\id COL - Olo NT [ong] -Papua New Guinea 1997 (web version -2014) 1997 
\h Kolosi 
\toc1 Youti Pol lantei ne nimoure mete pite Kolosi 
\toc2 Kolosi 
\toc3 Kol 
\mt1 Youti Pol lantei ne nimoure mete pite Kolosi  
\c 1  
\p
\v 1 Ki Pol wuso Ma Ili onom pele, le leiteiki fale kire pupane lite Krais Jisas lepe, le ki kire line winke louku Timoti,  
\v 2 ku wantei youti nepei ne ise nimoure mete pite Ma Ili pele wuso ratei Kolosi pepe. Ise ilim winkem pouku wuso yirkilau yulpowo Krais lepe.  
\p Ma Ili, le Eiya louku, le miso onom maneise le le waise enke malye.   
\s1 Pol onom teingine lasiepe mete nimoure pite Kolosi  
\p
\v 3 Ku wem oli oli mirpopowo Ma Ili, le yaitei lite Apa Ili louku Jisas Krais, ku mirpopowo mire onom teingine pouku wem ku meletei mireise ise.  
\v 4 Wusoli ku mingitepe il fei, il wuso pirpei pireise piti ise yulpowo Krais Jisas, le ise wuso kani onom yantepe mete yeflipiye pite Ma Ili pele pepe.  
\v 5 Wem linutei piti ise yingitepe il punkom wuso pirpei piripe Il Teingipe pite Krais, ise yingitepe le ise yulpope piti ratei yungariepe menmen teingipetei ma faleise pingiepe Il Teingipe wuso yingitepe pepe. So ise yulpope Il Teingipe pite Krais le ise yingiepe piti kani onom yantepe mete nemple wusoli ise retai, menmen teingipetei pepe Ma Ili luntoluwepe pifei uf teingi lele le ise miso kapi menmen fei pepe.  
\v 6 Tef ili yefliye, il teingipe pite Krais olo poungo rofro liye liye re peye, le pe piripe enke pite mete teingipe. Min watafei pe polpepe pireise pepe, wem linutei piti ise yingitepe il teingipe pepe, pe piripe enke peise teingipe le ise retai yolpepei Ma Ili olo onom maneise, le le olo teingi lireise.  
\v 7 Epafras lirpeise lire il fei pepei le ise so retai. Le towane loukutei piti mepi mesio towa niliye lite Krais, le ku kani onom mantowo le le lilouku tulum piti lirkilau lesio towa fei lepei.  
\v 8 Le lirpouku lireise ise wuso Riri Teingi lirkilau leilaise enke piti kani onom yantei nemple.   
\s1 Pol leletei Ma Ili pite pe ma pile singe  
\p
\v 9 Il pal pepei so ku wem oli oli meletei Ma Ili mireise pepe, wem linutei piti ku mingitepe il pirpei pireise, wem fei lepe le le lau lau fale fei, ku wala onposise le ku meletei Ma Ili mireise. Ku meletei Ma Ili piti ma waise onom nire wuru le ise miso retai yire tisi men le onposi piti ise ma yingowo, le Riri lele miso kaneise piti ise ma enke ulepe le ise miso retaitei yire tisi lele piti ise ma yingowo.  
\v 10 Leye lo ise miso ratei yoporo yingowo tisi wuso Ma Ili kosaise lepe, le ise miso wem oli oli yingiepe menmen teingipe tuwopou piti ma yirine onom pele teingine. Ise ratei yingowo tisi wuso Ma Ili kosaise lepe, le ise miso yesiepe towa men nange teingipe, le ise miso kapi enke piti yirkilau retawo Ma Ili.  
\v 11 Ma Ili olo teingitei le le olo singetei. Le miso kaneise piti yile singe soma ise ma yualo kolo, ise miso yapiri enke peise le ise yile singe piti yilape moingi.  
