\id 1CO  
\h 1 CORINTHIANS 
\toc1 Id ash d Paul Wehpeg Oꞌohana am ha Wui g Corinth t Am Wohochuddam 
\toc2 1 CORINTHIANS 
\toc3 1Co 
\mt1 Id ash d Paul Wehpeg Oꞌohana am ha Wui g Corinth t Am Wohochuddam 
\c 1  
\m  
\v 1 Ni-wepnag mam am kih Corinth t am: 
\b  
\p Am ant wo haꞌichu i em-oꞌohani ahni Paul mani d Jesus Christ kehsha mo wa am ni-tatchuid g Jiosh. K ia i ni-wehmaj ihda t-wehnag mo hab chehgig Sosthenes. 
\p  
\v 2 Jiosh at ab i em-gawulkai mamt d wo hemajkamgajk. Kumt heg hekaj ab i e hemakoj wehsijj t-wehm ahchim mach hab waꞌap ab ihm g t-kownalig Jesus Christ. 
\p  
\v 3 Ab o wa si s-em-hoꞌigeꞌid g t-ohg Jiosh g t-kownalig Jesus Christ wehm ch ab wo wa baꞌich i em-mahkad g i wehmtadag ch s-ap tahhadkam. 
\s1 Ab o hoꞌigeꞌid g Paul g Jiosh mat ab si i s-ha hoꞌigeꞌel. 
\p  
\v 4 Chum ani hekid ab si hoꞌigeꞌid g Jiosh em-hekaj. Ab amt i s-wohoch g Christ. T g Jiosh ab i em-mah g geꞌe i wehmtadag.  
\v 5 M heg hekaj s-mahch mo haschu s-apꞌe ch s-ap haꞌichu am hab junihim ch s-ap haꞌichu k amjed neneok.  
\v 6 Am o e chehgidch mam s-wihnam an uꞌukch g haꞌichu t-ahga ab amjed g Christ.  
\v 7 Kum wehs ab i neid g hoꞌigeꞌidadgaj ch ep nenida mat ep wo jiwia.  
\v 8-9 Jiosh at ab i em-waid k ab i em-gawulkai mat hab masma hab t-juh. Kum hab si s-ap s-mahch g alidaj Jesus Christ. T g Jiosh pi hekid am hu gawul wo juh g hab e-elida k an wo t-uꞌukchid matt pi ab hu wo t-chuꞌijigch heg eda tash mat wo ha lodai g pi ap chuꞌijkam. 
\s1 Mash am aꞌai gaꞌagwulkdas g wohochuddam. 
\p  
\v 10 T-kownalig Jesus Christ o ab ni-mahkch g gewkdag mant wo haꞌichu em-cheha. Kunt hekaj wo em-ahgi mamt pi ab hu e wui wo gegokiwua k wabshaba ab wo i hemakoj g e-chegitoidag k wo s-ap e tahtkk ab aꞌai e wui. 
\p  
\v 11 Ia at haꞌi dada g em-wehm kihkam mo d Cloe hajuni k hab kaij mamsh pi e wehm neneok.  
\v 12 Haꞌi amsh hab kaij mamsh ahni am ni-oid ch amsh haꞌi g Apollos am oid ch amsh haꞌi g Peter am oid. Kumsh haꞌi hab e elid mamsh ahpim d waꞌi wohokam oiddam g Christ. 
\p  
\v 13 Neh, am amtsh aꞌai i e gaꞌagwulkad k eda d chum hemako ab wecho g Christ. Pi att hema ahchim ab muh kots t ab em wehhejed. Heg at waꞌi Christ hab e juh. Kumt heg ab waꞌi s-wohochud k e pahl wapko. 
\p  
\v 14-17 Pi ant heg wehhejed am hu jiwia manis wehs wo em-pahl wapko. Shahag wepo mant hegam waꞌi Crispus ch Gaius ha wapko, pej hegam ehp Stephanus. Pi ant chegito manis haꞌi ep ha pahl wapko. Pi ani hab ni-ahg mams ahni wo i ni-oi. Pi at heg hekaj am i ni-kei g Christ manis wo ha pahl wapkonad k wabshaba am i ni-kei mant am wo ahgachugad ihda s-kehg haꞌichu ahga mo hab chuꞌig mat ab e muhkid kots t ab t-wehhejed. Neh, id ani waꞌi ahgachug ch pi hekaj g s-hasig neꞌoki mams ab wo si has ni-elid k p i am hu wo amichud k hab pi wo e doꞌibia. 
\s1 Mash g Christ am t-chehgidch g gewkdaj g Jiosh ch haꞌichu amichudadaj 
\p  
\v 18 Hegam mo pi d e doꞌibiakam o hab elid mo d wabsh pi haꞌichu g haꞌichu t-ahga mat g Christ ab muh kots t ab t-wehhejed. Kuch wabshaba ahchim mach d t-doꞌibiakam s-mahch mo g Jiosh hab masma ab t-chehgidch g e-gewkdag.  
\v 19 Neh, an o oꞌohanas mo hab kaij g Jiosh: 
\q1 Haꞌi o hab e elid mat wo i e apꞌech heg hekaj hejel e-amichudadag. 
\q1 Nt wabshaba am wabsh wo pi haꞌichuch g hab ha-elida. \rq Isaiah 29:13 \rq* 
\p  
\v 20 Pegih, am o t‑chehgidch g Jiosh matt pi hedai wo shaꞌi t‑nako machs wo hejel t‑doꞌibia, chum achs hems haꞌichu wo s‑amichudad ch haꞌichu wo s‑mahchkad. Pi att hedai wo shaꞌi t‑nako machs wo ha neꞌowin k wo cheh g Jiosh wohokam.  
\v 21 Jiosh at hab masma hab t‑juh matt pi hedai wo shaꞌi t‑nako machs hejel wo s‑mai g Jiosh k wo t‑doꞌibia. Haꞌi o pi haꞌichuchud g Jiosh haꞌichu ahga. K wabshaba hab d elidaj matt ab wo i s‑wohoch g haꞌichu ahgaj k hekaj wo t‑doꞌibia.  
\v 22 Ni‑wehm Tutuligo o s‑hohhoꞌid mat hoꞌip nei g s‑hasig haꞌichu k haha wo s‑wohoch hegai mo hab junihim. K g gawul mahs hemajkam s‑kaimk g hemajkam haꞌichu ha‑mahchig mat hab masma wo chum s‑mai g wohokam.  
\v 23 Ch wabshaba ahchim hi heg ahgachug mat g Christ ab muh kots t ab k hekaj t‑doꞌibia. Tutuligo o hab elid mo id wabsh chehgidch mo pi gewkdag. K g gawul mahs oꞌodham hab elid mo wabsh chehgidch mo pi haꞌichu amichud.  
\v 24-25 T wabshaba g Jiosh ab haꞌi i t‑gawulkai ahchim Tutuligo k hab waꞌap ab haꞌi i em‑gawulkai ahpim gawul mahs hemajkam matt ab wo i s‑wohoch g alidag k wo t‑doꞌibia. Hegam mo pi d e doꞌibiakam o pi ab hu haꞌichuchud ihda mat g Jiosh am hab t‑juni am gahi wuhshanim g e‑alidag. K wabshaba g Jiosh hab masma am t‑chehgidch g e‑amichudadag ch e‑gewkdag. 
\p  
\v 26 Am g wo s‑chegitok, ni‑wepnag, mam has i masma mat eda koi ab hu i em‑gawulkai g Jiosh mamt d wo hemajkamgajk, Muꞌijj am pi haꞌichu mahch ch pi ha gewkdag ch d wabsh pi haꞌichu am ha‑nena ed g hemajkam.  
\v 27 T g Jiosh ab i em‑gawulkai mat hekaj am wo ha chehgi hegam mo pi mahch mo d wabsh pi haꞌichu g haꞌichu ha‑amichudadag ch ha‑gewkdag.  
\v 28 Pi am ab hu em‑haꞌichuchud ch wabsh s‑em‑uhwaid. T wabshaba g Jiosh ab i em‑gawulkai mat hekaj am wo ha chehgi mo pi d shaꞌi haꞌichu hegam mo g hemajkam ab si has ha elid.  
\v 29 Heg o hekaj hab mahs mat pi hedai wo chum si e haschudad am tahgio g Jiosh.  
\v 30 Heg at ab i t‑wehnad g Christ matt ab i s‑wohoch g s‑kehg haꞌichu ahga ab amjed. T g Christ t‑doꞌibia ab amjed g pi apꞌekam k am i t‑apꞌech wehhejed g Jiosh matt d wo hekia s‑apꞌekam hemajkamgajk, Bo masma ab t‑chehgidch g Jiosh haꞌichu amichudadag.  
\v 31 Heg o hekaj an hab chuꞌig Jiosh oꞌohana ed: 
\q1 Pi g hedai hejel ab hu wo e haꞌichuchudad k ch heg ab wo waꞌi haꞌichuchudad mat haschu hab t‑juni g Jiosh. \rq Jeremiah 9:24 \rq* 
\c 2  
\s1 Mash heg waꞌi ahgachug Christ g Paul. 
\p  
\v 1 Kuni ahni hi pi shaꞌi hasigamkaj neok, ni‑wepnag, mant eda am wa jiwia em‑wui am ahgachugch  
\v 2 mat g Jesus Christ ab muh kots t ab am t‑wehhejed. Kuni hab n‑ahg mant heg am wo waꞌi ahgachugad  
\v 3 ch heg hekaj si s‑gihug ch gigiwuk.  
\v 4 K g haꞌichu ni‑ahga pi am hu hab shaꞌi kaidag matp hems g si s‑e mahchim oꞌodham haꞌichu ahga. K wabshaba g Hekia S‑apꞌekam Gewkdag am wohokamchud g haꞌichu ni‑ahga.  
\v 5 Heg ani hekaj s‑mahch mo g em‑wohochudadag pi ab hu shon heg ab hemajkam haꞌichu amichudadag ch wabshaba ab Jiosh gewkdag amjed. 
\s1 Mash g Paul am ha ahgid g Jiosh haꞌichu amichudadag 
\p  
\v 6 Am ani wa hi wa ha ahgid g haꞌichu amichudadag hegam mat geꞌegeꞌehogat e‑wohochudadag ed. K wabshaba id pi d hemajkam haꞌichu ha‑amichudadag, chum hems hegam mo d s‑has hahaꞌichu. Hegam haꞌichu ha‑amichudadag at wabsh ha wehm wo huhug.  
\v 7 Ihda haꞌichu amichudadag mani hab ahg o d Jiosh hab elida am t‑wehhejed ch an hab chuꞌig mat koi in hu nahto ihda jewed ch wabsh s‑aꞌagi an hab ah chuꞌig. Do Jiosh hab elida mat g Christ wo t‑doꞌibia.  
\v 8 Heg o d kownal wehs haꞌichu dahm. T eda g s‑has hahaꞌichu ab naggia kots t ab no pi pi mahch g Jiosh hab elida.  
\v 9 An o hab chuꞌig Jiosh oꞌohana ed: 
\q1 Pi o hedai shaꞌi neid o kah o chegito mat heꞌes i s‑kehg haꞌichu am i apꞌech g Jiosh am ha wehhejed hegam mo ab si tatchua. \rq Isaiah 64:4 \rq* 
\p  
\v 10 Jiosh haꞌichu hab elida o pi ta machima am t‑wehhejed. K wabshaba g Hekia S‑apꞌekam Gewkdag wehs s‑mahch ch am i t‑tashogid.  
\v 11 Neh, no hig pi woho mo pi hedai ep s‑mahch g haꞌichu t‑chegitoi hab masma mach ahchim hejel s‑mahch? Pegih, ch ahchim hab wa masma pi hedai ep s‑mahch g Jiosh haꞌichu chegitoi.  
\v 12 T wabshaba g Jiosh ab t‑mah g Hekai S‑apꞌekam Gewkdag mat am t‑eda wo ulinig ch am wo i t‑tashogidad mo haschu ab t‑makiog g Jiosh. 
\p  
\v 13 Pegih, pi att wo shaꞌi t‑nako machs am hu wo tashogi g Jiosh wohokam heg hekaj hemajkam haꞌichu amichudadag. K wabshaba g Hekia S‑apꞌekam Gewkdag ab t‑mahkch g haꞌichu amichudadag mach hekaj am i tashogid. T hegam wo waꞌi s‑amich mo hedai edgid g Hekia S‑apꞌekam Gewkdag.  
\v 14 T hegam mo pi edgid pi wo amichud k pi wo bei mo haschu ab t‑makiog. Heg waꞌi Hekia S‑apꞌekam Gewkdag o ab t‑mahkch g amichudadag matt wo s‑amich g wohokam.  
\v 15 Ahchim mach edgid g Hekia S‑apꞌekam Gewkdag att wo t‑nako matt am s‑ap wo i aꞌamich mo haschu am i t‑tashogidch. K hegam pi t‑amichud matp hedai i pi edgid g Hekia S‑apꞌekam Gewkdag. 
\p  
\v 16 Id o hab ahg hegai mo an Jiosh t amjed oꞌohanas: 
\q1 Pi o hedai hejel s‑mahch g Jiosh chegitoidag mas ab wo haꞌichu i ahgi. \rq Isaiah 40:13 \rq* 
\m Pegih, bo chuꞌig. Kuch wabshaba ahchim s‑mahch no pi g Christ ab t‑mahkch g e‑chegitoidag. 
\c 3  
\s1 Matt heg wo waꞌi oidad Christ ch pi g oꞌodham. 
\p  
\v 1 Am ani wa pi hasigam neok, ni‑wepnag, mani am em‑ahgid g wohokam namt pi pi koi geꞌegeꞌehogat id eda t‑wohochudadag ch pi am hu si e dagitokch Hekia S‑apꞌekam Gewkdag wui. Bam waꞌi masma mo g aꞌal nam pi d wabsh wechij id eda t‑wohochudadag.  
\v 2 Heg o wa wepo mani g wihbi em‑iꞌichud ch pi g haꞌichu hugi em‑gegosid ab wabsh s‑bahbagi haꞌichu em‑ahgidch. Chum wa iaꞌi idani amt koi geꞌegeꞌehogat  
\v 3 k hab wabsh kia chuꞌig mo hegam mo pi mahch g Jiosh. Neh, am am aꞌai s‑e hehgamk ch aꞌai e kawani. K id hekaj am tasho mam ha oidch hab e wua hegam mo pi mahch g Jiosh.  
