\id 1PE  
\h 1 PETER 
\toc1 Id ash d Peter Wehpeg Oꞌohana 
\toc2 1 PETER 
\toc3 1Pe 
\mt1 Id ash d Peter Wehpeg Oꞌohana 
\c 1  
\m  
\v 1 Ni-wepnag: 
\p Am ant haꞌichu wo i em-oꞌohani ahni Peter mani d kehshaj g Jesus Christ. Heg at am i ni-kei mant wo i ahgahi ab amjed. Kuni haꞌichu s-em-ahgidamk ahpim mam am aꞌai kih Pontus ch Galasia ch Cappadocia ch Asia ch Bithynia jejewed ch ed hab masma mo g ni-wehm Tutuligo.  
\v 2 Jiosh at ab i em-gawulkai mamt d wo hemajkamgajk k ab em-mah g Hekia S-apꞌekam Gewkdag mat wo em-wehmajk ch am wo i kegch g em-dodakag. Mt hekaj ab wo s-wohog elidad g Jesus Christ ab i s-wohochudk mat iawua g e-ehꞌed k e muhkid em-wehhejed. 
\p Ab o wa si s-em-hoꞌigeꞌid g Jiosh ch ab wo wa baꞌich i em-mahkad g i wehmtadag ch s-ap tahhadkam. 
\s1 Mach ab wui t-gewpkadch matt ep wo t-chegito 
\p  
\v 3 Ab att hig wo si i hoꞌigeꞌel g Jiosh heg hekaj t-kownalig Jesus Christ. Heg ohg Jiosh at ab i wuhshad muhkig t amjed. K id am t-chehgidch mat hab waꞌap ab wo i t-wuwhas muhkig t amjed. Tt heg hekaj ab i s-wohochud k ab bei g wechij doakag. 
\p  
\v 4 Jiosh o an nahtokch g si s-kehg kihdag am t-wehhejed an dahm kahchim ch ed. T ihda apꞌechudaj chum hekid d wo hekiakamk ch pi hekid wo e padch.  
\v 5 Ab ach s-wohochud g Jesus Christ. K heg hekaj t-nuhkud g Jiosh g si geꞌe e-gewkdagkaj. Kuch ab nenida mat s-ap wo maskogi g t-doꞌibiadag mat hekid wo huhug ihda jewed. 
\p  
\v 6 Si g wo s-hehgigk mamt wo e doꞌibia, chum ams hems ab wo nakogad g nahnko mahs shoꞌigchudadag ch pi ap tahhadkam hemu.  
\v 7 Ihda em-shoꞌigchudadag at wo aꞌappe g em-wohochudadag k wo chehgi mo d wohokam hab masma mat g ohla g meikaj wo e aꞌappe mas d wohokam. Ia atsh ep wo i e chehgi Jesus Christ. T g Jiosh am haha wo chehgi mo ab si has em-elid. 
\p  
\v 8 Pi am hi wa chum neid ch wabshaba ab si tatchua ch ab ep si s-wohochud. K id hekaj si geꞌej g s-em-hehgig. Kumt pi wo shaꞌi e nako mams wehs s-ap wo ah.  
\v 9 Jiosh at em-doꞌibia namt pi ab i s-wohoch g Jesus Christ. 
\p  
\v 10 Hegam mash d Jiosh haꞌichu i tashogiddam oki wa an oꞌohan matsh an wo em-ai ihda doꞌibiadag haꞌichu ahga ch eda an ep chum hoanahim g e-oꞌohana ch an chum mamche  
\v 11 mas hekid wo i k ch has masma hab wo e juh. Christ atsh ab ha mah g Hekia S-apꞌekam Gewkdag. Sh heg am ha tashogid matsh gam hu si ha baꞌich hab wo e juh matsh wo e shoꞌigch g Christ k haha wo bei g ab si has elidadag.  
\v 12 S-mahch ash mat pi wabsh hejel e wehhejed oꞌoha hegai mash am ha wui i e tashogid. 
