\id 1CO - Oksapmin NT [opm] -Papua New Guinea 1992 (web version -2014) 
\h 1 Korin 
\toc1 KORIN aptei han ihirnong Por oh kopenat brak mar atip ohe meng oh 
\toc2 1 Korin 
\toc3 1Ko 
\mt1 KORIN  
\mt2 aptei han ihirnong Por oh kopenat brak mar atip ohe meng oh  
\ip Mama meng rim ma brak matip oh Por oh Epesas ap mutuh amdapat patim Korin ap mutuh Hanipyah Jisas orhe nita hat pati bap ihirnong brak mar adarhetipmur. Ma adarhetip oh Akaia mong ohe winsi Korin ap mutuh pati ihirnong brak mar adarhetipmur.  
\ip Por oh rih ohri Korin ap mutuhnong susa ihirnong Jisas ohe danong hatin ohe meng ohri por am deisuhmur. Por am deipatdapat oh mandam wan apteinong saporhan ihir it er hat saperhan gahan oh Ihir mameng moh sama ire er hat sapti da oh mandama yah danong ha hatingwe rim mameng moh brak mar adarhetipmur.  
\c 1  
\p
\v 1-2 Noh Pormur. Por nohnong Got orhe damdapat orhor Go Jisas Krais ohe meng pot pisashen hanmur napor nohnong kis nahatip hanmur. Gin ihat kis nahat napapat han nohsi; Sostenes nuhut Gurhe sa yah hat pati napor Korin aptei Got orhe nita kuuhan gurnong brak mat mama nasariya ohmur. Got oh Maihir norhe gon han mat papat han bap ihirmur napor kis nahat napapat han bap gurnong oh Jisas Krais orhe dap teidapat yah hat sashen inasi nahat napapat han bap gurmur. Ama ihat Korin aptei pati han bap gursi; among among Jisas Krais orhe danong armi mar papti han bap ihirnongsi tap mat guragurnong brak mat mama nasariya ohmur. Jisas Krais oh iresi; diresi diradire Hanipyah tit pokwi hat pat hano rim brak mat mama nasariya ohmur.   
\p
\v 3 Noh diradire At Gotsi; diradire Hanipyah Jisas Krais ihitnong Gin gut taman gutagute damdapat orhor ihirnong imat yah matpera dahapti da ohsi; manap gosham yah hat paten da ohsi mat paptenmuro por noh gure paten meng oh nadahandeipatmur.   
\s1 Por oh Got ohnong weso porisuh ohe meng oh  
\p
\v 4 Got orhor Krais orhe dap teimdapat orhe da orhor yah matpora dahapat da oh gurnong yah mat orhor napripatmur. Oh imat yah mat orhor gurnong napripato rim noh dipwi weso porpatmur.  
\v 5-6 Nuhur Krais ohe meng oh gurnong napotperhan gur amrama gur ama danong oh ham kasip hat orhorwi saptimur. Ihat kasip hat saptin Got orhor orhornong am hen ohe dao orhe meng pot pisashen ohe dao ama ti yah da ti yah da oh napris bapkei nahat napapatmur.  
\v 7 Orhor imat napripat ohoh ihan orhe Yahsup ohe yah hat sashen ohe da ma napripat da oh na hatip hat patimur. Yah mat orhorwi ma napripat oh Ihir Krais orhornong mama da mohsi hat patim Jisas Krais oh sa pitap hatipra daham napriporhan dir ama napin pat da ohsi kasip ham minhan patimur.  
\v 8-9 Got oh Maihir norhe mon iraire Hanipyah Jisas Krais ohsi tap hat sa patepri napor kis nahat napapat han Got oh da na yawar deipat han Got ohoh ihan kasip ham yah hat paten dasi nahat napapatru napaptepramur. Imat kasip mat napapatin diradire Hanipyah Jisas Krais ohe ma pitap hatipra dik oh ihat yah hat patin ohoh dire boknong meng napotin meng oh ti na pat hatipramur. Gur ihat yah hat patio rim noh Got ohnong dipwi weso porpatmur.   
\s1 Got orhe nita ihir sakarap gosham katket tahatpa ohe meng oh  
\p
\v 10-12 Gur ihat yah hat pati orhora; Krowi ohe aptei han ihir aprisa nohnong Korin aptei sios ihir sakarap gosham kat ihir Nuhurri Por ohe meng amram dindeipti han nuhurmur. Kat ihir Nuhurri Aporos ohe han ham ohe mengnong amram dindeipti han nuhurmur. Kat ihir Nuhurri Pita ohe han ham Pita ohe mengnong amram dindeipti han nuhurmur. Kat ihir Nuhurri Krais orhe han ham ohe mengnong amram dindeipti han bap nuhurmur rim sakarap gosham inggoshaptimur napotirimur. Napotperhan noh amram da er hatirmur.  
\p Nohanhera. Noh Jisas Krais orhe mengtei meng naporpat ohoh ihan gin noh kasip mengtei napotiprohmur. Gure sakarap gosham katket tahat pati da oh mandama tit dawi hat patima Tit meng pokwi dimar paptepera daham tit dawi hat patenmur.  
\v 13 Dire napapat han Krais oh tit han pokwi ohoh ihan gur kin ham ohnong mandama kat han gurarhe haya kat han gurarhe haya hat pati. Ohnong imat na mandatin han ohoh. Gur Por oh nure er gap nahirmar irat bok sur garmatiri ma hapat daham ihaptida. Gur Noh Por ohe hanmur rim nohe win rim tom waihirida. Basra. Krais orhe win rim tom waihirimur.  
\v 14-15 Noh gurnong oh Krispassi Gaias ihitnongwi noh tom patitirmur. Ama yot han ihitnongwi tom patitir ohoh kat han ruumsan gurnong oh noh tom na napatitir ohoh ihan gurhe Nuhurnong Por oh tom napatitir ohoh ihan nuhur orhe hanmur na ritin ina hat patio rim noh amam hat patmur.  
\v 16 Noh ama yot han ihitsi; Stepanas ohe aptei han ihirnongsi tom patitirmur. Tithe tom patitirdo da timbaso oh noh hanhan hahmur.  
\v 17 Krais oh nohnong Go ihirnong tom patitin hanmur napor na nadarhetipmur. Nohnong ma nadarhetip oh Go ihirnong nohe yah meng moh porinmur napor nadarhetipmur. Nadarhetporhan noh dakuu han ire kakdah moh ohe dakuu meng napotporhan dakuu mengnong moh dimtipera daham dakuu han ire naporiya mengnong amram dindeiptiru mat gurnong imat na naporpatmur. Nohe ma naporpat oh irat bok ma sur gartahatip ohe meng oh hanip dire danong kasip nahapat mengo rim ohe meng oh amram ha dimtingwe rim kakdah moh ohe dakuu han ire dakuu meng ripti meng hatin mat gurnong na naporpatmur.   
\s1 Kakdah mohe dakuu danong Got orhe dakuu kasip hrepdapat mat papat ohe meng oh  
\p
\v 18 Krais ohe irat bok sur gartahatip ohe meng oh dakuu naham napanggeitin meng orhor eimat paten dasi na hatin inasi hat pati han ihir Mama meng moh er meng na napanggeitin meng ma hapat dahaptimur. Got oh eimat paten dasi naham nambur napapat dirnong oh irat bok sur gartahatip ohe meng oh Got orhe kasip ohsi yah nahapat ohe meng ma hapat dahaptimur.  
\v 19 Dakuu naham napanggeitin mengnong oh Moh dakuu na ham na napanggeitin meng ma hapat ma dahat pati ihiroh rih Got oh ritporhan ma brak matpa mengru hat pati bap ihirmur. Ritporhan ma brak matpa meng oh mamaru hat patmur.  
\q1 Got norhor ire kakdah ohe dakuu danong hat pati han ire danong oh da humat apaptepramur. Trun dasi hat sapti han ire dahe noh dat amdatipramur.  
\m ritporhan brak matpamur.  
\v 20 Orhor inahapat ohoh ihan kakdah mohe dakuu hat pati han ire mengo sawa mengnong isip am hat pati han ire mengo kakdah mohe mutuh mengnong daham aperipti han ire mengo oh dasi naham na napanggeitin mengwi deipatmur.   
\p
\v 21 Ma indeipat Got oh dakuu han ohoh ihan oh rih orhor Ihir ire kakdah morhe dakuu mengnong daham am hat sapti ohe pe oh norhornong na am haprimur. Jisas oh irat bok sur gartahatip ohe mengnong na dahatin menghe dahapti mengnong oh amram Arpin napanggeitin menghe dahayahan noh ama ihat gidahaya ihirnong amburipramur dahatipmur. Ama irat bok sur gartahatip mengnong oh nuhur pot pisaptimur.  
\v 22 Irat bok sur gartahatip mengnong na dahatin menghe daham ma mandapti oh Juda hat pati han ihir Nuhurnong hanip dire na imtin hatin da tit namgiritwi nuhur wandeipti am hama arpin ihat pat hanhe daham orhe danong hatper dahaptimur. Juda na hat pati han bap ihirhe Nuhurnong kakdah morhe dakuu mengwi naporiyarit nuhur Got ohe danong hatper dahaptimur.  
\v 23 Oh ire ma dahat sapti ohe meng ohmur. Nure ma Got ohe danong hat patim meng pot ma pisapti meng oh Krais orhe irat bok sur gartahatip meng ohwi pot pisaptimur. Imat pot pisaperhan Juda hat pati han bap ihir Moh er nahatin menghe daham dasei mar mandaptimur. Juda na hat pati bap ihirhe Moh na dahatin menghe daham garmar mandaptimur.  
\v 24 Ihir ihat dahat patimura; kat han Juda hat pati han bapo Juda na hat pati han bapo dirnong oh Got oh Gur norhe nita bap gurmur napor kis nahat napapat bap dirnong oh Krais ohe irat bok sur gartaham haputip ohe meng moh Got orhe kasip hat pat dao dakuu hat pat dao oh nuhurnong namgitip meng ma hapat daham am haptimur.  
\v 25 Kat han ihir Dire ma ripti mengnong moh dakuu meng riptimur. Got orhe irat bok sur gartahatip ohe mengnong ma ripti moh na dahatin meng riptimur dahaptimur. Ihat dahapti orhor Got ohe meng oh dakuu mengnap ohoh ihan kakdah ire dakuu mengmur ma ripti meng oh Got ohe na dahatin mengmur ma ripti ohe dakuu meng hrep dapat mat papatmur. Ihir Nuhur kasipmur. Got oh gap han hat patim irat bok sur garmar sutperhan haputipmur ripti orhor Got oh kasipnap han ohoh ihan ihir Nuhur kasip han bapmur ma ripti oh Got ohe kasip hrepnong mat papatmur.   
\p
\v 26 Nohanher kuuhan gur mohnong dahenmur. Got oh gurnong Gur norhe nita bap gurmur napor ma kis naham namburpat oh diradire Maihir dakuu han bapmur. Maihir han kasip bapmur. Maihir winsi han bapmur ma poripti han bap ihirnong oh Got oh tit han tit han mat amburpatmur. Ama ihtin dasi na hat patim be ma pati han bap dirnong oh ruumsan mat orhor namburpatmur.  
\v 27 Ire ma Maihir da timbas hat pati han bapmur ma naporipti han bap dirnong Got oh Norhe nitamur napor ma namburpat oh kakdah mohe dakuu han ihir Epe. Dakuu hat pati han dirnong kianorim sa na namburpat daham ihir da darher ha kas hatingwe rim imat da timbas hat pati dirnongri namburpatmur. Ire ma Maihir gapa hanmur ma naporipti han bap dirnong Got oh ma namburpat oh ihir Epe. Kasip han bap dirnong kianorim sa imat na namburpat daham da darher ha kas hatingwe rim imat gapa han dirnongri namburpatmur.  
\v 28 Amaru hat orhor ihir Maihir win timbas han ihirmur. Maihir borop han ihirmur. Maihir er hanmur ma naporipti dirnongri Got oh Gur norhe nitamur napor kis naham namburpat han dirmur. Imat ma namburpat oh ire Noh winsi hanmur. Noh ihtin hanmur ma ripti da oh ha timbas hatingwe rim be han dirnongri imat namburpatmur.  
\v 29 Imat win timbas han bap dirnong kis naham namburpat ohoh ihan dir kinhat Nuhur winsi han hat patin Got oh namburpatmuro daham armi tahatiprohe. Ihat na armi tahatin ina hat patimur.  
\v 30 Got orhordapat Gur norhe nitamur napor kis naham Jisas Krais ohe tapnong nahat napapatmur. Inahat napapatin dir Krais ohsi tap hat pati ohoh ihan Got oh dakuu da oh mon ohe boknong mat papatin dir wamar am haptimur. Dir wamar ma am hapti oh Krais orhe dap teimdapatwi er da hrep nang tatpat patin nang arpit namdao yah hat saperhan Gur yah hat sapti han bap gurmur napotin ohe dao ama da oh mon Krais orhe dap teidapatwi napapat ma hapat daham am haptimur.  
\v 31 Orhorwi inahapat ohoh ihan dir diradire kasip ohsi dir ihat patimur na ritiprohemur. Got orhordapatwi inahapatmur rim orhornongwi armi mar papteprohemur. Imat ma armi deipti oh Got oh ritporhan ma brak matpa mengru mat armi deiptimur. Ritporhan ma brak matpa oh mamaru hat patmur. Gur nohwi ihtin han hat patmur daham armi tahatper dahayahanhe Hanipyah orhorwi dirnong ihtin dasi nahat napapat hano rim orhornongwi armi mar paptenmur rim brak matpamur.   
\c 2  
\s1 Yahsup oh Por ohnong am mat papatin Por oh ihirnong meng porisuh ohe meng oh  
\p
\v 1 Nohanhera. Noh rih Got orhe reman paptesuh meng ma napot indip oh gur nohnong Moh dakuu han yah hat meng naporpat han ma hapat ha napotingwe rim noh gurnong meng napot na indipmur.  
\v 2 Nohe gurnong meng napot ma indip oh Noh sus ire mutuh ma indipra oh wan danong na hatiprawa. Jisas Krais ohe irat bok sur garmatperhan haputip ohe danongwi hat patdapat pot indiprawa daham noh gure patinong apris napot indipmur.  
\v 3 Nohe gurnong ma napot indip oh noh Norhe ina moh gapa hat pat ohoh ihan ihirnong meng oh pomat na potiprohkin daham kas ham ina bupat orhor gurnong meng naporisuhmur.  
\v 4 Imat ma napot indip oh Noh dakuu han ire dakuu meng yah mat napotperhan dakuu meng naporiya moh arpinnapkin ma dahaptiru ha hatingwe rim noh gurnong na napot indipmur. Nohe ma napot indip oh Yahsup ohe kasip oh arpinhe dahatin ohe da oh namgitporhan arpinhe ha dahatingwe rim ama orhe kasip da ohsi gurnong napot indipmur.  
\v 5 Got orhe kasip oh namgit napapat ohe pe oh arpinhe ha dahatingwe rim noh gurnong imat napot indipmur.   
\s1 Got orhe Yahsup oh Got orhe da oh namgim am nahat napapat ohe meng oh  
\p
\v 6 Noh dakuu meng hatin mat na naporpat orhora; dakuu meng naporpatmur. Dakuu meng ma naporpat oh kakdah morhe dakuu han ire ripti dakuu mengo kakdah mohe kakhan timbas hatin han ire mengo ama ihtin dakuu meng oh na naporpatmur. Got orhe meng oh dakuu meng ohoh ihan Got orhe dakuu yah meng orhorwi Got ohe danong hatin ohe da oh hanip yah hatin hat pati han bap gurnongwi naporpatmur.  
\v 7 Got orhe dakuu yah meng ma naporpat oh rih orhor mong na darpat patin orhor Kaput noh ihirnong mimat yah da apris pitap matiprawa daham reman paptesuh dakuu meng orhor naporpatmur.  
\v 8 Ama reman paptesuh dakuu mengnong kakhan ihirhe wamtinnong oh wamtipa orhora; dahatinnong oh na dahatpamur. Ihir dahatpaneng diradire Hanipyah yahnap dasi hat pat han ohnong na sutpanengmur. Na dahatpa ohoh ihan ohnong sutpamur.  
\v 9-10 Ihir ihat na dahatpamur. Dirnong oh Got orhor orhe Yahsupnong Go sus ihirnong pinggim am matinmur potporhan oh dirnong namgim am nahapatmur. Ama reman paptesuh meng ma namgipat oh rih mamaru mat ritporhan brak matpamur.  
\q1 Got oh Kaput norhornong bopor nahat napapti ihirnong oh mama yah da moh apripramur daham mamen mat paptesuh da oh kin na wandeiya nat tem na amraya damdapat na dahaya hapti ohe da ohmur.  
\m ritporhan brak matpamur. Yahsup ohe ma namgipat oh orhor Got ohe dahapat da musum dus treman pat dao ama erer da wamara dirnong namgim am nahapatmur.  
\v 11 Hanip dir tit han ohe da asoh wamar am hat patida. Basra. Ama han orhe damdapat orhor orhe danong am hat patmur. Ama ihat patru hat orhor dir Got orhe pat da oh na am hat patimur. Orhe Yahsup orhordapatwi am hat patmur. Am hat patdapat Got orhe da oh dirnong namgim am nahapatmur.  
\v 12 Dir ihat pati ohoh ihan hanip dire Got ohe danong ma am hapti oh kakdah mohe hanip diradire dahapti da ohsi Got orhe danong na am haptimur. Got oh orhe Yahsup ohnong Go norhe damdapat ihirnong be apripat yah da moh ihirnong pinggim am matinmur por darhetporhan orhe Yahsup oh apris dirnong ama da oh namgim am nahapatmur.  
\v 13 Orhor imat namgim am nahapat ohoh ihan dir kakdah mohe dakuu hat sapti da ohsi Got ohe danong namgim am nahatporhan dir Got oh ihat pat hanmur poriptida. Basra. Got orhe Yahsup oh namgim am nahatporhan orhe namgipat ohe da meng oh Yahsup oh ire da mutuh ma patisi han ihirnong pomat por am deiptimur.  
\v 14 Yahsup oh ire mutuhnong na patisi ihiroh orhe namgim am nahapat meng moh ihir amram na datin ina hat patimur. Ihat na datin ina hat pati ohoh ihan Moh da timbas na dahatin meng tit naporiya ma hapat dahaptimur. Yahsup ohe namgim am nahapat da oh orhorwi am nahatporhan am hapti ohoh ihan Yahsup oh ire mutuh ti na patisi han ihiroh dahatinheri na dahaptimur.  
\v 15 Yahsup oh dire mutuh patisi han bap diroh Yahsup orhor patin oh erer oh dir sama am haptimur. Ihat pati han dirnonghe be han ihirdapat dirnong nasam Maihir ihtin han bap hat patihe daham nasatiproheda. Basra. Imat na nasatiprohemur.  
\v 16 Ihir imat na nasatin hatin hat patimur ritporhan ma brak matpa meng oh mamaru hat patmur.  
\q1 Kakdah mama pati han dir Hanipyah orhe danong awamar Gin go mihat sonmur. Mihat patenmur por sawa atiproheda. Basra. Dir ohe danong am ham imat potin oh timbasnapmur.  
\m ritporhan brak matpamur. Ohe danong am hatin oh na hat pati orhor dir Krais ohe dahapat da oh dirsi pat ohoh ihan dir ohnong am hat patimur.   
\c 3  
\s1 Got orhe atamreipti han nuhur tap da hat patim atamreiptimur ritip ohe meng oh  
\p
\v 1 Nohe taptem bapa. Dir Krais ohe danong am hat pati orhor noh rih apris gurnong meng ma am nahatip oh gur Krais ohe danong hatin ohe da oh brer ire kopen potahat na dahat pati da hatin hat patin noh hanip ihir ire mutuh Yahsup oh patin meng ma poriptiru mat na napot indipmur. Kakdah morhe dasi hat patin ma ihirnong meng por am deiptiru mat orhor meng napot indipmur.  
\v 2 Gurnong imat ma meng napot indip oh gur brer brip ire ga na marhum patim kasip dennong na din ina hat patim non danongwi hat patiru hat patin noh mandap pe dahatin meng ohri napot indipmur. Mutuh ohe meng ohri na napot indipmur. Gin ma patihe kakdah han ire dahat sapti da hatin hat pati ohoh ihan gur kom dah ohe meng oh kopen na dahatin inasi hat orhor patimur.  
