\id ROM - 19/3/85 Larsen Orokaiva (Ehija dialect); changed backslash codes 3-Mar-2003 E.Bibilo 
\h Romans 
\toc1 ROMANS 
\toc2 Romans 
\toc3 Romans 
\mt1 ROMANS  
\c 1  
\s1 Paul na ahari erevi Rome ekalesia ta degi kajena  
\p
\v 1 Na Paul na Iesu Keriso ta pure ari embo apostel eto God ta duru javotoho embo ta degi hande ana jage eto umbuna avoeto nanena ungo Rome ekalesia ta degi ahari erevi ere kajihena.  
\v 2 Eto duru javotoho puvuresuja avo God na embo ta degi oje ena avo peroveta na ke ototohu avo mahu kakajekea  
\v 3 amo God ta Meni ungotenau Bada Iesu Keriso amina enda ta veto visi asuja amita ke avo kakajekea amo erevira, Iesu Keriso amo King David ta degi eto puvurarira  
\v 4 eto amina peheto Ahihi Otohu ta sovera peni be amina vasiri te erena avo kogue God ta Meni be ra ainge erera.  
\v 5 Avoeto amita javo avo enda embomeni tapa na ke be ijie avo ambo ambo ara God na na apostel ikena avoeto God ta hondate ari na enda tapa ta pahue ke hande ere ona  
\v 6 avoeto ungote tapa Iesu Keriso ta toho ava God na umbuna.  
\v 7 Avoeto ungo tapa God na osa ue amita toho ava siriketo humbunu Rome enda ta miheva amita degi ahari erevi ere kajihena amo ungota hondate ari te peka te avo God Mamota degi eto Bada Iesu Keriso ta degi ta eto puvuroi.   
\s1 Paul na Rome ta pambuto  
\s2 ke asi uje ere ua  
\p
\v 8 Eto ke kihi ta amo na Iesu Keriso ta javo ta God ta degi osa ari ere ikihena amo ungo God humota ere ova amita ke amo enda tapa ta sigeto ere pahua.  
\v 9-10 Eto na God ta ke agi ue amita Meni ta duru javotoho hande eagona avoeto na ungo hotembihe iji tapa pari eagona amo God na kiarira eto God na uje eto kito pambari degi hirikau pambuto ungo kesi pari ere ovona.  
\v 11 Amo Ahihi Otohu ta hondate ari avo hande eto humbuto sovera ava pambuto ungo kesi uje ere ona  
\v 12 eto erena amo na God humota eagona ainge ungo God humota eagova avo eto ungote tombu mine kia ue sovera ari mine umba asora.  
\v 13 Eto na enda nei nei embo ta degi pambuto pure ue pure ta ve avo umbagona ainge dombo ungota degi pambuto humbasi uje ere ona te nau namei kamei ungo be kivujo, ari neite neite na peikihei mihena.  
\v 14 Eto pure nau amo God na enda nei embomeni “School” kiari te “School” kiae embomeni te amita degi pambana ikena  
\v 15 avoeto ungo Rome ta miheva embomeni ta degi pambuto duru javotoho hande asi tunga ere ikihena.   
\s1 God ta duru javotoho amita sovera  
\p
\v 16 Avoeto Keriso ta duru javotoho hande ururono ingito ke be aisuja embo amo God ta sovera na pehari sapura amita avo oreketo humbuhurono ke hande ue me mane kesona. Eto duru emo nau Judea embomeni ta mahu hande ea avo enda nei embomeni ta degi hande ere ona  
\v 17 eto duru amita ke susu amo God na embo ta degi ari javotoho erevi asi ere harikihia, amo embo na God humota ururou kito God na embo javotoho ke aisuja, amita ke amo God ta ke ta mahu kajari mihia amo erevira, “Humota ari embo amina vasiri hambasuja”.   
\s1 God na embo tapa ta degi tumo ere ua  
\p
\v 18 Eto embomeni na enana ta ari sasapura neite neite amina God ta ke be avo teto hatihe eagora avoeto God ta tumo na uhu i ta eto veto embo tapa ta hamo ta veaguja avo God na harikeoi kiagora  
\v 19-20 amo God na uhu te enda te ena iji te eto puvuto eha emite amo God ta daroho irari ta sovera te eto amita ari tapa amo embo ta tihi na mane kiagora te amita ari avo ingeni hajire araha arahata kiagora avoeto God ta tumo avo tiumbeto pambari degi avo irae bera.  
\v 21 Eto enana God kia te God amo enana ta God mane ke ijie humota ae, osa kageni ae, hotembari sasapura ta pahuo jo mume enu  
\v 22 enana ungo oenga kiari embopo ke ijie hotembari jajavotoho toto  
\v 23 God usasa te daroho iraguja avo kuho sindeto ungota ingeni na embo ta tombu ta di ta o ta o koso o ta tombu avo ove eto God ke ere ijiahera.  
\v 24 Avoeto God na enana tonu hamo ta ujeje sasapura aita pahue me kiari, hamota tongopa mine ara ere ora.  
\v 25 Eto ari amina God ta ke be avo toto ke sokova ta pahue donda ingeni na ari avo humota ue donda tapa ari God avo ere toruhora. Eto God jakeka ari avo daroho iroi, amen.  
\v 26 Eto ari ainge avoeto God na enana tonu me kiari ta vasiri avo ujeje neite neite ue ere pahora amo enana ta airi te tapa na ivu jimbari toho avo toto pambuto evohu nei ga sesena eagora  
\v 27 eto ainge dombo embo na amita ae jimbari toho avo toto pambuto embo nei ga sesena asi uje isapamane eagora avoeto ari sasapura ta hajire amo mahu ue ere kogora.  
\v 28 Eto God ta kiari avo enana hotembae uo God na tonu enana ta uha sapura enu ari sasapura mane ara ena aita ere pahora.  
\v 29 Amo ujeje sasapura te ari sasapura neite neite eagora amo erevira, embo nei ta donda kito uje ari, embo nei tari pehari, boru jumbari, ke sokova ari, viso ari, embo nei hihi tirari,  
\v 30 embo nei ta javo sapura ari, eto God uje ae ari, na na ijie umo oenga jakeka ari, namei ta degi hoviro ari, eto ainge ue sapura nei avo asi jombure ue emamo ta degi agi ae ke peive eagora  
\v 31 eto hotembari irae, humota ae, jo ari irae osa ari irae embomeni  
\v 32 amina God na enana ta ari sasapura ta hajire ikau kogue pehasora amo enana mahu kiari rate toae ue embo nei nei kihi humbuto ue jakeka eagora.   
\c 2  
\s1 God na embo tapa sirikasuja  
\p
\v 1 Eto umo embo peni retemo isapa re amo inena God ta ari sirikari amo mane tiumbeto pambasoa te embo nei ta ari siriketo pehumba ere oa amo ari no te tapa umo oenga pehumba ereoa.  
\v 2 Eto ungotena kiari amo God na embo ta ari sasapura siriketo ke be na hajire ikasuja  
\v 3 te umo embo teho na embo ta ari avo sirikaroa te umo te tapa ari sapura vahai avo ereoa avoeto God na ari sapura ta hajire ikasuja amo daingeto tiumbeto pambao?  
\v 4 Eto God na no ari sapura ta hajire mahu ikau kiaehea te inena jo haperekau aja to aote mane ao avo God na iji koso be jo oi umo simba ere ua te God ta hondate ari avo uje ae ereoete?  
\v 5 Amo no jo ngahia amina jo haperekae mihiro God na ke be ta ari sirikari iji te amo God na no degi ta tumo pajire be aisi simba ere ua,  
\v 6 iji amite God na embo ta ari siriketo mine inono ta ikau kesora  
\v 7 amo embo amuna God ta usasa ta iresi jombure ue God ta uje avo pere ue sovera te iresuja embo amita degi God na vasiri ikau daroho iresuja  
\v 8-9 te embomeni tapa amuna ungota uje ta pahue God ta ke ga jujune ue ari sasapura ta pambasora amo God ta tumo na ikau memenga osaga keisora amo Judea embomeni na kihi kesora eto enda nei embomeni amo ambota kesora  
\v 10 eto ari jajavotoho embopo amo God na au usasa te peka te na otohu ta iresora amo Judea embomeni na kihi peka humbasora te enda nei embomeni ambota peka humbuto iresora  
\v 11 amo God ta tihi ta embomeni tapa inono be ra.  
\v 12-15 Eto God na degi nei ta ari sasapura rete javotoho hambasuja amo hajire inonota ikau kesora amo God ta ke pepeni Moses ta degi enu kajena amo enda nei embomeni na eheketo kiae rate enana ta jo ta God ta ke mihia amina ari sasapura davore javotoho davore avo harikeoi kiagora avoeto ari sapura aisora amo God na hajire ikau keisora. Rate God ta ke pepeni kajari amo Judea embomeni na eheketo kiagora te ke avo ambo ambo ae eagora avoeto God na hajire ikau kesora. Avo embo God na ke ingari embo avo javotoho ke mane eaguja te ke agi ari embo avo javotoho ke eaguja.  
\v 16 Eto ari einge ere ona amo God ta iji ke kahari puvuresuja amikote Bada Iesu Keriso na embo ta hotembari jo ta ojikari tapa amo siriketo hajire ikau kesora amita ke amo God ta ke hande eagona aita mihia.   
\s1 Judea embomeni te God ta ke pepeni te amita ke  
\p
\v 17-19 Eto ungo Judea embomeni ta degi avo ikenu God na amita ke peni humbuto humota ue iragova eto God ta tunga humbari embomeni ke ijie na na ereva amite eto ungo meni isapa ta eto God ta ke ingito humbari irae ari avoeto sapura davore javotoho davore amo ungo ahepoekari kiari te God ta uje amite avo ungo kiari embopo avoeto tihi kuru ari embopo kihi humbuto pambari embopo eto mume ta irari embopo ta usasa ikari embopo eto  
\v 20 kiari umbae embomeni ahepoekari embopo eto meni isasaraho ta ahe poekari embopo amo ungo na eagova te do eto ungo oenga ainge ae eagove?  
\v 21 Eto pegene eagora ahe poekagova amo ungo mane pegene eagove?  
\v 22 Eto tiha pahia eagora ahe poekagova amo ungo mane tiha pahia eagove? Eto ungo God ingeni na ari uje ae embopo ungona enana ta jakeka ari bande ta pegene mane eagovete?  
\v 23-24 Eto ungo God ta ke peni humbari embo avoeto ungo embo peni ke ereva te God ta ke peni avo poekihe God ta javo eagove sapura eaguja eto God ta ke kajari mihia amina harikihia amo erevira “Ungo Judea embomeni ta ari avo enda nei embomeni na kogue God ta javo ere urumbihera.”  
\v 25 eto ungo Judea embomeni na dago God ta toho ke ijie hamo kakamba eagova te God ta ke peni avo poekasova amo hamo kakamba eagova amita ke avo irae asuja  
\v 26 rate enda nei embomeni na God ta ke pepeni avo agi ue hamo kakamba ae rate God na kito embo nau be ra aisuja avoeto ungo Judea embomeni amo hamo kakamba ue God ta ke pepeni poekagova  
\v 27 te enda nei embomeni hamo kakamba ae amina God ta ke agi eagora amina ungota degi pehumba aisora.  
