\id 1JN - Oksapmin NT [opm] -Papua New Guinea 1992 (web version -2014) 
\h 1 Jon 
\toc1 Jon Ohri brak mat atip ohe meng oh 
\toc2 1 Jon 
\toc3 1Jn 
\mt1 Jon  
\mt2 Ohri brak mat atip ohe meng oh  
\ip Mameng rim ma brak matip han oh Jisas orhe pinggit pisasuh han Jon oh Jisas orhe ihat sasuh yah meng ma brak matip han Jon orhor paser tei mameng moh brak matipmur. Ohe ma brak matip oh Jisas orhe nita hat pati bap dir da gosapris bopor goshat ha patengwe rim brak matipmur. Tit meng ma daham brak matip oh kat ihir Dire mama pati ina moh er ina hat patimur. Ihan Jisas ohe kakdahnong mama wandas indip oh hanip dire ina moh hatin hat na indipmur riptin Jon oh Es. Krais ohe kakdah mama wandas ma indip oh hanip diradire ina ham indip ma hapat ha dahatingwe rim mameng moh por brak matipmur.  
\c 1  
\s1 Paten dasi nahat napapat han ohe meng oh  
\p
\v 1 Paten dasi nahapat ohe meng ohe duuptei oh Jisas Krais orhorwimur. Ama han oh erer na tarpat patin orhor ohri patesuhru patru pat han ohnong nuhur meng amramo nuranure kin wamaro kin duung por wamaro bes marimo indeishe han ohmur. Ama paten dasi nahapat han orhe meng oh noh napotporim mama brak mat nasar ohmur.  
\v 2 Ama dirnong paten dasi nahatin ohe da oh orhe boknong hat pat han oh nure kinteinong pitap hatipmur. Pitap hatporhan nuhur wamara Arpin oh ihat pat hanwa daham nuhur am hama gur Oh ihat pat han ma hapat ha dahatingwe rim noh mama meng napor brak mat nasar ohmur. Ama ihat pat han oh da dipdipwi patesuhru patru patepra han oh itap Got orhorsi tap hat patdapat pitap hatporhan nuhur wamtipamur. Nure ma wandeishe ohe meng oh gin gurnong napot napisaptimur.  
\v 3 Ama nure wamaro ohe meng amramo hashe ohe meng oh gurnong ma napot napisapti oh gurhe amrama dahapti diradir tit dawi gosham da gosat patenmat nuhur mama napot napisapti ohmur. Diradir tit dawi ham da gosat ma pati ohe da oh itap Got ohsi; mon Jisas Krais ohsi diradir tit dawi ham da gosat pati ohe da ohmur.  
\v 4 Gin gur amam hat indin ohe da oh isip hat orhorwi ha sashenoh rim noh ama ihat paten ohe da meng oh Jon noh mama brak mat nasar ohmur.   
\s1 Got orhe has yah da teiwi hat sashenmur ritip ohe meng oh  
\p
\v 5 Jisas ohe ma naporisuh wanin meng orhor noh mama gurnong naporpat ohmur. Ma naporpat meng oh Got orhe bok oh er da ham kwitem hat pat dahe orhe bok oh eimat timbasnapmur. Yah da orhap gon gurus rit pat han Got ohmur.  
\v 6 Oh yah da orhap gon gurus rit pat han ohoh ihan tit han tit Noh ohe tapnong hat pat hanmur rihanoh orhe yah da tei orhorwi sasiprohmur. Ihtin ohoh ihan orhe yah da tei na susa er da teinongwi hat sayahanoh ama han oh Got orhe tapnonghe na hat pat han ohmur. Ihan Noh ohe tapnong hat pat hanmur rim orhe da hatin hat na ushanoh ama han oh dasuh han ohmur.  
\v 7 Got orhe yah da teiwi hat patru hat ma pati bap diroh orhe yah hat ma patru hat orhorwi sapti han bap dirmur. Ihat ma pati bap diroh Got orhe nita kuuhan ihir tit dawi ham yah han gosham yah hat patimur. Ihat yah da tei ma pati dirnong oh Got orhe mon Jisas ohe heim ma tanduketip ohsi dire er hat sapti er gap gonsi hirmat namdama yah nahapatmur.   
\p
\v 8 Gur mohnong dahenmur. Hanip dir Nohri er dasi na hat pat hanmur riyahanoh ama giriya han dire mutuh oh arpin daheri na patin girit mengriptimur. Diradire danong dasuh mar ihat mengriptimur.  
\v 9 Diradire danong dasuh na mara diradire er hat sapti ohe er meng oh Got orhornong tirip ham porinmur. Potperhan orhor yot da na ham tit dawi ham duung dasi hat pat Got ohoh ihan diradire ma poriya meng oh It yansi matpora na daham hirmar namdam eimat hanhan mar namdapatmur. Hanhan mar namdama has yahnap han nahapatmur.  
\v 10 Got oh dirnong Hanip gur er hat sapti bap gurmur napotporhan hanip dirdapat Noh er hat na sapat hanmur poriyahanoh Got orhe mengnong na amram dasuh meng naporpat han hatin mar indeiptimur.   
