnong deipat apteinong pangopri. Pasa iraire kakun sus timapti han ire apnong oh mara den pandemo paptema timatiri.   
\p
\v 35 Timorimdapat kutwi mong da hatporhan oh saporim mani tan yot tit dara ap wamat pat han ohnong Ohe ap ma indiproh ohe ap yano den pandiproh ohe yano oh mama napir ohmur. Ihan go ohnonghe pomat papindinmur. Pomat papatina yan oh tit hatip hahhanhe noh it apris yan napripramur pora yan apris sangopri. Ihtipari pongopri.   
\p
\v 36 Giporpat sawa mengnong am hat pat han ohnong Gin arwananah ire danong ham ma bopor deipti da oh gin mama yitir han maihir de han oh ihtin dasi hat apris gapah han ihir rum hemat itiri han ohnong ambur yah matipo. Go ritino pongopri.  
\v 37 Potporhan sawa mengnong am hat pat han oh Ohra hanip ohnong ma hinhina mar panggeitip han oh ama han orhor ihtin dasi ham ambutipmur pongopri. Potporhan Ihan ohe ma mahaw goshat pati han ohnong hinhina mar ma panggeitipru hat orhor gohe ihirnong hinhina mar yahwi mar panggeit pisashenmur pongopri.   
\s1 Jisas oh Mata uhnong meng potip ohe meng oh  
\p
\v 38 Gahan Jisas oh orhe pinggit pisapat han ihirsi irair susa Mata uhe pat aptei oh kotpari. Kotperhan uh Gin nohe apnong sus den damo hatiprohemur por ambur pisangopri.  
\v 39 Ambur pisusa uh den tendeipatin arwap Maria uh Jisas oh ihirnong meng am deipat ohe meng oh amratporo rim ohe tong duup oh tongnoma meng amrat angopri.  
\v 40 Meng amrat patin Mata uh Maria uh nohnong na napanggeipat moho. Noh norhap den temaro ruumsan tamreipat moho daham da er hapat apris Jisas ohnong Hanipyaha. Uh nohnong na napanggeitporhan noh norhap tamreipat moh go kinham na dahapat. Ihan daham Go uhnong panggeitina potinmur pongopri.   
\p
\v 41 Potporhan Hanipyah oh We. Kora kora. Go tihan tihan danong oh ham da ruumsup hatipra.  
\v 42 Ohri isip hat pat da oh tit pokwi hat patmur. Ama danong oh Maria uh datpora daham darpatmur. Oh yahnap dat na mandatin ohe da dar ohoh ihan kinmat it dat amdatiprohe pongopri.   
\c 11  
\s1 Got ohsi ihat mengir patenmur ritip ohe meng oh  
\r (Matyu 6:9-15, 7:7-11)  
\p
\v 1 Gahan tit dah tit Jisas oh tit dus tit susa itap ohsi mengingopri. Mengit mandatporhan orhe pinggit pisapat han tit ohnong Hanipyaha. Go Jon ohe orhe pinggit pisasuh han ihirnong Got ohsi mengritinmat oh Mihat mengrinmur por ma pinggitipru mat orhor nuhurnonghe mihat Got ohsi mengrinmur napor am naham namgitinmur potipri.  
\v 2 Potporhan oh Gur Got ohsi mengritper riyahanoh mihat mengrinmur.  
\q1 At Gota. Ongengnap hat pat han gonong armi naham ongengnap hat orhorwi ha napaptengwemur. Gorhe hrepnong naham napapindin ohe da oh mong mong gonsi ha aprinohmur.  
\v 3 Go den gin din ohe kis oh kis mat napina.  
\v 4 Nuhurhe kat han ihir er nahatperhan it ihirnong yansi na mar eimat hanhan mar mandaptimur. Ihan gohe nure er hat sapti pe oh yansi nahatipra. Dat namdatinmur. Er hat ha songwe rim ruumsup naham er nahapat han ohe mutuhnong nahapra.  
\m por ihat Got ohsi mengir patenmur pongopri.   
\p
\v 5-6 Giporpat orhe han ihirnong Gur mohnong dahenmur. Gur guragure yah han tit kut mutuh orhor apirhanoh Noh den timbas hat patin oh apir moh gin noh kinmatiproh daham gorhe yah han ohe apnong asoh susa Gin norhe yah han oh nutanut timdinmat kwitem apirmur. Noh den timbas patin apir ohoh ihan go den yitir tit napinmur por dahamtiprohmur.  
\v 7 Dahamtiporhan ap nita han oh Es. Noh aphe tapura brer ihirsi tap dahnongwi ham timaya tei ohoh ihan noh gonong kinmat dat napriproh. Na napriproh ohoh ihan go apris nohnong ina ruumsup nahatipra napotiprohmur.  
\v 8 Napotiproh orhor go na kasa ham kandeipatin oh masasa gorhe ma hatip hat pat erer oh arpin dat napriprohmur. Ma dat napriproh oh gutagut yah han hat pati ohe pe oh dat na napriprohmur. Gorhe na kasa ham ma kandei ohe pe oh dat napriprohmur.   
\p
\v 9 Amaru hat orhor Got ohnong dahamtinmat oh dipwi dahamatwi ayahanoh ama daham dahandeiya da oh napriprohmur. Angmat orhorwi ayahanoh ama angmat aya ohe pe oh wamtiprohemur. Ha napanggeitinoh rim ap gwatei dipwi kang kang pot ayahanoh ama dipwi kang kang por aya gurnong oh ap gwatei nadapuma napanggeitiprohmur.  
\v 10 Datpera daham Got ohnong dahandeipti gurnong napripatmur. Wamtipera daham angdeipti gur wandeiptimur. Ha napanggeitinoh rim ap gwatei kang kang poripti gurnonghe ap gwatei nadapuma napanggeipatmur.   
\p
\v 11 Brer oh itapir gurnong Ata. Aning bok tit napin naporhanoh itap go na dapti han ambep bok tit apriprohda. Basra. Brer ire ma dahanahaya han orhorwi apriprohmur.  
\v 12 At go ner gwe napin naporhanhe sutin han tohah er oh apriprohda. Basra. Ner gwe yah orhor apriprohmur.  
\v 13 Gur kakdah moh er hat pati han bap orhora; guragure brer ihirnong yah hanwi apriptimur. Aw tei mahat ma pat han at Got oh atnap yahnap hat pat han ohoh ihan gur Got gorhe Yahsup oh nure mutuhnong mar napina poriyahanoh oh arpin napriprohmur pongopri.   
\s1 Kat han ihir Jisas ohnong Go Satan ohe kasip ohsi tamreipatmur potpa ohe meng oh  
\r (Matyu 12:22-30; Mak 3:20-27)  
\p
\v 14 Gahan ihir mongsup oh atem apat pat han tit popriperhan Jisas oh Mongsup hanipnong atem apat pat han go maras sona potporhan oh arpin maras saporhan hanip oh atem tanpura mengingopri. Mengitporhan kuuhan ruumsan ma tarmut pati ihirhe wamara sein bupang rim da tupnet ringopari.  
\v 15 Da tupnet ritperhan kat han ihir wamara Es. Mohra Got ohe kasipsi indeipatda. Basra. Mongsup ire duuptei han Biersebur ohe kasip ohsiwi mongsup ihirnong er mat darherpatmur por indeingopari.  
\v 16 Imtiperhan kat han ihir Jisas orhor orhe winnong daptuhur er hat ha sonoh daham ohnong Nuhur Moh Got ohe kasip ohsi patim indeipat ma hapat dahatin ohe da oh na wandeipti han tit namgitinmur. Namgirit nuhur dahatper por da akis deingopari.   
\p
\v 17 Da akis matperhan Jisas oh ire kis deiya ohe dao Biersebur ohe kasip ohsi indeipatmur poriya ohe dao oh am hapat mama paham meng moh pongopri. Tit kakhan ohe hrepdapatwi hat patimdapat amuk orhe amuk orhe gosham sut patin goshayahanoh irair tap hat gonsi timbas hatiprohemur. Tap ap ma pati guragur tam tuker gusuyahanhe guragur tap hat timbas hatiprohemur.  
\v 18 Amaru hat orhor Satan ohhe orhe nita ihirsi katket taham gusuyahanoh irair kinhat kasip hat indiprohe. Gonsi tap hat timbas hatiprohemur. Timbas hatipririm na ihapti ohoh ihan nohnong Moh Satan ohe kasip ohsi indeipat ma hapat ma naporipti oh kianorim ginaporipti.   
\p
\v 19 Gur nohnong Biersebur ohe kasip ohsi mongsup gur maras sona por er mat darherpatmur naporiyahanoh guragure han ire mongsup ihirnong ma er mat darheriptinong oh gur nihohe kasip ohsi er mat darheripti ma hapat dahapti. Ihir Got ohe kasip ohsi indeipti ma hapat ma dahapti oh nohnonghe Moh Got ohe kasip ohsi indeipat ma hapat dahenmur. Gur ihat ma na dahat pati oh guragure mongsup ihirnong er mat darheripti han bap ihirhe gurnong Biersebur ohe kasip ohsi na indeipatmur. Got ohe kasip ohsi indeipatmur. Gur kinham ihan na dahapti napotiprohemur.  
\v 20 Noh Got ohe kasip ohsi mongsup ihirnong er mat darherpat ohoh ihan Got orhe kasip hrepnong naham napapindin oh apris gin mama pat oh ma hapat dahenmur pongopri.   
\p
\v 21 Giporpat Gur mama mengnong dahatinmur. Han kasip tit dup wama ap gwatei kat patin oh mahaw ihir apris orhe erer oh bisei mar na adariptimur.  
\v 22 Han kasipnap tit apirhanoh ama kwet pat han ohnong ambapte deipat gapah han ihirnong mohsi ambapte mar sutipramur daham mamen mat it pat erer oh gonsi adatiprohmur. Adarpat ohe ihsen erer oh ros adatiprohmur. Adarpat ama erer oh orhe han ihirnong nitat mat apriprohmur. Noh amaru mat Satan ohnong ambapte mar ihat apripatmur pongopri.   
\p
\v 23 Gur nohe tapnong ham na napanggeipti han gur nohnong er naham mahaw nahaptimur. Gur hanip ihirnonghe Orhe sipsip bap amtiper na daham na naruprup deiyahanoh ama han gur okmat darheriptimur pongopri.   
\s1 Jisas oh Mongsup ihir hanip mutuh mandam susa orhor it apripramur potip ohe meng oh  
\r (Matyu 12:43-45)  
\p
\v 24 Jisas oh giporpat Gin gur mongsup bap ihirnong dahatinmur. Mongsup tit hanip mutuh patdapat Gin noh ga taper saporo rim saprohmur. Susa tupetporim ohe indin gat mong teinong angtahatiprohmur. Angtahama ohe indin mong tei timbashanoh Noh it hanip mutuhnong sapora rim it apriprohmur.  
\v 25 Apris wandeioh ama han ohe mutuh oh yah hat indin tei huhun hirmar yah mat papat orhor yah da oh ti na pathanoh oh wamat mandama  
\v 26 it susa atnap er matin ohe mong sup beshei ihirnong ambura apris irair ros indiprohemur. Ma ihat indiprohe oh rih er da oh gar hat patesuhmur. Gin oh atnap isipnap er hatiprohmur. Ihtin ohoh ihan er da mandapti orhor yah danong oh it gure mutuhnong na deiyahan er da oh it apris atnap er nahaprohmur pongopri.   
\s1 Got ohe mengnong amram dindeipti bap ihir amamsi hat pati kuuhan ihirmur potip ohe meng oh  
\p
\v 27 Jisas oh ameng oh gipotporhan kuuhan ire tarmuriya mutuh amdapat tit kuu tit Jisas ohnong Gonong ma nasara non namdip kuu uh amamsi kuumuro pongopri.  
\v 28 Potporhan Jisas oh Es. Nohnong non namdip kuu uhnong dahatipri. Amamsi kuuhan ihiroh Got ohe mengnong amram dindeipti bap ihirmur pongopri.   
\s1 Kuuhan ihir Jisas oh wanohe na imtin han tit ha namgitinoh dahat patin potip ohe meng oh  
\r (Matyu 12:38-42; Mak 8:12)  
\p
\v 29 Gahan kuuhan ihir apris tarmuriptin Jisas oh Gin mama dik ma pati kuuhan bap gur er hat son ohe danongwi hat sapti bap gurmuro. Ihtin bap gur nohnong Gin oh wanohe na imtin hatin han tit ha namgitinoh. Namgirit Moh Got orhorsiwi ihat sapat hanhe dahatper naporiptimur. Gure ma dahapti da oh noh ti na namgipramur. Nohe ma namgitipra oh Jona ohe ma hatipru ham namgitipramur.  
\v 30 Rih Jona ohe tei Got oh Ninipa ap mutuh ma pati kuuhan ihirnong pinggitipmur. Jona ohe tei ma pinggitipru mat orhor Hanip Brer nohe boknonghe naham gin mama dik ma pati kuuhan bap gurnonghe imat orhor namgitipramur.   
\p
\v 31 Noh gurnong dakuu meng am nahatporhan gur ma na dahapti oh gin mohnong dahatinmur. Rih Soromon oh mong ohe kakhan ham patesuhmur. Ihat patim dakuu mengwi am deisuhmur. Am deipatin wan mong kak hat pat kuu tit ohe dakuu meng amrapat meihdapat orhor ohe meng oh amratpora daham ohe meng amratinmat apdapmur. Oh dakuu han hat patesuh orhor gin mama dik ohe dakuunap isip hat ma pat han oh norhor pokwi mam pat ohmur. Ihtin ohoh ihan ama ihtip kuu uh kaput pepe dik ma nasatipra dik oh masasa gurnong Dakuu isipsi hat pat han moh ohe meng oh kianorim na amrashe napor inahatipramur.   
\p
\v 32 Ninipa ap mutuh ma pateshe kuuhan ihirhe Jona ohe meng oh potporhan ihir amrama Dir er hat pati sa daham iraire er hat sapti da oh mandatpamur. Jona ohe ma potip meng oh kasip meng potip orhora; gin nohe mama naporpat mengnong moh atnap kasipnap meng naporpatmur. Ihtin ohoh ihan kaput pepe dik ma nasatipra dik oh Ninipa kuuhan ma pateshe ihir masasa gurnong Kasipnap han ohe meng moh gur de tei pateshe. Kinham pomat na amrashe napor inahatiprimur pongopri.   
\s1 Kin oh da mutuh ohe hasmur ritip ohe meng oh  
\r (Matyu 5:15, 6:22-23)  
\p
\v 33 Jisas oh Gur mohnong dahatinmur. Hanip gur ram oh has mara tare dusnong sariyao baket san ohsi teimdapat giadeiyao na deiptimur. Has mara hanip ihir has tei orhor ha watahat marongwe rim has mar orhe pohon saripti gwar ka orhor sariptimur.  
\v 34 Hanip gure da mutuh ohe has nahatporhan ma dahapti oh kin ohmur. Kin oh yah hat orhorwi has hat pathanoh da mutuh ohe dahe gonsi yah hat has hat patmur. Kin oh yah hat has hat na pathanhe da mutuh ohe dahe kwihat orhor patmur.  
\v 35 Ihan da mutuh ohe danong oh kwi hatiprarim has mat orhorwi paptenmur.  
\v 36 Has mat orhorwi papayahanoh gorhe ina oh tit pe tit na kwi hama ram has mar pitap tei ka itperhan ap gonsi has hat orhorwi ma patru has nahat orhorwi napapteprohmur pongopri.   
\s1 Jisas oh Parisio sawa mengnong am hat pati hano Gur hinhinsi han bap hatiprimuro potip ohe meng oh  
\r (Matyu 23:1-36; Mak 12:38-40; Ruk 20:45-47)  
\p
\v 37 Jisas oh ameng oh pot mandatporhan Parisi ihir tit han tit Gin go nohsi susa nohe ap oh den diper pongopri. Potporhan ohsi susa ap rosa Jisas oh bes tom na gahmar be tongnoma den dangopri.  
\v 38 Iham tongnom den dapatin Parisi ambur ma pisa han oh wamar Epe. Jisas oh bes tom na gahmar bisei ham den de moh kinham ihaho daham ama da darhetip oh.   
\p
\v 39 Da darhetporhan Hanipyah oh Parisi ihirnong Gure mutuh oh hanip ihirnong sum ire erer oh bisei mar adaripti ohe dao ti da ti da ohe er hat son ohe dao oh gure mutuh oh teip hat patmur. Ihat teip hat patin orhor ina teimdapat preto kapo teimdapatwi gahmara mutuhdapat na hirmar ma saripti ohe tan hat pati gurmur.  
\v 40 Gur da huut pati bap gurmuro. Got oh hanip ma namanhetip oh ina tei ohe da mohwi yah hat hirmar ha paptengwe daham namanhetipda da ina mutuh ohe da ohsi tap mat yah hat hirmar ha paptengwe daham namanhetip. Basra. Ina mutuh ohe da ohsi; tei ohe da ohsi yot mat orhor hirmar yah mat orhorwi ha paptengwe daham namanhetipmur.  
\v 41 Ihan gur Nuhur bisei hat pat beso preto moh gahdeiyahan ongeng deiyamur dahapri. Guragure pret tei ma it pati erer oh hatip hat pati han ihirnong apris panggeitinmur. Iham ama ohe pe oh na bisei ham ongeng tahaptimur.   
\p
\v 42 Parisi gure ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro pongopri. Gure ma ihapti oh tohan panongwi basmur. Win timbas hatinmat papti han saman ohsi dara sama katheihanoh kat oh dara Got ohnong apriptimur. Ma ihapti oh yah orhora; isip sawa mengnong asoh ma mandapti oh ermur. Gur isip sawa mengnong ma mandapti oh mamarumur. Gur hanip ihirnong yah mat papindin dao Got ohnong bopor deipti dao oh gur mandaptimur. Ohnong mandapri. Ohsi guragure erer oh dara kat oh Got ohnong ma apripti ohe da ohsi tap mar orhor paptenmur.   
\p
\v 43 Parisi gur rotu ap ronmat oh hanip ihir Maihir yahnap han bap maras tongnoya ma hapat ha napotingwe rim ros yah teiwi tongnoptimur. Den tamohopti teinong saptihe ihir Nohan han yaha go patda napor yah mat orhorwi meng ha naporingwe daham sapti han bap gurmur. Parisi gure ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro.   
\p
\v 44 Hanip sein itpa mong oh teimdapat yah hat patin hanhan hat pati kuuhan ihir Moh yah monghe daham saya apriya haptimur. Among ohe tan hat pati han bap oh gurmur. Parisi gure ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro.   
\p
\v 45 Gipotporhan pohon sawa mengnong am hat pati han ihir tit han tit Tisa. Gwe mihtin meng Parisi ihirnong por dasei dei meng moh ihirnongwi na dasei deimur. Nuhurnongsi tap mat dasei naham inahapatmur pongopri.  
\v 46 Potporhan Jisas oh Pohon sawa mengnong am hat pati han bap gur kuuhan ihirnong amram na dimtin hatin ohe sawa meng oh pora ruumsup aptahaptimur. Imat ruumsup aptahat mandama panggeitinnonghe na panggeiptimur. Sawa meng am hat patim ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro.   
\p
\v 47 Rih gure ranir ihir Got ohe meng pot pisapti han ihirnong sushe ohe tam gip oh gur dara kwei tem gat hrepnong mat saripti pomar paptimur.  
\v 48 Rih ranir ihir Got ohe meng pot ma pisapti han ihirnong sushe ohe tam gip oh puh gur dara kwei tem gat hrepnong sara pomar ma papti oh ihirnong Sei sutpa por tam gip tang mar papti hatin hat pati bap gurmur. Parisi gure ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro.   
\p
\v 49 Gur ihat pati han bap ohoh ihan Got oh dakuu am hat patdapat mama meng moh ritipmur. Ma ritip oh Kaput norhe meng pot pisapti han propeto norhe mengtei darherpat hano ihir ire patinong susa meng pot pisaptin ihir kat ihirnong garmar ina ruumsup apriyao kat ihirnong suyarit hapuriyao mat pisasiprimur ritipmur.  
\v 50 Ma ritip meng oh puh gure boknongsi tap mar napor giritipmur. Ihan gin mama dik ma pati kuuhan bap gur ihtin bap hat pati ohoh ihan mong kopen ma darpa pe orhor Got ohe meng pot pisapti han ihirnong sut ma pisasheru mat orhor ginhe mama sut pisapti oh ama ohe batbet gonsi oh gur datiprimur.  
\v 51 Rih kopenat ma sutpa oh Eper ohnongri sutpamur. Ohnongri supti ohe pe oh Got ohe meng pot pisapti han ihirnong sut pisashemur. Pisusa gahan Sekaraia oh Got ohe ap yawar ohsi; apop sum atendeipti kwei tan ite mutuh oh patin sutpamur. Ama ihashe ohe batbet gonsi oh gur tap mat datiprimur.   
\p
\v 52 Pohon sawa mengnong am hat pati han gur Got ohnong am hatin ohe da oh gur ki ohe tan marin papti orhor guragurri am hatinmat dapum na roptimur. Kat ire ron mandap kat oh gur mandap agaheimat paptimur. Gure sawa meng am hat patin ma ihapti ohe pe oh ruumsup oh guragure boknong hatipra ohoh ihan gur hinhinsi hat pati bap gurmuro.   
\p
\v 53-54 Jisas oh ama meng oh pot mandapat kot roporhan ama pohon sawa mengnong am hat pati hano Parisio ihir heisup mara heisup meng poripti Gin dir ohe da aban matperhan oh wan meng tit ha ritinoh. Ritporhan ama ohe pe oh dir er meng ri moho rim meng oh orhe boknong matper daham dahamtin meng oh nahsi mat orhorwi dahamat patiwi hangopari.   
\c 12  
\s1 Jisas oh Parisi ire yot da hapti ohe tan hatipririm potahat patenmur potip ohe meng oh  
\r (Matyu 10:26-27)  
\p
\v 1 Gahan kuuhan ruumsan ruumsannap tit Jisas ohe meng oh amratperim apris tambokor hahtar goshat mandangopari. Ihat patin Jisas oh orhe pinggit pisapat han ihirnong Gur Parisi ire bret ma pipirpat han ohsi nahatipririm gur ongeng taham potahat patenmur. Noh gurnong ire bret pipirpat han ohsi nahatipri ma napor oh ire damdapat tit dahapti atem teimdapat tit meng ripti ihat yot da hapti ohe tan hatipririm potahat patenmur napormur.   
\p
\v 2 Mohnong dahenmur. Hanip ire reman amkat ma papti da oh gonsi pitap teinong amtiporhan wamar am hatiprimur.  
\v 3 Ma ihapri oh kut dus ahar ripti menghe mong da tei pat hatipramur. Ap taremdapat ma ahar ripti menghe pitap tei kamdapat pitap teinong mar rim utperhan amratiprimur pongopri.   
\s1 Jisas oh ina teinongwi nipti han ihirnong kasa hapri potip ohe meng oh  
\r (Matyu 10:28-31)  
\p
\v 4 Giporpat Jisas oh Norhe han gur norhe ma napotiproh meng moh dahenmur. Hanip ihir ina teinongwi niptimur. Haputperhan danong nasutin oh da na nasupti ohoh ihan ina teimdapatwi nipti bap ihirnong kasa hapri.  
\v 5 Got oh ina teisi; dasi tap mat nima da oh batbet dar patepri ohe irat has teinong nahatin han ohnong kasa hat patenmur. Ama inahat nitin han orhornongwi kasa hat patenmur.   
\p
\v 6 Ner twitwi ihirnong dahenmur. Ama ner gar ihirnong mohotper riyahanoh sup tan titwi ner gar hanen oh mohoptimur. Na dahatin ner gar orhor Got orhor dahat patin suptimur.  
\v 7 Hanip dire kak batnonghe sam am hatper na dahapti han orhor Got orhor sam am hat patmur. Hanip dire na dahapti ner gar oh Got orhor am ham yahnap hanmur porpat ohoh ihan hanip dirnong oh atnap isip yahnap hanmur napor yahnap mat orhor napapatmur. Got oh yahnap hanmur napor napapat ohoh ihan gur ina teimdapat ma nipti han ihirnonghe kasa hapri pongopri.   
\s1 Na kas hama Noh Jisas orhe nitamur ripti ohe meng oh  
\r (Matyu 10:32-33, 12:32, 10:19-20)  
\p
\v 8 Jisas oh giporpat Han gur ihirnong na kasa ham Nohri Jisas orhe nita ham ihat sapatmur rit sayahanoh ama ihat saya han gurnong oh Hanip Brer noh at Got orhe atamreipti han enser ire kinteihe noh Maihir norhe nita bap ihirmur potipramur.  
\v 9 Ihirnong kasa ham ire kintei Jisas ohnong nuhur hanhanmur riyahanoh Nohhe gurnong at orhe atamreipti han enser ire kinteihe noh Maihir norhe nita bap ihir basmur. Noh ihirnong hanhanmur potipramur.   
\p
\v 10 Gin gur mohnong dahenmur. Gur Hanip Brer nohnong dasei meng napor inahayahanoh ama inahaya ohe pe er yan oh Got oh dat namdatin ina hat patmur. Got ohe Yahsup ohnong dasei mar indeiyahanoh ama indeiya ohe pe er yan oh dat na namdatiprohmur.   