\v 4 Haꞌijj amsh hab chechꞌe mam ahni Paul am ni‑oid ch haꞌijj hab chechꞌe mam g Apollos am oid. K id am wohokamchud mam ha wepo haꞌichu chegito hegam mo pi mahch g Jiosh. 
\p  
\v 5 Pi ach d si haꞌichu ch d wabsh piongaj g Jiosh mamt ab t‑ab bei g wohokam ab amjed g Christ. Do Jiosh mo ab t‑mahkch g t‑chikpan. Kuch am hab wabsh junihim mo haschu ab t‑mahkch hab masma mo g oidag ch ed chikpandam.  
\v 6 Heg o wa wepo mani ahni am esh g haꞌichu kai am wehpeg ahgch g Jiosh haꞌichu ahga. K g Apollos am wapga g esha am baꞌich i ahgch. K wabshaba d Jiosh ch am i wuhshad g t‑esha mamt ab s‑wohochud k am heꞌes i oi g haꞌichu ahgaj mach am ahgachug.  
\v 7 Kuch heg hekaj pi d si haꞌichu ahchim mach am eshad ch wapga am ahgch g Jiosh haꞌichu ahga. Jiosh o d si haꞌichu no pi heg am i wuhshad g t‑esha mam ab s‑wohochud ahpim mam kah g haꞌichu ahgaj.  
\v 8 Wehs ach t‑wepo masma ahchim mach ahgachug g Jiosh haꞌichu ahga, chum achs hema wehpeg am wo ah, tt hema am baꞌich wo i ahgahi. T g Jiosh ab wo t‑mah g t‑namkidadag matt heꞌes hab i juh g chikpan.  
\v 9 Pegih, dach piongaj g Jiosh g Apollos wehm. Kum ahpim d Jiosh eniga mach am em‑chikpan wehhejed g Jiosh. 
\p Heg o wa wepo mam d Jiosh kihta.  
\v 10 T heg ab i ni‑gawulkai mant em‑chikp hab masma mani d s‑ni‑mahchim kihtdam ch am shondad g kih am ahgachugk g Jesus Christ. Kum ahpim epai himchud g kihta ahgachugch g Jiosh haꞌichu ahga. K ab em‑ab mamt si s‑nenꞌoid k am hab wo junihid.  
\v 11 Shondaj o heki hu nahtois ch d Jesus Christ. Kumt pi haschukaj ab ep wo shondad.  
\v 12 Neh, tp hems wo e mehi matp haschu kih wabsh g shaꞌikaj hab wo e juh.  
\v 13 Pegih, t hab wa masma wo i e aꞌappe g em‑chikpan. Mt heg hekaj si s‑ap hab wo juh  
\v 14 k hab wo bei g e‑namkidadag mat hekid wo e mamche.  
\v 15 T hi wo wa e doꞌibia matp hedai pi kehg hab juh g e‑chikpan. T wabshaba g chikpanaj wo huhug hab masma mat g shaꞌi wo meitto am mei ch ed. 
\p  
\v 16 Heg o wa wepo mach d Jiosh cheopiga no pi am t‑eda kih g Hekia S‑apꞌekam Gewkdag. Id amt wo chum s‑mahchk.  
\v 17 Jiosh at wo padch matp hedai wo i em‑padch nam pi d enigaj ch d hekia s‑apꞌekam. 
\p  
\v 18 Haꞌi amtp hab i e ahg mam s‑chu aꞌamichud am ha nena ed g hemajkam. Pi g am wo hejel e iattogid. Pi at hab wo t‑elidad machs s‑chu aꞌamichud hegam mo pi mahch g Jiosh haꞌichu amichudadag mattp heg an wo uꞌukchid. Am g wo i e nakog mamt an wo uꞌukchid, chum as hab wo em‑elidad mam pi haꞌichu aꞌamichud.  
\v 19 Do wabsh pi haꞌichu an Jiosh tahgio mo haschu idam hab elid mo d haꞌichu amichudadag. T g Jiosh an wo ha wulsh heg hekaj haꞌichu ha‑amichudadag mo hab masma an oꞌohanas wehhejed.  
\v 20 K an hab ep chuꞌig mo d wabsh pi haꞌichu g ha‑chegitoidag g s‑chu aꞌamichuddam am Jiosh wehhejed.  
\v 21-22 Kumt hekaj pi hedai wo chum ge t‑haꞌichuchudad. Dach wabsh em‑pionag g Apollos ch Peter ha wehm. Wehs ihda jewed o d em‑eniga. Hegai mo hemu in haꞌichug ch hegai mo ab hahawa him o d em‑eniga. Doakag ch muhkig d em‑apꞌedag.  
\v 23 Kum d Christ hemajkamga. K heg d alidaj g Jiosh. 
\c 4  
\s1 Mash heg waꞌi Jiosh s‑mahch mas hedai s‑ap am hab junihim g e‑chikpan 
\p  
\v 1 Dach wabsh piongaj g Christ. K heg t‑nuhkudachud matt am wo i tashogi g s‑aꞌagi haꞌichu ahgaj g Jiosh. Kumt hab masma wo s‑t‑mahchk.  
\v 2 Ha‑pionag at heg am hab wo waꞌi junihid mo haschu g ahmoj chehani ch s‑ap wo nuhkud g e‑nuhkuda.  
\v 3 Pegih, ni heg am waꞌi chikpanid Jiosh. K pi shaꞌi ni‑kudut mamtp has i masma hab wo elidad g ni‑chikpan ahpim o hedai i hemajkam. Niꞌinis hejel wo ah manis has masma hab wua.  
\v 4 Pi o haꞌichu shaꞌi ni‑kudut am ni‑chegitoi ed manis pi ap am hab junihim g chikpan am Jiosh wehhejed. K wabshaba pi id hekaj e wohokamchud manis am wabsh i si s‑ap am hab junihim. Heg o waꞌi Jiosh s‑mahch machs hedai s‑ap am hab junihim g t‑chikpan.  
\v 5 Mt heg hekaj pi ab hu wabsh si s‑hohtam hema haꞌichu wo abch mat koi wo e ai g tash. Am at haha wo t‑aꞌappe g t‑kownalig mat hekid wo jiwia k wo mahsko wua mach haschu i chegito ch haschu ahgch hab junihim haꞌichu k ab haha wo i t‑mahkhi g s‑ap has elidadag mo heꞌes ab i him t‑wui. 
\s1 Mat pi hedai ab hu wo chum si e haꞌichuch heg hekaj mo haschu i edgid. 
\p  
\v 6 Neh, id ani am em‑ahgid, ni‑wepnag, ab t‑amjed ahni ch Apollos mant am wo i em‑tashogi mamt pi am hu dahm wo i chesh hegai mo haschu an oꞌohanas Jiosh oꞌohana ed. Pi amt hedai Jiosh pionag ha baꞌich ab wo si has elidad ch wabshaba ab wehs wo ha kaihamad g Jiosh haꞌichu ahga.  
\v 7 Pi g wo chum si e haschudad heg hekaj mam haschu i edgid ch haschu i s‑mahch. Jiosh at wehs ab wabsh em‑mah mam haschu i edgid. 
\p  
\v 8 Bamsh e elid mam heki hu wehs haꞌichu edgid ch heki hu d s‑kakais ch d ge kokownal. Kuch eda ahchim Jesus Christ chuhchai pi d s‑kakais ch pi d kokownal. Mamt huꞌi woho d wo kokownalk. Kutt em‑wehm d wo kokownalk.  
\v 9 Kuch eda wehs ha baꞌich d i shoꞌigkam ch attp hems wo t‑koꞌij am wehhejed g Jiosh haꞌichu ahga. Shahag wepo mo g Jiosh am t‑chehgidch wehs ha baꞌich hab masma mat g kownal am wo ha chehgi hegam matp ha gewito k ha lilsoch.  
\v 10 Ahpim am hab e elid mam d si haꞌichu s‑mahchim ab amjed g Christ ch si s‑gewpkdag ch ab d si has ha‑elida hegam mo pi mahch g Jiosh. K eda idam pi kehg has t‑elid ahchim mach ahgachug g Jiosh haꞌichu ahga ch hab t‑elid mach pi haꞌichu mahch ch pi ha gewpkdag.  
\v 11 Hebai ach bihugkoꞌo ch ep tonkkoꞌo ch pi edgid g eniga. K hegam t‑gewichshulig. Pi ach hebai t‑mahch ch kih  
\v 12 ch si chikpan ch hejel t‑dagioꞌid. K hegam s‑koꞌokam has t‑ahg. Kuch ab wabsh i s‑ha hoꞌigeꞌid. T‑shoꞌigchud o. Kuch wabsh nakog.  
\v 13 An o ahgahim g iattogi ab t‑amjed. Kuch wabsh s‑hemajim ha wehm neneok. Bo wabsh t‑elid mach d wabsh hegai mo g hemajkam s‑ohhod ch gam hu nehnchud. 
\p  
\v 14 Id ani em‑ahgid mant wo haꞌichu i em‑shelini hab masma mam d si ni‑tatchuidch ni‑aꞌaliga. Pi ani hab ahgch em‑ahgid manis wo si em‑edawua.  
\v 15 Heg o wa wepo mani d em‑ohg id eda himdag namt pi ab ni‑amjed kah g s‑kehg haꞌichu ahgaj g Jiosh k hekaj bei g e‑wechij doakag. T wo muꞌijk g em‑mashchamdam id eda Christ himdag. Ni eda d waꞌi ahni mant wehpeg am em‑wui uꞌapa ihda s‑kehg haꞌichu ahgaj g Jiosh mamt heg hekaj e doꞌibia.  
\v 16 Kuni ab i em‑gewkemhun mamt am hab wo junihid mani wa haschu am em‑chehgid. 
\p  
\v 17 Ia o daha g t‑wehnag Timothy. Kuni am ahgid mat am wo i em‑chehgim ed k wo i em‑chegitoich matt has masma am wo himchudad g t‑doakag am wehhejed g Christ mani wa am em‑mashchamahim ch wehs ha mashchamahim mani hebai i hihhim. S‑mahch am mat heg ab ni‑amjed ab i s‑wohoch g Christ k heg wa wepo mo d si ni‑tatchuidch ni‑alidag ch am hab junihim g haꞌichu ni‑ahga. 
\p  
\v 18 Kah ani mamsh haꞌi si e sheshmachud hab e ahgch mant pi am hu wo i em‑chehgim.  
\v 19 Nt wabshaba s‑hohtam ab wo i hih em‑wui matp g Jiosh hab d wo elidak k am haha wo s‑mai mams has masma himchud g e‑doakag ahpim mam chum si e sheshmachud ch muꞌi neneok.  
\v 20 Ab ach wecho g Jiosh. K pi hab chum chuꞌig machs wabsh wo neneokad ch wabshaba g s‑ap haꞌichu hab wo junihid heg hekaj Jiosh gewkdag.  
\v 21 Ab o em‑ab mamt ab wo i e dagito wui g Jiosh. Nt hemho wo wa s‑em‑kehꞌel am jiwiak mamtp pi ab hu wui wo i e dagito, k wabshaba si s‑hemajim ab wo i em‑nei mamtp ab wui wo i e dagito. 
\c 5  
\s1 Mash haꞌi am hab junihim g pi apꞌekam 
\p  
\v 1 Am ash haꞌichu hab ep chuꞌig em‑shahgid ch d si geꞌe pi apꞌekam. Msh eda si e hahaschud. Hema ash wabsh hohnig g e‑ohgbad hohnig. Eda chump g Jiosh pi wohochuddam pi hab shaꞌi masma.  
\v 2 Mt wo chum si pi ap e taht mat id am hab e juh em‑shahgid k wo i wuhshad hegai mat am hab juh ihda pi apꞌekam.  
\v 3 Chum anis pi am hu haꞌichug ch eda heki hu hab i n‑ah mat ihda oꞌodham hemho wa gam hu wo i e wuhshad,  
\v 4 no pi hab masma t‑chehani g t‑kownalig Jesus matt hab masma am hab wo junihid. T heg am wo em‑wehmajk. Kumt heg hekaj am wo e nam  
\v 5 k wo i wuhshad ihda oꞌodham ab e amjed. Kut am wo e shoꞌigch ihda oꞌodham ge Jiawul wecho k atp hems id hekaj ab wo i e shoꞌigch Jiosh wui k d wo e doꞌibiakamk mat ep wo jiwia g t‑kownalig Jesus k wo ha lodai g pi ap chuꞌijkam. 
\p  
\v 6 Pi o apꞌe mams hab wo chei mam wabsh si s‑apꞌe mo eda an haꞌichug g pi apꞌekam am em‑shahgid. S‑mahch am ihda hab cheꞌidag, “Al chum jewajidakud o s‑gewkdag ch i koꞌokpodkad g wahga.” Id o chum t‑tashogid mat g al chum pi apꞌekam geꞌe haꞌichu wo padch.  
\v 7 Neh, t wo wa e muhkid g kahwal mad mat wo e wuhshad g t‑shohshon ha doꞌibiadag. T g jewajidakud gam hu hab wo i e juh. Pegih, k g Jesus Christ d s‑wohokam ch e muhkid am t‑wehhejed mat wo t‑doꞌibia ab amjed g pi apꞌekam. Kum heg hekaj pi padchudas ch gam hu hab wo i juh g pi apꞌekam mat pi wo em‑padch.  
\v 8 Pegih, tt wo si s‑hehgigk id hekaj ch gam hu hab wo i juh g pi apꞌekam k hab wo waꞌi junihid g s‑apꞌekam ch hab wo waꞌi kaijjid g wohokam. 
\p  
\v 9-10 Heki ant hu wa am em‑oꞌohanid k em‑ahgid mamt pi ab hu wo ha nawojk hegam mo ha wehm woꞌiwup mo hedai pi d ha‑wehm kihkam ch hegam mo s‑bahbanma ch hegam mo melchkwuhim g chehanig kch hegam mo heg ab ihm ch ab wui e hoꞌigeꞌidahun mo pi d Jiosh ch d ha‑nahtoi g hemajkam. Pi ani hegam hab ha ahg mo pi d t‑wehm wohochuddam ch hab chuꞌig. Idam o an wehsko hab chuꞌig. Kumt pi has masma pi ab hu wo ha miabi.  
