\id 2TI - Oksapmin NT [opm] -Papua New Guinea 1992 (web version -2014) 
\h 2 Timoti 
\toc1 Timoti ohnong Por oh komdapat brak mar atip ohe meng oh 
\toc2 2 Timoti 
\toc3 2Tm 
\mt1 Timoti  
\mt2 ohnong Por oh komdapat brak mar atip ohe meng oh  
\ip Por oh Timoti ohnong ohri ma brak mar adarhetip oh na karapus hat hat patim brak mar adarhetipmur. Adarher patin gahan ohnong karapus matperhan it Timoti ohnong dahapat it ohe danong akasip mar mameng moh komdapat brak mar adarhetipmur.  
\c 1  
\p
\v 1 Por noh Timoti go norhe boporsi brero rima mama brak mat nasar ohmur. Got oh Krais Jisas ohe dap teidapat Jisas ohe tapnong hat pati gur eimat paten dasi hatiprimur napor dirnong rit natipmur. Ama rit natip meng pot pisashen han oh Got orhe damdapat nohnong Go rit natip meng oh Krais Jisas orhe mengtei ihirnong pot pisashen han aposer hat patenmur napor kis nahat napapat han nohmur.  
\v 2 Noh ditadite at Gotsi; Hanipyah Krais Jisas ihitnong Gut ihirnong hinhina mara gutagute damdapat Ihirnong imat yah matpera ma dahapti da ohsi; manap goshat paten da ohsi mat Timoti ohnong paptenmur por nadahandeipatmur.   
\s1 Timoti go kas hatipra. Watahpei hat orhor meng oh pot pisashenmur potip ohe meng oh  
\p
\v 3 Nohe awher ire Got ohe danong ham ma atamreisheru hat orhor nohe dahe noh Got orhe danong ham yah mat orhor atamrein sapat ma hapat daham yah mat orhor atamrein sapatmur. Ama ihat atamrein sapat Got ohnong noh kwitemo mong dao oh Timoti gwe danong ham hahhan go Got ohe danong hat pat hano rim Got ohnong weso por nadahandeipatmur.  
\v 4 Nadahamara noh rih gosi patdapat noh saporo ritporhan gwe ma yimongopnong mah noh daham ditadit rumkin it wanggoshama noh amam isip hatipraneng dahat patmur.  
\v 5 Dahama gorhe ra Roissi; gorhe sua Yunis ite Got ohe danong ma hat patesheru hat orhor gwe dahe arpin ihat dahat orhorwi Got ohnong Ohwi inahatin hatin hanwa go ihat dahat pat ma hapat daham noh Got ohnong weso naporpatmur.   
\p
\v 6 Go Got ohe danong hat pat hano rim noh mama meng moh napotiprohmur. Noh gwe boknong bes namrinporhan Got orhe atamreindin orhe kasip oh gwe mutuhnong nahatipmur. Ama inahatip danong oh Timoti go mandatiprarim irat puka mar ma has deiptiru mat orhorwi papatim isip mat pisashenmur.  
\v 7 Got orhe Yahsup oh dirnong kas hat tamreindin ohe da oh na nahapatmur. Orhe Yahsup oh dirnong kasip naham watahpei hat tamreindin ohe dao bopor goshat indin ohe dao diradire danong pomar ongeng mat papten ohe dao ama da muk ihirsi nahat napapatmur. Inahat napapat ohoh ihan Got orhor atamreindin da ma napin pat da oh kasip hat orhor marin paptenmur.   
\p
\v 8 Ihan go Por oh Krais orhe nitao rim karapus matpa ma hapat daham kas haho diradire Hanipyah ohe meng oh potinmat kas haho hapra. Got ohe meng pot pison ohe ruumsup oh Por ohe dat patru hat orhor nohhe ihtin ruumsup dat patim ihirnong meng pot pisapora daham watahpei hat orhor pot pisashenmur. Pisapatin ruumsup dus orhor Got oh pang inasi nahatiprohmur.  