\v 12 Le ise ma enke teingipe wem ise yirpowo Eiya Ili lite yuwei, yirpowo wuso ise enke teingipe yasio lepe. Le lotei so lireise teingipe piti ise ma kapi menmen ilepe wuso Ma Ili lotei loporipe piti ma watepe mete pele pepe, le menmen fei pepei Ma Ili lirpei fei piti ma wauku ku mete pele wuso mingiepe il punkom pele pepe le le lotei ma lini luwouku watafei epli lepe.  
\v 13 Ku minu mratei tulum oli munkunum wolo Ma Ili lotei kanouku mau tani tulum oli fei lepe, le le leitouku mile alpe lite ninge nange leletei wuso le onom kerowotei liri lepe, piti ninge lele lepe ma luntoluku.  
\v 14 Ninge lele wuso kanouku kapi il olpe pouku tanuku le Ma Ili miso nou onposiepe kolo oloye.   
\s1 Krais, le ninge oru piti linuwepe men nange yeflipiye  
\p
\v 15 Ma Ili olo kotire linsi olol le ku miso muluwo kolo olo, wolo Krais kapi mi mati pele le le kosauku lire Ma Ili. Krais, le ninge oru piti linuwepe men nange wuso Ma Ili laptei pepe.  
\v 16 Wusoli Krais lotei so Ma Ili laltei piti laptei men nange yeflipiye pite yuwei re tef lepei. Krais laptei men nange wuso ku miso mulwepe mire lutepe pouku, le men nange wuso ku miso mire lutepe pouku mulwepe kolo olo. Le laptei ririm piti puntoluwepe men nange pinge teplai yuwei, le le laptei mete lipi piti puntoluwepe men nange pinge tef lepei. Ma Ili laltei Krais piti laptei men nange pite yuwei re tef lepei le pe ma pite le pele lotei.  
\v 17 Men nange pepe, pe wala fale kolo le Krais olo linu ratei fei, Krais lotei so laptei men nange pepe pratei tulum lelpe fi fi.  
\v 18 Krais lotei so linuwepe re luntoluwepe nimoure mete pele wuso pulpowo pepe, wusoli pe topo tale lele. Le lotei so watepe nempi liti nampir pratei, le le ninge oru wuso la wolo Ma Ili nou leila piti ma linuwepe re luntoluwepe men nange pepe.  
\v 19 Wusoli Ma Ili lotei onposi piti ninge lele ma loungai yaitei lotei, kapi re lingiepe wai pite Ma Ili lotei.  
\v 20 Ma Ili onposi piti laltei Krais ma weisipe men nange pite yuwei re tef lepei, Krais ma weisipe nou laptowo Ma Ili lotei. Ma Ili onom malye liripe mete wem ninge lele la laitei nimpe, le le nou weisipe men nange yeflipiye pite yuwei re tef lepei, le nou weisipe laptowo Ma Ili lotei.   
\p
\v 21 Wem linu ise yato fiyen yire Ma Ili le ise mete eringi pele wusoli ise onposiepe re yingiepe il olpe.  
\v 22 Wolo fei, ninge lele la punkom laitei nimpe le fei pepei, Ma Ili nou weiteise fale yire numuwi pele. Ninge lele la lungwipe il olpe peise piti ma leiteise fale teingipe tuwopou, il menmen re ma polise kolo olo, le le ma leiteise ye yirowo Ma Ili malfem.  
\v 23 Le ma kaneise lolpepei wuso ise yile singe wem ise yingowo tisi liti yulpope il teingipe pite Krais pepe, le ise yusa menele weiteise enke kolo olo. Wusoli wem ise yingitepe il teingipe pepe, ise retai pe miso kaneise, le fei pepei, ise yulpope. So ise ma yile singe yolpepe. Il teingipe pepei so ki Pol, ki kesio towa liti keptalo pepe, le ku meptalo pe nimoure mete yeflipiye piti pratei tef lepei lepe.   
\s1 Pol kaniepe nimoure mete pite Kolosi  
\p
\v 24 Le fei ki onom teingine kasiepe moingi wuso ki kilape kireise pepe. Wusoli moingi wuso faleiki topo tale leiki lepei lepe, ki onposi piti ma kanowo Krais kire moingi ilepe pele. Krais lilape moingi piti kaniepe nimoure mete pele wuso pulpowo pepe, wusoli pe topo tale ile lele, le fei ki kilape moingi ilepe pele piti ma kaniepe nimoure mete pele.  
