\id REV - 30/4/85 Larsen Orokaiva (Ehija dialect); changed backslash codes 3-mar-2003 by e.bibilo \h Revelation \toc1 REVELATION \toc2 Revelation \toc3 Revelation \mt1 REVELATION \c 1 \s1 Ari ambota puvuresuja amita ke John ta degi ikenu kajena \p \v 1 Eto book emita jo ta amo ari ambota do puvuresuja avo God na Iesu Keriso ta degi enu ingito amita pure ari embopo na iji isapa mihiroro do puvuresuja avo be ingora amita Anera ikenu puvuto pure meni John ta degi unu kogue kajena. \v 2 Eto God ta ke Iesu Keriso ta degi ikenu humbuto ehako John ta degi ikenu humbuhe amo ke be perekarira ainge John na ena \v 3 eto ari erei ta kajari amo porere mane sausau puvuresuja avoeto embo amuna ke erevi ehekaro ingito mane toasuja te be hotembihe tunga javotoho ari humbasuja. \s1 John na Ekalesia tapa 7 pekena \p \v 4 Na John nane ekalesia tapa 7 enda “Asia” jo ta mihera amita degi ke erevi ere kajihena. Eto embo mahu mihahija, eto eha mihia eto ambota iresuja eto amita avo arumba peni ai ta Ahihi tapa 7 areto mihera \v 5 eto Iesu Keriso amo God ta ari kito harikari embo eto vasiri te erari ta kihi humbari embo, eto enda ta kings tapa ta tihi jigari embo, aingeto amita degi ta eto ungota degi hondate ari te pekari te puvuresuja. Eto ungotena osa ari Embo Iesu na amita orosa na ungotena ari sasapura na andirari aravo bujeketo humbunu \v 6 embomeni amita toho eto priests ea avoeto God Mama ta ke agi ue iresora avoeto Iesu Keriso ta degi usasa te sovera te daroho iresuja aravora, \v 7 eto kivujo, amina johi ga puvutuhurou embo tapa na tihi na kogue avo tari embopo amite eto enda embopo tapa amite na osaga kogue sisisasi aisora, avo puvuroi ejo, aravora. \v 8 Eto Bada God na ke einge eria, “Na mahu iragona eto eha mihena eto ambota iresona avoeto iji susu te kombu te donda tapa simba ari Embo Sovera te amo namora”, ainge eria. \s1 John na Keriso kina \p \v 9 Eto na ungota namei John ungote tapa Iesu Keriso ta toho eto memenga te osaga te kogue sovera ari humbuto iragora embo nanena God ta ke avo ke be ijie Iesu humota eagona avoeto tipura ana ikeo tiuka javo Patmos ai ta pambuto mihene, \v 10 Bada ta jangu indari iji puvei God ta Ahihi Otohu ta sovera na jigei mihene nau kuho ta huin hindu ainge pajire be avo puvutuhoi ke einge ingena. \v 11 “Umo o hamo humbuto tapa do kesoa avo kaeto ekalesia tapa 7 eremita degi ikejo amo da Ephesus te da Smyrna te da Pergamum te da Thyatira, te Sardis te Philadelphia te Laodicea te amita degi ikejo”. \v 12 Ainge ijinu ingito amuna erei avo kesi egerembeto tutuvi gold na ari tapa 7 ainge avo usasa hamo ta tetembehere evekihera avo kehena. \v 13 Eto usasa ta jo ta amo Embo ta Meni avo heteto mihei kiarako ehena amita bo amo koso kaso tunga ta eto veto utu singi ta ari avo asukehija eto pupuri gold na ari avo temaketo heteto mihei kehena. \v 14 Eto amita siro amo parara be johi ainge eto o sheep ta hu ainge eto amita tihi amo ji peri vihiuja ainge kehena. \v 15 Eto amita utu amo auri ji ta ingagore eveketo pangaguja ainge eto amita ke hindu amo umo vuenga na hindu eaguja aingera. \v 16 Eto amita ingeni be ta amo kuro tapa 7 ainge jigito mihia eto asivo amo oiho oiho ti perekari avo amita pe ta eto puvutuhua, eto amita tombu amo iji na heri heri eaguja aingera. \v 17 Eto na avo kito joru ue veto amita utu ta peheto mihene amita ingeni be na nau siro ta tembihie ke einge ijija, “Umo joru mane asoa, na iji kombu ta eto iji susu ta irari embo \v 18 vasiri te daroho iragona. Eto na embo pepehekagora avo simba ue peheto pambuto iragora amita degi javo ‘Hades’ amita bokiri pe ikari jigito iragona. \v 19 Avoeto iji eha amita ari te ambota do puvuresuja amite avo eha ururono kogue kajejo embomeni eheketo kiore. \v 20 Eto kuro 7 ainge nau ingeni be ta mihia eto usasa 7 tutuvi hamo ta tetembehere mihia amita be amo erevira, kuro 7 amo ekalesia tapa 7 amita Anera eto usasa 7 amo ekalesia tapa 7 aingera.” \c 2 \s1 Ke erevi da Ephesus ta ekalesia ta degi ikena \p \v 1 Eto da Ephesus ta ekalesia ta ke hande ari Anera ta degi ke einge kajejo: Eto embo vahai amina usasa tapa 7 tutuvi hamo ta tetembari amita ugorota hembuhe kuro tapa 7 ingeni be ta jigito mihia amina einge eria ingivujo, \v 2 ungo na hamo ngahia eto pure ngahia ue ari neite neite avo ere ova eto ungo na ke sokova na ahe poekari embopo uje ae ue God ta apostero ke ijie ungota degi irari embopo ta degi eto kiari iketo enana ke be mane avo hambeva. \v 3 Eto ungona javo nau humota ere ova avoeto embo na eagore memenga osaga kiagova te pegogo eto toae hamo ngahia eto iragova. \v 4 Rate ungota sapura vahai eagove kiagona amo erevira. Amo ungona mahu kihi ta Keriso osa ue osa mine ara uove kiagona avo toto hu be ta heteheve irae ehija \v 5 avoeto jo hapereketo kihi ueva ainge dombo evujo. Eto ungo jo haperekae aisova amo na puvuto ungota usasa tutuvi hamo ta tembari avo umbano irae aisuja. \v 6 Rate ungota ari javotoho vahai amo na Nicolaitan\f Nicolaitans: \ft Enana amina ari sasapura ta gamo kesi uje isapamane ere uahera.\f*ari uje ae eagona ainge nombo ungo uje ae eagova. \v 7 Eto ungota oje irirou kito Ahihi Otohu na ekalesia tapa ta ke do eria avo ingivujo. Eto embo amuna sovera eto dembasuja amo ano God ta ‘Paradise’ ta horeto ji vasiri ta be indesuja. \s1 Ke erevi da Smyrna ta ekalesia ta degi ikena \p \v 8 Eto Da Smyrna ta ekalesia ta ke hande ari Anera ta degi ke einge kajejo: Eto iji susu ta eto pambuto kombu ta irari embo peheto ehako vasiri te erari amina ungota degi ke einge eria, \v 9 “Ungo memenga osaga kogue donda ambu teho mihovova amo na kogona te ungota ari javotoho amina ungo hajae vajae embopo ere ova. Eto Judea embopo nei uhoho na ungota degi ta pehumba ere ora amo na ere kogona te amo Judea embopo be manera te Satan ta toho uho na ere ora \v 10 eto ungota degi memenga puvuresuja avo joru avojo rate na ungota degi erena amo Satan na ungo nei uhoho avo eto kesi tipura ta ikau mihirovo iji tapa 10 ainge amita jo ta memenga ikaro osaga kesova. Eto enana na ungo taro pehasi ahumpa ue kito na egikae asova amo na ungota siro ta vasiri daroho irari na kogombasona. \v 11 Eto ungota oje irirou kito Ahihi Otohu na ekalesia tapa ta ke do eria avo ingivujo. Eto ke be amo sovera eto iresuja embo amita Ahihi mane pehasuja. \s1 Ke erevi da Pergamuna ta ekalesia ta degi ikena \p \v 12 Eto Da Pergamum ta ekalesia ta ke hande ari Anera ta degi ke einge kajejo: Embo Asivo ti oiho te oiho te jigama ari embo amina ungota degi ke einge eria”, \v 13 eto ungota da vahai embomeni ta ari sasapura isapamane amo Satan na da aita irarako oi kogona rate ungo na na ke be ijie javo nau humota eagova amo na kogona. Eto ungota da ai ta Satan iraguja avoeto ai ta nau ke hande ari embo javotoho javo Antipas avo teo pehena te ungona na egikae humota ue mihovova. \v 14 Rate ungota ari sasapura ere ova amo eingera: Peroveta sapura mahu javo Balaam amina King Balak ahe poekenu Israel embomeni na indari God ingeni na ove ari amita degi pene ikari avo indie tiha paiha ue sesena sasapura te tapa ara ena. Eto ungota embo nei uhoho na ahe poekari ainge amo ere ora. \v 15 Eto ungota embopo nei nei amina Nicolaitans ta ahe poekari sasapura avo jigama ere ora. \v 16 Avoeto enana jo haperekara erena te jo haperekae amo nau pe ta asivo mihia amina humbuto enana ga isoro asona. \v 17 Eto ungota oje irirou kito Ahihi Otohu na ekalesia tapa ta ke do eria avo ingivujo, eto embo amuna sovera eto iresuja amita degi uhu ta indari javo ‘mana’ ojikari avo humbuto ikano indirou koro orina parara be amita hamo ta javo eha kaeto ikano humbuto umo oenga kesuja. \s1 Ke erevi da Thyatira ta ekalesia ta degi ikena. \p \v 18 Eto Da Thyatira ta ekalesia ta ke hande ari Anera ta degi ke einge kajejo: Ke emo God ta Meni tihi ji perimbarako eaguja eto amita utu amo auri gajukeore piriki piriki eaguja aingeko amina eria. \v 19 Na ungota ari jajavotoho te osa ari te humota ari te pure kihi isapa isapa ueva ainge mane pure eha amo pajire be rate pegogo eto toae ereova. \v 20 Rate ungota ari sapura vahai amo erevira. Amo ungota evohu vahai ‘Jezebel’ amo oenga peroveta ke ijie nau pure ari embomeni na tiha ue sesena sapura ue indari god sokova ingeni na ove ari amita degi hande ikari avo indora ahe poekaguja te ungo na haekae eagova \v 21 avoeto na amina jo ahereketo ari sasapura avo toaja iji ikehena te toari uje ae ere ua \v 22 avoeto na evohu avo humbuto gosukano evari besi ta veto mihie osaga memenga kogue mihirou enana amiga tiha eagora embomeni amina jo ahereketo toae asora amo amite tapa ano osaga te memenga te peni vahai be kesora \v 23 amo na evohu amita meniundi te tapa tano pehihiroro ekalesia tapa na na kogue embo ta hotembari te jo te sirikari embo ke asora eto na ungo vahai vahai ta ari tapa siriketo hajire ikasona aingera. \v 24 Eto na ungo nei uhoho Thyatira ta miheva amina evohu amita ahe poekari umbae ue Satan ta ke ojikari ta iraguja avo umbae iragova ungota degi bouka nei do mane ikasona te \v 25 ungota humota ari be avo jigito irirovo puvuresona. \v 26 Eto embo amuna sovera ue uje nau avo ururou iji kombu puvurou nau Mama na enu na heteto iragona ainge dombo ano \v 27 embo amina heteto enda tapa tihi jigihe daho ngahia ikano humbuto jigito mihie enda tapa embomeni taro veasora amo ovu enda