\id EPH - Oksapmin NT [opm] -Papua New Guinea 1992 (web version -2014) 
\h Epesas 
\toc1 Epesas ihirnong Por oh brak atip ohe meng oh 
\toc2 Epesas 
\toc3 Ep 
\mt1 Epesas  
\mt2 ihirnong Por oh brak atip ohe meng oh  
\ip Por oh Hanipyah ohe meng oh pot pisapatin ihir ama meng pot pisapat ohe pe oh karapus matperhan oh karapus ap amdapat patim Hanipyah Jisas ohe nita hat pati bap winsi Epesas ap mutuho ama mong ohe aptei apteio ihir sam ha dahatingwe rim mameng moh brak mat adarhetipmur.  
\ip Mameng rim ma brak mar adarhetip oh Hanipyah orhor dirnong nambura orhe hrepnong naham tit inawi nahat napapat ma hapat ha dahatingwe rim brak mar adarhetipmur.  
\c 1  
\p
\v 1 Por norhor meng oh gurnong mama brak mar nasarpat ohmur. Got orhe da orhor nohnong Go Jisas Krais ohe meng pot pisashen hanmur napor nohnong kis nahat napapatin noh mama ihat sapat ohmur. Ama ihat sapat han norhor Got orhe nita kuuhan gur Krais Jisas orhe tapnong hat patim Got orhe danong na mandama orhe danongwi kasip hat pati kuuhan gurnong mama brak mat nasar ohmur.  
\v 2 Ama ihat pati kuuhan diradire at Gotsi; Hanipyah Jisas Krais ihitnong Gut taman Epesas aptei gutagute nita hat pati bap ihirnong gutagute damdapat orhor Imat yah matpera ma dahapti da ohsi; manap gosham yah hat pati da ohsi apris paptenmur por noh nadahandeipatmur.   
\s1 Krais orhe imtip dap teidapat oh dirnong yah nahapat ohe meng oh  
\p
\v 3 Diradire Hanipyah Jisas Krais orhe itap oh Got ohmur. Orhe Gothe itap Got orhormur. Ama Got orhor dirnong Maihir Krais orhe tapnong hat pati bapo rim orhe aw tei mahat papat yah da oh gonsi dire danong nabapkei mar napripatmur. Dirnong orhor imat napripat han ohoh ihan dirhe orhe winnongwi adaptuhur armi mat paptenmur.  
\v 4 Ama bapkei naham napripat da oh rih orhor mong kopen na darpat patin orhor Got oh dirnong Maihirnong kaput krais orhe dap teidapat norhe nita bap matipramur. Indeipat norhe hannap matporhan ihir yah hat ongeng tahat orhorwi saya apriya hat paten han bap mat paptepramur daham ihat paten han bap nahat napapatmur.  
\v 5 Ihat paten han bap nahat ma napapat oh dirnong rih orhor isip bopor nahama orhe da orhor Noh kaput Jisas Krais orhe dap tei oh ihirnong norhe brer mar paptepramur daham kis nahat napaptesuhmur.  
\v 6 Imat kis mat napapatdapat Noh norhe bopor mat papat mon orhe dap tei mamdapat ihirnong imat yah da apripora daham orhe damdapat Noh ihirnong imat yah matpora ma dahapat da oh yah mat orhor napripatmur. Ihat orhe damdapat daham napripat han ohoh ihan orhornongwi win adaptuhur armi mar paptepera daham orhe winnongwi adaptuhur armi mar paptenmur.  
\v 7-8 Orhe imat ma bopor nahatip oh mon Krais orhor dire gwemat haputipmur. Hapura orhe heim ohsi dire er da tein tahat patim ma er hat sapti danong moh orhordapat dat namdam yah da teinong nahat napapatmur. Inahat ma napapat oh Got orhe er yan napripra ma dahapat danong oh natimbas deipatmur. Imat er da dat namdam ma napapat oh Got orhe damdapat Imat yah matpora daham ma yah nahapat da oh isip mat bapkei mat papatin ohoh ihan isip mat orhor napripatmur. Imat isip mat napris napapatin ama da ohsi dakuu hayao da tanpet indin ina dasi hat hayao hat patimur.  
\v 9-10 Got orhor imat napapatin orhor orhe da orhor Noh kaput Krais orhe ma imtipra dap tei oh noh kakdah ohe erero putei ohe erero oh gonsi tit dawi deipat Krais orhe hrepnongwi mar orhornong kakhan matipramur dahatipmur. Orhe hrepnongwi matiprawa daham ma reman patesuh da oh gin pitap teinong matipmur. Ama pitap teinong matip da oh orhe ma dahatip dik oh hatporhan dam timama mamen matipramur.   
\p
\v 11 Got orhe ihtipora ma dahapat da orhorsi dam mat pisapatmur. Dam mat pisapat ohoh ihan orhe Noh Krais ohe ma imtipra ohe dap teidapat noh ama ihirnong norhe brer matiprawa ma dahatip da orhor arpin orhe brer nahat napapatmur.  
\v 12 Ma inahapat oh Juda hat pati nuhur kopenat orhor orhe danong ham Yah nahaprawa daham Krais orhe tapnong ham ma minhan pati nuhur orhornong armi mat orhorwi ha paptengwe rim inahat napapatmur. Inahat napapatin nuhur orhornongwi armi mar paptimur.  
\v 13 Gin Juda na hat pati bap gurhe ihat orhor Got orhe it nambur yah nahatin ohe arpin meng oh napotperhan gur amrama Krais ohwi inahatin hatin han ma hapat daham Krais orhe ma imtip ohe dap teidapat gin gurhe Got orhe brer hatirimur. Orhe brer hat patin Got oh ihirdapat wanaham Moh Got orhe nita ma hapat ha dahatingwe rim orhe Yahsup oh kaput napripramur ma ritip Yahsup oh dirnong ket tup saripti ohe tan mat kis naham napin napapatmur.  
\v 14 Imat ma napin pat Yahsup oh dirnong imin ohri napin patmur. Ma napin pat ohe pe oh Imin mohri nure bok pat ma hapat. Kaput erer napripra ma ritip oh arpin dam datipri ma hapat. Got orhe han nahat napapat dirnong oh arpin nambura orhe tapnong nahatipra ma hapat dahaptimur. Ama inahat napapat han orhorwi has yah dasi han ohoh ihan dir orhornongwi armi mat paptepera dahat patenmur.   
\s1 Por oh Epesas ire paten meng oh Got ohnong adahandeisuh ohe meng oh  
\p
\v 15 Kat han ihirdapat Epesas aptei ihir Jisas orhorwi inahatin hatin hanwa dahat patimur. Gidaham Got orhe nita kuuhan ihirnong da apris bopor deiptimur ritperhan  
\v 16 noh amrama Got go wes ihirnong ihtin dasi mat papato rima noh Got ohsi mengir ma nadahadeipat oh dipwi weso por nadahandeipatmur.  
