\id 2PE - Oksapmin NT [opm] -Papua New Guinea 1992 (web version -2014) 
\h 2 Pita 
\toc1 Pita ohe komdapat brak mat atip ohe meng oh 
\toc2 2 Pita 
\toc3 2Pi 
\mt1 Pita  
\mt2 ohe komdapat brak mat atip ohe meng oh  
\ip Ohri ma brak matip han Pita orhor mama kom meng mohhe brak matipmur. Ohe ma brak matip oh Jisas orhe nita hat pati bap ire mutuhnong dasuh han ihir sus iraire damdapat dahat pati meng oh dasuh mat pisaptin ihir amengnong amram dimtipririm mameng moh brak mar adarhetipmur.  
\c 1  
\p
\v 1 Noh Saimon Pitamur. Jisas Krais orhor Go norhe meng mohsi pot pisona napotporhan orhe kis nahat napapat han noh orhe boknong hat patim orhe mengtei be atamreim sapat han noh mama brak mat nasar ohmur. Diradire namburpat han Jisas Krais oh Gotmur. Ama Krais orhor orhe duung dasi hat pat ohe pe oh orhornong Ohwi inahatin hatin hanwa dahatin ohe da oh Juda hat pati bap nuhurnong yah mat orhor napripatmur. Yah mat orhor ma napripatru mat orhor gurnonghe imat orhor napripatmur. Napriporhan ohwi inahatin hatin hanwa ma dahat pati han bap gurnong mama brak mat nasar ohmur.   
\p
\v 2 Diradire Hanipyah Jisas Kraissi; Got ihit tamannong noh mama meng moh nadahadeipatmur. Ire gute taman danong ham Ihit ihat patimura; ihat patimura daham am hat orhorwi ma sapti ohe pe oh gutagute taman damdapat ma yah deipti ohe dao damdapat manap hat yah hat indin ohe dao ama ihat paten ohe da oh tei apin tei apin mar isip mat apisashenmur por nadahandeipatmur.   
\s1 Got oh Gur norhe nitamur napotporhan orhe nita ham kasip hat pati ohe meng oh  
\p
\v 3 Got oh kasipsi pat han ohoh ihan orhe kasip ohsi orhorsi eimat paten ohe dao orhe da hatin hat sashen ohe dao ama ihat paten ohe da oh gonsi gon ihat son ohe inasi nahat napapatmur. Ma inahapat oh orhe has yahnap da ohsi hat patim Gur norhe han bap hatinmur napor kis naham orhe han naham namburpatmur. Nambutporhan dirhe orhornong am hatperhan ama am haya ohe pe oh orhorsi eimat paten ohe dao orhe da hatin hat sashen ohe dao oh yah mat orhor napripatmur.  
\v 4 Orhe has yahnap dasi hat patim ma inahapat oh rih orhor Noh gurnong wanohe yahnap yahnap dawi nahapramur napor ma rit natip yahnap da orhor napin patmur. Ihtin yah da ma napripat oh Ama ohe pe oh ihir kakdah mohe er hat son ohe da oh pomat pisus hanipnong er deipat da moh mandama norhe yah hat sapat da moh hatin hat ha sashengwe daham ama rit natip yahnap da oh napripatmur.   
\p
\v 5 Orhor ihtin dasi nahat napapat hano rima Orhorwi inahatin hatin hanwa dahapti ohe kamen teinong oh duutin dasi ham yah hat sapti ohe da oh ohe kamen teinong matpora daham kasip ham imtinmur. Yah hat son ohe basnong oh Got oh Ihir ihat ha indingwe ma naporpat ohe da oh am ham ohe basnong matpora daham kasip ham imtinmur.  
\v 6 Got ohe dahapat da ma am hapti ohe basnong oh ti da ti da na ham ongeng tahat pati ohe da oh ohe basnong matpora daham kasip ham imtinmur. Ongeng tahat pati ohe da ohe basnonghe ina ruumsup apriporhan na gapa ham Kasip hat orhorwi paten ohe da oh ohe basnong matpora daham kasip ham imtinmur. Kasip hat orhorwi paten ohe basnong oh Got orhe da hatin hat sapora dahapti da oh ohe basnong matpora daham kasip ham imtinmur.  