na ari teoi karaun eto vearako aisora. \v 28 Eto embo avo ano iji te kuro na kaeto usasa arako aisuja. \v 29 Eto ungota oje irirou kito Ahihi Otohu na ekalesia tapa ta ke do eria avo ingivujo. \c 3 \s1 Ke erevi da Sardis ta ekalesia ta degi ikena. \p \v 1 Eto da Sardis ta ke hande ari Anera ta degi ke einge kajejo: ke erevi amo embo God ta Ahihi tapa 7 eto kuro tapa 7 jigito mihia amina eria. Nane ungota ari kogona amo embomeni na ungo vasiri te ke erera te na kogona amo ungo pehari embopora. \v 2 Avoeto ungo erevu! Ungota ari tapa avo God na kogua avo inono ae be ra avoeto ungota sovera isapa do mihia ano veto pambuto irae asi ere pahua \v 3 avoeto ungo nau ke do ingito humbuheva avo ehako hotembeto jo ahereketo agi evujo, rate ungo erae asova amo na iji nei hotembae asova amikote pegene embo na puvurarako aisona. \v 4 Eto ungo da Sardis embo heriso amina ungota bo tongopa na hatikae eagova amo ungota ari jajavotoho inono mihia avoeto nane ano bo parara asuketo namote isa aisova. \v 5 Eto embo amuna enana ainge sovera eto irirou bo parara ikano asukasuja. Eto amita javo amo Book javo vasiri eha aita kajari mihia avo mane hirasona te daroho irirou Mama te Mama ta Anera te amita degi ano ingesora \v 6 eto ungota oje mihirou kito Ahihi Otohu na ekalesia tapa ta degi ke eria avo ingesuja. \s1 Ke erevi da Philadelphia ta ekalesia ta degi ikena. \p \v 7 Eto da Philadelphia ta ekalesia ta ke hande ari Anera ta degi ke einge kajejo: ke emo ke be ari embo otohu, David, ta bokiri pe ikari God ta irari da avo hirikasuja avo jigito iraguja amina eria. Eto na da avo embo ta degi hirikasona amo embo na ahurekari inono ae eto na da avo embo ta degi ahurekasona amo embo na hirikari inono ae ra. \v 8 Eto na ungota ari tapa kogona avoeto, kivujo, na ungota tihi ta bokiri iketo pe hirikehene mihia amo embo na ahurekari inono aera eto na kogona amo ungota sovera isapa be rate ungo na javo nau egikae mihie ke nau agi ere ova \v 9 avoeto enana Satan ga kajuari embomeni amina dago Judea ra ijie ke sokova na erera avo ano ungota utu ta veto gombuto God na ungo osa ere ua ke ainge ara aisona. \v 10 Eto ungo na memenga kito toae ke nau agi ue sovera eto iragova avoeto enda embomeni tapa ta degi eto kiari ikasona amo ungo na mane kesova te oreketo umbasona. \p \v 11 Eto na sausau puvuresona avoeto ungota degi ari javotoho do mihia avo ngahia na jigivujo eto embo nei na ungota siro kope mane egimbeto humbasuja. \v 12 Eto embo amuna sovera eto irirou amo na nau mama ta bande otohu ai ta ano tutuvi vahai eto hetasuja eto amina bande avo mane toto pambasuja te nau God ta javo eto nau God ta da Jerusalem eha uhu i ta eto veasuja amita javo te eto nau javo eha amite tapa amita hamo ta kajasona. \v 13 Avoeto ungota oje irirou kito Ahihi Otohu na ekalesia tapa ta degi ke do eria avo ingivujo. \s1 Ke erevi da Laodicea ta ekalesia ta degi ikena. \p \v 14 Eto da Laodicea ta ekalesia ta ke hande ari Anera ta degi ke einge kajejo: Eto ke erevi amo donda tapa God ta ingeni na ari amita tihi jigari embo amina God ta ke avo tapa inono ta hande eaguja avoeto humota ari haite embo amina einge eria. \v 15 Na ungota ari tapa ere kogona amo jo na ae hamo na ere ova avoeto javotoho manera. Eto ungona ari javotoho aheva amo tunga javotoho ahena te \v 16 amo ari javotoho be mane eto ari sapura be mane avoeto nau pe na ungo isuva ano veto irae aisova. \v 17 Amo ungo na “Na haja vaja embo avoeto inonora” ainge ereva te ke be amo ungo donda ambu, tihi kuru ari hoivo iri bo irae hamo uhu teho miheva amo ungo kiaera \v 18 avoeto ungo ‘gold’ ji vevere ta ikeore eveketo sapura tapa karaun eto veau javotoho pere avo nau degi ta ombuto haja vaja embo be evujo, eto hamo uhu teho avoeto bo parara humbuto asuketo me mane kesova, eto sivo humbuto tihi ta kaimbavo tihi hirikau javotoho kesova. \v 19 Eto na embo osa ue ari javotoho ahe poekagona avo umbara memenga ikagona avoeto ungota jo tapa na jo ahereketo ari sasapura tovujo. \v 20 Eto kivujo, na bande pe ta vahihiri ue mihena avoeto embo amuna ke nau ingito bande pe hirikau horeto amiga arumbeto indesona. \p \v 21 Eto na sovera ereuahena avoeto puvuto nau Mama ga amita avo arumba ta arumbeto mihena avoeto embo amuna sovera aisuja avo umbano nau avo arumba ta namo ga arumbasuja. \v 22 Eto ungota oje mihirou kito Ahihi Otohu na ekalesia tapa ta degi ke do eria avo ingivujo. \c 4 \s1 God ta avo arumba uhu i ta mihia. \p \v 1 Eto ke avo nau degi ta ehei irae ehei uhu i ta pe avo nau tihi buju ta hiriketo mihei kogone ke huin ta hindu ainge ingihana amina ehako nau degi ta ke einge ehija “Umo ei huma hetejo, na iji ambota do puvuresuja avo ano kesoa” ke ainge ehei \v 2 Ahihi na na humbuto pambuto ikehei uhu i ta avo arumba peni ai embo arumbeto mihia amita tihi buju ta heteto mihie embo hajire einge kehena. \v 3 Amita bo amo ji kikino be na kembari ainge kiarako ehena eto eriri ove green avo kaseto embo avo jorereto mihei kehena. \v 4 Eto avo arumba peni amita engihita amo avo arumba tapa 24 amina jorerari eto embo okokose tapa 24 amina bo parara asukari eto siro kope gold na ari amo asukari amina areto mihere kehena. \v 5 Eto sariambu sariambu ue (pipiri te tururu te) avo arumba peni ta eto puvutohoi amita tihi buju ta amo usasa tapa 7 ainge eveketo peri peri ore kehena amita be amo God ta Ahihi Otohu vahai amita uhoho tapa 7 ra eto avo arumba peni amita tihi buju ta amo umo ukomo pajire eto visivisi be eto amita kiari javotoho be usasa perekari avo mihia. \p \v 6 Eto avo arumba peni ai ta amo o tapa 4 vasiri te hajire nei amina joeketo mihera amita ku te joga te tapa amo tihi perekari \v 7 vahai amo o lion aingeko nei amo o cow siaja aingeko nei amita tombu amo embo ta tombu aingeko eto nei amo di huna gati na pambaguja aingekora. \v 8 Eto o vahai vahai amita gati tapa 6 eto hamo uhu tapa amo tihi perekari ra. Eto o tapa 4 amina iji te mume te mahainge ke einge eagora. “Otohu, Otohu, Otohu, Bada God sovera isapamane te amo mahu mihahija eha mihia eto ambota iresuja embo ra.” \v 9 ainge eagora amina daroho irari embo avo arumba peni ta mihia avo Otohu ue jakeka ijie osa uore \v 10 embo pepeni tapa 24 amina veto gombuto mihie daroho irari embo avo jakeka ijie enana ta siro kope houketo avo arumba peni amita engihita tembihie ke einge eagora, \v 11 “Donda tapa amo ingeni no na ove ari iragora avoeto dagota Bada eto dagota God inena sovera ari te usasa te osa ari te avo humbari inono ra.” ke ainge eagora. \c 5 \s1 O Sheep Meni na o hamo ta ke kajari avo umbuna \p \v 1 Eto nei kehena amo avo arumba peni ta arumbeto mihia amita ingeni be ta o hamo egovekari ai ta ke kajari amo joga te ku te kajari pere avo jigito mihei kehena eto o hamo amita pe amo pangire tapa 7 amina vavahikari \v 2 eto Anera vahai peni sovera te amina jage eto ke einge ijija, “Embo javotoho vahai damina ke eremita pangire pirouketo hirikari haitere?” ainge ijinu \v 3 uhu ta eto enda ta eto embo peheto pambuto iragora degi ai ta jombure ehera te ke erevi hiriketo jo ta kiari haiteko embo avo hambaera. \v 4 Eto o hamo hiriketo ke jo ta kiari embo aravo hambae avoeto osaga kogue si ijie mihene \v 5 embo okose vahai amina puvuto nau degi ta ke einge ijija, “Umo si toto ke nau inga! Israel javo tapa 12 rate vahai Judah ta embo sovera te vahai javo ‘Lion’ ke eagora amo King David ta susu be amina tapa dembeto heteto tihi jigihe mihia avoeto pangire 7 amo pirouketo hiriketo ke jo ta amo kiari haitera” ke ainge ijinu \v 6 avo arumba peni amita engihita o vasiri te tapa 4 eto embo okokose te tapa joeketo mihera avo arumba peni amita ugorota amo O Sheep Meni tari pehari avo heteto mihei kehena eto amita perema tapa 7 eto tihi tapa 7 kehena amita be amo God ta Ahihi tapa 7 enda tapa ta ikeoi pambagora avo kehena. \v 7 Eto O Sheep Meni amina imihe embo avo arumba peni ta arumbeto mihina amita ingeni be ta o hamo ta ke kajari avo humbuhunu \v 8 o vasiri te tapa 4 eto embo okokose 24 enana vahai vahai ainge ‘guitar’ jigito aguhu gold na ari amita jo ta ‘incense’ ikeo evekihina amo embo ototohu ta pari avoeto jigito O Sheep Meni ta utu ta veto gombuto \v 9 haveni eha ganihe einge ea, “Umo embo na teo peheto orosa no na God ta toho ara enda embo tapa eto ke hajire nei te nei te tapa avo ombuto umba avoeto inena vahai pangire na o hamo vahaikari avo pirouketo hiriketo kesoa inonora. \v 10 Eto God na embomeni amita toho avo simba ururou amita ke agi ue enda tapa tihi jigesora” haveni na ainge ea. \p \v 11 Eto na arerembeto kehena amo Anera isapamane be ehekari haiteko mane amina haveni ijie puvuto avo arumba peni amite o vasiri te eto embo okokose amite tapa joeketo haveni ea \v 12 amo hindu pajire be ijie einge ea “O Sheep Meni tari amita degi sovera te haja vaja te ari te kiari te otohu ari te usasa te embo jakeka ari amite tapa amita degi puvuroi”, haveni ainge ijio \v 13 o te embo te tapa uhu i ta eto enda ta eto eva jo ta eto embo pepehekari amite tapa na haveni einge ijiera, “Avo arumba peni ta mihia amite eto o sheep meni amita degi jakeka ari te otohu ari te usasa te sovera te daroho mahainge irore”, ainge eo \v 14 o vasiri te 4 amina aravora ainge ijio embo okokose amina veto gombuto jakeka ea. \c 6 \s1 O Sheep Meni na o hamo ta ke kajari ihiketo pangire heukena \p \v 1 Eto na kogue mihene O Sheep Meni na ihiketo pangire vahai heukehei o vasiri te 4 rate vahai amina ke ‘Hae’ ainge amo tururu na keko ehei ingihene \v 2 o horse hamo parara amina sariketo embo hamo ta arumbari eto ki te peva te jigari puvei enana na amita degi siro kope ikehere asuketo amita kitoho ga isoro eto dembasi pambija. \v 3 Eto O Sheep Meni na pangire nei heukehei O Vasirite nei amina ‘Hae’ ainge ijinu \v 4 o horse nei hamo ji peri ainge hamo pangari amina embo hamota arumbari sariketo puvera amita degi peka haeketo isoro asora sovera ari amite eto isoro asivo peni te avo ikehere humbuto pambuhija. \v 5 Eto O Sheep Meni na pangire heriso heukehei irae ehei nei avo heukihinu O Vasirite nei amina ‘Hae’ ainge ijinu o horse hamo mume amina nau tihita sariketo puvei kehena. Eto o amita hamota embo arumbeto puvija amo donda tembeto bouka heka humbari avo ingeni na jigito puvija. \v 6 Eto O Vasirite tapa 4 amita jo ta ke einge puvei ingena “Eto ejo embomeni na koro pajire be na indari isapa be umbare amo embo na pure iji vahai asuja amo wheat\f wheat: \ft be amina jaseto flour eto bread ingagora\f*avo litre vahai umbautemo barley\f barley: \ft barley be amo wheat be aingera.