\id EPH - 29/5/85 Larsen Orokaiva (Ehija dialect); changed backslash codes 3-Mar-2003 by E.Bibilo 
\h Ephesians 
\toc1 EPHESIANS 
\toc2 Ephesians 
\toc3 Ephesians 
\mt1 EPHESIANS  
\c 1  
\s1 Paul na ahari erevi da Ephesus ekalesia ta degi kajena  
\p
\v 1 Na Paul, Iesu Keriso ta apostero ana God na umbuna nanena ungo Iesu Keriso humota ue amita jo ta miheva embomeni ungota degi ahari erevi ere kajihena.  
\v 2 Eto God Mamo te Bada Iesu Keriso te ta hondate ari te peka te ungota degi iroi.   
\s1 Javotoho ari Keriso ta degi humbagora.  
\p
\v 3 Eto ungotena Keriso ga kajueto vahai ehera avoeto God na uhu ta javotoho ari tapa ungotenau degi ta hande eaguja avoeto ungotenau Bada Iesu Keriso ta Mama God osa ue jakeka are.  
\v 4 Eto God na enda ove ae pekota ungotena osa ue amita Meni ga kajueto amita tihi ta embo sasapura irae ototohu ara siriketo umbuna.  
\v 5 Eto God na Iesu Keriso ta pure amina ungotena amita meniundi be ara jo tapa na ungotena humbasi uje ena avoeto ihikari ta nununga ena.  
\v 6 Eto God na ungotena hondate pajire be eto amita osa ari Meni avo ungotenau degi ta hande ikena avoeto ungote God jakeka are.  
\v 7-8 Eto ungotenau degi ta hande pajire be overekena amo Keriso ta orosa amina ungotenau ari sasapura ombuto humbuhe ungotena orekihie ari sasapura tapa hotembeto tona.  
\v 9 Eto God na amita kiari pajire be amina Keriso na ari do aisuja amo mahu ojikari mihahija te ungotenau degi ta hariketo tambu ena.  
\v 10 Eto ke ai ta amo God na iji inono ta donda tapa amita ingeni na ena uhu ta eto enda ta avo humbuto ikau enda vahai ari vahai eto irirou Keriso humbuto ikau heteto tihi jigesuja.  
\v 11 Eto God na amita hotembari mane toasuja te aisuja avoeto God na uje amita avo ihikari ta sirikena amo ungotena Keriso ga kajueto God ta toho ara iji ihikari ta sirikena  
\v 12 avoeto dago Keriso puvuroja kihi simba ere uahera embomeni na God jakeka erera.  
\v 13 Eto eha emo ungo tapa na God ta duru javotoho ingito Keriso ke be ere oreketo humbei amita embomeni eheva. Eto ungo God ta toho avo embomeni kiagora hajire ikena amo amita Ahihi Otohu ikasi oje ena avo ikehei ungota jo ta mihia.  
\v 14 Eto Ahihi Otohu ungotenau degi mihia avoeto ungotena ke be erera amo amita hotari ungotenau degi ikasi oje ena avo amite tapa ikau humbasora. Avoeto ungotena God ta embomeni avo ari sasapura na andirae teho iresora avoeto ungotena God jakeka ijiroro amita degi usasa puvuroi.   
\s1 Paul na enana avoembo pari ena.  
\p
\v 15 Eto ke be avoeto ungo Bada Iesu humota ue God ta embomeni osa ere ova ke avo nane ingito God ta degi osa ue  
\v 16 ungo embo pari kaiketo ijirono  
\v 17 Bada Iesu Keriso ta Mamo God usasa te na ungota degi Ahihi amita ikau God ta vasiri tapa harikihirou kiagova penunu erena.  
\v 18 Eto ungo God na siriketo umbuna embomeni ta uha hirikau God ta usasa kogue uhu i ta irari javotoho God na ikau humbasi simba miheva amo do aingere avo be kiagova pari erena. Eto javotoho ari God na amita embomeni ta degi ikaguja amite  
\v 19 eto God ta sovera ungotena God ke be ari embomeni ta jo ta pure ere ua amite tapa ungo be kiagova pari erena. Eto God ta sovera ungotenau jo ta pure ere ua sovera amina  
\v 20 Keriso pehari ta jiginu erenu humbuto uhu i ta ingeni be ta ikenu arumbeto mihie  
\v 21 tihi jigirikari embopo tapa uhu ta eto enda ta amita siro ta tihi jigihe mihia. Eto amita javo amo pajire be ra enda eha mihia ambota puvuresuja amita javo neite neite ainge manera.  