\v 9 Ama pang inasi nahapat Got oh Norhe nita ongeng mat papat brermur napor nambutin inasi nahat napapatmur. Nambutin inasi nahat ma napapat oh diradire yah hat saya apriya hapti ohe pe oh na namburpatmur. Orhe damdapat orhor Noh maihir imat yah matiprawa daham ama ihat dahah ohe pe ohwi orhor namburpatmur. Ma inahapat da oh rih mong moh na tarpat patin orhor Got oh Noh kaput Krais Jisas ohe dap teidapat ihirnong imat ambutiprawa dahat patesuh ohe pe oh dirnong namburpatmur.  
\v 10 Gahan arpin namburin han Krais Jisas orhe dap teidapat orhe damdapat Yah matpora ma dahapat da oh pitap teinong matipmur. Matporhan dir wamara am haptimur. Ama han Krais oh dire haputperhan da oh Got oh dat wan teinong mar batbet napris napaptepra ohe da oh natimbas deipat it masas da dipwi patepri ohe da mandapnong oh namanhetipmur. Namanhetporhan ama namanhetip da mengnong oh gin dir amrama am ham yah hat eimat paten dasi haptimur.   
\p
\v 11 Ama yah mengnong oh nohnong Go ihirnong pot pisusa am mat pisashenmur napor nohnong kis nahat napapatmur.  
\v 12 Imat kis nahat napapat ohoh ihan noh ama ohe meng oh pot pisapatin ama ohe pe oh nohnong ruumsup nahat napapti orhor noh na kas hapatmur. Ruumsup nahat napaptin orhor nohe ma na kas hapat oh Krais Jisas orhor nohnong Go nohe yah meng moh pot pisashenmur napor nohe hrepnong matip yah meng moh orhor wamat paptepra ma hapat dahapat ohoh ihan nohhe ruumsupsi nahat napapti dus orhor noh na kas hapatmur. Norhe Orhorwi inahatin hanwa daham ma am hat pat han orhor orhe mengnong yah mat orhorwi wamat papatru yah mat papatin orhor orhe pepe dik oh sa hatipra dahama na kas hama kasip hat orhorwi patmur.   
\p
\v 13 Nohe gonong Got ohe arpin meng ma naporpat meng morhorwi gohe ihirnong pot pisashenmur. Krais Jisas ohe tapnong hat patim Ohwi inahatin hatinwa daham ihirnong bopor mat papat ohe da ohsi hat orhorwi pot pisashenmur.  
\v 14 Pot pisusa Got ohe yah meng oh gwe hrepnong ma matipnong oh ihir aer matipririm orhe Yahsup dire mutuh ma pat Yahsup ohsi diradire ihsen yahnap tit ma boporsi mar paptiru mat orhor apaptenmur.   
\p
\v 15 Pigerassi; Hemogenes ihito Esia mong aptei aptei ma Got ohe nita bap ihiro gonsi ihir nohnong kasna naham namdatirimur. Kasna naham ma namdatiri oh go am hat patmur.  
\v 16-17 Onesiporas oh pokwi nohe karapus hat patnong moh na kasna nahama Rom ap mutuhnong moh De ap oh karapus hat pato rim angnahat apris wanahatipmur. Wanahapat gin trun dah tit da yah naham us apir hapatmur. Oh inahapat hano rima noh orhornongo orhe kuu brer ihirnongo oh Got go hinhina mar yah mat paptenmur.  
\v 18 Hinhina mar yah mat papatin kaput mong pepe dik oh hatporhan yah da tei sam imtinmur por adahandeipatmur. Noh rih Epesas ap mutuh oh patin oh nohnong ma napanggeisuh oh go am hat patmur.   
\c 2  
\s1 Tit danong ohwi kasip hat tamrein sashenmur potip ohe meng oh  
\p
\v 1 Nohe mon Timoti go Noh Krais Jisas orhe nita hat patin orhe damdapat orhor Noh imat yah matiprohwa ma dahapat da ohsi yah naham kasip nahat napapat ma hapat daham ama kasip ohsi hat tamreinmur.  