\v 25 Le Ma Ili leiteiki kesio towa liti kaniepe nimoure mete wuso pulpowo Krais lepe, le le waiki towa teingi fei lepei piti ki ma kaneise. Ki kesio towa liti keptalo il yeflipiye pite Ma Ili pele pepe.  
\v 26 Il pele wuso wem linu linu re lepe, le pele laplingi kotire pato le metewalem olo pretape kolo olo. Wolo fei Ma Ili laptei fale alepe nimin piti kosape nimoure mete pele.  
\v 27 Ma Ili onposi lolpepei, il pele wuso laplingi kotire pato pepe, le ma laptei fale alepe nimin le mete pele ma pretape. Il pele wuso laplingi kotire pato pepe, pe olo teingipetei le le onposi piti ma kosape mete yeflipiye. Le il wuso kotire pinsi olol pato pepe, pe min pirpei polpepei, Krais olo lunkise le le ratei leinginim peise. Le fei pepei pato polpepei, Ma Ili lotei olo teingitei le le onposi piti ma leiteise fale teingipetei watafei le lotei lepe.  
\v 28 So ku meptalo mete yeflipiye mire il pite Krais. Il menmen wuso ku mretape pepe, ku miripe piti meptalo mete yeflipiye le ku il polwepe piti ma kaniepe pe niliye niliye, kapi enke pite mete lipi le pe ma pile singe piti pulpowo Krais le pe miso pe pirowo Ma Ili malfem.  
\v 29 Piti ma kesio towa fei lepei, ki kifei lo ratei koporo re kolo olo, ki kirkilautei piti kesio towa fei lepei kiripe singe lipi wuso Krais waiki pepe.   
\c 2  
\p
\v 1 Ki fei ma kirpeise kire ki kutei wuso kirkilau kesio towa piti kaneise, le ki kesio towa piti kaniepe mete piti Laodisia, le mete yeflipiye wuso pulwepe mi mati peiki kolo olo pepe.  
\v 2 Ki onposi piti ma waise ise yepiye topo weli le piti ise ma yailele nemple re kani onom yantei nemple, leso ise retape il punkom, ise miso retai pe olo teingipe piti ma kaneisetei. Le fei pepei, ise miso retawo Krais lotei wuso wem linu linu re lepe, Ma Ili laltei fale alepe nimin kolo olo, lele lalingi.  
\v 3 Ma Ili olo onom nire wuru le onom pele olo ulenetei, le pe watafei mole ufau lele piti lalingi kotiretei lato wolo Krais lotei lepe so kosauku liri lepe.  
\v 4 Ki kaptei il pepei kirpeise piti ise ma yingiepe il tipe pite mete nemple kolo olo, le wuso il pelpe olo posise fei polomen re wolo ise ma yingiepe kolo olo.  
\v 5 Wusoli ki kato fiyen kireise wolo ki wem oli oli onposise le ki wata pirpolo ki ratei malfem kireise pepe. Le ki onom teingine kireise piti ise yirkilau yile singe piti yulpowo Krais le ise kere yusa nemple kolo olo.   
\s1 Ku ma mingiepe wai pite Krais le musape il pite tef  
\p
\v 6 Ise fei yulpo yirpei yolo Krais Jisas le Apa Ili, so ise ma ratei yingiepe wai pele watafei ise mete piti yulpowo punkom.  
\v 7 Ise ma yirkilau yulpowo wata pirpolo nimpe nele lile tef tangu le le lapiri nalem pirkilau pe penglei tef le pe pesio nimpe lepe lile singe. Le ise ma yirkilau yingiepe wai pele soma ise yile singe piti yulpope il wuso ku meitaleise miripe pepe. Le ise wem oli oli ma yirpowo Ma Ili wuso ise enke teingipe yasio lepe.   