\v 22 Eto God na donda tapa be tapa humbuto Keriso na simba aja sovera iketo amita ekalesia ta tihi jigari embo peni aja ikena.  
\v 23 Eto ungotena God ta ekalesia amo Keriso ta hamora. Amita be amo Keriso donda tapa ari embo na ungotenau jo ta mihie enetaguja ainge dombo donda tapa ena amita jo ta iraguja.   
\c 2  
\s1 Ungotena mahu pehari avo vasiri te ereto mihera.  
\p
\v 1 Eto iji mahu amo ungo God agi ae ue ari sasapura eagova avoeto ungota Ahihi amo pehari mihahija  
\v 2 iji amikote ungo na enda ta ari sasapura ambo ambo ue uhu ta eto enda ta Ahihi sasapura ta ke agi ueva. Amo enana ta ke avo God uje ae embomeni na agi eagora.  
\v 3 Eto ungotena mahu kihi ta enana te tapa God uje ae embomenira avoeto hamo ta ujeje sasapura hotembari sasapura ta pambuhuma God na embomeni tapa ta degi tumo eto hajire ikau kesora avo ungotenamote tapa kiaehera  
\v 4 te God na ungotena osa peni vahai ue jo pajire enu  
\v 5 ungotena ke agi ae ore Ahihi pehari embomeni avoeto Keriso ga tapa jiginu vasiri te ereto mihera, avoeto amo God na ungo hondate eto umo oenga ari sasapura te pehari te oreketo ungo umbuna.  
\v 6 Eto avoeto Keriso uhu i ta tihi jigihe mihia ainge dombo ungotena Ahihi ehaha humbuto Keriso ga tihi jigihe mihera eto ari avoembo God na ungotena humbuto Keriso ga kajueto jiginu vasiri te erena  
\v 7 amo ungotena osa ue Iesu Keriso na hondate asi uje isapamane ena avo embo tapa na eha eto ambota kiagora ena.  
\v 8-9 Avoeto ungo kogova amo ari ungotenau na ae rate embo na umo oenga ari sasapura ta orekari inono ke mane ara God na embo amuna God humota ere ua avo hondate eto ari sapura oreketo humbaguja amo God ta hande avoeto embo ta degi ikaguja.  
\v 10 Eto ungotena amo God ta ingeni hajire Iesu Keriso ga kajueto ari jajavotoho ara mahu sirikena avo ara ungotena ove ena.   
\s1 Keriso ga vahaita ereora.  
\p
\v 11 Eto ungo enda nei ta ingerekari embomeni ta degi ke erena ungo amo Judea embomeni hamo kakamba ari amina ungo hamo kakamba ae ke eagora ungota irari mahu avo hotembevujo.  
\v 12 Eto iji amite ungo Keriso ta javota horae avoeto God na siriketo humbari embomeni mane enda nei embora. Eto God na embomeni amita avo hondate asi oje ue noma kajena ke ai ta ungona horaera. Eto God ungota jota irae avoeto ungota degi ari javotoho puvuresuja avo ungo simba aera.  
\v 13 Te eha oroho amo Keriso na hamo amita na ungo ombuna avoeto ungo hoi ta iragova amina Iesu Keriso ta degi puvuto kajueto miheva.  
\v 14 Eto Judea embomeni te enda nei embomeni te mahu amo kitoho rate Keriso na hamo amita na hane timbenu irae enu peka ta humbunu seri kuru mine ara ue ere ova.  
\v 15 Eto Keriso na embo heriso javo oenga oenga avo humbuto amita jo ta embo vahai ara Judea ta ke pepeni neite neite amina andirari aravo bujeketo peka umbuna.  
\v 16 Eto Keriso ji atahu ta pehena amina kitoho irae enu embomeni heriso avo humbuto vahaita eto God ta degi ikena.  
