\id 1JN NT0032.1J1 ONO Phinnemore NOV-1990. \h 1 Yohane \toc1 1 Yohane \toc2 1 Yohane \mt1 1 Yohane \c 1 \s1 Yohaneŋo Kibi Mikepka Qeke, Don Gegeinerop Didiwo Wakonge \p \v 1 Mokaka qei kino ŋineka kieke pa sari mage pake, yewa ŋene ketzeŋo detkone, so deze weleŋo kakone, welekatne, ŋene dezeŋo ka more metezeŋo makone, gege togon Wane Don iwa qe ŋibonmaine. \v 2 Gege wele didiwo wakonlukki kakone, paki gege togon wane don kisiine iwa ra wakone ŋidanmaine, gege togon yewa Magak wano ŋine pa sari mage ŋenano didiwo wakongi kamaine. \v 3 Kine kine kakone so detkone, ea wane ŋene ra qelaŋane ŋine weneŋ yalewaka ŋidanmaine, ŋidanŋem detpi paki, ŋine ŋenano takotkeu wetze weku qeturage gekenane, pakimo wet weku gegeze yewaŋo Magak Anutu so Gipole Yesu Kristo erano kito more payake. \v 4 Yalewa paki, ŋenano wet pesekŋo maine watke more payakane kibi iwa qe ŋibonmaile. \s1 Anutu Eŋe Qelaŋan \p \v 5 Iwa yemo donkisi Gipole Yesu wano detkonane more, ŋine ra wakone ŋidanmaine, Anutu eŋe qelaŋan, eŋano panaman mane mi pamaike. \v 6 Ea wane ŋene wet weku Anuturop gemaine raŋem paki, yewaoka panamango gekene, pakimo donze yewa mo isi okangi, ŋene don wele yewa mi magekene. \v 7 Ŋo Anutu eŋine qelaŋango gemaike, yalewaka ŋene qelaŋango gekeneo, yemo ŋene doku tau tau ŋei natne eŋerop wet weku kima kima okane gekene, pakimo Gipole Yesu wane Weŋemineŋo sot turuŋ kine kineze ea saukki libeka qekene. \p \v 8 Ŋo ŋene sot turuŋze mane mi pamaike yale raikeneo, yemo ŋedomka wetze isikaikene, pakimo don welekatne yewaŋo ŋenane kotozo mi payake. \v 9 Ŋene borikineze rapok warekeneo, yemo Anutu eŋe mi qeliŋ ŋoniake, midakaka, eŋe masi koboine okangi paki borikineze qeligeake, so tanik manikze qotkoine yewa ma biraki ariki ŋene libeka qekene. \v 10 Ŋo ŋene iwa yale raikene ŋene sot mane mi ma okangone, ea rakeneo yemo, Anutu wane don raŋem, isi don yale okaniake, pakimo eŋane donŋo ŋenane kotozo mi payake. \c 2 \s1 Kristo Eŋe Ŋenane Qesi Qesiŋ \p \v 1 Gipon borasokopne, borikine mi maikei wane girem don iwa qe ŋibonmaile, ŋo ŋei mane eŋe borikine mayake, yemo qesi qesiŋze koboboine, Magak korop gemaike, Yesu Kristo yewa desiake. \v 2 Kristo oŋomka sot turuŋze mataliki siukeakane urataine make, so eŋe ŋenane sot turuŋze mataliki siukeakaneka urataine mi make, midakaka! Eŋe kepe baŋem ŋei ŋerep korop eŋane borikinane turuŋ weneŋ qeliŋge. \p \v 3 Ŋo ŋene Anutu wane don tewekkeneo, yemo ŋene iwa yale desikene, ŋene eŋe detlukkamaine, yale okaniake. \v 4 Ŋo ŋei mane eŋe rayake, “Na Anutu detlukkamaile,” yale raki paki, aŋaine mi tewekeake, ŋei yaline eŋe isi ŋei, wane ŋei yaline eŋane kotino don welekatne mane mi pamaike. \v 5 Ŋo ŋei mane eŋe Anutu wane don tewekeake, eŋe Anutu wet maep wele okankayake, ŋene yalewa okon okane more Anuturop gemaineo, yemo ŋene Anutu wano makatake gemaine, yale okaniake. \v 6 Ŋo mane eŋe