\v 2 Timoti go nohe kuuhan trun bap ire kintei ma ripatgwer meng oh gohe Mama han ihir dakuu ham meng pomat am mat pison han hat pati ma hapat daham ama ihat pati han ire bes teinongwi mat pisonmur.   
\p
\v 3 Go ami ire Noh ire ret patin niyahan yahwa daham batbet ma dariptiru hat orhor Krais orhe atamreipat han gohe Noh ihat batbet darhan yahwa daham batbet dar ihat atamrein sashenmur.  
\v 4 Ami bap ihiroh ami ire atamreindin ohsi; iraire danong ham tamreindin ohsi sahsah mar na tamreiptimur. Iraire duuptei hat pat han oh Norhe atemnongwi dinaham tamreipti ma hapat ha dahatinoh rim orhe atemnong dimar tamreiptimur. Amaru hat orhor gohe Krais ohe atamrein danong ohwi hat patim atamrein sashenmur.  
\v 5 Han ire dasei gosham ma sakaripti oh hanip iraire mengtei sakariyahanoh oh yan dariptimur. Iraire da orhor sakariyahanoh oh yan na dariptimur. Amaru hat orhor Krais orhe mengteiwi atamrein sashenmur.  
\v 6 Tohan pa rang kasip ham ma tamreipat han oh dam kopenat ma periya han oh ohri dapatmur. Amaru hapti ohoh ihan gorhor kasip hat orhor Krais orhe atamreindin oh atamrein sashenmur.  
\v 7 Nohe ma napor mengnong moh dahat orhorwi ahanoh Hanipyah oh mutuh meng gonsi am nahatiprohmur.   
\p
\v 8 Go Jisas Krais oh Depit ohe puh ihir ma hapat. Oh hapura it masas pat ma hapat dahat orhorwi patenmur. Nohe ma pot pisapat oh mameng mohwi pot pisapatmur. Ihan gohe ama mengnong ohhe dahat orhorwi patim kasip hat orhorwi patenmur.  
\v 9 Noh ama yah mengnong ohwi pot pisapat ohe pe oh norhornong inaham ruumsup nahama er han hatin naham karapus nahat napaptimur. Ihtin orhor Got ohe mengnong oh atimbas mar karapus matin hatinda. Na timbas matin hatinmur.  
\v 10 Na timbas matin meng ohoh ihan noh ruumsupsi hat orhor pot pisapatmur. Pot ma pisapat oh Got oh Ama han ihir norhe brer matipramur ma dahat pat bap ihir Krais Jisas ohnong Ohwi inahatin hatin han ma hapat daham Got orhorsi eimat yahnap hat ma patepri da oh ha datingwe rim noh ruumsupsi hat orhor pot pisapatmur.  
\v 11 Ruumsupsi ham kasip hat patim orhor ga ma ripti ga oh mohmur.  
\q1 Dire rihohe ma ihat pateshe da oh Krais ohsi tap hat hapura mandatpa hatin hat pati ohoh ihan dir orhorsi tap hat indiprimura; tap hat indiprimura.  
\v 12 Dirhe ruumsupsi hat orhor kasip hat orhorwi ayahanoh dirhe ohsi kakhan titwi ham ihirnong paptim wamat indiprimura; wamat indiprimura. Diradire boknong dahama dirhe kas ham orhe win aremayahanoh ohhe kaput itap ohe kintei Noh maihirnong hanhanmur napor win naremdipramura; win naremdipramura.  
\v 13 Dir tit da haya tit da haya ham da tamburkem tamburkem hayahanoh ama ihya bap ihirwi ihaptimur. Krais ohnong oh tit da hah tit da hah ham da na yawar deipat han ohoh ihan oh da na tamburkem tamburkem tahapat hanmura; na tamburkem tamburkem tahapat hanmura. Orhe noh imtiprawa ma dahapat da orhorwi inahatipramura; inahatipramura.  
\m ihat ga ma ripti oh arpin ga riptimur.   
