\id GAL - Oksapmin NT [opm] -Papua New Guinea 1992 (web version -2014) 
\h Garesia 
\toc1 Garesia ihirnong Por oh brak atip ohe meng oh 
\toc2 Garesia 
\toc3 Gar 
\mt1 Garesia  
\mt2 ihirnong Por oh brak atip ohe meng oh  
\ip Mama meng moh Por orhor brak mar Garesia mong ma Hanipyah orhe nita hat pati bap ihirnong adarhetipmur.  
\ip Por oh ama Garesia mongnong rih orhor sus Jisas ohwi inahatin hatin hanwa dahatin ohe da meng oh pot indipmur. Porpatin ama pati kuuhan ihir kat tit Arpin Hanipyah orhorwi inahatin hatin han ma hapat dahatpamur. Ihat dahat patin Por oh mandam wan teinong saporhan Juda hat pati bap ihir apris ihirnong Gur Juda nure pohon sawa mengnong amram dindeiyahanoh Got oh gurnong Yah han bapmur naporpatmur potperhan Por oh ire giporipti mengnong oh amrapat Es. Hanipyah Jisas orhorwi inahatin hatin hanwa dahaya ohe pe ohwi Got oh nuhurnong Yah han bapmur naporpat ma hapat ha dahatingwe rim mameng moh brak mar adarhetipmur.  
\c 1  
\p
\v 1 Noh Got ohe meng pot pisapat han Por noh mama brak dei ohmur. Noh mama mihat tamrein sapat moh tit han tit Gin go mama moh tamrein sashenmur napora kis naham na nadarhetipmur. Jisas Krais ohsi; Jisas ohnong ma pamsuhup han at Got ohsi itarhe taman Go meng pot pisona napora kis naham nadarhetpamur.  
\v 2 Nohsi; Jisas ohe nita ihirsi nuhur mama brak mar Garesia aptei aptei sios gurnong mama nadarheriya ohmur.   
\p
\v 3-4 At Gotsi; ama Hanipyah Jisas Krais ihitnong Gutagute damdapat orhor yah matpera ma dahapti da ohsi yah mar manap ham yah hat paten dasi mat paptenmur por gure paten meng oh nadahandeipatmur. Noh Krais oh dire at Got ohe danongwi dimara dire er gap hirmar namdatinmat haputip ma hapat. Hirmat namdama kakdah mama gin ma er hat pati ohe er nang oh natpat napapatin gatmar arpit namdatinmat haputip ma hapat rim gure paten meng oh nadahandeipatmur.  
\v 5 At Got oh Krais ohnong imat darhetipo rim ihan dir ohnong dipdipwi armi mar papten hanmur. Arpinwa.   
\s1 Gur yot menghe dindeipri ritip ohe meng oh  
\p
\v 6 Got oh Jisas orhe damdapat yah matpora daham ma haputip ohe pe oh orhor gurnong namburpatmur. Imat ma namburpat danong oh gur kapkapwi mandama wan mengnong Moh yah menghe dahama dindeiptio rim noh da dokdok sarpatmur.  
\v 7 Gur wan mengnong amram ma dindeipti oh Oh yah meng napanggeitin menghe daham dindeipti orhor na napanggeitin mengnong dindeiptimur. Ihir Krais ohe yah meng ohe boknong oh na napanggeitin er meng oh dip mar yah mengnong er mar gurnong da ban naham er mat naporiptimur.  
\v 8 Nuhur titdo enser ihir titdo nure yah meng ma napotpa meng oh mandapti wan meng tit naporiyahanoh ama han oh irat has teinong eimat ha sonohmur.  
\v 9 Nohe ma ri oh it ritiprohmur. Tit han tit aprisa gure yah meng ma am nahatpa meng oh mandama wan meng tit naporhanoh ama han oh irat has teinong eimat ha sonohmur.   
\p
\v 10 Nohe ma ripat meng moh hanip ihir ha amam nahengwe rimda da Got oh ha amam nahenoh rim noh giripatda. Noh hanip ihirnong gapamtinmat giripatda. Basra. Noh Got oh ha amam nahenoh rim giripatmur. Noh hanip ihir nohnong ha amam nahengwe dahahhanoh Krais ohe danongwi ham noh yah hat atamreindiprohda. Basra. Na ihtiprohmur. Noh hanip ire atamreipatin nohnong ha amam nahatingwe daham na tamreipat ohoh ihan noh Krais ohe danongwi hat patim orhe atamreipatmur.   
\s1 Got oh Por ohnong ma ambutip ohe meng oh  
\p
\v 11 Nohe taptem gur dahatinmur. Nohe yah meng ma napotip meng oh hanip diradire damdapathe na napotipmur.  
\v 12 Noh suhur ham saporhan meng am nahayao be meng naporiyao nahatperhan am ham meng na napotipmur. Na napotipmura; Jisas Krais ohwi nohe kinteinong meng oh pitap matporhan ama pitap matip meng oh napotipmur.   
\p
\v 13 Noh rih Juda nuranure pohon danong dimar ma ihat susuh oh gur amram am hat patimur. Nohe ma ihat sasuh oh Jisas ohe nita ihir ha timbas hatingwe rim noh kasip ham ihirnong sut pisasuhmur.  
\v 14 Ihama noh Juda nuranure pohon mengnong am ham dimtin ohe da oh noh han pohon han ihir hatin hapat norhorsi tap san ihirnong oh norhe hrepnong mara nohri hat sasuhmur. Nuranure pohon meng oh isip hat ha sonoh rim nohri han ham kasip hat patesuhmur.  
\v 15 Noh ihat sasuh orhor em uh na nit patin orhor Got orhe damdapat Moh norhe han matiprawa dahatipmur. Gahan orhe damdapat yah matpora ma dahapat da ohsi orhe han nahatipmur.  
\v 16 Ma nahatip oh Got orhe damdapat Gin norhe brer ohe da oh noh pinggitpora. Pinggirit oh am hama ama da ohsi wan han bap ihirnong meng pot ha pisonoh dahama orhe brer ohe da oh namgim am nahatipmur. Am nahatporhan noh am hama hanip ihirnonghe ti na dahamtipmur.  
\v 17 Kopen kis nahatir han noh Jerusarem ap mutuhnonghe sus Jisas ohe rih kis matporhan tamreishe han ihirnong noh ti na wamtipmur. Ti na wamara Arebia mongnong pipmur. Susa atei patdapat gahan it Damaskas apteinong sus indipmur.   
\p
\v 18 Patin gahan krismas yitir birhitporhan noh Pita ohsi mengitporo rim Jerusarem apteinong pipmur. Susa ohsi ma indip oh tan kinhei dah ohwi indipmur.  
