\id 1TH  
\h 1 THESSALONIANS 
\toc1 Id ash d Paul Wehpeg Oꞌohana am ha Wui g Thessalonica t Am Wohochuddam 
\toc2 1 THESSALONIANS 
\toc3 1Th 
\mt1 Id ash d Paul Wehpeg Oꞌohana am ha Wui g Thessalonica t Am Wohochuddam 
\c 1  
\m  
\v 1 T-wepnag mam am kih Thessalonica t am: 
\p Am ant haꞌichu wo i em-oꞌohani ahni Paul. K ia ni-wehmaj g Silas ch Timothy k ch am i ni-wehmaj. Dam woho hemajkamgaj g t-ohg Jiosh ab i e dagitok t-kownalig Jesus Christ wui. 
\p Ab o wa si s-em-hoꞌigeꞌid g t-ohg Jiosh g t-kownalig Jesus Christ wehm ch ab wo wa baꞌich i em-mahkad g i wehmtadag ch s-ap tahhadkam. 
\s1 Mash idam s-ap himchud g e-wohochudadag 
\p  
\v 2 Chum ach hekid ab hoꞌigeꞌid g Jiosh em-hekaj ch em-wehhejed t-hoꞌigeꞌidahun.  
\v 3 Ab am si s-wohochud g t-kownalig Jesus Christ ch hekaj chum hekid hab s-junimk g s-apꞌekam. Pihk em-elidadag o hab em-wua mam si chikpanid g Jiosh. Kum si s-gewkam him g e-doakag nam pi si nenida hegai matsh hab wo wa t-juni g Jesus. Id ach am wa wehs s-chegito ch hekaj chum hekid ab hoꞌigeꞌid g Jiosh. 
\p  
\v 4 Jiosh o ab si em-tatchua ch ab i em-ui mamt d wo aꞌaligajk.  
\v 5 Am att uꞌapa g s-kehg haꞌichu ahgaj em-wui. Kumt ab i s-wohoch. Pi ach wabsh neneok. Hekia S-apꞌekam Gewkdag at ab t-mah g gewkdag k am em-chehgi mo d wohokam g haꞌichu t-ahga. Am am wa s-mahch mach s-ap himchud g t-doakag am em-shahgid. Bach wa masma am em-chehgid mamt has wo i chum masmak.  
\v 6 Kum am t-oidch s-ap hab e junihim ch hab s-ap hab junihim g t-kownalig Jesus tatchui. Chum ams em-shoꞌigchud, mt ab i s-wohoch g Jiosh haꞌichu ahga. T g Hekia S-apꞌekam Gewkdag ab em-mah g si geꞌe s-hehgig. 
\p  
\v 7 An amsh e wehgaj ha chehgidch g e-wehm wohochuddam mat has wo chum masmak. Muꞌijj ash ab em-amjed haꞌichu mahchim hegam mo am kih Macedonia ch Greece jejewed ch ed.  
\v 8 T g Jiosh haꞌichu ahga gam hu aꞌai ep jejewed dahm i hih ab em-amjed. Wehsko o an e aꞌaga mam ab s-wohochud g Jiosh. K ab hahawa d em-wuikam mamt wo ha ahgi g Jiosh haꞌichu ahga. Kuch ab wabsh em-wui dagitokch.  
\v 9 Si amt s-ap ab i t-neid k ab i s-wohoch g s-wohokam Jiosh k gam hu ha dagito hegam mo d wabsh hemajkam ha-nahtoi. Id o wehsko an aꞌaga g hemajkam.  
\v 10 Ab o wa t-aihim g s-koꞌok namkida ab amjed g Jiosh. T wabshaba g Jiosh alidag am t-wehhejed e muhkid mat wo t-doꞌibia. T g Jiosh ab i wuhshad muhkig amjed k ab uhpam ep bei. Hemuch amsh s-ap nenida mat ia ep wo jiwia g Jiosh. Alidag ab dahm kahchim t amjed. 
\c 2  
\s1 Matsh has i e juh g Paul amai Thessalonica t am 
\p  
\v 1 Am am wa s-mahch ahpim t-wehm wohochuddam mat s-ap haꞌichu am hab e juh heg hekaj matt am dada am ahgachugch g Jiosh haꞌichu ahga.  
\v 2 Am ach wa em-ahgid mat haꞌi t-shoꞌigch amai Philippi kihhim t am matt eda koi am hu dada em-wui. T wabshaba g Jiosh ab i t-mah g gewkdag. Kutt am wabsh s-chechojim ahgachug g s-kehg haꞌichu ahgaj em-wui, chum as muꞌi ab t-wui gegok.  
