\id 2CO - Oksapmin NT [opm] -Papua New Guinea 1992 (web version -2014) 
\h 2 Korin 
\toc1 KORIN Aptei han ihirnong Por oh komdapat brak mar atip ohe meng oh 
\toc2 2 Korin 
\toc3 2Ko 
\mt1 KORIN  
\mt2 Aptei han ihirnong Por oh komdapat brak mar atip ohe meng oh  
\ip Por oh Korin ap mutuh Hanipyah Jisas orhe nita hat pati bap ihirnong brak mar adarhetporhan ihir sama kat ihir amrama ire er hat sapti da oh mandatpamur. Kat ihir Por oh arpin Krais orhe meng porin hanmur rim na kis mat papat han ohoh ihan nuhur ohe mengnong na amratiprohemur dahatpamur. Dahatperhan Taitas oh ire ma ihya danong oh am hapat susa Por ohnong potipmur. Potporhan Por oh nohnong Arpin Krais orhe meng porin han kisnahatip ma hapat ha dahatingwe rim mama meng moh komdapat brak mar adarhetipmur.  
\c 1  
\p
\v 1 Noh Pormur. Got oh nohnong Go Krais Jisas orhe atamrein sashen hanmur napor kis nahat napapat han noh gin diradire taptem Timoti nuhut gurnong mama brak mat nasariya ohmur. Grik mong Korin ap mutuh ma pati kuuhano aptei aptei ama pati kuuhano ama aptei aptei Got orhe nita hat pati kuuhan sios gurnong mama brak mat nasariya ohmur.  
\v 2 Diradire at Gotsi; Hanipyah Jisas Krais itaite taman damdapat orhor Imat yah matpera dahapti da ohsi; manap gosham yah hat paten da ohsi gurnong imat yah mat ha napaptengwe rim nuhut nadahandeiptimur.   
\s1 Ina ruumsup datperhan Got oh pang inasi naham napanggeipat ohe meng oh  
\p
\v 3 Got oh diradire Hanipyah Jisas Krais orhe itap ohmur. Orhor hinhina nahamo da nayah mar pang inasi nahamo inahat napapat han oh orhorwimur. Orhorwi ihtin duuptei han hat pat ohoh ihan orhornongwi weso por armi mar papten han oh orhorwimur.  
\v 4 Ama Got orhor Nure boknong oh tihan tihan ruumsup oh nahatporhan ama ruumsup danong pang naham yah nahapatmur. Yah nahatporhan ama yah nahah da ohsi arwananah ihirnong ire tihan tihan ruumsup ma hayanong oh panggeit ha papindingwe rim inahapatmur.  
\v 5 Krais ohe boknong ina ruumsup aptahat ma patesuhru mat orhor nuhurhe ihtin ina ruumsupsi hat patimur. Hat pati orhor Got ohdapat ohnong isip mat orhor panggeim pang deisuhru mat orhor nuhurnonghe Krais orhe tap hat patio rim imat isip mat orhor napanggeim pang inasi nahapatmur.  
\v 6 Nure ina ruum datperhan Got ohe ma napanggeipat ohe pe oh gurnong gure ina ruum hat ma patinong asoh napanggeima pang inasi nahamo Got ohe danong hatin ohe da oh kasip nahamo nahatinmat nuhur ina ruum dar gurnong napanggeiptimur. Imat napanggeitperhan gur kasip hama nure ina ruumsup ma daripti hatin hat orhor gure boknong nahatporhan gur garham na mandam kasip hat orhor patimur.  
\v 7 Gure ma ihit patinong oh nuhur wanahapti Ihir nure ma ruumsup hatperhan Got oh nuhurnong napanggeit napapatru mat orhor ihirnonghe imat orhor papat ma hapat. Ihan ihir na gapa ham kasip hat orhorwi patepri ma hapat daham am haptimur.   
\p
\v 8 Nohe taptem gur amratin. Nure Esia mong patin ina ruumsup ma datpa ohe meng oh gur am ham ha dahatingwe rim noh mameng moh napotiprohmur. Ama ruumsup oh gar ruumsup basmur. Isipnap ruumsup oh naptahatporhan nuhur Isip ruumsup naptahah moh nuhur gin hapuriya ma hapat dahatpamur.  
\v 9 Ihat daham nuranure haputin dik oh gin mama napir oh ma hapat dahatpamur. Dahatpa orhor Got ohdapat nuhurnong Ihir nuranure kasip ohsi ihaptikin ma dahapti da oh ha mandatingwe. Mandayarit norhe hanip haputperhan it da pamsapat ohe kasip mohsi mar pinggitpora. Pinggirit ihir Gin orhe pamsapat kasip ohsi nahah ma hapat dahat ha patengwe rim ama kasip oh namgitipmur.  
\v 10 Namgitporhan nuhur wamara am hapti Mama er sup namkar haput pati moh gin Got orhor nambur ma hapat. Ihan komdapathe mimat orhorwi nambur napaptepra ma hapat daham am haptimur.  
\v 11 Nambur ma napapat oh gur nure ihat ma pati meng nadahandeipti ohe pe oh inahat napapatmur. Imatwi ruumsan kat gur nure ihat paten meng oh nadahandeiptin Got oh namrapat bapkei nahat orhor sa napaptepra. Imat napapatin kuuhan ruumsan ihir wanahapti Ihirnong imat papat moh daham Got orhornong weso por sa armi mar paptepri.   
\s1 Por oh Got oh duung dasi hat orhorwi pat han ohoh ihan noh duung meng mohsi naporpatmur potip ohe meng oh  
\p
\v 12 Nuhur Got oh nure boknong armi nahatin inasi nahapat ohe meng oh napotiprohemur. Mamarumur. Nure da oh nuhur kakdah mama saya apriya hat ma pati oh kakdah moh ohe dakuu da ohsi saya apriya na haptimur. Got orhe damdapat Imat yah matpora ma dahapat ohe kasip orhorsi hanip ire mutuh oh gisipga dasi na ham tit dawi hat patim Got orhe duung da ohsi hat gure mutuh oh yah hat namgit saya apriya hat pati ma hapat dahapatimur. Ama ihat yah hat saya apriya hapti da oh Got orhordapat nure boknong armi nahatin inasi nahatporhan ihat saptimur.  
\v 13-14 Gure mutuh oh ihat namgit susa gin ma brak nasariptihe butahat sama na dahatin meng na nasariptimur. Kapkap sama kapkap dahatin ohe mengwi nasariptimur. Ginhe gur nure ina yah hat saptinong moh wamara Mihat yah hat sapti ma hapat daham na am hat patimur. Gur ihat kopen yah hat na dahat patio rim nohe da oh Gur yah hat orhor ha dahengwe dahapatmur. Gur yah hat orhor dahama am nahat patin orhor kaput diradire Hanipyah Jisas orhe pepe dik ma apir tei oh nure ma gurnong kat kuuhan ire kintei Ihir ihat yah hat patimur rim amam ham armi nahaptiru hat orhor gurdapathe nuhurnong imat orhor armi naham ha amam nahatingwe dahapatmur.   
\p
\v 15-16 Gur ihat norhornong armi nahatin da nahat napateprio rim noh yot dah gure patinong apripra dahatipmur. Ama yot dah apripra dik oh gurhe yot dah sa amam hatipri dahatipmur. Yot dah sapra ma dahatip oh Masedonia mongnong sonmat akat sapramur. Susa it handapat ma apripra oh Judia mongnong son mandap oh ti ha napanggeitingwe rim it akat orhor apripramur dahatipmur.  
\v 17 Noh gure patinong yot dah apripramur napor dik natip orhor nohe akat ma na apdor oh kakdah han dire da oh tan tit ma dahah oh Noh ihat saprawa dahapatin tan tit ma dahah oh Noh na saprawa ihat dahapti da hatin hatipda. Basra. Nohe da na yawar mara tit dawi ham aprin ohe danong oh hat patmur.  
\v 18 Nure meng ma naporipti oh tan tit dawa tan tit es dahat na riptimur. Got orhe arpin tit mengwi ma naporpatru hat orhorwi naporiptimur.  
\v 19 Sairaso Timotio nuhur Got orhe brer Jisas Krais oh mihat pat hanmura; mihat pat hanmura ma napotiri han oh tandapat dawa ripat tandapat es ripat handa. Basra. Dawa. Noh inahatiprohwa ripat meng orhorwi ripat hanmur.  
\v 20 Ama ihat ripat han orhor Got orhe rit natip meng gonsinong oh orhe boknong oh dam mat pisaporhan dir wamara Dawa. Orhe rit natip meng oh inahat napapatwa dahaptimur. Daham orhe imat ma napapat dap tei amdapat Got ohnong dahamar arpinwa por armi deiptimur.  
\v 21 Ama inahat napapat Got orhorwi gurnongsi diradirnong tap mat Mama han gur norhe hanmur napor kis naham Krais orhe tapnong hat paten kasip dasi nahat napapatmur.  
\v 22 Napapatim dire boknong ket tup saripti ohe tan tupsi nasar dason nahat napapatmur. Inahat ma napapat oh Kaput dam apriprawa daham orhe Yahsup oh imin ohe tan mat napris napapatmur.   
\s1 Por oh Korin sios ire pati kat na sus mengwi am matip ohe meng oh  
\p
\v 23 Nohe Korin gure pati kat ma na apdap oh Noh ire pati kat ushanoh iraire er hat pati pe oh noh imaro hama ruumsup matipra rim ihan noh mama dik moh akat na sapra daham na apdormur. Noh mama meng napor moh arpin meng napormur. Got oh am hat patmur.  
\v 24 Gure Got ohe danong hapti da oh nure hrepnong mar mihat dahatinmura; mihat dahatinmur napor kasip meng tei napapindinmat oh gurnong mama meng moh na naporiyamur. Gure Got ohe danong ma hat pati da oh gur kasip hat pati ohoh ihan gurnong nuhur Gur ihat dahat patenmura; ihat dahat patenmur na napotiprohemur. Gur guragure amam danong isip hat ha sonoh ma dahapti da oh nuhurhe ihir ihat amam danong bapkei mar isip mat ha pisongwe dahat patim mama meng napor nasariptimur.   
\c 2  
\p
\v 1 Gur Got orhe danong hat pati da oh na mandatin ina hat patin orhor tan tit er danong haptimur. Ihat patin noh rih apris gurnong Gur kinhat pati napor inaham gurnong da er nahatirru nahatiprarim ihan noh it gure patinong na apriproh daham na apdormur.  
\v 2 Noh gure patinong apris ina ruumsup napirhanoh guragur gonsi ruumsup dariyahan ama ruumsup dat pati han gurwi patin ohoh ihan it nohnong da nayah matin han oh nih. Ihan noh gure patinong na apdormur.  
\v 3 Norhor gure patinong na aprisa brakwi gurnong natirmur. Brak mat ma natir oh noh gure pati kat apirhanoh norhornong amam da napin han gurdapat norhornong da er naham ina ruumsup napriprikin daham na apdormur. Na aprisa mengwi brak mat natirmur. Gur norhornong amam da napin han gur ohoh ihan gur Nuhur Por ohhe amam hat pathanoh nuhurhe amam haptimur gur ihat dahat pati ma hapat dahapatmur.  
\v 4 Noh rih ma brak natir meng oh gur wamara Inahatin menghe daham da er hatirimur. Ihtiri orhor noh gurnong ruumsup naham gure danong naer matinmat na natirmur. Gur Dirnong Por oh isip da nasar bopor nahat napapat ma hapat ha dahatingwe rim noh da isip er ham yimat tit orhor brak oh natirmur.   
\s1 Er hatir han ohnong it yansi na mar mandatinmur ritip ohe meng oh  
\p
\v 5 Tit han tit er hatporhan ama ohe pe ina ruumsup dasi ma hatiri oh nohnongwi ina ruum na napdormur. Nohsi kat han ihirsi diradir tap hat ama ohe pe oh ruumsup dar da er hatirimur. Noh han gonsi gon dirnong tit han ohe er hah ohe pe oh ina ruumsup napdormur rihanoh ohnong ina ruum isip amkatiprohkin. Ihan kat han dirnongwi ina ruum napdormur ritiprohmur daham mama brak dei ohmur.  
\v 6 Ama er hatir han ohnong kat gurdapat orhe san hatir pe batbet apris da adason mat papti oh yahwa. Ginri kimur.  
\v 7 Ihan gur Gin kimur. It yansi na mar mandatiprohemur daham mandatinmur. Mandama orhe ruumsup aptahat pat da ohdapat Got ohe danong hat pat danong amkar mandatiprarim da ayah mar pang inasi matinmur.  
\v 8 Pang inasi matinmat oh Ihir nohe danong hat pati ma hapat dahatin ohe da oh ohnong pinggit pisonmur napor kasip mengtei mama naporpat ohmur.   
\p
\v 9 Noh rih gurnong Gur ama er hah han ohnong ina ruum apinmur napor ma brak natip oh gur Moh Por ohe meng ma hapat ihan dir amram ohnong ina ruum apriper dahatiprohedo da na dahatiproheo daham noh kis naham brak natipmur. Gin gur nohe meng namram ruumsup ma apdori oh gin kimur. Mandatinmur.  
\v 10 Gur er hatiri han ihirnong ire er hatiri danong oh it yansi na mar mandayahanoh nohhe it yansi na mar gure ma mandatiriru mat orhor mandatiprohmur. Nohe ma mandatiproh oh gure danong ham Krais ohe kinteio rim noh mandatiprohmur.  
