\id 1TI - Oksapmin NT [opm] -Papua New Guinea 1992 (web version -2014) \h 1 Timoti \toc1 Timoti ohnong Por oh kopenat brak mar atip ohe meng oh \toc2 1 Timoti \toc3 1Tm \mt1 Timoti \mt2 ohnong Por oh kopenat brak mar atip ohe meng oh \ip Mama meng moh Por oh orhe yah han Timoti ohnong brak mar adarhetipmur. Timoti ohe itap oh Grik bap ihirmur. Sup uh Juda kuu Hanipyah Jisas Krais orhe danong hat patesuh kuu uhmur. Ama han ohnong Por oh Gin go Epesas ap mutuh morhor Hanipyah orhe nita hat pati bap ihirnong wamat apaptenmur por mandatipmur. Madapat oh wan apteinong sus patdapat gahan dasuh han bap ihir aprisa Timotio ohe papat kuuhano ihirnong er matipririm ohnong Go ihirnong mimat wamat paptenmur por mameng moh brak mar adarhetipmur. \c 1 \p \v 1 Por noh Timoti gonong mama brak mat nasar ohmur. Nohnong oh Gotsi; Jisas Krais ihit Gin go Jisas Krais norhe meng moh pot napisashenmur napor kis nahat napapti ohoh ihan noh itaite yah meng oh noh mama pot pisapat ohmur. Nambutin ina naham napapat han Got ohsi; apris yah nahatiprawa daham ma minhan pati Jisas Krais itait kis nahat napapti ohoh ihan noh gin ite meng oh mama pot pisapat ohmur. \p \v 2 Timoti go norhe meng naporpat ohe pe oh go Krais ohwi inahatin hatin hanwa dahat pat ohoh ihan go norhe namanhetin brer hatin hat pato rim noh mama brak mat nasar ohmur. Gin ditadite at Gotsi; Hanipyah Krais Jisas ihitnong noh ma nadahandeipat oh Gut gutagute damdapat ma ihirnong imat yah matpera dahapti da ohsi; gutagutsi manap goshat paten ohe da ohsi mat paptenmur por nadahandeipatmur. \s1 Ire dasuh hat sapti meng oh ha mandatingwe rim Timoti go baso potinmur potip ohe meng oh \p \v 3-4 Noh rih Masedonia mongnong saporim gonong kasip mengtei Go Epesas ap mutuh morhorwi patenmur ma napotipru ginhe it tap meng orhor napor mama brak mat nasar ohmur. Go Epesas ap mutuh orhorwi patim kat han ihir Got ohe meng pomat na rima dasuh mengnong Got ohe meng hatin mar rit sayao rih pohon ma pateshe mengnong orhor dahat ayao hanip han ropir han ropir ma pateshe ire win na timbas hatin ohe dapnong ohwi dahat ayao hat ma pati oh ama ihat pati danong ha timbas hatingwe rim go baso potinmur. Ama da oh Got ohe danong hat sapti danong oh na napanggeima sakarap goshat son ohe danong ohwi nahat napisapat da ohmur. Ihan ama inahat napisapat danong oh ha timbas hatinoh rim go baso potinmur. \v 5 Noh Ihirnong baso potinmur ma napor meng moh ihir iraire ihapti danong oh mandama ongengnap mara duutin dasi mat papti dao Noh er hah sa na dahama Yah hat orhorwi patwa dahapti dao Ohwi inahatiprohwa daham arpinwi dahat pati dao ama yitir dahapti ohe pe oh hanip ihirnong bopor mar da apris hen ohe da oh sa tarpat sasipra daham mama napor ohmur. \v 6 Ama han irair ama ohe danong na hama wan mandapnong hat patim na dahatin mengnongwi gospot sapti bap ihirmur. \v 7 Ama ihiroh Moses ohe sawa meng oh pot pisapera daham potinmat oh Nuhur yah mat orhor naporiptimur por pot pisapti orhor ihir sawa meng ohe duuptei mengnong oh pomat na dahat patim ohoh ihan ihir er mat pot pisaptimur. \p \v 8 Dir am hat patimur. Got orhe Moses ohe atem teinong sawa meng oh ma rit natip meng orhe tamreindin orhe gon hat patmur. Orhe tamreindin ma natipnong asohwi deiyahanoh yah hatiprohmur. Wan tamreindinnong asoh deis poriyahanoh oh er hatiprohmur. \v 9 Sawa orhe tamreindein hat ma pat oh mamarumur. Ama sawa meng oh yah hat ma sapti han bap ihir Nuhur er hat pati sa ha dahatingwe rim na natip sawa mengmur. Er hat sapti han ihir sawa meng moh amram Nuhur er hat sapti sa ha dahengwerim ohe natip sawa mengmur daham yah mat orhor poriptimur. Er hat ma sapti ihiroh mama bap ihirmur. Iraire danong ham yahwiwa daham er hat sapti bapo sawa meng amkar sapti bapo Got ohnong kom asar er hat sapti bapo Got ohe dahapat danong na ham orhe kintei oh bisei hat sapti bapo supiro itapiro wan han bap ihiro ha haputingwe rim sut pisapti bapo \v 10 bisei saw goshat sapti bapo han yot ihithe itait kuu gamin hatin ham bisei saw goshat sayao kuu yot ihithe itait kuu gamin hatin ham bisei saw goshat sayao hapti bapo hanip ihirnong tapmar pisus er deipti bapo dasuh meng rit sapti bapo noh arpin ihtipramur ripti it komdapat na ihapti bapo ti sawa ti sawa yah ma natipnong oh