\v 17 Noh Got ohnong gure ihat pati meng ma nadahandeipat oh At Gota. Has yah dasi han go nure Hanipyah Jisas Krais ohe Gotmur. Ihtin han Got go ihir Got oh Ihtin han Got pat ma hapat ha dahatingwe rim go gorhe Yahsup ohsi ihirnong da tanpetin dasi mara dakuu deio mat paptenmur por noh Got ohnong nadahandeipatmur.  
\v 18-19 Nadahamara Got go ire danong adapem paptenmur. Imat adapem papatim gorhe ihirnong Noh gurnong yahnap han tit ma napripranong oh amam ham minhan patenmur ma potip ohe da ohsi mat paptenmur. Gorhe nita kuuhan ihirnong yahnap han apriprawa ma dahatip da oh isip yahnap tit nahatipra ma hapat dahat indin ohe dasi mat paptemo gorhe danong hat pati nure mutuhnong oh wanohe kasip ohsi nahat napapat ma hapat dahatin ohe dasi mat paptemo mat paptenmur por noh Got ohnong nadahandeipatmur.  
\v 20 Wanohe kasip ohsi dire mutuh ma tamreipat oh rih Jisas oh haputporhan Got orhor ama kasip ohsi pamsasa orhe putei mahat armisi bes oper tannong ma mat mandatip ohe kasip ohmur.  
\v 21 Ama ohe kasip ohsi oh kakdah ohe duuptei hano putei ohe kasipo gin winsi han hat ma patio kaput winsi han ham ma pateprio ama ihat pati gonsi ihirnong orhe hrepnong mar orhor papatmur. Imat papat ohoh ihan ihir orhe hrepdapatwi hat patimur. Orhorwi winsi han hat patim orhe hrepnongwi mar papatmur.  
\v 22 Got oh erer oh gonsi Krais orhe kasip hrepnongwi mat mandapat Gin go norhe nita sios ire kakhan hapat erer gon mohsi gorhe hrepnong mar wamat paptenmur por ihat papten kakhan matipmur.  
\v 23 Imat kakhan matip han Jisas Krais oh aw pe mong pe mong mong moh gonsi patwimur. Mong mong moh gonsi patim erer oh gonsi yah deipatmur. Ihat patin orhe nita diroh orhe boknong ham dam inasi mar yah deiptimur.   
\c 2  
\s1 Krais ohe tapnong naham napamsas napapat ohe meng oh  
\p
\v 1 Rih Juda na hat pati gure ma pateshe oh Got ohe meng oh na amratiprohe daham er danong ham Got orhe danong hatin ohe da oh hapuriya ohe tan hat pateshemur.  
\v 2 Er danong oh ihat patim gur kakdah mohe er hat sapti danong dindeiyao aw tei mahat ma pat han duuptei er han ohnong dindeiyao hat pateshemur. Ama dindeishe duuptei han oh Got ohe meng na amram sakarap deipti han ire mutuh oh kasip mat papat kakhan ohmur.  
\v 3 Gurwi ihat pateshe basmur. Diradir gonsi tap hat ina teimdapat tarpam Noh ihtiprohnengo daham ma ihapti danong dimar patin ihat sashemur. Dir ihtin dawi hat saptin Got orhe bopor heisup oh kakdah han ihirnong mat papatru mat orhor dirnonghe ama ihtin dasi nahat orhor napaptesuhmur.   
\p
\v 4-5 Dir ihat er da ohe hrepdapat ham Got ohe danong hatin ohe da oh haputin hat patin orhor Got orhe bopor naham hinhina nahapat da oh isip hat patim ohoh Krais orhe tapnong naham paten dasi nahatipmur. Got orhe ma inahatip oh orhe damdapat orhor Noh imat yah matpora daham nambutin inasi nahat napapatmur.  
\v 6 Inahat ma napapat oh Krais orhe tapnong hat patio rim Krais ohsi tap mat napamsasa Krais orhornong Putei mahat oh go armisi tei moh tongnotina ma potip armisi tei oh dirnonghe Gurhe Krais ohsi tap hat tongnotina napor orhor napapatmur.  
\v 7 Ihtin han bap nahat ma napapat oh Got norhe damdapat orhor Ihirnong yah matpora ma dahapat da mohri wanohe yahnap na wandeipti da moh Jisas Krais orhe boknong mar pinggitpora. Pinggitporhan han puh han puh hat ma sasipri han ihiroh am hat sa sasipri rim dirnong ihtin han bap naham napapatmur.  
\v 8-9 Ama orhe damdapat Yah matpora daham ma namgitip da ohsi namburpatmur. Hanip dirardire kasip hat saya ohe peo yah hat saya ohe peo ama ihat saya ohe pe oh Got oh na namburpatmur. Ohwi inahatin hatin hanwa dahatperhan orhe damdapat Noh ihirnong imat yah mar ambutpora dahapat da ohsi dirnong namburpatmur. Imat dirnong namburpat ohoh ihan dir kinhat diradire yah hat saya ohe pe nambur napapatmur rim armi tahatiprohe. Ihat armi tahatin da oh timbasmur.  
\v 10 Orhor nambutin inasi nahat napapat moh rih orhor Got oh Krais Jisas orhe tapnong hatipri bap ihir mama yah da mama yah danong hat sa sasipri daham ama yah da oh mamen mat natipmur. Mamen mat nasara ama mamen mat natip yah danong hat sashen ohe inasi naham kis naham napapatmur.   
\s1 Krais oh tit bapwi nahatip ohe meng oh  
\p
\v 11 Gure rih ma pateshe oh dahatinmur. Rih Got ohe nita bap Juda nure tapnong na hat patin nuhurdapat gurnong Nuhur eit watah gatdeipti ohoh ihan nuhurwi Got ohe nita bap hat patimur. Gur eit watah na gatdeipti bap ohoh ihan gur Got orhe nita basmur naporishemur. Imat naporishe orhora; hanip diradire bes teidapat ma ihyanong Nuhurwi Got ohe nita bapmur naporishemur.  
\v 12 Gure ma ihat pateshe oh Krais orhe tei gurarhe tei hat pateshemur. Gurarhe tei ihat ma pateshe oh Got orhe nita Isrer nure tapnong hat na patim Got ohe tapnong hatin ohe da oh gur hohop han bap hatin hat pateshemur. Ihat patim Got orhe Noh gurnong inahatipramur napor rit natip meng oh nure boknongwi naham rit natipmur. Gure boknong timbasmur ginaporishemur. Ma ginaporishe ohe pe oh Got oh kaput inahatipra daham amam ham ma minhan pati da oh gur hanhan hat pateshemur. Hanhan hat patim arpin Got ohnong hanhan hat pateshemur.  