\s1 Got oh nuhurnong ha amam nahatinoh rim yah hat orhorwi atamreinmur potip ohe meng oh  
\p
\v 14 Timoti go nohe ma napor meng moh meng am mat pison han ihirnong ihir hanhan matipririm pomat orhorwi ihirnong sat potinmur. Pora nohe ma napotiproh meng mohri ihirnong kasip mengtei orhor potinmur. We. Nohe meng ma napotiproh oh Got orhor nohnong wanahat patin gurnong napotiprohmur. Ihan gur pomat amrat patenmur. Gur mengnong sakarap goshat orhor pot pisasipri. Sakarap goshat orhor pot pisayahanoh ama amraya ihirnong oh panggeitin dasi na mara da aer mar ihapti ohoh ihan gur ihat sakarap goshat pot pisasipri. Yah mat orhorwi pot pisashenmur por Timoti go ama meng oh sios bap ihirnong potinmur.  
\v 15 Gorhornong oh Got oh Moh yah hat natamrein sapat hanhe napor amam nahat orhorwi ha napaptenoh. Noh ihan orhe kintei yah mat orhorwi atamreim orhe arpin meng mutuh meng moh pomat orhorwi apot pisasipora daham pomat orhorwi apot pisashenmur. Imat pot pisahanoh gorhe tamreindinnonghe na kas hatiprohmur.   
\p
\v 16 Kat han ire Got ohnong dasei mar dam na tarpatin meng ma rit saptinong ohri go amrapra. Kom asar sashenmur. Ameng oh Got ohe boknong na ham kom asar napison mengwi rit sapti ohoh ihan Got ohnong kom asar rit sapti mengnong oh gori amrapra. Kom asar sashenmur.  
\v 17 Ameng oh hanipnong birit er isip ma artahat sapat ohe tan mar er mar armat pisapti meng ohoh ihan ama armat pisapti meng oh gori amrapra. Ama armat pisapti han ite win yot oh Haimeniassi; Piretas ihitmur.  
\v 18 Ihit Got ohe arpin mengnong oh kap mara dasuh mengnong riptimur. Dasuh ma ripti meng oh mohmur. Hanip dir hapura it masaprimur ma ripti oh oh dasuh mengmur. Gin mama patinong mohwi napamsas hatin naham napapatmur. Kaput ihat it ti na masaprimur por Got ohe mengnong kap mara kuuhan ire Got ohe danongwi ma hat pati danong oh aer mar kap mat apisaptimur.  
\v 19 Er mat apisaper dahapti orhor Got oh orhe nita bap ihirnong doho kamen ohe tan mar kamen matipmur. Got orhe nita bap ihirnong kamen matip tei ohoh ihan kinmat dakapter wan teinong matiprohe. Got orhor imat kamen matip tei ohoh ihan na imtin hatinmur. Ama kamen matip boknong oh brak matip meng yot oh patmur. Tit ma brak matip oh Hanipyah oh orhe nita kuuhan ihirnong oh orhor am hat patmur gipor ma brak matip oh patmur. Tit brak oh Nuhur orhe han hat patimur ma riya ihir oh er danong oh hariri por mandapti kom asar patenmur gipor ma brak matip oh patmur.   
\p
\v 20 Kamah han ire ap yahnap ap oh ap dus ohom oh den temar ohe bas kan mat saripti han preto erer oh yahnap hansi; be hansi tap mat ap ohom it patimur. Ti gor kweio sirpa kweio ohsi hatpa han ohmur. Ti irato mong tamo ohsi hatpa han ohmur. Imat nitat mat hatpa erer oh ap dus ohom it patimur. Ama erer oh ti yahnap kuuhan ihir apriperhan ama yahnap han ohe tei oh den asar apriptimur. Ti oh be it pati ohoh ihan be kuuhan ihir apriperhan ama be han ohe tei oh den asar apriptimur.  
\v 21 Gur ihat pati bap ohoh ihan gur er danong oh kom asara yah danong ohwi ongeng mat paptenmur. Imat ongeng mat papayahanoh Hanipyah oh ama ihat pati gurnong oh Gur yahnap han ma ap it pati ohe tan hat pati gurmuro. Gur Got orhemuro rim pomat ongeng mat it pati bap gurmuro napotipramur. Ama imat naporpat han bap gur orhe yah atamreindin erernongwi atamreindin mat mamen tahat pati han bap gurmur.   