amkar bisei mat pisapti bapo ama ihat er hat sapti han bap ihir Nuhur ihat er hat sapti han bap sa ha dahatingwe rim ohe sawa natip meng ohmur. \v 11 Ti sawa ti sawa yah meng ma natip oh Dire armi matin han Got orhor Norhe has yah meng oh ihtin meng morhor pot pisonmur napor nohnong meng wamat paten kakhan nahatporhan noh mama napot napisapat ohmur. \s1 Krais ohe orhe damdapat Noh ihirnong imat yah matpora dahapat da oh Por ohe boknong ma pinggitip ohe meng oh \p \v 12 Dire Hanipyah Krais Jisas oh nohnong Oh mama tamreindin mohe danongwi hama kasip hat tamrein sasipra ma hapat daham nohnong Go norhe natamreindinnong moh natamrein sashenmur napora mama tamrein sashen ohe kasip moh napdapmur. Nohnong imat napdap hano rim noh orhornong weso porpatmur. \v 13-14 Noh rih orhornong dasei meng poro orhe winnong amkar er mat pisao orhe nita ihirnong er mat apisao indeisuhmur. Indeipatin orhor Got orhordapat nohnong hinhina isip nahama Oh nohnong Ohwi inahatin hatin hanwa na daham hanhan hat patim ihat sapat moh noh norhe danong hatin ohe da oh matpora daham orhe damdapat Noh ohnong imat yah matpora ma dahapat ohe yah da oh nohnong isip nahatipmur. Isip nahama orhorsi tap hat patim bopor goshat indin ohe dao Orhorwi inahatin hatin hanwa dahapti ohe dao ama Krais orhorsi tap hat patim daripti da oh napdapmur. Napdap ohoh ihan noh amam da ohsi patmur. \p \v 15 Krais Jisas oh er hat sapti han dirnong nambutinmat wanhupmur ma ripti meng moh arpin meng ripti ma hapat daham han gonsi dir amratin mengmur. Er hat sapti han dirnong nambutinmat ma wanhup oh nohri duupteinap ernap hat sasuh han nohmur. \v 16 Duuptei ernap hat sapat han nohnong Got oh hinhina naham ma nambutip oh mamaru hat daham nambutipmur. Komdapat norhe danong ma hatipri han ihir Por ohnong wamara norhe ma ihirnong kapkap na heisup mar yah da tei orhor yah deipat da moh wamar sa am hatipri daham nohe boknongri ama da oh mar namgim nambutipmur. \v 17 Ama inahatip han oh na hapura kakhan hat patesuhru patru hat orhorwi patepra han ohmur. Hanip dirhe kin wamtinhe na wandeipti han ohmur. Orhorwi arpin Got ohmur. Ama ihat pat han ohnongwi armi maro win isip adaptuhuro mat papten han ohmur. Arpinwa. \s1 Timoti go kasip hat tamrein sashenmur potip ohe meng oh \p \v 18 Norhe brer Timoti gonong Ire ma ihat pati da oh ha timbas hatingwe rim baso potinmur ma napor meng moh rih Got ohe meng pot pisapti han ihir Timoti oh ihtin tamreindin han hatipramur ma napotpa meng orhor noh it Timoti gonong mama napor ohmur. Ihan go Ihir nohnong ihtin han hatipra napor kis nahatpa ohoh ihan ama ginapotpa ohe pe oh noh kasip hat orhorwi tamrein sasipora daham kasip hama ama mahaw naham ihapti danong ambapte mar tamrein sonmur. \v 19 Kasip hat orhor tamrein sonmat oh Arpin inahatiprawa dahat pat da ohsi; noh yah hat orhorwi tamrein sapat sa dahatin da ohsi ama yot da ohsi orhorwi tamrein sashenmur. Kat han ihir Nuhur mama da mohsi ihat na sasiprimur rim garham mandama ihat saptin Got ohe danong hatin ohe danong oh tom san haptor mar mandaya ohe tan mar mandaptimur. \v 20 Ihat ma pati han yot ihitoh Haimeniassi; Areksanda ihitmur. Ihit ihat sus Got ohe danong hat pati da oh mandatperhan noh Ihit ite Got ohnong dasei deipti ohe da oh am ham ha mandatingwe rim noh ihitnong Gut Got ohe nita maire tap na indiprohemur pora itarhe teinong mara Satan ohe bes teinong mat papatmur. \c 2 \s1 Hanip gonsi gur Got ohnong dahamarwi patenmur napotip ohe meng oh \p \v 1 Gur mameng mohri amram dimtin meng ohoh ihan kasip mengtei orhor napotiprohmur. Gur Got ohnong dahandeiyao ohsi mengriyao hatin oh hanip bap gonsi maire paten meng oh Got ohnong adahamaro weso poro imat adahamar paptenmur. \v 2 Hanip gonsi ire paten meng oh imat adahamar paptenmur ma napor meng moh kakdah mohe kakhannap hat pati hano tihan tihan kak hat pati han bapo ama ihat pati ihirnongsi tap mat adahandeinmur napormur. Gure Got ohe danong ham ongeng tahat sus manap dasi gosham yah hat pati danong moh ihir naer matipri daham ama kakdah morhe kak hat pati han bap ire ihat paten meng ohhe Got ohnong adahamar paptenmur. \v 3 Hanip bap gonsi ire paten meng oh imat ma adahandeipti da oh dire namburpat han Got orhor Ihir ihat adahamat ayahanoh yaho daham amam hat