\v 13 Ihat hanhan hat patim gahan ginnong oh Juda na hat pati gur Jisas Krais orhe heim tanduketip ohe dap teidapat orhe tapnong haptimur. Krais orhe tapnong hatperhan orhordapat gure rih Got ohe duupnong na ham meihdapat hat ma pateshe oh gin Jisas orhor nambur napisusa itap Got orhe duupnong nahat napapatmur.   
\p
\v 14 Inahat ma napapat oh Juda hat pati han nuhursi; Juda na hat pati han bap gursi mahaw gosham dohosi ham apet goshat patin gahan Krais orhor dire ihat pati mutuh doho oh naurkamara diradir da gosar manap goshat indin dasi naham tit han bapwi nahat napapatmur.  
\v 15 Yot bap hat pati bap dirnong oh tit bapwi nahatinmat oh Juda nure pohon sawa meng oh Gur ihat patenmura; ihat sashenmura rishe sawa mengnong oh orhe haputip ohe pe oh amkar namdatipmur. Amkar namdama yot han bap ma hat pati oh gin kopenohe han bap titwi nahatipmur. Nahatporhan gin manap gosham yah hat mama pati ohmur.  
\v 16 Krais oh tit bapwi nahapat orhe irat bok sur ma gartahatip ohe dap tei ama tit han bapwi nahat napapat dirnong oh Got orhorsi manap gosham yah hat paten han bap nahat napapatmur. Imat ma napapat oh mahaw goshat pati danong oh eimatnap natimbas matipmur.  
\v 17 Imat natimbas deipat manap da gosapris indin ohe da meng oh napot napisasuhmur. Napot ma napisasuh oh Got ohe kakduup na patema Juda bap na hat pati bap gursi; Got ohe kakduup hat pati Juda bap nuhursi dirnong tap mat napot napisasuhmur.  
\v 18 Krais orhor imat napapat ohoh ihan dir tit Yahsup ohsiwi Got ohe tapnong hama ohsi mengitin ohe inasi hat patimur.   
\s1 Krais oh dirnong oh tit apwi nahat napisapat ohe meng oh  
\p
\v 19 Juda na hat pati han bap gur rih Got ohnong hanhan mar hohop han bap hat pateshemur. Gin Krais oh tit han bapwi nahatporhan gur gin Got orhorsi ap nita han bap titwi hat patimur. Ihat ma pati oh gin Got orhe nita han bap ham taptem bap titwi hat patimur.  
\v 20 Dir titwi ma hat pati oh tit ap gonwi hatin hat patimur. Ihat ma pati oh mutuh haw tam ma hat pat oh Jisas Krais orhormur. Mun nanip hat ma pati oh meng pot pisashe hano aposero nuhurmur. Mun nap ma hat pati bap oh gurmur. Ihat tit apwi hat patimur.  
\v 21 Tit apwi hat ma napapat oh Krais orhe boknongwi naham gonsi dirnong tap naham nang natpam tit apwi nahat napapatmur. Ama tit apwi nahat napapat ap oh Hanipyah orhe ongengnap mat papten ap yawaro rim arhap mar isip mat apisapatmur.  
\v 22 Imat dapat ap ohe tan isip mat ma apisapat oh gursi; nuhursi Krais orhe tapnong hat pati bap diradir gonsi tapnong naham tit bapwi nahat napisapatmur. Imat ma napisapat oh Got orhe Yahsup ohe paten apo rim ap isip mat apisapatmur.   
\c 3  
\s1 Got oh Por ohnong Juda na hat pati han ihirnong meng pot pison ina matip ohe meng oh  
\p
\v 1 Got oh dirnong tit bapwi nahat napapato rim noh gure ihat paten meng oh Got ohnong nadahadeipatmur. Noh gure imat nadahandeipat han noh Krais Jisas orhe han hat patim Juda na hat pati han bap gurnong napanggeit napisapat ohe pe oh karapus nahat patimur.  
\v 2 Got orhor nohnong ihat paten da ma napdap oh gur am hat patikin dahapatmur. Mamarumur. Got oh nohnong Norhe damdapat orhor imat yah matpora dahapat da meng moh Juda na hat pati kuuhan bap ihirnong pot pisashenmur napor kis nahatipmur.  
\v 3-4 Imat kis nahapat orhe reman papat da meng oh nohnong am nahatipmur. Am nahatporhan noh ama meng oh gurnong gar meng tit brak mar mama nasar ohmur. Gin ma nasar meng moh gur sama Got orhe reman papat da oh Jisas Krais orhe dap teidapat ma indeipat da oh Por ohe da tei imat am mat papatin dirnong imat am nahapat ma hapat dahatiprohemur.  
\v 5 Got orhe reman papatesuh meng oh rih hanip dirnong nareman paptesuhmur. Ginnong oh Krais ohsi tap hat sashen hano Got orhe meng pot pisapti hano nuhurnong oh Norhe hrep ongeng mat papat han bapo napor nuhurnong Got orhe Yahsup ohsi pomat orhor nure da tei pitap teinongwi mar namgit napisapatmur.  
\v 6 Ama nareman paptesuh da ma namgipat oh mohmur. Krais orhe inahapat yah meng ohe pe oh Juda hat pati hansi; Juda na hat pati hansi diradir tap han bap titwi hat pati ma hapat. Titwi hat patim Krais orhe dap teidapat Got orhe rit natip meng oh diradir tap hat titwi daripti ma hapat. Ma daripti oh Got orhe bapkei nahapat da oh gonsi diradir tap hat daripti ma hapat dahatin ohe da oh hanhan hat patin gin mama pitap teinong mara namgitporhan gin gonsi am ham dahat patimur.   
\p
\v 7 Ama namgitip yah meng oh Got orhor orhe damdapat Noh Por ohnong norhe yah meng moh pot pisashen han kis matpora daham ihtin tamreindin ina nahat napapatin noh orhe kasip ohsi mama ihat atamrein sapat ohmur.  
\v 8 Norhe da oh Noh komnap han win timbas han hat pat ma hapat dahapatmur. Ihat ma dahat pat han nohnong Got oh orhe damdapat orhor Imat yah matpora dahapat da ohsi nohnong Go Krais orhe yahnap da hanip gur na dahatin hatin ohe yahnap da meng moh go Juda na hat pati bap ihirnong pot pisashenmur.  
\v 9 Pot ma pisasipra ohe da meng oh mamaru hat patmur. Erer darpatip han norhe imtiprawa daham rih orhor reman apaptesuhru papat da moh kuuhan gonsi ihirnong norhe dahapat da meng moh por am mat pisashenmur. Imat por am mat pisapatin ihirhe ameng oh dahama am hapti Got orhe damdapat Noh imat ihirnong pinggitiprawa gidaham reman paptesuh da oh gin pitap teinong mar mama namgipat ma hapat daham sa am hapri daham imat meng pot pisashen han kis nahat napapatmur.  