\v 7 Got orhe da hatin hat sapora daham sapti ohe basnong oh Got orhe nita taptem ihirnong hinhina mar panggeipti da oh ohe basnong matpora daham kasip ham imtinmur. Taptem ihirnong hinhina mar panggeipti ohe da ohe basnong oh kuuhan gonsi ihirnong bopor mar da apripti da oh ohe basnong matpora daham kasip ham imtinmur.  
\v 8 Ama da gonsi marim isip mat pisayahanoh imat isip mat pisaya ohe pe oh dire Hanipyah Jisas Krais ohnong daham ma am hapti ohe da oh na wa hama dam ham isip hat mama sapat oh ma hapat dahaptimur.  
\v 9 Ama danong na marin pati han ihirnong oh meihnong na watahama kin kwi han ihir hatin hat patimur. Kin kwisi han ihir hatin hat patim Got oh Dire er gap hirmar namdatipwa ma dahapti danong oh it hanhan mar mandapti bap ihirmur.   
\p
\v 10 Nohe taptema. Gur ire ihapti da hatin hapririm noh tit meng tit napotiprohmur. Got orhor Maihir norhe nita matipra han ihirmur napora kis nahapat orhe nita naham napapat bap gurmur. Gurnong inahat napapat bap gur ohoh ihan ihir wanahama Maihir arpin Got orhe kis mat papat han bap ma hapat ha napotingwe rim gur ire kintei arpin yah mengnong dahama yah hat orhorwi saya apriya hat patenmur. Ihatwi saya apriya hat ayahanoh gurnong ma er naham timbas nahatin mandap oh timbasmur.  
\v 11 Ihat daham kasip hat orhor ayahanoh ama ihat pati han gurnong oh Got oh Hanipyah namburpat han Jisas Krais orhe eimat dipwi ma napaptepra apteinong ha rongwe rim Marona napor amam da ohsi isip naham nambutipramur.   
\p
\v 12 Nohe gurnong meng napor mama brak mat nasar meng moh gur Arpin meng ma hapat daham am ham kasip hat marin pati orhor noh gure danong napamsaswi napaptepramur.  
\v 13 Noh na haput patin orhor mama meng moh gur hanhan matipririm gure danong napamsas dipwi napor ahan yaho dahapatmur.  
\v 14 Hanipyah Jisas Krais oh nohnong Go matei kakun patema watah oh matei mandam da oh sapramur napor pitap teinong mar napotir ohoh ihan noh matei kakun pat ohoh gur mengnong moh hanhan matipririm noh dipwi gure danong napamsaswi patmur.  
\v 15 Noh haputporhan gur mama meng moh hanhan mar mandatipririm noh hapurhanhe gur Oh ginaponipat daham nohe mama napor brak deipat mengnong moh sama sa dahat orhorwi patepri rim noh kasip ham pomat orhorwi mama napor nasarpatmur.   
\s1 Arpin nuranure kin wamar naporiptimur potip ohe meng oh  
\p
\v 16 Nuhur dire Hanipyah Krais oh kasip hanmuro. Ama kasip han oh it apripramuro ma napotiri meng oh kat han ihir iraire damdapat daham ihtin hanmur potpera daham ambar meng hatin mat naporiyarit na napotirimur. Arpin Got oh Jisas orhe boknong wanohe has yahnapsi matporhan nuhur wandeipti nure ma wamtipa meng orhor napotirimur.  
\v 17 Nuranure kin ma wamtipa oh mamarumur. Nuhur yei ka rus patin itap Got oh mon Jisas ohnong armi mara armi matin ohe has yahnap ina ohsi mat manda hangop. Ihat pathe dahatperhan aw tei mahat has isipnapsi pat Got oh meng tit rim hangop. Meng ma ri oh Norhe mon moh norhor bopor mat papat monmuro. Ohe ma ihat sapat oh norhor amam isip mat papatmuro rim hangop.  
\v 18 Nuhur Got orhe yeio rim ongeng mat papti ka orhor orhorsi patin orhor ama meng oh aw tei mahatdapat ritporhan amratpamur. Ihan nuranure damdapat meng oh na naporiptimur. Amram wamtipa ohe meng orhor naporiptimur.   