\v 11 Satan ohe merwi naham ma namkarpat da oh dir am hat patimur. Ihan it yansi mar na mandayahanoh ohe merwi naham er nahatipra ma hapat daham gure dahat na patem ma mandatiproheru nohe dahe ihat dahat na patem tap mat orhor mandatiprohmur.   
\s1 Por oh Troas aptei susa Taitas ohnong angmar mandam pip ohe meng oh  
\p
\v 12 Noh Troas ap mutuhnong susa Krais ohe yah meng oh potpora daham Troas ap mutuhnong pipmur. Susa wandeioh Hanipyah oh ire danong nohe meng amratin dasi mar amamen mat papatgop.  
\v 13 Ire danong amamen mat papatin orhor noh Korin ire meng oh Taitas oh kianan napotiproho daham angmar ti na pathan ama ohe ruumsup da oh namkat napapatin ohoh ihirnong kapkep mara Taitas oh Masedonia mong tei patkin rim Masedonia mongnong wamar pipmur.   
\s1 Meng pot ma pisapti oh apop gapgwesi kat hanip pandeya hatin mat pandepti ohe meng oh  
\p
\v 14 Mahaw ihirdapat kat mahaw ihirnong ire merwi mar ti tapmar pisaptimur. Pisusa iraire aptei oh Nuhur hanip maihirnong ambura nure han deiyamur rim amam ham birhiptimur. Amaru hat orhor Got oh dirnong Ihir Krais orhe tapnong hat patio rim kuuhan ire kintei oh dipwi amam nahat napisapatmur. Napisusa aptei aptei oh orhe meng pot pison inasi nahatporhan meng pot pisaptimur. Meng pot ma pisapti oh apop temtiperhan sahren gwe oh tit uhe rum tem tit uhe rum tem ros sapatru hat orhor orhornong am hatin ohe meng ohhe ihat hanip mutuh ros among among oh artahat sapatmur. Orhor imat napisapat han ohoh ihan nuhur Got orhornongwi weso por armi mat paptimur.  
\v 15 Nuhur meng pot ma pisapti oh Krais oh itapnong apop gapgwesi kat pande hatin deipatru mat orhor nuhurhe imat meng pot pisusa apop gapgwesi kat hanip apriya hatin mat apripriptimur. Apriperhan din hansi na din hansi tap hat amraptimur. Amrama dapti han ihiroh Got orhor ambutin inasi mat papat han bap ihirmur. Amram na dapti han ihiroh er apteinong son inasi hat pati han bap ihirmur.  
\v 16 Tap hat amrapti orhor na din han ire mutuhnong ama gapgwe oh roporhan ihir ama gapgwenong na amratin ina ham er gwe hatin matperhan ama gwe oh ihirnong sum timbas deipatmur. Din han ihirnong oh ama gapgwe oh ire mutuhnong hama Mama gapgwe moh amratin gapgwe yah ma hapat dahatperhan ama gapgwe oh ihirnong eimat yah hat paten ina dasi deipatmur. Ihtin meng pot pison inasi nahat napapat bap oh de dira.  
\v 17 Nuhurnong ma Got oh ihat son inasi nahat napapat bap nuhurmur. Ihtin inasi ma inahat napapat bap nuhuroh kat han ire Nuhur Got ohe meng moh erer oh han ap mat pisusa yan daripti ohe tan hat meng moh pisaper daham ma meng pisaptiru mat nuhur imat meng na pisaptimur. Nure ma ihat saptinong ohri Krais orhe nitao rim ma Got ohe kis naham nadarhetip han hatin hat orhorwi arpin han hat orhorwi meng pot pisaptimur.   
\c 3  
\s1 Kopenohe meng ohe has da oh rihohe sawa mengnong ohe hrepnong mat papat ohe meng oh  
\p
\v 1 Noh ama nabrak dei oh gur it nuhurnong Ihir ihat pati han bapmur daham ha armi nahatingwe rim na nabrak deimur. Nuhurnong gur hanhan hat patida ihan wan ihirdapat Poro ihir ihat pati han bapmur napor nure ma ihat pati meng oh brak mar napriperhan nuhur popris gurnong nure yah hat pati meng brak oh gurnong namgitiprohe. Wan han asoh ihirhe hanhan hat patida ihan gure nuhurnong Poro ihir ihat pati han bapmur napor armi nahatin brak oh brak mat napriperhan nuhur pisusa ihirnong pinggitiprohe. Nuhurnong hanhan hat pati han ihir ti na pati ohoh ihan nuhurnong armi nahatin brakhe timbasmur.  
\v 2 Nure ma ihat yah hat pati da oh ihirnong pinggitin ohe brak hatin hat ma pat oh Korin aptei Got ohe nita hat pati guragure yah hat ma sapti ohe da ohmur. Guragure yah hat ma sapti ohe da oh ihir gonsi brak ma sam am hapti ohe tan gurnong wanaham nure ma ihat sapti ohe pe yah dam timapatnong oh wanaham Poro ihir yah hat orhorwi tamreipti ma hapat daham am haptimur. Gure ma ihat pati oh noh bopornap nahat napapatmur.  
\v 3 Gurnong wanaham ma am hapti oh mamaru hat patmur. Nuhur gure mutuh tamreiptin gur Got ohe danong hatirimur. Hatperhan kat ihir wanahama Ama ihir Krais orhe mengtei ihat sapti ohe pe oh maihir ihat pati ma hapat daham am haptimur. Gure ma ihat pati oh patesuhru patru patepra Got orhe Yah Sup oh gure paten da mutuhnong imtipmur. Ma imtip oh nure ma yah hat pati meng oh brak mar Krais ohe bes teinong matporhan orhordapat ihirnong pinggit papat hatin mat papatmur. Ama brak oh ihirnong ma pinggit papat oh rih Moses ohe kintei Got oh orhe meng kwei tan tei brak matip mengru hatin basmur. Hanip guragure mutuhnong napapatin ihir wanaham am haptimur.  
\v 4 Gure mutuh ma dam timapat oh Got orhordapat Krais orhe dap teidapat nuhurnong tamreindin inasi nahat napapatin gure mutuh oh dam nahapat ma hapat daham mama meng naporiya ohmur.   
\p
\v 5 Nuranure kasip ohsi nuhur ihaptimur napotin oh kinhat giritiprohe. Got orhe kasip oh kasip nahat napaptin ihapti ohoh ihan hanip nure kasip ohsi ihaptimur kinhat giritiprohe.  
\v 6 Orhe imat kasip mat napapat kasip oh komdapat dik natip meng pot pison inasi nahatin ohe kasip ohmur. Ama kasip ohsi nuhur komdapat ohe dik natip meng oh gin mama pot pisapti ohmur. Komdapat dik natip meng oh rih Moses ohe atem tei dik natip meng oh hatin basmur. Rihohe dik natip mengnong oh eimat paten dasi na nahatin meng ohmur. Komdapat dik natip mengnong moh Got orhe Yahsup ohe kasipsi ohoh ihan eimat paten dasi naham batbet dar paten apteinong nahatin ohe mengmur.   
\p
\v 7 Kwei tan tei brak mar natip meng oh Got oh hassi pat han ohoh ihan kwei tan teinong ma brak mar apdap ohhe ama has orhor Moses ohe rumkin teinonghe has isip matipmur. Ama isip ma has matip has oh eimat paten ohe isip has na hatipmur. Timbas hatin ohe isip has hatipmur. Ihtin has oh isip ohoh ihan ihir Moses ohe rumkin teinong kin hahramsi ohoh pomat na wamtin inasi hashemur.  
\v 8 Eimat na paten inasi naham batbet dar paten apteinong nahatin ohe meng oh has isipsi napdap ohoh ihan Yahsup ohe eimat paten inasi nahatin ohe meng moh has isip wanohe kasip isipnapsi pat ohe meng ma hapat dahenmur.  
\v 9 Rihohe sawa meng oh Got ohe kintei Moh er hanmur napor timbas nahatin ohe sawa meng orhor has kasipsi mar apdapmur. Got ohe kintei Moh yah hanmur napor duung dasi nahatin ohe meng oh atnap wanohe has kasip isipnapsi meng ohmur.  
\v 10 Ama ihtin has kasip isipnapsi meng apris ma pat oh rihohe isip ma has kasipsi hat patesuh meng ohe tamreindinnong oh atimbas mara kopenohe meng ohe tamreindinnong oh isip hat patmur.  
\v 11 Rihohe ma dik natip meng ohe tamreindin oh timbas hatin orhor has isipsi mat natipmur. Gin kopenohe dik natir meng ohe tamreindin oh na timbas hatin ohe tamreindin meng ohoh ihan atnap has isipnap hat patmur.   
\p
\v 12 Ama na timbas hatin has yah meng oh nuhur pot pisaptio rim nuhur na kas ham watahpei hat orhorwi gonsi meng oh naporiptimur.  
\v 13 Imat meng ma pot pisapti oh Moses ohe tan mat pot na pisaptimur. Moses ohe meng pot ma pisasuh oh orhe rumkin tei has hat pat oh hirtaham timbas hat sapatnong oh Isrer ihir wamtipririm giamat patim meng porisuhmur.  
\v 14 Gin nuhurnong oh kasipnapsi mengnong moh pitap teinong mar yah mat poripti orhor Juda bap ihir rih Moses ohe rumkin giamat papatin has danong na wandeisheru ginhe ire da oh ihat orhor da ban taham giamat papti ohoh ihan ihir Got orhe sawa mengnong sama na dahaptimur. Ama giamat papti da tein oh dapet amdatin oh Jisas Krais orhe tapnongwi hatperhan dapet amdatiprohmur.  
\v 15 Moses ohe sawa meng rim ma brak matip mengnong oh sama na daham da ban tahat patesheru hat orhor ginhe tap da orhor sam na daham da ban tahat patimur.  
\v 16 Ama da ban tahat pati bap ihir Hanipyah orhe danong hayahanoh ama ihya han ire da ban tahat pati da oh dapet amdapatmur.  
\v 17 Noh Hanipyah oh da dapet amdatiprohmur ma ri meng oh orhe Yahsup ohnong girimur. Ama Yahsup orhorsi tap hat pati tei oh han bap diroh da tanpet orhorwi yah hat patimur.  
\v 18 Ama Hanipyah oh Yahsup orhormur Orhor dirnong orhor hatin nahat napisusa dire danong orhe has oh has nahat napisapatin ihir ama has kakeir oh na giatahat patin ihir wanaham orhornong am haptimur.   
\c 4  
\s1 Got ohe nita hat pati dir ina amdapat gapa hat pati orhor da mutuhdapat has yahnap dasi hat pati ohe meng oh  
\p
\v 1 Got orhor yah nahapat han ohoh ihan dirnong hinhina nahama mama ohe tamreindin da moh napin pato rim nuhur garham na mandaptimur.  
\v 2 Garham na mandama pomat orhorwi meng naporiptimur. Pomat orhor ma naporipti oh ahar er hapti ohe dao paham meng napotin ohe dao nuranure meng oh Got ohe meng tapnong mar imat gapa naham napotin dao oh ti na inahaptimur. Ama ihtin dasi hat patim na napora pomat arpin mengwi pitap teinong mar naporiptimur. Gur nuhurnong Ihir yahnap hat orhorwi patihe daham ha am hatingwe rim Got ohe kinteihe pomat orhorwi naporiptimur.  
\v 3 Imat naporiptin kat ihir Moh na dahatin meng riptihe ma dahapti han bap ihir eimat paten dasi na hapti bap ihir ihat dahaptimur.  
\v 4 Ihat ma na dahapti oh kakdah moh ohe kakhan Satan oh ihirnong da aban mat papatmur. Da aban mat ma papat oh ihir Krais Got orhor hatin han oh has hat patin orhe has da yah meng oh ihirnong potperhan ama has meng oh ihir wamar daham am hatipririm Satan oh ire danong aban mat papatmur.   
\p
\v 5 Krais orhe has yah hat pat meng ma naporipti oh gur nure danong ha hengwerim ohe meng na naporiptimur. Watina. Jisas Krais oh nure duuptei han hat pat sa. Ihan dirhe orhe danong ham orhe hrepdapat hat inpera ha dahatingwerim ohe meng oh naporiptimur. Jisas oh nuhurnong gurnong napanggeit napapten da napin pato rim nuhur gurnong napanggeim mameng moh naporiptimur.  
\v 6 Rih mong moh has timbas hat patin Gin mong moh ha has hatinoh ma ritip Got orhor nure danong nadapem nahas mat napapat Got ohmur. Has nahat ma napapat oh Got orhe yah hat paten ohe has da oh Jisas ohe boknong atan kakeir hatin has mat papatin dir ama hasnong wamara orhornong am haptimur.   
\p
\v 7 Got oh yah da naham has dasi nahat ma nahapat oh dire ina moh ung gate er hatin hat patin Got ohe yah da oh ama ung gate ernong oh mipatmur. Ama yahnap kasip han oh ung gatenong mit saripti ohe tan mit napapatin ihir dirnong wanaham Er ung gatenong moh yahnap na dahatin ohe kasip tit mit pat moh iraire kasip bas ma hapat. Got orhe wanohe na dahatin hatin kasip ohsi hat pati ma hapat ha dahatingwe rim inahat napapatmur.  
\v 8 Inahat ma napapat dus orhor kat ihirdapat ruumsup da naprisa ihir kat tandapat kat tandapat hama nuhurnong er nahat napisapti orhor nuhur orhe kasip ohsi pati ohoh nuhur na gapa ham na mandaptimur. Inahat napaptin nuhur ha inahatiprohe daham bopor ap kaw supti orhor nuhur orhe kasip ohsi pati ohoh kas ham na mandaptimur.  
