\id 2TH - Oksapmin NT [opm] -Papua New Guinea 1992 (web version -2014) 
\h 2 Tesaronaika 
\toc1 Tesaronaika ihirnong Por oh komdapat ma brak mar atip ohe meng oh 
\toc2 2 Tesaronaika 
\toc3 2Ts 
\mt1 Tesaronaika  
\mt2 ihirnong Por oh komdapat ma brak mar atip ohe meng oh  
\ip Por oh Korin ap mutuh amdapat patim Tesaronaika aptei Hanipyah orhe nita hat pati bap ihirnong meng por ohri brak mar adarhetipmur. Gahan patdapat komdapat it ire danong akasip mar mameng moh brak mar adarhetipmur.  
\c 1  
\p
\v 1 Poro Sairaso Timotio nuhur Tesaronaika aptei Got ohe nita kuuhan bap gur diradire at Got ohsi; Hanipyah Jisas Krais ohsi tap hat patio rim mama brak mat nasariya ohmur.  
\v 2 Nuhur diradire at Gotsi; Hanipyah ihitnong Gut ihirnong gutagute damdapat orhor Yah matper daham ma yah deipti da ohsi; manap gosham yah hat paten da ohsi mar paptenmur por nadahadeiptimur.   
\s1 Poro ire Tesaronaika ihirnong win adaptuhut pisashe ohe meng oh  
\p
\v 3 Nure taptem bapa. Gure ma Hanipyah ohnong Orhorwi inahatin hatin hanwa ma dahat pati da ohsi; arwananah ihirsi da gosat pati da ohsi ama ihat dahapti da yot oh guragure bok oh isip hat saptio rim nuhurhe Ihir ihat saptio rim Got ohnong dipwi weso naporiptimur. Weso ma naporipti oh Got oh ama weso potin da oh nuhurnong napin pat ohoh ihan Got ohnong weso naporiptimur.  
\v 4 Weso pora Got orhe nita bap aptei aptei ma pati ihirnonghe Tesaronaika sios bap ihir ihat kasip hat orhorwi patimur por gure winnong armisi naham win nadaptuhut napisaptimur. Nuhur imat gure winnong ma nadaptuhut napisapti oh mamaru mat napisaptimur. Kat ihirdapat Tesaronaika aptei pati Got ohe nita ihirnong Maihir Got orhe nita bapmur rim ina ruumsup apriperhanhe ihir batbet isip dat sapti orhor ire Got ohe danong hat ma pati da oh na gapa ham kasip hat orhorwi ihat saptimuro por gure winnong armisi naham win nadaptuhut napisaptimur.   
\s1 Got ohe duung dasi hat pat da ohsi nasatipra ohe meng oh  
\p
\v 5 Gure na gapa ham kasip hat orhorwi ma sapti oh Got orhor duung dasi hat orhorwi nasam inahapat hanhe dahatin ohe da oh pinggit pisaptimur. Gure batbet dar ma ihat sapti oh Got oh Maihir norhe papindin hrepnong hatin inasi hat patim ihat saptimur naporpatmur.  
\v 6 Got oh duung dasi hat pat han ohoh ihan gure ruumsup napripti han ihirnonghe orhe duung da orhorsi sama ama ruumsup nahapti batbet orhor iraire boknong apripramur.  
\v 7 Aprisa orhe danong ham ina ruumsup daripti dirnong pang inasi nahatipramur. Duung da ohsi naham ma nasatipra oh Hanipyah Jisas Krais orhe ma apripra dik oh inahatipramur. Orhe ma apripra oh orhe enser kasipnap ihirsi; irat has ohsi tap hat apris pitap hatiprimur.  
\v 8 Ama inahatipra dik oh Got ohnong hanhan mar ihat sapti kuuhan bapo Hanipyah ohe yah mengnong kom asar mandapti kuuhan bapo ihirnong iraire er hat ma sapti ohe er yan oh apripramur.  
\v 9 Er yan ma apripra ihirnong oh orhe kasip ohsi has mat papat teinong oh na matipranapmur. Irarhe wan tei eimat dipwi batbet dar paten teinong matipramur.  
\v 10 Ma imtipra oh Got orhe ma Noh ama dik oh Hanipyah ohnong pitap matporhan orhe nita bap hat patim Ohwi inahatin hatin hanwa ma dahat pati kuuhan ihir ohnong armisi da maro amam maro sa hatipri ma dahat pat dik orhor imtipramur. Orhornong armi mar ma imtipri oh nuhur gurnong meng napotperhan gur amram arpin meng naporiptihe daham orhornong am hat pati bap gursi; diradir tap hat orhornong armi matiprimur.   