\v 11 Hegam ani wa hab ha ahg mo hab e ahg mo d t‑wehm wohochuddam ch eda am hab junihim g pi apꞌekam. Pi g am chum hems wo ha wehm dadhaiwua matp hedai wo ha wehm woꞌiwup mo hedai pi d ha wehm kihkam o atp wo s‑bahbanmak o atp wo melchkwuhid g chehanig o atp ab wo ihmad mo haschu d wabsh oꞌodham ha‑nahtoi ch ab wui wo e hoꞌigeꞌidahunad o atp d wo s‑iꞌimkamk o atp d wo s‑chu ehskamk. 
\p  
\v 12-13 Pi o ab hu t‑ab machs wo mamche g ha‑chuꞌijig hegam mo pi d t‑wehm wohochuddam. Jiosh at hab wo ha juh. Ab o em‑ab mamt gam hu wo i ha wuwhas hegam mat pi wo dagito g pi apꞌekam k eda d chum em‑wehm wohochuddam. Id o hab ahg hegai mo an Jiosh t amjed oꞌohanas: 
\q1 “Gam g hu wo i wuhshad g pi apꞌekam hemajkam ab e amjed.” \rq Deuteronomy 17:7 \rq* 
\c 6  
\s1 Matt pi wo chum aꞌai t‑lodaitad 
\p  
\v 1 Pi g am hu aꞌai wo e lodaitad am ha tahgio hegam mo pi mahch g Jiosh ch wabshaba ab e‑wehm wohochuddam ha wui wo e dagito. T am wo i apꞌech mamtp haschukaj pi e apꞌet.  
\v 2 Mt wo chum s‑mahchk mo hab him g tash matt d wo uꞌugchuk id dahm jewed ahchim Jiosh hemajkamga. Pegih, tt wo chum t‑nako matt am wo i apꞌech g al chuꞌuchum haꞌichu am t‑shahgid.  
\v 3 Mt ep wo chum s‑mahchk matt am hu wa hebai chum hems g anghil wo ha lodai. Kutt wo chum t‑nako matt wo haꞌichu i apꞌech id dahm jewed hejel t‑wehhejed.  
\v 4 Pi g am wo behꞌi hegai mo pi mahch g Jiosh mas am wo i apꞌech mo haschu i pi apꞌe am em‑shahgid.  
\v 5 Dat wo s‑ta edam haꞌichuk mamt aꞌai wo e lodaitad. Ab amsh si has ha elid g s‑chu aꞌamichuddam ch amtp eda pi hema cheh am e shahgid mas am wo i em‑apꞌech.  
\v 6 K amsh aꞌai e lodait am wabsh ha nena ed hegam mo pi mahch g Jiosh. 
\p  
\v 7 Am am e chehgidch mamt i e gehgch mam eda e kamꞌon. Matp pi am hu wo i em‑apꞌech g em‑wehm wohochuddam, mt wabsh pi am hu has wo kaijjid ch wo nako, chum ams haꞌichu em‑ehs.  
\v 8 Ni eda kah mamsh wabsh hejel pi ap haꞌichu hab wua ab ha wui ch haꞌichu ha ehsid chum hems g e‑wehm wohochuddam. 
\p  
\v 9 Mt wo chum s‑mahchk mat g pi ap hemajkam pi am hu wo i wahp Jiosh kownaltalig ed. Pi g am wo e iattogid mams am hu wo i wahp mamtp ha wehm wo woꞌiwupad mo hedai pi d em‑wehm kihkam o hedai d em‑wehm chechoj o g em‑wehm uꞌuwi o amtp wo jioshgat k ab wo ihmad mo haschu d wabsh oꞌodham ha‑nahtoi  
\v 10 o amtp wo s‑chu eꞌeskk o wo s‑bahbanmak o wo s‑iꞌimkk o wo haꞌichu ha iattogidad ab hema amjed o wo haꞌichu ha wohppoꞌidad.  
\v 11 Haꞌijj am hab chuꞌigkahim. T wabshaba g Hekia S‑apꞌekam Gewkdag gam hu hab i juh g pi ap em‑chuꞌijig k am i em‑apꞌech g t‑kownalig Jesus Christ wehhejed. 
\s1 Mattsh am Jiosh wehhejed wo hekaj g t‑honshpadag 
\p  
\v 12 Kumsh hahawa haꞌi hab chechꞌe mo wehs haꞌichu hiwgidas matp haschu wehhejed pi an hu haꞌichug g chehanig. Nt wabshaba am wo em‑ahgi mo pi wehs haꞌichu s‑kehgaj am t‑wehhejed. Pi att wo chum hiwigi mat haschu gan hu wabsh wo i si t‑ui.  
\v 13 Haꞌi amsh hab chechꞌe, “Haꞌichu hugi o ab d wuikamaj g t‑wohk ch g wohk g haꞌichu hugi ab d wuikam,” ch hab chum ahg mo wehs s‑apꞌe mach haschu i tatchua am wehhejed g t‑honshpadag. K wabshaba id pi woho mamsh has chum ahg. Pi att wabsh wo huhug hab masma mat idam haꞌichu k heg hekaj wo si t‑nuhkud. Neh, mo g cheoj tatchua mat ab wo i miabi g uwi nat pi hab masma nahto g Jiosh. K wabshaba pi hab d ahga ihda mas wabsh chum hedai wehm wo woꞌiwua, Pi at hab ahgk t‑nahto g Jiosh machs pi ap wo hekaj g t‑honshpadag k wabshaba hab ahgk matt g t‑kownalig Jesus wehhejed wo hekaj nat pi heg am t‑wehhejed muh.  
\v 14 Jiosh at ab uhpam i wuhshad g t‑kownalig Jesus ab muhkig amjed k hab waꞌap wo i t‑wuwhas ahchim heg hekaj e‑gewkdag mat hekaj ab i wuhshad g Jesus. 
\p  
\v 15 Mt wo chum s‑mahchk mo g em‑honshpadag ab giꞌi ab g Christ ch d enigaj. Pegih, mt pi woho hab wo juh g e‑honshpadag mat ab wo i e wehnad g chehpaꞌawi.  
\v 16 Aha nam pi mahch mamtp hema i wo wehmaj woꞌiwua g chehpaꞌawi k d haha wo hemakok heg wehm. Si o shel am ahg ihda g Jiosh oꞌohana ch hab chuꞌig mo d hemako am Jiosh tahgio hegam mat wo e wehm wohpiwua.  
\v 17 K pi hab chum mahs machs hab wo masmak chehpaꞌawi wehm ahchim matt ab i t‑dagito Christ wui nach pi d hemako heg wehm. 
\p  
\v 18 Ni heg hekaj hab kaij mamt wo si e nuhkud id amjed mamt pi wabsh chum hedai wehm wo woꞌiwupad namt pi heg hekaj wo e hemakoj ha wehm k wo uamhu g e‑honshpadag k hab masma wo i e mehkod ab amjed g Christ.  
\v 19 Mt wo chum s‑mahchk mo g Jiosh ab em‑mahkch g Hekia S‑apꞌekam Gewkdag. K heg am em‑eda kih. Pegih, k d cheopigaj g em‑honshpadag ch pi d wabsh hejel em‑eniga.  
\v 20 Jiosh at am i dagito g e‑alidag kots wui mat wo t‑doꞌibia. Kutt d haha wo hemajkamgajk ch heg hekaj ab wo si has i elid k wehhejed wo hekaj g t‑honshpadag. 
\c 7  
\s1 Mamsh ab kakke g Paul ab amjed g hohnta 
\p  
\v 1 Ia ant haha wo em‑ahgi hegai mam wa ni‑kakke ia ni‑oꞌohanidk. 
\p Id amt wehpeg ab ni‑kakke mas s‑apꞌe matt pi wo ha hohnt. Kunt hab wo em‑ah mo chum hi wa s‑apꞌe mamt pi wo ha hohnt.  
\v 2 K wabshaba haꞌi g ha‑tatchuidag si s‑gewkdag. K idam ha wehhejed baꞌich i s‑apꞌe mat wo e hohnt mat heg hekaj pi am hu wo i shul pi apꞌekam ch ed. 
\p  
\v 3-4 Kumt ab aꞌai e wui wo e dagito ahpim mam d e hohonikam no pi g em‑honshpadag d aꞌai em‑eniga ch pi d wabsh heheꞌejel em‑eniga. Mt hab s‑ap e tahtk ch wo e wehm kihk.  
\v 5 Pi g aꞌai wo e daꞌad, heg hi wa mamtp am aꞌai wo e apꞌech mamt heꞌes i tash pi ab hu wo i e miabi mamt heg hab wo waꞌi juh hoꞌigeꞌidahuna k am hab hahawa ep wo masmak mam heki hu mat pi wo em‑gehg g ge Jiawul heg hekaj em‑tatchui. 
\p  
\v 6 Pi ani ab hu em‑chehani mams wo ge hohont, heg hi wa mamtp wo tatchuad ch wo e hohont.  
\v 7 Mamt huꞌi pi wo ha wehm kihkamk hab masma mani ahni. K wabshaba g Jiosh pi wehs hab masma em‑apꞌechudch ch haꞌi em‑apꞌechudch mamt wo e hohont. 
\p  
\v 8 Nt wo haꞌichu em‑ahgi ahpim mam pi ha wehm kihkam ch ahpim mat koi g em‑wehm kihkam. Baꞌich o i s‑apꞌe mamt wo heheꞌejelk mani hab masma.  
\v 9 Mt wabshaba wo e hohont mamtp pi wo e nako mamt wo shohbi g e‑tatchui. Baꞌich o i s‑apꞌe mamt wo e hohont mamt pi wo e kudutad g e‑tatchuikaj. 
\p  
\v 10 Do chehanigaj g t‑kownalig Jesus mamt pi wo ohhod g e‑wehm kihkam  
\v 11 k amtp wabshaba hab wo sha e juh k hemho wa pi hema ep wo hohnt o wo kunt k wabsh wo hejelk o an uhpam ep wo i e nodagi e‑wehm kihkam wui. 
\p  
\v 12-14 Chum as pi d wo em‑wehm wohochuddamk g em‑wehm kihkam, mt pi am hu wo ha ohhod matp wo tatchuad mat an wo em‑wehmajk. Jiosh at am i apꞌech em‑wehhejed mat pi wo padch g em‑kihdag. T g Jiosh ab wo ha ui g em‑aꞌaliga mat d wo aꞌaligajk. T g em‑wehm kihkam pi wo ha padch. 
\p  
\v 15 Mt wabshaba wo ha hiwigi mat wo s‑em‑ohhod matp wo tatchuad nam pi pi heg hekaj e wupulshch matp wo s‑em‑ohhod. Do tatchuij g Jiosh mamt wo s‑ap e tahtkkad id dahm jewed.  
\v 16 Kum pi mahch mas em‑hekaj ab wo s‑wohoch g Jiosh haꞌichu ahga k wo e doꞌibia. 
\s1 Mattsh am wabsh wo kia oidad mattp haschu d i wehhejedkam. 
\p  
\v 17 Pegih, tt am wabsh wo kia oidad mattp haschu d i wehhejedkam mat hekid ab i t‑gawulkai g Christ. Id ani wehsko ha mashcham g wohochuddam.  
\v 18-19 Pi o has d ahga mamtp wo pahl hikuchkask o pi wo pahl hikuchkask. Kumt pi wo chum ge gawul e juh id hekaj. Heg o d waꞌi si haꞌichu matt ab wo s‑wohog elidad g Jiosh.  
\v 20 Mattp haschu d i wehhejedkam mat eda ab i t‑gawulkai g Jiosh ch heg s‑ap am hab wo junihid wehhejed.  
\v 21 Mamtp hedai d wo ha‑neneholigak id dahm jewed ch wabsh pi heg hekaj wo si e ehꞌel ab s‑wohochudk g Jiosh haꞌichu ahga. Tp wabshaba am wo sha s‑em‑apꞌet mamt wo e wuhpulꞌo, mt am hab wo e juh.  
\v 22 Am g wo s‑chegitok mat em‑wulꞌo g Christ ab amjed g pi apꞌekam, chum ams d nehol. Wehsijj ach d hahawa neneholigaj g Christ, chum hems ahchim mach pi d ha‑neneholiga id dahm jewed.  
\v 23 Jiosh at ab uhpam t‑uꞌapa e wui heg hekaj e‑alidag muhkig. Pegih, pi att hegai wo shaꞌi hiwigi mas wo t‑shohbi mach d piongaj g Jiosh.  
\v 24 Heg o chum hekid am t‑wehmaj. Kutt am nenaj ed s‑ap hab wo junihid g t‑chikpan matp haschu wud matt eda ab i s‑wohoch ihda s‑kehg haꞌichu ahgaj. 
\s1 Moki am si shel ha ahgid hegam mo pi ha wehm kihkam 
\p  
\v 25 Neh, nt am haha wo em‑ahgi mam haschu ab ni‑kakke ab ha amjed hegam mo pi ha wehm kihkam. Pi o d chehanig ihda mant wo em‑ahgi. K wabshaba ab s‑ni‑hoꞌigeꞌid g t‑kownalig Jesus ch ab ni‑mahkch g amichudadag. Kunt heg hekaj wo em‑ahgi mo haschu baꞌich i s‑apꞌe.  
\v 26 Shoꞌo waꞌi si geꞌej g t‑kudutalig hemu. Kuni heg hekaj hab elid mo baꞌich i s‑apꞌe mamt am hab wabsh wo i chuꞌigk mam has i masma.  
\v 27 Mamtp wo ge wehm kihkamk ch pi am wo ohhod o pi wo ha wehm kihkamk ch pi an hu wo hema i chum gahghi.  
\v 28 K wabshaba pi d pi apꞌekam mamtp an wo bei g wehm kihkam. Hi wa g hohnta at ab baꞌich wo i wuhshad g haꞌichu pi apꞌedag. Kuni heg hi wa chum pi hab elid mams ab hu wo nam. 
\p  
\v 29 Pi o am hu geꞌe wiꞌis g tash mat ia ep wo jiwia g Jiosh alidag jewed dahm. Kuni am i em‑gewkemhun mamt wo e nahtokchid heg wehhejed. Pi g wo shaꞌi hiwgid mas wo em‑shohbi g hohnta  
\v 30 o g chikpan o g has tahhadkam o g em‑eniga.  