\p
\v 11 Hanip ihir gurnong Maihir Jisas ohe nita han bapmur napor gurnong nambur dahanahatinmat rotu apnongdo gapman ohe atamreipti han ire duupnongdo napisayahanoh gur Epe. Dire boknong meng ma nahatiprohe oh dir kian meng sa potiprohe daham da darhetipri.  
\v 12 Napisus dahanahaptin orhor Got orhe Yahsup oh gurnong Mama meng moh potina napor rit natiprohmur pongopri.   
\s1 Kakdah ohe erernong ma isip mat pisapti ohe erer oh gonsi timbas hatipramur ritip ohe meng oh  
\p
\v 13 Gahan kuuhan ruumsan tarmut pati mutuhdapat tit han tit Jisas ohnong Tisa. Go norhe nanip ohnong potinmur. At ohe pan erer oh oh ruumsannap mat papat ohoh ihan go Kat tit nangga ohnong apin potinmur pongopri.  
\v 14 Potporhan Jisas oh Mona. Nohri erer oh sama hanip nitat mar napin han basmur pongopri.   
\p
\v 15 Giporpat ama kuuhan gonsi ihirnong Gur dahenmur. Erer ruumsansi ma pati ohe pe oh yah hat indin dasi na haptimur. Ihapti ohoh ihan gur Erer oh nohwi ruumsan mat orhorwi datpora dahapti ohe danong oh nahatiprarim gur potahat patenmur pongopri.  
\v 16 Giporpat ihir erer oh dar ruumsansi hatpora dahapti ohe danong oh hatipririm mama paham mengnong moh dahatinmur.  
\p Han kamah han tit den ruo erer oh ruumsansi han tit ama patesuh oh. Gahan ohe den ru oh dam ruumsan isipnap ama timdip oh.  
\v 17 Timdiporhan oh Noh den dam ruumsan tima moh ohe pe oh noh ihsen ruumsan titsi datiprawa dahama Gin itin ap oh timbas hat pat moh noh kinhatiproh sa dahapat  
\v 18 Ihan noh erer it pat ap morhor urkamat sara ap isip mat yah mat orhor hatpora. Ham mamen deipat norhe wito den erer oh apnong moh mat sara ama ohe pe oh yah hat pateprawa.  
\v 19 Hapat Gin nohhe erer mohsi yahnap hat orhorwi patru hat patepra han hah ma hapat daham tuper tongnopat deno wain tomo dam amam ham orhorwi dam patepra ma hapat ama dahatip oh.  
\v 20 Dahatporhan Got oh Go noh erer ruumsansi moh yah hat patepramur ma dahapat han go da huut patin ihpat ohoh. Gin mama kwi hatiproh kwitem morhor haputporhan gwe da oh nambur napisaprohemur. Napisaperhan gwe tap tei mat ma sarpat erer oh gorhor na wamtipramur. Wan han ihir nabisei matiprimur pongopri.   
\p
\v 21 Giporpat Gur Got ohe napapindin teinong na kamah hapti kakdah ohe erer datin danong ham isip mat pisapti han gurnong ama paham meng mama naporru nahatipra han bap gurmur pongopri.   
\s1 Jisas oh Gur Nuhur erer timbas hahhan kinhat patepri sa daham da trun trun darhetipri potip ohe meng oh  
\r (Matyu 6:25-34)  
\p
\v 22 Kuuhan gonsi ihirnong ama meng oh porpat orhe pinggit pisapat han ihirnong Gur Nure ma indipri oh nuhur den oh kinhat sa indeipri. Watah andin oh kinhat sa indipri daham da trun trun darher ruumsup hapri.  
\v 23 Gin de han oh isip hat pat. Dire mama pati oh isip hat patda da den oh isip hat pat. Gin mama pati ina moh isip hat patda da ina teimdapat ma aripti watah oh isip hat pat. Basra. Ina tei ma pat erer oh isip hat na patmur. Hanip dire da ma patinong oh isip hat patmur.   
\p
\v 24 Gur ner ire ma patinong oh dahenmur. Ihir den gonoyao den ruprup mat sariyao den ruprup mat itin ap hayao na haptimur. Na ihapti orhor Got orhor den agonom pandepatmur. Got ohe ner win timbas han bap ihirnong indeipat moh hanip winsi bap dirnong atnap imat napapat ma hapat dahenmur.  
\v 25 Gur Epe. Noh kinkin hatwi sa patepra daham da darher ruumsup hayahanoh ama ihya ohe pe oh guragure indinnong asoh gar tit dip matin hatinda. Basra. Gur gar tit na dip matin ina hat patimur.  
\v 26 Gur ama gar ohnong na imtin ina hat pati ohoh ihan gur Nuhur kinhat indiprohe sa daham da darhetin ohe danong oh trun hapri.   
\p
\v 27 Gur unuh gwe ma timapatnong dahenmur. Unuh gwe ihir timapti irair tamreima watah hama ariptida. Basra. Na ihapti orhora; ire boknong yahnap hat patimur. Kakhan Soromon ohe watah yahnap aro awataham orhor yahnap hat ma patesuh oh mama unuh gwe yahnap ire hrepdapat hat patesuhmur.  
\v 28 Unuh oh ginwi marporhan kimsi kutwidapat pera irat tei saripti han moh Got orhor it watah yahsi deipatmur. Ama imat na paten han garnong oh indeipat ohoh ihan hanip gur Nuhurnong atnap andin ohe watahsi nahat napapat ma hapat dahenmur. Gur Oh imat napapatwa na dahapti ohoh ihan gure Got ohnong Inahatin hatin hanwa ma dahapti oh garpok hat patmur.  
\v 29-30 Guragure ita Got oh gure den din ohe ma hatip hat patio tom din ohe ma hatip hat patio erer oh orhor gonsi am hat pat ohoh ihan gur Nuhur deno tomo oh kinhat dam patepri daham da darher ruumsup hapri. Got ohnong hanhan hat pati bap ihir Nuhur deno tomo erer oh kinhat patepri daham ama erer datin ohe danongwi hat patimur. Ihan gurhe ire ihat ma dahat pati da hatin hapri.  
\v 31 Gurnong oh at Got orhe napapat hrepnong naham Gin gur mihat ha songwe ma dahapat danong ohri hat inpera daham ama ohe danong ohwi isip hat sashenmur. Ihat ma sapti han bap gurnong oh Got orhor ama erer oh gon naprisipramur pongopri.   
\s1 Yah han erer oh aw tei mahat ruprup mat sarinmur potip ohe meng oh  
\r (Matyu 6:19-21)  
\p
\v 32 Giporpat Jisas oh orhe han ihirnong Norhe han pang han gurnong oh at Got orhe napapindin hrepnong naham Norhorsi paten ohe da oh ihirnong apriprawa dahat pat ohoh ihan gur na napriprakin daham da er hapri. Napriprawa daham da yah hatwi patenmur.  
\v 33 Ihat patim guragure erer oh wan han ihirsi mani ohsi mohoma ama mani ohsi hatip hat pati kuuhan ihirnong panggeinmur. Imat panggeipti aw tei mahathe guragure yah han erer oh ruprup mat kasip ung na turkatin ung oh mit sarinmur. Aw tei ohe yah han erer ohot ma saripti erer oh timbas haho gapah han ihir dariyao daskein ihir dam timbas deiyo na matin han sariptimur.  
\v 34 Guragure yah erer oh ruprup mat ma saripti tei oh guragure dahe atei patmur pongopri.   
\s1 Jisas oh norhe natamreindin oh natamreindinmat mamen tahat orhorwi patenmur potip ohe meng oh  
\r (Matyu 24:42-44)  
\p
\v 35 Giporpat Jisas oh Gur norhe natamreindin oh natamreindinmat watah aro ram has maro mamen tahat patin nohe natamreindin oh tit natamreindin oh pat hatporhan gur mamen tahat patimdapat ama tamreindin oh natamreindinmur.   
\p
\v 36 Gurnong nohe natamreindin oh mamen tahat patinmur ma napor oh mama atamreipti han bap ire atamreindinmat ma mamen tahat patiru hat orhor gurhe norhe natamreindin oh natamreindinmat mamen tahat patinmur. Ihiroh Nure hanipyah oh kuu kopen dara den isip temar dapti teinong sus pat ohoh ihan gin apriprohkin daham atamreindinmat mamen taham wamat patimur. Wamat patin oh apris ap gwatei moh kang kang potporhan ihir kapkap ap adapuptimur.  
\v 37 Imat atamreindinmat na timam mamen tahat wamat patin apris ihirnong Gur ihat ma pati oh yahmuro. Guragure ihat pati ohe pe oh yah yan datiprohemuro potiprohmur. Pora orhordapat tamreipti ohe watah oh ara orhe atamreipti bap ihirnong Gin norhe bes teimdapat gurnong den namdiprohmur. Gur tongnotina por den nitat mat asar pandiprohmur. Pandiporhan ihir amam hatiprohemur.  
\v 38 Oh kwi temdo kwit mutuhdo apirhanhe ihir na timam atamreindinmat mamen tahat orhorwi wamat patin oh apris amam matporhan ihir amamsi hatiprohe bap ihirmur. Amaru hat orhor norhe han gur norhe natamreindin oh natamreindinmat mamen tahat orhorwi patenmur pongopri.   
\p
\v 39 Giporpat ihirnong Gur gapah han oh ap dus ros gapah hapatnong oh dahatinmur. Ap nita han oh gin gapah han oh apris gapah hatiprohkin daham am ham kinkin da ham kwet patin oh gapah han oh apris na gapah hapatmur. Oh hanhan dei tei oh it apris gapah hahmur.  
\v 40 Amaru hat orhor gure kinkin da hat pati da oh hanhan deiya tei mah Hanip Brer noh apris buporinsi nahatipra ohoh ihan gur mamen taham kinkin da hat orhorwi patenmur pongopri.   
\s1 Yah hat atamreiya er hat atamreiya hapti ohe meng oh  
\r (Matyu 24:45-51)  
\p
\v 41 Jisas oh ameng oh pot mandatporhan Pita oh Hanipyaha. Go paham meng mama napor oh nuhurnongwi ha imtingwe rim ginaporda da mama kuuhan gonsi ihirsi tap mat ha imtingwe rim ginapor por dahamtipri.   
\p
\v 42 Por dahamtiporhan Hanipyah oh Gur mama mengnong dahenmur. Kamah han hat pat han oh wannong tit saporim orhe atamreipti han ihir kinhat pat han ohnong ohe erer oh ohe hrepnong mar saproh. Dakuu hat pan hat orhorwi tamrein sapat han tit pathanoh ama han orhornong Gin noh wan teinong tit saprohmur. Gin go apo norhe natamreipti hano ihirnong gwe hrepnong mar papatinmur. Imat papatim den dapti dik oh den pomar nitat mar pandemo papatinmur potiprohmur. Gipora mandam saprohmur.  
\v 43 Susa oh wan mong oh patdapat it apris wandeioh oh orhe ma potir mengru mat orhorwi papathanoh Go yah hat tamreipat hanhe potporhan oh amamsi han hatiprohmur.  
\v 44 Amamsi han hatporhan orhe hrep papat han erer oh gonsi ama yah mat ma atamreipat han ohe hrepnong Gin mama erer oh gorhe hrepnongwi nadeimur. Gwe hrepnongwi mar paptenmur por orhe hrepnongwi mar mandatipramur.   
\p
\v 45 Yah hat tamreipat ohe pe oh imtipramura; ohe hrepnong mat mandam saporhan Ohe erer oh nohe hrepnong mat namdam pir han moh kapkap na apripra ma hapat daham kat atamreipti kuuhan ihirnong suo den din danongwi haho er tom dam da timbas haho hatiprohmur.  
\v 46 Oh hanhan hat ihat sapatin orhe papat han oh Gin na apriprohkin daham hanhan hat patin oh apris buporinsi matiprohmur. Buporinsi mara ohnong Go er han tit nohe erer moh gwe hrepnong mat namdam noh pir ma hapat por sum batbet isip tit mara kat han ire yah hat ma na tamreipti ohe pe batbet datipri ohe tapnong matipramur. Ihtipramur pongopri.   
\p
\v 47 Giporpat atamreipat han oh orhe papat han oh Go norhe natamreindin oh ihat natamreindinmur potporhan oh am hat patim orhor tamreindin han erer oh dara na mamen taham orhe ma porir mengru na iherhanoh papat han oh it apris wamara kawsi suma batbet isipnap matiprohmur.  
\v 48 Atamreipat han oh orhornong papat han ohe atamreindin oh hanhan hat patim atamrei oh er mat atamreim heisup mar sutin ina hatinmat atamreihanoh papat han oh apris ohe tamreirnong wamara sutinnong sutiproh orhor Hanhan hat patim iher moh daham gar mat kapor atiprohmur. Amaru hat orhor Got orhor tihan atamreindin tihan atamreindin isip mat ma napin pat guroh isip mat orhor ihir ha natamreingwe dahapatmur. Isip isipnap mat ma napin pat bap gurhe isip isipnap mat orhorwi ha natamreingwe dahapatmur pongopri.   
\s1 Jisas ohe danong haya ihirnong mahaw mat papteprimur ritip ohe meng oh  
\r (Matyu 10:34-36)  
\p
\v 49 Giporpat Jisas oh Noh kakdahnong mama apdap oh kuuhan ire er hat sapti ohe er danong andor has mat adarhetin ohe irat has ohsi tap hat apdapmur. Ihan ama has oh Gin orhor has hat sapatnengo dahat patmur.  
\v 50 Norhornong oh ruumsup oh tom napatiriya hatin hat namkatipramur. Ama ohe ruumsup oh namkar ha timbas hatinoh dahapat ohe ruumsup oh namkat orhor napapatin ama ruumsup oh apris namkatporhan norhe ma dahat pat da ruumsup oh timbas hatipramur.  
\v 51 Gur nohnong Oh manap teiwi napapten ohe da ohsiwi apris pat ma hapat dahapri. Basra. Noh nohe danong haya hansi; kakdah orhe danong hat ma pati hansi ite mahaw goshat indin ohe da ohsi tap hat apris patmur.  
\v 52 Ama da ohsi apris pat ohoh ihan tap ap ma pati irair hanen patihanhe yitir ihir nohe danong hat patihanoh yot ihitdapat ihirnong mahaw deis. Yot ihit nohe danong hat patihanoh yitir ihirnong mahaw deis ihat saprimur. Gin mama pati orhor ihat patiru pateprimur.  
\v 53 Ma ihat patepri oh itapir ihirdapat monher ihirnong mahaw deiprimur. Monher ihirdapat itapir ihirnong mahaw deiprimur. Supir ihirdapat kuunang ihirnong mahaw deiprimur. Kuunang ihirdapat supir ihirnong mahaw deiprimur. Brer ire inapir ihirdapat kuu ropir ihirnong mahaw deiprimur. Kuu ropir ihirdapat brer inapir ihirnong mahaw deiprimur. Ihat patiru pateprimur pongopri.   
\s1 Kis han oh apris patin gur na dahaptimur potip ohe meng oh  
\r (Matyu 16:2-3)  
\p
\v 54 Jisas oh giporpat ama tarmuriya kuuhan ihirnong Gure ma ihaptinong oh dahenmur. Gur tom rian apriporhan gur wamara Gin tom wandaprohmur riptimur. Giritperhan arpin tom oh wanpatmur.  
\v 55 Apiap ham mong yah hat indinhe hanip guragure ina bok oh dame naham ap tan oh tihih hahhanoh Gin apiap ham mong yah hat indipra ma hapat dahaptimur. Dahatperhan arpin apiap hapatmur.  
\v 56 Gur tom wandon ohe kiso mong apiap hatin ohe kiso oh wamara gin ihtiproh ma hapat daham am hat pati orhor gin nohe mama ihat sapatnong oh gur kianorim wamar orhor na dahapti. Ihan gur Nuhur am hat patimur ma ripti oh gur dasuh hapti han bap gurmur pongopri.   
\s1 Er da oh gin orhor kom asar mandam yah tahatinmur potip ohe meng oh  
\r (Matyu 5:25-26)  
\p
\v 57 Jisas oh Gur kianorim yah hat son ohe danong oh wamar orhor Moh yah hat son ohe da ma hapat kianorim na dahapti.  
\v 58 Mameng mohnong daham am hatinmur. Tit han tit gonong Gwe ma nohnong inahatir oh gin meng pondeipti han ire duupnong sus pomtiper napor nambur ushanoh mandap sus orhor Watina. Han mohoh nohnong nambur us mohri meng nasama Gin karapus matin naporpat han ohe bes teinong nahatiprohkin. Nahatporhan ohdapat dupsi han ire bes teinong nahatporhan ihir karapus apnong nahatiprikin. Ihan meng pondeipti han ire duupnong na pim patin orhor Meng oh mandap tei morhor pomtipera daham ohnong pora gutagutwi meng pomar mandanmur.  
\v 59 Mandap meng na pomara napisus karapus apnong nahahhanoh opis mohotin ohe yan oh go mohopatin tit sup tan pok tit hatip hahhanoh Gin ha ihtinoh. Gin arpit namdamur. Sonmur napotiprada. Basra. Na ginapora gonsinap yan atporhanwi Gin sona napotipramur pongopri. Ma gipotip oh gin mama pati dik morhor er da oh mandama ha yah hatingwe rim gipotipmur.   
\c 13  
\s1 Er da na mandam ihat orhorwi ayahanoh batbet datiprimur potip ohe meng oh  
\p
\v 1 Jisas oh ameng oh gipot mandatporhan ama amrat pati kuuhan kat ihir Jisas ohe duupnong hapti ohnong Mona. Gariri mong ma pati kat han ihir Got ohe ap yawarnong susa Got ohe apop atemtin ohe apop oh asuptin Pairat orhe han ihir orhe mengtei sutinmur por darhetporhan ihir apris sutirimur pongopari.  
\v 2 Potperhan Jisas oh ihirnong Gur Gariri han ihir kat han ihir gar er hat saptin Pairat oh na sutir ma hapat. Mama Pairat ohe sutir han ihir isipnap er hat saptin imat sutir ma hapat dahaptida.  
\v 3 Basra. Noh arpin meng napotiprohmur. Guragur tap da hat patimur. Guragur tap da hat pati ohoh ihan gure er hat sapti da oh na mandam ihat orhorwi ayahanoh guragur amaru hat orhor batbet datiprimur.   
\p
\v 4 Jerusarem ap mutuh orhor tit Siroam ap mutuh ohe dokap oh het wandas tan ohe kathei han ihirnong amkar ma sutip oh Jerusarem ap mutuh ma pati kat han ire er hat ma sapti oh gar er hat saptin na sutip ma hapat. Maire ma er hat sapti oh isipnap er hat saptin sutip ma hapat dahaptida.  
\v 5 Basra. Noh arpin meng napotiprohmur. Guragur tap da hat patimur. Guragur tap da hat pati ohoh ihan gure er hat sapti da oh na mandam ihat orhorwi ayahanoh guragur amaru hat orhor batbet datiprimur pongopri.   
\s1 Er da na mandam ihat orhorwi ayahanoh batbet datiprimur potip ohe paham meng oh  
\p
\v 6 Porpat er da na mandama ihat orhorwi ayahanoh batbet datipri ohe paham meng tit pongopri.  
\p Tit han tit orhe den rang tei oh ket amgap tit itipri. Sara patesuhri. Patesuhdapat Gin dam timakin daham wamar pipri. Usoh dam na timon patgopri.  
\v 7 Ihat patwi hapatin orhe rang atamreipat han ohnong Epe. Noh wamar tantahapatin yitir krismas birhitir moh dam na timapat moh be mongnong moh supatmur. Ihan go gatmar mandatinmur pongopri.  
\v 8 Potporhan rang atamreipat han oh Hanipyah go ihat dahatipra. Oh ihat ha patinohmur. Noh mong aromaro huhun kup asaro hatporhan dam timdiprakin daham mama krismas moh pokwi wamat indipramur.  
\v 9 Wamat patim dam timahanoh yahwa. Dam na timahanoh gorhor gin gatmatina naporit gatmatipramur pongopri. Ihtipari pongopri.   
\s1 Jisas oh tuperipti dik moh hanip pondeio rim ohnong garmatpa ohe meng oh  
\p
\v 10 Gahan Juda iraire tuperipti dik sabat dik tit hatporhan iraire rotu ap tit oh ros meng am deingopri.  
\v 11 Kuu tit mongsup oh kopitamnong ga ara mukmak matporhan kinhat tindir hatin inasi hat patin krismas tan ohe kathei birhitipsi kuu tit rotu ap oh patin oh meng am deingopri.  
\v 12 Meng am deipat uhnong wamara Kuu go nohe pat duup moh aprina potporhan uh apriporhan oh Gin gonong mongsup oh ga nat pat moh gin noh ga pet namdamur pora  
\v 13 urhe basnong bes asar marinporhan uh asut orhor yah hama kopitam tindirhira yah hat tandeim susa Got ohnong win adaptuhur armi deingopri.   
\p
\v 14 Ihtiporhan rotu ap wamat pati han ihir tit han tit Hanip na tamreipti dik moh uhnong yah mar ma tamrei moh er hahmur daham Jisas ohnong heisup deingopri. Heisup deipat kuuhan ihirnong Hanip dire ma tamreipti oh dophei dah tamreiptimur. Ihan sik hat pati han gur ha yah nahatinoh dahayahanoh ama tamreipti dik orhor aprishenmur. Tuperipti sabat dik mohri oh tamreim ha yah nahatinoh daham aprisipri. Ohri awammur por ihirnong pongopri.   
\p
\v 15 Potporhan Hanipyah Jisas oh Wa. Da yot hat patim dasuh mengsi ripti han bap gurmuro. Gur tuperipti dik moh na tamreiptimur ripti orhor burmakauo donkio ire apnong sus ambop daphom ambopdapat marim tom pandinmat pisaptimur. Gur Nuhur tuperipti dik moh na tamreiptimur ripti gur ihat tamreipti ohoh ihan gur da yot hat pati han bap gurmur.  
\v 16 Gure tom pandinmat ambop daphom tom pandem ma yah deipti oh garpokmur. Nohe Epraham ohe puh kuu mauhnong Satan oh ambop dumat pat hatin mat papatin tan kathei krismas birhitip kuu moh noh tuperipti ohe Sabat dik orhor nang arpim yah dei moh isipnapmur. Isipnap panggei ohoh ihan gur nohe ma yah hat sapatnong moh Oh yah hat sapat ma hapat dahenmur pongopri.  
\v 17 Potporhan ohnong garmat pati han ihir Nure yot da hat pati da moh pitap teinong nadeihe daham kas hangopari. Be kuuhan gonsi ihirhe Ohe tamreipat moh yahnap hat atamreipat moho rim ihir amam hangopari.   
\s1 Jisas oh Got orhe hrepnong naham napapindin da oh mamaru naham isip nahat napapatmur potip ohe meng oh  
\r (Matyu 13:31-32; Mak 4:30-32)  
\p
\v 18 Ihtiperhan Jisas oh Noh Got orhe hrepnong naham napapat da oh mihat patmur napor ma kis matiproh oh kian hannong oh Mihat patmur napor kis matiproh.  
\v 19 Ma kis matiproh oh mastet ohe gwe ma marpatnong oh kis matiprohmur. Mamarumur. Tit han tit mastet gwe oh dar pisusa orhe rang tei sakmatipri. Sakmatporhan ama garnap gwe pok orhor ma mara oh isip hama irat hatin hangopri. Hatporhan ner ihir ohe san oh tongnomo ihaniptiri pongopri.   
\p
\v 20 Porpat it Noh Got orhe hrepnong naham napapat da oh mihat patmur napor ma kis matiproh oh bret pipirpat han ohnong kis matiprohmur.  
\v 21 Kuu tit bret pipirpat han garpok tit dara praua san isip san dahnong mara praua ohsi tap mar sahsah matipri. Matporhan praua gonsi pipirpat han ohsiwi hangopri pongopri.   
\s1 Got ohe napapindin teinong sapti ohe meng oh  
\r (Matyu 7:13-14,21-23)  
\p
\v 22 Jisas oh Jerusarem ap mutuhnong saporim ap mutuho be aptei apteio oh kor kuuhan ihirnong meng por am mat pipri.  
\v 23 Am mat susa gahan tit han tit Jisas ohnong Hanipyaha. Got oh uut han pok ambutiprada por dahandeingopri.   
\p
\v 24 Por dahamtiporhan Jisas oh Got ohe napapindin teinong sapti kat oh gop kat ohoh ihan ruumsan kuuhan ihir sapera daham sus kis tahayaoh na ron ina hatperhan mandaprimur. Ihtin gop kat ohoh ihan ropora ma dahapat da orhorwi kasip hat orhorwi patdapat roshenmur.  
\v 25 Got ohe napapindin teinong son kat oh gin tanput patmur. Kut ap nita orhor taputipramur. Taputporhan kuuhan gur susa ap gwatei bok oh kangkang por Hanipyaha. Go ap nadaputino por kamtiprimur. Por kamtiperhan oh Wa. Gur de gura. Nohri gurnong hanhanmuro napotipramur.  
\v 26 Napotporhan gur Wa. Nuhurra gosi den damo tom damo ma hanipti ohwa. Go nure ap mutuh orhor patim meng am nahanipat mahwa potiprimur.  
\v 27 Potperhan oh Es. Nohri arpin gurnong hanhanmur. Er dasi hat sapti han bap gur eimat namdam sonmur napotipramur.  