patmur. \v 4 Ama namburpat han oh Norhor hanip bap gonsi ihirnong ambutipranengo. Ambutporhan arpin meng oh amram am hat orhorwi ha patengwemur dahapat han ohmur. \p \v 5 Noh gonsi ambutipraneng dahapat Got oh tit han pokwimur. Ama tit han orhorsi; dirsi yah han hat ha indingwe rim tit han Krais Jisas orhor pokwi dire mutuh han hat patmur. \v 6 Ama ihat mutuh han ham napapat han orhor orhe danong na ham Noh ire er hat sapti ohe yan oh norhe boknongwi mar haputpora daham gonsi dire kakhan ham haputipmur. Ihat ma haputip oh Got oh Noh hanip bap gonsi ihirnong ambutipraneng ma dahat pat da moh ama dik oh imat pinggitiprawa ma dahatip dik oh pitap teinong mar dirnong namgitipmur. \v 7 Orhor ihat pat han ohoh ihan Por nohnong Gin go Juda na hat pati han bap ihirnong norhornongwi dahatin ohe arpin meng oh pot pisonmur napor kis nahat napapatmur. Noh arpin ihat pat han ohoh ihan noh arpin meng naporpatmur. \p \v 8 Ihan noh aptei aptei ma pati han gonsi ihir heisup ham inggoshatin da oh timbas hat patim ongeng mat papti da orhorsiwi Got ohnong dahamar ha paptengwe dahat patmur. \s1 Kuu ihir ihatwi ha patengwemur ritip ohe meng oh \p \v 9 Kuu ihirhe mihat ha patengwe dahat patmur. Kuu ihir watah oh hatip kat aripri. Dapsiwi yah mat orhor ha aringwemur. Kak batnonghe goher deiyao awat deiyao hapri. Inahe watah yahnap yan isipsi mohopti watah oh ariyao suyat baning ara awat tahayao hapri. \v 10 Ihir Nuhur Got ohe nita hat pati kuumur rim iraire yah hat saptiru hat orhorwi ha patengwemur. Ihtin kuu bap hat patim kat kuuhan ihirnonghe panggeit ha pisashengwemur. Ire ihat Got ohe danong hat patim arwananah ihirnong panggeit ma pisapti da oh awat yahnap an pati hatin hat saptimur. \p \v 11 Kuu ihir han ire hrepdapat hat patim Nuhur han ire hrepdapat hat patim kimirimwi meng amramo dahamo hat pateper dahat ha patengwemur dahat patmur. \v 12 Ihat dahat pat ohoh ihan kuu ihirdapat han ihirnong ire hrepnong mar meng pot pison inasi ham ihat sasipririm noh kuu ihirnong baso por Gur kimirim han ire hrepdapat hat patim amrat patenmur porpatmur. \v 13 Noh kuu ihirnong baso ma porpat ohe duuptei oh mamarumur. Adam ohnongri Got oh manhetipmur. Manhema komdapat Ip uhnong manhetipmur. \v 14 Manhetporhan dasuh han oh Adam ohnongri dasuh matipda. Basra. Ip uhnongri dasuh matporhan uh Got ohe mengnong amkatipmur. Imtip ohoh ihan noh kuu ihirnong meng oh Gurri meng oh poripri por baso porpatmur. \v 15 Baso porpat orhor iraire brer saripti ohe pe oh ihir Got ohnong inahatin hatin hanwa dahayao arwananah ihirnong apin ohe da oh apriyao yah danong ongeng mat papayao hahram hat sayao hat ayahanoh ama ohe pe oh Got oh ambutipramur. \c 3 \s1 Sios dire napapten hano rim ma kis deipti ohe meng oh \p \v 1 Noh sios ihirnong papten han hatipraneng ma dahapti han ihir arpin yahnap tamreindin danong oh hat patim giripti ma hapat dahenmur. \v 2 Arpin yahnap ohe tamreindin ohoh ihan guragure kintei yahnap hat ma pat han asohwi kis deinmur. Yahnap hat patin ma kis matiprohe han oh mamaru hat pat han ohnongwimur. Kuuhe tit kuu pokwi ma dat pat han ohmur. Dahatin dahe potahat dahama kak tongnot ma pat han ohmur. Ire kintei asoh ma yah hat us apir hapat han asohwimur. Hanip gonsi ihirnong ma norhe yah hanwimur por amburpat han ohmur. Da nadapetin meng ma naporpat han ohwimur. \v 3 Wain tom ruumsan dam ma da ban tahapat han oh basmur. Kapkap na heisup ham na gusut susa manap dasiwi hat ma pat han ohnongwimur. Mani amburin ohe danong hat ma na pat han ohwimur. \v 4 Kuu brer ihirnong pomat ma papat han ohwimur. Imat papatim brer ihirhe At ohe danongwi hat patepera daham itap orhe mengnongwi amram dindeipti han ire itap ohnongwimur. Ama ihtin dasi hat pati han ihirnongwi Mama ihat pat han moh yah hanmur por kis deinmur. \p \v 5 Han orhe kuu brernong pomat na papatin ihirhe itap ohe mengnong na amraptisi han oh sios ihirnong atnap er mat papindipra han ma hapat daham ama ihtin han ihirnongri kis deipri. Kuu brer ihirnong yah mat ma papat han ihirnongwi kis deinmur. \p \v 6 Kopen Got orhe nita hat pati han ihirnong oh sios nure napapten hanmur por kis deipri. Oh kopen han ohoh patem oh Nohwi yahnap han hat patmur dahatporhan rih Satan oh ihtin da hatporhan Got ohdapat ohnong ma imtipru mat