\v 31 Tt wo hekaj g jewed dahm haꞌichu k wabshaba pi ab hu wabsh wo si pihk t‑elidad nat pi wehs wabsh wo huhug. 
\p  
\v 32 Chum ani em‑tatchuichud mamt pi haꞌichukaj wo e kudutad. Gohkpa o kahch g t‑chegitoi matt wo ge hohnigk. Kutt wabshaba wo t‑nako matt heg am hab wo waꞌi junihid chikpan am wehhejed g t‑kownalig Jesus mattp pi wo ha hohnigk.  
\v 33 Mattp hedai wo ha hohnt k hemho wa haꞌichu am hab waꞌap wo junihid wehhejed mat wo s‑hohhoꞌidad. 
\p  
\v 34 Kumt ahpim uꞌuwi hab waꞌap wo e nako mamt ab wo gawulkdask ch heg am hab wo waꞌi junihid chikpan am wehhejed g t‑kownalig Jesus mamtp hedai pi wo ha kunk o koi wo ha kunt. Mtp wabshaba hedai wo ge kunk ch haꞌichu am hab ep wo junihid ha wehhejed mat wo s‑hohhoꞌidad. 
\p  
\v 35 Id ani hab kaij nani pi tatchua mant am wo i em‑wehmt ch pi heg hekaj manis am haꞌichukaj em‑shoshobid. Tatchua ani mamt am hab wo junihid mo haschu d s‑apꞌekam ch pi wo hiwigi mas am haꞌichu wo em‑shohbi mamt am wehs wo i e dagito t‑kownalig Jesus wui. 
\p  
\v 36 Mt wabshaba wo ha hiwigi g uꞌuwi e‑aꞌaliga mat wo ha kunt mamtp hab wo elidad mo d si tatchui nat pi s‑ap geꞌegeꞌehogat. Am o wa s‑apꞌe mat am hab wo e juh.  
\v 37 K wabshaba am wa s‑apꞌe mamt wo ha nuhkudad mamtp hab wo elidad mo s‑apꞌe no pi pi d tatchui.  
\v 38 Pegih, am o wa s‑apꞌe mamt wo ha hiwigi ch hi wa baꞌich i s‑apꞌe mat pi wo ha kunt. 
\p  
\v 39 Matp hedai wo e hohont k d wo e‑wehm kihkamk am hugkam mat hekid hema wo i muh. K am hahawa s‑apꞌe mat ep wo bei g wehm kihkam, heg hi wa mat g e‑wehm wohochuddam an wo bei.  
\v 40 Mt wabshaba baꞌich wo i s‑apꞌe tahtkkad mamt pi ep wo bei g wehm kihkam. Neh, id o am ni‑tashogid g Hekia S‑apꞌekam Gewkdag. 
\c 8  
\s1 Moki am ha ahgid g ha‑kakkei ab amjed g haꞌichu hugi toꞌidda 
\p  
\v 1 Am ant haha wo em‑ahgi hegai mam ab ni‑kakke ab amjed hegai haꞌichu hugi mo g hemajkam an toꞌaw am chum iagchulidch g e‑jijoshga. 
\p Haꞌijj amsh hab e elid mam si s‑mahch mamt has wo chum e junihid ch si e hahaschud g haꞌichu e‑mahchigkaj. Nt wabshaba wo em‑ahgi mamt am hab wabsh wo junihid mat haschu d wo i ha‑wehmtadagk g em‑wepnag mamtp woho ab wo ha tatchuad.  
\v 2 Pi amki koi haꞌichu s‑mahch mamtp hab e elid mam s‑e‑mahch.  
\v 3 Jiosh o s‑t‑mahch ahchim mattp ab si tatchua. 
\p  
\v 4 Pegih, k pi d haꞌichu g ha‑jijoshga am t‑wehhejed nach pi s‑mahch mo g Jiosh d hemako.  
\v 5 K eda muꞌi an haꞌichug g gewpkdag an dahm kahchim ch ed ch an jewed dahm mo hab e aꞌaga jijosh ch kokownal.  
\v 6 Ch ahchim hi s‑mahch mo d hemako g Jiosh t‑ohg. K wehs haꞌichu d amjedkamaj. Kuch heg wehhejed in d dodakam. K g t‑kownalig Jesus Christ d hemako ch wehs haꞌichu nahto. K heg gahi wuhshanim g Jiosh ab t‑mahkch g wechij doakag. 
\p  
\v 7 Pegih, msh haꞌi hi wa s‑mahch mo g ha‑jijoshga pi d haꞌichu am t‑wehhejed ch hekaj pi has e elid ch wabsh koꞌa hegai mo an e toꞌaw ha wehhejed. Sh haꞌi g em‑wehm wohochuddam pi am hu s‑ap s‑mahch mo pi d haꞌichu g ha‑jijoshga no pi heki hu waꞌi amjed ab has ha elid. Kumsh koꞌa hegai mo am e toꞌaw. Sh idam am em‑neid ch am em‑oidch hab e junihim ch eda hekaj e kudut no pi hab elid mo pi apꞌe.  
\v 8 Kumsh ahpim hab kaij mo pi has d ahga am Jiosh nena ed mamt wo huh ihda. Pegih, matp pi has d ahga k ch pi haꞌichu wo heki em‑wua mamt wabsh wo dagito. 
\p  
\v 9 Chum as hi wa s‑apꞌe hejel em‑wehhejed mamt wo huh ch wabshaba pi apꞌe mamt wo huh matp heg hekaj wo e kudut k wo i shul hegam mo pi hab masma s‑mahch ihda.  
\v 10 Idam atp hems am t‑oidk hab wo e juh ahchim mach haꞌichu s‑mahch k am hab wo juh mo haschu hab elid mo pi apꞌe. Pi att am hu wo i wahp k wo t‑gegos mo hebai i e koꞌa hegai mo an e toꞌaw ha wehhejed g ha‑jijoshga  
\v 11 natt pi heg hekaj wo heki ha himch hegam mo pi gewpkdag e‑wohochudadag ed. Tsh eda g Christ ha wehhejed muh no pi s‑ha doꞌibiamk.  
\v 12 Kutt wo padch mo haschu hab chum s‑junimk am ha wehhejed mattp wo heki ha himch.  
\v 13 Pi att hekid wo huh matp haschukaj wo heb hu hihi g t‑wepnag mat am t‑oidch hab wo e junihid. 
\c 9  
\s1 Id o d ha‑chikpan hegam mo am ahgachug g Christ 
\p  
\v 1 Pi ani em‑ahgid mams am hab wo junihid hegai mani ahni haschu pi am hu hab wua. Ahni ani hab waꞌap pi hekaj g haꞌichu ni‑apꞌedag, chum anis d uhgchu ch geꞌe apꞌedag nat pi am i ni‑kei g Jiosh mant wo ahgachugad g Christ. Ni heg am neid am i dahm mat e chegito k i wuhsh. Kum ahpim d e doꞌibiakam heg hekaj haꞌichu ni‑ahga mani am ahgachug wehhejed g Jesus Christ.  
\v 2 Chum as haꞌi pi wohochud mani d Jesus Christ kehsha, m wabshaba ahpim s‑wohochud nat pi em‑doꞌibia k hekaj am wohokamch mani d kehshaj.  
\v 3 Id ani am ha ahgid hegam mo pi wohochud mani d Christ kehsha. 
\p  
\v 4 Ahchim mach d Christ chuhchai ach edgid g apꞌedag matt ab wo bei g t‑gegosig heg hekaj t‑chikpan.  
\v 5 Christ wepnag ch Peter ch haꞌi ehp g Christ chuhchai ash an uhꞌudch g e‑wehm kihkam mo eda hasko hihhim ch am ahgachug g Jiosh haꞌichu ahga. Kumsh am ha dagioꞌid.  
\v 6 Bani wa masma apꞌedag. Kuch eda ahchim g Barnabas wehm pi hekaj g t‑apꞌedag ch wabsh hejel t‑dagioꞌid.  
\v 7 K eda wehs nahnko mahs chikpandam ab uꞌu g e‑gehgewi ab e‑chikpan amjed. Shondal am ha dagioꞌid ch g oidag chikpandam ab ha namkid heg hekaj mo haschu i bahijid ch g haꞌichu doakam ha nuhkuddam ha gegosid heg hekaj mo haschu ab i wuhshani. 
\p  
\v 8 Pi o d wabsh hemajkam hab ha‑elida ihda. An o hab chuꞌig heg eda Jiosh chehanig  
\v 9 mat g Mosesbad an oꞌoha: 
\q1 Pi amt an hu wo wulsh g woiwis chini mat wo kehiwia g haꞌichu bahijida. \rq Deuteronomy 25:4 \rq* 
\m Neh, pi o hegam hab waꞌi ha ahg woiwis.  
\v 10 Ahchim o hab ep t‑ahg. Hegai mo hedai i moihun ch hegai mo hihk g eꞌes at hemho wa ab wo haꞌichu i nei id ab e‑chikpan.  
\v 11 Heg o wa wepo matt am ei g haꞌichu kai em‑shahgid, am em‑ahgidch g Jiosh haꞌichu ahga. K hab chum mahs matt ab haꞌichu wo i nei em‑amjed.  
\v 12 Am amsh haꞌi i ha wehmaj. Kuch eda baꞌich i apꞌedag matt ab wo chum i nei haꞌichu em‑amjed ch wabshaba pi hekid ab hu em‑tahni ch am wabsh wehs haꞌichu nakog matt pi an hu wo shohbi g s‑kehg haꞌichu ahgaj g Jiosh ab amjed g Christ. 
\p  
\v 13 Mt wo chum s‑mahchk mo hegam mo am chikpan geꞌe cheopi ch ed ab i neid g e‑gegosig heg amjed mo g hemajkam ab mahkch g Jiosh.  
\v 14 Pegih, k hab waꞌap masma am t‑chehani g t‑kownalig Jesus hemu. Ahchim mach am ahgachug g s‑kehg haꞌichu ahgaj g Jiosh attsh ab amjed wo i nei g t‑dagioꞌidadag. 
\p  
\v 15 Ni eda pi hekid shaꞌi hekaj ihda ni‑apꞌedag ch pi heg hekaj em‑ahgid ihda manis em‑chehani mamt wo i ni‑dagioꞌi hemu. Baꞌich i mant wo bihugim k wo muh kih hegai manis wo em‑kowlant id hekaj s‑kehg haꞌichu ahga.  
\v 16 Ab o ni‑chehani g Jiosh mant wo ahgachugad g haꞌichu ahgaj. Kunt wo si pi ap ni‑tahtkk mantp pi am hu hab wo junihid. Jiosh ash ab ep em‑chehani mamt wo t‑namkid ahchim mam ab t‑amjed kah g haꞌichu ahgaj. Ni wabshaba pi ab hu em‑tahni heg hekaj mant baꞌich wo i s‑ap ni‑tahtkk ab wabsh em‑mahkch.  
\v 17 Mantp ahni hab i n‑ah mant am hab wo junihid ihda chikpan ch hekaj ab wo bei g ni‑gehgewi. K wabshaba g Jiosh ab ni‑chehani ch ab ni‑hiwig.  
\v 18 Pegih, k id d ni‑gehgewi mani si s‑ap ni‑tahtk heg hekaj mani ab wabsh em‑mahkch g s‑kehg haꞌichu ahgaj g Jiosh. Heg ani hekaj pi hekaj g ni‑apꞌedag manis wo em‑kowlant. 
\p  
\v 19 Pi ani hedai ha hiwig ch wabshaba wehs ha wehhejed ni‑pionchud mantp hems hab masma muꞌi ab wo i ha nohnogi Christ wui.  
\v 20 Ni am ha oidch hab ni‑junihim hegam mo am oid g heki hu t‑himdag ahchim Tutuligo mani hekid i ha wehmaj  
\v 21 ch am ha oidch hab ni‑junihim hegam mo pi am hu oid mani hekid i ha wehmaj mant hekaj ab wo i ha nohnogi Christ wui. K eda pi hab mahs manis pi ab hu wecho g Jiosh chehanig nani pi am hab junihim mo haschu ab i ni‑chehani g Christ.  
\v 22 Pi ant am hab wo junihid mat haschu wo ha kudutad, chum anis s‑mahch mo s‑apꞌe am ni‑wehhejed. Tp hems heg hekaj wo ni‑hiwigi mant am wo i ha wehmt. Wehs ani ha wepo masma hab ni‑wua mantp hems hab masma ab wo i ha nohnogi Christ wui wabsh chum has masma.  
\v 23 Id ani wehs hab wua mant hekaj am wo ahgachugad g s‑kehg haꞌichu ahgaj g Jiosh matt t‑wehm wo bei g s‑ap tahhadkam. 
\p  
\v 24 S‑mahch am mat g e melchuddam hab waꞌi masma wo bei gehgewi mat wo si e nakogad. Tt hab wa masma am wo t‑nakogad matt wehs am hab wo juh g Jiosh tatchui.  
\v 25 Hegai mo hedai i tatchua mat wo bei g gehgewi at hemho wa wo e momoisha k wo e nuhkud wehs haꞌichu k ed. Neh, id o wehs hab e wua heg waꞌi wehhejed mamt ab wo wahki g gihko. T eda wabsh wo huhug. Ch wabshaba ahchim am hab t‑junihim heg wehhejed m at pi hekid wo huhug.  
\v 26 Ni hekaj hab hi heg wa wepo mani shel med heg wui mant am wo nahto g ni‑mel k ab wo bei g ni‑mahkigdag. S‑mahch am mo g shonikkashdam pi tatchua mas wo heki wua g e‑shonihina. Ni ahni hab waꞌap pi tatchua manis wo heki wua g ni‑apꞌedag wehhejed g ni‑chikpan.  
\v 27 Shonikkashdam o ab si e nakog ch e momoisha. Ni ahni hab wa masma ni‑nakog Jiosh chikpan ed mat pi wo ni‑ohhod heg amjed am i dahm mant ab i em‑wai mamt am hab waꞌap wo junihid. 