\v 28 Napotporhan gur sus wan er apteidapat wandeiyaoh Eprahamo Aisako Jekopo Got ohe meng pot pisashe han propet gonsio ihir Got ohe papindin tei oh pati hatiprimur. Patihan gur wamar Epe. Ihirnong yah aptei patihe. Nuhurnong er apteinong tapan nandur namdatip ma hapat daham yimama guragure ganong kup matiprimur.  
\v 29 Kuuhan mong pe aw pe pati bap ihir apris Got ohe papindin teinong ham den isip tit dama amam ham pateprimur.   
\p
\v 30 Mohnong dahatinmur. Kat han ihir Nuhurri Got ohe napapindin teinong son inasi hat patimur ripti orhor ihirri na son ina hat patimur. Kat han ihir Nure kom hatiprimur ma poripti han ihirri ohri han hatiprimur pongopri.   
\s1 Jisas oh Noh Jerusarem ap mutuh pati han gurnong nambutipraneng ritip ohe meng oh  
\r (Matyu 23:37-39)  
\p
\v 31 Jisas oh ameng oh porpatin orhor Parisi ihir kat han ihir aprisa Jisas ohnong Gononghe Herot oh nitpor ripat ohoh ihan go mamong tei moh mandam wan mong teinong sonmur pongopari.  
\v 32 Potperhan Jisas oh Gur susa ambar mengtei hanipnong dasuh deipat han ohnong potinmur. Gure ma potiprohe oh Oh gino kimsio oh mongsup ga apero sik hat pati han ihirnong pomaro hat orhorwi pateprari. Patima dahan oh mamen mar timbas matiprari potinmur.  
\v 33 Nohra wan apteinong na saprohmur. Noh Jerusarem ap mutuhnong mama sapat moh kimsio dahano oh sapatwi hat orhor Jerusarem ap mutuh kotipramur. Wa. Matei moh Got ohe meng pot pisashe han propet ihirnonghe tit sutpada. Gin nohnonghe matei na nitiprohe. Jerusarem ap mutuh mahanwi propet ihirnong sushe ohoh ihan nohnonghe Jerusarem ap mutuh oh niyahan yahmur pora Jerusarem aptei han ire boknong mar irhaha deingopri.   
\p
\v 34 Imara Jerusarem ap mutuh ma pati kuuhan ihirnong Jerusarem aptei han gur Got ohe meng pot pisashe han propet ihirnong suyao Got ohe mengtei gure patinong darhetporhan ma apriya han ihirnong kweisi suyao ihapti han bap gur hinhin baprano. Noh gurnong ner kakaruk bap supir ire kaspas hrepnong mar yah mat paptiru nahatpor trun dahapat orhor gurdapat Go nuhurnong na inahatiprohmur dahaptimur.  
\v 35 Ihan gur amratin. Gure ap oh Got oh eimat mandama wan teinong sapramur. Saporhan nohnonghe na wanahaprimur. Na wanaham patina kaput Got orhe mengtei porpat han mohnong Got ohe bapkei dasi mat ha paptenoh napor armi nahatipri tei oh wanahatiprimur pongopri.   
\c 14  
\s1 Jisas oh tuperipti dik orhor buh ririsi bes ririsi hat pat han ohnong pomtip ohe meng oh  
\p
\v 1 Gahan tit tuperipti dik tit hatporhan Parisi ihir kak hat pat han tit Jisas ohnong Gin nohe apnong dir sus den diprohemur potporhan ihir sus den damo hama ihir Jisas oh Gin kinhatiproh daham wamat angopari.  
\v 2 Wamat patin buh ririsi bes ririsi hat pat han tit Jisas ohe duup oh pat hangopri.  
\v 3 Ihat pathan Jisas oh wamara sawa meng am hat pati hano Parisi bapo ihirnong Diradire pohon sawa meng oh tuperipti Sabat dik moh sik hat pati han ihirnong pondeiyahan yaho ripatda da tuperipti dik ohoh ihan tamreim hanip ihirnong pomtipri ripat por dahandeingopri.  
\v 4 Por dahamtiporhan ihir it meng diteim na pora kimirit mandangopari. Kimirit mandatperhan Jisas oh ama sik han ohnong bes marima yah deipat Gin yah ham sonmur por darhengopri.   
\p
\v 5 Por darherpat iraire tuperipti Sabat dik patim ma tamreipti danong oh daham ha am hatingwe rim ihirnong We. Gur Sabat tuperipti dik orhor patim guragure brerdo sahapti hando tit tanggap wahanoh Sabat diko rim mandatiproheda. Basra. Sabat diknong na dahama kapkap orhor ambur yah teinong matiprohemur pongopri.  
\v 6 Potporhan ihir arpin ihapti tei moh ihan kinhat diteim potiprohe daham kimirit mandangopari.   
\s1 Guragure winnong isip matpera dahapri ritip ohe meng oh  
\p
\v 7 Gahan den nita han orhe mengtei den dam apriya han ihir Nohri winsi han ire tongnopti ap tan tei moh noh tongnotpora daham tongnongopari. Ihat daham tongnotperhan Jisas oh wamar am hama iraire ihaptinong ha am hatingwe rim ohe meng tit pongopri.  
\v 8 We. Gin mohnong dahenmur. Kuu kopen dara den ruumsan dinmat aprinmur naporiyahanoh gur susa Nohri ohri winsi han ire tongnopti ap tan oh tongnotpora dahamhe tongnopri. Tongnoya tei mah den nita han oh win isipsi han tit uatir teihan patem oh apriporhan  
\v 9 den nita han gutagutnong unatir han oh apris Gin nohan win garsi han go susa komdah ohe tongnopti tei tongnotinmur. Win isipsi han oh gwe tongnot pat tei moh ha tongnotinoh napotporhan go sus komdah mahat tongnom kas isipsi hatiprohmur. Ihan winsi han ire tongnopti tei ohri tongnopri.  
\v 10 Ihan ihtipririm den dinmat unariyahanoh gur sus winsi han ire tongnopti tei ohri sus tongnopri. Kom dah ma tongnopti ohe ap tan tei tongnonmur. Atei tongnot patin den dinmat ma unat han oh Nohan go gin apris winsi han ire tongnopti tei moh tongnotina napotporhan go sus win isipsi han ire tongnopti tei oh tongnotporhan ma tarmuriya kuuhan ihir wanaham Moh win isipsi han ma hapat dahatiprohemur.   
\p
\v 11 Ihan mohnong dahenmur. Gur Nohwi win isipsi hanmur ma dahapti han gur Got oh win timbas han nahatipramur. Gur guragure winnong na daptuhura be win timbas han hatin hat pati han gur Got oh gurnong win isipsi han naham win nadaptuhutipramur pongopri.   
\s1 Den pandipora dahahhanoh borop han ire danong ham pandenmur ritip ohe meng oh  
\p
\v 12 Jisas oh giporpat Dit tap hat den dipera ma pot han ohnong Nohan go mongsutdo kwihando oh den temar kuuhan ihirnong pandipora dahahhanoh go gorhe taptemo gorhe nitao gorhe yah hano tap aptei kamah hano ama ihirnongwi uatporhan ihir apris nohe den moh ha dingwe. Dama yan oh it komdapat mimat sa namdipri daham ama imat namdin han ihirnongwi daham uaripri.  
\v 13 Den ruumsan temar pandipora dahahhan it yansi na nahatin han borop hano ina ersi hano buh ersi hano kin sohorsi hano ama ihtin han bap ihirnong oh uara den pandenmur.  
\v 14 Ihtin ihirnong imat den pandehanoh ihir gonong it yan na napin hatin han ohoh ihan Got orhor gonong bapkei amam dasi nahatipramur. Ma nahatipra oh duung dasi hat pateshe han ire ma masapri dik oh gwe yanhe napripramur pongopri.   
\s1 Got ohe napapindin teinong ha apringwe rim unarpat orhor garham na sapti ohe meng oh  
\r (Matyu 22:1-10)  
\p
\v 15 Jisas oh ameng oh potporhan orhorsi tap hat ma den dapti han irair tit han tit amrama Ei. Got ohe napapindin tei tongnom den dam patepri ihir bapkei amam dasi hatipri han ihirmuro pongopri.   
\p
\v 16 Potporhan Jisas oh Es. Go giritipra. Mama paham mengnong moh dahatinmur.  
\p Tit han tit Noh den isip temar ruumsan han ihirnong pandipramur dahapat ruumsan han ihirnong den din dik oh aprinmur por dik atipri.  
\v 17 Dik at mandapat den mamen matipri. Mamen mat mandapat Gin den din dik hah ma hapat daham orhe atamreipat han ohnong Gin go sus nohe ruumsan han dik atip ihirnong Gin den din erer gonsi oh mamen tahat pat ohoh ihan gur aprinri potinmur por atamreipat han ohnong darhengopri.  
\v 18 Darhetporhan oh sus ihirnong ama potip oh. Potporhan tit han oh Noh aprin orhor mong tit kopen namdata ohoh ihan noh ohnong wamar sapatmur. Ihan noh kinhat aprin hahmur pongopri.   
\p
\v 19 Potporhan gahan tit han oh Noh aprin orhor noh kopen baporo kathei tit mohom dat ohoh ihan ire tamreindin oh kinhat tamreindiprohe rim kis matiprohmur. Ihan den din teinong noh kinhat aprin hahmur pongopri.   
\p
\v 20 Potporhan gahan tit han oh Noh aprin orhor kuu kopen dat ohoh ihan noh kinhat aprin hahmur. Ihan noh na saprohmur pongopri. Ihir imat orhorwi pora garham na sangopari.   
\p
\v 21 Gipor na saperhan atamreipat han oh it orhe hanipyah ohe patnong aprisa Gwe ma dik atip han gonsi ihir imat ti hat ti hat meng rim garhayahemur pongopri. Potporhan ama den nita han oh heisup hama orhe atamreipat han ohnong Gin go kapkapwi ap mutuhnong sonmur. Susa ap mutuh oh mandap isip teio mandap gar teio oh borop hano ina ersi hano buh ersi hano kin kwisi hano ihir apriptihanhe ambur den dinmat poprinmur por it darhetipri.  
\v 22 Por darhetporhan atamreipat han oh susa orhe ama por mengru hama be kuuhan ihirnong ama ambur pihip oh. Ambur pisusa orhe papat han ohnong Napapat hana. Noh gin gorhe ma napor oh noh indeimur. Imat ambur popir orhor kat ap tan tei oh be patmur pongopri.   
\p
\v 23 Potporhan hanipyah oh Nohe ap moh ha bokotinoh dahapatmur. Ihan go it susa be mandap kup kupo doho hiro oh susa hanip patihanhe ambur poprinmur.  
\v 24 Nohe ma dik atporhan garhata han ihiroh it apris eimatnap na diprohemur potipri. Ihtipari pongopri.   
\s1 Jisas oh Gur da oh apera mamen mat paptimdapat nohe kom aprishenmur potip ohe meng oh  
\r (Matyu 10:37-38)  
\p
\v 25 Gahan kuuhan isip tit Jisas ohsi tap hat pipari. Saptin mandap oh Jisas oh it tamburkes rim ihirnong wandeingopri.  
\v 26 Wandeipat meng tit Gur nohe danong hatin ohe da ohri hatinmur. Itaniro suaniro kuu brero arwaniro ire danong hatin ohe danong ohri hat sasipri. Nohe danong hatin ohe da ohri isip hat orhorwi sashenmur. Ihat son ohe da oh gorhe boknong daham ma ihat sapat dahe mahaw mar hatin mar mandama nohe danong hatin ohe da ohri isip hat sashenmur. Ihat saya han bap gurwi nohsi tap hat sus namgit napisashen han bap gurmur. Ihat na saya han bap guroh nohsi tap hat sus namgit na napisashen han hat pati han bap gurmur.  
\v 27 Gur Nuhur Jisas orhe tapnong hat patin orhor nitperhan hapuriyahan yahwa daham nohe tapnong ham aprishenmur. Ihat na dahat pati han bap guroh nohe namgit na napisashen han hat pati han bap gurmur.   
\p
\v 28 Gur aperipti nohe komnong ma apripti meng oh mamaru hat patmur. Tit han tit ap hatpora daham ap hatin ohe erer oh Mimat mamen mat sar erer oh gin tarpatipra ma hapat daham ap hapatmur.  
\v 29-30 Ihat na mamen tahatin tei hahhanoh be tamwi gonoma kat pe erer oh na yah hatporhan mandatiprohmur. Imat mandatporhan ihir wamara Epo. Han moh na daham ap tamwi gonom mandatirda por dasei meng por imtiprohemur.   
\p
\v 31 Tit aperipti nohe komnong ma apripti oh mihat patmur. Mong erer gon ite hrepnong mat kak hat pati han yot ihit gusutper dahayahanoh tit han ohe dupsi han ihir 10,000 han gar bap ihirmur. Tit han ohe dupsi han ihir han isip 20,000 ihirmur. Ama kakhan yot ihit gusuper dahayahanoh 10,000si kakhan oh na gusut patin orhor daham apetiprohmur. Norhe dupsi han 10,000 garpok maihir ire merwi mar 20,000 ihirnong sutiproheda daham apetiprohmur.  
\v 32 Apera nohe 10,000 maihirsi na yah hatipra ma hapat dahahhanoh na gusut patin orhor meihdapat meng pisaya popriya ma hapti han ihirnongri darhetiprohmur. Darhetporhan ihir na gusum manap goshat indin meng oh apera pomtiprohemur.   
\p
\v 33 Gur mamaru hat orhor daham nohe kom ha aprishengwe rim mama paham meng yot moh napormur. Noh erer oh gonsi mandama eimat kom asara Jisas ohsi tap hat orhorwi sasiprawa daham ama da oh kasip ham marin patdapat orhorwi nohe tapnong ham aprishenmur. Ihat ma na dahat pati han bap guroh norhe namgit na napisashen han bap gurmur pongopri.   
\s1 Jisas oh Gur sor ambar hatin ham ire mutuh patenmur potip ohe meng oh  
\r (Matyu 5:13; Mak 9:50)  
\p
\v 34 Jisas oh ameng oh giporpat Gur sor ambarnong oh daham ire mutuh sor ambar hatin hat patenmur. Sor ambar dasansi hat patin yahmur. Sor ambar dasan oh timbas hahhanoh hanip dir kinmat it ambar dasansi mar yah matiprohe.  
\v 35 It na yah matin han ohoh ihan dir kinmat rang tei sariyao den yah hat ha maronoh rim imah asi sahsah mar rang tei sariyao matiprohe. Eimat er hahrit ohoh mandaptimur. Hanip nat temsi bap gur amranmur pongopri.   
\c 15  
\s1 Er hat pati han ire da tamburketperhan amam isip hapti ohe meng oh  
\r (Matyu 18:12-14)  
\p
\v 1 Gahan takis yan dar kat pe be agapah ham daripti hano er hat ma sapti hano ihir apris Jisas ohe meng amratperim ohe duup oh tarmungopari.  
\v 2 Tarmutperhan Parisio sawa meng am hat pati hano ihir wamara Han moh er hat sapti han ihirsi irair yah han ham ihirsi den dapat moh er hanmuro por indeingopari.   
\p
\v 3 Imtiperhan Jisas oh amram paham meng tit pongopri.  
\v 4 We. Gur mohnong dahatinmur. Guragur tit han tit ohe sahapat han sipsip oh 100 patina tit timbas hathanoh orhe damdapat 99 ihir mama pati ohwa. Tit pokwi timbas hat moh ha ihtinoh daham mandatiprohda. Basra. 99 ihirnong iraire den dapti tei yah tei oh mandama titnong oh de tei pato rim angmar saprohmur. Angmar sor patim pathan  
\v 5 nita oh amam isip ham ambura kat tam tei sara amam hat orhor popriprohmur.  
\v 6 Popris apteinong deipat orhe yah hano arwapiro ihirnong Gin gur apris matei tap tei hatinmuro. Nohe sipsip ma kotnong tandutir mah gin ambur popirmuro. Ihan dir wes ambur apiro rim amam hamo hatpero por uar tap teinong ham amam hatiprohemur.  
\v 7 Amaru hat orhor er hat sapat han oh da tamburkera er danong kom asar mandahanoh aw tei mahat ma pati ihirhe Oh ihat da tamburkero rim ihat amam isip tit haptimur. Ama amam isip ma hapti oh ruumsan yah hat sapti kuuhan ihirnong Ihir yah hat saptio rim ma amam hapti oh garpokmur. Er hat sapat han ohe ma da tamburker yah hat us danong oh amam isipnap tit haptimur pongopri.   
\s1 Er hat pati han ihir da tamburketperhan Got ohsi tap hat pati han enser ihir amam hapti ohe meng oh  
\p
\v 8 Porpat Jisas oh Gin gur tit mengnong mohhe dahatinmur. Dire mani tit dahwi tamreim ma daripti mani tan oh tit kuu tit ama kathei tan oh it patin tit tanwi timbas hahhanoh mandatiprohda. Basra. It datiprohneng daham tanggam has mat patim ap tan huhun hirmar pomat angmatiprohmur.  
\v 9 Pomat angmar pathan dara urhe yah kuuo tap aptei kuuhano ihirnong Gur amratino. Nohe mani tan pamdir ma angdeipat mahhe gin darmuro. Ihan gurhe apris diradir daro rim amam hatpero por uatiprohmur.  
\v 10 Noh arpin meng napotiprohmur. Kuu urhe mani tan dar ma amam hahru hat orhor Got orhorsi pati enser ihirhe er hat sapat han oh da tamburker er danong kom asar mandatporhan ihirhe er da mandam da tamburkero rim amaru hat orhor amam ham amam isip haptimur pongopri.   
\s1 Mon oh er hat sapatdapat it apriporhan itap oh amam hatip ohe paham meng oh  
\p
\v 11 Porpat Jisas oh Gin tit meng mohnong dahatinmur. Tit han tit mon yotsi han hat patesuhri.  
\v 12 Ihat patin gahan mon kom brer oh At oh haputporhan orhe pan erer ma datipra oh kapkap orhor datpora daham itap ohe duupnong aprisa Ata. Noh gwe erer moh pan ma datipra oh gin orhor datpora dahapatmur. Ihan gin orhor napinmur pongopri. Potporhan arpin itap oh itaite kis mat apripra kis orhor mat apdapri.  
\v 13 Apriporhan ruumsan dik na hat patin orhor kom brer oh orhe itap ohe ma apdor erer oh ihirsi mohoma mani oh tap tei mara meih wan mongnong mani ung ohsi sa pipri. Susa atei patim da timbas han hatin hat patim mani oh gonsi tapan andur dam ama ihat patesuh oh.   
\p
\v 14 Ihat patin gahan orhe erer gonsi timbas hah tei mah orhe pat mong tei oh pahoh sup isip tit apingopri. Aprisa orhe erer oh gonsi timbas hapat hanip orhe ina bokwi hatipri.  
\v 15 Orhe ina bokwi hatporhan oh ama aptei han ihirnong Gure tamreindin tit pathanoh noh natamreinpora por dahamtipri. Dahamtiporhan tit han tit Dawa. Nohe natamreindin tit patwa. Go nohe imah ihirnong sahamo nawamat patenmur pongopri. Potporhan oh sus wamat indipri.   
\p
\v 16 Wamat patin pahoh isip tit hama imah ire den sahapti ohe am na dapti han orhora; oh kian han din ham dipora dahatipri. Ihat kian han din hat patin ama han ihirhe eimat ti na pandem na kasip deingopari.  
\v 17 Na kasip matperhan ihat pahohsi patin da darhetipri. Da darherpat Noh matei patin pahoh ham hapurpat sa. At ohe hrepdapat patim be atamreipti bap ihir den ruumsanwi dam yah hat pati sa.  
\v 18 Noh ihan kinhatiproh sa. Noh it sus at orhe hrepnong hat indinmat at ohnong Ata. Noh ma ihat pat oh Got ohnongsi; gonongsi gutnong er nahat napapatmur.  
\v 19 Iham nohri gwe brer hatin na hat pat ohoh ihan go nohe mona napotipra. Go ihan norhe be natamrein han hat patenmur napora gorhe hrepnong nahat napaptenmur noh sus gipotiprawa dahatipri.  
\v 20 Dahapat it itap pat orhe aptei pipri. Sus oh kopen mandap meih dus ohon apripatin orhor itap oh sa wamtipri. Wamara hinhina isip tit deipat itap oh sakat susa mandap oh tuhup mara ga tam hrepdapat amam isip tit mara amam deingopri.  
\v 21 Imat amam isip tit matporhan mon oh Ata. Nohe ihat pat moh Got gutnong er nahat napapatmur. Iham nohri gwe brer hatin na hat pat ohoh ihan go nohe mona napotipra potipri.  
\v 22 Potporhan itap oh orhe atamreipti han ihirnong Gur kapkapwi sonmur. Susa watah yahnap dapsio kamah han ire bes tei aripti hano tong apo oh dar popris andinmur.  
\v 23 Aripti brer moh apiro rim amam matiprohe ohoh ihan sus burmakau bap bapkei tahat pat burmakau yahnap oh sum rohdinmur. Orhoma den ruumsan damo amam hamo hatiprohemur.  
\v 24 Norhe brer moh wan mong teinong ma pip oh adus haputipkin dahat patin it apir ohoh ihan dir orhe danong ham den ruumsan dam amam matiprohemur pongopri. Pora ihir den ruumsan damo amam maro hatpari.   
\p
\v 25 Ihir indeiptin duuptei brer oh den ru tei tamreipatdapat apris mandap amdapat amraoh waronsi amam ham birhim haptingopari.  
\v 26 Birhim haptihan oh amrama itap ohe atamreipti han ihirnong uara tit han tit apriporhan Gur aptei ama birhipti oh kinhaptio por dahamtipri.  
\v 27 Por dahamtiporhan oh Es. Gorhe taptem oh orhe ina pe moh na gatera yah hat patdapat apriporhan ita oh Weso. Itap norhe hrepnong apiro rim burmakau bapkei tahat pat yah oh suma amam haptimur pongopri.   
\p
\v 28 Potporhan duuptei brer oh nap ohnong heisup mara oh Noh apnong na roprohmur rim kot tei kimirit mandangopri. Kimirit mandatporhan itap oh rosa Marona por kamtipri.  
\v 29 Por kamtiporhan oh Noh gwe hrep mama be natamreipti han ihir hatin hat patim be ma natamreipat oh gwe ma naporpat meng oh tit meng tit na mandama gonsi yah hat orhorwi natamreisuhru natamreim orhorwi patmur. Ohnong go dahatinmur. Noh ihat ma natamreipat ohe pe oh go meme yan gar sariptisi han moh suma gorhe yah han ihirsi damo henmur napor na napripatgwermur.  
\v 30 Nohnong na napripatgwera; gin gorhe erer oh napisusa bisei saw yan saro be tapan andur natimbas deio ma indeisuh han oh it apriporhan go ohe danong ham burmakau bapkei tahat pat yahnap moh sum orhom amam hapatda. Nohnonghe na inahapatgwero pongopri.   
\p
\v 31 Potporhan itap oh Mona. Go ditadit taman dipwi tap pati brer ohoh ihan norhe hrep papat erer moh gorhewimur.  
\v 32 Gorhe nangga oh haputipkin dahat patin gin it apris pat ohoh ihan ohe danong ham amam matin da oh na mandatin hatinmur. Na mandatin ina hat pat ohoh ihan ohnong amam mar den damo hatiprohemur potipri. Ihtipari por Jisas oh ama paham meng oh pongopri.   
\c 16  
\s1 Kakdah moh ohe dakuu hat son ohe paham meng potip ohe meng oh  
\p
\v 1 Gahan Jisas oh orhe pinggit pisapat han ihirnong paham meng tit por am deingopri. Ma am matip oh  
\p Kamah han tit patesuhri. Gahan kamah han orhordapat orhe atamreipti han ihirnong tit han ohnong Gin go norhe erernong moh nawamat paptenmur por awamat papten han deingopri. Indeipat patesheri.  
\p Gahan patimdapat kat han ihirdapat kamah han ohnong Gorhe erer ma nawamat pat han mohoh gorhe erernong moh be natimbas deipatmur pongopari.  
\v 2 Gipotperhan oh amrapat orhe erer awamat pat han ohnong Gin go aprina por uangopri. Por uatporhan oh apriporhan Gwe boknong meng tit Oh ihpat hanmur ma naporiya oh noh amram Go arpin ihpat ma hapat dahah ohoh ihan nohe erer ma gwe hrepnong mar nawamat pat oh gin go na nawamat paptepramur. Wan han ihir nawamat paptepri ohoh ihan erer ma pat meng oh brak mat napinmur pongopri.  
\v 3 Potporhan oh Norhe napapat han oh Gin gwe natamreindin oh gin timbas hahmur ma napor moh gin noh kinhatiproh sa. Kot tei ohe tamreindin oh noh hanhan hat pat moh kinhat sa kasip ham mong sum tamreimo hatiproh. Noh na tamreim hanip ire patinong asoh Den ti namdina por deipmat son oh noh kas hapatmur. Gin noh kinhat sus den dam patepra ama gidahatip oh.  
\v 4 Dahapat tit ama dahatip oh. Ai. Noh ire kamah han ohe yan hat ma patinong asoh noh yan ahatip matpora. Imat ahatip deirit ihir ama ohe pe oh nohnong Go nuranure yah hanmur. Ihan go apris nure ap moh den denmur sa naporipri ama gidahatip oh.   