orhor ohnong imtiproh ohoh ihan kopen Got ohe danong haya han ihirnongri kis deipri. \v 7 Sios na hat pati han ihirhe wamara orhe us apir hat patnong asoh wamara Moh ohe boknong matin meng oh timbashe. Yah hat pat ma hapat dahat ma pati han asohwi kis deinmur. Ihir wamara Yah hat na pat ma hapat dahat pati han asoh kis deiyahanoh ihirdapat ohnong dasei matperhan oh da er hama noh mandatpora daham Satan ohe ambir temnong hatipra ohmur. Ihan yah hat us apir hapat han asohwi kis deinmur. \s1 Sios dire natamrein hano rim ma kis deipti ohe meng oh \p \v 8 Gin sios nure natamreindin han diken tit kis matper dahayahanhe noh rih ma napor han orhor hatin hat pati han ihirnongwi kis deinmur. Mamarumur. Kak tongnot patin kat ihirdapat wamar Kak tongnot pat hanhe dahapti han ihirnongwi kis deinmur. Pang yotsi hat pati hano wain tom ruumsan dam da ban tahat sapti hano mani amburin danong ham ambutinmat dasuh mar daripti hano ihat ma sapti han ihirnong kis deipri. Kak tongnom potahat pati han bap ihirnongwi kis deinmur. \v 9 Rih na amrashe treman patesuh meng pitap teinong matir meng moh arpin menghe daham tit dawi hat ma pati ihirnongwi kis deinmur. \v 10 Hanip ihirnong kis matin oh ohri Mama han moh kinhatwi patgwer gosham guragurri dahanggoshama Mama han oh yahnap hat orhorwi pat hanmur. Ihan dir ohnong kis matiprohemur goshama ama ihat pati han ihirnongwi kis deinmur. \p \v 11 Inap uhe dahe imap orhe da ma hat pat hatin hat pat kuuhanoh ama han ohnong kis deinmur. Mamarumur. Uh kak tongnom potahat pat kuuo inin menghe ire boknong na deipat kuuo arpin danongwi ham yah hat sapat kuuo ihat ma pat kuu uhe imap ohnongwi kis deinmur. \p \v 12 Diken tit kis matper dahayahanhe kuu titsi hanwi hat patim orhe kuu brer ihirnong ma pomat papat han ohnongwi kis deinmur. \v 13 Ihtin han ihirnongwi kis matperhan ama han ire tamreindin asoh yah hat orhorwi tamrein saprohemur. Ihat yah hat orhor tamrein saptin ihir wamara Moh ohe tamreindin oh yahnap hat tamreipat ma hapat daham ire danong hatiprohemur. Hatperhan ama ohe pe oh ihir ire Krais Jisas ohe danong ma hat pati ohe da oh watahpei ham ihirnong pot pison inasi sa hatipri. Hama yah hat orhorwi sa sasipri. \s1 Dire yah hat paten ohe meng oh yahnapmuro rim ga ripti ohe meng oh \p \v 14-15 Noh kimsi orhor apris Timoti gonong wanahatipra dahat pat orhor noh kapkap na apirhanhe go mameng moh sama Got ohe nita diradire paten ohe meng oh go sama ha am hatinoh rim noh mama brak mat nasar ohmur. Got ohe nita dir dipwi pat han Got ohe sios bap dirmur. Dir Got ohe arpin meng oh wandaprarim ap haw tam ohe tan mar kasip mat papti bap dirmur. \v 16 Ama dire yah hat paten arpin meng nareman papat meng oh Got oh pitap teinong matir meng moh wanohe arpin meng yahnap meng tit ma hapat daham mama ga ripti meng hatin mat ripti ohmur. \q1 Krais oh hanip hapat pitap hatipmura; pitap hatipmura. Pitap hapat orhe ongeng tahat yah hat sapatin Got ohe Yahsup oh orhe yah hat ma sapatnong oh namgitipmura; namgitipmura. Enser ihir wandeishemura; wandeishemura. Orhe meng oh aw pe mong pe han gonsi pot pisaperhan ihir amram arpin ohwi inahatin hatin hanhe dahashemura; dahashemura. Dahatperhan Got oh orhe yahnap teinong pihipmura; pihipmura. \m rim mama ga oh ripti ohmur. \c 4 \s1 Dasuh meng ritperhan kat han ihir dimtiprimur. Ihan gur ama ihtin meng oh amrapri ma ritip ohe meng oh \p \v 1 Got ohe Yahsup oh pitap tei meng ma napotip mengnong oh dahatinmur. Ma napotip meng oh mohmur. Kaput komdapat kat kuuhan ihir dire arpin menghe daham dindeipti mengnong moh mandatpera daham mandaprimur. Mandapti dasuh supo mongsupo ire ma ripti mengnong arpin meng hatin mar dindeiprimur. \v 2 Ihat ma dindeipti han bap ihir er danong na kas hama yahwi hat sayao dasuh danongwi isip hat sayao hapti han bap ihirmur. \v 3 Ihat ma pati bap ihir mama dasuh meng moh We. Kuuo hano gurhe gosdaripri. Awammur. Mama den moh awam den ohoh dapri ameng oh napot aprisipri ohoh ihan gur ameng oh amrapri. Ihir Mama den moh awammur. Dapri riyahanhe gur amrapri. Got oh Mama den moh Krais ohe danong ham arpin meng dindeipti han ihir mama den moh norhornong weso napor sa dapri napor ma natip dennong oh mohri awam na dapti denmur napotipri ohoh ihan gurri ameng oh amrapri. \v 