\v 3-4 Gur kakdah han ire dahat sapti da hatin hat patimur ma napor meng oh mamarumur. Gur kat han ihiroh Nuhurri Por ohe han hat patim ohe mengnong amram dindeipti han nuhurmur. Kat han ihir Es. Nuhurri Aporos ohe han hat patim ohe mengnong amram dindeipti han nuhurmur rim ma sakarap gosham heisup goshapti oh kakdah morhe danong hat patim ma ihat sapti han ire da hatin hat patim ihat sapti basda. Gur kakdah morhe danong hat patim ihat sapti han ire da hatin hat patim ihat sakarap goshat saptimur.   
\p
\v 5 Gur mohnong dahenmur. Aporos nuhut winsi han yot hat patin gur nuhutnong ginaporiptida. Basra. Nutarhe be Krais orhe atamreipti han yot hat patimur. Nute ma ihat pati oh Aporos ohe atamreindin orhe apin patmura; nohe atamreindin orhe napin patmur.  
\v 6 Nohe orhe atamreindin napin patin ma atamreipat oh irat gwe sakdeipti ohe tan mat gure mutuh oh meng oh napot napisasuhmur. Aporos ohnong ohe atamreindin apin patin ma atamrein sapat oh irat yah hat ha maronoh rim unuh ahaptiru mat orhor oh meng napot napisapatmur. Nuhut ihat be atamreipti han yotmur. Pamras dam matin han oh tit han Got orhorwimur.  
\v 7 Irat gwe pamras dam deipat han oh Got orhor pokwi indeipat ohoh ihan irat gwe ma sakmat pisapat hansi unuh ahat pisapat hansi nutarhe win timbas be han yot ihat atamrein saptimur. Pamras ma dam deipat han Got orhorwi winsi kasipnap hat pat hanmur.  
\v 8 Got orhorwi winsi han hat pat ohoh ihan irat gwe ohe tan mat sakmat pisapat han nohsi; unuh ohe tan mat ahat pisapat han ohsi nuhut tap da han yot be Got orhe atamreipti han yot nuhutmur. Ama tap atamreipti han yot nute yan ma datipri oh nuranure atamreipti ohe kis yan orhorwi datiprimur.  
\v 9 Gur Got orhe tohan pa ru hatin hat patin nuhut tap han ohe tap rang gure mutuh atamreipti han yot nuhutmur.   
\s1 Got ohe han bap dir ap hapti han bap hatin hat pati ohe meng oh  
\p
\v 10 Guragure apnong dahenmur. Gur Got orhe ap hatin han bap hat patimur. Gur Got orhe ap hatin hat ma pati oh Got orhe damdapat orhor nohnong ap hatin ina dasi nahatporhan noh pohon ap yah mat ma hapti han ire da hatin ham ap mun nanip kis mar itip ohe tan mat meng dup mar napotipmur. Noh imat meng duup mar napotporhan tit han oh apris ama ohe mun kamen tei oh tam gonopti ohe tan mat meng naporpatmur. Ap yah mat hapti han ire er mat hatipririm orhe kamen tei orhorwi pomat ma haptiru mat orhor Got ohe meng poripti han nuhurhe wan meng potipririm orhe napotip meng orhorwi pomat potpera daham porinmur.  
\v 11 Ap mun kamen ma kis mar itip kamen oh Got oh Krais orhe dap tei mamdapatwi amburipramur rim orhornong ap mun kamen ohe tan kis mat itipmur. Imat orhornong kamen matip ohoh ihan orhe dap teidapatwi hat patim meng porinmur. Wan kamen tit sara meng ohe dap teidapat potin menghe timbasnapmur.   
\p
\v 12 Ama kamen tei ma pati dir kat diroh kasip ap tam gor kweio sirpa kweio yahnap mani isip sar mohopti hano ama kasip tam ohsi hapti hatin hat pati kuuhan dirmur. Kat dir tit gapa ap tam irato bur tamo kon tamo dar ap tam gonom hapti ohe tan hat pati bap dirmur.  
\v 13 Dir ihat patim ma atamreipti da oh kaput pepe dik Krais ohe apris nasatipra dik oh pitap teinong matporhan wamar am hatiprimur. Wamar ma am hatipri oh ap andotperhan gapa tam oh gonsi timbas hatporhan kasip kwei tam oh patin wamar ma am haptiru Krais oh apris imat ap ohe tan nandora nasatporhan diradire ma atamreipti da oh wamar am hatiprimur.  
\v 14 Imat nandor ma nasatipra oh orhe kasip ohsi atamreim ma sashe han ihir orhe kasip oh na taur pat hatipramur. Pat hatporhan yah hat natamreisuh han ma hapat daham ama ohe yah yan oh napripramur.  
\v 15 Nandotporhan timbas hahhanhe Moh yah hat na natamreisuh han ma hapat daham yah yan oh na napripramur. Yah yan oh na napripra orhora; hanip orhornong oh eimat paten dasi hat pat han ohoh ihan ayapok tautiporhan amburipti ohe tan mat it nambutipramur.   
\s1 Hanip diradir Got orhe ap yawar hatin hat pati ohe meng oh  
\p
\v 16 Gur mohnong dahat pati basda. Guragure ina bok oh Got orhe ap yawar hatin hat pati ohoh ihan orhe Yahsup oh gure mutuh patmur.  
\v 17 Got orhe ap yawar oh Norhe gon apmur rim orhor ongeng mat papat ap oh hanip bap guragurmur. Ihat Got orhe ap yawar hatin hat pati bap gurnong er mar abisei deiyahanhe ama abisei deiya han ihirnonghe Got orhordapat Norhe ongeng mat papat ap yawarnong moh nabisei deiya ma hapat daham ama indeiya han ihirnonghe sum timbas matipramur.   
\s1 Kakdah mohe dakuu danong armi tahapri ritip ohe meng oh  
\p
\v 18 We. Gur Noh kakdah mohe dakuu da ohsi hat patim noh dakuu hat pat hanmur rim guragure danong dasuh mat pisasipri. Arpin dakuu han hatpor dahayahanhe imat ma dahaya guroh kakdah han ire Moh dakuu damur ma ripti danong oh mandama Got orhe dakuu danong oh kakdah han ihir Moh da timbas damur ma ripti hrepnong hat patenmur.  
\v 19 Kakdah han maire Moh dakuu damur ma ripti danong oh Got ohe dahapat oh Moh da ban taham da hut sapti da ohmur dahapatmur. Orhe ma ihat dahapat da oh orhor ritporhan ma brak matpa meng oh mamaru hat patmur. Kakdah maihir Nuhur dakuu dasi hat sapti han bapmur ma ripti han bap ihirnong iraire Moh dakuu damur ma ripti da ohsi pramat pisus ambir temnong mar mandapatmur ritporhan brak matpamur.  
\v 20 Tit meng ritporhan ma brak matpa oh mamaru hat patmur. Hanipyah oh kakdah mohe dakuu hat ma sapti han ire danong awandeioh ihir dam na tarpatin ohe danongwi ihat sapti ma hapat dahat patmur ritporhan brak matpamur.  
\v 21 Kakdah mohe dakuu da oh ihat pat ohoh ihan gure Noh dakuu han Aporos ohe hrepdapat hat pat hanmur. Noh dakuu han Por ohe hrepdapat hat pat hanmur rim armi tahatin dahe timbasnapmur. Gur Noh mama dakuu han ohe hrepdapat hat pat ohe pe oh noh erer ruumsansi han hat pat ma hapat dahapri.  
\v 22-23 Gur Got orhe brer Jisas Krais ohe han hat pati ohoh ihan Por noho Aporos oho Pita oho nuhur guragurnong napanggeitin han titwi hat pati han muk nuhurmur. Kakdah mohe yah erero hapur sus eimat yah hat patepri dao gin mama pati yah dao komdapat ma aprisipra yah dao erer oh guragure napanggeitin han titwi hat patimur.   
\c 4  
\s1 Hanipyah orhor orhe atamreipti han ihirnong sapat ohe meng oh  
\p
\v 1 Gur nuhurnong Ihir kinhat pati han bap sa daham am hatper dahayahanoh mamaru mat dahenmur. Ihir Krais orhe atamreipti han bap ihir ma hapat. Ihir Got orhe reman paptesuh meng oh pot pisapti han bap ma hapat dahenmur.  
\v 2 Hanip dir tit han ohe atamreindin tit atamreiyahanoh de ohe danong ohri ham atamreiyahanoh Moh yah hat natamreipat han ma hapat dahatiproh. Orhe porpat meng orhorwi hat atamreiyahanoh Go norhe yah hat natamreipat hanmur porpatmur.  
\v 3 Be han ihirdapat Go ihat atamreipat hanmur na poriptimur. Ama Go nohe natamreindin por ma wamat papti han irairdapatwi Go yah hat natamreipat hanhe. Go er hat natamreipat hanhe poriptimur. Ihat pati ohoh ihan kakdah han diradir gurdapat nohnong Go er hat atamreipat hanhe napor ma nohnong nasapti oh noh na dahapatmur. Nohhe norhe da oh Go er hat atamreipat hanmur. Go yah hat atamreipat hanmur daham norhornong oh noh na saprohmur.  
\v 4 Noh norhe damdapat Noh Got orhe atamreindin oh yah hat atamreipat hanmur dahat pat orhor norhordapat noh yah hat atamreipat han sa daham norhor na am haprohmur. Orhordapatwi Go ihat pat hanmur nasam napotporhan noh ihat pat han sa daham norhor am haprohmur.  
\v 5 Got orhordapatwi imat nasapat han ohoh ihan Hanipyah orhor apris nasatin dik oh kopen na apin patin orhor hanip gurdapat Moh yah hat atamreipat hanhe. Moh er hat atamreipat hanhe daham orhe atamreipti han nuhurnong nasapri. Orhorwi apris hanip diradire pohon ma ihat pati da oh gonsi gon mong da teinong mar pitap matporhan wamar am hatiprimur. Wamar am hatperhan Got oh diradire ma ihat pateshe ohe amam oh napripramur.   
\s1 Korin aptei sios ihir iraire danong ham armi tahat saptin Por oh meng potip ohe meng oh  
\p
\v 6 Nohe taptem gurnong ma napor meng moh Got orhe atamreipti han yot Aporos nutanute ma atamreipti boknong mar napormur. Ma napor oh gur Dir dire Got ohe atamreipti han bap ihirnong ma sapti oh Got orhe Gur mimat hanip satinmur napor ma brak matip mengnong amkar mandama hanip diradire dahapti da ohsi hanipnong imat sapti ma hapat ha dahatingwe rim noh mama meng moh nutanute boknong mar meng oh napormur. Ihan gur hanipnonghe sama Moh winsi han pathe ihan noh ohe hrepnong hatiprohmur. Moh win timbas hat pat hanhe ihan noh ohe hrepnong na hatiprohmur gosham hanipnonghe sam armi tahat sasipri.  
\v 7 Gur winsi han bap hat patihanhe guragure dahapti ohe pe oh winsi han bap hat patida. Basra. Got orhorwi ihtin da napriporhan ihat patimur. Orhorwi ihtin da napin patin ihat pati ohoh ihan kinhat Norhe da orhor ihat pat hanmur daham armi tahat sasiprohe. Orhorwi imat napin pat han ohoh ihan na armi tahaprohemur.   
\p
\v 8 Gur Nuhurri yah hat indin ohe danong oh isip ham teip hat orhorwi patimur. Nuhurri kamah han hat patimur. Nuhurri nure kakhan hat ma pati oh Poro ire naporipti ohe pe oh na ihat patimur. Nuranure daham ma ihat pati ohe pe oh kakhan hat patimur rim gur ihat armi tahat patimur. Epe. Gur ihat pati han bapda. Gur kakhan bap ha hatingwe dahapatmur. Gur ihat kakhan bap hatperhan nohhe diradir tap hat kakhan hatper dahapatmur.  
\v 9 Dir kakhan bap hatin ina hat pati han bapda. Basra. Nohe da oh Aposer nuhur ihtin han bap hat na pati ma hapat dahat patmur. Nuhurnong oh Got oh komnap han bap nahat napapat han bapmur. Imat kom han bap nahat napapatin mahaw han ihir apris hanip ambura ihirnong sutinmat ambur pisus hanip ire kintei dasei maro tumbe gut asaro deipti han bap hatin hat pati han bap nuhurmur. Ihat ma pati oh enser ire kinteio kuuhan ire kinteio ama ire kintei ihat patin inahapti han bap nuhurmur.  
\v 10 Ihat ma pati aposer bap nuhurnong kuuhan ihir Maihir Krais ohe danong hat patim ihat ma sapti oh da timbas hat patim ihat sapti han bapmur naporiptimur. Gure ma dahapti danong oh Nuhur Krais orhe tapnong hat patim dakuu dasi hat pati han bapmur riptimur. Nuhurnong Ihir kasip timbas han hat patimur naporiptimur. Gure ma dahapti danong oh Nuhur kasip hat pati han bapmur guragur giriptimur. Nuhurnong Maihir win timbas hat pati bap gurmur napor dasei nahaptimur. Guragure ma dahapti danong oh Nuhur winsi han bap hat patimur dahaptimur.  
\v 11 Aposor nuhurri gure guragure boknong ma dahaptiru hat na patimur. Nuhurri rih kopenat ma tamreisheru gin mama tamreiptihe pahohsi hat tamreiyao tom dinsi hat tamreiyao watah andin oh hatip hat patim tamreiyao nuranure tongnom yah hat indin teihe timbas hat patim tamreiyao ihat tamrein saptin ihir nuhurnong bessi nim er nahat napisaptimur.  
\v 12 Nure ma ihat sapti oh nuranure bes tei ma batbet dar tamrein sapti ohe pe ohwi den daptimur. Nuhur ihat yah hat saptin ihirdapat nuhurnong dasei meng napor inahayahanhe nuhurdapathe it yansi na mar Got ohnongwi Got go ihirnong bapkei mar paptenmur por ire paten meng oh adahandeiptimur. Ihirdapat nuhurnong ina ruum napriperhan nuhur it yansi na mar kasip ham kimirit patimur.  
\v 13 Ihirdapat nure sang rim inahat saptihanhe nuhurdapat it ire sang na rima nuhur yah meng katdapatwi poriptimur. Ihat ma pati aposor bap nuhurnong oh yar amo kumet amo oh ero rim tapan andur mandapti ohe tan nahat kuuhan bap gonsi ihir nuhurnong inahat napapti han bap nuhurmur.   
\s1 Por oh Noh gure ita hat pat ohoh ihan gur norhe dahat sapat da hatin hat sashenmur potip ohe meng oh  
\p
\v 14 Nohe taptem bapa. Noh gurnong aposer nure ma ihat pati meng moh gur amrama ha kas hatingwe rim brak mat na nasarmur. Noh bopor mat papti brer ihirnong ma sawa asaripitru mat orhor norhe bopor nahat napapat brer gurnonghe imat orhor sawa nasar mama brak mat nasar ohmur.  
\v 15 Gurnong Norhe bopor nahat napapat brer gurmur ma napor meng moh gurnong wanahat napapti han ihir trun trun patihanhe trun han ihir gurnong napapti orhora; gure napapat han ita oh tit han noh pokwimur. Noh Krais ohe yah meng oh napotporhan gur ama naporpat ohe pe oh Krais ohe tapnong hat patio rim ihan noh gure ita titwi hat patmur mama napor ohmur.  
\v 16 Noh ihat gure ita hat pato rim kasip mengtei Gur ita norhe ihat sapat danong mohwi dimar sashenmur mama naporpat ohmur.  
\v 17 Ita nohe ihat sapat danong mohwi dimar ha sashengwe rim noh Timoti ohnong mama nadarher ohmur. Norhe bopor mat papat han Hanipyah orhe atamreindin oh kasip ham yah hat orhorwi atamreipat han ohnong mama nadarher ohmur. Gin oh gure pati tei oh aprisa nohe Krais orhe tapnong hat patim ma ihat pat meng oh oh aprisa gurnong Por oh Krais ohe danong hat patim ihat atamrein sapat hanmura; ihat pat hanmura sa napotipra. Noh Krais ohe tapnong hat patim ma ihat pat da oh noh aptei aptei oh susa sios bap ihir gur ihat patenmur ihat patenmur ma porpat mengru hat orhor norhe dahe ihat orhorwi patmur.   
\p
\v 18 Sios bap guragur kat han ihir Por oh ihat wanaham na apriprakin daham iraire danong ham Nuhurwi ihat sios ire wamat paten han hat patiwa daham armi tahat saptimur.  
\v 19 Ihir Por oh wanaham na apriprakin dahapti orhora; basra noh aprin ina hat pat ohoh ihan han Hanipyah orhor Gin go sona naporhanhe noh arpin kapkap orhor wanaham apripramur. Aprisa ama Nuhurwi ihtin han bap hat patimur ma ripti han ihirnong wamara arpin Got ohe kasipsi ihat pati bapdo da atem teidapatwi giripti bapo rim noh ire danong adason mar wamar am hatipramur.   
\p
\v 20 Gur mohnong dahenmur. Got orhe napapat hrepnong hat pati ma hapat ma daham am hapti oh be atem teidapatwi Noh ihtin han hat patmur ma ripti ohe pe oh basmur. Got orhe arpin kasip ohsi ihat patim ma ihat sapti ohe pe oh arpin orhe napapat hrepnong hat pati ma hapat daham am haptimur.  
\v 21 Gure ihat ma sapti da oh mandama yah hat ha sashengwe rim noh mama brak mat nasar ohmur. Gin guragure dawimur. Gur meng oh na amram ihat orhor ayahanoh noh apris brer ihirnong da adason deipti ohe tan kapor nasar da nadason matipramur. Matipramura; gur ihat ma pati da oh mandama yah hatwi ayahanoh noh apris nohhe da yah ham manap dasi ham meng napotipramur.   
\c 5  
\s1 Por oh er hat sapat han ohnong orhe wan teinong mat mandatinmur ritip ohe meng oh  
\p
\v 1 Ire ritperhan noh ma amrapat oh Korin aptei pati sios ire mutuh oh tit han tit itap inap uhnong bisei saw adeipatmur ritperhan noh amrapatmur. Epe. Mihat isip ma er hat sapti moh Got ohe danong na hat pati han ihir Mihat sayahan ermur ma ripti da moh Got orhe danong hat sapti han gur kinham ihapti.  
\v 2 Gure mutuh oh isip er hat patim orhor Nuhur yah hat saptimur rim guragure inanong armi tahat saptimur. Guragure Nuhur yah hat patiwa daham guragure danong ham armi tahat sapti da ohri mandanmur. Mandama Nuhur ohsi tap hat ma pati oh er hat sa pati daham da er hama Mohri nuhur tap hat na indiprohemur daham ama ihat pat han orhe teinong mar mandanmur.  
\v 3 Noh gursi tap tei na pat orhora; danong oh gursi tap hat patmur. Nohe da oh gursi tap hat patim nohe ma dahapat oh Gure mutuh ma er hat pat han ohnong oh gur mamaru mat da adason matinmur.  
\v 4 Da ma adason matipri oh Gur diradire Hanipyah Jisas orhe mengtei tap tei hatinmur. Tap tei hapti gur Dir Por ohe dahe dirsi tap hat pat ma hapat. Diradire Hanipyah Jisas ohe kasip ohhe dirsi tap hat napapat ma hapat dahama ama kasip ohsi ama er hat pat han ohnong mamaru matinmur.  
\v 5 Gur Nuhur mama han ohnong Satan ohe bes teinong matper. Deiyarit Satan oh da adason mar ohe boknong batbet apriporhan oh Nohnong er teinong moh nahat napapatin noh batbet moh darpat sa daham Gin norhe er hat pat da moh mandatpora daham ha mandatinohmur. Mandatporhan diradire Hanipyah ohe apris dahanaham nasatipra dik oh ama ihat pat han ohnongsi diradirnong tap mat sa nambutipra daham imat mandatinmur.   
\s1 Korin aptei sios gure mutuh oh er hat sapat han tit pathanhe wan teinong mat mandatinmur potip ohe meng oh  
\p
\v 6 Gur Nuhur yah hatwi sapti ma hapat daham armi tahat sapti danong ohri hapri. Bretnong pipirpat han yis ohnong dahenmur. Yis oh gar saripti orhora; bret gonsi isip deipat hanmur. Yis gar ma isip hat sapatru hat orhor gure mutuh oh mama er hat pat han oh Gar er hat patmur ma poripti han oh pa sahapo yiso ire tan isip ham mutuh sus er hat sapat han ohnong giporiptimur.  