\v 19 Ama ihat indip ohhe Jisas ohe atamreishe han ihirnong kat han ihirnong na wamtipmur. Jisas ohe nap Jemis ohnongwi wamtipmur.  
\v 20 Noh Got ohe kintei ohoh ihan arpinnap meng napormur.   
\p
\v 21 Pita ohsi tan kinhei dah patin gahan susa Siria mongo Sirisia mongo oh indipmur.  
\v 22 Atei patin Judia mong ma pati han Jisas ohe danong hat ma pati sios ihir nohnong na wanahat patina.  
\v 23 Mengwi Er nahasuh han oh da tamburkera Jisas ohe yah meng oh ha timbas hatinoh daham ma sut pisasuh meng oh gahan it orhor ameng orhor pot pisapatmuro ritperhan ihir amratpamur.  
\v 24 Amrama Got orhor imat ma hapat daham Got ohnong armi matpamur.   
\c 2  
\s1 Winsi han ihirsi; Por ohsi tap da hatpa ohe meng oh  
\p
\v 1 Gahan krismas rumhei birhitporhan Banabas nuhut it Jerusarem apteinong sapero rim Taitas ohnong ambura nuhur pipamur.  
\v 2 Noh it ma pip oh Got oh Go it sona napotporhan noh pipmur. Susa sios ire winsi han ihirnongwi nohe Juda na hat pati han ihirnong ma pot pisapat meng oh Krais orhe yah meng ohwi pot pisapatmur pora ihirnong meng am matipmur. Nohe meng por ma am matip oh ihir Por oh be orhe gon meng tit pot pisapatkin daham nohe dam timdin meng moh amkar wa meng hatin matiprio daham noh sus sios ire winsi mat papti han ihirnong norhe ma pot pisapat ohe meng oh pomat am matipmur.  
\v 3 Am matporhan ihir am hapti Por oh eit watah gatmatin meng oh na pot pisapat ma hapat. Krais ohe meng ohwi pot pisapat ma hapat. Imat ma pot pisapat oh kimur. Ihan dir ohsi tap hat apir han Taitas wan han Grik ihir orhor Juda nure tan eit watah gatmatina na potiprohemur daham ohnong Eit watah gatmatina na potpamur.  
\v 4 Ihtin orhor kat Juda dasuh han bap ihir ahar nure mutuhnong hatpamur. Nure mutuhnong hama Gin dir maire pohon sawa mengnong mandama Krais ohe tapnong hat ma pati ohe pe oh nang tarpit wandas gin dir be yah hat patimur ma ripti moh dir gin kinheit sara wamat inpera. Wamat patin diradire pohon ma ripti meng moh na riyahanoh it pohon sawa hrepnong orhor matiprohemur daham da nadason mar wanahat inpamur. Wanahat patim Taitas ohnong wandeipti Gin go eit watah gatmatina napotpamur. Ma napotpa oh it nang natpatinmat ginapotpamur.  
\v 5 Ginaporiptin orhora; Krais ohe arpin yah meng mohwi gursi ha patenoh rim nuhur na amram na gatmatpamur.   
\p
\v 6 Got ohe atamreipti winsi han ihirdapathe nohnong Gwe Krais ohe meng pot ma pisapat mohsi; dire pohon meng mohsi yot mar pot pisonmur na napotpamur. Got oh Moh winsi hanhe. Moh win timbas hanhe ihat na dahapatmur. Amaru hat orhor noh Moh winsi han ohe meng moh amratpora. Win timbas han ohe meng moh noh na amratpora na dahapatmur.  
\v 7 Ama winsi han ihir nohe ma ihat sapatnong wanahama ihir Got oh Pita ohnong Go Juda ihirnong sawa pot pisona por ma darhetipru Por ohnonghe Go Juda na hat pati han bap ihirnong sawa pot pisona por darher ma hapat dahatpamur. Dahama Nure pohon meng mohsi go yot mat pot pisona na napotpamur.  
\v 8 Arpin Got oh Pita ohnong Go Juda ire mutuh oh nohe natamreindinmur por ma kasip mar darhetipru nohnonghe Gin go Juda na hat pati han ire mutuh oh nohe natamreindinmur napor kasip naham nadarhetipmur.   
\p
\v 9 Gahan duuptei hanmur ma porishe han Jemiso Pitao Jono ihirhe wanahama Got orhe damdapat Por ohnong kasip deipat ma hapat. Kasip matporhan ama kasip ohsi mama tamreindin moh tamreipat ma hapat dahatpamur. Dahama diradir tap tamreindin moh tamreipti ma hapat dahama Banabas nuhutsi we gosatpamur. We gosaripti Gur Juda na hat pati han bap ihirnong meng pot pisasiprimura; nuhur Juda ihirnong meng pot pisasiprimur goshapti tit dawi hatpamur.  
\v 10 Tit dawi ham Gur wan han ihirnong meng pot ma pisasipri oh ama ire danongwi hapri. Diradire taptem borop hat pati ihirsi tap mat dahat sashenmur napotpamur. Ma napotpa oh nohhe ama da orhor daham kasip hat patmur.   
\s1 Pita oh er hapathan Por oh imtip ohe meng oh  
\p
\v 11 Gahan Banabas nuhut Antiok aptei patina Pita oh apdapmur. Aprisa gahan oh er hat saporhan noh hanip mutuh orhor imtipmur.   
\p
\v 12 Pita ohe ama er hat pip oh mamarumur. Oh Jisas ohe danong hapti han watah na gatmaro ihapti han ihirsi tap ham den taman dapatin Got orhe nita Jemis ohsi pati kat han ihir apdapamur. Apriperhan Pita oh Mama apriya han ihir eit watah gatdeiyahanwi yah hat patimur ripti bap ihir apriya moh na gatmat pati ihirsi tap ham den na daptimur napotiprohekin daham kas ham eit watah na gatmat pati han ihirsi it den na dama eit watah gatdeipti han ire tapnong hatporim ihtipmur.  
\v 13 Ihtiporhan kat Juda ihir Pita ohe ma yot da ham gapa hat patnong oh wamara ihirhe ihangopari. Ihtiperhan Banabas oh Ihirhe ihya moh nohhe ihan Juda na hat pati han ihirsi den tap mat dapat moh mandatpora daham ihangopri.  
\v 14 Ihtiporhan noh wandeioh arpin Krais ohe meng mohwi na dimara it Juda ire pohon meng ohe hrepnong hatpor ihahrit noh sios ire kintei orhor Pita ohnong Pita go Juda orhor ire tapnong ham den ma dapat oh Juda ire pohon meng oh mandam ihpatmur. Mandam ihpat oh yahmur. Gwe ma ihpat oh Juda ihir hatin hat na patim ihpatmur. Be han ihir hatin hat patim ihpat oh yahmur. Ihat yah hat patdapat go gin Juda na hat pati han ihirnong Gur Juda ire tan hatinmur por pinggit pisapatda. Imat pinggit ma pisapat oh ermur pora noh imtipmur.   