\p Hemu at hab e juh hegai matsh wa an oꞌoha. K ahpim d em-wehhejedkam mamt wo kah. Jiosh chuhchai ash am em-ahgid ihda s-kehg haꞌichu ahgaj. K g Hekia S-apꞌekam Gewkdag ab ha mahkch g gewkdag mat an wo ahgahid. Ihda wohokam o shaꞌi si s-ta kakaima chum hems g anghil ha wehhejed. 
\s1 Mattsh d wo chum si hekia s-apꞌekamk 
\p  
\v 13 Am g wo i e nakog k ab wo si i e nenenashanichud k ab wo si i e gewpkai heg ab hoꞌigeꞌidadag mat g Jiosh wo em-mah mat hekid ep wo jiwia g Jesus Christ.  
\v 14 Ab g wo s-wohog elidad g Jiosh ch pi wo shaꞌi e hiwigi mams ged hu uhpam wo shul heg eda pi apꞌekam mam wa ab tatchua mam eda pi mahch g Jiosh.  
\v 15 Jiosh at ab i t-wai matt d wo hemajkamgajk. Kutt heg hekaj d wo chum si hekia s-apꞌekamk hab masma mo g Jiosh.  
\v 16 An o oꞌohanas Jiosh oꞌohana ed mo hab kaij: 
\q1 Hemho wa amt d wo hekia s-apꞌekamk nani pi ahni d hekia s-apꞌekam. \rq Leviticus 11:44-45 \rq* 
\p  
\v 17 Bam masma ihm g Jiosh ab e hoꞌigeꞌidahunch wui mo d em‑ohg. Kut heg wehs wo ha aꞌappe. Pegih, mt ab wo si has elidad chum hekid mamt heꞌes i tash ia d wo dodakamk. 
\p  
\v 18 Heki o hu hab elidas mat wo em‑doꞌibia g heki hu em‑himdag. Em‑shohshonbad ash wa chum em‑mashcham mamtsh haꞌichu ab wo namkid g Jiosh k hekaj am wo i e apꞌech nenaj ed. Kumtp hems chum namkid g plahda o g ohla o wabsh chum haschu. K wabshaba ihda hab mahs haꞌichu d wabsh pi haꞌichu am Jiosh tahgio. Kum am hahawa s‑mahch mat g Jiosh baꞌich i s‑namkig haꞌichukaj em‑doꞌibia. 
\p  
\v 19 Am o t‑tashogid g Jiosh mat has masma wo t‑doꞌibia am t‑chehanich mattsh wo mua g si s‑kehg kahwal k ab wui wo iagchul. Pegih, k g Jesus Christ d si hekia s‑apꞌekam ch hab sha masma e muhkid am t‑wehhejed mat wo t‑doꞌibia ab amjed g s‑koꞌok t‑namkidadag mach d pi ap chuꞌijkam.  
\v 20 Jiosh at am i kei mat eda koi in hu nahto g jewed k hemuch hahawa in i maskogi jewed dahm mat wo t‑doꞌibia  
\v 21 k ab i wuhshad am i dahm mat e muhkid k ab uhgk i be k ab dai e‑hugid an k ab si has elid. Kumt heg hekaj ab i s‑wohoch g Jiosh k ab si hiwig. 
\p  
\v 22 Jiosh at ab i hekiagi g em‑doakag namt pi ab s‑wohog el g wohokam ab amjed. Pegih, ab g aꞌai wo e tatchuad wehs e‑ihbdagkaj.  
\v 23 Pi at hekid wo huhug g Jiosh haꞌichu ahga. Kutt ab i s‑wohochud k hekaj ab bei g wechij doakag. T id hab waꞌap pi hekid wo huhug, chum as g t‑chuhkug wo huhug.  
\v 24 Neh, an o hab chuꞌig Jiosh oꞌohana ed: 
\q1 Hemho wa at wehsijj wo koi g oꞌodham hab masma mat g washai wo gaksh. 
\q1 T g ha‑gewkdag wehs wo huhug hab masma mat g haꞌichu heosig. 
\q1  
\v 25 T wabshaba g Jiosh haꞌichu ahga pi hekid wo ha huhug. \rq Isaiah 40:6-9 \rq* 
\m Neh, bo chuꞌig. K d hegai haꞌichu ahgaj mat am em‑wui e uꞌapa. 