\p
\v 5 Gidahama orhe papat han ohe erer ma ayan hat pati han ihirnong tit tit tahat Gur nohe pat tei moh aprinmuro por uatipri. Uatporhan ohri apir han ohnongri Gwe ma kamah han ohe ayan hat pat oh kinhei ayan hat pat por dahamtipri.  
\v 6 Dahamtiporhan oh Noh den tendeipti ohe wer san 100 oh ayan hat patmur pongopri. Potporhan oh Ihan go gin orhor tongnoma rihohe brak matip brak oh mandapat Nohe yan oh 50 pok patmur por brak mar napinmur potipri. Potporhan oh arpin yan hatip brak sar apingopri.   
\p
\v 7 Apriporhan gahan tit han oh apriporhan oh Gwe ma kamah han ohe ayan hat pat oh kinhei ayan hat pat por dahamtipri. Dahamtiporhan oh noh tendeipti han wit 100 ung oh ayan hat patmur pongopri. Potporhan oh Ihan go rihohe brak matpa brak moh dara mandapat 80 ung patmur por brak mar napinmur potipri. Potporhan oh arpin yan hatip brak sar apingopri. Imat orhor ire yan hat pati oh hatip matwi apihipri.   
\p
\v 8 Kamah han ohe erer awamat pat han oh imat ire ayan hat pati oh hatip mat apisaporhan kamah han oh wamar am hama ama er hat atamreipat han ohnong Go nohe natamreindin oh er mat natamreipat orhor gorhe kom ma kakdah morhor indin ohnong daham ire yan ahatip dei moh go dakuu han hatin ham indeimur pongopri. Ihangopri pongopri.  
\p Porpat Kakdah morhe danong hat ma pati bap ihiroh iraire komdapat kakdah indin ohe danong asoh dakuu ham ihat sapti bap ihirmur. Has yah dasi hat orhor ma pati han bap guroh guragure komdapat ma eimat patepri danong oh ihat na dahapti bap gurmur pongopri.   
\p
\v 9 Jisas oh giporpat Gin gur mohnong dahatinmur. Kakdah er hat patim ma daripti mani mohsi hatip hat pati han ihirsi guragur yah han hat indinmat aprishenmur. Imat apriptin ma timbas haya tei mah Got oh orhe eimat ma napaptepra apteinong nambur napisapramur.   
\p
\v 10 Gin gur mohnong dahatinmur. Gur gar erer moh pomat apapayahanoh isip asohhe pomat apaptepri han ma hapat dahaptimur. Gur gar erernong moh pomat na apapayahanoh isip asohhe pomat na apaptepri han ma hapat dahaptimur.  
\v 11 Ihat dahapti ohoh ihan gur kakdah er hat patim ma daripti mani ohnong oh pomat na papayahanoh ama imat er mat papti han guroh Got orhe arpin han erer oh gur pomat na papindin han bap hatiprimur.  
\v 12 Gur ire erer pomat na apapayahanoh ama imat er mat papti han gurnong guragure datin erer oh nih gurnong napripra pongopri.   
\p
\v 13 Jisas oh giporpat Gin mohnong dahatinmur. Tit han gowi yot han ite atamreindin asoh tapsut orhor tap hat atamreindin hatinda. Basra. Ihat na atamreindin hatinmur. Yot mat orhor atamreihanoh titnong bopor dei titnong na bopor dei hatiprohmur. Tit ohe danong ham titnong kom asar mandatiprohmur. Ihat yot hat na tamreindin ina hat pati ohoh ihan Got orhe danong ham atamreindin ohsi; mani ohe danong ham tamreindin ohsi tap hathe na tamreindin ina hat patimur pongopri.   
\s1 Jisas oh Parisi ihirnong meng potip ohe meng oh  
\p
\v 14 Jisas oh kakdah mohe mani meng oh potporhan Parisi ihir ameng amrama maninong bopor mat pati han bap ihir ohoh ihan irair rum tirhis gosham Jisas ohe mengnong kre angopari.  
\v 15 Kre atperhan Jisas oh Es. Gur Nuhurnong yah hat pati hanmur ha naporingwe rim ina teimdapat yah hat sapti han bap hatin hat sapti orhor gure da mutuhnong oh Got oh wanaham am hat patmur. Hanip gure yaho por ma bopor mat papti han oh Got oh ero por dasei mat papatmur.   
\p
\v 16 Moses ohe sawa meng rim brak matip mengo propet ire sawa meng rim brak matpa mengo ama sawa meng ire hrepdapat hat pateshemur. Ihat patin Jon oh apdapmur. Aprisa Got orhe hrepnong naham napapindin ohe yah meng oh naporisuhmur. Orhe imat ma napot indir meng orhor gin imat orhor naporpatmur. Ama imat naporpat ohe pe oh Got orhe napapindin hrepnong hatinmat kuuhan ihir gonsi bap gosham gargoshaptimur.   
\p
\v 17 Mong tansi; aw tansi moh kapkap na timbas hatin han orhor timbas hatiprimur. Got ohe sawa mengnong oh tit meng pok tit eimat na timbas ham dipwi patepramur pongopri.   
\s1 Kuu dariya mandaya hapti ohe meng oh  
\r (Matyu 5:31-32, 19:9; Mak 10:11-12)  
\p
\v 18 Jisas oh Gin gur mamengnong moh dahatinmur. Han gur kuu mandama wan kuu daripti han bap gur bisei saw hat sapti han gurmur. Han ire mandaya kuu daripti han gurhe bisei saw hat sapti han bap gurmur pongopri.   
\s1 Kamah han oh batbet datporhan bisei han oh amam hatip ohe meng oh  
\p
\v 19 Jisas oh ameng oh giporpat paham meng tit pongopri. Ma potip oh  
\p Kamah han tit patesuhri. Watah yahnap yahnapwi aro den isip yah mat orhorwi damo ham patesuhri.  
\v 20 Ama ihat pat han ohe ap doho gwatei kat oh borop han tit ohe ina bok moh er mongwi hatip han Rasaras ohnong popris atei mandam saperhan  
\v 21 Noh kamah han ohe den tambor ma tapan anduripti den oh noh diprohnengo daham timon patenipatri. Ihat timon patin mian ihir apris ohe ernong moh pang atandiniptiri.   
\p
\v 22 Ihamo ham patdapat gahan hapungopri. Haputporhan Got ohsi pati han bap enser ihir aprisa ohe da oh ambur pisusa Got orhe pat tei Epraham ohe pat duupnong sa matpari. Imtiperhan gahan kamah han ohhe hapungopri. Haputporhan sein itpari.  
\v 23 Itporhan da oh susa batbet dar pati aptei patin batbet dar hat patdapat aw teinong mahat wandeioh meih mahat Rasaras oh Epraham ohe duup mahat patgopri.  
\v 24 Pathan oh At Eprahamo. Noh irat has ohe batbet oh noh isip tit dat patmuro. Ihan kamahara naham go Rasaras ohnong darhetinmuro. Ohe bes ka oh tihih tom dahnong mara apris nohe pang mama har nahat patnong moh dip naham ha natihih matinoh pora uangopri.   
\p
\v 25 Por uatporhan Epraham oh Mono. Gorhe ma patesuhnong oh dahatinmuro. Go da patin orhor gorhe ina boknong bapkei taham ma patesuhnong dahatinmuro. Rasaras ohe ma patesuh oh orhe ina moh er mongwi ham bisei han hat patesuhmuro. Gin gute ina oh yawar hayamuro. Gonong er ham ina batbet isip dat patmuro. Ohnong da yah ham bapkei inasi hat patmuro.  
\v 26 Ginra maihir gwe pat apriyao go nure patinong apiro hatipririm mong isip nakwer apet nahatip tei moh kinhat apris gonong napanggeitiproho pongopri.   
\p
\v 27 Potporhan kamah han oh At Eprahamo. Ihan go nohe mama ihat pat ohe meng ohsi Rasaras ohnong it norhe apteinong darhetinmuro.  
\v 28 Darhetporhan oh susa norhe arwapir hanen gon han ihirnong We. Gure arwan ohe hanip ihirnong na kamahara mar orhe danongwi hat sasuh ohe pe oh gin orhe boknong batbet isip darpatmur. Ihan gurhe ihat batbet hapti apteinong hatipririm potahat patenmuro ha potinohmuro pongopri.   
\p
\v 29 Potporhan Epraham oh Es. Ohnong na darhetiprohmur. Ihirra Moseso propeto ire rim ma brak matpa meng oh pat basda. Ihan ihir ohnong sama ha dahengwemuro pongopri.   
\p
\v 30 Potporhan kamah han oh At Eprahamo. Rih ma ritpa mengwi oh ihir sam na dahatiprohemuro. Haputpa han ihir tit it masas sus porhanoh ihir Arpinhe daham da tamburker er da mandatiprohemuro pongopri.   
\p
\v 31 Potporhan Epraham oh Es. Ihir Nuhur Moseso propeto ire rim ma brak matpa mengnong oh na amratiprohemur dahapti ohoh ihan haputpa han ihir tit it masas sus porhanoh ihir Arpinhe daham amratiproheda. Basra. Ihir na amratiprohemuro pongopri. Ihangopari pongopri.   
\c 17  
\s1 Hanip ihirnong er da pinggit pisaya han gur batbet isip datiprimur potip ohe meng oh  
\r (Matyu 18:6-7,21-22; Mak 9:42)  
\p
\v 1 Jisas oh orhe pinggit pisapat han ihirnong Gur mohnong dahenmur. Er nahatin da oh ti da ti da er nahatinmat apripat orhor gure tei ohri tarpama ihirnongsi apriprio. Ihirnongsi apriyahan ama apriya han gure ihapti ohe pe oh ruumsup oh guragure boknong hatipra ohoh ihan gur kamahara hinhinsi hat pati han bap gurmur.  
\v 2 Ihama norhe nita brer ihsen hatin hat pati maihirnong er nang pinggitperhan ihir er hat sayahanoh ama er da pinggit pisa han go ama ohe pe oh ruumsan batbet datipramur. Go kwei gon tit gorhe manbi dah moh nang nadumama tom hru dahnong tahe napotperhan was hapurhanoh ama ohe batbet oh garpokmur. Ihirnong ma er da pinggi ohe batbet oh isipmur.  
\v 3 Ihtin ohoh ihan gur ihirnong er nang pinggit pisapririm guragurnong da ongeng mat paptenmur.  
\p Gin tit mohnong dahenmur. Guragure taptem ihir tit er da hat ushanhe ohnong Mihat na saptimur por imtinmur. Imtiperhan oh ama er hat sapat da oh Noh er hat sapat sa daham ohe er hat ma sapat da oh mandahanoh gur it orhe er hat sapat danong oh na dahama eimat hanhan amar mandanmur.  
\v 4 Ihir tit han tit gonong er nahapat komdapat apris gonong Noh gonong na inahahnengo daham noh da er hahmur naporhanoh go it yansi na mara eimat hanhan mar mandanmur. Mandatporhan oh susa it gorhornong er nahapat it apris gorhornong tap meng orhorwi napot napisapatin beshei dah hahhanoh go tit tit mat orhorwi it yansi na mar hanhan mar eimat amdat pisonmur pongopri.   
\s1 Hanipyah oh inahatin hatin hanwa dahapti ohe meng oh  
\p
\v 5 Jisas oh ameng oh potporhan orhe mengtei meng pot pisapti han ihir ohnong Hanipyaha. Nure gonong Ohwi inahatin hatin hanwa dahapti da oh gar hat pat ohoh ihan go isip mat napisonmur potpari.  
\v 6 Potperhan Hanipyah oh Es. Gure Hanipyah oh inahatin hatin hanwa ma dahapti da oh mastet gwe gar hatin hat ma pati da ohsi orhor Gin mama irat gwe san go gorhap kakersi tapera sus tom sor hru tei ohom it tonggonom maronmur poriyahanhe guragure ma daham poriya meng orhor arpin dam tarpatiprohmur pongopri.   
\s1 Tit han ohe hrepdapat hat patim orhe atamreipti ohe meng oh  
\p
\v 7 Jisas oh ameng oh porpat Gin gur tit han tit gwe natamreipat han ohe meng oh dahatinmur. Gwe natamreipat han oh mong sur teidapatdo da imah papter teidapatdo apriporhan Go gin kapkap apris tongnom den dinmur potiprohda.  
\v 8 Basra. Ohnong na gipotiprohmur. Gorhe natamreipat han ohoh ihan ohnong Norhe denri natemtinmur. Natemara mamen tahama norhe den oh kan mat natinmur. Kan mat napriso tom yohot napriso hapatin noh den damo tom damo hatiprohmur potiprohmur. Pora den damo tom damo hapat Ginra gorhe den dinmur potiprohmur.   
\p
\v 9 Papat han ohdapat orhe atamreipat han ohnong Han moh orhe da orhor apris tamreipatda ihan weso potiproh. Norhe mengtei tamreipat ohoh ihan noh weso na potiprohmur dahapatmur.  
\v 10 Amaru hat orhor Hanipyah orhe meng dimar pomar ma atamrein saptinong oh orhe mengtei ihat tamrein sapti ohoh ihan wes ihat natamrein saptio na napotin inasi hat patim atamrein saptimur dahenmur pongopri.   
\s1 Jisas oh ina mong mong moh tohohet saptisi kathei han ihirnong yah matip ohe meng oh  
\p
\v 11 Gahan Jisas oh Jerusarem apteinong saporim susa Samaria mongsi; Gariri mong ite mong en tei oh kora mong en mutuh oh pipari.  
\v 12 Mong en mutuh oh susa tit aptei tit kora ama apteinong oh saper riptin ina mong mong moh tohohet saptisi kathei han ihir apris ina mong mong moh tohohet saptisi hano rim meihdapat orhor  
\v 13 Jisas napapat han go nuhurnong kamahara naham yah nahatino por kasip mengtei pongopari.   
\p
\v 14 Potperhan Jisas oh ihirnong wamara Ei. Gur gure ina mong mong oh tohohet sapti oh gin yah hayado rim gur susa Got orhe ap yawar ohe hanat bok han ihirnong pinggitinmur pongopri. Potporhan ihir arpin amrama sangopari. Saptin orhor ire ina mong mong tohohet ma sapti oh timbas ham ama yah hatpa oh.  
\v 15 Yah hapti wamar am hapti tit han oh pokwi Nohe bisei nahat napapat ina moh gin nayah dei ma hapat daham it aprisa kasip mengtei Weso por Got ohnong armi mat apingopri.  
\v 16 Aprisa Jisas ohe duup oh bos hamnong mar timama Wes yah nahaho pongopri. Juda ihirsi mahaw ham tap hat na pati han Samaria ihir oh pokwi apris wes yah nahaho pongopri.   
\p
\v 17 Potporhan Jisas oh orhe han ihirnong Wa. Kathei han gonsi ihirnong ire ina mong mong moh tohohet saptisi ham bisei hat pati ina oh nohe ma ayah dei oh gin towathei han ihir apris nohnong weso na naporiyada.  
\v 18 Wan aptei han oh pokwi apris Got ohnong weso por armi dei moho. Kat han ihir kianorim na ihyao pongopri.  
\v 19 Porpat yah matporhan ma it apir han ohnong Gorhe da oh Oh yah nahatin hatin hanwa ma dahapat ohe pe oh noh yah nahahmur. Gin tandeim yah inasi hat orhor sonmur pongopri.   
\s1 Jisas oh Hanip gur ihat patin Hanip Brer noh it apripramur potip ohe meng oh  
\r (Matyu 24:23-28,37-41)  
\p
\v 20 Gahan Parisi ihir apris Jisas ohnong Got orhe napapindin oh desut apripra por dahandeingopari. Dahamtiperhan Jisas oh Es. Got orhe napapindin oh tarparit wamtiprida.  
\v 21 Basra. Got orhe ma napapat oh hanip diradire na wandeipti da mutuh mahandapat ham napapatmur. Imat napapat ohoh ihan hanip gur orhe napapat oh wamara Gin mama pat ohmur. Gur wamtin. Gin atei patmur. Gur wamtin na goshaprimur pongopri.   
\p
\v 22 Porpat orhe pinggit pisapat han ihirnong Gur komdapat Nuhur Hanip Brer oh tit dah tit it apris patin wandeiptinengo dahapri orhor gur ti na wandeiprimur.  
\v 23 Na wamara kat han ihir dasuh naham Oh apris matei patmuro. Gin gur apris wamtin. Kat han ihir Oh apris atei patmuro. Gur sus atei wamtin napor dasuh nahat apriprimur. Imat napor dasuh nahat apriyahanoh ire ginaporiya mengnong oh gurri amram dindeipri.  
\v 24 Hanip Brer nohe ma apripra oh ahar ihat na apripramur. Nohe ma apripra oh amsama dapeh ritporhan aw pe mong pe mama kuuhan ihir wamar am haptiru hat orhor noh apriporhan aw pe mong pe pati maihir gonsi wanaham am hatiprimur.  
\v 25 Noh komdapat ihat apripra orhor ohri ma hatipra oh gin ma pati kuuhan ihir Hanip Brer nohnong garnaham kom nasar batbet isip naham ina batbet ruumsup namkatiprimur.   
\p
\v 26 Hanip Brer nohe ma it apripra oh rih Noa oh patin ire ma ihasheru hat patin orhor apripramur.  
\v 27 Ire ma ihashe oh mamaru hashemur. Den din ohe danongwi hayao tom din ohe danongwi hayao ama kuu han gosdatin ohe danongwi hayao hat saptin Noa oh tom hru tei son ohe ap tit hama ruhupmur. Roporhan be kuuhan ihir hanhan hat patin tom dusut apris ihirnong gurmar timbas matipmur. Amaru hat orhor gur hanhan hat ihat saptin Hanip Brer noh it apripramur.   
\p
\v 28 Rot oh patin ire ma ihashe ohhe tap da orhorwi hat pateshemur. Ihir den damo tom damo erer oh tamohomo tohan pa gonomo ap hamo ama ihtin ohe danongwi hat sashemur.  
\v 29 Ihat saptin Rot oh Sodom ap mutuh oh mandama tandutipmur. Tandutporhan ihir ap mutuh orhor hanhan hat patin aw tei mahatdapat kwei kurgwesi har hapat kwei oh har isipsi hat wandas Sodom ap mutuh pati kuuhan ihirnong gonsi timbas matipmur.  
\v 30 Amaru hat orhor gur hanhan hat patin orhor Hanip Brer noh it apris pitap teinong hatipramur.   
\p
\v 31 Nohe ma apripra oh hanip gur kot tei ros tupet patin apirhanhe gur apnong it ros erer datin ohe danong hatipri. Rang tei sus tamreiptin noh apirhanhe it apteinong sus erer oh datin ohe danong hatipri.  
\v 32 Gur Rot ohe inap urhe erer ma aptei manda ohe danong hama it tamburker wamtiporhan urhorsi ma timbas hatip oh dahatinmur.  
\v 33 Amaru hat orhor gure dahe Matei orhorwi trun mihat orhorwi pateprineng daham inin hat ma sapti bap gur oh eimat yah hat paten ohe da oh na datipri han bap gurmur. Kakdah moh ohe paten ohe danong na hama Jisas ohe danong hat sapatin hapuriyahan yahwa ma dahat sapti han bap gur eimat yah hat paten ohe dasi hat patepri han bap gurmur.   
\p
\v 34 Noh arpin meng napotiprohmur. Nohe ma apripra dik oh yot han tit ap tan dah timon patihanhe Got orhorsi pati da bap enser ihir apris tit han ohnong ambutiprimura; tit han ohnong ama ap tan tei orhor mandatiprimur.  
\v 35 Yot kuu yot tit kon gwe kup mar tambor deiptihanhe tit kuu uhnong ambutiprimura; tit kuu uhnong atei orhor mandatiprimur.  
\v 36 Yot han tit rang tamreiptihanhe tit han ohnong ambutiprimura; tit han ohnong atei orhor mandatiprimur pongopri.   
\p
\v 37 Potporhan orhe pinggit pisapat han ihir ameng oh amrama Hanipyaha. Gwe ma napor meng oh de tei tarpatipra por dahamtipari. Dahamtiperhan oh Ner harkak ire tarmutperhan Gin tit or wanduh oh gwe mar tarmuriya ma hapat dahaptiru hat orhor gurhe norhe apirnong oh ihat wanaham Gin oh atei ihat apir ma hapat daham am hatiprimur pongopri.   
\c 18  
\s1 Jisas oh Got ohnong dahamtin oh garhapririm dipwi dahamar patenmur potip ohe meng oh  
\p
\v 1 Jisas oh Gur Got ohnong dahandein ohe da oh garham na mandama dipwi dahamar ha patengwe rim noh paham meng tit napotiprohmur. Paham meng oh mamarumur.   
\p
\v 2 Tit ap mutuh tit meng sam pondeipat han tit patesuhri. Ama han oh Got ohnong na kasa ham hanip ire danong na hapat han oh patesuhri.  
\v 3 Patin orhe pat ap mutuh oh kuu tahem tit ama patesuh oh. Patin uhe boknong meng tit matperhan uh sus meng sam pondeipat han ohnong Nohe boknong meng tit ma nahapti ohe meng oh go ponaham napanggeitinmur dipwi ponipatri.  
\v 4 Porpatin meng sam pondeipat han oh meng na amram kimirit patesuhri.  
\p Na amram kimirit patdapat gahan oh Noh Got ohnong na kasa ham hanip ire danong na hapat orhora;  
\v 5 kuu tahem uhe dipwi apris dahanahapat moh nohnong ina ruumsi nahapatmur. Ina ruumsi nahapat moh noh na pondeihanoh atnap dipwi dahanahapatin nohnong garnahatipra ma hapat. Ihan noh gin orhor meng sam pomara ayah matpora daham meng sam apomtipri. Ihtipri pongopri.   
\p
\v 6 Giporpat Hanipyah oh Gin gur meng sam pondeipat er han ohe meng oh amraya ohe meng oh dahenmur.  
\v 7 Got orhe nitao rim kis nahat napapat bap gurnong oh kwitem timbas mong da timbas dipwi ohnong dahamatwi ayahanoh oh namram na napanggeitiprohda. Basra. Oh sunhat na patema kapkap orhorwi namram yah mat napanggeitiprohmur.  
\v 8 Noh arpin meng napotiprohmur. Got oh kapkap orhorwi namram napanggeitin da hat pat orhor Hanip Brer norhe it ma apripra oh apris wanahahoh kuuhan gur Got ohwi inahatin hatin hanwa dahat pati hatiprio da ihtin dasi hat na pati hatiprido pongopri.   
\s1 Jisas oh Hanip guragure winnonghe daptuhutipri por paham meng potip ohe meng oh  
\p
\v 9 Kat han ihir Nuhurwi Got orhe meng amram yah hat saptimur. Kat ihir nure tan hat na saptimur por ihirnong dasei matpamur. Ama ihat nuhurwi yah hat saptimur ma dahapti han ihirnong Jisas oh mama paham meng moh pongopri.   
\p
\v 10 Yot han tit patesheri. Tit han oh Parisi ihirri; tit han oh takis yan darpat han ihirri. Ama han yot ihit Got ohsi mengitinmat Got ohe ap yawarnong ruhpari.  
\v 11 Rosa Parisi oh tandeima orhe danongwi hama orhe damdapatwi Got ohnong Gota. Noh kuuhan gonsi ire ma gapah hat saptio er hat saptio bisei saw hat saptio ire ma ihat sapti ohe tan noh na hat pato rim noh gonong weso napormur. Mama takis yan dar kat orhe gapah hapat han moh ohe tanhe noh na hat pato rim gonong weso napormur.  
\v 12 Noh tit wik tit wik oh gosi mengitinmat yot dah den na dam gosi mengripatmur. Noh erer gonsi ma darpat oh sama kathei hatporhan kat oh gonong napripatmur. Noh ihatwi sapat ohoh ihan nohe ma ihpat oh yahnap hat pat ma hapat daham gonong weso napormur por sa potipri.   
\p
\v 13 Oh Parisi ohe Got ohnong potip meng oha; Takis yan darpat han oh meihdapat tandeima da er ham aw teinong mahat na watahama mem hat patim orhor orhe rangrang teinong bessi pung pung pora Got ohnong Gota. Noh er hat sapat hanmur. Ihan go hinhina naham napanggeitina por dahamar sa pipri pongopri.   
\p
\v 14 Jisas oh ameng oh giporpat Noh arpin meng napotiprohmur. Hanip gur Nohwi win isipsi hanmur daham guragure winnong daptuhuripti han gurnong oh Got oh win garsi han nahatipramur. Gur guragure winnong daptuhutin ohe danong na hat pati han gurnong oh Got oh win isipsi han naham win nadaptuhutipramur. Ihtin ohoh ihan ama yot han ite Got ohnong ma meng potpa ohe pe oh Got oh Parisi ohnong Go yah hat sapat hanmur na potipmur. Na pora takis yan darpat han ohnongwi er da hirmat amdama Go yah hanmur potipmur. Potporhan oh pokwi yah han ham it orhe apteinong pipmur pongopri.   
\s1 Jisas oh brer ire danong hatip ohe meng oh  
\r (Matyu 19:13-15; Mak 10:13-16)  
\p
\v 15 Gahan kuuhan ihir Nohe brer moh Jisas oh bes marima ha beten matinoh rima popingopari. Popriperhan orhe pinggit pisapat han ihir Baso por imtipari.  
\v 16 Imtiperhan Jisas oh Es. Gur ihirnong Baso potipri. Got orhe napapindin hrepnong ma hapti ihir oh mihtin brer ihir ihapti bap ihir ohoh ihan gur baso potipri. Brer ihir nohe patnong moh ha apringwemur por ihirnong Nohe duupnong moh aprino pongopri.  