\s1 Got oh Jisas ohwi inahatin hatin hanwa ma dahaya bap ihirnong Gur yah hat pati bap gurmur porpat ohe meng oh  
\p
\v 15 Nuhur be han bap Moses ohe sawa meng na am hapti han bap basmur. Nuhur Juda bap orhor nitpamur.  
\v 16 Juda bap nuranur mama meng moh am hat patimur. Moses ohe sawa meng dindeiyahan ama dindeiya ohe pewi Got oh Gur yah hat pati han bapmur na naporpatmur. Jisas Krais oh arpin inahatin hatin hanwa dahayahanwi Got oh Gur yah hat pat han naporpatmur. Ihtin ohoh ihan nuhur pohon mengwi dindeiyahanoh Got oh Gur yah hat pati hanmur na naporpato rim nuhurnong Gur yah hat pati han bapmur ha napotinoh rim Jisas Krais ohwi inahatin hatin hanwa dahaptimur.   
\p
\v 17 Dahama Krais ohwi inahatin hatin hanwa dahat patin Got oh ire ihat ma dahat pati oh yahnap hat pati bapmur daham ha napotinoh rim dir pohon sawa ohe hrepdapat hat ma pati oh mandama Krais ohe danongwi hat patimur. Krais ohwi inahatin hatin hanwa dahat patimdapat er hat sayahanoh Krais oh er da am nahatporhan ihat saya ma hapat daham Krais ohnong Oh er da namgit napisapat han ma hapat potiproheda. Basra. Oh er da oh na namgipat hanmur.  
\v 18 Noh Krais ohwi inahatin hatin hanwa dahat patdapat it ama da oh mandapat pohon sawa hrepnong hahhanoh nohe ma er hat pat ohe da oh pitap teinong matiprohmur.  
\v 19 Pohon sawa meng oh noh sama na napanggeitin ohe sawa meng hahhanoh noh mandas pora nohri haput pat han hatin ham na amrapatmur. Na amrama da pat han hatin ham ma amrapat oh Krais ohe mengnongwi amrapatmur.  
\v 20 Noh Krais ohsi tap hat irat bok sur garnahatperhan orhorsi tap hat haputip hatin hat pat ohoh ihan norhe ma pat moh norhe da basmur. Krais orhe da oh nohe mutuh mahan patin ihat patmur. Ihat pat ohoh ihan noh kakdah mama pat moh Got ohe brer oh nohnong hinhina naham ma haputip han Krais ohnong Arpin ohwi inahatin hatin hanwa daham noh mama pat ohmur.  
\v 21 Pohon sawa meng oh yahnap nahatin meng patneng Krais oh be haputipnengmur. Oh be na haputip ohoh ihan nohe ma ihpat oh Got orhe damdapat yah nahatpora daham ma yah nahapat danong oh noh na mandam ihpatmur.   
\c 3  
\s1 Got oh dirnong Ohwi inahatin hatin hanwa dahapti ohe pe ohwi Gur yah hanmur naporpatmur ritip ohe meng oh  
\p
\v 1 Noh Jisas Krais ohe nambutinmat ma irat bok sur gartahatip ohe meng oh Garesia mong ma pati gurnong pomat napotipmur. Pomat napotporhan gur amram am hat pati orhor gin gure ma da ban tahaya moh nih da ban meng naporit da ban tahayao. Gur da timbas hat patim da ban tahayamur.  
\v 2 Guragure pohon meng oh dindeipti ohe pe oh Got ohe Yahsup oh gure mutuhnong nahat napapatda da Krais ohe irat bok sur gartahatip ohe meng oh amram Arpinhe daham dindeipti ohe pe oh Yahsup oh gure mutuhnong nahat napapat. Gin gur ama ohnong daham napotinmur.  
\v 3 Gure kopenat Got ohe nita ma hatpa oh orhe Yahsup ohe kasip ohsi ohe nita ham yah hat indirimur. Gin ama yah hat indiri danong mandama Nuranure ina tei ohe yah hat indin ohe kasip ohsi yah hat patiru pateprimur daham ihaptida. Gure ama ihat da hut sapti da ohri mandatinmur.  
\v 4 Gure ma datiri oh be datirida. Noh Gur be na datirikin dahapatmur.  
\v 5 Got oh gurnong Ihir pohon meng oh dindeiptihe daham orhe Yahsup oh gure mutuhnong nahama wandeipti na wandeipti han namgipatda da Ihir yah meng oh arpinwa daham amraptihe daham inahapat. Basra. Gur orhe yah mengnong amram arpin mengwa dahatperhan inahapatmur.   
\p
\v 6 Epraham ohnong dahatinmur. Rih ma brak matpa oh Epraham oh Got ohnong arpin inahatin hatin hanhe dahatporhan Got oh Epraham ohnong Go nohnong arpinhe naporpat ohoh ihan noh oh ihat ma dahat pat ohe pe oh noh gonong Epraham go yah hat pat hanmur napormur potipmur rim brak matpamur.  
\v 7 Ihtin ohoh ihan Got ohnong arpin inahatin hatin hanhe ma dahapti han bap guroh Nuhur arpin Epraham ohe brer hatin hat pati ma hapat dahenmur.  
\v 8 Rih orhor ama brak matpa han bap ihir Kaput Got oh wan han bap Juda na hat pati ihirnong ihir Got oh arpin inahatin hatin han ma hapat dahatperhan ama ihat dahaya ihirnong Got oh Gur yah hat pati han bapmur poripramur. Imat ihirnong poripra ohoh ihan Epraham ohnong Epraham gwe ma ihat dahat pat ohe pe oh Got oh ihirnong gonsi bapkei mar yah deipramur por brak matpamur.  
\v 9 Ihtin ohoh ihan Epraham oh Got ohnong arpin inahatin hatin hanwa dahatporhan Got oh ma bapkei deisuhru gin gonsi dirnonghe Got ohnong Oh arpin inahatin hatin hanwa dahaya ohe pe oh arpin Got oh imat orhor bapkei nahapatmur.   
\p
\v 10 Ma brak matpa mengnong moh dahenmur. Gur sawa brak meng oh gonsi amranmur. Amrama tit meng tit na daham mandayahanoh ama ihya han gurnong oh Got oh heisup nahat napapatmur por brak matpamur. Ihtin ohoh ihan Noh sawa meng oh gonsi dimtipora. Dimtiporhan ama ohe pe oh Got oh nohnong Go yah hat pat hana napotiprawa ma dahapti guroh meng gonsi na dimtin ina hat pati ohoh ihan ama imat gonsi sawa mengnong na dindeipti ohe pe oh Got oh heisup nahat napapatmur.  