\c 2  
\s1 Mach ab ab g Christ 
\p  
\v 1 Gam g hu hab wo i juhni g s‑padhog elidadag ch iattogida ch hehgamdadag ch has ahgadag.  
\v 2-3 Jiosh haꞌichu ahga o d s‑kehg gegosig g em‑doakag wehhejed. Ab at em‑wui chehgi g e‑hoꞌigeꞌidadag. Kumt ab wo si tatchuad hab masma mo g s‑moik ali tatchua g wihbi ch hekaj wo i geꞌelhid am e‑doꞌibiadag ed. 
\p  
\v 4 Ab g wehs wo i e dagito t‑kownalig Jesus wui. Haꞌi o chum s‑ohhodamk g hemajkam. T wabshaba g Jiosh am i kei mat d wo t‑shonk am t‑wohochudadag ed.  
\v 5 Kumt ab wo abkad hab sha masma mat g hohodai ab wo abkad g e‑shon am ha‑kihta ed. Heg o wa wepo mach ab ab kihtas g Jesus ch d geꞌe cheopi no pi am hahawa t‑eda g Jiosh. Jiosh at wehs am i t‑chuhcha ahchim Jesus wohochuddam matt d wo hekiakam papalk ch ab wui wo t‑hoꞌigeꞌidahunad ch am hab wo junihid g tatchuij. T id heg wo wa wepok mo g s‑ap iagchulida no pi g Jiosh s‑hohhoꞌid.  
\v 6 Id ani hab kaij no pi an oꞌohanas mo g Jiosh hab kaij: 
\q1 Am ant wo hema i kei mat d wo ha‑shondagk g ni‑hemajkamga. 
\q1 T hegam mat ab wo i s‑wohoch pi hekid heg hekaj wo si e elidad. \rq Isaiah 28:16 \rq* 
\m  
\v 7 Neh, bo kaij g Jiosh. K ihda kehshaj woho d si t‑tatchui ahchim mach ab s‑wohochud. T wabshaba hegam mo pi ab hu wohochud wabsh s‑ohhod. Id o hab ahgch an oꞌohanas mo g Jiosh hab kaij: 
\q1 Ni‑kehsha at d wo ha‑shondagk g ni‑hemajkamga, chum as g ha‑wanimeddam wo chum s‑ohhod. \rq Psalm 118:22 \rq* 
\m  
\v 8 K an ep oꞌohanas: 
\q1 Hemajkam at ab ab wo keiko hegai mat d wo chum ha‑shondagk. \rq Isaiah 8:14 \rq* 
\m Id o hab d ahga mat muꞌijj pi ab hu wo wohoch g Jiosh neꞌoki k pi wo mahchk g kehshaj. K d Jiosh tatchui mat idam pi wo e doꞌibia. 
\p  
\v 9 Kum eda ahpim ab s‑wohochud ch d Jiosh hemajkamga ch wehs d papal am wehhejed g t‑kownalig Jesus. Jiosh at am i em‑chuhcha mamt wo i ahgahi g s‑kehg haꞌichu tatchuij. Ab at i em‑wuwhas s‑chuhugam k amjed k ab i em‑wahpki si s‑kehg tonlig ch ed no p i ab em‑mahkch g amichudadag.  
\v 10 Heki am hu pi d haꞌichu ch wabshaba hemuch d hahawa Jiosh hemajkamga ch ab hahawa uꞌukch g Jiosh hoꞌigeꞌidadag. 
\s1 Matt hab wo junihid g Jiosh tatchui 
\p  
\v 11 Pegih, ni‑wepnag, pi am ia hu d si kihkam jewed dahm. Chum o hems g hejel em‑tatchui cheggia g em‑doꞌibiadag. Kunt wo si em‑ahgi mamt pi ab hu wui wo i e dagito  
\v 12 k wabshaba hab wo junihid g s‑apꞌekam. T hab wo nei g s‑ap haꞌichu hab em‑juni hegam matp hedai ab haꞌichu em‑abchud. T ab wo i e ai g geꞌe lodaita tash. T idam hemho wa wo wohokamch mat g Jiosh si s‑kehg haꞌichu hab juh am em‑doakag ed. 