\v 17 Porpat orhe han ihirnong Noh arpin meng napotiprohmur. Hanip gur brer ire Itapir supir ihir napaptiwa daham ire hrepnong hat ma patiru gurhe ihat orhor Got oh napapat hanwa daham orhe napapat hrepnong na ayahanoh gur eimatnap Got ohe napapindin hrepnong na hatipri bap gurmur pongopri.   
\s1 Kamah han ihir Got orhe napapindin hrepnong hatperda da na hatper daham butahapti ohe meng oh  
\r (Matyu 19:16-30; Mak 10:17-31)  
\p
\v 18 Gahan kak hat pat han tit apris Jisas ohnong Tisa. Yah hatwi sapat hana. Noh kinhat ushanoh yah hat eimat paten dasi hatiproh por dahandeingopri.   
\p
\v 19 Por dahamtiporhan Jisas oh ohnong Wa. Got orhap yah hat pat hanmur. Gin nohnong yah hatwi sapat hanmur ma napor oh Oh Got hatin hat pat hanmur daham naporda da na gidaham napor.  
\v 20 Go Got ohe sawa meng Moses ohe atem teimdapat ma napotip meng oh go am hat patmur. Sawa meng oh mamarumur. Bisei sawheri hapri. Haniphe ha haputinoh daham supri. Gapahhe hapri. Dasuh inin menghe hanip ire boknong deipri. Suanir itanir ire danong ham ire mengnong pomar amram dindeinmur. Ama sawa meng muk oh go am hat pat ohoh ihan go ama sawa meng muknong oh amram dindeinmur pongopri.  
\v 21 Potporhan oh Ama sawa meng ohra noh rih brer garsut orhor gonsi pomat amram dindeisuhru ginhe imat orhorwi dimar patru patmur pongopri.   
\p
\v 22 Potporhan Jisas oh Go imat dindeipat orhora; mama tit da mohoh go na ihpatmur. Gwe ma na ihpat oh mamarumur. Gin noh napotiprohmur. Gorhe ihsen erer ruumsan ma papat oh gin wan han ihirsi mohoma mani oh dara borop hat ma pati han ihirnong apinmur. Ihahhanoh go aw tei Got ohe napaptepra tei mahat ohe ruumsansi han hatipramur. Ihpat nohsi tap hat sashen han hat aprishenmur pongopri.  
\v 23 Potporhan oh Noh ihsen ruumsansi han ohoh ameng oh amrama Noh ihsen ruumsan pat moh gonsi ha mandatiproho daham isip da heimse ringopri.   
\p
\v 24 Heimse ritporhan Jisas oh ohe da er hah danong am hama Ihsen ruumsansi ham kamah han hat ma pati han ihiroh Got ohe napapindin hrepnong hatinmat kinhat son ham butahaptimur.  
\v 25 Sahapti han kemar ihir sur tem kat oh kinhat ron ham butahaptimur. Erer ruumsansi hat pati han ihiroh amaru hat orhor atnap Got ohe napapindin hrepnong sonmat oh atnap kinhat son ham butahaptimur pongopri.  
\v 26 Potporhan ihir ameng oh amrama Epe. Kamah han ihirnongri Got oh amburpatmur dahapti tei moh gin Jisas oh kamah han ihir na saprimur ri moh ihan kinhatin han ihirnongwi ambura yah hat eimat paten dasi matipra por dahamtipari.   
\p
\v 27 Dahamtiperhan Jisas oh Es. Hanip guragurdapat nambutin inasi na matin hat patimur. Got orhordapatwi nambutin inasi naham namburpatmur pongopri.  
\v 28 Potporhan Pita oh Nuhur erer mandam ohe kom sapti ohoh ihan Got oh amam nahat patkin daham Jisas ohnong Nohana. Nuhurra nure erer oh mandama gonong ma dinahapti ohwa pongopri.   
\p
\v 29 Potporhan Jisas oh Noh arpin meng napotiprohmur. Hanip gur Got ohe napapindin ohe danong ham apo kuu brero taptemo supir itapiro ihirnong mandam ihat sayahanoh  
\v 30 ama ihat sapti han gurnong oh Got oh Gin kakdah moh patinhe gure mandaya ohe erer oh isip mat orhor naprisipramur. Kaput eimat ma patepri teihe Got oh yah hat eimat paten dasi nahatporhan eimat yah hat pateprimur pongopri.   
\s1 Jisas oh Noh hapura it masapramur it tei ma potip ohe meng oh  
\r (Matyu 20:17-19; Mak 10:32-34)  
\p
\v 31 Gahan Jisas oh orhe pinggit pisapat nathei han ihirnong ambur irarhe teinong tap tei deipat Gin gur amratin. Dir Jerusarem ap mutuhnong ruptimur. Rusa ap mutuhnong hatperhan Got oh Hanip Brer nohe boknong ma inahatipri meng oh propet ihirnong potporhan ma brak matpa meng oh gonsi nohnong inahatperhan arpin dam timdipramur.  
\v 32 Inahatperhan ma dam timdipra oh mihat timdipramur. Nohnong Juda na hat pati han bap ire bes teinong nahatiprimur. Nahatperhan ihir tang nahayao dasei meng naporiyao tumbe gut nasariyao kaw boksi niyao naham nitiprimur. Nitperhan noh haputipramur.  
\v 33 Hapur sein nitperhan bimrip oh da apris it masapramur pongopri.   
\p
\v 34 Potporhan orhe pinggit pisapat han ihir orhe ma por meng oh na dahatpari. Ama mutuh meng oh ihir da ban tahat patin ohoh pomat na dahatpari.   
\s1 Jisas oh kin kwisi hat patesuh han ohnong yah matip ohe meng oh  
\r (Matyu 20:29-34; Mak 10:46-52)  
\p
\v 35 Jerusarem ap mutuh ruperim mandap oh sus Jeriko aptei oh koriyaoh kin kwisi han tit mandap manggap tan amdapat tongnoma hanip ihirnong manio erer oh ti namdina por deip deipatgopri.  
\v 36 Deip deipatdapat Hanipyah Jisaso ire ma apriyanong oh amrama We. Hanip ma apris hapti gur de gurwi apriptio por dahandeingopri.  
\v 37 Dahamtiporhan ihir Jisas Nasaret aptei han ohsi nuhur apriptimuro potpari.  
\v 38 Potperhan oh Jisas Depit ohe mon go apris kamahara naham yah nahatinmuro por uangopri.  
\v 39 Uatporhan ohri hat saya kuuhan ihir Ai. Kin kwisi han go imatri uatipra por baso por indeingopari. Baso por imtiperhan oh ire meng na amram atnap akit orhorwi Depit ohe mon go nohnong kamahara naham yah nahatina por ut patwi hangopri.   
\p
\v 40 Ut patwi hatporhan Jisas oh sapatdapat tandeim kimiringopri. Kimiripat Ginra kin kwisi han ohnong ambur nohe pat duupnong moh poprina pongopri. Potporhan ihir ambur orhe duupnong popriperhan  
\v 41 Jisas oh Gin noh gonong ha kinnahatinoh rim go nohnong unar por dahandeingopri. Gipor dahamtiporhan oh Hanipyaha. Nohe kin mama kwi hat pat moh nayah matporhan noh kin watahatporo daham ginapot unarmur pongopri.   
\p
\v 42 Potporhan Jisas oh Go nohnong ohwi yah nahatiprohwa ma dahah ohe pe oh gorhe kinnong noh nayah deimur. Gin wataham sonmur pongopri.  
\v 43 Potporhan arpin kapkap asut orhorwi kin tandipekas rim watahangopri. Watahama Got ohnong weso pora armi mat Jisas ohe kom oh apingopri. Ihtiporhan kuuhan ihir wamara Got orhor yah dei ma hapat daham Got ohe winnong adaptuhur armi deingopari.   
\c 19  
\s1 Jisas oh Sakias er hat sapat han ohe apnong sus inpa ohe meng oh  
\p
\v 1 Jerusarem ap mutuhnong saperim Jisaso ihir Jeriko ap mutuh orhor pipari.  
\v 2 Sus wandeiyaoh ihsen erer ruumsansi han takis mani daripti han ire duuptei han Sakias oh patgopri.  
\v 3 Ama han oh Noh Jisas ohe apirnong oh wamtipora daham wandeioh oh han hatip han ihir ohoh kuuhan ruumsan ihir mandap titapat patihan oh kinhat wamtin ham  
\v 4 sakat sus Jisas oh makat apriporhan noh wamtiprohwa daham orhe aprin dason kat oh irat san rus wamat patgopri.  
\v 5 Wamat pathan Jisas oh orhe wamat pat irat duup oh kora hatnong mar wamara ohnong Sakiasa. Mon go kapkap wandona. Wandarit gin nuhur gwe apnong sus indiprohemur pongopri.  
\v 6 Potporhan oh amam isip ham kapkap kakdah wandasa Jisas ohnong ambur orhe apnong pisongopri.  
\v 7 Pisaporhan kuuhan ihir wamara Jisas oh er hat sapat han ohsi sus indiproh moh ihan Jisas orhorhe er hat sapat han ma hapat por gonsi ihir ohnong ar indeingopari.   
\p
\v 8 Imtiperhan ihir sus ap oh patin Sakias oh tandeima Jisas ohnong Hanipyaha. Gin nohe ma ihtiproh ohe meng tit napotiprohmur. Go amratin. Noh gin mama morhor norhe erer ma papat oh sama kat gon oh borop han ihirnong apriprohmur. Aprisa kat han ire erer oh noh dasuh mar gapah ham adatip ohhe ire erer ma adatip ohe kis ohwi irairnong na apriprohmur. Noh isip ruumsan mat orhorwi apriprohmur pongopri.  
\v 9 Potporhan Jisas oh Mama han ohe ma ihah moh Epraham ohe Got ohwi inahatin hatin hanwa dahasuh ohe tan hah ohoh ihan oh Epraham ohe brernapmur pora Sakias ohnong Go Epraham ohe brer hat pato rim gorhornongsi; gorhorsi tap ap pati han ihirnongsi guragure er gap oh Got oh hirmat namdam namburmur.  
\v 10 Hanip Brer noh ama ihat er da hrepnong hat pati han ihirnong ambur yah da ohe mandap teinong matporim angmat apripato rim mama angnaham nambur ohmur pongopri.   
\s1 Got ohe atamreindin da napin patin ma pomat atamreiyasi pomat na atamreiyasi hapti ohe paham meng oh  
\r (Matyu 25:14-30)  
\p
\v 11 Ihir Jisas ohe meng oh amrama Dir Jerusarem ap mutuh kakduup haya tei mah ihan Got ohe kakhan ham napapindipra tei oh kimsi orhor pitap matipra ma hapat dahatperhan Jisas oh Ihir ihat dahaya moho daham ha dahatingwe rim paham meng tit pongopri. Ma potip oh   
\p
\v 12 Kamah han tit patesuhri. Patdapat gahan oh Noh gin kakhan hatinmat meih mongnong sapramur. Saporhan kakhan nahatperhan it apris matei kakhan hat patepramur dahatipri.  
\v 13 Gidahapat sonmat oh orhe atamreipti han kathei ihirnong tap tei deipat Gin noh meih mongnong sapra ohoh ihan gur mama mani mohsi tamohoma titsi it dariptin kaput norhor apris wanahatipramur por gor kwei hayop yitir tamreim daripti ohe gor kwei oh nitat mat apdapri. Aprisa pipri.   
\p
\v 14 Kakhan hatinmat saporhan orhe ma papindipra han ihir Ohri nure kakhan hat na napapindipramur por heisup deingopari. Heisup mara kat han ihir kat han ihirnong Gin gur mameng mohsi sonmur. Ohri nure kakhan hat na napapindipramur riyahemur. Ihan ohnongri kakhan matipri potinmur por kat han ihirnong ameng ohsi kom darhengopari.   
\p
\v 15 Ihir mengsi darhetperhan ihir saperhan ire meng na amrama ohnong irairnong kakhan hat papten han deingopari. Matperhan oh iraire pati mong ohe kakhan hat paptenmat apdapri. Aprisa kakhan hat patdapat Nohe gor kwei ma nitat mat apdap han ihir gin ama ohe pe oh kinhei daripti. Gin sam wamtiporo rim tit tit mat uatipri.  
\v 16 Uatporhan ohri ma apir han ohnong Gwe kinhei darpat por dahamtiporhan oh Hanipyaha. Gwe gor kwei tit ma napingop mah noh ohsi tamohoma it kathei gor kwei titsi nadarpatmur. Gin wamtin por apingopri.  
\v 17 Por apriporhan kak hat pat han oh wamara Go yahnap hat natamreipat hanmur. Garpok moh go yah mat papat han ohoh ihan noh isip kathei ap mutuh ihirnong papten han oh gorhornong papten han nahahmur por kathei ap mutuh ihirnong papten han matipri.   
\p
\v 18-19 Imtiporhan gahan kom han oh apingopri. Aprisa Hanipyaha. Gwe gor kwei tit ma napingop mah noh ohsi tamohoma it hanen gor kwei titsi nadarpatmur. Gin wamtin por apingopri.  
\v 20 Por apriporhan kak hat pat han oh wamara ihan go hanen ap mutuh ihirnong papten han nahahmur por hanen ap mutuh ihirnong papten han matipri.   
\p
\v 21 Imtiporhan gahan tit han oh apingopri. Aprisa Hanipyaha. Go tamreindin ohe danongwi ham nuhurnong akit mengtei ngarara naporo ire erer oh sariya oh go adaro gorhe bes tei na gonom ire bes tei gonopti den oh suhum adamo hapatgwer hano rim noh kas hatipmur. Kas ham sus noh gwe gor kwei tit ma napingop mah noh watahsi ban mara naremdipmur. Pomat nareman patdapat gin ama wanin orhor it mama napopir ohmur. Gin gorhor datina por apingopri.  
\v 22 Por apriporhan kakhan oh Wa. Nohe natamreipat han go er hanmuro. Go nohnong Go akit mengtei ngarara naporo ire erer sariya oh adaro ire bes tei gonopti den oh suhum adamo hapatgwer hanmur ma napor oh arpin meng napormur.  
\v 23 Nohe ma ihat pat oh go am hat patim kianorim go Oh ihpatgwer han ohoh ihan ohe gor kwei tit moh beng wamat pati han ire bes teinong matpora. Matporhan ama ohe pe oh kaput apris titsi sa datipra na daham kianorim be nareman paptesuh. Ihan go ernap hanmur potipri.   
\p
\v 24 Pora orhe atamreipti kat han ihirnong Gin gur ohe reman paptesuh gor kwei oh dara mama kathei gor kwei matip han ohnong apinmur potipri.  
\v 25 Potporhan ihir Hanipyaha. Oh kathei gor kwei patinhe gin it titsi apripora daham apina naporpatda pongopari.  
\v 26 Potperhan oh Dawa. Ihat dahat patmur. Noh arpin meng napotiprohmur. Hanip gur erer oh pomat ma papti han gurnong oh noh titsi naprisipramur. Pomat na papti han gurnong oh noh titsi na naprisa ma marin pati han oh norhor it datipramur. Ihan apina potipri.  
\v 27 Porpat Gin ihir Oh nure kakhan hat na napaptepramur napor ma inahapti han bap ihirnong oh ambur poprinmur. Popris norhe kintei morhor sutperhan ha haputingwemur potipri. Ihtipri por Jisas oh ama ihtipa ohe paham meng oh pongopri.   
\s1 Jisas oh Jerusarem ap mutuhnong saporim sapatin amam mat pihipa ohe meng oh  
\r (Matyu 21:1-11; Mak 11:1-11; Jon 12:12-19)  
\p
\v 28 Jisas oh ama paham meng oh poro hama Jerusarem ap mutuhnong saporim ohri hangopri.  
\v 29 Ohri hama susa Orip yei ohe duup ap mutuh yot Betpassi Betanisi ama ap mutuh yot oh kakduup mara orhe pinggit pisapat han yot ihitnong  
\v 30 Gutri ap mutuhnong mandeh deyonmur. Des wandeiyaoh donki bap kopen ohe bas tongnom na kis tahat pati donki bap tit ambap dumat pati pat hatiprohmur. Pathan gut ambop arpima ambopdapat marim poprinmur.  
\v 31 Gut popriper ihaptin We. Gut kinmatper ihapti naporiyahanoh gut Es. Mohsi Hanipyah ohe tamreindin tit pato rim ambur pisaptimur potinmur pora ihitnongri darhengopri.  
\v 32 Ihitnong por darhetporhan ihit sus orhe ma por mengru orhor hatpari.   
\p
\v 33 Ihama ihit donki bap ambur pisaperim ambop arpiptin donki bap nita han oh We. Gut nohe donki bap moh kinmatperim ambop arpiptio por dahandeingopri.  
\v 34 Por dahamtiporhan ihit Es. Mohsi Hanipyah ohe tamreindin tit pato rim ambur pisaptimur potpari.  
\v 35 Pora donki bap ohnong ambura ambopdapat marim Jisas ohe patnong pihipari. Pisusa itaite tei ohe an pati watah oh daphoma Jisas orhe tongnotin teio rim donki bap ohe kom tei andeh atpari. Asara gin mohe bas tongnotina potperhan Jisas oh rus ohe bas tongnom sangopri.  
\v 36 Tongnom saporhan kuuhan ihir ohe danong ham iraire tei ohe an pati watah oh daphoma ohe bas tonggamar ha sonoh rim en mat pisangopari.   
\p
\v 37 Imat en mat pisaptin Orip yei ka oh mandama Jerusarem ap mutuhnong wayonmat Jisas orhorsi sapti kuuhan bap ihir orhe ma wandeipti na wandeipti han ma pinggit pisaporhan ire ma wandeiptinong oh dahama ruumsan kuuhan gonsi ihir amam hama kasip mengtei orhorwi Got ohnong armi mar ohe win adaptuhutpari.  
\v 38 Got ohnong armi mar ohe win ma adaptuhutpa oh  
\q1 Hanipyah Got orhe mengtei apripat kakhan moh Got orhe yah mar bapkei mat papat han apripatmuro. Gin Got oh dirsi yah han ham manap dasi nahat napapatmuro. Ihan hanip dirhe putei mahat ma pat Got ohnong armi mar ohe winnong isip mar paptepero.  
\m por amam mat pihipari.   
\p
\v 39 Imat amam mat pisaptin Parisi kat ma irair tap hat sapti ihir Jisas ohnong Tisa. Go gorhorsi tap hat sapti kuuhan maire mama imat napisapti da moh Baso por imtinmur pongopari.  
\v 40 Potperhan Jisas oh Noh arpin meng tit napotiprohmur. Got oh nohnong armi naham ha napaptengwe daham nohe basnong armi nahatin ohe da oh nahat napapat ohoh ihan noh ihirnong baso porhanoh kweio mama ihir nohnong armi nahatiprohemur pongopri.   
\s1 Jisas oh Jerusarem ap mutuh pati kuuhan ihir er hat patio rim payimatip ohe meng oh  
\p
\v 41 Ihir Jisas ohnong armi mat pisusa Jerusarem ap mutuhnong sonmat kakduup mara Jisas oh ap mutuhnong wamara mama aptei pati kuuhan ire er hat sapti ohe batbet ruumsup oh datiprio rim da er ham  
\v 42 Epo. Mama ap mutuh pati kuuhan gur gin mama pati morhor Got ohsi manap ham yah hat indin ohe da oh am hat patineng yaho. Gur da ban tahat pati ohoh ihan gur wamar na am haptimuro.  
\v 43 Ihtin dasi hat patin orhor kaput guragure mahaw han ihir apris gurnong nitinmat mong doho ham patan prusa gur tandutipririm hohyap naham ret gatnahatiprimur.  
\v 44 Ret gatnahama ap mutuh ohe doho dah ma pati kuuo hano brero guragure apo erer gonapsi nim tambor muk naham timbas nahatiprimur. Timbas nahama ap ohe kwei ma patan prus ma hatpa ap ohhe gonsi urkamat natperhan tit kwei oh tit kwei ohe boknong ham diptahathe na pat hatipramur. Inaham ma timbas nahatipri oh gur nohe ma apir moh Got oh nuhurnong napanggeitinmat apir ma hapat na dahapti ohe pe oh imat nim timbas nahatiprimur por payimangopri.   
\s1 Jisas oh Got ohe ap yawar rosa tamohopti han ihirnong darhero imtip ohe meng oh  
\r (Matyu 21:12-17; Mak 11:15-19; Jon 2:13-22)  
\p
\v 45-46 Jisas oh Jerusarem ap mutuhnong rosa Got ohe ap yawar ohe doho dahnong ohom ruhpari. Royaoh Got ohnong apin ohe apop erer oh tamohoptingopari. Tamohoptihan Jisas oh ihirnong We. Mama ap ohe boknong mar Got oh meng oh ritporhan ma brak matpa meng moh dahatinmur.  
\q1 Map moh norhe ap ohoh ihan gur mapnong moh Got orhorsiwi mengrin apmur porinmur.  
\m potporhan brak matpamur. Gin gur mama brak matpa mengru na hama map moh gur gapah ham tandur sus kwei tem tremapti ap tem hatin deiptimur por ihirnong indeingopri. Por imara tamohopti han ihirnong er mat darhengopri.   
\p
\v 47 Imaro hapat iraire ma Jerusarem ap mutuh ma aya dik oh Jisas oh dipwi Got ohe ap yawarnong rosa kuuhan ihirnong meng por am mar angopri. Am deipatin ap yawar ohe hanat bok han ire duuptei hano sawa meng am hat pati hano rotu ap ohe han pohono ihir Jisas ohnong sutpero rim sutin kat oh sa apetpari.  
\v 48 Sutin kat oh apetpa orhor sutin oh kuuhan ruumsan gonsi ihir Jisas ohe mengnong oh nat tem tanpur amrat pati ohoh ihan ire ohnong sutin kat oh ama timbas hatip oh.   
\c 20  
\s1 Jisas ohnong Go nihohe meng tei ihat tamrein sapat potpa ohe meng oh  
\r (Matyu 21:23-27; Mak 11:27-33)  
\p
\v 1 Jisas oh Got orhe ap yawar ros meng por am mar ma indip oh tit dah tit ap yawar ros kuuhan ihirnong Got orhe yah meng oh por am deingopri. Por am deipatin ap yawar ohe hanat bok han ire duuptei hano sawa meng am hat pati hano rotu ap ohe han pohono ihir apris ohe duupnong hangopari.  
\v 2 Ohe duupnong hapti Jisas ohnong Go nihohe kasip ohsi ihat sapat. Go nihohe mengtei Go ihat son naporit ihat sapat por dahandeingopari.   
\p
\v 3 Por dahamtiperhan Jisas oh Ihan nohe menghe gurnong tit dahanahatiprohmur.  
\v 4 Jon ohe tom ma patirisuh oh hanip ire mengtei tom patirisuhda da Got orhe mengtei tom patirisuh. Gur kiano dahaya. Gure dahaya meng oh gin nohnong napotinmur por dahandeingopri.  
\v 5 Por dahamtiporhan ihir Dir Jon ohe tom ma patirisuh oh Got ohe mengtei tom patirisuhmur poriyahanoh Jisas oh Ihan gur kianorim ohe mengnong amram na dindeishe napotiproh ma hapat.  
\v 6 Dir Oh hanip ire mengtei tamreim propet hat patesuhmur poriyahanoh kuuhano ihir Got orhe mengtei tom patirisuhmur dahat pati tei ohoh ihan dir hanip ire mengtei tom patirisuhmur poriyahanoh ihir kwei dara kweisi nitiprohekin. Ihan dir kian meng sa potiprohe. Ihan dir Nuhurri hanhanmur potiprohemur gosham  
\v 7 Jisas ohnong Nuhur Jon ohe ma tom patirisuh oh nihohe mengtei tom patirisuho daham nuhurri hanhan hat patimur pongopari.   
\p
\v 8 Potperhan Jisas oh Gur nohe ma dahanahah meng ohhe gur na naporiya ohoh ihan gure nohnong ma dahanahaya menghe noh Ama han ohe mengtei ihat tamrein sapatmur na napotiprohmur pongopri.   
\s1 Got orhe mengtei darhetporhan kat ihirdapat ihirnong sushe ohe paham meng oh  
\r (Matyu 21:33-46; Mak 12:1-12)  
\p
\v 9 Jisas oh giporpat kuuhan ihirnong Gin noh paham meng tit napotiprohmur. Gur amratinmur.  
\p Tit han tit wain gwe nangbar amgap saro ham patesuhri. Patdapat gahan wan meih mongnong tit saporo rim sonmat kat han ihirnong Noh wan meih mongnong saprohmur. Gin gur nohe nangbar rango mohnong gur nawamat paptenmur. Nawamat paptema kat oh gur kapom dayao mohom dayao hama norhehe kat mohom nasarinmur pora ire bes teinong mara meih mongnong pipri. Susa atei trun patesuhri.   
\p
\v 10 Patdapat gahan kapotin haya tei mah Gin kapoma yan nata ma hapat daham orhe atamreipat han ohnong Gin go susa norhe nangbar rangnong wamat napapti han ire nangbar gweo nangbar gwe mohom yan ma nasaripti yano oh ma nasaripti oh go nadar aprinmur por darhetipri. Por darhetporhan oh sus nangbar rang awamat papti han ire duup han kotporhan ihir wamara Nangbar rang nita han oh erer moh datipra daham nangbar rang nita han ohe darhetir han ohnong kawsi suma be it darhetiri hangopari.  