\v 11 Tit ma brak matpa moh dahenmur. Got oh inahatin hatin hanwa gidahapti han gurnongwi Got oh yah hat pat hanmur napora eimat paten da napripatmur por brak matpamur. Imat brak matpa ohoh ihan pohon mengnong dindeiyahanoh Got oh Ama han go yah hat pat han na naporpat ma hapat. Timbasnap ma hapat dahat patimur.  
\v 12 Moses ohe sawa meng dindeipti ohe pe oh Got oh yah hat pat hana napotiprohkin dahapti han ihir Jisas ohwi inahatin hatin hanwa dahapti ohe danong na hat patim ihaptimur. Na hat patim ma ihapti oh rih ma brak matpa mengnong moh daham ihaptimur. Ma brak matpa oh mamaru mat brak matpamur. Pohon meng oh tit meng na mandama gonsi dindeiyahanwi eimat paten dasi hatiprimur por brak matpamur.   
\p
\v 13 Dir pohon mengnong dimtipera dahapti orhor pomat na dindeipti ohoh ihan Got oh heisup nahat napapatmur. Ama da oh Jisas oh dara ama yan oh oh datipmur. Ohe ma heisup nahat napapat da oh ma datip oh mama brak matpa mengru hatin mat datipmur. Ma brak matpa meng oh Hanip sama Moh er han sutin han ma hapat daham irat boknong nang atpayahanoh ama irat boknong nang atpaya hannong oh Got ohhe heisup mat papat hanmur por brak matpamur. Ma brak matpa mengru hat orhor Got orhe bopor heisup nahat napapat da oh Jisas orhe sur gartahatip boknong matipmur.  
\v 14 Jisas oh rih Got oh Epraham ohnong Gwe Oh inahatin hatin hanwa ma dahat pat ohe pe oh noh Juda na hat pati han bap gonsi ihirnong bapkei mar yah deipramur ma potip meng oh dam ha timdinoh. Timama rih Got oh Yahsup oh ire mutuh matipramur ama giritip oh ohnong Ohwi inahatin hatin hanwa ma dahapti han ire mutuh oh dam ha timdinoh rima Jisas Krais oh Got orhe bopor heisup nahat napapat da oh datipmur.   
\s1 Got ohe rit natip mengsi; sawa natip mengsi ama meng yot oh  
\p
\v 15 Nohe taptema. Gur Got ohe rit natip meng oh ihat pat ma hapat daham ha am hatingwe rim diradire ma ihapti ohe meng tit napotiprohmur. Mamarumur. Yot han tit rit gosasara nang kak ohe tan mat brak mat sariyahan ama meng oh arpin tarpatipramur. Ama meng ohe boknong oh wan meng tit na dip mar ama meng orhorwi patepramur.  
\v 16 Amaru hat orhor Got oh Epraham ohnong rit asarisuhmur. Rit ma asarisuh oh tit oh Noh gorhe puh ohnong yah matipramur por rit atporhan ihir brak matpamur. Ma brak matpa oh gonsi puh ihirnong por na brak matpamur. Epraham ohnong Gorhe puh ohnongwimur por brak matpamur. Gorhe Puh ohnongwimur por ma brak matpa oh tit han Krais ohnongwi por brak matpamur.   
\p
\v 17 Nohe ma naporpat oh mamarumur. Got oh Epraham ohnong rit atporhan gahan krismas 430 birhima Moses ohe sawa meng oh napdapmur. Moses ohe kom sawa meng ma napdap oh rih rit asarisuhnong oh na amkatin hatinmur.  
\v 18 Got oh ihir sawa meng dindeiyahanoh nohe mamen mat apapat erer moh ihirnong apriprawa na dahapatmur. Ihat dahapatneng rit asarisuh mengnong sawa meng oh amkat patnengmur. Ihat na dahapat ohoh ihan Epraham oh sawa meng dimtiporhan apripora na dahama rih rit atip teio rima be orhe da orhor mamen mat apapat erer oh apdapmur.   
\p
\v 19 Kathei sawa meng ohe pe oh Got oh yah mat na napripato rim ihan kianorim sawa meng moh natip dahayahanoh mohnong dahatinmur. Hanip ire Got ohe danong amkar er hat sapti da oh am hat ha patengwemur. Am hat ha patengwe rim sawa meng ohe hrepdapat hat ha patengwe. Ihat patin Epraham ohnong gwe puh ohnong yah matipra por ma rit atip han oh sa apripra daham sawa meng moh natip ma hapat dahenmur. Sawa meng ma natip oh mutuh han Moses oh patin Got oh orhe atamreipti han enser ihirnong potporhan ihirdapat mutuh han Moses ohnong potperhan Moses oh brak mar natipmur.  
\v 20 Rit ma natip meng oh mutuh han oh timbasmur. Got orhor Epraham ohnong potipmur.   
\s1 Moses ohe sawa meng oh napaptesuh ohe meng oh  
\p
\v 21 Sawa meng oh ihtin meng ohoh ihan Got oh orhe rit nasarisuh mengnong ha amkatinoh rim sawa natipda. Basra. Na amkatin hatinmur. Got oh eimat paten dasi nahatin ohe sawa meng tit natipneng dir dimara ama ohe pe oh eimat paten ohe da oh haptinengmur.  
\v 22 Eimat paten dasi nahatin ohe sawa meng tit na natip ohoh ihan ma brak matpa meng oh Noh mong mong oh gonsi er dawi nang natpat napapatmur rim ma brak matpa mengru hat patimur. Got oh Ihir er nang ohe atpat apapat hrep dapat hat patim sawa mengnongwi amram dindeiptin noh ihirnong yah han bapmur na potipramur. Jisas Krais ohnong Ohwi inahatin hatin hanwa dahaya ohe pe ohwi rih ma rit atipru mat orhor Gur yah han bapmur potipramur oh dahat patin orhor ihir sawa hrepdapat hat pateshemur.   
\p
\v 23 Jisas ohwi inahatin hatin hanwa dahatin ohe da oh na apin patin ohoh sawa meng ohdapat nang natpam ohe hrepnong naham wanahat napaptesuhmur. Inahat napapatin gahan Jisas ohwi inahatin hatin hanwa dahatin ohe da oh pitap teinong matipmur.  
\v 24 Sawa oh ihat ma patesuh oh brer ihirnong sawa porpat han hatin hat patin Got oh Ihir ihat ha patengwe. Ihat patin Krais oh sa apripra. Oh apriporhan ohnong Ohwi inahatin hatin hanwa dahaya han ihirnongwi Gur norhe yah han bapmur potipramur daham sawa hrepnong mar paptesuhmur.  