\v 28-29 Ke erena amita be amo erevira Umo Judea embo tombu kiari amina mane eagoa te no jo te hotembari te tapa amina eagoa ainge dombo God ta ke kajari avo kogue hamo kakamba ari amina God ta toho mane asoa te no jo te ahihi te tapa na asoa amo God ta toho aisoa amo embo na ungota hamo kogue pehumba eaguja te no jo avo God na kito osa eaguja.   
\c 3  
\s1 Ungote God vahai avo humota ahera  
\p
\v 1 Eto ungo Judea embo avoeto hamo kakamba ari avoeto tunga javotoho avo?  
\v 2 Ungo tunga javotoho evujo. Eto God ta ke amo embo nei ta ikae rate ungota degi ikena  
\v 3 ke be amo ungona God ta ke ambo ambo asi oje ava te ungo nei uhoho na toruheva te God na ungota degi oje ena amo toaute?  
\v 4 Mane toasuja te embo tapa na ke sokova eagora te God amo ke sokova embo mane ra te amita ke amo God ta ke ta einge kajari mihia “Eto embo na God ta degi eto kesi ke asora te God na ke be pere aisuja”.  
\v 5 Rate enda embo ta hotembari sokova na ke einge eagora amo ungotena enda embo ta ari sasapura neite neite amina God ombuto umbagore God amo embo peni eaguja  
\v 6 amo ungotena ari sasapura amina eoi God ta degi usasa puvaguja do avoembo God na ungotenau ari sasapura ta hajire ikau memenga kioro?  
\v 7 Amita ke be avo kito enda embomeni ta ari sasapura ta hajire mane ikaehija amo amita degi usasa ere puvutuhua avoeto embo ta ari sasapura kito tunga javotoho aehija,  
\v 8 ke ere kogova erevi ke be mane rate sokova einge amo nanena ahepoekari ke ijie embo nei na ke sokova na eagora amo erevira “Ungo ari sapura neite neite evujo God ta javo peni ai” ke ainge amo nanena ari ke eagora te ke ainge hande ari embo amo God na osaga memenga ikau kesora amo ungo tohora.   
\s1 Embo tapa amo ari sasapura embopora.  
\p
\v 9 Avoeto ungotena ke do aro? Ungotena Judea embo javotoho eto enda nei embo amo sapura ke arote? Ainge manerate, na ke mahu ehene ingeva amo Judea embomeni te enda nei embomeni te tapa ari sasapura embopo avoeto inono inonora te  
\v 10 God ta ke ta mahu einge kajari mihia erevira, “Ari jajavotoho ari embo irae be iraera.  
\v 11 Eto ke ingari embo irae eto God jombure ari embo irae.  
\v 12 Embo tapa na God kuho sindeto degi sapura ta ere pahora avoeto ari javotoho embo irae be irae.  
\v 13 Embo tapa ta pe ta amo embo ta kovari use ahikeore masa puvaguja aingeko eto ivivi na ke sokova eagora amo o jihuri ta saruka pe pekihi ta iraguja aingekora.  
\v 14 Eto enana ta pe amo hoviro javiro na enetarira.  
\v 15 Eto embo ta orosa veaja tiukasi huhevagora  
\v 16-17 eto enana peka umbae avoeto enana ta pambari degi amo osaga te sosou purisa te mihia  
\v 18 eto enana amo God jakeka ari hotembae be ra,” ke ainge kajari mihia.  
\v 19 Eto God ta ke pepeni amo Judea embomeni ta degi ikena amo enanana be ingora ikenu umbua te enda embomeni tapa na na ari sapura embo manera ke ainge avo mane asora te God na enana ta ari sapura ta hajire ikasuja avo kito ke mine mane ara ena.  
\v 20 Avoeto embo amuna God ta ke pepeni avo ambo ambo ururou God na kito embo erevi javotohora ainge mane aisuja te embo ta ari sapura amo God ta ke pepeni mahu kajari mihia amina humbuto ikau araha ta puvurou embo amina amita ari sapura do aingere amo be kesuja.   
\s1 God na embo au javotoho asuja  
\s2 degi amo erevira  
\p
\v 21-22 Rate embomeni na daingeto God ta tihi ta javotoho asora degi amo God na peroveta mamahu ta degi enu kakajekea avo ungotena eha ere kogora amo God ta ke pepeni agi ari amina ae rate Bada Iesu ke be ijie humota ururo God na kito embo javotoho ke aisuja amo Judea embo retemo enda nei embo re  
\v 23 eto embo tapa amo ari sasapura inono inono avoeto God ta usasa ta horari haite mane  
\v 24 rate ungotena embo jajavotoho ara God na ungotenau hande erevi ikena amo Iesu Keriso ta orosa na ungotena ombuna avoeto embo amuna orosa avo humota ururou God na kito embo javotoho ke aisuja.  
\v 25-26 Eto Iesu Keriso ungotenau hondate ari embo avo puvurae pekota God na ikenu puvuna amo embomeni na ari sasapura ere uahera amo God na kito tumo pajire be ere uahija amo tau pehaehera te Iesu ikau enda ta veto ari sasapura avoeto pehasuja avo hotembihe ari sasapura ta hajire avo sausau ikae tona, te mane jene ambu aisuja avo embo tapa kiagora ungotenau irari iji te Iesu Keriso ikenu puvuto enana ta eto ungotenau ari sasapura avoembo pehena avoeto embo amuna Iesu humota ururou amita ari sasapura ta hajire mane ikau kesuja te God ta tumo avo peiketo embo avo humbasuja.  
\v 27 Avoeto embo ta ari jajavotoho na God ta tumo ombuto uhurou kogue embo javotoho ke aute? Ainge manera. Ungotena ari jajavotoho ari embopo ke ijie iresora amo God na kito be mane hotembasuja te Iesu humota ururoro God na kito embo jajavotoho ke aisuja.  
\v 28 Avoeto embo na God ta ke pepeni etokito agi aisora te God na mane orekasuja te Iesu humota ururoro amina ungotena orekasuja avo ere kogora.  
\v 29 Eto God mo Judea embomeni ta God rete? Ainge mane rate enda embomeni tapa ta God ra,  
\v 30 rate God nei irae vahai amina dago Judea avoeto hamo kakamba ari embomeni Keriso humota ururoro kito embo jajavotoho ra ainge aisuja ainge dombo enda nei embomeni hamo kakamba ae amina Keriso humota ururoro embo jajavotoho ke aisuja.  
\v 31 Amo humota ari amina orekihirou God ta ke pepeni amo toarote? Ainge mane rate ungotena God humota ari amina amita ke pepeni amo agi eagora.   
\c 4  
\s1 Abraham na God humota unu  
\s2 embo javotoho ke ena.  
\p
\v 1 Eto dagota Ohihi Abraham avo ungote keisira, amita ari jajavotoho amina God ta tombu ta embo javotoho enute mo amita humota ari na embo javotoho enu?  
\v 2 Eto Abraham na amita ari jajavotoho na God ta tombuta embo javotoho aehija amo embo na kito jakeka ahera te God na Abraham ta ari jajavotoho kito embo javotoho ke mane aehija  
\v 3 te God ta ke ta einge kajari mihia amo “Abraham na God ke be ena avo God na kito embo javotoho ke ena”, ke ainge kajari mihia  
\v 4 avoeto erena amo embona pure eto mine humbaguja amo teho hande umbae rate amita pure ta mine avo humbaguja  
\v 5 rate embo na amita ari jajavotoho God ombae rate ari sasapura embomeni na Keriso humota ururoro God na hande mine vahai oreketo  
\v 6 humbau God ta tombuta embo amo ari sapura embo mane avoeto tunga javotoho be aisuja amita ke amo King David na einge kajena.  
\v 7-8 “Eto embo amuta ari sasapura amo God na hotembeto toto ahurekau irae au embo amo tunga javotoho ururou God na ehako mane hotembasuja”.  
\v 9 Eto tunga javotoho ari emo Judea embomeni avoeto hamo kakamba ari embomeni na pere kiorotemo hamo kakamba ae embomeni te tapa kioro? Eto ke mahu ehena amo Abraham na God ke be ijie humota unu God na embo javotoho ke ena  
\v 10 amo humota ari amita kihi ta hamo kakamba enute ambota enu? Eto amita ke be amo ungotena kiari amo Abraham na kihi God humota ue humota ari amita hajire avo God na enu hamo kakamba ena  
\v 11 avoeto hamo kakamba ae mihahija amikote amo God na kito embo javotoho ke ena avoeto Abraham amo ungo hamo kakamba ue humota eagova embomeni amita mamo pere mane  
\v 12 rate hamo kakamba ae embomeni God humota eagora amita mamora.   
\s1 God na oje ena avo God humota ue humbagona  
\p
\v 13 Eto God na Abraham ta eto meniundi ta degi enda tapa avo ikasi oje ena amo Abraham na God ta ke pepeni agi ere uahija avoeto ikasi oje ae rate Abraham na God ke be ena avoeto Abraham embo javotoho ra ijie oje ena.  
\v 14 Te ungo ereva amo God ta ke pepeni agi ari embopo na God ta hotari humbasora ainge ke be kito embo tapa na hotari mane humbasora eto God na oje ena amo be ambu aehija.  
\v 15 Eto ungotena ere kogora amo God ta ke pepeni irae amo mane poekahera te God ta ke amo mihia avoeto ungotena God ta hotari humbasi uje ue amo etokito ke pepeni avo agi eagora te ke pepeni avo kaikari poekagora avoeto God ta tumo vahai avo hambasora.  
\v 16 Avoeto hotari oje ena avo God humota ururoro Abraham ta meniundi tapa ta degi hande ikau humbasora amo ke pepeni umbae embopo te humbari embopo te tapa amuna Abraham na God humota ena ainge dombo ue Abraham ta meniundi eto humbasora.  
\v 17 Eto ungotena Abraham ta meniundi tapa amita ke amo einge kajari mihia, “Abraham, umo nanena enda tapa ta mamo ere ikihena” ke ainge God na ena avoeto Abraham na embo pehari ta vasiri ikari God avo ke be ena amo ungotenau mamahara te ari mahu puvurari te puvurae te amo God ta tohora.  
\v 18 Eto Abraham evovo ena te amita hamo visi amo hotembae ue God humota unu God na oje ena amo amita meni puvuto amita poru ta enda pajire be puvuroja oje ena  
\v 19 te Abraham ta pajirari jua 100 enu eto amita ae evovo enu hini vavekena te hotembu hotembu ae  
\v 20 rate sovera humbuto God humota ue jakeka ena.  
\v 21 Amo oje ena avo mane toasuja te sovera inono avoeto aisuja avo hotembeto ke be ena  
\v 22 eto Abraham ta hotembari avo God na kito embo javotoho ke ena  
\v 23 eto God na kito embo javotoho ke ena amo Abraham vahai mane rate  
\v 24-25 embo ta ari sasapura ombuto humbasi God na ungotenau Bada Iesu tonu pehenu ehako jiginu vasiri te erena avoeto embo amuna God ke be ijie humota aisuja embo amite tapa avo God na kito embo javotoho ke aisuja.   