\f*3 litre humbuhe koro ikau irae aisuja ainge ejo are, Rate esi grape\f grape: \ft esi grape ta be amina wine eora.\f*i olive\f olive: \ft i olive be amina oil eora.\f*pure avo ao mane sapura aisuja! ainge ena.” \v 7 Eto O Sheep Meni na pangire heriso nei vahai heukehei irae ehei nei heukihinu O Vasiri te tutumota vahai amina ‘Hae’ ainge ijinu \v 8 o horse nei hamo karere ari amo embo javo Tari Pehari avo hamo ta arumbari puvutuhunu amita ambota amo embo peheto pambuto iragora da javo Hades amite tapa embo na puvurarako ehei kehena. Eto embo javo Tari Pehari amite eto embo javo Hades amina enda embomeni tapa avo humbuto kaheke kaheke eto tapa 4 ainge iketo heriso nei vahai avo toto vahai avo asivo na tasora, indari pure sosou aro beuje na pehasora eto isoro o na kambaro pehasora eto ari tapa erevi ara sovera ari amo embo javo tari pehari amite eto embo javo Hades amita degi ikehere umbera. \p \v 9 Eto pangire heriso nei heriso pirouketo nei heukihinu God ke be ari embopo amo God egikae ue iragora avo kitoho embo na teo pepehekea amita Ahihi amo pene ikari gaga suvu ai kogone \v 10 enana amina ke peni vahai be eto einge ehera, “Bada God donda tapa simba ari embo umo ke be eto Embo Otohu avoeto iji doinge simba eto enda embo ta ari sasapura sirikihe dago kitoho na teo pepehekea amita orosa veari amita mine humbuhe hajire ikao kiaeherete avo simba mihovora,” \v 11 ke ainge ijio enana ta degi bo parara kokoso avo ikerekenu aseo, “Iji isapa simba ururovo ungota namei kamei God ta ke agi ari embopo nei uhoho avo kitoho na taro peharo heka inono ai avo simba evujo”, ainge ena. \p \v 12 Eto na kogue mihene o hamo ta ke kajari amita pangire 5 heukehei irae ehei God ta o Meni na 6 heukihei enda ta titira pajire puvutuhoi embo pehari ta sinena ue pusu kuhagora hajire avo iji na mume ehei hariga na orosa ta hajire arako ehei \v 13 kuro tapa enda ta vehera amo ji junga be sari pisara na jaheveoi veaguja aingeko vehera. \v 14 Eto uhu amo ohi na egoveketo pambaguja aingeko oi tiri te tiuka te na toto degi nei ta pambera. \v 15 Eto enda ta kings te embo pepenite isoro kihi humbari embopo te haja vaja embopote, sovera embopote embo nei ta ke agi ue pure ari embomeni te eto embo teho te tapa na pambuto panga ho ta eto tiri hemba ta karu ho ta ojijiketo mihie \v 16 tirite korote ta degi ke einge ehera, “O Sheep Meni na tumo ere ua avoeto embo avoarumba peni ta arumbeto mihia amita tombu titiha eto dagota hamota veto ahureke ojiketo irore. \v 17 Amo embo siriketo hajire ikari iji peni puvija amo enda embo amuna hetari haitere?” ke ainge ehera. \c 7 \s1 Eto God na embo tapa 144,000 ainge siriketo humbasuja. \p \v 1 Eto amita ambota ari einge puvei kehena. Amo Anera tapa 4 amina kaina ta pahina ta ihane ta eto sohe ta pambuto heheteto pisara enda ta pambaguja haekehere eva ta enda ta eto isibasi ta pambae toruhoi \v 2-4 Anera nei vahai amina God ta hajire avo ikehei amita ingeni na jigito ihane ta eto puvuto Anera tapa 4 amita degi ta ke peni vahai eto einge ijija “Ungota sovera na enda te eva te isibasi te sosou asi miheva te isapa simba ururovo ungote ungotenau God ta hajire erevi amita pure ari embomeni ta beo ta vahaikaro kakamba ai”. Ke ainge ei Israel ta ohihi javo tapa 12 amita embomeni tapa 144,000 ainge avo God ta hajire ikerekehera \p \v 5 Amo Judah ta embomeni tapa 12,000 eto nei Reuben ta embomeni tapa 12,000 eto nei Gad ta embomeni tapa 12,000 \p \v 6 Eto nei Asher ta embomeni tapa 12,000 eto nei Naphtali ta embomeni tapa 12,000 eto nei Manasseh ta embomeni tapa 12,000 \p \v 7 Eto nei Simeon ta embomeni tapa 12,000 eto nei Levi ta embomeni tapa 12,000 eto nei Issachar ta embomeni tapa 12,000 \p \v 8 Eto nei Zebulon ta embomeni tapa 12,000 eto nei Joseph ta embomeni tapa 12,000 eto nei Benjamin ta embomeni tapa 12,000 aingeto God ta hajire beo ta ikehere umbera. \s1 Embomeni isapamane be bo parara asari \s2 amina horuketo mihera. \p \v 9 Eto amina ambota kehena amo embomeni isapamane be ehekari haiteko mane avo horuketo mihere kehena amo enda neite neite amita embomeni tapa ke neite neite tapa eto ohihi javo neite neite tapa amina puvuto avo arumba peni amita eto O Sheep Meni amita tihi buju ta horukehera amo bo parara kokoso aseto koropa iki jigiriketo mihie \v 10 ke peni vahai be eto einge ijiera “Embo oreketo humbari amo ungotenau God avo arumba peni ta arumbeto mihia amita degi mihia eto O Sheep Meni amita degi ta mihia”, ainge ijiera. \v 11 Eto Anera tapa na avo arumba peni te embo okokose te o vasiri te 4 amite avo jorereto veto gombuto God jakeka ijie \v 12 ke einge ijiera. “Aravora, jakeka ari te usasa te kiari te osa ari te Otohu ari te tihi jigari te sovera ari te avo ungotenau God ta degi daroho iroi, aravora” ainge ijio \v 13 embo okose vahai amina nau degi ta ahereketo ke einge eto ingija “Embomeni bo parara kokoso asari emo davo embore eto dainge eto puvere?” ainge ehei \v 14-15 “Mama, embomeni emo umo kiarira” ainge ehene ke mine jandireketo einge ehija. “Embomeni emina enda ta osaga memenga kesora iji puvuresuja ai ta eto puvuto enana ta bo avo O Sheep Meni ta orosa ta egehere parara ehija avoeto enana God ta degi otohu ai horeto iji mahainge avo arumba ta tihi buju ta God ta ke agi ue mihera \v 16 avoeto enana God na uhumo au umo beuje indari beuje mane kesora eto iji na mane evekau vevere kesora \v 17 te O Sheep Meni avo arumba peni ugorota mihia amina enana avo o simba arako ue enana urumbeto humbuto pambuto umo vasiri te kuru vihiuja ai ta au indiroro God na enana ta tihi sisivu tuhasuja”. Ainge ijija. \c 8 \s1 Pangire tutumota heukihaja. \p \v 1 Eto o hamo pangire tutumota heukihei uhu i ta asavi ae iji ‘1/2 hour’ ainge jamo uija. \v 2 Eto na kogone Anera tapa 7 God ta tihi buju ta hetehere huin tapa 7 ainge ikehei umbera. \v 3 Eto Anera nei vahai amina iposi mune te vihiuja amita aguhu gold na ari avo ingeni na jigito pene gaga ta pambuto hetehei donda evikihie mune asuja avo isapamane ikehei humbuto embo ototohu ta pari amiga humbuto avo arumba engihita pene gaga gold na ari ai ta tembehei eveketo \v 4 iposi mune te amina embo ototohu ta pari ga Anera ta ingeni ta eto God ta degi vihija. \v 5 Eto Anera na pene gaga ai ta ji buju humbuto aguhu gold na ari ai ta jojehei pe vihei humbuto enda ta gosukehei vehei sariage oi pipiri tururu pajire be ei enda titira uija. \s1 Anera ihiketo huin husihera. \p \v 6 Eto Anera tapa 7 amita degi huin 7 ainge ikari avo huasi nununga eto mihere \v 7 Anera vahai na kihi husihei ‘ice’ te ji peri te orosa te omba omba ari avo enda ta jojekehei vovoi enda te ji te huna, 1/3 ainge amina evekihei sasaha avo irae evekihaja. \v 8 Eto Anera nei amina huin husihei tiri pajire be amina peri peri evikihoi humbuto eva ta gosukehere vovoi eva huna 1/3 ainge amina orosa sarikehei \v 9 eva o huna, 1/3 ainge, amina pepehekihere e nga huna, 1/3 ainge, avo hururumbeto eva jo ta vovuera. \p \v 10 Eto Anera heriso amo huin husehere irae ehei nei vahai amina husihoi kuro pajire be amina kerivo na ijimbarako eto uhu ta eto veto umo eto umo be huna 1/3 ainge aita vena. \v 11 Eto kuro amo sogaga te amina veto umo ta sigeto umo sogaga oi embomeni indito pepehekihera. \v 12 Eto Anera heriso nei vahai amo huin husehere irae ehei Anera nei amina husihoi iji huna eto hariga huna eto kuro huna tapa 1/3 ainge amina mume ore iji te hariga te amita usasa huna avo irae uija. \v 13 Eto na kogue mihene di huna na gati na enda ta puvutuhue ke einge isara na ijija, “Jove jove jove enda embomeni tapa ta degi erena Anera 3 amina huin husae mihera avoeto erena.” \c 9 \p \v 1 Eto Anera tapa 4 amina huin husehere irae ehei nei vahai amina husihoi kuro vahai uhu i ta eto veto enda ta iraguja amita Anera ta degi bokiri pe ikari God na ikehija amo ahihi sasapura enda hu ta iragora amita degi ta hoto koveto veto peun ari amita bokiri pe ikari avo God na ikehei \v 2 humbuto enda ho ta bokiri hirikehei iposi kumbo kumbo enda ho ta eto vihina amo embo na ehe undukeore eveketo vihiuja aingeko vihito iji te uhu te peikehei mume ehei \v 3 o boruga