\id HEB - Olo NT [ong] -Papua New Guinea 1997 (web version -2014) \h Hibru \toc1 Il pe mete pite Hibru \toc2 Hibru \toc3 Hib \mt1 Il pe mete pite Hibru \c 1 \s1 Ninge lite Ma Ili lele lotei lirpouku lire il pite Ma Ili \p \v 1 Sungoi Ma Ili lunkuwepe mete emarengi le le watepe il piti pirpepe manre yaire pouku. Wem ulel wuso lepe, Ma Ili lingiepe tisi wuru piti lirpei kosape manre yaire pouku lire il teingelem nempleiye nempleiye, lato ma ompangiye lo, le ma lunkuwo metine nimou fei lepe le le ma watowo il piti lirpepe manre yaire pouku, wem oli oli, lolpepeye lato. \v 2 Wolo wem fei lepei le wem lingi piti Ma Ili ma nou kesipe mete re men nange laptei lotei, wem fei lepeiye lo Ninge lite Ma Ili lele lotei lirpouku lire il pite Ma Ili. Ninge lotei fei lepei Ma Ili liri piti laltei tef, teplai re men nange pepe, le le lotei so Ma Ili keiniyo piti luntoluwepe men nange pepe wem le laptei pe eti pite Ma Ili. \v 3 Ninge, le kosauku lire singe pite Ma Ili pele, le le watafei Ma Ili lotei, le il pele olo singe piti pesiepe men nange pratei tulum lelpe lelpe. Le la le teluwi pele noro kaptetei il olpe pite mete piti tef le Ma Ili ma nou onposiepe il olpe pelpe kolo oloye, wem Ninge lepe lolpepei re fei, le le yuwei lifei eti tilpi lite Ma Ili Singetei. \s1 Ninge kali nange ili linuwepe ririm pite yuwei \p \v 4 Ninge lite Ma Ili kapi singe lipi linuwepe ririm pite yuwei, min watafei nange wuso Ma Ili watowo lepe re, nange lepe olo ili linuwepe nange pite ririm pepe. \v 5 Min polpepei so Ma Ili lirpowo riri nele lele lite yuwei lepe, lirpowo fei lolpepei kolo olo, lirpowo lirpolo, \q1 “Ye ninge leiki, fei ki fale kire Eiya leiye.” \q1 Ma Ili lirpei lolpepei liri riri nele lele kolo olo. Lo le lirpei lolpepei liri riri nele re kolo olo wem le lirpei lolpepei, \q1 “Ki ma yaitei lele le le ma ninge leiki.” Olo. \q1 \v 6 Wem Ma Ili laltei ninge oru lele lau tef lepei le lirpei lolpepei, \q1 “Ririm yeflipiye pite Ma Ili pele ma rautuwo.” \q1 \v 7 Le ririm pepe Ma Ili lirpei lolpepei liripe, Ma Ili lirpolo, \q1 “Ma Ili watepe ririm pele singe wata pirpolo singe pite yuf, le mete piti pesio towa lele, le watepe singe wata pirpolo singe pite weli ili.” \q1 \v 8 Wolo Ma Ili nou lirpei liri Ninge lolpepei, \q1 “Ye Ma Ili, ye singe piti untoluwepe men nange wem oli oli, ye ingiepe il tuwopou wem ye untoluwepe mete re men nange pepe. \v 9 Ye onom nuwope il teingipe tuwopou piti mete ma pingiepe le ye onom pesipe il olpe. Min polpepei so ki Ma Ili leiye, ki keiniye le ki kirine onom peiye teingine wusoli ki keila nange leiye le yuwei inuwepe numuwi peiye.” \q1 \v 10 Ma Ili nou lirpei lasiepe lolpepei, \q1 “Ye Ili, wem linutei ye altei tef le ye ire eti peiye yotei ye altei teplai yuwei. \v 11 Pe ma pelesesa wolo ye ma ratei ingi wem wem. Pe ma weitei pire olpe tipingou wata pirpolo olongou olpe tipingou pepe. \v 12 Ye ma onwipe wata pirpolo ye onwipe olongou pepe, le ye miso nou aptei nemple yeflipi wata pirpolo ye nomplei olongou olpe tani le ye nou afo nemple teingipe yeflipi pepe. Wolo ye miso weitei fei olomen olomen kolo olo, le ye miso a kolo olo, ye ratei olpepe ingi wem wem.” \q1 \v 13 Ma Ili lirpowo riri nele lele re kolo olo, lirpowo fei lolpepei, \q1 “Ye ifei eti tilpi leiki lepei ungariki ma kaptei mete eringi peiye pratei ire peiye tef le ye ma olwepe apiri.” \p Olo, le lirpowo riri nele lolpepe kolo. \v 14 Le ririm pepe, pe minemple? Pe yeflipiye pe ririm piti pesio towa lite Ma Ili le le laisipe pau piti ma kaniepe mete wuso Ma Ili keiniepe laptei lotei piti ma pratei pingi wem wem. \c 2 \s1 Ma Ili kanouku piti ratei moporo le fei pepei olo teingipetei \p \v 1 Min polpepei so ku ma mirkilau mesiepe il punkom wuso mingitepe fei pepe, le ku molpepe soma ku ma kere mingowo tisi nele kolo olo. \v 2 Il wuso ririm pite yuwei peptalo pau manre yaire pouku pite sungoi pepe olo fale punkom, le metine minele piti lingiepe lo le lulpope kolo olo, Ma Ili watowo moingi alepe nimin. \v 3 Ma Ili naluku tisi piti le ma kanouku ratei moporo le fei pepe olo teingipetei. Le wuso ku lupingio tisi fei lepe kolo olo, le ku musa, ku molomen ma meinei nautepe moingi piti Ma Ili ma laptei falepe mete wuso pinpim il pele pepe, ma olo. Apa Ili lotei linu leptalo il lirpei lire tisi liti Ma Ili ma kanouku ratei moporo, le mete wuso pingitepe il pele pepe, pe pirpei kosauku pirpolo il fei pepe olo punkom. \v 4 Wem pe polpepe, Ma Ili reresipe il pelpe le le kosauku lire singe pele wem le laptei menmen lipi potei pire tute fale yaupe. Le singe pite Riri Teingi re, Ma Ili lotei lire onom pele le karipe watepe mete pele piti pe ma piripe piti pesio towa lele. \s1 Jisas, le metine piti linuku mingowo tisi liti Ma Ili ma kanouku ratei moporo \p \v 5 Mete wuso tounga pesi wai oli lelpe le pe pingowo tisi nele yefli piti ratei poporo, mete fei pepe Ma Ili laptei ririm pite yuwei piti ma puntoluwepe kolo olo, ki kaptei il kirpei kiripe mete wuso pusape wai olpe piti tef lepei le pe onposi piti pingowo tisi nele yefli liti pratei poporo, puwo nemple. Mete fei pepe Ma Ili laptei ririm pite yuwei piti ma puntoluwepe kolo olo. \v 6 Wolo il nemple piti paitei yousi pite Ma Ili, pe paptei pirpei polpepei, \q1 “Ko Ma Ili, mete walem pepe, pe minemple so ye ma onposiepetei pepe? Pe mete walem yaupe le piti men ma ye ailelepetei? \v 7 Wem kurauye ye aptei pesio towa leiye punkuwepe ririm pite yuwei, Ye watepe singe peiye le ye eilape nange pelpe pe yuwei, \v 8 le ye aptei puntoluwepe men nange yeflipiye.” \p Il fei pepe pirpei pirpolo Ma Ili laptei mete walem piti puntoluwepe men nange yeflipiye, pe pirpei kosauku alepe nimin polpepei, menele re lato ire pele kolo olo, men nange yeflipiye mete walem puntoluwepe. Wolo fei ku mulwepe mete walem puntoluwepe men nange yeflipiye kolo olo. \v 9 Wolo ku mretawo Jisas. Wem kurauye Ma Ili laltei lesio towa lele lunkuwepe ririm pite yuwei, le Ma Ili lolpepei soma le kosauku piti le onom manouku le le laltei Jisas lau piti ma la lungwouku ku mete yeflipiye piti tef. Le fei ku mretai piti Jisas la lungwouku ku mete piti tef le fei pepei, Ma Ili watowo singe pele le le leila nange lele le yuwei. \v 10 Men nange yeflipiye Ma Ili laptei le le laptei pratei tulum lelpe lelpe, le pe pato tuwopou piti Jisas ma kali nange ili wusoli le lila moingi wem le la lungwouku, le le lolpepei soma le ma kesipe eple wuru pite Ma Ili pele pepe, kesipe laptowo Ma Ili le pe ma kapi singe pele le pe ma pratei watafei le lotei. Wusoli Jisas lotei so linuwepe mete fei pepe piti pingowo tisi liti Ma Ili ma kaniepe pratei poporo. \p \v 11 Le la le teluwi pele noro kaptetei il olpe pite mete le pe fale teingipe tuwopou, le le liripe mete wuso teluwi pele kaptetei il olpe pelpe le pe fale teingipe tuwopou pepe, pe pepiye pite yaitei niliye. Min polpepei so Jisas topo tapune kolo, wem le linape lirpolo pe winkem pele. \v 12 Jisas liripe il wuso paitei yousi pite Ma Ili, liripe piti lirpowo Ma Ili lolpepei, \q1 “Ma Ili, ki ma kirpepe winkem peiki, kirpepe nomnaipe kire nange leiye, le wem pe panfinemple piti rautuye, ki ma keila nange leiye.” \p \v 13 Jisas liripe il nemple piti paitei yousi pepe, nou lirpei lolpepei, “Ki kulpowo Ma Ili punkom.” Le le nou liripe il nemple piti paitei yousi pepe lirpei lolpepei, “Yuntoli, ki min lepei kiripe mete wuso Ma Ili waiki pepe, pe watafei eple kumpu pite Ma Ili pele.” \p \v 14 So mete wuso le linape lirpolo pe eple kumpu pepe, pe mete walem, pe peltei topo tale le teluwi lingepe watafei mete walem eryai pepe, le Jisas lotei re, le metine wape watafei pe pepe. Jisas lolpepei soma wem le la, le ma weisipe singe pite Towa wuso laptei mete pa pepe. \v 15 Jisas lingowo tisi fei lepei piti ma kaniepe mete wuso wem oli oli pratei pire mol wata pirpolo menmen oli lile malfem piti ma kapi pepe wusoli pe olo turwepetei piti pa. \v 16 So fei pepei ma kosauku alepe nimin piti Jisas lau kaniepe ririm pite yuwei kolo olo, wolo il piti paitei yousi pite Ma Ili min pirpei polpepei, “Le lau kaniepe eple palye pite Abraham.” \v 17 Il pal fei pepei so Jisas olo nimou pite tef lepei nila le le leltei topo tale lite tef lepei watafei winkem pele pepe, le le lolpepe soma le ma onom manepe le le ma telpalo lesio towa lile onom pite Ma Ili piti kaniepe mete lire topo tale lele wata pirpolo le leltawi laltowo Ma Ili soma Ma Ili ma onom teingine le le ma nou onposiepe il olpe pite mete piti tef kolo olo. \v 18 Le fei, le miso kaniepe mete wuso Towa lempesipe ma puwalo tisi oli lepe, wusoli le lotei re Towa linu lempesesi wolo le luwalo kolo, le lile singe le le lila moingi. \c 3 \s1 Jisas kali nange ili linuwo Moses \p \v 1 So ilim winkem peiki piti mepi mulpowo Krais, le ise re wuso Ma Ili linaise pepe. Ise onposio Jisas wuso Ma Ili laisi lau piti lirpouku lire il yeflipi piti Ma Ili topwepe lapiri lirouku ku mete pele, le il fei pepe ku fei min mulpope re mingiepe pepe. Jisas lotei so lile onom pite Ma Ili le le lesio towa piti kanouku. \v 2 Ma Ili keinio piti lesio towa fei lepei le le telpalo lingiepe il pite Ma Ili, min watafei Moses, le telpalo lingiepe il pite Ma Ili piti luntoluwepe mete pite Ma Ili pele. \v 3 Wolo Jisas kali nange ili linuwo Moses, min watafei metine piti lesio winem, metine lotei ma mete nemple pirpei peila nange lele piti lesio winem fei lepe, le winem olo, le winem yawi le mete ma peila nange lele kolo. \v 4 So winangou re mete pesiepe, wolo men nange yeflipiye Ma Ili pele laptei. \v 5 Moses, le metine piti lesio towa lite Ma Ili, le le lirpei liripe menmen piti wem lingi Ma Ili ma lirpei. Moses telpalo lingiepe il pite Ma Ili le le luntoluwepe mete pite Ma Ili pele wata pirpolo le luntoluwo winem lite Ma Ili lele. \v 6 Wolo Krais, le ninge lite Ma Ili le le telpalo lingiepe il pite Ma Ili piti luntoluwepe mete pele wata pirpolo le luntoluwo winem lite Ma Ili lele lepe wusoli le ninge lite Ma Ili. Ku watafei winem lite Ma Ili lele, le wuso ku ma topo weli piti mile singe le ku mirkilau mulpowo Krais, wem lingi ku ma kapi men nange teingipe wuso ku onom natope piti ma kapi pepe. \s1 Uf tef liti mete pite Ma Ili pele ma pe pratei paltei yef \p \v 7 So min watafei Riri Teingi lirpei lepe wem le lirpei lolpepei, \q1 “Wuso fei ise yingitepe il pite Ma Ili, \q1 \v 8 enke peise ma paungei kolo olo, min watafei yaire manre peise, enke pelpe paungei le pe purawo Ma Ili. Yaire manre peise wem pe pratei tef oli era re telmaneye yawi lepe, pe pinpim il pite Ma Ili le pe pila pusa pirpolo ma puluwo piti le Ma Ili punkom lo olo.” \q1 \v 9 Ma Ili lirpei lolpepei, \q1 “Tef oli era re telmane ye yawi lepe, yaire manre peise pilaiki pusaiki pirpolo ma puliki piti ki Ma Ili punkom lo olo, le eringi wuru (40 yia), ki kosape kire menmen lipi wuru wolo olo, pe pulpoiki kolo wusoli enke pelpe olo paungei. \q1 \v 10 Il pal fei pepe so ki onom kotu kasiepe mete fei pepe le ki kirpei kolpepei, ‘pe wem oli oli telpalo piti papteiki mingim kolo olo, le pe pinpim il peiki.’ \q1 \v 11 Ki onom kotu le ki topwepe il kapiri kirpolo ‘uf tef liti pe ma pe pireiki mepi ratei maltei yef lepe, pe ma pe kolo olotei’.” \p \v 12 So ilim winkem peiki, ise kotopa isotei piti nele leise re ma onom pele naungei kolo le le ma linpim il pite Ma Ili kolo soma le ma tounga pesi Ma Ili kolo, le Ma Ili piti ratei lingi wem wem. \v 13 Epli wem oli oli ise ma kane nemple piti wai nemple topo weli le ise kali wem yaltei yawi kolo, wusoli il wuso pirpei pirpolo “Fei,” pe pirpei piri epli wem fei lepe. Il wuso ise yulpope pepe ise ma yingiepe yirpei piti yeila nemple enke soma nele leise re ma onom pele naungei kolo, le il olpe ma pempesesi piti linpim il pite Ma Ili kolo. \v 14 Ku ilepe wane piti mire Krais mepi mesio towa le wuso ku mirkilau mingiepe il wuso wem linu ku mulpope le ku weitei yefi, mirkilau mingiepe me me fale wem ku ma, Ma Ili ma wauku menmen teingipe wuso le linu lirpei piti ma wauku pepe wusoli ku pite Krais. \p \v 15 Il piti paitei yousi pite Ma Ili min pirpei polpepei, \q1 “Wuso fei ise yingitepe il pite Ma Ili, enke peise ma paungei kolo olo, min watafei yaire manre peise, enke pelpe paungei le pe purawo Ma Ili.” \p \v 16 Minemple pingitepe il pite Ma Ili wolo pe purawo? Mete wuso Moses linuwepe pusa Isip le pe pe tani, pe yeflipiye purawo Ma Ili. \v 17 Eringi wuru pepe (40 yia), mete minemple so Ma Ili onom kotu lasiepe pepe? Ma Ili onom kotu lasiepe mete wuso pingiepe il olpe le pe puwalo pa pato tef oli era re telmaneye yawi lepe. \v 18 Ma Ili topwepe il lapiri wem le lirpei lolpepei, “Pe ma pe uf tef wuso ki ma watepe piti ratei paltei yef lepe kolo olo, pe ma pe kolo.” Ma Ili lirpei liripe mete minemple? Le lirpei liripe mete wuso pinpim il pele pepe. \v 19 So ku fei mretai piti pe pe uf tef wuso Ma Ili watepe lepe kolo, uf tef wuso Ma Ili lirpei piti pe ma pe pratei paltei yef, wolo pe pe fale uf tef fei lepe kolo wusoli pe pulpowo Ma Ili kolo olo. \c 4 \p \v 1 Le fei, il wuso Ma Ili topwepe lapiri lirpolo ma ku ma me \p miri mepi ratei maltei yef lepe, il fei pepe wala pile singe. So ku ma kotopa kutou soma nele leise re ma kere lato kolo, wolo ku yeflipiye ma me uf tef liti ratei maltei yef. \v 2 Ku mingitepe Il Teingipe pite Ma Ili wuso pirpei pire uf tef lite ku ma me ratei maltei yef, le min watafei mete wuso pusa Isip le pe pe tani lepe, pe re pingitepe il pepei fei. Pe pingitepe, wolo il pepe olo kaniepe kolo wusoli wem pe pingitepe il pepe, pe pulpope piti kapi pesiepe re pingiepe kolo olo. \v 3 Le ku piti mulpope il pepe, ku ma me mire Ma Ili ratei maltei yef. Min watafei Ma Ili lirpei lepe wem le lirpei lolpepei, \q1 “Ki onom kotu le ki topwepe il kapiri kirpolo, ‘uf tef liti pe ma pe pireiki mepi ratei maltei yef lepe, pe ma pe kolo olotei’.” \p Ma Ili lirpei il fei pepei wolo le olo pele linu onposiepe fei piti ma wauku uf tef nele liti mratei maltei yef, le pele linu onposiepe fei wem le laltei tef, teplai re men nange pepe. \v 4 Il nemple piti paitei yousi pite Ma Ili lepe, pe pirpei pire epli wem wuso Ma Ili laptei men nange yalipe le le ratei laltei yef lepe. Il pepe pirpei polpepei, “Epli wem pire eti plen poungo le nele piti lire eti kera pite eti plen lepe, pe epli wem piti le lesio towa lele piti laltei tef, teplai re men nange pepe, le epli wem piti lire eti teingine pite eti plen lepe (7 dei), le epli wem piti Ma Ili ratei laltei yef.” \v 5 Il nemple piti paitei yousi pepe re pe pirpei pire wem liti Ma Ili ratei laltei yef. Il pepe Ma Ili lirpei lolpepei, “Pe ma pau pireiki mepi ratei maltei yef kolo olotei.” \v 6 So mete wuso pinu pingitepe Il Teingipe pite Ma Ili wuso pirpei pire uf tef nele teingi lite ku ma me ratei maltei yef lepe, mete fei pepe olo pe pire Ma Ili pepi ratei paltei yef kolo olo wusoli pe pulpowo Ma Ili kolo. Wolo mete ilepe Ma Ili lusape pe piri pepi ratei paltei yef. \v 7 So Ma Ili ma lusape mete ilepe pe piri pepi ratei paltei yef le fei pepei ma kosauku punkom piti Ma Ili onposio wem nele, wem le lirpei liri lirpolo “Fei.” Eringi wurutei pautu re fei Ma Ili lunkuwo Devit le le watowo il piti lirpei liri wem fei lepe le il wuso Devit lirpei pepe olo paptei paitei yousi piti Sam le ki min kinu kirpeise pepe. Il pepe pirpei polpepei, \q1 “Wuso fei ise yingitepe il pite Ma Ili, enke peise ma paungei kolo olo.” \p \v 8 Josua linuwepe mete pite Israel pe fale Kainan, tef wuso Ma Ili linu lirpei piti ma watepe lepe. Wolo tef lepe Ma Ili onposi piti watepe liti ma pratei paltei yef kolo olo, liso Ma Ili nou lirpei lingi lire wem nele. \v 9 Min polpepei so wem nele wala lato piti mete pite Ma Ili pele ma pratei paltei yef poporo watafei Ma Ili lotei wuso epli wem pire eti plen poungo le nele piti lire eti kera pite eti plen lepe, le lesio towa lele piti laltei tef, teplai re men nange pepe, le epli wem piti lire eti teingine pite eti plen lepe (7 dei), Ma Ili ratei laltei yef. \v 10 So wem metine le lire Ma Ili ratei laltei yef, metine lepe, le ratei laltei yef wusoli le lesio towa lele yali fei. Min watafei Ma Ili lotei, wem le lesio towa lele piti laltei tef, teplai re men nange pepe, wem towa lele fei lepe yali, le ratei laltei yef. \v 11 Ku re ma mirkilau onposi piti ma me mire Ma Ili mepi ratei maltei yef. Ku minele re ma linpim il pite Ma Ili kolo olo, min watafei manre yaire pouku piti sungoi, pe pinpim il pite Ma Ili le pe pe piri pepi ratei paltei yef kolo olo, wusoli le onom kotu lasiepe le le losiepe pa pato tef oli era re telmane ye yawi lepe. \p \v 12 Il pite Ma Ili pele olo singe rasipe le pe pile pingi wem wem. Il pepe olo kimplipetei. Werau piti nel linge mingelem plen plen lepe, le miso lalowi metine topo le lengleipe numkufur re emingelem yaruwepe poungo. Wolo il pite Ma Ili pele olo pirkilautei piti posiepe enke pouku leinginim le pe miso kari riri tani nempi louku. Il menemple kumpu piti kotire pato enke pouku leinginim re wolo pe miso pato kotire kolo olo, wusoli il pite Ma Ili pele miso pirpei nomnaipe piti ku onposiepe il teingipe lo il olpe piti mingiepe. \v 13 Menele kumputei re miso lato kotire tani lutepe pite Ma Ili kolo olo. Men nange yeflipiye wuso Ma Ili pele laptei pepe olo pratei lutepe pele alepe nimin, le ku yeflipiye ma mirpowo mire wai louku fi fi. \p \v 14 So ku metine piti lesio towa lile onom pite Ma Ili piti kanouku pepe, le olo lunwei le yuwei fei. Metine fei lepe, le Jisas, ninge lite Ma Ili. Liso ku ma mirkilau mesiepe il wuso ku mulpope piti mingiepe pepe. \v 15 Ku enke pouku olo singe kolo, le ku wem oli oli muwalo tisi oli liti mingiepe il olpe. Wolo metine louku piti lesio towa lile onom pite Ma Ili piti kanouku pepe, le olo onom manoukutei wusoli le lotei re Towa lempesesi piti ma laltei luwalo tisi oli watafei ku pepe, wolo olo, le lile singe. Le lingiepe il nemple olpe re kolo olotei. \v 16 So ku ma topo weli piti me malfem mire Ma Ili le le ma onom manouku. Ku ma meletei piti kanouku wusoli le onom manoukutei, le wem moingi falouku, le ma kanouku. \c 5 \p \v 1 Mete pite Israel wuso pesio towa liti pinuwepe ilepe wane pelpe piti peptawio Ma Ili siye pepe, Ma Ili keiniepe piti kaniepe mete pepe piti paptei oweli re peptawi siye paptowo Ma Ili soma le ma onom teingine lasiepe le le ma nou onposiepe il olpe pelpe kolo olo. \v 2 So metine wuso Ma Ili keinio piti linuwepe ilepe wane pele piti kaniepe leptawio Ma Ili siye pepe, metine lotei fei lepe re onom pele olo singe kolo, wolo le ausi lanri onom pele le le onom malye lasiepe mete wuso pire wouye le pe pingiepe il olpe pepe. \v 3 Le wusoli le lotei re onom pele olo singe kolo, le ma leptawi siye piti kaniepe mete pele le le lotei re ma leptawi nemple pele laptowo Ma Ili piti kane lotei soma il olpe pele re Ma Ili ma nou onposiepe kolo olo. \v 4 Metine nele re keini lotei piti lesio towa ili piti linuwepe leptawio Ma Ili siye pepe kolo olo, le keini lotei kolo. Ma Ili lotei linawo piti laltei lesio towa lele piti linuwepe ilepe wane pele piti leptawio Ma Ili siye, min watafei Aron, Ma Ili lotei linawo piti laltei lesio towa lele. \p \v 5 So Krais re, le keini lotei piti lesio towa ili lile onom pite Ma Ili piti kaniepe mete kolo olo, le keini lotei kolo. Wolo Ma Ili lirpowo lolpepei, \q1 “Ye ninge leiki; fei, ki kirpei nomnaipe piti ye ma ileiki tulum piti untoluwepe mete re men nange pepe.” \q1 \v 6 Il nemple piti paitei yousi pite Ma Ili, pe re pirpei polpepei, \q1 “Ye ma wem oli oli esio towa ile onom peiki piti kaniepe mete le ye ma esio towa fei lepei inio Melkisedek.” \p \v 7 Wem Jisas ratei tef lepei, le lirkilau leltei Ma Ili, malfefi re louti lirpowo piti kanowo wusoli Jisas retai piti Ma Ili olo singe le le miso weisipe enke pite mete le pe ma petesi la kolo. Jisas lire yape le le onposi piti ma telpalo lingiepe il pite Ma Ili soma le ma kanouku ku mete pite tef, le fei pepei, Ma Ili laptowo mingim le le watowo singe piti la lungwouku. \v 8 Jisas, le ninge lite Ma Ili, wolo le onposi piti laptei mingim wem le lingiepe il pite Ma Ili piti ma lila moingi ili lirouku ku mete piti tef. \v 9 Wem Jisas lingiepe il pite Ma Ili pele le laptu, Ma Ili laltei piti kaniepe mete wuso paptei mingim le pe pulsi Jisas. Ma Ili laltei Jisas piti ma kaniepe mete fei pepe piti kali nempi nele liti pratei pingi wem wem, le pe ma pire Jisas pepi puntoluwepe mete re men nange pepe. \v 10 Jisas miso kanouku wusoli Ma Ili lirpei nomnaipe liri lirpolo le ma lesio towa lile onom pite Ma Ili piti kanouku, le Jisas ma lesio towa fei lepe linio Melkisedek. \s1 Ise yulpowo Krais fei, so ise ma yusa kolo \p \v 11 Ki onposiepe il wuru piti ma kirpeise kire Krais wuso lesio towa lile onom pite Ma Ili piti kanouku pepe, wolo ki onposi il pepe olo moingipetei piti ki ma kirpei namplise wusoli ise olo yire foringou piti yaptei mingim. \v 12 Ise yulpowo Krais wem ulel fei piti ise ma fale yire mete piti namti yeptalo mete nemple yire il wuso ise yulpope pepe, wolo ise onposi yirpolo ma metine nele soma lau leitaloise lire il elpesipe pite pinu wem ise yingitepe le ise weitei yefi, il wuso Ma Ili lirpei piti laltei Krais lau le le ma kanouku fei lolomen. Wolo ise wala weitei yire eple kumpu, le ise wala yaplei nimer le oweli kimplipe pepe wala ma yaplei kolo. \v 13 Metine piti onposi lirpolo ma nou