\v 9 Mahaw ihir nitperim dinahat apripti orhor nure yah nahat napapat han Got orhor doho dahnong nahat napapatwa dahaptimur. Ihir rum heimat nasaripti orhor haputinnong na hapuriptimur.  
\v 10 Jisas ohnong garmar ma sutparu nuhurnonghe imat nitin ina nahat napapti orhor Jisas orhe hapura it masas pip ohe kasip ohsi pati ma hapat ha dahatingwe rim nuhur haputin orhor na hapuriptimur.  
\v 11 Moh Jisas orhe meng pot pisapti han bap ihir ma hapat daham nitin ina nahat pati orhor Jisas ohe hapura it masas pip ohe kasip da oh ire kakdah ohe timbas hatin ina da mohsi tap hat pati ma hapat ha dahat patengwe rim nipti orhor gapa ham na mandaptimur.  
\v 12 Nuhur mahaw ire ga hrep hat patim orhor gurnong meng napotperhan gur eimat paten inasi nahapatmur.   
\p
\v 13 Rih ma brak matpa meng oh mama ohmur. Noh Got ohe rit natip meng oh arpin menghe daham porpatmur rim brak matpamur. Ama brak matpa mengru hat orhor nuhurhe Arpin meng ma hapat daham meng naporiptimur.  
\v 14 Nuhur dahat patimur. Got oh Jisas ohnong it da pamsuhup han ohoh ihan Jisas orhe dap teimdapat dirnonghe imat orhor napamsapra ma hapat. Napamsasa gursi diradir tap naham orhe pat teinong napisus napaptepra ma hapat dahat pati ohoh ihan gurnong meng mama naporipti ohmur.  
\v 15 Nuhur mama ina ruum dat ihat pati oh gure gwemat ihat mama pati ohmur. Nure ma ihat pati ohe pe oh Got oh orhe da orhor Noh ihirnong yah hat paten ohe da oh imat apripora ma dahapat da oh gure mutuhnong isip hat sus artahat ha sashenohmur. Ihat artahat isip hat sapatin Got ohnong weso por papten da oh artahat isip hat orhorwi sa sasipra. Ihat artahat sapatin ama ohe pe oh orhornong armi mar win adaptuhut papten da oh sa isip hat sasipra.   
\p
\v 16 Nuhur Got orhor imat napamsapra hano rim nuhur mama meng moh garham mandatpera na dahaptimur. Na daham ina teidapat paser ina hama irat huhup ohe tan timbas hatin ina hat pati ma hapat. Damdapat oh kopenohe paten dasi nahat napisapat ma hapat dahaptimur.   
\p
\v 17 Gin mohnong dahenmur. Gin matei patim ina ruum daripti moh kakun garpok tit dariptimur. Kimsi komdapat ma dat patepri da oh na timbas ham eimat isip yahnap hat paten da datiprimur. Ama eimat yahnap da datinmat oh gin kakun ruumsup daripti ma hapat dahaptimur.  
\v 18 Ihat dahat ma pati dir kakdah moh ohe erernong ma wandeipti danong oh timbas hatin han ohoh ihan pomat kin duung por na wandeiptimur. Dire kin na wandeipti eimat patepra han ohnong wamtipri ohe danong ohwi kasip hat orhor kinkin da hat patimur.   
\c 5  
\s1 Kaput eimat paten ina da datipri ohe meng oh  
\p
\v 1 Nure kakdah moh ohe ina moh kakun tom ap tem pati hatin hat patimur. Mama tom ap tem hatin ina moh turkar timbas hatporhan aw tei mahat Got orhe ma hapat ina ap hatin oh na turkatin hatin eimat paten ina ap hatin nahatipra ma hapat daham ama na wandeipti han ohe danongwi ham kasip hat patimur.  
\v 2 Ama na timbas hatipra danong oh datipriwa daham kasip hat pati orhor ama eimat paten ina oh kapkap datiprohenengo daham batbet hat patimur.  
\v 3 Kapkap datiproheneng daham batbet hat ma pati oh dir hapur sus ina timbas patin Jisas oh apriprao. Inasi hat patin orhor apris ihat paten ina dasi nahah oh yaho daham kapkap datiproheneng daham batbet hat orhor minhan patimur.  
\v 4 Eimat paten inasi hat paten da oh kapkap datiproheneng ma dahapti oh kakdah moh ohe ihat ma pati ina moh hapur ha timbas hatinoh na dahat patimur. Mihat patin orhor aw tei ohe eimat paten ina da orhap mama kakdah moh ohe pati inanong moh gianaham gon gurus ha napatinohmur. Gon gurus napora haputin inasi hat pati inanong moh natimbas mara orhe eimat pat ohe da ina oh gon gurus ina da ha nahatinoh daham batbet ham ina ruum hat wamat patimur.  
\v 5 Ama eimat paten ina datin ina nahat ma napapat oh Got orhor ihtin ina nahat napapatmur. Inahat napapatin kaput imat napapteprawa dahat ha patengwe rim orhe Yahsup oh ohri imin ohe tan mat napris napapatmur.   
\p
\v 6 Ohri imin ohe tan mat napris napapato rim nuhur garham na mandama watahpei hama kasip hat orhorwi patimur. Nuhur gin kakdah ina mohsi hat ma pati moh Hanipyah ohsi eimat paten ohe inasi hat na patim gin mihat pati ma hapat dahaptimur.  
\v 7 Ihat daham ma pati oh wandeipti danong na hama na wandeipti ohe danong ham inahatipra ma hapat dahat orhorwi saya apriya hat patimur.  
\v 8 Ihat pati ohoh ihan nuhur na garhama watahpei ham kasip hat orhor patimur. Ihat patima isip ma dahat pati oh Gin mama pati da oh mandama Hanipyah ohsi tap hat paten ohe danongwi isip hat patimur.  
\v 9 Ohsi tap hat paten ohe danong oh isip hat pati orhor dire isipnap ma dahat pati oh Got orhornong Gin kakdah mama patihe Got orhor amam hat paten ohe da ohsi hat orhor patepera. Hapur sus orhorsi tap hat patimhe orhor amam hat paten ohe da ohsi hat orhor patepriwa daham orhe amam hat paten ohe danong ohwi isip hat saptimur.  
\v 10 Dir orhe amam hat pat danong ohwi dimtipera daham ma dindeipti oh orhe nita bap dir gonsi Krais orhe rumkin teinong hatperhan Oh dir orhe dahapat danong ham ma hatip hat saptisi; dapsi hat saptisi ayot danong oh dahanaham nasatipramur. Nasama diradire kakdah mohe ihat ma sapti ohe pe oh ama ohe kis yan orhor napripramur. Ihat napripra ma hapat daham ihan dir orhe amam hat paten ohe danong ohwi dimtipera daham dindeiptimur.   
\s1 Got oh Krais ohnong kumet kak ohe tan kak mat darhetip ohe meng oh  
\p
\v 11 Hanipyah oh gonsi dirnong nasatiprao rim nuhur kas hat patim orhor kuuhan gure mutuh arpin meng pomat naporipti ma hapat ha dahatingwe rim pomat orhorwi napot napisaptimur. Nure yah hat mama saptinong moh Got oh am hat patmur. Orhe ma am hat patru hat orhor hanip gurdapathe nuhurnong ihat am hat pati ma hapat dahaptimur.  
\v 12 Gur nure ma yah hat saptinong moh am hat pati ma hapat ma naporiya oh nuranure boknong armi tahatinmat na naporiyamur. Gur nuhurnong Ihir arpin meng naporipti han bap ma hapat. Ihan dir amam mar paptepera daham ha napaptengwe rim mama meng moh gurnong naporiyamur. Gurnong imat napaptin ina mutuh na wamara ina teinongwi wamar Kamah han hat patimhe yah hat tamreipatmur. Kakhan hat patimhe yah hat tamreipatmur ripti bap ihir nure boknong naham er meng tit naporiyahanhe gurdapat ihirnong Es. Poro ihir dasuh han bap ihat na saptimur. Arpin mengsi ihat sapti han ihirmur. Nuhur ihirnong amam mat paptimur ha poringwe rim noh mama meng moh gurnong naporpatmur.   
\p
\v 13 Kat ihirdapat nuhurnong Ihir da er ham da ban tahat patim mameng moh naporiptimur napor dasuh meng oh nure boknong nahaptimur. Nure da ban tahat pati hatin atamrein ma sapti oh nuhur Got orhe danong ham orhe atamreindin oh da ban tahat hatin hat patim ihat atamrein saptimur. Nuhur da yah han hat patim orhor ma ihat sapti oh gurnong napanggeitinmat ihat atamrein saptimur.  
\v 14 Nuhur ihat atamrein ma meng napot sapti oh tit han Krais oh pokwi ma haputip oh dire gonsi imah ohe tan ohwi bat gwe naham haputipmur. Ohe ma haputip oh dire haputin batbet oh ohwi tap mat nadar haputporhan dir gonsi ohsi tap hat haputpa hatin hat pati ma hapat dahaptimur. Dahama ama Krais ohe hinhina naham haputip ohe da oh ihirnong potin da oh nahatporhan nuhur mama napot apripti ohmur.  
\v 15 Oh dirnong bat gwe naham ma haputip oh eimat yah hat paten dasi ma nahat napapat han dir Oh nohe gwemat sa haputip. Oh nohe gwemat sa Got oh it pamsuhup. Ihan norhe dahat son da oh mandama norhe gwemat ma mashup han ohe danongwi hat sapora dahatwi ha patengwe rim gonsi dirnong bat gwe naham haputipmur.   
\p
\v 16 Gin Got ohe danongwi ma hat pati bap diroh kakdah han ire ina teimdapatwi wamar Moh er hanhe moh yah hanhe por ma saptiru hat hanipnong na saptimur. Rih Krais ohe inanonghe wamara Oh mihat sapat han ma hapat por imat orhor sashemur. Gin ma patinong mohri ohnong imat na saptimur.  
\v 17 Gin kakdah morhe dasi hat patim ma sapti danong oh Krais orhe boknong oh mar natimbas matipmur. Imat natimbas matip ohoh ihan Krais orhe boknong hat pati kuuhan dirnong dire rihohe ihat ma pateshe danong oh dat namdapatmur. Namdama kopenohe paten dasi naham kis nahat napapatmur.  
\v 18 Ama inahat napapat oh Got orhorwimur. Orhornong dir mahaw mat papteshemur. Mahaw mat paptin orhe brer Krais ohnong dire patinong kumet kak ohe tan kak mara darhetporhan oh haputipmur. Ama apris haputip ohe dap tei oh rih ma Got ohsi mahaw hat pateshe da oh orhor dat namdama orhorsi yah hat indin ohe dasi nahatporhan gin ama da ohsi patimur. Ihat ma pati han dirnong oh kopen mahaw hat pati han ihirnong asoh Got orhorsi yah hat indin ina meng potin inasi nahat napapatmur.  
\v 19 Nohe ma ri oh mamarumur. Got oh han gonsi ihir norhorsi yah han hat ha patengwe rim Krais ohnong kumet kak ohe tan mat nadarhetipmur. Nadarhetporhan gin orhe dap tei oh dire ma er hat saptinong Got oh na dahama orhorsi yah hat paten ohe danong nahapatmur. Nahama norhorsi mahaw hat ma pati han ihirnong gin gur norhorsi yah han hat paten ohe meng oh pot pisashenmur napora nuhurnong ama meng pot pison ohe inasi nahat napapatmur.  
\v 20 Inahat napapat han nuhur ohoh ihan nuhur Krais orhe mengtei orhe meng pot pisapti han bap nuhurmur. Orhe meng pot ma pisapti oh Got oh nure atem tei tongnoma orhorsi mahaw hat pati han gurnong Gin gure Got ohsi mahaw hat pati da oh mandama orhorsi yah han hat paten ohe danong hatinmur napor kasip mengtei dipwi napot napisaptimur.  
\v 21 Got oh Krais orhe dap teidapat Norhe yahnap duung da moh ire boknong matpor. Matinmat ire er hat pati da moh ongeng tahat pat han Krais orhe boknong matpor daham orhe boknong mar er han hatin matipmur.   
\c 6  
\s1 Poro ihir Korin ire gwemat tihan tihan ruumsup darishe ohe meng oh  
\p
\v 1 Nuhur Got ohe tapnong ham atamreipti han nuhuro rim Got orhe damdapat orhor Imat yah matpor daham yah nahat orhor ma napapat bap gurnong orhe inahapat danong oh wa hapri. Damsi hat orhorwi ha patengwe rim nuhur mama kasip mengtei naporipti ohmur.  
\v 2 Got oh ritporhan ma brak matpa meng moh gur amratin.  
\q1 Noh Kaput ihirnong imat panggeitiprawa ma dahatip dik oh hatporhan noh gure ma naporiya meng oh noh amram gurnong napanggeitipmur. Noh gurnong nambutipra ma dahatip dik oh hatporhan noh gurnong nambura napanggeitipmur.  
\m ritporhan brak matpamur. Gur amratin. Gin Got orhe namram napanggeim napapin dikhe gin orhormur. Nambur napanggeitin dikhe gin orhormur. Inahah dik ohoh ihan gur wa hapri. Damsi hat orhor indinmur.   
\p
\v 3 Damsi hat orhor indinmur ma naporipti han nuhurnong gurdapat Ihir yah hat na patema er hat saptimur. Ihan nuhurhe ire hat saptiru hat sapera daham tambapte tapaya hatin hatipririm nuhur potahat patim orhor meng oh pomat naporiptimur.  