\p
\v 19 Nuhur wamar am hapti Rih propet ire rishe meng oh arpinnap meng naporishe ma hapat dahaptimur. Ama arpinnap meng oh kwitem dus tanggam has mar wandeipti ohe meng hatin hat pat ohoh ihan gur ameng oh pomat amram dindeinmur. Amram dindeiptin orhor Jisas oh sa apripra. Aprisa yinggarhes maraporhan atan oh maras mong da mar has deipatru hat orhor aprisa yah hat son ohe da gonsi oh pitap teinongwi mar am nahatipramur. Am nahatporhan am hat orhorwi sasiprimur.   
\p
\v 20-21 Gur mohnongri daham am hatinmur. Propet ire ma brak deishe meng oh iraire damdapathe Mameng moh brak matpera daham na brak deishemur. Hanip iraire damdapat Mama meng moh brak matinmur potperhan na brak deishemur. Ire ma brak deishe oh Got orhe Yahsup orhor ire atem tei rit atporhanwi brak deishemur.   
\c 2  
\s1 Dasuh meng pot pisapti han ire ihat sapti ohe meng oh  
\p
\v 1 Rih Isrer ire mutuh oh kat han ihir Nuhur Got ohe meng pisapti han propet nuhurmur por ihir dasuh mat pisashemur. Amaru hat orhor gure mutuh oh dasuh han bap ihir Nuhur meng am ham am nahapti han bapmuro napor dasuh nahat aprisiprimur. Aprisa ahar manap da tei orhor hanip dirnong er naham timbas nahatin ohe dasuh meng naporiprimur. Dasuh meng ma naporipri oh Krais oh dire gwemat haputip han orhornong oh Oh be han haputip ohoh ihan dir orhe hrepdapat hat na ayahanhe oh yahmur napor ihtin dasuh meng oh napot aprisiprimur. Ihat ma apripti han ihir iraire boknong kapkap timbas hatinmat ihat apriptimur.  
\v 2 Ihat dasuh nahat apripti han bap ihir iraire er hat son ohe kinnong asohwi isip ham tapet apripti han bap ihirmur. Ihir ihat apriperhan kat han gon gurhe ire ihat er kin tapet saptinong asoh kat han gon gur daripri han bap gurmur. Dara ihat er hat saptin kat kuuhan ihirdapat gurnong wanahapti Got orhe meng moh yahmur rim amrapti bap maihir er hat sapti moh ihan Got ohe meng moh kasip timbas er meng ma hapat daham kom asar mandaprimur.  
\v 3 Ama ihat apripti han bap ihir Nohwi darneng dahat aprisa iraire damdapat daham ama dasuh meng naporiya ohe pe oh be gure mani ruumsan nandariprimur. Ama ihapti han bap ihirnong Got oh rih orhor sama Maihir er han bap ohoh ihan er yan sa datipri daham wamat papat han bap ihirmur. Imat ma wamat papat ohe da oh na kap mar arpin apinmat mamen mat apapat ohoh ihan arpin apripramur.   
\p
\v 4 Got orhe meng pisaya popriya hapti bap enser kat ihirhe er hat saperhan Got oh ire ma er hat saya yan oh mandatipda. Basra. Na mandama kut mutuhnap er temnong mar nang atpat papatmur. Imat papatdapat kaput sama batbet sup oh ihirnong amkat paptepramur.  
\v 5 Rih ma Got ohe dahapat danong kom asar er hat sashe bap ihirnonghe Got oh ire ihat er hat sapti danong oh hanhan mar na mandama tomnong bapkei matporhan ipip taham gurmat maras sutipmur. Noa oh Gur duutin dasi hat patenmuro por sawa meng porisuh han ohoh ihan orhorsi; beshei kuu han ihirnongsiwi na sum ambutipmur.  
\v 6 Sodomsi; Gomorasi ama ap mutuh yotnonghe ihir er hat saperhan Timbas matpora daham andotporhan taur irat kup tanwi pati hatpamur. Ama ap mutuh yotnong andor ma timbas matip oh komdapat dirhe er hat sayahan inahatipra ma hapat daham am hatin ohe da oh namgitipmur.  