\p  
\v 13-14 Ab g wo s‑wohog elidad g kownal ch wehs hegam mo d kownal chuhchai. Idam o chum s‑koꞌokam ha namkid g pi ap chuꞌijkam ch ab i ha gewkemhun g s‑ap chuꞌijkam.  
\v 15 K d Jiosh tatchui mamt ab wo s‑ha wohog elidad ch hab wo junihid g s‑apꞌekam. T hab pi wo e nako mas has wo em‑ah hegam matp hems nahnko em‑ahg.  
\v 16 Ab at i em‑wuwhas g Jiosh heki hu em‑himdag amjed. Mt hab masma am hab wo e junihid mam d e doꞌibiakam ch d si piongaj g Jiosh ch wabshaba pi wo hekaj g e‑apꞌedag mams am hu hab wo juh g pi apꞌekam.  
\v 17 Ab g wo ihmad g Jiosh ch ab wo si has ha elidad g kokownal ch s‑ap ab wo ha neidad g hemajkam ch ab wo si pihk e elidad ha hekaj g e‑wehm wohochuddam. 
\s1 Matt has masma ab wo bei g t‑shoꞌigchudadag 
\p  
\v 18 Ahpim pion, ab g wabsh wo i e dagitokchid e‑aꞌamo ha wui ch ab wo has ha elidad, chum as haꞌijj wo s‑ta kekꞌeidamak.  
\v 19 Kut g Jiosh ab wo s‑em‑hoꞌigeꞌidad. S‑apꞌe o mamt s‑ap wo nako g shoꞌigchudadag s‑chegitokch g Jiosh.  
\v 20 Ab o d t‑wuikam g s‑koꞌok namkidadag mattp hab wo junihid g pi apꞌekam. Ttp wabshaba s‑ap wo nako g shoꞌigdag am hab chum junihidch g s‑apꞌekam, t g Jiosh ab wo wa s‑t‑hoꞌigeꞌel id hekaj  
\v 21 no pi hab d elidaj matt s‑ap ab wo nako. 
\p Id o wa am t‑chehgidch g Christ mo wa eda s‑ap ab nakog g shoꞌigdag am t‑wehhejed. 
\q1  
\v 22 Neh, pi at hekid hab juh g pi apꞌekam k pi hekid shaꞌi haꞌichu ha iattogid. \rq Isaiah 53:9 \rq* 
\p  
\v 23 Ab amt wa si s‑koꞌokam has ah. T wabshaba pi ab hu aigo has ha ah. Si amt shoꞌigch. T wabshaba pi ha ebkiod k ab wabsh i e dagitokch Jiosh wui s‑mahchch mo heg d si s‑apꞌekam usagakam.  
\v 24 Christ at wehs moht g t‑chuꞌijig k heg hekaj ab e muhkid kots t ab mat wo t‑doꞌibia. Kutt hab wo dagito g pi apꞌekam k am wo i hihi s‑apꞌekam oidk. Shoꞌigchudadaj at doaj g t‑doakag. 
\q1  
\v 25 Dach wa heb hu hihimkam hab sha masma mat g kahwal wo heb hu hih. \rq Isaiah 53:6 \rq* 
\m T g Christ ab uhpam i t‑ui e wui k s‑ap nuhkud g t‑doakag hab sha masma mat g kahwal ha nuhkuddam hab wo juh g heb hu himkam kahwal. 
\c 3  
\s1 Mat has wo chum masmak g uꞌuwi 
\p  
\v 1 Ahpim uꞌuwi amt ab wo e dagitokch heheꞌejel e‑kuhkun ha wui k ch s‑ap wo ha nuhkudad chum hems hegam mo pi ab hu wohochud g Jiosh. Tp hems ab wo i s‑wohoch  
\v 2 am neidch g s‑ap haꞌichu hab em‑juni, chum ams hems pi has wo kaijjid ab amjed g e‑wohochudadag.  