lingitepe il elpesipe pite pinu wem le lingitepe le le weitei yofu, metine fei lepe le wata pirpolo le ninge kumpu le le wala ma nou lintame nimer piti ma lamei. Le wala onposi loporo kolo, le le miso kapi il laptei piti pe teingipe lo pe olpe kolo, olo wala lire wouye. \v 14 Le oweli kimplipe pepe, mete lipi singe soma paplei oweli fei pepe wusoli pe peitalo potei piti paplei pingitepe le pe onom teingine pasiepe. Min watafei mete piti pirkilau pulpowo Krais, pe ma pingiepe il elpesipe pite pinu pepe, pingiepe pirpei pato fei polpepe kolo olo, wolo pe peitalo potei piti kapi il wuru nemple nemple, kapi paptei le pe miso pretai piti il menmen pe teingipe, il menmen pe olpe. \c 6 \p \v 1 So ku ma mingiepe il elpesipe mirpei mato fei molpepe kolo olo, il pite Krais wuso minu mingitepe le ku weitei yefi pepe, ku ma esi mapo paitei le ku ma rapope il kimplipetei pepe soma kapi mesiepe re mingiepe mapwonou. Ku ma nou meilape il elpesipe pite pinu pepe, meilape mirpei mato fei molpepe kolo olo, il piti ku tounga pesipe wai olpe pouku wuso ku minu mingipepe le ku ma ma masiepe pepe, le il piti ku ma mulpowo Ma Ili fei molomen, \v 2 il piti mirpei mire tisi liti kaptetei mete le ku meptalo esi puwope wem ku meletei Ma Ili piti watepe Riri Teingi, il piti mete wuso pulpowo Krais le pe pa pepe, pe ma nou peilo kali topo nele peltei piti ratei pingi wem wem, le il piti Ma Ili ma kapi il laptei lirouku ku mete yeflipiye le mete wuso pite Krais pele kolo pepe, Ma Ili ma laisipe pe tanio le pe ma pila moingi wem oli oli. Il fei pepei ku ma mingiepe mirpei mato fei molpepe kolo olo. \v 3 So ku ma esi mapo paitei le ku ma kete ire monglo me piti kapi il kimplipe piti ku ma retai moporo mire tisi liti ku ma mingowo me Ma Ili. Ma Ili onom pele, wuso le lusauku piti mingiepe fei molpepe, ku ma mingiepe. \p \v 4 Ki kirpei il pepei wusoli mete wuso weitei yofu fei wolo pe tounga pesi Ma Ili le pe nou pe pingiepe wai olpe pelpe pite pinu pepe, mete fei pepe, pe polomen ma nou weitei yofu piti nou kani onom pantowo Ma Ili? Ma olo. Pe pingitepe il pite Ma Ili fei le pe pulpo pirpolo il pepe olo punkom. Pe kapi menmen teingipe piti paule Ma Ili le pe kali Riri Teingi fei. \v 5 Pe pulwepe re pretai fei piti il pite Ma Ili olo teingipe, le pe puluwo wem teingi liti Ma Ili ma luntoluwepe mete pele wusoli Ma Ili reresipe il pele le le kosape lire singe pele wem le laptei menmen lipi potei pire tute fale yaupe pepe. \v 6 Mete fei pepe, pe pulwepe menmen teingipe falepe fei, wolo pe tounga pesi Ma Ili le pe nou pompetepe wai olpe pelpe piti tef lepei, nou pe ma pingiepe. So tisi men ma ku kaniepe piti pe ma nou weitei yofu le pe ma nou kani onom pantowo Ma Ili, olotei, wusoli pe wata pirpolo pe nou tingeli Ninge lite Ma Ili lele laitei nimpe le pe wata pirpolo pe peilape mete enke piti ma palwe oli pelesi lepe. \p \v 7 Tef wuso nef nualo kaltei lepe Ma Ili lailolowo piti mete ma papiri oweli le wem oweli poungo, mete wuso papiri pepe pe ma paplei oweli fei pepe. \v 8 Wolo tef wuso wolo re foiye singu yaupe pirkilau fale pratei pepe, tef fei lepe olo oli le wem malfem Ma Ili ma lirowo niliye. \p \v 9 Le wuso ki ma kaptei il singe fei polpepei kirpeise kire mete wuso tounga pesi Ma Ili lepe, ise numuwi peikitei, ki kretai piti ise ma enke olpe kolo olo wusoli ise wala yingowo tisi teingi liti Ma Ili ma kaneise piti kali nempi liti ratei yingi wem wem. \v 10 Ma Ili olo teingi tuwopou. Le wai leise piti onom puwol Ma Ili, le ise yingiepe piti kaniepe ilim winkem re ilepe wane peise piti yepi yingiepe il pite Krais, towa teingi leise fei lepe Ma Ili miso onom pete il liri kolo olo. \v 11 Ki onpositei piti ise niliye niliye ma yirkilau kani onom yantei piti ma ye fale kapi menmen teingipe wuso ise onom natope piti ma kapi pepe, wusoli Ma Ili ma waise punkom wem ise yapiri enke peise le ise telpalo yingiepe il pele ye ye fale wem ise ya. \v 12 Ki kinaulo piti ise ma yire foringou, wolo ise ma kosai isotei watafei ise mete piti yire punkom yulpowo Ma Ili, le ise yapiri enke peise piti ratei yungariepe menmen wuso Ma Ili lirpei piti ma waise pepe. \s1 Il menmen wuso Ma Ili lirpei piti ma lingiepe pepe, le ma lingiepe punkom \p \v 13 Wem Ma Ili topwepe il lapiri lire Abraham, le lire il singe lirpei piti le ma lingiepe il pele fei pepe. Minele re singetei linuwo Ma Ili lotei kolo olo, liso Ma Ili leisi nange lele lotei piti ma lesiepe il wuso le topwepe lapiri lire Abraham pepe, pe ma pile singe. \v 14 Ma Ili lirpowo Abraham lolpepei, “Ki kirpei punkom piti ki ma kaileleiye re kuntoliye le ki ma waiye eple palye wuru.” \v 15 Abraham lanri onom pele le le ratei lungario Ma Ili piti ma lingiepe il pele, le le so lulwepe menmen fei pepe falowo punkom. \v 16 Mete walem pite tef lepei, wem pe pire il singe pirpei piti ma pingiepe punkom, pe ma pirpei peisi nange lite metine nele ili soma pe topwepe il papiri le pe ma nou pire il pura nemple kolo oloye. \v 17 Ma Ili onposi piti ma lirpei laptei alepe nimin piti kosape mete wuso le lirpei piti pe ma kapi menmen teingipe pepe, le pe ma pretai polpepei, il menemple le lirpei piti ma lingiepe, le ma lingiepe punkom wusoli le miso nou weitei onom kolo olo. Le le so lire il singe lirpei piti ma topwepe il lapiri le pe ma pile singe. \v 18 Il menemple wuso Ma Ili pele topwepe lapiri le le lire il singe lirpei piti ma lingiepe punkom, le miso nou weitei onom lasiepe kolo, le le miso lirpei lempetei kolo olo. So ku piti mompotowo Ma Ili piti le ma luntoluku pepe, ku ma retai punkom piti ku ma kapi menmen teingipe wuso ku onom natope piti ma kapi pepe. \v 19 Ku onom natope menmen teingipe fei pepe le ku ma mirkilau mesiepe enke pouku mapiri wata pirpolo nimpe firingi piti lesiene uweka lanri nuwo tulum niliyeye lepe. Ku onom natowo menmen teingi ma falouku le fei pepe, le wata pirpolo lesiene onom pouku lanri, le ku mretai piti le ma falouku punkom. Menmen ku onom natowo lepe, le Jisas, le linu le linki ranguwom wuso lultei winem lite Ma Ili lele ratei yuwei lepe, le le linki le leinginim lire Ma Ili lotei rounge tifei. \v 20 Jisas linu linki le lire Ma Ili rounge tifei piti ma kanouku. Jisas lesio towa lile onom pite Ma Ili piti kanouku le le ma wem oli oli lesio towa fei lepe linio Melkisedek. \c 7 \s1 Melkisedek lesio towa lile onom pite Ma Ili piti kaniepe mete \p \v 1 Melkisedek, le metine ili piti luntoluwo uf ili Salem, le le metine piti lesio towa lile onom pite Ma Ili Singetei piti kaniepe mete pratei pire enke malye. Wem Abraham liripe mete pele pe plolpo le pe posiepe mete lipi twinges te twinges piripe mete pelpe, Abraham liripe mete pele posiepe pa re fei, pe nou pau le Melkisedek le fale lerengawo, le le leletei Ma Ili piti lailolowo re luntoluwo Abraham. \v 2 Men nange wuso Abraham liripe mete pele kapi wem pe posiepe mete eringi pelpe pepe, men nange pepe Abraham karipe laptei tulum pire eti plen le plen poungo, le le kapi pite tulum niliye pepe watowo Melkisedek. Nange Melkisedek lepe, il pal twinges pirpei piri pirpolo “Metine ili piti lingiepe il teingipe tuwopoutei.” Le wusoli le metine ili piti luntoluwo uf ili Salem, il pal nemple pepe pe pirpei pire nange lele pirpolo “Metine ili piti luntoluwepe mete pratei pire onom malye”. \v 3 Minemple re pretame nimou re yaitei mite Melkisedek kolo olo, lo yaire manre pele piti pinu pepe re olo mironom. Ku mironom mire wem piti nimou nila le wem piti le la, olo mirowo onom. Wolo le watafei Ninge lite Ma Ili le le lesio towa lile onom pite Ma Ili wem oli oli. \p \v 4 So ise ma retai yolpepei, Melkisedek, le metine ili. Mani louku Abraham lepe, men nange yeflipiye wuso le liripe mete pele posiepe mete eringi pelpe le pe kapi pepe, mani Abraham karipe laptei tulum pire eti plen le plen poungo, le le kapi pite tulum niliye pepe watowo Melkisedek. \v 5 Le eple palye pite Livai wuso pesio towa liti peptawio Ma Ili siye pepe, il lipi pite Moses pirpei piti pe ma kapi oweli ilepe pite ilepe wane pelpe pite Israel, oweli wuso mete pite Israel ma karipe paptei tulum pire eti plen le plen poungo le piti tulum niliye lepe pe ma kapi watepe eple palye pite Livai pepe. Mete pite Israel, pe eple palye pite Abraham wolo pe ma karipe oweli ilepe watepe eple palye pite Livai. \v 6 Melkisedek, le ninge palyene lite Livai kolo olo, wolo le kapi oweli men nange wuso Abraham karipe laptei tulum pire eti plen le plen poungo, le pe pite tulum niliye pepe, Abraham wuso Ma Ili linu topwepe il lapiri fei piti ma lirowo teingi lepe, le kapi watowo Melkisedek, le Melkisedek leletei Ma Ili piti lailolowo re luntoluwo Abraham. \v 7 So ku mretai moporotei piti metine wuso leletei Ma Ili piti ma lailolowo re luntoluwo metine nele lepe, metine piti leletei Ma Ili lepe, le kali nange ili linuwo metine piti Ma Ili ma lailolowo re luntoluwo lepe. \v 8 Mete piti pesio towa lite peptawio Ma Ili siye pepe, pe kapi oweli men nange wuso ilepe wane pelpe pite Israel karipe paptei tulum pire eti plen le plen poungo, le pe pite tulum niliye pepe, mete piti peptawio Ma Ili siye pepe pe kapi, wolo pe mete yaupe le pe pa. Le Melkisedek olo la kolo olo. Oweli men nange wuso Abraham karipe laptei tulum pire eti plen le plen poungo, le pe pite tulum niliye pepe Abraham kapi watowo Melkisedek, le metine piti ratei lingi wem wem, min il piti paitei yousi pite Ma Ili, pe pirpei piri lepe. \v 9 So ku miso mirpei molpepei oweli men nange wuso mete pite Israel karipe paptei tulum pire eti plen le plen poungo, le pe pite tulum niliye pepe, pe watepe eple palye pite Livai. Wolo wem Abraham karipe oweli men nange pepe laptei tulum pire eti plen le plen poungo, le le kapi pite tulum niliye pepe watowo Melkisedek, eple palye pite Livai re, pe wata pirpolo pe pire Abraham pepi paptei oweli men nange fei pepe watowo Melkisedek wusoli pe teluwi alpe lite Abraham. \v 10 Wem Livai nimou pele wala nila kolo olo, mantei lele Abraham lepe Melkisedek fale lerengawo, le Livai, le ninge palyene lite Abraham wolo le fale lingi. \p \v 11 Il lipi wuso Ma Ili watepe mete pite Israel piti ma pingiepe pepe, pe pirpei piti eple palye pite Livai ma pesio towa liti peptawio Ma Ili siye piti kaniepe ilepe wane pelpe pite Israel. Le wuso siye wuso peptawio Ma Ili lepe, pe miso kaniepe mete fale teingipe tuwopou pire Ma Ili, piti men ma metine nele fale piti ma lesio towa nele piti kaniepe mete? Metine fei lepe, le lesio towa lele linio Melkisedek, le le lesio towa lingowo tisi lite Aron kolo olo. \v 12 So wem metine nele fale piti ma lesio towa lite Ma Ili, il lipi wuso pirpei piti mete ma pingiepe piti peptawi siye paptowo