\c 5  
\s1 Keriso avoembo God ta tihi ta embo jajavotohora  
\p
\v 1-2 Rate Iesu Keriso na ungotena avoembo ena avoeto God humota ururoro God na kito Keriso ta hondate ari avoeto embomeni ta ari sasapura irae embomeni jajavotoho ke ijioi amita degi peka humbagora avoeto God ta usasa ta horasi tunga javotoho ue simba mihera.  
\v 3 Eto avo pere mane rate embomeni na uore osaga memenga kiagora amina hamo ta sovera ari humbuto ivo ue iresora avoeto tunga javotoho ereora.  
\v 4 Eto hamo ta sovera ari na Ahihi ta sovera ururou ari sapura ta sausau mane veasora te ungotenau vasiri avo Otohu ururou God humota ue iresora. Eto mihie God na ari javotoho avo ungotenau ikasuja avo simba ue sovera eto iresora.  
\v 5 Eto God na amita osa ari ungotenau jo ta overekena amo God na amita Ahihi Otohu avo ikenu veto puvuto ungotenau jo ta horeto mihie ke ijioi ingihe God ta ke avo ke be eagora.  
\v 6 Eto ungo kogova amo ungotena sovera humbari degi irae iji te Iesu na ari sasapura embomeni avoembo pehena.  
\v 7 Eto ke be amo enda embo na embo javotoho avoembo sari asi mane hotembaehija te iji nei nei ainge embo na embo nei javotoho be javotoho avoembo sari asi hotembagora  
\v 8 te God ta osa ari do aingere avo embo na kiagora ungotena ari sasapura te irari iji te ungotena avoembo Keriso ikenu puvuto pehena.  
\v 9 Avoeto ungotena ari sasapura embomeni avoembo Keriso na amita orosa overekenu vena amina embo jajavotoho ere ora avoeto God ta tumo avo Keriso na peikena.  
\v 10 Eto ke erena amo ungotena God ta degi kitoho ue mihahera amita Meni ikenu puvuto pehenu ungotena God ta degi peka humbuto Iesu ta vasiri na orekihirou irari javotoho hambasora  
\v 11 amo ungotenau Bada Iesu Keriso na ungotena avoembo pehena avoeto ungotena God ga namei ereora, avoeto osa ari na tunga javotoho ue mihera.   
\s1 Adam te Keriso te ta ke  
\p
\v 12 Eto ungo ke erevi hotembevujo, eto enda ta pehari amo irae rate embo Adam na ari sapura ena amina pehari hambuna. Eto ari sasapura amo enda tapa embomeni na eagora avoeto pehari amo enda tapa embomeni ta degi puvuna.  
\v 13 Eto God na amita ke pepeni Moses ta ikae puvurae kihi ta amo embomeni na ari sasapura ere uahera te God ta ke pepeni amo ikae puvurae avoeto God na ungo nau ke poekari embopo ke ainge ae  
\v 14 rate Adam na vahai God ta ke poekena avoeto Adam ta iji te eto pambuto Moses ta irari iji te embomeni na ari Adam na ena ainge mane rate ari sasapura neite neite ue ere pepehekihovora. Eto Keriso ambota puvuresuja amita ahe kihira avo Adam na ena.  
\v 15 Te Adam ta ari avo embo tapa ta degi ta amo pehari puvuna te ambota God ta hande javotoho be Iesu ta degi ta eto puvuna amo Adam na ena ainge mane, pajire be ra  
\v 16 amo eingera, eto embo vahai na ari sapura ena amo God na kito embo ta degi hajire ikau kogue pehasora te God ta hande amina ari sasapura isapamane ombunu irae ena avoeto hajire kiari irae.  
\v 17 Eto embo vahai ta ari sapura amina pehari irerembeto sigeto pahunu embo tapa pepehekagora te embo tapa amuna God ta hande javotoho avo humbuhe embo nei vahai Iesu Keriso amita degi vasiri eha humbuto God ta degi tunga humbuhe javotoho ari na Iesu Keriso ga heteto enda tapa tihi jigihe iresora.  
\v 18 Eto ke erena amo embo vahai na ari sapura ena avoeto embo tapa pepeheketo ari sasapura ta hajire kiaehera te embo nei Iesu na ari javotoho ena amina ari sasapura ta hajire kiari avo peikena avoeto embo tapa na vasiri eha humbuto irari haite ra.  
\v 19 Amo Adam na God ta ke peive eto embo tapa amita ari sapura ari embo ena te Keriso na God ta ke agi ena amina embo isapamane na embo jajavotoho aisora.  
\v 20 Eto God na amita ke pepeni avo Moses ta ikena amo ari sasapura pajirou embo tapa be kiagora ikena te ari sasapura papajihinu God ta hondate ari te tapa pajire be ena,  
\v 21 avoeto ari sasapura heteto pajire be eto embo ta degi pehari hande ena, te eha oroho amo God ta jo ari te hondate ari te avo tihi jigihe mihia avoeto ungotena God ta tombu ta embomeni jajavotoho eto Bada Iesu Keriso ta degi vasiri eha humbuto vasiri te daroho iresora.   
\c 6  
\s1 Bapataito ari ta ke.  
\p
\v 1 Avoeto ungote God ta hondate ari mo daingeto simba aro? Eto ungotena God ta hondate ari peni vahai be aja ari sasapura kaikari arote?  
\v 2 Ainge mane aisora te ungotena Iesu Keriso ga kajueto ari sasapura avoembo pepehekea avoeto ereto ari sasapura mane ue iresora.  
\v 3 Amita ke be amo erevira, ungotena Iesu Keriso ga pehari avoeto ungotena bapataito eagora amita ahe kihira avo eagora.  
\v 4 Amo God Mamo na amita usasa sovera te na Iesu Keriso pehena avo jiginu vasiri te erena avoeto amiga vasiri eha humbuto irora pehenu kovea aita bapataito eagora.  
\v 5 Amo Iesu pehena amiga kaju eagora avoeto Iesu na vasiri te erena ainge dombo ungotenanena vasiri te erasora.  
\v 6-7 Eto ungotena ere kogora amo ari sapura embo pehasuja amo ari sapura ehako mane aisuja te irae aisuja avoeto ungotenau hamo ta ari sapura amita sovera avo irae aja Iesu ga cross ta teo pehea amo ari sapura ta ke agi mane aisi ue pehea.  
\v 8 Eto ungotena Keriso ga pehea avoeto Keriso ga iresora avo ke be hotembagora.  
\v 9 Eto ke nei be hotembagora amo Keriso peheto vasiri te erena amo ehako mane pehasuja te pehari amo Iesu na dembarira.  
\v 10 Eto Iesu na iji vahai enda ta ari sapura avoembo peheto vasiri te erena amo God ga iraguja  
\v 11 ainge dombo ungo Iesu Keriso avoembo peheto vasiri te ereto God te Iesu Keriso te ga kajueto vahaita miheva.  
\v 12 Eto ungo hamo te visi te miheva amikote amo ari sasapura na tihi jigihirou ungo amita ke agi avojo.  
\v 13 Eto umo peheto vasiri te erari avoeto no utu rate ingeni rete tihi rete hamo rete amo ari sapura ara mane ikasoa te ari jajavotoho ara pe te God ta degi hande ikejo.  
\v 14 Eto umo God ta ke pepeni na andirari embo mane rate God ta hande humbari embo avoeto ari sasapura na umo mane tihi jigesuja.   
\s1 Ungotena ari sasapura ta embo manera.  
\p
\v 15 Eto ungotena God ta ke pepeni na andirae rate God ta degi vasiri hande ehei umbera amo ari sasapura aisora amo tehorete? Ainge manera te  
\v 16 umo embo amita pure tunga ikasoa amo embo amita ke avo pere agi asoa amo ari sasapura agi ue ere uma pehaote God ta ke agi ue ere uma amita tihi ta embo javotoho ao?  
\v 17 Eto ungo mahu amo ari sasapura ta ke agi ari embora te God ta ke hande ore ingihava avo be jigito miheva avoeto God osa ere ora.  
\v 18 Avoeto ungo ari sasapura na andirari avo bujeketo araha ta puvuto ke jajavotoho ta agi ari embopo ere ova.  
\v 19 Eto ke erena avo ungo be ingova timu hatirari ke na humbuto ere hona amo ari jajavotoho na tihi jigoute mo ari sasapura na tihi jigou? Eto iji mahu amo ungota hamo na ari sasapura isapamane be ere uaeheva avoeto jandireketo ari jajavotoho avo otohu ue amita ke agi ari embopo evujo.  
\v 20 Eto iji mahu amo ungo ari jajavotoho na tihi jigae rate ari sasapura na ungo tihi ere jigihahija, iji amikote amo ungota degi ari javotoho puvunute?  
\v 21 Na ere kogona amo ungota degi me kiari te pehari te avo puvuna.  
\v 22 Rate ungo ari sapura na andirari avo God na vujekehei amita pure embopo ere ova, amo amita pure ere uma Otohu ue vasiri te daroho iresova.  
\v 23 Eto ari sasapura ta mine amo pehasora te God ta hande amo Bada Iesu Keriso ta degi vasiri daroho humbuto iresora.   
\c 7  
\s1 Embo evohu jimbari ta timu hatirari ke  
\p
\v 1 Eto nau namei kamei ungo God ta ke pepeni amo Moses ta iji te ikena avo ungo kiari embopora, eto ke pepeni amina ungo vasiri te iragova amo peikarirate pehasova amo ungo mane peikasuja avo ungo kiarira.  
\v 2 Eto ke erena amo eingera. Eto evohu na amita ivu vasiri te irirou amo mane toasuja te ivu pehau toasuja amo God ta ke pepeni amina mane peikasuja.  
\v 3 Rate ivu pehae mihirou evohu amina amita hamo embo nei ta ikasuja amo tiha evohu rate ivu pehau embo eha jimbasuja amo ke pepeni amina mane peikasuja.  
\v 4 Avoeto nau namei kamei ungotena God ta ke pepeni mamahu avo toasi Keriso ga kajueto pehea te God ta toho be eto pure amita be avo umbara God na jiginu Keriso ga vasiri te erea.  
\v 5 Amita be amo ungotena hamo ta ujeje sasapura agi ari iji te God ta ke pepeni na haekasi unu ari sasapura uje isapamane ere umihe pepehekeo.  
\v 6 Rate ungotena God ta ke pepeni na andirari amita degi pepehekeo vujekenu arahata pahue God ta Ahihi Otohu ta ke agi ue iragora amo ke pepeni kajari amina ae rate vasiri ehaha na eagora.   
\s1 God ta ke pepeni te ari sasapura te amita ke  
\p
\v 7 Avoeto ungotena ke do aro? God ta ke pepeni amo sapura ke aro? Ke ainge mane aisora te ari sasapura do aingere avo God ta ke pepeni na eoi kiagora amo erevira, embo nei ta donda humbasi jo ta sirikagora amo sapura rate teho amo mane kiaehera te God ta ke pepeni amina haekeoi kiagora.  