\p
\v 8 Ise ma kotopa isotei yire mete wuso onposiepe men nange pite tef lepei le pe pire il tipe pelpe pirpei papwonou piti ma pempesipe mete nemple. Pe pingiepe tipipi olpe pelpe wuso manre yaire pelpe nampli pirpepe pepe, le pe pingiepe ririm olpe piti puntoluwepe men nange pinge teplai yuwei pepe. Il tipe pelpe pepe, pe paule Krais kolo olo, so ise ma kotopa isotei yiripe.  
\v 9 Wusoli wem Krais lau tef lepei, ku muluwo mi mati re topo tale lele watafei ku muluwo Ma Ili lotei, le singe pite Ma Ili pele olo pingio Krais yaliye.  
\v 10 Le wem ise kali Krais ratei leinginim peise, Ma Ili lirkilau waise nempi lele piti ise ma nampir ratei le ise ma yingiepe il pele. Krais, le singe piti watepe ririm re mete lipi il. Pe wuso puntoluwepe men nange pite yuwei re tef lepei lepe, Krais luntoluwepe yeflipiye, le pe miso yaruwepe il pele kolo.   
\p
\v 11 Ise yulpowo Krais le fei pepei ma wata pirpolo ise yingiepe wai pite Juda piti yaploupe topungou peise pepe. Wolo ise yaploupe topungou peise kolo olo, ise yulpowo Krais le Krais lotei, le liripe enke peise leinginim teingipe, le le waise enke teingipe yeflipi piti ise ma nou onposiepe il olpe piti yingiepe kolo oloye. Krais lingowo tisi yefli fei lepei piti ma leiteise fale teingipe, le Ma Ili ma lulpoise wata pirpolo ise yaploupe topungou peise watafei mete piti Juda pepe.  
\v 12 Wusoli wem ise yungungu, ise wata pirpolo ise yire Krais yepi ya le pe palowi oi peiteise yepi pepe. Le ise nou yeilo tani tipe wata pirpolo ise yire Krais nou yepi yeilo yire singe lipi pite Ma Ili lepe, wusoli ise yulpowo Krais wuso la wolo Ma Ili nou leila lepe.  
\v 13 Wem linu ise wata pirpolo ise olo ya fei wusoli ise yingiepe il olpe, le ise olo pite alpe nemple le ise kapi il lipi nemple piti ma kaneise re kolo olotei. Wolo fei Ma Ili keteise yau piti ma waise nempi nele le ise yire Krais yepi ratei, le il olpe pouku yeflipiye, Ma Ili miso nou onposiepe kolo oloye.  
\v 14 Il olpe pouku wuso ku mingiepe wem ku yaruwepe il lipi pite Moses pepe, Ma Ili olo pele laptei puwo. Wolo le fei ma nou onposiepe kolo oloye wusoli il lipi pite Moses wuso pirpei namuku pire moingi piti ku ma mila wem ku yaruwepe il lipi fei pepei pepe, il lipi pepe pe olo singe rasipe kolo oloye wem Ma Ili laptei piri Jisas paitei nimpe.  
\v 15 Le nimpe fei lepe Krais lirkilau weisipe singe pite ririm olpe wuso pirkilau puntoluwepe men nange pite yuwei re tef pepe, le le kosape mete lire singe pite ririm fei pepe, pe olo singe kolo olo. Krais lirkilau weisipe singe pelpe le le kosauku ku mete piti ku ma retai, le singe piti weisipe singe pite mete re men nange pepe piti pe ma paptowo mingim.   
\p
\v 16 So ise ma yusape mete nemple yeftuse pire oweli re tipe piti yaplei kolo olo, lo epli wem piti eringi nempleiye nempleiye pe paptei pirpolo pe wem lipi piti ise ma rautuwo Ma Ili, lo oweli lipi piti pe papli pire paulipe anongou yeflipi piti fale, lo epli wem piti pe onposio Ma Ili wuso laptei men nange pite yuwei re tef lepei lepe, laptei yalipe le le lifei laltei yef lepe, epli wem fei lepe pe re ma pifei yaupe piti onposio Ma Ili. Wem ise yingiepe menmen fei pepei kolo olo, ise ma yusape mete nemple yeftuse piti ma yingiepe kolo olo.  