\v 10-11 Rih Got oh orhe ma reman paptesuh meng oh Kaput norhe ihirnong imat yah matpora daham damdapat ma yah deipat da oh Krais Jisas ohe dap teidapat norhe nita sios bap ihirnong pinggim ama da meng oh ire bes teinong matipramur. Matporhan ihirdapat norhe dakuu yah meng yah meng moh aw tei mahat ohe kakhan hat pati da bapo kasip hat ma pati da bapo ihirnong pinggim sa am deipri dahat patesuhmur. Ihat ma dahat patesuhru hat orhor diradire Hanipyah Krais ohe dap teidapat mama namgipat ohmur.  
\v 12 Ama han Krais orhornong Ohwi inahatin hatin hanwa ma dahaya ohe pe oh orhe tapnong hat patimur. Orhe tapnong hat pati ohoh ihan Got oh dire menghe namrapat han ma hapat daham watahpei ham ohe duupnong haptimur.  
\v 13 Ihat pati ohoh ihan gur Por oh nure gwemat apripatin ohnong ruumsup mat papti moho rima gurhe da er ham guragure Got ohe danong hat pati da oh mandapri. Oh dirnong napanggeim yah nahatinmat oh ihat pat ma hapat daham kasip hat orhor patenmur.   
\s1 Por oh Epesas ire paten meng oh Got ohnong adahandeisuh ohe meng oh  
\p
\v 14 Got oh dirnong tit bapwi nahat napapato rim noh diradire at Got ohe duupnong ham mem ham nadahandeipatmur.  
\v 15 Ama nadahadeipat Got oh kakdah ohe tihan tihan bapo aw tei ohe tihan tihan bapo gonsi namanhem tihan tihan nahatip Got ohmur.  
\v 16 Ama Got ohnong noh At Gota. At Got go nuhurnong ma napanggeipat ohe da oh isip isipnap hat patmur. Go ihat pat han ohoh ihan gorhe Yahsup oh ire mutuhnong mara Yahsup ohe kasip ohsi ihirnong kasip da mat orhorwi paptenmur.  
\v 17 Papatin ihir Krais orhorwi inahatin hatin hanwa ma dahapti ohe dap tei oh Krais orhor ire mutuhnong ham ha patenohmur. Ihat patin Got gorhornongsi; hanip ihirnongsi bopor mar da apripti ohe da oh ire mutuhnong ha hatinohmur. Hama irat kaker oh mong mutuhnong yah hat wasa iratnong ma kasip deipatru hat orhor bopor mar da apripti ohe dahe ihat orhor ha kasip deinohmur.  
\v 18 Imat kasip matporhan Epesas ihiro gorhe nita bap gonsi ihiro ihir Krais orhe bopor naham da napin pat danong oh Mohri isip isipnap hanip dirhe na satin hatin ohe bopor nahapat da ma hapat dahatin ohe da ohsi mat paptenmur.  
\v 19 Imat papatin ihir imat bopor naham da napripat han ma hapat dahatiprohe orhor am hatin oh wanohe musum dus moh kinhat sam am hatiprohe. Gin Got go gorhe yahnap da ma teip hat pat oh ihirnonghe ama da ohsi teip mat apisashenmur pora Epesas gure ihat paten ohe meng oh noh nadahandeipatmur.   
\p
\v 20-21 Dir Got orhe kasip oh inahatporhan ihat kasipsi han hat pat ma hapat dahapat orhor ama dire am hapti kasip oh garpokmur. Orhorsi pat kasip isipnap oh dirhe am hamo dahamaro na hatin ohe wanohe kasip ohmur. Ihtin kasipsi han hat pat ohoh ihan Krais orhe tapnong ham Got orhe nita sios dir orhornongwi win adaptuhur dipdipwi armi marwi paptiru hat orhorwi papteprinapmur. Arpinwa.   
\c 4  
\s1 Krais ohsi tit inawi hat pati ohe meng oh  
\p
\v 1 Noh Got ohe atamreipat hano rim karapus nahat patimur. Karapus hat pat han norhor Got oh Krais ohe kasip ohsi inahapato rima noh kasip meng tei gurnong mama meng moh napotiprohmur. Got oh Gur norhe nita kuuhan bap hama mihat sa sasipri daham ma kis nahatipru hat orhorwi gurhe ihat orhorwi sashenmur.  
\v 2 Gur yah danongwi hat ha sashengwe rim kis nahatip ohoh ihan guragurnong winsi han na hayao ahar manap mengteiwi meng poriyao hat sashenmur. Ihat susa ihirnong kapkap heisup na mar manap da tei orhor bopor mar da apris paptenmur.  
\v 3 Got ohe Yahsup oh manap dasi gosham da gosapris paten ohe yah da napripatmur. Napriporhan ama da ohsi tit dawi hat patimur. Ama tit dawi hat pati da oh timbas hatiprarim kasip hat orhorwi marin paptepera daham marin orhorwi paptenmur.   
\p
\v 4 Gur mamengnong moh dahenmur. Krais ohe nita hat pati diroh ina titwi hat patimur. Got orhe Yahsuphe tit pokwimur. Amaru hat orhor Got oh Noh gurnong tit han tit napripramur. Gur ama tit han napripra hannong oh minhan patenmur napotip han ohnong pokwi minhan patimur.  
\v 5 Dire Hanipyahhe tit hanwimur. Orhorwi inahatin hatin hanwa dahatperhan ohe nambutin mandap kat oh tit pokwimur. Tom ma waptihe win oh tit han orhe winwi rim tom waptimur.  
\v 6 Hanip bap napotip gonsi dire Gothe tit Got pokwimur. Ama Got orhor dire at tit pokwimur. Oh pokwi gonsi dire kakhan hat patmur. Oh gonsi dire mutuh patim dire dap tei tamreipatmur. Got oh ihat tit han pokwi hat pat ohoh ihan ama tit dawi hat pati da oh mandapririm kasip hat orhorwi marin paptenmur.   
\p
\v 7 Krais oh tit hanwi orhora; yan timbas be musum ma napripat hannong oh oh Norhe da ruumsan mat papat moh ihirnong nitat mat apripor daham orhe dahah han orhorwi nitat mat be napripatmur.  
\v 8 Imat ma napripat oh Got ohe mengtei ma brak matpa mengru mat orhorwi napripatmur. Ma brak matpa meng oh mamarumur.  
\q1 Krais oh puteinong mahat runmat oh orhornong mahaw mat papti han bap trun han ihirnong tapmar pruhupmur. Prusa yan timbas be musum apripti erer oh kakdah mama ihirnong nitat mat apdapmur ritporhan brak matpamur. Gin ma brak matpa mengru mat orhor dirnong yan timbas be musum nitat mat napripatmur.  