\v 7 Gure mutuh oh er da oh yis ohe tan isip hat saprarim ama ihat isip hatin ina hat pat da ohri mandatinmur. Mandapti Pasopa diko rim bret yis timbas ma daptiru mat orhor er danong mandama potahat orhor ongeng tahat patenmur. Rih sipsip bap sutperhan heim ap bok pato rim ma einggahatip oh oh sipsip orhormur. Gin dirnong namburin han sipsip bap hatin hat patin ma sutiri han oh Krais ohmur. Gin Krais ohnong sutperhan dire gwemat hapura dirnong namburpat han hat pato rim er danong mandama ongeng tahat patenmur.  
\v 8 Ongeng tahat patim ihir sipsip bap suma dirnong napanggeim yah nahatin han sipsip bap suya ma hapat daham am ham den dasheru hat orhor gin dirhe dirnong nambur napapten han sutpa sa daham ohe danongwi ham amam hat orhor patenmur. Amam hat ma patepri oh ihir rihohe yisnong ma dar mandasheru mat orhor gin gurhe er hat sapti er danong oh kom asar mandama arpin dasi ham ongeng tahat paten danong orhorwi hat patim amam hat patenmur.   
\p
\v 9 Noh rih tit brak mar ma nadarhetir oh Gur ama bisei saw hapti han ihirsihe tap hat patepri. Gurarhe teinong orhe hat patenmur napor nadarhetirmur.  
\v 10 Noh Gur ihtin han ihirsi patepri ma napotir oh Got ohe nita hat na patim kakdah mama pati han ire tapnong hathe patepri na napotirmur. Ama ihat bisei saw hat sayao Nohwi erer ruumsansi han hat patneng dahayao erer mohotpero rim ma mohoya mani oh kat pe tit be adariyao dasuh got ire danong hayao hapti er han bap ihir mong mong moh gonsi pati ohoh ihan de mong oh ihir na pati tei oh sus indinmur napotiproh. Mong mong moh ihirwi hat pati ohoh ihan ihirsihe tap hat patepri na napotirmur.  
\v 11 Nohe ihirsi patepri ma napotir oh guragur kat han ihir Nuhur Got ohe nitamur ripti it er danong hat ma sapti ihirsi tap hat patepri napotirmur. Ma napotir oh ihir it bisei saw hat sayao Nohwi erer ruumsansi hat patneng dahayao dasuh got ire danong hayao dasuh ham er meng ritin danongwi hat sayao er tom dam da ban tahat sayao erer mohotpero rim ma mohoya mani oh kat pe tit be adariyao ama ihir Nuhur Got orhe nitamur ripti it er hat sapti han bap ire tapnong hathe patepri napotirmur. Ama ihat pati han bap ihirsihe gursi tap hathe den dapri.   
\p
\v 12 Got orhe nita hat pati han dirdapat orhe nita na hat pati ihirnong Moh er hanmur. Moh yah hanmur por dirdapat satin hatinda. Basra. Got orhordapatwi sapat hanmur. Oh Got orhe nita na hat pati han ire meng ohmura; Got orhe nita hat pati han ihirnong dirdapat satin ina hat patimur.  
\v 13 Satin ina hat ma pati oh rih ma brak matpa mengru hat patimur. Ma brak matpa meng oh mamaru hat patmur. Gure pati mutuh oh er hat sapat han tit pathanhe gur wandeipti orhe wan teinong mat mandatinmur rim brak matpamur. Ihat pato rim noh Ihirsihe gur tap hat patepri naporpatmur.   
\c 6  
\s1 Got ohe nita gur ruumsup meng tit pathanhe guragurwi pondeinmur potip ohe meng oh  
\p
\v 1 Amratin. Got orhe nita gur guragur ina ruumsup goshat patihanhe Got orhe nita na hat pati han ihir Dire ruumsup hat pati meng moh ihir ha napomtingwe daham Got orhe nita na hat pati han ire duupnonghe pisasipri. Got orhe nita guragurwi pondeinmur.  
\v 2 Gur Nure ruumsup goshat pati da moh Got ohe nita na hat pati han ihir ha napomtingwe daham ma pisapti oh gur mohnong hanhan hat patim ihaptida. Got orhe nita hat pati dirdapat kakdah mama pati kuuhan maihirnong Gur ihat pateshe bapmur por satiprimur. Gurdapat ihirnong imat satin ina hat patimdapat satipri ohoh ihan guragure garpok ma ruumsup goshaya oh guragur sama pomtin ina hat pati basda. Gur ihat pati ohoh ihan guragur sama pondeinmur.  
\v 3 Gur mohnong hanhan hat patida. Got orhe nita dirdapat Got orhorsi pati bap enser ihirnong Gur ihat pati han bapmur por satiprimur. Gur ihat Got orhorsi tap hat pati da bap enser ihirnong satin ina hat pati ohoh ihan kakdah mohe garpok ihat pati meng moh atnap gur sama pomtin ina hat patimur.  
\v 4 Guragure ruumsup goshat pati meng oh guragur pomtin ina hat pati ohoh ihan gur ruumsup ma goshaya meng oh Moh be han hat patimur ma poripti han ihir ha napomtingwe rim pisaptida. Basra. Guragur pondeinmur.  
\v 5 Nohe gurnong Gur imat pisasipri ma napor meng oh gur Nuhur imat pisapti sa daham ha kas hatingwe rim noh mameng moh naporpatmur. Guragure ruumsup goshat ma pati danong oh guragur tit han oh tit meng pomtin ina hat pat basda. Pomtin ina hat pat han tit pat ohoh ihan ama han oh ha pondeinohmur.  
\v 6 Guragur imat na pomara Got orhe nita hat patim taptem guragure ruumsup goshat pati meng oh Got ohe nita na hat pati han ihir meng oh ha napomtingwe daham pisaptimur. Imat ma pisapti oh Got ohe nita na hat pati kuuhan ire kintei dahanggosham ma pondeipti oh ermur.   
\p
\v 7 Gur dahenmur. Guragure ruumsup goshat pati da oh Got orhe da oh gure mutuh oh hatip hat patin ama da oh tarpapatmur. Gur ihan ama ihtin da ohri tarpaprarim guragur kat han ihirdapat er nahamo gure erer nadaro nahayahanhe gurdapat Ihir inahaya moh dir meng pomtipera na daham hanhan mar mandanmur.  
\v 8 Gur imat na mandama Got ohe nita hat pati guragur orhor arwanir ihirnong er maro ire erer oh adaro mat pisaptimur. Ohri awam na ihaptimur.   
\p
\v 9 Got orhe napapindin hrepnong er hat sapti han ihir ma na hatipri oh gur na dahat patim ihat saptida. Er hat sapti han ihir Got ohe napapindin hrepnong hatiprikin daham guragure danonghe dasuh mathe pisasipri. Mohnong dahat patim ihat sashenmur. Bisei saw hat sayao dasuh got ire danong hayao han inap ihirnong abisei saw mat pisayao han yot gutagut bisei saw goshat sayao  
\v 10 agapah hayao nohwi ruumsansi han hat pateporo dahayao er tom dam da ban tahat sayao dasuh ham er meng ritin danongwi hat sayao erer mohotpero rim ma mohoya mani oh kat pe tit be adariyao ama ihat sapti bap ihiroh Got ohe napapindin hrepnonghe eimatnap na hatipri bap ihirmur.  
\v 11 Kat han gur rih ihtin dasi hat pateshe bap gurmur. Gin mama patinong oh Got orhor er gap hirmat namdama yah nahat napapatmur. Imat ma napapat oh orhor diradire Hanipyah Jisas Krais ohe dap teimdapat orhe Yahsup oh gure mutuhnong nahatporhan Yahsup orhor Got orhe gon han bap nahat napapatmur. Orhe gon han bap nahat napapatin orhe kintei oh yah hat patin oh Gur yah hat pati han bapmur naporpatmur.   
\s1 Ina bok moh Got orhe hat pat ohoh ihan ina mohsi ongeng mat paptim Got orhe winnong adaptuhur paptenmur potip ohe meng oh  
\p
\v 12 Gur erer moh gonsi yahwimur ripti orhor kat tit na napanggeitin hannong giporiptimur. Noh erer oh gonsi yahwimur dahapat orhor tit danongwi ham noh ama ohe da hrepnong hat na patepramur daham ama da ohe hrepnong hat na patepramur.  
\v 13 Gur Den oh akenongwi deipti han oh yahwimur. Ake oh den darpat hanmur riptimur. Ma giripti oh arpin giripti orhora; Got oh tap mat yotyot timbas matipra yotmur. Ina mohri den ma dapti oh yahmur. Ina mohri ma bisei saw haptinong oh ermur. Ina mohri bisei saw hatin ohe ina basmur. Hanipyah orhe ina hat patmur. Orhe ina hat patim orhor napapatmur.  
\v 14 Imat napapat ohoh ihan Got oh rih Hanipyah ohnong ma pamsuhup kasip ohsi dirnonghe imat orhor napamsapramur.  
\v 15 Gur hanhan hat patida. Dir Krais orhe buh ina hat patimur. Ihat patimdapat bisei saw hapat kuu uhsi saw hayahanoh orhor ha ihpat hatin haptimur. Ihtiproheda. Basra. Orhe buh ina hat pati ohoh ihan ohri awamnap na ihat sapti hanmur.  
\v 16 Gur am hat patimur. Gur Hanip dir bisei saw hapat kuu uhsi saw ham tit inawi ma haptinong oh guragur am hat patimur. Ihat tit inawi ma hapti oh rih Got oh Hanip gur tit inawi haprimur ritporhan ma brak matpa mengru hat orhor ihaptimur. Ritporhan ma brak matpa meng oh mamaru hat patmur. Hanip bap kuuhan guragur tap dah ma timapti oh hanip guragur tit inawi ham sus ihat saptimur ritporhan brak matpamur. Giritporhan brak matpa ohoh ihan Dir bisei saw hapat kuu uhsi tap dah timayahanoh dir tit inawi hatiprohe ma hapat. Hapti Jisas ohe ina hat pati moh bisei mar aer matiprohe ma hapat daham ihapri. Mandanmur.  
\v 17 Hanipyah orhorwi tap hat ma pati bap dirhe orhorsi tit inawi ham tit dawi hat patimur.   
\p
\v 18 Bisei saw hapti danong oh gurri eimat kom asar mandama sashenmur. Ti da ti da apris ma er hat sapti oh guragure ina boknong er mar na ihat saptimur. Arwananah ire ina boknong aer mar ihat saptimur. Bisei saw hat ma sapti da oh guragure ina boknong er mar bisei mar ihat sapti ohoh ihan ama danong ohri eimat kom asar mandama sashenmur.  
\v 19 Gur mohnong dahat patimur. Got oh Hanip ire ina moh ap yawar hatin hat patin norhe Yahsup oh ros sa patepra daham orhe Yahsup oh dire mutuhnong naham napapatin dir orhorsi patimur.  
\v 20 Got oh orhe yan isip ohsi dirnong namohoma yah teinong naham napapat ohoh ihan dir diradire ina bok basmur. Got orhe ina hat patimur. Ihat pati ina mohsi Got orhe winnong adaptuhur pisashen inasi nahat napapatmur. Imat napapat ohoh ihan dir mama ina mohsi ohe winnong adaptuhur isip mat pisashenmur.   
\c 7  
\s1 Kuu gamder ire pati ohe meng oh  
\p
\v 1 Rih gur nohnong Got ohe nita hat pati kuu han dir ma gosdaripti oh yahda da na gosdaripti oh yaha napor nohnong ma dahanahatiri meng oh noh gin it gurnong napotiprohmur. Han gur kuu na dar pon han hat ayahanoh yahmur.  
\v 2 Yah orhora; ti da ti da apris bisei saw hat sashen ohe danong oh isip hat sasipririm nitat kuu han guragur gosdar patenmur napor mama brak mat nasar ohmur.   
\p
\v 3 Ihat gosdat pati gamin gutagut kuu uhdapat Gin ditadit saw hatper naporhanhe han gomdapat baso poripra. Han ohdapat kuu gonong Gin ditadit saw hatper naporhanhe kuu gomdapat baso poripra. Gutagut tit dawi ham da gosat patenmur.  
\v 4 Kuu go gorhe ina oh gorhe hrepnong mat na papatmur. Han orhe hrepnong mat papat ohoh ihan oh Dit ihtiper naporhanhe Yahwa porinmur. Han go gorhe ina oh gorhe hrepnong mat na papatmur. Kuu urhe hrepnong mat papat ohoh ihan uh Dit ihtiper naporhanhe Yahwa porinmur. Ihama tit inawi gosham patenmur.  
\v 5 Kuu go Gin mama dik moh noh na saw hat indipramur. Got ohsi mengir indipramur dahahhanoh iman ohnong dahamtinmur. Dahamara oh Es. Saw hatin oh mama dik moh na mandam ihat orhorwi indeprimur naporhanoh ohe napor danong hatinmur. Han go Gin mama dik moh na saw hat indipramur. Got ohsi mengir indipramur dahahhanoh inan uhnong dahamtinmur. Dahamara uh Es. Saw hatin oh mama dik moh na mandam ihat orhorwi indiprimur naporhanoh uhe danong hatinmur. Gutagut tap mengwi ham Gin dit mama dik moh na saw ham Got ohe danong ham indiprohemur goshayahanoh ama gosporiya danong hatinmur. Ihat trun indipri. Trun ayahanoh gut saw hatinoh kakun awammur ritiri tei ohoh ihan Satan oh kis naham han go kuu wansi saw hah kuu go han wansi saw hah hatiprohe ohoh ihan ihat trun patepri. Kakun ihat patem gutagute dahapti danong hatinmur.   
\p
\v 6 Gur nuhur kinhat indipri napor nohnong ma dahanahatiri meng oh gin noh mama napor ohmur. Mama napor meng moh Guragur kuu daripti ditadit gamin inpera dahayahanhe yahmur. Gur ihat patenmur na naporpatmur. Be yahwi naporpatmur.  
\v 7 Noh yahwimur naporpat orhor norhe ma dahat patnong oh Nohe mama pon han ham yah hat patru hat patepera daham ihat ayahanhe oh yahnapmur dahapatmur. Ihtin orhor Got oh nitat da napin patmur. Ma napripat oh nohe mama hat pat da hatin nahahhanhe gurhe nohe mama hat pat da hatin hat orhor patenmur. Ihat paten dasi na nahama kuusi hansi gosdatin da napin pathanhe gutagut gosdara gutagut gamin taham patenmur.   
\p
\v 8 Kuu pono han pono kuu tahemo hat pati gurnonghe gin noh mama meng oh napotiprohmur. Gur nohe tan hat patepera dahayahanhe yahwimur.  
\v 9 Gur nohe tan hat ayahanoh yaho dahapat orhora; eit a har hat son inasi naham er nahatiprohkin dahayahanoh ama ihat dahat pati gur er hat sapririm guragur gosdar gamder patenmur.   
\p
\v 10-11 Gin kuu gamder gure paten meng oh napotiprohmur. Kuu han inap gur imanir ihirnong mandapri. Kuusi han gurhe inanir ihirnong mandapri. Guragur gamder gosdat orhorwi patenmur. Kuu han dat patdapat Gin noh ohnong mandam sapora dahahhanoh wan han ihirnong it daripra. It apris gorhe han mandam pip han ohnong it gutagut da gosapris gosdar patenmur. It iman ohnong na datin dasi hat pathanhe ihan gorhap be patenmur. Nohe mama Gur ihat patenmur naporpat sawa meng moh norhe sawa meng basmur. Hanipyah orhe sawa meng oh gurnong naporpatmur.   
\p
\v 12 Gin Got ohe danong hat patsi; Got ohe danong na hat patsi gosdat pati gamder gurnong mama meng moh napotiprohmur. Ma napotiproh meng oh Hanipyah ohe ritip sawa meng na napotiprohmur. Norhe dahat pat sawa meng oh napotiprohmur. Got ohe danong hat pat han go Got ohe danong na hat pat kuu dat pathanhe uhnong mandapra. Uh Noh Got ohe danong na hat pat orhor gosi patepramur rihanhe yahwa daham dat orhorwi patenmur.  
\v 13 Amaru hat orhor Got ohe danong hat pat kuu go Got ohe danong na hat pat han tit dat pathanhe ohnonghe mandapra. Ohdapat Noh gosi patepramur rihanhe kuu gomdapathe yahwa daham gutagut gamin patenmur.  
\v 14 Nohe gutagut gamin ihat patenmur ma napor meng oh noh mohnong daham ginapormur. Kuu uh Got ohe danong hat patin han oh Got ohe danong na hat patin itait gosdat patin Got oh kuu uh nohe danong hat pat ohe pe oh han nohe danong na hat pat han ohnong Han moh norhe gon mat papat hanmur porpatmur. Han oh Got ohe danong hat patina kuu uh Got ohe danong na hat patina itait gosdat patin Got oh Han oh norhe danong hat pat ohe pe oh kuu nohe danong na hat pat kuu uhnong Kuu moh norhe gon mat papat kuumur porpatmur. Got oh supir itapir ihirnong orhe gon mat ma papat ohe pe oh brer ihirnonghe Got oh orhe gon mat papten brer mat papatmur. Got oh supir itapir ihirnong imat na papatneng brer ihirnonghe dasei mar bisei mat papatnengmur. Supir itapir ihirnong imat yah mat papat ohoh ihan brer ihirnongsi yah mat orhor papatmur.   
\p
\v 15 Kuu uh Got ohe danong hat patina han oh Got ohe danong na hat patdapat Gin noh gosi dit na pateprimur. Namdamur naporhanoh kuu gomdapat Yahwa. Gorhe dawimur porinmur. Han oh Got ohe danong hat patina kuu uh Got ohe danong na hat patdapat Gin noh han gosi dit na pateprimur. Namdamur naporhanoh han gomdapathe Yahwa. Gorhe dawimur porinmur. Got oh dirnong manap gosham yah hat paten da napin pat tei ohoh ihan patem inggoshatipririm Yahwa porinmur.  
\v 16 Got ohe danong hat pat kuu gomdapat Got ohe danong na hat pat han iman ohnong Gwe Got ohe danong hat pat da oh pinggit pisapatin oh am hatiprohde da na am hatiproh dirhe hanhan hat patimur. Got ohe danong hat pat han gomdapat Got ohe danong na hat pat kuu inan uhnong gwe Got ohe danong hat pat da oh pinggit pisapatin uh am hatiprohde da na am hatiproh dirhe hanhan hat patimur.   
\s1 Nitat tamreindin tei patin Got oh namburhanhe ama nitat tamreindin tei orhordapat Got orhe nita hat patenmur.  
\p
\v 17 Gin gur mohnong dahenmur. Hanip dir ihat pati dus orhor Got oh dirnong Gonong gin norhe han nahahmur napor nambur napapatmur. Ihat pat dus orhor nambur napapat moh Hanipyah Krais orhor Mihat ha patenoh rim kis nahat napapat ma hapat daham ihat sashenmur. Ihat sashenmur ma napor meng moh noh sios aptei aptei ma pati ihirnong gonsi tap meng mohwi pot pisapatmur.  
\v 18 Gur ihat pati dus orhor gur ihat sashenmur ma napor meng moh mamaru hat patmur. Eit watah gatmat pati teihe Got oh Gin noh gonong norhe han nahahmur napor namburhanhe ama han gur Nuhur eit watah na gatmat pati han hatin hatpora dahapri. Eit watah na gat mat patimdapathe Got oh Gin noh gonong norhe han nahahmur napor namburhanhe ama han gur Gin eit watah gatmatpera dahapri. Guragure ma hat patiru hat patin Got oh namburpat ohoh ihan gur ihat orhorwi patenmur.  
\v 19 Got oh eit watah gatdeiptio na gatdeiptio ohnong dahapat handa. Basra. Ama ihaptinong oh ina teimdapat ihaptio rim oh na dahapatmur. Da mutuhdapat ma Got orhe sawa mengnong amram dimat ayanong asohwi yaho dahapatmur.  
\v 20 Gur Nuhur ihat pati dus orhor Got oh Gin gur norhe han nahahmur napor ma nambutir oh ihat orhorwi patepera daham ihat orhorwi patenmur.  
\v 21 Gur ihat orhorwi hat patenmur ma napor meng oh mamaru hat patmur. Gur ire hrepdapat nang tatpat pati hatin hat patim ire be atamreiptin Got oh Gin gur norhe han nahahmur napor namburhanoh gur ire hrepnong hat pati da oh mandatpera daham mandapri. Mandatpera na dahat patin orhor narpit namdahanoh Wes nohnong narpit namda daham tarpir mandam sashenmur.   
