\id PHP - Olo NT [ong] -Papua New Guinea 1997 (web version -2014) 1997 
\h Filipai 
\toc1 Youti Pol lantei ne nimoure mete pite Filipai 
\toc2 Filipai 
\toc3 Fil 
\mt1 Youti Pol lantei ne nimoure mete pite Filipai  
\c 1  
\p
\v 1 Ki Pol, ki kire Timoti, ku mete piti wesio towa lite Krais Jisas.  
\p Ku wantei youti nepei ne ise nimoure mete yeflipiye pite Ma Ili pele wuso yulpowo Krais Jisas le ise ratei Filipai pepe. Ku wantei youti ne ise yiripe mete piti puntolise le mete piti kaneise yingowo tisi liti yulpowo Krais Jisas.   
\p
\v 2 Ma Ili, le Eiya louku lire Apa Ili Jisas Krais, te miso onom maneise le te waise enke malye.   
\s1 Pol lirpowo Ma Ili lire nimoure mete pite Filipai  
\p
\v 3 Ki kirpowo Ma Ili kire onom teingine peiki wem ki onposise.  
\v 4 Le wem ki keletei Ma Ili kireise ise yeflipiye, ki keletei kire onom teingine,  
\v 5 wusoli ise kaneiki piti meptalo il pite Ma Ili pe mete nemple, le ise yolpepei yile epli wem linu piti ise yingitepe il pite Ma Ili pepe, le ise kaneiki yau yau fale fei.  
\v 6 Le ki olo kretai koporotei kolpepei, Ma Ili wuso linu kaneise piti yesio towa teingi fei lepei lepe, le miso kaneise yesio yila ye yaltu wem Krais Jisas nou lau.  
\v 7 Ise olo yultei onom peiki, le ki onposiepe kolpepei, pe olo pato tuwopou piti ki ma onposise fei kolpepei. Wusoli ise kaneiki mesio towa teingi wuso Ma Ili waiki piti kesio lepe, le ise yolpepe yireiki ki wem fei lepei, wem ki kifei winem oli le wem ki wala kato yawi lepe. Ise kaneiki piti mirkilau mirpepe mete mirpolo il pepei olo teingipe le piti pe ma pirkilau pulpope pirpolo pe il teingipe pite Ma Ili pele le pe ma pesiepe re pingiepe.  
\v 8 Ma Ili retai ki kirpei punkom wem ki kirpei kolo, ise yeflipiye ki keiteise yultei onom peiki watafei Krais Jisas lotei, le onposise pepe.   
\p
\v 9 Ki keletei Ma Ili kireise kolpepei, ise ma wem oli oli onposi yirkilau piti ma kani onom yantei nemple. Ise yolpepei le enke peise miso pungo le ise ma retape il punkom yoporotei, le ise miso onposi re kapi yaptei yoporo.  
\v 10 Ise yolpepei soma ise miso keinio tisi men teingi loporo piti ise ma yingowo, le il olpe polomen polomen re miso paiteise topo kolo olo, le mete nemple re miso pamtuse pire il menmen re kolo olo wem Krais nou lau lepe.  
\v 11 Ise ma onposiepe menmen teingipe piti yingiepe le Jisas Krais loteteiye miso leilaise enke piti ise ma yingiepe fei yolpepe, le mete ma peila nange lite Ma Ili.   
\s1 Moingi wuso falowo Pol weisipe enke pite mete wuru le pe pulpope il teingipe  
\p
\v 12 Ilim winkem peiki, ki onposi piti ise ma retape fei yolpepei, moingi men nange wuso faleiki pepe, pe weisipe enke pite mete wuru le pe pulpope il teingipe pite Ma Ili.  
\v 13 Min polpepei so yali pal piti puntoluwo winem ili lite moli ili lite Rom lepe, yali pal pepe pe yeflipiye pire mete nemple piti pratei lepei lepe, pe pretai polpepei ki kifei winem oli wusoli ki metine piti kesio towa lite Krais.  