\s1 Poro ihir Tesaronaika ire paten meng adahandeishe ohe meng oh  
\p
\v 11 Dir orhornong armi matin dasi hat patin oh ha aprinoh rim nuhur gure paten meng oh dipwi Got ohnong nadahandeiptimur. Gure paten meng ma nadahandeipti oh mamaru mat nadahandeiptimur. At Gota. Gorhe Ihir norhe nita hat patim mama da mohsi mihat orhorwi ha sashengwe daham Gur norhe nita hatinmur por gorhe nita mat papat bap ihir gorhe ma dahapat da ohsi hat patim saya apriya hat ha patengwemur. Ihat patima gorhe kasip ohsi ire Nuhur mama yah danong mohwi ihtipera ma dahapti dao Krais ohnong ohwi inahatin hatin hanwa daham yah hat ma sapti ohe dao ama ihat sashen ohe inasi mat paptenmur por dipwi nadahamar paptimur.  
\v 12 Imat paptim Hanipyah Jisas Krais gutagute taman gutagute damdapat orhor Ihirnong imat yah matper ma dahapti da ohsi mat paptenmur. Imat paptim ihir ama da ohsi hat orhorwi saya apriya haptin kat ihir wamara Hanipyah gorhe imat papat danong oh wamara gorhe winnong armisi nahat sa napaptepri. Gorhordapathe gorhorsi tap hat pati ire winnong armisi mar paptenmur por nadahandeiptimur.   
\c 2  
\s1 Sawa mengnong am hatperhan ina ruumsup datipri ohe meng oh  
\p
\v 1 Nohe taptem gur amratin. Dir Hanipyah Jisas Krais oh it apris orhe duupnong naham ruprup nahatiprawa daham dir minhan patimur.  
\v 2 Ma minhan pati han oh apdormur naporiyahanhe kapkap bupang rim Arpinkin dahamhe da er hapri. Apdormur ma naporipti han ihir kat ihiroh Nuhur Got ohe Yahsup oh nure atem teinong rit natporhan naporiptimur. Kat han ihir Nuhurra Poro ihir naporiptin nuhur amram naporiptimur. Kat han ihir Poro ihir brak mar nadarhetperhan nuhur sama naporiptimur. Imat naporiyahanoh gurri ama mengnong oh Arpinhe daham amrapri.  
\v 3 Ama dasuh meng ohnong amrapririm mohnongri dahat patenmur. Mamarumur. Hanip ruumsan kat han ihir Got ohnong sakarap mar kom atin da ohri popriyao Got ohe danong na ham isipnap er hat pat han orhornong eimat timbas hatin han ohri pitap tei ham apiro ama ihat pati han bap ihirri hat apriprimur. Ama ernap han oh na apin pat ohoh ihan ama ihat dasuh meng naporiyanong asoh Arpinhe dahapri. Arpin han oh kom apripra ohoh.  
\v 4 Ama Got ohe danong na ham isipnap er hat pat han oh mamaru hat apripramur. Got orhornongo Got ohemur por ma armi deipti han erero kat han ire erernong Moh nure Gotmur poripti erero oh gonsi tap mar amkara Nohwi ihtin han hat patmur rim orhe winnong armi taham tandaptuhutipramur. Tandaptuhura Got ohe ap yawar ohom rosa Norhor Gotmur rim Got orhor hatin ham tongnotipramur.  
\v 5 Ameng oh noh gursi patim naporisuh meng oh gur hanhanda. Gur am hat patimur. Ginhe it tap meng orhor naporpatmur.   
\p
\v 6 Gure tit ma am hat pati oh ama er han oh gin orhor pitap hatiprarim tit han tit mandap apam gaheimat papatmur. Ama gaheimat papat oh Got orhe Ama dik oh sa pitap hatipra ma dahat pat dik oh kopen ohoh ihan Satan ohnong Go gaheimat paptenmur potporhan Satan oh gaheimat papatmur. Gaheimat ma papatnong oh gur am hat patimur.  
\v 7 Ama ernap han oh pitap teinong hatiprarim gaheimat papat orhor ama han ohe er da oh ahar tarpat sapatmur. Ahar tarpat sapatin orhor pitap hatiprarim mandap gaheimat papat han Satan ohnong Got oh dar wan teinong mara ernap han ohnong pitap teinong matipramur.  
\v 8 Pitap teinong matporhan Hanipyah Jisas oh orhe atem teidapat Gin go timbas hatina por ohsi; orhe ma apripra has kasip ohsi ama ernap hat sapat han ohnong sum timbas matipramur.   
\p
\v 9 Ama ernap han ohe ihat ahar apris ma pat oh Satan orhe er hat pat orhe kasipnap kasip ohsi kasip matporhan ama kasipnap ohsi apris patim hanip dire pati mutuhnong apripramur. Ama ohe kasip ohsi aprisa arpin tarpatipra ohe kis hano hanip dire na imtin hatin hano oh arpin Got orhe kasip ohsi ha indei hatin mat imtipramur.  
