\id 1JN  
\h 1 JOHN 
\toc1 Id ash d John Oꞌohana am ha Wui g Jesus Wohochuddam 
\toc2 1 JOHN 
\toc3 1Jn 
\mt1 Id ash d John Oꞌohana am ha Wui g Jesus Wohochuddam 
\c 1  
\s1 Jiosh alidag o ab t-mahkch g wechij doakag 
\m  
\v 1-2 Ni-wepnag: 
\p Am ant wo i em-oꞌohani ab amjed hegai mat ia uꞌapa g Jiosh haꞌichu ahga jewed dahm k ab t-mahkch g wechij doakag. Chum ash hekid wehmaj g e-ohg Jiosh an dahm kahchim ch ed ch wabshaba ia i wuhsh jewed dahm. Kuni si neid g hejel ni-wuhpuikaj ch kahk ch ab tahtk g ni-nohnhoikaj.  
\v 3 Ahchim mach wa neid g Jiosh alidag ach am em-ahgid ab amjed mamt hekaj t-wehm ab wo ihmad g Jiosh. Jesus Christ o d Jiosh alidag.  
\v 4 Kuni am em-oꞌohanid ahpim mam ab s-wohochud mamt hekaj wo si s-ap e tahtkkad. Nt ahni hab waꞌap wo si s-ap ni-tahtkkad em-wehm. 
\s1 Do hekia s-apꞌekam g Jiosh 
\p  
\v 5 Jesus o am t-ahgid mash g Jiosh d hekia tonlig.  
\v 6 T wo ha iattogi matp hedai hab wo chei mo s-mahch g Jiosh k eda hab wo junihid g pi apꞌekam. Id o am s-chuhugam k ed him.  
\v 7 Jiosh o d wohokam. Kutt wo si s-ap t-tahtkkad ab aꞌai t-wui am oidch hihimadch g wohokam. Kut heg gam hu hab wo i junihid g pi ap t-chuꞌijig nat pi heg hekaj t-wehhejed muh g alidaj. Heg o wa wepo mo g alidaj ehꞌed gam hu wakon g pi ap t-chuꞌijig. 
\p  
\v 8 Pi g hab wo shaꞌi chehꞌi mams pi ha chuꞌijig. Heg o d iattogi.  
\v 9 Tt wo mahsko wua g t-chuꞌijig. T g Jiosh gam hu hab wo i juh k wo i t-kegch. Heg at hekaj ab nako g Jiosh alidag g s-koꞌok t-namkidadag ab e shoꞌigchudk kots t ab.  
\v 10 Jiosh o am t-tashogid matt wehsijj hab juh g pi apꞌekam. Kut hedai hab wo chei mo pi ha chuꞌijig k am wo e chehgi mo pi ab hu wohochud g Jiosh. 
\c 2  
\s1 Am o i t-wehmaj g Jiosh alidag 
\p  
\v 1 Dam ni-aꞌaliga ab i s-wohochudk g haꞌichu ni-ahga. Kuni ab i em-gewkemhun mamt pi am hu hab wo junihid g pi apꞌekam. Jesus Christ o d hekia s-apꞌekam ch ab e hoꞌigeꞌidahun Jiosh wui am t-wehhejed. Kutt am wo ahgi g Jiosh g t-chuꞌijig matt hekid am hab wo juh g pi apꞌekam.  
\v 2 T heg gam hu hab wo i juh g t-chuꞌijig nat pi g alidaj heg hekaj nako g s-koꞌok t-namkidadag. Kut wabsh chum hedai wo chum e nako mat ab wo i e nodagi wui.  
\v 3 Tt wo s-mahchk mach wohoꞌi s-mahch g Jiosh matt am hab wo junihid mo haschu ab i t-chehani.  
\v 4 Hegai mat pi am hu oidk hab wo e junihid g Jiosh chehanig o pi mahch g Jiosh, chum as hems hab wo chum chei mo s-mahch.  
\v 5 Ahchim mach hab wua g Jiosh tatchui ach wohoꞌi ab si tatchua. Id at am wo t-chehgi mach woho d aꞌaligaj.  
\v 6 Jiosh alidag o chum hekid am hab junihim g e-ohg tatchui. Kutt ahchim hab wo chum masmak mattp woho d aꞌaligaj g Jiosh. 