avo ikehei iposi jo ta eto enda ta vehei God na o saiho ta sovera avo boruga ta degi iketo \v 4 mane embo ta indari pure te isibasi te avo hatikasora te embo God ta hajire beo ta umbae amita degi isoro ara ehija \v 5 rate mane taro pehara ehija te teho kambaro o saiho na kambuoi memenga kiagora aingeko avo hariga 5 amita jo ta kogue \v 6 embomeni na pehasi uje eto pehari jombure aisora te pehari na enana tiumbeto pambasuja. \v 7 Eto o boruga ta kiari amo o horse isoro o ainge ki emi hamo ta nununga arira eto enana ta siro ta amo king ta kope gold na ari aingeko kehena eto enana ta tombu amo embo ta tombu hajire ainge kehena. \v 8 Eto enana ta siro hu amo evohu ta ainge eto ti amo o ‘lion’ ta ti ainge ra. \v 9 Eto enana ta jenge ta beha ari asukehera amo ‘iron’ na ari avo asuketo gahi na pambuhore pupu ingena amo horse isapamane be na isoro gaga handuketo humbuto isoro ta pambagora aingeko avo ingena. \v 10 Eto o boruga ta ehu ta amo o saiho na kambuoi memenga hariga tapa 5 amita jo ta kiagora aingeko avo mihia. \v 11 Eto enana ta embo okose amo Anera sasapura enda hu ta iragora amita tihi jigari Anera amita javo amo hebrew ta ke na “Abaddon” ke eagora eto Greek ta ke na eagora amo “Apollyon” ke eagora. \v 12 Eto osaga vahai amo irae ehija te osaga nei heriso amo puvurae mihera puvuresora. \v 13 Eto Anera tapa 5 amo huin husehere irae ehei Anera nei vahai amina husihoi God ta tihi buju ta pene gaga gold na ari ai ta o ta perema tapa 4 ainge mihera amina Anera huin husehija amita degi ta \v 14 ke einge eria, “Anera 4 ainge umo pajire javo ‘Euphrates’ aita pundurari mihera avo vujekejo pambare”, ke ainge ehere \v 15 Anera 4 avo iji amikote arahata pambara pupundukeo iji aravo simba ue iragora avo Anera na vujekehere embomeni tapa amo kaheke kaheke eto di 3 ainge iketo di vahai avo tehere pepehekehera. \v 16 Eto enana ta isoro embopo horse hamo ta areto pambera amo embo tapa ‘200 million’ ainge pambereija. \v 17 Eto horse te embo te pambera amita kiari one amo ehure ta einge kehena. Eto jenge ta beha ikehera amo ji peri ainge pangari te mume te ovevari te na kaneke kaneke arira. Eto o horse ta siro amo o lion ta siro ainge eto o amita pe ho ta amo ji peri te johi te enda pusu masa te tapa puvija. \v 18 Eto embomeni di 3 rate ji peri te johi te pusu masa te avo munehembeto di vahai amo pehehera. \v 19 Eto o horse ta sovera amo pe ta eto amita ehu ta ra. Eto amita ehu amo o koso o ta ehu aingera eto siro na memenga ikaguja. \v 20 Eto osaga puvija amina embomeni nei uhoho pehae mihera enana amina ari sasapura ingeni na ari avo joru ue tunga ahereketo toae amo ahihi sasapura na jakeka ari amo toae eto enana ta ‘god’ ‘gold’ na ari, ‘silver’ na ari, ‘bronze’ na ari koro na ari eto ji na ari amo tihi irae amo oje irae eto amo hae ambu rate toae jigama ere ora \v 21 eto nei embo tari pehari te saruka ari te tiha paiha ari te pegene ari te amo toae jigama ue mihera. \c 10 \s1 Anera o hamo isapa te \p \v 1 Eto Anera nei sovera isapamane te amo utu ta eto veto mihei kehena amo johi na togari eto amita siro kombu ta amo eriri kaeto mihei kehena eto amita tombu amo iji ta tihi ainge eto amita utu amo ji peri koso vahai vihiuja aingekora. \v 2 Eto o hamo isapa ai ta ke kajari avo ingeni joga ta tembeto mihei kehena. Eto Anera amina utu be na eva ta haito anga na ombo ta haito mihie \v 3 o ‘lion’ na hori gagaha eaguja ainge ei pipiri tapa 7 amina ke ehera. \v 4 Eto ke ehera avo ihiketo kajihone ke nei uhu i ta eto puvuto ke einge ijie haekehija “Eto pipiri tapa 7 ainge amina ke ehera amo mane kajasoa te no jo ta tojo iroi” ke ainge ehei \v 5 Anera eva ta haito ombo ta haito amita ingeni be avo uhu i ta jigei vivihei uhu te \v 6 enda te eva te amita jo ta donda tapa mihera amita ari embo amo daroho iraguja amita tombuta ke einge ehija, “Eto Anera tapa 6 amo mahu husehere irae ehija te iji porere mane aisora \v 7 te Anera nei vahai amita huin huasi simba ururou God na ari mahu ojikari iraguja avo au kesora amita ke amo God ta ke agi ari peroveta ta degi ikena”. \v 8 Ke ainge ehei ke nei uhu i ta puvei ingena amo nau degi ta ke einge ehija, “Pambuto Anera utu eva ta haito ombo ta haito mihia amita ingeni ta o hamo hirikari tembeto mihia avo pambuto umbujo”, ainge ehei \v 9 ingito pambuto Anera ta degi o hamo ke kajari isapa avo penunu ehene ikihe ke einge ehija, “Humbuto inda! Pe ta amo iruha muko gamo te ra te hini ta amo sogaga te ra” ke ainge ehei \v 10 Anera ta ingeni ta humbuto indena amo pe ta amo iruha ta gamoko kehena te hini ta vehija amo sogaga ehija. \v 11 Eto ke nei einge puvei ingena “Umo embomeni te enda te eto embomeni ta ke te kings te ta degi do puvuresuja amita ke avo kajejo” ainge ehija. \c 11 \s1 Ke kito harikari embo heriso \p \v 1 Eto Anera vahai na God ta Bande Otohu ta heka humbana ituha ikihe ke einge ehija, “Umo pambuto God ta temple te God ta pene gaga te amita heka mo doitokore avo humbuhe embomeni ai ta God jakeka ue mihera amite tapa ehekejo. \v 2 Rate temple apupu ta enda amo Judea ta mane rate enda nei embomeni ta degi ikarira avoeto heka amiga mane humbasoa te tojo amo enda nei embomeni amina hariga tapa 42 amita jo ta God ta da Otohu haito hatikasora. \v 3 Eto na kito nau ke hande ari embo heriso ta degi sovera ari ikano bo baiki asuketo iji tapa 1,260 amita jo ta amo ari do puvuresuja amita ke avo embomeni ta degi hande aisora.” \v 4 Eto nau ke hande ari ji amo ji ‘olive’ herisora amina kerivo ijimbari heriso avo tembeto enda ta bada ta tombu ta heteto mihera. \v 5 Eto embo amuna avo tasi aisora amo ji peri na enana ta pe ho ta eto puvuto kitoho amo tau pepehekasora. \v 6 Eto embo heriso amina enda ta ari do puvuresuja amita ke avo hande ururoro enana ta sovera na uhu i peikau ga mane veasuja. Eto embo heriso amita sovera na enana ta uje na aro umo orosa pere aehija enda taro osaga memenga puvuraehija amo enana ta degi inonora. \p \v 7 Eto enana ta ke hande aro irae au o sapura be sovera te amina enda ho ta eto vihito embo heriso amo kambau peharo \v 8 enda timu hatirari ke na Sodom te Egypt te ai enana ta Bada Iesu teo pehena da ai ta sari ururoro \v 9 enda neite neite embomeni eto ke neite neite ari embomeni amina puvutuhue kesora rate embo heriso amita hamo mane kovasora \v 10 amo peroveta heriso amina enda embomeni sasapura ta degi osaga ere ikihahera avoeto puvuto kogue tunga javotoho ue pondo kando ue hande puanda mine ara aisora. \p \v 11 Eto iji 3 eto huna irae ehei God ta hoenge na jo ta horehei embo heriso amo ereto uhu ta hetehere embomeni na kito tututu ue joru pajire be ore. \v 12 Uhu i ta eto ke einge ingena “Ungo einge have” ainge ehei johi jo ta horeto uhu i ta pambuhore kitoho embomeni na arerembeto kehera. \v 13 Eto iji amikote titira pajire be ehei da ta bande huna, 1/10 ainge amina karauneto vehei embomeni tapa 7,000 ainge pepehekehere embo nei huna amina joru peni vahai ue ihiketo uhu ta God avo jakeka ea. \v 14 Aravora osaga heriso irae ehera te nei vahai puvuto ere hua. \s1 Anera 7 amina huin husehija \p \v 15 Eto Anera tapa 6 na huin husehere irae ehei Anera nei na husihei uhu i ta ke isara na einge puvija, “Enda ta king irae ehija eto ungotenau Bada Keriso amina God ta king eto hetehija amina tihi jigihe daroho iresuja”, ke ainge. \v 16 Embo okokose tapa 24 amo God ta tombu ta arumbeto mihera amina tombu na veto gombuto God jakeka \v 17 einge ehera, “Bada God sovera isapamane te daroho iragoa inena sovera no humbuto ihiketo tihi jigihea avoeto no degi ta osa be ere ora, \v 18 eto enda embomeni tapa na no degi ta isoro ere ovora avoeto inena enana ta degi tumo ehea. Embo pepehekari ta ari sirikari iji puvija erevira avoeto no pure ari embomeni te peroveta te embo jajavotoho isapa te peni te tapa amuna no javo Otohu eagora amita degi hotari ikao humbasora eto enda sosou ari embopo avo tao irae aisora” ainge ehere irae ehei \v 19 God ta Temple uhu i ta avo pe hirikehei God ta ke pepeni amita donda ototohu ta irari ‘box’ ai ta mihei kogue mihene pipiri sariambu oi tururu pajire be ei titira oi ga ‘ice’ te tapa vehija. \c 12 \s1 Pamone te o javo ‘dragon’ te \p \v 1 Eto uhu i ta hajire pajire be irerembehei kehena amo evohu iji ta usasa na togari hariga amita utu joga ta eto amita siro kope amo kuro tapa 12 ainge amina kogombari \v 2 amina meni ingasi ue memenga oi si ei kogue mihene \v 3 hajire nei uhu i ta irerembena amo o koso o pajire be javo ‘dragon’ hamo pangari amita siro tapa 7 ai ta perema tapa 10 eto kope tapa 7 ainge avo mihei kehena, \v 4 eto o amita ehu na jiheto kuro tapa kaheke kaheke eto di 3 ikari avo di vahai avo tehei enda ta karaun eto vehija. Eto koso o ‘dragon’ na evohu ta tihi ta heteto meni ingihirou humbuto indesi simba oi \v 5 meni singa amo enda tapa embomeni daho ngahia avo jigito tihi jigesuja meni avo ingihoi God na egimbeto humbuto amita avo arumba peni ai ta simba ue mihei \v 6 evohu amo joru huheveto pambuto degi ojaga tambu God na nununga ena ai ta iji tapa 1,260 ainge mihei God na simba ehija. \v 7 Eto utu ji ta amo Anera okose javo Michael te amita Anera te na o koso o ‘dragon’ ga isoro ehere \v 8-9 ‘dragon’ te amita Anera te avo ivo ambu eto dembari inono ae ehere, Michael na koso o ‘dragon’ te amita Anera te tapa avo humbuto gosukehei enda ta