\v 11 Imtirihan oh it atamreipat han tit han ohnong darhetipri. Darhetporhan oh ire duup han saporhan ihir wamara ohnonghe amaru mat orhor kawsi sumo er maro mar it be darhetiri hangopari.  
\v 12 Imtirihan oh it atamreipat han tit ohnong darhetipri. Darhetporhan oh ire duup han saporhan ihir wamara sein suma da napnep patin nangbar rang doho kot dahnong ohom matiri hangopari.  
\v 13 Imtirihan nangbar rang nita han oh Epe. Norhe natamreipti han ihirnong darhetporhan indeipti moh ihan gin noh kin matiproh sa. Ihan noh norhe mon bopor mat papat brer tit pokwi mohnong darhetiprohmur. Darhetporhan ohnong norhe mono rim nohe danong ham ohe meng amram na sutiprohekin daham orhe mon ohnong darhetipri.  
\v 14 Darhetporhan oh saporhan ihir wamara He. Mama apir brer moh nangbar rang nita han ohe mon oh apir moh itap ohe nangbar rang moh ohwi datipra. Mon ohnong sum nangbar rang moh dirwi gon mar datiprimur gosham  
\v 15 Mon ohnong nangbar rang kot doho hir dahnong oh mar sein sut itpari. Indeingopari pongopri.  
\p Jisas oh paham meng oh giporpat kuuhan ihirnong Gin mama paham meng ma napor moh nangbar rang wamat pati ihir imtiperhan nangbar rang nita han oh ihirnong kinmatipra dahaya por dahandeingopri.  
\v 16 Dahamara ihir na pot patin Jisas orhordapat Nangbar rang nita han oh mimtipramur. Oh ire pati teinong it susa ihirnong sein suma wan han ihirnong Gin gur nohe nangbar rang moh gur wamar napaptenmur por wan han ire bes teinong matipramur pongopri. Potporhan kuuhan ihir amrama Es. Ohri eimatnap na ihtipramur pongopari.   
\p
\v 17 Potperhan Jisas oh ihirnong wamaro hama Gur Es. Ohri na ihtipramur riya orhor ritporhan ma brak matpa meng moh ohe mutuh ohe mengnong moh na daham giriyada. Ritporhan ma brak matpa meng oh mamaru hat patmur.  
\q1 Ap hapti han ihir ap tam moh ero rim mandatperhan ama mandatiri tam wanin orhor wan han ihir dara na mandatin tamo rim it haw mutuh tam orhor mar gonotiprimur.  
\m ritporhan brak matpamur.  
\v 18 Noh ama ap ohe haw mutuh tam hat patmur. Ihat pat han nohe danong na hapti han bap gur ap haw mutuh tam boknong tung rim tapaya hatin hapti bap gurmur. Ihat tapapti bap gur tom san ohe tan hat haptor tahatiprimur. Haptor tahatiprimura; mutuh haw tam oh wandas namkarhanoh ama namkar han bap gurnong oh tambor naham kup banwi nahatipramur pongopri.   
\p
\v 19 Potporhan sawa meng am hat pati hano Got ohe ap yawar hanat bok han ire duuptei hano ihir amrama Mama paham meng napor moh Isrer diradire boknong naham ginapor ma hapat daham ihan dir gin morhor karapus matinmat net potpera gospotpa orhor kuuhan ire kintei ohoh kas ham ama mandatpa oh.   
\s1 Jisas oh orhe boknong tasutin meng oh ha ritinoh rim takis yan ma saripti ohe meng oh dahamtipa ohe meng oh  
\r (Matyu 22:15-22; Mak 12:13-17)  
\p
\v 20 Sawa meng am hat pati hano ap yawar ohe hanat bok han ire duuptei hano ihir Jisas ohnong sutinmat kin po mat ama wamat inpa oh. Wamat patim kat han ihirnong Gur sus Jisas orhe mengnong amram dimtin ina han hatin ham orhornong tasutin ohe meng tit dahamtinmur. Dahamtiperhan oh orhe boknong tasutin ohe meng tit sa napotiproh. Napotporhan dir ambur pisusa gapman duuptei han ohe bes teinong mara oh ha karapus matinoh rim ohe bes teinong matiprimur pora kin po han ihirnong ama darhetpa oh.   
\p
\v 21 Por darhetperhan ihir Jisas ohe patnong aprisa Tisa. Nuhur gonong am hat patimur. Go kuuhan nuhurnong arpin mengwi naporpat hanmur. Go moh winsi hanhe moh win timbas hanhe daham meng na naporpat hanmur. Got ohe yah meng oh pomat orhorwi naporpat hanmur.  
\v 22 Ihat pat han gwe da oh kiano dahah. Rom ire gapman Sisa ohnong takis yan ma apripti oh Moses ohe sawa meng ohe tei imat aprishenmur ritipda da na giritip por dahandeingopari.   
\p
\v 23 Por dahamtiperhan Jisas oh Norhe boknong tasutin ohe meng ha ritinoh rim mihtin meng moh napor dahanahaya ma hapat daham am hapat ihirnong  
\v 24 Wa. Gin gur mani tan tit dar pitap teinong matina potporhan ihir arpin dar pitap teinong deingopari. Pitap teinong matperhan oh Gin mani mohnong wamtina. Wamara rumkin moh nihohe rumkin pathe. Winhe nihohe win pathe. Gin gur wamara ritina pongopri.  
\v 25 Potporhan ihir Mohra Rom ire gapman Sisa ohe rumkino wino mam pat ohwa pongopari. Potperhan oh Ihan Sisa ohe rumkino wino oh pathanhe Rom gapman ohe ma hapat daham it orhornong asarinmur. Got ohe erer ma apapti ohhe orhornongwi aprishenmur pongopri.   
\p
\v 26 Imat dakuu mengwi ritporhan ire orhe boknong tasutin meng ha ritinoh rim ma dahandeiya oh kuuhan ire kintei orhe boknong matin meng oh er hat na mengingopri. Ihtiporhan ihir Epe. Dakuu mengwi ripat moh dir kinmat ohe boknong meng matiprohe daham da tupnet rim kimirit mandangopari.   
\s1 Sadyusi ihir Jisas oh Haputpa han ihir na masaprimur ha ritinoh rim dahamtipa ohe meng oh  
\r (Matyu 22:23-33; Mak 12:18-27)  
\p
\v 27 Gahan Sadyusi ihir Hanip haputporhan it da na tarpam na masaptimur ripti han bap ihir Jisas ohnong meng dahamtinmat orhe patnong apingopari.  
\v 28 Aprisa Jisas ohnong Tisa. Moses ohe brak natip meng oh tit mamaru mat brak mar natipmur. Han tit kopen kuu dara inap uh brer timbas patin imap oh hapurhanoh ohe tahem oh arwap go dara ama haputir han ohe puhsi ha hatinoh rim datinmur rim brak mar natipmur.  
\v 29 Moses oh girim brak mat natip ohoh ihan nuhur dahatin ohe paham meng tit dahanahatiprohemur.  
\p Han beshei han nanggamder moh patesheri. Patimdapat nanip oh kuu dara inap uh brer timbas hat patin hapungopri.  
\v 30 Haputporhan arwap oh it tahem datipri. Dat patin gahan uh brer timbas hat patin orhor oh hapungopri.  
\v 31 Haputporhan gahan mutuh tah oh datipri. Dat patin inap uh brer timbas hat patin orhor oh hapungopri. Ihat orhorwi saptin gahan kom pepe han oh datipri. Dara uh brer timbas patin orhor ohhe hapungopri.  
\v 32 Haputporhan gahan uhhe hapungopri. Ihangopri pongopari.  
\v 33 Pora Gin kuu mauh beshei han maihirnong gonsi ma datip oh kaput hanip da ma it masas patepri tei oh ama beshei han maihir de han oh eimat dat patepra por dahandeingopari. Ma dahamtipa oh it masas patimur ma ripti mengnong oh dasei mar ihat mengingopari.   
\p
\v 34 Por dahamtiperhan Jisas oh Epe. Gur pomat na daham ihat dahanahayada. Gin kakdah moh patim haputin inasi hat pati ohoh ihan puhsi ha hatingwe rim kuuhan gosdariptimur.  
\v 35-36 Got oh Maihir kaput masas nohsi paten inasi hat patimur daham papat ihiroh it masas ma patepri oh it na hapura Got ohsi pati bap enser ihir hatin ham na hapur dipwi patepri ohoh ihan na gosdatiprimur. Na gosdar Got orhor pamsasa orhe brer mat paptepra ohoh ihan na gosdara be eimat orhe brer hat pateprimur.   
\p
\v 37 Gur Moses oh hapuripti han ihir da na masaprimur dahasuh ma hapat dahapri. Oh irat bek san has hapatin wamar ma brak matip oh hapuripti han ihir it masapriwa ma dahapat ohe da oh namgim brak matipmur. Namgim ma brak matip meng oh Hanipyah Got ohnong Go Eprahamo Aisako Jekopo ire Gotmur por brak matipmur. Ma brak matip oh haputpa tei orhor ire da oh na hapura patio rim Go ire Gotmur por brak matipmur.  
\v 38 Got oh hapur da timbas hapti han ire Got hat patda. Basra. Got oh hapur sus da pati han ire Gotmur. Got oh hanip dir haputperhan ire da oh na timbas ham patiwa dahapat ohoh ihan oh da pati han ire Got hat patmur pongopri.   
\p
\v 39 Potporhan sawa meng am hat pati han kat han ihir amrama Tisa. Gwe ma por oh yahnap mat pormur pongopari.  
\v 40 Pora kuuhan ihir dasi mengwi naporpat moh ihan it ohnong da aban matin ohe meng oh de meng oh dahamtiperhan oh da ban taham orhe boknong tasutin ohe meng oh ritiproh daham kas ham it ti na dahandeingopari.   
\s1 Namburin han Krais oh ohri patin Depit oh Norhe Hanipyahmur por brak matip ohe meng oh  
\r (Matyu 22:41-46; Mak 12:35-37)  
\p
\v 41 Jisas oh Gur Got oh Krais namburin han ma kis mat pat han oh Depit ohe puh ihir tarpatipramur ma ripti oh kinhat it tarpam Depit ohe puh hatiproh.  
\v 42 Depit ohe ma brak matip meng ban oh tit meng oh Krais ohri hat patin Depit oh ohe danong ham brak matipmur. Ihat daham ma brak matip oh mamaru hat patmur.  
\q1 Diradire Hanipyah Got ohdapat norhe Hanipyah ohnong Go norhe bes oper tan moh tongnotinmur.  
\v 43 Tongnot patin noh gorhe mahaw nahatin han ihirnong gorhe hrepnong namtipramur.  
\m gipor Depit oh brak matipmur.  
\v 44 Depit orhor imat Krais ohnong Norhe Hanipyahmur ma potip oh ohri hat pat hano rim Norhe Hanipyahmur potipmur. Ihan gin kinhat it orhe puh hatporhan oh Depit ohe puhmur potiprohe pongopri.   
\s1 Jisas oh Sawa meng napor am nahapti han ire ihat sapti da oh gur inin hat patenmur potip ohe meng oh  
\r (Matyu 23:1-36; Mak 12:38-40; Ruk 11:37-54)  
\p
\v 45 Kuuhan gonsi ihir Jisas ohe meng amrat patin Jisas oh orhe pinggit pisapat han ihirnong  
\v 46 Gur sawa meng napor am nahapti han ire ma ihapti oh Nuhursi inahatipri daham inin hat patenmur. Ihir ire danong ham yahnap watah dapsi dap oh ara kuuhan ire kintei sayao tamohopti teinong saperhan kuuhan ihir Nure hanipyaha ha napotingwe daham sayao rotu aphe iraire pohon tongnopti yah ka ohwi tongnotpera dahayao den tarmur dapti teinong oh tamsi kat yahwi ha namdengwe daham sayao ihat iraire danongwi ham sapti han bap ihirmur. Ihan ire ma ihapti ohe da oh nuhurri ihtin han hatiprio daham inin hat patenmur.   
\p
\v 47 Ama han ihir tit ma ihapti oh kuu tahem ihirnong Got ohnong apin oh titsi apinmur por be dasuh mar ire erer adar bisei deiptimur. Got ohsi mengritperimhe Kuuhan ihir amrama Maihir Got ohsi yahnap han hat pati ma hapat ha dahatingwe rim meng dapsi dapsiwi pramat pisaptimur. Ihir sawa meng am hat patimdapat orhor imat er hat son ohe da oh namgipti ohoh ihan ama ihapti han bap ihirnong Got oh Gur ernap han bapmuro por batbet isipnap apripra han bap ihirmur pongopri.   
\c 21  
\s1 Kuu tahem uhe ihsen oh Got ohnong apdap ohe meng oh  
\r (Mak 12:41-44)  
\p
\v 1 Jisas oh Got ohe ap yawar ros meng poro hapat watahahoh kamah han bap ihir Got ohnong mani apripti san temnong oh isip mat orhor ihsen sariptingopari.  
\v 2 Itperhan kuu ihsen timbas bisei kuu tahem tit aprisa sup tan gar yot tit saringopri.  
\v 3-4 Itporhan Jisas oh wamara kuuhan ihirnong Noh arpin meng napotiprohmur. Kamah han bap ihir ihsen ruumsan sariya orhor ruumsan kat mandaya ohoh ihan ire ma sariya oh gar hatin mat sariyamur. Mama kuu tahem uhe ma sar oh hatip hat pat orhor urhe ma garpok marin pat oh komdapat urhe mohot din ohe danong na ham gonapsi sar ohoh ihan urhe ma sar oh isip mat hatin sarmur. Ire ma sariya oh garpok hatin mat sariyamur pongopri.   
\s1 Jisas oh Got orhe ap yawarnong urkamat itiprimur potip ohe meng oh  
\r (Matyu 24:1-2; Mak 13:1-2)  
\p
\v 5 Jisas oh Got orhe ap yawar ohe duup oh patin kat han ihir Ap yawar moh wamtin. Kwei dara kwei ap hapti yahnap kweisi awat matpa moho. Ma awat matpa oh kuuhan ire Moh Got orhemur rim yahnap han erer oh orhornong ma apriya ohsi awat matpa moho gosham hagoshatpari. Hagoshatperhan Jisas oh  
\v 6 Gure wamar ma hadeiya moh kaput mahaw ihir apris urkamat itiprimur. Urkamat itperhan oktahat wandasa tit kwei oh tit kwei ohe boknong diptahat na pat hatipramur pongopri.   
\s1 Pepe dik na hat patin ina ruumsup ohri aprisipramur potip ohe meng oh  
\r (Matyu 24:3-14; Mak 13:3-13)  
\p
\v 7 Jisas oh Got orhe ap yawar moh kaput urkamat itiprimur potporhan ihir Tisa. Ap yawar urkamat itiprimur ma ri oh desut urkamat itipri napotina. Kian han kis ohri tarpatporhan nuhur wamara Ap yawar urkamat ma itipri oh gin kakduup hah ma hapat daham am hatipri. Go nuhurnong napotina por dahamtipari.   
\p
\v 8 Gipor dahamtiperhan Jisas oh Trun han ihir nohe win paham apris Gure Krais oh apripramur rim ma minhan pati han oh gin noh mama apir ohmur napor dasuh nahat aprisipri ohoh ihan gurnong dasuh nahatipririm inin hat patenmur. Ama ihir apris pepe dik oh tarpatipramur ma ripti oh gin tarpatin oh kakduup hahmuro napor dasuh nahat aprisipri ohoh ihan gur ire ma naporiya meng oh arpinhe daham amram dimtipririm gurri inin hat patenmur.   
\p
\v 9 Kat han ihirdapat aprisa Ihir gusuptimur. Ihir wan gapman ha hatinoh daham gapman hat pati ihirnong mahaw mar suptimur rit apriperhan gur amram kas hapri. Ama ihtin sup ohri tarpat aprisipra ma hapat. Pepe dik oh kopen kakduup na hat patin ihat sapat ma hapat daham gurri kas hapririm watahpei ham kasip hat orhor patenmur pongopri.   
\p
\v 10 Porpat ihirnong Tit ma tarpat sasipra oh tit mong tei ma pati han ihir wan mong tei ma pati han ihirsi mahaw gosham gusutiprimur. Tit mong kakhan ohe papat han ihir wan mong kakhan ohe papat han ihirsi mahaw gosham gusutiprimur.  
\v 11 Bipi isip isipnap apiro ake erwip sup apiro tihatin ina ruumsup mong mong moh gonsi apiro hat aprisipramur. Aw tei mahathe pepe dik ohe tarpatin ohe kis oh wandeipti na wandeipti wanohe kassi nahatin ohe kis oh tarpatporhan wandeiprimur.   
\p
\v 12 Ihtin sup oh tarpat sasipra orhor ama ihtin sup oh na tarpat patin orhor kat han ihir gurnong net napor er naham batbet ina ruumsup nahaprimur. Nahama rotu apnong napisus Moh er hanmur napor ha karapus nahatingwe rim rotu ap wamat pati han ire bes teinong nahaprimur. Nahama Maihir Jisas orhe han hat patio rim kak hat pati hano gapman hat pati hano ire duupnong nahaprimur.  
\v 13 Ire duupnong nahatperhan gur norhe yah meng oh ihirnong potin kat oh pat hatipramur.  
\v 14 Ihir gurnong dahanahatin teinong na napihim patin orhor gur Ihir nohnong dahanahatinmat dahanahatin teinong napisayahanoh noh kian meng sa potiproh dahapri. Na daham be kimirim orhor sashenmur.  
\v 15 Gurnong ire duupnong napisayahanoh ama napisaya tei orhor noh gurnong dakuu dasi naham daham yahnap meng potin ohe meng oh gure atem tei rit natipramur. Rit natporhan ama meng oh gur ihirnong potperhan ihir gure meng oh sakarap naham na namkatiprimur. Inahatipra ohoh ihan gur Nuhurnong napisayahanoh nuhur kian meng sa potipri na dahat patimdapat orhor napisayahanoh sonmur.   
\p
\v 16 Be han ihirwi gurnong na inahaprimur. Guragure suanir itaniro guragure taptemo guragur tap bapo guragure yah hano ihirhe gurnong Moh Jisas orhe nita han hat patio rim nang ham mahaw ire bes teinong nahaprimur. Nahatperhan ihir kat gurnong karapus nahayao nitperhan hapuriyao haprimur.  
\v 17 Kuuhan bap ihirhe gonsi ihir gurnong Maihir Jisas orhe nita hat patim ihat saptio napor heisup nahat napapteprimur.  
\v 18 Inahat napisasipri orhor Got oh kak bat garnong oh na er matipri daham yah mat orhor wanahat napapat ohoh ihan danong atnap na er matiprimur daham wanahat napapatmur.  
\v 19 Inahat napisaperhan Got oh yah mat napapat ohoh ihan kasip hat orhorwi patenmur. Ihat patimdapat eimat yah hat paten ohe da oh datiprimur pongopri.   
\s1 Got orhe heisup mat papat da oh Juda mong ma pati bap ihirnong batbet apripramur potip ohe meng oh  
\r (Matyu 24:15-21; Mak 13:14-19)  
\p
\v 20 Jisas oh ameng oh porpat ihirnong Gur wandeiyaoh ami bap ihir apris Jerusarem ap mutuhnong moh parper mat patihanoh Gin Jerusarem ap mutuhnong moh urkamar timbas matinmat kakduup haya ma hapat daham am hatiprimur.  
\v 21-22 Jerusarem ap mutuhnong urkamar ma timbas matipri oh Got oh ihirnong heisup mat ma papat da oh rih orhor propet ire atem tei Noh ihirnong heisup mat papat ohoh ihan ihirnong imat apsi urkamar sutipramur ritporhan ma brak deishe meng oh gin dam ha tarpatinoh rim orhe heisup mat ma papat da oh pitap mar pinggitipramur. Imtipra ohoh ihan Judia mong ma pati gur yei dusnong tandutinmur. Jerusarem ap mutuh ma pati gurhe mandam wan apteinong kapkap tandut sonmur. Kot dah ma pati gurhe it ap mutuhnong sapri. Kot dah patimdapat orhor wannong tandut sonmur.  
\v 23 Ama Jerusarem ap mutuhnong ma imtipra oh Got orhe heisup mat papat da ohsi mama Judia mong mong mama pati kuuhan bap ihirnong ina ruumsup isip tit amkatipramur. Imat isip tit amkatipra ohoh ihan brer akesi pati kuuo brer non pandepti kuuo ihir ina ruumsupsi hat pati ohoh wannong kinhat kapkap tandut son hatipri ohoh ihan ama ihat pati kuu bap ihir hinhinsi baprano.  
\v 24 Mama Judia mong mong mama pati kuuhan bap ihirnong ina ruumsup amkar ma sutipra oh kat han ihirnong biorsi sutperhan or wandaprimur. Kat han ihirnong tapmar pisus wan han bap ire hrepnong mar papteprimur. Jerusarem ap mutuhnong oh Juda na hat pati han bap ihir ire hrepnong mar tonggamar er mat paptin Got oh Gin kiwa dahatporhan timbas hatipramur pongopri.   
\s1 Hanip Brer nohe ma apripra dik oh tihan tihan kis ohri tarpatporhan noh apripramur potip ohe meng oh  
\r (Matyu 24:29-31; Mak 13:24-27)  
\p
\v 25 Jisas oh Gin pepe dik kakduup hah ma hapat dahatin ohe kis oh atano hayopo merumo ire boknong oh ti han ti han kis oh tarparit wamtiprimur. Mong kakdah mohhe sor tom hru akitwi kura tom kopi oh gurir mat us apir hapatru hatporhan kuuhan ihir wamara Moh kinhah sa gosham kas isipnap hatiprimur.  
\v 26 Ihama aw tei mahat merumo erer ma pati ihirnonghe ungang matporhan kuuhan ihir wamara Epe. Kakdah moh er nahatin han tit tarpatiprohkin daham kas isip tit hama kin parper ham or wandaprimur.  
\v 27 Ihat mandatperhan gur wanahayaoh Hanip Brer noh wanohe kasipo haso ohsi rian tap wanpatin gur wanahatiprimur.  
\v 28 Ihat apripra ohoh ihan nohe ma napor han erer oh tarpatporhan gur Got orhor nambur yah mat napaptepra dik oh gin tarpatinmat ihah ma hapat daham noh apripatin oh gur wanahatinmat hatnong mat wanahat patinmur pongopri.   
\s1 Got ohe napapindin oh Gin kakduup hah ma hapat ha dahatingwe rim iratnong kis mar potip ohe meng oh  
\r (Matyu 24:32-35; Mak 13:28-31)  
\p
\v 29 Jisas oh Gin noh dahatin ohe meng tit napotiprohmur. Irat gasam rino oh dahatinmur.  
\v 30 Ama irat rin oh papor hatporhan gur wamar Gin pohon apiap hah ma hapat daham am haptimur.  
\v 31 Amaru hat orhor nohe ma ihat tarpatipramur ma napor meng oh tarparit gur wamara Gin Got oh dirnong orhe hrepnong naham napapindin dik kakduup hah ma hapat dahatiprimur.   
\p
\v 32 Noh arpin meng napotiprohmur. Mama Juda bap gur na timbas hat patin orhor nohe ma napor meng muk moh gonsi tarpatipramur.  
\v 33 Aw tan mong tan moh gonsi timbas hatipramur. Nohe ma naporpat meng moh gonsi dam timdin meng ohoh ihan na timbas hama arpin dam timapramur pongopri.   
\s1 Jisas oh gur da ban tahat patim noh apriprarim kinkin da hat orhorwi wanahat patenmur potip ohe meng oh  
\p
\v 34 Jisas oh We. Gur tarmur den ruumsan din ohe danongwi hayao er tom dam da ban tahatin ohe danongwi hayao noh kinhat indipra sa daham da trun trun darhet son ohe danongwi hayao hat sasipri. Ihat son ohe danongwi ham Oh apriprohkin na daham da hut patin noh aprisa gurnong buporinsi nahatipra ohoh ihan gur ama ohe danongwi ham da hutwi sasipri.  
\v 35 Nohe ma apripra oh aw pe mong pe mong mong moh gonapsi apripra ohoh ihan gur Oh mateinong na apriprakin daham da huthe sasipri.  
\v 36 Oh gin apriprohkin daham kinkin dahat orhorwi wanahat patenmur. Ihat orhorwi patim er nahatin sup oh apris gure boknong naham ambapte nahatiprarim gur Got ohnong At Got go er nahatin sup oh apriporhan ambapte matin ohe kasip ohsi kasip nahat napaptenmur. Kasip nahat napapatin Hanip Brer orhor ma apripra tei oh kasip ham orhe kintei tandeitiprimur por dipwi guragur dahamar paptenmur pongopri.   
\p
\v 37 Jisas oh Jerusarem ap mutuhnong rus ma indip oh mong da oh Got orhe ap yawar ros kuuhan ihirnong meng por am deingopri. Kwihan oh sus Orip yei ka ohwi timam angopri.  
\v 38 Mong da hatporhan kutkutwi orhor kuuhan ihir Jisas ohe meng amratperim Got orhe ap yawarnong oh apriperhan oh meng por am deingopri.   