\v 25 Imat Papatim gahan Krais ohwi inahatin hatin hanwa dahatin ohe da oh pitap teinong matporhan sawa meng ohe hrepnong nahat ma napapat sawa oh it orhe hrepnong na nahama orhor be patmur.   
\s1 Got ohe nita ham Krais ohe da hatin ham titwi hapti ohe meng oh  
\p
\v 26 Gin dir gonsi Krais Jisas ohnong ohwi inahatin hatin hanwa dahapti ohe pe oh Got oh Nohe brermur naporpatmur.  
\v 27 Napotporhan Gin nuhur Krais orhe nitamur rim tom waptimur. Orhor hatin ham orhe nitao rim tom waptimur.  
\v 28 Ihama dir Krais ohe nitao rim tit pokwi haptimur. Hapti Moh Judamur. Moh Grikmur. Moh be atamreipat hanmur. Moh hanip ire hrepnong hat na patim orhe teinong hat pat hanmur. Moh kuumur. Moh hanmur rim na tisariptimur. Jisas orhe nita tit bapwi hat pati ohoh ihan dir na tisariptimur.  
\v 29 Gur Jisas ohe nita gur ohoh ihan gur Epraham ohe puh gurmur. Epraham ohe puh bapo rim Epraham ohe rit atip da oh napripatmur.   
\c 4  
\s1 Got ohe nita hatperhan ma erer napripat ohe meng oh  
\p
\v 1 Nohe ma naporpat oh mamarumur. Brer ihir itapir ire pan oh datipri orhor kopen brer hat patin oh itapir ire hrep be atamreipti han bap ihir hatin hat patimur.  
\v 2 Kopen brer hat patin oh kat han ire bes tei pan erer oh apapayao brer irairnong papayao hat paptimur. Ihat patin itapir ihir kaput ama dik oh hatporhan nohe erer moh apripramur ma ritip dik oh hatporhan apriperhan dariptimur.  
\v 3 Dirhe ihat orhor kopen brer hatin hat patin kakdah hanip dire sawa meng ohe hrepdapat hat pateshemur.  
\v 4 Ihat patin gahan Got oh Noh adik darhetiprawa ma dahatip dik oh hatporhan arpin orhe brernong darhetipmur. Darhetporhan kuu uh brer ake hama itipmur. Itporhan Juda ire sawa meng hrepnong ham amrat patesuhmur.  
\v 5 Moses ohe sawa meng hrepnong ham amrat ma patesuh oh Ihir sawa meng hrep nang tatpat pati hatin hat pati moh noh arpit amdatpora. Arpit amdatporhan ihir Got ohe brer sa hatipri. Orhe brer ohoh ihan orhe at pat erer oh ihir sa datipri rima sawa hrepnong ham amrat patesuhmur.  
\v 6 Krais oh dire tapnong hat patim sawa meng arpit namdatip ohoh ihan dir ama ohe pe oh Got orhe brer haptimur. Orhe brer hat patim Got oh Gur norhe brero rim orhe brer ohe Yahsup oh dire mutuhnong namtiporhan ama Yahsup ohsi At Gota poriptimur.  
\v 7 Yahsup oh dire mutuhdapat patim At Got ma poripti oh orhe brer hat patim poripti ma hapat. Ihan dir be atamreipti han ihir hatin hat na pati ma hapat. Got orhe brer hat pati ohoh ihan orhe Norhe brer ihirnong apriprao rim mamen mat nat pat da oh dir datin inasi hat pati ma hapat dahenmur.   
\s1 Por oh Garesia ire boknong da darhetip ohe meng oh  
\p
\v 8 Rih gur Got orhe brer na hat patin gur ti sup ti sup mongsup dasuh got ire hrepnong hat pateshemur.  
\v 9 Gin ma patinong oh Got orhe brer hat patimur. Got orhe brer hat ma pati oh guragure da orhor orhe brer haptida. Basra. Got orhordapat orhe brer nahat napapatin orhe brer hat patimur. Ihat pati ohoh ihan gur nuhur kakdah sawa meng hrepnong hama amram dimtiperhan Got oh Go sawa mengnong dindeipat ohoh ihan go yah hanmur napotiprakin daham it sawa hrepnong hatperhan sawa meng it nang natpat ha napaptenoh daham ihaptida.  
\v 10 Gur ihtiperimkin ihapti. Gure ma ihapti oh Juda ire Sande diko hayop diko krismas diko ohnong isip mar ma rishe ohe mengnong dindeiptimur.  
\v 11 Gur imat ma dindeipti moh nohe ma naporpat meng moh be gurnong na napanggeitin meng hatin deiptio rim noh da ruumsup hapatmur.   
\p
\v 12 Nohe kasip hat naporpat mengnong moh nohe taptem gur amratinmur. Noh Juda nuranure sawa meng hrepdapat hat patdapat noh sawa mengnong mandama be han bap gur hatin hat patmur. Ihtin ohoh ihan gurhe Juda nure sawa meng hrepnong hapri. Nohe ma hat patru hat indinmur. Noh gursi patina gur nohnong na inaham yah mat napapinpamur. Ginhe imat ma napaptesheru nahat orhor napaptenmur.  
\v 13 Gur am hat patimur. Nohe kopenat ma apdap oh noh sik hat patim apdapmur. Aprisa gurnong yah meng oh napot indipmur.  
\v 14 Nohe ina bok moh sik ham tihet patin orhor ma napot indip oh dasei nahatin hatin sik nohe boknong hat patin orhor gur nohnong dasei naham kom na natpamur. Kom na nasara Got ohe atamreipti han enser ihirnongo Krais Jisas ohnongo ihirnong ha amburiya hatin hat amam hat nambutpamur.  
\v 15 Amam hat ma nambutpa da oh arpin mihat dahatpamur. Guragure kin oh pet nohnong napriya hatin hama amam isip ham nambutpamur. Ihtipa ohoh gin amam hat ma nambutpa da oh ginwa.  
\v 16 Noh arpin meng ma naporpat ohe pe oh gur Oh mahaw han ire meng naporpat hatin mat naporpatkin dahaptida. Basra. Imat na naporpat ohoh ihan ihat dahapri.   
\p
\v 17 Kat han ihir apris gurnong ambar meng ma naporipti oh Nure danongwi ha hatingwe. Hapti Por ohnong mandama nure danongwi hat ha patengwe rima gurnong ginaporiptimur. Ama ihat ginaporipti bap ihiroh gure danong haya hatin ham naporipti orhor gure danongwi hat patim na ginaporiptimur.  
\v 18 Noh patindo na patindo ihirdapat Gur yah hat ha songwe rim gure danong ham napanggeitin ambar meng naporiptihanoh oh yahmur. Ihir nohe rumkingnongwi wanaham gurnong napanggeitin meng naporiptihanoh oh ermur.   