\v 10 Indeipat er apteinong son inasi hat pati bap ihirnong orhe dasuh er da ohsi isipnap dasuh matipramur. Arpin mengnong amratperhan namburipra ohe mengnong na amratiprohemur daham kom at pati ohe pe oh er dasi han oh ihat apris dasuh mar ambutipramur.  
\v 11 Got oh Ihir norhe nambutin arpin mengnong moh kom at pati ohoh ihan noh dasuh mengnong moh arpin menghe dahatin ohe da ohsi matpora.  
\v 12 Mara arpin mengnong moh na amratin menghe daham mandama er danong hat son ohe danong oh amamsi hat orhor dimat ha sashengwemur. Ihat patin noh sama Gur er yan datin han bap gurmur pora sama heisup mat paptepramur daham da aban matin sup oh ire mutuhnong matipramur.   
\s1 Gur kasip hat orhorwi patenmur ritip ohe meng oh  
\p
\v 13 Nure taptem Hanipyah oh bopor nahat pat bapa. Got oh weso napotin inasi nuhurnong nahatporhan nuhur Got ohnong dipwi weso naporiptimur. Weso ma naporipti ohe duuptei oh mamaru hat patmur. Rih mong na tarpat patin orhor gurnong Got oh Ama han ihirnong norhe han matipramur. Norhe han ma matipra oh norhe Yahsup oh ihirnong irarhe teinong mar ongeng mat sa paptepra. Imat papatin arpin mengnong amram Arpin menghe daham amram dindeiptin noh ambutipramur daham orhe han naham kis nahatipmur. Imat kis naham napapat hano rim nuhur dipwi weso naporiptimur.  
\v 14 Got oh gurnong kis nahat napapatin nuhurhe Got ohe yah meng oh gurnong ma naporipti ohe pe oh Got oh gurnong Gur norhe han hatinmur naporpatmur. Ma naporpat oh Hanipyah Jisas Krais orhe has yah dasi hat ma pat oh ihirhe irair tap hat sa datipri daham gurnong norhe han hatinmur naporpatmur.  
\v 15 Orhor imat kis naham namburpat han ohoh ihan nure taptem gur nure be naporipti mengo brak tem ma naporipti mengo ama Got ohe sawa meng naporipti mengnong mandatipririm kasip hat orhor amram marin patenmur.   
\p
\v 16 Hanipyah Jisas Kraissi; at Got ihit dirnong bopor nahat napaptimur. Bopor nahat napaptim itaite damdapat orhor Ihirnong imat yah matpera dahapti ohe pe oh dirnong oh saheih ham ina ruumsupsi hat patin natimbas mara eimat pang inasi hat paten ohe dasi nahayao yah nahatiprawa daham ma minhan pati ohe da oh tit dawi naham kasip nahayao nahat napaptimur.  
\v 17 Ama inahat napapti han yot itaitnong gure paten meng oh Gut ire danong akasip mara pang inasi mat paptenmur. Ire saptinonghe ti da ti da yah hat sapti ohe da ohsiwi mat paptenmur. Menghe yah mengwi rit sashen ohe dasiwi mat paptenmur. Gut imat ihirnong paptenmur por nadahandeiptimur.   
\c 3  
\s1 Gur nure paten meng oh Got ohnong nadandeinmur potpa ohe meng oh  
\p
\v 1 Nure taptema. Gin nure kat meng ma pat oh napotiprohemur. Gurdapathe nure paten meng oh Got ohnong mamaru mat por nadahandeinmur. At Gota. Hanipyah ohe meng oh aptei aptei oh artaham isip hat ha sashenohmur. Isip hat susa nure ma amram winsi meng deisheru mat orhor ihirhe gin kapkap morhor amram winsi meng ha matingwemur por nadahandeinmur.  
\v 2 Tit ma imat nadahandein oh kuuhan kat gonsi ihiroh arpin meng na amratin ina hama nuhurnong er nahatin ina nahat napapti ohoh ihan gur Got ohnong At Gota. Go mamter er hat sapti han ire bes teinong hat ma pati ihirnong go bes arpit amdatinmur por nadahandeinmur.   
\p
\v 3 Er hat sapti ihir ihtin han hat pati orhor Hanipyah Jisas oh arpinwi inahapat han ohoh ihan gurnonghe kasip dasi nahat orhor napaptepramur. Napapatin er han oh er nahatiprarim orhor doho hatin naham doho dahnong naham napaptepramur.  
\v 4 Gur diradire Hanipyah ohsi tap hat pati ohoh ihan nure ma napotiri sawa meng oh gur amram dindeipti ma hapat. Gin ma naporiya sawa meng mohhe amram dimat orhor paptepri ma hapat dahaptimur.  