\c 22  
\s1 Judas oh Jisas ohnong sutin ohe nang han hatip ohe meng oh  
\r (Matyu 26:1-5,14-16; Mak 14:1-2,10-11; Jon 11:45-53)  
\p
\v 1 Gahan Pasopa dik Isrer ire Isip mong mandam iraire mong Kenannong saperim bret pipirpat han timbas be dipa ohe dik oh ama kakduup hatip oh.  
\v 2 Kakduup hah tei hanat bok han ire duuptei hano sawa meng am hat pati hano ihir Kuuhan maihir Jisas ohe danong hat pati moh dir ire kintei moh kinmat sutiprohe daham kuuhan ihirnong kasa ham Ihan dir ahar sutpera daham ahar sutin kat oh ama angmatpa oh.  
\v 3 Sutin kat oh angmar aperiptin er da nahapat han Satan oh Jisas orhe pinggit pisapat han nathei ihir Judas Iskariot ohe da mutuhnong ros Jisas ohnong mahaw mar sutin da matporhan  
\v 4 oh sus hanat bok han ire duuptei hano Got ohe ap yawarnong er matipririm wamat papti hano ire patinong ama pip oh. Sus ihirnong Noh gurnong napisus Jisas ohnong imat namgitipramur por ihirsi tap meng wanin mar ama nang hatip oh.  
\v 5 Imat namgitipramur potporhan ihir amam yahnap hama Ihan gononghe nuhur mimat yan napriprimur ama potpa oh.  
\v 6 Potperhan Judas oh ire ma poriya meng oh yahwa porpat susa Noh kuuhan ihir ruumsan ohe tap na patim noh Jisas ohnong mahaw ire bes teinong matiprawa daham kin po mat ama wamat indip oh.   
\s1 Jisas oh Pitasi Jon ihitnong Pasopa deno rim din oh Gut mamen deiptinmur por darhetip ohe meng oh  
\r (Matyu 26:17-25; Mak 14:12-21; Jon 13:21-30)  
\p
\v 7 Gahan bret pipirpat han timbas dipa ohe dik oh hatporhan Gin ama dik oh hah ma hapat. Gin Pasopa den dinmat sipsip bap sum mamen tahapti dik oh gin ihaya ma hapat daham  
\v 8 Jisas oh Pitasi Jon ihitnong Gin direhe gut sus den din oh mamen matinmur pongopri.  
\v 9 Potporhan ihit Nuhut sus den din ohe ap oh de ap oh sus ha mamen matingwe dahah por dahamtipari.   
\p
\v 10 Por dahamtiperhan oh Gut ap mutuhnong ham royaoh han tit tom san yohom marim apripat hatiprohmur. Apripathan gut ohe kom oh susa oh ap tit rohan guthe ama ro ap oh ronmur.  
\v 11 Rosa ama ap nita han ohnong Go nure namgipat han orhe han nuhursi; orhorsi de dah Pasopa deno rim ha dingwe dahahri por dahamtinmur.  
\v 12 Por dahamtiperhan oh ap tan isip tei dah ruh den ohe tei saro tongnopti teio oh patsi dah ruh namgitiprohmur. Namgitporhan gut adah oh Pasopa deno rim diradire din oh adah oh mamen deiptinmur por darhengopri.  
\v 13 Por darhetporhan ihit sus orhe ma por mengru mat orhor Pasopa deno rim din oh mamen matpari.   
\s1 Jisas oh orhe ina heim kis mar den pandip ohe meng oh  
\r (Matyu 26:26-30; Mak 14:22-26; 1 Korin 11:23-25)  
\p
\v 14 Ihat Pasopa den mamen mat mandapti patin atan waporhan Gin Pasopa deno rim din dik oh hah ma hapat gosham Jisas oh orhe pinggit pisapat nathei han ihirsi den dinmat den din apnong ros iraire den din duup oh tongnotpari.  
\v 15 Tongnoma Jisas oh Noh ina tei batbet ma datipra oh na dat patin orhor gur tapri Pasopa deno rim diprineng dahat patesuhmur. Ama da oh isip hat patmur.  
\v 16 Noh arpin meng napotiprohmur. Pasopa deno rim ma dapti moh noh gin pepe demur. Kimsinong oh noh na dapatru patin kaput Got orhe hrepnong naham napaptepra tei oh Got oh yah mat napapteprawa daham mama kis mar Pasopa deno rim dapti moh arpinnap tarpatporhan noh ama den oh it dipramur pongopri.   
\p
\v 17 Pora irat gwe tom gap san oh dara Got ohnong weso pora Gin gur moh tit uh dama tit uh tit uh hat sonmur por apingopri.  
\v 18 Aprisa Noh arpin meng napotiprohmur. Noh mama irat gwe gap tom oh na dam patru patin kaput Got orhe hrepnong mara yah mat ma napaptepra oh pitap matporhan noh it dipramur pongopri.   
\p
\v 19 Giporpat den tit dara Got ohnong weso pora brisbras pora ihirnong Moh norhe ina bokmur. Gure gwemat norhe ina boknong batbet datiprawa daham norhe ina bok moh kis mar gurnong namdemur. Kaput gure mamaru mat ma dapri oh norhe danong ham denmur por nitat mar apriporhan ihir dipari.  
\v 20 Dama den oh dapti Jisas oh den ma panderu mat orhor irat gwe tom gap san oh dara Moh norhe heim ohmur. Norhe heim ohsi gure er gap nahirmar nadurketipramur. Ama inahatipra heim ohsi Got oh gurnong yah nahat napaptepra ohe meng oh kopenohe meng deimur pora irat gwe tom gap san oh kumet kak ohe tan kak mar apingopri.  
\v 21 Aprisa Gin gur sa dahaya. Norhe nang han ohhe diradir tap ham tongnom den mama dapti ohmur.  
\v 22 Hanip Brer noh Got orhe Nohe brer oh ihat sa haputipra dahat patru hat haputipra orhor Hanip Brer nohnong nang ham mahaw han ire bes teinong nahatipra han oh batbet isip dara hinhinsi han hatipramur pongopri.  
\v 23 Gipotporhan ihir ohe Guragur tit han tit nohnong nang ham mahaw han ire bes teinong nahatipramur ma napor meng moh de han ohe boknong mar ginapor gosham irair dahanggoshatpari.   
\s1 Nohri han ham winsi han hat patmur goshatperhan Jisas oh potip ohe meng oh  
\p
\v 24 Jisaso ihir den damo hama orhe pinggit pisapat nathei han ihir iraire winnong daptuhutinmat Hanip ihir ohri han hat patim winsi han hat patmur ma naporipti oh nohnong ginaporiptimur. Tit han oh Es. Nohnong ginaporiptimur irair gonsi ihir gigosham sakarap goshatpari.   
\p
\v 25 Gigosham sakarap goshatperhan Jisas oh Gur Got orhe kintei winsi yahnap han hatper dahayahanoh mamengnong moh dahatinmur. Kakdah mohe kak hat pati han ihir winsi han hatinmat hanip ire poriya mengnong na amram nure danongwi ha dinahengwe daham kasip mengtei orhor hanip ihirnong ire hrepnong mar paptimur. Imat paptim nuhurnongwi nure napapat yah hana ha naporingwe dahaptimur.   
\p
\v 26 Oh kakdah mong mohe kakhan ihir Noh winsi han hat patwa daham ihaptimura; gurnong oh ama ire ihapti ohe tanhe hapri. Gur Got ohe kintei Nohri han ham winsi han hatpora dahayahanoh go be win timbas han hatin hat patenmur. Duuptei han hat patepor dahayahanoh ire hrepnong ham ire danong ham ire atamrein han hat patenmur. Ama ihat pati han gurri Got orhe kintei oh winsi duuptei han hat patimur.  
\v 27 Han yot han tit tongnom den dapat hansi; kan mat apopris asarpat han ihitnong dahatinmur. Gure ama ihat pati han yot ihitnong ma dahapti oh de han oh ohri han ham winsi han hat pat. Tongnom den dapat han oh ohri han ham winsi han hat patda da den kan mar apopris asarpat han oh winsi han hat pat. Basra. Gure ma dahapti oh tongnom den dapat han oh ohri han ham winsi han hat patmur. Ihtin orhor noh Got ohe kintei nohri han ham winsi han hat ma pat oh gure hrepdapat hat patim gurnong napanggein han hat pat han ohmur. Gurhe nohe ma ihat pat ohe tan hat orhor patenmur.   
\p
\v 28 Gin tit meng tit napotiprohmur. Er han oh nohnong er hat ha sonoh rim nohnong kis nahasuhru ma kis nahapat oh gur nohnong na namdama nohsi patesheru nohsi mama pati ohmur.  
\v 29 Gur nohsi ihat patio rim norhe at ohdapat nohnong Go ire kakhan ham ihirnong paptenmur napotporhan noh gure kakhan ham gurnong ma napapatru nohdapathe gurnong Gur ire kakhan ham ihirnong paptenmur napotporhan gur ire kakhan ham ihirnong papteprimur.  
\v 30 Ma paptepri oh nohe kakhan ham ma papat tei oh gursi nohsi tap hat tongnoma den damo tom damo ham diradir tap hat ihirnong papindin han hatiprimur. Hama gur kakhan ire tongnom ma papti ap tan tei oh gur nitat tongnotiprimur. Tongnoma Isrer ohe mon nathei bap ire puh ihirnong samo dahamaro meng poro mar papteprimur pongopri.   
\s1 Jisas oh Pita ohnong Go gorhe boknong kas ham nohe winnong yitir dah naremdiprohmur potip ohe meng oh  
\r (Matyu 26:31-35; Mak 14:27-31; Jon 13:36-38)  
\p
\v 31 Jisas oh ameng oh gipor mandapat Saimon Pita ohnong Nohan Saimon go amratinmur. Satan oh Got ohnong Maihir Got gonong namdatin han hatiprohedo da na namdatin han hatiproheo rim noh ihirnong kis matiprohmur potporhan Got oh Yahwa. Kis matina potporhan kis nahatpor ihah ohoh ihan go kasip hatinmur.  
\v 32 Satan oh gonong kis nahatpor ihah ohoh ihan noh go nohe danong hat sapat ohe da oh mandatipra rim noh Got ohnong naporpatmur. Imat naporpat ohoh ihan gwe er da tit ma hatiproh da oh mandama it norhe danong hatiprohmur. Hama gorhe taptem ihirnong norhe danong hat pati ohe da oh kasip mat pisashenmur pongopri.   
\p
\v 33 Potporhan Pita oh Wa. Hanipyaha. Noh gonong namdatin handa. Ihir gonong nitperim nambur napisayahanhe nohhe gosi sus ditadit tap hat karapus hayao gonong nitperhanhe nohhe gosi ditadit tap hat hapuriyao hatiprohewa dahat patmur potipri.   
\p
\v 34 Potporhan Jisas oh Noh gonong arpin meng napotiprohmur. Mama kwitem morhor kakaruk oh kopen na mengit patin orhor go gorhe boknong kas ham nohe win oh yitir dah naremdiprohmur pongopri.   
\s1 Jisas oh Noh rih oh gurnong Be sonmur napotipmura; ginnong oh Erersi sonmur napormur potip ohe meng oh  
\p
\v 35 Giporpat Jisas oh Noh rih gurnong ma nadarhengop mah Gur manio ungo tong apo ohsi na sus be sonmur napor ma nadarhengop mah gahan gur sus ererhe ti hatip hatpada por dahandeingopri. Por dahamtiporhan ihir Oho. Nuhur erer oh gonsi tit han tit na hatip hatpamur potpari.   
\p
\v 36 Potperhan Jisas oh Noh ihat nadarhetporhan gur erer oh na hatip hatpa orhor ginnong oh mani mit patihanhe datinmur. Mandap pison ohe ung pathanhe datinmur. Bior oh marim son oh tit na pathanhe guragure tei ohe watah oh wan ihirsi mani mohoma ama mani ohsi bior marim son ohe mohotinmur.  
\v 37 Noh arpin meng napotiprohmur. Nohe boknong naham ma brak matpa meng oh mamaru hat patmur. Ihir Moh er hat sapat hanmur pora er hat sapti han ire tapnong matiprimur napor brak matpamur. Napor ma brak matpa meng oh arpin gonsi dam tarpatin meng ohoh ihan ihir Moh er hat sapat hanmur por er hat sapti han ire tapnong matiprimur napor ma brak matpa meng oh arpin dam tarpatiprohmur. Ihan erer oh marim sonmur napormur pongopri.   
\p
\v 38 Potporhan ihir Hanipyaha. Nuhur bior yot mama pat ohwa por pinggitpari. Pinggitperhan oh Gur nohe meng napotporhan gur na dahaya ohoh ihan meng oh kiwa. Mandayamur pongopri.   
\s1 Jisas oh ina ruumsup dara itap ohnong dahamtip ohe meng oh  
\r (Matyu 26:36-46; Mak 14:32-42)  
\p
\v 39 Ama meng oh giporo hama Jisas oh orhe pinggit pisapat han ihirsi kot teinong rosa Jisas orhe timdinmat Orip yeinong sapatru hat orhor pipari.  
\v 40 Susa Orip yei duup orhe sapora daham ma us tei hat hapti ihirnong Er nahapat han oh apris er hat ha songwe rim kis nahatiprarim gurri Got ohnong dahamar indinmur pongopri.  
\v 41 Pora Jisas oh hanip dire kwei tahe potperhan ma wanpat ohe kis oh hapat orhe teinong sus katin takir tongnoma itap ohnong  
\v 42 Ata. Kuuhan maihirnong ire er gap oh ahirmara ambutin mandap oh wan katdapathe ambutin kat tit pathanohri nohri ina ruumsup dar na haputiprohmur dahapatmur. Ihan ire er gap ohe ina ruumsup nohe boknong namkat pat moh ha timbas hatinoh rim dat namdatinmur dahapatmur. Ihat dahapat orhor ire er gap oh ahirmar ambutin kat oh norhe boknongwi hat pathanoh nohe ma dahapat danong oh nahatipra. Gorhe ma dahapat danong ohwi nahatinmur por sa dahamtipri.   
\p
\v 43 Por dahamtiporhan Got ohe meng pisaya popriya hapti han enser ihir tit han oh aw tei mahatdapat wandasa Jisas ohe danong ama akasip matip oh.  
\v 44 Akasip matporhan Jisas oh ina ruumsup oh amkat patin ohoh ihan da isipnap tit heimse rit patin orhor itap ohnong yimat ama dahamtip oh. Imat dahandeipatin arpup ma mara oh heim orhor hatin hat maras tanduket kakdahnong ama wanhup oh.   
\p
\v 45 Iham itap ohsi mengrim timbas hapat tandeima orhe pinggit pisapat han ire patinong apingopri. Ihir Jisas oh ina ruumsup dat pato rim ihirhe da er ham kin timdin ina ham timon patin oh apingopri.  
\v 46 Aprisa We. Gur beten ham tei na patim timon patida. Gin masonmur. Masasa er nahapat han oh apris er hat ha songwe rim kis nahatiprarim Got oh ha kasip nahatinoh rim dahamtinmur pongopri.   
\s1 Judas oh Jisas ohnong mahaw han ire bes teinong matip ohe meng oh  
\r (Matyu 26:47-56; Mak 14:43-50; Jon 18:3-11)  
\p
\v 47 Jisas oh ameng oh porpatin Judas oh Jisas orhe papat nathei han irair nat han Judas oh ruumsan han ihirnong ambur popingopri. Ambur poprisa Jisas ohnong ga tam hrepdapat amam matinmat ohe duupnong hat apingopri.  
\v 48 Ihat apriporhan Jisas oh Judas go nohnong ga tam hrepdapat amam nahatporim ma apir oh Jisas ma poripti han oh mama han oh ma hapat ha dahatingwe rim Hanip Brer nohnong mahaw ire bes teinong nahatinmat ihat apirda pongopri.   
\p
\v 49 Potporhan orhorsi sapti han ihir Ohnong ambur sutinmat apriya ma hapat daham Jisas ohnong Hanipyaha. Dirhe bior mohsi ihirnong ha sutingwe dahapatda pora  
\v 50 tit han oh bior dara hanat bok han ire duuptei han ire atamreipat han ohnong biorsi suoh nat kak mohnong hrarmat asaringopri.  
\v 51 Hrarmat atporhan Jisas oh wamara We. Mama ihapti da mohri na ihaptimur. Mandatinmur pora natnong bes asar it ayah deingopri.   
\p
\v 52 Ayah maro hama hanat bok han ire duuptei hano ap yawarnong er matipririm wamat papti hano rotu ap ohe han pohono ihirnong Gur bioro kawo ohsi marim ma apriya oh hanip sum mamter hat sapti han ihirnong amburipti ohe tan hat bioro kawo ohsi tap hat apriyada.  
\v 53 Nohra Got ohe ap ros dipwi meng oh napor am nahapatin gur na namburiptingwerio. Gin oh er da kwitem dusnong wamat pat han ohe dik hah ohoh ihan gin gure nohnong nitin dik hahmur pongopri.   
\s1 Pita oh Jisas ohe win aremdip ohe meng oh  
\r (Matyu 26:57-58,69-75; Mak 14:53-54,66-72; Jon 18:12-18,25-27)  
\p
\v 54 Jisas oh ameng oh gipotporhan ihir net por ambur hanat bok han ire duuptei hat pat han ohe apnong pisangopari. Pisaperhan Pita oh kom gaha pipri.  
\v 55 Susa ap ohe doho dah ros ire irat temat pati tei oh ihir tap tongnoma indipri.  
\v 56 Ihir tap irat kak oh patin ire atamreipat kuu tit aprisa Pita ohnong irat has tei oh rumkinnong pomat wamara Mama han mohri Jisas orhorsi patgwer han ohmur pongopri.  
\v 57 Potporhan Pita oh Wa. Kuu go girit mengitipra. Kuu gwe ma giri oh nohri ohnong hanhanmur potipri.   
\p
\v 58 Gipora aya tei han tit aprisa ohnong wamar Gohe Jisas ohsi pat hanmur pongopri. Potporhan Pita oh Hana. Go giritipra. Nohri ohsi na pat hanmur potipri.   
\p
\v 59 Pora trun aya tei mah it tit han aprisa Pita ohnong wamar Mama han go Gariri han gur ohoh ihan Jisas orhe tap na pat handa. Arpin go orhe tap pat hanmur pongopri.  
\v 60 Potporhan Pita oh Hana. Gwe ma giri meng oh nohri hanhan hat pat meng go girimur potipri. Ama meng oh kopen giporpatin ner kakaruk oh mengingopri.  
\v 61 Mengitporhan Hanipyah oh bos tandapurkes rim Pita ohnong kin dung por wandeingopri. Imar wamtiporhan Pita oh Jisas ohe Ner kakaruk oh na mengit patin orhor go nohe win yitir dah naremdiprohmur ma pot mengnong oh it dahapat  
\v 62 da er ham kot rosa saheih ham yimtin danong ham isip tit yimtipri.   
\s1 Jisas ohnong suma dasei matpa ohe meng oh  
\r (Matyu 26:67-68; Mak 14:65)  
\p
\v 63 Gahan Jisas ohnong marim ma wamat papti han ihir ohnong sumo tang asaro deingopari.  
\v 64 Ma imtipa oh watah tan tit dara ohe kinnong apama sungopari. Supti Gonong mama han moh propetmur naporipti ohoh ihan gin go na wamat patin gonong ma niya oh gorhordapat Gin ama han oh nihemur rim win napotinmur por tang asaringopari.  
\v 65 Imat orhorwi er meng pora tang asar dasei deingopari.   
\s1 Jisas ohnong sutinmat kaunsir ire meng dahamtipa ohe meng oh  
\r (Matyu 26:59-66; Mak 14:55-64; Jon 18:19-24)  
\p
\v 66 Indeipti gahan kimsidapat kutwi mong da hatporhan rotu ap ohe han pohono hanat bok han ire duuptei hano sawa meng am hat pati hano ihir tap tei hapti Kaunsir nuhur Jisas ohnong meng dahamaro hatiprohe ohoh ihan ihir ha popringwemur potperhan Jisas ohnong wamat papti han ihir ama kaunsir ire patinong pisangopari.  
\v 67 Pisaperhan ihir Jisas ohnong Go napotina. Got oh hanip ihirnong ambutipra rim kis mat pat han Krais oh goda. Gorhor napotina por dahandeingopari.  
\p Por dahamtiperhan Jisas oh Noh ama hanmur naporhanoh gur arpin ama hanhe na dahatiprohemur. Ihan noh ama hanmur na napotiprohmur.  
\v 68 Nohdapat gurnong meng tit dahanahatporhan gurdapathe it diteim na napotin ina hat pati ohoh ihan noh gure ma dahanahaya menghe noh gurnong na napotiprohmur.  
\v 69 Ihtin orhor mamengnong moh napotiprohmur. Gin mama pati morhor Hanip Brer noh kasip Got orhe bes oper tan tongnom patru patepramur pongopri.  
\v 70 Potporhan ihir gonsi Ihan go ma giri oh Got orhe brer oh gorhorda por dahandeingopari.  
\p Por dahamtiperhan Jisas oh Gur go Got orhe brerda napor ma dahanahaya oh arpin meng naporiyamur pongopri.  
\v 71 Potporhan ihir Wa. Gin orhe atem teidapat orhor Noh Got orhe brermur ma ri oh orhe boknong mar sutin ohe meng oh orhor ama ri ohmur. Gin wan han ihir orhe boknong mar sutin ohe meng oh ha napotingweda. Orhe boknong mar sutin ohe meng oh orhor pok ma ri ohmur gosham sutin ohe danongwi hangopari.   
\c 23  
\s1 Pairat ohe kintei Jisas ohnong dahamtipa ohe meng oh  
\r (Matyu 27:1-2,11-14; Mak 15:1-5; Jon 18:28-38)  
\p
\v 1 Jisas ohnong sutin ohe danongwi hama gonsi tandeima Jisas ohnong ambur gapman Pairat ohe patnong pisangopari.  
\v 2 Pisusa Jisas ohe boknong mar sutin ohe meng oh Pairat ohnong Mama han mohoh gapman ohe pohon ihpat meng oh oh amkara gapman ohnong sakarap matin ohe da oh kuuhan ihirnong pinggit pisapatmur. Takis yanhe gapman Sisa ohnong gurri aprisipri naporpatmur. Tit meng ma naporpat oh Noh kakhan ham gurnong norhe hrepnong mar napapat han Krais oh nohmur naporpatmur pongopari.   
\p
\v 3 Potperhan Pairat oh Jisas ohnong Go arpin Juda ire kakhan ham papat han oh goda por dahandeingopri. Por dahamtiporhan Jisas oh Dawa. Gwe ma ri mengru hat pat han oh nohmur pongopri.   
\p
\v 4 Potporhan Pairat oh hanat bok han ire duuptei hano be tarmut pati kuuhano ihirnong We. Mama han ohe boknong mar sutin ohe meng duuptei oh ti na pathemur. Noh ti na wandeimur pongopri.  
\v 5 Potporhan ihir akit mengtei orhor Es. Oh gapman ohe mengnong sakarap mar gusutin ohe da oh Gariri mong amdapat orhor pinggit popripatru Judia mong mong moh gonsi mama popripat ohmur por akit mengtei orhorwi pongopari.   
\s1 Herot ohe kintei Jisas ohnong dahamar imtipa ohe meng oh  
\p
\v 6 Ihir Jisas oh Gariri mongdapat orhor ama ihtin meng oh pot popripatmur potperhan Pairat oh amrama Mama han moh Gariri mong ihirda por dahandeingopri.  
\v 7 Dahamtiporhan ihir Dawa. Oh Gariri han ihirmur potperhan oh Epe. Ihan oh Herot ohe hrepnong mat papat han ihir ma hapat. Gin mama dik moh Herot oh Jerusarem ap mutuh moh apris pat ohoh ihan Herot orhe patnong darhetporhan orhor dahamaro ha hatinoh daham orhe patnong darhengopri.  
\v 8 Darhetporhan ihir ambur Herot ohe patnong pisangopari. Pisaperhan Herot oh wamara oh rih orhor kuuhan ihir Jisas oh wandeipti na wandeipti han oh indeipatmur ripti han oh amrama Norhe kintei orhor tit imtiporhan noh wamtipranengo dahat pat tei ohoh Jisas oh ohe patnong popriperhan Wes popriyao daham amam isip tit hangopri.  
\v 9 Amam hapat Jisas ohnong meng ruumsan tit dahandeingopri. Dahamtiporhan Jisas oh Herot ohe ma dahandei meng oh it diteim ti na por kimirit mandangopri.   
\p
\v 10 Kimirit mandatporhan hanat bok han ire duuptei hano sawa meng am hat pati hano ihir Jisas ohe duup tandeima kasip hat orhor ohe boknong mar sutin ohe meng oh ruumsan deingopari.  
\v 11 Ruumsan matperhan Heroto ohe ami bapo ihir Jisas ohnong Gwe kasip timbas borop go por dasei mar tang asaringopari. Tang asara kakhan ire aripti watah yahnap dapsi tit dar popris ohnong dasei mar angopari. Aripti it Pairat ohe patnong darhengopari.  
\v 12 Rih Pairatsi Herot ihit tap da na ham mahaw goshat pateshemur. Gahan Jisas ohe sutin tei oh itait yah han hatpamur.   