\p
\v 19 Nohe brera. Gure da oh Krais ohe da hatin isip hat ha songwe rim noh kuu ire brer ake suya ohe batbet hatin hat patmur. Ihtin batbetsi hat patin orhor Krais ohe danong hatin ohe da oh orhe da hatin hayarit noh gure danong ham ma batbet hat pat moh timbas hatipramur.  
\v 20 Noh gur ihat saptio rim noh ina ruumsupsi ham da dokdok sarpatmur. Da dokdok sara inahatin meng hatin mama napor moh noh apris diradir tap tei patim orhor ahar yah meng tei orhor napotiprohnengo dahapatmur.   
\s1 Got ohe dik atip meng yot oh  
\p
\v 21 Gur Jisas ohwi inahatin hatin hanwa dahapti orhor gur Nuhur sawa meng hrepnong hat patepriwa dahaptimur. Ihat dahapti han gur ama sawa mengnong oh pomat sama na dahaptida.  
\v 22 Sawa mengnong pomat sama dahaptineng Epraham ohe ma ihasuh oh mihat pat ma hapat dahaptinengmur. Ohe ma ihasuh oh mamarumur. Epraham oh kuu yot hanmur. Duupsin kuu uh nang na tatpat pat kuu hatin hat imap ohe hrep oh patesuhmur. Gahansin kuu uh nang tatpat pat kuu hatin hat duupsin kuu urhe hrepdapat orhor urhe atamrein patesuhmur. Ihat patim gahan inap yot ihit mon yot itpamur.  
\v 23 Mon yot ma itpa oh nang tatpat pat hatin hat ma patesuh kuu uhe oh be manhem itip brermur. Nang na tatpat pat hatin hat patesuh kuu uhe brer oh Got orhor Gut gamin brer mon tit manhem itiprimur por rit atip brer itipmur.   
\p
\v 24 Kuu yot moh Got orhe dik atip meng yot hatin hat pateshe kuu yot ihitmur. Nang tatpat pat hatin hat ma patesuh kuu uh Sainai yei ka Got ohe dik ma natip meng hatin hat patesuh kuu uhmur. Ama Sainai yei ka dik natip meng oh gahansin kuu Hega uh hatin hat pat ohoh ihan ama sawa meng hrepnong hat ma pati ihiroh urhe ma nang tatpat patesuh ohe tan hat patimur.  
\v 25 Sainai yei ma Arebia mong pat oh Hega urhor hatin hat patmur. Jerusarem ap mutuh ma pathe Hega uh hatin hat patmur. Ihat pat ohoh ihan Moses ohe sawa meng hrepdapat hat pati bap ihir Hega urhe atamreipti han bap hatin hama urhe hrepnong ham nang tatpat pati bap hatin hat patimur.  
\v 26 Oh kakdah ohe Jerusarem ap mutuh ohmura; aw tei ohe Jerusarem ap mutuhnong oh duupsin kuu Sera uhe nang na tatpat patesuh ohe tan hat nang na tatpat pat ap mutuh ohmur. Ama ap mutuh oh dire em hat patmur.  
\v 27 Ama ap mutuh yotnong meng kis mar ma brak matpa meng oh mamaru hat patmur.  
\q1 Han ohdapat namdapat kuu go brer ruumsansi hatipramur. Han ohdapat na namdapat kuu go brer pangsi hatipramur. Ihtipra ohoh ihan han ohdapat namdatporhan brer na sar kasip hat pat kuu go brer ake nim batbet na darpat kuu go kaput Noh brer ruumsansi hatipra ma hapat daham amam ham deinin ga rimo ham patenmur.  
\m por ama Jerusarem ap mutuh yotnong oh ihat patimur rim kis mar brak matpamur.   
\p
\v 28 Gin norhe taptem gur Epraham ohe brer yotnong oh daham Nuhur Got orhe rit atip brer Aisak oh hatin hat pati ma hapat daham am hat patenmur. Tit oh mohnong dahenmur.  
\v 29 Rih gahansin kuu urhe be itip brer ohdapat duupsin kuu Got orhe Yahsup oh uhnong kasip matporhan itip brer ohnong oh mahaw hatin mar indeisuhmur. Amaru hat orhor gahansin kuu uhe brer hatin hat ma pati ihirdapat duupsin kuu uhe brer hatin hat ma pati dirnong mahaw naham inahaptimur.  
\v 30 Mahaw naham inahapti han ihirnong dir kinhatper dahayahanoh mama brak matpa mengnong moh wamar dahatinmur. Mamarumur. Nang na tatpat pat hatin hat pat kuu urhe brer ohwi itap ohe pan erer oh datipramur. Nang tatpat pat hatin hat patesuh kuu uhe brer oh itap ohe pan erer oh eimat na datin han hatipramur. Ihan itait imannong wan mongnong er mar darhetinmur por brak matpamur.  
\v 31 Ihtin ohoh ihan nohe taptem gur ama kuu yot ihitnong daham Nuhur gahansin kuu nang tatpat patesuh kuu uhe brer ihir hatin hat na pati ma hapat. Nuhur duupsin kuu nang tatpat na patesuh kuu uhe brer hatin hat pati ma hapat daham patenmur.   
\c 5  
\s1 Krais ohsi tap hat ma pati oh nang tarpit pati hatin hat pati ohe meng oh  
\p
\v 1 Sawa meng oh dirnong nang ohe tan natpam ohe hrepnong nahat napapatin Krais oh nang narpit namdatipmur. Ma namdatip oh nang tarpira nang na tatpat pati han bap hat orhorwi ha patengwe rim nang narpit namdatipmur. Imat narpit namdatip ohoh ihan gur it sawa meng hrepnong ham nang tatpat pati bap hatin hatipririm kasip hat orhor patenmur.   
\p
\v 2 Gin Por norhe ma napotiproh meng moh gur amratinmur. Kat ihirdapat gurnong Gur eit watah oh gatdeiyahanwi yah han bap hatiprimur naporiya mengnong oh gur amram Yahwa. Nagatmatina poriyahanoh Krais ohe dirnong napanggeim ma haputipnong oh dam timbas na napanggeitin ina mar ihaptimur.   
\p
\v 3 Noh it kasip meng tit napotiprohmur. Gur Nuhur eit watah gatdein ohe sawa meng moh amratper dahatperhan ihir nagatdeiyahanoh ama han bap gur gonsi sawa meng ohe hrepnong hatinmat ihaptimur.  
\v 4 Gur Nuhur sawa meng mohwi dimtiperhan Got oh nuhurnong Gur yahnap hanmur napotiprohwa daham dindeipti han gur Got oh orhe da orhor Yah matpora daham yah nahapat ohe hrepnong mandama kot dahdapat hat pati bap gurmur.  