\v 5 Gin gure da mutuhdapat Got oh bopor nahat napapatwa ma dahapti da oh Hanipyah orhor isip naham bapkei nahat ha napaptenoho. Napapatim orhe ina ruumsup dar kasip hat ma patesuh ohe kasip ohsi gure mutuhnong namtiporhan ama ohe kasip ohsi kasip hat ha napaptenoh rim nuhur nadahandeiptimur.   
\s1 Kakdah moh tamreimwi den dam patenmur ma potpa ohe meng oh  
\p
\v 6 Gin Hanipyah Jisas Krais orhe mengtei nure taptem gurnong kasip meng tit napotiprohemur. Nure Gur ihat tamrein patenmur ma napotiri meng oh tit han tit na amram na tamreim gapanwa han hat pathanoh ama han ohsi tap hathe patepri.  
\v 7 Gur Poro ire dirnong namginipti da moh dir dindeiyahanoh yahmur dahat patimur. Nure gurnong ma namgishe da oh mamarumur. Nure gursi ma patenipti oh nuhurri be gapanwa han hat na pateshemur.  
\v 8 Denhe nuhurri be dar na dashemur. Ma ihashe oh nuranure kasip hat tamreipti ohe pe oh mohomwi dashemur. Nuhurdapat gurnong ina ruumsupsi nahatipririm nuhur kwitemo mong dao ruumsan ma tamreiya ohe pe ohwi den mohom dashemur.  
\v 9 Nuhur den mohom ma dashe oh gurnong namgim ihashemur. Nure meng naporipti ohe pe oh Den namdina napor den dar dashehanoh yah hashemur. Ihtin orhora; nuhur na dashemur. Nuhur gur nure tamreim den dapti ohe da oh gurhe wamar am hama ha dimtingwe rim nuhur gurnong namgim ihashemur.  
\v 10 Nuhur rih gursi patim ma naponipti meng oh Gur Noh na tamreindiprohmur daham gapanwa hat pati han ihirnonghe den kasip mar pandepri ma naponipti meng oh ginhe it tap meng orhor naporiyamur.   
\p
\v 11 Kat ihirdapat Tesaronaika aptei sios ihir Gapanwa han hat pati ihir iraire tamreindinnong na tamreima kat ire Nuhur ihtiper ma dahaya danong asoh agatmat apisaptiri giritperhan nuhur amratirimur. Amrama kat gur ihat pati han bap ma hapat daham nuhur mama meng moh naporiptimur.  
\v 12 Kat gur ihat pati ohoh ihan nuhur Hanipyah Jisas Krais ohe mengtei kasip mat orhor We. Gapanwa han gur kak tongnom guragure bes tei den gonom dam patenmur girim kasip mengtei orhor naporiyamur.  
\v 13 Kat ihir ihapati orhora; nure taptem gure ma yah mat pisapti da oh garham mandapri. Kasip mat orhorwi yah mat pisashenmur.   
\p
\v 14 Nure napor brak nasariya meng moh tit han tit amrama na dindeihanoh ama han ohnong dason mara am hat patenmur. Ihat patim ama ihpat han ohe tapnonghe ham patepri. Gur ihat patin orhe ma ihpat da oh Noh ihat patin ihir nohnong kasna naham inahapti ma hapat daham sa am hatipra.  
\v 15 Ohe tapnong ham patepri ma naporiya oh mahaw han hatin mar papindin ohe meng na naporiyamur. Be guragure taptem ihirnong sawa asar kasip deiptiru mat papteno rim mameng moh naporiyamur.   
\s1 Por orhe bes tei brak mar kapkep matip ohe meng oh  
\p
\v 16 Manap dasi ham yah hat pati ohe duuptei oh Hanipyah orhorwimur. Ama imat napapat han orhor gursi tap hat ha patenohmur. Gursi tap hat napapatin yah hat ma aya diko ina ruumsupsi aya diko oh dipwi Hanipyah orhe manap dasi naham yah hat paten ohe da ohsi naham ha napaptenoh rim nadahandeiptimur.   
\p
\v 17 Gin gurhe sa pati napor mama nabrak dei meng moh Por norhe bes tei mama nabrak dei ohmur. Noh brak ma nasarpat oh ihir brak matperhan pepe kapkep meng oh norhe bes tei mimatwi brak mat nasarpatmur. Gur Por orhe bes tei brak mat natirhe ha dahatingwe rim norhe bes tei brak mat mama nasar ohmur.   
\p
\v 18 Gin Hanipyah Jisas Krais gorhe da orhor Noh ihirnong yah mar bapkei matpora dahapat da orhorsi gonsi ihirnong bapkei mar paptenmur por nadahandeipatmur.  
\p Gin Por nohe meng oh kimur.