\p
\v 22 It nang tatpat pati danonghe hapri ma napor oh mama danong ham ginapormur. Gur ire hrepdapat nang tatpat pati hatin hat patim ire be atamreiptin Got oh Gin gur norhe han nahahmur napor nambur orhe hrepnong nahahhanoh ama inahah han bap guroh ire hrepdapat tatpat patin orhor Hanipyah orhorsi pati ohoh ihan nang tarpir be han bap hat patimur. Nang tatpat pati ohe hrepdapat hat na patin orhor namburhanhe ama inahah han bap gur Krais orhe hrepdapat nang tatpat pati han bap gurmur.  
\v 23 Got oh orhe yan isip ohsi dirnong namohoma yah teinong naham napapat ohoh ihan hanip diradire dahapti ohe hrepdapat hathe patepri. Got orhe dahapat da ohe hrepdapat hatwi patenmur.  
\v 24 Got orhe nita taptem bap gur Nuhur ihat pati dus orhor Got oh Gin gur norhe han nahahmur napor nambutir ma hapat. Ihan dir Got oh ihat pati dus orhor ma nambutirru hat orhor patepera. Ihat orhorwi ma patepri oh Got orhorsi tap hat patim ihat orhorwi pateprimur daham ihat orhorwi patenmur.   
\s1 Kuuhan na gosdat pati ire ihat paten ohe meng oh  
\p
\v 25 Gin na gosdat pati bap gure paten meng oh napotiprohmur. Ma napotiproh meng oh Hanipyah ohe ritip meng oh na napotiprohmur. Norhe dahat pat meng tit napotiprohmur. Norhe dahat pat meng ma napotiproh oh gure damdapat oh Hanipyah oh Por ohnong hinhina mar ohsi pat ohoh ihan oh amram am hatin ohe meng tit napotiproh ma hapat daham nohe ma napotiproh mengnong moh amratinmur.  
\v 26 Norhe da oh Gin mama ina ruumsup dat pati dus moh guragure ma hat pati da hatin hat orhorwi patenmur.  
\v 27 Kuu dat patihanhe kuu mandatin ohe danong hapri. Dat orhorwi patenmur. Kuu na dat patihanhe Noh kuu datpora dahapri. Guragure ma ihat patiru hat orhorwi patenmur.  
\v 28 Gosdatper gosham gosdariyahanhe oh erda. Oh yahmur. Kuu horhor ihir han dariyahan erda. Oh yahmur. Yah orhora; guragure brer manhem brersi ham aya dus asoh ruumsup oh namkatipra rim mameng moh naporpatmur.   
\p
\v 29 Nohe taptema. Nohe ma naporpat meng moh mohnong daham naporpatmur. Gin mong moh timbas hatin dikhe kakduup hat patmur. Kakduup hat pat ohoh ihan gar dik mama indiprohe dik moh kuusi han gurhe kuu timbas han hatin hat indinmur.  
\v 30 Saheih ham ma yimapti han gurhe Mong moh timbas hatin kakduup hah ma hapat. Ihan dir na saheih hapti han ire tan hat inpera dahat indinmur. Amam hapti han gurhe Mong moh timbas hatin kakduup hah ma hapat. Ihan dir na amam hapti han ire tan hat inper dahat indinmur. Erer ma daripti han gurhe Mong moh timbas hatin kakduup hah ma hapat. Ihan dirhe erer timbas hat pati han ire tan hat inper dahat indinmur.  
\v 31 Kakdah mohe erer tamohotin danong hat sapti han bap gurhe Mong moh timbas hatin kakduup hah ma hapat. Ihan dir kakdah mohe erer marindin danong na hapti han ire tan hat inper daham indinmur.   
\p
\v 32 Kuuhan guragur gosdaripti brersi hama ama ohe ruumsup danong oh hat patepririm noh mameng moh gurnong naporpatmur. Mohnong dahenmur. Kuu timbas han ire ma pati oh kuu brersi han ire ruumsup oh amkat pat da hatin hat na patimur. Ihir Nuhur Got orhe amam hat pat danong hat patepera daham orhe dahat pat danongwi hat patimur.  
\v 33 Oh kuu timbas hat pati han ire meng oha; kuusi hat ma pati bap ihirhe kuu uhe dahapat danong da ayah deipat da ohsi tap hat patim kakdah morhe tamreindin dasi haptimur.  
\v 34 Ihat patima kakdah mohe ma dahapti da ohsi; Got ohnong dahapti da ohsi hat patimur. Kuu tahemo horhoro ihirhe Nuhur ina tei mohsi; da mutuh ohe da ohsi Hanipyah orhemur por ongeng mat apaptepera daham Hanipyah orhe atamreindin ohe danong ohwi hat patimur. Hansi kuu ihirhe han orhe ma dahah danong asoh ayah deipat da ohsi hat patim kakdah morhe tamreindin dasi haptimur.  
\v 35 Noh mama napor meng moh gur Nure gosdatin mandap oh Por oh baso napor ma hapat dahapri. Basra. Noh gurnong napanggeit napapten meng oh napotporhan gur ama ohe pe oh yah hat sashen ohe danong ohwi hama Hanipyah orhe danongwi hat ha sashengwe rim mameng moh gurnong naporpatmur.   
\p
\v 36 Gin nuhut gosdatiprimur gosham kis goshat pati gure meng oh napotiprohmur. Kis goshat patimdapat na gosdat patin orhor han ohdapat Noh kuu moh na darpat moh noh uhnong er deipatkin dahayo oh datin ohe danong oh isip hat patin orhor Noh kot katdapat bisei saw deihan uhnong er matiprohkin dahayao ihat dahat patimdapat gosdatper dahayahanhe gutagute dahapti danongwi ham gosdarinmur. Ihat patimdapat ma gosdaripti oh erda. Oh yahmur.  
\v 37 Kis goshat patimdapat orhor oh orhe da orhor Noh kuu moh na dara pon han patepramur daham na ihat sashen ohe da oh orhe hrepnong mat papatim uhnong na darhanoh oh erda. Oh yahmur.  
\v 38 Ihat pat ohoh ihan kis goshat pati yot itait gosdariyahanoh yahmur. Oh uhnong na dara Noh pon han hat patepramur rim na darhanhe yahnapmur.   
\p
\v 39 Gin tahem gure paten meng oh napotiprohmur. Han oh da patin oh sawa meng oh Wan han datipra. Iman orhorsi patenmur napotip ohoh ihan orhornong dat patenmur. Han oh haputporhan Noh gin wan han tit datpora dahahhanhe yahwa. Gorhe dawimur. Yah orhora; kin wataham Got orhe nita hat pat han ohnong asohwi darinmur.  
\v 40 Kuu gohe gorhe dawimur napor orhora; norhe dahapat oh han darhanoh ama han dar amam oh garpokmur. Han na darhanoh ama amam oh isipnap hat patepra ma hapat dahapatmur. Nohe ma dahapat oh Got orhe Yahsup oh nohe mutuh moh patin noh ihat dahat pat ma hapat dahapatmur.   
\c 8  
\s1 Dasuh got ire asariya den oh dayao na dayao hapti ohe meng oh  
\p
\v 1 Gin ire apop sum dasuh got ihirnong asariyamur rim it komdapat dapti ohe meng oh napotiprohmur. Guragur kat han gur Nuhur am hat patimur. Moh awam han basmur. Yahwimur daham daptimur. Ihat daham ma dapti oh guragure inanong tohormi tahat son ohe danong hat patim ihaptimur. Ihan gur Nuhur am hat patimur rim tohormi tahat sasipri. Ihirnong da aprisa kasip goshat paten ohe danong hat sashenmur.  
\v 2 Nuhur pomat orhor am hat patimur ma ripti han gur pomat am hat na patim ihat giripti han bap gurmur.  
\v 3 Ihat na rima arpin dawi Got ohnong apris bopor deiyahanhe ama ihapti han gurnong oh Got oh Maihir norhornong ihat da napris pati han bap ma hapat daham orhor am hat patmur.   
\p
\v 4 Gin ire apop sum dasuh got ihirnong temar asariya den ma dapti ohe meng oh gin napotiprohmur. Dir am hat patimur. Ire Moh nure gotmur por kis mar arhur armi deipti han oh be hannong armi mar indeiptimur. Arpinnap Got ma pat han oh tit hanwi patmur.  
\v 5 Ihir Nure got ihir aw tei mahato kakdah moho ruumsan patimur. Nure napapti Hanipyah bap ihir ruumsan han patimur riptimur. Ire ihat ma ripti bap oh pati orhora; oh bemur.  
\v 6 Diradire napapat Got oh tit han pokwi diradire At Got oh pokwi patmur. Ihat ma pat Got orhor erer moh gonsi darpatip Got orhorwimur. Dir ama ihat pat Got orhewimur. Dire Hanipyah ma pat hanhe Jisas Krais orhor pokwimur. Ama Hanipyah hat pat han orhe bes teinongwi mara erer oh darpatipmur. Ama ihat Hanipyah hat pat han orhor dirnonghe ihat paten dasi nahat napapatmur.   
\p
\v 7 Dasuh got ihir be han bap hat patin orhor kat han guragur kat ire Moh got guremur por ma dasuh got ire asariya den oh dama Gin dir dasuh got ire asariya den ma daya moh ire danong hatinmat ihya ma hapat. Ihan gin dir er haya ma hapat dahaptimur. Moh be han asariya den daya ma hapat na daham ma dapti oh Got ohnong bisei mar daya ma hapat dahaptimur.  
\v 8 Ihat dahapti orhor Got oh dire den daptio na daptio ama ohe danong oh Got oh na hapatmur. Kat den tit na dayahanhe Got oh Moh kinham na daya napotiprohda. Den gonsi moh yahwiwa rim gonsi dayahanhe Got oh Gonsi den oh dapti oh yahmur napotiprohda. Basra. Got oh den imat daptio na daptio ama ohe danong na hapat hanmur.   
\p
\v 9 Got oh dir den daptio na daptio ama ohe danong na dahapat orhor den yahwiwa daham ma dapti han gurdapat kat han guragur Nuhur mama den moh dayahan er hatiprohekin ma dahapti han ihir er da hatipririm gur ire kintei dapri.  
\v 10 Noh ire kintei dapri ma naporpat oh mamaru hat patmur. Den yahwimur rim ma dapti han bap gur dasuh got ire ap yawarnong ros den daptin kat guragur Mama den moh dayahan er hatiprohekin daham ma na dapti han ihirdapat gur den daptin wanahama Ihirhe dasuh got ire asariya den mama dapti ohwa. Ihan dirhe dayahan yahwa daham diprohemur.  
\v 11 Dapti dire na dapti den moh daya moh gin dir er haya sa dahatiprohemur. Ma dahatiprohe da oh gur den oh yahwiwa daham am hat patim orhor ma dapti ohe pe oh guragure taptem bap Krais orhe ambutinmat ire gwemat ma haputip han ire danong aer mar ihat daptimur.  
\v 12 Gur ihat daham ma dapti ohe pe oh guragure taptem bap ihir Nuhur mama den moh dayahan er hatiprohekin ma dahapti han ire danong ma aer deipti oh Krais orhe danong aer mar ihaptimur.  
\v 13 Ihtin ohoh ihan nohe ma ihpat ohe pe oh nohe taptem ire danong aer matiprarim noh eimatnap ama apop oh na dapramur dahapatmur.   
\c 9  
\s1 Por oh yan na dar ihirnong be meng pot pisasuh ohe meng oh  
\p
\v 1 Noh hanip gure hrepdapat hat patda. Basra. Noh gure hrepdapat hat na patmur. Noh Krais orhe mengtei orhe meng pot pisapat han aposer hat pat basda. Noh aposer ma hat pat oh noh diradire Hanipyah Jisas ohnong wamara am hapat aposer hatipmur. Aposer hat patim orhe mengtei atamreim meng napot napisapat ohe pe oh gur am ham orhe danong ham orhe han haptimur.  
\v 2 Noh orhe meng napot napisapat ohe pe oh gure mutuh dam ma tarpat sapti oh arpin Hanipyah Krais orhe mengtei ihat sapat han ma hapat dahatin ohe dam oh tarpat sapatmur. Ihat gure mutuh oh dam tarpat sapat ohoh ihan gur wamar Moh Krais orhe mengtei ihat sapat han ma hapat daham am hapti basda. Kat ihir ihat na dahayahanoh nohe ma ihat sapatin kat gure mutuh ma dam timapatnong oh wanaham ihir Por oh aposer hat pat ohe pe oh ire mutuh moh dam timapat ma hapat sa dahapri.   
\p
\v 3 Kat han ihir Por oh ihat ma sapat oh ermuro rim nohe boknong meng nahayahanoh nohdapat it mama meng moh porpatmur.  
\v 4 Nure Hanipyah orhe mengtei ihat tamrein ma sapti ohe pe oh ihir tomo deno namdiperhan dayahan erda. Oh yahmur.  
\v 5 Hanipyah orhe mengtei meng pot pisapti han Pitao ihir kuu dara inapir ihirsi tap hat meng pot pisaptimur. Ire ma saptiru nohhe kuu dar ihat ushan erda. Basra. Oh yahmur.  
\v 6 Gur Nuhur aposer kat han ihirnongwi diradire bes teidapat den pandipera. Banabassi Por ihitwi den na pandipera dahapri. Nuhutnonghe ihirnong ma pandeptiru mat namdeyahanhe yahwimur.  
\v 7 Nure tamreipti ohe pe oh den namdeyahan yahmur ma napor meng oh mohnong dahenmur. Ami ihirhe iraire bes tei den gonom daptida. Basra. Iraire papti han ihir pandeptimur. Den ma gonopti han ihirhe iraire gonopti den oh na daptida. Basra. Daptimur. Sipsip ma papti han ihirhe sahama ama non gap ma daripti oh irair na daptida. Basra. Daptimur. Ama ihat tamreipti bap ihir iraire tamreipti ohe pe oh den daptimur. Ihapti ohoh ihan nute meng napor ma tamreipti ohe pe oh nuhutnong den namdeyahan erda. Basra. Namdeyahan oh yahwimur.   
\p
\v 8 Noh hanip diradire ma ihapti danong ohwi daham imat na naporpatmur. Got ohe sawa meng oh ritporhan ma brak matpa meng oh amaru hat ritporhan brak matpao rim imat naporpatmur.  
\v 9 Got oh tit meng ritporhan Moses ohe ma brak matip sawa meng oh mamaru hat patmur. Burmakau ihirnong ambur pisusa ire tong ohsi wit dam oh tonggamar arhot ha itingwe rim ateinong deiptimur. Ateinong matperhan ihir arhot sariptimur. Arhot sariptinhe hanip gur atem apapri. Iraire arhot sariya wanin oh diper ihyahanhe ha dingwemur ritporhan Moses oh brak matipmur. Ama Got oh ritporhan brak matip meng oh Got oh burmakau ire boknongwi daham na giritipmur.  
\v 10 Hanip dire boknongsi tap mat daham ginapotipmur. Ma ginapotip oh mong marim den gonopti hansi den suhupti hansi irair tap hat Nure mama mihat tamreipti pe moh dam yah mat datipriwa daham ha tamreingwe rim ginapotipmur.  
\v 11 Ama den imat gonoptiru hat orhor nuhut yah meng oh napor gure mutuhnong den ohe tan nagonotirimur. Ma nagonotiri ohe pe oh erer oh ihir sa napripri dahayahanoh oh erda. Oh yahwimur.  
\v 12 Gure mutuh oh patin kat han ire ma tamreipti pe oh guragure erer oh ihirnong apriperhan ihir dar daptimur. Nute yah hat ma tamreipti ohe pe oh Ihir erer oh ha napingwe naporiyahanoh oh erda. Basra. Oh yahnapmur.  
\p Nuhut napina napotin oh yahnap hat pat orhora; nuhutdapat gurnong na naporiptimur. Gurnong imat ma na naporipti oh gure Krais ohe yah meng amratin ohe mandapnong agatdeipririm gurnong imat na napora erer datin oh nuranure boknongwi ruumsup dariptimur.  
\v 13 Gur Got ohe ap yawar ma atamreiptinong oh gur am hat patimur. Kat han ihir Moh Got ohe denmur por ma asaripti den oh ama ap yawar tamreipti han bap ihir kat oh dar daptimur. Hanat bok han hat pati han ihirhe Got gwemur por ma asaripti apop oh ihir kat dar daptimur. Ma ihaptinong oh guragur am hat patimur.  
\v 14 Ire ma tamreipti ohe pe oh den dar daptiru hat orhor nuhutnong oh Hanipyah oh Norhe yah meng ma pisapti han gurhe gure ihat ma meng pisapti ohe pe oh ihir deno erer oh ha naprishengwe. Napriperhan gur dar denmur naporpatmur.   
\p
\v 15 Oh imat naporpat ohoh ihan nohdapat gurnong imat napotin ina hat pat orhor nohdapat imat napina na naporpatmur. Ginhe noh gurnong imat ha napanggeitingwe daham brak moh gurnong na nasarmur. Noh gurnong napanggeitin han erer oh napina napotin danong na hat patmur. Noh gurnong na napot patin orhor hapurhanhe yahwa dahat patmur. Nohe gurnong erer oh ti napina na naporpat ohe pe oh norhor amam ham yah hat pat ma hapat daham ma armi tahapat da oh timbas hatiprarim gurnong erer oh napina na naporpatmur.  
\v 16 Noh mama yah meng pot pisapat ohe pe oh norhe da orhor Noh ihat sapat hanmur rim noh armi tahatiprohda. Basra. Got orhor nohnong Go ihirnong imat meng pot pisashenmur napor kis nahat napapat ohoh ihan noh ihat na tamrein ushanoh noh norhornong batbet dar hinhinsi han hatiprakin daham meng pot pisapatmur.  
\v 17 Noh norhe da orhor ihat meng napot napisapatda ihan noh meng naporpat ohe pe oh Gur nohnong napanggeinmur napotiproh. Noh norhe da orhor meng napot na napisapatmur. Got orhordapat Go nohe meng moh pot pisona napor kis nahat napapatin noh orhe meng oh gurnong napot napisapatmur.  
\v 18 Noh gurnong erer ti napanggeitinmur na napora be meng ma napot napisapat ohe pe oh nohe yan ma darpat oh mamaru hat patmur. Noh kuuhan ihirnong Gur ti napanggeitinmur potin ina hat pat orhor na pora noh ihirnong be meng pot pisapato rim noh amam isip hat patmur. Ama amam isip hat patnong oh noh yan hatin mat darpatmur.   
\s1 Por oh ire danong ham iraire pati da hatin hat patim orhor meng porisuh ohe meng oh  
\p
\v 19 Nohe ihat ma tamreipat oh hanip ire hrepdapat hat patim ihir Gin go ihat tamrein sashenmur napotperhan noh ihat tamrein na sapatmur. Noh ihat hanip ire hrepdapat hat na pat orhor kuu han ruumsan han ihir Krais orhe danong ham orhe nitanong ruumsan ha hatingwe rim noh ire danong ham ire hrepdapat hat patim tamreipatmur.  
\v 20 Noh ire danong ham ire hrepdapat hat patim ma tamreipat oh mamaru hat patmur. Noh Juda ihirnong meng potinmathe ihir Krais ohe danong ha hatingwe rim noh Juda iraire hat patiru hat patim orhor ihirnong meng porpatmur. Moses ohe sawa meng hrepdapat hat pati han ihirnonghe Krais orhe danong ha hatingwe rim noh Moses ohe sawa meng amram dindeipat ohe pe oh Got oh Go yah hat pat hanmur na naporpat ma hapat dahapat orhor noh ama sawa meng hrepdapat hat patim ama sawa meng ohe hrepnong hat pati han ihirnong meng porpatmur.  
\v 21 Juda na hat patim ire sawa mengnong na marin pati han ihirnong potinmathe Ihir Krais orhe danong ha hatingwe rim noh iraire be han hatin hat ma pati ohe tan hat orhor patim ihirnong meng porpatmur. Noh ihat patim ma meng porpat oh noh Got orhe sawa mengnong mandam na ihpatmur. Krais orhe naporpat ohe sawa meng ohe hrepdapat hat patim orhor ihirnong meng porpatmur.  
\v 22 Krais ohe danong hat pati orhor kinhat ayahan yah hat indiprohe kinhayahan er hat indiprohe daham da yot hat ma pati han ihirnong meng potinmathe ihir Krais orhe da oh pomat am ham ha kasip hatingwe rim iraire dahapti da hatin hat patim orhor meng porpatmur. Noh kinhatin da pinggirit nitat dahat pati kuuhan gonsi ihir Krais orhe danong hatiprohe daham noh iraire nitat dahapti da hatin hat patim orhor ihirnong meng porpatmur.  