\v 5 Gure ihat dahaptimura; Nure ma dahapti oh Got orhe Yahsup ohe inahapat ohe pe oh Got oh dirnong Gur yah han bapmur napotiprawa daham Oh arpin inahatipra ma hapat daham amam hat orhorwi minhan patimur.  
\v 6 Jisas Krais ohsi tap hat ma pati dirnong oh Got oh eit watah gatmatperhan ama gatdeiya ohe pe oh Go yah hanmur naporpatda. Na gatdeiyahanhe ama na gatdeiya ohe pe oh Go yah hanmur naporpatda. Basra. Ama gatdeiya na gatdeiya hapti ohe pe oh na ginaporpatmur. Jisas Krais ohe tapnong hat patim Ohwi inahatin hatin hanwa daham ihirnong bopor mar panggeipti ohe da ohwi Got oh wanaham Go yah hanmur naporpatmur.   
\p
\v 7 Gur Krais ohwi inahatin hatin hanwa dahat sapti da oh yah hat saptin gahan nih apris gure arpin meng amraptinong oh nagatmatir.  
\v 8 Gurnong Ihir nohe nitamur ma naporpat Got orhor gurnong We. Ama meng oh amrapri napor nagatmatirda. Basra. Hanip ihirdapat nagatmatirimur.  
\v 9 Ma nagatmatiri oh mama ripti meng moh hatin mat orhor nagatmatirimur. Bret pipirpat han garpok itiproh orhor bret gonsi oh pipirpat han ohsiwi hat pat hatiprohmur riptimur. Amaru hat orhor er meng oh gar meng tit naporiptin orhor ameng oh gure mutuh oh isip hatporhan aprin mengnong kapkap mandatin ina haptimur.  
\v 10 Gur ihat dahat pati orhor nohe da oh Diradir Krais ohsi tap hat pati han bap dir ohoh ihan nohe ma dahapat da hatin hat orhor gurhe ihat dahat patepri ma hapat. Wan da na hatipri ma hapat dahapatmur. Ama da ban nahapat han ohnong oh orhe gurnong ma da ban nahapat ohe pe oh orhornong wamtipra ma hapat dahapatmur. Ama han oh sa winsi han hat pathanhe gurnong ma da ban nahapat ohe pe oh orhornong pe wamtipramur.   
\p
\v 11 Nohe taptem gur dahatinmur. Nohnong Oh eit watah gatdeipti mengsi irat bok sur gartahatip ohe meng ohsi yot mat orhor mat porpatmur ma naporipti oh mohnong daham Oh imat na porpatin orhor ohnong be giporipti ma hapat dahenmur. Noh eit watah gatmatin ohe mengsi; irat bok sur gartahatip ohe mengsi yot mat porpatneng ihir nohnong heisup naham ina ruumsup oh nohe boknong na haptinengmur. Ihir nohnong ina ruumsup ma napripti oh Oh imat yot mat na porpat ohe pe oh orhornong ina ruumsup apripti ma hapat daham am henmur.  
\v 12 Gure danong naban deipti han ihir eit watah gatmatina naporipti ohe pe oh ihan iraire tangges gwehe hwet ha mandatingwemur.   
\p
\v 13 Nohe taptem gurnong oh Krais orhor Gin gur norhe han hat patenmur napor nang arpit namdatporhan gin dir orhe han hat patimur. Ihat patim gur Nuhur Krais ohsi tap hat pati ma hapat. Nuhurnong er yan na napripra ma hapat. Ihan nuranure dahat pati dawi hat sasipera dahat sasipri. Arwananah ihirnong bopor mar panggeit pisashenmur.  
\v 14 Sawa meng gonsi ohe duuptei kamen meng oh titwi mamaru hat patmur. Gorhe ina boknong ma bopor deipatru mat orhor arwanahah ihirnonghe imat orhor bopor mat paptenmur.  
\v 15 Na bopor mat paptem kotwa ire bopor hatin hama ga tatwi ayahanoh ama ohe pe oh tap hat timbas hatiprimur. Ihan ihat sasipri. Yah da orhor bopor goshat patenmur.   
\s1 Yahsup oh damsi nahapat ohe meng oh  
\p
\v 16 Nohe ma naporpat oh mamarumur. Gure mutuh Yahsup ma naporpat meng danong ohwi amram dindeiyahanoh ina teimdapat Noh ihtiprohneng noh ihtiprohneng daham er danong hat na sasiprohemur.  
\v 17 Yahsup ohe da oh orhe gonmur. Diradire ina teimdapat Noh ihtiprohneng noh ihtiprohneng daham er da tarpam sapti da orhe gon hat patmur. Ihtin ohoh ihan itait mahaw goshat patimur. Ihan diradire yah danongwi hat sasipra dahatin da oh kinhat ihat yah hat sasiprohe.  
\v 18 Ihtin dasi nahat pati orhora; Yahsup ohe naporpat ohe meng oh amram dineiyahanoh sawa meng nang natpat pat han ohe hrepnong na hat patimur.   
\p
\v 19 Diradire er hat sus ihapti da oh pitap teinong hat patin wamar am haptimur. Pitap teinong hat patin ma wandeipti oh tit bisei saw hapti da ohmur. Tit mian imah da hatin hat bisei saw hapti da ohmur. Tit bisei saw danong kin taper sapti da ohmur.  
\v 20 Tit dasuh got ihirnong armi maro dahamaro hapti da ohmur. Tit amkimon hapti da ohmur. Tit mahaw goshapti da ohmur. Tit inggoshapti da ohmur. Tit kat ire ihyanong asoh awamara ma abopor deipti da ohmur. Tit heisup gosham ma tandarpam gusupti da ohmur. Tit Nohwi ihtin han hat patepora ma dahapti da ohmur. Tit sakarap goshapti da ohmur. Tit katket tahat ma pati da ohmur.  
\v 21 Tit er da orhap dahapat da ohmur. Tit er tom dam ma da ban tahat sapti da ohmur. Tit tarmuriya tei ma tohor meng goshat sus ma mian imah ire da hatin hat sapti da ohmur. Ama ihtin da muk oh diradire ma er hat sapti da muk ohmur. Ama ihat sapti han gurnong noh rih kasip mengtei napotipru ginhe it mama napor ohmur. Gur kaput Got ohe napapindin hrepnong na hatinmat ihaptimur.   
\p
\v 22 Oh diradire er hat sapti da ohmura; Got orhe Yahsup oh dire mutuhdapat patim dam tit pokwi hapatmur. Dam tit pokwi ma hapat oh tit hanipnong bopor mar panggeipti da ohmur. Tit amamsi da hat pati da ohmur. Tit manap da tei ma pati da ohmur. Tit ahar dahapti da ohmur. Tit ihirnong panggeitpora daham panggeim yah da ma apripti da ohmur. Tit arpin dasi hat ma sapti da ohmur.  