\c 10  
\s1 Matt pi ab hu wui wo t‑hoꞌigeꞌidahu mo haschu pi d Jiosh 
\p  
\v 1 Am am wa chum s‑mahch matsh wa haschu has e juh am ha tahgio g t‑shohshon matsh wa g Mosesbad am i ha wanim. Jiosh ash hab masma ha nuhkud ch ha wanimed mash wa g chewagi am ha baꞌich him. Kutsh am gahi i huhud g geꞌe shuhdagi.  
\v 2 Id atsh hab ha juni mat hekaj ab wo s‑wohog elidad g Mosesbad.  
\v 3 Wehsijj ash am koꞌa hegai haꞌichu hugi mash g Jiosh ab ha mahk  
\v 4 ch wehsijj ab ihꞌe hegai shuhdagi mash ab geꞌe waw t amjed daꞌiwuni ch s‑wawinig. Ihda waw o wepogidas g Christ mo g doakgaj chum hebai ha wehmaj ch ab ha mahkch g hoꞌigeꞌidalig.  
\v 5 Tsh wa eda muꞌijj pi ab hu wohog el g Jiosh. Tsh hekaj si pi ha hohhoꞌi idam k ab ha hugio tohono jewed ch ed mash an oiopohim. Sh g ha‑hohon am wabsh e dagitohim. 
\p  
\v 6 Pegih, wehs ihda o d wabsh chehgida mat wo t‑shohbi matt pi ab hu wo i tatchua g pi apꞌekam mash wa hab e wua idam  
\v 7 ch pi ab hu wui wo t‑hoꞌigeꞌidahu mo haschu pi d Jiosh mash wa hab e wua haꞌijj idam. Bo chuꞌig an Jiosh oꞌohana ed matsh wa am dadhaiwua k huh mat haschu am toꞌi hegai mo chum jioshchud k am i wuwhag k e waila.  
\v 8 Am hu hebai ehp, sh haꞌijj wabsh chum hedai ha wehm woꞌiwup. Tsh g Jiosh am haꞌi ha cheha matsh wo ha kokda. Tsh gokko gamai waik mihl (23, 000) e koꞌij hemako tash ed.  
\v 9 Am hu hebai ehp, tsh haꞌijj bagach g Jiosh. Tsh heg hekaj am apꞌech matsh wo ha kiꞌikka g kohkꞌoi k wo ha hugio.  
\v 10 Am hu hebai ehp, sh haꞌijj pi ap has ahg g Jiosh hab kaijch mash pi ap ha dagioꞌid. Tsh heg hekaj am apꞌech matsh g anghil wo ha hugio. Mt heg hekaj pi am hu ha oidch hab wo e junihid. 
\p  
\v 11 Id ash wehs an oꞌohanas mat wo t‑shohbidad matt pi hab wo junihid g pi apꞌekam ahchim mach hemu in d dodakam am wehs ha oidch. 
\p  
\v 12 Haꞌijj amsh hab e elid mam s‑gewpkdag am e‑wohochudadag ed. Mt wabshaba wo si s‑e nenꞌoidk mamt pi wo i e jushadkad k pi wo i gei am pi apꞌekam ch ed no pi wehsijj t‑aꞌappem g Jiawul.  
\v 13 Wehs hegai aꞌappema mo ab t‑aihim o chum hedai ab aꞌahe. K wabshaba g Jiosh hab kaij matsh wo t‑nuhkudad ch heg hekaj pi hiwgid mas wo t‑aꞌappe am dahm matt heꞌes wo i t‑nako ch ab t‑mahkch g gewkdag matt wo nakog k wo t‑doꞌibia heg amjed. 
\p  
\v 14 Pegih, ni‑wepnag mani si em‑tatchua, pi g ab hu wui wo shaꞌi e hoꞌigeꞌidahunad hegai mo haschu pi d Jiosh.  
\v 15 Am g wo i aꞌamichud ihda nam pi haꞌichu s‑aꞌamichud.  
\v 16 Ab ach hoꞌigeꞌid g Jiosh ch ab si ihm g alidaj mach eda hab wua g mihshmda chemait hugi no pi hab d ahga mat am i dagito g e‑hon kots t ab k am iawua g e‑ehꞌed mat am t‑wehhejed muh.  
\v 17 Do waꞌi hemako hegai mat am t‑wehhejed muh. Ch ahchim am t‑chehgidch mach am wehmaj d hemako am t‑wehm hab wuadch g t‑mihshmda chemait hugi. 
\p  
\v 18 Jiosh atsh am ha cheha g t‑shohshon mat wo ha kokda g haꞌichu doakam k hekaj wo iagchul g e‑chuꞌijig wehhejed k haha wo huh hegai chuhkug. K hegam mo koꞌa ab ihm g Jiosh.  
\v 19 Pegih, k hegam mo ab ha wui iagchulid g e‑jijoshta ab ha ihm koꞌadch g e‑iagchulida. K eda pi d haꞌichu g ha‑jijoshta.  
\v 20 Ab o wabsh ha ihm g jijawul pi e mahchch mas has e wua. Kuni pi em‑tatchuid mams wo ha wehm ab ha ihm g jijawul koꞌadch hegai mo ab ha toꞌid.  
\v 21 T‑kownalig Jesus Christ o ab t‑mahkch ihda t‑mihshmda chemait hugi. K pi shaꞌi hiwgidas mams wo ha wehmajk amai mo ab ha ihm g e‑jijoshga koꞌadch hegai mo ab ha doꞌid.  
\v 22 Shahag wepo mam tatchua mamt wo hehgamch g Jiosh ab ha ihmadch g jijawul mamtp hedai ha wehm koꞌa mo haschu ab wui e toꞌaw g ha‑jijoshga. S‑e g wo nenꞌoidk no pi baꞌich i s‑gewkdag g Jiosh mam ahpim ch wo s‑koꞌokam em‑namkid. 
\p  
\v 23 Msh haꞌi hab chechꞌe mo wehs haꞌichu hiwgidas matp haschu wehhejed pi an hu haꞌichug g chehanig. Nt wabshaba wo em‑ahgi mo pi wehs haꞌichu s‑apꞌe am t‑wehhejed. Wehs haꞌichu o hiwgidas ch wabshaba pi wehs d wo i t‑wehmtadagk.  
\v 24 Am g wo s‑chegitok g chum hedai ha‑apꞌedag ch pi wabsh hejel e‑tatchui. 
\p  
\v 25 Oi g am wabsh wo huhgi matp haschu am e gagda nolawtakud ch ed k pi wo e kudu mas hebai e bei. Pi o ab hu em‑ab mams ab wo ha kakke mas d hegai mo ab e toꞌid g ha‑jijoshga.  
\v 26 An o hab chuꞌig Jiosh oꞌohana ed mo wehs haꞌichu d enigaj. 
\p  
\v 27 Mamtp wo tatchuad ch am wo e gegosido ha‑kih am hegam mo pi d e doꞌibiakam ch ab em‑waid. Kumt wabsh wo huh matp haschu ab wo i em‑toꞌi k pi ab hu wo ha kakke mas ab e toꞌid g ha‑jijoshga, wabsh pi wo e kudu mas hebai be k ab em‑mah.  
\v 28-29 T wabshaba hema ab wo sha si em‑ahgi mat ab e toꞌi g ha‑jijoshga, mt pi wo huh mat heg hekaj pi wo e kudu hegai mo em‑ahgid. Pegih, mtp hems haꞌi hab wo chei, “Ms haschu ahgk hig wo ge has ni‑ahgad heg hekaj mani haschu i koꞌa mani eda heg hekaj ab hoꞌigeꞌid g Jiosh?  
\v 30 Kunis haschu ahgk wo ni‑shohbi heg wabsh hekaj mam e kudut?” 
\p  
\v 31 Pegih, woho o wa mach apꞌedag matt wabsh chum haschu wo koꞌad. K wabshaba ab t‑ab matt ab wo si haꞌichuch g Jiosh wabsh chum haschu k ed, chum hems heg hekaj mach haschu i koꞌad ch haschu i ihꞌe.  
\v 32 Am g wabsh s‑ap wo kihkad ch pi haꞌichu am hu hab wo junihid mas heg hekaj hedai am hab wo juh g pi apꞌekam, chum hems hegam mo pi d e doꞌibiakam.  
\v 33 Bamt wo masmak mani ahni. Pi ani am hu waꞌi hejel ni‑chegito ch wabshaba wehs s‑ha chegito g hemajkam. Bani wa ni‑wua matp hems heg hekaj wo s‑hohhoꞌi mani has ni‑wua k ab wo s‑wohoch g haꞌichu ni‑ahga k wo e doꞌibia. 
\c 11  
\p  
\v 1 Am g wo ni‑oidk hab e wuad hab masma mani ahni Christ oidch hab ni‑junihim. 
\s1 Matsh g uꞌuwi ab wo ha wechok mihshmda ed 
\p  
\v 2 Ab ani si has em‑elid mamsh chum hekid s‑ni‑chegito ch am oidch hab e junihim ihda himdag mant am em‑wui uꞌapa.  
\v 3 Mt wabshaba wo chum s‑mahchk mo g cheoj am dahm g uwi. K g Christ am dahm g cheoj. K g Jiosh am wehs haꞌichu dahm.  
\v 4 Id amt wo chehgidch mam eda e mihshmad. Mt heg hekaj ahpim chechoj pi ab hu wo ha maꞌishchid g e‑mohmi mam hekid i e hoꞌigeꞌidahun ch am ep ahg g Jiosh haꞌichu ahga. Dat wo s‑ta edam haꞌichuk mamtp ab wo ha maꞌishchid. 
\p  
\v 5 Kumt ahpim uꞌuwi hi ab wo ha maꞌishchid g e‑mohmi mam hekid i ha kaichudch e hoꞌigeꞌidahun ch am ep ahg g Jiosh haꞌichu ahga. Bat wa masma wo s‑ta edamak mamt wo s‑wohlim hih g e‑moꞌo mamtp pi ab hu wo ha maꞌishchid.  
\v 6 Pegih, mt ab wo e maꞌishchid ch wo e mihshmad k heg hekaj pi wo si e el. 
\p  
\v 7 Kumt ahpim chechoj pi ab hu wo ha maꞌishchid g e‑mohmi e mihshmadch no pi g Jiosh am t‑eda chehgidch g e‑gewkdag. Mt wabshaba ahpim uꞌuwi ab wo e maꞌishchid nam pi ab wecho g chechoj ch ab chehgidch g ha‑gewkdag.  
\v 8-9 Jiosh at wehpeg nahto g cheoj k heg amjed ab i wuhshad g uwi k nahto am wehhejed g cheoj.  
\v 10 Ab o em‑neid g anghil. Kumt ahpim uꞌuwi am wo ha chehgi ab ha maꞌishch g e‑mohmi mam ab ha wecho g chechoj. 
\p  
\v 11 K eda hab d elidaj g Jiosh mat g cheoj ch uwi ab aꞌai wo e hiwgad ch ab aꞌai wo i e wehmajk.  
\v 12 Woho o wa mat g Jiosh ab i wuhshad g uwi ab amjed g cheoj. K wabshaba g chechoj ab hahawa uwi t amjed i wuwhag. K wehs haꞌichu ab d Jiosh amjedkam. 
\p  
\v 13 Am g wo oidahid ihda mo pi hab chum chuꞌig mas g uwi ab wo e hoꞌigeꞌidahu Jiosh wui pi ab hu maꞌishch g e‑moꞌo.  
\v 14 S‑mahch ach mo g cheꞌechew moꞌo s‑ta edama am wehhejed g cheoj  
\v 15 ch wabshaba am wa s‑apꞌe g uwi wehhejed no pi ab mahkch g Jiosh mat hekaj ab wo e maꞌishchid g moꞌoj. 
\p  
\v 16 Pi ani ahpim waꞌi em‑mashcham ihda. Wehsko ani am ha mashcham mo hebai g t‑wehm wohochuddam e hehemapad. Kush wehsijj g Christ chuhchai hab masma ha mashcham. T hab pi hedai ab hu wo chum t‑neꞌowi heg hekaj. 
\s1 Mash pi am hu ap hab junihim g chemait hugi 
\p  
\v 17 Msh am haꞌichu ep pi ap hab wua mam am e hehemapad.  
\v 18 Wehpeg ant id hab wo ah mani kah mamsh haꞌi ab e wui gegok am e nanmekch. Ni am wa heꞌes s‑wohochud ihda.  
\v 19 Hemho wa at am wo i wuhsh g hab mahs kudutadag em‑shahgid mat am wo i e tashogi mo hedai pi apꞌe. 
\p  
\v 20 Naꞌams hab elid mam s‑ap hab wua g chemait hugi hekid i e nanmekch ch amsh eda pi ap am hab junihim.  
\v 21 Wehpeg amsh e wehm e gegosid ch eda pi aꞌai e hoꞌid ch haꞌi wabsh s‑kokwog ch haꞌi nawkoꞌo ch haꞌi bihugkoꞌo.  
\v 22 Bo wa masma tasho mam pi ab hu has ha elid g e‑wehm wohochuddam ch wabsh si ha edawua hegam mo am d wa shoꞌigkam. Mt hemho wa ab wo e chuꞌijigch id hekaj. Baꞌich o i s‑apꞌe mamt wo e gegos heheꞌejel e‑kihki am k am hab wo juh g chemait hugi mam am e nanmek. 
\p  
\v 23 Am ani wa em‑mashcham hegai mo wa g t‑kownalig Jesus am ni‑tashogid ab amjed ihda chemait hugi himdag. Am atsh i shonwua heg i hudunk ab mamtki wa wo gagda matki wo e muhkid. Hegam mash wa ab wui e dagitokch atsh am i e hemapai. Kutsh g Jesus am i bei g chemait  
\v 24 k am i hahai ab hoꞌigeꞌidk g Jiosh k hab kaij, “Do ni‑honshpadag ihda mamt am i em‑hahaini. Id ani hab ahgch hab kaij mant wo ni‑muhkid am em‑wehhejed. Ab g wo huhgi ihda hahainig k id chum hekid am hab wo junihid mamt hekaj wo s‑ni‑chegitok.” 
\p  
\v 25 Tsh wa woho hab e juh. Kutsh am hahawa bei g tahsa k hab kaij, “Do ni‑ehꞌed ihda nawait. Id ani hab ahgch hab kaij mat g ni‑ehꞌed wo e iawua. T g Jiosh heg hekaj am hab wo juh hegai mo wa hab kaij matsh hab wo em‑juni. Ab g wo ihꞌi ihda k id chum hekid am hab wo junihid mamt wo s‑ni‑chegitok.” Neh, bo kaij g t‑kownalig Jesus.  