\v 9 Putei mahat pruhupmur ritporhan ma brak matpa oh de ohe pe oh sa ruhup dahayahanhe mihat dahatinmur. Kopenatri kakdah moh wandasa hapur sus da was pati hrep mong mutuhnapnong waihip ma hapat. Gahan it maras ruhup ma hapat dahatinmur.  
\v 10 Kakdah mama wanhup han morhor it puteinong ruhupmur. Wao ruo ma hatip oh orhor gonwi ha hatinohrim wao ruo hatipmur.   
\p
\v 11 Ama han orhor musum napin han oh orhe atamreindinnong asoh nitat mat napdapmur. Nitat mat ma napdap oh kat han ihirnong orhe mengtei meng pot pisashen han deio kat han tit ihirnong orhe meng porin han deio kat han tit orhe yah meng pot pisashen han deio kat han tit orhe nita ihirnong paptim meng am dein han deio imat orhe atamreindin asoh nitat mat napdapmur.  
\v 12 Nitat mat ma napdap oh Got oh Norhe nita gonsi ihir norhe nitat natamrein sashen ohe da oh nitat mat apripora. Imat apriporhan ihir ama da ohsi Krais orhe nita han bap orhe ina hatin hat pati ihir gospanggeim kasip ham isip hat ha sashengwe daham orhe atamreindin da nitat mat napdapmur.   
\p
\v 13 Nitat mat ma napdap da ohsi isip hat orhorwi saptin saptin kaput Got ohe mon oh ihtin hanhe daham am hapti dao Ohwi inahatin hatin hanwa dahapti dao oh kaput tap kat ham titwi hatiprimur. Hapti Krais orhe hanip yah ham ma pat da hatin orhor dirhe hanip yah ham orhor hatin hatiprimur.  
\v 14 Hanip yah ham orhor hatin hama it brer gar ire dahapti da hatinhe na hapti ohe da ohmur. Brer gar ire dahapti da hatin hat ma pati han ihir mamaru hat dahat patimur. Dasuh han ihir aprisa manap mengtei dakuu meng hatin mat meng poriyao Moh arpin dakuu hanhe dahatin ohe da pinggiyao haptin ihir Arpin dakuu meng naporiya ma hapat daham ti meng ti mengnong oh ihir amram dindeiptimur. Ti meng ti mengnong amram dindeipti ihir tom hru tei ohe manduu kat ma inim oh mer mat pisao popiro deipat hatin hat patin pramar pisaya popriya mar papti han bap ihirmur.  
\v 15 Ihat ma dahat pati da hatin hatri patepri. Gur arpin meng orhor yah mat orhorwi da apin patim pot pisashenmur. Imat pot pisaptin diradire kak Krais orhor hatin hat isip hat orhor sasiprimur.  
\v 16 Krais oh hanip dire kak moh hatin hat patim orhordapat orhe buh pe bes pe hatin hat pati dirnong nitat tamreindin dasi nahat napapatmur. Imat ma napapat oh buh bes ming oh na yawar nahapatmur. Orhe dason orhorwi dip nahama tit ina gonwi naham napapatmur. Inahat napapatin buh bes ina gon iraire nitat tamreindin oh kasip hat orhorwi da gosat patimdapat tamreim patimur. Ihat ma pati ohe pe oh tit inawi ham bapkei tahat sapatmur.   
\s1 Kopenohe han bap ham yah hat sapti ohe meng oh  
\p
\v 17-18 Gin noh Krais ohe mengtei kasip bok meng moh napotiprohmur. Gur Got ohe danong na hat pati han ire da hat sapti da hatin hat sasipri. Ire ma ihat sapti ohri kwitem dus dam na tarpatin ohe danong ham da hut sapti bap ihirmur. Ihir Got ohe yah meng moh na amratiprohemur daham kom asar na dahapti ohoh ihan Got orhe meih mahan patmura; irarhe meih mahan patimur. Ohsi tap tei hat na patimur.  
\v 19 Ihir er danong na kasa mat patimur. Ihat patim Nuhur mama er danong moh dingoshat saper. Mama er danong moh dingoshat saper gosham ama er danong ohwi isip hat sapti bap ihirmur.   
\p
\v 20 Oh Got ohe danong na ham er danong dingoshat sapti bap ihirmur. Gurnong oh Krais oh ihat pat hanmur napor ma namgitpa oh Ihir er dasi hat ha sashengwe rim namgitpada.  
\v 21 Basra. Nohe dahapat oh gurnong Krais orhe nitao rima orhe ma ihpat ohe da meng oh mohmur napor orhe arpin ma ihat pat meng ohwi namgitpa ma hapat dahapatmur.  
\v 22 Arpin danong ma namgitpa oh mamarumur. Gur er da hrepdapat hat patina er da oh gin gur mihat sashenmur. Mihat sashenmur napor dasuh naham gurnong imat pranahat napisus timbas nahatin ina nahat napapat ohe er da oh gin orhor rihohe watah er ma daphot eimat mandaptiru mat orhor eimat kom asar mandatinmur.  
\v 23 Rihohe er da oh kom asar kopenohe yah hat son danong ma dahapti da orhap gon gurus ha napotinohmur.  
\v 24 Kopenohe da oh orhap gon gurus napotporhan ama kopenohe da ohsi hat patim saya apriya hat patenmur. Ihat kopenohe han bap hat patima Got orhe arpin duungnap dasi ham ongengnap tahat pat da hatin ham orhor hatin han bap hatinmur napotperhan gur amram am hatpamur.   
\p
\v 25 Imat am nahatpa ohoh ihan gur Got orhor hatin hapti dasuh hapti da oh eimat kom asar hariri por mandanmur. Mandapti Gin dir Krais ohe nita ham orhorsi tit inawi hat pati ohoh ihan dir arwananah ihirsi arpin mengwi rit saya apriya hat pateper daham arpin mengnong ohwi rit saya apriya ham patenmur.  
\v 26-27 Heisup da tit gure bas oh apris hahhnhe Epe. Nohnong er nahatin han ohe ap gwatei oh norhor adapu sa. Norhor adapu moh orhe hrepnong natipra. Ihan noh kapkap mong kwi hat na patin orhor noh ama heisup hah da moh kapkap mandatpora daham mandanmur.  
\v 28 Gapah hapti han gurhe gapah hapti danong oh hariri por mandanmur. Mandapti guragure bes tei yah hat tamreindinnong asoh yah hat tamreima den yah mat damo hatip hat pati ihirnong pandemo hat patenmur.   
\p
\v 29 Gur hanip ihirnong er matin ohe er meng ohri ripri. Ama er mengnong oh hariri por mandanmur. Eimat mandama Mama meng moh ihirnong panggeit papten ohe meng ma hapat daham iraire nitat panggeit papten ohe meng oh nitat mat por panggeinmur.  