Ma Ili lepe, il lipi fei pepe olo kimplipe kolo oloye, le Ma Ili olo nou laptei il lipi nemple yeflipi. \v 13 Le Ili louku wuso ku fei mirpei miri lepe le lite alpe nele le minele lite alpe lele re fale lesio towa lite leptawi siye laptowo Ma Ili piti kaniepe mete kolo olo. \v 14 Mete wuru pretai piti Ili louku lepe, le fale lile alpe lite Juda, le Moses lirpei liri alpe fei lepei piti pe ma pesio towa liti peptawi siye paptowo Ma Ili kolo olo, Moses lirpei liri kolo. \s1 Metine nele fale piti lesio towa lite Ma Ili linio Melkisedek \p \v 15 Ise fei miso retai yoporo yire il wuso kirpei kiripe menmen fei pepei pepe. Metine nele fale piti lesio towa lite Ma Ili linio Melkisedek. \v 16 Le lesio towa lite Ma Ili lingowo tisi lite alpe re teluwi kolo olo, wolo le lingowo tisi lite singe pite nempi nele piti ratei lingi wem wem. \v 17 Wusoli il piti paitei yousi piti Ma Ili pe pirpei polpepei, “Ye ma esio towa ile onom pite Ma Ili piti kaniepe mete wem oli oli, le ye ma esio towa fei lepe inio Melkisedek.” \v 18 So il lipi pite pinu pepe olo kanouku poporo kolo, le ku ma musape wusoli il lipi fei pepe ma nou pirouku teingipe kolo oloye, le Ma Ili olo nou laltei tisi nele yefli piti kanouku. \v 19 Wusoli Il Lipi pite Moses pepe, pe miso kanowo metine fale teingi tuwopou kolo olo. Le fei ku ma onom natowo tisi nele yefli piti ma kanouku me malfem mire Ma Ili, le tisi fei lepei olo teingitei. \p \v 20 Tisi teingi wuso fei ku ma onom natowo lepe, Ma Ili olo lire il singe lirpei liri lirpolo tisi fei lepei miso kanoukutei. Wem mete piti alpe lite Livai, Aron lire eple palye pele pepe, wem pe pesio towa liti peptawi siye paptowo Ma Ili lepe, Ma Ili lire il singe lirpei liripe kolo olo wusoli pe pesio towa fei lepe pinge tisi lite alpe re teluwi. \v 21 Wolo Jisas lesio towa lile onom pite Ma Ili piti kanouku wusoli Ma Ili lire il singe lirpei wem le lirpowo lolpepei, \q1 “Ki Ma Ili, ki kire il singe kirpei le ki ma nou weitei onom kolo olo, Ye ma esio towa ile onom peiki piti kaniepe mete wem oli oli.” \p \v 22 Wusoli Ma Ili lire il singe fei pepei lirpei liri Jisas, so Jisas ma lile nimin piti kanouku yaruwepe il mafo mire Ma Ili le il pingi wuso le topwepe lapiri lirouku pepe ma teingipetei pinuwepe pite pinu wuso le topwepe lapiri lire Moses pepe. \p \v 23 Eple palye pite Livai wuso pesio towa liti peptawi siye paptowo Ma Ili lepe, pe wuru wusoli wem nele la, nele namti lilowo tulum le pe pratei pesio towa fei lepe wem oli oli watafei Jisas kolo olo. \v 24 Wolo Jisas ratei lingi wem wem, le towa lele piti lesio lile onom pite Ma Ili lepe, le weisi watowo metine nele re kolo olo. \v 25 So fei le wem oli oli, Jisas miso kaniepe mete pe malfem pire Ma Ili piti pratei pingi wem wem. Jisas miso kaniepe wusoli le ratei lingi wem wem le le lilepe mete tulum piti lirpowo Ma Ili piti ma kaniepe. \p \v 26 So Jisas, le metine piti lesio towa lile onom pite Ma Ili piti kanouku. Le olo teingi tuwopoutei, il menemple olpe re paitowo topo kolo olo. Ma Ili eti lalpo taniepe mete pite tef lepei wuso pire il olpe pepe, le Ma Ili nou leila, kesi lila le yuwei. \v 27 Jisas, le watafei eple palye pite Livai kolo olo, pe wuso pesio towa liti peptawio Ma Ili siye. Pe epli wem oli oli, pe ma peptawi siye paptowo Ma Ili piti kaniepe ilepe wane pelpe pite Israel, le pe potei re ma peptawi siye paptowo Ma Ili piti kane potei. Pe peptawi siye paptowo Ma Ili so le ma onom one lasiepe lire il olpe pelpe kolo. Wolo Jisas lolpepei kolo olo. Jisas wai lotei le Ma Ili piti la lungwipe il olpe pouku wem niliye, le le lolpepe wem wuru kolo olo. \v 28 Mete lipi wuso pesio towa liti peptawio Ma Ili siye pepe, pe teingipe tuwopou kolo olo, wolo Il Lipi pite Moses pirpei piti pe ma pesio towa fei lepe. Il Lipi pite Moses pepe, Ma Ili linu watowo Moses fei le le so lire il singe lirpei lingi piti le keinio Ninge nele wusoli le teingi tuwopoutei, le le lingiepe il olpe kolo olo. \c 8 \s1 Jisas lesio towa lile onom pite Ma Ili piti kanouku \p \v 1 Il wuso kirpei pepe, ki kirpei kire menmen fei pepei Jisas lesio towa lile onom pite Ma Ili piti kanouku, le le olo lifei eti tilpi lite Ma Ili wuso lifei flenge pele pratei uf teingi lato yuwei lepe. \v 2 Jisas lesio towa lile onom pite Ma Ili piti kanouku le le lesio towa fei lepe lile leinginimtei piti Ma Ili lotei lifei, tulum fei lepe le wata pirpolo winemtei liti ku ma rautuwo Ma Ili. Winem fei lepe mete walem pesio kolo olo, Ma Ili lotei lesio winem fei lepe. \p \v 3 Mete wuso pesio towa liti peptawio Ma Ili siye pepe, pe niliye niliye Ma Ili lotei keiniepe piti ma kapi oweli lo siye piti peptawi paptowo Ma Ili, le metine wuso ki kirpeise kiri piti lesio towa lile onom pite Ma Ili piti kanouku pepe, le re watowo Ma Ili menmen. Le menmen fei lepe, le topo tale lele lotei, le wai lotei le Ma Ili piti la le teluwi pele ma kaptetei il olpe pouku. \v 4 Wuso le ratei tef lepei, le ma lesio towa lile onom pite Ma Ili piti kanouku kolo olo, wusoli tef lepei, mete pite Juda pingiepe il lipi pite Moses le pe keiniepe mete pelpe piti alpe lite Livai piti ma pesio towa liti paptei oweli re peptawi siye paptowo Ma Ili. Le lesio towa fei lolpepei kolo olo. \v 5 Mete piti pesio towa liti peptawio Ma Ili siye pepe, pe pingiepe piti pesiepe menmen piniepe wuso Ma Ili kosawo Moses piti ma lirpepe mete pite Israel piti pingiepe wem pe rautuwo Ma Ili. Menmen punkomtei pepe olo pratei uf teingi lato yuwei, le Ma Ili kosawo Moses le le so lingiepe piti lire siye topungou kaltu winem le le lesiepe tile re men nange piti pe ma piripe piti rautuwo Ma Ili. Min polpepei so wem Moses lopori lotei piti ma lire siye topungou kaltu winem liti rautuwo Ma Ili, Ma Ili lotei il poluwo Moses lolpepei, “Ye ma telpalotei piti esiepe menmen fei pepe ingiepe wuso ki kosaiye ratei tumun Sainai lepe.” \v 6 Wolo fei ku mretai, Jisas lesio towa lile onom pite Ma Ili piti kanouku pepe, towa fei lepe olo ilitei linuwo towa lite mete wuso peptawi siye paptowo Ma Ili. Min watafei il pingi wuso Ma Ili topwepe lapiri piti ma kanouku ku mete piti tef, le Jisas lile nimin piti kanouku yaruwepe il mafo mire Ma Ili, fei pepei olo teingipitei pinuwepe il pinu wuso Ma Ili topwepe lapiri lire Moses. Il pingi wuso Ma Ili topwepe lapiri lirouku ku mete piti tef, pe olo teingipitei wusoli Ma Ili lotei topwepe il fei pepe lapiri le le lirpei lirpolo pe ma kanoukutei. \p \v 7 Il pinu wuso Ma Ili topwepe lapiri lire Moses pepe, wuso pe kaniepe mete poporotei, Ma Ili ma nou onposi piti topwepe il nemple lapiri lirouku ku mete piti tef kolo olo. \v 8 Wolo il pinu wuso Ma Ili topwepe lapiri lire Moses pepe, il pepe olo kaniepe mete fale teingipe pire Ma Ili kolo, liso Ma Ili lamtuwepe piti pe rautuwo poporo kolo, le le so lirpei lolpepei, \p “Wem fei lire malfemye piti ki ma topwepe il nemple yeflipi, topwepe kapiri kire mete pite Israel le mete pite Juda. \v 9 Il nemple yeflipi pepei, pe ma watafei il nemple pinu wuso ki topwepe kapiri kire yaire manre pelpe pepe kolo olo, il wuso ki topwepe kapiri wem ki kaniepe koporotei piti pusa tef lite Isip. Il pinu wuso ki topwepe kapiri kiripe yaire manre pelpe pepe, pe telpalo pingiepe piti rautuki poporo kolo olo. Le ki so tounga pesipe. \v 10 Fei, wem lire malfemye piti ki ma topwepe il nemple yeflipi kire mete piti Israel, ki ma kaptei il peiki pratei falongou pelpe, le ki ma kaptei paitei enke pelpe. Ki ma Ma Ili lelpe le pe ma mete peiki. \v 11 Nele lelpe re ma leltalo metine nele lite uf tef niliye lo lite alpe niliye, leltalo lirpolo le ma retai piti ‘Ma Ili, le Ili,’ le ma leltalo fei lolpepe kolo. Wusoli pe yeflipiye ma pretaiki, mete piti nange pelpe lipi le mete yaupe, nange olo, pe yeflipiye ma pretaiki. \v 12 Ki ma onom manepe le il olpe pelpe ki ma nou onposiepe kolo oloye.” \p \v 13 So wem Ma Ili lirpei lire il nemple yeflipi piti pingi, le lirpei kosauku lirpolo il pinu wuso le topwepe lapiri lire Moses pepe olo singe kolo oloye, le pe ma pa. \c 9 \s1 Tisi liti rautuwo Ma Ili ratei tef lepei le uf teingi lato yuwei \p \v 1 Il pinu wuso Ma Ili topwepe lapiri lire Moses pepe, pe pirpei karipe wai lelpe lelpe piti mete ma pingiepe fei polomen wem pe rautuwo Ma Ili, le mete potei pesio winem liti pratei rautuwo Ma Ili. \v 2 Tulum lepe, mete pire siye topungou pantei talu neinowo kotuye le pe paptei wingi nempleiye pato le minemple re ma pinki pe leinginim kolo olo, mete pite alpe lite Livai wuso pe keiniepe piti ma paptei oweli lo peptawi siye paptowo Ma Ili, pe poteteiye miso pinki pe leinginim pite talu pepe. Le talu leinginim pe kaltu winem nele luwo le pe paltei ranguwom lultei karinge elpeingo twinges. Elpeingo piti lato lau towa yawi lepe, pe pinawo pirpolo elpeingo liti lato malfem lire Ma Ili. Elpeingo lepe, pe paltei menmen lelpe liti peltei weli loli watafei sakulou, paltei lile, pe paptei ponu nemple pile, le pe paptei lufe, weli laplei elpesipe piti watowo Ma Ili, paptei puwo ponu fei pepe. \v 3 Le elpeingo nele piti lato le leinginim lepe, pe pinawo pirpolo elpeingo liti Ma Ili lotei lifei. \v 4 Elpeingo lepe, pe paptei tile pire gol pesiepe, tile piti paptei oweli wopu pifei le pe pepletei weli, pe paptei tile fei pepe pile. Le pe paptei bokis piti kosape mete pire il wuso Ma Ili topwepe lapiri liripe piti ma kaniepe pepe, pe paptei bokis fei pepe pile. Bokis pepe, pe pire gol pesiepe, leinginim towa yawi re, gol yaune naitei. Le bokis leinginim, pe pafo lufe nemple (mana) wuso Ma Ili watepe paplei pinge tef oli era re telmane yawi lepe, pe pafo pire mili le mili lepe re pire gol pesio. Pe palfo eflei lite Aron wuso nimpe yousi fale poli pepe, le pe pafo era fila twinges wuso Ma Ili laptei Il Lipi pele pire eti plen le plen poungo, laptei paitei le le watowo Moses, pe pafo pratei bokis fei pepe. \v 5 Bokis nemi yuwei, pe pire gol pesienge menmen twinges teingingetei wata pirpolo ririm tite yuwei, te tilowo Ma Ili tulum. Pe pepletenge flingu le pe kesipe paptei pire muntuwo bokis nemi liti wem pe paltei teluwi lite siye lifei, Ma Ili ma onom manepe le le ma nou onposiepe il olpe pelpe kolo olo. Wolo menmen fei pepei, ki ma kali wem kaltei piti nampli kirpeise kire il wuru kolo olo. \p \v 6 So men nange fei pepe, pe esi pingiepe fei polpepe piti ma piripe wem pe rautuwo Ma Ili. Mete piti pesio towa liti paptei oweli re peptawi siye paptowo Ma Ili lepe, epli wem oli oli pe ma pinki talu pepe pe pesio towa lelpe pile winem elpeingo piti lato lau towa yawi lepe. \v 7 Le elpeingo nele piti lato leinginimtei lepe, pe miso pinki pe kolo olo. Metine wuso Ma Ili keinio piti linuwepe pepe, le loteteiye