\s1 Mat i e wechijid g heki hu chehanig 
\p  
\v 7 Pegih, ni-tatchui, pi ani em-ahgid g wechij chehanig am em-ahgidch mamt ab aꞌai wo si e tatchuad. Jiosh o wa heki hu hab masma t-chehani. Kum id ab kaichug heki hu waꞌi amjed.  
\v 8 T eda g Jiosh alidag am i wechijid t-wehhejed mat ab i t-mah g wechij doakag. Tonlig o gam hu hab i wua g s-chuhugam am t-wehhejed. 
\p  
\v 9 Am o wabsh kia him s-chuhugam k ed matp hedai s-kehꞌid g e-wehnag, chum as hab wo kaijjid mo hab wua g s-apꞌekam.  
\v 10 Tt am tonlig ch ed wo hihimad mattp woho ab wo si ha tatchuad g t-wepnag. T pi hedai wo pihk chuꞌi heg hekaj mach has masma.  
\v 11 K wabshaba am s-chuhugam k ed him hegai matp hedai wo s-ha kehꞌidad. 
\p  
\v 12 Pi ant hab ahgk am wo em-oꞌohani mams pi mahch g Jiosh. Gm at hu hab i juh g em-chuꞌijig. Kum s-mahch.  
\v 13-14 Ahpim mam d si geꞌeged am s-mahch mo g Jesus chum hekid d doakam. Kum ahpim wechij hemajkam s-gewkdag ch am gewito g Jiawul nam pi s-gegokim ab e uꞌukch Jiosh haꞌichu ahga ab. Heg ant hekaj am wo i em-oꞌohanid k ab wo i em-gewkemhu. 
\p  
\v 15 Pi g wo shaꞌi si pihk e elidad heg ab mo d wabsh jewed t ab haꞌichu. Hegam matp hedai wo si pihk e elidad id ab haꞌichu at pi wo shaꞌi pihk e elidad ab Jiosh wui.  
\v 16 Pi o d shaꞌi Jiosh hab elida matt hab wo s-junim g pi apꞌekam o si s-wohom wo s-behim mach haschu i neid o machs haschukaj wo si t-haschudad. Wehs ihda o d wabsh jewed t ab haꞌichu  
\v 17 ch hab wa masma d wabsh huhugedam haꞌichu. T wabshaba pi hekid wo huhug hegai wechij doakag mo g Jiosh ab t-mahkch ahchim mach am hab junihim g tatchuij. 
\s1 Matsh an wo i e maskogi hegai mash d si obgaj g Jiosh alidag 
\p  
\v 18 Am am wa kah matsh an wo i e maskogi hegai mash d si obgaj g Jiosh alidag. Heki at hu muꞌi an i wuwha t-shahgid mo d obgaj. Kuch heg hekaj s-mahch mo e aihim mat wo huhug g jewed.  
\v 19 T wo chum t-wehm wih matp d t-wehm wohochuddam k wabshaba am i t-dagito. K heg hekaj tasho mo pi woho d t-wehm wohochuddam. 
\p  
\v 20 Jiosh alidag at ab t-mah g Hekia S-apꞌekam Gewkdag. K heg am t-wehmaj ch i t-wehmt. Kuch heg hekaj s-mahch g wohokam.  
\v 21 Pi o hekid g iattogi d wohokam. Kum s-mahch ihda nam pi s-mahch g wohokam. Nt heg hekaj am em-oꞌohani ihda. 
\p  
\v 22 Hegam mo hab kaij mo g Jesus pi d Jiosh alidag o wehs ha baꞌich d i s-chu iꞌattomkam ch d obgaj. Heg o hekaj e chehgid mo pi ab hu wohochud g Jiosh.  
\v 23 Hegam mo pi ab hu ihm g Jiosh alidag o hab waꞌap pi ab hu ihm g Jiosh. Hegam o ab waꞌi ihm g Jiosh mo hedai ab ihm g alidaj. 
\p  
\v 24 Mt am wabsh wo i wohochudad ihda s-kehg haꞌichu ahga mam ga hu i wehpeg amjed kaichug. Kut heg hekaj chum hekid am wo em-wehmajk g Jiosh g e-alidag wehm.  
\v 25 Heki o hu hab kaij g Jiosh matsh ab wo t-mah ihda wechij doakag matsh pi hekid wo huhug. 
\p  
\v 26 Am ant em-oꞌohani ab ha amjed hegam mo em-iattogid ch im hu hab i s-em-junimk ab amjed g Jesus. Kumt pi ab hu haꞌichu wo mahchim ha ab.  