\c 2  
\s1 Krais oh dire komnong ham dire sang ripat ohe meng oh  
\p
\v 1 Nohe taptem brer muka. Nohe brak mat nasarpat meng moh Gur er hat sasipririm noh mama meng napor brak mat nasarpat ohmur. Er hat sasipririm brak mat nasar orhor er hat sayahanhe dire komnong ham itap oh dirnong nitiprarim dire sang ripat han orhorwi patmur. Ama dire sang ripat han oh duung dasi hatwi pat han Jisas Krais ohwimur.  
\v 2 Ama han orhor dire gwemat haputip ohe dap tei oh dire er hat sapti er da oh hirmat namdapatmur. Ma inahapat oh dire er hat sapti er da ohwi hirmat namdapat han hat na patmur. Mong mong gonsi ma pati han bap iresi tap mat hirmat namdatin han hat patmur.   
\s1 Arpin dasi hat patim hanip bopor deipti ohe meng oh  
\p
\v 3 Gur mohnong dahenmur. Got ohe sawa meng amram dindeiyahan Got ohe pat danong am ham ihat sapti ma hapat dahaptimur.  
\v 4 Got ohe pat danong am hat patimur ripti orhor orhe sawa meng amram na dindeiptihanoh ama ihapti han ihir arpin da oh ire mutuh na patin dasuh hat sapti han ihirmur.  
\v 5-6 Got orhe mengnong amram dindeipti bap ihiroh Got orhe danong ham bopor matin da oh isip hat patim ihat saptimur. Dir Noh Got orhe tapnong hat patmur ma riya han dir Jisas ohe hat ma sasuhru hat orhorwi sasiprohemur. Ihat sayahan arpin orhe tapnong hat patim ihat sapti ma hapat daham am hatiprohemur.   
\p
\v 7 Norhe bopor nahat napapat bap gur amratin. Nohe mama napor brak mat nasar sawa meng moh kopenohe sawa meng basmur. Gure kopenat ma Krais orhe mengnong Nuhur amratpera daham amrashe meng orhor ginhe it amrapti wanin sawa meng orhor it noh mama naporpat ohmur.  
\v 8 Rihohe sawa meng orhora; kopenohe sawa meng hatin hat pat ohoh naporpatmur. Kopenohe sawa meng hatin hat patmur ma napor oh kwitem da hut sapti da oh mandama yah da oh mong da tei nahat napapato rim noh kopenohe sawa meng hatin hat patmur napormur. Kopenohe sawa meng hatin hat ma pat oh mamaru hat patmur. Krais oh dire danong ham napapao dire arwananah ihirnong da gosat ayao hat ma pati oh sawa mengnong dam mara kopenohe sawa meng hatin mar paptimur.   
\p
\v 9 Gur dahenmur. Hanip gur Noh has yah da tei orhorwi sapatmur ripti orhor Krais orhe nita hat pati taptem bap ihirnong asoh na bopor mar dasei mar mandaptihanoh ama han oh kwitem dus er da teinongwi hat patesuhru patru pat han ohmur.  
\v 10 Krais orhe nita hat pati taptem bap ihirnong asoh da apris bopor mar papti han ihiroh has yah da teiwi hat patim ihat sapti han bap ihirmur. Ihat ma sapti han bap ihir has yah da teinongwi hat sapti ohoh ihan ihir tit bok tit tung rim or wandas tapdinhe timbasmur.  
\v 11 Ihat na susa Krais orhe nita taptem ihirnong na bopor mar dasei mar papti bap ihiroh er da teinongwi hat sus kwitem dus saya hatin hat sapti han bap ihirmur. Ama kwitem dus saya hatin hat sapti bap ihir er da oh ire danong aban matporhan ihir Nuhur er hat sapti ma hapat na dahama kwi dus hut sapti bap ihirmur.   
\p
\v 12 Norhe taptem brer muka. Got oh Krais orhe dap tei gure er hat sapti ohe yan oh it na dahama eimat hanhan mar namdapatmuro rim noh mama meng moh gurnong brak mat nasarmur.  
\v 13 Krais orhe danong ham hanip yah hatin hat pati han bap gurhe erer na tarpat patin orhor patesuhru patru hat pat han Krais orhornong am hat patio rim noh gurnong mama brak mat nasar ohmur. Kopen ma Krais ohe danong hapti bap gurhe kasip hat sus Satan ohnong ambapte mat paptio rim noh gurnong mama brak mat nasarpat ohmur.  
\v 14 Norhe taptem brer muk gurhe ita Got orhornong am hat patio rim noh gurnong mama brak mat nasar ohmur. Hanip yah hatin hat pati bap gurhe erer na tarpat patin orhor patesuhru patru hat pat han Krais ohnong am hat patio rim noh gurnong mama brak mat nasar ohmur. Kopen ma Krais ohe danong hapti han bap gurhe Got orhe meng oh gure mutuh oh kasip nahat napapatin gur kasip hat sus Satan ohnong ambapte mat paptio rim noh gurnong mama brak mat nasar ohmur.   
\s1 Kakdah mohe er danong ham batbet ham sasipri ritip ohe meng oh  
\p
\v 15 We. Gur kakdah mohe er da ma tarpapat ohe danongo pohon ma er hat sapti han ire ihapti danongo ohri wamara Nuhurhe ihtiproheneng daham batbet ham sasipri. Ihat ma sapti bap ihir Got ohe danong na ham na bopor mar ihat sapti ohoh ihan ama danong ohri hapri. Mandanmur.  