\v 4 Nuhur yah hat patim orhor gurnong meng pomat ma naporipti oh hanip ihir nure boknong ruumsup nahayao ti da ti da ruumsup oh nure boknong ruumsup nahaho inahat napapatim orhor nuhur na gapa ham kasip hat orhor patin gur nuhurnong wanahama Maihir Got orhe atamreindin oh yah hat orhorwi atamreipti han baphe dahaptimur.   
\p
\v 5 Nure ihat tihan tihan ruumsup ma nure boknong daripti oh kat ihirdapat nuhurnong garnaham kawsi niyao karapus nahayao irair tit dawi ham kasip ham nitpero daham inahayao nahaptimur. Nuhur kin ruumsan na timama ruumsan tamreiyao den pomat na dam pahohsi hat ayao hat orhorwi patimur.  
\v 6 Ihat patim da ongeng mat pisayao dakuu hat ayao kapkap it diteim potin danong na hayao hanip yah mat papindin ohe danong hayao Got ohe Yahsup ohe ma inahat napapat danong hayao ihirnong ina mutuhdapat bopor mat indin ohe danong hayao ihat pati han bap nuhurmur.  
\v 7 Nuhur arpin mengwi pot pisayao Got orhe kasip ohsi hat patim ihat tamrein sapti han bap nuhurmur. Nuhur Got orhe duung dasi er danong sut ma pisapti oh bes tan oh er danong sutin ohe duung da oh marin saptimur. Tan oh nure boknong nitipririm ohe damer oh marin saptimur.  
\v 8 Nuhur ihaptin kat han ihir nure winnong nadaptuhuriptimur. Kat han ihir nure winnong namkar naer deiptimur. Kat han ihir nuhurnong armisi nahaptimur. Kat han ihir dasei nahaptimur. Nuhur arpin han orhora; kat ihirdapat nuhurnong dasuh han hatin nahat napaptimur.   
\p
\v 9 Han gonsi nure ihat tamreiptinong oh am hat pati orhor kat han ihirdapat nuhurnong Maihir be han bap ire meng na amratin inasi hat pati han baphe naporiptimur. Nuhurnong haputin ina hat pati orhor nuhur mama pati ohmur. Kat ihir nure danong dason naham inahapti orhor nuhur na hapur da patimur.  
\v 10 Ina ruum napripti sup oh nure basnong ruum nahapti orhor nuhur na saheih ham amam da tei orhorwi hat patimur. Nuhur borop han bap hatin hat pati orhor gurnong meng napot ma napisapti ohe pe oh Got ohe yah han erer ohsi kamah han hatin nahat napisapatmur. Nuhur bisei han hatin hat pati orhor Got orhe erernong oh gonsi nuhur marin patimur. Ihat pati han nuhurnong Ihir arpin Got ohe meng yah mat napot napisapti han ihir ma hapat ha dahatingwe rim nuhur mama naporipti ohmur.   
\p
\v 11 Ama naporiya oh Korin aptei pati kuuhan guragure han nuhur gurnong da nat pati ohoh ihan nure ina ruum dar batbet hat sapti meng oh na naremama gonsi gurnong pitap teinong mar napora bopor nahat napapti ohe meng oh pitap teinong mar napriyamur.  
\v 12 Nuhur gurnong ma da nat pati da oh tit da tit na naremama amam dao oh gonsi pitap teinong mar gurnong napriptimur. Napripti orhor gurdapat nuhurnong ma da napripti da oh hatip mat pok napriptimur.  
\v 13 Ihan nure gurnong da nat pati da oh ti na naremama gonsi gurnong ma napriptiru mat orhor gure dahe nuhurnong imat orhor naprishenmur. Naprishenmur ma napor oh itapir ihir brer ihirnong sawa meng poriptiru mat napormur.   
\s1 Dir Got ohe ap yawar hatin hat pati han diro rim be han ihirsi sahsah hathe patepri ritip ohe meng oh  
\p
\v 14 We. Krais orhe danong hat sapti gurri Krais ohe danong na hat pati kuu han ihirsi tit inawi gosham sahsah hathe patepri. Got ohe duutin da ohsi; er hat sapti da ohsi tap matin hatinda. Na tap matin hatin ohoh ihan sahsah mathe paptepri. Mong dasi; kwitemsihe tap mat sahsah mat pison hatinda. Na imtin hatin ohoh ihan gur sahsah mathe paptepri.  
\v 15 Satan ohsi; Krais ohsi ihit tap da hat son hatinda. Basra. Ihit na ihtin hatin hat pati ohoh ihan gur ihirsi sahsah goshathe sasipri. Krais ohe danong hat pati han dire dasi; ohe danong na hat pati han ire dasi tap matin hatinda. Basra. Na imtin hatin ohoh ihan sahsah mathe paptepri.  
\v 16 Kakdah dasuh got ire ap yawar ohsi; Got orhe ap yawar ohsi tit apwi matin hatinda. Basra. Na imtin hatin ohoh ihan gur sahsah mathe paptepri. Got oh ritporhan ma brak matpa mengnong moh dahenmur. Ma brak matpa meng oh mamarumur.  
\q1 Got oh Noh ire ina oh norhe ap yawar hatin mara ire ina mutuh oh noh patepramur. Ihat ma patepra oh ihirnong norhe nita mar paptepramura; ihirdapat norhornong Nure Gotmur napor napapteprimur.  
\m ritporhan brak matpamur. Giritporhan ma brak matparu orhe nita ma nahat pat dir gonsi dipwi pat han Got orhe ap yawar ongeng mat apapten ohe ap yawar hatin hat patimur. Ihat pati han dir ohoh ihan gur Got ohe danong na hapti han ihirsihe sahsah goshathe patepri.  
\v 17 Ihirsihe sahsah hat patepri ritporhan ma brak matpa mengnong moh dahenmur. Ma brak matpa oh mamarumur.  
\q1 Gur Got nohe danong na hapti han ire tapnong ham sahsah goshat pati da oh mandama gur gurarhe teinong hat patenmur. Gurarhe teinong hat patim gurnong er naham bisei nahapti han erer oh gurri maripri. Ihat ongeng tahat patin orhor norhor nambutipramur.  
\v 18 Nambura norhor gure ita hat patepramur. Gur norhe brer kuunango wanango ham diradir pateprimur. Hanipyah kasipnap han norhor ginaporpatmur.  
\m potporhan ama meng oh brak matpamur.   
\c 7  
\p
\v 1 Got oh ritporhan ma brak matpa meng ma riya moh dirnong tap mat napotip ohoh ihan nohsi taptem dir Mameng moh arpin dirnong napotip ma hapat daham da ina tei ma er nahapat da moh gonsi mandatpero. Mandama Got orhornong kas ham diradire da inanong ongeng mat papinpero rim noh mameng moh naporpatmur.   
\s1 Korin ihir ihat patimur ritperhan Poro ihir amam hatpa ohe meng oh  
\p
\v 2 Nure taptema. Nuhur apris gursi ma indiri oh gure erer oh nadariyao er nahayao da er mat napisayao nahat na indirimur. Timbasnapmur. Timbasnap ohoh ihan gure dahe tanpera nuhurnong yah mat orhor da napris napaptenmur.  
\v 3 Nohe mameng gurnong ma napor oh Gur er han bapo napotinmat na ginapormur. Noh rih gurnong da nat patmur ma naporhe meng orhor gin it mama naporpat ohmur. Nuhur gure danong ma isip nat pati oh gur hapuriyahanoh nure da oh nihohe boknong matiprohe. Gursi tap hat hapuriya hatin hatiprohemur. Gin mama pati oh nure dahe gure boknong nahat napaptimur.  
\v 4 Gure da oh nuhurnong napriprohewa daham nohe ma dahat pat meng gonsi pitap teinongwi mar mama naporpat ohmur. Noh gurnong armi nahatin da orhorsiwi hat pat ohoh ihan tihan tihan ruumsup oh nohnong naptahat napapathanoh noh na gapa ham amam hama pan hat orhorwi patmur.   
\p
\v 5 Tihan tihan ruumsup oh naptahat ma napapat oh nuhur Gin Masedonia mongnong sus tupetper daham apdorimur. Apris tupetper dahatiri orhor kinhat nah tupetin ina hatirimur. It ruumsup oh naptahatirmur. Ma naptahatir ruumsup oh meng sakarap nahayao ina ruumsup nahaho Korin kuuhan gur kinhat sa patio dahaya da oh ina ruumsup dariyao hatirimur.  
\v 6-7 Nuhur ama ohe ina ruumsup ohsi dat patin at Got oh da ruumsup hat patin pang naham yah amam da ma napripat han orhor da mahan yah nahatirmur. Ma yah nahatir oh Taitas oh aprisa nuhurnong Noh Korin ire patinong saporhan ihir nohnong nambura nohnong amam naham yah da nahatirimuro. Yah da nahama ihir Nuhur Por ohnong nuhur wamar nuranur tit dawi hapti nure ma er hatpa meng oh pomtiprinengo. Pomara nuhur Por ohnong kom aham panggeitiprimuro ihirhe giriptingwerimur napotporhan Taitas ohe ma apir ohe amam ohsi; Korin gur diradir wanggoshatiprineng ma dahapti ohe amam ohsi amam isip nahatirmur.   
\p
\v 8 Noh rih gurnong brak ma natip oh gur wamara moh inahat ma hapat daham gur da er hatpamur. Da er hatperhan nohhe gar tit da er hatirmur. Gurhe gar tit da er hapti it yah da hatperhan nohe dahe yah ham nohe brak ma atir oh wes ihirnong atir dahatirmur.  
\v 9 Gur ama gar da er hatiri ohe pe oh Dire er hat sapti da moh mandatpera daham ma mandatiri oh wes mandatirio daham gin noh Wes er da mandatirio rim amam hat patmur. Noh gure gar tit ma da er hatiri danong oh noh am ham na amam hatirmur. Gure er danong mandapti yah danong ma hatirinong oh noh amam hat patmur. Gure ma da er ham er da ma mandatiri da oh Got orhor Ihir ihat da er ham er danong ha mandatingwe dahatporhan gur arpin da er ham er hat sapti danong mandatirimur. Ihtino rim nohe brak gurnong ma natir oh gure boknong eimat da na er nahatirmur rim noh mama amam hat pat ohmur.  
\v 10 Got orhe danong ha hatingwe rim saheih hatin da ma napripat ohe pe oh er da mandama eimat paten ohe danong haptimur. Ihat da er hapti yah da ma dariptinong oh it ero potiproheda. Basra. Ama inahapatnong oh yaho poriptimur. Oh Got orhe ma inahapat ohe saheih da meng ohmura; orhe pat kat dapat na apripat ohe saheih da oh Nohe ma ihtir oh er hatir sa dahapti orhor mandatinnong oh na mandaptimur. Ama ihat saheih da hapti ohe pe oh eimat yah hat paten ohe dasi na naham batbet dar paten ohe dasi nahatin ohe saheih da ohmur.  
\v 11 Got oh gurnong saheih da ma napdor ohe penong oh dahatinmur. Ama ohe pe oh gur da isipnap er hama Gin nure boknong moh kin hatiprohe sa daham guragure boknong kas hatirimur. Ihat kas hapti er hatir han ohnong imtin dasi mar Gin orhorwi pomtipera. Pondeipti nure bokdapat pat meng timbas ma hapat ha dahatingwe rim ama er hatir han ohe boknongwi meng oh mara pomtipera. Pomta tei Por oh ha aprinohmur dahatirimur. Gur ihat daham ma meng pomtiri oh gure boknong menghe timbas ma hapat dahatin ohe da oh guragur pitap teinong matirimur.  
\v 12 Nohe brak mat ma natip oh er hatip han ohe danongo ohdapat ohnong ma er matip han ohe danongo ama ohe danongwi ham na natipmur. Tit danong ham ma natip oh gur ama brak oh Got orhe kintei pomat sama amram patimdapat Ei. Dir Poro iraire danong hat patesheru hat orhorwi pati sa daham ha am hatingwe rim noh ama brak natip ohmur.  
\v 13 Natporhan Taitas oh ihir ama brak oh dara amrangwerimur ritporhan nuhurhe amam ham da yah hatirimur.  
\p Ama da yah hatiri ohe bas oh gure Taitas ohnong da yah mar amam matiri da oh Taitas oh apris ritporhan ama amam ohsi nuhur atnap isip amam hatirimur.  
\v 14 Nuhur Korin aptei kuuhan gure boknong armi nahatin meng oh Taitas ohnong Ihirri han yahnap bap hat patimur por ohnong darhetirimur. Darhetperhan oh gure pati tei oh apris gurnong wanahatporhan nure gure boknong armi nahatiri mengru mat orhor ambur papangweriri. Taitas oh apris Ihir ihat napapangwerimur ritporhan nuhur na kas ham amam hatirimur. Ma amam hatiri oh nure gurnong arpin mengwi ma naporiptiru mat orhor Taitas ohnonghe arpin meng potiri ma hapat daham nuhur amam hatirimur.  
\v 15 Taitas oh gure pati tei oh kotporhan gur ohnong wamar sein bupang rim kas hat patim orhor ohnong ambutiriri. Ambura ohe meng amratper daham amram ma ihtirinong oh Taitas oh daham gure danong hatin ohe da oh isip nahapatri.  
\v 16 Gur Taitas ohe meng oh imat ma amratiri oh Hanipyah orhe menghe imat orhorwi amram patepri ma hapat daham noh amam hat patmur.   
\c 8  
\s1 Krais ohe nita gur pan hat orhor gospanggeit patenmur potip ohe meng oh  
\p
\v 1 Nure taptem bap gur Got orhe damdapat Masedonia mong ma pati ihirnong mihtin yah da oh apripora daham ma apin pat da ohe pemdapat ma ihtirinong oh gur dahenmur.  