rayake, “Na Anuturop gemaile”, yale rayake, eŋe Yesu Kristoŋo okange, yale Anuturop geake yemo menageake. \s1 Kima Kima Okane Qelaŋango Gekene \p \v 7 Kima maepkopne, na don iwa qe ŋibonmaile, yewa don musele mida, iwa mo ramatok don sogine, ŋine mo qei bano kine dere mage sakoi, ramatok don sogine yewamo miti don, ŋine mo alakanka detkoi. \v 8 Ŋo don iwa qe ŋibonmaile, yemo don musele, so ea wane weleine yemo Kristoŋo kotozo urata make, yewao kakone, panaman mo mida lele arikimo, qelaŋan weleŋo qelaŋanmaike. \p \v 9 Ea wane ŋei mane eŋe iwa yale rayake, na qelaŋango gemaile, raki paki kimaine qaisik kayake, eŋe naso yewaoka panaman koto geake. \v 10 Ŋo ŋei mane eŋe kimaine wet maep okan kayake, eŋe qelaŋangoka ge ariake, eŋe numa mi qeyauyake, paki eŋano ŋine kine kine natneŋo ŋei natne mi ebuki borikine maikei, midakaka! \v 11 Ŋo ŋei mane eŋe kimaine qaisik kayake, eŋe panaman koto geki paki panaman wane numao arimaike, eamo mi desiake. Onoka wane Panamanŋo maki deine mupkemaike ea wane eŋe numa maine me qotkoine eamo maine mi kayake. \p \v 12 Gipon borasokopne, Kristo wane eŋet wane Anutuŋo borikineŋine qeliŋgi siukwareke eawane don iwa qe ŋibonmaile. \v 13 Magakop, ŋine mokaka qei kino ŋine Ŋeiwa ge sari geke, so gemaike, eŋane kine detlukkamami, ea wane don iwa qe ŋibonmaile. Ŋei medep, ŋine mo Satan ŋadeka more qeliŋ kamami, ea wane don iwa qe ŋibonmaile. \p \v 14 Medep nigatne ŋine Magak Anutu detluk kamami, ea wane don iwa qe ŋibonmaile. Magak ŋine mokaka qei kino ŋine ge sari geke, so gemaike, Eŋe detlukkamami, ea wane don iwa qe ŋibonmaile. Ŋei medep qaluwit, ŋine zonom ŋine pamaike, so Anutu wane donŋo koto ŋino pamaike, paki Satan ŋadekkamami, ea wane don iwa qe ŋibon maile. \s1 Ŋene Wetze Kepe Abogo Misuk Payake. \p \v 15 Wetŋine kepeo me kepe wane abogo misuk motpi payake, ŋo ŋine wetŋine kepeo motpi payake, yemo ŋine wet maep ŋine Magak wane yewaŋo ŋinane koto ŋino mi payake. \v 16 Kepeo ŋine kine kine korop, solaŋo bailalaŋ, me deŋo ka so bailalaŋ, so wawaine kine kine, ŋei ŋerep eŋe ka more wawaine okan okanmami, yewa mo Magak wanoŋine mi sarimaike, mida! Wawaine korop kepeo ŋine. \v 17 Kepe so aboŋ kine kineine kepe kutno paki, ŋei ŋerep eŋe ka more bailalaŋ okan okanmami, yewa korop mida sololokeake, ŋo Anutu wane don dere tewek okanmaike eŋe yemo naso baŋem ge ariake. \s1 Kristo Wane Ŋabaine Wakonge \p \v 18 Gipon borasokopne, naso mo bomilemaike! Kristo wane ŋabaine wakoniakane rakoi, wane ukude yemo Kristo wane ŋabakoune mo loutne wakone gewaremami, pakimo ŋene detmaine, naso mo bomilemaike. \v 19 Ŋei ŋerep magu iwa eŋe welekatne ŋenane magu midakaka, yalinane biraŋone arikoi, eŋe ŋenane magu wele gekoi ra, yemo ŋenerop geurap, ŋo eŋe siluŋ biraŋongoi, paki kine iwa yale wakonge, eŋe welekatne ŋenane magu wele midakaka. \p \v 20 Ŋo ŋine yemo Kristoŋo Asu Koboboine ŋibongane