\v 16 Kakdah mohe er da ma tarpapat da oh mamaru hat patmur. Ina teimdapat er da tarpam Noh ihtiprohneng dahapti dao kin wamar Noh ihtiprohneng dahapti dao Nohwi ihtin han hat patmur daham tohormi tahapti dao ama ihat sapti da oh kakdah morhe tarpapat da ohmur. Got orhe bokdapat tarpam na apripat da ohmur.  
\v 17 Kakdah mohe er da tarpapat dao ama ohe danong hatinmat batbet hat sapti dao oh timbas hatin ina hat pat ohoh ihan ama danong ohri hapri. Got ohe danong ham ohe mengnong amram dimar patenmur. Ihat ma pati bap ihiroh eimat paten dasi ham ihat saptimur.   
\s1 Krais ohnong mahaw mat papti han ihir gin tarpat saptimur ritip ohe meng oh  
\p
\v 18 Nohe taptem brer gur mohnong dahenmur. Gin mong moh timbas hatinmat kakduup hat pat ma hapat dahenmur. Timbas hatinmat kakduup hat ma pat oh rih Kaput Krais ohnong mahaw matin han tit tarpatipramur ma ripti meng oh gin arpin ohnong mahaw mat papti han bap ihir ruumsan tarpam mama pati ohmur. Ihat ma pati oh dir wamara Gin mong timbas hatinmat kakduup hah ma hapat daham am haptimur.  
\v 19 Ama Krais ohnong mahaw mat papti bap ihir diradire mutuh amdapat orhor tarpam ihat saptimur. Diradire mutuhdapat tarpam sapti orhor diradire Krais ohe danong hat son ohe da oh tap da hat na pati ohoh ihan ihir dirnong namdam pirimur. Diradire Krais ohe danong hat son ohe da oh tap da hat patineng ihat na susa diradir tap hat patinengmur. Ihir ihat namdam piri ohoh ihan diradir tap da orhorwi hat na patim ihat piri ma hapat daham am haptimur.   
\p
\v 20 Gur mohnong dahenmur. Got orhe Yahsup oh arpin am hatin ohe da oh gure mutuhnong am nahatporhan gur arpin ohe danong am haptimur.  
\v 21 Gur arpin ohe danong am hat patio rim noh mama brak mat nasar ohmur. Gur arpin ohe danong hanhan hat patikin daham noh na nasarmur. Gur arpin ohe danong am hat patima er dasuh da oh arpin da ohe bokdapat na tarpapat ma hapat dahat patio rim noh mama brak mat nasar ohmur.   
\p
\v 22 Gur mohnong dahenmur. De han bap ihir dasuh hat saptio daham am hatper dahayahanoh Jisas ohnong Got oh dire namburin han na kis matip hanmur ma girit sapti han bap ihiroh eimat dasuh hat sapti han bap ihir ma hapat daham am henmur. Ama ihat mengripti han ihir mon ohnongsi; itap ohnongsi ihit tamannong Ihit na patimur daham Krais ohnong mahaw mat paptim ihat girit mengit sapti han bap ihirmur.  
\v 23 Mon ohnong Oh dire namburin han na nakis matip han ma hapat ma ripti han ihir itap orhorsihe tap hat na patim ihat mengripti han bap ihirmur. Mon orhornong Arpin itap orhor na kis matip han ma hapat ma ripti han ihiroh itap orhe tapnong hat patim giripti han bap ihirmur.   
\s1 Yahsup oh dire mutuh patim arpin dawi am nahapat ohe meng oh  
\p
\v 24 We. Gur amratin. Gure ma kopenat Krais ohe meng ma amram marin pati meng oh gapa ham mandapri. Kasip hat orhor marin paptenmur. Ihat kasip hat orhor marin ayahanoh ama ihat aya guroh itap Got ohsi; mon ohsi ihit tamansi guragur tap ham yah hat pateprimur.  
\v 25 Tap ham yah hat patim Krais orhe Noh ama ihat pati bap gurnong oh eimat yah hat paten dasi nahatipramur napor ma rit natip meng oh arpin dam timdipramur.   
\p
\v 26 Nohe brak mat nasar meng moh dasuh han ire wan danong nahatinmat ma dasuh nahapti han ire meng oh noh gurnong napotinmat mama brak mat nasar ohmur.  
\v 27 Noh gur ha am hatingwe rim mama meng moh brak mat nasar orhora; Krais oh Got ohe Yahsup oh gure mutuhnong namtiporhan Yahsup orhor am nahat napapat ohoh ihan gur am hat patimur. Gur am hat pati ohoh ihan nih Moh yahmur. Moh ermur napor am nahatiproh. Guragur am hat patimur. Yahsup oh gure mutuh patim ma am nahat napapat oh dasuh hat sashen ohe da oh na am nahapatmur. Arpin yah hat sashen ohe da ohwi am nahapatmur. Ihat am nahapat ohoh ihan orhe am nahapatru hat orhor Krais orhe tapnong hat patenmur.   
\s1 Got orhe brer hat pati ohe meng oh  
\p
\v 28 Norhe taptem brer gur Krais orhe tapnong ham yah hat patiru hat orhorwi patenmur. Dir ihat orhorwi ayahanoh orhe ma apris pitap hatipra dik oh dirhe kas ham na tirhitiprimur. Watahpei hat patimdapat orhor da yah ham wamtiprimur.  