miso linki elpeingo fei lepe, wolo epli wem niliye lite eringi nempleiye nempleiye, le ma lolpepe. Le ma kali teluwi ile lite meme lo bulmakau wuso peltawio Ma Ili pile elpeingo lato towa yawi lepe, le kali teluwi fei lepe soma lila linki le elpeingo piti lato leinginimtei lepe, le ma lire esi yaupe linki le kolo olo. Le kali teluwi fei lepe lila le soma laltei watowo Ma Ili piti kaptetei il olpe pele lotei le mete pite Israel wuso pironom le pe pingiepe il men nange olpe pepe. \v 8 Riri Teingi lirpei kosauku alepe nimin lire elpeingo piti lato leinginimtei lepe lirpolo wem pe wala pingiepe il pinu wuso Ma Ili topwepe lapiri lire Moses pepe, wingi piti pinki pe elpeingo leinginimtei piti Ma Ili lotei lifei lepe, wingi fei pepe wala pungo kolo olo. \v 9 Il kauro yuwei pepei, pe pirim pirpei pire wem wuso mete pite Israel wala pingiepe il pinu wuso Ma Ili topwepe lapiri lire Moses. Il pal pato polpepei, wem pe paptei oweli re peptawi siye paptowo Ma Ili, menmen fei pepe miso piripe enke pelpe teingipe felkele kolo olo, le pe miso pe malfem pire Ma Ili kolo olo. \v 10 Pe pingiepe il piti pirpei pire oweli re tipeluwi piti mete paplei, le tisi liti kaptetei topungou pelpe. Pe pingiepe il piti kaniepe mete piti piripe topungou yuwei yaupe teingipe le enke pelpe leinginim olo, il pepe olo kaniepe kolo. Ma Ili onposi piti pe ma pingiepe fei polpepe pau pau fale wem le ma topwepe il nemple yeflipi, topwepe lapiri liripe mete pele piti pe ma pingowo tisi nele yefli piti rautuwo Ma Ili poporo. \p \v 11 Wolo fei Krais lesio towa lile onom pite Ma Ili piti kanouku le ku ma kapi menmen teingipe wuso Ma Ili lirpei piti ku ma kapi pepe wusoli ku fei mretawo tisi teingi liti rautuwo Ma Ili moporo. Krais linki le leinginimtei wuso Ma Ili lotei lifei lepe, le le lesio towa lile tulum fei lepe piti kanouku. Le tulum fei lepe olo teingitei linuwo tulum lite tef lepei wuso mete pile piti pesio towa lite Ma Ili lepe. Tulum teingitei wuso Krais lile piti lesio towa lile onom pite Ma Ili piti kanouku pepe, tulum fei lepe, le lite tef lepei kolo olo. \v 12 Wem Krais le yuwei, le wata pirpolo linki le elpeingo leinginimtei wuso Ma Ili lotei lifei lepe, le Krais lolpepe wem niliye. Le wem Krais linki le elpeingo leinginimtei wuso Ma Ili lotei lifei lepe, le kali teluwi lite meme re bulmakau ninge lila linki le piti watowo Ma Ili kolo olo, wolo le wata pirpolo lila teluwi lele lotei le watowo Ma Ili piti kaptetei il olpe pouku le Ma Ili ma onom manouku re kanouku wem oli oli. \v 13 Mete piti pesio towa liti peptawio Ma Ili siye pepe, pe ma kali teluwi lite meme re bulmakau lo olfom lite bulmakau ninge wuso peltawio Ma Ili lepe, pe ma kapi pepio peptalipe mete wuso pesiepe menmen olpe watafei pe pesio metine piti la, pe peipipe esi lo pesiepe menmen pite mete piti alpe nemple, menmen fei polpepe pepe pe wata pirpolo piripe topungou pelpe olpe le pe ma rautuwo Ma Ili kolo olo. Mete piti peptawio Ma Ili siye pepe, pe ma pepio teluwi lite meme re bulmakau le olfom lite sipsip ninge wuso peltawi lepe, pepio peptalipe mete fei pepe soma pe ma nou fale teingipe le pe miso nou rautuwo Ma Ili. \v 14 Le wuso menmen fei pepe miso kaniepe mete nou fale teingipe tuwopou pire Ma Ili, ki onposi teluwi pite Krais ma kanoukutei. Riri lite Ma Ili piti ratei lingi wem wem lepe, le liri Krais rounge tratei le le watowo Krais singe. Riri kanowo Krais le le wai lotei le Ma Ili piti la lungwouku. Wem Krais la, le la yawi, il menemple olpe re paisi topo lele kolo olo. Krais la le teluwi pele noro piti kaptetei il olpe pouku wusoli ku wala mingiepe men nange olpe wurutei le Ma Ili ma onom kotu lirouku le le ma wauku moingi. Krais la lungwouku piti ma kanouku onposi moporo le ku ma tounga pesipe wai olpe pouku le ku ma telpalo kutou piti mesio towa lite Ma Ili piti ratei lingi wem wem. \p \v 15 Il pal fei pepei so Krais la le teluwi pele ma pesiepe il pingi wuso Ma Ili topwepe lapiri lirouku ku mete piti tef piti ma kanouku pepe, teluwi pite Krais ma pesiepe il fei pepe papiri le pe ma pile singe soma mete wuso Ma Ili linape laptei lotei pepe, pe ma kali nempi liti pratei pingi wem wem, nempi wuso Ma Ili lirpei piti ma watepe lepe. Pe miso kali nempi liti pratei pingi wem wem wusoli Krais la lungwipe il olpe pelpe fei, le wem pe wala pingiepe il pinu wuso Ma Ili topwepe lapiri lire Moses pepe, pe pingiepe il men nange olpe wurutei le il fei pepe miso kaniepe pe malfem pire Ma Ili kolo olo. Wolo Krais la fei, le teluwi pele noro kaptetei il men nange olpe pelpe le pe miso pe malfem pire Ma Ili. \p \v 16-17 Ki ma nampli kirpeise kire il pal piti Krais la. Ma Ili onposiepe il pingi wuso le topwepe lapiri lirouku ku mete piti tef piti ma kanouku mratei moporo, Ma Ili onposi piti il fei pepe ma pile singe fei polomen. Min watafei metine liti tef lepei, wem le topwepe il lapiri lire metine nele piti ma kapi oweli men nange pele wem metine lotei fei lepe, le la. Wem metine piti topwepe il lapiri pepe, wem le wala namin ratei, il pele wuso topwepe lapiri pepe menele re ma fale lingepe kolo olo. Ma wem le la soma metine nele lepe, le ma lingiepe piti kapi oweli men nange pite metine lotei wuso la lepe. \v 18 Min polpepei so il pinu wuso Ma Ili topwepe lapiri lire Moses pepe re, pe pile singe wem pe petesi meme lo bulmakau nele la le teluwi pele ma pesiepe il fei pepe papiri le Ma Ili lingiepe piti le ma nou onposiepe il olpe pite mete kolo olo. \v 19 Moses linu leptalo mete pite Israel lire il yeflipiye piti paitei Il Lipi wuso Ma Ili watowo pepe. Leye lo le kali teluwi lite bulmakau re meme, lalfo linge tipe nimou le le topuwo namalou lire sipsip tipli yalei, topwepe pingi nemple paitei nimpe le le so loptoto teluwi pire tipe lepe, le le leltalipe yousi wuso laptei Il Lipi paitei pepe, le le lelyo leltalipe mete yeflipiye. \v 20 Le Moses lirpei lolpepei, “Teluwi fei lepe, le ma lesiepe il wuso Ma Ili topwepe lapiri lireise pepe le pe ma pile singe piti ise ma yingiepe.” \v 21 Moses lolpepe liri winem wuso pire siye topungou kaltu luwo lepe le men nange yeflipi wuso piripe piti rautuwo Ma Ili lepe, Moses lelyo teluwi lire tipe lepe leltalipe. \v 22 So wem ku mulwepe Il Lipi pepe, ku ma mretai molpepei, men nange yeflipi wuso piripe piti rautuwo Ma Ili lepe, pe miso fale teingipe wem pe pelyo teluwi peltalipe. Le il olpe pite mete re, Ma Ili nou onposiepe kolo olo wem teluwi noro kaptei wuso teluwi olo Ma Ili ma wala onposiepe. \s1 Krais la lungwouku ku mete piti tef le Ma Ili ma nou onposiepe il olpe pouku kolo oloye \p \v 23 Menmen wuso pe piripe piti rautuwo Ma Ili lepe, pe pesiepe piniepe menmen punkomtei pite yuwei le pe min so pire teluwi lite siye kaptei piti menmen fei pepe ma fale teingipe le pe soma piripe piti rautuwo Ma Ili. Wolo menmen punkomtei pite yuwei pepe, teluwi lite siye miso kaptei piti piripe teingipe kolo olo, teluwi pite Krais wuso la lepe, pe olo teingipitei le pe miso piripe menmen punkomtei pite yuwei pepe teingipe. \v 24 Wusoli Krais linki le elpeingo liti lato malfem lire Ma Ili, elpeingo wuso mete pesio pinio lite yuwei lepe, Krais linki le elpeingo fei lepe kolo olo. Le le yuwei punkom piti lilouku tulum le le lilowo Ma Ili onom le le lirpowo piti kanouku. \v 25 Ninge paliene lite Aron wuso lesio towa liti leptawio Ma Ili siye pepe, eringi nempleiye nempleiye le ma kali teluwi lite siye lila linki le elpeingo piti lato leinginimtei wuso Ma Ili lotei lifei lepe. Krais wata pirpolo linki elpeingo fei lepe wolo le wai lotei piti la lungwipe mete wem wuru kolo olo. \v 26 Wuso le lolpepe, wem linu piti Ma Ili laltei tef, teplai re men nange pepe le le lau lau fale wem fei lepei, Krais ma lila moingi re la wem wuru piti kaniepe mete, wolo le lolpepe kolo olo. Wolo fei, le wem lire malfem piti Ma Ili ma luntoluwepe mete pele pratei poporo, liso Krais lau tef lepei piti wai lotei le Ma Ili, le la wem niliye le teluwi pele noro kaptetei il olpe pite ku mete piti tef. \v 27 Mete yeflipiye ma pa wem niliye, le wem pe pa fei, Ma Ili ma kapi il laptei liripe. \v 28 Min watafei Krais re, le wai lotei le Ma Ili piti la wem niliye le teluwi pele noro kaptetei il olpe piti mete wuru pite tef. Krais ma nou lau punkom, wolo le lau piti ma nou la liripe il olpe pouku kolo olo. Le lau piti kaniepe mete wuso pratei pungario piti ma kaniepe pratei poporo. \c 10 \p \v 1 Il Lipi wuso Moses watepe pepe, pe pirpei kosape mete pire tisi liti rautuwo Ma Ili wolo mete miso kapi menmen teingipe wuso Ma Ili onposi piti ma watepe pepe kolo olo, pe miso kapi kolo wusoli pe pingiepe piti peptawi siye paptowo Ma Ili lepe, pe pingiepe pinge yuwei yawi, le menmen punkomtei pepe wala pinsi olol pato. Epli wem oli oli, eringi nemple nemple, mete pingiepe Il Lipi pepe piti peptawi siye paptowo Ma Ili, wolo siye wuso peptawi pepe, pe kaniepe mete fale teingipe pire Ma Ili kolo olo. \v 2 Le wuso siye wuso peptawio Ma Ili pepe, pe miso kaniepe mete fale teingipe pire Ma Ili le il olpe pelpe re Ma Ili ma nou onposiepe kolo oloye, mete wuso rautuwo Ma Ili lepe, pe enke pelpe ma piripe flo, le pe ma nou peptawi siye nemple paptowo Ma Ili kolo olo. Wolo pe polpepe kolo, wusoli siye wuso peptawio Ma Ili lepe, pe kaniepe fale teingipe pire Ma Ili kolo olo. \v 3 Le pe min so pingiepe piti peptawio Ma Ili siye eringi nemple nemple, polpepeye pato le pe wala onposiepe il olpe pelpe wem oli oli. \v 4 Wusoli teluwi lite bulmakau re meme miso kaptetei il olpe pite mete kolo olotei. \p \v 5 Min polpepei so wem Krais onposi piti lau tef lepei, le lirpowo Ma Ili lolpepei, \q1 “Ye inaulo piti mete ma papteiye oweli re peptawi siye papteiye, wolo ye elteiki topo tale. \v 6 Ye onom teingine kolo wem mete peptawi siye yeflipiye pifei tile, lo pe paptei waiye piti ye ma nou onposiepe il olpe pelpe kolo olo, ye onom teingine asiepe kolo. \q1 \v 7 Leye lo ki kirpei kolpepei, ‘Ma Ili, ki min lepei piti ma kingiepe il menemple wuso ye onposi piti ki ma kingiepe pepe, min watafei il piti paitei yousi pite Il Lipi wuso ye watowo Moses le pe pirpei pireiki pepe’.” \p \v 8 Ise yulwepe il wuso Krais linu lirpei liri Ma Ili wem le lirpei lolo, “Siye re oweli wuso mete paptei waiye pepe, le siye wuso peptawiye yeflipiye pifei tile le pe piti mete paptei waiye le pe peiteye piti ye ma nou onposiepe il olpe pelpe kolo olo, mete polpepei piti rautuye wolo ye inaulo le ye onom teingine asiepe siye re oweli fei pepe kolo olo.” Siye re oweli wuso mete paptei watowo Ma Ili lepe, pe polpepe pingiepe il piti paitei Il Lipi pite Moses pepe wolo olo, Krais wala lirpei il fei pepe liripe. \v 9 Leye lo le nou