\v 2 Masedonia mong ma pati ihirnong Got oh ama da apin pat ohe pemdapat ma ihtiri oh mamarumur. Ire boknong ruumsup amkat pat dus orhor ihir gapa ham na mandam amam danong oh isip hat orhor indirimur. Amam da isip hat orhor ma indiri oh ihir borop hat patim orhor ihsen gar ma pat oh Got orhe nita kuuhan wan aptei pati ihirnong panggeitpera daham pan ham isip mat orhor panggeim atirimur.  
\v 3-4 Noh wamat patin arpin imat asaringwerio rim noh arpin meng orhor naporpatmur. Imat ma atir oh iraire da orhor Nuhur gin Krais orhe nita Judia mong ma pati ihirnong kat ihirhe imat panggeitiri ma hapat ihan nurehe imat panggeitiprohe ma hapat ihan gur nuhurnong baso napotipri. Nurehe itiprohemur gosham irehe asaringwerimur. Imat ma atiri oh iraire kis oh apris orhora; it iraire ma mandaya oh it tei asaringwerimur.  
\v 5 Ma atiri oh nure ihir imat asariyahan yaho ma dahatiri danong ohwi na hatirimur. Isip mat orhor atirimur. Imat ma atiri oh ihir Got ohe hrepnong hat paten ohe danong ohri hapti orhe dahapat daru ham nure danong hatirimur. Iham isip mat asaringwerimur.   
\p
\v 6 Ihirhe imat yah mat orhor atirimur. Ihan Korin irehe imat yah mat orhor atipri ma hapat daham Taitas ohnong Taitas go rih susa Korin ihirnong Gur kat ihirnong hinhina mar panggeitinmur potporhan ma itpa ohe kat pe oh gin ha timbas matingwemur pora Taitas ohnong ama darheriya ohmur.  
\v 7 Korin gur Krais orhorwi inahatin hatin hanwa dahapti dao yah mengnong daham am hat patim meng pot pisapti ohe dao pan hat Got orhe atamreipti dao nuhurnong bopor nahatin ohe dao ama da gonsinong oh guroh isip hat patimur. Ihat isip hat pati ohoh ihan kat Got orhe nita hat pati ihirnong gure hrepnong mar paptimur. Gur ihat pati han bap gur ohoh ihan gure ihirnong panggeitinhe isip mat orhorwi panggeitpera daham imat isip mat atinmur napor mama nabrak dei ohmur.   
\p
\v 8 Noh Masedonia ire imat ma panggeitiri meng oh gur imat orhor ha panggeitingwe rim na ginapormur. Noh gur hatip hat pati han ire danong ma hat pati da oh arpin ire danong ham panggeitin danong hat patido da na panggeitin ina hat patio daham noh am hatinmat mameng moh napormur.  
\v 9 Gur mohnong dahat patimur. Hanipyah Jisas Krais oh kamah han hat patesuh orhora; Noh Gin borop han hatpor. Nohe borop han ma hatipra ohe pe oh ihir kamah han bap sa hatipri daham oh dire gwemat borop han ham wanhupmur.   
\p
\v 10 Gin norhe dahah meng tit gurnong napotiprohmur. Hanohe krismas gure kopenat Dirri pan hat orhorwi panggeitper daham gurri pan hat katpe ma mamen mat atiri oh guragure bes teidapat paptimur.  
\v 11 Gin gure kopenat ma ihirnong pan hat orhorwi panggeitper daham pan hat ma panggeitiri ohe kat pe bok oh dip mar pan hat orhorwi timbas matper daham guragure ihsen ma dar marin pati kis orhorwi mat apris mamen mar timbas matinmur.  
\v 12 Got oh hanip dire ihsen marin pati danong oh na hapatmur. Oh dire pan hat apripor dahapti danong oh dahapat ohoh ihan Yah mat orhor apripor daham yah mat ma apriya han gurnong Got oh yah mat apriya ma hapat daham amam nahapatmur.   
\p
\v 13 Nohe ma napor meng moh gur ina ruumsupsi hat pati ihirnong panggeima ire ina pang deiya ohe pe oh guragur ina ruumsup ha hatingwe rim na napormur.  
\v 14 Gin mama dik oh gur erer ruumsansi pati ohoh ihan gurdapat ihirnong panggeitinmur. Kimsi komdapat gur hatip hatperhan ihir erer ruumsan hat patihan gurnong sa napanggeitipri. Ihat gospanggeit ayahanoh guragur tap kat ham yah hat indiprimur.  
\v 15 Tap kat hat indin ohe meng oh Isrer ihir hanip timbas dusnong oh saptin Got oh den manao rim pamdiporhan ihir dipa ohe meng oh mama brak matpa ohmur.  
\q1 Kat han ihir garpok dara ruprup mat itpamur. Kat han ihir ruumsan dara ruprup mat itpamur. Sara gahan dar dayanong oh isip ma dariya han ireoh patwi na hatipmur. Garpok ma dariya han ireoh hatip na hatipmur. Irair tap mat den titwi dapti tap hat pei hatpamur.  
\m rim brak matpamur. Amaru hat orhor guragur tap kat hat indiprimur.   
\s1 Taitas ohsi; yot han ihitsi darhetporim Korin ihirnong brak atip ohe meng oh  
\p
\v 16 Nure isip da ma Korin gur yahnap hat orhorwi ha patengwe rim isip panggeitper ma dahapti da hatin orhor Got oh Taitas ohnonghe imat gurnong napanggeitin da apripato rim nuhur Got ohnong weso poriptimur.  
\v 17 Ama ihat pat han oh orhe damdapat Noh Korin ihirnong panggeitinmat sapora dahapatin nuhur Go ihirnong panggeim son hatinda potperhan oh na garhama Mai yahwa. Noh pan hat patwa. Saprohmur ritporhan nuhur mama darhetper riya ohmur.  
\v 18 Ma darhetiprohe oh diradire taptem yot han ihitsi darhetiprohemur. Tit ma darhetiprohe han oh Got orhe meng oh pot pisapatin aptei aptei Got orhe nita sios bap ihirdapat ohnong Oh yah nahat orhor napot napopripat han moho por armi mar bopor mat ma papti han ohmur.  
\v 19 Ama ihpat ohwi basmur. Tit ma ihpat oh Sios bap ihirdapat ohnong Gin hatip hat pati han ihirnong panggeitinmat atperhan Poro ire ma apisaya mani oh go tap apisashenmur pora kis mat papti han ohmur. Ama han ohsi nuhur Got orhe winnong adaptuhut pisayao nure ihirnong panggeitper ma dahaya da oh pitap teinong mar pinggit pisayao hatinmat ama han ohsi tap hat mama sapti ohmur.   
\p
\v 20 Gurdapat Nuhurnong Gur ruumsan yah mat ma atiri mani oh gur pomat na pisaptikin napotipririm nuhur ama yahnap yitir han ihirnong Gure bes teinong ha matingwemur por ama darheriya ohmur.  
\v 21 Nuhur Got oh wanahama Ihir pomat papti han baphe naporo gurdapathe nuhurnong wanahama Ihir pomat papti han baphe naporiyao ha nahatingwe rim nuhur mama imat pomat pisapti ohmur.   
\p
\v 22 Diradire taptem han tit ma Taitas ohsi darhetiprohe han oh nuhur dipwi ohnong Kis matperhan oh na garhama dipwi pan hat orhorwi tamrein sapat han ohmur. Ama han ohnong Go son hatinda nuhur potperhan oh Yahwa. Ihir hanip panggeitin dasi hat pati han bap ohoh ihan noh pan isipnap hahmur. Saprohmur napotporhan nuhur mama darhetper ihya ohmur.  
\v 23 Ama Taitas ohsi ma darhetiprohe han yot ihitoh Sios ihir Gut Got orhe atamreindin oh atamrein sashenmur potperhan ihit atamrein saptin ite ma atamrein sayanong oh ihir wamara Krais ohe winnong aisip deiptimur. Taitas oh Gurnong napanggeitinmat nutanut tap hat tamrein sapti han ohmur.  
\v 24 Ihtin han ihirnong ama darheriya ohmur. Ihir apriperhan gur guragure arwananah ihirnong ma bopor mat papti da oh ihirnonghe imat orhor bopor mar da apinmur. Apriperhan ama yitir ihirnong ma darhetiri kat sios bap ihir Korin aptei pati bap gure hanip ihirnong imat bopor mar da apripti da meng oh amrama Yo. Poro ihir Korin aptei sios bap ihir ihat yah hat pati bapmur rim ma armi deiptingweri oh arpin ihir ihat pati bap ma hapat daham ihirhe sa am hatipri. Ihir ihat daham ha am hengwe rim ihir apriperhanhe da apris ambutinmur.   
\c 9  
\s1 Got ohe nita ihir irair gospanggeit indin ohe meng oh  
\p
\v 1 Judia mong ma Krais ohe nita han hat ma pati kuuhan ihirnong mani asar ma panggeiptinong oh gur dahat pati ohoh ihan noh trun meng na napotiprohmur.  
\v 2 Noh gure ihirnong panggeitper ma dahapti da oh noh am hat patmur. Am hat patima Masedonia sios kuuhan ihirnong Akaia mong Korin aptei hano ama nuhursi taptem kuuhan bap ihir rih hanohe krismas orhor panggeitper dahatpa da orhor hat patimur por noh gurnong armi nahatin meng oh ihirnong pot indirmur. Potporhan Masedonia ihirhe kat kuuhan ruumsan ihir Ihir ihat panggeitin danong pan hat pati ohoh ihan dirhe ihirnong imat orhor panggeitper daham atirimur.  
\v 3 Gin nuhur yitir han maihirnong gur erer oh mamen mat ha itingwe rim gure patinong ma darhetiprohe oh ihir gure pati tei apriperhan guragure mani itin ohe ihsen oh ruprup mat itinmur. Imat ruprup mat itiri tei nohe Masedonia ihirnong Dir sus wandeiyaoh ihir ihsen oh wanin mar mamen mat ita hatiprimur ma porpat meng oh sa dam tarpatipra.  
\v 4 Kat Masedonia ihirsi nuhur apris wanahayaoh Nohe Masedonia mong ma pati han ihirnong dir sus wandeiyaoh ihirri mani oh mamen mat ita hatiprimur ma potir meng oh gur mani ruprup mat na sara dam na tarpatirhanoh noh Masedonia ihirnong dasuh meng potir ma hapat daham noh kas hatipramur. Norhorwi na kas hatipramur. Diradir tap hat kas hatiprimur. Ihan gur mamen mat orhor at patinmur.  
\v 5 Mamen mat orhor ha at patingwe rim noh norhe yah han yitir han maihirnong Gurri mengsi sonmur. Susa ire panggeitiprimur ma ritpa oh gure kintei mamen mat ha atingwemur rim ihirnong mama darhetper ihya ohmur. Imta tei nuhur aprisa wanahama Moh iraire da orhor imat panggeita ma hapat. Hanip ihir Gur imat panggeitinmur na pota ma hapat nuhur apris gidahatiprimur rim ihirnongri nuhur mama darhetper ihya ohmur.   
\p
\v 6 Hanip ihirnong yah mat ma panggeipti da oh mamarumur. Den gar ma gonoya han ihirhe garpok suhum daptimur. Ruumsan ma gonoya han ihirhe ruumsan mat orhor suhum daptimur. Ihapti ohoh ihan hanip ihirnong panggeitinhe pan mat yah mat orhor asarinmur.  
\v 7 Imat atinmat oh Got oh na garhama pan hat ma panggeipti ihirnong oh amam deipat ohoh ihan gurhe ire Kasip mengtei imat panggeitinmur ma naporiya danongo garhat panggeitin danongo oh hapri. Guragure damdapat orhor Nuhurhe imat panggeitpera ma dahaya da orhorsi amam hat panggeinmur.  
\v 8 Imat panggeitpera ma dahapti gurnong oh Got oh Noh ihat ma pan hat yah mat orhor apripti ihirnong oh noh iraire din ohesi; ihirnong panggeitin ohesi ruumsan mat orhor tap mat apripora daham imat napin inasi nahat napapatmur. Inahatin inasi nahat pat ohoh ihan guraguresi; ihirnong yah mat panggeitin ohesi tap mat ruumsan mar bapkei mat orhor napripatmur.  
\v 9 Ihat pan ham yah mat orhor panggeitpera daham yah mat ma apripti ihiroh mama brak matpa mengru hat pati ihirmur. Ma brak matpa oh mamarumur.  
\q1 Ama ihtin han oh bisei hat pati han ihirnong panggeitinmat oh pan hat orhorwi ruumsan mat panggeipatmur. Ruumsan mat ma panggeipat ohe da oh na timbas ham dipwi patmur.  
\m ritporhan brak matpamur. Gin ma brak matpa mengru pan ham yah mat orhor panggeitpora ma daham ihapti gure da oh ihat orhor patimur.  
\v 10 Dam gwe san ma napripat han oh Got orhorwimur. Nadam matin hanhe Got orhorwimur. Ama Got orhordapat ruumsan mat panggeitper ma dahapti han gurnong oh Ihir ihat dahapti moh noh ihirnong ruumsan mat orhor apripora. Apriporhan ire ma ihat dahapti da oh sa tarpat sasipra daham ruumsan mat orhor napripatmur.  
\v 11 Ruumsan mat orhor panggeitpera ma dahapti gurnong oh Got oh Ihir ihat dahaptio rim ihirnong ruumsan mat panggeit papten han oh ruumsan mat orhor apris paptepramur rim imat orhor gurnong napripatmur. Napriporhan gur ohsi ihirnong panggeitinmat nure bes teinong matperhan nuhurdapat ihirnong apriperhan ihirdapat Wes imat napanggeim napriyao rima Got ohnong weso pora ohnong amam matiprimur.   