\v 14 Le wem ki kifei winem oli lepei, Apa Ili watepe ilim winkem wuru pepe topo weli le pe turwepe kolo, pe pirkilau peptalo il pite Ma Ili.   
\p
\v 15 Wolo punkom, ilim winkem ilepe pe peptalo il piri Krais le pe onposi piti kelelaiki ki le pe pire il pirpei pura nemple. Wolo ilim winkem nemple, pe peptalo il piri Krais pire enke teingipe.  
\v 16 Le pe onposi piti kani onom pantepe mete nemple, wusoli pe pretai polpepei, Ma Ili waiki towa fei lepei kesio piti ma kosape mete kirpolo il teingipe pite Ma Ili pepe, pe olo pirpei punkom.  
\v 17 Ilim winkem ilepe pepe, pe peptalo il piri Krais wolo enke pelpe olo teingipe kolo. Pe onposi piti pailele potei, le pe onposi pirpolo ma kesipe moingi nemple nou papteiki wem ki wala kifei winem oli.   
\p
\v 18 Pe onposi piti ma polomen pireiki pepe, ki olo onom one kolo olo. Ki onom teingine kasiepe menmen fei pepe, wusoli ki onposi piti pe ma peptalo il piri Krais. Enke pelpe onposi piti ma polomen polomen re wolo wem pe peptalo il piri Krais, ki onom teingine le ki ma onom teingine fei kolpepeye kato.  
\v 19 Ki ma onom teingine fei kolpepe wusoli ki kretai punkom, ise yeletei Ma Ili yireiki ki le Riri lite Jisas Krais, le kaneiki le fei pepei, mete miso pusaiki ke yawi.  
\v 20 Ki kirkilau onposi piti ki ma topo oli kire towa leiki kolo olo, wolo wem oli wuso lepe ki topo weli le fei lepei re ki kirkilau topo weli, le wuso ki ka lo ki namin ratei, ki ma kire topo leiki yefliye piti keila nange lite Krais.  
\v 21 Piti men ki namin ratei fei kolpepei? Ki namin ratei piti ma kesio towa lite Krais. Le wuso ki ma ka, ki onposi nange lite Krais ma fale ili le mete wurutei ma pretawo re pulpowo.  
\v 22 Le wuso ki ma wala namin ratei, ki miso kirkilau kesio towa ili piti kaniepe mete wuru, wolo tisi men ma ki keinio piti kingowo. Olo kironom.  
\v 23 Ki kupwe tisi twinges. Ki onposi kirkilau piti ma kusa olol re nempi oli liti tef lepei lato le ki ma ke kire Krais wepi ratei, le fei pepei ma teingipetei.  
\v 24 Wolo piti ma kaneise ki onposi pe pato poporo piti ki ma wala namin kratei.  
\v 25 Ki kretai koporotei piti ki ma wala namin kratei. Ki ma wala namin kratei piti ma kaneise yeflipiye piti ise ma enke teingipe yirkilau wem ise yulpowo Krais.  
\v 26 So wem ki ma nou ke kulise, ise ma rautuwo Krais Jisas yireiki ki wusoli le kaneiki ke kireise kratei.   
\p
\v 27 So menemple nempleiye fei pepei, ise ma yingiepe. Wai leise piti ratei, ise ma yingiepe watafei il teingipe pite Krais pe pirpei namise piti ise ma yingiepe pepe. Ise yingiepe yolpepei soma wem ki ke kulise lo wem ki kato fiyen, ki miso kingitepe il pirpei pireise pirpolo ise yile singe le ise yesiene onom nenpeiye, le ise kani nemple piti yirkilau yulpope re yingiepe il teingipe pepe.  
\v 28 Ise turise yasiepe mete eringi peise kolo olo. Ise wem oli oli topo weli rasi nemple, le fei pepei ma kosape yolpepei, ise miso weisipe singe pelpe, wusoli Ma Ili lotei le kaneise piti weisipe singe pelpe.  