vigo vigo vehera. Eto o koso o amita javo Satan na amita ke gamo na enda embo tapa avo kihi humbuto ari sapura ta pambagora. \v 10 Eto ke uhu i ta eto puvei ingena amo einge ehija, “Embo iji te mume te God ta tihi ta heteto ungotenau namei kamei pehumba eaguja avo humbuto gosukehere vehija avoeto God ta sovera na embo orekihie tihi jigihirou ungotenau hondate ari embo Keriso na heteto king asuja. \v 11-12 Eto God ta ke be ari embopo amina God ta o ‘Lamb’ ta orosa te God ta ke hande ari te amina Satan dembehera. Eto enanana amita vasiri peni avo osa ae avoeto embo na tari pehari avo joru ae ra. Avoeto ungo uhu ta irari embomeni tapa tunga javotoho ue osa evujo, rate jove jove enda ta eva ta degi erena, Satan na ungota degi pambija avoeto. Eto amita iji koso mane irae ere ua avoeto amita tumo sisire hini kambari amina jo enetarira,” ke ainge ehei ingena. \p \v 13 Eto koso o ‘dragon’ amo enda ta gosukehere vehija avo kito evohu meni singa humbija avo ehehasona ainge hotembihei \v 14 God na kito evohu amita degi di huna ta gahi heriso avo ikehei asuketo degi ojagatambu God na amita irari degi sija ehija ai pambei God na simba oi jua tapa nei heriso nei vahai eto nei huna ai ta mihei o koso o na avo hame ari inono ae ehija. \v 15 Eto o koso o aramina evohu avo umo na umbaja ehei amita pe ho ta umo pajire be veto pambuhoi \v 16 enda na evohu avo hondate eto oenga haunketo pambuhoi umo amo ai ta veto pambei \v 17 koso o ‘dragon’ amo evohu amita degi tumo pajire eto evohu amita meniundi ta degi isoro asi pambija. Eto evohu ta meniundi amo Iesu ta ke avo ke be ijie God ta ke agi eagora embomeni ra. \c 13 \s1 Isoro o heriso \p \v 1 Eto o ‘dragon’ amo pambuto eva hora ta heteto mihei, o nei isoro o eva jo ta eto vihei kehena amita siro tapa 7 ai ta perema tapa 10 eto kope tapa 10 perema vahai vahai amita tumo ta asukari eto amita beo vahai vahai ta God ta javo avo urumbihe ke kakajekari ainge avo mihei kehena. \v 2 Eto o amita kiari amo o javo ‘leopard’ amita kiari aingeko rate amita utu amo o ‘bear’ ta utu ainge eto pe amo o ‘lion’ ta aingera. Eto o ‘dragon’ na o sapura amita degi sovera pajire ke iketo avo arumba ikehei arumbeto tihi jigiha. \v 3 Eto o amita siro vahai ai ta amo pupuho pajire be kehena amo pehari haite rate kojihaja. Eto enda embo tapa na o avo kito vani vini ue aha puha ijie ihiketo o avo ambo ambo ue. \v 4 O ‘dragon’ amina o sapura amita degi sovera ikehija avoeto o ‘dragon’ amite eto o sapura amite tapa jakeka ijie ke mine ara eto einge erera, “O erevi nei eingeko iraera eto embo amuna amita degi isoro ari haitere?” \v 5 eto o ‘dragon’ na o sapura ta degi ke aisuja amita pe ikehei humbuto amina na javotoho ra ijie God ta javo urumbehei hariga tapa 42 amita jo ta sovera amita jigama \v 6 ue pe haunketo God ta javo te eto God ta irari degi te eto God ta toho uhu i ta iragora avo hoviro ue urumbehei sapura be ehija. \p \v 7 Eto o ‘dragon’ na sovera nei ikehei o sapura amina humbuto God ta embopo ototohu ta degi isoro eto dembeto ke neite neite eagora embomeni tapa enda tapa ta mihera amita sovera na tihi jigiha. \v 8 Eto enda embopo tapa na o sapura avo jakeka ijie humote pain asora rate book javo vasiri amita jo ta javo kakajekari amo o Lamb uhu te enda te ae pekota embo avoembo ikari pehari amita toho embomeni amina mane humote pain aisora \v 9 te ungo embo amuta oje irirou kito ke erena erevi ingivujo. \v 10 Eto embo na kitoho ta ingeni ta pambaja aisuja amo pambasuja eto asivo na jau pehaja aisuja amo jau pehasuja avoeto erena amo ungo God ta embo ototohu ungo God humota ue sovera eto irivujo. \p \v 11 Eto na o nei enda jo ta eto puvutohoi kehena amita siro ta amo o ‘sheep’ meni ta perema ainge heriso avo mihera te amita ke hajire amo o koso javo ‘dragon’ ta ke hajire vahaira. \v 12 Eto o pupuho te eva jo ta eto vihina amina o nei eha puvija amita degi sovera ikehei humbuto jigama ue enda embo tapa na o mahu eva ta eto vihina amita degi humotepain ara ke \v 13 ijie amita hajire kiagora ehei ji peri na uhu i ta eto evikihie vovuoi embo tapa kogore hajire pepeni nei te neite ehija \v 14 eto ari sovera ainge oi embo tapa na amita ke sokova avo ke be ijie ambo ambo ehera ore eto asivo na jari pupuho te o avo kogue ingeni na ove eto humotepain ara ehei ore \v 15 sovera nei humbuto o ove ehera amita degi hoenge ikehei ihiketo ke eria avo humotepain ae ehere tehere pehehera \v 16 eto ari nei ehija amo embo pepeni te isapa te eto embo koro te koro ambupu te eto pure mamo te pure embo te tapa amina beo ta rete mo ingeni be ta retemo hajire umbara ehija, \v 17 eto ‘number’ umbera amo o sapura ta ‘number’ eto amita javo ta hajire ra. Eto embo amuna ‘number’ aravo hamo amita ta umbae aisuja embo amina donda nei do mane ombuto humbasuja. \v 18 Avoeto umo kiari embo kito o ta ‘number’ avo eto kito eheketo hambujo amo embo na donda ehekagora amita ‘number’ avoeto 666 ra. \c 14 \s1 O ‘Lamb’ te amita embomeni te \p \v 1 Eto na arerembeto kogue mihene nau tihi ta amo tiri javo Zion amita hamo ta amo O ‘Lamb’ heteto mihia eto amiga mihera amo embo tapa 144,000 ainge amita beo ta O ‘Lamb’ ta javo te amita Mamo ta javo te avo kakajekari avo mihere kehena. \v 2 Eto uhu i ta hindu ingena amo umo vuenga ta hindu ainge eto tururu pajire be amita hindu aingeko rate gita javo ‘harp’ embo isapamane na teagora amita hindu aingeko avo ingena \v 3 eto God ta avo arumba peni amite eto o vasiri te tapa 4 amite eto embo okokose tapa amita tombu ta embomeni tapa 144,000 amina haveni eha ganeto haveni erera amo embo eha God na enda ta ombuto humbari amina pere haveni amo humbari haitera. \v 4 Eto embomeni aramina evohu ga tiha paiha ae ari jajavotoho pere ere uahera amina iji mahainge O ‘Lamb’ ambo ambo ue pambagora amo ji eha uragora ereto be jajavotoho pepeni ekaguja aingeko amina embo aravo embo tapa ta degi ombuto humbuto O ‘Lamb’ ta degi eto God ta degi hande ikari ra. \v 5 Eto enana ta pe ta ke sokova irae eto ke sasapura irae avoeto enana amo pehumba ari haite manera. \s1 Anera nei heriso nei vahai \p \v 6 Eto Anera vahai i ta kin eto pambuhoi kehena amina God ta duru javotoho daroho iraguja avo ke neite neite ari embomeni enda tapa ta iragora amita degi ke hande ue \v 7 ke isara na einge ehija. “Embo ta ari siriketo hajire ikari iji puvija avoeto uhu te enda te eva te umo kuru vihiuja amite tapa ari embo God avo joru ue jakeka ijirovo amita degi usasa puvuroi,” \v 8 ainge ijie pambuhoi Anera nei amita ambota puvutuhue ke einge ehija “Eto enda peni Babylon amita tiha evohu na eoi enda embo tapa na amita esi mu indie ari sasapura uje peni vahai eagora avoeto enda Babylon avo karaun eto ere vovua,” ke ainge ehei \v 9 Anera nei vahai ambota puvutuhue ke isara na einge ehija, “Eto embo amuna o sapura aririvo embo na ove ari amite avo kogue humotepain ue eto amita hajire ‘number’ avo beo ta rete o ingeni ta rete humbasuja \v 10 amo God na tumo pajire be eto amita degi wine saruka sovera te overekau humbuto indirou humbuto Anera ototohu te O ‘Lamb’ te amita tombu ta ikau evikihie memenga kogurou \v 11 amita iposi na daroho ta vivihe iresuja. Eto embo amuna o sapura amita javo ta hajire humbuhe o amite amita aririvo te avo jakeka aisuja amina iji te mume te tapa jangu indari mane kesuja,” ke ainge Anera amina ehija \v 12 avoeto ungo embo ototohu God ta ke agi ue Iesu humota eagova avo ungo sovera eto irivujo. \p \v 13 Eto ke nei uhu i te ei ingena amo eingera, “Ke erevi kajejo: eto embo amuna eha oroho eto ambota Bada ke be ere ijima pehasuja amita degi ta javotoho be puvuresuja.” Ainge eto Ahihi na einge eria, “Ke be, amo enana ta pure irae au jangu indie iriroro pure ta be ambota puvurou kesora.” \s1 Enda ta be kahumbasora \p \v 14 Eto na tihi i ta eto kehena amo johi parara be ai ta Embo ta Meni kiarako ehena amita siro ta kope gold na ari avo asuketo asivo okokombari ti te avo jigito mihei kehena. \v 15 Eto Anera nei na ‘Temple’ jo ta eto puvuto embo vahai johi parara hamota arumbeto mihina amita degi ke isara na einge ehija, “Enda ta be javotoho avo sari ari iji puvija no asivo humbuto pambuto kahumbeto umbujo” ke ainge ehei \v 16 embo johi hamota arumbeto mihia amina asivo na jiheto enda ta be tivehei iraehija. \p \v 17 Eto Anera nei uhu i ta temple jo ta mihina amite tapa asivo okokombari ti te avo jigito puvei \v 18 Anera nei ji evekaguja amita simba ari Anera amina pene gaga ta eto puvuto Anera nei asivo te amita degi ta ke isara na einge ehija, “Enda ta esi ‘grape’ be sari eto mihia avo kahumbeto humbuto puvujo” ainge ehei \v 19 Anera na asivo humbuto enda ta ‘grape’ be jiheto kahumbeto humbuto God na hini kambari ue haito sahaguja degi ai gosukehei vehei \v 20 da sahu ai ta sahihere orosa na pevihito gavineketo veto ‘300 kilometres’ eto ukomo eto vihito o ‘horse’ ta pe ga inono ehija. \c 15 \s1 Anera tapa 7 amina aro osaga memenga kesora \p \v 1 Eto na hajire nei pajire be avo uhu i ta kehena amo Anera tapa 7 amina osaga memenga hajire neite neite tapa 7 ainge avo embota degi aro koguroro God ta tumo irae asuja avo jigito mihere kehena. \v 2 Eto eva visi visi javotoho ji peri na ombuto ombuto ari kehena amita hora ta o sapura te amita aririvo ove ari te amita javo ta number hajire te umbae sovera eto dembari embopo amina gita