\v 17 Avoeto erena amo Keriso na peka humbari ta duru javotoho enda hoi ta mihahera embomeni amita degi eto Judea embomeni auveto mihahera amita degi hande ena,  
\v 18 avoeto ungotena enda nei rete Judea rete amo Ahihi Otohu vahai amita sovera ari na God ta degi pari eagore ingioi amita jota pambagora.   
\p
\v 19 Avoeto ungo enda nei embomeni amo kitoho embo javo nei mane ra te God ta embomeni be amita jeka hoka vahaira.  
\v 20 Eto God ta bande Otohu amo amita embomeni ra, tutuvi peroveta te apostero na hurukari aita gerikari mihia eto ungo enda nei embomeni te tapa na bande amita pokuatahu ere ova, eto bande amita tutuvi vahai pajire be amo Iesu Keriso na ere ua.  
\v 21 Eto amina huruketo turi turi eto mihoi amita hamota Bada God na amita bande Otohu gerikeoi sovera eto peni ereua.  
\v 22 Eto ungote tapa vahaita Iesu ga kajueto gerikagova God ta Ahihi na jo aita iraguja.   
\c 3  
\s1 Paul na enda nei embomeni avoembo pure ena.  
\p
\v 1 Eto na Paul ungo enda nei embomeni ta degi Keriso ta ke hande one humbuto tipura ta gosukehere mihena, na ke ungota degi kaehena avoembo God ta degi pari ereona.  
\v 2 Eto ungo ingiheva amo God na ungota degi ari javotoho puvuroja hondate amita na pure erevi nau degi ta ikena.  
\v 3 Eto God na ari erevi aisuja amita ke amo mahu ae ingae rate nau degi ta harikehei ingito ungo ingova kaehena  
\v 4 avoeto humbuto eheketo kogue Keriso ta ke mahu ojikari amita ke susu deire avo kaehena avo humbuto eheketo kivujo  
\v 5 amita ke amo God na embo ta degi mahu ae ingae rate eha amo amita Ahihi Otohu na apostero te peroveta te ta degi harikehei ingera.  
\v 6 Ke amo erevira, amo Judea embomeni na oenga ae rate enda nei embomeni te tapa na God ta degi javotoho ari humbasora, amo embomeni na Iesu Keriso ta degi ari javotoho umbara oje ena avo Judea te enda nei embomeni te na hamo vahai visi vahai eto humbasora.   
\p
\v 7 Eto God na nau degi ta hande javotoho ikena amo amita sovera na amita duru javotoho hande ana amita pure embo umbuna.  
\v 8 Te na embo javote mane eto God ta embomeni tapa amita jo ta namo amo embo tehora te embomeni na Keriso ta degi ari javotoho be humbasora amita duru javotoho avo nane humbuto enda nei embomeni ta degi hande ana God na umbuna.  
\v 9 Eto God na daingeto embomeni oreketo humbuto tihi jigesuja amita ke mahu ojikari mihouva avo embo tapa na kiagora humbuto araha ereona. Eto uhu te enda te eto donda tapa ari God amina ke erevi mahu ojikena te  
\v 10 embo pepeni javote uhu i ta mihera amina kogue God ta ekalesia enda ta eha ere uhua aita God ta kiari pajire neite neite avo kiagora ere uhua.  
\v 11 Eto God na vasiri erevi aisuja amo mahu hotembena amo ungotenau Bada Iesu Keriso na ere ua erevira.  
\v 12 Avoeto ungotena humota ari na Iesu Keriso ga kajuari avoeto me kiae teho God ta degi horagora.  
\v 13 Eto na ungo avoembo osaga memenga kogue mihena avo hotembihe God toasi hotembavojo amo ungota degi ari javotoho puvuroja ereona.   
\s1 Keriso ta osa ari.  
\p
\v 14-15 Eto na ke erevi embo God Mamo, javo vahai embomeni tapa uhu ta eto enda ta amita javo ikerekari embo, amita tita ta paunge teteri eto humotepain eagona.  
\v 16 Eto God na amita usasa pajire be ai ta humbuto amita Ahihi na sovera ari ikau ungota hotembari jo ta sovera umbava God ta degi pari ereona.  
\v 17 Eto nei ungo humota ururovo Keriso na ungota jo amo irari bande amita ke ijie ai ta iroja pari ere ona.  