\v 23 Noh imat meng ma pot pisapat oh Krais orhe yah meng oh dam timdiporhan diradir tap mat yah dam datinmat noh imat meng pot pisapatmur.   
\s1 Por oh Noh eimat yah hat paten yan oh datiprawa daham kasip hat orhorwi sapatmur ritip ohe meng oh  
\p
\v 24 Gur am hat patimur. Han ire erer datinmat en taham ma sakaripti oh sakara gonsi ihir yan na dariptimur. Ohri hat sus nang dap ma dakmeir han oh pokwi yan darpatmur. Ihan ire Nohri yan oh datiprohneng daham kasip ham sakariptiru gurhe ihat orhor Got orhe yah da ma nat pat oh Nuhur sus datipriwa daham Got ohe danong kasip hat orhorwi sashenmur.  
\v 25 Ama ihat sakaripti han bap ihir Kimsi nohri hat sakara erer datiprawa daham iraire inanong pang mar kis taham sakariptimur. Ire ma ihapti oh kakun ohe kakung ara it timbas hapat kakungnong oh datinmat ihat kis taham sakariptimur. Dire kasip hat ma saptinong oh eimat na timbas hatin ohe hannong datinmat ihat kasip hat saptimur.  
\v 26 Ama na timbas hatin han oh noh datiprawa daham han ire ma it kom katnong na wataham kasip ham sakariptiru hat orhor nohhe ihat orhorwi kasip hat sapatmur. Noh tit ama han orhornong datiprawa daham kasip hat ma sapat oh ire ban tahe potperhan be mong tei na wandasa hanip baswi ma wanpatru hat orhor noh amaru hat orhor nohe sonhe tit dawi hat patim kasip hat orhorwi sapatmur.  
\v 27 Nohe ihat ma kasip hat sapat da oh nohe ma meng pot pisapat ohe pe oh noh tambapte tapam kis tei na koripti ohe tan hatiprarim daham ti da ti da ma hapat danong oh norhe ga tam hrepnong amkar mandama kasip hat orhorwi sapatmur.   
\c 10  
\s1 Ire er hat sashe da hatin hathe sasipri potip ohe meng oh  
\p
\v 1 Nohe taptem bap gur mohnong ha dahatingwe rim noh gure danong napamsaprohmur. Diradire awher ihir rih Moses ohsi tap hat ma pipa oh ihir gonsi rian hrepdapat hat pipamur. Susa ire son mandap oh tom sor hru oh mutuh ganera katnong hah katnong hah hat patin ihir gonsi ama mutuh oh deihpamur.  
\v 2 Ihir rian hrepdapat hat sayao sor tom hru oh katnong hah katnong hah hat patim deihpao ma ihtipa oh dire Krais orhe nita ham tom waptiru hat orhor ihir gonsi Moses orhe han ham ihtipamur.  
\v 3 Ihama ihir tom timbas irat timbas mong mutuh saptin Got orhe gon den ma kakdahnong mar asarisuh den oh gonsi ihir ama den dar dashemur.  
\v 4 Tomhe Got oh iraire tap hat sashe kwei mutuhdapat tom oh apamraporhan irair gonsi dashemur. Ama tom kwei mutuhdapat marporhan dashe kwei oh Krais orhormur.  
\v 5 Got oh gonsi ihirnong imat panggeisuh orhora; komdapat kat ihir wan danong hatperhan oh ama kuuhan ruumsan kat ihirnong heisup mar ama hanip timbas irat timbas mong mutuh oh saptin orhor adus oh han atei hapuriya atei hapuriya hat tapat sashemur.   
\p
\v 6 Ire ma ihashe oh dirhe ihirnong wamara ire ma er da hashenong oh dirhe Nuhurhe ama er da oh hatiprohenengo dahapririm dirnong namgim ihashemur.  
\v 7 Ti ma namgim ihashe oh iraire dasuh got ire danong ham ma armi deisheru hapririm dirnong namgim ihashemur. Ire dasuh got ire danong hashe meng oh Moses oh mamaru mat brak matipmur. Ihir iraire bes tei ma manhetpa han ohe danong ham tongnom den damo tom damo dipamur. Dama mian imah ire da hatin hat pipamur rim Moses oh brak matipmur.  
\v 8 Ihir ihat bisei saw goshat saptin Got oh heisup ham tit dahwi 23,000 kuuhan ihirnong sutporhan ihir hapur timbas hatpamur. Gin gurheri ire ma bisei saw goshat sashe da hatin hathe sasipri.   
\p
\v 9 Kat han ihir Dir er hat sapera. Er hat saperhan Got oh dirnong inahatiprohde da na inahatiprohe daham Got ohnong kis mat pihipamur. Imat kis mat pisapatin Got oh inapawam ihirnong ama ihat sapti han ihirnong Gin gur sus sutinmur por darhetporhan arpin ihir sus sutperhan haputpamur. Ihan gin ire puh gurhe ire da hatin hamhe Got ohnong kis mathe imat sasipri.   
\p
\v 10 Kat han ihir Got ohnong Mihat hanip dirnong er dusnong son napor inahapat han er Goto por imtiperhan Got oh Ihir nohnong dasei nahaya moh hanip supat enser go sus ihirnong sutinmur por darhetporhan oh arpin sus ihirnong sum timbas matipmur. Imat sum timbas matip ohoh ihan gin ire puh gurhe ire tan hat patimhe Got ohnong dasei mar ihat sasipri.   
\p
\v 11 Ire ma ihashe da oh dir am hama ire ti da ti da ma hashe danong oh hatipririm ihir ama meng oh dire boknong naham brak matpamur. Ihan mong moh timbas hatin dik oh kakduup hat pat ohoh ihan ire ma ihashe da oh gur am ham ihapri. Gur yah hat orhorwi patenmur.  
\v 12 Nuhur yah hat orhorwi saya apriya hat patepriwa dahat pati guroh inin timbas hat saptin er da oh apris buporinsi nahatiproh ohoh ihan gure bok oh er da tarpatiprarim yah hat inin hat orhorwi sashenmur.  
\v 13 Dir er hat ha songwerim dire boknong er da oh apris kis nahapatmur. Ama kis nahapat kis oh hanip gonsi dirnong tap kis orhorwi kis nahapatmur. Dir er hat ha songwerim ma kis nahapat da oh Got oh norhor imat ihirnong panggeipramur napor ma rit natip da ohsi oh arpin han ohoh ihan dirnong imat orhor napanggeipatmur. Imat ma napanggeipat oh er da oh dirnong kis nahatporhan dir na ambapte matin ina hat patihanoh Got oh baso porpatmur. Dir ama ohe er danong ambapte matin ina hat patihanoh Got oh yahwa daham baso na porpatmur. Ama er da oh dirnong kis nahat napapatin Got oh dirnong ama er danong ambapte matin ohe kasip ohsi nahatporhan dir ama kasip ohsi er danong ambapte mar tonggamar son ina hat patimur.   
\s1 Hanipyah ohsi; mongsup bap ihirsi kinhat tit inawi hatiprohe ritip ohe meng oh  
\p
\v 14 Nohe bopor nahat napapat taptem bap gurri ire er danong ham ma sashe da oh hatin hat sasipririm gur dasuh got ire danong ham armi maro hapri. Gurri ama danong kom asar mandanmur.  
\v 15 Gur dahat pati han gur ohoh ihan nohe ma naporpat meng moh gur wamara Moh arpin mengdo da dasuh mengo daham sam am henmur.  
\v 16 Gin gur Krais ohe boknong kis mar dapti tomo deno ohnong dahenmur. Dir Krais orhe heim tom ma dapti oh Got ohnong weso por daptimur. Imat weso por ma dapti oh Krais ohe heim ma tandurketip oh dirnong orhorsi tit inawi nahat napapatwa daham weso por daptimur. Den ma dapti oh Krais orhorsi tit inawi hat pati ma hapat daham orhe watah oh brisbras por daptimur.  
\v 17 Hanip dir trun bap pati orhor den oh tit pokwi taman ma dapti oh hanip dir tit inawi hat patiwa daham tit den pokwi daptimur.   
\p
\v 18 Gur Isrer ire apop sum ma ihaptinong moh dahenmur. Ihir Moh Got gwemur por apop sum asaripti apop oh ihir kat apop tit daptimur. Imat ma dapti oh Got ohe tapnong ham ihaptimur.  
\v 19 Nohe gurnong imat ma naporpat oh dasuh got ihirnong ma asaripti oh arpin Got ohnong asaripti ma hapat. Ama asariya den oh orhe gon den hat pat ma hapat na dahapatmur.  
\v 20 Noh ihat na dahapatmura; nohe ma dahapatnong oh mamaru hat dahapatmur. Ihir sum dasuh got ihirnong ma asaripti oh arpin Got ohe danong ham na asariptimur. Mongsup bap ire danong ham asariptimur. Ihan gurri mongsup ihirsi tit dawi hatipririm gurri ihirsi tap ham ire asariya den oh dapri.  
\v 21 Gur Dir Hanipyah orhe heim tomo rim dipera. Mongsup ire wain tom ma asariyahe dipera. Dama Hanipyah ohsi; mongsup ihirsi tit inawi hatper daham kinhat ihtin ina da hatiprohe. Na ihtin hatin hat patimur. Denhe Dir Hanipyah orhe wataho rim dipera. Mongsup ire den ma asariyahe dipera. Dama Hanipyah ohsi; mongsup ihirsi tit inawi hatper daham kinhat ihtin ina da hatiprohe. Na ihtin hatin hat patimur.  
\v 22 Imat yot mat dipera daham daptin Got oh heisup naham inahatiproh ohoh ihan yot mat dapri. Gur Nuhur Got orhe kasip oh nure kasip hrepnong mat paptio dahamhe ihapri. Basra. Orhornong kasipnap hat pat han ohoh ihan heisup naham gurnong inahatipramur.   
\s1 Got orhornong winsi han matin ohe danongwi hat sashenmur ritip ohe meng oh  
\p
\v 23 Ihir Nuhur Got orhe sawa hrepdapat hat ma pati oh Juda ire Nuhur ihat patimur ma ripti ohe sawa meng hrepdapat hat na pati ohoh ihan dir erer oh gonsi yahwimur riptimur. Ihat pati orhor gonsi erernong yahwi hat patda. Basra. Erer asoh kat tit hanip dire danong kasip goshat indin ohe dasi nahatin ohe han hat na napapatmur.  
\v 24 Guragure danong ham yahwiwa dahat sayahanoh arwananah ihirsihe kasip goshat na indin ohe danong hat saprohe ohoh ihan ihat sasipri. Arwananah ire panggeitin danong ham panggeit pisashenmur.   
\p
\v 25-26 Gin noh apop hit mohom dapti ohe meng oh napotiprohmur. Got orhe ritporhan ma brak matpa mengnong moh dahenmur. Got orhe ma ritip meng oh mamaru hat patmur. Kakdah moh ohe erer oh gon oh gonsi gon Got norhewimur ritporhan brak matpamur. Got oh Erer oh norhewimur ritip ohoh ihan orhe apop hitnong mohom dinmathe Moh mohom dipora daham mohom dayahanhe yahwimur. Apop hit moh nihohe asariya. Noh diporda da na dipor daham dahanggoshathe sasipri. Yahwiwa daham mohom denmur.   
\p
\v 27 Got orhe nita na hat pat han tit apris Gur apris nohsi den diper napor nambur napisahanhe gur susa den dinmat oh Moh nihohe den asariya. Noh diporda da na dipor daham dahatahamhe dapri. Be yahwiwa daham denmur.  
\v 28 Susa dinmat tit han tit Mama apop hit mohri dasuh got ire asariya hitmur naporhan gur din orhor Ama ginapor han oh awammur dahat patim ginapor ma hapat daham ohe danong ham dapri. Mandanmur.  
\v 29 Gur dapri ma napor oh guragure da orhor Moh awam na dapti den ma hapat daham ha mandatingwe rim na ginapormur. Orhordapat moh na dapti denmur dahat pat ohe pe oh gurnong ginapormur. Gure Moh yahwiwa ma dahat pati da oh ohe Moh awammur ma napor ohe pe oh gur Moh arpin awam ma hapat daham mandatiproheda. Basra. Gure damdapat Yahwiwa dahat patim orhor ohe ma ginapornong oh daham ama ginapor han orhe danong ham mandanmur.  
\v 30 Gure Got ohnong weso por ma dapti oh kat han ihirdapat gurnong Moh er hayamur napor meng oh gure boknong nahatin ina hat patida. Basra. Gur Got ohnong weso por dapti ohoh ihan gurnong na ginapotin ina hat patimur.   
\p
\v 31 Nohe ma naporpat oh mamaru hat orhorwi ha patengwe rim naporpatmur. Gur den dam tom dam erer oh gonsi hatinmat oh Nuhur kinhayarit Got orhornong winsi han matiprohe daham orhornong winsi matin han erernong ohwi ihat sashenmur.  
\v 32 Ihat susa Juda bapo Juda na hat pati han bapo Got orhe nita hat pati han bapo ire danong er amtipririm ihan noh ire kintei yah da orhorwi pinggit pisasipora daham yah da pinggit pisashenmur.  
\v 33 Nohe ma yah hat sapatru hat orhor gurhe ihat orhor sashenmur. Nohe ma yah hat sapat oh mamaru hat sapatmur. Norhe boknong yah tahat indin ohe danongwi hat na sapatmur. Ihirnong pinggim amam hat paten ohe danong oh pinggim ihat sapatmur. Nohe ma ihat sapat oh ihir Got orhe ambutin hrepnong ha hatingwe rim ihat sapatmur.   
\c 11  
\p
\v 1 Nohe ma ihat sapat oh Krais orhe hat pat ohe tan hat sapat ohoh ihan gurhe norhe ma ihat sapatru hat orhorwi sashenmur.   
\s1 Kuuhan dir kakung ariyao na ariyao ham beten hapti ohe meng oh  
\p
\v 2 Gur nohe ma yah hat sapat ohe danong ham gurhe ihat orhor susa kat han ihir Got ohe pohon paten meng oh nohnong napotperhan noh gurnong napotporhan gurhe amram dindeiptio rim noh gurnong amam nahat napapatmur.  
\v 3 Nohe gin gure tit meng tit daham ha am hatingwe rim gurnong napotiprohmur. Krais oh Got orhe papat meng hrepdapat hat patmur. Iham papatin Krais ohdapat hanip bap dirnong orhe napapat meng hrepnong nahat napapatmur. Imat napapatin han dirdapat kuu ihirnong dire meng hrepnong mar paptimur.  
\v 4 Han dir Krais orhe napapat hrepdapat hat pati ohoh ihan gur kakung an patim orhor tandeim beten hayao Got orhe sawa meng riyao hapri. Kakung an patim ihyahan Krais ohe napapat hrepdapat hat na pati hatin hatiprohemur. Hanip guragur tit han ohe hrepdapat hatin hat patim ihapti ohoh ihan ohri ihapri.   
\p
\v 5 Kuu gurhe Nuhur han ire hrepdapat hat patiwa daham kakung ariptimur. Ihapti ohoh ihan gur kakung timbas patim beten hayao Got ohe meng oh poriyao hayahan han ire hrepdapat hat na pati hatin hat patim han ihirnong dasei mar ihaptimur. Ihan ama ihapti ohe da ohri hapri. Ihyahan kuu ihir kak bat pira ham mandama kak bat timbas kuu hatin hat pati ohoh ihan ama da ohri ihapri.  
\v 6 Kuu ihir kakung na anpera dahayahanoh kak batnong dapsi oh gatmar ha mandangwemur. Nuhur kak bat gatdeiyahanoh kassio dahapti ohoh ihan beten haya teio meng ma ritper riya teio oh kakungnong an patim beten haya mengriya ham ha patengwemur.  
\v 7 Han gur Got orhe dahapat da hatin hat orhor patim Got oh Mihat yahnap hat pat hanmur por orhe ihat pat da oh ihirnong pinggipti han gur ohoh ihan sawa meng rimo beten hamo hatin tei oh kakung na ariptimur. Kuu gurhe Nure han ihir mihat yah hat patimur dahatin ohe da oh pinggipat kuuo rim kakung ariptimur.   
\p
\v 8 Hanip dirnong Got oh ma namanhetipnong oh dahenmur. Got oh kuu ihirnongri manhema kuu ire tam ohsi han ihirnong manhetipda. Basra. Han ihirnongri manhepat ire tam ohsi kuu ihirnong manhetipmur.  
\v 9 Kuu uhri patina Gin kuu uhnong panggeim papten han tit darpatpora daham na darpatipmur. Basra. Han ohri patina Gin noh han ohnong panggeim papten kuu tit darpatpora daham darpatipmur.  
\v 10 Imtip ohoh ihan kuu ihir han ire hrepdapat hat pati ma hapat ha dahatingwe rim ihir kakung ariptimur. Kuu ire imat ma an patinong oh Got ohsi tap hat pati da enser ihir wamara Ihir kakung ma an pati oh han ire hrepdapat hat patim mihat patihe daham am haptimur.  
\v 11 Kuu ihir han dire hrepdapat hat ma pati oh Hanipyah orhe nita hat ma pati kuuhan bap diroh han gure da oh Nuhur nurarhe patim yah hat pati ma hapat. Kuu gurhe Nurarhe pati moh yah hat pati ma hapat dahapri. Basra. Kuusi hansi diradir da gosat patim gospanggeim gospanggeim ham yah hat patimur.  
\v 12 Gospanggeim gospangeim ham ma yah hat pati oh kuu gur han ire tam ohsi namanhetip orhor gin kuu gurdapat it han ihirnong sariptimur. Ihat ma kuuo hano tarpapti ohe duuptei han oh Got orhorwi hat patmur. Ihat pati ohoh ihan da gosapris gospanggeit patimur.   
\p
\v 13 Dir ihat pati kuuhan bap dir ohoh ihan beten hatin tei oh kuu ihir kakung ariyahan yahda da era daham guragur sam dahenmur.  
\v 14 Sam am hatinmat oh hanip diradire ma ihat dahapti danong asoh dahenmur. Dire ma dahapti da oh mamaru mat dahaptimur. Han dir kak bat na gatmar dapsi hat patin oh kuu tahem ire kak bat dap hatin hat pati moh por dasei mar wamat patimur.  
\v 15 Kuu ihir kak bat dapsi patin oh irairnong sup tapam yah hat patimur poriptimur. Ihat yahnap hat patimur ma poripti oh Got oh kuu ihirnong iraire kaknong kakung ohe tan an paten ohe kak bat oh apdap ma hapat daham ihat yah hat patimur poriptimur. Ihat poripti ohoh ihan beten haya tei oh kuu ihir kakung an patim orhor beten hayahanoh yahmur dahenmur.  
\v 16 Nohe ma napor meng moh nure meng ma pot pisaptio aptei aptei sios bap ma pati bap ihiro nuhur gonsi nohe ma napor meng ohe danongwi hat patimur. Ihat pati ohoh ihan gur wan danong hatpero dahayahanhe nure ma ihat pati danong moh Ihir ihat pati ma hapat daham am hatinmur.   
\s1 Korin aptei sios bap gur Hanipyah orhe danong ham tarmuriya tei oh er haptimur potip ohe meng oh  
\p
\v 17 Gin gure tap tei ham rotu hapti ohe sawa meng tit Gur ihat patenmur napotin ohe meng tit napotiprohmur. Nohe ma napotiproh oh guragure Got ohe danong hatinmat tarmur ma meng sariya tei oh Hanipyah ohe danong hatin ohe danong amkara na gospanggeim ihaptio rim noh na amam hat patmur.  
\v 18 Gure ma ihat patinong oh nohe ma na amam hat pat oh mameng mohri napotiprohmur. Kat han ihirdapat Korin aptei sios kuuhan ihir rotu ham tarmuriya tei oh ihir katket taham kat irarhe kat irarhe hat patimur napotperhan noh amram nohe daheri katpe tit gur arpin ihat patikin daham da er hat patmur.  
\v 19 Na katket tahat patin oh arpin danong hatin ohe da oh kinmat pinggitiprohe. Ihan gure ihat ma katket tahat pati oh kat gur arpin da oh kat ihirnong pinggim sus pitap teinong mar ihaptimur.  
\v 20 Ihtin orhora; gure Hanipyah orhe deno tomo dipero rim ma tarmuriya tei oh ohe danong ohwi ham na tarmuriptimur.  