\v 29 Ma Ili onom maneise, le waise towa teingi lite Krais piti ise ma yesio, le ise ma onposi yirpolo ise yulpowo yawi kolo olo. Ise yulpowo le ise ma yila moingi yiri.  
\v 30 Le fei, ise ma yanteiki mepi lolpo mire moingi. Moingi elpesi wuso nempis yinu yuliki lolpo kiri lepe, le fei re ki wala lolpo kire moingi elpesi lepe, le ise min yingitepe il pirpei pireiki ki pepe.   
\c 2  
\s1 Ku ma mire yape watafei Krais  
\p
\v 1 Ise yingowo tisi lite Krais le fei pepei, ise yile singe ko? Krais kani onom lanteise le ise yingitepe enke peise pireise flo ko? Ise yesiene onom nenpeiye watafei Riri lite Krais ko? Ise yailelepe re onom mane isotei wane ko?  
\v 2 Leso ki kirpeise, ki ma onom teinginetei wuso ise ma yesiene onom nenpeiye, kani onom yantei nemple, le il menmen pite ise onposiepe piti yingiepe, ise ma yulpo nemple.  
\v 3 Ise ma onposi piti kane isotei kolo olo, lo ise ma onposi piti rautu isotei yaupe kolo olo. Wolo ise ma yire yape le ise ma yeila isotei kolo olo, yeite isotei ye tef le ise yeilape mete nemple pe yuwei.  
\v 4 Ise ma onposi piti yailelepe enke peise isoteiye kolo olo, mete nemple re ise ma onposi piti yailelelpe enke pelpe.  
\v 5 Ise ma yesiene onom nenpeiye watafei Krais Jisas lotei.   
\p
\v 6 Le watafei Ma Ili lotei, wolo le onposi piti ma reitu lotei fale lire Ma Ili rounge toungai noute kolo olo.  
\v 7 Le onom pele lotei le tounga pesipe menmen teingipe pele le le fale lire metine yawi piti lesio towa. Le fale metine wape le le kali topo lite tef lepei leltei lotei.   
\q1
\v 8 Le lire yape le le lingowo tisi lite laptei mingim le le yo laye, la laitei nimpe wuso tingeli laitei lepe.  
\v 9 Min polpepei so Ma Ili leila nange lele le yuwei, le le watowo nange nele ilitei linuwepe nange eryai pepe.  
\v 10 Ma Ili lolpepei liri Jisas soma ririm pite yuwei, mete piti tef le mete wuso pa le pe naro pe pratei tef pepe, pe yeflipiye ma yaruwepe yamkelem pratei,  
\v 11 le pe yeflipiye ma pirpei nomnaipe pirpolo Krais, le Ili, le pe ma peila nange lite Ma Ili, le Eiya lite yuwei.   
\s1 Ku ma naliepe tisi  
\p
\v 12 So numuwi peikitei, wem ki kireise ratei, ise yapteiki mingim, le fei ki kato fiyen kireise, pe re ma teingipetei piti ise wala yapteiki mingim yolpepe. Ise retawo tisi piti Ma Ili kaneise ratei yingi wem wem, so ise yire yape onposio Ma Ili, le ise yaptowo mingimye.  
\v 13 Wusoli Ma Ili, le wem oli oli rateise leinginim le le leilaise enke piti ise ma yaptowo mingim le ise miso yingiepe il pele.   
\p
\v 14 Towa men nange ise yesiepe, ise ma yaru mi lo yura nemple re kolo olo,  
\v 15 soma il menmen re ma polise kolo olo, le enke peise re ma teingipe watafei ise eple teingipi pite Ma Ili pele wuso ratei yeingalope mete olpe piti pingiepe il olpe pepe. Ise ma kosape yire wai leise watafei taurungu fale poli teplai yuwei wem mulpou le if lelpe lini linge teplai yuwei lepe.  
\v 16 Ise kosape mete olpe piti pire il olpe pepe, kosape yire il wuso kaneise piti ratei yoporo pepe. Wuso ise yolpepei, ki ma rautu kutei kireise wem Krais nou lau, wusoli towa leiki wuso kesio lepe olo kere yawi kolo olo.   