\v 18 Eto Keriso ai ta irirou ungote eto God ta embomeni tapa te amina Keriso ta osa ari pajire be rate heka doitokore avo ungona kiari haite avo pari ere ona.  
\v 19 Eto embo tapa na Keriso ta osa ari peni vahai avo tapa inono ta kiari inono ae rate ungota jo amo God ta Ahihi na eto God ta ari na enetaja pari ereona.   
\p
\v 20-21 Eto ungote God ta degi do humbasi penunu arote mo ikau humbasi hotembaro amo God ta sovera ungotenau jo ta pure ere ua avoeto dembeto ikari haitera avoeto ungote ekalesia ta eto Iesu Keriso ta jo ta mihie God daroho ta jakeka are, amen.   
\c 4  
\s1 Ekalesia ta hamo vahai ari.  
\p
\v 1 Eto na Bada ta pure embo avoeto tipura eto mihena nane ungona ava erena amo God na ungo ehara ta jage eto umbuna iji te daingeto irova ena aingeto irova erena,  
\v 2 amo embo javote ke ijie “Na na” mane aisova, sausau ereto hini kambari mane aisova. Eto namei ta ari nei eto ururou kito mane urumbasova te osa mine ara evujo.  
\v 3 Eto Ahihi Otohu ta peka na ungo ajeketo pundurari iragova avo ungota jo tapa na simba evujo.  
\v 4 Eto ekalesia neite neite irae rate ekalesia vahai eto Ahihi Otohu vahai eto God na ungo iji puvurou kiagova jage ena amo vahaira.  
\v 5 Eto Bada vahai, humota ari vahai, bapataito vahai,  
\v 6 eto God amo embomeni tapa ta Mamo donda tapa ta Bada avoeto donda tapa eto embo tapa ta jota mihie pure eaguja.   
\p
\v 7 Eto ungotena embo vahai vahai na Keriso hande ikari embo be amita degi Ahihi ta sovera ari oenga oenga hande eto umbera  
\v 8 amita ke amo einge kajari mihia, “Amina isoro eto dembeto i be ita vihito embomeni ta degi hande ikerekena,”  
\v 9 ke ainge mihia, eto Keriso na uhu i be ta vihina amita be amo Keriso na uhu i ta eto veto enda kovari jo ta vena.  
\v 10 Eto Keriso enda ta vena amina uhu i be ta vihito Ahihi amita na uhu te enda te tapa eneteto iraguja.  
\v 11 Eto Keriso na embomeni ta degi hande ikerekena amo nei apostero ara ikena nei peroveta ara ikena nei amo God ta ke hande ara ikena, nei God ta embomeni simba ara ikena eto nei embo ahe poekara ikena.  
\v 12 Eto hande ainge ikena amo God ta embomeni tapa na Keriso ta ke agi eto pure ue Keriso ta embomeni na ari jajavotoho ue pajirora ikena.  
\v 13 Avoeto ungotena na God ta Meni be avo kogue humota ue embomeni vahai eto pajito embo be eto Keriso ta hajire vahai aisora.  
\v 14 Eto ungotena meni isasaraho mane avoeto ahepoekari embo sapura puvuto embo kihi humbasi ke gamo poekasuja te ungote ai ta mane huhevasora  
\v 15 te ungotenau osa ari na ke be pere jigama ue Keriso ungotenau kihi humbari ke ijie ambo ambo ue ari amita na pajiresora.  
\v 16 Eto Keriso amo siro rate hamo uhu tapa amo ungotenamora. Eto ungotena osa mine ara ue pure eagora amo hamo ta vehu aingeko kaju ue pajiraguja.   
\s1 Keriso ta jo ta irari eha.  
\p
\v 17 Eto na Bada ta javota erena ungo God kiae embomeni amita ari avo ambo ambo avojo. Enana ta hotembari amo ke be mane  
\v 18 eto enana ta kiari amo mume ta mihera. Eto enana ta jo ngahia amina kiari irae avoeto enana God ta degi vasiri eha mane humbasora be ra.  
\v 19 Eto enana amo ari sasapura kaiketo asi uje isapamane eagora te me kiari avo irae ra.   