\v 17 Il wuso pirpei polwepe menmen fei pepei, pe pingiepe wata pirpolo pe pingowo soni lelpe lepe, le menmen potei fei pepei pepe, pe pilowo Krais lotei.  
\v 18 Le wuso metine nele ma lempeteise lirpolo le olo retaitei wusoli lus pele kere le le lulwepe men nange teingipe teingipe. Le le ma lempetei lirpei lolo le metine piti lire yape, le le rautuwepe ririm pite yuwei, wolo ise ma yusa weiteise kolo olo. Metine fei lolpepei lepe, le rautu lotei yawi liripe menmen pite mete piti tef lepei wuso pelpe onposiepe pepe, le il pele ma polwepe menemple punkom re kolo olo.  
\v 19 Le le olo lirkilau lesio Krais ratei yofu lele kolo olo, wusoli Krais lotei so line oru piti linuwepe winkem you pele wuso pulpowo pepe. Krais lotei luntoluwepe winkem you pele le pe poli nemple wata pirpolo topo tale niliye yefli le numkufur re emingelem polwepe pinge leinginim piti ma penglei poli nemple singe, le Ma Ili onposi piti topo tale lepe, le ma leilo le ili.   
\p
\v 20 Ise wata pirpolo yire Krais yepi ya fei le singe pite ririm wuso puntoluwepe men nange pite teplai yuwei re tef lepei lepe, singe pelpe olo pesise peireise kolo oloye. Le piti men ma ise nou yingiepe watafei mete piti tef lepei pelpe pingiepe pepe? Piti men ma ise yingiepe il wuso pirpei polpepei,  
\v 21 “Ye ma kapi oweli fei pepei kolo olo,” lo “Ye ma aplei oweli fei pepe kolo olo,” lo “Oweli nemple pepe ye ma esiepe yaupe re kolo, ma olo?”  
\v 22 Il fei polpepei pepe pe pirpei pire menmen piti ku fei mesiepe kapi maplei, le wem ku mopyoyope fei, oloye, pe ma nou kanouku kolo oloye. Il polpepei pepe mete piti tef lepei pelpe potei onposiepe le pe peptalo mete nemple piti pingiepe.  
\v 23 Il wuso pirpei pirpolo ise ma yaplei oweli re tipe fei pepe kolo olo, mete ma onposiepe pirpolo mete wuso pinu pingiepe pepe, pe enke pelpe olo ulepe. Wolo olo pe enke pelpe olo ulepe kolo olo. Pe ma pire il singe pirpei yeftuse piti ma yingiepe rautuwepe ririm pite yuwei, le pe ma pempetei pirpolo pe mete piti pire yape. Pe ma pirpei polo wem pe wai potei flis re moingi, pe ma rautuwo Ma Ili poporo. Wolo olo, tisi fei lepei miso kaniepe tounga pesipe il olpe kolo olo.   
\c 3  
\s1 Pol laptei il piti ku ma mratei moporo  
\p
\v 1 Wem Ma Ili nou leila Krais, ise re wata pirpolo Ma Ili nou leilaise yepiye. So ise ma onom natope menmen pite uf teingi lato yuwei wuso Krais lifei flenge teingipetei pele pepe, le le lifei eti tilpi lite Ma Ili.  
\v 2 Menmen pite uf yuwei pepe soma ise onom natope pepe, le ise onom natope menmen pite tef fei lepei kolo olo.  
\v 3 Wusoli ise wata pirpolo yire Krais yepi ya fei, le Ma Ili wata pirpolo le kete olol lele lau lire muntise yire Krais pepe, le Ma Ili lotei luntolise.  
\v 4 Ise ma kani onom pite Krais, le wem le nou lau tef lepei, le ma lau alepe nimin le mete ma puluwo pretawo, le ili singe, le ise re ma yile watafei le.   