\p
\v 17 Ise yulpowo Krais le ise yingiepe yoporotei piti Ma Ili ma onom teingine lireise watafei ise yeptawi siye yaptowo le le onom teingine lasiepe pepe. Le ki onposi kirpolo wuso mete ma peteteiki ka, teluwi leiki ma lualo watafei wain tipe liti ise kalulu yeltalipe siye wuso yeptawi yaptowo Ma Ili pepe. Wuso pepei ma fale polpepe, ki ma onom teingine le ise re ma yanteiki mepi enke teingipe.  
\v 18 Min watafei ise pepe, ise re ma enke teingipe le ki ma kanteise mepi enke teingipe.   
\s1 Timoti ma le Filipai  
\p
\v 19 Wuso Apa Ili Jisas lulpoiki onom peiki leinginim ki ma kaisi Timoti frou le lulise soma wem le nou lilape il lau lirpeiki lireise ise, ki ma topo weli.  
\v 20 Timoti loteteiye, le onposi watafei ki onposi, le punkomtei, le onposisetei.  
\v 21 Mete yeflipi pepe pe onposi piti pailele potei, le pe onposi piti pesio towa lite Jisas Krais kolo olo.  
\v 22 Le ise isotei yuluwo wai lele fei, le ise retai le metine teingi. Le lireiki ki wepi wesio towa watafei ninge nele lire yaitei lele lepe, le ku wepi wesio towa piti ma mete wuru pulpope il teingipe pite Krais.  
\v 23 Ki so onposi kirpolo ma kaisi Timoti frou le lulise wem ki kretai piti pe ma polomen pireiki, pe ma waiki moingi lo pe ma pusaiki naro ke yawi, fei wala kironom.  
\v 24 Le ki kretai Apa Ili miso kaneiki le ki kutei miso frou ke kulise.   
\s1 Epafroditus ma le Filipai  
\p
\v 25 Ki onposiepe pato poporo piti ki ma kaisi line winke louku Epafroditus nou le ise. Le lireiki wepi wesio towa re, lireiki wepi lolpo wire moingi re, le le wuso ise yaltei lau piti ma kaneiki lepe.  
\v 26 Le onom neilo piti ma nou lulise yeflipiye, le le onom moinginetei wusoli ise kapi il piti le wuso kainu lepe.  
\v 27 Le kainu punkom le wem lirowo malfem piti ma la, le wuso le la, ki ma onom onetei. Wolo Ma Ili onom manowo, le ki re, Ma Ili onom maneiki piti kanowo namin ratei so ki onom one kolo.  
\v 28 Ki kirkilau onposi piti ma kaisi nou le ise soma wem ise yuluwo, ise ma nou enke teingipe, le ki re ma onom flo.  
\v 29 Kesi yaltei isotei wusoli le line winke leise piti yepi yulpowo Apa Ili, le ise enke teingipe. Mete watafei le lepe, ise ma yailelepe re yulsipe,  
\v 30 wusoli le onposi lotei kolo olo. Le onposi towa lite Krais le wem latotowo malfem piti ma la wolo olo, le lileise tulum piti lesio towa fei lepei piti kaneiki ki wusoli ise olo yato fiyen.   
\c 3  
\s1 Ku ma mingowo Krais, le topo olo ku mingowo kolo  
\p
\v 1 Piti ma kirpei il kapulu ki kirpeise ise ilim winkem peiki kolpepei, Ma Ili miso lirkilau waise enke teingipe. Le wuso ki ma nou kaptei il kingiepe elpesipe wuso kinu kaptei pepe, onom peiki ma one kolo, le ki onposi wuso ki kolpepe pepe ma kaneise piti yile singe.  
\v 2 Ise ma kotopa isotei yire mete piti pingiepe il olpe pepe. Pe watafei pelem, pe onposi piti ma pirkilau yeftuwepe mete piti ma paploupe topungou pelpe.  