\v 27 Pi o hab chum mahs mams wabsh chum hasko amjed wo i e gahgidahi mam haschu i pi amichud. Jiosh alidag at ab em-mah g Hekia S-apꞌekam Gewkdag. Kut heg chum hekid am wo em-wehmajk ch wehs wo em-mashchamad g wohokam. Kumt ab wo kaihamad g mashchamaj ch ab wo s-wohog elidad g Jiosh alidag  
\v 28 ch hab masma pi wo si e el mat hekid ep wo jiwia.  
\v 29 Do hekia s-apꞌekam g Jiosh. Kumt heg hekaj wo s-mahchk mamtp hedai hab junihim g s-apꞌekam ch d aꞌaligaj. 
\c 3  
\s1 Mach d aꞌaligaj g Jiosh 
\p  
\v 1 Jiosh at hab t-juh mach d hahawa aꞌaligaj no pi si pihk e elid ab t-wui. Hegam mo pi mahch g Jiosh alidag o pi mahch mach ahchim hab waꞌap d Jiosh aꞌaliga.  
\v 2 Batt wo chum masmak mo g Jiosh alidag nach pi hab waꞌap d aꞌaligaj. K pi koi am hu i si tasho matt has wo masmak nach pi wabsh s-kohmagim neid mo has i masma g Jiosh alidag. T hekid ep wo jiwia k ab wo i e chehgi t-wui. Kutt haha wo wepo masmak natt pi wo s-mai mo has masma.  
\v 3 K eda hemu tasho mo d si hekia s-apꞌekam g Jiosh alidag. Kutt ahchim wo si t-nuhkudad matt d wo s-apꞌekamk nach pi s-mahch mat ep wo jiwia. Kutt wo neid k wo wepo masmak. 
\p  
\v 4 Dat wo pi ap chuꞌijkamk am Jiosh chehanig ed hegai mat hedai hab wo junihid g pi apꞌekam.  
\v 5 Pi o ha chuꞌijig g Jiosh alidag ch in i wuhsh jewed dahm wepo masma g oꞌodham mat gam hu hab wo i juh g pi ap t-chuꞌijig.  
\v 6 Pi att am hu hab wo chum junihid g pi apꞌekam mattp ab wo s-wohochudad g Jiosh alidag. Hegai mat hedai hab wo junihid g pi apꞌekam oki pi mahch g Jiosh alidag. 
\p  
\v 7 Haꞌi o hab kaij mamt d wo s-apꞌekamk, chum hems pi am hu hab junihidch g s-apꞌekam. S-e g wo nenꞌoidk mat pi wo em-iattogi. Jesus o am t-chehgidch g hejel e-doakagkaj matp hedai d wo s-apꞌekamk ch am hab wo junihid g s-apꞌekam.  
\v 8 Matp hedai hab wo junihid g pi apꞌekam ch d wo Jiawul pionagk nat pi hab wo junihid g tatchuij g Jiawul. Jiawul o hab junihim g pi apꞌekam ged hu i si wehpeg amjed. T ia jiwia g Jiosh alidag jewed dahm mat wo hugio g Jiawul chikpan. 
\p  
\v 9 Pi att am hu hab wo junihid g pi apꞌekam ahchim mach d aꞌaligaj g Jiosh nach pi edgid g wechij doakag.  
\v 10 K id hekaj tasho mo hedai d aꞌaligaj g Jiosh ch hedai am oid g Jiawul. Pi o d shaꞌi aꞌaligaj g Jiosh hegam mat hedai pi hab wo junihid g s-apꞌekam ch pi ab hu wo pihk e elidad ab ha wui hegam mo d chum ha-wepnag. 
\s1 Matt ab aꞌai t-hekaj wo si pihk t-elidad 
\p  
\v 11 Ihda mani em-ahgid o d hegai mam kaichug ged hu i amjed mamt wehpeg kah. Ab g wo si pihk e elidad aꞌai e wui. 
\p  
\v 12 Neh, hema ash wa d Cain ch hab junihim g Jiawul tatchui. Kumt pi oidk am hab wo e junihid. Cain cheoj wehnag ash wa hab junihim g s-apꞌekam. Sh g Jiosh si tatchua. Tsh g Cain heg hekaj s-hehgam k mua. 