\p
\v 20 Eto Keriso ta ahe poekari ai ta amo ari sasapura ainge amo iraera  
\v 21 te ungo amita ambotani ta degi ahe poekehere ingihava amo Iesu ta ke be avo pere ingihava.  
\v 22 Avoeto ungota irari mahu amo bo tongopate aingekora houketo gosukevu irae ai. Amo ungota hamo ta irari mahu na uje sasapura amita na umo oenga sari uija.  
\v 23 Eto evu God ta Ahihi Otohu na au ungota hotembari jo eha ururou  
\v 24 ari eha bo eha aingeko asuketo irivujo. Eto ari eha aita amo God ta tombu hajire vahai ai ta amo ke be te otohu te avo embo na kiagora.   
\p
\v 25 Avoeto ke sokova tapa tovujo irae ai. Ungotena Keriso ta jo ta avoeto hamo visi vahai avoeto namei, Iesu ke be ari embo, amita degi ke be pere evujo.  
\v 26 Eto umo tumo ue kito amita tutumota ari sapura mane asoa te mume sihukae mihirou mahu iji te no tumo avo ejo irae ai.  
\v 27 Eto Satan na umo engekaguja na simba ejo.  
\v 28 Eto mahu pegene embo na ari avo toto ingeni amita na pure eto koro humbuhe ombari asari amita avo simba ue donda irae embomeni hondate aja evujo.  
\v 29 Eto isembari ta ke avo toto ke javotoho na pere deirami ijiro embo nei hondate aisuja avo pere evujo.  
\v 30 Eto ungo God ta toho amita hajire amo amita Ahihi Otohu ungota jo ta mihia avo kogue God na ungo vujekasuja iji puvuto ere hua avo ke be eagora avoeto ari deina eagove God ta Ahihi Otohu osaga kiaguja avo tovujo.  
\v 31 Amo jo memenga, ujeje sasapura, tumo sisire hini kambari boru jumbari, isembari ta ke avo pe te tovujo irae ururou  
\v 32 osa mine ara ue God na umo Keriso avoembo ari sasapura no avo hotembeto tona ainge dombo namei ta ari sasapura hotembeto tojo.   
\c 5  
\s1 Usasa ta irari.  
\p
\v 1 Eto ungo God ta osa ari meniundi avoeto God ta ari avo hamo eto evujo.  
\v 2 Eto Keriso na ungotena osa ue hamo amita avo God ta degi pene mune te avo ikihinu God na kito tunga javotoho ena avoeto ungota osa ari amina ungo tihi jigoja evujo.   
\p
\v 3 Eto ungo God ta embomeni avoeto tiha pahia, sesena sasapura uje neite neite amina ungota irari javotoho avoeto ke sasapura eremina ungota degi mane ereto pajiresuja.  
\v 4 Eto nei ke tongopa ganini sasapura ainge amo ungona mane jigama aisova te God ta degi osa jakeka ari ta ke avo pere evujo.  
\v 5 Eto ungo kogova amo tiha paiha embo eto ari sasapura ari embo eto donda uje isapamane ari embo (amo donda na amita god eaguja) eto embomeni aingeko amina Keriso ta tihi jigari ta mane horeto God ta degi hotari humbasora.  
\v 6 Eto God ta ke agi ae ue ari avo ari embo ta degi God na tumo pajire be aisuja, avoeto embo amuna ungo ari sapura ainge ava ke sokova na jo kajasuja embo amita ke mane ingesova te  
\v 7 embomeni ainge avo tovujo oenga tinheto irore.  
\v 8 Eto ungo mahu mume ta irari embomeni rate Bada ta embomeni ueva amina usasa ta horiheva, avoeto usasa ta embomeni ta ari humbuto mihirovo  
\v 9 usasa ai ta amo be javotoho ekasuja amo ke sokova ai ta irae, ke be ari eto javotoho ari ekehija avo hambasova  
\v 10 avoeto ari deirami avo Bada na kito tunga javotoho aisuja avo pere evujo.  
\v 11 Eto mume ta ari amo be ambu avoeto ari ainge mane aisova te tovujo. Eto ari sapura evu araha ta puvurou embomeni kiore.  