\v 3 Pe olo, ku so Ma Ili lulpouku ku wata pirpolo ku maploupe topungou pouku punkom wusoli Riri lite Ma Ili lele, le kanouku piti rautuwo Ma Ili, le ku enke teingipe piti mingowo tisi lite Krais Jisas. Ku mulpo piti maploupe topungou pouku kolo olo wusoli tisi lepei, pe lelpe pingowo piti rautuwo Ma Ili pinge topo yuwei yawi, le ku ma mingepe kolo olo.  
\v 4 Ki onposi tisi liti maploupe topungou pepe, le ki miso kulpo. Le wuso metine minele lulpo lirpolo tisi fei lepei miso kanowo, ki ma kirpei kolo pepei, tisi fei lepei ki kingowo fei.  
\v 5 Ema nilaiki le epli wem pire eti plen poungo te twinges kari wem piti ema nilaiki lepe, pe palowi topo leiki. Ema re eiya meiki, me mite Israel le me roum milaiki. Ki lite alpe lite Benjamin le eiya mani peiki, pe pite Hibru, le ki teluwi alpe lite Hibru. Piti mingiepe il lipi pite Juda pepe, ki kingiepe pite alpe lite Farasi,  
\v 6 le ki onposi kirkilautei piti ma kesio towa lite Ma Ili le ki min so kosiepe mete wuso pulpowo Jisas pepe. Ki kingiepe il piti paitei il lipi pite Juda, le ki onposi kirpolo ki kingiepe koporo le ki metine teingi.  
\v 7 Wolo men nange wuso ki onposi kirpolo pe ma kaneiki pepe, fei olo pe kaneiki kolo wusoli ki fei kingowo tisi lite Krais.  
\v 8 Menmen wuso ki kinu kingiepe pepe le men nange eryai pepe, ki onposi pe miso kaneiki kolo olotei wusoli menmen teingipetei piti ki ma kretape pepe, ki ma kretai kolpepei, Krais Jisas le Ili leiki. Ki onposio Krais Jisas le ki so tounga pesipe menmen piti kinu kingiepe pepe le ki onposiepe kolpepei, pe olo olpe misiri. Ki kolpepei soma ki kesio Krais loteteiye lultei onom peiki,  
\v 9 le ki ma kulsi le loteteiye. Ki ma nou onposi kirpolo ki fale teingi tuwopou wem ki kingiepe il lipi pepe lom? Olo ki ma nou onposi kolpepe kolo oloye. Ki fei kingowo tisi liti kulpowo Krais le ki ma fale teingi tuwopou. Ma Ili lotei kosaiki tisi fei lepei liti ma fale teingi tuwopou kiri le lotei wem ki kulpowo Krais Jisas.  
\v 10 Ki onposi piti ma kretape menmen nempleiye fei pepei, ki onposi piti ma kingiepe wai pite Krais wem le la le Ma Ili nou leila lepe, le ki ma kilape moingi re ka kasiepe watafei Krais lotei.  
\v 11 Ki onposi kolpepei wem ki ka re, Ma Ili miso nou leilaiki namin kratei.   
\s1 Ku ma mile singe, le ku ma mingowo Pol  
\p
\v 12 Ki kirpei kolo ki wala retawo wai lite Krais Jisas koporo kolo olo, le ki wala fale teingi watafei le lotei lepe re kolo olo. Wolo ki kirkilau kingowo wai lele piti ki ma fale kire metine lele wusoli le keiniki.  
\v 13 Ilim winkem peiki, ki kirpei punkom. Ki wala kingiepe wai pele koporo kolo olo, le ki kingiepe menmen nempleiye fei pepei. Wai peiki piti kinu kingiepe pepe, ki ma nou onposiepe kolo olo, kirepe onomye, le ki ma lupoluwepe piti wala yeflipi pepe, kirkilau kingiepe kilape ke ke ma fale kapi menmen teingipetei pepe yo fei kaltei yef.  