javo ‘harp’ God ta degi umbera ai ta torue \v 3 Moses, God ta pure ari embo te eto God ta O Lamb te amita haveni avo einge ijie ehera, “Bada God sovera isapamane te no ari tapa avo pajire be eto javotohora. Eto vasiri no tapa amo ke be ke be umo iji daroho ta king. \v 4 Oarie Bada embo tapa na umo joru ururoro usasa javo no ta puvuroi no ari jajavotoho eoe kiagora avoeto enda embo tapa na no degi ta puvuto humote pain ue jakeka asora”. \v 5 Haveni ainge ehere irae ehei uhu i ta God ta irari degi Otohu be Otohu avo hirikihoi \v 6 Anera tapa 7 amina osaga memenga tapa 7 ainge avo jigiriketo arahata puvutuhore kehena amo enana bo parara be asari eto jenge ta amo pupuri gold na ari avo kajari ainge avo puvutohore \v 7 o vasiri tapa 4 rate vahai amina aguhu gold na ari tapa 7 ainge avo ikerekehija amita jo ai ta amo God ta tumo pevihari avo mihia. \v 8 Eto temple jo ai ta amo God ta sovera te eto God ta usasa te amina ji iposi ainge eto kumbo kumbo vihito temple jo enetehei embo horari haite mane kihi Anera 7 amina osaga memenga tapa 7 avo aro embomeni na kioro irae au ambota horasora. \c 16 \s1 God ta tumo aguhu tapa 7 ta ra \p \v 1 Eto temple jo ta ke isara na Anera tapa 7 amita degi ta ke einge ei ingena, “Ungo pambuto, aguhu tapa 7 ainge God ta tumo na pevihari avo humbuto enda embomeni ta degi jojevujo veare,” ke ainge ehei \v 2 Anera vahai amina pambuto amita aguhu avo enda ta jojehei veto embo o sapura amita aririvo ingeni na ove ari avo jakeka ue hajire humbari embomeni amita hamota mahu memenga te masa te pajire be avo paukena. \v 3 Eto Anera nei amina aguhu nei avo eva hamota jojehei veto embo pehari ta orosa ainge avo irerembehei eva ta o vasiri te tapa be tapa amo pepehekehera. \v 4 Eto Anera heriso jojehere irae ehei Anera nei amina aguhu humbuto umo kombu te avo te ai ta amite umo kuru vihiuja ai ta jojehei veto orosa irerembehei, \v 5 Anera umo simba eaguja amina ke einge ehija, “Umo daroho irari Embo Otohu inena enana ta ari sasapura ta hajire ere ikihea amo javotohora amo \v 6 enana na peroveta te embo ototohu te amita hamo tiukehere orosa vehija avoeto inena orosa ikihe enana ta ari hajire avoeto kogue ere indera” ainge ehei \v 7 pene gaga kehena ta ke mine einge puvija “Ke be umo Bada God sovera isapamane te embo sasapura ta degi no hajire ikari amo be perera”, ainge ehija. \v 8 Eto Anera heriso nei vahai jojehere irae ehei nei amina iji hamo ta jojehei iji vevere pajire be eto ihiketo embomeni evekehei \v 9 vevere memenga koguroro amo God na osaga memenga embomeni na kogora avo haekari haite rate embomeni na memenga kogue ari sasapura toto jo hapereketo God jakeka ae hoviro ehera. \p \v 10 Eto Anera nei heriso nei heriso jojehere irae ehei nei amina aguhu o sapura amita avo arumba peni ai ta jojehei mume kambujoro pajire be sihukehija. \v 11 Eto embomeni na osaga memenga eto masa kehera avo hotembeto tunga hapereketo ari sasapura toae rate uhu i ta God avo hoviro ehera. \v 12 Eto Anera tapa 5 jojehere irae ehei nei amina umo pajire javo Euphrates ai ta jojehei eveketo irae ehei kings nei nei ihane hena ta eto isoro ue puvurora ehija. \v 13 Eto na kogue mihene Ahihi sasapura o kana ainge tapa heriso nei vahai amo vahai o koso o javo ‘dragon’ ta pe ho ta puvija eto nei amo o sapura amita pe ho ta eto puvija eto nei amo peroveta ke sokova na ke hande eaguja amita pe ho ta eto puvija. \v 14 Eto Ahihi sasapura amina pambuto enda tapa ta ‘kings’ amita tombuta ari sovera neite neite eagora amore God sovera te ta iji peni amite vahai ta puvuto isoro pajire be ara ari ainge amo eagora. \v 15 Eto God na ke einge eria, “Ingivujo, na pegene embo na joru paseto puvurarako asona avoeto embo amuna evo ae ue bo asuketo ereto iresuja embo amina hamo teho mane avoeto me mane kesuja”, ainge eria. \p \v 16 Eto enana na enda tapa ta ‘kings’ avo siriketo ikehere pambuto ‘Hebrew’ ke na degi javo ‘Armageddon’ eagora ai ta horukehera. \v 17 Eto Anera tapa 6 amina God ta tumo aguhu ta avo jojehere irae ehei nei vahai amina aguhu humbuto jiginu vihinu i ta jojehei vehei temple jo ta avo arumba peni ai ta ke isara na “Irae ehija aravora”, ainge ehei \v 18 pipiri te tururu te asavi ei enda titira pajire be ereto enda tiroki koheki ehija amo embo ari iji te eto puvuto eha emikote amina titira aingeko ae peko ta eha ehei \v 19 da pajire be avo enda haunketo tapa heriso nei vahai ainge oi enda tapa ta da pepeni tapa amo karaun eto vehera. Amo da sapura javo Babylon avo hotembeto aguhu ta ‘wine’ jojarako eto amita tumo avo jojeto ikehei indija. \v 20 Eto eva tiuka tapa amo irae oi tiri tapa amo karaun eto veto visi visi ehera. \v 21 Eto uhu i ta eto ‘ice’ moti pepeni papeni bouka ‘50 kilo’ ainge amina embo ta hamo ta vehei osaga memenga pajire be kogue God ta degi hoviro peni vahai ehera. \c 17 \s1 Tiha evohu pajire be \p \v 1 Eto Anera 7 aguhu 7 rate vahai amina puvuto nau degi ta ke einge ehija, “Umo einge hae tiha evohu pajire be umo isapamane amita hamo ta arumbeto mihia amita ari sasapura ta hajire God na do ainge au kesuja avo ano kesoa, \v 2 amo enda tapa ta ‘kings’ na amiga tiha eagora avo eto enda tapa embomeni na amita tiha ‘wine’ ainge amina indere tihivi oi ere ora,” ainge eto \v 3 Anera amina Ahihi nau humbuto pambei tiha evohu avo ojaga tambu ai ta o hamo pangari eto o amita hamota amo God ta javo urumbihe kajari eto o amita siro tapa 7 amita perema tapa 10 ainge amita hamota arumbeto mihei kehena. \v 4 Eto amita bo amo ove ohoma te ovihasuko ta ove kaneke kaneke ari eto bo hamota amo ‘gold’ te koro orina uhuruma memeni jajavotoho amina kogombari avoeto pingi sari ehija. Eto amita ingeni ta amo aguhu ‘gold’ na ari avo jigito mihia eto aguhu jo ta amo amita tiha paiha ta tongopa te eto donda sasapura neite neite amina pevihari avo jigito mihia \v 5 eto amita beota amo ke ojikari na einge kajari kehena: “Enda ta ari sasapura tapa amite eto tiha paiha ari evohu tapa amita e amo Da peni javo Babylon”. \v 6 Eto evohu amina Iesu ta ke hande ari embopo ototohu ta orosa avo indito kava oi kehena. Eto na evohu avo kogue mana mana one \v 7 Anera na nau degi ta ke einge harikehei ingena, “Umo mana mana ere oate evohu emite eto o siro 7 amite perema 10 amite amita be avo harikano ingesoa, \v 8 amo o sapura ere kogoa amo mahu mihahija te eha amo iraera te enda jo hu ta eto vihito pahurou God na tau irae asuja amo embomeni enda eha ra ta ari iji te eto puvuto eha eremikote avo enana ta javo book vasiri amita jo ta kajae avoeto o sapura aravo kogue ti kakambuketo mana mana aisora amita be amo o sapura amo mahu mihahija rate eha amo irae avoeto ambota puvuresuja. \v 9 Eto ke nei asi ereona amo embo uha hotembari javotoho te amina kesuja amo evohu amina heti tapa 7 ai arumbeto mihia amo amita siro tapa 7 ra eto nei amo enda ta ‘kings’ tapa 7 ra, \v 10-11 te 5 amo enana ta tihi jigari mahu irae ari nei vahai amo tihi jigihe mihia eto nei amo eha heteto iji tuho be tihi jigesuja. Eto o sapura amo mahu mihahija te eha amo irae ra te eha ereto enana 7 amiga king inono ue king 8 aisuja rate God na tau irae asuja. \v 12 Eto perema 10 amina ahekihira oi ere kogoa amo ambota kings heteto o sapura amiga tapa iji tuho be tihi jigihe \v 13 uha vahai asora amo enana na o sapura amita sovera ari ikihe \v 14 O Lamb ta degi isoro asora te O Lamb amo bada tapa te amita Bada eto king tapa te amita King avoeto amita ambotani jajage eto siriketo humbari amiga heteto isoro eto o sapura amo dembasora” ainge eto \v 15 Anera na ke nei einge ehija, “Eto tiha evohu na umo hamo ta arumbeto mihia umo amo enda tapa te amita ke neite neite avo ijie iragora embomeni ra. \v 16 Eto o sapura amite eto perema 10 amite na tiha evohu ta degi tumo ue ereto tiha evohu amita bo jigito houketo taro pehau visi indie ji ta ikaro evekasuja \v 17 eto ainge asora amita be amo God na amita uje avo ara jo ta hotembari ikau tunga vahai eto o sapura ta degi sovera ari ikihiroro God na ke ehija amita be avo puvurou kesora. \v 18 Eto evohu ere kogoa amo enda sapura ta da okose vahai amina enda tapa ta ‘kings’ tihi jigihe mihia amita ahe kihira avo ere ua. \c 18 \s1 Da Babylon karaun eto veasuja \p \v 1 Eto ari avo kehene irae ehei Anera nei uhu i ta eto veto puvutuhoi kehena amo Anera okose be amina puvutuhoi amita usasa pajire be amina enda tapa daha daha oi \v 2 amina ke isara na einge ehija, “Da pajire be javo Babylon amina karaun eto vehei irae ehei embahe te ahihi sasapura te di sasapura te amina ai ta mihera. \v 3 Amo da tapa embomeni na amita tiha ta ‘wine’ indito kava ue ere vovora eto enda ta kings tapa na amiga tiha uoi enda ta donda ombari embopo na amita degi ombuto humbuhe koro mamone ere ovora” ainge Anera amina ehei \v 4 uhu i ta eto ke einge ehija, “Nau embomeni ungo evohu avo toto have eto ungote tapa na evohu ta ari sasapura ta veasova amore evohu amita degi osaga memenga ikasona avo ungo te tapa kiagova uje ae ereona \v 5 amo evohu ta ari sasapura hamota hamota ue vihito uhu hame ere ua avo God na jenambu ae rate kogue mihia \v 6 eto evohu amita sapura do ikehija avo mine ikari avo inono ta mane ikasuja rate nei hamota ikihe aisuja amo evohu ta aguhu ta inja mihia ai ta God na inja nei sovera te amo hamota jojeto ikau indesuja. \v 7 Eto evohu amina haja vaja te