dereret ŋinerop okane don welekatne yewa detlukmami. \v 21 Ŋine don welekatne ea wane kine ŋaŋaemami, yale rawe paki kibi iwa mi qe ŋibonmaile, midakaka. Ŋine mi ŋaŋaemami, ŋine mo detlukmami, so don welekatne yewao ŋine isi don mane mi wakon okanmaike, yewa ŋine mo weneŋ detwaremami. \p \v 22 Pakimo ŋei isi don rara eamo ma? Ea mo ŋei mane, Yesu wane Mesia, Anutuŋo birakaki ketke, mida rayake oŋo, eŋe Magak so Medep weneŋ eretnarek qaisik osiake, yale okangi paki Kristo wane ŋabaine okaniake. \v 23 Ŋei mane eŋe magak qaisikkaki paki, medep yalewaka qaisikkayake, ŋo mane eŋe Medep kima okankaki paki, Magak yalewaka kima okankayake. \p \v 24 Ŋo qei kino miti don detkoi, yewaka togole malipka gekei, miti don yewa wetke togole malipka geu paki ŋine baŋ, naso baŋem Medep so Magak ererop tako rakot ge arikei. \v 25 So Kristo oŋom kine kine ŋeboniakane ŋedaŋge, yemo gege togon. \p \v 26 Wet ma siuk okan ŋungei wane ra okanmami, eŋane rawe paki kibi iwa qe ŋibonmaile. \v 27 Ŋo ŋinane, yemo Kristoŋo Asuine ŋibonge, yewaŋo ŋinano payake, Asuŋo ŋinane koto ŋino geki, ŋine ŋei maneŋo kito ŋiboniakane mi ŋaŋaekei, Kristo wane Asuineŋo kine kine korop ea wane kine kito ŋiboniake, eamo don welekatne kito ŋidaniake, ea mo isi midakaka, ea wane ŋine Asuŋo kito ŋidaniake, yewa tewekeu paki, Kristo wano kito togole gekei. \p \v 28 Welekatne, gipon borasokopne, Kristo wano kitou togoleu paki gekei, paki Nasoo eŋe didiwo sariake, yewao ŋene maine togole okorakene, ŋene eŋane kaitko kaet so gamu gamu okane mi siukkene. \v 29 Ŋine mo detmami, Kristo eŋe koboboine, ŋine yalewaka iwa yale desikei, ŋei mane eŋe masi tanik koboboineka okane geake, eŋe Anutu wane medep. \c 3 \s1 Anutu Wane Ŋerep Medep \p \v 1 Detmami, Magakŋo wet maep zok manerop okanŋonge! Eŋe wet maepine zok kakapa suaine pamaikane, ŋene Anutu wane ŋerep medep ŋedorake, iwa yemo welekatne, kine yalinane kepeo ŋei ŋerep eŋe Anutu wane mi detkoi, so ŋene yalewaka mi detŋonmami. \v 2 Kima maepkopne, ŋene ukude Anutu wane ŋerep medewekoune okane gemaine, baŋ ŋado daleo okane gekene, eamo mi wakongi detlukkamaine, ŋo siluŋ iwa yale detmaine, ŋado Kristo lotkeake, naso yewao, eŋine kait toqaine tokso giridiŋ kaŋem paki eŋine rokop okanikene. \v 3 Ŋei korop eŋe weteneŋo Kristo wane dereret so tomaka gekei, eŋe edom yale okanbi paki, Anutu wane kaitko libe qe more gemami, so eŋe Kristoŋo libe qotqole gemaike, yale gekei. \s1 Borikine Ma More Satan Wane Medep Natne Okanikei \p \v 4 Ŋei mane borikine mayake, eŋe Anutu wane Ramatok Don yewa yuanmaike so qemaike, onoka wane, borikine yewaŋo Ramatok Don qeqe okanmaike. \v 5 Ŋo ŋine mo detmami, Kristo eŋe ŋei ŋerep sot turuŋene ebu ma wareakane lotkeke, eŋe borikine sot mane mi pamanmaike. \v 6 Mane eŋe Kristorop geake, eŋe takotke borikine mi mayake, ŋo mane eŋe borikine takotke mayake ŋene raikene eŋe Kristo