\v 14 So ki ma weitei onposiepe fei pepei piti ma kapi, ki onposi piti ma ke yuwei kali nempi liti ratei kingi wem wem, nempi wuso Ma Ili linaiki piti ma kulsi Krais Jisas le ki ma kali nempi fei lepei lepe.   
\p
\v 15 Ku wuso mirkilau mulpowo Krais Jisas pepe, ku yeflipiye ma onposiepe wai nempleiye fei pepe piti ma mingiepe. Le wuso ise ilepe onposiepe nemple, Ma Ili miso kosaise liripe fei pepei.  
\v 16 Wolo il wuso ku kapi fei le ku mingiepe milape mau mau fale wem fei lepei lepe, il elpesipe pepe ma ku mirkilau mingiepe milape me.   
\p
\v 17 Ilim winkem peiki, ise yingiepe wai peiki. Ku mingiepe tuwopou piti ise ma yafouku yepe, so ise lupoluwepe mete wuso pingiepe watafei ku pepe le ise yiniepe.  
\v 18 Ki kinu kirpeise wem wuru kiripe menmen fei pepei, le fei ki ma nou kirpeise kasiepe le ki lus tipe falele. Kirpeise kolpepei, mete wuru wala pingiepe wai pelpe piti pinu le pe fale pire mete eringi pite Krais wuso la laitei nimpe lepe.  
\v 19 Pe ma pe uf oli liti pila moingi wusoli pe onposiepe menmen piti pailele topo tale lelpe potei le pe rautuwepe watafei ma ili lelpe lepe. Menmen fei pepei pepe, wem mete rautuwepe, pe ma topungou olpe pasi potei, wolo mete fei pepei pe olo topungou olpe kolo olo. Pe onposiepe men nange piti tef fei lepei pirkilautei.  
\v 20 Ku olo pite uf teingi lato yuwei, le ku mratei mungario metine piti ma lato yuwei laule kanouku, metine fei lepe, le Apa Ili Jisas Krais.  
\v 21 Le ma weisipe topungou olpe pouku pepei, topungou olpe toulipi le pe olpe piti ma pa porworo, le ma weisipe fale teingipe singe watafei le pele lotei. Le ma liripe singe pele pepe piti ma weisipe laptei lotei le le ma luntoluwepe.   
\c 4  
\p
\v 1 So ilim winkem peiki, ise olo peikitei le ki onposisetei piti ma nou kulise. Ise yirine onom peiki teinginetei, le ki rautu kutei kireisetei. Min polpepei so ilim winkem peiki, ise ma yile singe piti yingowo Apa Ili.   
\s1 Ku ma onom nenpeiye  
\p
\v 2 Yuodia re Sintike, roum yingitei, ise roum ma yesiene onom nenpeiye piti yulpowo Apa Ili watafei ise roum liyo re winke meme.  
\v 3 Le ye towane leikitei lepe, ye re ki kirpei keiteiye piti ma kanieme nimoure wiem meme, wusoli me roum mirkilau mesio towa mireiki ki piti mepi mirpepe mete wuru mire il pite Krais Jisas. Le Klemen re, liripe towane peiki yeflipi pepe, pe wuso nange pelpe olo puwo yousi pite Ma Ili pele piti pe ma pratei pingi wem wem.   
\p
\v 4 Ise wem oli oli enke teingipe yasio Apa Ili. Ki ma nou kirpeise kapwonou kolpepei, ise enke teingipe.   
\p
\v 5 Mete yeflipiye ise ma yailelepe yire enke malye. Wem lire kurauye Apa Ili ma nou lau.  
\v 6 Ise enke olpe yire men nange kolo olo, wolo menmen wuso ise olo pepe, ise yeletei Ma Ili yiripe le ise enke peise ma teingipe yiri wem ise yeletei.  
\v 7 So onom malye piti Ma Ili pele wuso mete piti tef olo miso pretane kolo olotei, onom malye pite Ma Ili nepe miso nailelepe re kotopape enke re falongou peise wem ise yulpowo Krais Jisas.   