\v 8 Rate na God ta ke peni avo hotembihe nau jo ta kajeoi embo ta donda humbasi uje isapamane eagona avoeto God ta ke pepeni irae amo ari sasapura ta hajire mane kiaehena.  
\v 9-10 Eto mahu kihi ta amo na God ta ke pepeni avo kiae avoeto vasiri te mihahena te ihiketo kogue ari sasapura jo nau ta irerembenu nau Ahihi pehari avo kia, amo na God ta ke pepeni agi eto vasiri humbana God na ikena te ai ta amo pehari pere hambuhana.  
\v 11 Amo erevira, na daingeto iresona amita degi amo God ta ke pepeni amina degi ena te ari sapura degi ai ta pahue amina ke sokova ijinu ingiho God ta ke pepeni amina nau Ahihi amo teo pehena.  
\v 12 Rate ungotena ere kogora amo God ta ke pepeni amo sapura mane rate ke Otohu jajavotoho embo ta irari daingeto iresora avo God na ikena.  
\v 13 Rate donda jajavotoho amina ahihi nau avo tenu pehenute? Ainge mane rate nau ari sasapura amina tenu pehena, amo ungotenau ari sasapura amo sapura be sapura avo be kiagora God no amita ke pepeni avo ikena amita jo ta ari sasapura irerembeto amita sovera na ahihi nau tenu pehena.   
\s1 Ungotenau jo ta hotembari heriso  
\s2 amina isoro mine ara ereora.  
\p
\v 14 Eto ungotena ere kogora amo God ta ke pepeni uhu ita puvurari rate namo enda embora te ari sasapura ta ke agi ue amita pure eagona  
\v 15 amo na uje eagona donda avo toto uje ae donda avo uje ue kaiketo ue na oenga embo nei ta ari ko ere one ainge ijie eagona.  
\v 16 Eto ari uje ae eagona avo ue God ta ke pepeni avo ke be eagona avo poeketo me kiagona,  
\v 17 avoeto ari sasapura amo hotembari na hotembeto ae rate jo ta irerembeto jo ta kajeoi eagona.  
\v 18 Amo ari jajavotoho asi uje eto tunga ere ikihena te ari avo inono ae avoeto nau jo ta amo ari jajavotoho irae rate ari sasapura avo pere mihia.  
\v 19 Eto na ari jajavotoho asi amo pe na eagona te ehako ari sasapura eagona  
\v 20 amo na ari sapura toasi eagona te toae eagona amo na embo nanena ae rate nau jo ta ari sapura amina eoi eagona.  
\v 21 Avoeto jo nau ta ari einge emo mihia, na ari jajavotoho asi uje eagona te ari sapura emo hoi ta irae rate namote mihia  
\v 22 eto nau jo ta amo God ta ke pepeni mihia avo osa eagona  
\v 23 te ari sasapura pepeni te tapa nau jo ta mihia avo eto enana heriso na isoro ue na ari sapura ta tipura embo arako ereona.  
\v 24 Ajao! Na sapura embo eto nau hamo na nau Ahihi kihi humbuto pehari degi ta ere pahua amo amuna oreketo humbau?  
\v 25 God na ke ijirou Bada Iesu Keriso na nau ahihi oreketo humbasuja avoeto na God osa mahainge eagona, te ke erena amo erevira, na jo nau na God ta ke pepeni agi eagona te hamo nau amo ari sasapura ta ke agi eaguja.   
\c 8  
\s1 Ungotenau ahihi ta irari  
\p
\v 1 Eto ungotena Iesu Keriso ga kaju eto iresora amo ungotenau ari sasapura ta hajire mane ikau kesora,  
\v 2 amita be amo ungotena Iesu Keriso pehena amita Ahihi Otohu ta sovera na ungotena ari sasapura te pehari te na pundurari avo vujekena avoeto arahata ere pahora.  
\v 3 Amo ungotenau hamo ta uje sasapura isapamane avoeto God ta ke peni agi ue ungotena oenga sapura vujekari inono ae rate God na amita Meni ikenu puvuto embo sasapura ta hamo umbuna avo ungotena ari sasapura ta pene ikihe ari sasapura avoeto ungotena ombuto humbuto pehena.  
\v 4 Amo God ta ke pepeni avo agi eto amita hamo na ombuto pehena avoeto ungotena hamo ta uje amo ambo ambo ae Ahihi Otohu ta hondate ari amina God ta ke pepeni simba eagora embopo avo God na kogue Iesu ta pure avoembo embo jajavotoho ke eria.  
\v 5 Ari sasapura mahu neite neite ta pambari embomeni na hamo ta uje amita tunga ere ikihera te nei uhoho Ahihi ta pambari embomeni na uhu i ta ari amita tunga ere ikihera  
\v 6 irari mahu avo tunga ikasuja embo amo pehasuja te ahihi ta irari avo tunga ikasuja amo tunga jamo ari te peka te hambasuja.  
\v 7 Amita be amo vasiri mahu ta tunga humbari embo amo God ta kitoho amina God ta ke pepeni amo agi ue ambo ambo ari inono ae ra  
\v 8 eto ari mamahu agi ari embopo amita ari amo God na kito osa mane aisuja.  
\v 9 Rate ungo amo God ta Ahihi Otohu na ungota jo ta mihia avoeto ungo ari sasapura mamahu ta ke agi mane eagova te Ahihi ta ke agi eagova te embo amuna Keriso ta Ahihi jo amita ta umbae amo Keriso ta toho manera.  
\v 10 Eto no hamo avo sari aisuja te Keriso no jo ta iresuja avoeto no Ahihi amo God na javotoho ari avoeto vasiri te iresuja.  
\v 11 Eto no Ahihi na Iesu pehena amo jiginu vasiri te erena ainge dombo Ahihi no jo ta iresuja amo ainge hamo no jigou vasiri te erasuja amo amita Ahihi no jo ta mihia avoeto ainge aisuja.  
\v 12-13 Eto nau namei kamei ungotena hamo ta ujeje sasapura avo agi ue amo pehasora avoeto ari ainge avo mane aisora te Ahihi Otohu ta sovera na hamo ta ujeje tapa tau pehau vasiri te iresora.  
\v 14 Eto God ta Ahihi ambo ambo ari embopo amo God ta meniundira.  
\v 15 Eto ungo God na amita Ahihi ikehei umbua amo God joru ue pure avo ikae rate ungo God ta meniundi be avo Ahihi amita amo ikehei umbeva amo amita Ahihi ta sovera na “God nau Mama” ainge amo eagova  
\v 16 amo God ta Ahihi na ungotenau jo be ta “Ungo God ta meniundi ra” ainge ijioi ingihe eagora.  
\v 17 Eto ungotena amita meniundi avoeto Keriso na hotari humbija vahai avo ungotenane humbasora. Eto Keriso na osaga te memenga te kito God ta usasa ta horena ainge dombo ungotena Keriso na osaga te memenga te kina avo kogue amita usasa ta horasora.   
\s1 Ungotena God ta usasa ta horasora  
\p
\v 18 Eto uhu ita usasa puvurou kogue tunga javotoho aisora eto na ere kogona amo ungotena enda ta osaga memenga tapa amo isapa rate God ta usasa kesora amina pajire be aisuja.  
\v 19 Eto iji ke kahari iji te uhu te enda te na God ta meniundi mo do aingere avo God na au puvuroro kesi simba ue mihera.  
\v 20-21 Eto donda tapa God ta ingeni na enu ari sapura ai ta puvutuhunu kito amita hamo ta saruka ena avo donda iji kombu te vujekasuja avo simba ere ua amo iji kombu te vujekau embo pehari te donda pepehekari ari te au irae au God ta meniundi ga usasa ta horeto tunga jamo jamo te iresora.  
\v 22 Eto ungotena ere kogora amo God ta donda tapa amina amo evohu na meni humbasi ue memenga kiagora ainge donda tapa amo memenga kogue mihovora.  
\v 23 Eto donda avo pere mane rate ungotena God ta Ahihi Otohu humbari embopo amina ungotenau jo ta sisisasi ijie daroho irari ta hamo eha ikau humbuto amita meniundi be asora avo simba mihovora.  
\v 24 Amo ungotena God humota ue amina donda javotoho avo ikasi oje ena avo simba ara ungotena oreketo umbuna. Eto donda avo mahu humbahera amo God humota mane ahera.  
\v 25 Te God na umbara oje ena amo eha umbae rate ambota humbasora avoeto God humota ue simba ue mihovora.  
\v 26 Eto ungotena ivo ambu embopo avoeto God ta Ahihi Otohu na hondate eto einge eaguja amo ungotena pari ari ta degi jombure eagora amo Ahihi Otohu na ungotenau jo ta pari amo ijiore ingihe si javotoho be na God ta degi eoi ingioi  
\v 27 God ta Ahihi Otohu na God ta uje tapa deire amo kogue embomeni ta pari avo God ta degi si na ijioi God embo ta jo kiari embo avoeto Ahihi Otohu ta hotembari tapa avo kiaguja.  
\v 28 Eto ungotena ere kogora amo tunga javotoho ari te tunga osaga ari te tapa ungotenau degi ta puvaguja amo God na amita tunga humbari embomeni amina sovera eto ari javotoho avo kiagora ikeoi puvaguja amo God ta ujena embomeni amita toho ara umbuna amita degi ikeoi puvaguja.  
\v 29-30 Eto God na enana mahu humbasi sirikena amo amita Meni Bugo ta hajire vahai avo humbuto amita ambo jimbi ara sirikena avoeto God na enana jage eto humbuto umo oenga enu embomeni jajavotoho ere ora avoeto God na au usasa amita ta horeto iresora.   
\s1 Amita Meni Iesu Keriso ta pure avoeto  
\s2 God na ungotena osa eaguja.  
\p
\v 31 Rate ungote ke mine amo do aro? Eto ungotena God na simba ere ua te embo amuna mane sovera eto dembasuja.  
\v 32 Eto God na amita Meni amo oreto umbae rate ungotenamo avoembo ikenu puvuto sari ena avoeto ungotena ere kogora amo donda nei pepeni te isasaraho te tapa amo mane orasuja te ungotenamo avoembo ikasuja.  
\v 33 Eto God na ungotena amita toho ara siriketo umbuna amo embo amuna pehumba au? Eto God na pehumba aute? Ainge manera te God na ungotenau ari sasapura egenu irae enu ungotena embo jajavotoho be ena  
\v 34 rate embo amuna ungotena pehumba au?, Iesu na pehumba aute? Ainge mane rate amina peheto vasiri te ereto God ta ingeni be ta arumbeto mihie ungotenamo avoembo God ta degi ke ijie mihia avoeto ungotena amina mane pehumba aisuja.  