usasa te do ainge humbija amo God na kito memenga te osaga te amo ainge inonota ikau kesuja. Eto evohu amina jo ta einge ere hotembihia, “Na evohu doru mane na ‘queen’ pajire be avoeto si mane asona te daroho ta tunga javotoho ue iresona” ainge eria \v 8 te amita ari siriketo hajire ikari embo Bada God amo sovera isapamane be amina iji vahai osaga memenga ikau puvutuhurou sorara humbasuja, pehasuja, eto beuje kesuja, eto ji na evekau irae asuja,” ainge ehija. \p \v 9 Eto enda ta kings amita hajae vajae indie amiga tiha ere ova avoeto evohu avo memenga kogua avo joru ue ahen ta heteto amita iposi kumbo kumbo vihesuja \v 10 avo kogue si ijie ke einge asora, “Oio, da peni Babylon sovera te, iji isapa amita tutumota irae ereoa,” ainge ijiroro \v 11 enda ta donda ombuto humbari embopo na donda na ombuto koro humbari degi irae ere ua avoeto bija puri aisora \v 12 amo enana ta ‘gold’ te ‘silver’ te bo ove neite neite na kembari te ji savari te donda neite neite o ti na ji na ‘bronze’ te ‘iron’ te na eto koro na ove ari amite eto \v 13 donda mune te ji osare hamo te jeune te doriva te ‘wine’ te seha te ‘wheat’ be jasari te jasae amite o ‘cow’ te o ‘sheep’ te o ‘horse’ te amita gaga te eto embo ta hamo te ahihi te tapa amo ombuto humbari degi irae avoeto \v 14 enana na ke einge aisora, “No ji be neite neite uje isapamane ereova amita gamo ehako mane kesoa eto no hajae vajae tapa irae ere ua ehako egerembari inono ae,” \v 15 ainge donda na evohu amita degi ombuto koro isapamane humbagora embopo amina joru ue hoi ta heteto evohu amina memenga kogurou si ijie \v 16 einge aisora, “Ajao da pajire no bo ove hohoma te ovihasuko te na kembari eto no bo hamota gold te koro orina uhuruma jajavotoho amina kogombari amina pingi sari eaguja te \v 17 iji isapa amita tutumota tehei hajae vajae irae ere ua,” ainge ijio e nga tari jigari embo te tihi jigari embo te e nga ta eagora embomeni tapa amina hoi ta heteto \v 18 amita iposi kumbo kumbo vivihirou kogue ke einge aisora, “Da pajire be eingeko mahu be mahu amo iraera” ainge ijie \v 19 amisa timbuto siro ta kuhihe bija puri ijie ke einge aisora “Oio da pajire be, dago e nga tihi jigirikari embopo na no degi ta pambuto donda na ombuto koro mamone ere ovora te iji isapa amita tutumota tehei irae ere ua,” ainge amo enana na aisora te \v 20 ungo uhu i ta irari embopo tunga javotoho evujo amo ungo embo ototohu te apostero te peroveta te tapa tunga javotoho ue haveni evujo, amo ungota degi sapura eaguja avoeto God na hajire mine ikehei kogua,” ainge Anera amina ehei \v 21 Anera nei vuvure te amina koro pajire be ‘wheat’ jasagora aingeko avo humbuto eva ta gosukehei vehei ke einge ehija “Vasiri pajire be eingeko amina da peni Babylon amo gosukaro veto irae au ehako hambari haite mane aisuja. \v 22 Eto amita huin husari te isepuri husari te gita tari te haveni ganari te amo embo na ehako mane ingesora eto amita ingeni na pure ari embopo ai ta mane hambasora eto ‘wheat’ jasari ta hindu ai ta mane ingesora. \v 23 Eto amita jo ta usasa mane undukaro evekasuja eto singa te kakara te jimbari ta ke mane ingesora. Eto no donda na ombuto humbari embopo amo enda ta embo okokose avoeto no saruka ke na enda tapa embomeni kihi humbuto sapura ta pambua.” \v 24 Eto embo tapa enda ta tari te peroveta te embo ototohu te ta orosa amo da amita jo ta hambera. \c 19 \p \v 1-2 Eto ari ainge ehija amita ambota uhu ita embomeni isapamane na ke o a ijie einge ehera, “Aleluia God na embomeni ta ari avo ke be na siriketo enana ta hajire ikihe tohota embomeni avo oreketo siriketo humbija, amo usasa te sovera te amita degi iroi. Eto tiha pajire be ari evohu amina amita tiha na ehei enda tapa sapura be ehei God ta pure embopo tehei orosa vehija avoeto God na amita sapura ta hajire ikehei humbuto ere ahua,” \v 3 ainge eto ke o a ijie ehako einge ehera “Aleluia, evohu avo evikihie amita iposi na kumbo kumbo vivihe daroho ta iresuja”, ainge ijio, \v 4 embo okokose tapa 24 amite o vasiri te tapa 4 amite na God avo arumba peni ai ta arumbeto mihia amita tombu ta veto gombuto God jakeka ijie, “Amen, Aleluia,” ainge ere. \s1 O ‘Lamb’ ta jimbari dorovu \p \v 5 ke avo arumba peni ai ta eto einge puvija, “Ungo God ta pure ari embomeni pepeni te memeni te ungo God joru ue otohu eagona embomeni avo God jakeka evujo,” ke ainge ehei ingihene \v 6 ke nei umo pajire be ta hindu ainge eto pipiri pajire be ta hindu ainge amina ke mine einge ehija, “Aleluia, ungotenau Bada God sovera te na heteto tihi jigihe mihia. \v 7-10 Ungotena osa osa ue jakeka ijie haveni ijiroro amita degi usasa puvuroi, amo God ta o ‘Lamb’ ta jimbari iji puvei amita kerari kakara amo amita ekalesia avo nununga oi bo parara javotoho tongopa ambu ikehei asukehija amita be amo embo ototohu tapa amita ari jajavotoho avo asukehija,” ainge ehere Anera na nau degi ta ke einge ehija, “Ke erena erevi kajejo, O ‘Lamb’ ta jimbari dorovu indora oru humbari embopo amina osa osa ue tunga javotoho aisora” eto nei amo “Ke kajihena amo God ta ke be ra,” ke ainge kajana ehei, Anera jakeka ijie utu ta gombuto mihene haekihe ke einge ehija “Na mane jakeka asoa te namote umote eto no namei kamei Iesu ta ke hande eagora amite tapa God ta pure embopora te ambota do puvuresuja avo ene ere kogoa amita be amo Iesu ta ke vahai aravora avoeto God vahai avo jakeka ejo. \s1 O ‘horse’ parara \p \v 11 Eto uhu pe hirikari ai ta o ‘horse’ hamo parara heteto mihei amita hamota arumbeto mihia amo embo javo Humota ari Ke Ve ari amo embo ta ari avo siriketo hajire ikari embo eto isoro embo avo mihei kehena, \v 12 amita tihi amo ji peri ainge amita siro ta kope isapamane be eto amita javo hamo ta kajari amo embo tapa kiae rate umo oenga ere kogua \v 13 amita bo amo orosa ta hatito pohukari eto amita javo amo “God ta ke” ra. \v 14 Eto amita ambota amo uhu i ta isoro embopo avo bo parara javotoho tongopa ambu avo asuketo horse hamo parara ai ta areto puvutohore kehena. \v 15 Eto embo amita pe ta amo asivo koso vahai ti te amina enda embo tapa jasuja avo pe ta eto puvutuhoi kehena. Eto embo amina daho ngahia be avo jigito embo tapa tihi jigesuja. Eto Embo amina God sovera te tumo avoeto embomeni ta hajire ikau kesora amo ‘grape’ ta hamo ta haito saharako aisuja \v 16 eto amita bo pohukari hamota eto utu poru ta amo embo amita javo amo einge kajari mihia “King tapa ta king eto Bada tapa ta bada” ainge kajari kehena. \v 17 Eto Anera nei kehena amina iji ta heteto di i ta ere pahua amita degi jage eto einge ehija “Ungo God ta pondo indova na have, \v 18 amo kings te isoro tihi jigirikari embopo te vuvure embopo te, o horse hamota arumbeto pambari embopo te o horse te embo okokose te pure embopo te eto peni te isapa te indova na have”, ainge ehei \v 19 o sapura amite eto enda ta kings te enana ta isoro embopo te na embo o horse parara ai ta bo parara asari amite eto amita isoro embopoga isoro asi horukea \v 20 rate peroveta sokova o sapura amita javota ari sovera neite neite oi embomeni kogue o sapura ta hajire kikiva ari avo humbuto o sapura ta aririvo ingeni na ove ari avo humotepain ehera peroveta amite eto o sapura amite tapa avo andito umbera te tae pehae umo joremba ji peri masa te ai ta gosukehere veto evekehere \v 21 o sapura amita isoro embopo nei uhoho amo embo o horse hamota arumbari amita asivo pe ho ta eto puvuto mihia amina jehei pehehere di na veto visi indere hini guru ehija. \c 20 \s1 Jua tapa 1,000 \p \v 1 Eto Anera vahai uhu i ta eto veto puvutuhoi kehena amo ingeni vahai amo enda jo hu ta amita bokiri hirikari ‘key’ avo jigito ingeni nei na amo ‘chain’ pajire be jigija \v 2 amina veto o koso o sapura be javo ‘dragon’ amo ke gamo poekari embo ‘Satan’ embo avo andito punduto enda jo hu beta gosukehei \v 3 veto jua tapa 1,000 ainge ai ta iroja iketo ahureketo arinako ehija amo enda tapa embomeni engekihoi amita ujeta ambo ambo eagora avoeto enda huta jua tapa 1,000 ainge mihirou aro araha ta puvuto iji isapa isa aisuja. \v 4 Eto avo arumba pepeni ai ta kehena amo embomeni ta ari sirikari embopo avo God na siriketo ikehei areto mihere kehena eto nei amo God ta ke avo ke be ijie Iesu ta ke hande ari embopo avo tunga tiukari amita ahihi avo kehena. Eto enana amo o sapura te eto amita aririvo ingeni na ove ari amite avo humotepain ae eto amita hajire beo ta eto ingeni ta umbae avoeto enana amina ereto Iesu ga jua tapa 1,000 ainge amita jo ta heteto tihi jigesora \v 5 te tihi jigari iji amita tutumota amo embomeni pehari tapa amina vasiri te erasora \v 6 te enana kihi erasora amina Otohu be ue tunga javotoho be aisora eto enana ta degi God na sovera ari ikau ehako mane pehasora te vasiri te daroho ta mihie God ta eto Keriso ta priests ue amiga jua tapa 1,000 amita jo ta tihi jigesuja. \s1 Satan na daroho ta memenga kesuja \p \v 7 Eto jua tapa 1,000 irae au Satan tipura ta avo hirikau vihito \v 8 pahue God ta kitoho enda tapa ta mihera (amita javo amo Gog te Magog te ainge amo eagora) avo jajage au puvuto isoro asi vahaita horukasora amo eva hora ehekari inono ae aingeko \v 9 amina enda tapa ta eto puvuto God ta osa ari da amita embomeni mihera avo joeketo mihiroro ji na uhu i ta eto veto embo amo evekau pehihiroro \v 10 enana engekari embo Satan avo humbuto o sapura te peroveta sokova mahu gosukari