\p
\v 22 Kopen han gure tei kapkap er da oh tarpas rim isip hapatmur. Ihan Timoti gori ihtin da tit tarpam hahhan kom asar tandurinmur. Tandura yahnap hat son ohe danong ohwi hat sasipora daham sashenmur. Susa Got ohe danong hatin ohe dao hanip taptem ihirnong bopor dein ohe dao ama danong ohwi ham yah hat sashenmur. Susa da ongeng mat paptim Hanipyah ohnong Napanggeitina por ma dahandeipti han bap ihirsi manap goshat patenmur.  
\v 23 Na dahatin meng ma ripti bap ihirsi tap hat patepra. Go am ham dahat patmur. Da hut pati han bap ire na dahatin mengnong ma sakarap gosham meng gusut sapti ohe pe oh inggoshat son danong oh tarpat sapatmur. Ama ihat sapti da oh go am hat pat ohoh ihan go ama ihat sapti danong oh go it tamburker wandeipra. Kom asar sashenmur.  
\v 24 Hanipyah ohe atamreipti han gur sakarap goshapri. Ohri awammur. Gur mutuh mengnongwi pomar am mar papten ohe danong ohwi deinmur. Deipti ihirnong kapkap na heisup mar gonsi yah han bap titwi mar paptenmur.  
\v 25 Paptim ihir mengnong sakarap mar gardeiyahanhe gurdapat ihirnong kapkap imtipri. Ahar manap da tei orhor meng pomat porinmur. Got oh ire danong ha ayah matinoh. Ayah matporhan ihir da tamburkera arpin meng ohe danong ha hatingwe rima gur manap da ohsi pomar paptenmur.  
\v 26 Pomar paptin ihir Dir rih er hat pati ma hapat. Gin arpin mengnong dinggoshatper daham Satan oh Nohe ma dahapat danong oh hat ha sashengwe pora orhe ambir temnong mat ma papat ihiroh ambir tandaphoma yah teinong hatiprimur.   
\c 3  
\s1 Mong pepe dik oh nitat er da tarpatporhan yah hat pati dirnong ruumsup naptahatipra ohe meng oh  
\p
\v 1 Kaput pepe dik apris ruumsup oh ma namkatipranong oh Timoti go dahat orhorwi sashenmur.  
\v 2 Ruumsup ma isip hatipra ohe duuptei oh mama mihapti mohoh isip hatipramur. Kat han ruumsan ihir iraire danong bopor hat pati dao Noh mani ruumsan darneng dahapti dao iraire danong ham armi tahat sapti dao hanip ihirnong dasei mar indeipti dao supir itapir ire mengnong sakarap mar amkar sapti dao wes napanggeim napiro na ripti dao yah hat paten danong bisei deipti dao  
\v 3 arwananah ihirnong ma na hinhina hapti dao hanip mengnong sakarap mar amkar sapti dao hanip aduup apit aripti dao iraire inanong na dahapti dao hanipnong sut pisapti dao yah danong dasei mar mandapti dao  
\v 4 kat han ihirnong nang han ham supti dao iraire indinnong asoh na dahama er danong asoh kapkap dinggoshapti dao Nuhurwi ihtin dasi isip hat pati han bapmur ripti dao iraire Got ohe danong na hama tihan tihan erer ohe ina amamnong oh hat pati dao  
\v 5 ina tei oh Got ohe danong hat sapti ohe ina hatin hat sapti orhora; mutuhdapat arpin danong kasip hat na pati ohe dao ama da muk oh isip hapat ruumsup oh namkatipramur. Ihan gori ihat dahapti han ihirnong wandeipra. Kom asar tandurinmur.   