4 Got orhe erer ma natip erer oh na mandatin han ohoh yahwimur daham weso por dar dapti han ohoh ihan gur ire meng oh amrapri. \v 5 Got oh Moh yah hanmur ma ritip hannong oh daripti weso poriyahanoh oh yahnap han mar dariya ma hapat dahapat ohoh ihan gur ire mengnong oh amram ero daham mandapri. \s1 Timoti go yah hat orhorwi atamrein sashenmur ma potip ohe meng oh \p \v 6 Por nohe Timoti gonong mama napor meng moh gorhe taptem kuuhan ihirnong pora meng am mat pisashenmur. Meng am mat pisahanoh go Krais Jisas ohe yah hat atamrein sashen han hatiprohmur. Hapat gwe Krais ohe danong hen ohe yah meng ma dindeipat meng oh gorhornong kasip naham napisasipramur. \v 7 Inahat napisapatin hanip ihir Got ohnong dasei mar dam na tarpatin ohe meng oh kuu ire ripti meng hatinmat naporiyahanoh gori ama ihtin mengnong oh na amram kom asar sashenmur. Susa Got orhe dahat pat da hatin hatinmat oh kis taham am hat orhorwi sus kasip ham am hat sashenmur. \p \v 8 Kasip ham am hat sonmat oh mohnong dahatinmur. Tamnong kasip deipti ohe pe oh kakdah morhe napanggeitin tam kasip deiptimur. Got ohe danong hen ohe da ma kasip deipti ohe pe oh gin mama pati ohe napanggeipat ohsi; komdapat patepri ohe napanggeipat ohsi tap mat kasip deipti ma hapat daham ongeng tahat pat danong oh kasip mat pisashenmur. \v 9 Mama napor meng moh hanip gonsi amrama Arpin menghe dahen ohe meng oh napormur. \v 10 Arpin meng ma hapat dahapti ohoh ihan dipwi pat Got oh kakdah han bap gonsi dirnong namburin han ma hapat. Namburin han hat pat ohoh ihan arpin orhe danong hat ma pati bap dirnong nambutipra ma hapat daham minhan wamat patimur. Inahatipra hanwa daham kasip hat orhor atamrein saptimur. \v 11 Mama napor meng moh go kuuhan ihirnong Gur mama meng moh amrama dimtinmur pora am mat pisashenmur. \p \v 12 Kuuhan ihir gonong wanahama moh kopen han ma hapat. Ihan meng moh dasuh mengsi naporpat ma hapat daham dasei nahatipririm gomdapat yah meng potin dao yah hatwi son ohe dao ire danong ham panggeitin ohe dao Got ohe danongwi kasip hat paten ohe dao yah danong ongeng mat papti ohe dao oh Krais ohe danong hat pati han ihirnong pinggit pisashenmur. \v 13 Nohnong naminhan patin kuuhan ire mutuh oh tandeima Got ohe sawa meng oh sama ihirnong Gur ihat patenmura; ihat patenmura por meng am mar papatinmur. Imat ihirnong papatin noh apris wanahatipramur. \v 14 Ama tamreindin ohe kasip oh Got ohe atem teidapat ire atem teinong potporhan ihir ritperhan han pohon sios ihir Ohnong apir ma hapat daham gwe boknong bes namrinpa ohe kasip oh go mandapra. Ama kasip orhorsi tamrein patenmur. \v 15 Ihat sapatin ihir gonsi gonong wanahama Ohe kasip hat atamrein sapat moh isip hat sapat ma hapat daham am hatiprimur. \v 16 Gorhe ma yah hat sapat danongo Got orhe meng pot pisapat mengnongo ohnong er matipririm kinkin dahat orhorwi tamrein sashenmur. Ihat orhorwi sapatin gwe ma ihpat ohe pe oh gorhornongsi; gorhe meng ma amraya ihirnongsi eimat nambutin inasi naham nambutipramur. Ihan kinkin da hat orhorwi tamrein sashenmur. \c 5 \s1 Timoti go kuuhan ihirnong imat sawa asarinmur potip ohe meng oh \p \v 1 Itanir san ihir er hat sayahanhe Timoti go imtin meng hatin mat poripra. Gorhe itanong gapa mengtei ma sawa asarpatru mat orhor sawa asarinmur. Gorhorsi tap san kopen han ihir er hayahanhe gorhe taptem arwan ohnong sawa asarpatru mat orhor sawa asarinmur. \v 2 Suanir san ihir er hayahanhe gorhe sua uhnong sawa asarpatru mat orhor sawa asarinmur. Kuunang ihir er hayahanhe ahar tare asoh sawa meng poripra. Gorhe boknong nahatin menghe timbas hat patin orhor hanip ire kintei asoh Gur ihat sasipri por sawa asarinmur. Gorhe kuunang taptem ihirnong sawa ma asarpatru mat orhor sawa asarinmur. \s1 Sios ihir kuu tahem bisei ihirnong papayao brer put tahem ire ayao hat pati ohe meng oh \p \v 3 Kuu tahem bisei hat pati ihirnong oh sios gur ire danong ham panggeinmur. \v 4 Brer ire hrepdapat hat patim na bisei hat patihanoh brer irairdapat Rih nuhurnong napanggeit indiri sa. Gin nuhurdapathe ihirnong panggeitpera daham ire danong ohri hama sa panggeit paptepri. Imat ma paptinong oh Got oh wamara Yahnap hayamur daham amam hapat ohoh ihan imat panggeit paptenmur. \p \v 5 Kuu tahem biseinap hat ma pati ihir Got oh