\v 29 Gur Krais oh duung dasi hat pat hanwa dahat pati ohoh ihan ihat duung dasi hat ma sapti ihiroh Got orhe brer ham ihat sapti ma hapat daham am haptimur.   
\c 3  
\p
\v 1 Gur mohnong dahenmur. Han bana. Got orhe bopor nahat napapat da mohri isipnap nahat napapatmur. Isipnap nahat ma napapat ohe pe oh dirnong Gur norhe brermur naporpatmur. Imat ma naporpat oh dir arpin orhe brer hat patin Gur norhe brer gurmur naporpatmur. Dir ihat orhe brer ma hat pati oh kakdah han diradir kat han ma Got ohnong hanhan hat pati han ihiroh Got orhe pat danong hanhan hat pati ohoh ihan orhe brer hat pati dire ihat ma sapti danong ohsi hanhan hat patimur.   
\p
\v 2 Norhe yah han taptem bapa. Dir gin arpin Got ohe brer hat patimur. Ihat ma pati bap diroh dire komdapat ma indipri ohe da oh kopen pitap teinong na hat pat ohoh ihan dir hanhan hat patimur. Gin dire ma dahat pati oh Krais orhor apris pitap hatporhan dir pomat wamar am hama orhor hatin hat patepri ma hapat daham am hat patimur.  
\v 3 Orhor hatin hat patepri ma hapat daham ma minhan pati diroh Krais orhe danong ongeng mat papatru mat orhor dire dahe imat ongeng mat orhor pisapera daham ongeng mat orhorwi pisaya popriya mar papti bap dirmur.   
\p
\v 4 Gur mohnong dahenmur. Er hat ma sapti da oh Got orhe sawa mengnong amkar mandam ihat sapti ohoh ihan er hat ma sapti bap ihirhe Got orhe sawa mengnong amkar ihat sapti bap ihirmur.  
\v 5 Gur am hat patimur. Krais orhe bok oh er dahe timbasnap han ohmur. Ama han oh dire er da hat sapti da oh hirmat namdatinmat kakdah moh wandas pitap hatipmur.  
\v 6 Oh ihtin er dahe timbasnap han ohoh ihan orhe tapnong hat ma sapti han bap dirhe it er danong asohhe hatpera na daham kom asar sapti han bap dirmur. Ihat sapti ohoh ihan tit uh tit Noh er hat sapora daham er hat sapathanhe Krais orhornong na wamar hanhan hat patdapat ihat sapat han ma hapat daham am haptimur.   
\p
\v 7 Norhe taptem brer muk gur amratin. Dasuh han ihir apris er da teinong nahatinmat dasuh nahat apripri ohoh ihan gurhe potahat patenmur. Yah hatwi ma sapat han oh Krais orhe duung dasi hat ma pat da hatin hat pat han oh moh ma hapat dahenmur.  
\v 8 Er hat ma sapat han oh rih orhor er hat sasuhru hat sapat han Satan orhe brer hat patim ihat sapat ma hapat dahenmur. Ama er hat sapat han ohe er hat sapat danong amkar atimbas matinmat Got orhe brer oh kakdah moh wandas pitap hatipmur.  
\v 9 Got orhe brer hat ma pati diroh Got orhe yah hat pat ohe da oh dire mutuhnong naham napapat ohoh ihan ihat ma pati bap diroh er danong hat sasipera na daham er danong na hat sapti han bap dirmur. Got orhe brer hat pati ohoh ihan it er danong hat son ohe da hatin inahe ti na hat patimur.  
\v 10 Ihat pati ohoh ihan dir De han bap ihir Got orhe brer hat patio. De han bap ihir Satan ohe brer hat patio daham wamar am hatper dahayahanoh mama mihat pati bap ihirnong wamar dason mar am henmur. Yah hat duung dasi hat ma na sapti han bapo arwananah ihirnong da na apris na bopor deipti han bapo ama han bap ihir Got orhe brer hat na pati ma hapat. Satan ohe brer hat pati ma hapat daham am henmur.   
\s1 Arwananah ihirnong arpin da apris bopor deipti ohe meng oh  
\p
\v 11 Taptem guragur da gosapris bopor goshat patenmur ma ripti meng oh gur kopen Krais orhe danong haya tei orhor amrasheru ginhe mama amraptiru amraptimur.  
\v 12 Ihat ma da gosapris pati bap guroh rih Ken ohe ma hatip da hatinhe hapri. Ohe ma ihtip oh er han ohe hrepdapat hat patim ohoh ihan orhe arwap ohnong sutipmur. Ma sutip oh Got oh arwap ohnong orhe yah hat sapat ohe pe oh Yah hana por ma hapat. Nohnong norhe er hat sapat ohe pe oh Er hana napor ma hapat daham heisup mar arwap ohnong sutipmur.  
\v 13 Amaru hat orhor kakdah ohe danong hat ma pati bap ihirdapat gurnong yah hat sapti ohe pe oh dasei naham inahayahanhe gur Nuhurnong kianorim sa inahayao daham da trun darhetipri. Ken oh arwap ohnong na bopor mar ma imtip ohe tan mat nuhurnonghe inahaya ma hapat daham kimirinmur.   