\s1 Pairat oh kuuhan ire mengnong dimar Jisas ohnong sutin han ire bes teinong matip ohe meng oh  
\r (Matyu 27:15-26; Mak 15:6-15; Jon 18:39–19:16)  
\p
\v 13 Jisas ohnong Herot oh Pairat ohe patnong it darhetporhan Pairat oh hanat bok han ire duuptei hano kaunsir bapo kuuhano ihirnong Gin gur apris tap tei hatinmur potporhan ihir apris tap tei hatperhan  
\v 14 Pairat oh Gur mama han oh nohe patnong poprisa Mama han mohoh gapman ohnong sakarap mar ohe mengnong amkatin ohe da oh kuuhan ihirnong pinggit pisapatmur ma napota oh noh guragure kintei orhor dahandei oh gure ohe boknong mata ohe meng oh ohe bok moh timbas hatmur.  
\v 15 Timbas hatporhan noh Herot ohe patnong darhetmur. Darhetporhan Herot ohhe ohe boknong matin ohe meng oh timbas hatporhan oh itnong mama darher ohmur. Ihtin ohoh ihan ohe boknong mar sutin meng oh eimat timbasnap ma hapat dahatinmur.  
\v 16-17 Ihan noh ohe da adason mar be kaw boksi suma arpit mandatiprohmur pongopri.   
\p
\v 18 Potporhan kuuhan ihir tap kat mengwi hama Es. Ama han ohnong sutperhan hapur ha timbas hatinoha. Barabas ohnong arpit mandatinmuro por kasip mengtei tap kat mengwi hangopari.  
\v 19 Barabas oh Jerusarem ap mutuh orhor gapman ohnong sakarap mar gusutin ohe da oh pinggit pisusa orhor tap ihir gusum tit han ohnong sum haputporhan ama ohe pe oh ohnong karapus matpamur. Ama ihtip han ohnong arpit mandatinmur ama potpa oh.   
\p
\v 20 Potperhan Pairat oh Noh Jisas ohnong arpit mandatpora dahapat Oho. Noh ohnong be kaw boksi sum arpit mandatiprohmur ihirnong it pongopri.  
\v 21 Potporhan ihir Es. Irat bok sur garmar ha sutingwe kasip mengtei orhor poriptiwi hangopari.   
\p
\v 22 Hatperhan Pairat oh it ihirnong Oh kian er hahrit ha sutingwe. Ohe boknong mar sutin ohe meng oh ti na pat tei moh kianorim be ha sutingwe por gur kasip bok hapti. Ihan noh be kaw boksi suma arpit mandatiprohmur pongopri.  
\v 23 Potporhan ihir na gapa ham kasip mengtei orhor Irat bok sur garmar ha sutingwe poriptiwi ham Pairat ohe mengnong ambapte mar amkangopari.   
\p
\v 24-25 Pairat ohe mengnong amkatperhan ihan Pairat oh ire mengnong amratpora daham Barabas gapman ohe mengnong sakarap mar hanip sutporhan karapus matpa han ohnong ire arpit mandatin ma poriyaru hat orhor arpit mandangopri. Jisas ohnonghe kuuhan maire dahayaru Jisas ohnong ha matingwe daham gapman ohe dupsi han ire bes teinong deingopri.   
\s1 Jisas ohnong irat bok sur garmar dasei matpa ohe meng oh  
\r (Matyu 27:32-44; Mak 15:21-32; Jon 19:17-27)  
\p
\v 26 Jisas ohnong Rom gapman ohe dupsi han ire bes teinong matporhan ihir ambur pisangopari. Ambur mandap pisapatin Sairini aptei han Saimon oh kot dahdapat ap mutuh saporim apripathan ihir ohnong ambura Gin go Jisas orhornong sutin ohe irat bok orhor kat tam tei sar popripat moh go gwe kat tam tei sar apisonmur por ohe kat tam basnong amatperhan oh amarim Jisas ohe kom itait tap hat sangopari.  
\v 27 Saperhan kuuhan ruumsan ihir ohe kom oh sangopari. Susa kat kuu ihir ohe danong ham ha sutiprio daham da er ham payimat tit sangopari.   
\p
\v 28 Payimat tit saperhan Jisas oh bos tamburker wamara ihirnong Jerusarem ap mutuh an kuu gur nohe danong ham nohnong napayimatipri. Guraguro guragure brero guragure ma batbet datiprinong oh Nuhur sa batbet datipri daham guragure danong ham yimtinmur.  
\v 29 Batbet ma datipri dik oh kuuhan ihirdapat Brer timbas kuu gur guragure ruumsup ohwi daripti ohoh ihan gur amamsi kuu gurmuro napotiprimur.  
\v 30 Naporipti batbet ha datiprohe daham yei isip ihirnong Yei isip isip gur het wandas nuhurnong namkatinmuro. Mong ka muk muk ihirnong Mong ka muk muk gur het wandas nuhurnong namkatino potiprimur.   
\p
\v 31 Ihat batbet isip ma datipri oh mohnong dahatinmur. Nohe yah hat sapat ohe da oh irat hapen hatin hat patin orhor ihir irat tei nasariya hatin naham batbet nahayamur. Irat hapen hatin hat pat han nohnong inahaya ohoh ihan da er hat sus kan irat hatin hat pati han ihirnong atnap batbet isip apriporhan datiprimur pongopri.   
\p
\v 32 Potporhan dupsi han ihir er hat sapti han yot ihitnonghe Jisas ohsi tap mat sutperim ambur tap mar pisangopari.  
\v 33 Pisusa mong hanip kak hatin hat patin hanip kak mong porishe mong teinong oh pisangopari. Pisusa ama mong tei oh Jisas ohnong irat boknong mar sur garmar daptuhura mong tei gonongopari. Gonopti ama er hat sapti han yot ihitnonghe amaruwi mar sur gardeipti tit han ohnong bes oper tannong deiya tit han oh bes watah tannong deiya mar mong tei gonongopari.  
\v 34 Irat bok sur garmar gonom sutperhan Jisas oh irat bok andemdapat Ata. Ihir nohnong hanhan hat patidapat niya ohoh ihan go ire niya ohe pe yan oh apripra. Eimat hanhan mar amdatinmur pongopri. Potporhan dupsi han ihir orhe watah pan oh adatinmat satu hama nitat goshangopari.   
\p
\v 35 Kuuhan ihir wamat patin hanat bok han ire duupteinap hat pat han ohe komiti hat pati han ihir Han moh hanip ihirnongra yah mat ma pisapatgwer han moh arpin Got ohe ihirnong amburin hanmur rim kis mat pat han Kraishan oh ihan gin orhornonghe sur per hamat sar wandas ha sonoh por dasei deingopari.   
\p
\v 36 Imtiperhan dupsi han ihirhe er dasansi wain gap san tit dar poprisa Moh diprohhan dina por atem teinong dip adeingopari.  
\v 37 Dip mara Go arpin Juda ire kakhan hat pathanhe gorhornong gorhe sur garnahaya ohe sur oh per hamat sar kakdah wandas yah ham sonmur por tang asar dasei deingopari.  
\v 38 Irat brak tan tit dar Mama han moh Juda ire kakhan ham wamat papat hanmur por brak mara orhe suya ohe irat bok kakwit andeh sur garmata hangopri.   
\p
\v 39 Er hat sapti han yot Jisas ohe tap suya han yot ihithe tit han oh Go namburin han Krais basda. Go namburin han Kraishanra gorhornongo nuhutnongo dirnong sur ama irat bok garnahaya moh per hamat sar yah nahahrit sapera por dasei deingopri.  
\v 40-41 Dasei matporhan tit han oh We. Go ohnong imat dasei matipra. Dirnong er hat sapti hano rim batbet ma napriya oh tap da batbet napriyamur. Napriya orhor dite batbet ma napriya moh ditadite er hat sapti ohe pe oh kis tei batbet napriyamur. Ohe batbet apriya oh dite mama hat saptiruwi hat batbet na apriyamur. Duuptei timbas be batbet apriyamur. Ihan go Batbet ma napriya moh ditadite ihat sapti ohe kis tei batbet napriya ma hapat daham go Got ohnong na kas hahda por indeingopri.  
\v 42 Por imara Jisas ohnong Mona. Go kakhan ham ma papindipra tei oh nohe danong ham nambutinmur pongopri.   
\p
\v 43 Potporhan Jisas oh Noh arpin meng nohan gonong napotiprohmur. Gin mama pati morhor go nohsi ditadit sus yah hat patepri apteinong sus pateprimur pongopri.   
\s1 Jisas ohe da sus ma haputip ohe meng oh  
\r (Matyu 27:45-56; Mak 15:33-41; Jon 19:28-30)  
\p
\v 44-45 Jisas oh irat bok oh sur gartahat patim orhor mongsut nat kirok hatporhan atan oh tikimas rima mong mong moh gonsi kwi hat mandangopri. Kwi hat patin atan oh tambera bimrip kirok hatporhan atan oh it has hangopri. Has hah tei mah Got ohe ap yawar mutuh dah ohe ap gwatei apat pati ohe watah tan oh hatdapat orhor tuket wasa tan orhe tan orhe ham tuker hangopri.  
\v 46 Hatporhan Jisas oh itap ohnong akitwi Ata. Gin nohe da oh gorhe bes teinong deimur pora orhe da oh itap orhe bes teinong mara hapungopri.   
\p
\v 47 Girim haputporhan ami ire duuptei han oh ama ihah erer oh wamara Epe. Mohri duung dasi ham yahnap hat pat han tit suyamuro rima Got ohnong armi maro hangopri.  
\v 48 Jisas ohe suptinong wamar ma apriya kuuhan ihirhe ama tarpa erer oh wamara Epe. Yahnap han moh ha suyao goshama saheih ham da er isip tit hama bes bapiar deingopari.  
\v 49 Bes bapiar matperhan Gariri mongdapat Jisas orhorsi apripti kuuo orhe yah hapti kuuhano ihir gonsi tap ham meih asomdapat wamat inpari. Wamat patin Jisas ohnong imar sutperhan ama erer oh tarpangopri.   
\s1 Josep oh Jisas ohnong sein itip ohe meng oh  
\r (Matyu 27:57-61; Mak 15:42-47; Jon 19:38-42)  
\p
\v 50 Gahan Josep oh hanat bok han ire duupteinap hat ma pat han ohe komiti hat patesuh han ohmur. Oh Judia mong ohe Arimatia aptei han ihirmur. Ama han oh duung dasi ham yah dasi hat patesuh hanmur.  
\v 51 Oh Got ohe kakhan ham napapindipra tei oh apriprawa daham minhan wamat pat ohoh ihan kat komiti ihir Jisas ohnong heisup mar sutpera ritperhan oh yahwa na daham ihirsi tap da na hatipmur.  
\v 52 Ama han orhor Jisas oh haputporhan sein itinmat Pairat ohe patnong susa Noh Jisas ohe sein oh dar itiprohmur. Go yahwa dar itina napotiprohdo rim noh dahanaham apripatmur ama potip oh. Gipor dahamtiporhan Pairat oh Yahwa sein oh dar itinmur potporhan  
\v 53 arpin Josep oh susa Jisas ohe sein oh arpim kakdahnong mara orhe kopen watah namei hatin dap ohsi ban mara pisus kwei ma tem mat pat wanin tem kopen hanip sein na it pati tem oh prosa saringopri.  
\v 54 Ohe ma sein itip oh patem atan waporhan Sabat tuperipti dik apriporhan indipri ma hapat daham deno erer mamen tahapti dik oh sein oh saringopri.   
\p
\v 55 Josep oh Jisas ohe sein oh itporim pisapatin Gariri mongdapat Jisas ohsi tap hat apripti kuu ihirhe Josep ohe kom oh susa Josep oh kwei tem oh sein sarpatin wamara ohe ma imat sein sar oh ama am hatpa oh.  
\v 56 Am hapti it iraire apteinong susa Jisas ohe sein oh na tumnuhurin han ohe gapgwesi han dara atipriwa daham ama mamen mat itpa oh. Mamen mat sara Juda ire tuperipti dik Sabat oh hatporhan sawa meng oh ama dik oh tuperinmur ma potip mengru hat orhor ihirhe ama tupetpa oh.   
\c 24  
\s1 Jisas oh it da apris masas pip ohe meng oh  
\r (Matyu 28:1-10; Mak 16:1-8; Jon 20:1-10)  
\p
\v 1 Gahan tuperipti dik Sabat oh timbas hatporhan Sande mong da hatin hah tei mah Jisas ohsi tap hat sapti kuu ihir iraire gapgwesi han Jisas orhe seinnong tumnuhutiprarim atinmat mamen mat itiri gapgwesi han oh dara Jisas ohe sein boknong amotinmat ama pipa oh.  
\v 2 Susa sein itiri kwei tem duup oh koriyaoh kwei isipsi ma kwei tem apatiri oh dapurkem dapurkem mat pisusa wan teinong mat ita hangopri. Mata oh kwei tem oh be tanput patgopri.  
\v 3 Tanput pathan ihir tem ros wandeiyaoh Hanipyah Jisas ohe sein itir tei oh sein oh ti na patgopri.  
\v 4 Na pathan ihir wamar Epe. Hanip sein moh kinmata sa daham da trun trun darhetpari. Darhera watahayaoh han yot tit ire duup oh tandeit patingopari. Ite watah ma an pati oh amsama hatin has hat orhor patingopari.  
\v 5 Ihat hassi patihan kuu ihir kas ham rumkin oh memham mongnong wamat mandatpari.  
\p Wamat mandatperhan ama han yot ihit We. Kuu muka. Gur da pati han ihirnong haputperhan sein saripti tei moh angdeipri.  
\v 6 Gure ma angmat apriya han ohra da apris it masas pi ohoh ihan matei na patmur. Masas ma pi oh orhe rih da patim orhor guragur rih orhor Gariri mong oh tap hat patim ma napotip mengnong oh it dahatinmur.  
\v 7 Ma napotip oh Hanip Brer nohnong er hapti han ire bes teinong nahatiprimur. Nahatperhan ihir irat boknong sur garnaham nitiprimur. Nitperhan noh hapura mong tem patin bimrip oh it da apris masapramur ma napotip meng oh dahatinmur ama han yot ihit kuu ihirnong imat meng pongopari.  
\v 8 Potperhan kuu ihir Yo. Orhe ma napongop meng mah sa daham orhe ma potip mengnong it dahatpari.  
\v 9 Dahama sein itiri tei oh mandama it apteinong pipari. Susa Jisas orhe pinggit pisapat gwerhei han ihirnongo kat kuuhan orhorsi tap ma sapti ihirnongo ama ihirnong potperim pipari. Susa ama meng oh potpari.   
\p
\v 10 Jisas ohe sein itiri teinong wamar susa apris orhe han ihirnong ma potpa kuu muk oh mama kuu ihirmur. Maria Makdara aptei kuuo Joanao Maria Jemis ohe supo ama kuu muko kat kuu ma irair tap hat sapti kuuo ama kuu ihir susa Jisas orhe pinggit pisapat gwerhei han ihirnong potamur.  
\v 11 Potperhan ihir Kuu ire ma naporiya meng moh na dahatin meng naporiya ma hapat daham ire ma poriya meng oh arpin menghe ama na dahatpa oh.  
\v 12 Arpin menghe na dahama Pita oh Ihan noh wamar sapora daham sein itiri teinong wamtiporim ama sakat pip oh. Susa sein itiri kwei temnong oh tanggras rim wandeioh hanip ohe sein oh ti na patgopri; orhorsi ban mar itiri watah dapsi ohwi patgopri. Pathan oh Epe. Hanip moh kinhat sao daham da trun trun darherpat it pipri.   
\s1 Yot tit mandap kup saptin Jisas ohnong wamtipa ohe meng oh  
\r (Mak 16:12-13)  
\p
\v 13 Gahan Jisas ohe masas ma pi dik oh orhorsi sapti yot ihit tit Emeas apteinong sapero rim Jerusarem ap mutuh oh mandama Emeas apteinong sapti ohe mandap oh pipari. Jerusarem ap mutuhdapat Emeas apteinong sapti oh meihkirim 11 kiromita ohe kismur.  
\v 14 Ama apteinong sonmat mandap oh Jisas ohe sutperhan hapur it ma masas pi ohe meng oh gospot pipari.  
\v 15 Gospot apet tit saptin Jisas oh ite kom apris ite boknong ham irair tap hat pipari.  
\v 16 Tap hat pipa orhor da ban taham Moh Jisas orhor ma hapat na dahatpari.   
\p
\v 17 Na daham saptin Jisas oh Gut kian mengwi apet sapti por dahandeingopri. Por dahamtiporhan ihit Jisas ohe sutiri ohe danong hat patin ohoh da er ham rumkin tisos rim atei tandeim kimiritpari.  
\v 18 Kimirima itait tit han Kriopas oh Jisas ohnong Wa. Kuuhan aptei aptei amdapat apris Jerusarem ap mutuh ma pati kuuhan ihir Jerusarem ap mutuh ma ihta meng oh ihir gonsi am hat patimur. Gorhap hanhan hat patda potipri.  
\v 19 Gipotporhan oh Jerusarem ap mutuh ma ihta meng oh kinhata meng ripti por dahandeingopri.  
\p Por dahamtiporhan ihit Jerusarem ap mutuh ma ihta meng oh Jisas Nasaret han ohnong ma imta ohe meng oh riptimur. Ama han oh propet yahnap hanmur. Ohe meng poro erer ma indeipato oh kasip yahnapwi hatporhan Got ohe kinteio kuuhan ire kinteio oh imtiporhan ihir wamara Moh yahnap hat sapat hano dahaptimur.  
\v 20 Ama ihat dahapti han ohnong hanat bok han ire duuptei hano hanat bok han hat pati han ire duupteinap han ohe komiti hat pati han bapo ihir sutperhan ha haputinoh rim mahaw mar gapman ire bes teinong matirimur. Matperhan ihir Moh er hat sapat han ohoh ihan sutin hanmur por irat bok sur garmar sutirimur.  
\v 21 Sutperhan haputporhan sein it patina yitir dah timda tei moh na pathanoh nuhur Isrer nuhurnong oh nambur yah nahatipra han ma hapat dahat pati ohe da oh mandama da er hat patimur.  
\v 22 Ihat da er hat patimdapat nuranur kat kuu ihir kopen mong dahah tei orhor sein itiri teinong wamar sus wandeiyaoh sein oh na pathan ihir it apris nuhurnong buporinsi meng napotamur.  
\v 23 Buporinsi meng napotperhan nuhur sus wandeiyaoh Jisas ohe sein oh ti na pathemuro. Nure kintei moh kinpitap hatin ham wandeiyaoh enser yot ihitwi patimdapat Es. Ohra da patmuro napotamur.  
\v 24 Napotperhan nuranur kat han ihir it wamar piyamur. Susa ire ma riya meng oh arpin ihatmur. Ma ihat oh seinnong ti na wamtamur potpari.   
\p
\v 25 Potperhan Jisas oh We. Da hut pati yot gut rih propet ire ma brak matpa meng oh sama Mohri arpin tarpatipra meng ma hapat kapkap na dahaptida.  
\v 26 Got oh Krais oh batbet ha datinohmur. Darpat has armisi da moh sa datipra ma dahatip da oh gut hanhan hat patida pongopri.  
\v 27 Giporpat orhe boknong mar ma brak matpa meng oh ihat tarpatipramura; ihat tarpatipramura por ihitnong gonsi meng am deingopri. Imat meng ma am matip oh Moses ohe meng ohri duup mar porpat propet ire ma brak deishe meng oh gonsi por am deingopri.   
\p
\v 28 Ihat mandap kup oh meng am mat pisusa ite saperim ma saya ap mandap mindiskak tei oh oh wan apteinong saporim ihangopri.  
\v 29 Ihtiporhan ihit Es. Mona. Atan was mong kwi hatin hah tei moh go denong sapor ihpat. Nute ma timdiprohe ap oh diradir tap hat timdiprohemur por baso potpari. Potperhan oh arpin amrama irair tap hat ap ros inpari.   
\p
\v 30 Patemo hama den diperim tap hat tongnoma den tit dara Got ohnong weso pora den oh ihitnong akatket deingopri.  
\v 31 Akatket mar apriporhan ite da oh wan hankin ma dahat pateri da oh gahan Moh Jisas orhor sa. Diradir tap hat pati sa dahas rim am hatperhan timbas hat mandangopri.  
\v 32 Timbas hat mandatporhan ihit Epe. Mandap kup apris brak matpa meng oh da tanpetin mengwi napot apripatin dit amram da tanper amam hat orhor apririmur goshatpari.   
\p
\v 33 Gigoshapti ama sut orhor it Jerusarem ap mutuhnong pipari. Sus Jisas orhe pinggit pisapat han gwerhei ihiro be orhorsi sashe han ihiro ihir tap tei hat patin sus ama wamtipa oh.  
\v 34 Wamtiperhan ihirdapat ihitnong Guthe meng moh amratin. Hanipyah oh Saimon Pita ohe kintei pitap hatporhan oh wamatmuro. Ma wamat oh Hanipyah oh arpin it masas pat ma hapat dahayamur ama potpa oh.  
\v 35 Potperhan ihit ite mandap kup saptin Jisas oh apris ihitnong ma por ohe mengo den katket mar apriporhan ihit ohnong wamar am haya ohe mengo oh ihirnong ama potpa oh.   
\s1 Jisas oh orhe pinggit pisasuh han ire kintei pitap hatip ohe meng oh  
\r (Matyu 28:16-20; Mak 16:14-18; Jon 20:19-23)  
\p
\v 36 Hanip yot tit ite mandap kup susa Jisas ohnong ma wamta ohe meng oh poriptin orhor Jisas orhor ire mutuh oh pitap hangopri. Pitap hama We. Nohanhera. Gur manap dasi ham yah hat patenmur pongopri.  
\v 37 Gipotporhan ihir wamara Epe. Moh hanip dakin daham sein bupang rim kas hatpari.   
\p
\v 38 Sein bupang rim kas hatperhan oh We. Monhera. Gur kianorim nohnong wanaham Moh hanip bashe. Hanip dakin daham kas hapti.  
\v 39 Gur ihat dahapti ohoh ihan nohe beso buho sur apitnong moh wanaham Orhor ma hapat daham am hatinmur. Am hapti ina boknong moh namrindinmur. Namrima inasi tamsi pat moh hanip da ihir inasi na pati ohoh ihan hanip da bas ma hapat. Hanip orhor ma hapat dahatinmur pongopri.   
\p
\v 40 Giporo hama Gin gur nohe beso tongo moh wamtin por pinggingopri.  
\v 41 Pinggitporhan ihir wamara ihan orhorkin daham amam isipnap tit hatpari. Hapti yot da hat orhor patin Jisas oh gur den kanhe ti patihan namdina pongopri.  
\v 42 Potporhan ihir aning bok temar kan mat sariya tei ohoh kat apdapari.  
\v 43 Apriperhan oh ambura iraire kintei orhor dangopri.   
\p
\v 44 Damo hama ihirnong Noh rih orhor gursi patim Moses ohe nohe boknong naham brak matip mengo propet ire nohe boknong naham brak matpa mengo ga rim nohe boknong armi naham ma brak matpa mengo ameng oh na wa ham gonsi dam tarpatipramur ma naponipat meng oh gin arpin dam tarpat ma hapat na dahayada pongopri.  
\v 45 Pora orhe boknong mar ma brak matpa meng oh ihir da ban taham na dahat patihan oh pomat porpat da adapengopri.   
\p
\v 46 Da ma adapetip oh Nohe boknong mar ma brak matpa meng oh tit mamaru hat patmur. Got oh ihirnong amburin hano rim kis mat pat han Krais oh batbet dar haputipramur. Hapura yot dahwi timama bimrip oh it da apris masapramur.  
\v 47 Masporhan orhe mengtei kat kuuhan ihirdapat kat kuuhan ihirnong Gur ihan dire er hat sapti da moh mandatper. Mandama yah hat sapti danongwi hat sasiper dahayahanoh Got oh gure er gap oh hirmat namdama it yansi na nahama eimat hanhan mar mandatipramur pot pisaprimur. Ameng ma pot pisasipri oh Jerusarem ap mutuh ohri pot pisusa aw pe mong penong gonsi pot pisasiprimur rim brak deishemur.  
\v 48 Gin dam tarpatporhan ma wandeiya meng moh pot pisashen han bap oh gin mama norhornong kin wanahaya han bap guragur pot pisashen han bap gurmur pongopri.   
\p
\v 49 Giporpat Gin gur amratin. At oh ihtin han tit napripramur napor ma rit natip han oh norhordapat gurnong napripramur. Ihan gur wan apteinong sapri. Mama ap mutuh morhor minhan patin Got ohe kasip Yahsup oh aw teidapat nadarhetporhan oh gure mutuhnong teip ham kasip nahat napaptepramur pongopri.   
\s1 Got oh Jisas ohnong ambur aw teinong pruhup ohe meng oh  
\r (Matyu 16:19-20; Aposer 1:9-12)  
\p
\v 50 Jisas oh ameng oh gipor mandapat ihirnong ambura ama Jerusarem ap mutuh oh mandama Betani apteinong pisangopri. Pisusa bes daptukus por ire pati teinong mar Got ohe ihirnong bapkei mat papten ohe meng oh por apingopri.  
\v 51 Imat por apripatin orhor Got oh ambur aw teinong mahat pruhum mandangopri.  
\v 52 Pruhum mandatporhan ihirhe orhornong armi maro hama amam isipnap hat orhor it Jerusarem ap mutuhnong pipari.  
\v 53 Susa Jerusarem ap mutuh oh Got orhe ap yawar oh rosa Got orhornong weso por orhe win adaptuhuro armi maro inpari.