\p  
\v 13 Pi g wo shaꞌi e totodsid mat hems g hemajkam hab wa masma wo s-em-kehꞌidad.  
\v 14 S-mahch ach mo ab t-mahkch g Jiosh g wechij doakag nach pi si pihk t-elid ha hekaj g t-wehm wohochuddam ch hab masma ab ha neid mo d t-wepnag. Hegam mo pi pihk e elid ha hekaj g e-wepnag o hab sha masma mo g koꞌi.  
\v 15 Heg o wa wepo mo d ha muꞌakam matp hedai s-ha kehꞌid. Kuch s-mahch mo pi edgid g wechij doakag hegam mat hedai d wo ha muꞌakamk. 
\p  
\v 16 Jiosh alidag at ab muh kots t ab t-wehhejed no pi t-hekaj si pihk e elid. Id o hekaj tasho mo haschu d pihk elidadag. Kutt wo si pihk t-elidad ha hekaj g t-wepnag am hugkam matt chum hems wo t-muhkid am ha wehhejed.  
\v 17 Pi o shaꞌi pihk e elid ab Jiosh wui hegai mat hedai haꞌichu wo s-edgidad ch pi heg hekaj ab hu wo i wehmt g e-wehnag.  
\v 18 Ab att wo ha mah g t-wepnag g i wehmtadag matp wo tatchua k pi hab wabsh wo kaijjid mach si pihk t-elid ha hekaj. 
\s1 Mat ab wo i miabi g Jiosh g aꞌaligaj 
\p Pegih, si ach pihk t-elid ha hekaj g t-wepnag.  
\v 19 K heg hekaj tasho mach edgid g wohokam. Id att hekaj ab wo i t-gewkemhu matt ab wo i miabi g Jiosh.  
\v 20 Hebaichujj ach ab haꞌichu t-chuꞌijigchud. K wabshaba g Jiosh baꞌich i s-gewkdag mach ahchim ch wehs haꞌichu s-mahch  
\v 21 ch gam hu hab i juh hegai t-chuꞌijig. Tt hab pi haꞌichu ab hu wo t-chuꞌijigchud k ab wabsh wo i miabi g Jiosh pi shaꞌi has t-elidch.  
\v 22 Bach junihim g Jiosh tatchui ch hegai mo haschu ab t-chehani. K g Jiosh heg hekaj am hab t-junid mach haschu ab i tahni.  
\v 23 K id d chehanigaj g Jiosh matt ab wo s-wohochudad g alidaj ch ab aꞌai t-wui wo si pihk t-elidad mo hab masma t-chehani g alidaj.  
\v 24 Mach hedai ab s-wohog elid g Jiosh att ab si t-hemakoj heg wehm. Jiosh at ab t-mah g Hekia S-apꞌekam Gewkdag. K id d Jiosh ch t-wehmaj. Kuch heg hekaj s-mahch mach d aꞌaligaj. 
\c 4  
\s1 Mo hedai edgid g Hekia S-apꞌekam Gewkdag 
\p  
\v 1 Muꞌi at an i wuwhag k hab chum e wua mo d ha mihshmaddam. K eda pi ha wehmaj g Hekia S-apꞌekam Gewkdag. Kumt heg hekaj pi wabsh chum hedai ab wo s-ha wohochud k hoꞌip ha aꞌappe mas woho ha wehmaj g Hekia S-apꞌekam Gewkdag.  
\v 2 Ahchim o waꞌi t-wehmaj g Hekia S-apꞌekam Gewkdag mach hedai wohokamchud mo g Jesus d Jiosh alidag ch ia mahsi k d oꞌodham hab masma mach ahchim.  
\v 3 Pi o am hu ha wehmaj g Hekia S-apꞌekam Gewkdag hegam mo hedai pi ab hu wohochud g Jiosh alidag. Am o hema ha wehmaj ch d Jesus obga. Heki am hu kah mat an wo i wuhsh g obgaj. K hemuch in haꞌichug no pi an ha wehmaj hegam mo pi ab hu wohochud g Jiosh alidag. 
\p  
\v 4 Jiosh alidag obga o am ha wehmaj hegam mo g iattogi chum ha mihshmdahim. K wabshaba g Hekia S-apꞌekam Gewkdag in t-wehmaj. Kutt heg hekaj ha gewito no pi heg baꞌich i s-gewkdag mo hi g Jiosh alidag obga.  