\p
\v 14 Dir mohnong dahat patimur. Dir arwananah ihirnong da apris ma bopor mat papti da moh Got ohsi yah hat na patem er hat patepri ohe danong oh mandama orhorsi yah hat eimat paten ohe danong ham ihat sapti ma hapat daham am haptimur. Arwananah ihirnong da na apris na bopor mat papti bap ihiroh Got ohsi yah hat eimat paten da ohsi hat na patim ihat er hat sapti han bap ma hapat daham am hat patimur.  
\v 15 Arwananah ihirnong na bopor matin ina hat pati bap ihiroh Er moh suyarit ha haputinoh dahat ma pati bap ihirmur. Hanip suyarit ha haputinoh daham ma supti han bap ihir Got ohsi yah hat eimat paten dasi na hat patim ihaptimur. Ihan arwananah ihirnong na bopor deipti han ihirhe Got ohsi yah hat eimat paten dasi hat na patim ihat sapti han bap ma hapat daham am haptimur.   
\p
\v 16 Arwananah ihirnong da apris bopor deipti ohe da oh kinhat sa pat daham am hatper dahayahanhe Jisas Krais ohe namgitip danong moh daham am henmur. Ma namgitip oh oh Noh norhe danong na hatpor. Ire danong ham haputpora daham dire gwemat haputipmur. Orhe dire danong ham ma haputipru dirhe imat orhor arwananah ihirnong bopor mar papti ohe pe oh nuhurnong niyarit hapuriyahanhe yahwa daham ihirnong imat da apris bopor mat paptenmur.  
\v 17 Arwananah ihirnong imat na bopor mara go ihsen erer oh ruumsan patin orhor arwananah asoh ma hatip hat pati ire danong na ham na hinhina mara gorhe danongwi hat pathanoh Got orhe hanip dirnong bopor nahat napapat da oh gwe mutuh oh ti na pat ma hapat dahenmur.  
\v 18 Ihtin ohoh ihan nohe taptem brer gur atem teidapatwi Nuhur arwananah ihirnong da apris bopor mat paptimur rim be mengwihe girim patepri. Arpin panggeit paptimdapat girit mengrinmur.   
\s1 Hanip ihirnong bopor deipti ohe pe oh Got ohe kintei na kas hapti ohe meng oh  
\p
\v 19-20 Imat arwananah ihirnong da apris bopor mat paptihanoh ama ihapti guroh Nuhur Got orhe arpin da oh nure mutuh mahan patin ihat sapti ma hapat daham guragurnong am hatiprohemur. Daham am hat patimdapat Noh Got orhe kintei moh er hat pat sa ihtin da tit gure da tei apris hahhanoh gur Noh ihat pat han ma hapat dahamhe da er hapri. Guragur Nohe da tei apir danong mohwi Got oh na am hat pat ma hapat. Dire ma ihapti da oh gonsi am hat pat ma hapat. Ihat am hat pat ohoh ihan dire arwananah ihirnong da apris bopor mat papti da oh orhor am hat patim da yah ham amam hapat ma hapat daham da yah hat patenmur.   
\p
\v 21 Nohe bopor nahat napapat bap gur arwananah ihirnong imat da apris bopor mat paptin gure da tei oh Noh Got ohe kintei er hat pat sa dahatin ohe da oh ti na apripathanoh Nuhur Got orhe kintei yah hat pati ma hapat daham watahpei hat orhor orhornong dahamtiprohemur.  
\v 22 Dahamara Got orhe bopor mat papat dao orhe sawa mengo ohnong amram dindeipti ohoh ihan dire Got ohnong ma dahandeipti ohe erer oh gonsi napriporhan dariptimur.  
\v 23 Got orhe ma naporpat sawa meng oh mamaru hat patmur. Gur norhe mon Jisas Krais ohnong Oh arpin ihtin han hat pat ohoh ihan orhorwi inahatin hatin han ma hapat daham ohe danongwi hat patenmur. Ihat patim orhe Gur arwananah ihirnong da apris bopor mat paptenmur ma naporpatru hat orhor patenmur napor Got orhor imat sawa nasarpatmur.  
\v 24 Ama sawa nasarpat mengnong amram dindeipti han bap diroh Got orhorsi tap hat patimur. Ohdapathe dirsi tap hat patmur. Ihat Got ohsi tap hat ma pati da oh orhe napin pat Yahsup oh Gur ihat Got ohsi tap hat patimur napor am nahatporhan dir ohsi ihat pati ma hapat daham am haptimur.   
\c 4  
\s1 Dasuh dasi; arpin dasi dason mar am henmur ritip ohe meng oh  
\p
\v 1 Norhe bopor nahat napapat bap gur mameng mohnong amratinmur. Dasuh han bap ihirhe trun han bap tit Nuhur Got ohe mengsi napot apripti han bapmur napor dasuh nahat mong mong moh apriptimur. Dasuh han bap ihir ihat apripti ohoh ihan ihir Noh supsi hat pat han nohe mengnong moh amratinmur naporiyahanoh kapkap bupang rim amrapri. Gur Moh arpin Got orhe bokdapat tarpam apripat mengda da dasuh meng tit naporipti daham pomat samo ham am henmur.  