mi kake so mi detkake, yale okaniake. \p \v 7 Ŋerep medewekopne, ŋine kaulukei, ŋei natneŋo isiŋunikei. Ŋei mane tanik manik koboine mamaike, eŋe ŋei koboboine Kristoŋo geke, eawane rokop. \v 8 Mokaka qei kino kieke more, Satanŋo borikine kine kine mamaŋke, eawane ŋei mane eŋe borikine mamaikeo, yemo eŋe Satan wane ŋei me medep okanmaike. Paki Anutu wane Gipole eŋe didiwo sari lotke more, Satan esopkaki paki, urataine weneŋ mataliki siuke mida leleke. \p \v 9 Ŋei mane Anutu wane medep geake, eŋe borikinane tanik manik takorakot mi mayake, onoka wane, Anutu eŋine gege mage so tanik manikŋo eŋano pamaike, so Anutu eŋe eŋine magaine, ea wane eŋe borikine mi takotke mayake. \v 10 Anutu wane ŋei ŋerep so Satan wane ŋei ŋerep eŋane kine keueno pamaike, yemo iwa didiwo wakonmaike, ŋei mane eŋe tanik manik koboboine mi okaniake, me kimaine wet maep mi okankayake eŋe Anutu wane medep mi okaniake. \s1 Wet Maep Maneŋo Mane Okannagu Gekene \p \v 11 Mokaka biŋek don mane iwa yale detkoi, ŋene kima kopze wetzeŋo wet maep okan ongene. \v 12 Ŋene Kain yale misuk okanikene, Kain eŋe Satan wane biŋek ea wane eŋine ŋole qeke, Kain eŋe onoka wane ŋole qeke? Yemo kine iwa yale wane, Kain eŋe kine kine wa okange, eamo qotkoine, ŋo ŋoleŋo kine kine wa okange, eamo mayakatne, ea wane. \p \v 13 Kimakopne, kepe ŋei kimakop ŋine eŋe ŋaba okanŋunbi, ŋine misuk qisekei. \v 14 Ŋene iwa yale detmaine, ŋene seu seu qeliŋka more sari gegeo waketŋem paki wiekone, ŋene yewa detmaine, onoka wane ŋene kimakopze Anutu wane ŋei ŋerep wet maep okanon okanmaine, ea wane. Ŋei mane eŋe kimakoune wet maep mi okanoniake, eŋe seu seuneka geake. \v 15 Ŋei mane eŋe kimaine qaisik kayake, eŋe kawali qeqe, pakimo ŋine mo detmami, kawali qeqe ŋei yewa eŋe gege togon mane mi pa manmaike. \v 16 Kristo eŋe ŋenane raki paki gegeine qaisikkake, ea wane ŋene detŋem wet maep wele okan maike, so ŋene yalewaka kimakopze eŋane raŋem paki gegeze qaisikkaŋem menageake! \v 17 Ŋei mane eŋe kepe wane ŋara aboŋ morianine zok manerop pa manmaike paki, kimaine mane eŋe ŋara aboŋine midaine geki ka qewoloŋ okangi paki, qomine ma walukeake, paki ŋene daleo raikene, eŋe Anutu wane wet maepŋo kotino mi pamaike! \v 18 Gipon borasokopne! Ŋenane wet maepze yewamo donŋoka me aŋazeŋoka misuk raikene, ea mo wet maep wele, metezeŋo so wetzeŋo maŋem deeneŋo wele kaikei, Anutu wane don teweke more kaet midaine Anutu wane kaitko maine okorakene. \p \v 19 Yale okanŋem, don wele ea wane magu gemaine, ea wane kine wakoniake, pakimo ŋene wetzeŋo qebin mabin ŋebuki Anutu wane kaitko maine ŋene wetze ma pesekaikene. \v 20 Ŋo wetzeŋo ŋenguyake yemo, ŋene mo detmaine, Anutu eŋe ŋenane wetzane rokop yuankamaike, eŋe rokop mane geki paki kine kine korop ea wane kine detwaremaike. \v 21 Pakimo kima maepkopne, ŋene wetzeŋo mi ŋenguyakeo, yemo ŋene Anutu wane kaitko togole okorakene. \v 