\v 3 Haꞌichu t-chegitoidag o am wabsh si s-apꞌe. Pi ach em-iattogid ch wabshaba wabsh s-chechojim ahg g Jiosh haꞌichu ahga mamt ab wui wo i e dagito.  
\v 4 Jiosh at t-aꞌappem k am i t-chuhcha matt wo i ahgahi g s-kehg haꞌichu ahgaj. Kuch heg hab waꞌi junihim mo haschu d tatchuij ch pi wabsh g hemajkam ha-tatchui hab junimk. Jiosh o am t-mamche mach haschu ahgch hab haꞌichu junihim.  
\v 5 Am am wa s-mahch mach pi wabsh em-hehosimhun ch pi em-iattogid machs wo haꞌichu em-wohppoꞌi. Jiosh o s-mahch mo d wohokam ihda.  
\v 6 Pi ach hekid am hu t-gahgid mas g oꞌodham ab wo ge has t-elidad ch ab wo t-hehgchulidad. 
\p  
\v 7 Bo hi wa chum mahs mamt ab wo si has t-elidad ch haꞌichukaj wo i t-wehmtad ahchim mach d Jesus chuhchai. Kuch wabshaba pi am hu t-gahgid ihda nach pi si s-hemajim ab em-neid hab masma mat g ha-jeꞌe ab wo ha neidad g e-aꞌaliga.  
\v 8 Si ach pihk t-elid ab em-wui ch hekaj am wabsh i t-dagitokch em-wehhejed mach em-ahgidahim g s-kehg haꞌichu ahgaj g Jiosh, chum achs hems heg hekaj wo t-koꞌij.  
\v 9 Am amtp hu waꞌi s-chegito mach si chikpan wabsh i siꞌalim amjed ch mehk s-chuhugam k ed matt pi haꞌichukaj wo em-kudu. 
\p  
\v 10 Si ach wa s-ap ab em-neid ch pi hekid hab wua g pi apꞌekam ab hema i em-wui. Jiosh o s-mahch ihda. Kum ahpim hab waꞌap s-mahch.  
\v 11-12 Jiosh o ab i em-waid mamt am wo apꞌedagk kihdaj ed ch ab wehmaj wo uꞌukchid g ab has elidadag. Kum s-mahch mach am i em-gewkemhun wepo masma mo g ha-ohg ch ab s-ap i em-neneokid ch i em-chehani mamt am hab wo masmak mam d Jiosh aꞌaliga. 
\p  
\v 13 Heg ach waꞌi ahgachug Jiosh haꞌichu ahga ch pi g hemajkam haꞌichu ha-ahga. Kumt hab waꞌi masma hab elid k hekaj ab i s-wohoch. Jiosh o am i chikpan em-shahgid ch am wohokamchud mo d haꞌichu ahgaj. Kuch hekaj chum hekid ab si hoꞌigeꞌelid.  
\v 14 Am am ha oidch hab e wua hegam e-wehm wohochuddam mo am aꞌai kih Judea ch ed. Ha-wehm oꞌodham o ha shoꞌigchud. K hegam wabsh s-ap ab nakog. Kum ahpim hab waꞌap wabsh s-ap ab nakog mo g em-wehm oꞌodham em-shoꞌigchud.  
\v 15 Do hegam ni-wehm oꞌodham mat wa mua g t-kownalig Jesus. Kush d t-shohshon mat wa ha kokda g Jiosh haꞌichu i tashogiddam. K hegam ni-wehm oꞌodham t-shoꞌigchud ch gm hu i t-wuwhas ahchim mach am ahgachug g s-kehg haꞌichu ahgaj g Jiosh. K g Jiosh pi hohhoꞌid mo has e wua. Chum o hems ab wehs ha wui gegok g hemajkam  
\v 16 chum t-shohbidch ahchim mach ha ahgid g goꞌol hemajkam hegai mat hekaj wo e doꞌibia. T id ab wabsh baꞌich i geꞌedaj g pi ap ha-chuꞌijig. Kut heg gam hu ai mat ab ha wui wo jiwia g wehs s-koꞌok ha-namkidadag. 