\v 26 Kuch hekid am hab i wua ihda chemait hugi ch am tasho wohokamchud mat t‑wehhejed muh ch ab aihim mat ep wo jiwia. 
\p  
\v 27-28 Pegih, tt am wo si hejel i t‑mamche machs wa woho ab haꞌichuchud g t‑kownalig Jesus k am hab haha wo juh g chemait hugi. Tsh ab wo moht g chuꞌijig matp hedai pi ap hab wo wuad ihda chemait hugi no pi pi haꞌichuchud mat am dagito g e‑hon kots wui k am iawua g e‑ehꞌed mat t‑wehhejed muh.  
\v 29 Tt am wo ai g s‑koꞌok t‑namkidadag mattp hab wo juh g chemait hugi pi amichudch mat am t‑wehhejed muh g t‑kownalig Jesus.  
\v 30 Heg am hekaj muꞌijj kokꞌo ch pi ab hu gewpk ch haꞌijj heki hu koi.  
\v 31-32 Bat wa masma hab wo t‑juh g Jiosh hab ahgk matt wo dagito g pi ap t‑chuꞌijig k pi gam hu hab wo i t‑juh ab amjed g Jiosh hab masma mat hegam mat pi ab hu wui wo i e nohnogi. Pi at hab masma s‑koꞌokam ab wo t‑namkid g Jiosh mattp hems wehpeg am wo si heheꞌejel i t‑mamche mach has masma. 
\p  
\v 33 Pegih, ni‑wepnag, am amt wo aꞌai e nenida k wehs e wehm hab wo juh g chemait hugi.  
\v 34 Matp hema d wo bihugimkamk ch wo e gegos ab e‑kih ab mat koi wo e ai g em‑namki. Mt am hahawa pi heg hekaj ab hu wo e chuꞌijigch. Am ant haha wo i apꞌech mam haschu ab ep i ni‑kakke hekid i em‑neidk. 
\c 12  
\s1 Mo ab t‑mahkch g gewkdag g Hekia S‑apꞌekam Gewkdag 
\p  
\v 1 Ab am wa ep ni‑kakke ab amjed hegai gewkdag mo g Hekia S‑apꞌekam Gewkdag ab t‑mahkch matt ab aꞌai wo i t‑wehmajk. Tatchua ani mamt wo s‑mahchk g wohokam ab amjed ihda.  
\v 2 Idani am hahawa s‑mahch mam wa haꞌichukaj am i e wanimed mam eda ab has ha elid mam haschu i chum jijoshchud.  
\v 3 K wabshaba pi d Hekia S‑apꞌekam Gewkdag ch am i em‑wanimed namt wa ge e nako mams wo wohokamch mo g Jesus d Jiosh. Hegam mo pi edgid g Hekia S‑apꞌekam Gewkdag o hab elid mo g Jesus am gawulkdas ab Jiosh t amjed. Kuch wabshaba ahchim mach edgid s‑mahch mo g Jesus d Jiosh. 
\p  
\v 4 Ab o t‑mahkch g Hekia S‑apꞌekam Gewkdag g gewkdag matt hab wo junihid g nahnko mahs haꞌichu am wehhejed g Jiosh.  
\v 5 K g t‑kownalig Jesus am apꞌechudch matt has masma am hab wo junihid.  
\v 6 K d nahnko mahs chikpan mach am hab junihim ch wabshaba wehs ab d amjedkamaj g Jiosh. 
\p  
\v 7 Heg o ab t‑mahkch g Hekia S‑apꞌekam Gewkdag. K id am t‑gewpkadch ch ab heheꞌejel t‑mahkch matt has wo t‑junihid ch am aꞌai wo i t‑wehmajk. Kuch s‑mahch mo am t‑eꞌeda g Hekia S‑apꞌekam Gewkdag no pi ab t‑mahkch g gewkdag.  
\v 8 Ab o haꞌijj t‑mahkch matt wo s‑chu aꞌamichud k am wo tashogi g s‑hasig haꞌichu ch ab haꞌijj t‑mahkch matt wo si s‑mahchk ch ahgachugad g Jiosh haꞌichu ahga.  
\v 9 Ab o haꞌijj t‑mahkch g geꞌe wohochudadag ch ab haꞌijj t‑mahkch matt wo ha doaj  
\v 10 o g s‑hasig haꞌichu hab ep wo junihid. Ab o haꞌijj heheꞌejel t‑mahkch g haꞌichu e‑ahga matt wo ahgad ch ab haꞌijj t‑mahkch matt wo neneokad g pi t‑machiga neꞌokikaj ch ab haꞌijj t‑mahkch matt wabsh wo s‑amich hegam neꞌoki k am wo i tashogi k ch ab haꞌijj t‑mahkch matt wo s‑mahchk mo haschu ahga ab amjed g Hekia S‑apꞌekam Gewkdag ch haschu pi ab hu amjed.  
\v 11 Neh, wehs ihda o ab d amjedkamaj g Hekia S‑apꞌekam Gewkdag. K heg ab heheꞌejel t‑mahkch mo has i mahs chikpan am hab s‑junimk ab gai t‑wuhshanim. 
\s1 Mach d hemako am i t‑wehnadk g t‑doꞌibiakam 
\p  
\v 12 S‑mahch ach mo g t‑honshpadag muꞌi nahnko chuhchuꞌidag ch wabshaba d waꞌi hemako. Kuch hab wa masma wehsijj d hemako ahchim matt ab i t‑wehnad g Christ.  
\v 13 Muꞌijj am hi wa pi d Tutuligo. Tt wabshaba pi wo t‑nako machs hab wo chei mam pi d t‑wehm wohochuddam. Haꞌijj am hi wa d nenehol. K wabshaba pi has d ahga mam has i mahs ch ab i s‑wohoch g Jiosh. Heg at wehsijj ab i t‑hemakoch. K hahawa heg wa wepo mach d Jesus honshpadag. K g Hekia S‑apꞌekam Gewkdag wehsijj an t‑uꞌukch. 
\p  
\v 14 Kuch eda nahnko mahs haꞌichu chikpan hab masma mo g nahnko chuhchuꞌidaj g t‑honshpadag.  
\v 15 T‑tahtad o pi wepo haꞌichu hab wua mo g t‑nohnhoi. Kuch wabshaba wehs ha tatchua.  
\v 16 K g t‑nahnk gawul haꞌichu hab wua mo g t‑wuhpui.  
\v 17 Kuch wabshaba wehs ha tatchua natt ge has masma haꞌichu wo kah mattp pi wo sha ha nahnkk ch pi has masma wo hewagi mattp pi wo sha ha dahkk.  
\v 18 Jiosh at am nahto g oꞌodham k hab masma hab juh g nahnko chuhchuꞌidag ab t‑honshpadag ab.  
\v 19-20 K wehs ab i e wehnadch g hab t‑chuhchuꞌidag no pi d hemako g t‑honshpadag. 
\p  
\v 21 Pi ach hegam waꞌi tatchua t‑wuhpui ch wabshaba g t‑nohnhoi ehp k ch pi heg waꞌi tatchua t‑moꞌo ch wabshaba g t‑tahtad ehp.  
\v 22 Haꞌi o pi gewpkdag g hab t‑chuhchuꞌidag ch wabshaba hab wa masma d si t‑tatchui.  
\v 23 Kuch s‑ap ha nuhkud ch ha maꞌishch mat pi wo mahsk hegam hab chuhchuꞌidag mo pi ta neidagma.  
\v 24 Pi ach hab masma s‑ha nenꞌoid hegam hab chuhchuꞌidag mo pi has d ahga mat wo e neidad.  
\v 25 Wehs ach ha tatchua g hab t‑chuhchuꞌidag mat wehs e wehm s‑ap wo chikpanad.  
\v 26 Pegih, bach wa masma chum t‑wehm s‑ap chikpan ch wehs t‑wehm wo t‑shoꞌigch mattp hema haꞌichukaj wo t‑shoꞌigch. Kutt wehs t‑wehm wo s‑hehgigk mamtp hema ab wo si s‑ap has t‑ah. 
\p  
\v 27 Pegih, wehsijj ach d hemako g Jesus Christ wehm ch heg wa wepo mach d honshpadaj ch heheꞌejel d nahnko chuhchuꞌidaj.  
\v 28 Jiosh at wehs ab i t‑mahkhi matt haschu hab wo junidahid. K id d si wehs ha dahm t‑chikpan mach haꞌi d Jesus Christ chuhchai ch am ahgachugch g haꞌichu ahga ab amjed. K id ab oidch d t‑chikpan mach haꞌi d Jiosh haꞌichu ahga i tashogiddam. K id ab oidch d ep t‑chikpan mach haꞌi d Jiosh haꞌichu ahga ha mashchamdam. Haꞌijj ach s‑hasig haꞌichu hab wua ch haꞌijj uꞌukch g gewkdag matt wo ha doaj ch haꞌijj am i ha wehmaj haꞌi ehp ch haꞌijj am haꞌichu aꞌapꞌechud ha shahgid g t‑wehm wohochuddam ch haꞌijj g pi t‑machiga neꞌokikaj neneok. 
\p  
\v 29 Pi att wehsijj gam hu mehk wo ahgachugad g Jiosh haꞌichu ahga ch pi wehsijj d Jiosh haꞌichu ahga i tashogiddam ch pi wehsijj d Jiosh haꞌichu ahga ha mashchamdam ch pi wehsijj uꞌukch g gewkdag matt hab wo junihid g s‑hasig haꞌichu  
\v 30 o wo ha doaj ch pi wehsijj neneok g pi t‑machiga neꞌokikaj ch pi wehsijj ab mahks g amichudadag matt wo tashogi idam neꞌoki.  
\v 31 K wabshaba haꞌi idam mahkigdag baꞌich d i ha wehmtadag g t‑wehm wohochuddam. Kutt heg hekaj baꞌich wo i tatchua matt wo hekaj hegam. K eda g pihk elidadag wehs baꞌich d i si haꞌichu. 
\c 13  
\s1 Matt wo chum si pihk t‑elidad ha hekaj 
\p  
\v 1 Neh, ttp hems wo t‑nako matt wo neneokad g nahnko mahs oꞌodham ha‑neꞌokikaj o chum hems g anghil ha‑neꞌoki. T wabshaba hegai t‑neꞌoki heg wo wa wepok mo g s‑nakosig haꞌichu am e gew mattp pi wo edgidad g pihk elidadag.  
\v 2 Dach wabsh pi haꞌichu mattp pi wo edgidad g pihk elidadag, chum achs ab wo mahksk matt wo si s‑ap i tashogi g Jiosh haꞌichu ahga o wo s‑mahchk g geꞌe haꞌichu ch g s‑juhk haꞌichu ahga wo s‑amichudad o wo edgidad g wohochudadag matt wo i himch g doꞌag.  
\v 3 Pi o haꞌichu t‑wehhejed s‑kehgaj mattp pi wo edgidad g pihk elidadag, chum achs hems wo s‑chechojimak matt wehs gm hu wo ha mah g haꞌichu t‑eniga, chum hems ab wo i t‑dagito mamt wo t‑mehid k wo t‑kokda ha wehhejed. 
\p  
\v 4 Mattp wo edgidad g pihk elidadag ch wo s‑hemajimak ch ab wo s‑ha bahbgid ch pi wo chu hehgamk ch pi wo woikimak  
\v 5 ch pi am hu wo ha edawua ch pi wo chu daꞌad ch wo s‑bamuistk. Pi att wo kuint mat hema pi ap has wo e juh  
\v 6 k pi wo hohhoꞌi g pi apꞌekam k wabshaba si s‑ap wo t‑tahtkk ab kahkch g s‑apꞌekam  
\v 7 ch s‑ap hab wo ha elidad g hemajkam. Chum as pi ap hab wo e junihid, tt hab wo ha elidad matp hems wo wa aꞌapꞌet ch hekaj wabsh s‑ap wo nakogad matp has wo e juh. 
\p  
\v 8-10 Ab o heheꞌejel t‑mahkch g Hekia S‑apꞌekam Gewkdag g haꞌichu ahga ch pi t‑machiga neꞌoki ch haꞌichu mahchig mat d wabsh wo i t‑wehmtadagk hemuch. Kut wabsh wo huhug idam mahkigdaj matt hekid am wo i ai hegai mo haschu g Jiosh wehs s‑ap am apꞌechudch t‑wehhejed. T wabshaba g pihk elidadag pi hekid wo huhug. 
\p  
\v 11 Neh, no hig pi g ali alikaj neok ch alikaj haꞌichu tahtk ch haꞌichu chegito? T wabshaba ab wo i e ai g geꞌeligaj. T wo geꞌehogat.  
\v 12 Pegih, tt hab wa masma am gawul wo t‑juh matt hekid am wo nei g t‑doꞌibiakam am i koꞌok. Hemuch ach wabsh al heꞌes haꞌichu i s‑mahch ab amjed g Jiosh. K id heg wa wepo mach wabsh s‑kohmagim neid haꞌichu. Tt wabshaba heg i tash haha wo si s‑ap s‑mai haꞌichu ab amjed g Jiosh ab i neidok g t‑doꞌibiakam. T g t‑mahchig hahawa d wo wehsk hab masma mo hab masma s‑t‑mahch g Jiosh. 
\p  
\v 13 Pegih, chum att hekid ab wo s‑wohochudad g Jiosh ch ab s‑ap wo nenidad mat am hab wo i junihid g e‑neꞌoki am t‑wehhejed. Chum att hekid wo si pihk t‑elidad ha hekaj. K g pihk elidadag wehs ha baꞌich d i si s‑has haꞌichu. 
\c 14  
\s1 Moki ia ha tashogid g Hekia S‑apꞌekam Gewkdag mahkigdag 
\p  
\v 1 Pegih, mt am wo e nakogad mamt ab wo si pikh e elidad wehs ha hekaj ch wo i ha wehmtad heg hekaj mo haschu ab t‑makiog g Hekia S‑apꞌekam Gewkdag matt hab wo junihid. T id d wo si i ha‑wehmtadagk matt am wo ha ahgidad mo haschu g Jiosh am i t‑tashogid.  