napanggeitiprohwa daham dipwi kwitem timbas mong da timbas Got ohnongwi Napanggeitina por dahamarwi patimur. \v 6 Ihtin dahat na patema iraire boknongwi dahat sapti kuu tahem bap ihir ina teimdapat da pati orhor damdapat oh haputpa bap hatin hat pati ihirmur. \v 7 Kat ihirdapat kuu tahem ire brero ihirnong Maihir ire kuu tahem ihirnong pomat na paptem er hat patimur potipririm Timoti go mameng moh kuu tahem ire brero ihirnong Gur mamengnong moh pomat daham dimtinmur pora pomat orhor pot pisonmur. \v 8 Pot pisaporhan ihir meng na amram arwapnanah ihirnong na panggeit ayahanoh oh ihir er haptimur. Supir itapir iraire taptem ihirnong na panggeiyahanoh oh atnap isip er hat saptimur. Ma ihapti oh Got ohe danong hatin ohe da oh kom asar ihaptimur. Ma ihapti oh be han Got ohe danong na hapti han ire ma er hat sapti oh garpokmur. Ama ire ihat saptinong oh atnap isipnap er hat saptimur. Ihtin ohoh ihan go mameng moh pomat pot pisonmur. \p \v 9 Sios gur kuu tahem ihirnong panggeitinmat ire win atper dahayahanoh sama mihat ma pati ire win ohwi atinmur. Mamarumur. Imapir ihir na haput patin orhor orhe danongwi hat patin haputporhanhe inapir ma kusen hata kuu ire winwi atinmur. \v 10 Ama kuu ihir brer ihirnonghe pomat papayao hohop han ihirnong ambura papayao Got ohe nita bap ihir apriperhanhe ire tong agahmar papayao ruumsup hat pati ihirnong panggeim papayao ama ire kin tei ihat yah hat tamrein sapti kuu tahem ire winnongwi asarinmur. \p \v 11-12 Kopen ohe brer put hat patin imapir haputpa tahem ire win ohri asaripri. Atperhan ihir it han datin danong ham dariyahanoh ire rih Nuhur Krais ohe danong ham atamreinwi pateprimur ritperhan ma win itpanong oh aer mara irairnong san hatipri ohoh ihan ire win ohri asaripri. \v 13 Kuu kopen brer put tahem ire win asariyahanoh ihir dirnong den namdemo napanggeimo napapti moh ihan dire tamreindin oh ha ihenoh. Dirri hanip ire taptap oh be saya apriya ham patepera daham gapa kuu ham be saya apriya hat pateprimur. Ihat patim hanip ire boknong inin meng poriyao hanip ire dahapti danong agatdeiyao ham paptepri ohoh ihan ama ihat sasipri bap ire win ohri asaripri. \v 14-15 Kat kuu tahem ihir ihat susa Got ohe danong mandama Satan ohe danong dinggoshaptimur. Ihaptin Got ohe danong na hat pati ihir sios gurnong wanahama Gur ihat er hat sapti bap gur ma hapat napotiprimur. Ihat napotipririm noh mihat dahapatmur. Kopen brer put hat pati tahem ihiroh it han daripti brersi hama iraire brernong pomat papayao hat ha patengwe dahat patmur. \p \v 16 Krais ohe danong hat pati kuu ihir iraire heim taptem tahem tit pathanoh Moh norhor pat ohoh norhor panggeit papteprohwa. Sios ihir tahem bisei trun ihirnong ma papti oh ihat ha paptengwemur. Ihan nohehe norhe tahem mauhnong papteprohwa daham ha paptengwemur. \s1 Sios dire natamreipti han ire meng oh \p \v 17 Kat han pohon ihir gurnong ire hrepnong naham pomat napaptimur. Ihan gurdapathe ihat ma napapti han pohon ihirnong oh Nuhurnong imat napapti sa. Ihan dirhe ihirnong ire win isip mat orhorwi adaptuhur paptepera daham win adaptuhur paptenmur. Ama han pohon ihir ire tamreindin oh meng pomat am naham ma naporipti bap ihirnong oh atnap win isip adaptuhur paptenmur. \v 18 Got ohe meng ritporhan ma brak matpa mengnong moh dahatinmur. Tit meng ritporhan ma brak matpa oh Gur burmakau oh wit gwe oh tambor deipatin atemnonghe apatipri ritporhan brak matpamur. Tit meng ritporhan ma brak matpa meng oh Tamreipti han ihirhe iraire ma tamreipti ohe yan oh ha daringwemur ritporhan brak matpamur. Ama brak yot oh hanip ma tamreipti ohe yan oh ha datingwe napotip ma hapat daham ire tamreim napanggit napisapti ohe yah oh mani apriso win adaptuhuro mar papteper daham apris paptenmur. \p \v 19 Tit han oh pokwi tit ama ihat tamreipti han pohon ihirnong Mama han oh er hat sapatmur por meng ohe boknong deihanoh oh tit han ohe mengwi ohoh gur amrapri. Yot hano yitir hano ihir tap meng Oh ihat er hat sapatmur riyahanoh Oh arpin meng riya ma hapat daham dahamtinmur. \v 20 Dahamara arpin menghanoh kat ma tamreipti ihirhe ha kas hatingwe rim ire kintei orhor dahamara pomtinmur. \p \v 21 Nohe imat meng pomtinmur ma napor meng moh noh Got ohe kinteio Krais ohe kinteio yahnap enser ire kinteio oh kasip mengtei