\v 5 Hegam o ab wabsh jewed t ab haꞌichu k amjed neneok. K hegam ab ha kaiham mo hab waꞌap pi mahch g Jiosh.  
\v 6 Pi o ab hu t-kaiham mach chum neneok ab amjed g Jiosh no pi pi mahch g Jiosh. Hegam o ab waꞌi t-kaiham mo hedai s-mahch g Jiosh. Bach masma s-mahch mo hedai edgid g Hekia S-apꞌekam Gewkdag. Heg o am ha tashogid g wohokam. 
\s1 Mo si pihk e elid g Jiosh ab t-wui 
\p  
\v 7 Ab att wo chum si pihk t-elidad aꞌai t-wui no pi g Jiosh ab t-mahkch g pihk elidadag. Mamtp woho wo s-mahchk g Jiosh ch d aꞌaligaj ch wo si pihk e elidad.  
\v 8 Jiosh o si t-tatchua ch heg hekaj si pihk e elid ab t-wui. K hegam mo pi edgid g pihk elidadag pi d shaꞌi aꞌaligaj.  
\v 9-10 Jiosh at ab i wuhshad g si hemako e alidag id dahm jewed. T heg ab nako g s-koꞌok t-namkidadag mach heg ab beihog. Kut hab masma ab t-mah g wechij doakag. Bat wa masma am t-tashogi g Jiosh mo si pihk e elid ab t-wui. Kutt heg amjed i s-mai g pihk elidadag k hahawa si pihk t-elid ab Jiosh wui.  
\v 11 Am o wa tasho mo ab t-wui si pihk e elid g Jiosh. Pegih, ni-wepnag, ahchim att hab waꞌap wo chum si pihk t-elidad ab aꞌai t-wui.  
\v 12 Pi ach hedai hekid shaꞌi neid g Jiosh g t-wuhpuikaj. K wabshaba heg ab t-mahkch g si geꞌe pihk elidadag. Kuch heg hekaj s-mahch mo t-wehmaj. 
\p  
\v 13 Jiosh at ab t-mah g Hekia S-apꞌekam Gewkdag. K heg d Jiosh ch ab t-wehm kihdag. Kuch heg hekaj s-mahch mach d aꞌaligaj.  
\v 14 Heki at hu am i kei g Jiosh g e-alidag mat ab wo i hih jewed wui k wo ha doꞌibia g hemajkam. Kuni si neid ihda ch heg amjed am em-ahgid.  
\v 15 Wehsijj ach d aꞌaligaj g Jiosh matt hedai ab s-wohochud k ah mo g Jesus d si alidaj.  
\v 16 Kuch heg hekaj s-mahch mo si pihk e elid g Jiosh ab t-wui ch ab si t-hemakojidch e wehm. 
\p Jiosh o ab si t-tatchua. Kuch s-mahch mach d aꞌaligaj nach pi ab aꞌai si t-tatchua.  
\v 17 Ab o t-mahkch g si geꞌe pihk elidadag. Kuch wepo masma ab si tatchua mo g alidaj ch hab s-ap t-taht k wo ai g lodaita  
\v 18 k pi wo ehbidad. Gm at hu hab i juh g pi ap t-namkidadag g Jiosh no pi si pihk e elid ab t-wui. Kutt heg hekaj pi wo ehbidad ch wabsh aigo wo si pihk t-elidad ab wui. Pi o pihk e elid ab Jiosh wui hegai mat hedai wo s-ehbidad. 
\p  
\v 19 Wehpeg o si pihk e elid g Jiosh ab t-wui. Kuch heg hekaj edgid g pihk elidadag.  
\v 20 Pi o woho d Jiosh wohochuddam mo hedai pi ab hu pihk e elid t-wui ahchim mach d wohochuddam. Baꞌich o i s-hasig matt ab wo si tatchua hegai mach pi neid. Pi at wo e nako mat ab wo si tatchua g Jiosh matp hedai pi ab hu wo si ha tatchua g e-wepnag.  
\v 21 Ab o t-chehani g Jiosh ahchim mach ab si tatchua matt ab epai wo si ha tatchuad g t-wepnag. 
\c 5  
\s1 Mattsh wo ha gewito hegam mo ab wui gegok g Jiosh 
\p  
\v 1 Dach Jiosh aꞌaliga wehsijj ahchim mach s-wohochud mo g Jesus d alidaj g Jiosh ch d si Kehshaj. Kutt ab aꞌai wo si t-tatchuad nach pi d t-wepngam. K g Jiosh d t-ohg.  