\v 3 S‑ap amt ulinim d wo uꞌuwik ch wabshaba heg pi ab hu wo hiwgad mams ab wo si has masma e apꞌech. Pi at wo em‑apꞌech am Jiosh tahgio mamt has masma wo apꞌech g e‑moꞌo o an hab wo juh g si s‑namkig aꞌanilo ch sisishpakud ch eniga.  
\v 4 Baꞌich i mamt wo s‑hemajimak ch wo s‑dodolimak. T hab wo s‑apꞌek g em‑doakag am Jiosh tahgio.  
\v 5 Bo wa masma hab chuꞌig g Jiosh wohochuddam uꞌuwi ga hu i wehpeg ch ab i e dagitokch heheꞌejel e‑kuhkun ha wui.  
\v 6 Sarabad o wa hab chuꞌig ch ab s‑wohog elid g Abrahambad mo heg d ha‑wanimeddam am ha‑kihdag ed. Kumt ahpim Jiosh wohochuddam uꞌuwi am hab wo junihid g s‑apꞌekam ch pi haꞌichukaj wo e kudutad. T heg wo wa wepok mam d Sarabad amjedkam. 
\s1 Mat has wo chum masmak g chechoj 
\p  
\v 7 Ahpim chechoj amt ab wo has ha elidad g e‑hohonig nam pi s‑mahch mo pi am hu hugkam s‑gewkdag mam ahpim. Bamt masma s‑ap wo e hoꞌigeꞌidahunad g e‑hohonig ha wehm. T g Jiosh ab wo em‑kaihamad. Am g wo s‑chegitok mam e wehm uꞌukch g pi ha huhugedam doakag no pi g Jiosh ab em‑mahkch. 
\s1 Matt s‑ap wo nako g shoꞌigdag 
\p  
\v 8 Wehsijj amt ab wo i e hemakochud k ab aꞌai wo si i e tatchuad ch wo s‑e hoꞌigeꞌidad ch ab wo i e shoꞌigch aꞌai e wui.  
\v 9 Pi g am wo e agwua g pi apꞌekamkaj k pi ab hu wo i nodagi g pi kehg neꞌoki. Ab o t‑ab matt ab wabsh wo i s‑ha hoꞌigeꞌel. T g Jiosh ab epai wo i s‑t‑hoꞌigeꞌel nat pi heg hekaj ab i t‑wai.  
\v 10 An o hab chuꞌig Jiosh heki hu oꞌohana ed: 
\q1 Pi g am wo pad neneokad ch pi haꞌichu wo ha iattogidad mamtp wo tatchuad mamt s‑ap e tahtk ch in d wo dodakamk ch wo s‑hehgigk. 
\q1  
\v 11 Hemho wa amt wo s‑ohhod g pi apꞌekam k am hab wo junihid g s‑apꞌekam ch am wo i e nako mamt wo s‑ap e tahtkkad ab wehs ha wui. 
\q1  
\v 12 T g Jiosh wo em‑nuhkudad ch ab wo kaihamad g em‑hoꞌigeꞌidahuna. 
\q1 Mtp wabshaba hab wo junihid g pi apꞌekam, t g Jiosh ab em‑wui wo kehkkad. \rq Psalm 34:12-16 \rq* 
\m Neh, bo wa masma an oꞌohadag. 
\p  
\v 13 K pi hab chum mahs mas hedai wo s‑koꞌokam em‑juh mamt am wo si e nakogad mamt am hab wo junihid g s‑apꞌekam.  
\v 14 Tp hab wo mahsk mamt wo e shoꞌigch am hab junihidch g s‑apꞌekam, mt wabsh wo s‑ap e tahtkkad nat pi g Jiosh ab wo wa s‑em‑hoꞌigeꞌel heg hekaj. Pi g wo shaꞌi ha ehbidad hegam mat wo em‑shoꞌigchudad. 
\p  
\v 15 Ab g wo has elidad g t‑kownalig Jesus Christ ch chum hekid wo e nahtokchid mamt s‑ap wo ahgi mat hedai ab wo i em‑kakke mam haschu wui ab e gewpkadch.  
\v 16 Kumt wabsh si s‑ap e taht k wabsh s‑hemajim ab wo ha ahgi. 