\p
\v 6-7 Ama ihat dahat sapti han bap ihir da gapa hat pati kuu ire ap rosa da aban deiptimur. Ama da gapa hat pati kuu ihir mamaru hat patimur. Iraire Nuhur nen er hat sapti oho dahapti da oh irairnong ruumsup mar amkat patwa. Ihir Noh ihaprohneng dahatperhan kapkap orhor ama er da tarpas ma riptisi kuu ihirwa. Ihir dir be meng meng oh amram am hatper dahapti orhor dahatinnong na dahapti kuu ihirmur. Ama ihat pati kuu ire apnong oh ama er han ihir Dir ire da adatinmat ropera dahaptimur. Daham ap roperim Nuhur gurnong yahnap meng tit napotperim apriptimur pora dasuh mar ap roptimur. Rosa da aban matperhan ire da oh ire boknong haptimur.  
\v 8 Rih Janessi; Jambres ihit Moses ohnong garmar ma er deisheru mat orhor mama ihapti ihirhe arpin mengnong garmar er mar ihaptimur. Ma ihapti bap ihir er danongwi duut sapti ohoh ihan Got oh ihirnong na ambutin ina hat patmur.  
\v 9 Ihir ihat pati orhor ire ihat pati ohe pe oh isip artahat na sasispramur. Rih Janessi Jambres ihitnong wamar da hut patim ihat saptihe daham kapkap ma am ham mandatparu mat orhor mama ihat sapti bap ihirnonghe kapkap orhor am hama mandatiprimur.   
\s1 Got ohe meng ritporhan ma brak matpa mengnong mohwi dimat sashenmur potip ohe meng oh  
\p
\v 10 Nohe yah hat ma tamrein sapatnong oh go am hat patmur. Mamarumur. Nohe meng pot pisapat mengnongo nohe ihat ma sapat danongo nohe ihat tamrein sapat ohe duuptei mengo nohe kasip hat orhor ma Got ohe danong hat pat danongo nohe manap da tei orhorwi ihirnong pomat papat danongo nohe ire danong ham bopor mar panggeipat danongo ruumsup nahatperhan na garhama pan hat orhorwi ma pat danongo  
\v 11 nohe ihat sapat ohe pe ruumsup ma darpat danongo nohe ama ihat sapat da oh gonsi go am hat patmur. Noh ina ruumsup ma datir oh noh Antiok ap tei patin niyao Aikoniam aptei patin niyao Ristra aptei patin niyao nahatperhan nohe batbet dar ruumsup ma datir oh go am hat patmur. Aptei aptei nitperhan nohe ina ruumsup dar ma namkarpat oh ire bes tei patin orhor Hanipyah orhor yah naham nambutirmur.  
\v 12 Nohnongwi inahat napapti basmur. Nuhur Krais Jisas orhe tapnong hama yah danongwi hat pateper ma dahapti han gurnonghe gonsi inahatperhan mama mihtin ruumsup oh gure boknong inahaptimur. Imat ruumsup nahapti ohoh ihan gur kasip hat orhor patenmur.  
\v 13 Er danong hat sapti han bapo Nuhur yah hanmur rim dasuh hat sapti han bapo ama ihat er hat sapti han bap ire er da oh isip hat isip hatwi sasipramur. Isip hat susa kuuhan ihirnong dasuh mat pisaptin Satan oh it irairnong dasuh mat pisasipramur.  
\v 14 Ihapri ohoh ihan Timoti gori ama danong oh hapra. Ama danong hatiprarim rih meng am nahatperhan Moh arpin meng ma hapat daham ma dindeipat ohe mengnongwi dimar patenmur. Meng ma am nahatpa oh gorhe am hat pat kuuhan ihir am nahatperhan go Maihir arpin dasi hat pati kuuhan ihir ma hapat. Ihan ire naporiya meng moh arpin meng naporiya ma hapat daham ma dindeipat meng morhorwi kasip ham marin paptenmur.  
\v 15 Go brer gar hat patin orhor Got orhe ongeng mat papat yahnap meng oh ritporhan ma brak matpa meng oh gonong napor am nahatperhan go amrama daham am hat patesuhru patru patmur. Ama am hat pat meng oh hanip dirnong da nadapetporhan Krais oh inahatin hatin hanwa dahatperhan Got oh nambutin inasi nahapat ohe meng ohmur. Inahapat meng ohoh ihan ama meng orhorwi kasip ham marin orhor paptenmur.  