lirpei il nemple pingi, lirpei lolo, “Ma Ili, ki min lepei piti kingiepe il menemple wuso ye onposi piti ki ma kingiepe pepe.” So tisi tangu liti mete rautuwo Ma Ili wem pe paptei oweli re peptawi siye paptowo pepe, tisi fei lepe Ma Ili ma nou lupingio piti kaniepe mete kolo oloye. Wolo le laltei tisi nele yefli piti kaniepe mete, le tisi fei lepe Ma Ili laltei liri Krais wem le la, le teluwi pele noro kaptetei il olpe pite ku mete yeflipiye piti tef. \v 10 Wusoli Jisas Krais lingiepe il wuso Ma Ili onposi piti le ma lingiepe pepe, le fei ku yeflipiye fale teingipe mire Ma Ili wem Krais wai lotei piti la wem niliye le teluwi pele noro kaptetei il olpe pouku. \p \v 11 Mete pite Juda wuso pesio towa liti paptei oweli re peptawio Ma Ili siye piti kaniepe mete pite Juda pepe, pe epli wem oli oli pile pesio towa lelpe fei lepe le epli niliye pe ma pingiepe nauyou nauyou, wem wuru piti peptawi siye paptowo Ma Ili. Wolo siye wuso peptawio Ma Ili pepe, pe miso kaniepe mete kolo le Ma Ili wala onposiepe il olpe pelpe. \v 12 Wolo Krais wai lotei piti la lungwouku wem niliye le teluwi pele noro kaptetei il olpe pouku, le fei pepei ma kanouku wem oli oli. Wem Krais lolpepei fei, le le lifei eti tilpi lite Ma Ili. \v 13 Krais fei lifei lepe lungario Ma Ili piti ma kesipe mete eringi pele laptei pratei ire yepe tef le Krais ma loluwepe lapiri. \v 14 Krais la wem niliye le teluwi pele noro kaptetei il olpe pite ku mete piti tef, le mete wuso wai potei pe Ma Ili lepe, teluwi pite Krais kaniepe fale teingipe tuwopoutei pire Ma Ili le pe wem oli oli onposi piti pratei pire enke teingipe felkele. \p \v 15 Le Riri Teingi re, le lirpouku lire menmen fei pepe. Le linu lirpei lolpepei, \v 16 “Il pepei ki topwepe kapiri kiripe mete peiki, wem lingi, ki Ma Ili kirpei piti ki ma kaptei il lipi peiki pultei enke pelpe, le ki ma kaptei pratei falongou pelpe.” \p \v 17 Leye lo le nou lirpei lolpepei, “Il olpe pelpe ki ma nou onposiepe kolo oloye.” \v 18 So wem il olpe pouku pepe Ma Ili ma nou onposiepe kolo olo, ku ma nou mingowo tisi tangu liti meptawi siye maptowo kolo oloye. \s1 Ku ma me malfem mire Ma Ili \p \v 19 Ilim winkem peiki, Jisas la fei piti kapunuku wingi le ku miso me malfem mire Ma Ili. \v 20 Le naluku tisi nele yefli, tisi liti kanouku mratei mingi wem wem, le le naluku tisi fei lepe wata pirpolo le rapu ranguwom wuso lultei kari elpeingo leinginimtei liti Ma Ili lotei lifei lepe, le fei pepe, le kosauku piti le naluku tisi wem le wai lotei piti mete olpe petesi la le pe tingeli laitei nimpe. \v 21 Fei ku, metine liti kanouku lepe, le olo luntoluku mete pite Ma Ili pele fei, le le lesio towa lile onom pite Ma Ili piti kanouku. \v 22 So ku ma me malfem mire Ma Ili, ku me mire enke teingipe piti mire punkom mulpowo le ku ma mirkilau mingiepe il pele. Enke pouku leinginim, ku ma nou onposiepe il re men nange olpe kolo olo, le ku ma kotopape topungou pouku wem ku tounga pesipe il olpe le pe keitetouku piti mingiepe il pite Krais. \v 23 Ku onom natope menmen teingipe wuso Ma Ili lirpei piti ma wauku pepe, so ku ma mirkilau mesiepe re mingiepe il wuso ku mulpope pepe wusoli Ma Ili ma wauku menmen fei pepe punkom, le ma lempetouku kolo olo. \v 24 Ku ma onposi piti kane nemple so ku onom puwo nemple re mailele nemple. \v 25 Wai louku piti manfi nemple piti mirpei mire il pite Ma Ili lepe, ku ma musa kolo olo. Ilepe pouku polpepe fei le pe onposi pirpolo ma pile ire pelpe. Wolo ku ma mirkilau mingiepe il pite Ma Ili mirpei piti meila nemple enke re wai nemple topo weli wusoli ise retai wem olo lire malfemye piti Apa Ili ma nou lau piti kapi il laptei liripe mete. \p \v 26 Ku fei mretape il punkomye, le wuso ku onposi piti ma nou mingiepe il olpe, menele teingi lato fei linei ma ku kali watowo Ma Ili soma le ma onom pete il lire il olpe pouku pepe, olotei. \v 27 Ku ma molomen, olo, ku ma turuku, mratei mungario Apa Ili piti ma nou lau kapi il laptei lirouku. Wem fei lepe wem le kapi il laptei lire mete yeflipiye, mete piti pinpim il pite Ma Ili, le ma liripe pinki weli ili le weli ma laplei liripe nempleiye. \v 28 Wem metine nele tounga pesipe Il Lipi pite Moses, pe ma kapi il paptei piri, le wuso mete twinges lo twinges niliye, pe pamtuwo pirpolo metine lepe, le tounga pesipe Il Lipi punkom, pe ma onom manowo kolo, wolo pe ma petesi la. \v 29 Le wuso metine nele piti lulpowo Ma Ili wolo le weitei le le tounga pesi Ninge lite Ma Ili, menele ma falowo? Moingi ilitei ma falowo wusoli le onposi lirpolo teluwi pite Krais wuso pesiepe il pingi wuso Ma Ili topwepe lapiri lirouku ku mete piti tef pepe, metine lepe le onposi lirpolo pe olo yaupe, menele teingi fale lingepe kolo olo, le pe olo kaptetei il olpe pele kolo. Le le kelelawo Riri liti onom manouku. Metine fei lolpepe lepe, Ma Ili ma yifa lempesi watowo moingi ilitei. \v 30 Wusoli ku mretai piti Ma Ili lirpei lolpepei, “Ki kutei ma namti watepe moingi, ki ma namti kirine peiki piti watepe flis.” Le le nou lirpei lolpepei, “Ki ma kapi il kaptei kire mete peiki.” \v 31 Le wuso Ma Ili piti ratei lingi wem wem lepe, le onom kotu lirouku, ku ma turuku olpetei mire eti pele piti wauku flis re moingi. \p \v 32 Ise onposi piti wem linu wuso ise yulpope Il Teingipe pite Ma Ili, le moingi wuru faleise, wolo pe weiteise yuwalo yasiepe kolo olo, ise yile singe. \v 33 Wem wuru mete pirpei kelelaise yile lutepe pite nimoure mete wuru, le pe namplise uru, le wem ise yulwepe ilepe wane peise pila moingi fei polpepei, ise yantepe yepi yila moingi. \v 34 Mete piti pifei winem oli, moingi lelpe ise yantepe yepi yila, le wem mete kapise oweli men nange peise taniese, ise enke olpe yasiepe kolo wusoli ise retai piti ise ma kapi menmen teingipe wuso Ma Ili lirpei piti ma waise pepe, le pe ma kaneise wem oli oli. \v 35 So ise ma yile singe wusoli Ma Ili ma lirkilau laileleisetei wem le waise menmen teingipe wuso le lirpei piti ma waise pepe. \v 36 Ise yesiepe enke peise yapiri le ise yingiepe il wuso Ma Ili onposi piti ise ma yingiepe pepe, le wuso ise yolpepei, ise ma kapi menmen teingipe wuso Ma Ili lirpei piti ma waise pepe. \v 37 Min watafei il piti paitei yousi pite Ma Ili, pe pirpei pepe, pe pirpei polpepei, \p “Wem kurauye le metine piti ma lau lepe, le ma lau fale, le ma kali wem laltei kolo olo. \v 38 Mete peiki piti teingipe tuwopou pepe, pe ma pulpoiki le pe ma nampir pratei. Le wuso nele lelpe tounga peteiki, ki ma onom teingine kasio kolo olo.” \p \v 39 Wolo ku mete piti nou mile weitei kani onom mantepe il men nange olpe pite tef lepei kolo, le ku ma ma melengi kolo olo. Ku mete piti mulpowo Ma Ili punkom le le ma kanouku mratei moporo mingi wem wem. \c 11 \s1 Tisi liti mete pulpowo Ma Ili \p \v 1 Il pal piti ku ma mulpowo Ma Ili lepe, ku ma onom natope menmen wuso lutepe pouku wala pulwepe kolo pepe, wolo enke pouku leinginim ku retai moporotei piti ku ma kapi menmen fei pepe punkom. \v 2 Mete pite sungoi pepe, pe pulpowo Ma Ili punkom le le so onom teingine lasiepe. \p \v 3 Ku mulpowo Ma Ili le ku min so retai piti le lire il lirpei liso men nange pite yuwei re tef lepei fale pratei, le le lolpepei soma men nange wuso mete pulwepe kolo pepe, Ma Ili liripe piti laptei men nange min fei ku mulwepe pepe. \p \v 4 Abel lulpowo Ma Ili le le so lingiepe loporo piti leltawi sipsip ninge laltowo Ma Ili, le Kein olo lingiepe wanketei. Abel lulpowo Ma Ili liso Ma Ili onom teingine lasio le le linawo Abel lirpolo le metine teingi tuwopou wusoli Ma Ili lulpowo Abel wem le leltawi sipsip ninge laltowo. Abel lulpowo Ma Ili le le olo la fei wolo le wata pirpolo wala lirpopouku pepe wusoli le kosauku lire tisi liti mulpowo Ma Ili. \p \v 5 Enok lulpowo Ma Ili le le so la kolo, wolo Ma Ili kesi naminye lila le yuwei le mete perengawo kolo olo. Il piti paitei yousi pite Ma Ili, pe pirpei pirpolo wem Enok wala ratei tef lepei, le lirine onom pite Ma Ili pele teingine liso Ma Ili kesi lila le yuwei. \v 6 Metine piti lulpowo Ma Ili kolo, le miso lirine onom pite Ma Ili pele teingine kolo olo, wusoli metine wuso onposi lirpolo ma rautuwo Ma Ili, onom pele leinginim, le ma lulpo lirpolo, iyo, Ma Ili ratei le le olo teingi liripe mete wuso pire punkom peletei piti kaniepe pepe. \p \v 7 Noa lulpowo Ma Ili liso Ma Ili linu il poluwo lire moingi lipi piti ma fale wem lingi. Moingi fei pepe, Noa wala lulwepe kolo, wolo le laptowo Ma Ili mingim le le lulpowo. Le lingiepe il pite Ma Ili le le lesiene uweka wuso le lire moto pele re eple tuleingi pele pire nimoure pelpe, pe ponglo pifei leinginim, le Ma Ili kaniepe pepe. Noa lolpepei le le kosape mete piti tef lirpolo pe olo mete olpe piti pinpim il pite Ma Ili. Noa lulpowo Ma Ili, liso Ma Ili linawo Noa lirpolo le metine teingi tuwopou. \p \v 8 Abraham lulpowo Ma Ili le le lingiepe il pite Ma Ili wem le lirpowo piti ma lusa uf lele Haran, le le le uf tef nele wuso Ma Ili lirpei piti watowo lepe. Abraham retawo uf tef piti le ma le kolo, wolo le lusa uf tef lele lato le le le. \v 9 Abraham lulpowo Ma Ili le le ratei uf tef wuso Ma Ili lirpei piti watowo lepe, le Abraham ratei wata pirpolo le lite uf tef nele. Le liripe mete pele pratei winangou wuso pire siye topungou pesiepe pepe, le Abraham ninge lele Aisak re Aisak ninge lele, Jekop, te rounge re tiripe mete pelnge pratei winangou pire siye topungou pesiepe. Te rounge re tratei uf tef wuso Ma Ili lirpei piti watowo Abraham re eple palye pele pepe. \v 10 Abraham liripe mete pele pratei winangou pire siye topungou pesiepe wusoli le onposi lirpolo wem wala lato, wem le ma ratei uf ili wuso Ma Ili lotei lesio lepe, uf ili piti ratei lingi wem wem. \p \v 11 Abraham lulpowo Ma Ili le wem Abraham oli lire lotei, le moto pele Sara re olo one nire notei le ne olo yaune, nilape eple kolo olo, wolo Ma Ili wateme roum ninge. Abraham retai piti Ma Ili ma lingiepe il pele punkom, il wuso Ma Ili lirpei piti Sara ma nila ninge tulei lepe. \v 12 Abraham topo lele olo oli lultutuweye le le wata pirpolo la lepe, wolo le metine niliye fei lepe, le laptei eple palye piti pingi pingi re pepe, kere wurutei watafei tauri pite teplai yuwei le pe watafei telmane lite peryai mingo. \p \v 13 Mete yeflipiye fei pepe, pe pulpowo Ma Ili pe pe fale wem pe pa. Menmen wuso Ma Ili lirpei piti ma watepe pepe, pe wala kapi kolo, wolo pe wata pirpolo pile fiyen le pe pulwepe menmen fei pepe punkom, le pe enke teingipetei pasiepe. Le pe pirpei nomnaipe pirpolo pe olo pite uf tef nele le pe so pau pratei tef fei lepei. \v 14 Mete wuso pirpei fei polpepei pepe, pe pirpei paptei alepe nimin pirpolo pe wala onom natowo uf tef nange lelpetei