mama napor ohmur. Ihan Timoti gorhe da ohri Moh er hanhe Moh yah hanhe por satin da ohri hat patim satipra. Go potahat dahataham manap da tei orhor sanmur. \p \v 22 Sios gure napapten han kis matper riyahanoh kapkap mandus ambura bes oh ire boknong marim kis deipri. Timoti go ire ma er hat saptinong asohhe wamara nohhe ihtin han hat sapora dahapra. Gorhe danong ongeng mat paptenmur. \p \v 23 Gwe dipwi ma sik hapat oh be tom ohwi dapra. Noh ake nadapato Noh mama sik hapato moh wain tom oh merasin hatin mat gar mat dipor daham wain tomhe gar mat denmur. \p \v 24 Hanip dire ma daham sapti da oh mihat patimur. Kat ire damdapat er hat pati da oh pitap teinongwi mat paptin Moh er hat pati hanhe daham kapkap am haptimur. Kat ire da oh damdapat er hat patin orhor kapkap pitap teinong na matperhan hanhan hat patimur. Kaput komdapat pitap teinong matperhan Moh ihtin dasi hat patesuh hanhe daham am haptimur. \v 25 Yah hat ma sapti dahe amaru hat orhor am haptimur. Kat ihir iraire yah hat sapti da oh pitap teinongwi mat pisaptin kapkap wamar am haptimur. Kat ihir iraire yah hat sapti da oh kapkap pitap teinong na deiptin wamar kapkap na am haptimur. Kaput komdapatwi pitap teinong matperhan wamara Moh ihat yah hat patesuh hanhe daham am haptimur. Hanip da oh ihat am hapti ohoh ihan kapkaphe Moh nure napapten han matpera rimhe kis deipri. \c 6 \s1 Kakdah mama hanip ire hrepdapat hat patim ma atamreipti ohe meng oh \p \v 1 Kakdah han ihir kat han tit kat han ihirnong Nure hrepnong moh ham be natamreinmur potperhan ihir Nuhur napapat han orhe naporpat meng moh amram dimtiper daham papat han orhe danong hat ha patengwemur. Ihat patin kuuhan ihirdapat ihirnong wamara Got ohe winnongo dire Got ohe meng pot pisapti mengnongo moh na dasei mara mohnong yahnap meng ma hapat sa dahapri. \v 2 Ire hrepnong ham be ma atamreipti han bap iraire papat han oh Krais ohe nita hat pathanoh be ma atamreipti han ihirhe Dir tap han bap diradir ohoh ihan ohe naporpat meng moh noh na amratiprohmur dahapri. Ai. Dire napapat han moh Krais ohe danong hat pat moh dire bopor mat papti han ohoh ihan dire yah hat ma atamreiya ohe pe oh ohnong yah deiptimur. Ihan dir yah mat orhorwi ohe atamreindin oh atamreinper daham yah mat orhorwi ha atamreingwemur. \s1 Erer ruumsan darneng dahapti ohe pe oh er danong isip hat sapti ohe meng oh \p Timoti go nohe mama napotiproh meng moh kasip mengtei orhor Gur mameng moh amram dimtinmur pora am mat pisashenmur. \v 3 Kat han tit Krais oh ihat pat hanmura; ihat pat hanmur por yah mat ritip mengnongo dire yah da ongeng mar yah hat sapti ohe mengnongo oh sakarap mara Ameng oh basmur. Mamengnong moh amratinmur pora pot pisaptimur. \v 4-5 Ama ihat yah mengnong amkar ihat sapti han bap ihiroh Nuhurwi ihat am hat pati han bapmur daham ihat sapti orhor ihir damdapat hut patin oh ina temdapatwi ihat daham tohormi tahat sapti han bap ihirmur. Ama ihat sapti han bap ihir duuptei ripti meng oh patin orhora; iraire damdapat sakarap goshatper daham sakarap goshaptinong oh isip hat saptimur. Ihat sakarap goshat sapti ohe pe oh er da tarpam isip hat sapatmur. Er da tarpam isip hat ma sapat oh mama ohmur. Tit han ohe ihat patnong asoh wamara Nohhe ihat pat hanneng daham abopor deipti dao sakarap goshapti dao dasei mar tang deipti dao aduup apitdapat aripti dao dipwi inggoshat sapti dao ama ihat sapti da oh isip hat sapatmur. Ama tihan tihan er da isip hat ma sapat oh da hut patim arpin mengnong kom asar tapan andur mandatpa han bap ire mutuh oh ihtin er da tarpam isip hat sapatmur. Ama ihir diradire Got ohnong daham ihat sapti ohe pe moh ihsen erer dara kamah han hat patepriwa daham ihat sapti han bap ihirmur. \p \v 6 Got ohe danong hat pati dirnong oh Got oh yah naham bapkei nahapat orhor ire nuhur titsi datpera ma dahapti ohe pe oh dirnong na bapkei nahapatmur. Got ohe yahnap danong ohwi hat susa nohe ma ihat pat moh yahwa. Got oh am hat patwa ama ihat dahapti ohe pe oh bapkei nahat napapatmur. \v 7-8 Dirnong emher ihir ma nasaripti oh erer timbas be gon nasariptimur. Hapur da ma saptihe be gon saptimur. Ihan den dino watah andino oh tit pathanhe Moh kiwa dahat patenmur. \v 9 Ihat na dahama Noh kamah erer ruumsansi han hatpor ma dahapti ihir iraire Ihtin