\v 21 Guragure ma tarmuripti oh kat guragure tarmuriya tei den dipero rim mim apriri den oh kapkap orhor nahsi mat dama timbas deiptimur. Arwananah kat han ire danong na hatperhan ihir pahohsi hat patimur. Wain tom ma mim popririhe kat gur nahsi mat dama da ban taham da timbas hat saptimur.  
\v 22 Ama ihapti ohri na ihapti er da tit ham ihaptimur. Guragure aptei den damo tom damo hen ap oh ti na patda. Basra. Guragure aptei oh pat ohoh ihan ama ap oh tom damo den damo henmur. Gure ma ihapti oh Got orhe nita kuuhan ihirnong dasei matpera daham ihat saptida. Den timbas bisei hat pati bap ihirnonghe kas inasi matpera daham gur ihat saptida. Gur ihirnong er matinmat ihat sasipri. Gur Nuranure ma ihat saptinong moh Por oh ha amam nahatinoh daham gur ihat saptida. Basra. Por noh ihat sapti han bap gurnong na amam nahapatmur.   
\s1 Hanipyah orhe danong ham orhe boknong kis mar den tom dapti ohe meng oh  
\r (Matyu 26:26-29; Mak 14:22-25; Ruk 22:14-20)  
\p
\v 23 Nohe Gur Hanipyah orhe danong hatinmat mihat tarmur patenmur ma napotir oh Hanipyah orhor Ihir ihat tarmur norhe danong hat sa sasipri napor am nahatporhan orhe wanin meng orhor gurnong napotirmur. Ohe napotporhan nohe gurnong napotir meng oh mamaru hat patmur. Jisas ohnong nang han Judas oh Mama kwitem dus morhor mahaw han ire bes teinong matiprohwa dahatip ohe kwihan orhor  
\v 24 Jisas oh den tit dara orhe pinggit pisapat han ihirnong pandinmat Got ohnong weso pora brisbras pora Mohri norhe gure gwemat haputipra ohe ina bokmur namde. Ihan kaput gure mamaru mat ma dapri oh nohe gure gwemat ma haputipra ohe danong ham denmur por nitat mat apdapmur.  
\v 25 Apriporhan ihir dipari. Dama den dapti rih ma den panderu mat orhor wain tom san oh dara Gin mama diprohe wain tom moh norhe ma irat bok sur gartaham tanduketipra ohe heim ohmur. Ama heim ohsi Got orhe kopenohe dasi naham napaptepra ohe da oh norhe heim mama kumet kak ohe tan mat kak mat sar mama gurnong napir ohmur. Mama napir heim tom ma dam patepri oh norhornong Oh inahatip han sa daham norhe danong ham dam patenmur por ihirnong apdapmur.  
\v 26 Ihtin den heim tom napdap ohoh ihan gur orhe danong ham ihtin den heim tom ma dapti oh Hanipyah orhe dire gwemat ma haputip ohe da oh pinggim ihaptimur. Ama ihtin da oh pinggit orhorwi patiru patina kaput ohe apripra dik oh sa hatipra.   
\s1 Hanipyah orhe deno heim tomo oh adinmat oh dahe pomat sama adenmur ritip ohe meng oh  
\p
\v 27 Hanipyah orhe danong hen ohe den heim tom ohoh ihan Hanipyah orhe den heim tomo rim dinmat oh orhornong na armi mara be adayahanoh orhe ina bok tasum heim ma tanduketipnong oh bisei mar aer deiptimur. Ama ihapti bap diroh er yan datipriwa daham yan ham ihaptimur.  
\v 28 Ihtin ohoh ihan gur be mandus hamhe dapri. Dinmat oh gorhe Got ohe kintei ihat ma pat da oh sama gorhornong potahamwi denmur.  
\v 29 Hanipyah orhe ina bok ma dire gwemat tasutipnong na dahat patim Hanipyah orhe den heim tom oh be adayahanoh Got orhor Go er hapat hanmur napor er yan datin ohe danong ham ihaptimur.  
\v 30 Ama Hanipyah orhe ina boknong na daham dapti ohe pe oh kat kuuhan bap ruumsan gur ina gapa hamo sik hamo hat patimur. Ama ihat pati bap ihir ti ihir sik hama haputirimur.  
\v 31 Gurnonghe inahatiprarim gure Got ohe kintei ihat ma pati da oh sama yah tahapti Got orhe Go er hat pat hanmur napor gure boknonghe ruumsup na naprisiprohmur.  
\v 32 Diradire danong pomat sama na yah tahayahanhe Got orhor dirnong nasama da nadason mar dire boknong ruumsup napris da nadason deipatmur. Imat da nadason mar ruumsup ma napripat oh kaput kakdah er hat pati bap erer moh sama Moh er hanmur por ma mandatipra ire tapnong na nahatiprao rim dire boknong ina ruumsup napripatmur.   
\p
\v 33 Ihan norhe taptem bap gur Hanipyah ohe deno tomo oh dipero rim tarmuriya tei oh tit tit mathe den oh dapri. Guragur gonsi tap tei hapti gurgur tap mat den denmur.  
\v 34 Gur Hanipyah orhe danong ham orhe deno tomo oh adinmat oh pahoh hat patihanhe guragure ap orhor den dam kasip hama apris denmur. Pahohsi hat patim orhor apris Hanipyah orhe deno heim tomo oh adayahanoh orhe danong na hat patim be adiperhan Got oh Go er hanmur napor inahatiproh ohoh ihan gur ihat pahoh hat patimhe apris dapri. Gin oh gurnong napotin meng oh pat orhora; kimsi apris gurnong pomat napotipramur.   
\c 12  
\s1 Got orhe Yahsup oh tit pokwi orhora; nitat atamreindin da ma napripat ohe meng oh  
\p
\v 1 Nohe taptem bapa. Gin gur Got orhe Yahsup oh dirnong nitat tamreindin da ma napripat oh gur pomat daham ha am hatingwe rim noh mama meng moh napotiprohmur.  
\v 2 Guragure rih ma Got ohe danong hanhan hat patim ma pateshenong oh guragur am hat patimur. Gure rih ma pateshe oh guragure pohon ma pateshe da oh pranahat napisusa meng timbas dasuh got bap ire hrepnong nahatperhan gur ire danong ham ire hrepdapat hat pateshemur.  
\v 3 Gure gin dahatinnong oh Got orhe Yahsup ohsi ma pat han oh de han oh dahatper riyahanoh mohnong daham ha am hatingwe rim noh mameng moh gurnong napotiprohmur. Got orhe Yahsup ohsi ma pat han oh Jisas ohnonghe Bisei han er gwe timbas han go kapkap timbas hatina por ohnong na dasei matin ina hat patmur. Ihat pat ohoh ihan Jisas ohnong imat dasei deiyahanoh ama han oh Got orhe Yahsup oh ire mutuh oh na pat han ma hapat daham am haptimur. Jisas ohnong na dasei mar ohnong Go norhe Hanipyah napapat han gomur poripti han ihirnong oh Got orhe Yahsup oh ire mutuh patin orhorwi imat potin inasi hapti ohoh ihan ihat ma mengripti han ihirnong Moh Got orhe Yahsup oh ohe mutuh oh patin ihat mengripti han bap ihir ma hapat daham am haptimur.  
\v 4 Got orhe Yahsup oh nitat da ma yan timbas be napripat oh trun da napripat orhora; ma napripat ohe duuptei hat ma pat han oh Yahsup orhapmur.  
\v 5 Hanipyah orhe danong ham atamreindin oh trun nitat pat orhora; Hanipyah oh tit han orhap patmur.  
\v 6 Nitat atamreindin ina dasi hat patim ma atamreipti da oh trun nitat pat orhora; atamreindin inasi nahat ma napapat han oh tit han Got orhap napapatmur.   
\p
\v 7 Got orhe Yahsup ohe dirnong nitat da ma napripat oh hanip dir kasip gosham gospanggeit ha patengwe rim orhe nita bap gonsi dirnong nitat da napris napapatmur.  
\v 8 Got orhe Yahsup oh dirnong gospanggeit sashen nitat da ma napin pat oh mamaru hat patmur. Tit han ohnong ma apripat oh Got orhe meng oh dakuu mat porin ohe da oh apripatmur. Tit han ohnong ma apripathe Got orhe mengnong am hama kuuhan ihirnong porin ohe da oh apripatmur.  
\v 9 Ama tit Yahsup orhordapat tit han ohnong ma apripathe Got ohwi imtin hatin hanwa dahatin ohe da oh apripatmur. Tit han ohnong ma apripathe sik hat pati kuuhan ihirnong pomat pison ina da apripatmur.  
\v 10 Tit han ohnong ma apripathe hanip dire na imtin hatin han imtin ohe da oh apripatmur. Tit han ohnong ma apripathe Got orhe meng pot pison da apripatmur. Tit han ohnong ma apripathe hanip ire ma ihat tamreiyanong asoh wamar Moh Got orhe Yahsup ohsi indeipathe. Moh Got orhe Yahsup ohsi na indeipathe daham sam am hen ohe da apripatmur. Tit han ohnong ma apripathe meng tunmat hatin mengitin ohe da oh apripatmur. Tit han ohnong ma apripathe meng tunmat mengitperhan amram daham kat ihirnong potin ohe da oh apripatmur.  
\v 11 Ama ihtin trun nitat da ma napripat ohe duuptei hat ma pat Yahsup oh tit Yahsup orhapmur. Imat nitat mat ma napripat oh tit Yahsup orhap orhe da orhor Mama han ohnong mama da moh apripora. Mama han ohnong mama da moh apripora daham orhe damdapat orhor imat nitat da napripatmur.   
\s1 Dir tit inawi hat patim nitat ina pe atamreipti ohe meng oh  
\p
\v 12 Krais orhe ina titwi hat ma pat oh hanip dire ina nitat patinong oh dahatinmur. Hanip dire ina bok moh beso buho rumkin ina trun hat pat orhor ina boknong oh titwi hat patimur. Hanip dire ina bok ihat ma patiru hat orhor hanip bap dir orhe nita kuuhan trun bap hat pati orhor Krais orhe ina bok oh titwi hat patmur.  
\v 13 Dir ihat trun han bap hat pati orhor tit inawi hat ma pati oh mamaru hat patmur. Juda hat pati han bapo Juda na hat pati han bapo ire hrepdapat nang tatpat patim be atamreipti han bapo ire hrepdapat nang na tatpat patim be han hat pati han bapo ama trun han bap hat ma pati han bap dirnong oh Got oh orhe Yahsup oh dire mutuhnong namtiporhan dir tap hat patim tom wasa Krais ohe ina ohsi dir tit inawi hat patimur.   
\p
\v 14 Dir Krais orhe ina boknong tit inawi hat patim orhe nitat atamreindin ma napripat oh hanip diradire inanong moh dahatinmur. Dire ina moh tit ina pe ohwi hat na patmur. Ina pe pe moh trun hat patmur.  
\v 15 Ama ina trun oh tong tan ohdapat Nohri bes tan na hat pat ohoh ihan noh hanip ina hat na patmur rihanoh oh giritiproh orhor oh hanip ina hat patim orhor giritiprohmur.  
\v 16 Nat ohdapathe Noh kin na hat pat ohoh ihan nohri hanip ina basmur rihanoh oh giritiproh orhor oh hanip ina hat patim orhor giritiprohmur.  
\v 17 Dire ina pe pe moh trun hat patin yah hat ma pat oh mohnong dahatinmur. Ina moh kin orhap patneng kinhat hanip meng amraptineng. Ina moh nat orhap patneng kinhat erer gapgwe moh amraptineng.  
\v 18 Hanip dire ina moh ihat tit hanwi hat na patmur. Got orhor Hanip dire ina pe pe moh imat nitat mat atpora daham nitat ina pe pe moh natipmur. Orhor imat ina pe pe moh natip ohoh ihan hanip dir nitat ina pesi hat patimur.  
\v 19 Ihat nitat ina pesi hat na patim tit ina pe orhap hat patineng hanip ina hat na patinengmur.  
\v 20 Orhor hanip dire ina moh trun pe natip ohoh ihan dir ina trun pesi hat patimur. Ihat trun ina pe hat pati orhor ina gonsinong oh tit inawi hat patimur.   
\p
\v 21 Kin oh bes ohnong Go na patnenghe noh norhap yah hat patnengmur potiprohda. Basra. Na gipotiprohmur. Kak ohhe tong ohnong Go na patnenghe noh norhap yah hat patnengmur potiprohda. Basra. Na gipotiprohmur. Ina pe pe moh gonsi patin yah hat pati ohoh ihan kinhat ihat giritiproh.  
\v 22 Ihat na mengira hanip dire ina pe moh gapa hat pat pe moho ma poripti pe oh na patneng atnap ina moh er hat patnengmur.  
\v 23 Ina pe moh na yah hat patmur ma dahapti penong oh awat mar yah mat paptimur. Ina moh kas ham hahram hat ma pati penong oh yah mat orhor apam giamar pomat paptimur.  
\v 24 Orhap yah hat ma pat penong yah hat pato rim giamat na paptimur. Dire ina orhap na yah hat pat penong moh winsi matpora daham awat deiyao giadeiyao ma hapti ohe da oh Got orhor ama na yah hat pat pe ohe danong ham ihat ha patengwe daham natipmur.  
\v 25 Yah hat na pat pe ohe danong ham ha paptengwe rim ma natip da oh ina kat pe kat pe yot itait sakarap goshat patepririm tap kat da titwi gospanggeit ha patengwe rim ama da oh natipmur.  
\v 26 Dire ina moh tit inawi ham gospanggeit pati ohoh ihan tit pemdapat tit ina ruum darhanhe gonsi ina pe moh ire ruum dariptimur. Tit pemdapat tit armi matin da hahhanhe gonsi ina pe moh irair tap mat ama ohe amam oh dariptimur.   
\p
\v 27 Amaru hat orhor Krais orhe buh bes ina ham titwi hat patmur.  
\v 28 Dir orhe buh bes ina ham nitat ina pe hat ma pati oh mamaru hat patimur. Got oh dirnong ma Krais orhe boknong naham ma Norhe natamreindin oh mohri hat patmur daham ma napripat oh aposer hat paten ohe da napripatmur. Komdapat tipnerip atamreindin ma napripat oh orhe meng pot pisashen da napripatmur. Bimrip ma napripat oh meng am mat pisashen da napripatmur. Ama ohe komdapat ma napripat oh hanip dire na imtin hatin han asoh imtin da napripatmur. Ama ohe komdapat ma napripat oh sik hat pati han ihirnong pondeiyao arwananah ihirnong panggeit pisayao kat ihirnong ire hrepnong mar papayao meng tunmat hatin meng riyao ama ihat nitat hat atamrein ohe da oh napripatmur.  
\v 29 Ihat Krais orhe boknong ham orhe ina pe pe oh nitat atamreindin da napripat ohoh ihan dir gonsi aposer bapwi hat na patimur. Dir gonsi Got orhe meng pot pisashen han bapwi hat na patimur. Dir gonsi meng am mat pisashen han bapwi hat na patimur. Dir gonsi hanip dire na imtin han imtin ina han bapwi hat na patimur.  
\v 30 Dir gonsi sik hat pati han ihirnong pomtin ina hat na patimur. Dir gonsi meng tunmatin mengnong ritin ina hat na patimur. Dir gonsi tunmatin meng ritperhan dapuker ritin ina hat na patimur. Got oh nitat atamreindin ina nahatporhan nitat ina pesi hat patimur.  
\v 31 Got orhe nitat atamreindin da ma napripat oh orhe Mohri hat patmur ma dahapat da oh ha napinoh daham ama datin ohe danong ohri hat patenmur.  
\p Got ohe atamreindin oh nitat mat napin pat orhora; ama nitat tamreindin oh mama napotiproh ohe hrepdapatwi hat patimur.   
\c 13  
\s1 Hanip ihirnong da apris bopor deipti da oh ohri kamen tahat patmur ritip ohe meng oh  
\p
\v 1 Gin hanipnong da apris bopor deipti da ohri kamen tahat pat meng oh napotiprohmur. Hanip dir kakdah moh ohe among among ohe hanip ma pati bap ire mengo Got ohsi tap hat pati han enser bap ire mengo oh gonsi dir am hat patim orhor hanip ihirnong da na apris na bopor mat paptim mengriyahanoh oh be waron meng deiyao be tinsan bar meng deiyao mar hanip ihirhe na amratin meng mara be ire natnong akimar meng deiptiru hat mengriptimur.  
\v 2 Dir Got ohe meng pot pison ohe dao Got ohe reman papat danong am ham potin ohe dao erernong gonsi am hatin ohe dao Got ohnong Ohwi imtim hatin hanwa dahat patimdapat yeinong Yei go gin tanggoshet wan teinong sonmur por imtin ohe dao hat patimdapat hanip ihirnong da na apris na bopor deiyahanoh dir be han bap hat patimur.  
\v 3 Dir dire erer oh borop han ihirnong apriyao Diradire ina moh namrin napisus irat teinong nahayahanhe yahwa daham diradire ina moh ihirnong apriyao hatiprohe orhor hanip ihirnong da na apris na bopor mat patim ihat saptihanoh ama ihat sapti da oh hanip dirnong na napanggeitin da ohsi ihat saptimur. Ihan hanip ihirnong da apris bopor deipti da kamen tahat na patin ohri ihathe sasipri.   
\p
\v 4 Hanip ihirnong da apris bopor deipti da oh dire mutuh patin oh dir hanip ihirnong kapkap heisup na mara manap da tei orhorwi pomar paptimur. Hanip ihirnong da apris bopor deipti da oh dire mutuh patin oh arwananah ire ihat patinong asohwi wamara Noh ihat patnengo ihir ihat na patinengo gidaham abopor deipti dao Nohwi ihtin han hat patwa daham armi tahat sapti dao ama da oh dire mutuh oh ti na pat hatiprohmur.  
\v 5 Hanip ihirnong da apris bopor deipti da oh dire mutuh patin oh dir arwananah ihirnong asoh kas hatin inasi deiyao diradire dahat son ina danongwi hat sayao kapkap heisup ham ihirnong heisup da deiyao arwananah ihirdapat dirnong ma inahapti danong asoh sam dahayao oh ihat na saptimur.  
\v 6 Hanip ihirnong da apris bopor deipti da oh dire mutuh patin oh dir ire er hat saptinong asoh wamar na amam haptimur. Arpin dasi hat patim yah hat ma saptinong asoh wamar amam haptimur.  
\v 7 Hanip ihirnong da apris bopor deipti da oh dire mutuh patin oh kat ihirdapat kat ire boknong dasuh inin meng oh ire boknong deiyahanhe dir ire meng oh na amram bopor mat orhor paptimur. Ama da oh patin oh dire Got ohe danong hat pati da oh gapa ham na mandaptimur. Ama da oh patin oh dire Got ohe yah naham inahatiprawa daham amam hat ma minhan pati danong oh gapa ham na mandaptimur. Ama da oh patin oh gonsi ruumsup ma apripatnong oh na gapa ham kasip hat orhorwi patimur.   
\p
\v 8 Hanip ihirnong da apris bopor deipti da oh na timbas hapat da ohmur. Got ohe meng pot pisapti dao meng tunmat hatin ma mengripti dao erer ma am hat pati ohe dao ama da gonsi oh timbas hatipramur. Hanip ihirnong da apris bopor deipti da ohwi na timbas ham patru patepramur.  
\v 9 Dire erer ma am hat pati dao Got ohe meng pot pisapti dao oh kopen pomat am ham tap kat hat na patim ihat saptimur.  
\v 10 Ama ihat sapti da oh kaput Got oh gonsi am hatin ohe da oh ma pitap matipra dik oh kat kat hat ma am hat pati danong oh amkar timbas matipramur.  
\v 11 Gonsi am hatin da ohsi kat kat hat ma am hat pati danong ma timbas matipra da oh mamaru hat patmur. Dir brer gar hat patim brer ire meng ripti dao dahapti dao hat pateshemur. Ihat patin hanip yah hapti brer ihsen hat patim ma dahat pateshe danong oh mandaptimur. Amaru hat orhor gin dire mama kat kat ma am hat pati da moh mandatiprimur.  
\v 12 Gin mama kat kat am hat pati da moh dire tom hru temnong tom kakeir wamar rumkin pomat na wandeiptiru hat patimur. Kaputnong oh orhe rumkin teinong ham wamara pomat am hatiprimur. Gin dir orhe pat danong ma am hapti oh kat kat pok am haptimur. Kaputnong oh orhordapat dirnong am hat patru hatin hat orhor orhornonghe dir imat orhor pomat wamara am hatiprimur.  