\v 35 Eto Keriso na ungotena osa ere ua amo ari deina peikau? Osaga na memenga na beuje na iri bo irae amina boru jujune eto tari pehari na peikaute? Amina mane peikasuja  
\v 36-37 te ungotena osaga memenga ere kogora amo God ta ke ta einge kajari mihia, “Eto ungotena God ke be eagora avoeto iji tapa ungotenau pehari avo simba uore embopo na o sheep teto hevarako uore mihovora” ke ainge mihia amo ungotenau osaga memenga tapa amo Iesu Keriso ungotenau osa ari embo ta sovera na ari tapa erevi ungotenanena dembagora.  
\v 38-39 Eto ke amita be nanena ere kogona amo pehari rete vasiri rete Anera rete embo tihi jigari rete donda mahu irari rete ambota puvuroute sovera ari i ta rete enda ta rete tapa be tapa God na ari amina God ta osa ari ungotenau degi ta ikari amo Bada Iesu Keriso ta degi ere kogora avoeto peikari inono ae be ra.   
\c 9  
\s1 Paul na amita namei kamei Judea  
\s2 embomeni avo hotembeto osaga ena amita ke  
\p
\v 1 Eto na ke sokova ae rate Keriso ta javota ke be erena amo Ahihi Otohu na nau jo ta ei ingihe erena  
\v 2 amo nau namei kamei Judea embomeni ta degi do puvuresuja avoembo osaga ere kogona.  
\v 3 Eto nau namei kamei Israel embomeni na Keriso ke be ara ari erevi ahena amo nanena ungo hondate ari embo ke eto God na ungo humbuhe namo avo tau pehaehena  
\v 4 te God na Israel embomeni amo amita meniundi avoeto humbuto amita sago kiari te usasa te eto ke kajari peni te isapa te eto daingeto God jakeka asora amite tapa iketo enana ta degi hotari ikasi oje ena.  
\v 5 Eto Israel embomeni ta mamone mamahu na God ta ke kihi umbua eto Keriso enana ta hondate ari embo puvuna amo enana ta jeka hoka ta orohuta puvuna amita javo amo i be ita, God ta peka ta daroho iresuja. Amen.  
\v 6 Eto God ta ke Israel embomeni ta degi ikihe oje ena amo God na toae rate enana ta ujena toa te amita be amo hamo na Israel embo rate ungota jo avo Israel embo mane.  
\v 7 Eto Abraham ta meniundi tapa amo Abraham ta meniundi be mane avoeto amita ke kajari erevi be hotembevujo “Eto no ahihije ta mamo be amo no meni Isaac na aisuja”.  
\v 8 Eto ke amita be amo God ta meniundi be amo hamo te visi te na ae rate God ta ke mahu ikari avo ingihe ke be ari embomeni amo God ta meniundi eto Abraham ta meniundi bera.  
\v 9 Eto God na Abraham ta ae na meni umbaja oje ue ke einge ena, “Eto na iji ikehena inonota puvuto mihirono no ae Sarah na meni humbasuja” ainge enu  
\v 10 meni Isaac humbunu pajito embo eto Rebecca jimbuto ve ikena.  
\v 11-12 Rebecca urete eto hini ta meni heriso irari iji te God na ke einge ena, “Meni ambo Jacob amina embo peni au meni bugo amo ambo meni amita pure embo aisuja”, eto ke ainge ena amo meni javotoho davore sapura davore avo kito ae rate God ta uje na ena  
\v 13 amita ke avo einge kajena “Na embo Jacob avo osa ere ona te embo Esau avo na uje ae ra”.  
\v 14 Ke ainge God na ena amo embo sirikari sapura ue enute? Ainge aera te  
\v 15 Moses ta degi ke einge ena avo kivujo “Na uje nau na embo kogurono jo aisuja amo embo kito hondate aisona”, ke ainge God na ena  
\v 16 amo embo kito hondate ari amo embo na oenga pure ngahia eto God ta hondate umbae rate God ta jo ari na hondate ari ikeoi embo ta degi puvaguja.  
\v 17 Amita be amo God na Pharoah ta degi ke einge ena, “Umo nanena humbuto ikehene embo peni ehea amo nanena no degi ta isoro ururono enda embomeni tapa na kogue nau javo te nau sovera te avo kogue ke be ara umo nanena ikehene hetehea”. Ke ainge ena  
\v 18 amita be amo God ta uje na embo nei kito jo eoi hondate eaguja eto embo nei amo kito toi jo ngahia eagora.   
\s1 God ta tumo te jo ari te  
\p
\v 19 Te ungona nau degi ta ke einge ereva amo “Eto God na umo oenga embo ta jo eoi ngahia eagora amo God na daingeto embo amo pehumba au? Eto God na uje amita avo ururou embo na amita uje avo ari haite rete?” Ungo ke ainge ereva  
\v 20 te na ungota degi ke erevi erena amo ungo embo teho rate ke ainge ijie God ta degi pehumba ereova, amo erevira, ovu enda na ari amina ovu ari evohu ta degi ke einge aisuja “Umo do eto nau degi ta ari einge mo ehe?” Ainge aisuja ainge dombo ungo na ke amo ereva  
\v 21 amo ovu ari evohu na enda humbuto ovu heriso eto ovu nei kiari ovu eto ovu nei sio jigama aisora ovu amo teho uje amita na eaguja.  
\v 22 Eto ari ainge dombo amo God na embo ta degi ere ua amo God na embo ta ari sasapura avoembo amita tumo do aingere amite eto amita sovera te avo embo na kiagora ue embomeni sasapura tau pepehekihe hajire kiaehera te  
\v 23 avo toto simba ue mihie embo amita toho mahu siriketo umbuna avo amita usasa javotoho kiagora ue toto mihouva.  
\v 24 Eto embomeni amo ungotena Judea rete enda nei embomeni rete amo God na mahu siriketo umbuna amo ungotenamora.  
\v 25 Eto God na enda nei embomeni te tapa amita toho ara humbasuja avo peroveta Hosea na einge kajena, “Eto embomeni amo nau mane rate nane embomeni nau ke aisona eto enda amita embomeni amo na osa ae rate nanena nau tunga humbari embomeni ke aisona,  
\v 26 eto ungo enda aita mihaheva amo nanena ungo embomeni nau mane ke ijiena te embo nei na ungo enda ai ta miheva avo kogue God vasiri te amita meniundi ke aisora”. Ke ainge peroveta Hosea na kajena.  
\v 27 Eto Peroveta Isaiah na Israel embomeni kogue ke einge ena, “Eto Israel embomeni na eva hora aingeko embo isapamane arote aisora amo God na embo heriso kaheketo humbasuja.  
\v 28-29 Amo porere mane aisuja te sausau enda embomeni ta degi hajire ikau kesora,” Ke ainge Isaiah na eto ke nei einge ena, “Eto uhu te enda te ta Bada God sovera isapamane te na jo enu Israel embomeni heriso be amo tae tona te toaehija amo da Sodom te Gomorrah te na ea aingeko tapa tau pehaehera.”   
\s1 Paul na Israel avoembo pari ena  
\p
\v 30 eto ke erena emita tutumota ke peni mo do ano? Rate ke peni re erevira, enda nei embomeni na embo jajavotoho asi jombure ae rate God na oenga kito ehei embo jajavotoho ere ora amo embo amuna God humota ururou God na kito embo javotoho ke aisuja.  
\v 31 Eto Judea embomeni na God ta ke pepeni tapa avo agi asi tunga ikea te God na kito embo jajavotohora ainge aera  
\v 32 te do eto ke ainge aere? Amita be amo ungo ke be na God humota ae rate ari neite neite amina embo jajavotoho asi ere uahera, te enana na God ta Koro amo amita Meni Iesu Keriso amita hamota teto tin ambu eto vea  
\v 33 amita ke amo einge kajari mihia, “Ungo kivujo, da Jerusalem ta tiri Zion ai ta nau Koro ikano mihirou amo ungo teto tiambueto veasova te ungo na Koro avo kito ke be ijie amo me mane kesova”.   
\c 10  
\p
\v 1 Eto nau namei kamei, nau jo tapa na Judea embomeni nau be avoeto God na oreketo umbaja jo tapa na pari eagona.  
\v 2 Eto enana ta jo tapa na God uje ue amita pure asi uje eagora amo na kiarira te God ta ke be amo enana be kiaera.  
\v 3 Te God na eoi embo jajavotoho eagora te enana na ari avo kito kiaesira ue God na ari javotoho ari avo toto ungo oenga eto javotoho asi eagora te  
\v 4 Keriso na vahai God ta ke pepeni tapa amo inono ta ehei irae ehija avoeto embo amuna humota ururou amo God na kito embo javotoho ke aisuja.   
\s1 God na embo tapa oreketo humbasi uje ere ua  
\p
\v 5 Eto Moses na ke einge kajena, “Embo amuna God ta ke pepeni avo tapa inono ta agi aisuja amo God na kito embo javotoho ke ijirou daroho irari ta vasiri hambasuja”.  
\v 6-7 Te God humota ururoro kito embo jajavotoho ke aisuja amita ke amo Moses na einge kajena, “Embo amuna uhu ita vihari inono re? Eto embo amuna embo pehari ta degi be ari inonore? Ke ainge jo no ta mane hotembasoa” ke ainge Moses na kajena te ke be amo ungotenau orekari embo Keriso mahu uhu ita eto puvuna eto mahu vasiri te erena.  
\v 8 Eto ke ainge mane aisova te God humota ari ta ke dago na hande eagora amo einge kajari mihia “Eto God ta ke amo hoi ta mane rate no ivivita mihia eto no jo ta mihia.”  
\v 9 ke amita be amo erevira, Iesu pehenu God na enu vasiri te erena avo embo amina jo te tapa ke be ijie ivivi na Iesu amo nau Bada ra ainge aisuja embo amo God na kito oreketo humbasuja  
\v 10 amo ungo na jo te tapa na ke be ereva avoeto God na kogue embo jajavotoho ke aisuja, eto ungota ivivi na ereva avoeto oreketo humbasuja.  
\v 11 Eto God ta ke kajari ta amo einge mihia “Embo amuna humota aisuja amo me mane kesuja” ke ainge mihia  
\v 12 te Judea rete enda nei rete amita javo ai ta irae rate enda tapa embo amuna Bada ta hondate ari humbasi penunu aro ikau umbaro inono aisuja, amo enda tapa amita Bada aisuja.   
\s1 Enda nei embomeni na javotoho ari ere humbuhora  
\p
\v 13 Avoeto enda tapa ta embomeni amuna Bada ta javo ta jage aisora amo Bada na oreketo humbasuja.   
\s1 Eto Israel embomeni ta degi  
\s2 serikari ta ke iraera.  
\p
\v 14 Eto enanana Bada ke be ae aisora amo daingeto Bada jage aro? Eto enana amita ke embo na ae ingae aisora amo daingeto ke be aro? Eto embo na pambuto ke hande ae ingae amo daingeto ingoro?  
\v 15 Eto embo na ke hande ari embo ikae pambae amo daingeto ke hande au? Avoeto ke einge kajari mihia “Ke javotoho hande ari embo ta utu uruhu amo ingari javotoho.”  