veari degi ji peri masa te umo joremba ta evekaguja ai ta gosukau veto mihie iji te mume te daroho ta memenga kesuja. \s1 Ari sirikari iji tutumota \p \v 11 Eto avo arumba pajire hamo parara be amita hamota Ari Sirikari Embo mihei kehena amita degi ta eto uhu te enda te na joru pambere irae ehija amo ehako hambari haite manera, \v 12 eto embo pepeni pehari te isapa pepehekari te tapa amina avo arumba peni amita tihi buju ta heheteto mihere enda ta ari do ere uahera tapa books ai ta kajari avo hiriketo ai ta kogue siriketo hajire ikehija. \v 13 Eto book nei hirikehija amo vasiri ta book ra eto use te embo pehari ta ahihi irari degi te eto eva te na pehari embomeni tapa ikehere puvera \v 14-15 eto embo amita javo book vasiri amita jo ta kajari irae kito amo ehako pehaja humbuto umo joremba ji peri ai ta gosukaro veto mihie ji vevere daroho kogue iresora. Eto ji peri aita amo embo pehari te degi javo Hades amite tapa irae aisuja. \c 21 \s1 Uhu eha te enda eha \p \v 1 Eto uhu te enda te eva te mamahu irae ehere uhu te enda te ehaha avo kehena \v 2 eto kerari kakara kogombeore amita ivu na sago pajire be kiaguja aingeko avo da eha Jerusalem Otohu amo God ta degi uhu i ta eto vovuoi kogone \v 3 ke pajire be avo arumba peni ai eto einge puvija “God ta irari degi avo embo ta degi puvija amo emboga iresuja eto enana amo amiga mihiroro God na enana ta God ue \v 4 enana ta tihi sisivu tapa avo tuhasuja amo donda tapa be tapa eto ari tapa mamahu amo irae ehija avoeto pehari sorara humbari bija puri ari memenga tapa amo embo na ehako mane kesuja,” ainge eto \v 5 avo arumba peni ta arumbeto mihia amina ke einge ehija “Na donda tapa ehaha ereona amo ke be ijie humota ari haite ra, tapa book ta kikiva ejo kiore,” ainge ijie \v 6 nau degi ta einge ehija “Aravora, irae ehija namo amo ihikari ta eto pambuto tutumota ra (amo Alpha te Omega te ra) eto embo umo beuje asuja amo umo vasiri kuru vihiuja ai ta nane mine vahai timbuto ikano indesuja te mine mane ikasuja. \v 7 Eto embo amina sovera eto dembasuja amina hotari erevi humbau na amita God ururono amo nau meni aisuja \v 8 rate joru ue ke hande ae embopo te God ke be ae embopo te ari sasapura embopo te embo tari pehari embopo te tiha paiha embopo te saruka embopo te God ingeni na ove eto humota ari embopo te ke sokova eagora embopo te tapa amita irari degi amo umo joremba ji peri masa te evekaguja aita amo enana ari ainge eagora amita pehari nei amo aravora,” ke ainge ehei. \s1 Da Jerusalem eha \p \v 9 Anera tapa 7 aguhu 7 aita osaga memenga na pevihari overekehera ta Anera vahai amina nau degi ta puvuto ke einge ehija “Na O ‘Lamb’ ta ae kerari avo ano kioana hae” ke ainge \v 10 eto ahihi nau humbuto pambuto tiri pajire koso vahai aita ikehei hetehene Da Otohu Jerusalem uhu i God ta degi ta eto ikehei vouvoi ehei kehena. \v 11 Eto amina God ta sovera te usasa te amina gain eto koro orina javo ‘jasper’ na usasa pingi sari eaguja ainge amina ehei kehena \v 12 eto huga koro na hamota hamota iketo vihari koso vahai be amina joekari aita pe tapa 12 ainge paukari aita amo Anera tapa 12 amina heteto simba ue iragora eto pe bokiri amita hamota amo Israel embomeni ta Ohihi javo tapa 12 amina kakajekari mihia \v 13 eto pe tapa 12 rate 3 ainge amo ihane ta nei 3 ainge amo sohe ta nei 3 ainge amo kaina ta eto nei 3 ainge amo pahina ta \v 14 eto da ta huga jigito ngahia iroja atahu ikari koro tapa 12 amita hamota amo O ‘Lamb’ ta apostels 12 amita javo kakajekari avo mihere kehena. \p \v 15 Eto Anera namote ke ehija amina heka humbari ituha gold na ari amina da ta heka do aingere eto huga amita heka do aingere eto bokiri ta heka doaingere avo humbasi jigija. \v 16 Eto heka humbija amo i ta eto hu ta kaina eto pahina ihane eto sohe amo heka inono inono ta ikari avoeto 1,400 kilometres koso ra \v 17 eto ehako huga ta heka humbija amo huga apupu oiho ta eto pambuto apupu oiho ta eto heka humbija amo 65 miters ra amo embo heka humbagora ainge dombo amina jigama ehija. \v 18 Eto da ta huga amo koro orina javotoho javo ‘jasper’ amina gerikari eto da be amo ‘gold’ javotoho usasa eaguja amina gerikarira. \v 19 Eto da ta huga jigito ngahia iroja atahu ikari koro tapa 12 amo koro orina kiari jajavotoho ove neite neite amina kogombari ra eto vahai amo ‘jasper’ na kogombari nei amo ‘sapphire’ na kogombari nei amo ‘chalcedony’ na kogombari nei amo ‘emerald’ na kogombari \v 20 nei amo ‘sardonyx’ na kogombari nei amo ‘sardus’ na kogombari nei amo ‘chrysolite’ na kogombari nei amo ‘beryl’ na kogombari nei amo ‘topaz’ na kogombari nei amo ‘chrysoprase’ na kogombari nei amo ‘jacinth’ na kogombari eto ambo dombota amo ‘amethyst’ na kogombari ra. \v 21 Eto huga pe ta bokiri 12 amo eva ta gagina uhuruma parara be eto pajire vahai vahai amina bokiri tapa 12 amo ahurekari mihia eto da jo ta degi pambari amo gold javotoho usasa te amina vevendeto pambarira. \v 22 Eto da amita jo ta amo embo vahai vahai amina degi tapa ta ue Bada God sovera te eto O Lamb amite jakeka eagora avoeto da jo ta Temple amo irae ra. \v 23 Eto God ta usasa te eto O Lamb ta usasa te na da jo ai ta usasa eaguja avoeto iji te hariga te ta usasa amo mane eaguja. \v 24 Eto enda tapa amita embomeni na amita usasa ta iriroro enda ta ‘kings’ na enana ta sago kiari te hajae vajae te humbuto da ai ta horasora \v 25 eto da ai ta mume mane sihukasuja avoeto huga ta pe bokiri amo mane ahurekasora te hirikari mihirou \v 26 enda tapa embomeni na donda sago kiari jajavotoho humbuto ai ta horasora te \v 27 donda sapura te ari sapura te ke sokova te avo mane ai horasora te O Lamb ta book javo vasiri ai ta javo kakajekari embomeni amina pere horasora. \c 22 \p \v 1 Eto Anera na vasiri ikari umo avo God ta eto O Lamb ta avo arumba peni ai ta eto puvutuhoi ehei kehena \v 2 umo amina da amita jo ta degi tambu orohu ai ta puvuto pambuhoi umo ahone ta vasiri ikari ji amina ereto be ekari iji amo hariga vahai vahai amita jo ta ekasuja eto amita iki amo enda embo tapa ta sivo avoeto indie kokojekasora. \v 3 Eto enda ta saruka ari memenga ikari neite neite tapa amo irae asuja. Eto God te O Lamb te na da jo ta avo arumba peni ta arumbeto mihiroro amita pure embopo na ke agi aisora. \v 4 Eto embomeni na God ta tombu kesora eto God ta javo avo enana ta beo ta kajasuja. \v 5 Eto da ai ta mume mane sihukasuja avoeto embo na mane usasa undukasora te usasa amo Bada God ta degi puvuresuja avoeto usasa iji ta avo mane kesora. Eto embomeni na heteto God ga daroho mihie tihi jigesora. \s1 Bada Iesu ta puvurari \p \v 6 Eto Anera na nau degi ta ke einge ehija “Eto ke erevi erena amo ke be ijie humota ue evujo amo Bada God peroveta tapa ta Ahihi amita God na amita pure ari embopo na ari tapa do puvuresuja avo be kiagora amita Anera namo avo ikehei puvena.” \p \v 7 “Kivujo na eha puvuto ere hona avoeto embo amuna ambota do puvuresuja avo book eita kajari mihia avo toae jigama ue iresuja amina tunga javotoho be aisuja,” ainge Bada na eria. \p \v 8 Na John nanena ke erevi kehena eto ingena avoeto na ari kiari Anera avo jakeka asi veto gombuhone haekihe ke einge ehija. \v 9 “Na jakeka aojo. Namote umote peroveta tapa amo no namei kamei ra amite eto book amita ke agi eagora embo tapa amiga God ta pure ari embora avoeto God vahai avo jakeka ejo,” ainge ijie ke nei \v 10 einge ehija, “Ari do asora avo o hamo vujekari ei ta kajari mihia amita iji avo auvehija avoeto o hamo mane egovekasova. \v 11 Eto ari sapura embo amo ari sapura mahainge ue iresuja God kiae embo amo God kiae ue mahainge iresuja, ari javotoho embo amo ari javotoho mahainge ue iresuja eto embo otohu amo embo otohu mahainge ue iresuja,” ke ainge Anera na ehija. \v 12 Eto Iesu na ke einge eria “Kivujo, na puvuto ere hona, eto na embo jajavotoho te sasapura te amita ari ta hajire amo mine nau degi ta mihia avo inonota ikasi ere puvutuhona \v 13 na ihikari tutumota, kihi eto ambota, susu eto kombura. \v 14 Eto embo amuna da peni ta horasi bo egasuja amo God na au huga pe ta horeto vasiri ikari ji ta be avo indito tunga javotoho ue iresuja. \v 15 Rate da ahone ta amo embo sasapura amina ino na arako ue mihera amina saruka te tiha paiha te embo tari pehari te god sokova ingeni na ove ari avo humotepain ue iragora ke sokova na tirihie osa ue iragora amina da ahone ta mihera. \p \v 16 Eto na Iesu nanena ekalesia nau tapa avo ke erevi kiagora uje eto nau Anera emina au kioa ikehene puvija, na Susu ra, na David ta Meni ra eto na Iho Tarama usasa te ra,” \v 17 ainge eto Ahihi te O Lamb ta kerari kakara te na “Ungo havu” erera eto ke ingari embo na ke einge aisuja “Ungo havu, umo beuje kogue havu, ungo ujena vasiri ikari umo avo mine vahai indesi havu,” ainge aisuja. \s1 Ke tutumo \p \v 18 Eto iji ambota do puvuresuja avo book eita kaehena erevi ingari embo ta degi erena amo amuna ke nei hamota ikasuja amita degi God na memenga osaga book erei ta kajari mihia amo au kesuja. \v 19 Eto embo amuna book eremita ke davo purasuja amo God na au Da Otohu ta vasiri ikari ji book erei ta kajari amita be amo mane indesuja. \v 20 Eto ke erevi ikari embo na einge eria “Ke be, puvurari iji nau auvehija,” ainge eria avoeto ‘Bada Iesu umo hae!’ ke ainge na John na erena aravora. \v 21 Eto Bada Iesu ta hondate ari avo God ta embomeni ta degi iroi. Aravora.