\v 2 Gur Maihir arpin Got orhe Yahsup ohe mengtei naporiptida da dasuh meng naporipti daham am hatpera dahayahanhe mihat dahenmur. Ama meng naporipti han bap ihir Jisas Krais oh arpin Got orhe patdapat wandas hanip diradir hatipmur girit mengripti ihir arpin Got orhe Yahsup ohsi patim meng naporipti ma hapat dahenmur.  
\v 3 Ihat na rima Es. Jisas ohe kakdahnong ma wanhup oh kakdah moh hanip ina na hatipmur riyahanoh ama ihat ripti han bap ihir Got orhe Yahsup ohsi na pati han bap ihir ihat mengripti ma hapat dahenmur. Ihtin ohoh ihan tit han tit ihat girit mengirhanoh gur Mama mihat mengir han moh Kaput Krais ohnong mahaw matin han tit tarpatipramur ritperhan gur amrapti meng oh gin mama han ohe bok moh tarpam gin pitap tei mama pat oh ma hapat daham am henmur.   
\p
\v 4 Norhe taptem brer muk gur Got orhorsi tap hat pati ohoh ihan ama dasuh han bap ihirnong gurdapat ambapte mat paptimur. Gure mutuh ma pat Got orhor kakdah ohe danong hat pati han bap maihirnong orhe kasipnap ohsi ihirnong ambapte mat papat ohoh ihan ama imat papat Got orhe kasip ohsi gur ihirnong ambapte mat paptimur.  
\v 5 Ama ihat dasuh nahapti han bap ihir kakdah morhe da hapti hrepdapat hat patim kakdah morhe mengwi napot napisaptimur. Napisaperhan kakdah morhe danong ma hat pati han ihir amratpera daham amraptimur.  
\v 6 Dirnong oh Got orhorsi tap hat patim meng pot pisapti ohoh ihan Got ohnong am hat pati han ihir dire ma poriya mengnong amraptimur. Got ohsi tap hat ma na pati han bap ihir kakdah ohe danong hat pati han ihir ohoh ihan Got ohsi tap hat pati han dire ma poriya mengnong oh ihir na amraptimur. Ama ihat dire meng amrapti ihiroh arpin dasi hat patim dire meng amrapti ma hapat. Ma na amrapti han ihiroh dasuh da ohe hrepdapat hat patim na amrapti ma hapat daham dason mar am haptimur.   
\s1 Got oh dirnong bopor nahat napapat ohe pe oh dir arwananah ihirnong bopor mat papti ohe meng oh  
\p
\v 7 Norhe bopor nahat napapat bap gur arwananah ihirnong da apris bopor deipti da oh Got orhe bokdapat tarpam dirnong imat bopor nahat napapat da ohoh ihan gurhe Got orhe dirnong bopor nahat napapatru mat orhor arwananah ihirnonghe imat orhor da apris bopor goshat patenmur. Imat ma da apris bopor mat papti ihir Got orhe brer hama orhornong am hat patim ihat sapti ma hapat dahenmur.  
\v 8 Hanip ihirnong da apris bopor deipti da gon oh Got orhorwi hat pat ohoh ihan hanip ihirnong da na apris na bopor mat papti han ihir Got orhornong hanhan hat patim ihat patimur.  
\v 9 Got oh dirnong da napris bopor nahat napapat ohe da oh orhe mon tit pokwi orhor ohnong Gin go wasa ire gwemat haputinmur. Haputporhan gwe ma hapur ohe dap tei oh ihir eimat yah hat paten da sa datipri por orhe mon tit pokwi orhor darhetipmur. Ma imtip oh orhe bopor nahat napapat da oh mon ohe boknongwi mar dirnong namgitipmur.  
\v 10 Ama mon ohnong Go ire gwemat haputinmur. Haputporhan noh gwe ma hapur ohe dap tei oh noh ire er hat sapti yan oh it yansi na mara eimat hanhan mar amdatipramur por mon ohnong darhetipmur. Ma darhetip oh orhe dirnong da napris bopor nahat napapat da oh mon orhe boknong mar namgitipmur. Ma namgitip oh dire arwananah ihirnong bopor matin da oh mihat pat ma hapat dahatin ohe da oh mon orhe boknong mar namgitipmur. Ma namgitip oh dire Got ohnong bopor deipti da hatin mat na namgitipmur. Bopor matin da oh morhe gon hat patmur rim mon orhe boknong mar dirnong namgitipmur. Namgitporhan dir wamara hanip ihirnong da apris bopor deipti da oh mihat pat ma hapat daham am haptimur.   
\p
\v 11 Norhe bopor nahat napapat gur dahenmur. Got oh dirnong imat bopor nahat napapat ohoh ihan dirhe hanip ihirnong imat orhor bopor mat paptepera daham imat orhorwi bopor mat paptenmur.  
\v 12 Dir Got ohnong na wandeipti han orhora; dir hanip ihirnong da apris bopor mat paptihanoh ama imat bopor mat papti ohe pe oh ama na wandeipti Got orhor dire da mutuh patim ihirnong da apris bopor mat papten ohe da oh dirnong isip mat orhor naprisa pei mat orhorwi napisapatmur.   
\p
\v 13 Gur mohnong dahenmur. Got orhe Yahsup ma napin pat ohe penong oh dir wamara Dir ohsi pati ma hapat. Orhor dirsi pat ma hapat daham am hat patimur.  