\p Haꞌi atp hems pi ap has wo em‑ahg k ab wo chum em‑abch g pi apꞌekam k wabshaba wo si e el mamtp chum hekid am hab wo junihid g s‑apꞌekam.  
\v 17 S‑apꞌe o matt wo t‑shoꞌigch am hab junihidch g s‑apꞌekam matp d wo Jiosh tatchuik. K wabshaba d si edadag mattp am hab wo junihid g pi apꞌekam ch hekaj wo t‑shoꞌigch.  
\v 18 Jesus Christ o d hekia s‑apꞌekam ch wa eda e shoꞌigch. Pegih, tt ahchim hab waꞌap wo t‑shoꞌigch. 
\p E at muhkid g Jesus Christ am t‑wehhejed ahchim mach d pi ap chuꞌijkam mat am wo i t‑ui Jiosh wui. Chuhkugaj amt hi wa chum mua. T wabshaba g Hekia S‑apꞌekam Gewkdag baꞌich i mah g gewkdag.  
\v 19 Id gahi wuhshanim Hekia S‑apꞌekam Gewkdag o wa g Jesus Christ am ha mihshmad hegam mo hemu d koꞌi ch gam hu si kuhpi.  
\v 20 Jiosh ash wa si s‑hemajim ab ha nenida g hemajkam mash eda g Noahbad ab s‑wohog elid ch nahtohim g geꞌe wahlko. Tsh wabshaba g hemajkam pi ab hu wohog el. Tsh hab ha wiꞌin. Tsh hegam waꞌi Noahbad e doꞌibia am i wahpk wahlko ch ed matsh am i ha wiꞌin. Sh d gigiꞌik hemajkam matsh e doꞌibia.  
\v 21 Id ani wepogid g t‑pahl wakonadag. Heg att hekaj am t‑chehgi mach s‑wohochud mat g Jesus Christ s‑ap gahi wuhsh g muhkig am t‑wehhejed. Tt ahchim hab waꞌap s‑ap wo gahi wuwha. Pi o hab d ahga g pahl wakonadag machs wabsh wako g t‑chuhkug. Bo d ahga matt ab i t‑dagito Jiosh wui nat pi gam hu hab i juh g pi ap t‑chuꞌijig. Ch hahawa pi heg hekaj t‑kudut.  
\v 22 Christ at gam hu hih dahm kahchim wui. Kush g Jiosh ab si has elid an e‑hugid an dahshch e‑kownal daikud an. Kush g anghil ch nahnko mahs gewpkdag an dahm kahchim ch ed ab wecho. 
\c 4  
\s1 Mat g Jesus am gawul juh g t‑doakag 
\p  
\v 1 E at shoꞌigch g Christ k hekaj am gewito g pi apꞌekam t‑wehhejed. Kumt id wo s‑chegitok namt pi hab waꞌap wo e shoꞌigch mamt wo gewito g pi apꞌekam.  
\v 2 Hemho wa amt am wo e‑dagitokchid Jiosh wui wehs e‑doakdag oidam ch pi g hejel e‑tatchui hab wo junihid.  
\v 3 Tash amt am hihi pi apꞌekam ch ed mam ab jioshga ihda jewed t ab haꞌichu ch nawkkoꞌo ch wabsh e totontochud ch ha wehm woꞌiwup hegam mo pi d em‑wehm kihkam.  
\v 4 Hemu at e ai mamt haꞌasa hab juh hegai hab mahs pi apꞌekam. K g em‑wehm oꞌodham hahawa pi em‑amichud ch ab si has em‑ahg.  
\v 5 E o nahtokch g Jiosh mat wehs wo ha lodai g hemajkam, chum hems hegam mat heki hu koi. Kut wehs wo ah g pi ap e‑chuꞌijig hegam mat pi dagito.  
\v 6 E ash wa ahgahim g s‑kehg haꞌichu ahga chum hems wa hegam ha wui mat idani heki hu koi matp hems ab wo bei g pi ha huhugedam doakag k an haha wo wehmajk g Jiosh. 