\v 16 ke ainge mihia te Israel embo nei nei na ke avo ere ingihera te ambo ambo ae avoeto amita ke amo Isaiah na einge kajena, “Bada, ungotenau ke hande ere ora te embo amuna ke be erei? Enana ingito ingarako ereora”.  
\v 17 Avoeto Keriso ta ke avo hande uore embo na ingihe ke be eagora  
\v 18 te embo na Keriso ta ke avo enana Israel embomeni ta degi hande uerete aere? Amita ke amo einge kajari mihia, “God ta ke amo enda susu ta ihiketo pambuto tutumo be ta irae arira” ainge mihia te  
\v 19 Israel embomeni na God ta ke ere ingihera te be ingae rete? Ainge manera te amita ke amo God na ijinu Moses na kajena amo eingera, “Eto nanena enda nei embomeni humbuhurono amo ungo Judea embo na kito dago umbae ereoi ainge ijie osaga kesova amo enana enda nei kiari irae ke eagova embomeni avo humbuhurono ungo tumo aisova” ke ainge kajena  
\v 20 avo Isaiah na ke erevi kajena amo ke be pere na kajena, “Enana enda nei embomeni na na jombure ae rate hambuhera, eto enana na jage ae rate teho nanena ehene na be ere kogora”,  
\v 21 te Israel ta ke amo einge kajena. “Eto iho vujari ta eto pambuto mume sihukarita amo nau Judea embomeni humbasi no degi ingeni ere jujurukihena te enana ta jo ngahia oi ke ingito puvurae ereora”. Ke ainge God na ijinu Isaiah na kajena.   
\c 11  
\s1 God na Israel embo huna humbasuja.  
\p
\v 1-3 Eto ke nei aisona amo God na amita embomeni egikenute? Ainge aera te namote tapa na Israel embo eto Ahihi nau amo Abraham eto embomeni nau amo Benjamin ra eto God na amita embomeni mahu kina amo God na egikaera. Te peroveta Elijah na Israel embomeni ta jo ngahia avo pehumba eto God ta degi hariketo ke ainge ena avo ungo be hotembevujo, “Bada God, Israel embomeni na no peroveta tapa tehere pepehekehera eto no pene gaga jigito aimbehera na oenga mihena te namote tapa taro pehana ere ora”, ainge enu  
\v 4 God na ke mine einge ena, “Ke ainge amo erea te embo tapa 7,000 ainge avo embo nau ara simba ereona amina god ingeni na ari javo Baal avo paunge teteri eto humote pain ae mihera” ke ainge ena  
\v 5 avoeto eha oroho emo God na embo amita toho avo uje amita na humbuto simba ere ua.  
\v 6 Amo embo ta ari jajavotoho amina God ombae rate God ta uje na embo humbaguja te embo ta ombari avo God na mane humbasuja te embo ta degi hande ere ikihia avoeto uje amita na embo humbaguja.  
\v 7 Te ke do aro? Eto Israel embomeni na God kesi jombure ere uahera te hambae ea te God na oenga kito siriketo humbija embomeni amina God ere hambuhora. Eto God na siriketo umbae tona embomeni avo ke be mane kiagora God na tihi ere peikiha  
\v 8-9 amita ke amo einge kajari mihia, “Eto God na enana ta siro ehei bouka ehei tihi na kiae eto oje na ingae amo God na ainge ena amikote puvuto eha emite ainge pere mihera”. Amita ke amo David na einge kajena, “Eto enana ta hajae vajae amo ihive aingeko kaiketo mihirou ai ta horaro timbau hajire kesora.  
\v 10 Eto tihi ta taro kuru au ari sasapura ta bouka humbuto ku okokombeto daroho iresora.” ke ainge David na Judea embopo God kiae avoembo kajena.  
\v 11 Eto eto ingari ke nei asona amo erevira, Israel embomeni na teto tiambueto veto mihera amo mane ereto pambarote? Ereto pambasora te enana ari sasapura eto veto mihera enda nei embomeni God na oreketo uhua avo kogue enana daingeto humbaehija avoeto tunga osaga kogue mihera.  
\v 12 Eto ke erevi be hotembevujo, Israel embomeni na God egiketo ari sasapura ta vea avoeto God na enda nei nei embomeni avo ere uhua avoeto enana ta degi ari javotoho puvija, eto Judea embomeni te tapa humbasuja amo ari javotoho be enda tapa ta ainge puvuresuja.  
\v 13 Eto ungo enda nei embomeni ta degi ke erena, amo ungota degi ke hande ana God na ikehija pure amo nau degi ta dombo be rate  
\v 14 pure erevi ereona amo ungo God ta degi javotoho ari ere uhova avo embomeni nau na kito humbasi uje ururoro God na kito oreketo umbaja pure erevi ereona.  
\v 15 Te God na Israel embo tona avoembo enda nei embomeni na God ga namei ere ora te Israel embomeni ehako humbasuja amo pehari ta eto eha erarako aisora.  
\v 16 Eto embo na pure ta indari be isapa humbuto God ta degi ikasuja eto pure ta indari tapa amo God ta toho ue otohu aisuja eto nei ji susu amo otohu ururou eto ji amita hatu iki tapa amo otohu aisuja.  
\v 17 Eto Israel embomeni ta ke amo ji ‘Olive’ da arahata iraguja amita ke ta humbuto puvuresona. Eto God na ji ‘Olive’ ta hatu sasapura amo jeto kahumbena eto ji ‘Olive’ ahoe ta amita hatu avo humbuto puvuto da ta ji ‘Olive’ amita ikenu kakambuketo ji susu ai ta indari javotoho te umo javotoho te ungo na indie ere papajikihova.  
\v 18 Te ungo ji hatu mahu kahumbari avo kogue sapura ke ijie ungo oenga na na avojo, eto ungo na ji susu amita degi indari ikae rate ji susu amo ke mahu God na Abraham ta degi ikari avoeto ungota degi indari ere ikihia.  
\v 19 Te ungo ke ereva amo ji hatu sasapura avo kahumbeto gosuketo dago avo ikehei kakambuketo mihera avoeto ungo na dago javotoho ke ereva  
\v 20 te kivujo enana amo God ke be ae avoeto kahumbena te ungo amo God ke be ijie humota eagova avoeto miheva te ungo ‘Na na’ avo, teho kogue irivujo,  
\v 21 eto hatu be amo tona avoeto ungo ahoe ‘Olive’ ta hatu na God toasova amo ungo te tapa toasuja.  
\v 22 Eto God amo osa ari embo eto memenga ikari embo avoeto ungo be hotembevujo, eto enana egikea amita degi memenga ikari embo rate ungo humota ururovo amo ungo simba aisuja te ungona toasova amo ungo tiukau irae aisova.  
\v 23 Eto Judea embomeni na jo haperekau God ke be ijie tunga humbuhuro amo God na humbuto ji hatu mahu kahumbena aita ikau kakambukasora, ari ainge amo God na ari inono be ra  
\v 24 amita be amo erevira, ungo enda nei embomeni amo ahoe ‘Olive’ avo humbuto da ‘Olive’ ta ikehei kambuheva amo uho ungota be mane ra te Judea embomeni amo da ‘Olive’ ta hatu be avoeto ehako humbuto ikau tohota uhu be aita kambasora.   
\s1 Israel embomeni amo God  
\s2 na oreketo humbasuja.  
\p
\v 25 Eto nau namei kamei, ke be vahai araha ta mane, ma ta ojikari avo nanena ano ingova uje ere ona amo ungo God na humbari ke ijie na na eagova avo eto ke erevi ano ingova erena, Israel embomeni huna amina God ta degi jo ngahia ue mihera avoeto enda nei embomeni God na humbau inono au  
\v 26 Israel embo nei huna God na oreketo humbasuja, amita ke amo einge kajari mihia, “Eto enana ta orekari embo amo tiri Zion ta eto puvuto Jacob ta embomeni na God ta degi tumo eagora avo au irae au  
\v 27 enana ta degi noma kaeto enana ta ari sasapura avo umbano irae aisuja” ke ainge God na ena.  
\v 28 Eto Judea embomeni na God ta duru javotoho avo ingari uje ae ue God ta degi kitoho ereora amo ungo enda nei embomeni avoembo ereora. Rate Judea embomeni ta ohihi mamahu amo God na kihi umbuna avoeto Judea embomeni amo embomeni amita ke ijie osa ere ua  
\v 29 amo mahu kihi hondate asi ke ijie humbuto noma kajena avoeto enana mane toasuja.  
\v 30 Eto ungo enda nei embomeni na God ta degi ari sasapura ere uaeheva ainge dombo Judea embomeni na eha oroho God ta degi ari sasapura ore ungona God ta jo ari avo kogue ere uhova.  
\v 31 Eto God na ungota degi jo ere ua avoembo iji ambota amo enana Judea embomeni God ta degi ari sasapura ereora avo God na jo au humbasuja.  
\v 32 Eto Judea embomeni te enda nei embomeni te tapa avo God na jo ururou hondate au kesora avoeto embomeni tapa na God ta degi ari sasapura ara tona.   
\s1 God jakeka aisora.  
\p
\v 33 Ajao, God ta javotoho ari te hotembari te kiari te, eva ta ukomo ainge peni vahai be eto God na embota ari sirikari amo embo na kiae ra eto God ta ari neite neite tapa amo embona kiari inono ae ra.  
\v 34 Eto embo amuna Bada ta hotembari kogue oje kahau? Embo na kogue ari inono ae ra.  
\v 35 Eto embo amuna God ta degi hande ikihirou hande mine ikau? Hande mine ikari inono ae ra.  
\v 36 Eto uhu ta donda te enda ta donda te tapa amo amita sovera te kiari te na umo oenga avoembo ena avoeto amita degi usasa daroho iresuja, amen.   
\c 12  
\s1 Ekalesia ta irari.  
\p
\v 1 Eto nau namei kamei ungo God jakeka ari be erevi ava erena. God na ungo jo ere ua avoeto ungota ari avo otohu ue vasiri ungota avo God ta degi pene ikihirovo God na kito tunga javotoho aisuja.  
\v 2 Eto ungo enda ta hajire avo mane aisova te ungota hotembari avo jandireketo hotembari eha humbuto God ta uje pere avo kogue ari javotoho davore God na kito osa aisuja ari avo pere ue irivujo.  
\v 3 Eto God na na osa eto amita pure nau degi ta ikena avoeto ungota degi oje ere kahihena amo ungo embo vahai vahai na ungo oenga embo peni ke mane aisova te ungo vahai vahai amita degi God na ungota humota ari do ikena avo pere kogue inono ta evujo.  
\v 4 Eto ungotenau hamo ta donda amo neite neite ra, bende rete tihi rete pe rete amita pure amo oenga oenga ra.  
\v 5 Eto ainge dombo ungotena tapa amo Keriso ta hamo avoeto ungotena hamo vahaira  
\v 6 te God na amita hondate ari na amita pure ara amita sovera ari amo oenga oenga ikaguja avoeto embo amina God ta ke harika aja sovera ari ikena avoeto amita humota ari na pure avo aisuja,  
\v 7 eto embo unduresi sovera ari umbuna embo amina pure avo ue embo unduresuja, eto ahe poekari ta sovera ari humbasuja embo amina ahe poekasuja,  
\v 8 eto oje kahari embo na God ta ke hande aisuja, eto hande ikari embo na hande aisuja, eto tihi jigari embo na embo simba ue iresuja, eto hondate ari embo amina osaga kiari embo avo osa osa ari na tunga javotoho ari na unduresuja.  