\v 14 Got oh orhe mon ohnong aw pe mong pe gonsi dirnong namburin han darhetporhan nuhur dam wamara gurnong Arpin oh dire namburin han nadarhetipmur napotperhan gur amram am haptimur.  
\v 15 Ihat am hapti Jisas oh arpin Got orhe brerwa daham riyahanoh ihat ma daham ripti han bap gure mutuh oh Got orhor patmur. Gurhe Got ohsi tap hat patimur.  
\v 16 Ihat orhorsi tap hat patim orhe bopor nahat napapat da oh dir wamar am hama arpin ama da ohsi inahat napisapatin dir ihat sapti ma hapat dahaptimur.  
\p Hanip ihirnong da apris bopor deipti da gon oh Got orhorwi hat patmur. Ihat pat han ohoh ihan hanip ihirnong da apris bopor deipti han dir orhorsi tap hat ayao oh dire tapnong hat ao hat patim diradir da gosapriptimur.  
\v 17 Orhorsi tap hat ma pati ohe pe oh orhornong da apris bopor mat papten da oh yahnap mar isip mat orhorwi pisaptimur. Isip mat pisusa kakdah moh patim orhor Krais ohe bopor nahat napapatru mat orhor bopor mat paptimur. Imat bopor mat paptim orhe dahanaham ma nasatipra dik oh orhe kintei oh dir na kas hatiprimur.  
\v 18 Ma kas hapti da ohe duuptei oh Norhe er hat sapat ohe pe yan oh noh batbet yan datipra sa daham kas haptimur. Ama ihat kas hapti danong oh Got orhor dirnong isip mat bopor nahat napapat da ohsi ama kas hapti danong amkar timbas mat pisaptimur. Imat timbas mat pisapti ohoh ihan orhe isip ma bopor nahat napapat dasi hat pati gure boknong oh kas timbas hat patimur. Ihat na patima Got oh dirnong inahatipra ma hapat daham kas hat patihanoh ama ihat kas hat pati ihir Got oh dirnong yah mat bopor nahat napapat ma hapat ihat ma pomat na dahapti ohe pe oh orhornong kas hat patimur.   
\p
\v 19 Da apris bopor deipti da oh Got orhordapatri dirnong bopor nahatporhan dirdapat it orhornong bopor deiya hanip ihirnong bopor deiya haptimur.  
\v 20 Ihan hanip dir Nohri Got ohnong da apris bopor mat papatmur giripti orhora; Got orhe nita bap kuuhan ihirnong da na apris na bopor mat paptihanoh ama giripti bap ihir dasuh hapti han bap ihirmur. Hanip wanggosham pati han bap diradir da na apris na bopor mat paptihanoh Got na wandeipti han ohnonghe atnap da na apris na bopor mat pati ma hapat daham Ama giripti bap ihir dasuh han baphe daham am henmur.  
\v 21 Ama dire na wandeipti Got orhor mama sawa meng moh Norhornong arpin bopor nahayahanoh norhe nita kuuhan ihirnonghe arpin bopor matiprohemur napor ama sawa meng oh natipmur.   
\c 5  
\s1 Kakdah mohe danong ambapte deipti ohe meng oh  
\p
\v 1 Gur mohnong dahenmur. Jisas ohnong Got orhor dirnong namburin han nadarhetip ma hapat dahapti han bap dir Got orhe brer hat patim ihat dahaptimur. Orhe brer hat patim ihat dahapti ohoh ihan itap orhornong da apris bopor deipti da hatin hat orhor orhe brer hat patim ihirnonghe imat da apris bopor deiptimur.  
\v 2 Gur Got ohnong da apris bopor mar orhe naporpat sawa meng oh gonsi amram dindeiyahanoh ama ihapti ohe pe oh Noh Got orhe nita ihirnonghe imat bopor mat papat ma hapat daham am haptimur.  
\v 3-4 Got orhornong da apris ma bopor deipti ohe da oh orhe naporpat sawa meng gonsi amram dindeipti da ohmur. Kakdah ohe danong ambapte matin ohe da oh Jisas ohnong Ohwi inahatin hatin hanwa ma dahapti ohe da ohmur. Got orhe brer hat pati dir ama da ohsi hat pati ohoh ihan ama da ohsi kakdah ohe danong ambapte deiptimur. Ama dasi hat pati ohoh ihan Got orhe sawa mengnong oh dimtin sawa meng hat pat sawa meng ohmur.  
\v 5 Kakdah mohe danong ambapte deipti han bap ihir de ihir dahayahanhe Jisas ohnong Got orhe brer darhetip hanwa ma dahapti han bap ihirwi kakdah mohe danong ambapte deipti han bap ma hapat dahenmur.   
\s1 Got oh orhe mon ohe boknong mar meng am nahapat ohe meng oh  
\p
\v 6 Ama Got orhe brerwa dahapti han Jisas Krais oh kakdah mama wandasa tom waso heim tandukero ma hatip ohe pe oh Arpin Got orhe brer ma hapat dahatin ohe da oh dirnong namgim ihtipmur. Ma ihtip oh tom ohwi na waihipmur. Tom ma waihip ohsi orhe heim ma tanduketip ohsi tap mat namgim ihtipmur. Ihtiporhan Got orhe Yahsup oh arpin da ohe duuptei han hat pat ohoh ihan Krais orhe ma ihtipnong oh arpin Got orhe brer hat patim ihtip ma hapat dahatin ohe da oh napor am nahapatmur.  
