\id TIT - 4/6/85 Larsen Orokaiva (Ehija dialect); changed backslash codes 3-mar-2003 by e.bibilo 
\h Titus 
\toc1 TITUS 
\toc2 Titus 
\toc3 Titus 
\mt1 TITUS  
\c 1  
\s1 Paul na Titus ta ahari kajena  
\p
\v 1 Na Paul, God ta ke agi ari embo eto God na siriketo humbari embomeni amina God humota be ue amita ke be avo be kogue God ta ari javotoho avo be jigama ara na Iesu Keriso ta apostel nane ke hande ere ona  
\v 2 amo ungotenau irari daroho avo humbasi ue God ta ke be avo humota ara eagona. Eto irari daroho avo God ke sokova embo mane ke be ari embo amina enda ae kihi ta embo ta degi ikasi ke ena  
\v 3 amo amita iji inono ta embo na amita ke be avo kiagora ungotenau orekari embo God amita ke avo nanena hande ana ikena.  
\v 4 Na Paul ungotena God ta ke humota eagora avoeto Titus umo nau meni avoeto no degi ta ahari erevi ere kajihena. Eto God Mamo te Iesu Keriso ungotenau orekari embo amita hondate ari te peka te no degi ta iroi.   
\s1 Titus na pure erevi aja enda Crete ta Paul na ikena  
\p
\v 5 Eto umo enda Crete ta toto puvuhena amo pure huna toruhena avo inena ae umo toto puvuhena. Eto ke no degi ta ijiena ainge dombo da vahai vahai ta ekalesia tihi jigari embo avo inena siriketo umbujo.  
\v 6 Eto tihi jigari amo ari eingeko avo umbujo. Eto ari javotoho ari embo evohu vahai jimbari amita meniundi God ke be ijie e mamo ta ke agi ue isa sio sao mane eagora embo ainge avo umbujo.  
\v 7 Eto pure erena amo nei mane God ta pure avoeto ari jajavotoho eaguja embo amina aisuja, eto keniga embo eto tumo embo, wine indito tihivi ari embo, sausau ereto embo isembari embo, ke sokova ijie ombagora embo amina mane aisuja  
\v 8 te embo undurari embo, ari javotoho osa ari embo, hotembari javotoho hotembeto ari embo ari javotoho ari embo otohu embo amita hotembari sasapura uje sasapura toari veari embo  
\v 9 amina tihi jigihe ke tapa do ahe poekihera avo inono ta jigama ue hande ururou embo nei nei na sovera ari humbuhuro embo nei ta ke sokova amo tau iraesuja.   
\p
\v 10 Eto ke sokova ari embopo ainge amo mihera amina God ta ke be ingito ingaesira ue ke sokova na embomeni humbuto ari neite neite amina kihi humbuto ere pahora.  
\v 11 Eto Judea embomeni na hamo kakamba eto God ta toho ara ke sokova na ijie ahe poekihore embo javo vahai amo kaheketo oenga pamba eagora avoeto enana ta ahe poekari sapura avo haekejo, amo osa ue koro humbasi ere ora.  
\v 12 Eto ke sokova ainge ere ora amo enana da Crete embo vahai ungota peroveta vahai amina hariketo ke einge ena, “Eto Crete embomeni amo ke sokova hihi tirari isoro ngahia ari kupi ue okope undurari embomeni ra”  
\v 13 ke ainge ena amo Ke be avoeto enana ta ari avo ngahia na haekejo God ta ke be avo humota ue  
\v 14 Judea ta hihi sokova amite ari neite neite avo ke be ae ari embopo na ara eagora avo toare  
\v 15 eto otohu embo ta degi donda tapa amo otohura te God ke be ae ari sapura ari embopo ta degi donda tapa amo otohu manera. Eto ke be amo enana ta hotembari te jo te tapa amo sapura ari ra.  
\v 16 Eto enana na God ke be eagona ainge eagora te God ke be ari embopo na enana ta ari na harikeoi kiagora amo enana God ke be ae embopo ra. Eto enana God ta ke agi ae ari sasapura embopo amina ari nei javotoho ari inono aera.   
\c 2  
\s1 Eto Titus na ke erevi ahe poekasuja.  
\p
\v 1 Rate inena ahe poekasoa amo erevira. Eto embo God ta ke ingihe irari javotoho iresora amita ke avo pere ahe poekejo.  
\v 2 Eto embo be na ari erevi ara ahe poekejo. Eto wine peni mane indesora, te ari javotoho pere ururoro embomeni na kito embo be ra ainge ijiroro iresora amo ari tapa sio mane aisora te ke be hotembeto aisora eto humota ari na osa ari na memenga do puvurou kito amo mane toasora te sovera eto iresora.  
\v 3 Eto ainge dombo veha evohu na ari einge ara ahe poekejo. Eto evohu amina ari ainge ururoro amo embomeni na evohu emo otohu evohu ra ainge aisora. Eto embo nei ta javo mane aro sapura aisuja eto wine peni mane indesuja te vasiri javotoho ahe poekari evohu aisuja  
\v 4 eto ainge ururoro evohu ehaha na kito amita ivu te meniundi te osa ue daingeto simba aisora avo be kesora.  