\v 2 Pi at hedai hejel wo s‑em‑amichud k ab wo bei g i wehmtadag mamtp wabsh g pi e‑machiga neꞌokikaj wo neneokad. Heg o wa wepo mach heg hekaj ab waꞌi Jiosh wui neneok.  
\v 3 K wabshaba hegai mo am ha ahgid mo haschu g Jiosh am i ha tashogid am i ha wehmaj ch am i ha gewkemhun ch ab ha mahk g s‑ap tahhadkam.  
\v 4 Hejel o waꞌi e wehhejed hab kaij hegai mo gawul kaidam nenneok. K wabshaba hegai mo am ha ahgid mo haschu g Jiosh am i ha tashogid am i ha wehmaj g e‑wehm wohochuddam. 
\p  
\v 5 Mamt huꞌi wehsijj wo neneokad g pi e‑machiga neꞌokikaj. Ni wabshaba baꞌich i tatchua mamt wo bei hegai mahkigdag mamt si s‑ta amichudam wo ahgad g Jiosh haꞌichu ahga. Pi at am hu hugkam d wo i ha‑wehmtadagk mamtp wo neo heg hekaj pi e‑machiga neꞌoki, heg hi wa matp am hema wo gagda g em‑neꞌoki am wehs ha wehhejed.  
\v 6 Pi ant haꞌichukaj wo shaꞌi i em‑wehmt mantp hems am wo jiwia em‑wui k heg waꞌi hekaj wo neokad pi ni‑machiga neꞌoki. Bant waꞌi masma wo i em‑wehmt mant am wo tasho em‑ahgi mo haschu am ni‑maskogid g Jiosh o g haꞌichu mahchig ab amjed o g haꞌichu mashchamigaj.  
\v 7 Id ant wo haꞌichu wepogi mamt wo s‑amich. S‑mahch am mat pi hedai wo s‑mahchk mo haschu neꞌi am chum aꞌaga matp g uhs kuikud ch ahlpa pi kehg wo kaida.  
\v 8 T pi hedai wo s‑mahchk g shondal mat has wo e juh matp g kuhudam pi ap am hu wo kuhu g kuikud.  
\v 9 Pegih, t hab wa masma pi hedai wo em‑amich mam haschu am chum aꞌaga mamtp wabsh gawul kaidam wo neokad. Heg o wa wepo mat an wabsh wo i huhug g em‑neꞌoki.  
\v 10 Muꞌij o g nahnko mahs neꞌoki id dahm jewed.  
\v 11 Mantp pi wo mahchk g neꞌokij g gawul neokdam, kutt d wabsh wo ge oꞌodhamk ab aꞌai t‑wui nach ge s‑t‑amichud.  
\v 12 S‑apꞌe o mam si tatchua g mahkigdaj g Hekia S‑apꞌekam Gewkdag. Kumt baꞌich am hab wo i junihid mat haschu baꞌich d wo i ha‑wehmtadagk g em‑wehm wohochuddam. 
\p  
\v 13 Hegai mat hedai wo gawul kaidam nenneokad at hemho wa wo chum e hoꞌigeꞌidahun k ab wo tai g Jiosh g amichudadag mat s‑ap wo i tashogi g gawul kaidam e‑neꞌoki.  
\v 14 Pi att hedai am hu wo i ha wehmtad heg hekaj haꞌichu t‑amichudadag mattp wabsh g gawul kaidam neꞌokikaj wo t‑hoꞌigeꞌidahunad, chum achs si s‑ap t‑tahtk am heheꞌejel t‑iꞌibdag ed.  
\v 15 Kutt heg hekaj pi wabsh wo t‑hoꞌigeꞌidahunad g gawul kaidam neꞌokikaj ch pi wabsh wo neꞌed g gawul kaidam neꞌokikaj ch wabshaba s‑ta amichudam hab ep wo t‑juh.  
\v 16 Pi at wo e nako hegam mo pi mahch mach has t‑wua mat t‑wehm ab wo hoꞌigeꞌel g Jiosh mattp wabsh g gawul kaidam neꞌokikaj wo t‑hoꞌigeꞌidahunad nat ge wo amich mach has kaij.  
\v 17 Ttp hems hi wa si s‑ap wo t‑hoꞌigeꞌidahu Jiosh wui. T wabshaba idam pi ab hu wo bei g i wehmtadag. 
\p  
\v 18 Ab o ep ni‑mahks ihda mahkigdag. Kuni ab si hoꞌigeꞌid g Jiosh mani em‑baꞌich i muꞌikko nenneok g gawul kaidam neꞌokikaj.  
\v 19 Nt wo ni‑nako mant heg hekaj muꞌi mihl neꞌoki hab wo chei. K wabshaba baꞌich i s‑apꞌe mach eda t‑mihshmad mant al hetasp neꞌoki hab wo chei mat wo s‑e amich mani haschu chum ha mashcham. 
\p  
\v 20 Aꞌalkaj am hab e junihim, ni‑wepnag, ab si haꞌichuchudch ihda al mahkigdag ch heg hekaj ab si e haschud. Am g wabsh wo dagito ihda pi apꞌekam. Neh, aꞌal o pi mahch g pi apꞌekam. Kumt hab waꞌi masma hab wo masmak mo g aꞌal mamt pi wo mahchk g pi apꞌekam.  
\v 21 An o oꞌohadag mo hab kaij g Jiosh: 
\q1 Bant wo ha juh g Tutuligo mat wo e gehg k hemho wa ab wo kaihamad g ha‑neꞌoki g gawul hemajkam. 
\q1 T eda wabsh kia pi ab hu wo ni‑kaihamad. \rq Isaiah 28:11-12 \rq* 
\p  
\v 22 Neh, idam gawul kaidam neꞌoki mam ab si haꞌichuchud o wa d chum chehgida am ha wehhejed hegam mo pi ab hu kaimk g Jiosh ch pi t‑wehhejed d chehgida ahchim wohochuddam. Hegai mo g Jiosh am t‑tashogid matt wo ha ahgi g t‑wehm wohochuddam o am ha chehgid mo am t‑wehmaj g Jiosh, chum as pi am hu wo ha chehgi hegam mo pi kaimk g Jiosh.  
\v 23 T hegam mo s‑kaimk ch am wo i wahp t‑namki ed hab wo chei matt t‑loligoch mattp wabsh gawul kaidam wo nenneokad.  
\v 24 Hemho wa att am wo tasho ahgad mat has chu g Jiosh am wo t‑tashogi matt wo ah. Kut wo s‑t‑amich g pi e doꞌibiakam k wo s‑mai moki d pi ap chuꞌijkam ch atki wo e lodai.  
\v 25 Wehs g haꞌichu t‑ahga at ab ha wui wo tashogi g s‑aꞌagi haꞌichu ha‑chegitoi. Kut ab wo i shul Jiosh wui k ab wo ihm k wo wohokamch moki woho am t‑wehmaj g Jiosh. 
\s1 Matt wo chum s‑dodolim himchudad g t‑namki 
\p  
\v 26 Id ani hab ahg, ni‑wepnag, mamt wehs haꞌichu s‑ap am hab wo junihid e‑namki ed. Mtp hems hema am wo ah g neꞌi k hema g mashchama hab wo juh k hema wo ah mat haschu g Jiosh am wo i em‑maskogi k hema hems g gawul kaidam neꞌokikaj wo neo k hema am wo i tashogi mo has d ahga ihda neꞌoki. Wehs haꞌichu at d wo i chum em‑wehmta.  
\v 27 Mamtp wo neneo g gawul kaidam neꞌokikaj, mt am waꞌi waik o gohkajj hab wo juh shakal e oidam. Mt hema am wo i tashogi ihda mo am hab e kaij.  
\v 28 Kumt pi am hu hab wo chum chei g gawul kaidam neꞌoki matp pi am hu hedai wo haꞌichugk mat am wo i tashogi k wabsh hejel e wehhejed ch ab Jiosh wui hab wo chei. 
\p  
\v 29 Kumt waik o gohkajj am wo ah mat haschu g Jiosh ab wo em‑mah. Kumt haꞌijj am wo aꞌamich mo haschu am hab e kaij.  
\v 30 Kumt wabshaba wo haꞌasa neo matp g Jiosh am hema ep wui wo haꞌichu i tashogi mat am hab wo chei.  
\v 31 Wehsijj am hiwgidas mamt am wo ah g Jiosh haꞌichu ahga hehemakoj. T hab wehsijj wo haꞌichu mahch k ab hekaj wo bei g i gewkemhunadag.  
\v 32 Mt wo nenida g e‑apꞌedag mat hekid g Jiosh ab wo em‑mah g haꞌichu e‑ahga am ha wehhejed.  
\v 33 Pi o tatchua g Jiosh matt wabsh wo has hu t‑wuad ch wabshaba matt wo s‑dodolimak. 
\p Bamt masma hab wo e wuad e‑namki ed mo wehsko hab e wua g Jiosh hemajkamga.  
\v 34 Ahpim uꞌuwi amt ab wabsh wo ha wechok. Bo masma hab chuꞌig g heki hu t‑himdag chehanig. Pi amt has wo chei ab amjed mo has i kaij g chechoj  
\v 35 k wabshaba ab wo ha kakke g e‑wehm kihkam am e‑kihki am mamtp wo haꞌichu s‑mahchim. Dat wo si edadagk mamtp ab wo ha kakke mam am e mihshmad. 
\p  
\v 36 Pi g hab wo elidad mas ahpim em‑gahi wuhshanim ab i wuhsh g Jiosh haꞌichu ahga o mams ahpim ab waꞌi bei.  
\v 37 Mt wo chum s‑mahchk mo id d Jiosh chehanig mamtp hedai hab e elid mam d Jiosh haꞌichu ahgdam ch edgid g gewkdaj g Hekia S‑apꞌekam Gewkdag.  
\v 38 Kumt pi ab hu wo ha kaiha matp hedai pi ab hu wo kaiha ihda. 
\p  
\v 39 Pegih neh, ni‑wepnag, am g wo si i e gewpkad mamt wo ah g Jiosh haꞌichu ahga k wabshaba pi wo ha daꞌi hegam mat g gawul kaidam neꞌokikaj wo nenneokad.  
\v 40 Wehs amt haꞌichu si s‑ap am hab wo junihid e‑namki ed ch pi wabsh wo has hu e wuad. 
\c 15  
\s1 Mo id d mashchamig ab amjed g Jesus i wuhshanig 
\p  
\v 1 Am ant ep wo em‑ahgi ihda s‑kehg haꞌichu ahgaj g Jiosh, ni‑wepnag. Ab amt i s‑wohoch mant eda am em‑ahgi heki hu k s‑wihnam gegok am e‑wohochudadag ed.  
\v 2 Do ihda s‑kehg haꞌichu ahga mamt heg hekaj wo e doꞌibia mamtp woho an uꞌukch. 
\p  
\v 3 Am ant em‑ahgi mant haschu bei. K id d si s‑has haꞌichu ahgaj g Jiosh ch hab chuꞌig mat g alidaj muh heg hekaj pi ap t‑chuꞌijig  
\v 4 k uhpam ep e chegito mo am d i waik tash mamt am woi cheo ch ed hab masma mo an oꞌohadag Jiosh heki hu oꞌohana ed mat am hab wo e juh.  
\v 5 Am at i e chehgi Peter wui k ab hahawa wehs ha wui g am e‑chuhchai  
\v 6 k am ep i e chehgi ha wui g hetasp siant i baꞌiwichkim mo ab d wohochuddam. Muꞌijj idam o an d wabsh kia dodakam. T haꞌijj hi wa koi.  
\v 7 Am at hahawa ep i e chehgi e‑wehnag James wui k ab ep ha wui wehs g am e‑chuhchai  
\v 8-9 k am si ha oidch hab waꞌap i e chehgi ab ni‑wui. Ni eda s‑koꞌokam ha shoꞌigchud hegam mo ab s‑wohochud. K pi ab hu d chum ni‑wuikam manis d wo kehshajk. T wabshaba wa am ni‑wui i e chehgid k ab i ni‑waid k am i ni‑kei.  
\v 10 Bat wa masma si s‑ni‑hoꞌigeꞌel g Jiosh. Kuni heg hekaj d kehshaj ch chum hems wehs ha baꞌich i si chikpan hegam mo am d chuhchaij. K eda d Jiosh mo hab junihim ihda. Pi ani hejel hab junihim.  
\v 11 K g Jiosh hab waꞌap i ha wehmt hegam mo ni‑wehm d piongaj g Jiosh. Wehsijj ach heg am wa ahgachug. K d ihda haꞌichu t‑ahga mam ab s‑wohochud. 
\s1 Matt am uhpam ep wo t‑chechegito 
\p  
\v 12 Id o d haꞌichu t‑mashchama mat uhpam ep e chegito g Christ. Msh eda haꞌi hab chechꞌe mat pi hedai uhpam ep wo e chegito.  
\v 13 Pegih, t g Christ hab waꞌap pi ep e chegito matp wo wohok mat pi hedai ep wo e chegito.  
\v 14 Kut pi d wo haꞌichuk machs hekaj wo em‑mihshmad o mams ab wo s‑wohoch.  
\v 15-16 T d wabsh wo iattogik mattp wo em‑ahgi mat g Jiosh ab i wuhshad g e‑alidag.  
\v 17 Kumt pi wo shaꞌi e doꞌibia. T pi haꞌichu wehhejed wo s‑kehgajk g em‑wohochudadag.  
\v 18 T hab waꞌap pi wo e doꞌibia hegam mat heki hu koi ab i s‑wohochudk g haꞌichu t‑ahga ab amjed g Christ.  
\v 19 Shaꞌatt waꞌi si shoꞌig hab wo mahsk wehs ha baꞌiwichkim ahchim wohochuddam mattp pi uhpam ep wo t‑chegito. 
\p  
\v 20 T wabshaba woho ab i wuhsh g Christ muhkig amjed k am i shonwuich mat wo i wuwha g koꞌi.  
\v 21 Muhkig at ab i shonwua hema amjed g oꞌodham. T g i wuhshanig ab muhkig amjed hab wa masma ab i shonwua hema amjed g oꞌodham. 
\p  
\v 22 Hegai mat g muhkig ab amjed i shonwua o d Adambad. Kuch wehsijj mukiog nach pi heg ab d amjedkam ch heg wehm d Hemako. 