\v 12 Eto enana ta ari ojikari ta eagora amo me kiari ta ari avoeto amita ke ijie me kiaehera.  
\v 13 Eto ari tapa humbuto usasa ta iketo kiagora amo ari amita tombu hajire be avo kiagora.  
\v 14 Amo usasa amina eoi ari tapa usasa eaguja amita ke amo einge kajari mihia, “Umo evari embo, pehari ta eto erao Keriso na no hamo ta gainhiro usasa aisuja”. Ke ainge mihia  
\v 15 avoeto irari ungota avo simba evujo, ungo kiae kiae embomeni mane ra, ungo kiari embomeni ra, irivujo.  
\v 16 Eto iji eha sapura avoeto ari jajavotoho deirami aisova avo jombure evujo.  
\v 17 Eto ungo uha irae embomeni na arako avojo te Bada na ungo do avo uje ere uo avo jombure evujo.  
\v 18 Eto ungo jae indito kava aisova amina ungo sapura aisuja avoeto ari avo toto Ahihi Otohu na ungo tihi jigoja simba evujo.  
\v 19 Eto ‘Psalms’ God ta ke ta kajari mihia amite eto haveni ototohu amite amita ke humbuto ke mine ara ijie jo tapa na Bada jakeka ijie evujo.  
\v 20 Eto Bada Iesu Keriso ta javota donda tapa eto ari tapa avoeto God Mamo ta degi osa evujo.   
\s1 Ivu te ae te ta ke.  
\p
\v 21 Eto ungo Keriso Otohu ere ova avoeto agi mine ara evujo.  
\v 22 Eto ungo airi na Bada ta ke agi eagova ainge dombo ungota ipone ta ke agi evujo.  
\v 23 Eto Kerisona hamo amita na ekalesia orekena avoeto tihi jigaguja ainge dombo ungo ipone na airi tihi jigivujo.  
\v 24 Avoeto ekalesia na Keriso ta ke agi eaguja ainge dombo ungo airi na ipone ta ke agi inono ta evujo.  
\v 25 Eto ungo ipone ta degi erena, eto Keriso na ekalesia osa eto hamo amita avo ikihe pehena ainge dombo ungota airi osa evujo.  
\v 26 Eto Keriso na amita duru javotoho eto amita bapataito ari umo amina amita ekalesia egeto hande javotoho be God ta degi ikena.  
\v 27 Eto ainge ena amo amita ekalesia amo sago kiari javotoho be sapura tongopa tapa irae donda javotoho be avo nau hande ra ijie umbuna.  
\v 28 Eto embo na ae osa eaguja amo hamo amita avo osa eaguja avoeto ungo embo na hamo ungota osa eagova ainge dombo ungota airi osa ava erena.  
\v 29 Eto ungo kogova amo embo na hamo tohota avo uje ae ari iraerate embo tapa na totohota hamo osa ue indari indie simba eagora, eto ari ainge dombo Keriso na amita ekalesia simba eaguja.  
\v 30 Eto ungotena amo Keriso ta hamo amita utukoho hamo uhu ra.  
\v 31 Eto God ta ke kajari ta amo ke einge mihia, “Eto embo na avoembo amita emamo toto pambuto ae ga kajueto amiga visi vahai aisuja”  
\v 32 ainge mihia te na kogona amo Keriso te amita ekalesia te ta timu hatirari ke rate  
\v 33 avo pere mane rate ungo ipone na hamo ungota osa eagova ainge dombo airi osa ururovo airi na ipone humota aisora amita ke ra.   
\c 6  
\s1 Emone mamone te meniundi te ta ke  
\p
\v 1 Eto ungo meni isasaraho ungo Keriso ta toho avoeto emone mamone agi ari ta jaha mane aisova te agi aisova.  
\v 2 Eto God ta ke 10 Moses ta ikenu kajena ai ta ke vahai amo embo na agi ururou javotoho ari amita degi puvuroja God na oje ena amo erevira “No aja mama avo Otohu ue ke agi ejo” ke ainge mihia eto javotoho ari God na oje ena amo eingera  
\v 3 “Eto ke agi ururovo God na au irari javotoho ue iji koso enda ta iresova” ainge God na ijie oje ena.  