\s1 Mash g Paul am ep s-ha chehgimelimk 
\p  
\v 17 Pi att shaꞌi pi em-chegito matt hekid am i t-gawulkai ab em-amjed. Chum ach s-em neidamk  
\v 18 ch am ha hekaj chum si i t-nako matt am uhpam wo hihi em-wui. Ahni Paul ant muꞌikko am chum uhpam s-himim. T am ni-kuh g jijawul ha-geꞌejig Satan.  
\v 19-20 M eda d ahpim mach am si em-hiwig ch em-hekaj wo si s-hehgigk ch ab wo si hoꞌigeꞌel g t-kownalig Jesus mat hekid ep wo jiwia. 
\c 3  
\p  
\v 1-2 Am att i pi t-nako am em-chegitokch. Kum s-mahch matt am i kei g t-wehnag Timothy mat am wo him k am wo em-nei. Tt ahchim am hejel wih Athens kihhim t am. Timothy o si s-ap ahgachug g s-kehg haꞌichu ahgaj g Jiosh ab amjed g Christ. Kutt hab i t-ah mat am wo him k am wo i em-gewkemhun k am wo i gewkai g em-wohochudadag.  
\v 3 Kumt hab pi hedai wo shaꞌi dagito g Jiosh haꞌichu ahga heg hekaj e-shoꞌigchudadag. Am am wa s-mahch matt wo t-shoꞌigch id hekaj t-wohochudadag.  
\v 4 Id ach wa heki hu am em-ahgid mach eda am em-wehmajkahim. Kum s-mahch mat wa woho hab e juh.  
\v 5 Kunid s-gihug mat am hu wo i em-bijim g ge Jiawul. Kut wo heki e wua g t-chikpan am em-shahgid. Nt pi ni-nako manis am baꞌich ep wo i neahi k hekaj am i kei g Timothy mat wo s-mai mams am wabsh kia ab s-wohochud. 
\p  
\v 6 T hemuch ia ep jiwia ab em-amjed k ia uꞌapa g s-ta hohhoꞌidam ahga ab amjed g em-wohochudadag ch pihk em-elidadag. Am o t-ahgid mam chum hekid si s-ap am t-chegito ch hab wa masma chum s-t-neidamk mach ahchim has i masma chum s-em-neidamk.  
\v 7 Muꞌi ach haꞌichu nakog ch muꞌi t-shoꞌigchud. K wabshaba g em-wohochudadag ab t-gewkemhun.  
\v 8 S-gegokim amki ab s-wohochud g t-kownalig Jesus. Kuch ab si t-nenenashanichud  
\v 9 ch ab si i hoꞌigeꞌelid g Jiosh mam hab wa masma ab t-mahkch g s-hehgig.  
\v 10 Chum ach hekid ab tahni g Jiosh wehs t-ihbdagkaj matt wo wa ep em-neid k ab wo i em-wehmt mamt s-ap ab wo s-wohochudad g Jiosh haꞌichu ahga.  
\v 11 Mat hems wo waꞌi t-hiwigi g t-ohg Jiosh ch t-kownalig Jesus matt am wo wa ep em-nei. 
\p  
\v 12 Ab ach tahni g Jiosh mat baꞌich ab wo i em-mah g gewkdag mamt hekaj wo si pihk e elidad ab aꞌai e wui ch ab ha wui g wehs hemajkam.  
\v 13 Kumt s-gegokim ab wo wohochudad g Jiosh ch ab wui wo gawulkdask ab amjed g pi apꞌekam mamt pi wo ha chuꞌijigk mat hekid ep wo jiwia g t-kownalig Jesus wehs ha wehm hegam mo d hemajkamgaj ch heki hu koi. 
\c 4  
\s1 Mo has mahs doakag d Jiosh hohhoꞌida. 
\p  
\v 1 Pegih, t-wepnag, am ach wa em-ahgid mamt has masma wo himad g e-doakag ch hab wo hohhoꞌidach g Jiosh. Ab amt bei g haꞌichu t-ahga. Kuch hemuch ab si em-tahni ch ab em-chehani am wehhejed g t-kownalig Jesus mamt baꞌich am hab wo i junihid.  
\v 2 S-mahch am mach wa has masma am em-shelinid g gewkdajkaj. 
\p  
\v 3 Jiosh o em-tatchuid mamt ab wo si i e gawulkai pi apꞌekam amjed k wo si e nuhkud g hejel e-wehm kihkam wehhejed.  
\v 4 Ahpim chechoj amt wo s-mahchk mamt wo si s-ap ha hohnt am tahgio g Jiosh ch am hemajkam ha tahgio.  