liti pe ma pe pratei. \v 15 Pe pirpei pire uf tef lite tef lepei wuso pe pusa lato lepe kolo olo, wuso pe pirpei pire uf tef lite tef lepei, pe ma onposi piti nou karowo uf tef lelpe wuso pusa lepe, pe ma nou karowo pe. \v 16 Wolo olo, pe onom natowo uf tef nele teingitei wala lato, uf tef teingitei liti lato yuwei. Liso Ma Ili topo tapune kolo wem pe pinawo pirpolo le Ma Ili lelpe, wusoli le olo lopori uf ili lelpe laltepe lato fei. \p \v 17-18 Abraham lulpowo Ma Ili wem le linu topwepe il lapiri lire Abraham lirpolo, “Ninge leiye Aisak ma laptei eple palye peiye wuru.” le wem Ma Ili onposi lirpolo ma lila Abraham lusa, luluwo piti Abraham lulpowo punkom lo olo, wem le lirpowo Abraham piti ma leltawi ninge lele Aisak laltowo. Abraham lingiepe il pite Ma Ili le le lopori lotei piti ma leltawi Aisak wolo Ma Ili frou il kari. \v 19 Abraham retai lolpepei, wuso le letesi Aisak la, Ma Ili miso nou leila, le ku miso mirpei mirpolo Ma Ili nou leila Aisak punkom wusoli le frou il kari Abraham piti lire werau lalwe Aisak le le ma leltawi lifei tile. \p \v 20 Aisak lulpowo Ma Ili, le le so lirpenge eple winge tele Jekop lire Iso lirpolo wem lingi Ma Ili miso lailelenge re luntoluwenge. \p \v 21 Jekop lulpowo Ma Ili, le wem lire malfem piti le la, le leletei Ma Ili piti lailelenge re luntoluwenge eple winge tite Josep. Jekop lungutu luwo eflei lele le le so rautuwo Ma Ili. \p \v 22 Josep lulpowo Ma Ili, le wem lire malfem piti le la, le lirpei piti mete pite Israel ma pusa Isip le pe pe tani. Le le lirpepe piti pe ma polomen pire emingelem pele. \p \v 23 Nimou re yaitei mite Moses, me roum mulpowo Ma Ili le wem nimou nila Moses fei, anongou twinges niliye, me roum malingi ninge kumpu lepe. Me roum muluwo wuso teingitei lepe, le me roum turweme kolo piti minpim il pite Fero, le metine ili lite Isip wuso luntoluwepe pepe, wusoli le lirpei piti wem nimoure pite Israel pilape eple tuleingi, pe ma petesipe pa. \p \v 24 Moses lulpowo Ma Ili, le wem le ili lire metine, le linau piti mete pinawo pirpolo le ninge lite ningio pite Fero. \v 25 Moses onposi lirpolo pe ma teingipe piti le ma lila moingi liripe mete pite Ma Ili pele, le le linau piti rautu lotei lire menmen olpe pite tef lepei wusoli le retai, pe miso kanowo wem ulel kolo olo. \v 26 Moses onposi piti lila moingi liripe mete pite Ma Ili pele wusoli le onom manepe le le onposi lirpolo wuso le lila moingi fei lolpepei, le ma lila lire nange lite Krais wuso Ma Ili lirpei piti ma laltei lau lepe. Le Moses onposi lirpolo wuso mete watowo moingi, pe ma teingipitei pinuwepe oweli re yini teingipe pite Isip wusoli le onposi piti wem lingi Ma Ili ma lirowo teingi. \p \v 27 Moses lulpowo Ma Ili, le le turuwo kolo liri metine ili piti luntoluwepe mete pite Isip wuso onom kotu liri lepe, Moses turuwo liri kolo, le le lusa Isip. Moses le tani Isip le le onposi piti nou le kolo wusoli le wata pirpolo luluwo Ma Ili fei, Ma Ili wuso mete miso puluwo kolo lepe. \v 28 Moses lulpowo Ma Ili, le le lirpepe mete pite Israel piti rautuwo wem wuso Riri lite yuwei lonsuwepe wem le losiepe eple tuleingi pite Isip pa pepe. Moses lirpepe mete piti Israel piti relta teluwi lite sipsip lo meme laitei wingi pite winangou pelpe soma Riri piti losiepe mete pa pepe, le ma lonsuwepe le le ma losiepe eple tuleingi pite Israel wuso emare pilape pinu pepe, Riri lepe ma losiepe pa kolo olo. \p \v 29 Mete pite Israel, pe pulpowo Ma Ili le pe so poli telmane lite peryai yalei, poli pilele pinge nimin pe fale plen wem Ma Ili lesio peryai lari lifei plen plen. Pe poli pinge telmane nimin pe fale plen wata pirpolo pe poli pinge tef tangu pe lepe. Le wem yali pal pite Isip pirpolo ma pulsipe pe wolo peryai nou loungo luwo nele lau mulfipe pa yalipeye. \p \v 30 Mete pite Israel pulpowo Ma Ili, le wem pe pilele peinei pau pe neinowo uf ili Jeriko epli wem pire eti plen poungo te twinges fei, lom ine pite nile neinowo uf ili lepe noungo nualo ratei tef. \v 31 Moto pite tisi, nange pene Rehap, ne nulpowo Ma Ili le wem mete pite Israel fale posiepe mete wuso pinpim il pite Ma Ili, posiepe pa, pe petesine Rehap na kolo wusoli ne kaniepe mete pite Israel wuso kotire pe lupiripe mete pite uf fei lepe. \p \v 32 Ki ma nampli kirpei kilape ke lom? Olo. Wem olo kurau piti ki ma kaptei il kirpei kiri Gideon, Barak, Samson, Jepta, Devit, Samuel le mete emarengi wuru pepe. \v 33 Pe pulpowo Ma Ili le wem pe plolpo piripe mete pite uf tef nemple, pe pirkilautei piti posiepe mete yeflipiye pite uf tef fei pepe. Pe pingiepe il tuwopou le pe so kapi menmen wuso Ma Ili lirpei piti watepe pepe. Pe karpupe nemi pite siye laion, \v 34 weli lipitei fale wolo pe papunu pa, le pe namprupe esi pite mete wuso piripe werau piti ma posiepe pa pepe. Pe topungou toulipi pire uwal, wolo Ma Ili lirkilau watepe singe. Pe fale pire mete lipi singe piti plolpo le pe pirkilau posiepe mete pite uf tef nemple wuso pau tef pelpe pepe. \v 35 Pe pulpowo Ma Ili, le nimoure ilepe, pe nou pulwepe mete pite alpe lelpe wuso pe plolpo le mete eringi pelpe posiepe pa wolo Ma Ili nou leilape, nimoure pepe pulwepe nou karepe pau uf re winangou pelpe. \p Mete ilepe pite Israel wuso mete eringi pelpe pengleipe pepe, pe pinau piti pulsipe rautuwepe weni ririm olpe pelpe liso mete eringi pelpe petesipe pa. Mete pite Israel pepe, pe pretai piti wem pe pa pire moingi fei polpepei, Ma Ili ma nou leilape le pe ma kali nempi nele liti pratei poporotei pingi wem wem. \p \v 36 Mete ilepe pite Israel, mete eringi pelpe piripe olpetei, kelelape re palwe oli pelesipe le pe pire foiye petesipe. Ilepe pelpe, mete eringi pelpe ma topwepe papiri le pe kesipe pilape pe paptei pifei winem oli. \v 37 Mete wuso pulpowo Ma Ili lepe, pe pila moingi, mete pire era posiepe pa, ilepe, mete pire werau paploupe kotu ilo ilo, le ilepe, pe pire werau papwe pa. Mete wuso pulpowo Ma Ili lepe, pe paulo liye liye re pe, le pe pafo olongou olpe piti pire topungou pite sipsip re meme pesiepe pepe. Pe oweli yini nange naplei, mete watepe moingi wuru le pe nampliepe uru. \v 38 Tef fei lepei olo teingi liti pe ma pratei kolo. Pe paulo poutalo liye liye re pe pinge tef oli era re telmane ye yawi, tef linpei lifefei, le pe pratei pinge ilingi re era namplungu. \p \v 39 Mete yeflipiye fei pepei, Ma Ili onom teingine lasiepe wusoli pe pulpowo. Wolo menmen wuso Ma Ili lirpei piti pe ma kapi pepe, pe wala kapi kolo, \v 40 wusoli Ma Ili linu onposi fei piti laltei tisi teingitei piti kanouku. Ma Ili onposi piti mete pite sungoi wuso pulpowo pepe le ku piti fei wem lingi lepei, Ma Ili onposi piti lopori tisi niliye piti kanouku mepiye fale teingipe miri le lotei. \c 12 \s1 Ma Ili, le Eiya louku \p \v 1 Le fei ku re, mete wurutei pite sungoi wuso pulpowo Ma Ili lepe, pe kosauku pire wai lelpe liti pingiepe il pite Ma Ili le pe wata pirpolo pile neinouku piti ma puluku namti mingowo tisi wuso pe pinu pingowo lepe. So ku ma tounga pesipe il men nange olpe wuso piripe enke pouku moingi le ku telpalo mingiepe il pite Ma Ili moporo kolo pepe, ku ma tounga pesipe le ku ma mirkilau mingowo tisi wuso Ma Ili laltouku lato piti ma mingowo lepe. \v 2 Ku ma onposio Jisas wusoli le lotei so linu kosauku tisi liti mulpowo Ma Ili, le le ma kanouku piti me malfem mire Ma Ili watafei le lotei. Le tounga pesi Ma Ili kolo, le lingiepe il pite Ma Ili pele le le fale wem pe petesi la le pe tingeli laitei nimpe. Le topo tapune piti la laitei nimpe kolo olo wusoli le onposi piti wem lingi Ma Ili ma lirine onom pele teingine, le le fei olo lifei eti tilpi lite Ma Ili wuso lifei flenge pele pratei uf teingi lato yuwei lepe. \p \v 3 Ise onposio moingi wuso Jisas lile lepe le wem mete olpe kelelawo re onom kotu piri, wolo le topo tapune kolo, le lile singe piti lingiepe il pite Ma Ili. So fei ise re ma enke peise toulipi piti topungou olpe kolo wem mete kelalaise piti yulpowo Ma Ili, le ise ma tounga pesipe il pite Ma Ili kolo olo. \v 4 Wusoli wem mete kelelaise re namplise uru le ise watepe topo, wolo pe peteteise ya kolo. \v 5 Le il wuso Ma Ili lirpei pe ise eple pele piti waise topo weli wolo ise yirepe onom ye lom? Il pepe Ma Ili lirpei lolpepei, \q1 “Eple peiki, wem ki waise moingi piti ma nou keiteise yingowo tisi teingi, ise ma enke olpe kolo, le wem ki kire il singe kirpelaise kire il olpe peise, ise ma tounga peteiki kolo olo. \v 6 Wusoli mete wuso ki onom nuwope pepe, ki ma watepe moingi le pe ma pretai piti ma nou pingowo tisi teingi, le mete wuso ki kinape kirpolo pe eple peiki pepe, ki ma ketesipe soma pe ma pingiepe il peiki.” \p \v 7 Moingi wuso faleise pepe, ise ma yuwalo yasiepe kolo olo, yile singe le ise yesiepe enke peise yapiri wusoli ise eple pite Ma Ili pele le le waise moingi piti il polise le ise ma yingiepe il pele. Ise onposiepe yaire pite tef lepei, wuso eple pelpe paptepe mingim kolo, pe ma petesipe eple pelpe soma pe il polwepe piti paptei mingim. So fei ise re, Ma Ili lolpepei lireise wusoli ise eple pele, le le onom puwoise. \v 8 Wuso Ma Ili waise moingi kolo olo, ise ma wata pirpolo ise eple pite tisi, le ise eple pite Ma Ili pele kolo olo (mete yeflipiye pila moingi). \v 9 Ise onposiepe yaire pouku pite tef lepei, pe petetouku re wauku flis kumpu le ku maptepe mingim. Le wem Ma Ili, le eiya louku lite yuwei, le wauku moingi piti kanouku mingowo tisi teingi liti kali nempi liti ratei mingi wem wem, ku ma mirkilau mesiepe enke pouku mapiri le ku mile singe piti mingiepe il pele. \v 10 Yaire pouku pite tef lepei, pe petetouku piti il poluku wem ku wala eple kumpu, le pe onposi piti ku ma maptepe mingim. Pe polpepe piti kanouku wem kurau. Wolo Ma Ili wauku moingi piti lirouku teingipe wem oli oli, le le onposi piti ku ma telpalo ratei mire enke teingipe felkele watafei le lotei. \v 11 Wem Ma Ili wauku moingi, wem fei lepe enke pouku moingipe le ku enke olpe, ku enke teingipe kolo olo. Wolo wem lingi, mete wuso pila moingi lepe pe ma kotopa potei piti pratei poporo pire enke malye. \s1 Il piti il polwepe nimoure mete piti pulpowo Ma Ili \p \v 12 Esi peise ma pire uwal kolo le yamkelem peise re ma peireise kolo, yire isotei singe piti yingowo tisi lite Ma Ili. \v 13 Ise lupoluwo tisi tuwopou piti yingowo ye soma urou wuso oli lepe, le ma la kolo wolo le ma nou fale teingi. \p \v 14 Ise ma onposi piti ratei yire enke malye yiripe mete yeflipiye, le ise ma onposi piti ratei yire enke teingipe felkele wusoli wem ise ratei teingipe tuwopou kolo, ise ma yuluwo Ma Ili kolo olo. \v 15 Ise kotopa nemple le nele leise re ma nou tounga pesi Ma Ili kolo wusoli le olo onom maneise. Ise ma yusa nele leise