\p K hegai mat g i wuhshanig ab amjed i shonwua d Christ. Kutt heg wehm ab i t‑hemakoj ab i s‑wohochudk k hekaj ab wo i wuwha muhkig amjed. 
\p  
\v 23 Do Jiosh hab elida mat wehpeg ab i wuhsh g Christ ab muhkig amjed. Tt ahchim ab hahawa hab waꞌap wo i wuwha mach ab s‑wohochud. Id at hab wo e juh mat hekid ep wo jiwia g Christ.  
\v 24 T am haha wo huhug g jewed. Kut ab wo dagito g Christ g e‑kownaltalig e‑ohg Jiosh wui. T Wabshaba g Jiosh wehpeg ab wecho wo i ul wehs haꞌichu. Hemuch at ab wo gegokkad g kokownal ch nahnko mahs gewpkdag Christ wui.  
\v 25 T wabshaba g Christ hemho wa wo himchudad g e‑kownaltalig ch ab wo ai mat wehs wo ha gewito g e‑obga.  
\v 26 K g muhkig d si oidchkam haꞌichu mamt wo gewito.  
\v 27 An o hab chuꞌig Jiosh oꞌohana ed mat wehs haꞌichu ab wecho wo i ul g am si e‑Kehsha. K oi wa pi hejel hab e ahg g Jiosh mas ab wecho wo i e ul.  
\v 28 T wabsh chum haschu ab wecho wo i ul g Christ. T heg ab hahawa wehs haꞌichu wo dagito e‑ohg Jiosh wui. T g Jiosh d wo geꞌe kownalk wehs haꞌichu dahm chum hekid. 
\p  
\v 29 Neh, haꞌijj at g em‑tatchui ab i s‑wohoch g s‑kehg haꞌichu ahgaj g Jiosh k hahawa koi. Kumt haꞌi hab waꞌap ab i s‑wohochud k e pahl wapko mamt wo ha wehmajk am i koꞌok. Pegih, pi g hab wo chehꞌi mas pi ep wo e chegito.  
\v 30 Wehs tashkaj ach pi shaꞌi huwid g t‑doakag ahchim mach am ahgachug g doꞌibiadag. Kutt pi am hab wo t‑junihid matp pi ab hu wo i wuwha g koꞌi.  
\v 31 Neh, ni‑wepnag, wehs tashkaj o am hab chuꞌig g s‑ni‑mukimkam. Id ani hab kaij nani pi ab si has em‑elid mam d ni‑wehm wohochuddam.  
\v 32 Ia at haꞌi hab masma ni‑cheggia mo g s‑ta ehbidam haꞌichu dodakam Ephesus t am. Kunt pi ab hu ha wui wo shaꞌi kekiwua am ahgachugch matt ep wo t‑chegito am i koꞌok matp pi d wo wohokamk. Matp hab chuꞌig, nt wabsh oidk hab wo ni‑junihid g hab ha‑cheꞌi mo hab chuꞌig, “Tt hig wabsh wo si t‑gegosidad ch wo s‑hehgigk natt pi hemuch im hu hab wo i t‑juh.” 
\p  
\v 33 Mt wo e iattogid k hab waꞌap wo masmak mo hegam mamtp ab wo ha kaihamad.  
\v 34 Haꞌijj amki pi mahch g Jiosh. K id d si em‑edadag. Am g wabsh wo dagito g pi ap e‑chegitoi k s‑ap haꞌichu wo chegito. 
\s1 Matsh baꞌich wo i s‑kehgajk g t‑chuhkug ab i wuwhak muhkig amjed 
\p  
\v 35 Neh, haꞌijj amsh hab chechꞌe, “Shaht masma ep wo i wuwha g koꞌi. Kut has wo mahskad g hohon matp woho hab wo e juh?” 
\p  
\v 36 Pegih, nt wo em‑tashogi. T‑hohon o wepogidas mo g haꞌichu kai. Heg at am wo e ei jewed ch ed. T g elidaj wo padt. T g kai am haha wo i wuhsh.  
\v 37 Hegai mam am eꞌesha o d wabsh si s‑wohom haꞌichu kai ch pi d wehs hegai mat ab wo i wuhsh.  
\v 38 Jiosh at hab masma am wo wuhshad mo has i masma tatchua k ab mahkch mat hab wo mahskad mo g jeꞌej. Wehs o gawul mahs g haꞌichu wuhshanig.  
\v 39 K g haꞌichu doakam hab waꞌap gawul mahs. Oꞌodham o am wa has mahs chuhkug. K g haꞌichu doakam ch uꞌuwhig ch waptopi am wa heheꞌejelko gawul mahs chuhkug. 
\p  
\v 40 Tash ch mashad ch huhuꞌu o gawul masma mo g jewed ch gawul masma s‑kehgaj.  
\v 41 K idam mo an t‑dahm hab chuꞌig pi e wepo masma s‑kehgaj. Mashad o gawul masma s‑kehgaj mo g tash. K g huhuꞌu hab waꞌap gawul masma s‑kehgaj mo idam ch pi e wepo masma s‑kehgaj. 
\p  
\v 42-44 Ihda t‑honshpadag o d wabsh jewed t ab haꞌichu ch wo hekit k pi wo kehgajk ch pi wo ha gewkdagk ch wo muh k ged hu wo e hiash. T g Jiosh ab wo i t‑wuwhas. T g t‑honshpadag d haha wo dahm kahchim ch ed haꞌichuk ch wo s‑kehgajk ch wo gewkdagk ch pi hekid wo hekit k pi hekid wo muh. Jiosh at ab t‑mah ihda t‑honshpadag matt id dahm jewed wo hekaj. K hab mahs mat hemho wa am wo nahto g dahm kahchim honshpadag matt an wo hekajid dahm kahchim ch ed. 
\p  
\v 45 Neh, bo chuꞌig g Jiosh oꞌohana mash g wehpeg oꞌodham d Adambad. Tsh id g Jiosh am nahto k ab mah g doakag k Hekaj am i shonwuich g oꞌodham doakag. K wabshaba g Christ ab hahawa t‑mahkch g wechij doakag.  
\v 46 Pi o an hu wehpeg d dahm kahchim doakag g oꞌodham ch wabshaba hemho wa in jewed dahm wehpeg mahsi.  
\v 47 Jiosh atsh wabsh g jewedkaj am nahto hegai si wehpegkam. T heg i dahm ia hahawa jiwia g Christ ab dahm kahchim t amjed.  
\v 48 Wehsijj ach ab d amjedkamaj hegai mat g jewedkaj e nahto ch hab wa masma. Ch ahchim mach ab s‑wohochud hegai mat ia jiwia dahm kahchim t amjed hab wa masma mo hegai.  
\v 49 Matt wo i wuhsh ab muhkig amjed k haha wo wepo masmak.  
\v 50 Pi at an hu wo shaꞌi i wah dahm kahchim ch ed ihda jewed dahm t‑hon mo aihim g muhkig. 
\p  
\v 51 Neh, nt am haha wo em‑ahgi g s‑aꞌagi haꞌichu. Pi att wehsijj wo koꞌo k wabshaba wehsijj wo gawul t‑juh ahchim mach ab s‑wohochud g Jiosh haꞌichu ahga.  
\v 52 Kut id si s‑hohtam hab wo e juh hab masma mam si s‑hohtam e wuhigid. Wehpeg at ab wo kaida g kukuikud k g si ha oidchkam ab wo kaida. T ab ha hekaj wo i wuwha hegam mat heki hu koi ab i s‑wohochudk g Jiosh haꞌichu ahga. Tt ahchim mattp in d wabsh wo kia dodakamk hab waꞌap wo gawul t‑juh.  
\v 53 Ihda t‑hon at am gawul wo e juh mat pi hekid wo muh.  
\v 54 T hab masma wo e wohokamch ihda mo an hab chuꞌig Jiosh oꞌohana ed: 
\q1 Muhkig at im hu hab wo i e juh. 
\q1 Jiosh at am s‑ap wo gewito. \rq Isaiah 25:8 \rq* 
\p  
\v 55-57 Bo wa masma g muhkig mo g si geꞌe koꞌoi. K g s‑koꞌok t‑namkidadag heg hekaj pi ap t‑chuꞌijig heg wa wepo mo g keꞌij. T wabshaba g t‑kownalig Jesus Christ gam hu hab i juh g keꞌij ab nakogk g s‑koꞌok t‑namkidadag. Jiosh at am i apꞌech mat hab masma wo t‑gewitojel g muhkig. Kuch heg hekaj si s‑hehgigam ab hoꞌigeꞌid. 
\p  
\v 58 Pegih neh, ni‑wepnag, pi at wo shaꞌi heki e wua matt haschu am hab wo junihid g t‑kownalig Jesus wehhejed. Kumt heg hekaj s‑wihnam wo gegokkad e‑wohochudadag ed ch chum hekid wo si chikpanad wehhejed. 
\c 16  
\s1 Mat am wo i apꞌech g mahkig 
\p  
\v 1 Id ant hab wo ah heg amjed lial mamt am wo toꞌawad ha wehhejed hegam e‑wehm wohochuddam mo am kih Judea jewed ch ed. Bani ha ahg hegam wohochuddam mo am muꞌikpa kih Galasia jewed ch ed mat am wo toꞌawad g e‑lialiga.  
\v 2 Kumt ahpim hab wa masma hab waꞌap am wo haꞌi toꞌawad wehs domig ed mamtp heꞌekia wo i e nako am aꞌamichudk mam heꞌekia i ha gew.  
\v 3 Kumt am wo haꞌi i ha chuhcha mat am wo i ui g em‑mahkigdag Jerusalem wui. Nt am wo ha oꞌohani g geꞌegedchu Jerusalem t am am jiwiak em‑wui. T id am wo i bei g em‑chuhchai k am wo hihi.  
\v 4 Kunt ahni am epai wo ha oi matp d wo Jiosh tatchuik mant am wo hih. 
\s1 Mo ia ahg g Paul mat has wo chum e juh 
\p  
\v 5 Wehpeg ant am wo i ha neidahi g t‑wehm wohochuddam ha‑kihhim oidk am Macedonia ch ed k am haha wo i em‑chehgimed  
\v 6 k antp hems wehs s‑hehpchꞌed oidam am wo em‑wehmajkahim. Mt am haha wo i ni‑wehmt mantp hebai baꞌich wo i hih.  
\v 7 Pi ant wo em‑nei am himadch Macedonia wui nani pi tatchua mant am wo wa tash em‑wehmajkahim matp d wo Jiosh tatchuik. 
\p  
\v 8 Bani ni‑elid mant ia wo haꞌichugk Ephesus kihhim t am ch ab wo ai g bahijida gegosig.  
\v 9 Geꞌej o g ni‑apꞌedag mant am hab wo junihid g Jiosh chikpan iia, chum as hi wa muꞌijj ab ni‑wui gegok. 
\p  
\v 10 Tp hems am wo jiwia g Timothy em‑shahgid. Kumt si s‑ap ab wo neidad no pi am hab waꞌap junihim g Jiosh chikpan hab masma mani ahni.  
\v 11 Pi amt wo pi ap hab elidad mo d wabsh wechij oꞌodham ch wabshaba am wo i wehmt. T hab s‑ap e taht k ab uhpam wo i hih. Si ani nenida mat ia ep wo jiwia hegam ha wehm mat am wehmaj wo hihi em‑wui. 
\p  
\v 12 Am amsh s‑neidamk g Apollos. Kuni ab chum si i gewkemhun mat am wo i em‑chehgim. K wabshaba pi hab elid mo d Jiosh tatchui mat am wo hih hemu ch heg hekaj pi wo ha oi idam mat am wo i em‑chehgio k wabshaba am wo wa em‑nei mat hekid am wo s‑apꞌekad wehhejed. 
\s1 Ia o nahnko haꞌichukaj ha jehnigid g Paul 
\p  
\v 13 Am g wo s‑e nenꞌoidad ch s‑wihnam wo gegokkad am e‑wohochudadag ed ch s‑geꞌehogam am wo chikpanad  
\v 14 ch ab wo e chehgidch wehs haꞌichu k ed mam ab si pihk e elid wehs ha hekaj. 
\p  
\v 15 S‑mahch am mo hegam Stephanas d si wehpegkam am em‑jewedga ed mat wehs e wehm ab i s‑wohoch g s‑kehg haꞌichu ahgaj g Jiosh. Idam at am i e dagito mat haꞌichu am hab wo junihid ha wehhejed g wohochuddam. Kuni ab em‑gewkemhun, ni‑wepnag,  
\v 16 mamt ab wo ha kaihamad hegam mo hab masma em‑wanimed mo idam ch hegam mo hedai ha wehm chikpan. 
\p  
\v 17 Hemu at wabsh ia dada g Stephanas ha wehm g Fortunatus ch Acaicus. Kuni si s‑ap ni‑tahtk ch ha neid nani pi si s‑em‑neidamk.  
\v 18 Ab at si i ni‑hehgchul hab masma mat hab em‑juh. S‑ap amt ab wo ha neidad g hab mahs oꞌodham. 
\p  
\v 19 Hegam mo ab ihm g Christ iia Asia jewed ch ed o am i em‑ahgid mamt ab wo i s‑ha hoꞌigeꞌel. Aquila ch Priscilla ch hegam mo am e nanmek ha‑kih am o hab waꞌap am i em‑ahgid mamt ab wo i s‑ha hoꞌigeꞌel.  
\v 20 Wehsijj g wohochuddam iia Ephesus t am o hab waꞌap am i em‑ahgid mamt ab wo i s‑ha hoꞌigeꞌel. 
\p Ab g aꞌai wo s‑e hoꞌigeꞌidad nam pi d e wehm wohochuddam. 
\p  
\v 21 Ia ant hejel wo oꞌoha g ni‑hoꞌigeꞌidadag am em‑wui. 
\p  
\v 22 Jiosh at gam hu hab wo i ha juh matp hedai pi ab hu wo tatchuad g t‑kownalig Jesus. Ia at ep wo jiwia g Jesus s‑hohtam. 
\p  
\v 23 Si o s‑hemajima g t‑kownalig Jesus Christ ab em‑wui ch baꞌich ab wo i em‑mah g i wehmtadag. 
\p  
\v 24 Ab ani si pihk ni‑elid wehs em‑hekaj ahpim ni‑wehm wohochuddam. 
\p Neh, id ant hab wo waꞌi chei am em‑wui.