\v 5 Eto umo oenga vasiri te ari te simba ue enana ta jo ta hotembari javotoho ue bande ta pure agari jivari te gajika toreka te eto embomeni ta osaga kito hondate ari te ivu ta ke agi ururoro embomeni na kito God ta ke sokova ke mane aisora.  
\v 6 Eto ainge dombo embo ehaha avo ejo enana ta ari te vasiri te simba are.  
\v 7 Eto inena no ari javotoho amina enana ta degi ahe kihira ejo kiore. Eto embomeni ahe poekihe kege ganini mane sio aisoa te embo humota ari na ke be pere ijiro  
\v 8 kitoho embo na no ke javotoho avo ingihe ungotenau ari te ke te avo ingito urumbari inono ae avoeto me kito ke mane asora.  
\v 9 Eto embo nei ta ke agi ue pure ari embomeni na pure mamo ta ke tapa avo ejo agi are. Eto ke mine mane sapura asora te pure ururoro pure mamo na kito tunga javotoho aisuja  
\v 10 eto pure mamo ta donda mane pegene aisuja te javotoho be na pure ururoro pure mamo na kito humota aisuja. Eto ainge ururoro embomeni na ungotenau orekari embo God ta ahe poekari avo kito uje asora.   
\p
\v 11 Eto God ta hondate ari puvuna amo embo tapa orekasi puvuna.  
\v 12 Eto God hotembae ue enda ta ujeje ta pahuore God ta hondate ari amina eoi ari avo toto God hotembeto ari javotoho jigama ue ungotenau vasiri avo kogue iragora  
\v 13 eto ari ainge ue God sovera te Iesu Keriso ungotenau orekari embo usasa te puvuresuja avo simba ere ora  
\v 14 eto embo amina ari sasapura tapa amo amita hamo na ombuto ungotena humbuto egau otohu ue amita toho be ara umbuna amo ungotena jo tapa na ari javotoho pere ara ena.  
\v 15 Avoeto ke erena erevi ahe poekejo. Eto ke emo na mane God ta ke avo eto ke eremina embo na sapura ururoro kito haeketo sovera ari ikejo umbare. Eto ari ainge ururo embomeni na umo kito ke be ari embo ke are.   
\c 3  
\s1 Eto embomeni na ari javotoho are.  
\p
\v 1 Eto ke mahu ijiera ainge dombo ejo no embomeni ingito enda ta tihi jigari embopo ta ke agi ue ari javotoho tapa avo asi nununga are.  
\v 2 Eto embo na embo nei ta javo humbuto au mane sapura aisuja te peka ari tunga humbari ke ainge ijie, namei amo embo peni umo isapa ke ainge ijie iresora.   
\p
\v 3 Eto iji mahu amo ungotena sarika ue ke agi ae degi nei sapura ta pahue enda ta uje neite neite na andirari amo ari sapura neite neite ue embo nei ta donda kito tumo ue mine tara asi ere uahera.  
\v 4 Rate ungotenau orekari embo God na kito jo enu osa ue  
\v 5 ungotena oreketo umbuna, amo ungotena ari jajavotoho avo eto ae rate amita jo ari na einge ena. Eto amita Ahihi Otohu na enu meni eha ingarako eto embo ehaha jajavotoho ea.  
\v 6 Eto God na ungotenau orekari embo Iesu Keriso ta pure avo kogue Ahihi Otohu ungotenau jo ta overekena  
\v 7 eto amita hondate ari amina ungotena embo sasapura mane embo jajavotoho ere ora amo vasiri daroho avo hoteto iresi simba ere ora.  
\v 8 Eto ke erena erevi ke be avoeto no embomeni ta degi ao ingora erena. Eto God humota ere ora embomeni na ke erevi ingihe ari jajavotoho asi tunga ikasora. Eto embo tapa amuna ke javotoho erevi ingihiroro amo ungota degi irari javotoho puvuresuja.  
\v 9 Rate Judea ta ke pepeni neite neite amite eto Judea ta Ohihi ta hihi sokova neite neite kakajekari avo kogue tumo ue boru jumbuhe ke sapura eagora avo tojo. Eto ke sokova amo be ambu ra.  
\v 10 Eto jujune ke aro ingesi jujumi ujekari embo amita degi ke ejo ingioi eto ao ingito toae au amo ehako ejo ingito toae au kito avo tojo oenga iroi  
\v 11 eto umo kogoa embo amo ari sapura na jo andirari avoeto ari sapura amita na pehumba aisuja.   
\s1 Ahari ta ke tutumo  
\p
\v 12 Eto na jajemo iji amo na da Nicopolis ei ta iresona avoeto embo Artemis te embo Tychicus te ikano no degi ta pambaro kito umo etokito nau degi ta puvujo.  
\v 13 Eto enda ta ke pepeni papeni simba ari embo Zenas te embo Apollos te degi ta pahue indari te donda nei do jigama ue pambasora avo pere hondate ejo pambari pere are.  
\v 14 Eto ungotenau embomeni na kupi pegogo ambo ue ombari asari humbasi amo jo tapa na pure tunga iketo pure javotoho asora amita kiari avo umbara erena.   
\p
\v 15 Eto embomeni tapa namote mihera amina umo ere pekihera. Eto embomeni dago osa ue God humota eagora avo ere pekihera, ejo ingore.  
\p Eto God ta hondate ari ungota degi iroi.