\v 30 Er meng riyahanoh Got orhe Yahsupnong ina ruum apris imtiprohe ohoh ihan gur ama Yahsupnong ina ruumsup apin meng ohsi rit sasipri. Ama Yahsup oh Got oh Maihir norhe ambutipra han ihirmur. Ihan noh norhe Yahsup mohsi ire boknong ket tup saripti ohe tan mat itpora. Tup sar mihih mat papatin kaput pepe dik sa tarpatipra daham ama Yahsup ohsi dason nahat napapat ohoh ihan ama Yahsup ohnong ruum sup apris er deipri.  
\v 31 Imat er matipririm gure mutuh ator gap pat dao mamter hapti dao heisup hapti dao kasip bok mengtei inggoshapti dao dasei meng poripti dao ama ihat heisup goshapti da oh gonsi hariri por mandanmur.  
\v 32 Mandapti ambar gap yah da tei andeh hinhina gosham da gosapris patenmur. Ihat patim Got oh dire er hat saya ohe pe yan oh Krais orhe boknong mar dat namdatipru hat orhor arwananah ire ma imat er nahaya danong asohhe ithe dahapri. It na daham Got oh dire er danong it yansi na naham eimat hanhan mar namdatipru mat orhor gurhe amaru mat orhor hanhan mar mandanmur.   
\c 5  
\s1 Has teinong hat sapti ohe meng oh  
\p
\v 1 Gur Got orhe boporsi nahat napapat brer gur ohoh ihan gurdapathe ita orhe da orhor dindeinmur.  
\v 2 Krais oh dirnong bopor nahama dire gwemat haputipmur. Dire gwemat ma haputip ohe gapgwe oh ap yawar tei apop atendeipti ohe gapgwe hatin hat sus Got ohe rum tem roporhan oh da yah ham amam hatipmur. Ihan Krais oh dirnong imat bopor naham haputipru hat orhor gurhe arwananah ihirnonghe imat orhor bopor mar da apris paptenmur.   
\p
\v 3 Gur Got orhe nita hat pati ohoh ihan gure mutuh oh bisei saw goshat sapti dao imaho miano ire da hatin ham er hat sapti dao arwananah ire erernong asoh abopor mat sapti dao oh gure mutuhnong oh tarpama gwe duup oh meng pat hatiprarim inin ham ongeng tahat orhorwi patenmur. Gur Got orhe nita hat pati ohoh ihan ongeng tahat orhorwi ayahan yahmur.  
\v 4 Ongeng tahat orhorwi patim tohor meng hatin hat er meng ripti mengo dam na tarpatin ohe mengo tohor goshapti mengo ama meng oh gurri ripri. Got orhe nita hat pati gurri ihtin meng oh na ripti awam meng ohoh ihan ama ihtin meng ohri ripri. Gure ritin oh Got orhornongwi weso por armi mat paptenmur.  
\v 5 Nohe ma napotiproh meng moh gur arpin ma hapat dahat pati meng oh napotiprohmur. Mamarumur. Bisei saw goshat sapti ihiro imah mian ire da hatin hat er hat sapti ihiro nohewimur por ma abap mat pisapti ihiro ama bap ihir eimatnap Kraissi; Got ite napapindin hrepnong na hatipri bap ihirmur. Erer oh nohewimur por ma abap mat pisapti han bap ihir ama erernong iraire got hatin mat paptim ihat saptimur.  
\v 6 Ama Got ohe meng na amram kom asar ihat sapti han bap ihirnong Got oh heisup mat papatmur. Imat papat ohoh ihan gurri ama ihtin danong ohri hapri. Kat ihir dam na tarpatin meng asoh dam tarpatin meng hatin mat napor dasuh naham ihtin dap teinong pranahat napisasipri ohoh ihan gurri ama dam na tarpatin mengnong ohri amram dindeipri.  
\v 7 Ihat dasuh han ihir dasuh nahat aprisipri ohoh ihan ama ihapti han bap ihirsiri nap nanip gosham ire tapnong hat patepri. Gurarhe teinong patenmur.   
\p
\v 8 Rih gure da oh kwitem hat pateshemur. Gin oh diradire Hanipyah orhe danong hama orhe nita ma hat pati oh orhe has da ohsi nahat napapatmur. Orhe has da ohsi imat napapat ohoh ihan gur kwitem dus napapat han ohe brer hatin hathe patepri. Orhe has tei ma napapat han orhe brer hat patenmur.  
\v 9 Orhe has da teiwi susa dam ma timapat ohe dam oh mamarumur. Yah hat sus ma duutin dawi hat sapti dao arpin dasi sapti dao oh has da teiwi sus ma dam timapat ohe dam ohmur. Gur ama has da teinong hat pati bap gur ohoh ihan ama dam ohsi hat sashenmur.  
\v 10 Ama dam ohsi hat susa Hanipyah ohe Moh yahmur napor ma amam hat pat danong asoh dason tahat sasipora daham dason mat orhorwi sashenmur.  
\v 11 Kwitem ohe brer hat ma pati bap ihirhe dam na tarpatin ohe er danong asohwi dason mar dinggoshat sapti ohoh ihan gurri ama dam na tarpatin ohe danong ham dinggoshat sapti bap ire tapnong hamhe sasispri. Has da teinong hat orhorwi hat susa ire kwitem hat sapti er danong oh has teinong mar pitap teinong deinmur.  
\v 12 Ire ahar ma er hat sapti ohe da meng oh kassi meng ohoh ihan ritinhe na ritin mengo rim na poriptimur. Ihan ire er da oh has teinong mar pitap teinong deinmur.  
\v 13 Ire er da oh has teinong mar pitap teinong matperhan kuuhan gonsi ihir has teinong hat pati kuuhan ihirnong wamara ihat pati kuuhanhe daham pomat daham am haptimur.  
\v 14 Tit has teinong ma hapti ohe meng oh mamaru hat riptimur.  
\q1 Hapura timon pat han go kin wataham masona. Masporhan Krais orhe has ohsi has teinong nahatiprohmur riptimur.   
\p
\v 15 Gur has teinong hat pati han bap gur ohoh ihan da hut patim kwitem dus ohe da hatin hat pati han bap ire da hatin hat sasipri. Dakuu hat ma has teinong sapti han ire da hat saptiru hat orhorwi potahat sashenmur.  
\v 16 Er hat son supheri gin tarpat apir ohoh ihan Mihat pati dik morhor yah da pinggit pisapora daham onggem mama dik morhor yah da pinggit pisonmur.  
\v 17 Gur yah da pinggitinmat oh da hut pati han ire da hatin hat sasipri. Hanipyah orhe dahat pat danong morhorwi am hat sasipora daham am hat sashenmur.   