\v 13 Gino kaputo na timbas ham dipwi ma patepra da oh mama yitir muk mohmur. Tit oh Got ohwi inahatin hatin hanwa dahapti da ohmur. Tit oh Got ohe dirnong yah naham inahatiprawa daham amam ham minhan pati da ohmur. Tit oh hanip ihirnong da apris bopor mat papti da ohmur. Ama na timbas ham dipwi ma patepri da muk ohri kamen tahat ma pat oh hanip ihirnong da apris bopor mat papti da ohmur.   
\c 14  
\s1 Got orhe meng pitap teinong mar potin ohe danong oh kasip ham patenmur ritip ohe meng oh  
\p
\v 1 Hanip ihirnong da apris bopor deipti da oh ohri kamen tahat pat ohoh ihan gur Nuhur ohe danongri hat sasipera daham ohe danong hat son ohe danong ohri kasip hat orhorwi sashenmur. Susa Got ohe Yahsup ohe nitat tamreindin napripat da oh datpora dahenmur. Daham Got orhe meng pot pison da ohri datpora daham ha napinoh rim orhornong dahandeinmur.  
\v 2 Noh gur Got orhe meng pot pison ohe danong mohri datpor daham datinmat oh orhornong dahandeinmur ma napor oh mama danong ham napormur. Dir meng tunmatin hatin ma mengripti oh hanip ihir na amratin mengnong ripti ohoh ihan hanip ihirnong meng potinmat ihtin meng oh na mengriptimur. Got orhornongwi meng potinmat ihtin meng oh mengriptimur. Ihat ma mengripti oh Got orhe Yahsup ohe kasip ohsi pitap tei pat meng oh na rima treman pat mengnong ohwi riptimur.  
\v 3 Ihat na rima Got orhe mengnong pitap teinong mar riyahanoh hanip ihirnong da adapeyao ire ruum hat pati danong pang mar ayah deiyao hanip ire danong akasip deiyao matin meng ohmur.  
\v 4 Meng tunmat hatin hat ma ripti ihiroh iraire danongwi kasip mar ihat mengriptimur. Got orhe meng oh pitap teinong mar ma poripti han ihiroh Got orhe nita kuuhan sios bap gonsi ire danong adapema kasip mar ihat meng poriptimur.  
\v 5 Noh Gur meng tunmat hatin mengripti meng oh gonsi ihat ha mengitingwe dahat patmur. Ihat dahat pat orhora; noh isipnap ma dahat patnong oh Got orhe mengnong mohwi pitap teinong mara pot ha pisashengwe isipnap dahat patmur. Meng tunmat hatin hat ma ripti meng oh it dapuker pitap teinong mar ritin han oh ti na pathanoh kinhat da tanper ihir am hatiprohe. Ihat pat ohoh ihan meng oh it dapuker pitap teinong mar ritin han oh ti na pathanoh Got orhe meng pitap teinong mar porpat han ohri hat patmur.   
\p
\v 6 Gur mohnong dahatinmur. Noh gure pati tei oh aprisa meng tunmat hatinwi meng oh naporhanhe gure danong nadapem napanggeitin meng napotiprohda. Basra. Gurnong na napanggeitin mengwi napotiprohmur. Gurnong napanggeitin meng oh mamaru hat patmur. Got oh norhe da teinong ma pitap teinong mar namgit napapat mengo Got orhe ihat pat da mengo gurnong am nahatin ohe mengo ama Got orhe meng ohwi gurnong naporhanoh gurnong napanggeitin meng hat pat ohoh ihan ama ihat pat meng ohwi naporhan gurhe daham am hatiprohemur.  
\v 7 Meng tunmat hatin mengitperhan hanip dir ma na amrapti oh mohnong dahenmur. Tarbeo warono ma meng deipti oh be meng deiyahanoh kinhat ama han ohe boknong mar meng deiya ma hapat daham am hatiprohe. Ga rim pomat orhor meng deiyahanoh ama han ohe boknong mar mimat meng deiya ma hapat daham am haptimur.  
\v 8 Gusutinmathe pomat orhor na uriyahanoh Gin gusutinmat uriyahe daham am hatiproheda. Basra. Pomat na amram na am hatiprohemur.  
\v 9 Amaru hat orhor gur na dahatin meng tunmat hatin hat riyahanoh hanip ihir kinhat amram am ham dahatiprohe. Be pupuka hatin ham timbas hapat meng ohoh ihan pomat na amratiprohemur.  
\v 10 Aw pe mong pe mong moh nitat meng ma mengripti oh hanip amram am hatin mengnongwi riptimur. Be mengwi na riptimur.  
\v 11 Amram am hatin mengwi ripti orhor nohe na amrapat mengtei naporiyahanoh noh amram ama meng naporiya ma hapat daham am hatiprohda. Basra. Noh na amrapat meng ohoh ihan ama napor han ohsi nuhut hahap goshat hatin hat pateprohemur.  
\v 12 Gur amaru hatipririm Got orhe Yahsup orhe nitat tamreindin ma napripat danong datpero daham kasip hat ma pati bap guroh ama na gospanggeit indin ohe danong ohri Nuhur dara ama da ohsi tamreinper dahapri. Gospanggeit indin ohe danong ohri daripti gospanggeim tamrein inpera daham ama datin ohe danong ohri kasip hat orhor patenmur.   
\s1 Meng tunmatwihe mengripri. Pitap teinong mar meng porinmur potip ohe meng oh  
\p
\v 13 Guragur gospanggeit indinmat oh meng tunmat meng hatin mat napirhanoh gurdapat Got orhornong Gin gorhor mimat napir meng moh it dapurkera kuuhan ihirnong potin ohe da napinmur por dahandeinmur.  
\v 14 Hanip dir meng tunmat hatin hat mengir Got ohnong poriyahanoh orhe Yahsup oh dire mutuhdapat patim porpat orhora; daham sus potinnong oh orhornong na poriptimur.  
\v 15 Ihat pati ohoh ihan noh Got ohnong meng potinmat oh Yahsup oh norhe mutuhdapat patim ma porpat meng ohsi; norhe damdapat dahapat meng ohsi; tap mat Got orhornong potiprohmur. Got ohnong armi matin ohe ga ritinmathe Yahsup oh norhe mutuhdapat patim porpat meng ohsi; norhe damdapat dahapat meng ohsi tap mat Got orhornong potiprohmur.  
\v 16 Dir Got orhe Yahsup ohe napripat meng tunmat hatin mat orhorwi Got ohnong weso poriptin oh na amratin meng ohoh ihan be ma pati kuuhan ihir kinhat amrama Moh arpin meng ripti ma hapat daham arpinwa ritiprohe.  
\v 17 Dir imat yah meng potiprohe orhor ihir na amratin meng ohoh ihan ire danong kinmat akasip matiprohe. Na akasip matin hatin hat patmur.   
\p
\v 18 Gure meng tunmat hatin mengripti meng oh gar pang pok ihaptimur. Nohe ma ihat mengripatnong oh ruumsan hat ihpatmur. Nohe ihat ruumsan ma ihpatnong oh Got oh ihat ruumsan napripato rim noh orhornong weso porpatmur.  
\v 19 Noh ruumsan ihat mengripat orhora; Got orhe nita bap gure ma tarmuriya tei oh noh meng tunmatin yahnap meng oh dapsi hat patin orhor gur na dahatin meng hat pat ohoh ihan gurnong na napotiproh dahapatmur. Dahatin bok mengwi gurnong naporhan yaho dahapatmur.   
\p
\v 20 Nohe taptem gure meng tunmatin meng danong isip hat ma pati oh brer ire iraire indin danong hat ma patiru hat patim ihaptimur. Ihat brer ire hat pati da hatin hatheri patepri. Hanipyah ham ma gospanggeit sapti da hatin hat orhor sashenmur. Er danong hatipririm brer ire ma er danong hanhan hat pati da hatin hat orhor patenmur.  
\v 21 Gur Got oh ritporhan ma brak matpa mengnong moh amram meng tunmat hatin ma mengripti meng oh na napanggeitin meng ma hapat dahatinmur. Got oh ritporhan ma brak matpa oh mamaru hat patmur.  
\q1 Got noh wan aptei pati han ihirnong norhe han bap ire patinong darhetporhan ihir apris iraire mengripti meng tei norhe meng oh poripri orhor ihir na amram garnaham napapteprimur.  
\m ritporhan brak matpamur.  
\v 22 Ihan meng tunmat hatin hat ma mengripti oh Got orhe danong hat pati han ihir Maihir Got ohsi patim ihapti ma hapat ha dahatingwe rim ihat na mengriptimur. Orhe nita hat na pati ihir Maihir Got ohsi patim ihat mengripti ma hapat daham ha am hatingwe rim ihat mengriptimur. Got orhe meng oh pitap teinong mar ma poripti oh Got orhe danong na hat pati ihirnong panggeitinmat na poriptimur. Orhe danong hat ma pati bap ihirnong panggeitinmat poriptimur.   
\p
\v 23 Gin mohnong dahatinmur. Got orhe nita kuuhan bap gur tarmuriya tei oh gonsi guragur meng tunmat hatin hatwi mengira ihirnong gonsi gur meng poriyahanoh Got ohe danong na hat pati bap ihiro orhe danong pomat na dahapti ihiro ihir maras patin oh tunmat hatin ma mengriya meng oh ihir amram Maihir da timbas hat patim ihat mengripti ma hapat napotiprohemur.  
\v 24 Ihir imat napotipririm gur meng oh tunmat meng hatin hatwi mengripri. Got ohe meng oh pitap teinongwi mat orhor meng porinmur. Imat meng poriyahanoh Got ohe danong na hat pati bapo ohnong pomat na dahapti bapo ihir maras patin oh meng gonsi meng oh ire mutuhnong rosa Gur ihat er hat pateshe han bapmur por ihirnong am matporhan ihir Epe. Nuhur ihat er hat pateshe bap ma hapat daham am hatiprohemur.  
\v 25 Am hama iraire hanhan hat patim ma er hat sashe danong oh meng oh pitap teinong amtiporhan ihir am hatiprohemur. Am hama bos hamnong ham timama Arpin Got oh gure mutuh moh patin ihat meng naporiptimuro napor Got orhornong armi matiprohemur.   
\s1 Yah hat orhorwi rotu ham patenmur ritip ohe meng oh  
\p
\v 26 Ihan nohe taptem bap gure rotu hatinmat tarmuriya tei oh nitat atamreindin pat ohoh ihan sios bap ihirnong kasip mat pisonmat oh nitat atamreinmur. Nitat atamreindin da oh mamaru hat patmur. Ga ritin ohe dao meng am mat pison ohe dao Got oh orhe da teinong mar pinggit papat ohe da meng potin ohe dao tunmat meng potin ohe dao tunmat mengriya meng it dapuker potin ohe dao ama ihat nitat atamreindin da oh kuuhan ihirnong kasip mat pisashenmatwi ihat atamrein sashenmur.  
\v 27 Kasip mat pisonmat oh tunmat hatin hat ma mengripti mengnong oh tit hando yot hando yitir han pok tit ihat mengitper dahayahanoh ama ihat han gur kimur. Trun hanhe ihat mengit sasipri. Yot hano yitir hano gur ihat mengitper dahayahanhe tap hathe mengripri. Tit tit hat orhorwi mengrinmur. Ihat tit tit hat orhorwi mengitperhan tit han tit dapuker por tit han oh dapuker por meng pitap teinong mar ha poringwemur.  
\v 28 Imat dapuker potin han ihir ti na patihanoh meng tunmat hatin mengtei poripti han gur ihat tunmatin mengtei poripri. Kimirinmur. Kimirima guragure damdapat orhor Got ohsi ama tunmatin mengtei oh mengrinmur.   
\p
\v 29 Got ohe meng pitap teinong mar pot pisashen han gurhe yot hando yitir hando gurwi Got orhe meng oh tit tit hat potinmur. Meng napotperhan ameng amraya han gurhe pomat amrama sam apera dahenmur.  
\v 30 Ihat patin tit han oh Got ohe meng oh ripatin Got oh tit han ohe da mutuhnong Gin go mameng moh ritinmur por am deihanoh ma ripat han go kimiritporhan ohe ma am dei meng oh ha ritinohmur.  
\v 31 Ihat tit tit hat tandeim meng poriyahanoh Got orhe meng potin meng ma napir meng oh gonsi gon pora ihirnong am mara ire danong akasip mar ayah mat pisaprohemur.  
\v 32-33 Got oh meng sinisine dus mengitin da na nahama manap da teiwi mengitin dasi nahat napapat han ohoh ihan gur mengitinmat oh tap hathe mengripri. Got ohe napin pat meng oh ihirnong potin ohe da oh guragure hrepnong mat paptim orhor tit tit hat meng porinmur.   
\p
\v 34 Got orhe nita bap aptei aptei rotu hatinmat tarmuriya tei ma kuu ihir meng na por ma kimirit patiru hat orhor Korin sios bap gurhe ihat orhor na mengir kimirit patenmur. Kimirit indinmat oh rih Moses ohe sawa meng oh Kuu ihir han ire hrepdapat hat ha patengwemur rim ma brak matipru hat orhor han ire hrepdapat ham kimirit patenmur.  
\v 35 Ihat kimirit patimdapat kian meng sa dahayahanhe sus guragure pati apnong sus han ihirnong kian meng sa riya por dahandeinmur. Tarmuriya tei orhor kuu ire meng ma poripti oh kassi da ohoh ihan kuu gur tarmuriya tei oh menghe poripri. Kimirit patenmur.   
\p
\v 36 Wa. Sios bap gure sinisine rit ma mengripti oh gur Got ohe meng oh Nuhurnongri napriporhan nure duup mamdapat tarpam ihat sapatmur daham gure ihat mengriptida. Basra. Gure duup ohri Got ohe meng oh ihat na tarpatip ohoh ihan aptei aptei ire ma hat rotu haptiru hat orhor rotu henmur.   
\p
\v 37 Korin aptei pati sios bap gure mutuh oh Noh Got ohe meng pot pison han hat patmur. Noh Got ohe Yahsup oh nohe mutuh patim ihat pat hanmur ma dahapti han ihir gure mutuh patihanhe nohe brak mat gurnong nasar meng moh sama Moh arpin Got orhe sawa meng oh nasar ma hapat sa dahatiprohe.  
\v 38 Ama ihat Noh Yahsupsi pat hanmur ma ripti han ihir Moh Got orhe sawa meng oh nasar ma hapat na dahayahanoh gurdapat ama ihat na dahaya han ire meng ohri gur amrapri.   
\p
\v 39 Ihan nohe taptem bap gur Got orhe meng pitap teinong mar porin ohe danong ohri datper daham ohe danong ohri hat patenmur. Ihat patim kat ihir meng tunmat hatin hat mengitper daham ihyahanhe baso poripri. Ihat mengir ha poringwemur.  
\v 40 Ihat mengitinmat sinisine temhe mengir rotu hapri. Yah hat orhorwi tit tit hat mengiro rotu ham patenmur.   
\c 15  
\s1 Krais oh hapura it masas sapatin wamtipa ohe meng oh  
\p
\v 1 Nohe taptema. Gin nohe rih gurnong ma napotir yah meng oh it gure danong napamsas napotiprohmur. Ama yah mengnong gur Moh arpin menghe daham marin patimur.  
\v 2 Ama yah mengnong oh kasip ham orhor marin orhorwi paptin Got orhor nambutipramur. Imat marin na paptihanoh dam timbas meng mar be mandaptimur.   
\p
\v 3 Duuptei meng oh mohmur napor nohnong am nahatperhan noh ama duuptei meng oh gurnong napotirmur. Ama duuptei meng ma napotir oh mamaru hat patmur. Meng oh Krais orhe boknong mar ma brak matparu oh arpin dire er hat sapti yan oh dara orhe boknong mar haputirmur.  
\v 4 Haputporhan arpin orhe boknong mar ma brak matparu mat orhor ohe seinhe kwei tem itpamur. Itperhan gahan yot dah timama bimrip oh masas pipmur.  
\v 5 Masas susa gahan Pita ohe kintei oh pitap hatporhan oh wamtipmur. Wamara gahan orhe pinggit ma pisasuh han aposer ire kintei oh pitap hatporhan ihir gonsi wamtipamur.  
\v 6 Gahan orhe danong hat pati kuuhan 500 tit hama it kuuhan ruumsan bap ihir tarmut patin ire mutuh oh pitap hatporhan ihir wamtipamur. Ama wamtipa kuuhan bap ihir kat tit haputirimur. Han ruumsan ihir patimur.  
\v 7 Gahan komdapat Jemis ohe kintei pitap hatporhan oh wamtipmur. Gahan it komdapat orhe mengtei ohe meng pot pisashe han ire kintei pitap hatporhan ihir gonsi wamtipamur.   
\p
\v 8 Gahan komdap pepe oh nohe kintei pitap hatporhan noh wamtipmur. Nohe ma wamtip oh kuu ihir Gin brer indin dik hah ma hapat na dahat patim gamat ma sariptiru hat orhor noh ihat patin noh Jisas ohnong wamtipmur.  
\v 9 Noh ihat patin ma wamtip oh Noh Got orhe nita ihirnong er mat pisapat dus orhor noh wamtipmur. Noh ihat patesuh han ohoh ihan nohnong Moh Jisas orhe mengtei atamrein sapat han ma hapat napotin inasi hat na pat hanmur. Noh ihat pat ohoh ihan noh Jisas orhe mengtei atamrein sapti han ire win hrepdapat hat pat hanmur.  
\v 10 Noh ihtin han hat patin orhor Got orhe damdapat orhor Ohnong yah matpora daham orhe da orhor yah nahatporhan gin noh mama ihtin han hat pat ohmur. Got orhe da orhor ma yah nahatip da oh na wa hama arpin dam tarpama mama dam timan sapat ohmur. Ihat dam ma timan sapat oh ire Krais ohe mengtei kasip hat ma atamrein sapti oh noh atnap kasip hat orhor atamrein sapatmur. Nohe ihat kasip hat orhor ma atamrein sapat oh norhe kasip orhor ihat sapatda. Basra. Got orhe damdapat orhor kasip nahapat kasip ohsi ihat atamrein sapatmur.  
\v 11 Nohe ihat ma atamrein sapat oh meng oh ire mengsi; nohe naporpat mengsi tap meng orhor napot napisaptimur. Ihat napot napisapti mengnong oh ihirdo nohdo napotperhan gur amrama Moh arpin menghe daham dindeiptimur.   
\s1 Haputpa han ihir it masaprimur ritip ohe meng oh  
\p
\v 12 Gur mohnong dahatinmur. Nuhur tap meng orhorwi Krais oh haputporhan Got oh it pamsaporhan masas patmur napotperhan gur amram am hat patimur. Ama mengnong oh gur am hat pati ohoh ihan kianorim kat han gur Hanip nuhur hapuriyahan it na masaprimur ripti.  
\v 13 Hanip dir haputperhan Got oh it da na napamson ina hat pathanoh ihan Krais ohnonghe it da na pamsuhuphe dahenmur.  
\v 14 It da na pamsuhupneng nure ma naporipti meng oh be meng hat patin nuhur gurnong napotperhan gur Moh arpin menghe ma dahapti oh be arpin menghe dahaptinengmur.  
\v 15 Nuhur Got oh Krais ohnong it da pamsuhupmur naporipti ohoh ihan oh imat na pamsuhupneng nuhur dasuh meng napor Got ohnong dasuh han hatin deiptinengmur. Hanip dir haputperhan Got oh it da na napamson ina hat patneng ihan Krais ohnonghe it da na pamsuhupnengmur. Got oh imat na pamsuhupneng nuhur gurnong dasuh meng naporiptinengmur.  
\v 16 Hanip dir haputperhan Got oh it da na napamson ina hat patneng ihan Krais ohnonghe it da na pamsuhupnengmur.  
\v 17 Got oh Krais ohnong it da na pamsuhupneng gure Arpin meng naporiptihe ma dahapti da oh be patin er da hrepdapat hat orhor patinengmur.  
\v 18 It na pamsuhupneng ihir Krais oh nuhurnong napamsaprawa daham ma hapuriya han ihir it da mason inasi na hama eimat timbas haptinengmur.  
\v 19 Dire Krais ohwi inahatin hatin hanwa ma dahapti da oh kakdah morhorwi dar ihat patihanoh ama ihat pati bap diroh hinhinsi hat pati bap dirmur. Dire ma hinhinsi hat ma patinong oh isipnap hat patimur. Be ire ma hinhinsi hat patinong oh gar hat patimur.   