\p
\v 12 Gure Got ohe nita Juda mong pati ire hatip hat pati han ihirnong oh panggeitper daham ma panggeipti oh ihirnong pei mat orhor indeiptimur. Pei mat orhor ma indeipti ohe pe oh Got ohnong amam isip mar weso porin dasi mar indeiptimur.  
\v 13 Imtiperhan ihir wamara ama ihir arpin Got ohe nita bapmur. Ihir Nuhur Krais ohe meng dindeipti bap nuhurmur ma ripti oh arpin indeipti bap ihirmur. Ihir nuhurnongo ihirnongo ruumsan mat orhor napanggeipti bap ihirmur rim Got ohnong armi matiprimur.  
\v 14 Got ohnong armi mara Got orhe damdapat Noh imat yah matpora daham ihirnong bapkei deipat da ohsi nuhurnong napanggeitahe daham gurnong bopor nahama gure ihat paten meng oh sa nadahandeipri.  
\v 15 Got orhe ma napdap han oh isipnap ohoh ihan dir kinhat ihtin hanmur ritiprohe. Ihtin isipnap han napdap ohoh ihan dir ihtin isipnap napdap ma hapat daham weso potwi papteper dahat patenmur.   
\c 10  
\s1 Por oh Got oh mama tamreindin inasi moh nohnong nahatporhan noh ihpatmur ritip ohe meng oh  
\p
\v 1 Nohanhera. Kat han ihir nohe boknong meng ma nahapti oh Por oh kakduup apris patim oh kas hat patim meng oh pomat na naporpatmur. Meih sus patim oh kasip bok mengtei inahah meng hatin mat naporpatmur napor meng oh nohe boknong nahat napaptimur. Inahapti orhor noh Krais oh orhe danong na ham manap mengtei risuh ohe tan hat orhor gurnonghe noh imat orhor napotiprohmur. Napotporhan gur amratinmur.  
\v 2 Kat han ihir Por oh kakdah mohe danong hat patim ihat sapat hanmur ma naporipti han ihirnong oh noh apris kasip mengtei potin ina hat patmur. Noh kasip mengtei gurnong inahatiprarim ihan guragure da oh pomtinmur.  
\v 3 Nuhur kakdah moh pati orhora; kakdah ohe er danong sum ma timbas matinmat oh kakdah morhe da hrepdapat hat na patim suma timbas deiptimur.  
\v 4 Nure sum timbas deipti oh kakdah morhe dup ban kaw erer ohsi marin patim er danong na suptimur. Got orhe kasip napin pat ohsi er da mahaw bap ire kasip doho hama doho dah treman patinong oh Got orhe kasip napin pat ohsi doho urkamat asar ros suptimur.  
\v 5 Nure doho oh urkamar ros ma supti han oh tit oh sakarap goshapti dasuh mengnong suma timbas deiptimur. Tit oh iraire ina boknong armi tahat patim Got ohnong am hatin danong hatipririm agaheideipti danong oh suptimur. Imat suma kakdah mama patim ti da ti dahapti da oh gonsi dara Krais orhe hrepnongwi deiptimur.  
\v 6 Indeipti gin gur nure meng moh gonsi dimtin ina ha hatingwe rim daham wanahat napaptimur. Napaptin gur nure mengnongwi amram dimtin ina hat patin komdapat tit han tit na dimtin ina hahhanoh noh apris ama han ohnong da adason mar pomtinmat batbet apripramur.   
\p
\v 7 Gur nohe ma ihat pat danong na wanahama be ina teimdapatwi wanahapti Oh be ihat pat hanhe dahaptimur. Iham Nohwi Krais orhe mengtei atamreipat han ma hapat ma dahah han go it potahat dahatinmur. Ma dahatiproh oh Nohwi Krais orhe atamreipat han bas ma hapat. Por ohsihe nutanut arpin Krais ohe mengtei tap atamreipti han yot ma hapat sa dahatipra.  
\v 8 Noh Hanipyah orhe atamreipat han ma hat pat moh orhordapat oh nohnong Go ire danongri aer deipra. Ire da oh akasip mar isip mat orhorwi apisashenmur napor kis nahat napapatin noh mama gure danong nakasip mat napisapat ohmur. Noh ihtin han hat patmur ma ri meng moh norhornong armi tahat patim orhor ginaporpatmur. Norhorhe armi tahatin meng napormur ma napor oh norhorhe na kas hat patmur. Norhe damdapat ihat dahapat handa ihan noh kas hatiproh. Got orhor ihtin inasi nahat napapatin ihpat han ohoh ihan noh na kas hatiprohmur.  
\v 9 Nohe ma nasarpat meng moh gur sama dirnong kas hatin meng nasarpat ma hapat dahatipri.  
\v 10 Kat ihir Por oh meihdapat da nadapetin meng kasip mengtei inahatin hatin meng oh nasarpato. Kakduup moh apris patim ma naporpat oh gapa han ham gapa meng na dahatin mengwi naporpato giriptimur.  
\v 11 Ihtin meng ma ripti han bap ihir pomat ha dahatingwemur. Noh meihdapat patim kasip mengteido gapa meng teido ma naporpat hanhe oh kakduup apirhanhe tap da meng orhorwi naporipra ma hapat ha dahengwemur.   
\p
\v 12 Kat han ihir nuranure dahaya ohe kis mohsi hat sayao apriyao ayao hat pateper daham iraire ma dahaya ohe kis ohsi hat orhor Nuhur yah hat sapti han bap ma hapat daham iraire boknong armi tahat patimur. Ihat daham armi tahapti bap ihir da ban tahat patim ihat pati bap ihirmur. Ama ihat pati han bap ire kis hrepnong nuhur na hatiprohemur.  
\v 13 Got oh nuhurnong Gur ama han ire mutuh oh susa mihat tamreindinmur napor tamreindin kis napin pat kis orhorsiwi tamrein saptimur. Ama kis nahat napapat ohe mutuh oh gur patimur. Gur ihat pati ohoh ihan Nuhur kat han ire kis mat patnong asoh wamara nuhurri ihat sapti han bapmur na ritiprohemur. Nuhur Got ohe kis nahat napapat kisnong mohwi wamara nuhur Nuranure kis nahat napapat ohe kis mohsi nuhur ihat sapti ma hapat daham armi tahaptimur.  
\v 14 Got orhe kis nahat napapat doho dahdapat gur pati ohoh ihan noh apris Krais orhe yah meng ma napotip oh Got orhe kis nahatip doho oh dakmeir ros kot dahdapat na napotipmur. Got orhe kis nahat napapat doho ru dahdapat orhor napotipmur.  
\v 15 Noh ire tamreinperhan ire ma tamreiya ohe pe yah hahnong oh noh wamar noh indeirmur rim na armi tahatiprohmur. Got orhe tamreindin napin pat ohe kisnong ohwi tarpatporhan noh wamar armi tahatiprohmur. Gin nohe ma dahapat oh Gure Got ohnong Ohwi inahatin hatin hanwa ma dahapti da oh isip hat ha sonohmur. Isip hat saporhan Got oh Nohnong Gin go han aptei han aptei hat tamrein sashen ohe tamreindin oh Go ihat sashenmur ha napotinoh dahat patmur.  
\v 16 Ihat tamrein sashenmur naporit noh gure kom dah among among pati ihirnong oh meng oh pot pisapranong dahat patmur. Noh imat pisashen oh wan han ire ma ihya ohe pe oh na armi tahatipra. Norhe ma ihat tamrein sasipra ohe pe oh armi tahatipra ma hapat dahat patmur.  
\v 17 Norhe ma armi tahatipra oh norhe tamreipat ohe peda. Basra. Got orhe meng ritporhan ma brak matpa mengru hat orhor Hanipyah orhe ma inahah ohe pe oh noh armi tahatipra ma hapat dahapatmur. Ritporhan ma brak matpa meng oh mamaru hat patmur. Gur nuhur armi matin danong hatpera dahayahanoh Hanipyah orhe inahapat boknongwi dahama armi mat paptenmur ritporhan brak matpamur.  
\v 18 Hanip dir diradire winnong daptuhur armi tahayahan ama ihapti han bap ihir Got orhe kintei yah hat na pati han bap ihirmur. Got orhordapat win adaptuhur armi dei han ihirnongwi Norhe kintei gur yah hat pati han bapmur porpatmur.   
\c 11  
\s1 Dasuh han ire ihat saptin Por oh Korin ihirnong da adapetip ohe meng oh  
\p
\v 1 Noh da ban tahat pati han ire iraire winnong taptuhur mengriptiru hat mama napor nabrak matiproh meng moh gur Nuhur garham na amratiprohemur dahapri. Amrat patenmur.  
\v 2 Got oh gurnong Ihir ongeng tahat ha patengwe ma dahapat da hatin hat orhor nohdapathe gurnong ihtin da orhor hat ha patengwe dahat napapatmur. Imat ma napapat da oh kuu tap oh han ohnong Gwe kuuhe mohmur pora han ohe boknong kis deipat it itap orhe hrep ongeng mat apapatru mat orhor noh guragure han tit hanwi Krais orhe inapir gurnong mihih mat napapatdapat kaput iman Krais orhe boknong nahatipra rim noh gurnong ongeng naham mihih nahat napapatmur.  
\v 3 Imat mihih nahat napapatin hasiap oh dasuh dakuu meng oh Ip uhnong por ma dasuh matipru gurnonghe inahatporhan gure Krais ohnong rum mutuh mat ma papti da oh mandam er matipri rim noh gurnong ake tom nahat napapatmur.  
\v 4 Noh gurnong ake tom nahat ma napapat ohe duuptei oh mama ohmur. Kat ihir apris nohe Jisas ohe ihat patesuh hanmur ma naporisuh mengnong oh mandama ihir wan mengnong Jisas oh ihat patesuh hanmur naporiyao nohe Gurnong Got oh Yahsupsi ma nahatipnong oh mandapti ire wan sup tit Moh Yahsupmur naporiyao nohe Got ohe yah meng ma naporpatnong oh mandapti ire wan mengnong Moh Got orhe yah mengmur naporiyo nahatperhan gur kapkap amratin ina haptio rim noh gurnong heimse rim ake tom nahat napapatmur.   
\p
\v 5 Ama ihat meng oh nohe boknong naham dasuh nahat apripti han ihir Nuhurwi Jisas ohe meng pot pison han bap kis nahatip bap oh nuhur pokwi winsi han hat patim ihat apriptimur dahaptimur. Ihir ihat dahapti orhor nohe ma dahapat oh Noh ire hrepdapat hat patim gurnong meng naporpatda. Basra. Nohnong Got orhor kis nahat napapatin noh meng naporpat ohoh ihan ihir norhe hrepdapat hat pati ma hapat dahapatmur.  
\v 6 Noh meng ma naporpat oh han ire kopenat meng potinmat tandeim kas hat meng poriptiru hat patim naporpatmur. Ihat meng naporpat orhor norhe dahat patnong oh amnap han hat patim orhor naporpatmur. Ama dakuu amnap hat pat da oh nohe tamreipat ohe peo norhe meng naporpat ohe peo oh gurnong namgit napisapatmur.   
\p
\v 7 Gur Got orhe kintei winsi bap ha hatingwe rim noh norhe winnong amkara gurnong meng naporisuhmur. Noh yan datin ohe danonghe hat patim na tamreisuhmur. Got orhe yah meng napotin danongwi hat patim tamreisuhmur. Noh ihat ma tamrein sasuh oh noh er danong tamrein sasuhda. Basra. Noh yah dawi hat patim orhor tamrein sasuhmur.  
\v 8 Noh yan timbas be imat ma naporpat oh wan sios ire bes teidapat napanggeitperhan gurnong oh be mengwi naporisuhmur. Gurnong meng napotinmat noh ire mani oh be noh adarisuhmur.  
\v 9 Noh gursi patin nohe erer oh hatip hatporhan Gin gur ti napanggeitin napor ina ruum gure boknong ti na naprisuhmur. Noh hatip hatporhan diradire taptem ihir Masedonia mongdapat patima aprisa napanggeishemur. Ihan noh ina ruumsup gure boknong ti na naprisuhmur. Ama imat ma na naprisuhru hat patru hat orhorwi napaptepramur.  
\v 10 Noh yan timbas be napanggeipato rim norhe ina boknong armi tahat patim naporpat meng moh Akaia mong mama pati gur nih norhe armi tahat ripat meng moh nagatmatiproh. Timbasmur. Noh Krais orhe arpin da ohsi nahatporhan noh arpin da meng orhor mama naporpat ohmur.  
\v 11 Nohhe gure yan timbas be gurnong napanggeipatmur ma napor moh gur Oh kianorim dire panggeitin mandap oh oh baso naporpat. Oh dirnong na bopor nahat patim ginaporpatkin dahapri. Nohe gure danong ham bopor nahat patim ihpat da moh Got oh am hat patmur.   
\p
\v 12 Kat han ihir Nuhurnong Jisas orhe meng pot pisashen han bap kis nahat napapat han bap nuhurmur. Ihat pati han bap nuhur Por ohe yah hat tamrein sus yan darpatru mat orhor nuhurhe ihat yah mat orhor meng pot pisus tamrein sapti han bapmur. Ihan yanhe Por ohe ma darpatru mat orhor naprishenmur napor dasuh nahat apris gure mutuh oh patim yan dariptimur. Ire ihat patim ma yan daripti oh nohri ihathe yan na darpat hanmur. Nohhe ihat yan ma na darpat oh ama ihat dasuh han bap ihir gure mutuhnong aprisa Nure yan ma dariptiru mat orhor Por ohhe imat darpatmur napor dasuh nahatipririm noh yan na dar be tamrein patesuhru patru hat orhorwi patepramur.  