\v 5 Hegam mo pi mahch g Jiosh o wabsh hejel e-tatchui wehhejed bebhe g uwi. Mt wabshaba ahpim pi hab masma wo be  
\v 6 k hab pi ab hu hedai wui pi ap has wo chuꞌi. Heki ach hu am em-ahgid mat g Jiosh s-koꞌokam wo ha namkid matp hedai am hab wo juh ihda pi apꞌekam.  
\v 7 Jiosh at pi hab ahgk ab i t-gawulkai machs am hab wo junihid g s-uam haꞌichu. Do tatchuij matt d wo hekia s-apꞌekamk.  
\v 8 K heg hekaj ab t-mahkch g Hekia S-apꞌekam Gewkdag. Hegai matp hedai wo s-ohhod ihda mashchama at wo s-ohhod g Jiosh. 
\p  
\v 9 Heki atsh hu i em-tashogi g Jiosh mamt wo si pihk e elidad wehs ha hekaj g e-wehm wohochuddam. K pi hab chum mahs machs am hu ep wo ge em-oꞌohani ab amjed.  
\v 10 Si amsh pihk e elid wehs ha hekaj g e-wehm wohochuddam am wehs Macedonia jewed ch ed. Kuch wabshaba ab si em-tahni mamt baꞌich am hab wo i e junihid.  
\v 11 Am g wo i e nakog mamt wo s-dodolimak ch am hab wo junihid g hejel e-chikpan ch wo haꞌichu e gahgidad. Id ach wa heki hu hab em-ahgid.  
\v 12 Bamt masma pi hedai ab hu wo hiwgad mas ab wabsh wo em-mah hegai mam haschu i tatchua. T hegam mo pi mahch g Jiosh wo em-nei mam s-chikpnadag k ab wo si has em-elidad. 
\s1 T-kownalig jiwhiadag. 
\p  
\v 13 Si ach em-tatchuid mamt wo s-mahchk g wohokam ab ha amjed hegam mat heki hu koi. T hahawa pi wo i em-bijim g pi ap tahhadkam hab masma mat hab wo ha juh g pi wohochuddam.  
\v 14 Neh, ab at i wuhsh g Jesus muhkig amjed. Kuch s-wohochud ihda ch hekaj ab wui nenea mat g Jiosh ab ep wo i ha wuwhas hegam mat koi ab s-wohochudch g haꞌichu ahgaj ab amjed g Jesus. 
\p  
\v 15 Hegam atsh wo i wuwha ab amjed g muhkig matt koi an hu wo nam g t-kownalig Jesus.  
\v 16 Wehpeg at ab wo si s-kaidam t-wai g anghil ha-geꞌejig. T g Jiosh kuikud ab haha wo kaida. T ab haha wo i hud g t-kownalig Jesus ab dahm kahchim t amjed. T hegam mat heki hu koi ab s-wohochudch g Jesus ab wo i wuwha.  
\v 17 T hegam mat hedai in d wo kia dodakamk heg i tash ed ab haha wo i e hemapai ha wehm chewagi ch ed k an wo nam g t-kownalig. Kutt am i amjed chum hekid wo wehmajk g t-kownalig.  
\v 18 Ab g wo si e gewkemhunad id hekaj haꞌichu ahga. 
\c 5  
\p  
\v 1 Pi o hab mahs manis am hu wo em-oꞌohani ab amjed mas hekid hab wo i e juh ihda haꞌichu mani am ahg.  
\v 2 Am am wa s-ap s-mahch mat chum s-aꞌagi wo e ai mat ep wo jiwia g t-kownalig Jesus. Neh, pi o ta machima mas hekid wo i jiwia g s-chu ehskam chuhug ch ed, o mas hekid wo i e ai mat g uwi ab wo taht g s-koꞌok k wo bei g ali. K hab waꞌap pi ta machima am ha wehhejed g pi e doꞌibiakam mas hekid ep wo jiwia g t-kownalig.  
\v 3 Idam at hab wo kaijjid mo wehs haꞌichu am wabsh i si s-apꞌe ch s-dodolima. T am wabsh wo si e ai mat wo e koꞌijid k pi wo e doꞌibia. 
\p  
\v 4 Kum eda ahpim e doꞌibiakam s-mahch ihda. K pi hab chum mahs mat s-aꞌagi wo jiwia hegai tash em-wui hab sha masma mo g s-chu ehskam.  
\v 5 Jiosh o haꞌichu t-tashogid. Kuch an uꞌukch g tonlig hab masma mo hegam mo am tash ed hihim.  