\v 7 Rot ohnongwi duutin dasi ham yah hat sapat hano rim na sum ambutipmur. Ohe duutin dasi ham yah hat ma sasuh oh ihir sawa mengnong amkara er hat saptin oh Ihir kinham sa ihat sapti daham ina ruumsup darisuhmur.  
\v 8 Ama ihat duutin dasi hat patesuh han oh ire mutuh oh patin ohoh ire er meng riya meng amrao Got ohe meng na amram er hat saya danong wandeio hapat oh dipwi ina ruumsup dar patesuhmur.   
\p
\v 9 Hanipyah oh indeipat han ohoh ihan orhe da hatin hat patim yah hat sus ruumsup ma dat sapti dirnong oh ama ihat sapti dus orhor nambutin inasi nahat napapat ma hapat dahaptimur. Er hat ma sapti ihirnong oh batbet mar papatdapat kaput pepe dik ma nasatipra dik oh atnap isip batbet apinmat mamen mat apapat ma hapat dahaptimur.  
\v 10 Atnap isip batbet apin inasi mat papat bap ihiroh ti da ti da er hatin ohe danongwi isip mat paptepera daham iraire danong bisei deipti danong dindeiyao kakhan ire mengnong na amram dasei mar kom asar mandayao hapti han bap ihirmur.  
\p Ama ihapti han ihir iraire ina boknong armi taham na kas ham aw tei mahat ma kasip dasi hat pati bap ihirnong dasei meng potinmat oh na kas ham dasei meng por indeiptimur.  
\v 11 Ama dasuh han kasip han bap ihirnong dasei deipti han bap ihir gapa hat pati bap ihirmur. Got ohe meng pisaya popriya hapti da bap enser ihirhe ihat na gapa hat patim kasip hat pati orhor ihir Got orhe kintei oh kas ham aw tei mahat ma kasipnap hat pati bap ihirnong oh imat na indeiptimur. Enser kasip han bap ihir Got orhe kintei kas ham ihat dasei meng na riptimur. Mama dasuh han bap ihir kianorim Got orhe kintei na kas ham dasei meng poripti.   
\p
\v 12 Ama ihat er hat sapti han bap ihiroh apop da timbas ire da hatin hat patim na dahapti da ohsi ire hanhan hat pati erer ihirnong dasei mar indeiptimur. Apop ma artahapat oh sum daptin timbas mar den han bap artahapatmur. Amaru hat orhor dasei meng por indeipti han bap ihirhe apop ire timbas haptiru hatinmat ihat sapti han bap ihirmur.  
\v 13 Ihir kat han ihirnong ina ruumsup batbet apripti orhor it kang rim it iraire boknong apripramur. Ihir mong da tei kas hatin ohe er da oh ihir na kas ham mong da tei orhor ina teidapat noh ihtiprohneng dahapti ohe er da ohsi ihat saptimur. Ihat sapti danong oh yaho daham amam hat saptimur. Ire ma ihat sapti oh bewi na ihaptimur. Gur rotu ap den dipera rim saya ohsi; sus den ma dapti mutuh ohsi ihat saptimur. Ihat ma sapti oh gure inanong kas inasi naham dasei nahatin inasi naham ihat saptimur.  
\v 14 Ama ihapti han ihir bisei saw kinnong taper ihat sayao er hat son ohe danong na mandama isip mat pisayao ihat saptimur. Ihirdapat Got ohe danong hat sapti orhor gapa hat ma pati kuuhan ihirnong er hat ha songwe rim tarmin ohe tan bapen apin tei tohan agonom gapa mar ambar mengtei pora pramat pisaptimur. Ihir Nuhurwi titsi titsi dariptineng daham ma daripti danong oh amnap hat mandatpamur. Ama ihat pati bap ihirnong Got oh bopor heisup mar batbet sup amkar sutin ina mat papatmur.  