\v 13 Ihir nuhur Jisas ohe meng pot pison han bap kis nahatip han bap nuhurmur rima arpin orhe kis mat papat han bap hatin hat tamrein sapti orhora; dasuh ham ihat tamrein sapti han bap ihirmur.  
\v 14 Gin gur Por oh yahnap hat pati han bap ire boknong ihir er hat pati han bapmur ma napor moh kinham sa ginapor daham da darhetipri. Da darheriyahanhe Satan dindi han ohnong dahatinmur. Oh ernap han orhor dindi hapat teimdapat enser has yahnap yah dasi han hatin hapatmur.  
\v 15 Orhe ma ihpatru hat orhor orhe atamreipti han bap ihirhe wan da haptida. Basra. Orhe ma ina teimdapat yah inasi hatin ham ma tamreipatru hat orhor ihirhe orhe wanohe dindi kasip ohsi teimdapat yah duutin inasi hama yah duutin dasi tamreim ha saya ina hatin hat orhor saya apriya hat patimur. Ihat ma hanip kintei saya apriya hat sapti han bap ihir kaput iraire ma ihat sapti ohe yan oh imat orhor datipri basda. Iraire ihat sapti kis orhor datiprimur.   
\s1 Por oh trun tit ma tamreindinmat ina ruumsup dat sasuh ohe meng oh  
\p
\v 16 Noh Korin aptei sios gurnong rih ma napor meng oh tap meng oh orhor napotiprohmur. Gur Por oh da ban tahat pati han ire iraire winnong daptuhur mengriptiru hat orhor ohhe ihat mengripat han ma hapat dahapri. Noh gur Oh ihat da ban tahat patim tohormi tahat mengripat han ma hapat dahayahanhe ire da ban tahat patim tohormi tahat naporipti mengnong amraptiru mat orhor nohe mengnonghe imat orhor amranmur. Gur imat orhor amrat patin noh tohormi tahatin meng hatin mat napotiprohmur.  
\v 17 Nohe norhe boknong tohormi tahat hatin hat patim mama napotiproh meng moh Krais orhe hat patru hat patim mameng moh na naporpatmur. Norhe da ban tahat pat da hatin hat patim imat naporpatmur.  
\v 18 Nohe ma ihpat oh kat han ire kakdah ohe danongwi ham tohormi tahapti ma hapat ihan nohhe ire ihat ma tohormi tahapti ohe tan hatpora daham ihpatmur.  
\v 19 Gur Nuhur dakuu hanmur daham ire mengnong asoh pan hat orhor amraptimur. Gur da timbas ham ire imat naporiya mengnong amrapti ohoh ihan nohhe ire ma haptiru hatpor daham ihpatmur.  
\v 20 Gur ama da timbas hat mengripti han ire mengnong asoh pan hat ma amrapti oh mamaru hat gur amraptimur. Ihirdapat gurnong Nure natamreindin moh gur be natamreinmur napor ire hrepnong nahayao gurnong bisei naham borop nahayao gure da oh ire boknong ha hatingwe rim dasuh nahayao Nuhurwi ihtinsi pati han bapmur naporiyao dak moh pung naporiya hatin hama dasei nahayao nahatperhan gur na garhama yahwa daham amraptimur. Ihan norhe ma napotiprohnong moh ire inahatperhan gur na gapa ham ire mengnongwi amraptiru hat orhor nohe mengnong mohhe imat orhor amranmur.  
\v 21 Ire watahpei ham gurnong imat ma naporipti meng oh nuhurri kas hat patim ohoh ama ihtin danong oh na hashemur. Gin noh kas hat patim orhor mameng moh napotiprohmur.  
\p Gin ire watahpei hat patim ma tohormi taham naporipti meng ohor norhe boknong tohormi tahat patim orhor napotiprohmur. Ama imat tohormi tahat patim napotiproh meng oh noh da ban tahat pat han hatin hat patim napotiprohmur. Ma napotiproh oh gur Por ohnong Krais orhor kis mat papat hanhe ha dahatingwe rim napotiprohmur.  
\v 22 Nohe tohormi tahat ma napotiproh meng oh mamarumur. Ihir Nuhur Hibru bap nuhurmur ma ripti oh nohhe Hibru basda. Nohhe Hibru nuhurmur. Ihir Nuhur Isrer bap nuhurmur ma ripti oh nohhe Isrermur. Ihir Nuhur Epraham ohe puh nuhurmur ma ripti oh nohhe Epraham ohe puh basda. Nohhe Epraham ohe puhmur.  
\v 23 Ihir Nuhur Krais orhe atamreipti han nuhurmur ma ripti oh Noh atnap Krais orhe atamreipat hannap oh nohmur. Nohe Ma napor oh da ban tahat pati han ire tan hat napormur. Noh atnap Krais orhe atamreipat han hat ma pat oh mamaru hat patmur. Atamreindin oh ire pangmur. Nohe ma atamreipatnong oh isipnap atamreipatmur. Isip ma atamreipat ohe pe oh karapushe ire karapus oh pang garpokmur. Noheoh atnap tei karapus hat tei karapus hat ihat apripatmur. Kawsi ma niptihe ihirnong ma supti oh garpokmur. Nohnong ma nipti oh isipnap niptimur. Haputin ina nahat napisonhe noh isipnap tit haputin ina hat sapatmur.  
\v 24 Nohnong ma niptihe Juda iraire hanip supti ohe kasip nang tan ohsi hanen gonap dah mah tit dah tit dah ma nipti oh 39 matwi kasip nang ohsi nim namdaptimur.  
\v 25 Rom ire bes teidapathe nohnong yitir dah kasip nangsi niptimur. Tit dah tit kweisi rum hemat nasar niptimur. Yitir dah tit noh sip tem sapatin turkat tom hru dahnong wasa aya haputirmur. Tit dah tit sip tem sapatin ma turkatip oh noh prang tan ohsi marima tom hru tei patin kwitem has rima it mong dahas ritipmur.  
\v 26 Noh trun ma meih mandap er nahatin ohe mandap katnongwi ma sapat oh tit oh tom oh nipatin orhor sapatmur. Tit oh gapah han ihir gapah ham nitin ina nahat napaptin orhor sapatmur. Tit oh Juda na hat pati hano Juda hat pati nuranuro ihirdapat nohnong nitper ihaptin orhor ire pati kat sapatmur. Tit ma sapat oh garnahaham nitin ap mutuhnong sapatmur. Tit oh hanip timbas er nahatin ohe mong dusnong oh sapatmur. Tit oh tom sor hru tei sip tem ma sapat oh er nahatin orhor sapatmur. Tit oh Diradir Krais ohe nita han bapmur ma ripti dasuh han bap ihir nitper ihapti kat orhor sapat. Noh ama ihtin ohe er nahatin mandap katwi sapatmur.  
\v 27 Nohe ruumsan ma ina ruumsupsi hat orhor ma tamreipat oh trun oh ina batbet daro ruumsan tamreio ma hah ohe pe oh noh kin na timapatmur. Na timama trun tit tom din haho pahoh haho den hatip haho watah andin ohe hatip haho damesi hat ao hapatmur.  
\v 28 Ama ihat tamreipat ohe ina ruumsup nahatin ohwi basmur. Tit oh aptei aptei ohe sios ihir kinhat patio ire saheih meng ma hat pati asoh ohe meng oh kinmat pomtiproho dahapat ohe ruumsup oh namkat napapatmur.  
\v 29 Ama ruumsup namkat napapat da oh mamarumur. Tit han tit ohe yah hat saptin orhe yah hat sapat ohe pe oh ruumsup er tit ohe boknong hatporhan oh yot da ham gapa hahhanoh nohhe ohe ma ihah danong oh hama noh gapa han hatin hama ruumsup darpatmur. Tit han ohdapat tit han ohnong er da mar ambir temnong deihanoh nohhe ama pe oh ihat ambir tapan pat sa dahah ohe ruumsup oh darpatmur. Ama ruumsup nang oh nohnong namkat napapatmur.   
\p
\v 30 Noh norhe inanong moh armi tahatin inasi nahat napapat ohoh ihan noh armi tahat indin meng oh napotiprohmur. Armi tahat indin meng ma napotiproh oh kasip hat patim ma indeipat ohe armi tahatin meng oh na napotiprohmur. Gapa hat patim ma ihpat meng oh armi tahatin ohe meng hatin mat napotiprohmur.  
\v 31 Nohe arpin meng naporpatnong moh Got oh dire Hanipyah Jisas ohe itap oh dipdipwi armi mat papten han orhor Oh arpin meng porpat ma hapat daham nohnong am hat patmur.  
\v 32 Noh gapa hat patim ma ihpat meng oh mamaru hat patmur. Noh Damaskas ap mutuh oh patin kakhan Aretas ohe hrepdapat Damaskas ap mutuhnong wamat pat kiap oh orhe dupsi han ihirnong Por oh tandutipra. Gur doho isip pruhupa gwatei kat oh wamat patenmur. Saporim ihahhanoh nang atpatinmur potporhan ihir arpin wanahat inpamur.  
\v 33 Wanahat patin ohoh ihir nohnong nang natpatipri rim norhe yah han ihir bek ung namima nang nadumama doho bas ohotdapat nangdapat namrim napaptin kot dah ohe kakdah but ham namdatperhan noh ahar tandutipmur.   
\c 12  
\s1 Por orhe boknong kinpitap hatin mat pinggitip ohe meng oh  
\p
\v 1 Gurnong napanggeitin mengnong oh amraptida ihan ameng oh napotiproh. Gurnong na napanggeitin dasuh meng ohwi amratin ina hat pati ohoh ihan na napanggeitin ohe armi tahatin mengnong ohwi napotiprohmur. Ma napotiproh oh Hanipyah Jisas Krais ohe kinpitap hatin ma namgitip ohsi; komdapat dir na dahat pati han ma tarpatipra han ma namgitip han ohsi napotiprohmur.  
\v 2 Mamarumur. Nohe am hat pat han tit Krais ohe nita hat patim kapkap gasnang por tapas pora tei ohe pepe aw tan tei mahat sariyaoh pat hatipmur. Ma ihtip oh gin noh patin gin mama 14 krismas hatir ohmur. Ama ihat pat hatip han oh norhor ihat pat hangopmur. Ma pat hatip oh norhe ina mohsi pat hatipde da da ohwi pat hatipe daham norhor hanhan hat patmur. Got ohwi am hat patmur.  
\v 3 Ina mohsi pat hatipde da dawi pat hatipe daham norhor hanhan hat patmur. Got ohwi am hat patmur. Apteinong ma nahatip teinong oh nohnong Got orhe ap yah teinong nahatiphe daham am hat patmur.  
\v 4 Ama apteinong nahatporhan noh wanohe yahnap meng hanip dire na ritin hatin awam yahnap meng tit amratipmur.  
\v 5 Ma ihtip oh Got oh inahatip ma hapat daham ama ihtin ohe penong daham armi tahatiprohmur. Norhe kasip ohe boknong daham na armi tahatiprohmur. Norhe gapa han hat ma pat ohe boknongwi daham armi tahatiprohmur.  
\v 6 Nohe kasip ohsi ma ihpat ohe kasip oh patmur. Pat ohoh ihan ama orhe boknong ham armi tahatpor daham armi tahahhanoh da ban tahat pati han ire tan hat na armi tahatiprohmur. Arpin ohe armi ohsi armi tahatiprohmur. Ihat pat orhor noh ama ohe danong ham na armi tahaprohmur. Nohe ma na armi tahatiproh ohe duuptei oh mamaru hat patmur. Noh mengwi armi tahatporhan gur amrama Oh ihtin han hat pat ma hapat dahayahan ermur. Noh gure pati teinong apris nohe ma ihat sapat dao nohe meng pot ma pisapat ohe dao ohnong gur wanahama Oh ihat pat hanhe naporiyahanoh yahnapmur daham noh norhe ina boknong na armi tahatiprohmur.   
\s1 Por oh Noh gapa han hat patin Krais ohe kasip oh nohe boknong tarpapatmur ritip ohe meng oh  
\p
\v 7 Nohe yahnap han hanip kintei na ritin hatin han tit ma wamtir ohe pe oh Got oh Por oh Nohwi ihtin han rim orhe danong hatin ohe danong hatipra. Orhe boknong ihtin dahatiprarim Satan go ohe boknong trah ban supsi matinmur potporhan Satan oh arpin nohe boknong moh trah ban sup argonahat napapatmur. Inahat napapat ohoh ihan noh kinhat Nohwi ihtin han kasip han hat patmur ritiproh. Na giritin ina hat patmur.  
\v 8 Ihat pato rim noh yitir dah Got ohnong At Got go mama trah ban sup argonahat napapat moh dat namdatinmur por yitir dah dahamtipmur.  
\v 9 Dahamtiporhan oh Es. Norhe kasip oh gapa han ire da mutuh oh yah hat tarpama tamreipatmur. Ihat gapa han ire mutuh tamreipat kasip ohoh ihan go Got oh bopor naham mama kasip mohsi nahat pat ma hapat. Mama kasip moh kiwa dahatinmur napor baso napongop. Baso napotporhan noh Gapa hat pat moh yahwa. Krais orhe kasip oh ha tarpatin oh daham kimiritipmur. Kimiripat norhe gapa hat pat ohe pe oh Krais orhe kasip oh ha tarpatinoh daham ohnongwi daham armi tahat patmur.   