\v 16 Ama Got orhe meng ma brak matpa meng gonsi oh Got orhe atem teidapatwi ritporhan brak matpamur. Got orhe atem teidapat ritip meng ohoh ihan da nadapemo Noh gin er hah sa dahatin danong am nahamo Go ihat sapra. Yah danong oh mihat sonmur napotin ohe danong oh namgimo nahat ma napisapat meng ohmur.  
\v 17 Imat ma napisapat oh dir Got orhe atamreindin ohe kasipo dao oh napriporhan ti yah han ti yah han ohe tamreindinnong oh mamen tahat ha patengwe rim inahapatmur.   
\c 4  
\s1 Timoti go ihirnong meng pot pison inasi hat orhorwi pot pisashenmur potip ohe meng oh  
\p
\v 1 Krais Jisas ohe it ma apripra oh hanip dirnong orhe hrepnong naham napapindin yahnap han ham apripramur. Aprisa haputpa bapsi; da pati bapsi tap naham dahanaham nasatipramur. Ihtin han Kraissi; Got ite kintei kasip mengtei ma napotiproh meng moh ite dap tei awam hatin tuker napotiprohmur.  
\v 2 Timoti go Got orhe arpin meng pot orhorwi paptenmur. Ihat papindin oh ihir na amratper ariya teio meng amratper riya teio oh gomdapat ire ma ihaptinong oh dahapra. Potpora daham pot orhorwi paptenmur. Pot orhorwi porpatim go manap da tei orhor Gur mihat ma sapti oh er hat saptimur. Mihat ma saptinong oh yah hat saptimur pora meng am matin inasi hat patim orhorwi pot pisashenmur.   
\p
\v 3 Imat pot pison oh kimsi kat han ihir yahnap ohe sawa mengnong moh nuhur mihtin mengnong mohri nuhur na amratiprohemur. Nuhur masoma ihapti mengnong masoh amratiprohemur daham er meng am matin han ihirnongwi ambura ama ihtin er meng ohwi ambar meng hatin mar amraprimur. Ihapri ohoh ihan Timoti go ihirnong yah meng moh am matin inasi hat patim orhor pot pisashenmur.  
\v 4 Ihir er meng amrama arpin yahnap mengnong moh dakap meng hatin mar kom asara kakdah mohe erer ihat tarpatipmur rit son ohe dasuh mengnong oh amrat sasiprimur.  
\v 5 Ihtipri ohoh ihan go da timbas ham meng pasorim mandus hatheri mengripra. Da darhet patdapat orhorwi meng porinmur. Go ihtin dasi hat orhorwi patin ruumsup nahayahanhe ruumsupsi hat orhor meng pot pisashen ohe danong orhorwi hat sashenmur. Susa Got orhe atamreindin oh ti amdapra. Gonsi atamreim tap kat mat orhor apisashenmur.   
\s1 Por oh Noh hapur norhe tamreipat ohe yan oh datipramur ritip ohe meng oh  
\p
\v 6 Norhornong oh hanip ire danong ham panggeit pisapatin norhornong bat gwe naham nitin ina nahat napaptimur. Inahat napapti ohoh ihan noh haputin kakduup hat pat ma hapat dahat patmur. Noh ihat pato rim meng oh gonong mama pomat naporpat ohmur.  
\v 7 Ire nang dap dakmeitperim ma yah hat orhor sakat sus dakmeiriptiru nohhe Got orhe napotip meng danong orhorwi hat sapatru hat susa gin mamen mar timbas deimur. Noh Got ohe danong hatin ohe da oh gapa ham na manda ma hapat dahapatmur.  
\v 8 Timbas matporhan yan oh nang dap dakmeiriya han ireo rim ma mamen mat asariptiru mar Got oh Norhe danongwi kasip hat ma sapti han ire yan atpora rim ma nasarpat yan oh nohe mamen mat nat patmur. Kaput pepe dik oh Hanipyah duung dasi ma nasapat han orhor nasama ama mamen mat nat pat yan oh napripramur. Ama yan oh nohnongwi na napripramur. Hanipyah ohnong oh kapkap apris pitap teinong ha hatinoh daham kinkin da hat ma pati bap gursi gonsi diradirnong tap mat ama yan oh napripramur.   