\v 23 Tit ahar manap da ohmur. Tit er da oh ihtin ina da nahatporhan baso potin ina hat pat da ohmur. Ama da gonsi oh Yahsup oh dire mutuh pat ohe dam titwi ohmur. Ama ihat pati danong oh tit sawa meng oh Gur ama da ohri ihat sasipri na napotiprohmur.  
\v 24 Krais orhe nita dire ina teimdapat ma tarpapat er danong oh irat bok sur gardeiya hatin mar mandaptimur.  
\v 25 Ma ihat pati bap dirnong oh Yahsup oh dipwi yah hat paten dasi nahapatmur. Inahapat ohoh ihan gur orhe ama ihat paten da nahapatru hat orhorwi saya apriya hat indinmur.  
\v 26 Ihan gur Nohwi ihtin hanwa daham arwananah ire danonghe aer deipri. Ire ihya danong asohhe abopor deipri. Ihat ayahanoh er ohoh ihan ihat patepri. Yah hat orhor patenmur.   
\c 6  
\s1 Gospanggeipti ohe meng oh  
\p
\v 1 Nohe taptem Yahsup oh yah mat napapat han gurdapat wandeiyaoh guragur tit uh tit er hat sus ambir tapan pat hatin hat pathan gur Got orhe nita moh noh panggeitpora daham ahar daphoma yah teinong matinmur. Nohe boknonghe ihtin da nahatipra daham ahar inin hat patim orhor arpim yah teinong matinmur.  
\v 2 Guragure ruumsup hat pati da oh gospanggeit sashenmur. Ihat ma sapti oh Krais orhe napotipru hatwi saptimur.  
\v 3 Gur ihtin han hat na patin orhor guragure damdapat Noh ihtin hanmur dahayahanoh guragure danong dasuh deiptimur.  
\v 4 Ihan gorhe ihpat da oh pomat sam dahenmur. Daham amam henmur. Ire ma ihaptinong asohhe asama Ihir ihat patihe. Nohe ma pat oh ire ihat pati da moh hatin hat na pat moh noh yah hat pat ma hapat daham sapri. Gorhe ma ihat patnongwi daham satinmur.  
\v 5 Sama gorhe da oh er hat pathanhe gorhor yah tahatinmur.   
\p
\v 6 Gur guragurnong meng am nahapti han ihirnonghe guragure yah han erer oh kat tit ihirnong aprishenmur.   
\p
\v 7 Gur nure ma ihapti da oh dam na timdiprakin dahapri. Basra. Got ohnong na dasuh matin han ohoh ihan gur ihat dahapri. Dire dahe irat gwe ma sakmatperhan ama han orhor dam timapat hatin hat pati sa dahenmur.  
\v 8 Amaru gur ina teimdapat Noh ihahneng ihahneng dahapti er da apripathanhe Gin noh ama apir danong oh hatpora daham ama ina teimdapat apir er danong oh dindeiyahanhe gur er irat gwe sakmatperhan ma er dam timapatru hatin hat orhor er dam timdipramur. Er dam oh ihat timama timbas nahatipramur. Yahsup orhe naporpat danong moh amram dimtipora daham dimat ayahanoh ama ihya ohe dam timapramur. Dam ma timapra oh Yahsup oh eimat yah hat paten dasi nahatporhan eimat yah hat paten dasi hat pateprimur.  
\v 9 Gur arwananah ihirnong asoh yah da apris panggeitin ohe danong oh garhapri. Ihirnonghe kasip ham pan hat orhorwi panggeit paptenmur. Na garham imat panggeipti tei oh kaput dam timdiporhan datin oh gurhe yah dam datiprimur.  
\v 10 Ihtin ohoh ihan panggeitin hatin hat ma pati ihirnong asohhe gonsi panggeinmur. Panggeitinmat oh Got ohwi inahatin hatin hanwa ma dahapti han ihirnong oh isip mat orhor panggeinmur.   
\s1 Por ohe irat bok sur gartahatip ohe danong isip mat patesuh ohe meng oh  
\p
\v 11 Gin gur wamtinmur. Norhe bes tei brak dei moh isip gon isip gon mat mama nabrak dei ohmur.  
\v 12 Kat han ihirdapat kasip mengtei Gur eit watah gatmatin ma naporipti han bap ihir Nuhur Krais ohe irat bok sur gartahatip meng mohwi pot ayahanoh nitiprikin daham eit watah gatmatin ohe mengnong isip deiptimur.  
\v 13 Moses ohe sawa mengnong ma pomat dindeipti han ihiroh de ihira. Eit watah gatmatin ohe danong dindeipti han ihirkin dahapri. Basra. Sawa meng oh pomat dimtinmur naporipti orhor irairnong oh pomat na dindeipti bap ihirdapat gurnong ginaporiptimur. Ma ginaporipti oh gur eit watah gatmatperhan ama han ihir susa Nure mengtei ihat eit watah gatdeiyahe ritperhan ihir amrama dire winnong isip mat ha napisashengwe rim ihaptimur.  
\v 14 Nohra ama be mengnong oh isip mar na daptuhurpatmura; Nohe ma isip mar daptuhurpat oh Jisas Krais ohe irat bok sur gartahatip ohe danongwi ha isip hatinoh rim ihpatmur. Nohe da oh Jisas Krais ohe irat bok ma sur gartahatip oh kakdah mohe erer gon moh sur gartahat pat hatin hat pat ma hapat. Ihan ama ohe erer ohe danong na hat patmur. Ihat pat ohoh ihan noh Krais orhe danongwi isip mat paptepora daham isip mat papatmur.  
\v 15 Ihan eit watah gatdeiyao na gatdeiyao ma hapti oh oh be teiwi ihaptimur. Got orhe ma kopenohe inasi naham kopen han ma nahapat ohe da ohwi isipnap hat patmur.  
\v 16 Ihat ma dahapti han mong mong ma pati han gonsi gurnong oh noh Got ohnong At Got go gorhe damdapat Yah matpora daham ma yah deipat dao manap goshat paten ohe dao oh gorhe brer gonsi ihirnong apris paptenmur por Got ohnong nadahandeipatmur.   
\p
\v 17 Ihir nohnong Jisas ohe hanmur napor ruumsup naham ma nitpa ohe si oh pat ohoh ihan gur nohnong it si teinong moh niya hatin naham ruumsup naprisipri.   
\p
\v 18 Gin at Got go Hanipyah Jisas Krais orhe damdapat Yah matpora daham ma yah deipat da ohsi norhe taptem ihirnong yah mar paptenmur por mama nadahandeipat ohmur. Arpinwa.