\p
\v 10 Noh Krais ohe danong hat sapatin nohe ina boknong gapa hat pat ohe pe oh Got orhe kasip oh nohe mutuhnong yah hat tarpama kasip nahat napapatwa dahapatmur. Ihat dahapat ohoh ihan ihir dasei naham inahayao ti han ti han ruumsup oh norhe boknong nahayao naham gapa nahatperhan Nohe gapa hah ohe pe moh Got orhe kasip oh kasip nahat napapatwa daham noh amam hat patmur.   
\s1 Por oh Korin ihir er hat patin noh saprakino daham ina ruumsi hat patesuh ohe meng oh  
\p
\v 11 Korin sios bap gur Krais ohe meng pot pisashen han kis mat papat han bap maihir pokwi meng yah mat orhor napot napisapti han bapmur por ma armi deipti han ire hrepdapat hat noh patda. Basra. Noh bisei han hatin hat pat orhora; ire hrepdapat hat noh na patmur. Noh ihat pat han ohoh ihan gur nohnonghe Oh yah mat orhor meng napor napanggeitin han ma hapat kinham ihat na daham nohnong na armi nahapti. Gin gur ihat nohnong na armi nahapti ohe pe oh noh mama da ban tahat pati han ire iraire tohormi tahat mengriptiru hat noh mama meng moh naporpatmur.  
\v 12 Noh gure mutuh oh patin orhor manap da tei orhor tamreisuhmur. Noh gure mutuh oh ihat patin ma tamreisuh ohe pe oh Moh arpin Krais orhe meng pot pisashen han kis mat papat han ma hapat dahatin ohe da oh kasip han tarpao na wandeipti han tarpao hatipmur. Imat tarpatporhan gur ohnong wamara nohnong Moh Got orhor kis mat papat han ma hapat na dahashemur.  
\v 13 Noh kat sios ihirnong isip da aprisa panggeit sasuhda. Gurnong gar da naprisa imat napanggeipatda. Basra. Tap da orhorsiwi isip mat napanggeit napisapatmur. Ihat napisapat ohoh ihan de ohe pe oh gur Por oh er mat napisapatmur naporipti. Ihan noh erer oh hatip hatporhan gurnong Napanggeitina ma na ginaporisuh ohe pe oh gure damdapat Oh dirnong Gur napanggeitina ma na naporpat moh nuhurnong Por oh er nahapatmur riptida. Gur gidahat patihanoh nohe gurnong ma inahatir ohe da oh dahatipri. Hanhan mar mandatinmur.   
\p
\v 14 Noh rih yot dah apdormur. Gin it apriporo rim mamen tahat patmur. Noh mamen tahat patdapat ma apripra oh gure erer oh noh nadatinmat na apripramur. Nohe ma apripra oh gurnong nambura Got orhe kasip hrepnong nahatinmat apripramur. Inahatinmat apripra ohoh ihan noh erer asoh hatip hahhanoh gurnong noh ti napanggeitina na napotipramur. Ma na napotipra meng oh mamaru hat patmur. Brer ihirdapat supir itapir ihirnong ire hrepnong mar na paptimur. Supir itapir ire hrepnong mar brer ihirnong paptimur. Ihtin ohoh ihan noh supir itapir hatin hat apris gurnong erer oh ti napanggeitina na napotipramur.  
\v 15 Na napora gurnong ha yah hatingwe rim nohe erer oh gonsi gurnong napanggeim sus napripatin nohe erer timbas hama norhe ina bokwi hapat ruumsup darhanhe yahwa dahapatmur. Yahwa daham gurnong bopor nahatin da oh isip dapsi mat orhor napisapatmur. Inahapatin gurdapat oh nohnong bopor nahatin ohe da oh gar gar mat ha napisashengwe dahapatda. Basra. Nohe gurnong ma isip mat orhor bopor nahapatru hat orhor gurdapathe nohnong imat orhor ha bopor nahengwe dahapatmur.   
\p
\v 16 Gur am hat patimur. Noh erer oh hatip hatporhan gin gure erer oh ti napanggeitina napor gure boknong ruumsupsi ma na nahasuh oh gur am hat patimur. Gur am hat pati orhor dasuh han bap ihir gurnong Por oh dasuh naham gapa nahapat gure ihsen erer oh ahar mandap nadarpatmur naporiptimur.  
\v 17 Ma naporipti oh noh kinmat ahar datiproh. Nohe gure patinong ma nadarherpat ihirnong oh Gur susa ahar gapa meng mara ire ihsen oh adara popris nohnong napinmur por nadarherpatda. Basra. Noh gur ihenmur por na nadarherpatmur.  
\v 18 Nohe Tit ma nadarhetip oh Taitas ohsi; itait Got ohe danong hat pati han yot ihitnong kasip mengtei Gut kapkap sona por kasip mengtei por darhetipmur. Darhetporhan ihit gure pati tei oh aprisa gure ihsen erer oh ahar nadatirida. Basra. Taitas ohhe nohe gurnong napanggeitin danongwi hat ma tamreipatru hat orhor Taitas ohhe nohe mihat tamreipat daru hat tamreipat han ohoh ihan ohe gure pati tei oh apris ihat orhor tamreindirmur.   
\p
\v 19 Nohe gurnong ma naporpat meng moh Dire Por ohe boknong deipti meng moh dasuh meng ma hapat daham ha mandatingwe rim ginapot ma hapat dahatipri. Guragure Got ohe danong hapti da oh isip hat orhor ha sashengwe rim noh mameng moh mama naporpat ohmur. Nohanhera. Nohe ma naporpat meng moh gur Moh Krais orhe han hat patim Got ohe kintei arpin dirnong napanggeitinmat naporpat ma hapat dahatinmur.  
\v 20 Dahama yah da hat orhor patina noh apripramur. Aprisa noh ihir sa ihat yah hat patepri ma dahapat da ohsi hat gur ihat na patihanoh nohhe gure Oh manap dasi hat sa apripra ma dahat pati da ohsi na apripramur. Gur ihat na patin noh apriprakin daham ina ruumsi hat patmur. Noh ina ruumsi hat ma pat oh gur sakarap gosham inggoshatin ohe dao ire asoh abopor deipti ohe dao kapkap bopor heisup deipti ohe dao ator meng goshapti ohe dao Nohwi winsi han hatipraneng daham bap goshapti ohe dao dasei meng poripti ohe dao ap taredapat hanip aripti ohe dao nohwi ihtin hanmur dahapti ohe dao tit urhe dahah tit urhe dahah gosham sakarap goshapti ohe dao ama ihat pati da muk ohsi hat patin noh gure mutuh apriprakin daham ina ruumsi hat patmur.  
\v 21 Kat gure er hat susa bisei saw goshapti dao han inap abisei saw deipti dao ina teimdapat da tarpam Noh mihat ushan yahwa daham yahwi hat sapti dao ama ihat pati da muk oh na mandat patin noh apriprakin. Aprisa gurnong wanahama gur ihat er hat patihanoh gure ma ihat pati ohe pe oh Got oh nohnong kas dasi nahatporhan noh saheih ham yimtin inasi hatiprakin dahat patmur.   
\c 13  
\s1 Por oh Korin ihirnong Gur yah hat patenmur. Na yah hat ayahanoh ruumsup nahatipramur potip ohe meng oh  
\p
\v 1 Noh rih yot dah apdormur. Gin it apriporo rim mamen tahat patmur. Noh mamen tahat patdapat ma apripra oh aprisa ma brak matpa mengru mat orhor gur ma er hatiri meng oh noh pomtipramur. Got oh ritporhan ma brak matpa meng oh mamaru hat patmur. Tit han orhap Moh ihtin han hat patmur ripathanoh amengnong amrapri. Yot hano kat hano ihir tap meng orhor tit han ohe boknong asoh deiyahanoh Trun han ihir tap meng orhorwi riya moh arpin menghe daham amranmur rim ma brak matpa meng orhor hatin mat orhor noh amram pomtipramur.  
\v 2 Meng amrama er hat patihan ama er hat pati han ihirnong arpin imtipramur. Noh tipnerip ma apdap oh apris patin gahan sonmat oh gurnong Gur ihat orhor er hat patihanoh noh it bimrip oh ma apripra oh arpin ama er hat pati han gurnong er yan napripramur napor namdapat pipmur. Gin ama napotip meng orhor ginhe it tap meng orhor naporpatmur. Tap meng orhor naporpat ohoh ihan arpin rih ma er hat sapti hano kopen ma er hat sapti hano guragure ma er hat sapti ohe pe oh noh aprisa guragurnong tap nahat arpin er yan napripramur. Tit er hat ma sapat han tit na sam namdatinhe na namdatipramur.  
\v 3 Noh er yan ma napripra oh gure er hat saperhan Krais orhor gure mutuh patim er yan ma napripatnong oh dahenmur. Orhe ma napripat oh gapa hatin napripatda da kasip hat napripat. Basra. Kasip hat orhorwi napripatmur. Gin nohhe gure patinong apris er yan ma napripra oh ama kasip orhorsi er yan napripramur. Napriporhan gur wamara Por oh tit han tit namgirit nuhur wamara Moh arpin Krais orhe ripat wanin meng oh napor ma hapat ma dahapti da oh pitap teinong matporhan gur am hatiprimur.  
\v 4 Krais oh orhe kasip ohsi hat ma pat oh mamarumur. Oh hanip diradir hatin gapa han hatin hat patin irat bok sur garmar sutpa orhora; it masas ma pipnong oh Got orhe kasip ohsi pamsaporhan masas patmur. Masas ma pat oh ama pamsuhup kasip orhorsiwi hat patmur. Gin orhorsi ma tap hat pati nuhuroh orhe gapa han ma hat patesuhru hat orhor nuhurhe ihat patimur. Ihat pati orhor orhe pamsas papat kasip ohsi nuhur tap hat pati ohoh ihan noh ama ohe kasip ohsi apris er yan napripramur.   
\p
\v 5 Ihan gur Por oh apris inahatiprakin daham Noh Krais orhe danong ham orhorsi tap hat pat handa da orhe tapnong na hat pat han daham guragure danong sama dahatinmur. Sama gur arpin Krais orhe danong hat patihanhe Nuhur Jisas Krais orhe tap hat pati ma hapat daham am hatiprohemur. Na ihat patihanhe Nuhur Krais orhe tapnong na hat pati han sa daham guragur am hatiprohemur.  
\v 6 Guragure damdapat sam ma dahatiprohe da hatin hat orhor nohnonghe nasayahanhe Moh arpin Krais orhe meng pot pisona por ma kis mat papat han oh moh ma hapat dahatiprohekin dahapatmur.  
\v 7 Noh norhe tamreipat ohe pe oh dam yah hat timarit Por oh yah hat tamreipat hanhe ha dahatingwe rim noh na tamreipatmur. Kat han ihir Por oh er hat tamreipat hanhe dahayahanhe yahwiwa. Ama ihtin danong oh noh na hapatmur. Nohe ma dahapat oh gure yah hat sashen ohe danong ohwi ake tom hat patmur. Ihat noh gur er hat sapririm yah hat orhorwi patim yah hat orhorwi ha sashengwe rim Got ohnong gure paten meng oh noh Got ohnong nadahandeipatmur.   
\p
\v 8 Gur dahenmur. Nuhur arpin mengnong oh dasuh meng hatin mar amkatin inasi hat na patimur. Arpin mengnong oh isip mat pison inasi hat patimur.  
\v 9 Arpin mengnong isip mat pison inasi hat ma pati oh nuhur gapa han hatin hat patin gur kasip han hatin hat patihanoh oh yahmur daham amam haptimur. Ihat dahapti ohoh ihan nuhur Got ohnong ire ihat ma pati da oh Got gorhor isip mat apisus gorhe dahat pat da ohsi; ire ma dahapti da ohsi tap kat mat apisashenmur por nadahandeiptimur.  
\v 10 Hanipyah ohe kasip nohnong ma napin pat kasip oh gurnong eimat er nahatin ohe kasip basmur. Gurnong da nadason matporhan da yah hat ha songwerim ohe kasip oh napin patmur. Ama kasip ohsi noh apris gurnong ha ruumsup nahatipra. Ihan noh na apin patin orhor meng mohri nabrak mar nadarhetpor. Nadarhetporhan gur sama pomta tei noh apriprawa daham meng ohri mama nadarher ohmur.   
\s1 Por oh pepe kapkep mar brak mar atip ohe meng oh  
\p
\v 11 Nohe taptem gurheo. Gur nohe mengnong moh amratinmuro. Amrama yah danong hatin ohe danong moh Got orhe dahat pat da ohsi tap kat mat pisasipera daham tap kat mat pisashenmur. Imat pisus guragur tit dawi hama manap dasi gosapris yah hat patenmur. Ihat patin bopor naham manap dasi nahapat Got oh gursi tap hat sa patepra.  
\v 12 Ihat patin guragure tarmuriya tei wanggoshamhe Moh ditadit taptem ma hapat daham tuhup gosham amam goshenmur.  
\v 13 Got ohe nita maihir gurnonghe Ihirhe sa yah hat patio rim dahatahaptimur.   
\p
\v 14 Gin Hanipyah Jisas Krais orhe damdapat orhor Noh ihirnong imat yah matpora daham ma yah nahapat dao Got oh gure danong ham bopor nahat napapat dao Yahsup oh gure mutuh patim tit dawi naham yah han bap gosham indin ohe dao oh gursi sa pateprio rim noh ama gure ihat paten meng oh por nadahandeipatmur.  
\p Gin kimur.