\v 2 S-mahch ach mo d wohokam g t-tatchuidag ab aꞌai t-wui nach pi ab si tatchua g Jiosh.  
\v 3 K am wa tasho mach ab si tatchua g Jiosh nach pi ab s-wohog elid. K g chehanigaj pi shaꞌi wehch am t-wehhejed.  
\v 4-5 Jiosh o ab t-mahkch g gewkdag matt wo gewito g pi apꞌekam. Ab ach s-wohochud g alidaj. K heg hekaj ab t-mahkch hegai gewkdag matt heg hekaj gewito g pi apꞌekam. Pi at wo e nako g pi wohochuddam mas wo gewito g pi apꞌekam. 
\s1 Mash g Jiosh am wohokamchud g e-alidag 
\p  
\v 6 Jesus Christ at ia jiwia jewed dahm k e pahl wakon k am hab juh g e-chikpan k am hahawa e muhkid am t-wehhejed.  
\v 7-8 T g pahl wakonaj ch muhkigaj am wohokamch mo d Jiosh alidag ch d doakam id dahm jewed. K g Hekia S-apꞌekam Gewkdag hab waꞌap wohokamchud. Idam waik o am wohokamchud mo g Jesus d Jiosh alidag.  
\v 9 Neh, ab ach s-wohochud g oꞌodham mat ab haꞌijj wo t-ahgi mo si s-ap s-mahch. K g Jiosh haꞌichu ahga baꞌich i s-gewkdag mat heg am wohokamch g e-alidag.  
\v 10 Kutt hedai ab wo s-wohoch g Jiosh alidag k wo si s-ap s-mahchk mo d wohokam. Hekia S-apꞌekam Gewkdag at t-wehhejed wo wohokamch. Hegam mo pi wohochud g Jiosh oki hab elid mo t-iattogid.  
\v 11 Ab o i t-tashogid g Jiosh mo ab t-makiog g pi ha huhugedam doakag am gahi wuhshanim g e-alidag.  
\v 12 Ahchim mach ab ihm g alidaj ach edgid hegai doakag. K hegam mo pi ab hu ihm pi edgid. 
\s1 Mo hedai edgid g wechij doakag 
\p  
\v 13 Id ant am em-oꞌohani ahpim mam ab ihm g Jiosh alidag mamt hekaj wo s-mahchk mam edgid ihda wechij doakag.  
\v 14-15 Si ach s-mahch mat ab wo t-kaiha g Jiosh matt ab haꞌichu wo tai matp id am tatchuij oidch d wo haꞌichuk. Kutt heg hekaj ab wo i t-gewkemhunad ch ab wo haꞌichu tahnid nat pi woho am hab wo t-junidahid. 
\p  
\v 16 Ab att wo tahnid g Jiosh mat gam hu hab wo i juh g ha-chuꞌijig g t-wehm wohochuddam matp ab wo e shohbi. Kut hab wo juh mach haschu ab tahni. Pi ani em-ahgid mams wo e hoꞌigeꞌidahu ha wehhejed hegam mat pi ab hu wo shaꞌi e shohbi.  
\v 17 Wehs o haꞌichu d pi apꞌekam mo haschu i pi d Jiosh tatchui. T wabshaba g Jiosh gam hu hab wo i juh g ha-chuꞌijig hegam mat ab wo e shohbi. 
\p  
\v 18-19 S-mahch ach mo g Jiawul edgid g gewkdag am wehs ha dahm hegam mo pi d Jiosh aꞌaliga. Kuch eda ahchim d Jiosh aꞌaliga. Jiosh alidag o t-nuhkud. Kut pi wo shaꞌi e nako g Jiawul mas gam hu hab wo i t-juh ab amjed. Pi att am hu hab wo junihid g pi apꞌekam ahchim mach d Jiosh aꞌaliga.  
\v 20 K g Jiosh alidag ab t-mahkch g amichudadag matt wo s-mahchk g wohokam Jiosh ch wo edgidad g wechij doakag. Heg at hekaj ia jiwia g Jiosh alidag jewed dahm. Heg o d waꞌi t-Jioshga mo d si wohokam Jiosh.  
\v 21 Kumt pi haꞌichu ep wo jioshchud k pi hedai ep ab hu wui wo e hoꞌigeꞌidahunad.