\v 7 Arpin Got orhe brermur dahatin ohe danong ma namgipat oh yitir damur.  
\v 8 Tit da oh orhe tom waihip ohe da ohmur. Tit da oh orhe heim tanduketip ohe da ohmur. Tit oh Got orhe Yahsup ma am nahapat ohe da ohmur. Ama yitir da ihiroh dirnong nitat da na am nahaptimur. Tit dawi hama Jisas oh Got orhe brermur dahatin ohe danongwi am nahaptimur.  
\v 9 Hanip ire naporiya meng oh dir amram arpin menghe dahaptimur. Hanip ire naporipti meng oh Got orhe naporpat meng hrepdapat hat pat ohoh ihan orhe mon ohe boknong mar naporpat meng moh atnap isip ma hapat daham amranmur.  
\v 10 Got orhe brer ohnong Ohwi inahatin hatin hanwa dahayahanhe ama ihat dahapti han gure da mutuhdapat orhor Got oh orhe mon ohe boknong mar naporpat meng moh Arpin ma hapat dahatin ohe da oh gure da mutuh oh pat haprohmur. Got orhe naporpat mengnong Arpinhe na dahapti han bap ihir Got orhe mon ohe boknong mar naporpat mengnong moh dasuh menghe dahapti ohoh ihan Got orhornong dasuh han hatin mat paptimur.  
\v 11 Got orhe ma naporpat meng oh mamaru hat patmur. Got norhor norhe brer ohe dap teidapat gurnong eimat yah hat paten dasi nahat napapatmur napor dirnong am nahapatmur.  
\v 12 Yah hat eimat paten da oh imat napin pat ohoh ihan mon orhe tapnong hat pati bap diroh yah hat eimat paten dasi hat pati bap dirmur. Mon orhe tapnong na hat pati bap ihiroh ama eimat yah hat paten dasi na hat pati bap ihirmur.   
\s1 Jon ohe pepe ma brak matip ohe meng oh  
\p
\v 13 Monhera. Nohe mama brak mat nasar moh Got orhe brer ohnong Ohwi ihtin han pat ma hapat ma dahapti gurnong brak mat mama nasar ohmur. Ma nasar oh gur Nuhur arpin eimat yah hat paten dasi hat pati ma hapat daham ha am hatingwe rim noh mama brak mat nasar ohmur.  
\v 14 Got orhornong dahamtinmat oh orhe Imtipora ma dahapat danong ohwi dir dahamtipera daham dahandeiyahanoh na kas ham Oh arpin inahatiprohwa daham watahpei ham orhe duupnong ham dahandeiptimur.  
\v 15 Imat ma dahandeiya ohe pe oh Arpin amrama gin ma dahandeiya han oh gin napir ma hapat dahaptimur.   
\p
\v 16 Got orhe nita bap guragur wandeiyaoh tit uh tit eimat batbet dar paten ohe hrepnong na matin ohe er da oh dat sapathanoh arwapir gur wamara Got oh ha ayah matinoh rim Got ohnong adahandeinmur. Adahamtiperhan ohe er hat sapat da oh dat amdama eimat paten dasi sa matiproh. Nohe gur imat adahandeinmur ma napor meng moh eimat batbet dar paten ohe hrepnong na matin ohe er hat sapti han ire adahandein ohe mengnong oh napormur. Eimat batbet dar paten ohe hrepnong nahatin ohe er da ohri patmur. Ama danong hat pati han ire ihat pati danong asohhe adahandeinmur na napormur.  
\v 17 Er hat ma sapti oh gonsi er dawi hat patmur. Ihtin orhor ti ma er hat sapti oh eimat batbet dar paten ohe hrepnong na nahatin ohe er danong hat saptimur.   
\p
\v 18 Dir am hat patimur. Got orhe brer ihir Nuhur er hat sapera daham er hat son ohe danong hat na saptimur. Got orhe kis mar napdap brer oh orhe hrepnong naham orhe damer ohe tan tare nahat napapat ohoh ihan Satan oh kinhat apris nambur napisus er da teinong nahatiproh. Oh dirnong na inahatin ina hat patmur.   
\p
\v 19 Dir am hat patimur. Kakdah moh ohe erer gon oh gonsi Satan ohe hrepnong mat papatmur. Papatmura; Got orhe brer hat pati dirnong oh Got orhor orhe hrepnong nahat napapatmur.   
\p
\v 20 Dir am hat patimur. Got orhe brer oh kakdah mama wandas patesuh ohe pe oh dire da nadapema arpin Got orhornong am hatin ohe da oh napdapmur. Napriporhan dir ohnong am haptimur. Am hapti orhe brer Jisas Krais ohsi tap hat ma pati oh Got orhorsi tap hat patimur. Ama ohsi ihat pati Got orhor arpin Got eimat paten dasi nahapat Got orhormur.   
\p
\v 21 Nohe taptem brer gur han apsup ihirnong kom asar eimat mandanmur.  
\p Gin Jon nohe meng oh kimur.