lingiepe il olpe kolo, le ma wata pirpolo foiyou fotungo lepe, wuso ise kofli lo yalowi wisyau re lepe, le kete nane lele lalteiseye. \v 16 Ise kotopa nemple soma nele leise re ma onom fale piti laulelipe nimoure ausi kolo, lo le ma tounga pesi Ma Ili watafei Iso kolo olo. Iso onposiepe oweli kumpu piti lafo fango lele le le lirpei leite lotei lirpolo le winke you liso Ma Ili lirkilau lailolowo re luntoluwo kolo olo. \v 17 Ise retai piti wem lingi Iso lirpolo ma leltei yaitei lele Aisak piti leletei Ma Ili piti ma lailolowo re luntoluwo wolo yaitei lele Aisak lirowo yef. Iso linta tisi piti weisine onom pite yaitei lele, le le louti lirpei piti malfefi wolo olo, wusoli Iso lotei linu folfol lire oweli le le lirpei leite lotei lirpolo le winke you. \p \v 18 Ise watafei mete pite Israel kolo, pe wuso lutepe pelpe potei pulwepe re pingitepe menmen wuso falepe pepe. Pe puluwo weli ili loluwo tumun Sainai, nopom ili fale keraisipe oloye, munkunum tur oli, le yuf ili fale losiepe. \v 19 Pe pingitei putupa wengle le Ma Ili lirpei. Wem mete pite Israel pepe, pe pingitepe il pite Ma Ili, pe turwepetei le pe pirkilau pirpei pirpolo Ma Ili ma nou lirpei il nemple kolo, wolo Moses ma kapi il pele soma lau lirpepe, \v 20 wusoli pe pinlele potei wem Ma Ili lire il singe lirpepe lolpepei, “wuso metine wape lo sipsip, bulmakau re siye eryai pepe, nele lelpe lau malfem lire tumun pau lepei, ise ma yire era yosio la.” \v 21 Mete pite Israel pulwepe re pingitepe menmen fei pepe le pe olo turwepe olpetei, le Moses lotei re lirpei lolpepei, “Ki turiki re punweweiki.” \p \v 22 Wolo ise olo, menmen fei polpepe olo faleise kolo. Ise fei yau fale tumun pinawo Saion, le ise yau fale uf ili lite Ma Ili, le Ma Ili piti watepe mete nempi liti pratei. Ise yau fale Jerusalem piti lato uf teingi yuwei liripe ririm wurutei pele. \v 23 Le ise fei yau yanfipe eple pite Ma Ili pele, pe potei lipi eri le pe olo enke teingipetei. Pe wuso nange pelpe olo Ma Ili laptei puwo piti pe ma piri pepi pratei uf teingi lato yuwei lepe. Ise fei yau falowo Ma Ili, le Ma Ili piti kapi il laptei liripe mete yeflipiye piti tef. Le ise fei yau falepe mete teingipe pite sungoi wuso pa wolo Ma Ili kaniepe fale teingipe pire le lotei. \v 24 Ise fei yau falowo Jisas, le metine piti lilouku nimin piti kanouku yaruwepe il mafo mire Ma Ili, le il pingi wuso Ma Ili topwepe lapiri lirouku ku mete piti tef pepe, il pepe ma pile singe. Ise fei yau falowo Jisas wuso teluwi pele noro kaptetei il men nange olpe pouku le ku miso fale teingipe mire Ma Ili. Teluwi pite Jisas, pe pirouku teingipe piti Ma Ili ma onom manouku le le kanouku me malfem miri le lotei, wolo teluwi pite Abel olo, pe kanouku kolo. Abel teluwi pele kosauku pire tisi liti mete pingiepe il olpe le Ma Ili ma onom kotu lasiepe le le ma namti watepe moingi. \p \v 25 Ise kotopa isotei le ise yinau piti yingitepe il pele kolo, wem Ma Ili lirpei. Sungoi, wem Ma Ili watepe il pele pe metine nimou lele, le le lirpepe mete piti Israel pepe, wolo pe paptowo mingim kolo, leso Ma Ili onom kotu lasiepe le le watepe moingi. Le fei Ma Ili lifei uf teingi lato yuwei le le lirpouku lire il pele, le wuso ku maptowo mingim kolo, ku ma mila moingi ilitei. \v 26 Sungoi, wem Ma Ili lirpei, tef nenyi lotei wolo fei Ma Ili lirpei lolpepei “Wem nele ki ma nou nenyi tef loteteiye kolo, wolo ki ma nenyi tef lire teplai.” \v 27 Il wuso Ma Ili lirpei lirpolo “wem nele ki ma nou nenyi tef”, il pepe pirpei kosauku alepe nimin pirpolo men nange wuso Ma Ili laptei pepe, Ma Ili ma lesi nenyipe le men nange wuso le laptei piti ma pratei pingi wem wem kolo pepe, le ma kapi tani, le menmen wuso le laptei piti ma pratei pingi wem wem pepe, le ma lusape pratei. \p \v 28 Ku ma enke teingipe masio Ma Ili wusoli le leitouku piti mratei uf lele le minemple re miso weisine onom pite Ma Ili kolo olo. So ku ma enke teingipe le ku ma onposi piti telpalo rautuwo Ma Ili moporo soma ku ma mirine onom pele teingine. Ku ma turuku miri le ku ma telpalo rautuwo piti meila nange lele, \v 29 wusoli Ma Ili louku, wem le onom kotu lasiepe mete wuso paptowo mingim kolo pepe, le ma liripe nemple wata pirpolo weli ili loli piti ma laplei pire tusiye. \c 13 \s1 Tisi liti ku ma mirine onom pite Ma Ili pele teingine \p \v 1 Ise ilim winkem piti yepi yulpowo Krais so ise ma onom puwo nemple. \v 2 Ise ma onposi piti yailelepe mete nemple, le wem mete nampir pau faleise, ise kesipe yilape ye winangou peise le ise yuntoluwepe. Mete ilepe pite sungoi, pe pingiepe fei polpepei le pe pailelepe ririm pite yuwei wata pirpolo pe mete yaupe pite tef lepei, le pe pretai piti pe ririm pite yuwei kolo. \v 3 Ise ma onposiepe mete piti pifei winem oli, onposiepe wata pirpolo ise isotei re yiripe yepi yifei winem oli lepe. Le ise ma onposiepe mete wuso moingi falepe pepe, onposiepe wata pirpolo ise isotei re yiripe yepi yila moingi fei lepe. \p \v 4 Nimoure re mete wuso paite nemple pepe, pe ma pailele nemple re puntolunemple, onom kere nemple le pe ma pusa nemple kolo olo. Nimoure lo mete wuso paite nemple fei wolo pe kare nemple tounga le pe pe piripe nemple pepi paulelei nemple ausi, Ma Ili ma kapi il laptei liripe le le ma watepe moingi ili. Le nimoure mete wuso paite nemple walolo, wolo pe pailele nemple pe re ma pila moingi ili. \v 5 Ise onom kere piti yintape mole yini wuru kapi kolo olo, le menmen wuso ise yesiepe fei, ise ma enke teingipe yasiepe. Wusoli Ma Ili lirpei lolpepei, “Ki ma tounga peteise kolo olo, ki ma kaileleise kireise mepi mratei.” \v 6 So ku ma topo weli le ku ma mirpei molpepei \q1 “Ma Ili miso kaneiki, ki ma turiki kolo olo. Metine nele ma lolomen lireiki? Olo.” \p \v 7 Ise ma onposiepe mete wuso pinu peitaloise pire il pite Ma Ili lepe. Ise ma nou onposiepe wai lelpe liti pingiepe il pite Ma Ili fei polomen pe pe fale wem pe pa, le ise re ma yingiepe fei yolpepe wem ise yulpowo Ma Ili. \v 8 Jisas Krais miso loli weitetei kolo olo. Nemul, fei, le wem oli oli, le onom re wai lele olo, nenpiyeye. \v 9 Ise yusape mete nemple peitaloise pire il nemple polomen polomen re kolo olo. Wuso ise yulsipe, ise ma yusa tisi teingi wuso ise fei min yingowo lepe. Ma Ili onom manouku le fei pepei, pe wata pirpolo piripe enke pouku leinginim singe le pe kanoukutei, wolo il wuso mete nemple pirpeise pire oweli pirpolo ise miso yaplei oweli fei pepe, le nemple pepe ise ma yaplei kolo, il fei pepe olo kanouku kolo olotei. Le mete wuso pingiepe pepe, il fei pepe olo kaniepe kolo, wusoli pe oweli yaupe piti ku mete ma maplei eryai. \p \v 10 Ise retai, wem Jisas la laitei nimpe le teluwi pele noro kaptetei il olpe pouku, nimpe wuso le la laitei lepe, le wata pirpolo tile pouku piti meltawi Jisas maltowo Ma Ili le le ma nou onposiepe il olpe pouku kolo olo. Le wem mete wala pingiepe il pinu wuso Ma Ili topwepe lapiri lire Moses, il wuso pirpei piti mete ma rautuwo Ma Ili pingowo tisi tangu lepe, mete fei pepe, teluwi pite Jisas miso kaniepe piti kaptetei il olpe pelpe kolo olo. \v 11 Metine pite linuwepe mete pite Juda wuso pesio towa liti peptawio Ma Ili siye, le lingiepe il pinu wuso Ma Ili topwepe lapiri lire Moses pepe, pe petesipe siye le le kali teluwi ile lila linki le elpeingo piti lato leinginimtei piti Ma Ili lotei lifei. Le ma laltei teluwi lepe lifei malfem lire Ma Ili soma le ma nou onposiepe il olpe pite mete kolo. Wolo siye yeflipiye, pe ma kapi pilape pe towa yawi tani uf winangou pelpe pratei lepe, pe towa yawi soma peptawi siye fei pepe. \v 12 Min polpepei so Jisas re, pe kesi pila noro pe towa yawi tani uf ili Jerusalem le pe so petesi la soma teluwi pele noro kaptetei il olpe pite ku mete piti tef, le le ma kanouku fale teingipe mire Ma Ili. \v 13 So ku ma tounga pesi tisi tangu wuso mete pite Juda pingowo piti rautuwo Ma Ili, le ku ma wata pirpolo mulsi Jisas noro me towa yawi le mete ma palwe oli peletouku watafei Jisas lotei, wem le la, mete palwe oli pelesi. \v 14 Mete ma palwe oli peletouku wusoli tef fei lepei, uf ili nele re ku louku piti ratei wem oli oli kolo olo, wolo ku wala onom natowo uf ili nele piti wem lingi Ma Ili ma wauku le ku ma ratei mingi wem wem. \v 15 So ku ma wem oli oli meila nange lite Ma Ili le ku molpepe wem ku miri nange lite Jisas piti mirpei nomnaipe mirpolo, “Ma Ili, le Ili louku.” \v 16 Ise onom pete il kolo piti yailele nemple le ise kane nemple yire oweli re men nange pepe, wusoli wem ise yingiepe fei yolpepe, ise wata pirpolo yaptei menmen teingipe watowo Ma Ili, le le ma onom teingine lireise. \p \v 17 Mete piti puntolise re peitaloise pire il pite Ma Ili, mete fei pepe ise ma yaptepe mingim le ise yingiepe il pelpe. Pe wem oli oli onposi piti puntolise re kotopaise, wusoli pe ma nampli pirpowo Ma Ili pire towa lelpe wuso pesio lepe. Wuso ise yaptepe mingim re yingiepe il pelpe, pe ma enke teingipe piti telpalo pesio towa lelpe poporo. Le wuso ise yolpepe kolo, pe ma enke olpe le fei pepe ma kaneise kolo olo. \p \v 18 Ise wala ma yeletei Ma Ili piti kanouku. Ku mretai punkom piti enke pouku ma pamtuku piti ku mingiepe il menemple olpe re kolo olo, wusoli ku wem oli oli onposi piti ma ratei teingipe tuwopou. \v 19 Le ki kirkilau keiteise piti ma yeletei Ma Ili soma le ma laiteiki nou frou ke ise. \s1 Pe peletei Ma Ili piti kaniepe mete pite Hibru wuso pingitepe il piti paitei youti nepei \p \v 20 Apa Ili louku Jisas la wolo Ma Ili nou leila, le metine teingi piti luntoluwepe sipsip pite Ma Ili pele wusoli wem le la, teluwi pele wata pirpolo pesiepe il pingi wuso Ma Ili topwepe lapiri lirouku ku mete piti tef, teluwi pite Jisas ma pesiepe il fei pepe papiri le pe ma pile pingi wem wem. \v 21 Ma Ili, le metine piti onom malye, le miso kaneise lire men nange yeflipiye wuso teingipe piti kaneise yingiepe il pele. Le ku re, Ma Ili lotei miso leilauku enke piti ma mingiepe il pele piti mesio towa fei molomen, le le ma lolpepe lirouku liri nange lite Jisas Krais. Ku meila nange lite Krais wem oli oli. Punkomtei. \s1 Il piti pirpei papulu \p \v 22 Ilim winkem peiki, ki keiteise piti yaptei mingim yoporo yire il fei pepei piti ma waise topo weli, wusoli il wuso ki kaptei paitei youti nepei piti waise pepe, il olo ulepe kolo. \v 23 Ki kirpeise retai kire line winke louku Timoti wuso lifei winem oli lepe olo pe kesi paltei lau yawiye. Le wuso le frou lau faleiki, le ma lireiki wepi we wulise. \p \v 24 Ise yirpei wem teingi louku le mete peise piti puntolise pire il pite Ma Ili, le mete yeflipi pite Ma Ili pele pepe. Ilim winkem pite Itali, pe pirpei wem teingi lelpe le ise. \v 25 Ma Ili miso onom maneise re laileleise yeflipiye.