\p
\v 18 Wain er tom ruumsan dama ohe kasip hrepnong nahatporhan da ban tahat ma sapti oh er ohoh ihan gurri ihapri. Mandama Got orhe Yahsupnong asoh nohe da mutuh mahan ha teip nahatinoh. Teip nahat napapatin noh orhe kasip hrepnong hat patepor daham pei mat pisashenmur.  
\v 19 Imat pei mat pisusa guragure ma tarmur meng sariya tei oh ma brak matpa meng ganong riyao rotu ham ma ga ripti ohe ga riyao Yahsup orhe bokdapat tarpam ma ripti ga riyao ihat meng ohwi gosporinmur. Ihat mengitin danong ohwi hat patim Hanipyah orhornongwi dahamo armi maro mat paptenmur.  
\v 20 Ihapti Jisas Krais orhorsi tap hat patio rim diradire At Got ohnong Wes erer gonsi moh inahapat hano por dipwi armi mar paptenmur.   
\s1 Kuu gamder da gosat patenmur ritip ohe meng oh  
\p
\v 21 Krais orhe danong ham orhe winnong aisip matin ina hat pati guroh tit uhe meng amra tit uhe meng amra gosham guragur tap kat goshat patenmur.  
\v 22 Kuu gurhe Hanipyah orhe hrepdapat hat patim meng ma amraptiru mat orhor imanir ire hrepdapat hat patim meng amramo hat patenmur.  
\v 23 Krais orhe nita bap sios dire kakhan hat patmur. Orhe kakhan hat patru hat orhor han ihir kuu gure kakhan hat patimur. Ihan ire hrepdapat hat patim meng amramo hat patenmur. Krais orhor kakhan hat ma pat oh orhe nita sios bap dirnong nambur orhe hrepnong nahat napapatmur.  
\v 24 Inahat napapat ohoh ihan sios dir Krais orhe hrepdapat hat patim meng ma amram dindeiptiru hat orhor kuu gurhe imanir ire hrepdapat hat patim ire meng gonsi amram dindeinmur.   
\p
\v 25 Imapir gurdapathe Krais oh orhe nita sios dirnong bopor nahama dire gwemat ma haputipru mat orhor gurhe inanir ihirnong imat bopor mat paptenmur.  
\v 26-27 Krais oh dire gwemat ma haputip oh Noh norhe nita sios kuuhan bap maihirnong tom gahdeipti ohe tan mat gahmaro norhe meng ohsi yah maro mar ongeng mat papten dasi matipramur. Deipat ire ina bok andeh sirap huhun tamboro er yan datin hatin hat pati ohe tamboro oh timbasnap ina yahnap ongeng mar mihihnap mat papat bok tei andeh norhe bes teinong mar datipramur daham dire gwemat haputipmur.  
\v 28 Ama Krais oh dire danong ham haputipru hat orhor han gurhe inanir ihirnong imat orhor da apris bopor mar paptenmur. Bopor mat papindin oh ditadit tap ina hat pati sa. Ihan noh norhe boknong bopor mat patru uhe boknonghe imat orhor bopor mat papinpora daham bopor mat paptenmur. Uhe boknong ma bopor mat papat oh oh gorhe boknong bopor tahat patmur.  
\v 29 Diradire inanong oh diradir dasei deiptida. Basra. Krais oh orhe nita sios dirnong pomat ma napapatru hat orhor dirhe diradire inanong pomat paptimur.  
\v 30 Dir orhe buh bes ina titwi hat pati ohoh ihan orhor pomat napapatmur.  
\v 31 Kuuhan gosdara tit inawi haptimur rim ma brak matpa oh mamarumur. Ihan han ihir kuu datinmat supir itapir mandama kuu dara itait tap hapti tit inawi hat patimur rim brak matpamur.  
\v 32 Ama brak matpa meng ohe mutuh meng yahnap treman patesuh meng oh patmur. Ama treman pat meng oh noh Mamaru hat pat ma hapat dahapatmur. Kuuhan gosdar tit inawi hat patimur ma napotip oh Krais orhe nita sios dirnong orhe ina titwi nahat napapat ohe meng oh ginapotip ma hapat noh dahapatmur.  
\v 33 Orhe nita sios bap dire pati ohe meng ohwi na napotip ma hapat kuu gamder dire paten mengsi tap mat napotip ma hapat dahapatmur. Imat napotip ohoh ihan Han gurhe gure inanong ma bopor mat paptiru mat orhor guragure inanir ihirnonghe imat orhor bopor mat paptenmur. Kuu gurhe imanir ire meng amram ire hrepdapat hat orhorwi patenmur napotip ma hapat dahapatmur.   
\c 6  
\s1 Brer imder gur tamder potahat patenmur napotip ohe meng oh  
\p
\v 1 Brer gurhe Nuhur Hanipyah orhe hrepnong hat ma pati oh ather emher ire hrepdapat hat patim iraire meng amram dimtinmur naporpat ohoh ihan emher ather ire meng amram dindeipera daham dindeinmur.  
\v 2-3 Emher ather ire mengnong amram dimtin ohe meng napor ma brak matpa meng oh mamaru hat patmur. We. Brer gurhe suanir itanir ire danong ham yah mat orhor ire mengnong amram dimar patenmur. Ihat ayahanoh gurnong kakdah moh trun indin ohe bapkei nahat napapten da ohsi bapkei nahat napaptepramur ritporhan brak matpamur. Imat kakdah moh trun bapkei nahat napaptepramur ma risuh oh Mama sawa meng ohe boknong mohri matporhan brak matpamur. Ihtin sawa meng pat ohoh ihan gur suanir itanir ire hrepdapat hat patim ire meng amram dindeinmur.   
\p
\v 4 Itapir gurdapathe brer ire danong akweireh deipri. Manap mengteiwi brer ire danong adason maro Hanipyah ohe sawa mengnong poriyao mar paptenmur.   
\s1 Kakdah mohe kak hat pati han ihirsi; ire hrepdapat hat patim be atamreipti han ire meng oh  
\p
\v 5 Kakdah morhe ire hrepdapat hat patim be ma atamreipti han bap gurhe iraire mengnongwi amrama kas hat orhorwi patim atamreinmur. Atamreinmat oh ina teimdapat tit da haya ina mutuhdapat tit da haya hat patimheri atamrein patepri. Iraire danong ohwi hat patim orhor atamrein patenmur. Krais orhe mengnong dimar ma atamrein saptiru hat orhorwi atamrein sashenmur.  
\v 6 Ihat saptin ire kinteiwi Moh yah hat natamreipat hanhe ha napotingwe daham ire kinteiwi kasip hat tamreipri. Ei. Noh Krais orhe atamreipat han hat pat sa. Ihan noh Got orhe pan hat orhorwi ha atamrein sashengwe ma dahapat da morhorsiwi hat patim atamrein sasipora daham ire atamreindin oh kasip hat orhorwi atamrein sashenmur.  