22 Ŋene kine kine yewa me yewa wane qeka more raŋem ŋeboniake, onoka wane ŋene pidonine tewekmaine so eŋane kaitko maine geŋem yale okanŋoniake. \v 23 Pidonine iwa yale, ŋene Gipole Yesu Kristo wane eŋetine detlukkaikene, so Kristo pidonine rake, ea wane rokopko ŋei kima kopze eŋerop wet maep okannagukene. \v 24 Ŋei mane eŋe Anutu wane pidonine tewekeake, eŋe Anutu qotkayake, paki Anutuŋo ŋei yewa yalewaka qotkayake, Anutuŋo qotŋone gemaike, yemo Asu ŋebonge eaŋo ra wakone ŋedangi detokanmaine, yemo Anutu eŋe ŋenerop gemaike. \c 4 \s1 Asu Welekatne So Asu Isisine \p \v 1 O, kima maepkopne, ŋine ŋei korop eŋe Asu pa ŋebonmaike, rau detpi wele misuk okaniake, ŋine liwekone more kineene kaikei, eŋe Asu ma gemami, yewa Anutu wanoŋine sarimaike me mida, yewa detlukkei, propet isisine loutne wakongoi, kepe baŋem rokopke ge waremami. \v 2 Ŋine kineene yemo iwa yaleoken desikei, Asu mane eŋe Yesu Kristo welekatne ŋei okange, yewa raulukeake, Asu yewa eŋe Anutu wano ŋine ŋei yewa eŋano pamaike raikene. \v 3 Ŋo Asu mane eŋe, Anutuŋo Yesu mi birakake ketki paki ŋei mi leleke, eaŋo bisop kayake, asu yewa eŋe Anutu wanoŋine mi ketke, eŋe Kristo wane Ŋabaine eŋano ŋine sarike. Ŋine eŋane det okanmami, eŋe kepeo wakoniakane rakoi, wane iwa yemo eŋe mo wakonge gemaike. \p \v 4 Gipon borasokopne, ŋine yemo Anutu wane biŋek ea wane propet isisine mo ebu ket biraon warekoi, onoka wane Asu yewa ŋinane koto ŋino gemaike, eŋane zonomine yemo togogole, kepeo ŋine asu eŋane zonom korop yuanka waremaike. \v 5 Ŋei propet isisine iwa eŋe kepeo ŋine, ea wane donene yewa kepe donka okanmaike, paki kepe ŋei eŋe ketene more don yewa det okanmami. \v 6 Ŋo ŋene yemo Anutu wane biŋek, mane eŋe Anutu detkamaikeŋo ŋenane don desiake. Mane eŋe Anutu wano ŋine mi wakongeŋo, yemo donze mi desiake. \p Don welekatne ea wane Asu so isi don wane asu erane kineetne yalewao wakongi ka more maine raikene. \s1 Anutu Eŋe Wet Maep \p \v 7 Kima maepkopne! Ŋene maneŋo mane wet maep okannagukene, onoka wane wet maep yewa yemo Anutu wanoŋine sarimaike, wane ŋei mane eŋe wet maep korop geake, eŋe Anutu wane medep okaniake, so Anutu detkayake. \v 8 Ŋei mane wet maepine midaine geake, eŋe Anutu mi detkayake. Onoka wane, Anutu eŋe wet maep wane kine so welaine. \v 9 Anutu eŋe iwa yale okangi paki, wet maepine ŋenane ra more sikanŋonge, eŋe gipole wemedep weku birakaki kepeo ketke, ŋene Yesu wane ra more gegeze marat kaikenane, yale okange. \v 10 Wet maep wane kine iwa yale pamaike, ŋedo Anutu wet maep mi okankakone, midakaka, Anutuŋo ŋene wet maep okanŋongi paki, Gipole talekaki ket more, borikinezane turuŋ qekokki paki ŋebu make. Ŋei wet maep mi okanone more Anutuka wet maep okanka okanka ea mo mi pamaike. \p \v 11 Kima maepkopne, Anutuŋo wet maep yale okanŋongane ŋene yalewaka, kimakopze eŋerop wetzeŋo wet maep okan nagukene. \v 12 Anutu