\p
\v 8 Ilim winkem peiki, ki ma kirpei il kapulu kolpepei, il menmen piti teingipe tuwopou, il punkom, il piti ma waise nange teingipe le piti ma pailelepe enke pite mete nemple, il teingipe fei pepei pepe soma ise yirkilau yesiepe pultei enke re falongou peise pepe.  
\v 9 Il men nange wuso ki kirpeise re kosaise piti ma yingiepe pepe, ise yingiepe watafei ki kosaise pepe. Le Ma Ili wuso wauku enke malye pepe, le miso lireise ratei.   
\s1 Pol kapi menmen wuso pe watowo, le le onom teingine  
\p
\v 10 Ki onom teinginetei kasio Apa Ili, wusoli ise nou kosaiki piti ise wala onposiki. Ki kretai ise onposiki, wolo nempis tisi men ma ise kaneiki, olo, le fei ise kaneiki.  
\v 11 Ise ma onposi yirpolo ki kirpei il fei pepei wusoli men nange piti ki kesiepe piti ma kane kutei kiripe pepe, ki olo lom? Olo, menmen pepe ki kesiepe pireikiye. Wuso ki kesiepe menmen lo olo ki kane kutei.  
\v 12 Ki kretai wem ki menmen olo, le ki kretai wem ki menmen wuru kesiepe pireiki. Ki kretai piti ki ma onom teingine wem ki kaplei oweli peilaiki lo ki olo nimpi neiyeiki, ki kesiepe menmen wuru lo olo ki kesiepe yaipiyeye, menmen fei pepei pepe olo faleiki re kingitepe fei, le ki kretape. Liso wem ki linei linei ke, ki onposi piti onom peiki ma teingine nolpepe.  
\v 13 Ki olo onom one kolo olo wem menmen fei pepei faleiki, wusoli Krais olo waiki singe fei piti ma kire kesipe men nange fei pepe.   
\p
\v 14 Wolo teingipitei ise kaneiki wem moingi wuso faleiki pepe.  
\v 15 Ise piti Filipai, ise isotei retai yoporotei wuso wem ki kusa tef liti Masedonia, epli wem pinutei piti ki keptalo Il Teingipe pepe, ise isoteiye so kaneiki yire era re menmen kumpu pepe.  
\v 16 Ise kaneiki wem wuru wem ki kratei Tesalonaika, le ki era olo, ise yaptei pe waiki.  
\v 17 Ki onposi piti ise ma waiki menmen yaupe kolo olo, wolo ki onposi piti ise ma yirkilau yingiepe le nange leise ma fale ili.  
\v 18 Ki so kaptei il pepei kirpeise kire onom teingine peiki wusoli menmen yeflipi wuso ise yaptei watowo Epafrodaitus piti lilape lau waiki pepe, olo lau waiki fei. Le ki onom teingine, pe fei pireikiye. Menmen peise wuso waiki pepe, pe pirine onom peiki teinginetei watafei siye wuso ku meptawio Ma Ili le le onom teingine lasiepe pepe.  
\v 19 Le Ma Ili leiki wuso ki kesio towa lele lepe, le men nange pele olo wurutei le le miso lupingio Krais Jisas le le miso lirkilau kaneise lire menmen wuso ise olo pepe.  
\v 20 Ku meila nange lite Ma Ili, le Eiya louku, meila nange lele wem oli oli. Punkomtei.   
\s1 Pol laptei wem teingi lele  
\p
\v 21 Ki kirpei wem teingi leiki le nimoure mete yeflipi pite Ma Ili pele le pe wuso pulpowo Krais Jisas pepe. Ilim winkem wuso pireiki mepi ratei lepei lepe, pe pirpei wem teingi lelpe le ise.  
\v 22 Mete pite Ma Ili pele wuso pratei lepei lepe, pe piti pratei winem ili lite moli ili lite Rom lepe, pe yeflipiye pirpei wem teingi le ise.   
\p
\v 23 Apa Ili Jisas Krais miso onom maneise ise yeflipiye.