\v 15 Ama titsi titsi datpera dahapti bap ihir duung dasi hat sapti mandap oh mandama bong rim er hat sapti mandapnong hat saptimur. Duung dasi hat sapti mandap oh mandama er hat sapti mandapnong ma sapti oh Bio ohe mon Beram oh Got orhe meng porisuh han ohe yah mandapnong mandama er hat sapti mandapnong ma pip ohe tan hat ihat saptimur. Beram ohe er mandapnong ham ma pip oh oh Noh er danong hah moh ihsen erer yan sa napriprohe daham yan datin ohe danong isip ham er da hatipmur.  
\v 16 Ama er da ohe pe yan datin danong ham donki bas oh tongnom sapatin meng timbas han donki oh hanip dire meng hama We. Gwe ma ihat sapat da moh er danong hat sapatmur por imtipmur. Indeipat Got oh orhe na daham er hat ma sapat mandapnong baso por agaheimtipmur.   
\p
\v 17 Ama ihat dasuh hat sapti bap ihir Nuhur gurnong napanggeitiprimur naporipti orhor arpin napanggeitinnong oh na napanggeiptimur. Ihat sapti bap ihir tom uup tem marapatnong dipero rim sus wandeiyaoh butip tei sus wandeipti hatin hat pati han bap ihirmur. Ihir tom wandon ohe rian hatin hat patim inim oh apris riannong mermat anong anong matporhan tom na wandas gatet pat hatin hat pati han bap ihirmur. Ama ihat pati bap ihirnong Got oh Kwinap ap mutuhnong moh matipramur por amamen mat apapatmur.   
\p
\v 18 Ama ihapti han bap ihir iraire ina boknong tohormi tahat patim dam na timdin meng ohwi ambar meng hatin mar poriptimur. Pora diradire ina tei damdapat Noh ihahneng ihahneng daham er hapti da ohsi yah meng hatin mar tarmin bapen apin tei tohan agonom pramat pisapti ohe tan mat er da teinong pramat pisaptimur. Pramat ma pisapti oh rih er da hat sapti han ire tap hat patimdapat kopen mandama yah danong hata han ihirnong imat it pramat er da teinong pisaptimur.  
\v 19 Ihir er da teinong pramat ma pisapti oh ihir Gur moh ihapri. Mihat sayahan ermur na pora Yahwimur por er da teinong pramat pisaptimur. Ihir Nuhur tit da ohe hrepdapat nang tatpat na patimur poripti orhor basra irairnong er ham timbas hatin ohe hrepdapat nang tatpat patim orhor ihirnong imat meng oh poriptimur. Tit da oh tit pranahat napisapathanoh Dir ama ohe hrepdapat nang tatpat pati ma hapat daham Ihan ihir mihat pati bap ma hapat dahenmur.   
\p
\v 20 Gur mohnong dahenmur. Hanip dir diradire Hanipyah namburpat han Jisas Krais orhornong am hapti ohe dap teidapat kakdah mama er nahapat ohe er nang oh arpit namdatir tei it er danong ham nang tatpat pati hatin hayahanoh ama ihya han ihir rih Krais ohnong hanhan hat patim ma er hat pateshenong oh garpokmur. Gin ohnong am hat patim orhor ma ihaptinong oh atnap isipnap er hatin ohe dap teinong hat patimur.  
\v 21 Ihir duung dasi hat son ohe mandap hanhan hat patim orhor ihaptineng batbet garpok datiprinengmur. Am hat patim orhor Got orhe ongeng mat papat yahnap sawa meng potperhan amram dindeiptin orhor kom asar ihapti moh atnap isipnap batbet datiprimur.  
\v 22 Ire ma ihat pati oh miano imaho ire ihat saptimur ripti meng hatin hat patimur. Mian ihir usan gut mandapti it susa it daptimur. Imah ihirhe hanip ihir yah mat gahmatperhan irarhe it susa tom sirah hru wasa tandapurkem tandapurkem ham er hat tiriptimur riptimur. Ama ripti mengru hanip ihiroh it ma er haya da oh atnap er haptimur.   