ŋene dezeŋo mi kakane, ŋo siluŋ ŋene ŋedomka wetzeŋo wet maep okan nagukeneo, yemo Anutuŋo kotozo geake, paki eŋane wet maepŋo ŋenane kotozo sua leule okaniake. \p \v 13 Ŋene onoka wane maine Anutu detluk kamaine? So eŋe ŋenerop gemaike, me ŋene eŋerop gemaine? Eŋine detluk kamaine, yemo Asuine ŋebongane ŋene iwa yale detmaine, ŋene Anutu qotkamaine ŋo Anutu eŋe ŋene qotŋonmaike. \v 14 Magak, eŋe Gipole talekaki kepe baŋem ŋei korop ŋebu mainŋone eŋino biraŋoniakane ketke, paki ŋene dezeŋo kaulukkonane don yewa raulukon okanmaine. \v 15 Ea wane ŋei mane eŋe Yesu Anutu wane Gipole, yale raulukeake, eŋe Anutuŋo ŋei yewarop geake, ŋo ŋei yewaŋo Anuturop geake, \v 16 pakimo ŋene ŋedom Antuŋo wet maep okanŋonge, yewa detmaine so detlukkamaine. \s1 Wet Maep Koropŋo Kaet Mi Ma Geake \p Anutu eŋe wet maep wane kiewowoine, ŋei mane wet maep korop geake eŋe Anuturop geake, ŋo Anutuŋo eŋerop geake. \v 17 Wet maep wane wele ŋenano wakon lukmaike, eamo iwa yale. Ŋene gegeze kepeo gemaine, eamo Kristo wane rokop. Ea wane ŋene baŋ Wano Wanok Naso suaine yewao, kaet mi okane more togole okorakene. \v 18 Kaet so wet maep ere kima kima mida, wet maep wele yewaŋo kaet korop esopongi saket ariwarekei, kaet eŋe kawali ma okanmaike, ea wane mane eŋe kaet mageake, eŋano wet maep maine mi pamaike, yale raikene. \p \v 19 Anutuŋo alakane more wet maep okanŋonge, ea wane ŋene wet maep korop gekene. \v 20 Ŋei mane eŋe rayake, “Na Anutu wet maep okankamaile,” raki paki kimaine qaisikkayake, eŋe isi ŋei, ŋei yewa eŋe ŋei kimaine deŋo kakaine, eŋe qaisikkaki paki, daleo Anutu deŋo mi kakaine, eŋe wet maep okankayake me? Midakaka! \v 21 Ea wane Kristo wane pidon iwa yale ŋebonge, mane eŋe Anutu wet maep okan kaki paki, ŋei kimaine weneŋ yale waka wet maep okankayake. \c 5 \s1 Mali Malip Korop Ŋo Kepe Wane Tanik Manik Borikine Maket Birakayake \p \v 1 Ŋei maneŋo Yesu wane Kristo raki paki malip kayake, eŋe Anutu wane medep, ŋo mane eŋe magaine wet maep okankayake, eŋe medep yalewaka wet maep okankayake. \v 2 Ŋene Anutu wet maep okankaŋem paki, pi donine tewekkeneo, yemo Anutu wane ŋei ŋerewekoune wet maep okanonmaine, yewa wane kine qe wakoniake. \v 3 Ŋene Anutu yaup mi wet maep okankaikene, so eŋane pidonŋo ŋenano umatne mi okanmaike, midakaka, \v 4 onoka wane, Anutuŋo eŋane ŋerep medep gege togon ebonge, eŋe kepeo umat me wikile kine kine ŋine korop kito peseki ket okanmaike, yemo ŋenze mali malipŋo, yalewa oken okane more kepe wane tanik manik yuanka ma pesekakene. \v 5 Maŋo kawali qe yuangi paki kepe wane tanik manik ma pese okanmaike? Ŋei mane eŋe Yesu, Anutu wane Gipole, yale raki paki malipkayakeŋo weku yale okaniake. \s1 Anutuŋo Yesu Kristo Wane Don Didiwo Ra Wakonge \p \v 6 Yesu Kristo eŋe wekuŋo lotkeke, eŋe dokuŋo tauon tauon ea wane tanik manik so kibego weŋemine ket ket, ea wane tanik manik yewarop sari lotkeke, eŋe