\v 9 Eto embo osa asova amo hamo na mane osa asova te ari sasapura uje ae ue ari jajavotoho avo ue jo tapa na osa evujo.  
\v 10 Eto namei kamei ari na embo nei amo otohu embo ke ijie osa mine ara evujo.  
\v 11 Eto Bada ta pure ue pegogo mane aisova te jo tapa na tunga vahai ta iketo pure evujo.  
\v 12 Eto ungo God ta degi hotari humbasova avo hotembihe tunga javotoho evujo. Eto osaga memenga puvuresuja amo mane toasova, javajava te pari ue irivujo.  
\v 13 Eto ungota namei kamei ekalesia ta ujeje deire avo mihirou kito amo hondate evujo, eto ekalesia embo damina puvuresora unduresova avo peni bera ainge ijie jireki poeki eto kito poeto kogue eto unduvujo.  
\v 14 Eto embo na ungota degi ta memenga ikau kito amo mane hoviro javiro asova te God na javotoho ari enana ta degi ikaja pari evujo.  
\v 15 Eto embomeni tunga javotoho ue mihera amiga tapa tunga javotoho evujo, eto embomeni osaga kogue si ijie mihera amiga tapa si evujo.  
\v 16 Eto embomeni ga peka ta irivujo, eto ungo embo pepeni ke ijie na na ijie umo oenga kiari embo mane asova te embomeni ga tapa umoro evujo.  
\v 17 Eto embo na ungota degi ta ari sapura au kito amo mine ari sapura mane aisova te embo tapa ta tihi ta ari javotoho davore avo eto kogoeto evujo.  
\v 18 Eto ari ungota avo jigito kogoeto embo tapa ga peka ta irivujo.  
\v 19 Eto nau namei kamei ungo na ari sasapura ta mine mane ikasova te God ta tumo avo hotembeto tovujo amita ke amo einge kajari mihia, “Eto ari sapura ta mine amo nanena ikasona”, ke ainge Bada God na eria  
\v 20 avoeto ari nei amo einge evujo. Eto ungota kitoho beuje ururou kito amo indari te umo te avo ikevujo indore. Eto ainge ururovo amo me kito havo havo ue pambasora.  
\v 21 Eto ari sasapura na ungo dembasuja avoeto simba ue ari jajavotoho na ari sasapura ta degi isoro eto serikevujo.   
\c 13  
\s1 Gavana ta ke agi asora.  
\p
\v 1 Eto ungo gavana ta ke agi evujo. Eto gavana ta sovera amo embo nei na ikae rate God na vahai ikaguja avoeto gavana ta pure ari embopo ta sovera ari God na ikeoi humbuto pure eagora.  
\v 2 Avoeto embo amuna gavana ta ke ingae aisuja amo God na gavana ta sovera ikari avoeto gavana na embo amita hajire ikau kesuja.  
\v 3 Eto ke agi ari embo na joru mane aisuja te gavana ta ke agi ae embo amina gavana joru ue iraguja avoeto embo amuna joru ae teho iresi uje eto kito amo gavana ta ke agi ururovo kito embo javotoho ke aisuja.  
\v 4 Eto gavana amo God ta pure ari embomeni avo ungo hondate ara God na ikena avoeto ungo na gavana ta ke ikari poekasova amo hana kesova avoeto joru ue irivujo, eto God na no degi ta tumo ere ua avoeto gavana na no degi ta memenga ikau kesova.  
\v 5 Eto ungo gavana ta ke agi ae asova amo ungota ari sasapura avoeto ungota jo ta hotembu hotembu ue iresova eto nei amo memenga ikaro kesova avo joru ue irivujo.  
\v 6 Eto gavana amo God ta pure ari embo eto ungo simba eagora avoeto enana ta mine avo tax koro ikevujo.  
\v 7 Eto tax koro rete haja vaja rete Otohu ari rete humote pain rete amo enana ta mine ikasora ainge ijie ikevujo.   
\s1 Osa mine ara ari ta ke.  
\p
\v 8 Eto embo ta hondate ari mine avo mane ikasi ke asova te ikevujo humbau irae ai. Eto hondate ari vahai emore mane irae aisuja avoeto osa ari mine ara ue mahu ainge iresuja, eto ari ainge avo ue amo God ta ke pepeni avo inono ta aisova.  
\v 9 Eto ke erena amita be amo erevira, God ta ke pepeni amo umo tiha mane aisoa, embo mane tao pehasora, pegene mane aisoa embo nei ta donda kito humbasi jo ta mane sirikasoa eto ke nei nei amite tapa mihera ke amita susu be amo erevira, “Umo oenga osa ere oa ainge dombo no namei osa ejo”.  
\v 10 Eto namei osa ue amita degi sapura mane aisoa te osa ari amo God ta ke pepeni tapa amita susura.  
\v 11 Eto ungo ari ainge ue amo iji eha avo hotembihe ereto heteto irivujo, ungotena mahu amo God ke be ijio oreketo umbuna avoeto ungotena pambasora iji amo auvehija  
\v 12 amo Keriso puvuto ere hua amo mume irae ururou iho vujasuja avoeto mume ta ari avo toto usasa ta ki emi avo jigito heteto irivujo.  
\v 13 Eto mumete ari sasapura ue umo indie ke siosao ijie tiha paiha ue boru jujune ke ijie embo nei ta donda kito si ijie isoro eagora avo toto iji ta ari avo jigama evujo.  
\v 14 Eto hamo ta ujeje sasapura amita gamo ta mane huhevasova te Bada Iesu Keriso ta ari avo humbuto turereketo irivujo.   
\c 14  
\s1 Namei ta ari deire kito pehumba avojo.  
\p
\v 1 Eto embo nei na God humota ue amita osa ari avo ombasi ue ke pepeni neite neite jigama eaguja embo amiga mane boru jumbasova te pekihe umbuvujo.  
\v 2 Eto ungo ere kogova amo embo vahai amina nei do hotembae ue indari neite neite tapa avo indie iraguja eto embo nei amo God humota be ae avoeto o tapa God ta tihi ta indahu ke ijie ina pere indaguja.  
\v 3 Rate o indari embo amina o ajirekari embo ta degi ganini ijie embo sapura ke mane aisuja eto o ajirekari embo amina o indari embo avo pehumba mane aisuja eto o indagora amite eto mane indagora amite amo God na amo pure ari embo amita avoeto pekihe humbaguja  
\v 4 eto embo ainge eagora amo God ta ke avo ambo ambo asi uje ue eagora avoeto inena God ta pure ari embo ta degi mane pehumba asoa. Eto embo amina ari ainge ue amo hetautemo veau amo Bada na simba ere ua avoeto Bada ta sovera na jigou hetasuja.  
\v 5 Eto embo nei amo iji vahai vahai amo otohu iji ra eaguja rate embo nei amo iji tapa amo otohu ijira eaguja te ke peni be amo embo na amita jo ta do aisuja avo siriketo aisuja  
\v 6 eto embo nei na iji nei nei otohu iji ra eaguja amo Bada jakeka ijie otohu eaguja eto embo nei o indaguja amo God osa ue indaguja avoeto God jakeka eaguja, eto embo nei o ajirekaguja amo Bada otohu ue ajirekaguja avoeto amite tapa God jakeka ere ua.  
\v 7-9 Eto embo amo teho iroute mo pehau amo umo oenga ae rate teho iresuja amo Bada na oenga au iresuja eto pehasuja amo Bada na oenga au pehasuja amo embo pehari te vasiri te amita Bada aisi Keriso na peheto vasiri te erena avoeto ungotena teho iresora eto pehasora amo ungotena Bada ta meniundi ra.  
\v 10 Eto ungotena tapa amo Bada ta meniundi rate ungo nei uhoho amina namei ta ari nei avo kogue sapura ke ijiove nei uhoho na mine pehumba ereova amo sapura be avo ere ova te ke be amo ungotena tapa God ta tombu ta hetaro God na ungotenau ari sirikihirou ungotenanena God ta degi ke mine asora  
\v 11 amita ke amo einge kajari mihia, “Na vasiri te Bada nanena ke erevi erena, embo tapa na tombu nau ta heteto humotepain ue umo God ra ke aisora”. Ke ainge mihia.  
\v 12 Avoeto ungotenau ari tapa amita ke susu amo God ta degi harikaro ingesuja.   
\s1 Namei tiambueto veaguja simba evujo  
\p
\v 13 Eto ungotena pehumba mine ara mane aisora te ungotenau irari avo ungotena oenga kogue namei ta pambari degi avo mane peikaro teto tiambueto veaja simba aisora.  
\v 14 Eto Bada Iesu na ke ena amo na ere kogona amo indari nei sapura nei javotoho ra aera te embo nei na indari nei avo sapura ke ijie indesuja embo amo ari sapura aisuja aravora.  
\v 15 Eto indari emo no namei indahu avo namei hotembae ue inde kito amite tapa indie osaga ere kogua amo inena namei osa ae ue ereoa. Eto Keriso amo namei avoembo pehena te inena ari no amina namei ta degi ao ari sapura ta veasuja.  
\v 16 Eto ungota degi ari jajavotoho avo pambuto embo nei ta degi ta avo kito urumbaro simba evujo.  
\v 17 Eto God na embomeni amita toho siriketo humbuto tihi jigesuja amo indari amo ke peni mane rate embo ari javotoho ari te peka te tunga javotoho ari te avo Ahihi Otohu na hande eaguja avo ke peni bera.  
\v 18 Eto embo amuna ke avo be hotembihe Keriso ta pure ururou God na kito osa ururou embo na kogue ke be aisora  
\v 19 avoeto ari deina ue hondate mine ara ari amo aro ejeha au peka ta iroro avo ue hamo asora  
\v 20 eto God ta pure avo indari ta ke na mane avo sapura aisuja. Eto indari tapa amo javotoho rate namei na indari indirou namei na kito tiambueto veasuja amo sapura  
\v 21 avoeto namei na kito ari sapura aute avo hotembihe o rete mo wine rete mo donda deire avo be tovujo irae ai.  
\v 22 Eto umo indari ajirekari rete ari nei deire amo God te umo te aingeto ungo tohora te ke amo mane toasova ainge nei mane hande asova te umo oenga ke avo jigama ue amo no jo ta umo oenga pehumba mane asoa avoeto tunga javotoho ue iresoa.  
\v 23 Eto embo amita hotembari heriso avoeto indonote mane indono ainge eto na indesona ainge eto indesuja amo embo amita jo ta pehumba ere ua avoeto embo amo God ta tihi ta ari sapura ere ua.   