hansi hat patineng ma dahapti ohe er da oh pramat pisusa ambir temnong deipatmur. Matporhan da ban tahat patim Titsi datpor. Titsi datpor ma dahapat da oh ihirnong er mara timbas deipatmur. \v 10 Ti er da ti er da ma tarpapat ohe duuptei kak oh Mani ruumsan darnengo ma dahapti da oh duuptei er da ohmur. Ama duuptei er da oh pat ohoh ihan kat han ihir mani ambutin ohe danong oh isip hat susa ama ohe pe oh Got ohe danong hatin ohe mengnong oh kom asara mandatperhan irairnong ruumsup amkat papatmur. \s1 Timoti ohnong Go yah danong orhorwi kasip hat orhorwi sashenmur potip ohe meng oh \p \v 11 Ire ma er hat saptinong ohri Timoti go Got ohe hrepdapat hat patim atamreipat han ohoh ihan gori kom asar tandurinmur. Tandura yah dao Got ohe yah hat ma pat danong ongeng mat papat ohe dao Got ohwi inahatin hatin hanwa dahat paten ohe dao ire danong ham panggeit sashen ohe dao pan ham kasip da hat orhorwi paten ohe dao hanip ihirnong manap da tei papten ohe dao ama da muk oh isip ham ha tarpat sashenoh rim kasip mat paptenmur. \v 12 Got ohnong Ohwi inahatin hatin hanwa daham ohe danongwi hat ma sapti ohe da oh nang dap dakmeitinmat ma sakaripti ohe tan hat kasip hat orhorwi sakarinmur. Sakara Got ohsi yah hat eimat paten da oh dar paptenmur. Ama da oh Got oh Oh mama da moh sa datipra napor gonong kis nahatipmur. Kis nahatporhan go kuuhan ire kintei Nohnong Got oh mama da ohsi naham kis nahatipmur por ire kintei oh yah meng potipmur. Ihtin han nahat napapat ohoh ihan go kasip hat orhorwi marin sashenmur. \v 13-14 Erer gonsinong paten dasi mat papat han Got ohe kinteio Jisas Krais oh Pontias Pairat ohnong Hanip Brer noh ihat pat hanmura; ihat pat hanmura pomat ma gipotip han ohe kinteio ama han yot ite kintei noh kasip mengtei gonong mama napor nasar meng moh gori kasip hat orhorwi dimar paptenmur. Ama danong oh er maro bisei mar amkaro matiprarim yah mar dimar orhorwi papatin Jisas Krais oh sa apripra. \v 15 Ohe ma apripra oh Got oh Kaput mama dik moh darhetipramur ma dahat pat dik oh darhetporhan apripramur. Ama darhetipra Got orhornongwi dirhe armi mar papten hanmur. Orhorwi kakhan ham napapat hanmur. Kakdah maire kakhan hat pati duuptei han hat patio ma ripti han ire kakhan oh orhor pokwimur. \v 16 Orhorwi haputin timbas patru pat hanmur. Orhorwi has isipsinap hat patin hanip dir orhe duupnong na hatin hatinmur. Hanip dir na wandeiptru na wandeipri hanmur. Orhornongwi Gorhorwi winsi hat paten hanmuro. Gorhorwi kasipsi hat paten hanmuro por orhornongwi armi mar papten hanmur. Arpinwa. \s1 Timoti go Kamah han ihirnong Gur ihat patenmur pot pisonmur ma potip ohe meng oh \p \v 17 Timoti go kakdah morhe erernong ma kamah han hat pati ihirnong kasip mengtei porinmur. Kamah han gur kakdah timbas hapat han ohe danong ham erer ruumsan mohoh nohnong yah nahatipra ma hapat. Ihan nuhurwi yahnap hat pati han bapmur dahapri. Got orhornongwi Orhorwi yah nahatipra han ma hapat dahenmur. Ama han Got oh Ihir da yah ham amam hat ha patengwe daham erer oh yah mat orhor ruumsan napripat han ohoh ihan orhe danongwi hat patenmur. \v 18 Gur dahat orhorwi patima ihirnong yah mat orhor panggeiyao ihirnong pan mat isip mat orhor apriyao mat pisashenmur pora ama ihat kamah hat pati ihirnong kasip mengtei pot pisashenmur. \v 19 Pot pisaporhan ama kamah hat pati bap ihir imat isip mat panggeit ayahanoh iraire eimat paten ohe da oh doho kamen ohe tan mat sariptimur. Ama kamen tei oh arpin eimat paten da oh dariptimur. Ihan Timoti go ire ihat pati danong oh akasip mat pisashenmur. \s1 Timoti ohnong kapkep matip ohe meng oh \p \v 20 Got ohe atamreindin oh Timoti gonong wamat paten han nahatip ohoh ihan wamat paten han gorhor aer matiprarim pomat orhor pot apisonmur. Pot ma apisapra oh ire Got ohe yah dasi na ham damsi na hatin ohe mengo yah mengnong amkaripti ohe mengo ama wa hatin mengnong ohwi dakuu meng dam hatin ohe mengmur ma rit sapti mengnong oh go amrapra. Komwi at patenmur. \v 21 Kat ihir ama dam timbas mengnong oh amrama Got ohe arpin mengnong mandapti ohoh ihan gori ama ihapti han ire meng oh amrapra. Komwi at patenmur. \p Gin gurnong Got ohe damdapat Ihirnong panggeitpora dahapat dasi naham ha napaptenoh rim noh mama brak mat nasar ohmur. \p Gin nohe meng oh kimur.