\v 4 Eto ungo emamo ta degi erena, amo ungota meniundi na ungota degi hini kambari eagora avo kaiketo mane isembasova te Keriso na embomeni ahe poekena ainge dombo ue oje kahihe ahe poekavo ari jajavotoho na pajirore.   
\s1 Pure mamone te pure embomeni te ta ke  
\p
\v 5 Eto ungo embo nei ta ke agi ue pure ari embomeni ta degi erena amo ungota pure mamone amo Otohu ue ungota jo te tapa na enana ta ke agi evujo, amo ungona Keriso ta ke agi eagova ainge inono ta enana ta ke agi evujo.  
\v 6 Eto enana na ungo koguroro jakeka ari ta pure mane aisova te ungo Keriso ta pure ari embopo avoeto God ta uje avo jo tapa na eagova ainge dombo enana ta ke agi evujo.  
\v 7 Eto jo tapa na pure ngahia asi ue embo avoembo mane aisova te Bada avoembo asi hotembevujo.  
\v 8 Eto ungo kogova amo embo nei ta pure embo rete tohota pure embo re amo Bada na ari jajavotoho tapa kogue mine inono ta ikau humbasora.  
\v 9 Eto ungo pure tihi jigirikari embopo ta degi ke erena amo ari javotoho ainge amina ungota ke agi ari embopo ta degi evujo. Eto enana tasi ke mane aisova te tihi jigari embo enana ta eto ungota amo uhu i ta mihia amita tihi ta amo embo nei peni embo nei isapa ainge manera te embo tapa inono inonora.   
\s1 Ari sasapura ta degi isoro evujo.  
\p
\v 10 Eto ke tutumota erena amo Bada ta sovera humbuto irivujo.  
\v 11 Eto Satan ta ke gamo ta degi isoro asi Bada ta ki emi te isoro donda te humbuto asevujo.  
\v 12 Amo ungotena embo visi te amita degi isoro ae rate mume ta tihi jigirikari Ahihi neite neite eto mume ta sovera neite neite amo Satan ta isoro ari embopo Ahihi sasapura ta irari degi ta isoro eagora amita degi isoro ereora  
\v 13 avoeto God ta ki emi tapa humbuto asuketo nununga evujo. Eto ari sapura puvuresuja iji te amo isoro ue mane veasoa te sovera ari humbuto heteto iresova.  
\v 14 Avoeto isoro embo na pupuri tigito eaguja aingeko God ta ke be jigito heteto irivujo, eto ungota jenge ta asukari amo javotoho ari na oreka aisuja.  
\v 15 Eto ungota utu goru amo God ta peka ta duru javotoho avo hembuhe hande asi uje evujo.  
\v 16 Eto God humota ari amo beha aingeko ungo oreka ururou Satan ta ki vevere te amina ikau puvuto ungo mane kajaro evekasova.  
\v 17 Eto ungo God na oreketo humbasuja amo ungota siro kope ainge hotembevujo eto God ta ke Ahihi Otohu na ikasuja amo isoro asivo aingeko avo ikau humbuto jigivujo.  
\v 18 Eto iji tapa ari tapa avoembo pari evujo amo Ahihi ta sovera na kaiketo pari ue siro pure eto God ta embomeni tapa hotembihe enana embo pari evujo.  
\v 19 Eto God na nau degi ta ke ikau ingito amita duru javotoho mahu ojikari avo joru ae ue embo ta degi hande ana pari evujo.  
\v 20 Amo na amita ke hande ari embo ‘Chain’ na tigere mihena te na embo joru ae ue sovera ari humbuto ke hande ana God na pari avo uje ere ua.   
\s1 Pekari ta ke  
\p
\v 21 Eto Bada ta ke agi ari embo javotoho ungotenau namei Tychicus amina ungota degi pambuto ke nau eto ari nau na do ereona amo amina au ingesova  
\v 22 avoeto ungota degi ikano pambuto dagota ke avo au ingito sovera ari humbasova.   
\p
\v 23 Eto God Mamo te Bada Iesu Keriso te na ungo namei kamei ekalesia tapa ta degi pekari te osa ari te humota ari te avo ikaro humbasova  
\v 24 eto jo tapa na Bada Iesu Keriso osa eagora embomeni amita degi God ta hondate ari iresuja.