\p
\v 5 Ise ma tounga pesipe il olpe pite tef lepei wuso pirkilau peilaise enke piti yaulelipe nimoure ausi, onom fale nemple piti yire nemple olpe watafei pelem pepe, onom falepe menmen pite mete nemple pelpe, onom fale piti ma yingiepe il men nange olpe le ise onposi piti ma yire filai, (wusoli wem mete pire filai, pe onposiepe oweli yini re mole pelpe, le pe onposio Ma Ili kolo olo.) Ise enke peise ma nou onposiepe wai olpe peise piti pinu pepe kolo, ise ma yirkilau tounga pesipe re onom petepe il ye.  
\v 6 Wusoli mete wuso paptowo Ma Ili mingim kolo olo, le pe pingiepe wai olpe pite tef fei lepei lepe, mete fei pepe Ma Ili ma onom kotu liripe le le ma watepe moingi.  
\v 7 Le ise isotei, wem linu ise ratei yingiepe wai olpe polpepe le il olpe pirkilau peilaise enke piti yingiepe.   
\p
\v 8 Wolo fei il olpe fei pepei ise ma tounga pesipe. Il olpe watafei onom kotu, onom falepe il olpe piti ma yingiepe, le ise onom flis yire mete nemple. Ise kelelai nemple pato le il men nange olpe piti yirpei kotu nemple enke re ma yirpei fale nemi peise kolo olo.  
\v 9 Ise yempetei nemple kolo olo wusoli wai olpe peise olo ise tounga pesipe fei,  
\v 10 le ise fei kapi enke nemple yeflipi yepletei. Ise niliye niliye fale wata pirpolo metine nele teingi yefli wuso Ma Ili lele lesio le le watowo onom teingine yefline piti ma onposi watafei Ma Ili lotei, le ise miso retawo Ma Ili yoporotei.  
\v 11 Min polpepei so ise mete piti alpe nemple pepe, ise nemtei kolo olo, le mete piti Juda re, pe nemtei kolo olo. Mete piti paploupe topungou le pe piti paploupe topungou kolo pepe, pe re nemtei kolo olo. Lo mete piti pirpei il pelpe nemple nemple, lo mete piti pratei pinge towa yawi, lo mete piti pesio towa lite mete nemple yawi, lo mete yaupe, pe nemtei re kolo olotei. Ise yeflipiye wata pirpolo ise mete nempleiye pite alpe niliye pepe, le ise pite Krais pele le ise wuso yulpowo pepe, ise yeflipiye Krais lunkise le le lireise yepi ratei.   
\p
\v 12 Ise mete pite Ma Ili pele. Le kani onom lanteise le le keinise pite le pele lotei. So ise ma yingiepe wai piti onom manepe mete nemple, ise kaniepe re yailelepe mete nemple, ise yeila nange peise isotei kolo olo, ise ma enke malye yire mete nemple, le ise ma yapiri enke peise wem mete nemple waise moingi. Wai fei pepei ise ma yingiepe.  
\v 13 Ise ma kane nemple le wuso ilepe wane peise pe watowo line winke nele leise moingi, line winke lepe le ma nou onposiepe il olpe pelpe kolo olo, le ma lingiepe wai piti kani onom lantepe mete nemple. Ise ma nou onposiepe il olpe pite mete nemple kolo olo, wusoli Krais, le nou onposiepe il olpe peise kolo olo.  
\v 14 Ise yingiepe wai fei pepei le ise ma yirkilau yingiepe yapwonou piti kani onom yantei nemple wata pirpolo ise pite alpe niliye pepe le ise ma ratei yuwo nemple yoporotei.  
\v 15 Krais wauku enke malye, so ise ma yirkilau onposiepe il teingipe piti yingiepe, wusoli Ma Ili linaise piti ratei yuwo nemple le ise ratei yire enke malye. Le ise ma yirpowo Ma Ili yirpolo ise enke teingipe yasio.  