\c 3  
\s1 Hanipyah ohe it apripra ohe meng oh  
\p
\v 1 Norhe bopor nahat napapat taptem gurnong tipnerip brak oh gin mama brak mat nasar ohmur. Noh rihohe brak mat ma natir meng ohsi; gin mama brak mat nasar meng mohsi gure yah hat indin ohe danong pomat daham ha indingwe rim noh it gure danong napamsas mama brak mat nasar ohmur.  
\v 2 Gin gur rihohe Got orhe yahnap han propet ire naporishe mengo diradire Hanipyah namburpat han oh orhe yahnap sawa meng oh orhe han aposer ihirnong potporhan ihirdapat gurnong naporipti mengo ama meng oh mandapririm pomat ha dahat patengwe rim gurnong it da napamsas mama brak mat nasar ohmur.   
\p
\v 3 Ire ma naporipti meng oh mohnongri dahenmur. Gin mama pepe dik pati morhor dasei meng naporin han ihir iraire ina teimdapat ti da ti da oh pramat pisapat ohe hrepdapat hat patimdapat aprisiprimur. Ihat aprisa Jisas ohe boknong mar gurnongsi dasei meng naporiprimur.  
\v 4 Dasei meng ma naporipri oh We. Hanipyah oh Norhor it apripramur girim ma rit natip meng oh gin oh de tei pat. Gin ti na apripatheo. Mong mohra rih Got ohe ma darpatip mong orhor awher ihir wamat patimdapat haputpamur. Haputperhan it wan mong oh ti na wandeiptimur. Tap mong orhorwi patin wandeiptimur. Na wandeipti mong tit hatirda ihan Jisas orhe aprin oh kakduup hah ma hapat dahatiprohe. Mama wandeipti mong morhorwi pat ohoh ihan ohe Noh it apripramur napor ma rit natip meng oh dasuh mengmur napor dasei meng naporiprimur.  
\v 5 Ihat dasei meng ma naporipri oh mama mengnong moh ihir dahat patim orhor hanhan mar mandatinmat imat naporiprimur. Hanhan mar mandatperim ihapti meng oh mohmur. Got oh rih orhe kasip mengtei Aw tan ha tarpatinoh ritporhan tarpatipmur. Tarpatporhan tom orhorsi tom mutuh paten ohe mong oh darpatipmur.  
\v 6 Mong darpapat gahan komdapat Gin tom go mongnong moh gurmara hanipsi tap mat sutina potporhan arpin tom oh ama mongnong gurmara ama rih patesuh mongo hanipo ihirnong tap mat sutipmur.  
\v 7 Gin mong tan aw tan ha tarpatinoh potporhan aw tan mong tan tarpatip ohe meng kasip orhorsi gin mama pati aw tan mong tan mohnong Kaput irat har mar sutipramur daham sutinmat ama meng kasip ohsi mamen mat marin papatmur. Mamen mat ma papat oh pepe dik oh Hanipyah oh aprisa Got ohe meng na amram sapti han bap ihirnong dahamar sutipramur. Ama dik oh mongnong irat har mar timbas matinmat mamen mat papatmur.   
\p
\v 8 Norhe bopor nahat napapat taptem bap gur Hanipyah oh kapkap na apripato ma ripti oh gin mohnong dahenmur. Dire ma dahapti oh kimsi ma patepranong oh kakduup ma hapat. 1,000 yia ma hatipra oh kaput ma hapat dahaptimur. Hanip dir ihat dahaptimur. Hanipyah oh kimsisi kaput ohsi tap mat gin aya mohwi dahapatmur.  
\v 9 Ihat dahapat han ohoh ihan kat guroh Noh ihtiprawa napor rit natip meng oh kapkap na tarpam butahapat moho ma dahapti guroh ihat na butahapat hanmur. Oh arpin hanip nasatinmat apripra hanmur. Oh kapkap na apripra ma hapat ihat dahapri. Oh Hanip gur tit han tit dipwi batbet dar paten teinong hatiprarim gonsi da tamburkeriyarit ambutipra daham yah da tei naminhan wanahat napapatmur.   