\v 7 Ihat atamrein sus Noh hanip ire atamrein sapat moh Hanipyah orhe pan hat ma atamrein sapatru mat orhor atamrein sasipora daham amam ham pan hat orhorwi atamrein sashenmur.  
\v 8 Ihat ma atamrein sapti han guroh mohnong dahat patimur. Hanipyah oh duuptei han ire yah hat ma tamreipti yano ire hrepdapat hat patim be yah hat ma tamreipti ohe yano oh yah yan tit pokwi Hanipyah oh napripatwa dahat patimur. Ihat dahat pati ohoh ihan amam ham pan hat orhorwi atamrein sashenmur.   
\p
\v 9 Be ma natamreipti ihirnong papti han bap gurhe amaru hat orhor Got ohe danong hat patim orhor paptenmur. Ihirnong kas ina matinmat kasip mengteihe poripri. Diradir Hanipyah aw tei mahat ma pat han oh tit pokwimur. Ama han orhor Moh duuptei hat pat hanmur. Moh ohe hrepdapat mat papat hanmur napor na nasapatmur. Orhor tap kat titwi nahat napapatim nasapat han ma hapat. Ihan nohhe ihirnong ohe ma napapatru mat orhor ihirnonghe imat paptepor daham pomar paptenmur.   
\s1 Er da ihirsi gusutinmat namya ar mamen tahat pati ohe meng oh  
\p
\v 10 Gin meng timbas matinmat tit meng moh napotiprohmur. Gur Nuhur Hanipyah orhe wanohe kasip tapnong hat pati sa. Ihan orhe kasip moh nuhurnong isip nahat orhorwi ha napisashenoh dahatperhan ama kasip oh isip nahat orhorwi ha napisashenohmur.  
\v 11 Satan oh Hanip dirnong da naditeim er nahatinmat oh wanahat pat ohoh ihan ohe merwi naham er nahatiprarim gurhe Got orhe gusutin ohe erer ma wanin mat nat pat erer oh dara kasip namyao erer oh ara mamen tahat patenmur.  
\v 12 Mamen tahat wamat indin oh kakdah han hanip bap ihirsi gusutinmat basmur. Hanip dirhe na wandeipti aw tei mahatdapat dirnong er nahapti sup bap ihirsi gusutinmat mamen tahatwi patimur. Ama na wandeipti sup kat bap ihiroh er sup ohe kakhan hat pati bap ihirmur. Kat bap ihiroh ire hrepnong mar ire mengtei papti duuptei han bap ihirmur. Kat bap ihiroh kakdah mohe kwitem hat pati da ohe kakhan ham kasip hat pati bap ihirmur.  
\v 13 Ama bap ihirsi gusutinmat Got ohe gusutin ohe erer oh mamen mat nat pat ohoh ihan gurhe Got orhe kasip han erer ma wanin mat nat pat erer oh gonsi dara mamen tahat patinmur. Ihat mamen tahat patimdapat er nahatin han ohsi gusutin dik oh hatporhan gure merwi mar paptiru mat orhorwi papteprimur.   
\p
\v 14 Ihtin bap ihirsi gur gusutipri ohoh ihan mamen taham kwet patinmur. Mamen taham indin oh arpin meng oh ahep nang aripti ohe tan kasip mat orhor ar patenmur. Yah hat son ohe duung dahe namya hatin mat ar patenmur.  
\v 15 Got ohsi manap gosham yah hat ma pati ohe meng oh ihirnong pot pisonmathe tongap hatin mat ara mamen tahat patenmur.  
\v 16 Got orhorwi inahatin hatin hanwa ma dahapti da ohhe damer hatin mat marin orhorwi sashenmur. Ihat saptin Satan ohe harsi ban oh gonong arwanahahhanhe gwe bok na tapaprohmur. Damer boknonghe tekapiripramur.  
\v 17 Got orhor it nambura yah hat paten dasi nahat napapatwa dahapti ohe dahe kasip kak ung hatin mat andinmur. Got orhe Yahsup oh Got orhe ma napripat yah menghe bior hanat hatin mat marima sashenmur. Ama erer Got oh wanin mat nat pat oh marim mamen tahat patenmur.   
\p
\v 18 Mamen tahat patin Yahsup oh napapatin Got ohnong erer gonsi dahamtin ohe meng oh dahandeiyo hat patenmur. Ihat patepero daham kin watahat orhorwi patima Got orhe nita bap ire adahamtin oh kasip hat orhorwi adahamar patenmur.  
\v 19 Ihirnongwi basmur. Nohnonghe gur At Gota. Por oh gorhe hanip dire hanhan hat pati meng oh ritpor ri tei oh gorhor ohe pang teinong tongnotinmur. Tongnotporhan gwe yah meng ma treman pat meng oh Por oh watahpei hat orhorwi pitap teinong mar pot ha pisashenohmur rim nadahandeinmur.  
\v 20 Gur dahat patimur. Noh rihhe Jisas Krais orhe meng tei ama meng oh pot pisapatin ama ohe pe oh nohnong karapus nahatperhan noh mama karapus hat pat ohmur. Ihat sapat ohe pe oh karapus hat pat ohoh ihan gur Got ohnong Got gwe Por ohnong Go nohe meng moh imat pot ha pisashenoh ma dahapat da orhorsiwi mat watahpei hat orhor meng pot pisashen dasi mat Got gorhor pisashenmur por nadahandeinmur.   
\s1 Meng timbas matinmat kapkep matip ohe meng oh  
\p
\v 21 Gin norhe mama ihat pat meng gonsi oh gur amram ha am hatingwe rim diradire bopor mat papti taptem Hanipyah ohe atamrindein oh kasip ham napanggeipat han Tikikas ohnong noh ameng ohsi tap mat darhetiprohmur.  
\v 22 Darhetporhan oh apris nure mama yah hat pati meng moh gurnong napor gure danong nadapem sa yah nahatipra.   
\p
\v 23 Gin diradire at Gotsi; Hanipyah Jisas Krais ihitnong Gut taman norhe taptem gonsi ihir gutnong Ihit tamanwi inahatin hatinwa ma dahapti ohe da ohe pe oh ihirnong manap goshat indin ohe dao da gosapris pati ohe dao ama da oh ihirnong aprishenmur por Epesas aptei Got orhe nita hat pati bap gure paten meng oh ihit tamannong nadahandeipatmur.   
\p
\v 24 Got gorhe damdapat orhor Ihirnong yah matpora ma dahapat da oh Hanipyah Jisas Krais orhe danongwi ham bopor mat paptiru papti bap ihirnong aprisa bapkei mat paptenmur rim mama nadahandeipat ohmur. Arpinwa.