\v 16 Il wuso pirpei piri Krais pepe, ise ma yirkilau yesiepe pultei enke peise le pe ma peilaise enke piti ratei yoporo yire mete nemple. Ma Ili waise enke piti ise ma onposi yoporo le ise yeitalo nemple re yirpei nami nemple yire men nange teingipe pepe. Ise ma yuro weni pite Sam, yuro weni piti rautuwo Ma Ili le ise yuro weni pite Ma Ili wuso Riri Teingi leilaise enke piti yuro pepe. Ise yuro weni piti yeila nange lite Ma Ili le enke peise leinginim, ise ma yirpei isotei yirpolo ise enke teingipe yasio.  
\v 17 Men nange yeflipiye piti ise yirpei lo piti ise yesiepe, ise ma yingiepe yiri nange lite Apa Ili Jisas wem ise yirpowo Ma Ili yire onom teingine peise wuso Jisas kaneise pepe.   
\s1 Pol laptei il piti mete nimoure re eple pelpe ma pingiepe  
\p
\v 18 Ise nimoure, ise ma yaptepe mungarem peise mingim, wusoli ise ma yingiepe fei yolpepe wem ise yingowo tisi liti yulpowo Krais.   
\p
\v 19 Ise mungarem, ise ma kani onom yantepe nimoure peise, le ise nampliepe uru kolo olo.   
\p
\v 20 Ise eple, wem ise yingowo tisi liti yulpowo Krais, ise ma wem oli oli yaptepe emare yaire peise mingim, wusoli wem ise yingiepe fei yolpepei, ise yirine onom pite Ma Ili pele teingine.   
\p
\v 21 Ise yaire, ise ma yiripe enke pite eple peise olpe kolo olo soma pe wala ma kapi enke paptowo Ma Ili.   
\s1 Ku ma mesio towa moporo, le ku ma maptei mingim pe lipi pouku  
\p
\v 22 Ise mete piti yesio towa yawi lite moli lipi peise pepe, il menemple moli lipi peise pirpeise piti ma yingiepe, ise ma yaptepe mingim. Le ise ma onposi yirpolo wem pe pile malfem lupolise piti yesio towa lelpe, wem fei lepe so ise ma telpalo yesio towa piti pe ma pulpoise lom, olo, ise onposi yolpepe kolo. Ise wem oli oli ma telpalo yesio towa lelpe yire enke teingipe, wusoli ise ma onposiepe yoporo wata pirpolo ise onposio Apa Ili le ise yesio towa lele lepe.  
\v 23 Towa menele ise yesio, ise ma onposi piti ma yirkilau yesio wata pirpolo ise yesio towa lite Apa Ili lepe, le ise yesio towa lite mete kolo olo.  
\v 24 Ise ma retai yolpepei, Ma Ili miso namti laileleise. Menmen pele wuso le loporipe piti ma watepe mete pele pepe, ise re miso yiripe yepi kapi menmen fei pepe. Wusoli Krais loteteiye, le moli ili piti ise yesio towa lele.  
\v 25 Le metine minele wuso lingepe il olpe pepe, le ma namti lila moingi lire il olpe pele, wusoli Ma Ili ma kapi il laptei lire wai lite mete fi fi, le le miso nel loli ilo ilo kolo olo.   
\c 4  
\p
\v 1 Ise moli lipi piti yuntoluwepe mete piti pesio towa leise yawi lepe, ise ma yuntoluwepe yoporo le ise yailelepe wusoli ise ma retai yolpepei, ise re moli ili nele leise, le ratei yuwei.   
\s1 Ku ma meletei Ma Ili wem oli oli  
\p
\v 2 Ise ilim winkem peiki pite Kolosi pepe, ise ma yire wilfingou piti yeletei Ma Ili kolo olo. Ise ma wem oli oli yeletei Ma Ili le ise ma kotopa isotei yire il menmen piti ise yirpowo. Le ise ma yirpowo Ma Ili yirpolo ise enke teingipe yasio.  
\v 3 Le wem ise yeletei Ma Ili, ise ma yeletei yirouku ku re soma Ma Ili miso naluku tisi piti ku ma meptalo il pele piti mirpepe mete mire Krais. Il pele wuso nempis pinu wala kotire pinsi olol pato pepe. Wolo fei ku mirpei nomnaipe pile alepe nimin le ki fei pire foiye singe topiki kifei winem oli kiripe il fei pepe.  