\s1 Matt wo s‑ap hekaj hegai mo g Jiosh ab t‑mahkch 
\p  
\v 7 E o aihim mat wo huhug g jewed. Kumt wo si e nuhkud ch wo si s‑e tahtkkad ch hab s‑ap wo e hoꞌigeꞌidahunad.  
\v 8 Id o d i si haꞌichu mamt ab wo si ha tatchua g e‑wehm wohochuddam k hekaj wabsh wo pi chegito g pi ap ha‑chuꞌijig.  
\v 9 S‑hohhoꞌidam amt ab aꞌai wo i e hiwgidad e‑kihki ed.  
\v 10 Ab o t‑mahkch g Jiosh g nahnko mahs mahchig ch apꞌedag. K hab d elidaj matt am aꞌai wo i t‑wehmtad id hekaj t‑apꞌedag.  
\v 11 Mamtp hedai wo ha mihshmad k heg waꞌi Jiosh haꞌichu ahga wo ahgad. Mtp hedai ab wo mahksk mamt wo i ha wehmtad g hemajkam, mt am hab wo juh heg hekaj gewkdag mo g Jiosh ab em‑mahkch. Bamt masma ab wo si has elidad g Jiosh am gahi wuhshanim g Jesus Christ. Neh, wehs o ab d t‑wuikam matt ab wo wechokad ch ab wo hehgchulidad chum hekid. 
\s1 Matt has masma ab wo nakogad g shoꞌigdag 
\p  
\v 12 Ni‑tatchuidch ni‑wepnag, pi g am wo has elidad mam ab nakog g shoꞌigdag.  
\v 13 Jesus Christ o wa heg ab nakog. Kumt wo si s‑hehgigk mam hab waꞌap nakog am hab junihidch g chikpanaj. Ab o him g tash mat g gewkdaj wo i e maskogi. Kumt hahawa baꞌich wo i s‑hehgigk.  
\v 14 Mtp hems s‑koꞌokam has wo em‑ahgad nam pi ab si ihm g Christ. Kumt wabshaba wo si s‑ap e tahtkkad no pi am em‑wehmaj g Hekia S‑apꞌekam Gewkdag.  
\v 15 Pi g am hu hab wo junihid g pi apꞌekam. T wo em‑ai g s‑koꞌok em‑namkidadag. Pi g wo ha muaꞌi. Pi g wo s‑chu eꞌeskad. Pi g wo hudawogad hegai mo haschu pi ab hu em‑him.  
\v 16 Mt ab wo si i hoꞌigeꞌel g Jiosh k pi has wo e el mamtp wo sha e shoꞌigch heg hekaj mam ab si ihm g Christ. 
\p  
\v 17 E at ai mat g Jiosh wo t‑aꞌappe. Kutt chum hems ahchim Jiosh hemajkamga wo t‑aꞌappe g shoꞌigchudakaj. Pegih, t hemho wa baꞌich ab wo i nei g shoꞌigdag hegam mo pi ab hu wohochud g Jiosh haꞌichu ahga.  
\v 18 Neh, bo chuꞌig g heki hu oꞌohanaj g Jiosh: 
\q1 S‑hasigam at wo e doꞌibia hegam mo hab elidas mo d s‑apꞌekam. 
\q1 T eda g Jiosh baꞌich i s‑gewkam wo ha aꞌappe hegam mo pi ab hu wohochud. \rq Proverbs 11:31 \rq* 
\p  
\v 19 Neh, Jiosh o d t‑nahtokam ch woho hab wo juh hegai mo hab kaij mat hab wo juh. Kumt heg hekaj ab wui wo i e dagito, chum as hems wo hiwigi mamt wo e shoꞌigch am hab junihidch g s‑apꞌekam. 
\c 5  
\s1 Mamt has wo masmak mam d Jiosh hemajkamga 
\p  
\v 1 Ahni ani wa g ni‑wuhpuikaj neid mad wa muꞌi e shoꞌigch g Jesus Christ. Jiosh o ab si has elid ch wehmaj ab si has t‑elid ch id am wo maskogi mat hekid ia ep wo jiwia g Christ jewed dahm. K ab ni‑ab mant wo ahgahid ab amjed. Dani hema ha wanimeddam g Jiosh hemajkamga ch heg hekaj am i em‑gewkemhun ahpim mam hab waꞌap d ha wanimeddam.  