\p
\v 20 Got oh Krais ohnong it da na pamsuhupneng dir er hat patinengmur. Ohnong it da pamsuhup ohoh ihan dirhe gin mama yah hat pati ohmur. Ohnong imat ma pamsuhup oh dir Ohnongri imat pamsuhup ohoh ihan dirhe haputperhan amaru mat orhor dirnongri napamsaprawa dahat patimur.  
\v 21 Ihat masapriwa ma dahapti oh mamaru hat dahaptimur. Gonsi ma hapuripti oh tit han ohe bokdapatwi tarpam hapuripti ma hapat dahaptimur. Ama ihat dahaptiru hat orhor da ma masaprihe tit han Krais orhe dap teidapat orhorwi gonsi hapura it da masapri ma hapat dahaptimur.  
\v 22 Gonsi dir Adam ohe puh hat pati ohoh ihan dir gonsi hapuriptimur. Amaru hat orhor Krais ohe tapnong hat pati dire da oh Got oh it gonsi napamsapramur.  
\v 23 Imat ma napamsapra oh Krais ohnongri pamsuhupmur. Komdapat orhe ma apripra dik oh orhe tapnong hat pati bap dirnong napamsapramur.  
\v 24 Napamsa tei oh kakdah mong erer oh gonsi timbas hatipramur. Imat timbas hatporhan Krais oh kakdah mohe supsi han ire duuptei hano hanip ire hrepnong mar papti kasip dao erer ohe kasipo ama Got ohnong mahaw mat papti erer gonsi ihirnong ambapte mar timbas matipramur. Indeipat itap ohnong Gin At go erer moh gonsi gorhe hrepnongwi mar paptenmur por orhe bes teinong mat mandatipramur.  
\v 25 Imat ma mandatipra oh Krais oh erernong gonsi tonggamar orhe hrepnong mar timbas matin ina mat papat ohoh ihan gonsi mahaw ihirnong orhe hrepnong mar tonggamar timbas matipramur.  
\v 26 Imat timbas mat pisusa pepe ma mahaw nahat napapat han ohnong ma timbas matipra oh hapuripti danong oh pepe timbas matipramur.  
\v 27 Krais oh orhe hrepnongwi mar imat ma timbas matipra oh ma brak matpa mengru mar imat timbas matipramur. Imat timbas matipramur ritporhan ohe boknong mar ma brak matpa oh mamaru hat patmur. Got noh erer oh gonsi Krais orhe hrepnongwi mar sa paptepra rim orhe hrepnongwi mar mandatipmur ritporhan brak matpamur. Got ohe imat erer oh gonsi Krais orhe hrepnong mat mandamur ma potip oh orhornong oh noh Krais orhe hrepnong hat patmur daham na giritipmur. Orhordapat erer oh gonsi Krais orhe hrepnong deipat han ohoh ihan Got orhe boknong ham na giritipmur.  
\v 28 Gonsi erer oh Krais ohe hrepnong mat mandatporhan Krais ohdapat Gin erer gonsi moh norhe hrepnongwi nadei han oh gin norhorsi; han bap gonsi nure duupteinap han hat ha patenohmur. Oh ihat ha patenoh rim noh orhe hrepdapat hat patepramur daham itap orhe hrepnong hatipramur.   
\p
\v 29 Hanip dire da oh hapur it masapri ma hapat dahatinmat oh mohnong dahenmur. Kat han ihir ma haputiri han ihirnong Ihir tom na waihim patin haputiri ohoh ihan nuhur ire ohsi tap hat wapera daham ma tom wapti oh ihir it masapriwa daham ihat ire ohsi tap hat tom waptimur. Got oh hanip gonsi dirnong na napamson ina hat patneng ire ma ihat daham tom ma waptihe be ihat daham tom waptinengmur.  
\v 30 Nuhur hapur sus it na masapti ma hapat dahaptineng nuhur mahaw ire dipwi er naham nitin ina nahat napapti dusnong asoh nuhur meng pot pisaptinengda. Basra. Ihat na saptinengmur.  
\v 31 Nohe taptem bapa. Ihir nohnong er nahatperhan nohe dipwi ma haputin ina hat orhorwi sapat oh gur Oh arpin ihat sapat han ma hapat ha dahatingwe rim mamengnong moh napotporhan dahatinmur. Noh gur diradire Hanipyah Jisas Krais orhe tapnong ham ma ihat pati oh noh amam hat patmur ma napor mengnong oh gur Oh arpin ihat pathe dahaptimur. Ama ihat dahaptiru hat orhor nohe haputin ina hat sapatmur ma napor meng mohhe gur Oh arpin ihat haputin ina hat sapat ma hapat dahatinmur.  
\v 32 Noh Epesas aptei pati han ihirnong kot samin ihirsi gusuptiru hat orhor meng ma potir oh kakdah morhe timbas hatin ohe danongwi hat patim ihtirneng noh yan oh kian yan datirneng. Kakdah morhe timbas hatin yan ohoh ihan noh yan ti na datirnengmur. Hanip dire da oh it na masaprineng ihan kat han ire ma Dire kimsi hapur timbas hatipri ohoh ihan gin da patim morhor den dayao tom dayao hat inpera daham ma daptiru hat orhor patepera dahapatnengmur.   
\p
\v 33 We. Gurnong ihtin meng napor dasuh nahatipririm mohnong dahenmur. Nuhur er han ihirsi tap hat sayahanoh ire da moh nuhurnong napriprohe ma hapat daham ire tapnong hatheri patepri.  
\v 34 We. Gur da hut patim er hat ma sapti da ohri mandanmur. Mandama yah hat da darhet sashen ohe danong oh hat patim da darhet sashenmur. Kat gur Got ohnong hanhan hat patim ihat saptimur. Ihat saptimur ma napor oh gur kas ham ha mandatingwe rim noh mameng moh napormur.   
\s1 Wan ina dasi ham ma masapri ohe meng oh  
\p
\v 35 Nohe hapur sus it masaprimur ma napor meng moh gur amram nohnong Hapur sus it da ma masapri oh kinhat masaprio. Da masapti it kinhatin ina hatiprio napor dahanahayahanoh noh mameng moh gurnong napotiprohmur.  
\v 36 Gur da timbas hat patim imat dahanatiproheda. Kono erer ohe gwe ma amgap sariptinong oh dahenmur. Amgap ma sariya oh tei ohe watah ohsi patin oh maraprohda. Basra. Watah oh mandama dus orhap amgap ta put marapatmur.  
\v 37 Ama kon gweo erer gwe gonsi amgap ma saripti oh amgap ta marhum patin sariptida. Basra. Amgap ta oh put na marhum patin mutuh ohon patin gwe sariptimur.  
\v 38 Imat itperhan amgap ta put ma mara oh rih Got orhor ihtin han hat sa put marapra ma dahatipru hat orhor marapramur. Ma marapat oh ama gwehe ama han gwe orhor sa put marapra. Ama gwehe ama han gwe orhor sa put marapra daham ma nitat matipru hat orhorwi marapatmur.  
\v 39 Amaru hat orhor Got oh nitat inasi nahat ma napapat oh mamarumur. Hanip dire ina orhor gon hat patimur. Apop erer ire ina orhe gon ina nitatsi hat patimur. Ner ire ina orhe gon hat patimur. Aning ire ina orhe gon hat patimur.  
\v 40 Kakdah mama pat han erer ire ina morhe gon hat patimur. Aw tei ohe erer mahat pati erer ire ina orhe gon hat patimur. Ire ihat ma pati oh kakdah morhe erer ire ina ma tam bukur yah hat pati orhe gon hat patimur. Aw tei ohe erer ma pati ire ina ma has ham yah hat pati orhe gon hat patimur.  
\v 41 Aw tei ohe erer mahat ire ina has ham ma yah hat pati oh atan ohe ina orhe gon has han yah hat patmur. Hayop ohe ina ma has hat pat orhe gonmur. Merum ohe ina orhe gon has hat patmur. Merum ire ina bok ma has ham yah hat pati oh nitat ina bok has ham yah hat patimur.   
\p
\v 42 Got oh imat erer ihirnong yah inasi mat ma papatru mat orhor hanip dire danong ma napamsaprahe wan gon yah inasi naham napamsapramur. Gin mama pati ina moh haputperhan sein itperhan patahar timbas hapat inasi hat patimur. Got orhor wan inasi naham ma napamsapra ina oh tumnuhur na timbas ham eimat paten inasi naham napamsapramur.  
\v 43 Haputperhan sein nasaripti ina moh dasei mar kasa hapti gapa ina watah ohmur. Ma napamsapra ohe inanong oh kasip yahnap ina dasi naham napamsapramur.  
\v 44 Haputperhan sein ma nasaripti ina moh kakdah mohe ina ohmur. Ma napamsapra ohe ina oh aw tei mahat ohe eimat paten ina ohmur. Kakdah mohe paten inasi hat ma pati ohnong moh wamar kaput aw tei mahathe mihat eimat paten inasi hat patepri ma hapat dahenmur.   
\p
\v 45 Aw tei ohe paten ina da orhe gon hat patmura; kakdah morhe paten ina da orhe gon hat patmur. Kakdah mohe ma pati da oh Adam ohe boknong mar ma brak matpa mengru hat patmur. Ma brak matpa oh Adam oh kakdah mohe paten dasi ham tarpatipmur rim brak matpamur. Komdapat pepe Adammur ma poripti han Krais oh hanip dirnong aw tei mahat ohe eimat paten ina da ma napripat han ohmur.  
\v 46 Aw tei ohe eimat paten ina da ohri na napdapmur. Kakdah mohe paten ina ohri napdapmur. Napripat komdapat aw tei ohe eimat paten ina dasi nahapat han oh dirnong napdapmur.  
\v 47 Kakdah morhe ohri patesuh han Adam oh Got oh mong morhorsi darpapat kakdah morhe paten han mat mandatipmur. Komdapat ma apdap han Adam oh aw tei mahat ohe eimat paten ina dasi hat ma pat han Adam oh kakdah moh apdapmur.  
\v 48 Ama ite ihat patiru hat orhor kakdah mama pati han bap dir ohri ma darpatip han orhor hatin hat pati han bap dirmur. Aw teinong sus ma patepri han bap dirhe komdapat aw tei mahat ohe eimat paten ina dasi hat pat han orhor hatin hat pateprimur.  
\v 49 Gin dire kakdah mama pati ina moh rih kakdah mama patesuh han Adam orhor hatin hat patimur. Aw tei ma pateprihe aw tei mahatdapat ma wanhup han orhe pat ina da hatin hat pateprimur.   
\p
\v 50 Nohe taptem bapa. Nohe ma naporpat oh gur mihat ha dahatingwe rim naporpatmur. Hanip dire ina moh gonsi timbas hapat ina ohoh ihan ama ohe inasi hat patim Got orhe napapindin teinong na saprimur. Aw tei oh eimat paten inasi ham paten ap tei ohoh ihan mama pathar timbas hapat ina mohsi hathe na saprimur.  
\v 51-52 Gur mohnong amram dahatinmur. Gin noh rih pitap teinong na mat papat meng tit gin pitap teinong mar napotiprohmur. Krais orhe ma apripra oh kat dir tit na haput patin orhor apripramur. Orhe ma apripra oh pong pong poripti han oh pepe oh meng matperhan hanip gonsi dirnong kapkap orhor kin up has watahas ma riptiru hat orhor kapkap hanip dire ina moh nayawar mar wan ina dasi nahatipramur. Ma inahatipra oh haputpa han ihirnongri na haputin inasi mara pamsa tei oh na haput pati han dirnongsi tap mat wan ina dasi nahatipramur.  
\v 53 Ma inahatipra oh mama pati ina moh hapura patahar timbas hatin inasi hat pati ohoh ihan orhor it nayawar mara na hapur eimat paten ina dasi nahatipramur.  
\v 54 Diradire hapur timbas hapti ina watah moh yawar hama na timbas hapat ina watah ma datipri oh rih ma brak matpa mengnong oh dam mar imtipramur. Ma brak matpa meng oh mamaru hat patmur.  
\q1 Got oh haputin supnong oh orhe hrepnong mar ambapte mar eimatnap timbas matipmur.  
\v 55 Imat timbas matip tei ohoh ihan gin haputin sup gwe ambapte nahatin ohe kasip han oh de tei pat. Eimat timbasnapmur. Gwe hanip sutinmat om ga ohe tan ga tandumat sapat kasip oh de tei pat. Eimat timbasnapmur.  
\m rim ma brak matpa meng oh arpin dam matipramur.  
\v 56 Hanip dire ihat ma er da hat sapti ohe pe oh haputin sup ohe danong akasip mar ihat saptimur. Got ohe sawa mengnong amram ma na dindeipti ohe pe oh haputin sup ohe danong akasip mar ihat saptimur.  
\v 57 Ihtin orhor Got oh diradire Hanipyah Jisas Krais orhe dap teidapat haputin supnong oh ambapte matin inasi nahat napapatin dir haputin supnong dire hrepnong mar ambapte mat paptimur. Imat ambapte matin inasi nahat napapat hano rim Got orhornong weso por armi mar paptimur.   
\p
\v 58 Dirnong ihtin inasi nahat napapat ohoh ihan norhe boporsi taptem bap gure kasip hat ma pati danong oh gapa hamhe mandapri. Kasip hat orhorwi patenmur. Ihat orhorwi patim diradire Hanipyah ohe atamreipti moh be na atamreipti ma hapat daham kasip hat orhorwi patim atamrein sashenmur.   
\c 16  
\s1 Got ohe nita bap Jerusarem ap mutuh ihirnong panggeitin mani oh mimat asarinmur potip ohe meng oh  
\p
\v 1 Gin gure Got ohe nita bap Judia mong ma pati bap ihirnong panggeitinmat mani ma tap tei mat asaripti ohe meng oh napotiprohmur. Ma napotiproh oh Garesia mong pati sios bap ihirnong Gur imat asarinmur ma potip meng hatin mat orhor gin gurnonghe imat orhor napotiprohmur.  
\v 2 Gur mamaru mat mani oh asarinmur. Guragure tamreim ma daripti mani oh sama guragure ma daripti kis orhorwi mat orhor tit Sande tit Sande oh asarinmur. Imat asariptin nohe ma apripra oh ama wanin mat asaripti wanin orhor datipramur. Gurnong wan tit it angmar asarinmur na napotipramur.  
\v 3 Imat mani oh ruprup mat asaripti ama asaripti maninong apison han ihirnonghe Mama ihir yah mat pisapri han ihir ma hapat daham kis mat paptin noh apripramur. Aprisa Jerusarem ap mutuh pati kuuhan ihir Moh arpin Korin sios ihir ihat napanggeipti ma hapat ha dahatingwerim ohe brak oh noh apris gure ma asaripti mani ohsi tap mat Jerusarem ap mutuhnong darhetipramur.  
\v 4 Gur Nurarhe apisayahan er hatiprohekin dahayahanoh nohsi diradir tap hat saprimur.   
\s1 Por oh Noh Korin ap mutuh pati sios gurnong wanaham apripramur potip ohe meng oh  
\p
\v 5 Noh Masedonia mong aptei aptei meng pot pisasipramur. Meng pot pisuso hapat gure pati teinong apris diradir tap hat indiprimur.  
\v 6 Noh gursi tap hat ma indipra oh trun tit indiprade da na indiprae dahapat orhor tit ma dahapat oh trun dik tit indipramur dahapatmur. Noh gursi trun dik patin mong er ham tom inimsi hat pat mong oh gaterit noh sapramur dahapatmur. Noh ihat patdapat wan apteinong ma sapra oh nohe ma sapra apteinong oh gur mandap sa napanggeit napisapri dahapatmur.  
\v 7 Noh apris gursi atei gar dik tit na indipra ma hapat. Hanipyah oh Yahwa. Go isip dik tit indin naporhan yahwa isip dik orhor indipra ma hapat daham noh Masedonia mong aptei aptei maihirnongri meng pot pisus mamen deipat gure pati teinong apripramur dahapatmur.  
\v 8-9 Noh gin Epesas ap mutuh mama pat oh noh meng pot pisasiprarim mahaw han bap trun ihir noh meng pot pison mandap nagahei mat napapti orhor Got oh pat ohoh ihan nohe kuuhan ihirnong meng pot pison mandap oh namanhet patin noh ihirnong meng pot pisapatmur. Epesas ap mutuh morhor patin den dara amam hapti Pentikos dik oh hatporhan noh sapramur dahat patmur.   
\p
\v 10 Timoti oh norhe Hanipyah orhe atamreindein oh norhe mama hat atamreipatru hat atamreipat han ohoh ihan oh gure aptei oh apirhanhe oh manap da tei orhor ha patenoh rim gurhe manap da tei orhor ambur ohnong pomar paptenmur.  
\v 11 Oh Be han ihat apripat mohwa daham kom asaripri. Ohe ma napor mengnong pomat amrama pomat paptenmur. Imat paptimdapat orhe it aprin ohe mandap oh panggeim darhetinmur. Noh Timoti ohsi; taptem kat han ihirsi ma apripri ihirnong wamat pat ohoh ihan mandap oh panggeim darhetinmur.   
\p
\v 12 Gin diradire taptem Aporos ohe meng oh napotiprohmur. Noh trun tit Aporos go diradire taptem kat han ihirsi Korin ap mutuhnong susa ama Korin ap mutuh sios pati ihirsi tap hat indinmur porpat orhor oh Gin noh na son ina hat patmur ripatmur. Kaput gure patinong aprin ohe mandap oh pat hapathanoh sa aprisipra.   
\s1 Por oh kapkep maro matip ohe meng oh  
\p
\v 13 Gur mamengnong moh dahenmur. Gurnong er da oh apris er nahatiprarim watahat patenmur. Ihat watahat patim gure Krais ohnong ohwi inahatin hatin hanwa ma dahapti da oh kas ham gapa hatipririm watahpei ham kasip hat orhorwi patenmur.  
\v 14 Gur guragure Nuhur ihtipera daham ma ihapti da oh Got ohnongo hanip ihirnongo ihirnong da apris bopor mat paptim orhor ihat sashenmur.   
\p
\v 15 Nohe taptema. Gur Stepanaso orhe brer imdero ihirnong daham gur am hat patimur. Akaia mong Got ohe nita hat pati ihir ama ihirri Got orhe danong ham Got orhe nita hatpamur. Hapti Gin dir Got orhe nita bap ihirnong panggeit pisasipera daham panggeit pisaptimur.  
\v 16 Ama ihat daham tamreipti han bapo ihirsi tap hat patim tamreipti bapo ama ire hrepnong hat patim ire meng amram dindeinmur napor mama kasip mengtei naporpat ohmur.   
\p
\v 17 Noh gursi na pato rim pitning hat patin gahan Stepanaso Potunataso Akaikaso ihir apriperhan noh pitning hat pat da oh ire boknong hama da yah ham amam hat patmur.  
\v 18 Noh ihat amam hat ma pat oh gure danong ihir ma nayah matiriru hat orhor nohnonghe imat da yah nahatperhan noh amam hat orhor patmur. Ihat pati han ihir ohoh ihan gur ihirnong ihat pati hano rim amam mar paptenmur.   
\p
\v 19 Esia mong aptei aptei sios bap ihir gurnong Ihirhe sa yah hat patio rim dahatahatperhan noh mama brak mat nasar ohmur. Akwirasi Prisira ihit gaminsi; ite gamin ap ma tarmur rotu hapti kuuhansi ihirhe gurnong dipwi Hanipyah orhe nita bap nuranur ohoh ihan Ihirhe sa yah hat patio rim dahatahatperhan noh mama brak mat nasar ohmur.  
\v 20 Gure taptem gonsi mama pati ihir gurnong Ihirhe sa yah hat pati rim dahatahatperhan noh mama brak mat nasar ohmur. Taptem guragur ma wanggoshaya teihe tuhup gosham amam goshenmur.   
\p
\v 21 Gin norhor gur sa yah hat patio rim Por norhe bes tei mama brak mat nasar ohmur.   
\p
\v 22 Hanipyah orhe danong na haper daham na bopor mat pati han ihirnonghe Got orhe bopor heisup mar timbas deipat da ohsi ihirsi tap hat ha paptenoh dahapatmur. Hanipyah oh kapkap orhor ha aprinoh dahapatmur.   
\p
\v 23 Hanipyah Jisas Krais orhe damdapat orhor Noh ihirnong imat yah matpora ma dahapat da oh gursi tap hat ha napaptenohmur.   
\p
\v 24 Gur hanipyah Jisas Krais orhe tapnong hat patio rim noh gurnong bopor nahat napapat ohe da oh pitap teinong mara gurnong mama naporpat ohmur.  
\p Gin Por nohe menghe kimur.