\c 15  
\s1 Sovera ambu embopo avo hondate evujo  
\p
\v 1 Eto ungotena Keriso humota ue sovera humbari embopo na ungotenau ujeje ta mane pambasora te embo nei sovera peni umbae embopo avo hondate ue iresora,  
\v 2 eto ungotena embo vahai na ungotenau namei na Keriso ta degi sovera ari umbaja ungote degi jombure ue iresora.  
\v 3 Ke ainge avo Keriso te tapa amita hamo avo hotembae rate amita ke avo einge kajari mihia amo “Bada God, enana na Umo urumbagora te bouka amo koho nau ta ere viviha” ainge kajari mihia.  
\v 4 Eto God ta ke ijioi kakajikihovora amo ungotenanena God ta ke susu be avo kiagora kakajekea, eto ke ai ta sovera ari humbuto osaga memenga puvuresuja te mane joru asora te God na umbara oje ena avo simba ue iresora.  
\v 5 Eto na pari ere ona amo ungo na Iesu Keriso ambo ambo ururovo ungotenau oje kahihe sovera ikari embo God amina ungotena jo vahai ari avo ikau  
\v 6 humbuhe jo vahai eto pe vahai amina ungotenau Bada Iesu Keriso ta Mamo God avo jakeka ijiroro amita degi usasa puvuresuja.   
\s1 Enda nei embomeni ta degi duru javotoho puvija  
\p
\v 7 Eto Keriso ta peka na ungo umbuhaja ainge dombo ungota peka mine ikara ururovo embo nei na kogue God jakeka aisora.  
\v 8 Eto erevi hotembevu, Iesu puvuna amo God na Judea ta ohihi hondate asi oje ena avoeto Iesu amo Judea embo hondate asi puvuna  
\v 9 eto enda nei embomeni na God ta jo ari avo enana na kito God jakeka ara puvuna amita ke amo einge kajari mihia “Eto ari no avoeto enda nei embomeni ta da ta enana ga umo jakeka ijie no javota haveni aisora” ke ainge eto  
\v 10 nei amo “Ungo Judea embomeni te enda nei embomeni te aingeto vahaita eto tunga javotoho evujo” eto ke nei amo  
\v 11 “Ungo enda nei embomeni Bada jakeka evujo eto ungo embo tapa Bada ta degi haveni evujo”.  
\v 12 Eto Isaiah na ke einge kajena “Eto embo Jesse ta meni King David amita ahije vahai amina ereto enda nei embomeni amita tihi jigari embo ururou kogue ke be ijiroro enana ta Bada aisuja”, ke ainge kajena.  
\v 13 Eto pari erena emo ungo God ke be ijirovo humota ari God amina ungota degi peka te tunga jamo ari te ikihirou humbuhe Ahihi Otohu ta sovera ari humbuto God na ambota ikau umbava oje ena avo simba ue tunga javotoho ue irivujo.   
\s1 Paul ta pure ta ke.  
\p
\v 14 Eto nau namei kamei na ungo humota ae ue teho kajae rate ungo oenga ahe poekari mine ara eto oje kahari mine ara ue tunga iketo ere ova amo na ere kogona te  
\v 15 God na pure nau ikena avoeto ari neite neite tapa erevi be hotembava ke ngahia na ere kajihena.  
\v 16 Amo na Iesu Keriso ta pure ari embo enda nei embo avoembo ikari avoeto pure avo ue ungota degi God ta duru javotoho hande ere ona amo enda nei embomeni Ahihi Otohu na egau God na enana ta degi pene javotoho umbaja ere ona.  
\v 17 Avoeto na God ta pure avo Iesu Keriso ga vahaita ere ona avoeto tunga javotoho ereona  
\v 18 te na ke erena emo embo nei nei na Keriso ta pure ereora avo ae rate nanena Keriso ta hondate ari na pure one enda nei embomeni na ingihe God ta ke ihiketo agi ere ora  
\v 19 amo Ahihi Otohu ta sovera na ari neite neite one kogora amo da Jerusalem eto pambuto da Illyricum kane ainge eto Keriso ta duru javotoho avo hande one ere ingihera.  
\v 20 Eto uje nau amo na embo nei ta tutuvi hurukari aita mane bande gerikagona te na oenga tutuvi huruketo bande gerikasona ke ainge eto God ta ke ingae embomeni enda nei ta pambuto Keriso ta duru javotoho hande eagona.  
\v 21 Amo God ta ke einge kajari mihia avo kogue eagona, “Eto kiae embomeni na kesora eto mahu ingae embomeni na ingito ke be aisora”  
\v 22 eto na pure ainge ere ovona amina ungota degi sausau pambae amore ere ovona.   
\s1 Paul na Rome embomeni kesi pambasuja.  
\p
\v 23 Eto na jua koso be ungo kiae enda nei nei eita pahue pure ere ovona avo pure ehene irae ehei  
\v 24 enda Spain ta pambasi pambuto degi ta heteto ungo te umoro isapa ue ungota pekari avo kito pambasona.  
\v 25-26 Rate na kihi amo ekalesia da Jerusalem ta mihera amita pure ta pambuto da Macedonia te da Achaia te ta ekalesia na koro siriketo enana da Jerusalem embo nei nei donda ambupu eto koro irae embomeni ta koro siriketo nanena ikana ijie hande ikehera avo ikasi pambasona.  
\v 27 Eto koro amo enana ta jo tapa na ikasi uje eto ikehera amo teho hande ae rate Bada ta ke avo Judea embo na enda nei embo ta degi hande ore ere ingihera avoeto hande mine haja vaja avo ikehera.  
\v 28 Avoeto na enana ta hande ikehera avo humbuto pambuto ungota ingeni ta iketo enda Spain ta pambasi pambuto ungote arumbeto umoro asona  
\v 29 eto na kogona amo ungote umoro ue Keriso ta osa ari avo mine kiara aisora.  
\v 30 Eto nau namei kamei Bada Iesu Keriso ta javota eto Ahihi Otohu ta osa ari na namo avoembo pari ururovo na degi ta pahue kitoho embo hambasona avo eto nau javota pari evujo.  
\v 31 Eto enda Judea jo ta Keriso kiae embomeni amina na tasora avoeto tiumbeto pambana eto Judea ekalesia na koro eremite tapa umbara amite tapa pari evujo.  
\v 32 Eto God na uje au kito amo na pambuto ungote jangu indie tunga javotoho asona  
\v 33 te God ta peka ungota degi iroi, amen.   
\c 16  
\s1 Pekari ta ke  
\p
\v 1-2 Eto ungotenau du Phoebe amo da Cenchreae ekalesia evohu ta pure ari evohu avo ungota degi puvuresuja amo ungo Keriso ta embomeni be kito avo pekevujo. Eto evohu amina embo isapamane te eto namote tapa hondate eaguja avoeto puvuto amina donda do uje au kito hondate evujo.  
\v 3 Eto evohu Prisca te amita ivu Aquila te amo namote Iesu Keriso ta javota pure ere uahera avo ere pekihena,  
\v 4 eto enana ta vasiri na na orekihie enana sari ari haite ea amo nanena vahai osa ae rate enda nei ekalesia tapa na enana osa ereora.  
\v 5 Eto ekalesia tapa enana ta bande ta horukagora amite tapa ere pekihena. Eto nau namei Epaenetus amina enda Asia ai ta kihi jo haperekenu Keriso ambo ambo ena avo ere pekihena.  
\v 6 Eto nei amo Mary na ungo embo pure ngahia ena avo ere pekihena.  
\v 7 Eto apostel embo pepeni Andronicus te Junias te amo nau ke vahai embopo namote tapa tipura uera amina na Keriso ambo ambo ae kihita amo enana embo heriso amina Keriso ambo ambo uera avo ere pekihena.  
\v 8 Eto nau namei Ampliatus avo Bada ta javota osa ere ona avo ere pekihena.  
\v 9 Eto ungotena Keriso ta pure vahai embo Urbanus te nau namei be Stachys te avo ere pekihena.  
\v 10 Eto embo Apelles amo memenga kina te toae Keriso humota ere ova amite eto embo Aristobulus te amita bande vahai embomeni avo ere pekihena.  
\v 11 Eto nau da Judea embo vahai Herodion amite eto embo Narcissus ta bande vahai embomeni Bada ta javota mihera avo ere pekihena.  
\v 12 Eto evohu heriso Tryphaena te Tryphosa te avo Bada ta pure ngahia be na ere ora avo ere pekihena. Eto nau du Persis amite tapa Bada ta pure ngahia na ere ua avo ere pekihena.  
\v 13 Eto Bada ta meni Rufus amite amita e te na aja nau na arako uija avo ere pekihena.  
\v 14 Eto embo javo Asyncritus Phlegon te Hermes te Patrobas te Hermas te enana amita namei kamei tapa enana amiga horukagora avo ere pekihena.  
\v 15 Eto embo Philologus te amita ae Julia te embo Nereus te amita du te Olympas te Keriso ta embomeni enana ga tapa mihera avo ere pekihena.  
\v 16 Eto Bada ta ke ta mune tavo mine ara ari amina osa mine ara evujo. Eto Keriso ta ekalesia tapa eita mihera amina ungo ere pekihera.   
\s1 Ke tutumo  
\p
\v 17 Eto nau namei kamei ke erena amo embo ta hotembari sokova na Iesu ta ke ahe poikihiroro amo ungo teto tiambueto veasova avoeto ari avo toto be kogue irivujo.  
\v 18 Eto embomeni amo Iesu Keriso ta pure ari embomeni mane rate ujeje sasapura ta pure ari embo amina ke gamo na poekihe ijiore ke kiae embomeni na ambo ambo eagora.  
\v 19 Eto ungona God ta ke avo ambo ambo ere ova amo embo tapa na kiari avoeto na nau jo tapa na osa ere ona. Eto ungo ari jajavotoho kiari embopo ue ari sasapura avo mane kesova te toava uje ereona.  
\v 20 Eto ari ainge ururovo jo jamo jamo ari ta God Mamo amina Satan humbuto ungota tombuta tau karaun eto veasuja avoeto ungotenau Bada Iesu ta hondate ari avo ungota degi iresuja.  
\v 21 Eto nau pure vahai embo Timothy te nau da vahai embo Lucius te Jason te Sosipater te na ungo ere pekihera.  
\v 22 Eto na Tertius nanena Paul ta pe ta ke erevi ingito ungota degi ere kajihena amo Bada ta javo ta ungo ere pekihena.  
\v 23 Eto na Paul embo Gaius amina na undurari javotoho ere ua amite ekalesia amita bande ta horukihera amite tapa ungo ere pekihera. Eto da ta koro simba ari embo javo Erastus te ungotenau namei Quartus te na ungo ere pekihera.  
\v 25 Eto duru javotoho amo Iesu Keriso ta ke avo hande eagona avo ungo na ingihirovo God na ungo jigou hetasova. Eto ke emo mahu be rate ojikari iraguja  
\v 26 avo enda tapa ta embomeni na daroho irari God avo embomeni na ke be ijie ambo ambo ara God na ijinu peroveta na kakajekea ke avo araha tambu ta harikeore ingagova.  
\v 27 Eto Iesu Keriso avoembo God kiari embo vahai amita degi usasa puvuresuja, Amen.