\v 2-3 Am o haꞌi em‑nuhkudachud g Jiosh g hemajkam. Kumt wo si s‑ap ha nuhkudad hab masma mat g kahwal ha nuhkuddam hab wo ha juh g e‑kahwaliga. S‑mahch am mo pi ha shahdahim ch wabshaba s‑ap ha wanimed. Kumt ahpim hab waꞌap wo ha wanimedad g hemajkam ch am wo ha chehgi g e‑doakagkaj mat has wo chum masmak. Pi o hab chum chuꞌig mams ab wo haꞌichu si i ha chehanid. K pi hab chum chuꞌig mams wo si tatchuad g e‑namkidadag heg hekaj chikpan. Mt wo chum si tatchuad mamt si s‑ap wo ha nuhkudad.  
\v 4 T g Jesus Christ ab wo em‑mah g pi ha huhugedam si has elidadag mat hekid ia ep wo jiwia jewed dahm no pi heg wehsijj d t‑nuhkuddam. 
\p  
\v 5 Ab amt wo ha kaihamad g e‑wanimeddam. Wehsijj amt wabsh wo i e shoꞌigchudad. Neh, bo chuꞌig g Jiosh oꞌohana: 
\q1 Jiosh at ab ha wui wo kekiwua hegam mo chum si e haschud k wabshaba wo ha mah g hoꞌigeꞌidalig hegam mat ab wo i e shoꞌigch. \rq Proverbs 3:34 \rq* 
\m  
\v 6 Pegih, mt ab wabsh wo i e shoꞌigch Jiosh wui. Kut heg ab haha wo si em‑haꞌichuch mat hekid am wo s‑apꞌet.  
\v 7 Ab g wehs wo i dagito g e‑kudutadag Jiosh wui no pi ab si em‑tatchua. 
\p  
\v 8 Si g wo s‑e tahtkkad ch wehs haꞌichu wo si nenashanad. Jiawul o chum s‑t‑uꞌimk ch s‑koꞌokam s‑t‑junimk hab masma matp g mawid wo sha t‑be k hab waꞌap wo s‑koꞌokam t‑juh.  
\v 9 Wehsijj g em‑wehm wohochuddam o ab nakog ihda hab mahs shoꞌigdag. Kumt heg hekaj s‑wihnam wo gegokkad e‑wohochudadag ed ch ab wui wo gegokkad g Jiawul.  
\v 10 Jiosh at ab i em‑gawulkai mamt ab wo i s‑wohoch g Jesus Christ k chum hekid wehmaj wo edgidad g si s‑kehg apꞌedag. Kumt al haꞌas wo i taht g shoꞌigdag. T g Jiosh ab wo em‑mah g gewkdag k hab wo em‑juh mamt wo geꞌegeꞌehogat k s‑wihnam wo gegokkad.  
\v 11 Jiosh o d gewkdag chum hekid. Kutt chum hekid ab wo hehgchulidad. 
\s1 Mat ia i kuhgi g e‑oꞌohana g Peter 
\p  
\v 12 Ia o ni‑wehmaj g Silas ch am oꞌoha ihda al haꞌichu ni‑ahga k am wo i bei em‑wui. Ab ani si hiwig g Silas am eda ihda chikpan. 
\p Jiosh o si s‑hemajim ab i em‑wehmt. Kuni am i em‑gewkemhun mamt pi hekid wo pi chegito g i wehmtadaj. 
\p  
\v 13 Idam t‑wehm wohochuddam mo ia d kihkam Rome t am o s‑em‑ahgidamk mamt ab wo i s‑ha hoꞌigeꞌel. 
\p Ia o ep ni‑wehmaj g t‑wehnag Mark ch hab waꞌap s‑em‑ahgidamk mamt ab wo s‑hoꞌigeꞌel. 
\p  
\v 14 Ab g wo aꞌai si e ihmad, ahpim e wehm wohochuddam. 
\p Ab at wo wa baꞌich i em‑mah g Jiosh g s‑ap tahhadkam.