dokuropka mi sari lotkeke, eŋe dokurop so weŋem gorop weneŋ sari lotkeke. Asuŋo oŋom kine ra wakone ramaike, iwa welekatne, onoka wane, Asu eŋe don wele ea wane welaine so kine. \v 7 Anutu wane don ŋei karewe edo ra wakon okanmami. \v 8 Asu, doku so weŋem, eŋe karewe, ŋo kineene yemo weku. \v 9 Ŋeiŋo don qesi qesiŋ okane rau detŋem, welekatne okan okanmaike. Ŋo Anutuŋo donine qesiŋkake, yemo wele zok manerop okan okanmaike, eŋe Gipolane don qesiŋka more ra wakonge. \v 10 Ea wane ŋei mane eŋe Anutu wane Gipole detlukkayake, eŋe Anutu wane don wele eaŋo kotino pamaniake. Ŋo mane eŋe Anutu wane don detki don yauwine okangi mi detlukkayake, paki Anutu eŋe isi ŋei yale okaniake, ŋei yaline eŋe Anutuŋo Gipolane kine ra wakonge, ea mi dere malipkayake. \v 11 Ŋene tanik manik yaline eaŋo sikan ŋonmaike, yemo Anutu wane don eamo welekatne, Anutu wisika gege, so gege togon ŋebonge, ea wane kine so welaine yemo Gipolano pamaike. \v 12 Ŋei mane eŋe Anutu wane Gipolerop gemaike, eŋe wisika gegeine pamaike, ŋo mane eŋe Anutu Gipolerop mi gemaike, eŋano wisika gege ea mo mane mi pamaike. \s1 Wisika Gege So Gege Togon Mat \p \v 13 Na don iwa qemaile, yemo ŋine ŋei ŋerep korop Anutu Gipolane eŋetine dere malipka gemami, ŋine maine desikei, ŋene Gege Togon mo makone, yale desikei. \v 14 Ŋene Anutu wane kaitko togole gekene, onoka wane ŋene yale detmaine, ŋene kine kine mane wane Anutu wane simile pamaike, yewao mogare meŋenkaŋem eŋe meŋe meŋenze detki paki ŋeboniake. \v 15 Ŋene meŋenkaikene rokop, eŋe detŋoniake, iwa welekatne, ŋene yalewaka detŋem paki kine kine oŋo ŋeboniakane meŋenkaŋem eŋe ŋeboniake. \p \v 16 Ŋei mane eŋe kimaine kaki borikine mayake, borikine yalineŋo tebakaki seu seu wane rokop mi okaniake, eŋe yaline kaki paki, Anutu meŋenkaki oŋo gege togon maniake, iwa yemo ŋei borikine ewekine ma okanmami, eŋane ramaile. Ŋo borikine umatneŋo tebaongi seu seu wane biŋek oka okan eŋe pamaike, ŋo na yaline eŋane Anutu meŋen kaikenane mi ramaile. \v 17 Masi tanik qotkoine korop yewa eŋe sot turuŋ weneŋ okanmaike, ŋo borikine natne yemo tebaongi seu seuo mi arikei. \p \v 18 Ŋene iwa yale detmaine, ŋei ŋerep Anutu wane dokoine okane gege togon gemami, eŋe borikine takotki takot mi ma okanmami, onoka wane eŋe Anutu wane Gipoleŋo warekaki tikŋaneŋ gemaike, wane Satanŋo maine mi matalikayake. \p \v 19 Ŋene detmaine, ŋene Anutu wane ŋerep medewekoune, ŋo kepe baŋem korop Anutu wane don ŋadekka okanmami, eŋe Satan ŋo ŋei waom okan ongi eŋane bango gemami. \p \v 20 Ŋene iwa yale detmaine, Anutu wane Gipole eŋe ketki paki, wet dereretze ma wakone ŋebongane, ŋene Anutu welekatne eŋe detka okanmaine, ŋenane gegezeŋo yemo Anutu welekatne eŋano pamaike, so Gipole Yesu Kristo wano weneŋ pamaike, eŋe Anutu welekatne so iwa eŋe gege togon. \p \v 21 Gipon borasokopne, ŋine Anutu isisine yewa korop ŋadekon warekei!