\v 6 Pegih, tt wo chum s-nenenashanik ch pi hab wo masmak mo g nawkkoi.  
\v 7 Hegam mo pi nenenashanik ch nawkkoꞌo o am eda g s-chuhugam.  
\v 8 Kutt wabshaba ahchim s-ap wo t-nahtokchid hab masma mo g shondal. T-wohochudadag ch pihk t-elidadag o d wainomi lihwa t-wehhejed. Kuch ab wui t-gewpkadch mat g t-doꞌibiadag s-ap wo e nahto. K id hab sha masma mo g wainomi wonami t-wehhejed.  
\v 9 Pi at hab ahgk ab i t-gawulkai g Jiosh mas wo t-namkid heg hekaj pi ap t-chuꞌijig k wabshaba hab ahgk mat g t-kownalig Jesus Christ wo t-doꞌibia.  
\v 10 Heg at muh t-wehhejed k i wuhsh matt d wo dodakamk wehmaj. K wabsh chum has masma s-apꞌe chum achs wo heki hu koi o in d wabsh wo kia dodakamk mat wo jiwia.  
\v 11 Mt heg hekaj ab wabsh wo si aꞌai e gewkemhunad ch ab aꞌai haꞌichukaj wo i e wehmajk mam am hab wa e junihim. 
\s1 Matsh I kuhgi g haꞌichu i ha shelinida. 
\p  
\v 12 Ab ach si em-tahni mamt s-ap ab wo ha neidad g e-wanimeddam ch hegam mo am em-mashcham ch ab shohbidch g pi apꞌekam em-shahgid. Do Jiosh hab elida mo hab wua.  
\v 13 Ab g wo si has ha elidad ch s-ha hoꞌigeꞌidad no pi hab wua a Jiosh chikpan. Am g wabsh wo s-dodolim kihk e wehm. 
\p  
\v 14 Ab ach si em-tahni mamt wo ha ahgidad hegam mo s-papadma mat wo chikpanad. Ab g wo i ha gewkemhunad hegam mo pi wihnam gegok am e-wohochudadag ed. I g wo ha wehmtad hegam mo pi ha gewpdag ch ab wehsijj wo si ha bahbgi.  
\v 15 Pi g am uhpam wo agwua mat hema s-koꞌokam wo em-juh k wabshaba chum hekid am wo i e nakogad mamt s-ap haꞌichu hab wo wuad ab aꞌai e wui ch ab wehs ha wui g hemajkam. 
\p  
\v 16 Chum g hekid wo s-ap e tahtkkad.  
\v 17 Chum g hekid wo e hoꞌigeꞌidahunad.  
\v 18 Ab g wo s-hoꞌigeꞌidad g Jiosh, chum atp haschu has wo i chuꞌigk. Id o d Jiosh tatchui em-wehhejed ahpim mamt ab i e hemakoj g Jesus Christ wehm. 
\p  
\v 19 Pi g am hu wo shohbid g Hekia S-apꞌekam Gewkdag.  
\v 20 Pi g am wo s-kaihogi hegam mo g Jiosh ab ha mahkch g haꞌichu ahga  
\v 21 k wabshaba wehs haꞌichu wo i aꞌappemad ch g s-apꞌekam ab wo uꞌukchid.  
\v 22 Im g hu wehs hab wo i juhni g pi apꞌekam. 
\p  
\v 23 Jiosh o ab t-mahkch g s-ap tahhadkam. Kuni ab tahni mat wehs gam hu hab wo i juh g pi apꞌekam ab em-amjed k wo si nuhkudad g em-doakag ch em-ihbdag ch em-hon mat d wo hekia s-apꞌekamk. Mt am hahawa pi wo ha chuꞌijigk mat ep wo jiwia g t-kownalig Jesus Christ.  
\v 24 Jiosh at ab i em-wai e wui k chum hekid hab junihim mo has i kaij. 
\p  
\v 25 Am g wo t-wehhejed e hoꞌigeꞌidahunad. 
\p  
\v 26 Am g wo ha ahgid g t-wehm wohochuddam mat ab wo i s-t-hoꞌigeꞌel. 
\p  
\v 27 Ni ab si em-chehani g t-kownalig Jesus gewkdagkaj mamt am wo neꞌokchul ihda oꞌohana am wehs ha wui g t-wehm wohochuddam amai. 
\p  
\v 28 Neh, ab at wo wa baꞌich i s-em-hoꞌigeꞌel g t-kownalig Jesus Christ.