\s1 Hanipyah oh it aprin ohe dik oh erer oh timbas hatipra ohe meng oh  
\p
\v 10 Hanipyah ohe it ma apripra oh gapah han hatin hat apris buporinsi nahatipramur. Buporinsi ma nahatipra dik oh aw tan oh pasrara rim pura timbas hatipramur. Timbas hapat mong tannong ma kasip mat papat han erer mohhe gonsi taur timbas hatipramur. Timbas hapat mongo kakdah diradire daripti han erer gon moho gonsi timbas hatipramur.   
\p
\v 11 Erer oh ihat timbas hatipra ma hapat daham ihan dir kinhat inper daham ihan nuhur Got orhe danongwi ham orhe dahapat da hatin ham ongeng tahat orhorwi saya apriya hatwi patepera daham sashenmur.  
\v 12 Ama ihtin dasi hat patim orhor Got orhe imtipra diknong oh wamat patim kapkap ha tarpatinoh rim kasip hat orhor tamreim wamat patenmur. Ma imtipra dik oh aw tan oh taur timbas hatipramur. Taur ma timbas hatipra ohe mumun oh mong tannong ma kasip mat papat erer moh gonsi ama ohe has mumun oh sutporhan gapa ham tumrer timbas hatipramur.  
\v 13 Timbas hatipra orhora; Got oh Noh kopenohe mong tan aw tan duung dasi hat indin ohe mong tan aw tan matipramur ma rit natip mongnong oh dir minhan patimur.   
\s1 Dasuh han ire er da ohsi apris er nahatipri ohoh ihan inin hat patenmur ritip ohe meng oh  
\p
\v 14 Norhe bopor nahat napapat taptem gur ma ihtipranong oh minhan pati ohoh ihan dire da oh ongeng yahnap mat orhorwi orhorsi manap goshat indin ohe da ohsi hat patin orhor oh apris ha wanahatinoh daham ama danong oh kasip hat orhorwi marin patin pepe dik ma tarpatipranong oh minhan patenmur.   
\p
\v 15 Gur mohnong dahenmur. Hanipyah oh manap da tei ma wanahat napapat oh gonsi ihir da tamburkeriyarit ambutpora daham manap da tei orhor wanahat napapat ma hapat dahenmur. Ama ihtin da tei wanahat napapat ohe meng oh diradire taptem bopor mat pati han Por ohnong Got oh pepe dik ma tarpatipra ohe dakuu meng oh am matporhan tap meng morhor napor brak mat natirmur.  
\v 16 Ohe brak mat ma nasarpat ohe meng oh ihtin meng pathanhe norhe mama nabrak deiru mat orhorwi brak mat nasarpatmur. Orhe kat meng ma nasarpatnong oh kapkap na dahatin meng nasarpatmur. Ama kapkap na dahatin mengo be kat ma brak matpa mengo ohnong ama dasuh han bap ihir sama er mat poriptimur. Ama han bap ihir Got orhe mengnong pomat na sama danong hatip hat pati han bap ihir ohoh ihan gurnong Ire danong aban mar er mat potpera daham er mat naporiptimur. Er mat ma naporipti ohe pe oh irairnong timbas hatinmat ihaptimur.   
\p
\v 17 Norhe bopor nahat napapat taptema. Gur ama dasuh han ire apris er nahatin da oh gur am hat patimur. Ihan gur Ihir ihat apris er nahapri ma hapat daham inin hat kasip hat orhor patenmur. Ama ihat sapti bap ihir sawa mengnong sakarap mar er hat sapti da ohsi apris gurnong Gure Got ohe danong ham ma kasip hat sapti da oh ha mandatingwe rim er hat sapti da ohsi gapa naham namburipri ohoh ihan gure Got ohe danong hat pati ohe da oh kasip hat orhor marin paptepera daham kasip hat orhor marin paptenmur.  
\v 18 Kasip hat orhor marin paptim ama ihat sapti han ire danong ohri hapri. Diradire Hanipyah namburpat han orhornong Oh ihat pat hanhe daham am hatin ohe dao orhe da orhor bapkei naham yah nahapat ohe dao ohnong titsi titsi dar am hatpora daham ama ohe danong ohwi isip mat pisashenmur. Orhorwi has yahnapsi hat pat han ohoh ihan gino kimsio kaputo dipdipwi armi mar papten han oh orhor pokwimur. Arpinwa.