\v 4 Ise ma yeletei Ma Ili yireiki ki piti ki ma kirkilau kirpei nomnaipe kire il pite Krais, wusoli ki ma kirkilau kesio towa fei lepei.   
\p
\v 5 Mete piti pulpowo Krais kolo olo pepe, ise ma onposi yoporo wem ise kosape yire wai peise piti yulpowo Krais, le ise kali wem yaltei yawi kolo olo.  
\v 6 Wem oli oli, il peise piti yirpei ma teingipe tuwopou le pe ma posiepe mete enke, le wem mete nemple peiteise pire il menmen, ise ma retai piti namti yirpepe yoporo.   
\s1 Pol laisi Tikikus lire Onesimus te rounge te Kolosi  
\p
\v 7 Line winke louku Tikikus, le metine piti lirkilau lesio towa lite Apa Ili le le towane louku piti mepi mesio towa niliye lepe, le miso nampli il yeflipiye lirpeise lireiki ki.  
\v 8 Min polpepei so ki kaisi le ise pepe, piti ma liripe enke peise nou teingipe wem le lirpeise lire men nange wuso falouku lepei lepe, le ku fei mratei molomen.  
\v 9 Le Onesimus re liri Tikikus rounge tepi te. Le line winke loukutei piti lirkilau lulpowo Krais, le le nele leise. Te rounge miso tirpeise tire men nange yeflipiye wuso fale lepei lepe.   
\s1 Pol liripe laptei wem teingi pe Kolosi  
\p
\v 10 Aristarkas wuso lireiki wepi wifei winem oli lepei lepe, le lirpei wem teingi le ise. Le Mak re, Barnabas winke lele lepe, le lirpei wem teingi le ise. (Ise kapi il fei, piti ma kesi Mak yaltei isotei wem le lau faleise.)  
\v 11 Josua, nange nele pinawo Jastus, le re lirpei wem teingi le ise. Aristarkas, Mak re Josua, pe twinges niliye pepei pe pite alpe lite Juda wolo fei pe weitei pulpowo Krais le pe pireiki ki mepi mesio towa lite weisipe mete maptowo Ma Ili piti le ma luntoluwepe re lailelepe. Le pe olo kaneiki poporotei.   
\p
\v 12 Epafras, le line winke nele leise, le re lirpei wem teingi le ise. Le metine piti lesio towa lite Krais Jisas. Le wem oli oli lire punkom piti leletei Ma Ili piti ma kaneise yile singe, yirkilau yulpowo Krais, le ise ma retai punkom yolpepei Krais miso kaneise wem ise yingiepe il pele.  
\v 13 Ki kutei miso kosaise kire towa lele wuso lesio lepe. Epafras lirkilau lesio towa piti kaneise le mete piti Laodisia re Hierapolis.  
\v 14 Luk, le metine piti kanoukutei lire pape re kainu pouku, le lire Demas rounge tirpei wem teingi lelnge le ise.   
\p
\v 15 Ise yirpepe ilim winkem pite Laodisia pepe yirpolo, ki kirpei wem teingi le pe, le Nimfa niripe nimoure mete piti pulpowo Krais le pe pau panfi nemple pifei winem lene piti rautuwo lepe. Pe re, ise ma yirpepe yirpolo ki kirpei wem teingi le pe.  
\v 16 Wem ise yungunane youti nepei re fei, ise ma onposi piti watepe ilim winkem pite Laodisia le pe re ma pungunane. Le ise ma namti yungunane youti wuso ilim winkem pite Laodisia ma waise nepe.  
\v 17 Le ise ma yirpowo Arkipus yolpepei, “Ye ma irkilau esio towa lite Apa Ili lepe, esio ila e altuye.”   
\p
\v 18 Ki Pol, ki kire eti peiki kutei, ki kaptei il pepei, wem teingi leiki le ise. Ise retai ki kifei winem oli le ise ma onom peteiki il kolo olo.  
\p Ma Ili miso onom maneise.