\s1 Por oh Noh ruumsupsi hat pat ohoh ihan Timoti go wanaham aprinmur  
\p
\v 9 Gin Timoti go norhe patnong kapkap aprin danong hama gin orhor kapkap aprinmur.  
\v 10 Nohsi patesuh han Demas oh kakdah mohe paten danong isip hama nohnong namdama Tesaronaika apteinong pipmur. Ma napanggeit napapti han ihiroh Kresens oh Garesia mongnong sus patmur. Taitas oh Darmesia mongnong sus patmur.  
\v 11 Ruk orhap nohsi matei patmur. Ihan go Mak oh nohnong yah mat napanggeitin han ohoh ihan go ohnong ambura mama orhor gutagut tap hat kapkap aprinmur.  
\v 12 Noh Tikikas ohnong Go Epesas apteinong son por darhetirmur.   
\p
\v 13 Go ma apriproh oh nohe damesi teimdap andin ohe watah saket dapsi oh noh Troas ap mutuh Kapas ohe ap oh mandatip wataho brak ban oho oh nadar poprinmur. Apop watah tei brak matpa brak ban ohri na hanhan matipra. Nadar poprinmur.   
\p
\v 14 Areksanda kapasi erer manhepat han oh nohnong isipnap tit er nahatipmur. Nohnong ma isip er nahatip yan kis orhor Hanipyah oh ohnonghe imat yan orhor apripramur.  
\v 15 Pohon ihtin han oh dire mengnong heisup nahat orhorwi patim nagatdeipat ohoh ihan goheri oh inahatiprarim kinkin da ham inin hat orhorwi patenmur.  
\v 16 Nohnong rih kopenat kot naham ma dahanahatiri oh nohsi pati han ihir iraire boknong hama nohe komnong ti na ham namdatirimur. Ire imat nohnong namdatiri ohe pe yan oh Got gorhor ire boknonghe matipra por Got ohnong adahandeipatmur.  
\v 17 Ihirdapat nohnong na napanggeim namdatiri orhora; Hanipyah oh ama dahanahatiri dik orhor apris Juda na hat pati han bap ihirnong meng pot pison inasi naham napanggeit napapatin noh Got ohe meng moh ihirnong pomat potirmur. Potporhan Dir Por ohnong sutpera ma dahapti han bap ihir kotwa bap hatin hat pati bap ire atem teidapat orhor Got oh nohnong nambutirmur.  
\v 18 Ma nambutirru nahat orhorwi Hanipyah oh er nahatin han ire atem teidapat orhorwi namburipramur. Nambura orhe napapat teinong nahatipramur. Ihtin han orhor dirnong imat napapat ohoh ihan dir Weso por armi mar papten han oh orhorwimur. Arpinwa.   
\s1 Por oh kapkep matip ohe meng oh  
\p
\v 19 Gin Timoti go Prisirasi; Akwira ihit gamino Onesiporas oho orhe kuu brer orhe hrep mat papat ihiro ihirhe sa yah hat pati rim Por oh dahatahapatmur potinmur.  
\v 20 Erastas oh Korin ap mutuh patin noh apdapmur. Aprisa gahan Tropimas oh Miritas aptei oh sik hatporhan noh atei mandama apris mama pat ohmur.  
\v 21 Mong er hapat dik oh na apin patin orhor go aprinmur. Yuburaso Pudenso Rainaso Krodiao Got ohe nita hat pati kat bap ama ihirhe Timoti ohhe sa yah hat pato rim dahatahaptimur.   
\p
\v 22 Noh Hanipyah ohnong Hanipyah go Timoti ohnong panggeit pomat paptenmur. Timoti ohnong panggeit papatim gorhe damdapat Noh ihirnong imat yah matpor ma dahapat da ohsi Timoti ohnongsi; Timoti ohsi pati ihirnongsi tap mat apris paptenmur por nadahandeipatmur.  
\p Gin nohe menghe kimur.